ភ្នំពេញ ៖ លោក សួន សេរីរដ្ឋា សរសេរនៅលើបណ្តាញ Facebook របស់លោកថា គណៈស្ថាបនិកគណបក្ស និងក្រុមប្រឹក្សានយោបាយ បានសម្រេចយក ថ្ងៃទី១៨ ខែមីនា ឆ្នាំ២០១៩ ជាថ្ងៃកំណើតបង្កើតគណបក្ស និងបានរើសយកឈ្មោះ ចំនួន២ ដើម្បីដាក់ជូនក្រសួងមហាផ្ទៃសម្រេច គឺទី១ គណបក្សខ្មែរកែទម្រង់ (គ.ខ.ក) Khmer Reform Party (K.R.P) និងទី២ គណបក្សផ្តល់អំណាចពលរដ្ឋ (គ.ផ.អ.ព) People Empowerment Party (P.E.P)។ ឯបាវចនាគឺ ជាតិ ទឹកដី សេរីភាព។

សូមរំលឹកថា មុននឹងឈានដល់ការសម្រេចចិត្តបង្កើគណបក្សនយោបាយថ្មីពេលនេះ លោក សួន សេរីរដ្ឋា ធ្លាប់បានប្តឹងទាមទារគណបក្សអំណាចខ្មែររបស់លោក ពីលោក សួង សុភ័ណ្ឌ មកវិញដែរ នៅក្រោយពេលដែលលោកចេញពីពន្ធនាគារវិញ តែមិនបានជោគជ័យ ហើយមកដល់ពេលនេះ លោក សួន សេរីរដ្ឋា អតីតប្រធានគណបក្សអំណាចខ្មែរ បានសម្រេចបង្កើតគណបក្សថ្មីមួយទៀត បន្ទាប់ពីគណបក្សអំណាចខ្មែររបស់លោក ត្រូវធ្លាក់ក្នុងកណ្តាប់ដៃលោកសួង សុភ័ណ្ឌ អំឡុងពេលលោកជាប់ក្នុងពន្ធនាគារ កន្លងមក។

ទោះជាយ៉ាងនេះក្តី មកដល់ពេលនេះ ក្រសួងមហាផ្ទៃ នៅមិនទាន់សម្រេចបែបណា លើការបង្កើតគណបក្សថ្មីរបស់លោកសួន សេរីរដ្ឋា នេះនៅឡើយទេ៕

ភ្នំពេញ ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានប្រកាសអះអាងថា គ្មានភាពចាំបាច់អ្វី ដែលត្រូវប្រើលុយ ទៅទិញទឹកចិត្តឲ្យក្រុមអតីតមន្ត្រីគណបក្សសង្គ្រោះជាតិ ឲ្យចូលសុំសិទ្ធិធ្វើ នយោបាយនោះទេ ព្រោះនោះជាសិទ្ធិរបស់បុគ្គល។
សម្តេចតេជោ បានថ្លែងបែបនេះ ខណៈសម្តេចចុះជួបសំណេះសំណាលជាមួយកម្មករ កម្មការិនី នៅស្រុកក្រគរ ខេត្តពោធិ៏សាត់ នាព្រឹកថ្ងៃទី២០ ខែមីនា នេះ។

សម្តេចតេជោ ហ៊ុន សែន នាយករដ្ឋមន្ត្រី បានថ្លែងចាត់ទុកការចោទប្រកាន់នៃការប្រើលុយដើម្បីទិញទឹកចិត្ត មន្ត្រីអតីតគណបក្សប្រឆាំងទៅសុំសិទ្ធិនយោបាយ ថាជារឿងមើលងាយ និងប្រមាថចំពោះអតីតមន្ត្រីគណបក្សប្រឆាំងទាំងដូចទៅនឹងសត្វធាតុ។ ការប្រកាសទាត់ចោលការចោទប្រកាន់នេះគឺនៅគ្រាដែល មានមន្ត្រីបក្សប្រឆាំងមួយរូបនៅទីក្រុងម៉ុងត្រេអាល់ ប្រទេសកាណាដា បានបង្ហោះប្រឌិតថា សម្តេចតេជោ បានប្រើលុយពី១០ទៅ២០ម៉ឺនដុល្លារ ដើម្បីទិញទឹកចិត្តអតីត មន្ត្រីគណបក្សសង្គ្រោះជាតិជាថ្នូរឲ្យទៅនឹងការដាក់ស្នើពាក្យសុំសិទ្ធិធ្វើនយោ បាយឡើងវិញ។ អតីតមន្ត្រីគណបក្សមិនគួរចាត់ទុកសមាជិក សហការីរបស់ខ្លួន ដែលដាក់ពាក្យសុំសិទ្ធិធ្វើនយោបាយឡើងវិញដូចជាទំនិញ ដែលត្រូវគេ ទិញដូរនោះទេ។ សម្តេចតេជោ បានអះអាងថា គណបក្សប្រជាជនកម្ពុជា គ្មានភាពចាំបាច់អ្វីត្រូវទិញទឹកចិត្តមន្ត្រីគណបក្សប្រឆាំងនោះទេ រាល់ការសុំសិទ្ធិដើម្បីបាននីតិសម្បទានយោបាយឡើងវិញគឺជាសិទ្ធិរបស់ពួកគេ។ បើតាមសម្តេចនឹងនៅតែពិនិត្យ ថាអ្នកណាដែលគួរផ្តល់ និងអ្នកណាដែលមិនគួរផ្តល់នីតិសម្បទាធ្វើនយោបាយឡើងវិញ មុនដាក់ថ្វាយព្រះមហាក្សត្រ។

ទន្ទឹមជាមួយនឹងការប្រកាសច្រានចោលការចោទប្រកាន់នេះ សម្តេចតេជោ នាយករដ្ឋមន្ត្រីក៏បានព្រមានចាត់វិធានការផ្លូវច្បាប់ ចំពោះអតីតមន្ត្រីគណបក្ស ប្រឆាំងមួយចំនួនដែលកំពុងបង្កើតគណៈកម្មការចំពោះកិច្ចនៅតាមឃុំ សង្កាត់ និងចុះជួបឃោសនាជាមួយប្រជាពលរដ្ឋ។ ការធ្វើសកម្មភាពនយោបាយ ដោយមិនទាន់បានទទួលនីតិសម្បទាធ្វើនយោបាយឡើងវិញ ជារឿងខុស ច្បាប់ ដែលរដ្ឋអំណាចត្រូវចាប់ខ្លួនក្នុងករណី នៅតែបន្តធ្វើសកម្មភាព។

កាលពីថ្ងៃទី១៩ ខែមីនា ម្សិលម៉ិញ ប្រមុខរដ្ឋស្តីទី សម្តេចវិបុលសេនាភក្តី សាយ ឈុំ បានចេញព្រះរាជក្រឹត្យ ដោយផ្តល់នីតិសម្បទានយោបាយដល់ អតីតតំណាងរាស្រ្ត និងថ្នាក់ដឹកនាំអតីតបក្សប្រឆាំងចំនួន៥រូបផ្សេងទៀត បន្ទាប់ពីពួកគាត់បានដាក់សំណើទៅកាន់ក្រសួងមហាផ្ទៃ កាលពីថ្ងៃទី១៨ ខែមីនា ឆ្នាំ២០១៩ ដើម្បីសុំសិទ្ធិធ្វើនយោបាយឡើងវិញ។ គិតត្រឹមថ្ងៃទី១៩ ខែមីនា ឆ្នាំ២០១៩នេះ មានអតីតថ្នាក់ដឹកនាំ នៃអតីតគណបក្សសង្រ្គោះជាតិ ចំនួន៩រូបហើយ ត្រូវបានព្រះមហាក្សត្រ និងប្រមុខរដ្ឋស្តីទី ផ្តល់នីតិសម្បទានយោបាយឡើងវិញ។ អតីតថ្នាក់ដឹកនាំ អតីតCNRP ដែលទទួលបានសិទ្ធិធ្វើនយោបាយឡើងវិញនោះ រួមមាន ទី១៖ លោក គង់ គាំ អតីតទីប្រឹក្សាជាន់ខ្ពស់គណបក្សសង្រ្គោះជាតិ ទី២៖ លោក គង់ បូរ៉ា អតីតតំណាងរាស្រ្តគណបក្សសង្រ្គោះជាតិ ទី៣៖ លោក ស៊ីម សុវណ្ណនី និងទី៤៖ លោក រៀល ខេមរិន្ទ ដែលជាអតីតតំណាងរាស្រ្ត នៃអតីតគណបក្សសង្រ្គោះជាតិ, ទី៥៖ លោក អ៊ូ ច័ន្ទរ័ត្ន, ទី៦៖ លោកស្រី ទេព សុទ្ធី, ទី៧៖ លោក កង គឹមហាក់ ទី៨៖ លោក ជីវ កត្តា និង ទី៩៖ លោក ច័ន្ទ សិលា។ ក្រៅអ្នកទាំងពីអ្នកទាំង៩រូបនេះ គឺនៅមានអតីតតំ ណាងរាស្ត្រ និងថ្នាក់ដឹកនាំនៃអតីតគណបក្សសង្គ្រោះជាតិចំនួនជាង២០នាក់ ផ្សេងទៀត នឹងបន្តដាក់ពាក្យសុំសិទ្ធិធ្វើនយោបាយបន្ថែមទៀតក្នុងពេលឆាប់ៗខាងមុខនេះ ដើម្បីសុំសិទ្ធិធ្វើនយោបាយឡើងវិញ៕

ខេត្តកំពង់ស្ពឺ ៖ គោយន្តដឹកឈើមួយគ្រឿង ត្រូវបានខាងមន្ត្រីជំនាញបរិស្ថានចំណុច ស្រែកិន ធ្វេីការបង្ក្រាប ខណៈម្ចាស់គោយន្តបេីកយកមកលាក់ទុកខាងក្រោយផ្ទះ ប្រជាពលរដ្ឋ ដែលគេស្គាល់ច្បាស់ថាម្ចាស់មានឈ្មោះ ម៉ុន អាយុជាង៤០ឆ្នាំ កាលពីព្រឹកថ្ងៃទី១៩ខែមីនាឆ្នាំ២០១៩នៅចំណុចក្នុងភូមិទួលធ្នង់ ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។

ការចុះបង្ក្រាបគោយន្តដឹកឈើគ្រឿង ខាងលេីនេះ ដោយមានការ រាយការណ៍ពីប្រជាពលរដ្ឋ ក្នុងមូលដ្ឋានអំពី សកម្មភាពការដឹកជញ្ជូនឈេី បែបអាណាធិបតេយ្យ របស់មេឈ្មួញម្នាក់ ត្រូវបានគេ ស្គាល់ឈ្មោះថា លោក ម៉ុន អាយុជាង៤០ឆ្នាំ ដែលជាមេឈ្មួញជេីងខ្លាំងល្បីល្បាញ ប្រចាំស្រុកឱរ៉ាល់និងស្រុកថ្ពងមិនខ្លាចញញើតសមត្ថកិច្ចនុងជំនាញណាឡើយដឹកឈើទាំងថ្ងៃតែម្តង។

ប្រភពពីប្រជាពលរដ្ឋបន្តថាដោយរយៈពេលកន្លងមកមេឈ្មួញរូបនេះ តែងតែលួចដឹកជញ្ជូនផលអនុផលព្រៃឈេី(ឈើគ្រឿងផ្ទះ) យ៉ាងសកម្ម ក្នុងទឹកដីស្រុកឱរ៉ាល់ ហេីយកម្លាំងជំនាញបរិស្ថានយេីងបានធ្វេីការតាមបង្ក្រាបជាច្រេីនដងដែលប៉ុន្តែមេឈ្មួញរូបនេះហាក់បីដូចជា ដឹងខ្លួនមុនរហូត បានរត់គេចចូលក្នុងចំការអំពៅជាញឹកញាប់ៗណាស់។ប៉ុន្តែសំណាងមិនល្អ ព្រះមិនជួយទើប រហូតមកដល់ថ្ងៃនេះត្រូវអស់ល័ក្ខ ហេីយត្រូវបានខាងមន្ត្រីជំនាញបរិស្ថានតំបន់ ស្រែកិនធ្វេីការបង្ក្រាបបានតែម្តងប៉ុន្តែតៃកុងរត់គេចខ្លួនបាត់បន្សល់ទុកតែគោយន្តប៉ុណ្ណោះ។

កិច្ចប្រត្តិបត្តការខាងលេីនេះ ក្រោមការដឹកនាំ កម្លាំងដោយលោក វណ្ណ ធឿន ប្រធានក្រុមល្បាតចំណុចស្រែកិន និងមានការសហការចូលរួម ពីជំនាញផងដែរ។គោយន្តដឹកឈើដែលបង្ក្រាបបាននេះគេដឹងថាមេឈ្មួញបានដឹកចេញពីខេត្តពោធិសាត់ ឆ្លងកាត់តាមអូរត្រាវ ស្រែកិនទើបបង្ក្រាបបាន។

ក្រោយពីការបង្ក្រាបគោយន្តរបស់មេឈ្មួញខាងលេីរួចមកកម្លាំងជំនាញបរិស្ថានបានធ្វេីការបេីកយកមករក្សាទុក នៅទីស្នាក់ការបរិស្ថានស្រែកិន ដេីម្បីចាត់ការបន្តតាមផ្លូវច្បាប់ស្តីអំពីរដ្ឋបាលព្រៃឈេី។

សូមបញ្ចាក់ផងដែរថា៖រយៈពេលកន្លងមកកម្លាំងជំនាញបរិស្ថានតំបន់ស្រែកិន បានធ្វេីការបង្ក្រាបជាច្រេីនលើកច្រើនដង មកហេីយទៅលេីក្រុមឈ្មួញដឹកបទល្មើសទាំងនេះ តែក្រុមឈ្មួញទាំងនេះនៅតែមកលបលួចដឹកជញ្ជូនដដែល។ទោះជាយ៉ាងណាក៏ដោយ កម្លាំងជំនាញបរិស្ថាននឹង បន្តការតាមបង្ក្រាបជានិច្ចមកលើមេឈ្មួញទាំងនេះ ដើម្បីការពារព្រៃឈើអោយបានគង់វង្សនោះ៕

ភ្នំពេញ ៖ គណៈកម្មាធិការជាតិរៀបចំការបោះឆ្នោត គ ជ ប នៅរសៀលថ្ងៃទី១៩ ខែមីនា ឆ្នាំ២០១៩ ម្សិលមិញ នេះ បានរៀបចំការចាប់ឆ្នោតកំណត់លំដាប់លេខរៀងគណបក្សនយោបាយនៅលើសន្លឹកឆ្នោត សម្រាប់ការបោះឆ្នោតជ្រើសរើសក្រុមប្រឹក្សារាជធានី-ខេត្ត-ក្រុង-ស្រុក-ខណ្ឌ អាណត្តិទី៣ ឆ្នាំ២០១៩ នៅទីស្នាក់ការលេខាធិការដ្ឋាននៃគណៈកម្មការរៀបចំការបោះឆ្នោតរាជធានីភ្នំពេញ។

លទ្ធផល នៃការចាប់ឆ្នោតកំណត់លំដាប់លេខរៀងគណបក្សនយោបាយនៅលើសន្លឹកឆ្នោត សម្រាប់តែរាជធានីភ្នំពេញ គឺ ៖
-គណបក្សយុវជនកម្ពុជា លេខរៀងទី១
-គណបក្សសញ្ជាតិកម្ពុជា លេខរៀងទី២
-គណបក្សឆន្ទៈខ្មែរ លេខរៀងទី៣
-គណបក្សប្រជាជនកម្ពុជា លេខរៀងទី៤
-គណបក្ស ហ៊្វុនស៊ិនប៉ិច លេខរៀងទី៥
សូមជម្រាបថា អ្នកបោះឆ្នោត និងឈរឈ្មោះបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សានេះ គឺជាសមាជិកក្រុមប្រឹក្សាឃុំ សង្កាត់ នៅក្នុងមុខតំណែង ដែលមានសមាជិកសរុបចំនួន ១១ ៥៧២ នាក់ នៅទូទាំងប្រទេស ដែលការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ នឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩ ខាងមុខនេះ៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានចេញអនុក្រឹត្យកែប្រែ និងដំឡើងប្រាក់ឧបត្ថម្ភប្រចាំខែ ចំពោះសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ មន្រ្តីភូមិ និងការិយាល័យប្រជាពលរដ្ឋរាជធានី ខេត្ត ក្រុង ស្រុក ខណ្ឌ។

យោងតាមអនុក្រឹត្យខាងលើនេះ បានបង្ហាញថា ប្រាក់ឧបត្ថម្ភខាងលើនេះ ត្រូវបើកជូនចាប់ ពី ថ្ងៃ ទី១  ខែមេសា ឆ្នាំ២០១៩ខាងមុខនេះ។
សូមអានខ្លឹមសារ នៅក្នុងអនុក្រឹត្យខាងក្រោមនេះ ៖

មណ្ឌលគិរី ៖ មានហេតុការណ៍អគី្គភ័យមួយបានកើតឡើងបណ្ដាលឲ្យក្មេងស្រីវ័យជំទង់ពីរនាក់បានស្លាប់ និងបានឆាបឆេះរាលដាលលំនៅដ្ឋាន៤ខ្នងទាំងស្រុង ដោយឧបទ្ទវហេតុនេះ ផ្ដើមចេញពីផ្ទះលក់សាំងមួយកន្លែង ។ ហេតុការណ៍នេះ បានកើតឡើងនិងបង្កការភ្ញាក់ផ្អើលនៅវេលាម៉ោងប្រហែល ៥ល្ងាច ថ្ងៃទី១៨ ខែមីនា ឆ្នាំ២០១៩ នៅភូមិមេប៉ៃ ឃុំពូជ្រៃ ស្រុកពេជ្រាដា ហើយអគ្គីភ័យបានអូសបន្លាយឆាបឆេះប្រហែលជាង៣ម៉ោង គឺរហូតដល់ម៉ោងប្រហែល៨យប់ ទើបសមត្ថកិច្ចអាចប្រើប្រាស់ឡានទឹកបាញ់ពន្លត់អគ្គីភ័យនេះបាន ។

ស្នងការនគរបាលខេត្តមណ្ឌលគិរី លោក ឡោ សុខា បានប្រាប់នៅកន្លែងកើតហេតុថា មូលហេតុដែលបណ្ដាលឲ្យអគ្គីភ័យនេះបង្កជាអណ្ដាតភ្លើងបាន ព្រោះការធ្វេសប្រហែសរបស់អ្នកបើកឡានដឹកប្រេង ដែលបង្ហូរប្រេងចេញពីស៊ីទែនមកមិនប្រយត្ន ធ្វើឲ្យប្រេងទាំងនោះខ្ទាតចេញទៅប៉ះជាមួយចង្ក្រានភ្លើងនៅផ្ទះបាយ បង្កជាការឆាបឆេះតែម្ដង។ លោកបន្តថា ហេតុការណ៍នេះបណ្ឌាលឲ្យមនុស្សស្រីពីរនាក់ស្លាប់ និងរបួសម្នាក់ ចំណែករថយន្តដឹកប្រេងសមត្ថកិច្ចឃាត់បានហើយ ប៉ុន្តែតៃកុងរថយន្តបានរត់គេចខ្លួន ។ ក្នុងករណីនេះដែរ កម្លាំងនគរបាលបានប្រើរថយន្តពន្លត់អគ្គីភ័យ៤គ្រឿង និងប្រើទឹកជាង២០ឡានទើបអាចពន្លត់អគ្គីភ័យនេះបានទាំងស្រុង ។

ប្រភពនៅកន្លែងកើតហេតុបានឲ្យដឹងដែរថា ក្រោយអគ្គីភ័យនេះបានកើតឡើង ភ្លាមៗនោះគេឃើញម្ចាស់ផ្ទះលក់ប្រេងបានរត់ចេញពីអណ្ដាតភ្លើងមកពីរនាក់ និងជាប់ក្មេងស្រីវ័យជំទង់ពីរនាក់ក្នុងផ្ទះ ដែលត្រូវជាកូនស្រីម្ចាស់ផ្ទះ០១នាក់ ក្មួយស្រី០១នាក់ ហើយពួកគេបានរត់ទៅពួនក្នុងបន្ទប់ទឹក រំពេចនោះប្រជាពលរដ្ឋព្យាយាមជួយសង្គ្រោះជនរងគ្រោះទាំងពីរនាក់ ប្រើមធ្យោបាយវាយទម្លុះជញ្ជាំងបន្ទប់ទឹកនោះតែម្ដង តែជាអកុសល្យគឺវាយច្រលំបន្ទប់ មិនចំបន្ទប់ទឹក ក៏បណ្ដាលឲ្យពួកគេមិនអាចទ្រាំបានដាច់ខ្យល់ស្លាប់ក្នុងបន្ទប់ទឹកនោះយ៉ាងអាណោចអធ័ម ។

ជនរងគ្រោះទាំងពីរនាក់ ដែលបានស្លាប់ក្នុងហេតុការណ៍អគ្គីភ័យនេះ ទី១ឈ្មោះ ហ៊ាង សម្ផស្ស ភេទស្រី អាយុ១៧ឆ្នាំ ទី២ ឈ្មោះ ហ៊ាង ស្រីលីន ភេទស្រី អាយុ១៤ឆ្នាំ ។

គិតមកដល់ព្រឹកថ្ងៃទី១៩ ខែមីនា នេះ សមត្ថកិច្ចមិនទាន់អាចបញ្ជាក់ពីទំហំនៃការខូចខាតនៅឡើយទេ៕ ដោយ ៖  ភិរ៉ាន

ភ្នំពេញ ៖ ស្ថាបនិកកាសែត The Cambodia Daily លោក Bernard Krisher បានទទួលមរណភាពក្នុងវ័យ៨៧ឆ្នាំ នៅមន្ទីរពេទ្យមួយក្នុងទីក្រុងតូក្យូ ប្រទេសជប៉ុន កាលពីថ្ងៃទី៥ ខែមីនា ឆ្នាំ២០១៩ ដោយសារលោកមានជំងឺបេះដូង។

ក្នុងអត្ថបទអនឡាញរបស់ខ្លួនចុះផ្សាយនៅថ្ងៃនេះ សារព័ត៌មាន ឌឹ ខេមបូឌា ដេលី បានរៀបរាប់ថា លោក Bernard Krisher ដែលមានតួនាទីជាប្រធានអង្គការជំនួយពិភពលោកសម្រាប់កម្ពុជា (World Assistance for Cambodia)ផងនោះ បានទទួលមរណភាពដោយសារជំងឺគាំងបេះដូង កាលពីថ្ងៃទី៥ ខែមីនា ក្នុងវ័យ ៨៧ឆ្នាំ នៅឯមន្ទីរពេទ្យមួយកន្លែងក្នុងទីក្រុងតូក្យូ ប្រទេសជប៉ុន។

សារពត័ត៌មានដដែលនេះ បានចុះផ្សាយបន្តថា មរណភាពរបស់ស្ថាប័នសារព័ត៌មានមួយនេះ ត្រូវបានក្រុមគ្រួសារទម្លាយឲ្យដឹងជាសាធារណៈ ក្រោយពីការរៀបចំពិធីបញ្ចុះសពលក្ខណៈឯកជនមួយធ្វើឡើងនៅទីក្រុងញូវយ៉ក។

ស្ថានទូតអាមេរិកប្រចាំកម្ពុជា បានបង្ហោះលើទំព័រហ្វេសប៊ុកបង្ហាញពីការសោកស្តាយចំពោះមរណភាពរបស់លោក Krisher ជនជាតិអាមេរិក ដែលមានកំណើតនៅក្រុង Frankfurt ប្រទេសអាល្លឺម៉ង់។ ស្ថានទូតអាមេរិក បានសរសេរយ៉ាងដូច្នេះថា៖«លោក Krisher មិនត្រឹមតែបានធ្វើឲ្យប្រជាជនកម្ពុជារាប់លាននាក់ទទួលបានព័ត៌មានតែប៉ុណ្ណោះទេ តែលោកថែមទាំងបានចំណាយពេលវេលារបស់លោករាប់ទសវត្សរ៍ ដើម្បីធ្វើការងារមនុស្សធម៌នៅកម្ពុជា»។

លោក Bernard Krisher មុននឹងភៀសខ្លួនទៅនៅអាមេរិកនៅវ័យកុមារនៅឡើយនៅក្នុងឆ្នាំ១៩៣៧នោះ លោក Bernard Krisher ក៏ជាអតីតនាយកការិយាល័យព័ត៌មាន Newsweek ប្រចាំនៅទីក្រុងតូក្យូ ព្រមទាំងសារព័ត៌មានអន្តរជាតិដទៃទៀតផងដែរមុននឹងលោកបង្កើតកាសែត ឌឺ ខេមបូឌា ដេលី ជាភាសាអង់គ្លេស The Cambodia Daily នៅក្នុងឆ្នាំ១៩៩៣។ប៉ុន្តែ កាសែតភាសាអង់គ្លេសមួយនេះ បានបិទការបោះពុម្ពផ្សាយរបស់ខ្លួនទាំងស្រុងកាលពីដើមខែកញ្ញា ឆ្នាំ២០១៧ ក្រោយពីត្រូវរដ្ឋាភិបាលចោទថា បានជំពាក់ពន្ធជាង ៦លានដុល្លារអាមេរិកនៅក្នុងររយៈប្រហែល ១០ឆ្នាំ។

ស្ថានទូតអាមេរិកប្រចាំនៅកម្ពុជា បានបង្ហោះសារនៅលើទំព័រហ្វេសប៊ុកផ្លូវការរបស់ខ្លួនថា ស្ថានទូតបានរៀបចំបន្ទប់មួយដាក់ឈ្មោះលោក Bernard Krisher សម្រាប់ជាកិត្តិយសរបស់លោកផ្ទាល់៕

(លោក Bernard Krisher ស្ថាបនិកកាសែត The Cambodia Daily ទទួលមរណភាពក្នុងអាយុ​៨៧ឆ្នាំ។ ប្រភពរូបថត The Cambodia Daily)

ភ្នំពេញ ៖ លោក សោ ចាន់ដេត អតីតសមាជិកព្រឹទ្ធសភាគណបក្សសង្គ្រោះជាតិ កំពុងរងបណ្តឹងពីបទប្រមាថសម្តេចតេជោ ហ៊ុន សែន នាយករដ្ឋមន្ត្រីកម្ពុជា។

លោក គី តិច មេធាវីរបស់សម្តេចនាយករដ្ឋមន្ត្រី ហ៊ុន សែន បានដាក់ពាក្យប្តឹងអតីតថ្នាក់ដឹកនាំគណបក្សប្រឆាំងម្នាក់ទៀត គឺលោក សោ ចាត់ដេត ពីបទជេរប្រមាថ និងបទញុះញង់។

បើតាមពាក្យបណ្តឹងរបស់លោក គី តិច បានឲ្យដឹងថា អង្គហេតុដែលនាំឲ្យមានបណ្តឹងនេះ គឺដោយសារលោក សោ ចាត់ដេត បានបង្ហោះសារលើបណ្តាញសង្គមហ្វេសប៊ុកនាពេលកន្លងមក ។ លោក គី តិច ចាត់ទុកសារទាំងនោះថា មានលក្ខណៈប្រមាថសម្តេចនាយករដ្ឋមន្ត្រី ហ៊ុន សែន។

លោក សោ ចាន់ដេត អតីតសមាជិកព្រឹទ្ធសភាគណបក្សសង្គ្រោះជាតិ មិនអាចទា់ទងសុំការពន្យល់ឆ្ល;យតបទៅនឹងបណ្តឹងនោះបានទេ៕ 

(លោក សោ ចាន់ដេត ចូលរួមបាតុកម្មជាមួយពលរដ្ឋខ្មែរនៅកាណាដា ។ រូបភាព៖ ហ្វេសប៊ុកលោក សោ ចាន់ដេត )

ភ្នំពេញ ៖ ឆេះផ្ទះឈើប្រក់សង្ក័សីអស់ ៣១ខ្នងកាលពីវេលាម៉ោង ៣រសៀល ថ្ងៃទី១៧ ខែមីនាឆ្នាំ២០១៩ ស្ថិតនៅចំនុចផ្លូវលំ ភូមិព្រែកទល់ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

ប្រភពព័ត៍មានពីសមត្ថកិច្ចបានឱ្យដឹងថា អគ្គីភ័យដែលបានឆាបឆេះផ្ទះប្រជាពលរដ្ឋអស់៣១ខ្នង ខាងលើនេះ គឺបណ្តាលមកពីឆ្លងចរន្តអគ្គីសនី ខណៈដែលម្ចាស់ផ្ទះ បានចាក់សោរផ្ទះ ហើយចេញទៅខាងក្រៅ បណ្តាលឱ្យទុសេរខ្សែរភ្លើង បង្កចេញជាអណ្តាតភ្លើងយ៉ាងសន្ធោសន្ធៅរីករាលដាលដល់ផ្ទះក្បែរៗជាប់គ្នាអស់ជាច្រើនខ្នង។

ហេតុការណ៍នេះក៏មានរថយន្តពន្លត់អគ្គីភ័យចំនួន១៨គ្រឿង របស់ស្នងការនគរបាលរាជធានីភ្នំពេញចំនួន ១៤គ្រឿង រថយន្តអាវុធហត្ថរាជធានីចំនួន៣គ្រឿង និងរថយន្តពន្លត់អគ្គីភ័យរបស់ក្រុមហ៊ុនស្រាបៀកម្ពុជាចំនួន១គ្រឿង ចេញទៅជួយបាញ់ទឹកដើម្បីទប់ស្កាត់កុំឱ្យរាលដាលបន្តទៅផ្ទះប្រជាពលរដ្ឋដែលនៅក្បែរៗនោះទៀត តែដោយសារតែផ្លូវតូចចង្អៀតទើបធ្វើឱ្យក្រុមពន្លត់អគ្គីភ័យពិបាកចូលទៅបាញ់ទឹកពន្លត់រហូតឈានដល់ខូចខាតផ្ទះប្រជាពលអស់ ៣១ខ្នងទាំងស្រុង និងខូចខាតសម្ភារៈអស់មួយចំនួន តែសំណាងល្អដែរ ដោយគ្មានបណ្តាលពលរដ្ឋណាម្នាក់រងគ្រោះថ្នាក់ទេ៕

ភ្នំពេញ ៖ ក្រសួងធនធានទឹក និងឧតុនិយម បានជូនដំណឹងថា ចាប់ពីថ្ងៃទី២១ ដល់ ២៤ ខែមីនា ឆ្នាំ២០១៩ រាជធានីភ្នំពេញ ខេត្តព្រៃវែង ស្វាយរៀង ក្រចេះ ស្ទឹងត្រែង ត្បូងឃ្មុំ កំពង់ចាម កណ្តាល កំពង់ស្ពឺ តាកែវ កំពង់ធំ កំពង់ឆ្នាំង និងខេត្តពោធិ៍សាត់ នឹងមានភ្លៀងកក់ខែលាយឡំជាមួយរន្ទះ និងខ្យល់កន្រ្តាក់។

តាមសេចក្តីជូនដំណឹងដដែលបានឲ្យដឹងថា បណ្តាខេត្តដទៃទៀតដូចជា សៀមរាប បាត់ដំបង ប៉ៃលិន បន្ទាយមានជ័យ ឧត្តរមានជ័យនិងខេត្តព្រះវិហារ ក៏នឹងមានភ្លៀងកក់ខែលាយឡំជាមួយរន្ទះ និងខ្យល់កន្រ្តាក់ផងដែរ ចាប់ពីថ្ងៃទី២៣ ដល់ ២៤ ខែមីនា ឆ្នាំ២០១៩។

ការជូនដំណឹងខាងលើនេះ បន្ទាប់ពីក្រសួងបានតាមដានស្ថានភាពអាកាសធាតុរួចមក ឃើញថា៖ សម្ពាធទាបនៅលើផ្ទៃដី បន្តគ្របដណ្តប់លើកម្ពុជា។ ទន្ទឹមនឹងនេះ កម្ពុជា ក៏ចាប់ផ្តើមទទួលឥទ្ធិពលពីខ្យល់ដែលបក់មកពីទិសខាងកើត និងទិសអាគ្នេយ៍ផងដែរ។

ស្ថានភាពអាកាសធាតុបែបនេះ ក៏បានធ្វើឱ្យកម្រិតសីតុណ្ហភាពចាប់ពីថ្ងៃទី២១ ដល់ ២៤ ខែមីនា៖
-បណ្តាខេត្តនៅភាគខាងកើត ខាងត្បូង និងតំបន់មាត់សមុទ្រ៖
+សីតុណ្ហភាពអប្បបរមា ស្ថិតក្នុងរង្វង់ពី ២៥ ដល់ ២៧អង្សារសេ និងអតិបរមា ពី ៣០ ដល់ ៣២អង្សារសេ។

-បណ្តារាជធានី-ខេត្តដទៃទៀត៖
+សីតុណ្ហភាពអប្បបរមា ស្ថិតក្នុងរង្វង់ពី ២៥ ដល់ ២៧អង្សារសេ និងអតិបរមា ពី ៣២ ដល់ ៣៥អង្សារសេ។
ជាមួយគ្នានេះ ក្រសួងក៏បានអំពាវនាវឱ្យបង្កើនការប្រុងប្រយ័ត្នខ្ពស់ ចំពោះបាតុភូតរន្ទះ និងខ្យល់កន្រ្តាក់ ដែលអាចនឹងកើតមានជាយថាហេតុ នៅពេលមេឃរកកលភ្លៀង៕