(បន្ទាយមានជ័យ): នៅយប់ថ្ងៃបុណ្យចូលឆ្នាំប្រពៃណីជនជាតិចិន-វៀតណាម ថ្ងៃទី២៨ ឈានចូល ២៩ ខែមករា ឆ្នាំ២០២៥ អគ្គីភ័យបានឆាបឆេះផ្សារត្រី នៅក្នុងភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ បណ្ដាលឱ្យឆាបឆេះតូបលក់ដូររបស់អាជីវករអស់ជាច្រើនតូប។
ភ្លាមៗនោះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានបញ្ជូនកម្លាំងអធិការដ្ឋាននគរបាលក្រុងប៉ោយប៉ែត កម្លាំងវរៈនគរបាលការពារព្រំដែនគោកជាង១០០ នាក់ នាំយករថយន្តទឹកចំនួន៤គ្រឿង សហការជាមួយ កម្លាំងមូលដ្ឋានកងរាជអាវុធហត្ថ អាជ្ញាធរមូលដ្ឋាន ប្រជាពល រដ្ឋ ជួយអន្តរាគមន៍ពន្លត់កន្លែងកើតហេតុ រហូតដល់វេលាម៉ោង១អាធ្រាត ទើបគ្រប់គ្រងបាននិងភ្លើងរលត់ទៅវិញទាំងស្រុង។
លោកវរៈសេនីយ៍ឯក ព្រហ្ម ពិសិដ្ឋ អធិការនគរបាលក្រុងប៉ោយប៉ែត បានឲ្យដឹងថា ករណីអគ្គីភ័យឆាប់ឆេះផ្សារត្រី នេះបានបណ្ដាលឲ្យ ឆេះតូបអស់ចំនួន ៣តូប គឺតូបសាឡន១ តូបអីវ៉ាន់ចាបហួយ១ និងតូបលក់ខោអាវ១ ឆេះទាំងស្រុង តែមិនបានបណ្ដាលឱ្យជនណាម្នាក់រងរបួស ឬបាត់បង់ជីវិតឡើយ៕
