ភ្នំពេញ ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំកិច្ចប្រជុំគណៈកម្មាធិការអចិន្ត្រៃយ៍រដ្ឋសភានៅព្រឹកថ្ងៃទី២៤ ខែមីនា ឆ្នាំ២០២០នេះ។

ជាលទ្ធផលគណៈកម្មាធិការអចិន្រ្តៃយ៍រដ្ឋសភាសម្រេចកោះប្រជុំរដ្ឋសភាជាវិសមញ្ញ នីតិកាលទី៦ នៅព្រឹកថ្ងៃទី២៦ ខែមីនា ឆ្នាំ២០២០ ខាងមុខដើម្បីពិភាក្សានិងអនុម័តសេចក្តីព្រាងច្បាប់ចំនួនបី។ សេចក្តីព្រាងច្បាប់ទាំងបីដែលលើកយកទៅពិភាក្សានិងអនុម័តក្នុងសម័យប្រជុំរដ្ឋសភាជាវិសាមញ្ញនៅព្រឹកថ្ងៃទី២៦ ខែមីនា ខាងមុខនេះមាន ៖

១- សេចក្តីព្រាងច្បាប់ ស្តីពីការអនុម័តយល់ព្រមលើការធានា ទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន រ៉ូយ៉ាល់ គ្រុប អ៊ិនវេសម៉ិនគ្រុប ឯ.ក សម្រាប់គម្រោងវិនិយោគសាងសង់រោងចក្រអគ្គិសនីដុតធ្យូងថ្ម អានុភាព ៧០០មេហ្គាវ៉ាត់ ខេត្តកោះកុង ។

២- សេចក្តីព្រាងច្បាប់ ស្តីពីការអនុម័តយល់ព្រមលើការធានា ទូទាត់របស់រាជរដ្ឋា ភិបាលនៃព្រះរាជាណាចក្រកម្ពុជា ឱ្យក្រុមហ៊ុន ហាន សេង ខូល ម៉ាញ សម្រាប់ គម្រោងវិនិយោគ សាងសង់ខ្សែបណ្តាញបញ្ជូនអគ្គិសនីតង់ស្យុង ២៣០គីឡូវ៉ុល តភ្ជាប់ពីរោងចក្រអគ្គិសនីដុតធ្យូង ថ្ម ខេត្តឧត្តរមានជ័យ។

៣- សេចក្តីព្រាងច្បាប់ ស្តីពីការអនុម័តយល់ព្រមលើការធានា ទូទាត់របស់រាជរដ្ឋា ភិបាល នៃព្រះរាជាណាចក្រកម្ពុជា ឱ្យក្រុមហ៊ុន ហាន សេង ខូល ម៉ាញ សម្រាប់គម្រោងវិ និយោគ សាង សង់រោងចក្រអគ្គិសនីដុតធ្យូងថ្ម អានុភាព ២៦៥មេហ្គាវ៉ាត់ ខេត្តឧត្តរមានជ័យ៕

ភ្នំពេញ ៖ នៅព្រឹកថ្ងៃអង្គារ ១កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៤ ខែមីនា ឆ្នាំ២០២០ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីភាពក្នុងពិធីចុះហត្ថលេខាលើលិខិតប្តូរសារ ស្តីពីការផ្តល់ជំនួយអភិវឌ្ឍន៍ផ្លូវការជប៉ុន ដែលមានទឹកប្រាក់សរុប ៣៤.១៣៨ លានយ៉េន (ប្រមាណ៣១០លានដុល្លារអាមេរិក) ជូនចំពោះរាជរដ្ឋាភិបាលកម្ពុជា។

ពិធីចុះហត្ថលេខានេះ នឹងត្រូវធ្វើឡើង នាវេលាម៉ោង ០៩:០០ព្រឹក នៅវិមានសន្តិភាព ដែលលិខិតប្តូរសារដែលនឹងត្រូវចុះហត្ថលេខាដោយ លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ និងលោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា គ្របដណ្តប់លើការអនុវត្តគម្រោងហិរញ្ញប្បទានឥតសំណងចំនួន ៣គម្រោង និងឥណទានសម្បទាន ចំនួន២គម្រោង ដូចខាងក្រោម ៖

* ហិរញ្ញប្បទានឥតសំណង សម្រាប់អនុវត្ត៖
ទី១- គម្រោងការពង្រីកប្រព័ន្ធផ្គត់ផ្គង់ទឹកស្អាត ក្នុងក្រុងតាខ្មៅ ដែលមានទឹកប្រាក់ចំនួន ៣.៤២១លានយ៉េន (ប្រមាណ៣១លានដុល្លារអាមេរិក)

ទី២- គម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីន ដែលមានទឹកប្រាក់ចំនួន ១.០០០លានយ៉េន (ប្រមាណ ៩លានដុល្លារអាមេរិក)

ទី៣- គម្រោងកម្មវិធីអភិវឌ្ឍន៍សេដ្ឋកិច្ច និងសង្គម ដែលមានទឹកប្រាក់ចំនួន ៣០០លានយ៉េន (ប្រមាណ២,៧លានដុល្លារអាមេរិក)។

* ឥណទានសម្បទាន សម្រាប់អនុវត្ត ៖
ទី១- គម្រោងធ្វើឱ្យប្រសើរនូវផ្លូវជាតិលេខ៥ ដំណាក់កាលទី២ (ធ្លាម្អម-បាត់ដំបង និងសិរីសោភ័ណ្ឌ-ប៉ោយប៉ែត) ដែលមានទឹកប្រាក់ ១៧.៧០២ លានយ៉េន (ប្រមាណ ១៦១លានដុល្លារអាមេរិក)។

ទី២- គម្រោងធ្វើឱ្យប្រសើរនូវផ្លូវជាតិលេខ៥ ដំណាក់កាលទី៣ (ព្រែកក្តាម-ធ្លាម្អម) ដែលមានទឹកប្រាក់ ១១.៧១៥លានយ៉េន (ប្រមាណ១០៦,៥ លានដុល្លារអាមេរិក)។

ហិរញ្ញប្បទានឥតសំណង និងឥណទានសម្បទាន ដែលផ្តល់ដោយរដ្ឋាភិបាលជប៉ុននេះ នឹងជួយលើកកម្ពស់បន្ថែមទៀត នូវការអភិវឌ្ឍសេដ្ឋកិច្ច និងសង្គម នៃព្រះរាជាណាចក្រកម្ពុជា ហើយព្រមទាំងពង្រឹងទំនាក់ទំនងមិត្តភាព និងកិច្ចសហប្រតិបត្តិការ រវាងប្រជាជាតិទាំងពីរ ផងដែរ៕

ខេត្តកំពង់ចាម ៖ លោក អ៊ុន ចាន់ដា អភិបាលខេត្ត និងជាប្រធានគណៈកម្មការប្រយុទ្ធជំងឺកូវីដ១៩ ខេត្តកំពង់ចាម នារសៀល ថ្ងៃ ទី ២៣ ខែមិនា ឆ្នាំ ២០២០ ម្សិលមិញ នេះ បាន ដឹកនាំ កិច្ចប្រជុំផ្សព្វផ្សាយ អំពីវិធានការទប់ស្កាត់ ការរាតត្បាតនៃជំងឺកូវីដ១៩ ដល់អាជ្ញាធរ សមត្ថកិច្ច ស្រុកកងមាស សម្រាប់ធ្វើការផ្សព្វផ្សាយបន្ត ដល់បងប្អូនប្រជាពលរដ្ឋ ក្នុង មូលដ្ឋានរបស់ខ្លួន។

ថ្លែងក្នុងកិច្ចប្រជុំនោះដែរ លោក អ៊ុន ចាន់ដា បានលើកឡើងនូវចំណុចសំខាន់ៗ ចំនួន៣ សម្រាប់ត្រៀម និងបង្ការការរីករាលដាលនៃជំងឺកូវិដ១៩នេះ រួមមាន ដាក់ស្នេីឲ្យ បងប្អូនប្រជាពលរដ្ឋណា ដែលទើបតែ ត្រឡប់ មកពីបណ្ដាប្រទេសនានា ឲ្យពួកគាត់រស់នៅដាច់ដោយឡែក ក្នុង រយៈពេល ១៤ថ្ងៃសិន ព្រមទាំងពិនិត្យនៅសំណាកសម្រាប់តាមដានថាមានជំងឺ កូវីដ១៩ឬទេ។

ព្រមទាំងធ្វើការអប់រំទៅដល់បងប្អូនប្រជាពលរដ្ឋ ដែលរស់នៅតាមមូលដ្ឋានឲ្យច្បាស់ពីជំងឺកូវីដ១៩នេះ ដោយឆ្លងតាមរយៈអ្វីខ្លះ ដោយធ្វើការសំអាតអនាម័យជាប្រចាំសម្រាប់ខ្លួនឯង និងមនុស្សជុំវិញខ្លួន។ ព្រមទាំង សូមអាជ្ញាធរមូលដ្ឋាន ធ្វើការផ្សព្វផ្សាយពីសេចក្តីណែនាំ របស់ប្រមុខរាជរដ្ឋាភិបាល ក្រសួងសុខាភិបាល ក្រសួងមហាផ្ទៃ និងរដ្ឋបាលសាលាខេត្ត ដើម្បីជូនជាដំណឹងដល់បងប្អូនប្រជាពលរដ្ឋ ក៏ដូចជាអាជ្ញាធរមានសមត្ថកិច្ច អោយគាត់យល់ដឹង និងអនុវត្តតាម។

ជាមួយគ្នា នោះ លោក អភិបាលខេត្ត ក៏បានផ្តាំផ្ញើ ដល់អាជ្ញាធរមានសមត្ថកិច្ច និងគ្រប់សាសនា ត្រូវយកចិត្តទុកដាក់លើមុខសញ្ញា ដែលមានការពាក់ព័ន្ធជាមួយជនជាតិ ម៉ាឡេស៊ី ចំនួន ០៧នាក់ ដែលបានរកឃើញមានផ្ទុក ជម្ងឺ កូវីដ១៩ នៅក្នុងឃុំ រការគយ ឃុំ អង្គរបាន និងឃុំ ពាមជីកង នៃស្រុកកងមាសនោះផងដែរ៕ ដោយ ប៉ែន សុផល

ភ្នំពេញ ៖ ក្រសួងធនធានទឹក និងឧតុនិយម នៅព្រឹកថ្ងៃទី២៤ ខែមីនា ឆ្នាំ២០២០នេះ បានចេញសេចក្តីជូនដំណឹងថ្មីមួយ ស្តីពីស្ថានភាពធាតុអាកាសចាប់ពីថ្ងៃនេះ ដល់ ថ្ងៃទី៣១ ខែមីនា ឆ្នាំ២០២០ ដោយបញ្ជាក់ថា ក្នុងរយៈពេលនេះធាតុអាកាសបន្តក្តៅខ្លាំងនៅពេលថ្ងៃ ភ្លៀងអាចធ្លាក់ពីកម្រិតតិចទៅបង្គួរ។

ជាមួយគ្នានេះ ក្រសួងក៏បានអំពាវនាវដល់ប្រជាពលរដ្ឋ ថែរក្សាសុខភាពចំពោះការកើនឡើងនៃកម្តៅ និងសូមបន្តប្រុងប្រយ័ត្ន ចំពោះបាតុភូតផ្គរ រន្ទះ និងខ្យល់កន្ត្រាក់៕

សាលាឧទ្ទរណ៍តំបន់ចំនួនបី នឹងដាក់ឲ្យដំណើរការជាផ្លូវការនៅដើមខែមេសា នេះ

សាលាឧទ្ទរណ៍ទាំងបីនេះ មាននៅក្នុងខេត្តព្រះសីហនុ ខេត្តត្បូងឃ្មុំ និងខេត្តបាត់ដំបង ។សលាឧទ្ទរណ៍នេះ មានសមត្ថកិច្ចបើកសវនាការជំនុំជម្រះលើសំណុំរឿងដែលស្ថិតក្នុងដែនដីរបស់ខ្លួន៕

អាជ្ញាធរថៃ បានចេញវិធានការបន្ទាន់ទប់ស្ថានភាពនៃកូវីឌ១៩ កុំឲ្យឈានទៅកាន់តែធ្ងន់ធ្ងរ

ចំនួនអ្នកឆ្លងកូវីដ១៩ នៅថៃ បានកើនឡើងខ្លាំងគួរឲ្យព្រួួយបារម្ភបំផុត។ មនុស្ស ១៨៨នាក់ត្រូវបានគេធ្វើតេស្តរកឃើញផ្ទុកកូវីដ១៩ នៅថ្ងៃអាទិត្យទី ២២មីនា ដែលធ្វើឲ្យអ្នកឆ្លងសរុបនៅថ្ងៃមានចំនួន ៥៩៩នាក់។ប្រឈមនឹងការឆ្លងរាលដាលកាន់តែលឿនរហ័សនេះ អាជ្ញាធរថៃបានចេញវិធានការមួយចំនួន បន្ថែម ដោយបាន សម្រេចបិទហាងទំនិញ ហាងកែសម្ផស្ស ផ្សារទំនើប មជ្ឈមណ្ឌល ពាណិជ្ជកម្ម ទាំងអស់ ទូទាំងក្រុងបាងកក ចាប់ពីថ្ងៃអាទិត្យ ទី ២២មីនា រហូតដល់ថ្ងៃទី ១២មេសា៕

ប៉ូលិស និង គយ របស់ប្រទេសឆែក ចុះចាប់រឹបអូសយក ម៉ាស និងឧបករណ៍សម្រួលផ្លូវដង្ហើម

ជិត ៧សែន នៅក្នុង ឃ្លាំងស្តុកទំនិញរបស់ក្រុមហ៊ុនឯកជនមួយ នៅភាគខាងជើង ប្រទេស។ អាជ្ញាធរឆែក បានបង្ហាញពីជោគជ័យធំធេងក្នុងការបង្រ្កាបទៅលើក្រុមឈ្មួញលក់ក្នុងទីផ្សារងងឹតក្នុងតម្លៃខ្ពស់។

សាធារណរដ្ឋឆែក កំពុងរងការចោទប្រកាន់ថា បានបន្លំលួច យកម៉ាស និងគ្រឿងបរិក្ខាពេទ្យដែលប្រទេសចិនបញ្ជូនទៅឲ្យ អ៊ីតាលី ខណៈដែលអ៊ីតាលី កំពុងរងគ្រោះខ្លាំងមានមនុស្ស ស្លាប់ដោយ កូវីដ១៩ ច្រើនជាងគេបំផុតក្នុងពិភពលោក៕

 គុយបា និងរុស្ស៊ី បញ្ជូន គ្រូពេទ្យ ទៅ ជួយ អ៊ីតាលី

នៅអ៊ីតាលី ក្នុងមួយថ្ងៃសៅរ៍ទី ២១មីនា មានអ្នកជម្ងឺ កូវីដ១៩ ប្រមាណជិត ៨០០នាក់ បានស្លាប់។ មន្ទីរពេទ្យនៅអ៊ីតាលី កំពុងស្ថិតនៅ ក្នុងភាពអាសន្នធ្ងន់ធ្ងរបំផុត ដោយខ្វះសម្ភារៈចាំបាច់ ក្នុងការសង្រ្គោះជីវិតអ្នកជំងឺ ដែលកើនឡើងឥតឈប់។ ដើម្បី ជួយ សម្រាល ការលំបាកនេះ រដ្ឋាភិបាលគុយបា និងរុស្ស៊ី បានសម្រេចបញ្ជូនក្រុមគ្រូពេទ្យ និងសម្ភារៈពេទ្យមួយ ចំនួន ទៅជួយ អ៊ីតាលី។

 ជំងឺ COVID-19 សម្លាប់មនុស្សនៅអ៊ីរ៉ង់ ជិត ៧.០០០នាក់

តេហេរ៉ង់ ៖ ទីភ្នាក់ងារព័ត៌មានចិនស៊ីនហួរ នាព្រឹកថ្ងៃចន្ទ ទី២៣ ខែមីនា ឆ្នាំ២០២០ នេះ រាយការណ៍ថា ចំនួនមនុស្សស្លាប់ដោយសារតែជំងឺរាតត្បាតសកល COVID-19 នៅទូទាំងប្រទេសអ៊ីរ៉ង់បានកើនឡើងដល់ ១.៦៨៥នាក់ហើយ ក្នុងចំណោមករណីឆ្លងសរុប ២១.៦៣៨ករណី ខណៈអ្នកជំងឺ ៧.៩១៣នាក់ក៏បានជាសះស្បើយរួចទៅហើយដែរ។

អាជ្ញាធរអ៊ីរ៉ង់ កាលពីថ្ងៃអាទិត្យម្សិលមិញនេះ មជ្ឈមណ្ឌលពាណិជ្ជកម្ម ហាងលក់ទំនិញ និងសូម្បីតែឱសថស្ថាន ក៏ត្រូវបានបញ្ជាឲ្យបិទទ្វារជាបណ្តោះអាសន្នផងដែរ ដើម្បីទប់ស្កាត់ការឆ្លងរាលដាល COVID-19 ឲ្យកាន់តែខ្លាំងក្លា តែរដ្ឋាភិបាលអ៊ីរ៉ង់ សម្រេចប្រើប្រាស់ផ្សារទំនើបធំមួយនៅកណ្តាលរដ្ឋធានីតេហេរ៉ង់ ធ្វើជាកន្លែងទទួលព្យាបាលអ្នកជំងឺឆ្លង COVID-19 ដែលអាចមានសមត្ថភាពផ្ទុកមនុស្ស ៣,០០០នាក់៕

 ករណីកូវីដ១៩ នៅស្រុកកងមាស មានមនុស្ស៤០នាក់ត្រូវដាក់ឲ្យនៅដោយឡែក

មនស្ស ៤០នាក់ ដែលមានទំនាក់ទំនងជាមួយបុរសជនជាតិម៉ាឡេស៊ី ចំនួន ៧នាក់ដែលឆ្លង COVID-19 នៅស្រុកកងមាស ត្រូវបានរៀបចំឲ្យពួកគេដាក់នៅដាច់ដោយឡែករយៈពេល១៤ថ្ងៃ ព្រមទាំងបានយកសំណាកទៅធ្វើតេស្តនៅវិទ្យាស្ថានប៉ាស្ព័រកម្ពុជា រួចហើយ និងកំពុងរង់ចាំលទ្ធផលនៃការវិភាគ។

អភិបាលខេត្តកំពង់ចាម លោក អ៊ុន ចាន់ដា បានប្រាប់នៅព្រឹកថ្ងៃទី២២ ខែមីនា នេះថា ចំណាត់ការយកមនុស្សដាក់ដាច់ដោយឡែកទាំង ៤០នាក់នៅតាមមូលដ្ឋាននានាស្រុកកងមាស ខេត្តកំពង់ចាម នោះ បានធ្វើឡើងភ្លាមៗនៅក្រោយពេលក្រសួងសុខាភិបាលប្រកាសថា បុរសជនជាតិម៉ាឡេស៊ី ៧នាក់ នោះ ត្រូវបានរកឃើញមានផ្ទុក COVID-19 ៕

 ពលរដ្ឋ និងពលករខ្មែរនៅម៉ាឡេស៊ី អាចទៅពិនិត្យ”កូវីដ១៩”ដោយឥតគិតថ្លៃ

ភ្នំពេញ ៖ ស្ថានទូតខ្មែរនៅម៉ាឡេស៊ី ជូនដំណឹងដល់ពលរដ្ឋ និងពលករខ្មែរ ដែលកំពុងស្នាក់នៅ ឬធ្វើការនៅក្នុងប្រទេសម៉ាឡេស៊ី ត្រូវទៅពិនិត្យ និងព្យាបាលសុខភាពដោយឥតគិតថ្លៃ ទោះគ្មានច្បាប់ស្នាក់នៅក៏ដោយ បើសិនមានសញ្ញាណាមួយដែលសង្ស័យជារោគសញ្ញានៃវីរុស COVID-19។

ក្នុងសេចក្តីជូនដំណឹង វានបង្ហាញខ្លះៗពីរោគសញ្ញាដែលគួរឲ្យសង្ស័យដូចជា ៖ ក្តៅខ្លួនខ្លាំង ក្អក ឈឺបំពងក ហៀរសំបោរ និងដកដង្ហើមថប់ណែន…។

សេចក្តីជូនដំណឹងដដែលបញ្ជាក់ថា បើទោះបីជាការស្នាក់នៅដោយខុសច្បាប់នៅក្នុងប្រទេសម៉ាឡេស៊ី ពុំមានការលើកលែងទោសក៏ដោយ ប៉ុន្តែក្នុងអំឡុងពេលអនុវត្តបទបញ្ជារឹងបន្តឹងការធ្វើដំណើរ អាជ្ញាធរម៉ាឡេស៊ី មិនចាប់ ឬឃាត់ខ្លួនជនទាំងឡាយណា ដែលសង្ស័យថាកើតជំងឺ COVID-19 រួមទាំងអ្នកជូនអ្នកជំងឺទៅមន្ទីរពេទ្យផងដែរ ដោយពិនិត្យដោះស្រាយតាមករណីជាក់ស្តែងនីមួយៗ៕

ចិន រាយការណ៍ថា គ្មានករណីឆ្លងថ្មីនៃវីរុស កូរ៉ូណា ៥ថ្ងៃ ជាប់គ្នា

ចិន ៖ គណៈកម្មាធិការសុខភាពជាតិរបស់ចិន បានរាយការណ៍នៅព្រឹកនេះថា គ្មានករណីឆ្លងថ្មីនៃវិរុស កូរ៉ូណា សូម្បីតែម្នាក់នៅក្នុងរយៈពេល៥ថ្ងៃជាប់គ្នា ខណៈមានការឆ្លងថ្មី ចំនួន ៣៩ករណីដែលនាំចូលពីបរទេស និងមានអ្នកស្លាប់ ចំនួន ៩នាក់ ផ្សេងទៀត គិតត្រឹមពាក់កណ្តាលអធ្រាត្រថ្ងៃអាទិត្យ។ នេះបើយោងតាមប្រភពពី CGTN ។

របាយការណ៍ដដែលបានបញ្ជាក់ ចំនួនករណីឆ្លងនៅ ចិនដីគោកសរុប ៨១.០៩៣នាក់ ខណៈចំនួនអ្នកស្លាប់កើនដល់ ៣.២៧០ នាក់ ។នៅថ្ងៃដដែល អាជ្ញាធរសុខាភិបាល ចិន បាននិយាយថា អ្នកជម្ងឺចំនួន ៤៥៩នាក់ ត្រូវបានអនុញ្ញាតឲ្យចាកចេញពីមន្ទីរពេទ្យដែលធ្វើឲ្យចំនួនអ្នកជាសះស្បើយ សរុបកើនដល់ ៧២.៧០៣នាក់ នៅទូទាំងប្រទេស ៕

 ទណ្ឌិតជិត៤០០នាក់ស្ថិតក្នុងបញ្ជីត្រូវពិនិត្យដើម្បីបន្ធូរបន្ថយ និងលើកលែងទោសអំឡុងបុណ្យចូលឆ្នាំប្រពៃណីខ្មែរ

ភ្នំពេញ ៖ គណៈកម្មការជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសនៃក្រសួងយុត្ដិធម៌កំពុងពិនិត្យបញ្ជីឈ្មោះទណ្ឌិតចំនួន ៣៩៩នាក់(ស្ដ្រី៤៣នាក់) ដើម្បីដាក់ក្នុងការស្នើសុំបន្ធូរបន្ថយទោស និងលើកលែងទោសសម្រាប់ពិធីបុណ្យចូលឆ្នាំថ្មីប្រពៃណីជាតិខ្មែរនាខែមេសា ខាងមុខ។

លោក គឹម សន្ដិភាព រដ្ឋលេខាធិការ និងជាអ្នកនាំពាក្យក្រសួងយុត្ដិធម៌បានប្រាប់ថា សម្រាប់ឱកាសចូលឆ្នាំថ្មីប្រពៃណីជាតិខាងមុខនេះគណៈកម្មការជាតិ ពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសដែលមានរដ្ឋមន្ដ្រីក្រសួងយុត្ដិធម៌ លោក អង្គ វង្ស វឌ្ឍានា ជាប្រធានបានទទួលសំណើពីគណៈកម្មការរាជធានី-ខេត្តចំនួន ២២ (ពន្ធនាគារ ២២) និងពីគណៈកម្មការក្រសួងមហាផ្ទៃ (មណ្ឌលអប់រំកែប្រែចំនួន ៤)៕

ភ្នំពេញ ​៖ គិត​ត្រឹម​ម៉ោង១០​ព្រឹក ថ្ងៃ​ទី២៣ មីនា ២០២០ នាយកដ្ឋាន​ប្រយុទ្ធ​នឹង​ជំងឺឆ្លង ហៅ​កាត់​ថា CDC របស់​ក្រសួងសុខាភិបាល​បាន​ប្រកាស​ឲ្យ​ដឹង​ថា ​មានការ​រក​ឃើញ​នូវ​ករណី​វិជ្ជមាន​កូ​វី​ដ១៩ ចំនួ​ន ២ ករណី​បន្ថែម​ទៀត ដែល​នាំ​ឲ្យ​ចំនួន​ឆ្លង​សរុប​ហក់​ឡើង​ដល់៨៦ករណី​ទូ​ទាំង​ប្រទេស​។

នាយកដ្ឋាន​ប្រយុទ្ធ​នឹង​ជំងឺឆ្លង​បាន​បញ្ជាក់​ថា «​យើង​រក​ឃើញ​អ្នកជំងឺ COVID-19 សរុប​ទាំងអស់​ចំនួន ៨៦​ករណី ។ រហូត​ពេល​នេះ​យើង​បាន​ព្យាបាល​ជា​ពីរ​នាក់​ហើយ​គឺ​ជនជាតិ​ចិន​១​នាក់ និង​ជនជាតិ​អង់គ្លេស​១​នាក់ ។ យើង​ពុំ​ទាន់​រក​ឃើញ​ភ័ស្តុតាង​បញ្ជាក់​ថា​មានការ​ឆ្រ​ហូល​ង​ក្នុង​សហគមន៍​នៅឡើយ​ទេ តែ​លទ្ធភាព​នឹង​អាច​កើត​មាន​ឡើង​»​។

សូម​បញ្ជាក់​ថា ២ ករណី​ថ្មី​នេះ​គឺ​មួយ​ករណី​មាន​លើ​ជនជាតិ​ខ្មែរ​នៅ​ខេត្តកោះកុង ដែល​នាំ​ឲ្យ​ខេត្តកោះកុង​មាន​ករណី​វិជ្ជមាន​កូ​វី​ដ​១៩ ចំនួន២ករណី និង​កំពង់ចាម​ឡើង​ដល់១១​ករណី៕