ភ្នំពេញ ៖ ស្របពេលដែលធនាគារជាតិនៃកម្ពុជា កំពុងជំរុ្ញគោលនយោបាយប្រើប្រាស់រូបិយប័ណ្ណប្រាក់រៀលសម្រាប់ប្រើប្រាស់ក្នុង ប្រតិបត្តិការហិរញ្ញវត្ថុនៅតាមគ្រឹះស្ថានធនាគានោះ វិស័យធនាគារនៅកម្ពុជា ក៏មានការរីកចម្រើនគួរអោយកត់សម្គាល់ ដោយក្នុងឆមាសទី១ឆ្នាំ២០១៨ ទ្រព្យសកម្មសរុបរបស់គ្រឹះស្ថានធនាគារក្នុងប្រទេសកម្ពុជា មានកំណើនជាង១៦% ស្មើនឹងប្រមាណ៣១ពាន់លានដុល្លារអាមេរិក ខណៈដែល ដើមទុនសរុបរបស់គ្រឹះស្ថានធនាគារទូទាំងប្រទេសមានកំណើន ដល់៣ពាន់៧រយលានដុល្លារ។
យោងតាមរបាយការណ៍របស់ធនាគារជាតិនៃកម្ពុជា នៅក្នុងឆមាសទី១ ឆ្នាំ២០១៨នេះ ទំហំឥណទាននៃវិស័យធនាគារបានកើនឡើងដល់៧០,៦ទ្រីលានរៀល ស្មើនឹង១៧ពាន់៦៥០លានអាមេរិក ចំណែកកំណើនមូលនិធិកម្ចីកើនឡើងប្រមាណ៣៣% កើនឡើងដល់៦,៦ទ្រីលានរៀល ស្មើនឹង ១ពាន់៦៥០លានដុល្លារ និងកំណើនប្រាក់បញ្ញើកើនដល់ប្រមាណ ២១,៥% ដល់៧៧,៨៨ទ្រីលានរៀល ស្មើនឹង១៩ពាន់៤៧០លានដុល្លារ។ របាយការណ៍របស់ធនាគារជាតិនៃកម្ពុជា បង្ហាញថា គ្រឹះស្ថានធនាគារ បានពង្រីកការផ្តល់សេវាឱ្យកាន់តែទូលំទូលាយ តាមរយៈការពង្រីកសាខារហូតដល់៨៦២សាខា ដែលមានម៉ាស៊ីដកប្រាក់និងដាក់ប្រាក់ស្វ័យប្រវត្តិ(ATM)កើនដល់១ពាន់៥៩៣ម៉ាស៊ីន។
រីឯការប្រើប្រាស់ប័ណ្ណឥណទាន ក៏មានការកើនឡើង ប្រមាណ៣៦,៦% ដល់ចំនួន៨ម៉ឺន៨៥៣៣ ប័ណ្ណ ខណៈដែលការប្រើប័ណ្ណឥណពន្ឋ កើន១៦,៤% ដល់១លាន៩សែនប័ណ្ណ។ គួកត់សំគាល់ថា ការប្រើប្រាស់ឥណទានរបស់គ្រឹះស្ថានធនាគារ ជាប្រភពទុនយ៉ាងសំខាន់ ដែលគាំទ្រដល់ការបង្កើត និងពង្រីកអាជីវកម្ម ក្នុងនោះ វិស័យផ្សេងៗ ដែលកំពុងប្រើប្រាស់ឥណទាន រួមមាន ការលក់រាយ១៧,៤% ការលក់បោះដុំកើន ១១,៧% កសិកម្ម រុក្ខាប្រមាញ់នេសាទកើន ៩,៤% សំណង់កើន ៩,៥% ការឱ្យខ្ចីទិញផ្ទះជាកម្មសិទ្ឋិផ្ទាល់ខ្លួន ៩,៤% សេវាកម្មមិនមែនរហិរញ្ញវត្ថុផ្សេងៗទៀត ៧,១% កម្មន្តសាល ៥.៩% ការជួញដូរអចលនទ្រព្យ ៦,៣% សណ្ឋាគារនិងភោជនីយដ្ឋាន៤,៥% និងវិស័យផ្សេងៗ១៨%។
សូមបញ្ជាក់ថា គិតត្រឹមដំណាច់ឆមាសទី១ ឆ្នាំ២០១៨ នៅក្នុងប្រទេសកម្ពុជា មានធនាគារពាណិជ្ជ ដែលកំពុងធ្វើប្រតិបត្តិការចំនួន៤០ធនាគារ។ ធនាគារឯកទេសចំនួន១៥ និងគ្រឹះស្ថានមីក្រូហិរញ្ញវត្ថុសរុបចំនួន ៧០គ្រឹះស្ថាន៕
