ភ្នំពេញ ៖ នៅអាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៥ ខែមេសា ឆ្នាំ២០២០នេះ ក្រសួង ការពារជាតិកម្ពុជា ទទួលបានសម្ភារ បរិក្ខាពេទ្យ សម្រាប់ទប់ស្កាត់វីរុស COVID-19 ដែល ជាជំនួយរបស់ក្រសួងការពារជាតិរបស់ប្រទេសចិន ចំនួន១១មុខ ទម្ងន់ប្រមាណ១៦តោន មានតម្លៃប្រមាណ១លានដុល្លារ។

ពិធីប្រគល់ និងទទួលសម្ភារពេទ្យទប់ស្កាត់វីរុស COVID-19 នេះ បានធ្វើឡើងក្រោមវត្តមាននាយឧត្តមសេនីយ៍ ណឹម សុវត្ថិ ទីប្រឹក្សាពិសេស សម្តេចពិជ័យសេនា ទៀ បាញ់ និងជាអគ្គនាយក អគ្គនាយកដ្ឋាននយោបាយ និងកិច្ចការបរទេស ចំណែកភាគី ចិន តំណាងដោយអនុពន្ធ័យោធាប្រចាំកម្ពុជា នៅព្រលានយន្តហោះអន្តរជាតិភ្នំពេញ (VIP)។

លោកនាយឧត្តមសេនីយ៍ ណឹម សុវត្ថិ ទីប្រឹក្សាពិសេស សម្តេចពិជ័យសេនា ទៀ បាញ់ និងជាអគ្គនាយក អគ្គនាយកដ្ឋាននយោបាយ និងកិច្ចការបរទេស បញ្ជាក់អោយដឹងថា៖ រហូតមកដលពេលនេះ ភាគីចិនតាមរយៈក្រសួការពារជាតិ នៃប្រទេសចិនមកដល់ភាគី កម្ពុជាចំនួន៣លើក ចាប់តាំងពីខែមីនាកន្លងមកនេះ មានទាំងអ្នកជំនាញព្យាបាលជំងឺកូវីដ ១៩ ចំនួន ៤រូបផងដែរ។

លោកបន្តថា៖ ជំនួយទាំងនេះ មានសំខាន់ខ្លាំងណាស់ក្នុង ការ ប្រយុទ្ធប្រឆាំជំងឺកូវីដ ១៩ ដែលកំពុងកើតមាននៅក្នុងប្រទេសកម្ពុជា ហើយការផ្តល់ជំនួយ របស់ភាគីចិនមកដល់កម្ពុជា បានឆ្លុះបញ្ចាំងពីចំណងមិត្តភាពរវាងកម្ពុជា-ចិន ដែលមាន ទំនាក់ទំនងគ្រប់ជ្រុងជ្រោយ។ នាយឧត្តមសេនីយ៏ ណឹម សុវត្ថិបន្ថែមទៀតថា ម្យ៉ាងវាបាន ឆ្លុះបញ្ចាំងនូវទឹកចិត្ត នៃកងទ័ពរបស់ប្រទេសចិន មកលើកងទ័ពកម្ពុជាក្នុងការ ប្រយុទ្ធ ប្រឆាំង ជំងឺកូវីដ ១៩ នៅក្នុងប្រទេសកម្ពុជាផងដែរ។

ចំណែកតំណាងកងទ័ពនៃប្រទេសចិន បានឱ្យដឹងដែរថា៖ ការផ្តល់ជំនួយជាសម្ភារៈ វេជ្ជ សាស្ត្រដល់កងទ័ពកម្ពុជានាពេលនេះ គឺដោយសារតែកម្ពុជា-ចិនមានទំនាក់ទំនងយ៉ាង ស៊ីជម្រៅ រវាងថ្នាក់ដឹកនាំនៃប្រទេសទាំងពីរ។ លោកបន្តថា ប្រទេសទាំងពីរមានការ ជួយ គ្នាទៅវិញមក ក្នុងគ្រាដែលលំបាក មិនត្រឹមតែប៉ុណ្ណោះ ប្រទេសកម្ពុជា និងចិនជាបងប្អូន និងមិត្ដដែកថែប ដែលមិនខ្វះគ្នា។ លោកបន្ថែមទៀតថា ចាប់តាំងពីមានការផ្ទុះឡើង នូវជំងឺកូវីដ ១៩ មក ប្រទេសទាំងពីរតែងតែមានទំនាក់ទំនង គ្នាយ៉ាងល្អប្រសើរ និងជួយគ្នា ទៅវិញមក ក្រោមការដឹកនាំនៃប្រទេសទាំងពីរ។ រដ្ឋាភិបាលចិនចាប់តាំងពីមានកាផ្ទុះឡើងនូវ ជំងឺ កូវីដ ១៩ មិនត្រឹមតែផ្តល់ជំនួសជា សម្ភារៈ វេជ្ជសាស្ត្រជូនដល់ក្រសួងការពារជាតិកម្ពុជានោះទេ ថែមទាំងបានផ្តល់ជំនួស ជាសម្ភារៈជាច្រើនតោនដល់ក្រសួងសុខាភិបាល និងស្ថាប័នរដ្ឋនានា ដើម្បីចូលរួមទប់ ស្កាត់ ការរីករាលដាលនូវជំងឺកូវីដ ១៩ នៅក្នុងប្រទេសកម្ពុជាផងដែរ៕

ភ្នំពេញ ៖ នៅក្នុងដំណាក់នៃការឆ្លងរាលដាលនៃមេរោគកូវីដ១៩ គ្រប់គ្នាបានបង្ហាញការខ្លាចរអាពីមេរោគកូវីដ១៩ តែបែរជាសមាគមភស្តុភារកម្មកម្ពុជា បានផ្តោតលើផ្នែកដឹកជញ្ជូនដោយប្រៀបធៀបថា ខ្លួនខ្លាចពន្ធដារជាងខ្លាចជំងឺកូវីដ ១៩ ទៅវិញ។

នៅក្នុងសេចក្ដីថ្លែងការមួយដែលចេញផ្សាយនៅថ្ងៃទី២៥ ខែមេសា នេះ ស្ដីពីការព្រួយបារម្ភអំពីស្ថានភាពអាជីវកម្មក្នុងវិស័យភស្តុភារកម្ម និងដឹកជញ្ជូន បានបង្ហាញថា ការរីករាលដាលនៃជំងឺកូវីដ ១៩ បានជះឥទ្ធិពលយ៉ាងអាក្រក់ និងផលប៉ះពាល់យ៉ាងខ្លាំងមកលើវិស័យសេដ្ឋកិច្ចជាសកល រួមទាំងប្រទេសកម្ពុជាផងដែរ ក្នុងនោះវិស័យដឹកជញ្ជូនក៏បានរងផលប៉ះពាល់ជាបន្តបន្ទាប់គួរអោយព្រួយបារម្ភ ។

នៅក្នុងចំណុចទាំង៨ ដែលបង្ហាញពីការព្រួយបារម្ភ របស់សមាគមមួយនេះ មានចំនុចពីរ ដែលមើលទៅចាប់អារម្មណ៍ជាងគេ ក្នុងនោះ គឺក្រសួងស្ថាប័នមួយចំនួន របស់រាជរដ្ឋាភិបាលនៅតែបន្តយកកម្រៃជើងសារ ទៅលើការបំពេញបែបបទបញ្ចេញទំនិញគ្មានការបន្ធូរបន្ថយឡើយ និងចំណុចមួយទៀតនោះ គឺមន្ត្រីពន្ធដារនៅតែបន្តចុះធ្វើសវនកម្មគ្រប់ប្រភេទ និងបានធ្វើឱ្យម្ចាស់អាជីវកម្មទាំងអស់ខ្លាចមន្ត្រីពន្ធដារជាងខ្លាចជំងឺកូវីដ ១៩ ទៅទៀត៕

ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅយប់ថ្ងៃទី២៤ ខែមេសា ឆ្នាំ២០២០ បានសម្រេចបិទបញ្ចប់ ការត្រួតពិនិត្យសុខភាពដល់កម្មករ ដែលត្រឡប់ចូលធ្វើការវិញ បន្ទាប់ពីឈប់ សម្រាកក្នុងឱកាសបុណ្យចូលឆ្នាំថ្មី ប្រពៃណីខ្មែរកន្លងទៅនេះ។ នេះបើតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ។

តាមសេចក្តីប្រកាសនេះ ក្រសួងការងារ បានឱ្យដឹងថា ដោយគិតចាប់ពីយប់ថ្ងៃទី០៩ ខែមេសា ដល់ថ្ងៃទី២៤ ខែមេសានេះ គឺមានរយៈពេលលើស ១៤ថ្ងៃ ហើយក្នុងអំឡុងពេលនេះ ក្រសួងសុខាភិបាលក៏ពុំបានរកឃើញករណីវិជ្ជមានកូវីដ-១៩ ថ្មី និងយោងលទ្ធផលអវិជ្ជមាននៃការធ្វើតេស្តសំណាកទាំង១២៥ករណី ក្រសួងសម្រេចបញ្ចប់ការត្រួតពិនិត្យសុខភាព ចាប់ពីម៉ោង ៦:០០នាទីល្ងាច ថ្ងៃទី២៤ ខែមេសា ឆ្នាំ២០២០នេះ ដោយរក្សាទុកតែមណ្ឌលចត្តាឡីស័កកម្រិត២ ក្នុងវិទ្យាល័យជម្ពូវ័ន ដើម្បីបន្តតាមដានស្ថានភាពសុខភាពកម្មករចំនួន ២០នាក់តទៀត រហូតដល់ស្ថានភាពសុខភាពអ្នកទាំងនេះអាចទៅធ្វើចត្តាឡីស័កនៅតាមផ្ទះបាន។

សេចក្តីប្រកាសរបស់ក្រសួងការងារ បានបញ្ជាក់ថា៖ ក្រោយការបិទបញ្ចប់មណ្ឌលត្រួតពិនិត្យសុខភាពកម្មកររោងចក្រទាំង ១០កន្លែងនេះ ប្រសិនជាបងប្អូនកម្មករមានអាការៈសង្ស័យណាមួយ សូមទាក់ទងទៅក្រសួងសុខាភិបាលតាមរយៈលេខ ១១៥ ឬទូរស័ព្ទលេខ ០១២ ៨២៥ ៤២៤។

សូមបញ្ជាក់ថា នាពេលកន្លងមកនេះ ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយក្រសួងសុខាភិបាល, រដ្ឋបាលរាជធានីភ្នំពេញ និងក្រុមគ្រូពេទ្យស្ម័គ្រចិត្តសម្តេចតេជោ រៀបចំមណ្ឌលត្រួតពិនិត្យសុខភាព ចំនួន១០កន្លែង និងមណ្ឌលចត្តាឡីស័ក ចំនួន ៣កន្លែង ដើម្បីត្រួតពិនិត្យសុខភាពកម្មកររោងចក្រដែលបានឈប់សម្រាកអំឡុងពេលបុណ្យចូលឆ្នាំ និងទើបវិលត្រឡប់ចូលបម្រើការងារវិញ។

រយៈពេល១៤ថ្ងៃមកនេះ ក្រសួង និងភាគីពាក់ព័ន្ធបានពិនិត្យសុខភាពកម្មករ ចំនួន ៥ ០៤៥នាក់, ដាក់ឱ្យធ្វើចត្តាឡីស័កនៅផ្ទះ១៤ថ្ងៃ ចំនួន ៤ ៨២៣នាក់, ដាក់ឱ្យស្នាក់នៅមណ្ឌលចត្តាឡីស័កកម្រិត១ ចំនួន ៩៧នាក់, ដាក់ឱ្យស្នាក់នៅមណ្ឌលចត្តាឡីស័កកម្រិត២ ចំនួន ១២៥នាក់, និងយកសំណាកទៅពិសោធបន្ត ចំនួន ១២៥នាក់ ដោយមានលទ្ធផលអវិជ្ជមានជំងឺកូវីដ-១៩ ចំនួន ១២៥នាក់, និងអនុញ្ញាតឱ្យចេញពីមណ្ឌលចត្តាឡីស័កកម្រិត១ និងកម្រិត២ សរុបចំនួន ២០២នាក់ ទៅធ្វើចត្តាឡីស័កបន្តនៅតាមផ្ទះ៕

ភ្នំពេញ ៖ សំណុំរឿងបង្កើតកម្លាំងប្រដាប់អាវុធខុសច្បាប់នៅរាជធានីភ្នំពេញ ខេត្តកំពង់ស្ពឺ និងខេត្តកំពង់ឆ្នាំង នឹងត្រូវតុលាការយោធាយកមកបើកសវនាការជំនុំជម្រះនៅថ្ងៃព្រឹកទី២៨ ខែមេសា ឆ្នាំ២០២០ ខាងមុខនេះ។ នេះបើយោងតាមសេចក្តីជូនដំណឹងរបស់តុលាការយោធា។

យោងតាមសេចក្តីជូនដំណឹងរបស់តុលាការយោធា បានឲ្យដឹងថា ក្រុមប្រឹក្សាជំនុំជម្រះ នៃតុលាការយោធា នឹងបើកសវនការជំនុំជម្រះក្តីជាសាធារណៈ លើសំណុំរឿងព្រហ្មទណ្ឌលេខ ០០៨ ចុះថ្ងៃទី២៥ ខែឧសភា ឆ្នាំ២០១៩ ដែលមានជនជាប់ចោទ: ១. ឈ្មោះ សុខ ប៊ុនធឿន ភេទប្រុស អាយុ៦៣ឆ្នាំ ជនជាតិខ្មែរ មុខរបរយោធា។ ២. ឈ្មោះ រ័ត្ន ច័ន្ទមន្នី ហៅជ័យ មឿន ភេទប្រុស អាយុ៤៧ឆ្នាំ ជនជាតិខ្មែរ មុខរបបយោធា។

តុលាការយោធាបានបញ្ជាក់ថា ជនជាប់ចោទទាំងពីរ ជាប់ចោទពីបទបង្កើតដោយខុសច្បាប់នូវកងកម្លាំងប្រដាប់អាវុធដោយគ្មានសិទ្ធិ និងគ្មានការអនុញ្ញាតពីអាជ្ញាធរស្របច្បាប់ ប្រព្រឹត្តនៅខេត្តកំពង់ឆ្នាំង ខេត្តកំពង់ស្ពឺ និងរាជធានីភ្នំពេញ កាលពីអំឡុងឆ្នាំ២០១៦ ដល់ខែមិថុនា ឆ្នាំ២០១៨ បទល្មើសដែលមានចែងឲ្យផ្តន្ទាទោសតាមមាត្រា ៤៦៣ នៃក្រមព្រហ្មទណ្ឌ។

មាត្រា ៤៦៣ នៃក្រមព្រហ្មទណ្ឌៈ បទបង្កើតដោយខុសច្បាប់នូវកម្លាំងប្រដាប់អាវុធៈ អំពើបង្កើតកម្លាំងប្រដាប់អាវុធដោយគ្មានសិទ្ធិ ឬគ្មានការអនុញ្ញាតពីអាជ្ញាធរស្របច្បាប់ ត្រូវផ្តន្ទាទោសដាក់ពន្ធនាគារពី ១៥ឆ្នាំ ទៅ ៣០ឆ្នាំ៕

ភ្នំពេញ ៖ ក្រសួងសុខាភិបាល នៅថ្ងៃទី២៥ ខែមេសា ឆ្នាំ២០២០នេះ បានចេញប្រកាសនូវដំណឹងល្អបន្តទៀតថា អ្នកជំងឺកូវីដ១៩ បានជាសះស្បើយថ្មីចំនួន៧នាក់ទៀត ធ្វើឲ្យចំនួនអ្នកជាសះស្បើយ កើនឡើងរហូតដល់១១៧នាក់ ហើយពុំមានករណីអ្នកឆ្លងជំងឺកូវីដថ្មីទេ។

ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៥នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី២៥ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលទទួលបានមុននេះបន្តិច

អ្នកជាសះស្បើយចំនួន០៧នាក់រួមមាន៖

* បុរសជនជាតិម៉ាឡេស៊ី អាយុ៦៦ឆ្នាំ មកពីប្រទេសម៉ាឡេស៊ី ដើរធ្វើការងារសាសនានៅខេត្តកែប ដែលបាន បញ្ជូនពីមន្ទីរពេទ្យខេត្តកែប មកព្យាបាលបន្តនៅមន្ទីរពេទ្យមិត្តភាពខ្មែរ-សូវៀត ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។

* បុរសជនជាតិខ្មែរ អាយុ៣៧ឆ្នាំ នៅក្រុងសៀមរាប ជាអ្នកបើករថយន្តឱ្យក្រុមអ្នកទេសចរបារាំង បានព្យាបាលជាសះស្បើយ ដោយទទួលបានលទ្ធផលអវិជ្ជមានវីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរពេទ្យខេត្តសៀមរាប។

* ស្ត្រីជនជាតិខ្មែរ អាយុ២០ឆ្នាំ នៅរាជធានីភ្នំពេញ ជានិស្សិតខ្មែរដែលបានវិលត្រឡប់ មកពីសិក្សានៅប្រទេសអង់គ្លេស បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសក្ខវីដ-១៩ ចំនួន០២ដងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។

* ស្ត្រីជនជាតិវៀតណាម អាយុ២៧ឆ្នាំ នៅ Apartment Diamond1 កោះពេជ្រ សង្កាត់ទន្លេបាសាក់ ខណ្ឌចម្ការមន រាជធានីភ្នំពេញ បានព្យាបាលជាសះស្បើយ ដោយទទួលបានលទ្ធផលអវិជ្ជមានវីរុសកូវីដ-១៩ ចំនួន០២ដង និង ត្រូវបានអនុញ្ញាតឱ្យចេញ ពីមណ្ឌលសុខភាពចាក់អង្រែក្រោម។

* ស្ត្រីជនជាតិវៀតណាម អាយុ២៤ឆ្នាំ ជាអ្នកទេសចរស្នាក់នៅបន្ទប់ជួលនៅផ្លូវលេខ៣០២ សង្កាត់បឹងកេងកង១ រាជធានីភ្នំពេញបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូដ-១៩ ចំនួន០២ដង ត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។

* ស្ត្រីជនជាតិចិន អាយុ៣០ឆ្នាំ ស្នាក់នៅ Olympia អគារ C1 ជាអ្នកទេសចរ និងចង់បើកហាងនៅកម្ពុជា ជាករណីប៉ះពាល់ផ្ទាល់ជាមួយដៃគូ (បុរសជនជាតិចិនមានវីរុសកូវីដ-១៩ រកឃើញនៅប្រទេសចិន) បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន ០២ដង និងត្រូវបានអនុញ្ញាតឱ្យ ចេញពីមន្ទីរពេទ្យមិត្តភាពខ្មែរ-សូវៀត។

* ស្ត្រីជនជាតិចិន អាយុ៣១ឆ្នាំ ស្នាក់នៅផ្លូវ៣៥២ សង្កាត់បឹងកេងកង១ រាជធានីភ្នំពេញ បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមាន វីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរ ពេទ្យមិត្តភាពខ្មែរ-សូវៀត៕

ភ្នំពេញ ៖ ខណៈតម្រូវការប្រើប្រាស់ទឹកបានកើនឡើងលើសពីការផ្គត់ផ្គង់ អង្គភាពរដ្ឋករទឹកស្វយ័តក្រុងភ្នំពេញ បានរៀបចំផែនការដើម្បីសាងសង់អាងពិពិធកម្មទឹកស្អាតបន្ថែម ដើម្បីបង្កើនការផលិតនិងផ្គត់ផ្គង់ទៅកាន់ប្រជាពលរដ្ឋ និងបំពេញតម្រូវការប្រើប្រាស់ក្នុងប្រទេសកម្ពុជា ។ ជាលទ្ធផល ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បញ្ជាក់ថា ឆ្នាំ ២០៣០ កម្ពុជានឹងអាចផ្គត់ផ្គង់ទឹកបានប្រមាណ១លានម៉ែត្រគូបក្នុងមួយថ្ងៃ ដើម្បីផ្គត់ផ្គង់នៅក្នុងប្រតេសកម្ពុជា ។

បើយោងតាមលោកហេង សុខគង់ រដ្ឋលេខាធិការនិងជាអ្នកនាំពាក្យនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងវានុវត្តន៍ បានមានប្រសាសន៍ថា តម្រូវការទឹកស្អាតនៅក្នុងប្រទេសកម្ពុជាមានការកើនឡើងគួរអោយតក់សម្គាល់ នៅក្នុងរយៈពេលប៉ុន្មានឆ្នាំចុងក្រោយនេះ ដែលធ្វើអោយតម្រូវការបានកើនឡើងលើសពីការផ្គត់ផ្គង់ និងជំរុញអោយរដ្ឋករទឹកស្វយ័តក្រុងភ្នំពេញ ត្រូវរកវិធីសាស្ត្រ និងយុទ្ធសាស្ត្រ ដើម្បី ផ្គត់ផ្គង់អោយគ្រប់ទៅតាមតម្រូវការ ។

លោកបន្តថា ពេលនេះរដ្ឋករទឹកបាននិងកំពុងសាងសង់អាងពិពិធកម្មទឹកស្អាតមួយកន្លែងនៅបាក់ខែដែលអាចមានសមត្ថភាពផលិតបាន២០ម៉ឺនម៉ែត្រគូប ហើយអាងពិពិធកម្មនេះ នឹងរួចរាល់នៅឆ្នាំ ២០២៣ និងអាចផ្គត់ផ្គង់បានផងដែរ ។ នៅជំហានទី២នឹងសង់អាងពិពិធកម្មនេះ អាចមានសមត្ថភាពផ្គត់ផ្គង់បាន២០ម៉ែត្រគូបទៀត ហើយបូកជាមួយជាមួយការផ្គត់ផ្គង់នាពេលបច្ចុប្បន្ននេះប្រមាណ៦០ម៉ែត្រគូបទៀតនឹងបានដល់១លានម៉ែត្រគូប នៅឆ្នាំ ២០៣០ ។

លោកបន្តថា ក្រៅពីអង្គភាពរដ្ឋករទឹករបស់រដ្ឋទាំងពីរ រួមមានរដ្ឋករទឹកស្វយ័តក្រុងភ្នំពេញ និងរដ្ឋករទឹកស្វយ័តខេត្តសៀមរាបក៏មានអង្គភាពផ្គត់ផ្គង់របស់ឯកជនប្រមាណ២៦០ស្ថាប័នទៀត ដូច្នេះនៅក្នុងឆ្នាំ ២០៣០ខាងមុខ ទីប្រជុំជនទូទាំងប្រទេស នឹងមានទឹកស្អាតប្រើប្រាស់គ្រប់គ្រាន់និងប្រកបដោយគុណភាពមិនមានការខ្វះមុខខ្វះក្រោយឡើយ ។

លោកបានបញ្ជាក់ថា ការអភិវឌ្ឍទឹកស្អាតមានភាពពិបាកជាងការអភិវឌ្ឍអគ្គិសនី ទើបធ្វើអោយការដោះស្រាយបញ្ហាខ្វះខាតអគ្គិសនីបានឆាប់ជាងការដោះស្រាយបញ្ហាខ្វះទឹក ។ ការអភិវឌ្ឍបណ្ដាញអគ្គិសនី មានភាពងាយស្រួលជាងទឹក ព្រោះថាការតបណ្ដាញទឹកត្រូវជីករូងក្រោមដីដើម្បី បង្កប់ទុយោ ហើយក៏ត្រូវគាស់តបណ្ដាញទឹកចូលផ្ទះនីមួយផងដែរ ។ ទាំងនេះហើយ ទើបធ្វើអោយការតទឹកត្រូវប្រើពេលយូរជាងអគ្គិសនី ។

បើតាមលោកសោម សិទ្ធិប្រធាននាយកដ្ឋានទឹកស្អាតនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងបច្ចេកវិទ្យាបានមានប្រសាសន៍ផងដែរថា បច្ចុប្បន្ន រដ្ឋករទឹកស្វយ័តក្រុងភ្នំពេញទាំងមូលផលិតទឹកបានតែប្រមាណ៦០ម៉ឺនម៉ែត្រគូបប៉ុណ្ណោះ ខណៈការប្រើប្រាស់របស់ពលរដ្ឋដែលតពី រដ្ឋករទឹកភ្នំពេញ មានប្រមាណដល់ទៅជាង៧០ម៉ឺនម៉ែត្រគូប ទើបធ្វើអោយទីតាំងមួយចំនួននៅចុងបណ្ដាញមានសម្ពាធខ្សោយ ។

លោកបន្តថាការកាត់នូវតំបន់មួយចំនួនពីខេត្តជាប់រាជធានី ចូលក្នុងដែនរាជធានីភ្នំពេញ ធ្វើអោយតម្រូវការទឹកប្រើប្រាស់កាន់តែច្រើនឡើងថែមទៀត ។យ៉ាងណាក៏ដោយ តាមរយៈការអភិវឌ្ឍន៍អាងពិពិធកម្មទឹកស្អាត ដែលកំពុងអភិវឌ្ឍន៍នឹងអាចផ្គត់ផ្គង់បានគ្រប់ទៅតាមតម្រូវការអ្នកប្រើប្រាស់ ៕

ភ្នំពេញ ៖ ទោះបីជាសកម្មភាពការងារ នៅក្នុងអាកាសយានដ្ឋានអន្តរជាតិកម្ពុជា មានភាពស្ងប់ស្ងាត់ជាងមុន ក្រោយពេលស្ថានភាពកូវីដ ១៩ នៅលើពិភពលោកកាន់តែអាក្រក់ ក៏អង្គភាពមួយនេះ មិនមានផែនការកាត់បន្ថយបុគ្គលិកឡើយដោយទុកបុគ្គលិកនៅបម្រើការងារនៅដដែល ខណៈបណ្ដាក្រុមហ៊ុនទេសចរណ៍និងអាកាសចរណ៍នានាត្រូវបានកាត់បន្ថយបុគ្គលិកជាបន្តបន្ទាប់ ។

ក្នុងកិច្ចជំនួប លោក Alain Brun នាយក ប្រតិបត្តិ ក្រុមហ៊ុនអាកាសយានដ្ឋានកម្ពុជានិងលោកម៉ៅ ហាវណ្ណាល់រដ្ឋលេខាធិការអាកាសចរណ៍ស៊ីវិល លោក Alain Brun បានលើកឡើងនូវចំនុចសំខាន់ចំនួន២ បើទោះបីជាមាន វិប្បត្តិជម្ងឺ COVID19 ក៏ដោយ គឺ ៖១- បន្តការរក្សាបុគ្គលិកធ្វើការ និង ២ បន្តអភិវឌ្ឍន៍អាកាសយានដ្ឋានអន្តរជាតិខេត្តព្រះសីហនុ តាមផែនការ ។

លោក Alain Brun នាយក ប្រតិបត្តិ ក្រុមហ៊ុន អាកាសយានដ្ឋានកម្ពុជា បានបញ្ជាក់ថា បើទោះបីមាន ផលប៉ះពាល់ដោយ COVID19 ដោយមានការថយចុះ ចាប់តាំងពីខែមករា រហូតដល់ខែមេសា ឆ្នាំ២០២០ មានចំនួនធ្លាក់ចុះ នៃការហោះហើរ ចំនួន៩៥% ក្តី ក៏ក្រុមហ៊ុន អាកាសយានដ្ឋានកម្ពុជា នៅតែរក្សាចំនួនបុគ្គលិក ដែលមានចំនួនជិត ១៨០០ នាក់ដដែល ដោយមិនមានការកាត់បន្ថយបុគ្គលិកទេ។ ដោយគ្រាន់តែរក្សានូវបុគ្គលិកធ្វើការ តាមវិធីសាស្ត្របែងចែកការងារធ្វើការពេញម៉ោង និងបុគ្គលិកសំរាកបណ្ដោះអាសន្ន ដោយកាត់ប្រាក់ខែតែ២០% ចំពោះបុគ្គលិក ដែលមានប្រាក់ខែច្រើនជាង ៥០០ ដុល្លា ក្នុង០១ ខែ ចំពោះបុគ្គលិក ដែលមានប្រាក់ខែចំនួន៥០០$ ចុះក្រោមគឺរក្សានៅដដែលមិនមានការកាត់ទេ ៕

ខេត្តកំពង់ចាម ៖ ប្រជាពលរដ្ឋដែលជួបការលំបាកក្នុងជីវភាពរស់នៅប្រចាំថ្ងៃចំនួន៥៣គ្រួសារនៅក្នុង ឃុំព្រែកក្របៅ ស្រុកកងមាស ខេត្តកំពង់ចាមបានទទួលអំណោយពីប្រិយសម្ព័ន្ធគ្រិស្តបរិស័ទកម្ពុជា  និងប្រជាជាតិអាស៊ី តាមរយៈក្រុមជុំនំគ្រួសារថ្មីក្នុងព្រះគ្រីស្ត ដែលពិធីនេះត្រូវបានធ្វើឡើងនាព្រឹកថ្ងៃទី ២៤ ខែមេសា ឆ្នាំ២០២០ ក្រោមវត្តមានលោក ខាន់ ខុន ទីប្រឹក្សាក្រសួងធម្មកា និងសាសនា ព្រឹទ្ធបូជា ចារ្យសរពលៈសមាជិកក្រុមប្រឹក្សាភិបាលទទួលបន្ទុកបេសកកម្ម និងជាប្រធានសម្របសម្រួល បេសកកម្មកម្ពុជាក្នុងប្រិយសម្ព័ន្ធគ្រិស្តបរិស័ទកម្ពុជាព្រមទាំងមានការចូលរួមពីមន្ត្រីអាជ្ញាធរមូលដ្ឋាន ផងដែរ។

ឆ្លៀតក្នុងឱកាសនោះដែរ គណៈអធិបតីបានក្រើនរំលឹកដល់បងប្អូនប្រជាពលរដ្ឋឲ្យចូលរួមអំពីការ ការពារទប់ស្កាត់ការរីករាលដាល នៃជំងឺកូវីដ១៩ ដោយផ្តើមចេញពីការថែរក្សាអនាម័យផ្ទាល់ខ្លួនក្នុង គ្រួសារក៏ដូចជានៅក្នុងសហគមន៍ទាំងមូល ពោលគឺត្រូវជៀសវាងការជួបជុំគ្នាក្នុងពិធីធំៗ និងត្រូវពាក់ម៉ាស់នៅទីប្រជុំជន ព្រមទាំងលាងសម្អាតដៃដោយសាប៊ូ អាល់កុល ឬជែលសម្លាប់មេរោគជាញឹកញាប់  ស្របតាមការណែនាំរបស់ក្រសួងសុខាភិបាល ព្រោះជំងឺកូវីដ១៩នេះមិនមានការរើសអើង  ឬយោគយល់ចំពោះអ្នកណាម្នាក់នោះទេ គឺមិនថា អ្នកមាន អ្នកក្រ មន្ត្រីតូចធំ អ្នកកាន់ព្រះពុទ្ធសាសនា ឥស្លាម សាសនា ឬអ្នកជឿព្រះយេស៊ូគ្រិស្តនោះទេ ឲ្យតែមានការធ្វេសប្រហែស គឺជាការផ្តល់ឱកាសឲ្យមាន ការឆ្លងជំងឺនោះជាមិនខាន ដូច្នេះយើងត្រូវទាមទារឲ្យមានការប្រុងប្រយ័ត្នខ្ពស់ទាំងអស់គ្នា។

គួរបញ្ជាក់ផងដែរថា អំណោយដែលបានប្រគល់ជូនក្នុង១គ្រួសារៗត្រូវទទួលបាន អង្ករ០១បេស្មើនឹង ១៥គីឡូក្រាម មី០១កេស ទឹកស៊ីអ៊ីវ០១យួរ ទឹកត្រី០១ដប ក្រម៉ា០២ និងអាហារបំប៉ន១០កញ្ចប់ផងដែរ  ៕ ដោយ ៖ ប៉ែន សុផល

ដោយ ៖ កូវ ប៊ុនហេង

ខេត្តព្រះវិហារ ៖ រសៀលថ្ងៃទី២៤ ខែមេសា ឆ្នាំ២០២០ ក្នុងការអញ្ជើញចុះត្រួតពិនិត្យរាល់សកម្មភាពចិញ្ចឹមសត្វ និងដាំបន្លែនៅតាមបណ្តាអង្គភាពនីមួយៗរបស់មន្ត្រីកងរាជអាវុធហត្ថទូទាំង ៨ក្រុង ស្រុក និងដើម្បីផ្សព្វផ្សាយពីពិធីសាស្ត្រការពារប្រយុទ្ធនឹងប្រឆាំងមេរោគ covid19 អោយយល់កាន់តែច្បាស់បន្ថែមទៀត។

លោកឩត្តមសេនីយ៏ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារបានលើកឡើងថា ក្នុងនាមយើងជាមន្រ្តីនគរបាលយុត្តិធម៌ដែលជាអ្នកអនុវត្តន៍ច្បាប់ធ្វើយ៉ាងណាត្រូវប្រកាន់អោយខ្ជាប់នូវសច្ចភាពស្មោះត្រង់ ត្រូវមុឺងម៉ាត់យកច្បាប់ជាគោល ព្រោះភាពស្មោះត្រង់ជាគ្រឹះដោយមិនអាចខ្វះបាននោះឡើយ។លោកសង្កត់ធ្ងន់ថា នៅពេលមន្ត្រីយើងចុះអនុវត្តន៍ច្បាប់ទៅលើបុគ្គលដែលជាជនសង្ស័យណាមួយ មិនត្រូវប្រើអំពើហឹង្សាទៅលើជនសង្ស័យដែលនាំឲ្យប្រាសចាកក្រមសីលធម៌ក្នុងនាមជាមន្ត្រីដែលប្រសូតចេញពីប្រជាពលរដ្ឋហើយក៏ជាអ្នកបំរើប្រពលរដ្ឋនោះដែរ។

ទទឹមនោះលោកមេបញ្ជាការក៏បានកោតសរសើរដល់លោកមេបញ្ជាការ មេបញ្ជារង ទូទាំង ៨ក្រុង ស្រុក ដោយមួយរយ:កាលកន្លងមកនេះ បានខិតខំប្រឹងប្រែងចូលរួមទប់ស្កាត់បាននូវរាល់បទល្មើសនានាមិនថាបទល្មើសធនធានធម្មជាតិ ឬបទល្មើសគ្រឿងញៀននោះទេ ដោយកំលាំងសមត្ថកិច្ចកងរាជអាវុធហត្ថទាំងអស់ដែលចេះសហកាបានល្អជាមួយនិងអាជ្ឋាធរដែនដីនោះ។ចំនុចត្រង់នេះ លោកមេបញ្ជាការក៏បានស្នើសុំអោយមេបញ្ជាការ មេបញ្ជាការង ទាំងអស់បន្តរអនុវត្តន៍តទៅទៀត។

ជាមួយគ្នានោះដែរ លោកមេបញ្ជាការក៏បានលើកឡើងផងដែរពាក់ពន្វ័ទៅនឹងជំងឺcovid19 ដោយបច្ចុប្បន្ន បើទោះបើមន្ត្ត្រីកងរាជអាវុធហត្ថមានចុះចំនួនជាង២មុឺននាក់នៅទូទាំងប្រទេសនៅមិនទាន់មានមន្ត្រី នាយ និងពលអាវុធហត្ថណាម្នាក់បានឆ្លងជំងឺcovid19 នេះក៏ដោយចុះ ក៏មិនត្រូវធ្វេសប្រហែស និងមើលស្រាលទៅលើសត្រូវដែលគ្មានស្រមោលនោះបានដែរ។ក៏ប៉ុន្តែសត្រូវដែលគ្មានស្រមោលមួយនេះ ក៏យើងនឹងអាចការពារវាមិនអោយឆ្លងបានដែរ បើសិនជាយើងគោរព និងអនុវត្តទៅតាមកាណែនាំត្រឹមត្រូវរបស់ក្រសួងសុខាភិបាលនោះ។

ជាចុងក្រោយលោកមេបញ្ជាការ បានណែនាំដល់មេបញ្ជាកាបញ្ជារងទាំងអស់ដោយចាប់ពីពេលនេះតទៅ ធ្វើយ៉ាងណាក្នុងម្នាក់ចិញ្ចឹមមាន់យ៉ាងតិចអោយបាន ៣០ក្បាលនោះដែរ ដើម្បីជាការឆ្លើយតបតាមបទបញ្ជានឹងការណែនាំរបស់នាយឩត្តមសេនីយ សៅនសុខា អគ្គមេបញ្ជាការងនៃកងយោធពលខេរ:ភូមិន្ននឹងជាមេបញ្ជាការកងរាជអាវុហត្ថលើផ្ទៃប្រទេសដាក់អោយមកអនុវត្តន៍៕