ខេត្តសៀមរាប៖ទីបំផុតមន្ត្រីជាន់ខ្ពស់ដែលមានតួនាទី និងមុខតំណែងការពារអភិរក្សព្រៃឈើរបស់អាជ្ញាធរអប្សរា២នាក់ត្រូវបានចាប់ខ្លួនក្នុងសំណុំរឿងឧក្រិដ្ឋកាប់រំលំដើមគ្រញូងដ៏ធំមហិមាមានមុខកាត់ដល់ជិតមួយម៉ែត្រ នៅក្នុងតំបន់អង្គរកាលពីល្ងាចថ្ងៃទី០៥ វិច្ឆិកា កន្លងទៅថ្មីៗ ដែលការឃាត់ខ្លួននេះធ្វើឡើងកាលពីវេលាព្រឹកថ្ងៃទី០៩ វិច្ឆិកា។
អភិបាលខេត្តសៀមរាប លោក ឃឹម ប៊ុនសុង បានមានប្រសាសន៍ថា ការចាប់ខ្លួនជនសង្ស័យទាំង២នាក់នេះ ធ្វើឡើងទៅតាមបទបញ្ជាដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា ចំពោះការបំផ្លិចបំផ្លាញសម្បត្តិជាតិដ៏កម្រ និងមានតម្លៃ ។
ជនបានចាប់ខ្លួនម្នាក់ឈ្មោះឈរ ថាណាត អគ្គនាយករងទទួលបន្ទុកព្រៃឈើនៃអាជ្ញាធរអប្សារា និងម្នាក់ទៀតឈ្មោះចេវ ផល ប្រធានការិយាល័យគ្រប់គ្រងព្រៃឈើនៃអាជ្ញាធរអប្សារា ដើម្បីយកមកទទួលខុសត្រូវចំពោះមុខច្បាប់ ។
លោកបានបន្ថែមថា បច្ចុប្បន្នជនសង្ស័យទាំងពីរកំពុងឆ្លិចយកចម្លើយបន្ថែម ដោយមន្ត្រីរដ្ឋបាលព្រៃឈើ មុនបញ្ជូនទៅកាន់ស្ថានអយ្យការអមសាលាដំបូងខេត្ត ដើម្បីបើកការចោទប្រកាន់ទៅតាមនិតិវិធី ។ ចំណែកវត្ថុតាងឈើគ្រញូង ដែលកំពុងថែរក្សាទុកបណ្តោះអាសន្ន នៅរដ្ឋបាលព្រៃឈើ នឹងត្រូវយកទៅឆ្លាក់ជាព្រះពុទ្ធរូប សម្រាប់ទុកជាការគោរពសក្ការៈរបស់ពុទ្ធិបរិស័ទទាំងពួង៕
លោក ដូណាល់ ត្រាំ បានក្លាយជាប្រធានាធិបតីអាមេរិកទី ៤៥ ដោយបានយកឈ្នះលើលោកស្រី ហ៊ីលឡារី គ្លីនតុន នៅក្នុងការបោះឆ្នោតថ្ងៃទី ៨វិច្ឆិកា។ ជាបេក្ខជនមកពីបក្សសាធារណរដ្ឋ លោក ដូណាល់ត្រាំ គឺជាមហាសេដ្ឋីដ៏កំពូលម្នាក់របស់អាមេរិក ជាអ្នកជំនួញធំ ក្នុងវិស័យអចលនទ្រព្យ មុននឹងចូលប្រលូកនយោបាយ។
កើតនៅថ្ងៃទី ១៤ មិថុនា ឆ្នាំ ១៩៤៦ នៅក្រុងញូវយ៉ក ក្នុងសង្កាត់ដែលកាលសម័យនោះមានតែជនជាតិស្បែកសរស់នៅ។ ដល់អាយុចូលសាលា លោក ដូណាល់ ត្រាំ ទៅបានឪពុកម្តាយបញ្ជូនទៅរៀននៅក្នុងសាលាយោធា ដើម្បីបំពត់អត្តចរិករប៉ិលរប៉ូច ចាប់មិនឈ្នះ។
លោកជាកូនទី៥ក្នុងត្រកូលអ្នកជំនួញ និងជាគ្រួសារអន្តោប្រវេសន៍ ដោយមានឪពុកជាជនជាតិអាល្លឺម៉ង់ ធ្វើដំណើរផ្សងព្រេងតាមកប៉ាល់មកអាមេរិក និងម្តាយជាជនជាតិអេកូស។ ត្រកូល ត្រាំ ជាគ្រួសារគំរូរបស់អាមេរិក តំណាងជោគជ័យ ប្រឹងប្រែងរកស៊ីខ្លាំង និងបានចូលរួមចំណែកអភិវឌ្ឍន៍ សង្កាត់ Jamaica Estates ដោយសាងសង់ផ្ទះយ៉ាងច្រើន។
ក្រោយបញ្ចប់ការសិក្សាផ្នែកពាណិជ្ជកម្មនៅសកលវិទ្យាល័យ Pennsylvanie លោក ដូណាល់ ត្រាំ បានចូលធ្វើការក្នុងក្រុមហ៊ុនរបស់ឪពុកនៅឆ្នាំ១៩៦៨។ នៅឆ្នាំ១៩៧១ លោក ដូណាល់ត្រាំ បានទទួលជំនួយពីឪពុក ចំនួន១លានដុល្លារ ដើម្បីផ្សងព្រេងក្នុងវិស័យអចលនទ្រព្យ និងគ្រប់គ្រងក្រុមហ៊ុនរបស់គ្រួសារបន្ត។ ប៉ុន្តែខុសឪពុក ដែលសង់ផ្ទះសម្រាប់គ្រួសារឋានៈមធ្យម ថ្នាក់កណ្តាល លោក ដូណាល់ ត្រាំ ជ្រើសរើសភាពទំនើបនិងប្រណិតៗ អាគារខ្ពស់ៗ កាស៊ីណូ សណ្ឋាគារ … នៅសង្កាត់ម៉ាណាតាន់ កណ្តាលទីក្រុងញូវយ៉ក ក្នុងពេលដែលតម្លៃនៅថោកនៅឡើយ។ ជំនួញរបស់លោក បានផ្តល់ផ្លែផ្កានិងជោគជ័យខ្លាំង ! នៅឆ្នាំ១៩៨០ លោកបានក្លាយជាអ្នកជំនួញ ដែលមានជោគជ័យបំផុត និងក្លាយជាមហាសេដ្ឋី មានប្រាក់ដល់ទៅវាល់ពាន់លានដុល្លារ។
នៅឆ្នាំ១៩៩០ ជីវិតឯកជនរបស់បានផ្ទុះឡើងយ៉ាងផុសផុលក្នុងទំព័រមុខរបស់សារព័ត៌មាន អាមេរិក។ ការលែងលះលើកដំបូងរបស់លោក បានចំណាយប្រាក់អស់រាប់លាន។ លោក ដូណាល់ ត្រាំ ឆ្លងកាត់ការខាតបង់ ដល់ទៅបួនដងតែអាចស្ទុះងើបឡើងវិញ រហូតឈ្មោះលោកបានក្លាយ ម៉ាក ៖ ម៉ាកផលិតផលប្រណិត ម៉ាកស្រា vodka ម៉ាកសាច់គោ Steaks Trump។ ភាពល្បីល្បាញរបស់លោកបានរីកកាន់ធំ ដោយលោកធ្លាប់ធ្វើជាពិធីករទូរទស្សន៍ ជាតារាដ៏ល្បីល្បាញ ក្នុងកម្មវិធី The Apprentice ដែលមានអ្នកតាមដានទស្សនាដល់ទៅជាង៥០លាននាក់។
លោកបានចូលប្រលូកក្នុងជីវិតនយោបាយនៅឆ្នាំ១៩៨០ ក្នុងនាមជាអ្នកប្រជាធិបតេយ្យ បន្ទាប់មកបានផ្តាច់ខ្លួនមកចូលបក្សសាធារណរដ្ឋនៅឆ្នាំ១៩៨៧ ហើយត្រលប់ចូលទៅបក្សប្រជាធិបតេយ្យវិញ នៅសម័យលោក ចច ប៊ូសជាប្រធានាធិបតី ព្រមទាំងបានសម្តែងការគាំទ្រលោកស្រីគ្លីនតុន នៅឆ្នាំ២០០៨ផង។
លោកបានសាកល្បងឈរឈ្មោះជាបេក្ខជនប្រធានាធិបតី ម្តងជាពីរដង (១៩៨៨-២០០០)មិនបានសម្រេច ទើបនៅឆ្នាំ២០១២ លោកបានវិលមកកាន់បក្សសាធារណរដ្ឋ ជាមួយនឹងការគាំទ្រ លោក មីតរ៉ូមនី និងបានក្លាយជាបេក្ខជនប្រធានាធិបតីបក្សសាធារណរដ្ឋ ដោយគ្មាននរណាគិតដល់ នៅឆ្នាំ២០១៥។ នៅថ្ងៃទី៨ វិច្ឆិកា ២០១៦ លោក បានបង្កការភ្ញាក់ផ្អើល ដោយបានជាប់ឆ្នោតក្លាយជាប្រធានាធិបតីអាមេរិកទី៤៥៕
វ៉ាស៊ីនតោន៖សារព័ត៌មាន Channel News Asia បានចេញផ្សាយថា ប្រធានាធិបតីអាមេរិកផុតអាណត្តិលោក បារ៉ាក់ អូបាម៉ា នឹងជួបពិភាក្សាការងារជាមួយនឹងប្រធានាធិបតីអាមេរិកដែលទើបតែជាប់ លោកដូណាល់ ត្រាំ នៅឯសេតវិមាននៅថ្ងៃនេះ ស្ដីពីការផ្ទេរតំណែង បន្ទាប់ពីបេក្ខភាពប្រធានាធិបតីនៃគណបក្សសាធារណរដ្ឋរូបនេះ និងក្រុមការងារបានធ្វើយុទ្ធនាការឃោសនាបោះឆ្នោតជិតមួយឆ្នាំមកនេះ។
យោងតាមសេចក្ដីថ្លែងការណ៍អ្នកនាំពាក្យខាងសេតតវិមាន លោក Josh Earnest បាននិយាយថា«ការធានា នូវការផ្ទេរតំណែងដោយសន្តិវិធីគឺជាមូលដ្ឋានគ្រឹះជាអទិភាព នៃការកំណត់ពីប្រធានាធិបតីថ្មីនៅដើមឆ្នាំក្រោយ នេះ ក៏ដូចជាជំនួបរវាងប្រធានាធិបតីផុតអាណត្តិ និងប្រធានាធិបតីថ្មី»៕
ខេត្តព្រៃវែង៖បុរសម្នាក់ដែលជាអនុប្រធានការិយាល័យបេឡាជាតិរបបសន្តិសុខសង្គមខេត្តកំពង់ចាម បានដាច់ក្បាលចេញពីខ្លួនបាត់ ដោយសារតែបើករថយន្តឆ្លាម ទៅបុកជាមួយរថយន្តយីឌុប ដែលបើកមកបញ្ច្រាសទិសគ្នា។ ហេតុការណ៍នេះកើតឡើងកាលពីវេលាម៉ោង១២ និង៣០នាទីថ្ងៃត្រង់ថ្ងៃទី៩ ខែវិច្ឆិកា ឆ្នាំ២០១៦នៅលើកំណាត់ផ្លូវជាតិលេខ៨អា ក្នុងភូមិក្រសាំងគយ ឃុំជ្រៃ ស្រុក ស្វាយអន្ទរ ខេត្តព្រៃវែង។
សមត្ថកិច្ចមូលដ្ឋាន បានឲ្យដឹងថា ជនរងគ្រោះត្រូវបានគេស្គាល់ថា ឈ្មោះ សូ សុធា អាយុ៣២ឆ្នាំមានទីលំនៅក្នុង សង្កាត់ស្រះចក ខណ្ឌដូនពេញ រាជធានីភ្នំពេញ មានមុខរបរជា អនុប្រធានការិយាល័យបេឡាជាតិរបបសន្តិសុខសង្គមខេត្តកំពង់ចាម។
មុនពេលកើតហេតុ ជនរងគ្រោះបើករថយន្តម៉ាកកាំម៉ារីឆ្លាម ពណ៌ទឹកប្រាក់ ពាក់ស្លាកលេខភ្នំពេញ 2AB-5813 ក្នុងទិសដៅពីកើតទៅលិច ពេលមកដល់ចំណុចកើតហេតុ រថយន្តជនរងគ្រោះបានបើកឆ្លងទ្រូងថ្នល់ ចូលទៅខាងឆ្វេងដៃទៅ បុករថយន្តយីឌុប១គ្រឿងផ្សេងទៀតដែលបើកមកបញ្ច្រាស់ទិសគ្នា ម៉ាកហ៊ីយ៉ាន់ដាយ ពណ៌ស ពាក់ស្លាកលេខស្វាយរៀង 3A-1005 បណ្តាលឲ្យរថយន្តទាំង២ បុកគាបរួញក្បាលទាំងសងខាង ចំណែកជនរងគ្រោះ សូ សុធា មិនដឹងថាត្រូវនឹងអ្វីនោះទេ ស្រាប់តែឃើញដាច់ក្បាលធ្លាក់ចេញពីខ្លួនបាត់ទៅហើយហើយនៅក្នុងរថយន្តនោះមិនមានអ្នកផ្សេងជិះរួមដំណើរនោះទេ។ ចំណែកអ្នកបើកបររថយន្ត ហ៊ីយ៉ាន់ដាយដែលប៉ះទង្គិចគ្នានោះក្រោយកើតហេតុភ្លាម បានរត់គេចខ្លួនបានស្រមោលភ្លាម បន្សល់ទុកតែរថយន្តនៅ នឹងកន្លែងកើតហេតុ។
ក្រោយកើតហេតុភ្លាមសមត្ថកិច្ច បានទៅដល់កន្លែងកើតហេតុភ្លាម ហើយបានទាក់ទងទៅក្រុមគ្រួសារ ជនរងគ្រោះទៅទទួលយកសាកសព ជនរងគ្រោះភ្លាមៗផងដែរ ចំណែករថយន្តទាំង២ត្រូវសមត្ថកិច្ច យកទៅរក្សាទុកនៅប៉ុស្តិរដ្ឋបាលឃុំជ្រៃ ដើម្បីរង់ចាំការដោះស្រាយនៅពេលក្រោយ៕
ដោយ៖ប៉ែន សុផល
បាត់ដំបង៖កាលពីរសៀល ថ្ងៃទី៨ ខែវិច្ឆិកា ឆ្នាំ២០១៦ក្រុមបង្ការបង្ក្រាបនៃស្នងការដ្ឋាននគរបាលខេត្តបាត់ដំបងចុះប្រតិបត្តិការបង្ក្រាប ល្បែងចាក់កន្ទុយលេខ ឆ្នោតចំនួន១កន្លែងឃាត់មេឆ្នោត១នាក់ និងវត្ថុតាងមួយចំនួនកសាងសំណុំរឿងបញ្ជូនទៅតុលាការ។
ដោយយោងតាមអនុសាសន៍ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បាន បើកកិច្ចប្រជុំ ផ្សព្វផ្សាយសេចក្តីណែនាំ ស្តីពីការអនុវត្តវិធានការបង្ក្រាបរាល់ល្បែងស៊ីសង ខុសច្បាប់ នៅក្នុងព្រះរាជាណាចក្រ កម្ពុជា និងមានការ ណែនាំពីនាយឧត្តមសេនីយ៍ នេត សាវឿន អគ្គស្នងការនគរបាលជាតិ ឧត្តម សេនីយ៍ ស្នងការ នៃស្នងការដ្ឋាននគរបាលខេត្តបាត់ដំបង បានដាក់បទ បញ្ជាដល់លោកឧត្តមសេនីយ៍ត្រី ជេត វណ្ណនី ស្នងការរងទទួលផែននគរបាលយុត្តិធម៌និងដឹកនាំបញ្ជាកម្លាំងផ្ទាល់ ដោយលោកអនុសេនីយ៍ ទោ ឈឿង គឹមសុង ប្រធានក្រុមបង្ការបង្ក្រាបនៅរសៀលថ្ងៃទី៨ ខែវិច្ឆិកានេះបានចុះធ្វើការ បង្ក្រាបល្បែង (ចាក់កន្ទុយលេខឆ្នោត)ចំនួន១កន្លែងនៅចំណុចភូមិអូរដំបង ឃុំអូរដំបង២ ស្រុកសង្កែ ខេត្តបាត់ដំបង។
លោក ឈឿង គឹមសុង ប្រធានក្រុមបង្ការបង្ក្រាបបានអោយដឹងថា៖ក្នុងកិច្ចប្រតិបត្តិការ បទល្មើសជាក់ស្ដែងខាងលើសមត្ថកិច្ចឃាត់ខ្លួនមេកត់កន្ទុយឆ្នោតចំនួន១នាក់ ឈ្មោះគឹម ពីយ៉ា ភេទស្រី អាយុ២៣ឆ្នាំ រស់នៅភូមិឃុំខាងលើ រួមនិងវត្ថុតាងកត់កន្ទុយលេខឆ្នោតមួយចំនួនផងដែរ។
បច្ចុប្បន្នជនសង្ស័យខាងលើរួមនិងវត្ថុតាងកត់កន្ទុយលេខឆ្នោតត្រូវបានកម្លាំងការិយាល័យជំនាញនគរបាលព្រហ្មទណ្ឌកំរិតស្រាលនៃស្នងការខេត្តបាត់ដំបង កសាងសំណុំរឿងបញ្ជូនទៅតុលាការដើម្បីចាត់ការទៅតាមផ្លូវច្បាប់៕
ខេត្តសៀមរាប៖តាមភ្នាក់ងាររាយការណ៍ថា មកដល់ពេលនេះ ករណីកាប់ឈើគ្រញូងនៅតំបន់អង្គរ ត្រូវ បញ្ជូនទៅតុលាការ ខណៈដែលសមត្ថកិច្ចក៏កំពុងស្វែងរកមុខអ្នកដែលជាប់ពាក់ព័ន្ធ និងការកាប់ឈើគ្រញូងដ៏មានតម្លៃនោះផងដែរ។
សូមជម្រាបថា ឈើគ្រញូងមួយដើមដែលត្រូវបានកាត់ផ្តួលដោយអាជ្ញាធរអប្សរាត្រូវបានរដ្ឋបាលព្រៃឈើខេត្តសៀមរាបដឹកយកទៅរក្សាទុកបណ្ដោះអាសន្ននៅរដ្ឋបាលព្រៃឈើស្រុកបន្ទាយស្រីក្នុងឃុំព្រះដាក់ទោះបីពលរដ្ឋតវ៉ាមិនឲ្យដឹកចេញក៏ដោយ ។
អាជ្ញាធរអប្សរាបានឲ្យដឹងថាដើមគ្រញូង ១ ដើមដែលមានមុខកាត់ជិត ៩ តឹក និងកម្ពស់ជិត ១០ ម៉ែត្រមានទីតាំងស្ថិតក្នុងឧទ្យានជាតិអង្គរខាងកើតវត្តថ្មីដំរីសែនជ័យក្នុងភូមិនគរក្រៅ ឃុំគោកចក ក្រុងសៀមរាបត្រូវបានអាជ្ញាធរអប្សរាកាត់ផ្តួលកាលពីថ្ងៃអាទិត្យក្រោយពេលឈើដ៏កម្រ និងមានតម្លៃបំផុតនេះត្រូវបានរាយការណ៍ថាមានជនខិលខូចលួចអារបានមួយភាគក្នុងបំណងលួចដឹកចេញ។
មន្ត្រីអាជ្ញាធរអប្សរាបានបញ្ជាក់ថា មូលហេតុដែលត្រូវកាប់ដើមឈើនេះ ព្រោះថា ទី ១ គឺដើម្បីការពារកុំឲ្យវាដួលរលំដែលអាចមានគ្រោះថ្នាក់ដល់អ្នកដំណើរ ឬអ្នកដែលមកជ្រកក្រោមដើមគ្រញូងនេះ និង ទី ២ គឺកាប់យកទៅរក្សាទុកកុំឲ្យជនខិលខូចលួចកាប់បន្តទៀតក្រោយពេលជនខិលខូចទាំងនោះបានលួចកាប់កាលពីថ្ងៃទី ៤ ខែតុលាសល់តែ ២ តឹកប៉ុណ្ណោះ ។
យ៉ាងណាក៏ដោយ ប្រជាពលរដ្ឋរួមទាំងមន្ត្រីជំនាញ បានអះអាងថា ឈើនេះ ជនខិលខូចបានអារអស់ប្រមាណ១តឹកប៉ុណ្ណោះ ដូច្នេះអាចរក្សាទុកបាន ប៉ុន្តែមន្ត្រីអាជ្ញាធរអប្សរាបានទៅកាប់រំលំតែម្តង ដែលធ្វើឲ្យមានការសង្ស័យយ៉ាងខ្លាំង ។ ផ្តើមពីនោះប្រជាពលរដ្ឋ រួមទាំងមន្ត្រីបរិស្ថានបានលើកឡើងថា ការកាប់ឈើក្រញូងមួយដើមនៅតំបន់អង្គរនេះ ស្ថិតក្នុងភាពអាថ៌កំបាំង និងលាក់លៀមបំផុត ដែលសមត្ថកិច្ចត្រូវតែវែកមុខឲ្យឃើញជនខិលខូច បើពុំនោះទេ ពួកគាត់មិនសុខចិត្តនោះឡើយ៕
រាជធានីភ្នំពេញ៖យោងតាមសេចក្តីរាយការណ៍បានឲ្យដឹងថា ពាក់ព័ន្ធនឹងករណីបរិហារសម្តេចតេជោ ហ៊ុន សែន ទិញ Like ក្លែងក្លាយ នៅលើបណ្តាញសង្គម Facebook ដើម្បីបង្កើនប្រជាប្រិយភាព ត្រូវបានសាលាដំបូងក្រុងភ្នំពេញសម្រេចពិន័យប្រាក់ លោក សម រង្ស៉ី ១០លានរៀល និងបង្គាប់ឱ្យសងជំងឺចិត្ត ទៅជនរងគ្រោះ ១៥លានរៀល៕
ភ្នំពេញ៖អគ្គិភ័យមួយបានឆាបឆេះ នៅក្នុងភោជនីយដ្ឋានយីហោ តន្ត្រីក្ដាមស្រែ បំផ្លាញកញ្ចុះស្បូវសម្រាប់ភ្ញៀវ អង្គុយផឹកស៊ីអស់ចំនួន៤ខ្នង ដែលបណ្ដាលមកពីកម្ទេចផ្កាភ្លើង ជាងផ្សាដែលធ្លាក់លើ តែក្នុងហេតុការណ៍នោះត្រូវបានបុគ្គលិកយកបំពុងពន្លត់អគ្គិភ័យបាញ់អស់ជាច្រើនបំពុង ទើបមិនបណ្តោលអោយរាលដាល់ដល់ផ្ទះប្រជាពលរដ្ឋជិតខាងទេ តែអ្វីដែលគួរអោយកត់សំគាល់នោះគឺម្ចាស់ហាងមិនបានសហការនិងអនុញ្ញាត្តអោយអាជ្ញាធរចូលឡើយ។ ហេតុការណ៍នេះបានបង្កឲ្យមានការភ្ញាក់ផ្អើលឡើង កាលពីវេលាម៉ោង៣និង៣០នទី រសៀល ថ្ងៃទី៨ ខែវិច្ឆិកា ឆ្នាំ២០១៦ ស្ថិតនៅតាមបណ្ដោយផ្លូវ ជាតិលេខ៤ ក្នុងភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
មិនមាននរណាម្នាក់បានដឹងថា នៅក្នុងហេតុការណ៏នោះ បណ្ដាលឲ្យមានមនុស្សប៉ុន្មាននាក់រងរបួស ឬក៏អត់ នោះឡើយ ព្រោះនៅខណៈពេលមានការឆាបឆេះ ម្ចាស់ហាងរួមនឹងបុគ្គលិកបម្រើការងារនៅក្នុងនោះ បានរួមគ្នាពន្លត់ មិនបានពឹងផ្អែកលើរថយន្តពន្លត់អគ្គីភ័យទេនិងមិនទទួលយក ការអន្តរាគមន៏ពីអាជ្ញាធរនិងសមត្ថ កិច្ចឡើយ។ និយាយរួមម្ចាស់ហាងខាងលើ បានទាញទ្វាររបងនិងគ្របស្ទង់បិទជិត មិនអនុញ្ញាតឲ្យ នរណាម្នាក់បានចូលទៅពិនិត្យមើល ពីស្ថានភាពនៃការឆាបឆេះនោះទេ។ ធ្វើអោយប្រជាពលរដ្ឋ ម្នាក់ៗបានត្រឹមឈរនៅខាងក្រៅ តោងរបងអឺតមើលទៅខាងក្នុងតែប៉ុណ្ណោះ ដោយពួកគេនិយាយថា បានពន្លត់ភ្លើងរលត់វិញហើយ៕ បញ្ញា
ខេត្តពោធិ៍សាត់៖កម្មករសំណងនៅវិទ្យាល័យហ៊ុនសែនរំលេចម្នាក់ ត្រូវបានឆ្លង់ចរន្តអគ្គិសនីឆក់ស្លាប់យ៉ាងអាណោចអាធ័ម ខណៈដែលត្រូវបានគេសង្ស័យកម្មកររូបនេះបានដើរចុះទៅត្រួតពិនិត្យម៉ូទ័របូមទឹកស្រះខាងក្រោយសាលា ហើយអាចបណ្តាលមកពីភ្លេចដក់ឌុយខ្សែភ្លើង។
ហេតុការណ៍នេះបានភ្ញាក់ផ្អើលឡើងកាលពីវេលាម៉ោង១៧ និង៣០នាទី ថ្ងៃទី០៧ ខែវិច្ឆិកា ឆ្នាំ២០១៦ ត្រង់ចំណុចស្រះទឹកក្នុងបរិវេណវិទ្យាល័យរំលេច ស្ថិតក្នុងភូមិប្រឡាយរំដេញ ឃុំរំលេច ស្រុកបាកាន ខេត្តពោធិ៍សាត់ តាមការបញ្ជាក់ពីសមត្ថកិច្ចនគរបាលរដ្ឋបាលរំលេចបានឲ្យដឹងថាជនរងគ្រោះឈ្មោះ រិន រិទ្ធ ភេទប្រុស អាយុ ២១ឆ្នាំ បច្ចុប្បន្នមានទីលំនៅភូមិផ្លង ឃុំនាងដៃ ស្រុកអង្គរជុំ ខេត្តសៀមរាប មកបម្រើការងារនៅចំណុចនិងភូមិ-ឃុំកើតហេតុខាងលើ។
ប្រភពខាងលើនេះបន្តថា សាកសពជនរងគ្រោះត្រូវបាននារីកម្មករសំណងដូចគ្នាប្រទះឃើញនៅពេលគាត់ដើរទៅដងទឹកដើម្បីយកមកដាំបាយ ដូច្នេះជនរងគ្រោះត្រូវបានឆ្លង់ចរន្តអគ្គិសនីឆក់ស្លាប់ អាចបណ្តាលមកពីភ្លេចដក់ឌុយខ្សែភ្លើងនៅកន្លែងធ្វើការ (ក្នុងសាលារៀន) ហើយគាត់បានដើរទៅស្រះទឹកខាងក្រោយសាលាចម្ងាយប្រមាណ ៣០ម៉ែត្រ ដើម្បីធ្វើការត្រួតពិនិត្យម៉ូទ័របូមទឹក ប៉ុន្តែជាអកុសលក៏ត្រូវបានឆ្លង់ចរន្តអគ្គិសនីឆក់ស្លាប់បែបនេះ។
ប្រភពដដែលបន្តទៀតថាក្រោយកើតហេតុ សមត្ថកិច្ចជំនាញបានសហការណ៍គ្នាចុះទៅធ្វើការត្រួតពិនិត្យនៅកន្លែងកើតហេតុ ដើម្បីស្រង់ចម្លើយនានានិងចាប់យកវត្ថុតាងឈានទៅធ្វើការសន្និដ្ឋាន ជនរងគ្រោះពិតជាអាចស្លាប់ដោយសារឆ្លង់ចរន្តអគ្គិសនីពិតប្រាកដ ដូច្នេះក៏ធ្វើការទំនាក់ទំនងជាមួយម្ចាស់សំណងនិងសាច់ញាតិក្រុមគ្រួសារជនរងគ្រោះដើម្បីចាត់ចែងតាមនីតិវិធី៕
ហ្វីលីពីន៖កិច្ចសន្យាលើការនាំចូលកាំភ្លើងប្រហែល២ម៉ឺន ៦ពាន់ដើមពីក្រុមហ៊ុនផលិតកាំភ្លើងអាមេរិក Sig Sauer Inc. ត្រូវបាន លោក រ៉ូទ្រីហ្កូ ឌូទើតេ ប្រធានាធិបតីហ្វីលីពីនបានបញ្ជាឲ្យលុបចោលកាលពីថ្ងៃម្សិលមិញ គ្រាដែលលោកថ្លែងសុន្ទរកថានៅវិមានម៉ាឡាកាណាំង។ នេះដោយយោងតាមការចុះផ្សាយទីភ្នាក់ងារព័ត៌មានជប៉ុន Kyodo។
លោកថ្លែងថា៖ “ខ្ញុំបញ្ជាឲ្យលុបចោលកិច្ចសន្យារបស់ប៉ូលិស។ ហើយយើងនឹងត្រូវស្វែងរកប្រភពដទៃទៀត ដែលមានតម្លៃថោកជាង អាចហើយប្រើប្រាស់បានយូរជាង និងល្អដូចកាំភ្លើងផលិតពីកន្លែងដែលយើងកំពុងបញ្ជាទិញហ្នឹង”។
គួរបញ្ជាក់ថា ក្រុមហ៊ុន Sig Sauer ដែលតំណាងដោយក្រុមហ៊ុនក្នុងស្រុក InTrade Asia Pacific Corp គឺជាឈ្នះក្នុងការដេញថ្លៃលើកិច្ចសន្យាមានតម្លៃដល់ទៅជិត ៣៩លានដុល្លារ ក្នុងការផ្គត់ផ្គង់អាវុធដល់ប៉ូលិសហ្វីលីពីន៕
ខេត្តស្វាយរៀង៖គ្រោះថ្នាក់ចរាចរណ៍មួយបានកើតឡើងកាលពីម៉ោង៥ និង១៥នាទីទាបភ្លឺនៅលើផ្លូវជាតិលេខ១ស្ថិតក្នុងភូមិស្វាត សង្កាត់ចេក ក្រុងស្វាយរៀង ខេត្តស្វាយរៀង។ បើតាមសមត្ថកិច្ចបានអោយដឹងថា រថយន្តយីឌុបមួយគ្រឿងពាក់ស្លាកលេខ ស្វាយរៀង 3A0718 មកពីបាវិតទៅភ្នំពេញហើយខូចកាលេឈប់អែបស្តាំត្រូវបានម៉ូតូមួយគ្រឿងម៉ាក ស្មាស់វី ពណ៌ខ្មៅពាក់ស្លាកលេខ1CM 9086 ពីទិសខាងកើតទៅលិចលុះដល់ចំណុចកើតហេតុខាងលើស្រាប់តែបុកពីក្រោយរថយន្តស្លាប់ភ្លាមៗនៅនិងកន្លែងកើតហេតុតែម្តង។
ប្រភពខាងលើបានបន្តទៀតថា៖ម្ចាស់រថយន្តមានឈ្មោះ វ៉ាន់ សុភី ទីលំនៅភូមិកណ្តៀងរាយ ឃុំកណ្តៀងរាយ ស្រុកស្វាយទាប ខេត្តស្វាយរៀង។ ចំណែកជនរងគ្រោះមានឈ្មោះ នាង ឡាវី ភេទប្រុស អាយុ២៣ឆ្នាំ មានទីលំនៅភូមិទន្លៀង ឃុំរមាំថ្កោល ស្រុកស្វាយទាប ខេត្តស្វាយរៀង។
ក្រោយពីកើតហេតុសមត្ថកិច្ចចុះមកវាស់វែងយករថយន្តនិងម៉ូតូយកទៅរក្សាទុកនៅការិយាល័យខេត្តស្វាយរៀងដើម្បីដោះស្រាយតាមផ្លូវច្បាប់ហើយសពជនរងគ្រោះត្រូវបានសមត្ថកិច្ចប្រគល់ជួនក្រុមគ្រួសារយកទៅធ្វើបុណ្យតាមប្រពៃណី៕
ខេត្តកណ្តាល៖បុរសម្នាក់ត្រូវបាននគរបាលប៉ុស្តិ៍រដ្ឋបាលឃុំឈើទាល ចាប់ឃាត់ខ្លួនដោយមានពាក្យបណ្តឹងពីក្រុមគ្រួសារជនរងគ្រោះថា បានចាប់រំលោភចៅស្រីរបស់គាត់អាយុ០៤ឆ្នាំ។ ហេតុការណ៍ចាប់ឃាត់ខ្លួនជនសង្ស័យរូបនេះ បានកើតឡើងកាលពីវេលាម៉ោង២២ និង៤៩នាទី នៅផ្ទះជនសង្ស័យ ក្នុងភូមិឈើទាល ឃុំឈើទាល ស្រុកកៀនស្វាយ ខេត្តកណ្តាល។
ជនសង្ស័យមានឈ្មោះ ផន អាត ភេទប្រុស អាយុ៣៣ឆ្នាំ មុខរបរកសិករមានទីលំនៅភូមិនិងឃុំកើតហេតុខាងលើ ។ ចំណែកក្មេងស្រីរងគ្រោះអាយុ០៤ឆ្នាំ មានទីលំនៅភូមិនិងឃុំកើតហេតុខាងលើ(ជិតផ្ទះជនសង្ស័យ) ។
លោកនាយប៉ុស្តិ៍នគរបាលរដ្ឋបាលឃុំឈើទាលបានឲ្យដឹងថា នៅថ្ងៃកើតហេតុម្តាយជនរងគ្រោះបានទុកកូនឲ្យជីដូនមើលថែដោយខ្លួនធ្វើការនៅរោងចក្រកាត់ដេរឯភ្នំពេញ ។ ចំណែកជីដូនបានទៅបង្រៀនសិស្សនៅសាលារៀនទុកចៅឲ្យនៅផ្ទះជាមួយមីងពេលជីដូនត្រឡប់មកដល់ផ្ទះវិញស្រាប់តែឃើញចៅដេកអស់កំលាំងខុសពីធម្មតាក៍យកចៅទៅងូតទឹកស្រាប់តែជនរងគ្រោះ(ចៅស្រី)ស្រែកយំយ៉ាងខ្លាំងហើយប្រាប់ជីដូនថា ឈឺក្រហាយនៅប្រដាប់ភេទខ្លាំណាស់ពេលមើលប្រដាប់ភេទចៅឃើញហើមប៉ោងក្រហមនិងដាច់ប្រហោងទើយកចៅស្រីទៅឲ្យគ្រូពេទ្យនៅមណ្ឌលសុខភាពឃំុឈើទាលពិនិត្យមើលពេលនោះគ្រូពេទ្យឃុំបានប្រាប់ថា ក្មេងស្រីនេះមានស្នាមហើមក្រហមដាច់ប្រហោងប្រដាប់ភេទមានគេចាប់រំលោភ។ ពេលនោះជីដូនជនរងគ្រោះបានសួរចៅស្រីថា អ្នកណាធ្វើអីចៅជនរងគ្រោះឆ្លើយថាប៉ាបងលីន(ជនសង្ស័យមានឈ្មោះខាងលើ)ជាអ្នកចាប់រំលោភ។
លោកនាយប៉ុស្តិបានបន្តទៀតថាក្រោយពីបានដឹងពណ៍មាននេះភ្លាមជីដូននិងម្តាយគ្មេងរងគ្រោះបានទៅដាក់ពាក្យបណ្តឹងនៅវេលាម៉ោង២២និ៤៩នាទីថ្ងៃខែដដែលអោយជួយអន្តរាគមន៍។ ពេលទទួលបានពាក្យបណ្តឹងពីឈ្មោះ សុខ ម៉ារី ភេទស្រី អាយុ២៥ឆ្នាំ (ម្តាយជនរងគ្រោះ) មានទីលំនៅភូមិនិងឃុំកើតហេតុខាងលើក្នុងករណីរំលោភសេពសន្ថវៈកើតនៅថ្ងៃទី០៧ ខែវិច្ឆិកា ឆ្នាំ២០១៦ នៅវេលាម៉ោង១៥ និង៤០នាទីនៅចំណុចផ្ទះជនសង្ស័យក្នុងភូមិនិងឃុំកើតហេតុខាងលើរួចកំលាំងប៉ុស្តិនគរបាលឈើទាលរួមសហការជាមួយអាជ្ញាធរមូលដ្ឋានភូមិ.ឃុំបានចុះទៅនាំខ្លួនជនសង្ស័យមកប៉ុស្តិ៍ធ្វើការសាកសួរនៅចំពោះមុខសមត្ថកិច្ចជនសង្ស័យមិនបានសារភាពថា ខ្លួនជាអ្នកប្រព្រឹត្តទេ។ ជនសង្ស័យបានបញ្ចូនមកអធិការដ្ឋាននគរបាលស្រុកដើម្បីបន្តចាត់ការតាមនីតិវិធី៕
រាជធានីភ្នំពេញ៖គិតត្រឹមម៉ោង៦ល្ងាច ថ្ងៃទី០៧ ខែវិចិ្ឆកា ឆ្នាំ២០១៦ម្សិលមិញនេះប្រជាពលរដ្ឋខ្មែរចំនួន ៦,៩០៤,៤៥៦នាក់ហើយបានទៅចុះឈ្មោះបោះឆ្នោត។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត គ.ជ.ប។
គួរបញ្ជាក់ថា ប្រជាពលរដ្ឋដែលមានអាយុ ១៨ឆ្នាំឡើង មានសិទ្ធិចុះឈ្មោះបោះឆ្នោត មានចំនួនជាង៩.៦លាននាក់៕
រាជធានីភ្នំពេញ៖មន្ត្រីតុលាការក្រុងភ្នំពេញបានថ្លែងប្រាប់អ្នកសារព័ត៌មានថា សាលាដំបូងរាជធានីភ្នំពេញបានសម្រេចប្រកាសសាលក្រមលើសំណុំរឿង លោក សម រង្ស៉ី ចោទសម្តេចតេជោទិញ Like ក្លែងក្លាយ នៅម៉ោង៣ និង០០នាទីរសៀល ថ្ងៃទី០៨ ខែវិច្ឆិកា ឆ្នាំ២០១៦នេះតែម្តង។
គួរបញ្ជាក់ថា កាលពីព្រឹកថ្ងៃទី០៨ ខែវិច្ឆិកា ឆ្នាំ២០១៦ សាលាដំបូងរាជធានីភ្នំពេញបានបន្តបើកសវនាការលើសំណុំរឿងលោក សម រង្ស៊ី ប្រធានគណបក្សសង្គ្រោះជាតិដែលចោទប្រកាន់សម្តេចតេជោ ហ៊ុន សែន ថា ទិញ Facebook Like ក្លែងក្លាយ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
