រាជធានីភ្នំពេញ៖គណបក្សរាជានិយមហ្វ៊ុនស៊ិនប៉ិច នៅព្រឹកថ្ងៃទី១១ ខែ វិច្ឆិកាឆ្នាំ ២០១៦នេះបានរៀបចំ សមាជប្ដូរស្លាកសញ្ញាបក្សថ្មី កែសម្រួលរចនាសម្ព័ន្ធ លក្ខន្តិកៈ និងគោលនយោបាយមួយចំនួនក្រោមអធិបតីភាពសម្ដេចក្រុមព្រះ នរោត្តម រណឫទ្ធិ ព្រះប្រធាន គណបក្ស ។
សមាជនេះ គេសង្កេតឃើញមានការចូលរួមយ៉ាងច្រើនកុះករពីសំណាក់អ្នកគាំទ្រគណបក្សមកពីតាមបណ្តាមូលដ្ឋានទូទាំងប្រទេស៕
បាល់ទាត់៖យោងតាមយោងតាមប្រព័ន្ធផ្សព្វផ្សាយក្នុងប្រទេសបារាំងបានឲ្យដឹងថា ក្រុមមហាសេដ្ឋីរបស់បារាំង Paris Saint-Germain គ្រោងចំណាយកញ្ចប់ទឹកប្រាក់ ១០០ លានអឺរ៉ូក្នុងការចុះហត្ថលេខាទិញយកកីឡាករ Philippe Coutinho និង Firmino របស់ក្រុមហង្សក្រហម Liverpool នាទីផ្សារដោះដូរកីឡាករបើកនៅខែមករាខាងមុខនេះ។
Philippe Coutinho បច្ចុប្បន្នមានការផ្សារភ្ជាប់យ៉ាងខ្លាំងទៅលើការចាកចេញពីទឹកដី Anfield ខណៈដែលមានសេចក្តីរាយការណ៍ថា ក្រុមយក្សលីកកំពូលអេស្ប៉ាញ La Liga ក្រុមអ្នកមានបុណ្យ Barcelona និងអធិរាជស Real Madrid កំពុងនឹងបានបង្ហាញចំណាប់អារម្មណ៍របស់ខ្លួនក្នុងការចុះហត្ថលេខាទិញយករូបគេផងដែរ។
PSG អះអាងថាក្រុមត្រៀមសំណើរួចរាល់សម្រាប់ដាក់ទៅកាន់ក្រុមហង្សក្រហម ដើម្បីនាំយកកីឡាករទាំងពីរនេះ និងគ្រោងចំណាយថវិការហូតដ៏ទៅ១០០ លានអឺរ៉ូ ក្នុងការចុះហត្ថលេខានាំយកកីឡាករដ៏មានឥទ្ធិពលទាំងពីរនេះដើម្បីពង្រឹងក្រុមបន្ថែមទៀត។
គួរបញ្ជាក់ថា តារាបាល់ទាត់អន្តរជាតិប្រេស៊ីលទាំងពីររូប ការបង្ហាញទម្រង់លេងដ៏ល្អរបស់ពួកនៃរដូវកាលថ្មីបានដឹកនាំ Liverpool មកឈរលើកំពូលតារាង អង់ គ្លេស Premier League បណ្តោះអាសន្នជាលើកដំបូងក្នុងរយៈពេលជាងពីរឆ្នាំកន្លះចុងក្រោយមកនេះចាប់តាំងពីខែឧសភា ឆ្នាំ ២០១៤៕
ដោយ៖ប៉ែន សុផល
បាត់ដំបង៖ប្រជាពលរដ្ឋចំនួន៤០គ្រួសាររស់នៅក្នុងភូមិកកោះ ឃុំអូរតាគី ស្រុកថ្មគោលបានរិះគន់ខ្លាំងៗទៅលើក្រុមហ៊ុនម៉ាស៊ីនកិនស្រូវ(ខៀវ ឃាង)មួយកន្លែងនៅតាមបណ្តោយផ្លូវជាតិលេខ៥ចំណុចភូមិកកោះ ឃុំអូរតាគី ស្រុកថ្មគោល ខេត្តបាត់ដំបង ថាបានបង្ហុយលំអងស្រូវមកលើលំនៅដ្ឋាននិងបង្ហូរទឹកស្អុយចូលស្រះទឹកពួកគាត់ផង។
ប្រជាពលរដ្ឋលើកឡើងថា៖ម្ចាស់រោងម៉ាស៊ីនកិនស្រូវ(ខៀវ ឃាង)ខាងលើហាក់បីដូចជាគ្មានការឈឺឆ្អាលអ្វីសោះបណ្តោយអោយលំអងផេះហុយកាន់តែខ្លាំងឡើងៗ និងទឹកស្អុយហូរចេញពីម៉ាស៊ីនឆ្លងចូលស្រះពួកគាត់ប្រើប្រាស់មិនបាន ធ្វើអោយរងការប៉ះពាល់យ៉ាងធ្ងន់ធ្ងរទៅដល់សុខភាពនិងកើតជំងឺផ្សេងៗដល់ប្រជាពលរដ្ឋថែមទៀតផង។
លោក អុន សំអា តំណាងអោយប្រជាពលរដ្ឋបានលើកឡើងផងដែរថា ជារៀងរាល់ថ្ងៃក្រុមហ៊ុនកិនស្រូវ(ខៀវ ឃាង)ខាងលើតែងធ្វើការ២៤ម៉ោងលើ២៤ម៉ោងមិនមានពេលសំរាកហើយថែមទាំងបានបង្ហុយលំអងស្រូវមកលើលំនៅដ្ឋានរបស់ពួកគាត់ធ្វើអោយហុយចូលបាយ ទឹក និងចូលច្រមុះនៅពេលដកដង្ហើមម្តងៗប៉ះពាល់យ៉ាងធ្ងន់ធ្ងរទៅលើសុខភាពនិងផ្លូវដកដង្ហើម ហើយម្យ៉ាងវិញទៀត បានបង្ហូរទឹកស្អុយចូលទៅក្នុងស្រះជាច្រើនដែលពួកគាត់បានរៃអង្គាសលុយគ្នាបូមទឹកដាក់ដើម្បីទុកប្រើប្រាស់នៅរដូវប្រាំងថែមទៀតផង។
ហើយក្នុងនោះដែរពួកគាត់សំណូមពរដល់អាជ្ញាធរ និងមន្ត្រីជំនាញជួយមានវិធានការឆាប់ៗទៅលើទីតាំងក្រុមហ៊ុនកិនស្រូវខាងលើនេះផងដើម្បីអោយពួកគាត់បានរស់នៅស្រួលប្រកបដោយសុខភាពល្អនិងគ្មានជម្ងឺផ្សេងៗផង។
ពាក់ព័ន្ធទៅការលើកឡើងខាងលើ លោក ប៉ង់ ណាប់ មេឃុំអូរតាគី បានប្រាប់សារព័ត៌មានយើងនៅរសៀលថ្ងៃទី១០ ខែវិច្ឆិកា ឆ្នាំ២០១៦នេះថា៖បញ្ហារឿងទឹកស្អុយហូរចេញពីរោងម៉ាស៊ីនកិនស្រូវចូលទៅក្នុងស្រះទឹកប្រជាពលរដ្ឋខាងលោកធ្លាប់បានចុះទៅធ្វើការនែនាំអោយខាងរោងម៉ាស៊ីនដឹកដីយកមកចាក់ទប់តាំងពីឆ្នាំ២០១៥មកម្លេះដោយខាងរោងម៉ាស៊ីនចេះតែពន្យារពេលរហូតហើយឆ្នាំនេះព្រមព្រៀងគ្នានិងចាក់នៅខែប្រាំងនេះ ចំណែក ពាក់ព័ន្ធនិងការហុយ វិញលោកថាជាការធម្មតាទេតែមានខ្យល់គឺតែងតែមានហុយប៉ះពាល់ខ្លះហើយប៉ុន្តែមិនស្តីទេខែប្រាំងនេះគេនិងចាត់ចែងធ្វើហើយ។
ចំណែក លោកជួប សារុន ប្រធានមន្ទីរបរិស្ថានខេត្តបាត់ដំបងជំវិញទៅនិងបញ្ហាខាងលើនេះលោកបានប្រាប់សារព័ត៌មានយើងនៅព្រឹកថ្ងៃទី១១វិច្ឆិកានេះថា៖បើសិនជាមានករណីម៉ាស៊ីនកិនស្រូវខាងលើធ្វើអោយមានផលប៉ះពាល់ដល់ប្រជាពលរដ្ឋដូចជាការលើកឡើងមែននោះសូមអោយពលរដ្ឋផ្តិតមេដៃមកលោកនិងចាត់អោយកូនចៅចុះទៅមើលធ្វើការនោះភ្លាម៕
រាជធានីភ្នំពេញ៖ខណៈដែលកម្លាំងសមត្ថកិច្ចជាច្រើនបាននិងកំពុងចេញប្រតិបត្តិការស្វែងរកកីឡាករអុំទូក ២នាក់ដែលបានបាត់ខ្លួនទឹកទន្លេ ក្រោយពេលទូក ង របស់ជនរងគ្រោះ បុកជាមួយ ទូកទេសចរណ៍ នៅមុខព្រះបរមរាជវាំង ពេលដែលកំពុងសណ្តោង យកមកអុំប្រណាំងសាកល្បងនៅព្រឹកនេះ។
តាមប្រភពព័ត៌មានពីអាជ្ញាធរនៅកន្លែងកើតហេតុបានបញ្ជាក់ថា ជនរងគ្រោះ២នាក់ ក្នុងចំណោម៩នាក់ ដែលនៅលើទូក នៅមិនទាន់រកឃើញនៅឡើយទេ រហូតមកដល់ពេលនេះ ហើយនៅពេលនេះកម្លាំងប្រតិបត្តិការ បានចេញជួយស្វែងរកជាច្រើន អូប័រ។
គួរបញ្ជាក់ថា ទូក ង មកពីវត្តអម្ពវ័ន្ត ស្ថិតនៅសង្កាត់ព្រែកថ្មី ខណ្ឌច្បារអំពៅ មានឈ្មោះថា រស្មីស្រីស្រស់ដាញ់ទិព្វសែនជ័យ ពេលសណ្តោងមក ប្រណាំងសាកល្បង នៅព្រឹកថ្ងៃទី១១ ខែវិច្ឆិកា ឆ្នាំ២០១៦នេះ ស្រាប់តែបុកជាមួយ ទូកទេសចរណ៍ បណ្តាលឲ្យលិច នៅមុខព្រះបរមរាជវាំង៕
រាជធានីភ្នំពេញ៖សំណុំរឿងលោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម នៃគណបក្សសម រង្ស៊ី ក្រោមការចោទប្រកាន់ពីបទ សូកប៉ាន់សាក្សី ពាក់ព័ន្ធរឿងអាស្រូវផ្លូវភេទរបស់លោក កឹម សុខា និង កញ្ញា ខុម ចាន់តារាទី ហៅស្រីមុំ សាលាដំបូងរាជធានីភ្នំពេញនៅព្រឹកថ្ងៃទី១១ ខែវិច្ឆិកា នេះបានបន្តសវនាការ ។
សវនាការនេះដឹកនាំដោយលោក កោ វណ្ឌី អនុប្រធានសាលាដំបូងរាជធានីភ្នំពេញ និង លោក សៀង សុខ ជាតំណាងអយ្យការ។
គួរបញ្ជាក់ថា លោក ស៊ាង ចែត ត្រូវបានចោទប្រកាន់ពីបទ សូកប៉ាន់សាក្សីតាមមាត្រា៥៤៨នៃក្រមព្រហ្មទណ្ឌ ។ បទល្មើសសូកប៉ាន់សាក្សី កំណត់ការផ្តន្ទាទោសពី៥ឆ្នាំទៅ១០ឆ្នាំ៕
ខេត្តសៀមរាប៖តុលាការបានសម្រេចឃុំខ្លួនមន្ត្រីអាជ្ញាធរអប្សរា៥នាក់ ដែលពាក់ព័ន្ធនឹងការកាប់ដើមគ្រញូងនៅឧទ្យានជាតិអង្គរខេត្តសៀមរាបកាលពីរសៀលថ្ងៃទី១០ ខែវិច្ឆិកា ឆ្នាំ២០១៦ម្សិលមិញនេះ បន្ទាប់ពីសមត្ថកិច្ចបានចាប់ និងបញ្ជូនទៅកាន់សាលាដំបូងខេត្តសៀមរាប។
លោកស្នងការរងនគរបាលខេត្តសៀមរាបដដែលរូបនោះបានបញ្ជាក់ថា តុលាការបានសម្រេចឃុំខ្លួនបណ្តោះអាសន្ន ដោយចោទប្រកាន់ពីបទ៖ «ផ្តើមគំនិតប្រមូលផល អនុផល ព្រៃឈើជាប្រភេទឈើចំណាត់ថ្នាក់ ដែលមិនទាន់អនុញ្ញាតឲ្យប្រមូល»។
មន្ត្រីអាជ្ញាធរអប្សរាទាំង៥នាក់នោះ រួមមានទី១៖ ឈ្មោះ ឈ ថាណាត ជាអគ្គនាយករងអាជ្ជាធអប្សារា ទទួលបន្ទុកនាយកដ្ឋានគ្រប់គ្រងព្រៃឈើ ទេសភាពវប្បធ៌មនិងបរិដ្ឋាន, ទី២៖ ឈ្មោះ ចេវ ផល ប្រធានការិយាល័យការពារបរិស្ថាន អាជ្ញាធអប្សារា ដែលត្រូវចាប់ខ្លួននៅព្រឹកថ្ងៃទី៩ ខែវិច្ឆិកា, ទី៣៖ ឈ្មោះ ឡី ជាតិ ជាអ្នកបើកបររថយន្ត អាជ្ញាធរអប្សរា, ទី៤៖ ឈ្មោះ ទូច តេត្រា ជាប្រធានការិយាល័យគ្រប់គ្រងហានិភ័យ ព្រៃឈើអាជ្ញាធរអប្សារា និងទី៥ ឈ្មោះ ខាន ង៉ិក ជាអ្នកបើកបរ រថយន្តអាជ្ញាធរអប្សារា ដែលត្រូវចាប់ខ្លួននៅពេលរសៀល។
ការចាប់ខ្លួនជនពាក់ព័ន្ធទាំងនេះ បានធ្វើឡើងបន្ទាប់ពីមានបញ្ជាដោយផ្ទាល់របស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ក្រោយពីកើតហេតុ។
សូមបញ្ជាក់ថា ឈើគ្រញូងមួយដើមយ៉ាងធំនៅក្នុងឧទ្យានជាតិអង្គរ ដែលមានអាយុត្រូវបានគេលួចកាត់ កាលពីយប់ថ្ងៃទី០៤ ខែវិច្ឆិកា ឆ្នាំ២០១៦។ ដើមគ្រញូងមាន អង្កត់ផ្ចិត ៨៣០សង់ទីម៉ែត្រ (៨.៣តឹក) ប្រវែងជាង៨ម៉ែត្រ នៅមាត់កសិន្ធអង្គរធំ ខាងកើតវត្តថ្មីដំរីសែនជ័យ ស្ថិតនៅភូមិនគរក្រៅ សង្កាត់គោកចក ក្រុងសៀមរាប៕
ខេត្តកំពង់ស្ពឺ៖នារីវ័យក្មេងក្រមុំម្នាក់ដែលបានលួចលាក់ទៅសហាយស្មន់ជាមួយប្តីគេ ហើយពង្រត់គ្នាតាំងពីភ្នំពេញរហូតទៅដល់ស្រុកបរស៊ែត ទើបប្រពន្ធដើមនាំកូនទៅតាមទាន់កន្លែងដែលកំពុងក្រេបទឹកឃ្មុំជាមួយគ្នានៅក្នុងផ្ទះស្ថិតនៅភូមិសង្គ្រោមបូរ ឃុំបរស៊ែត ស្រុកបរស៊ែត ខេត្តកំពុងស្ពឺ កាលពីវេលាម៉ោង៨យប់ថ្ងៃទី២៦ ខែតុលា ឆ្នាំ២០១៦។
តាមការរៀបរាប់ពីប្រពន្ធដើមបានអោយដឹងថា នារីវ័យក្មេងដែលលួចលាក់សាហាយស្មន់ជាមួយប្តីរបស់គាត់នោះឈ្មោះ ស្រី ណុច អាយុប្រហែលជា២៣ឆ្នាំ ជានារីកម្មកររោងចក្រ ស្នាក់នៅជិតវត្តអង្គមេត្រី ស្រុកអង្គស្នួល ខេត្តកណ្តាល នាងបានលួចទាក់ទងជាមួយប្តីរបស់គាត់អស់រយ:ពេលជាង៦ខែហើយ ហើយនាងបានលួងលោមប្តីរបស់គាត់លក់របស់របរគ្មានសល់ទើបរូបខ្លួនសង្ស័យក៏តាមដានរហូតដ៏ទីតាំងកើតហេតុខាងលើតែម្តង។
ក្រោយពេលកើតហេតុប្រពន្ធដើមបានហៅអាជ្ញាធរមូលដ្ឋានមកដោះស្រាយដើម្បីចរចាគ្នាថ្ងៃក្រោយ៕
រាជធានីភ្នំពេញ៖តុលាការកំពូលនឹងបើកសវនាការសំណុំរឿងមន្ត្រីសមាគមការពារសិទ្ធិមនុស្សអាដហុក៤រូប និងអគ្គលេខាធិការរងគណៈកម្មាធិការជាតិរៀបចំការបោះឆ្នោតមួយរូបនៅព្រឹកថ្ងៃទី២៣ ខែវិច្ឆិកាខាងមុខនេះ។
សវនាការនេះដឹកនាំដោយលោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និងលោក ឈួន ចាន់ថា ជាតំណាងមហាអយ្យការ ។ កម្មវត្ថុនៃសវនាការនេះគឺ បណ្តឹងសុំមោឃភាពនីតិវិធីរបស់សាលាដំបូងរាជធានីភ្នំពេញ។
មន្ត្រីអាដហុក៤រូបនិងមន្ត្រីគជប ជាប់ចោទពីបទសូកប៉ាន់សាក្សី និងសមគំនិតក្នុងអំពើសូកប៉ាន់សាក្សីដល់អ្នកនាង ខុម ចាន់តារ៉ាទី ហៅស្រីមុំ ដើម្បីកុំឲ្យអ្នកនាងនិយាយការពិតប្រាប់សមត្ថកិច្ចចំពោះរឿងអាស្រូវផ្លូវភេទរបស់លោក កឹម សុខា ប្រធានស្តីទីគណបក្សសង្គ្រោះជាតិ។
ជនជាប់ចោទទាំងអស់នេះរួមមាន៖លោក នី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និង លោកស្រី លឹម មុន្នី មន្ត្រី ជាន់ខ្ពស់សមាគមអាដហុក ត្រូវបានលោកព្រះរាជអាជ្ញារង គុជ គឹមឡុង ចោទពីបទ សូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ ។
ដោយឡែកលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ ។ ជាមួយគ្នានេះ លោក សឺន សាលី ជាមន្ត្រីអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ក៏ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សីផងដែរ។ បទល្មើសសូកប៉ាន់សាក្សី កំណត់ការផ្តន្ទាទោសពី៥ឆ្នាំទៅ១០ឆ្នាំ៕
រាជធានីភ្នំពេញ៖មនុស្ស៣នាក់បានស្លាប់ក្នុងហេតុការណ៍បាញ់ប្រហារ នៅក្នុងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសំអាតមីន និងកាកសំណល់សង្គ្រាម គ្រាដែលស្រីស្នេហ៍របស់ជនដៃដល់ និងជនរងគ្រោះបានស្លាប់ក្រោយពេលបញ្ជូនទៅសង្គ្រោះនៅមន្ទីរពេទ្យកាល់ម៉ែត។
សមត្ថកិច្ចម្នាក់បានលួចបង្ហើបថា មូលហេតុដែលនាំឲ្យមានការបាញ់ប្រហារនេះ ក៏ដោយសារតែ ជនដៃដល់ កាលពីយប់មិញ បានបបួលនារីជាស្រីស្នេហ៍ទៅក្រៅ ប៉ុន្តែនាងមិនទៅ ពីព្រោះជាប់នៅជាមួយជនរងគ្រោះ ដែលជាមន្ត្រីយោធាផ្កាយ២ ទើបឈានទៅដល់ការឈ្លោះគ្នា ហើយបាញ់ប្រហារតែម្តង។ ក្រោយបាញ់ជនរងគ្រោះទាំង២នាក់ហើយ ជនដៃដល់បានបាញ់សម្លាប់ខ្លួនឯងផងដែរ៕
បាល់ទាត់៖លោក Albert Botines ទីភា្នក់ងាររបស់កីឡាករ Hector Bellerin បានឲ្យដឹងថា មកដល់ពេលនេះ Bellerin យល់ព្រមចុះហត្ថលេខានៅលើកុងត្រារយៈពេលវែងថ្មីជាមួយក្រុមកាំភ្លើងធំ Arsenal ហើយ។
កីឡាករវ័យ២១ឆ្នាំរូបនេះ បច្ចុប្បន្នមានកំពុងតែមានការចំណាប់អារម្មណ៍ពីសំណាក់ Barcelona និង Manchester City ខណៈ Arsenal គេកំពុងស្ទុះស្ទាក្នុងការទប់ស្កាត់ ប៉ុន្តែឥឡូវនេះ Bellerin យល់ព្រមចុះហត្ថលេខានៅលើកុងត្រារយៈពេលវែងថ្មីជាមួយនឹងក្រុមកាំភ្លើងធំ ។
Bellerin បាននិយាយនៅលើគេហទំព័រផ្លូវការរបស់ Arsenal “ខ្ញុំពិតជារីករាយនៅឯ Arsenal ហើយឋខ្ញុំស្រឡាញ់ក្រុមមួយនេះ ខ្ញុំចង់បន្តអនាគតដល់វែងឆ្ងាយជាមួយនឹងកាំភ្លើងធំ”។រឿងនេះនឹងក្លាយទៅជាលើកទីបួន ដែលគាត់បានចុះហត្ថលេខានៅលើកុងត្រាថ្មីនៅឯក្រុម ហើយវាពិតជាច្បាស់ណាស់ដែលគាត់នឹងបង្កើតឱ្យមានការរីកចម្រើនយ៉ាងល្អ”៕
រាជធានីភ្នំពេញ៖សេចក្តីរាយការណ៍ជំហានដំបូងឱ្យដឹងថា យ៉ាងហោចណាស់ មនុស្សម្នាក់ស្លាប់នៅនឹងកន្លែង និង២នាក់ទៀតបានរងរបួសធ្ងន់-ស្រាល ក្នុងហេតុការណ៍ផ្ទុះអាវុធបាញ់ជាច្រើនគ្រាប់ ស្ថិតនៅក្នុងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាម បង្កឱ្យភ្ញាក់ផ្អើលនៅវេលាម៉ោង០៩ និង៥០នាទីព្រឹកថ្ងៃទី១០ វិច្ឆិកា នេះ ស្ថិតនៅតាមបណ្តោយផ្លូវលេខ៥៥៤ កែងផ្លូវ៣១៣ សង្កាត់បឹងកក់២ ខណ្ឌទួលគោក រាជធានីភ្នំពេញ ។
សេចក្តីរាយការណ៍បន្តថា ក្នុងករណីនេះបណ្តាលឲ្យស្លាប់មន្ត្រីយោធាម្នាក់ ថ្នាក់ឧត្តមសេនីយ៍ទោទៀតផង និងរបួសម្នាក់ ដែលបណ្តាលមកពីរឿង ស្នេហា។
សេចក្តីរាយការណ៍ដដែលបញ្ជាក់ថា ជនដៃដល់មានឈ្មោះ សែន រដ្ឋា ថ្នាក់អនុសេនីយ៍ បានបាញ់ លោកឧត្តមសេនីយ៍ទោ អ៊ុំ សុធា ប្រធាននាយកដ្ឋានធនធានមនុស្សបណ្តាលឲ្យស្លាប់ និងម្នាក់ទៀត របួសជាស្ត្រីត្រូវគេបញ្ជូនទៅសង្គ្រោះនៅមន្ទីរពេទ្យ ដោយផ្តើមចេញពីរឿង ស្នេហា។
ទោះជាយ៉ាងណាជនដៃដល់ក្នុងករណីនេះត្រូវបានគេរាយការណ៍ថា បានបាញ់សម្លាប់ខ្លួនឯងផងដែរ៕
រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី០៩ ខែវិច្ឆិកា ឆ្នាំ២០១៦ម្សិលមិញនេះមានប្រជាពលរដ្ឋខ្មែរចំនួន៦,៩៦៥,៩៣៥នាក់ហើយ បានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត គ.ជ.ប៕
រាជធានីភ្នំពេញ៖ដើម្បីការពារករណីផ្សេងៗដែលអាចកើតមានឡើងក្នុងពិធីបុណ្យអុំទូកខាងមុខនេះ នគរបាលជាតិបានបង្ហាញលេខទូរស័ព្ទចំនួន១៦ខ្សែ ដើម្បីងាយស្រួលឲ្យប្រជាពលរដ្ឋរាយការណ៍នូវមុខសញ្ញាដែលទាក់ទងនឹងករណីចោរលួច, ឆក់, ដាក់ថ្នាំសណ្តំ ឬករណីផ្សេងៗទៀត។
ព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក នឹងប្រព្រឹតទៅនៅថ្ងៃទី១៣-១៤-១៥ ខែវិច្ឆិកា ឆ្នាំ២០១៦។
ខាងក្រោមនេះជាលេខទូរស័ព្ទដែលអាចឲ្យប្រជាងពលរដ្ឋទាក់ទងបាន ២៤ម៉ោង៖ ០១៧ ៥៦២ ២២២, ០៩៧៦ ៦៦៨ ៨៨១, ០៩៧ ៦៦៦ ៦៧៦, ០៩៧៩ ៣០៩ ៩៩៩, ០៧៧ ៨០៧ ៧៧៧, ០១២ ៨០៩ ៩៧៩, ០១២ ៥៨៦ ៥៤៩, ០១២ ៥១១ ៣៣៣, ០១២ ៩៣០ ៧៧៧, ០១២ ៥០២ ៤២៤, ០១៧ ៨២២ ០២២, ០១៧ ៨៤៥ ១៦៨, ០១១ ៧០៦ ៧០៦, ០១២ ៨៩៨ ៨៩១, ០១២ ៩៥០ ២៧២, ០១២ ២៧២ ២២៤៕
រាជធានីភ្នំពេញ៖សាលារាជធានីភ្នំពេញ បាននិងកំពុងរៀបចំការស្នាក់នៅ របស់កីឡាករអុំទូកទាំង ១៧ ០០០នាក់ ចំនួន ៥មណ្ឌល ដើម្បីឲ្យពួកគាត់បានសម្រាក់ ក្នុងឱកាសដែលនឹងមកចូលរួម ការប្រណាំងអុំទូក ទាំង៣ថ្ងៃ គឺចាប់ពី ថ្ងៃទី១៣-១៤-១៥ ខែវិច្ឆិកា ឆ្នាំ២០១៦ខាងមុខនេះ។
យោងតាមបណ្ដាញទំនាក់ទំនងសង្គម (Facebook) លោក ប៉ា សុជាតិវង្ស អភិបាលរាជធានីភ្នំពេញ បានលើកឡើងថា “រដ្ឋបាលរាជធានីភ្នំពេញ បាននិងកំពុងរៀបចំមណ្ឌលស្នាក់នៅ ដូចជា ទី១. សាងសង់រោងចំនួន ១៥០រោង, ទី២. សាងសង់បង្គន់ចំនួន ២០០បង្គន់, ទី៣. សាងសង់បន្ទប់ងូតទឹករួម ចំនួន ៣៤កន្លែង, ទី៤. រៀបចំកន្លែងដាំបាយចំនួន ៣៦កន្លែង និងទី៥. ផ្គត់ផ្គង់ភ្លើងបំភ្លឺផ្លូវ និងក្នុងរោងស្នាក់នៅ”។
លោកបានបន្តថា ជាមួយគ្នានោះ សាលារាជធានី នឹងរៀបចំផ្គត់ផ្គង់ទឹកស្អាត ដោយតបណ្តាញបំពង់រដ្ឋាករទឹក ប្រវែង ៤គ.ម, រៀបចំដេប៉ូ និងប្រមូលសំរាម, សាងសង់រោងគណៈកម្មាការស្នាក់នៅ, ស្នាក់ការគិលានសង្គ្រោះបន្ទាន់ និងរៀបចំប្រគុំតន្ត្រីចំនួន ២កន្លែង សម្តែងដោយមន្ទីរវប្បធម៌ និងវិចិត្រសិល្បៈរាជធានីភ្នំពេញ និងអាជ្ញាធរជាតិប្រឆាំងជម្ងឺអេដស៍។
សូមបញ្ជាក់ថា ក្នុងឱកាស ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ទាំង៣ថ្ងៃ មានទូកងមកពីរាជធានី-ខេត្ត ចូលរួមប្រកួតមានចំនួន ១៥៦ទូក។ ដើម្បីបញ្ចៀសនូវការកក់ស្ទះចរាចរណ៍ លោកអភិបាលរាជធានី ក៏បានប្រកាស ហាមមិនឲ្យរថយន្តធុនធ្ងន់ៗ បើកបរចូលក្នុងរាជធានីភ្នំពេញនោះទេ និងការដ្ឋានសំណង់ផ្លូវនានា ក៏បានឲ្យផ្អាកដំណើរការ ចំនួន ៤ថ្ងៃដែរ គឺចាប់ពីថ្ងៃទី១២ ដល់ថ្ងៃទី១៥ ខែវិច្ឆិកា។
ដោយឡែក ចំពោះបញ្ហាសន្តិសុខវិញ នឹងប្រើប្រាស់កម្លាំង ប្រមាណជាង ១ម៉ឺននាក់ ដើម្បីការពារសុវត្ថិភាព សណ្ដាប់ធ្នាប់សាធារណៈ ជូនបងប្អូនប្រជាពលរដ្ឋខ្មែរ ដែលនឹងមកចូលរួមកម្សាន្តសប្បាយ ផងដែរ៕
ខេត្តកំពត៖សមត្ថកិច្ចបានចាប់វ៉ៃខ្នោះ អនុរដ្ឋលេខាធិការក្រសួងធម្មការម្នាក់ ឈ្មោះ នាក់ សំបូរ អាយុជាង៣០ឆ្នាំ រឿងជំពាក់ប្រាក់អ្នកលក់គ្រឿងសំណង់ រហូតដល់ជាង២០ម៉ឺនដុល្លារ ដើម្បីយកទៅកសាងវត្តមួយនៅខេត្តកំពត ដើម្បីចង់បានងារជាឧកញ៉ា។
លោក ហែម ចាន់ដារ៉ា មេបញ្ជាការ PM ខេត្តបានឲ្យដឹងថា ការចាប់ខ្លួនជនសង្ស័យរូបនេះ បានធ្វើឡើងនៅវេលាម៉ោងជាង១១ព្រឹកថ្ងៃទី៩ ខែវិច្ឆិកា ឆ្នាំ២០១៦ ស្ថិតនៅចំណុច ភូមិត្រពាំងរាំង ឃុំតានី ស្រុកអង្គរជ័យ ខេត្តកំពត ដោយអនុវត្តតាមដីកាបង្គាប់ឱ្យចាប់ខ្លួន ឃុំខ្លួនចុះថ្ងៃទី២១ ខែកក្កដា ឆ្នាំ២០១៥ របស់លោក ហុង សុគុណវឌ្ឍនា ចៅក្រមស៊ើបសួរ នៃសាលាដំបូងខេត្តកំពត ពីបទ «រំលោភលើទំនុកចិត្ត»។ លោកថា ការចាប់ខ្លួនជនសង្ស័យរូបនេះ ដោយសារតែគាត់ ទិញគ្រឿងសំណង់របស់គេ យកទៅកសាងវត្តរហូតដល់ជាង២០ម៉ឺនដុល្លារ តែមិនព្រមសង។
យ៉ាងណាក៏ដោយ មន្ត្រីក្រសួងធម្មការម្នាក់ បានឲ្យដឹងថា លោក នាក់ សំបូរ ពិតជាមានតួនាទី ជាអនុរដ្ឋលេខាធិការក្រសួងធម្មការ ពិតប្រាកដមែន តែទើបនឹងទទួលបានព្រះរាជក្រឹត្យ តែងតាំងនាពេលថ្មីៗនេះទេ ។ លោកថា លោក នាក់ សំបូរ ពីមុនធ្លាប់បួសជាព្រះសង្ឃនៅប្រទេសថៃ ហើយក្រោយមកត្រូវបានតែងតាំងជាជំនួយការលោក មិន ឃិន អតីតរដ្ឋមន្ត្រីក្រសួងធម្មការ តែក្រោយពេលលោក មិន ឃិន ស្លាប់ទៅ ស្រាប់តែទៅរត់ការ បានរហូតជាអនុរដ្ឋលេខាធិការក្រសួងតែម្តងធ្វើឲ្យគេភ្ញាក់ផ្អើលគ្រប់គ្នា តែម្តង៕
