ភ្នំពេញ ៖ មានការព្រួយពីការប្រកាសរបស់អង្គការយូនេស្កូ។ ម្នាក់ៗស្រែកថាល្ខោន ខោលជារបស់ខ្មែរ ប៉ុន្តែអ្នកស្គាល់ល្ខោនខោលដល់កំរិតណា? នៅក្នុងថ្ងៃនេះពីកម្មវីធីនឹង បង្ហាញលោកអ្នកនូវ ៧ចំនុចដែលអ្នកគួរដឹងពីល្ខោនខោល។
ចំណុចទី១ ល្ខោនខោលមាននៅក្នុងប្រទេសកម្ពុជា មុនសម័យអង្គរ ៖
1. បើតាមរយៈចម្លាក់លឹប នៅតាមជញ្ជាំងអង្គរ ត្រូវបានគេជឿជាក់ថាល្ខោនខោលត្រូវ បានបង្កើតឡើងមុនសម័យអង្គរ ក្នុងអំឡុងសតវត្សទី៩។
ចំណុចទី២ ល្ខោនខោលរាំដោយបុរសសុទ្ធ
2. ល្ខោនខោលគឺជាទម្រង់របស់បុរស។ បើតាម អ្នកស្រាវជ្រាវបានបង្ហាញថា ដោយសារការដុះដាលនៃសាសនាធ្វើឲ្យ សាសនាព្រាហ្មណ៍ មានជម្លោះជា មួយសាសនាព្រះពុទ្ធ ក្នុងរាជកាលព្រះបាទជ័យវរ្ម័នទី៧។ ក្នុងនោះមាន នារីរបាំជាច្រើនត្រូវបានសម្លាប់ និងធ្វើជាស្រីកំណាន់ ដូច្នេះទើបមាន ការហ្វឹកហាត់អ្នករបាំបុរស ។ ប៉ុន្តែកន្លងមកមានអ្នករិះគន់មួយចំនួនដែលមិនស្គាល់ពី ទំរង់ល្ខោនខោល តែងតែរិះគន់ថាហេតុអ្វីបានជាយកបុរសមករាំ។ ដូច្នេះបើទោះបីជាត្រូវសម្តែងតួនាងក៏ដោយ ក៍អ្នករាំគឺជាបុរសដែរ ដែលនេះផ្ទុយពី របាំព្រះរាជទ្រព្យ ដែលជាទម្រង់របស់ស្ត្រី។
ចំណុចទី៣ អ្នករាំពាក់របាំងមុខលើកលែងតែតួនាង និង សីតា
3. អ្នករាំត្រូវពាក់របាំងមុខទាំងអស់លើកលែងតែតួនាង និង តួនាងសីតា។ បើនិយាយពី សម័យមុនតួនាងសីតាត្រូវលាភម្សៅស ប៉ុន្តែរហូតមកដល់ពេលបច្ចុប្បន្នតួនាង និង នាងសីតាត្រូវបានផាត់មុខស្រស់ស្អាត។
ចំណុចទី៤ អ្នកសម្តែងល្ខោនខោល រាំតាមពំនូលរបស់អ្នកពោល
4. អ្នកសម្តែងល្ខោនខោលគឺបញ្ចេញក្បាច់រាំទៅតាមអ្នកពោល។ រាល់ចង្វាក់នឹងក្បាច់ទាំង អស់ដែលអ្នកសម្តែងល្ខោនខោលរាំ សុទ្ធតែបង្ហាញពីអារម្មណ៍ទៅតាមពំនោលដែល មានសប្បាយ រំភើប ពិបាកចិត្ត ភ័យខ្លាច កាចសាហាវជាដើម។ ក្នុងនោះមានតួអង្គ សំខាន់ធំៗសំខាន់ៗ៤ ដូចជា តួនាង តួព្រះរាម តួហនុមាណ និង តួក្រុងមា។
ចំណុចទី៥ ល្ខោនខោលសម្តែងបានតែនៅក្នុងរឿងរាមកេរ្តិ៍
5. លោកអ្នកប្រហែលធ្លាប់ទស្សនាឈុតជាច្រើននៅពេលទស្សនាល្ខោនខោល ហើយ ឈុតដែលមានការចាប់អារម្មណ៍សព្វថ្ងៃនេះ គឺយាយកន្តែរ៉ែទៅថែនាងសេដា។ ប៉ុន្តែជាក់ស្តែងល្ខោននេះសម្តែងបានតែនៅក្នុងរឿងរាមកេរ្ត៍តែប៉ុណ្ណោះ។
ចំណុចទី៦ ល្ខោនខោលអាចរាំជាមួយនឹងស្បែកធំបាន
6. នាពេលបច្ចុប្បន្នល្ខោនខោលត្រូវបានសិល្បៈជំនាន់ក្រោយយកមកកែច្នៃដែលអាចរាំបញ្ចូលគ្នាបានជាមួយនឹងល្ខោនស្បែកធំ ដើម្បីបង្កើតភាពរស់រវើក និង ភាពទាក់ទាញ។
ចំណុចទី៧ រូបល្ខោនខោលត្រូវបានបោះពុម្ភលើក្រដាសប្រាក់ជាយូរមកហើយ
7. រូបល្ខោនខោលត្រូវបានធនាគារជាតិនៃកម្ពុជាបោះពុម្ភលើក្រដាសប្រាក់៥០០រៀល និងប្រើប្រាស់ក្នុងកំឡុងឆ្នាំ1956 ដល់ឆ្នាំ1970។
ទាំងនេះគឺជា៧ចំណុចដែលអ្នកគួរដឹងពីល្ខោនខោល។
តើអ្នកគិតថានៅមានចំណុចអ្វីបន្ថែមទៀតដែលយើងមិនបានជំរាបជូន? សូមផ្តល់មតិយោលរបស់លោកអ្នកមកវីដេអូយើង៕ ប្រភព STV
