ភ្នំពេញ ៖ នេះបើយោងតាមប្រភពព័ត៌មានពីមន្ដ្រីសាលាដំបូងរាជធានីភ្នំពេញនៅព្រឹកថ្ងៃទី២៥ ខែមករា ឆ្នាំ២០១៩ បានបង្ហើបឲ្យដឹងថា ថៅកែហាងកែសម្ផស្ស (ឌែម៉ូគ្លីនិក) និងអ្នកគ្រូពេទ្យវះកាត់ ត្រូវបានចៅក្រមតុលាការក្រុងភ្នំពេញ សម្រេចអនុញ្ញាតឲ្យនៅក្រៅឃុំជា បណ្តោះអាសន្នហើយនៅថ្ងៃទី២៤ ខែមករា ឆ្នាំ២០១៩ នៅវេលា ម៉ោង៧ និង ៣៥នាទីយប់ ។
សូមរំលឹកផងដែរ ថៅកែហាងកែសម្ផស្ស (ឌែម៉ូគ្លីនិក) និង អ្នកគ្រូពេទ្យវះកាត់ ត្រូវចៅក្រមស៊ើបសួរតុលាការក្រុងភ្នំពេញលោក ម៉ុង មុនី្នសោភា សម្រេចចេញដីកា បង្គាប់ឲ្យឃុំខ្លួនដាក់ ពន្ធនាគារPJ បណ្តោះអាសន្ន កាលពី រសៀលថ្ងៃទី០៥ ខែមករា ឆ្នាំ២០១៩។
ថៅកែហាងកែសម្ផស្សឌែម៉ូគ្លីនិកមានឈ្មោះហូវ ដាណេ និង គ្រូពេទ្យវះកាត់ ឈ្មោះពៅ ស៊ីណាត ត្រូវបានលោក សឿន មុនីរ័ត្ន ព្រះរាជអាជ្ញារងអម តុលាការក្រុងភ្នំពេញចោទប្រកាន់ពីបទ៖
-ប៉ះពាល់ដល់សិទ្ធខាងរូបភាពនៃបុគ្គលតាមមាត្រា ៣០២នៃក្រមព្រហ្មទណ្ឌ
-កំហែងយកតាមមាត្រា ៣៦៣និងមាត្រា៣៦៤នៃក្រមព្រហ្មទណ្ឌ
-ការគំរាមកំហែងហែកកេរ្តិ៍ តាមមាត្រា ២៧២និងមាត្រា២៧៣នៃក្រមព្រហ្មទណ្ឌ បន្ទាប់ពីកម្លាំងកងរាជអាវុធហត្ថលើផ្ទៃប្រទេសឃាត់ខ្លួន. និង. បញ្ជូនទៅកាន់អយ្យការអមសាលាដំបូងរាជធានីភ្នំពេញហើយ ដើម្បីចាត់ ការបន្តទៅតាមច្បាប់កាលពីព្រឹកថ្ងៃទី០៤ មករា ឆ្នាំ២០១៩ ៕
ភ្នំពេញ ៖ លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពល បានបញ្ជាក់កាលពីដើមសប្តាហ៍នេះថា ក្រុមហ៊ុនរ៉ែមាសមានមូលដ្ឋាននៅប្រទេស ឥណ្ឌា Mesco Gold ដែលទទួលបានសិទ្ធិធ្វើអាជីវកម្មរ៉ែមាសនៅកម្ពុជា គ្រោង ចាប់ផ្តើមការចម្រាញ់រ៉ែមាសនៅកម្ពុជាជាលើកដំបូងនៅចុងឆ្នាំនេះ ខណៈក្រុមហ៊ុនកំពុងដំឡើងផលិតកម្មចម្រាញ់រ៉ែមាសនៅគម្រោងរ៉ែមាស ភូមិស៊ីយ៉ារុង ក្នុងខេត្តរតនគិរី។
លោក យស មុនីរ៉ាត់ Mesco Gold (Cambodia) បានទទួលការអនុញ្ញាតដើម្បីប្រតិបត្តិការអាជីវកម្ម រួមមានការវាយតម្លៃលើផលប៉ះពាល់បរិស្ថាន និងសង្គម ដោយក្រសួងបរិស្ថាន ទទួលបានអាជ្ញាប័ណ្ណអាជីវកម្មរ៉ែពាណិជ្ជកម្ម និងទទួលបានការអនុម័តគម្រោងវិនិយោគមានលក្ខណសម្បត្តិគ្រប់គ្រាន់ ពីក្រុមប្រឹក្សាអភិវឌ្ឍន៍កម្ពុជា។
លោកបន្តថា ការវាយតម្លៃបរិស្ថាន និងផលប៉ះពាល់សង្គម (ESIA) របស់ក្រុមហ៊ុន Mesco គ្របដណ្ដប់លើផ្ទៃដីសរុប ១២ គីឡូម៉ែត្រក្រឡា ប៉ុន្តែអាជ្ញាប័ណ្ណរុករករ៉ែគ្របដណ្ដប់លើការផលិតលើផ្ទៃដី ១គីឡូម៉ែត្រក្រឡាប៉ុណ្ណោះ។
គួរជម្រាបថា Mesco Gold (Cambodia) បានទិញសិទ្ធិដើម្បីអភិវឌ្ឍអណ្ដូងរ៉ែ និងរុករករ៉ែនៅភូមិស៊ីយ៉ារុងពីក្រុមហ៊ុនរុករករ៉ែរបស់ប្រទេស កាណាដា Angkor Gold Corp កាលពីឆ្នាំ ២០១៣ ក្នុងកិច្ចព្រមព្រៀងលក់មានតម្លៃ ១,២ លានដុល្លារ។ ក្រុមហ៊ុន Angkor Gold Corp ប៉ាន់ប្រមាណថា រ៉ែនៅក្រោមដីនៅក្នុងភូមិស៊ីយ៉ារុង ខេត្តរតនគិរី ទាញយករ៉ែមាសរហូតដល់ ១០ ឆ្នាំ ដែលអាចផលិតមាសបាន ១០ ០០០ អោសន៍ក្នុងមួយឆ្នាំ៕
លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងលើកទឹកចិត្តដល់បុគ្គលិកមន្ត្រីរាជការ ឱ្យចូល រួមគាំទ្រ និងប្រើប្រាស់ បណ្ណសមាជិកបេឡាជាតិរបបសន្ដិសុខសង្កម (ប.ស.ស) រាល់ពេលទៅទទួលសេវាព្យាបាល និងថែទាំវេជ្ជសាស្ត្រផ្សេងៗ នៅតាមមន្ទីរពេទ្យរដ្ឋ ពី ព្រោះថា នេះជាអត្ថប្រយោជន៍ ដែលមន្ត្រីគ្រប់រូបត្រូវទទួលបាន។ លោក បានថ្លែងបែបនេះ ក្នុងពិធីផ្សព្វផ្សាយ គោលនយោបាយអនុវត្តរបបសន្តិសុខសង្គមរបស់បេឡាជាតិរបបសន្តិសុខសង្គម កាល ពីថ្ងៃទី២៣ ខែមករា ឆ្នាំ២០១៩។
គួរជម្រាបថា ការអនុវត្តន៍របបថែទាំសុខភាពសម្រាប់មន្ត្រីសាធារណៈ អតីតមន្ត្រីរាជការ និងអតីត យុទ្ធជន ដែលរដ្ឋាភិបាល ជាអ្នកទទួលបន្ទុកបង់វិភាគទានជំនួស គឺចាប់ផើមតាំងពីឆ្នាំ២០១៨ និង បន្តរហូតដល់ឆ្នាំ២០២០។បន្ថែមពីលើនេះ រាជរដ្ឋាភិបាលបានបន្តយកចិត្តទុកដាក់ និងតម្កល់ឧត្តម ប្រយោជន៍មន្ត្រីសាធារណៈ ដោយសន្យាដាក់ឱ្យអនុវត្តន៍បន្ថែមមួយទៀត នូវរបបហានិភ័យការងារសម្រាប់មន្ត្រីសាធារណៈ នៅឆ្នាំ២០១៩ នេះ៕
ខេត្តក្រចេះ ៖ នៅថ្ងៃទី២៤ ខែមករា ឆ្នាំ២០១៩ មន្ត្រីសាខាកាំកុងត្រូលខេត្តក្រចេះ និងមន្ត្រីមកពី មន្ទីរពាក់ព័ន្ធក្នុងខេត្ត បានសហការចុះត្រួតពិនិត្យផលិតផលម្ហូបអាហារនៅក្នុងផ្សារស្នួល ស្រុក ស្នួល ខេត្តក្រចេះ។
មន្ត្រីជំនាញ បានរកឃើញភាពមិនប្រក្រតីនៅលើម្ហូបអាហារ មានដូចជា ៖ ត្រីបបែលក្រៀមចំនួន ០,៥ គីឡូក្រាម ដែលមានផ្ទុកសារធាតុគីមីហាមឃាត់បូរ៉ាក់។ ម្ទេសដៃនាង មើមខ្ទឹមស ខ្ទឹមក្រហម និងស្លឹកខ្ទឹម ដែលមានផ្ទុកសារធាតុសំណល់គីមីកសិកម្ម។ បន្ទាប់មក មន្ត្រីជំនាញបានធ្វើកំណត់ ហេតុដកហូត និងយកមកកម្ទេចចោលភ្លាមៗ ផងដែរ។
ក្នុងឱកាសនោះ មន្ត្រីសាខាកាំកុងត្រូល បានធ្វើការណែនាំដល់អាជីវករ ស្តីពីការគ្រប់គ្រងគុណភាព សុវត្ថិភាព លើផលិតផលទំនិញ និងសេវាជៀសវាងបង្កផលប៉ះពាល់ដល់សុខភាពប្រជាពលរដ្ឋ និង អាចប្រឈមចំពោះមុខច្បាប់ថែមទៀត៕
ភ្នំពេញ ៖ នៅព្រឹកថ្ងៃសុក្រ ទី២៥ ខែមករា ឆ្នាំ២០១៩ នេះ សម្តេចតេជោ ហ៊ុន សែន នឹងអញ្ជើញ ទៅកាន់ខេត្តកំពត ដើម្បបន្តជួបសំណេះសំណាលជាមួយកម្មករ កម្មការិនី និយោជិតប្រមាណ ១១.៧៣៨នាក់ មកពីរោងចក្រ សហគ្រាសចំនួន ១២។
នេះ គឺជាជំនួបលើកទី២ ហើយសម្រាប់ឆ្នាំ២០១៩ ដែលជាពិធីជួបសំណេះសំណាល រវាងសម្តេច តេជោ ហ៊ុន សែន និងកម្មករ និយោជិត និងបានប្រារព្ធធ្វើឡើងនៅរោងចក្រ POU CHEN Cambodia CO., LTD ស្ថិតនៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្ត កំពត៕
ភ្នំពេញ ៖ នេះជាហេតុការណ៍មួយដ៏គួរអោយរន្ធត់ បណ្តោលអោយបុរសជិះម៉ូតូដឹកសាំងម្នាក់ ត្រូវភ្លើងឆាបឆេះរហូតដល់ស្លាប់ ខណៈកំពុងជិះម៉ូតូដឹកសាំង ហើយបានដួលម៉ូតូ ខ្ទាតសាំងផ្ទុះឆេះយ៉ាងសន្ធោសន្ធៅ។
ហេតុការណ៏ដ៏រន្ធត់នេះបានកើតឡើងកាលពីវេលាម៉ោង០៩និង៤០នាទីព្រឹក ថ្ងៃទី២៤ ខែមករា ឆ្នាំ២០១៩ ស្ថិតនៅចំនុចមុខហាងកាហ្វេអាមេហ្សូនផ្លូវលេខ៣៣៧កែងនឹងផ្លូវលេខ៥២៨ សង្កាត់ បឹងកក់ទី១ ខណ្ឌទួលគោក រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឱ្យដឹងថាមុនពេលកើតហេតុគេឃើញបុរសរងគ្រោះខាងលើជិះម៉ូតូដឹកប្រេងសាំងចំនួន៤កានបើកបរក្នុងល្បឿនលឿនពីទិសដៅពីកើតទៅលិចលុះដល់ចំណុចកើតហេតុបានគេចពីរ៉ឺម៉កមួយគ្រឿងឆ្លងផ្លូវនៅខាងមុខ ហើយបានដួលបែកប៊ីដុងសាំង ខ្ទាតសាំងប៉ះបង្គោលភ្លើង និងរថយន្តលុចស៊ិស ដែលចតនៅលើចញ្ចើមផ្លូវបង្កឱ្យចេញជាអណ្តាតភ្លើងយ៉ាងខ្មួលខ្មាញ់ធ្វើឱ្យបុរសខាងលើឈ្លក់ផ្សែងភ្លើងដួលឆេះខ្លោចស្លាប់ភ្លាមៗយ៉ាងអណោចអធម និងរាលដាលឆេះរថយន្តលុចស៊ិសមួយគ្រឿង និងប្រអប់បង្គោលភ្លើងរបស់ EDC ជាច្រើនប្រអប់។
ភ្លាមៗនោដែរក៏មានរថយន្តពន្លត់អគ្គីភ័យចំនួន៤គ្រឿង ចេញអន្តរគមន៍បាញ់ពន្លត់អស់មួយគ្រឿង ដើម្បីកុំឱ្យឆេះរាលដាលដល់ផ្ទះប្រជារដ្ឋដែលនៅក្បែរកន្លែងកើតហេតុ ឱ្យរលត់ទៅវិញជាស្ថាពរ នៅវេលាម៉ោង១០និង ០០នាទី ព្រឹកថ្ងៃដដែល។
ចំណែកសពត្រូវបានរថយន្តដឹកសពដឹកយកទៅតម្កល់ទុកនៅវត្តទឹកថ្លា ដើម្បីប្រគល់ទៅឱ្យក្រុមគ្រួសារធ្វើបុណ្យតាមប្រពៃណី៕
ភ្នំពេញ ៖ អភិបាលរាជធានីភ្នំពេញ លោក ឃួង ស្រេង បានលើកឡើងថា ក្រោយពេលផ្លូវ ក្រវាត់ក្រុងទី៣សាងសង់រួចរាល់នៅកំលុងឆ្នាំ២០២១ នឹង លែងឱ្យរថយន្តកុងតឺន័រ ឬរថយន្ត ធំៗចូលរាជធានីភ្នំពេញទៀតហើយ។ លោកអភិបាលរាជធានីភ្នំពេញ លើកទឹកចិត្ត ឱ្យថៅកែរោងចក្រ សហ គ្រាសទាំងអស់ ពិចារណាយករោងចក្រ សហគ្រាស ឬឃ្លាំងរបស់ ខ្លួនទៅ ដាក់នៅតាមបណ្តោយក្រវាត់ក្រុងទី៣នេះវិញ ដើម្បីសម្រួលការដឹកជញ្ជូន ទំនិញ។
លោក ឃួង ស្រេង បានបញ្ជាក់ឱ្យដឹងកាលពីរសៀលថ្ងៃទី២២ ខែមករា ឆ្នាំ២០១៩ថា ផ្លូវក្រវាត់ក្រុងទី៣ បានបើកការដ្ឋានសាងសង់កាលពីថ្ងៃទី១៤ ខែមករា ឆ្នាំ២០១៩កន្លងទៅថ្មីៗនេះ ក្រោមអធិបតីភាពសម្តេច ហ៊ុន សែន នាយករដ្ឋមន្ត្រី។ ផ្លូវនេះ បម្រើប្រយោជន៍ធំបំផុត គឺបញ្ចៀសចរាចរណ៍ ក្នុង រាជធានីភ្នំពេញ និងជាផ្លូវយុទ្ធសាស្ត្រដ៏សំខាន់មួយក្នុងការដឹកជញ្ជូនតភ្ជាប់ពីបណ្តាខេត្តនានាមករាជធានីភ្នំពេញ ហើយផ្លូវនេះត្រូវ ជាមួយគ្នានេះ លោកអភិបាលបាន លើក ឡើងថា ក្រោយពេលផ្លូវក្រវាត់ក្រុងទី៣ សាងសង់រួចរាល់នៅអំឡុងឆ្នាំ២០២១ នឹងលែងឱ្យរថយន្តកុងតឺន័រ ឬរថយន្តធំៗ ចូលរាជធានីភ្នំពេញទៀតហើយ។
លោក ឃួង ស្រេង លើកឡើងថា ផ្លូវនេះ មានទំហំទទឹង ២៧ម៉ែត្រ សម្រាប់ ទីប្រជុំជន ហើយសម្រាប់ក្រៅ ទីប្រជុំជន វិញមានទំហំទទឹងផ្លូវ ២៥ម៉ែត្រ។ ផ្លូវនេះនឹងមានដាក់អំពូលបំភ្លឺផ្លូវសម្រាប់ កំណាត់ផ្លូវក្នុងក្រុង និងដើម ឈើ លម្អសម្រាប់កំណាត់ផ្លូវក្រៅក្រុង។ ផ្លូវក្រវាត់ក្រុងទី៣ នឹងមានសាងសង់ ស្ពានអាកាសឆ្លងកាត់ចំនួន ០៤កន្លែង (ឆ្លងកាត់ផ្លូវជាតិលេខ៤ លេខ៣ លេខ ២ និងលេខ២១) ប្រវែងសរុប ១០០០ម៉ែត្រ។
គួរជម្រាបថា ផ្លូវក្រវាត់ក្រុងខ្សែទី៣ (ផ្លូវជាតិលេខ៤-ផ្លូវជាតិលេខ១) ស្ថិតនៅ ក្នុង ភូមិសាស្ត្ររាជធានីភ្នំពេញ និងខេត្តកណ្តាល ដែលមានប្រវែងសរុបជិត ៥៣គីឡូម៉ែត្រ។ ក្នុងនោះឆ្លងកាត់ភូមិសាស្រ្តរាជធានីភ្នំពេញជាង១៥គីឡូម៉ែត្រ និងឆ្លងកាត់ភូមិសាស្រ្តខេត្តកណ្តាលប្រវែងជិត ៣៨គីឡូម៉ែត្រ ដែលមាន ចំណុចចាប់ផ្តើមពីគីឡូម៉ែត្រ ១៤+១០៥ នៃផ្លូវជាតិលេខ៤ និងចំណុចចុង បញ្ចប់នៅគីឡូម៉ែត្រ ២៤+៨៤០ នៃផ្លូវជាតិលេខ១។
ទន្ទឹមនឹងនោះ ក៏មានការសាងសង់ស្ពានឆ្លងកាត់ទន្លេបាសាក់០២កន្លែង នៅ កោះអន្លង់ចិន ដែលមានប្រវែងសរុប ៩៩៦ម៉ែត្រ ក្នុងនោះស្ពានទន្លេ បាសាក់ ខាងកើតប្រវែង ៦៣០ម៉ែត្រ និងស្ពានទន្លេបាសាក់ខាងលិច ប្រវែង៣៦៦ ម៉ែត្រ។ សាងសង់ស្ពានមធ្យម និងខ្លីចំនួន ០៦កន្លែង និងលូគ្រប់ប្រភេទ ១១៣កន្លែង។
សូមបញ្ជាក់ថា គម្រោងសាងសង់ផ្លូវនេះចំណាយថវិកាសរុបប្រមាណ ២៧៣លានដុល្លារ ដែលជាហិរញ្ញប្បទានសម្បទានពីរដ្ឋាភិបាលចិន ហើយ រាជរដ្ឋាភិបាលកម្ពុជា ចូលរួមថវិកាបដិភាគសម្រាប់ ការដោះស្រាយ ផល ប៉ះពាល់ ការបោសសម្អាតមីន និងយុទ្ធភណ្ឌមិនទាន់ផ្ទុះជាដើម។ ផ្លូវដែល ជាសរសៃឈាមសេដ្ឋកិច្ចដ៏សំខាន់មួយខ្សែនេះ នឹងប្រើរយៈពេល សាង សង់ចំនួន ៤២ខែ គ្រោងបញ្ចប់នៅខែធ្នូ ឆ្នាំ២០២១៕ ប្រភព ៖ AKP
ភ្នំពេញ ៖ លើកឡើងក្នុងសន្និបាតបូកសរុបលទ្ធផលការងារដែលសម្រេចបានក្នុងអាណត្តិទី៥នៃរាជរដ្ឋាភិបាលកម្ពុជា និងលើកទិសដៅការងារសម្រាប់អាណត្តិទី៦ របស់អាជ្ញាធរអគ្គិសនី កម្ពុជា នាព្រឹកថ្ងៃទី២៣ មករានេះ ប្រធានអាជ្ញាធរអគ្គិសនីកម្ពុជា លោក យឹម វិសិដ្ឋ បានឲ្យដឹងថា បរិមាណអគ្គិសនីដែលកម្ពុជានាំចូលពីប្រទេសជិតខាងបានថយចុះពី ៤០,០៦% នៅឆ្នាំ២០១៤ មកនៅត្រឹម១៤,៥៥% នៅឆ្នាំ២០១៨ ហើយថា នៅក្នុងប្រព័ន្ធផ្គត់ផ្គង់អគ្គិសនីរបស់កម្ពុជា បច្ចុប្បន្ន ប្រភពអគ្គិសនីដែលយើងមាន និងអាចប្រើប្រាស់បានមាន២ប្រភេទគឺ ប្រភព អគ្គិសនីដែលអភិវឌ្ឍក្នុងស្រុក និងប្រភពអគ្គិសនីដែលទិញពីប្រទេសជិតខាង។
លោក យឹម វិសិដ្ឋ បានបន្តថា ចំពោះប្រភពអគ្គិសនីដែលបានអភិវឌ្ឍក្នុងស្រុក សំរាប់អាណត្តិទី៥ នៃរាជរដ្ឋាភិបាលកន្លងមកយើងបានដាក់ឲ្យដំណើរការប្រភពអគ្គិសនីថ្មីៗ បន្ថែមសរុបចំនួន ១០៩៩.២ មេហ្កាវ៉ាត់ ជាមួយនឹងការបញ្ឈប់ដំណើរការប្រភពអគ្គិសនីប្រើ ប្រេងខ្មៅចំនួន ៥២.៧ មេហ្កាវ៉ាត់ និងលុបចោលការផលិតអគ្គិសនីប្រើម៉ាស៊ីនម៉ាស៊ូតតូចៗ តាមតំបន់នានាចំនួន ៣៦.២៣ មេហ្កាវ៉ាត់ ធ្វើឲ្យអនុភាពសរុបនៃប្រភពអគ្គិសនីក្នុងស្រុកបាន កើនឡើងពី ១០២៥.១៩ មេហ្កាវ៉ាត់ នៅចុងឆ្នាំ២០១៤ មក ២២០៧.៧៦ មេហ្កាវ៉ាត់ នៅចុង ឆ្នាំ២០១៨ គឺកើនឡើង ២.១៥ដង។ ដោយឡែកបរិមាណថាមពលអគ្គិសនីដែលកម្ពុជាបាន ប្រើប្រាស់ចេញពីប្រភពអគ្គិសនីដែលមានខាងលើបានកើនឡើងពី ៤៨៧៣.០៧ លានគីឡូ វ៉ាត់ម៉ោង នៅឆ្នាំ២០១៤ មក ៨៥,៤៥% នៅឆ្នាំ២០១៨ ធ្វើឲ្យបរិមាណអគ្គិសនីដែលកម្ពុជានាំ ចូលពីប្រទេសជិតខាងបានថយចុះពី ៤០,០៦% នៅឆ្នាំ២០១៤ មកនៅត្រឹម ១៤,៥៥% នៅ ឆ្នាំ២០១៨។
រដ្ឋមន្ត្រីក្រសួងរ៉ែ និងថាមពល លោក ស៊ុយ សែម មានប្រសាសន៍ថា គោលដៅទី១ នៃការអភិវឌ្ឍប្រព័ន្ធសម្រាប់កម្ពុជា គឺការអភិវឌ្ឍ ប្រភពអគ្គិសនីជាបន្តបន្ទាប់ ដើម្បីធ្វើយ៉ាង ណាឲ្យកម្ពុជាមានខ្សែបញ្ជូនអគ្គិសនីធំៗ និងអនុស្ថានីយកាន់តែច្រើនតភ្ជាប់ការផ្គត់ផ្គង់អគ្គិស នីទូទាំងប្រទេស និងអាចប្រទាក់គ្នាកាន់តែរឹងមាំ ពង្រឹងស្ថិរភាពផ្គត់ផ្គង់ឲ្យកាន់តែខ្ពស់ក្លាយជា ឆ្អឹងខ្នងនៃការផ្គត់ផ្គង់ដែលប្រមូលផ្តុំប្រភពអគ្គិសនីដែលបានអភិវឌ្ឍទាំងអស់បញ្ចូលគ្នា រួចធ្វើ ការបែងចែក និងបញ្ជូនល្បាយប្រភពអគ្គិនីទៅឲ្យអនុស្ថានីយតាមបណ្តារាជធានី/ខេត្តនីមួយៗ ហើយថា ជាមួយនឹងការអភិវឌ្ឍប្រភពអគ្គិសនី និងប្រព័ន្ធបណ្តាញជាតិខាងលើ យើងក៏ត្រូវ ធ្វើការអភិវឌ្ឍបណ្តាញបញ្ជូនរងដើម្បីបញ្ជូនប្រភពអគ្គិសនីពីអនុបណ្តាញជាតិទៅឲ្យតំបន់ ចែកចាយនានា ដែលជាអ្នកចែកចាយតាមតំបន់ចែកចាយនីមួយៗទាំងរដ្ឋ និងទាំងឯកជន ត្រូវមានកាតព្វកិច្ចធ្វើការអភិវឌ្ឍបណ្តាញចែកចាយអគ្គិសនីឲ្យបានគ្រប់ភូមិក្នុងតំបន់ចែកចាយ របស់ខ្លួន ដើម្បីអាចផ្គត់ផ្គង់អគ្គិសនីរាយឲ្យគ្រប់អ្នកប្រើប្រាស់ក្នុងតំបន់របស់ខ្លួន ដើម្បីធានាថា គ្រប់ភូមិទាំងអស់ក្នុងប្រទេសកម្ពុជាមានអគ្គិសនីប្រើប្រាស់ត្រឹមឆ្នាំ២០២០៕
ភ្នំពេញ ៖ បើតាមសេចក្ដីសម្រេចក្រុង ស្រុក ខណ្ឌ ចំនួន៦ថ្មីនោះរួមមាន៖
*ទី១៖ ខណ្ឌបឹងកេងកង (រាជធានីភ្នំពេញ)
*ទី២៖ ខណ្ឌកំបូល (រាជធានីភ្នំពេញ)
*ទី៣៖ ក្រុងកោះរ៉ុង (ខេត្តព្រះសីហនុ)
*ទី៤៖ ស្រុកតាំងគោក (ខេត្តកំពង់ធំ)
*ទី៥៖ ស្រុកតាលោសែនជ័យ (ខេត្តពោធិ៍សាត់)
*ទី៦៖ ស្រុកបុរីអូរស្វាយសែនជ័យ (ខេត្តស្ទឹងត្រែង)។
ជាមួយគ្នានេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏បានដាក់សំណើរជូនសម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា ដើម្បីពិនិត្យ និងសម្រេចលើការ កំណត់ចំនួនគណៈអភិបាលក្រុង ស្រុក ខណ្ឌ ផងដែរ។
ក្រសួងមហាផ្ទៃ ស្នើសុំកំណត់ថា ក្នុងមួយក្រុង ស្រុក ខណ្ឌថ្មីនេះ មានចំនួនគណៈអភិបាល ៥នាក់៕
ភ្នំពេញ ៖ សេវាកម្មជួលរថយន្ត ជួលគ្រឿងចក្រកសិកម្ម គ្រឿងចក្រក្នុងវិស័យសំណង់ ត្រូវបាន ក្រុមហ៊ុនក្នុងស្រុកមួយ នាំចូលពីសហរដ្ឋអាមេរិក ដើម្បីសម្រួលដល់វិនិយោគិនក្នុងស្រុក និងក្រៅស្រុកដែលកំពុងដំណើរការក្នុងប្រទេសកម្ពុជា។
លោក ងន សាំង អគ្គនាយកក្រុមហ៊ុន អ អិម អេ ខេមបូឌា មានប្រសាសន៍ក្នុងកិច្ចសម្ភាសន៍មួយ នៅពិធីប្រកាសដំណើរការសេវាកម្មជួលនេះនៅកម្ពុជា ថា ដោយមើលឃើញថា សេវាកម្មជួលនៅក្នុងប្រទេសកម្ពុជា ហាក់មានកម្រិតទាបនៅឡើយ ទើបក្រុមហ៊ុន អ អិម អេខេមបូឌា បាននាំសិទ្ធិសេវាកម្មជួលរបស់ Avis Budget មកកាន់ប្រទេសកម្ពុជា ដោយបន្ថែមការជួលទៅលើរថយន្តសម្រាប់ធ្វើដំណើរ រថយន្តដឹកទំនិញធំធុនតូច និងធុនធំ ដូចជារថយន្តដឹកប្រេង គ្រឿងចក្រកសិកម្ម គ្រឿងចក្រសម្រាប់លើកដាក់ទំនិញក្នុងឃ្លាំង ក៏ដូចជាគ្រឿងចក្រ ក្នុងវិស័យសំណង់ និងឧបករណ៍គ្រឿងចក្រជាច្រើនទៀត ។
លោកបន្តថា ការបើកសេវាកម្មទាំងនេះ គឺជួយដល់អ្នកអភិវឌ្ឍន៍ក្នុងប្រទេស ក្នុងការកាត់បន្ថយនូវថ្លៃដើមផងដែរ ។ ជាក់ស្ដែងគ្រឿងចក្រក្នុងវិស័យសំណង់នីមួយៗ មានតម្លៃខ្ពស់ណាស់ ហើយបើសិនជាគាត់ត្រូវការទិញប្រើប្រាស់ថវិកាផ្ទាល់ខ្លួន នឹងធ្វើអោយគាត់បន្ថែមការចំណាយទៅលើការវិនិយោគក្នុងគម្រោង ក៏ប៉ុន្តែបើសិនជាគាត់ជួលគ្រឿងចក្រទាំងនោះទៅប្រើប្រាស់ពេលគម្រោងចប់ អាចយកត្រលប់មកវិញ ដោយអស់ថ្លៃដើមតិចជាងរបស់ផ្ទាល់ខ្លួន ។
លោកបន្ថែមថា នៅក្នុងប្រទេសកម្ពុជា សេវាកម្មបែបនេះ គឺនៅមានកម្រិតនៅឡើយ ហើយក៏កំពុងដើរក្រោយប្រទេសរីកចម្រើនលើពិភពលោកផងដែរ ដូច្នេះ ការនាំចូលមកនេះ លោកសង្ឃឹមថា នឹងជួយអភិវឌ្ឍន៍សេដ្ឋកិច្ច និងដំណើរការសាងសង់លើវិស័យសំណង់ អភិវឌ្ឍន៍ វិស័យកសិកម្ម និងជួយដល់ធុរជនដែលកំពុងស្វែងរករថយន្តសម្រាប់ប្រើប្រាស់ក្នុងរយៈពេលខ្លីផងដែរ ។
លោកបញ្ជាក់ថា តាមពិតទៅ ក្រុមហ៊ុន អ អិម អេ ខេមបូឌា បានបង្កើតសេវាកម្មជួលនេះ តាំងពីឆ្នាំ ២០១៤ មកម្ល៉េះ ក៏ប៉ុន្តែកាលនោះ គឺមានជួលតែរថយន្តសម្រាប់ដឹកអ្នកដំណើរប៉ុណ្ណោះ តែដោយសារតែមើលពីសក្ដានុពល និងការរីកចម្រើនលើវិស័យនេះ ទើប អ អិម អេ នាំចូលនូវសេវាកម្មជួលថ្មីនេះ មកកាន់កម្ពុជា តែម្ដង៕
SONY DSC
ភ្នំពេញ ៖ ប្រជាពរដ្ឋជិត ១០០គ្រួសារ ក្នុងចំណោមជាង៣០០គ្រួសារ ដែលរកស៊ីចិញ្ចឹមត្រីនៅក្នុងបឹងសំរោង ដែលស្ថិតនៅភូមិ ឌួង សង្កាត់ព្រែកព្នៅ ខណ្ឌព្រែកព្នៅ បានផ្ទុះការតវ៉ានៅព្រឹក ថ្ងៃទី២៣ ខែ មករា ឆ្នាំ ២០១៩ នេះ ដើម្បីទាមទារអោយអាជ្ញាធរ ទុកពេលមួយឆ្នាំ ដើម្បីប្រមូលត្រីសិន ទើបឯកភាពរុះរើចេញ បន្ទាប់ពី អាជ្ញាធរ ចេញសេចក្តីជួនដំណឹងឲ្យរុះរើ ក្រោមរូបភាពស្តារបឹង ដោយទុករយះពេលតែ១០ថ្ងៃ។
ប្រជាពលរដ្ឋថា ពួកគាត់ព្រមធ្វើកិច្ចសន្យា បើសិនជាដល់ថ្ងៃកំណត់មិនព្រមរុះរើទេ ពួកគាត់សុខចិត្តទទួលខុសត្រូវតាមផ្លូវច្បាប់ ហើយបើសិនគ្មានការដោះស្រាយនោះទេ ពួកគាត់នឹងលើកគ្នាទៅសាលារាជធានីភ្នំពេញ ។
គួរបញ្ជាក់ថា រដ្ឋបាលខណ្ឌព្រែកព្នៅ បានជូនដំណឹងដល់ ពលរដ្ឋដែលជាម្ចាស់ស៊ងចិញ្ចឹមត្រី និងស្រះចិញ្ចឹមត្រីក្នុងបឹងសំរោងថា ដើម្បីការពារផ្ទៃបឹងសំរោង និងថែករក្សាមុខងារបឹងជាអាងស្តុបទឹក ដែលជាប្រព័ន្ធរំដោះទឹកជន់លិចមួយភាគពីរាជធានីភ្នំពេញ និងពីបណ្តាខេត្តនានានោះ រដ្ឋបាលរាជធានីភ្នំពេញនឹងធ្វើការស្តារបឹងសំរោងឡើងវិញ ហើយតម្រូវអោយ ប្រជាពលរដ្ឋជាម្ចាស់ស៊ង និងម្ចាស់ស្រះចិញ្ចឹមត្រីទាំងអស់រុះរើចេញ៕
ប៉ោយប៉ែត ៖ សមត្ថកិច្ចជំនាញប្រឆាំងបទល្មើសសេដ្ឋកិច្ច ខេត្តបន្ទាយមាន ជ័យ បានរកឃើញ ទីតាំងផលិតស្ករត្នោតក្លែងក្លាយមួយកន្លែងកាល ពី ព្រឹកថ្ងៃទី២៣ ខែមករា នេះ នៅខាងកើតផ្សារសមាគមន៏ចំងាយប្រហែល ២០០ម៉ែត្រ តាមបណ្ដោយផ្លូវបេតុង ឋិតក្នុងភូមិចាន់គិរី សង្កាត់/ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ទោ រស់ អៀម នាយរងប្រឆាំងបទល្មើសស្នងការដ្ឋាននគរបាលខេត្តបន្ទាយមានជ័យប្រាប់ថា: ម្ចាស់ទីតាំងឈ្មោះ ផៃ សំណាង ភេទប្រុស អាយុ២៦ឆ្នាំ និងប្រពន្ធឈ្មោះសុខ ម៉ី អាយុអាយុ២៥ឆ្នាំ រស់នៅភូមិកើតហេតុខាងលើ។ សមត្ថកិច្ចបញ្ជាក់ថា ស្កត្នោតក្លែងក្លាយខាងលើពេលយើងយកទៅបរិភោគ វានឹងធ្វើឲ្យប៉ះពាល់ដល់សុខភាព ដូចជាក្អួតចង្អោរ ឈឺក្រះពះ ពោះវៀន/ទឹកនោមផ្អែម/ឡើជាតិអាស៊ីត/រលាកពោះវៀន។ល។ជាពិសេសក្មេងៗ។
ម្ចាស់ផ្ទះត្រូវសមត្ថកិច្ចនាំទៅសាកសួរនៅស្នងការខេត្តបន្ទាយមានជ័យ និងកសាងសំណុំរឿងបញ្ជូនបន្ត។ ចំណែកផ្ទះដែលជាទីតាំងផលិតស្កត្នោតត្រូវបានសមត្ថកិច្ចចាក់សោបិទបណ្ដោះអាសន្ន៕
ព្រះវិហារ ៖ អភិបាលខេត្តព្រះវិហារលោក អ៊ុន ចាន់ដា កាលពីព្រឹកថ្ងៃទី២៣ ខែមករា ឆ្នាំ២០១៩ បានអញ្ជើញដឹកនាំក្រុមការងារចុះពិនិត្យរៀបចំដីសម្បទានគោលនយោបាយសង្គមកិច្ចលំនៅឋាន និងដីសម្បទានកសិកម្មជូនប្រជាពលរដ្ឋ។
ពួកគាត់នៅក្នុងតំបន់អភិរក្សប្រាសាទព្រះវិហារមកពីចំណុចស្វាយជ្រុំ ស្រុកជាំក្សាន្ត ខេត្តព្រះវិហារដែលផ្លាស់មករស់នៅភូមិធម្មជាតិ ឃុំស្រអែម ស្រុកជាំក្សាន្ត តាមគោលនយោបាយរបស់រាជរដ្ឋាភិបាលកម្ពុជា។
ជាលទ្ធផលនៃការចុះពិនិត្យជាក់ស្តែងនៃក្រុមការងារខេត្ត ទទួលបានលទ្ធផលដូចខាងក្រោម៖១.ក្រុមការងារនឹងចុះកំណត់ប្លង់ និងបោះបង្គោលការរៀបចំបិទបញ្ជីក្បាលដីឡូត៍លំនៅដ្ឋាននាពេលឆាប់ៗដល់ប្រជា ពលរដ្ឋ ដែលមិនទាន់បានទទួលបានដីកន្លងមក ស្ថិតនៅភូមិធម្មជាតិ ឃុំស្រអែម ស្រុកជាំក្សាន្ត។
២.ដីសម្បទានកសិកម្មដែលស្ថិតនៅឃុំកន្ទួតស្រុកជាំក្សាន្តចំនួន៥.០០០ហិកតានឹងត្រូវបែងចែកជូនប្រជាពលរដ្ឋក្នុង១គ្រួសារចំនួន២ហិកតាសម្រាប់យកទៅបង្កបង្កើនផល។ក្នុងដំណើរចុះពិនិត្យទីតាំងខាងលើនេះ ក៏មានការចូលរួមពីតំណាងអាជ្ញាធរព្រះវិហារ អភិបាលរងខេត្ត នាយករដ្ឋបាលសាលាខេត្ត អភិបាលស្រុក និងមន្ទីរជំនាញពាក់ព័ន្ធជុំវិញខេត្តជាច្រើនរូបផងដែរ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
