រាជធានីភ្នំពេញ ៖ នៅព្រឹកនេះតុលាការកំពូល បានបើកសវនាការលើសំណុំរឿងបរិហារកេរ្តិ៍របស់លោក គឹម សុខ ដែលបានប្តឹងដោយលោក គី តិច មេធាវីការពារក្តីឲ្យសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
សូមបញ្ជាក់ថា លោក គឹម សុខ ត្រូវបានសាលាដំបូងរាជធានីភ្នំពេញ ចោទប្រកាន់ពីបទញុះញង់ឲ្យប្រព្រឹត្តបទឧក្រឹដ្ឋជាអាទិ៍ និងបរិហាកេរ្តិ៍ជាសាធារណៈ ខណដែលលោកបានធ្វើអត្ថាធិប្បាយតាមវិទ្យុអាស៊ីសេរីថា គណបក្សប្រជាជនកម្ពុជា គឺជាអ្នកសម្លាប់លោក កែម ឡី៕
ដោយ ៖ ប៉ែន សុផល
បាត់ដំបង ៖ យាយចំណាស់ម្នាក់ត្រូវបានអ្នកស្រុកប្រទះឃើញដេកស្លាប់ក្នុងទឹកប្រឡាយយ៉ាងអាណោចអាធម៌នៅវេលាម៉ោង ៧ និង១០នាទី ថ្ងៃទី៨ ខែមិថុនា ឆ្នាំ២០១៧នៅត្រង់ចំនុចវត្តអាស្រមកុន្ធកុដិ បុ៑ត.សាវង្ស ស្ថិត ក្នុងក្រុមទី ៨ ភូមិរំចេក ៣ សង្កាត់រតនៈ ក្រុងបាត់ដំបង ។
សមត្ថកិច្ចមូលដ្ឋានបានប្រាប់ថា ជនរងគ្រោះមិនស្គាល់អត្តសញ្ញាណ ភេទស្រី អាយុ ប្រហែល ជាង៧០ឆ្នាំពាក់អាវដៃវែងពីរជាន់ពណ៌ស និងស្លៀកខោផ្កាជើង វែងបានលង់ទឹកប្រឡាយជំរៅ ១.៨០ម៉ែត្របណ្តាលអោយស្លាប់យ៉ាងអាណោចអាធ័ម។
យោងតាមការលើកឡើងពីលោក សំ ឆាយ អាយុ៧៥ឆ្នាំ ជាអាចារ្យវត្តអាស្រមគុន្ធកុដិបានបញ្ជាក់ប្រាប់ថា នៅមុនថ្ងៃកើតហេតុជនរងគ្រោះខាងលើត្រូវបានឃើញម៉ូតូ១គ្រឿងបានដឹកយកមកទំលាក់ចោលនៅក្នុងវត្តអាស្រមគុន្ធកុដិដោយមានសភាពវង្វេង និងស្មារតីមិនគ្រប់គ្រាន់លុះព្រឹកឡើងស្រាប់តែមានការភ្ញាក់ផ្អើលថា បានធ្លាក់ទឹកប្រឡាយស្លាប់បាត់ទៅហើយ។
បច្ចុប្បន្នសពត្រូវបានប្រជាពលរដ្ឋស្រង់យកទៅរក្សាទុកនៅក្នុងវត្តអាស្រមគុន្ធកុដិ ប៊ុត សាវង្សដើម្បីស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី៕
ខេត្តសៀមរាប ៖ អ្នកញៀនល្បែង ប្រុសស្រី១៣នាក់ ត្រូវបានកម្លាំងនគរបាលខេត្តសៀមរាបឃាត់ខ្លួន ខណៈពួកគេ នាំគ្នាលួចលាក់ លេងល្បែងស៊ីសង ស្ថិតនៅភូមិមណ្ឌល៣ សង្កាត់ស្លរក្រាម ក្រុងសៀមរាប ។ ទន្ទឹមនោះ កម្លាំងនគរបាល បានដកហូតវត្ថុតាង រួមមាន ម៉ូតូចំនួន១៤គ្រឿង មេអាបោង៣គ្រាប់ ចានអាប៉ោង១ គម្របចាន១ និងបៀរ២ហ៊ូ ។
មន្ត្រីនគរបាលបានបញ្ជាក់ថា ចំពោះម្ចាស់ ដែលផ្តល់ទីតាំង ឲ្យលេងល្បែងស៊ីសង រួមទាំងមេអាបោង មានគ្នា៣នាក់ ទី១.ឈ្មោះ ស្រង រ៉ា ភេទប្រុស អាយុ៤២ឆ្នាំ ទីលំនៅបច្ចុប្បន្នភូមិមណ្ឌល៣ សង្កាត់ស្លក្រាម ក្រុង/ខេត្តសៀមរាប ជាម្ចាស់ទីតាំង, ទី២.ឈ្មោះ សុខ ម៉ឹង ហៅប៉ាវ ឬវី ភេទប្រុស អាយុ៥៨ឆ្នាំ ទីលំនៅបច្ចុប្បន្ន ភូមិមណ្ឌល៣ សង្កាត់ស្លក្រាម ក្រុង/ខេត្តសៀមរាប ជាមេអាប៉ោង និងទី៣.ឈ្មោ ហ៊ត់ បូ ភេទប្រុស អាយុ៤២ឆ្នាំ ទីលំនៅបច្ចុប្បន្ន ភូមិគោកបេង សង្កាត់គោកចក ក្រុង/ខេត្តសៀមរាប ជាមេអាប៉ោង។
គួរបញ្ជាក់ថា ប្រតិបត្តិការធ្វើឡើងកាលពីព្រឹកថ្ងៃទី៨ ខែមិថុនា ឆ្នាំ២០១៧ម្សិលមិញនេះ៕
ខេត្តបន្ទាយមានជ័យ ៖ ប្រជាពលរដ្ឋខ្មែរត្រូវតម្រួតថៃឃាត់១៣នាក់ត្រូវបានដោះលែងនៅរសៀលម្សិលមិញនេះ និងមកដល់ខាងភាគីកម្ពុជាវិញ តាមច្រកបឹងត្រកួននៅវេលាម៉ោង៦ និង៤០នាទីយប់ ថ្ងៃទី០៧ ខែ មិថុនា ឆ្នាំ២០១៧ ហើយត្រូវបានបង់ថ្លៃដេកគុកចំនួន៣០០បាតក្នុងមួយនាក់ សរុប៣៩០០០បាត ជាថ្នូរនិងការដោះលែងនេះ ដែលអភិបាលស្រុកតាប្រាយ៉ាជួយចេញពាក់កណ្តាល។
តាមប្រភពដដែលបានបញ្ជាក់ថា ក្រោយពីពួកគាត់បានឃើញបងប្អូនពលរដ្ឋខ្មែរទាំង១៣នាក់ បានរួចផុតពីការឃុំឃាំង និងបានវិលត្រលប់មកដល់ទឹកដីខាងកម្ពុជាវិញហើយនោះ ពួកកាត់ក៏ព្រមដោះលែងរថយន្តថៃដែលចូលមកដដឹកដំឡូងទៅកាន់ទឹកដីថៃជាធម្មតាវិញ។
គួររំលឹកថា តម្រូតថៃបានឃាត់ខ្លួននិងឃុំឃាំង ប្រជាពលរដ្ឋខ្មែរចំនួន១៣នាក់ កាលពីល្ងាចថ្ងៃទី០២ខែមិថុនាឆ្នាំ២០១៧កន្លងទៅ ហើយបងប្អូនប្រជាពលរដ្ឋខ្មែរត្រូវជាសាច់ញាតិនាំគ្នាយករថយន្តនិងលូបិទផ្លូវឃាត់រថយន្តថៃចំនួន២៦គ្រឿងតាមផ្លូវដើម្បីជាថ្នូរការដោះដូរប្រជាពលរដ្ឋដែលថៃឃាត់ខ្លួន។
ក្រោយពីឃាត់ខ្លួនពលរដ្ឋខ្មែរ និងពលរដ្ឋខ្មែរបានឃាត់រថយន្តដឹកដំបូងថៃ អស់រយះពេលជិតមួយសប្តាហ៍មក លោក ផ្លែក វ៉ារី អភិបាលស្រុកថ្មពួកបានប្រាប់ថា លោកអភិបាលខេត្តបន្ទាយមានជ័យ លោក សួន បវរ បានអោយលោកនិងអាជ្ញាធរមូលដា្ឋនសហការអគ្គកុងស៊ុលកម្ពុជាប្រចាំខេត្តស្រះកែវទំនាក់ទំនងជួបភាគីថៃដើម្បីដោះស្រាយ រហូតដល់ព្រឹកថ្ងៃទី០៧ខែមិថុនាឆ្នាំ២០១៧បានជួបប្រជុំអភិបាលស្រុកតាប្រាយ៉ាខេត្តស្រះកែវប្រទេសថៃ ដើម្បីសម្រេចចំណាយថវិកាខាងកម្ពុជា៥០ភាគរយ និងភាគីថៃ ៥០ភាគរយ ដើម្បីធានាពលរដ្ឋចេញមកវិញនៅយប់ថ្ងៃដដែលនេះផងដែរ៕
រាជធានីភ្នំពេញ ៖ សម្តេច ហ៊ុន សែន ប្រធានបក្សកាន់អំណាចបានសរសេរនៅលើទំព័រ Facebook របស់សម្តេចនាព្រឹកថ្ងៃទី០៨ ខែមិថុនា ឆ្នាំ២០១៧ នេះថា «លទ្ឋផល បឋមនៃការបោះឆ្នោតគឺបានបញ្ជាក់ច្បាស់ថា ពលរដ្ឋកម្ពុជាភាគច្រើនលើសលប់បំផុតគាំទ្រសន្តិភាព និងការអភិវឌ្ឍក្រោមការដឹកនាំរបស់ សម្តេចតេជោ ហ៊ុន សែន»។ សម្តេចបញ្ជាក់ថា ប្រជាពលរដ្ឋបានឃើញច្បាស់នូវស្នាដៃ និងសមិទ្ធិផលជាតិជាច្រើនត្រូវបានកើតឡើងក្រោមការដឹកនាំរបស់សម្តេចតេជោ ដែលបានផ្តល់នូវទំនុកចិត្ត និងការគាំទ្រយ៉ាងច្រើនលើសលប់បំផុតពីប្រជាពលរដ្ឋ ដែលធានាបាននូវជ័យជម្នះទាំងសម្រាប់អាណត្តិនេះ និងនៅអាណត្តិក្រោយៗទៀត ។
ប្រធានគណបក្សប្រជាជន ថែមទាំងបានបន្តថា «កម្ពុជាត្រូវតែបោះជំហានទៅមុខដើម្បីវិបុលភាពសម្រាប់ប្រទេសជាតិទាំងមូល»។ សម្តេចតេជោ ហ៊ុន សែន ក៏បានអរគុណសារជាថ្មីដល់ប្រជាពលរដ្ឋទូទាំងប្រទេស ដែលនៅតែជឿជាក់ និងបានបោះឆ្នោតគាំទ្រគណបក្សប្រជាជនកម្ពុជា តាំងពីអា ណត្តិមុនៗមកទល់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤នេះ៕
សេអ៊ូល ៖ ទីភ្នាក់ងារសារព័ត៌មាន Reuters បានរាយការណ៍នៅមុននេះបន្តិចថា កូរ៉េខាងជើង នៅព្រឹកថ្ងៃព្រហស្បតិ៍នេះបានបាញ់សាកល្បងមីស៊ីលប្រឆាំងនាវាជាច្រើនគ្រាប់ជាថ្មីម្តងទៀត ចេញពីតំបន់ឆ្នេរខាងកើតរបស់ខ្លួន ។
យោធាកូរ៉េខាងត្បូងបានថ្លែងថា នេះគឺជាលើកទី០៥ហើយ ដែលកូរ៉េខាងជើងបានបាញ់សាកល្បងមីស៊ីល គិតចាប់តាំងពីប្រធានាធិបតីកូរ៉េខាងត្បូងថ្មី លោក មូន ជេអ៊ីន ឡើងកាន់តំណែងមក លោកបង្ហាញពីទំនោរចង់ផ្សះផ្សាជាច្រើនលើក។
តាមសេចក្តីថ្លែងការណ៍របស់យោធាកូរ៉េខាងត្បូងបានអះអាងថា កូរ៉េខាងជើងទំនងជាបានបាញ់សាកល្បងមីស៊ីលប្រឆាំង នាវារយៈចំងាយខ្លី ជាច្រើនគ្រាប់ នៅព្រឹកថ្ងៃព្រហស្បតិ៍នេះ ចេញពីតំបន់ Wonsan នៃខេត្ត Kangwon តម្រង់ទៅកាន់តំបន់សមុទ្រខាងកើត ហើយមីស៊ីលនេះអាចរត់បាន ចំងាយ២០០គីឡូម៉ែត្រ មុននឹងធ្លាក់ក្នុងសមុទ្រជប៉ុន ឬសមុទ្រខាងកើត។ ប៉ុន្តែទន្ទឹមគ្នា កូរ៉េខាងត្បូង និងសហរដ្ឋអាមេរិក កំពុងវិភាគលើការបាញ់សាកល្បងនេះនៅឡើយ៕
ខេត្តស្វាយរៀង ៖ កូនតិរច្ឆានខណៈស្រវឹងស្រាជោក ត្រឡប់មកផ្ទះ ត្រូវឪពុកស្ដីបន្ទោសបន្តិចបន្តួច ផ្ទុះកំហឹងបានទាញយកកាំបិតកាប់រហូតដល់ស្លាប់ ដែលករណីដ៏ព្រៃផ្សៃនេះបានកើតឡើងកាលពីថ្ងៃទី៦ ខែមិថុនា ឆ្នាំ២០១៧ នៅវេលាម៉ោង២ និង៤៦នាទី នៅភូមិកណ្តាល សង្កាត់ប្រាសាទ ក្រុងបាវិត ខេត្តស្វាយរៀង។
បើយោងតាមសមត្ថកិច្ចនគរបាលក្រុងបាវិតបានឲ្យដឹងថា៖ជនសង្ស័យមានឈ្មោះ លី ថែ អាយុ២៩ឆ្នាំ មុខរបរកសិករ មានទីលនៅភូមិកណ្តាល សង្កាត់ប្រាសាទ ក្រុងបាវិត ខេត្តស្វាយរៀង។ ចំពោះជនរងគ្រោះជាឪពុកមានឈ្មោះ លី ចាន់ថន អាយុ៥៦ឆ្នាំ មុខរបរ កសិករ មានទីលំនៅនៅភូមិ ឃុំជាមួយគ្នា ដោយរងរបួសត្រង់កំភូនដៃស្តាំហូរឈាមជាច្រើនបណ្តាលឲ្យស្លាប់នៅនឹងកន្លែងតែម្តង។
សមត្ថកិច្ចនគរបាលបន្តថា នៅមុនពេលមានរឿងកាប់សម្លាប់គ្នាកើតឡើង ដោយឈ្មោះ លី ថែ ជនសង្ស័យត្រូវជាកូនបានផឹកស្រាឡើងស្រវឹងជោគហើយត្រឡប់មកផ្ទះវិញហើយឃើញដើរទ្រេតទ្រោតចង់ដួល ទើបបុរសជាឪពុកបានស្ដីបន្ទោសពីរឿងមិនចេះជួយធ្វើការរកស៊ី ចេះតែដើរផឹកស៊ី ដោយសារឪពុកស្ដីឲ្យ ណាមួយជាតិស្រវឹងចូលខ្លួន ក៏កើតមានទំនាស់ពាក្យសម្ដីគ្នារហូតដល់ស្ទុះទៅយកកាំបិតកាប់ឪពុកបង្កើតទាល់តែស្លាប់ តែម្ដង ។
បច្ចុប្បន្នជនសង្ស័យត្រូវបាននគរបាលឃាត់ខ្លួនយកទៅសាកសួរអធិការដ្ឋាននគរបាលក្រុងបាវិត ដើម្បីកសាងសំណុំរឿងបញ្ជូនទៅតុលាចាត់ការតាមច្បាប់៕
រាជធានីភ្នំពេញ ៖ អគ្គិសនីកម្ពុជា បានចេញសេចក្ដីជូនដំណឹងដល់ប្រជាពលរដ្ឋថា ខ្លួននឹងផ្អាកការផ្គត់ផ្គង់អគ្គិសនី បណ្ដោះអាសន្ន នៅតំបន់មួយចំនួននៅរាជធានីភ្នំពេញ និងខេត្តកណ្ដាលរយៈពេល៤ថ្ងៃ គឺ ចាប់ពីថ្ងៃទី០៨-១១ ខែមិថុនា ឆ្នាំ២០១៧ ដើម្បីបង្កលក្ខណៈងាយស្រួល ដល់ការដ្ឋានពង្រីកផ្លូវ នៅតំបន់ទាំងនោះ។ ព័ត៌មានលម្អិតសូមអានសេចក្តីជូនដំណឹងរបស់អគ្គិសនីកម្ពុជាខាងក្រោម៖
តេហរ៉ង់ ៖ ក្រុមឧទ្ទាម ISIS បានបើកការវាយប្រហារដ៏កក្រើកចំនួន២លើកលើសភាអ៊ីរ៉ង់ និងទៅលើផ្នូររបស់ស្ថាបនិកសាធារណរដ្ឋអ៊ីរ៉ង់លោក Ayatollah Khomeini នៅក្នុងរដ្ឋធានីតេហេរ៉ង់ កាលពីម្សិលមិញបណ្តាលឲ្យមនុស្ស១២នាក់ស្លាប់ និង៤២នាក់ផ្សេងទៀតបានទទួលរងរបួស។ នេះបើយោងតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ។
មន្ត្រីរដ្ឋាភិបាលអ៊ីរ៉ង់បានថ្លែងថា ជនសកម្មប្រយុទ្ធចំនួនបួននាក់ដែលបានបើកការវាយប្រហារទៅលើសភាអ៊ីរ៉ង់ និងពីរផ្សេងដែលបានធ្វើសកម្មភាពនៅផ្នូររបស់លោក Ayatollah Khomeini នោះ ត្រូវបានកម្លាំងសន្តិសុខបាញ់សម្លាប់ ខណៈភេរវករម្នាក់ទៀត ត្រូវចាប់ខ្លួនបន្ទាប់ពីទទួលរងរបួស។ មន្ត្រីដដែលបញ្ជាក់ថា ការវាយប្រហារដ៏កក្រើករបស់ក្រុម ISIS ចំនួនពីរលើកនេះមិនធ្លាប់មានពីមុនមកទៅដោយមានទាំងសកម្មភាពបាញ់ប្រហារ រួមទាំងបំផ្ទុះគ្រាប់បែកអត្តឃាតផងដែរ ។
ជុំវិញករណីនេះក្រុមភេរវករ ISIS តាមរយៈប្រព័ន្ធព័ត៌មានរបស់ខ្លួនឈ្មោះ Amaq បានអះអាងដូច្នេះថា «ក្រុមអ្នកប្រយុទ្ធ ISIS បានដឹកនាំការវាយប្រហារនៅឯផ្នូរ Ayatollah Khomeini និងអាគារសភាអ៊ីរ៉ង់»៕
រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់គណកម្មាធិការជាតិរៀបចំការបោះឆ្នោតឲ្យដឹងថា ស្ថាប័នមួយនេះ ទទួលបានពាក្យបណ្តឹងចំនួន៧១បណ្តឹង ក្នុងនោះមាន២៤បណ្តឹងដែលប្តឹងសុំឲ្យរាប់សន្លឹកឆ្នោតឡើងវិញ។
តាមសចក្តីប្រកាសព័ត៌មានបណ្តឹងសុំឲ្យរាប់សន្លឹកឆ្នោតឡើងវិញនោះរួមមាន បណ្តឹងរបស់គណបក្សប្រជាជនកម្ពុជា និងបណ្តឹងរបស់គណបក្សសង្គ្រោះជាតិ៕
រាជធានីភ្នំពេញ ៖ កម្លាំងនគរបាលអន្តោប្រវេសន៍នៅព្រលឹមថ្ងៃទី០៧ ខែមិថុនា ឆ្នាំ២០១៧នេះបានបន្តចុះឃាត់ខ្លួនជនជាតិវៀតណាមរស់នៅចំនួន១៤នាក់នៅភូមិអូរអណ្តូង និងភូមិបឹងព្រលឹត សង្កាត់ព្រែកប្រា ខណ្ឌច្បារអំពៅ។
ប្រធាននាយកដ្ឋានស៊ើបអង្កេត និងអនុវត្តនីតិវិធីលោកឧត្តមសេនីយ៍ទោ អ៊ុក ហៃសីឡា បានឲ្យដឹងថា ប្រតិបត្តិការនេះកម្លាំងជំនាញបានពិនិត្យឃើញមានជនជាតិវៀតណាមចំនួន២៩នាក់ ស្រី០៥នាក់ ក្នុងនោះប្រើប្រាស់ឯកសារមិនត្រឹមត្រូវចំនួន១៤នាក់ ស្រី០២នាក់។ លោកបញ្ជាក់ថា ក្រោយត្រួតពិនិត្យបានបញ្ជូនជនជាតិវៀតណាមទាំង១៤នាក់ ទៅកាន់អគ្គនាយកដ្ឋានអន្តោប្រវេសន៍ ដើម្បីត្រួតពិនិត្យឯកសារ និងចាត់វិធានការតាមនីតិវិធី៕
ខេត្តកំពង់ធំ ៖ ស្ត្រីមេម៉ាយកូន៣ម្នាក់បានសម្រេចចិត្តចង.កសម្លាប់ខ្លួនបន្សល់ទុកឲ្យកូនរស់នៅកំព្រាគ្មានទីពឹងគួរឲ្យសង្វេគ ព្រោះតែតូចចិត្តគូស្នេហ៍មិនមកសែនព្រេនជាមួយ ដែលករណីនេះកើតឡើង នៅព្រឹកថ្ងៃទី៦ ខែមិថុនា ឆ្នាំ២០១៧នេះ នៅភូមិរនាម ឃុំទំរីង ស្រុកសណ្តាន់ ខេត្តកំពង់ធំ។ ស្ត្រីរងគ្រោះឈ្មោះ គឹម អាង អាយុ ២៩ឆ្នាំ ។ ចំណែកបុរសជាគូស្នេហ៍ឈ្មោះ ញ៉ក់ គ្រី។
នគរបាលប៉ុស្តិ៍ឃុំទំរីងបានប្រាប់ថា ស្ត្រីរងគ្រោះ និងលោក ញ៉ក់ គ្រី បានលួចលាក់ស្រឡាញ់គ្នាជាយូរមកហើយ ប៉ុន្តែបងប្អូនខាងស្រីមិនទាន់ដឹង។ ក្រោយពេលបងប្អូនដឹងរឿង ក៏បាននាំគ្នាស្តីបន្ទោសឲ្យថែមទៀត ដោយតូចចិត្តបងប្អូនស្តីបន្ទោសផង ហើយហៅគូស្នេហ៍មកសែនព្រេនមិនព្រមមកទៀត ក៏ដាច់ចិត្តបញ្ចប់ជីវិតដោយចង.កតែម្តង៕
រាជធានីភ្នំពេញ ៖ ក្រសួងធនធានទឹក និងឧតុនិយមបានចេញសេចក្តីប្រកាសព័ត៌មាន ស្តីពីការ ព្យាករណ៍អាកាសធាតុប្រចាំសប្តាហ៍ចាប់ពីថ្ងៃទី០៦-១២ ខែមិថុនា ឆ្នាំ ២០១៧ ដោយបញ្ជាក់ថា ក្នុងរយៈពេលនេះជ្រលងសម្ពាធទាបបាននិងកំពុងគ្របដណ្តប់លើតំបន់មួយចំនួនរបស់ប្រទេសកម្ពុជា ខណៈខ្យល់មូសុងនិរតីក៏បាននិងកំពុងមានឥទ្ធិពលលើកម្ពុជាផងដែរ។
ស្ថានភាពបែបនេះបណ្តាលឲ្យ តំបន់មួយចំនួនអាចនឹងមានភ្លៀងធ្លាក់ខ្លាំង ពិសេសតំបន់ឆ្នេរ និងនៅលើផ្ទៃសមុទ្រ។ ទន្ទឹមនោះក្រសួងក៏សូមអំពាវនាវដល់បងប្អូនប្រជានេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់៕
រាជធានីភ្នំពេញ ៖ អតីតអគ្គនាយក នៃអគ្គនាយកដ្ឋានពន្ធនាគារ លោក គុយ ប៊ុនសន បានទទួលមរណភាពនៅវេលាម៉ោង២ និង៤០នាទីយប់ឈានចូលថ្ងៃទី០៧ ខែមិថុនា ឆ្នាំ២០១៧នេះ ដោយរោគាពាធ ក្នុងវ័យប្រមាណ៦០ឆ្នាំ។
បើតាមគ្រួសារបានឲ្យដឹងថា សពរបស់លោក បាននឹងកំពុងរៀបចំធ្វើបុណ្យនៅគេហដ្ឋាន ក្នុងសង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ៕
រាជធានីភ្នំពេញ ៖ នៅវេលាម៉ោង២ និង១៥នាទីរំលងអធ្រាត្រឆ្លងចូលថ្ងៃទី០៧ ខែមិថុនា ឆ្នាំ២០១៧នេះមានករណីអគ្គិភ័យឆាបឆេះផ្ទះប្រជាពលរដ្ឋ ស្ថិតក្នុងភូមិថ្មីក្រុមទី៧ សង្កាត់ដង្កោ ខណ្ឌដង្កោ រាជធានីភ្នំពេញ នៅចំណុចជាប់ផ្លូវបេតុងព្រៃស ដែលបណ្តាលឲ្យខូចខាតសំភារៈរួមមានផ្ទះទំហំ ៧ម៉ែត្រគុណ៩ម៉ែត្រ ស្មើ២ខ្នង ធ្វើអំពីថ្មក្រោមឈឺលើ និងតូបជួលចំនួន០៥ ទ្រព្យសម្បត្តិបាត់បង់។
សមត្ថកិច្ចបានឲ្យដឹងថា ក្នុងហេតុការណ៍នេះកម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន០៨គ្រឿង ក្នុងនោះរថយន្តក្រុមហ៊ុនស្រាបៀរកម្ពុជាចំនួន០១គ្រឿង និងរាជធានីភ្នំពេញចំនួន០៧គ្រឿង ដោយធ្វើការបាញ់ពន្លត់អត់ទឹកចំនួន១២ស៊ីទែន មូលហេតុសង្ស័យឆ្លងចរន្តអគ្គិសនី។
ទោះយ៉ាងណានៅមិនទាន់មានប្រភពណាមួយបញ្ជាក់ពីទំហំនៃការខូចខាតនោះនៅឡើយទេ៕
