ក្រុងប៉ោយប៉ែត ៖ ទីតាំងលក់ម៉ូតូមួយកន្លែងយីហោ« ជុំ សារិទ្ធ លក់ទិញម៉ូតូគ្រប់ប្រភេទ» ស្ថិតភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវកម្លាំងគយចល័តក្រសួងប្រចាំគល់ស្ពានទឹកថ្លាបង្ក្រាប ថ្ងៃទី២២ ខែមេសា ឆ្នាំ២០២០ នេះ ដោយសង្ស័យថា ជាម៉ូតូដែលក្រុមរកស៊ីក្រៅច្បាប់ឃុបឃិតជាមួយមន្ត្រីមានអំណាចតាមព្រំដែន នាំចូលតាមច្រករបៀងរបស់ខេត្តខ្មែរជាប់ប្រទេសថៃ។

ម៉ូតូដែលកម្លាំងគយបង្ក្រាបនោះគេឃើញភាគច្រើនម៉ូតូម៉ាក់ PCX សេរីទំនើប ក្នុងនោះគេឃើញកម្លាំងគយបានឲ្យកម្លាំងកម្មករលើកម៉ូតូទាំងអស់ដាក់រថយន្តដឹកជញ្ញជូនទៅទីតាំង កម្លាំងគយប្រចាំគលស្ពានទឹកថ្លាដើម្បី កោះហៅម្ចាស់ទៅសួរនាំ និងបងពន្ធតាមច្បាប់។

ប្រភពថា ម៉ូតូនៅក្នុងក្រុងប៉ោយប៉ែត ដែលដាក់តាំងលក់មួយភាគគីជាម៉ូតូនាំចូលតាមច្រករបៀង បង់ពន្ធតាមទូរស័ព្ទ មួយភាគទៀតចូលមកតាមរយៈខ្សែបក្ខពួកក្រុមឈ្មួញ ហូរចូលស្ទើររៀងរាល់ថ្ងៃយប់តាមបន្ទាត់ព្រំដែនក្នុងស្រុកចំនួនបីខាងជើងផ្លូវជាតិលេខ៥ ដូចជាស្រុកអូរជ្រៅ ស្រុកស្វាយចេកនិងស្រុកថ្មពួក។ មិនតែប៉ុណ្ណោះ មានទាំងនាំរថយន្តចង្កួតដ្ដាំសេរីទំនើបៗ យកប្ដូរពណ៏ថ្នាំត្រេអ៊ី ជាច្រើនផងដែរ ។

បញ្ហាការនាំចូលរថយន្ត ម៉ូតូរួមទាំងមុខទំនិញគេចពន្ធតាមបន្ទាត់ព្រំដែនក្នុងខេត្តបន្ទាយមានជ័យនៅតែបន្តមានកើត បើទោះជាអនុសាសន៌សម្ដេចក្រឡាហោម ស ខេង បញ្ជាឲ្យបិទច្រករបៀងក៏ដោយ។ ហើយការខាតបង់ថវិកាចូលរដ្ឋក្នុងមួយខែៗ ជាច្រើនដោយសារតែការនាំចូលមុខទំនិញ ឬរថយន្ត ម៉ូតូគេចពន្ធរបស់ក្រុមឈ្មួញជាមួយមន្ត្រីខិលខូចមួយចំនួនតូចតាមបន្ទាត់ព្រំដែន។
ប្រភពបន្តថា បើគយចល័តប្រចាំតាមច្រករបៀងមិនបើកដៃ ធ្វើយ៉ាងណាទើបម៉ូតូ និងទំនិញគេចពន្ធផ្សេងៗទៀតនាំឆ្លងដែនមកខាងទឹកដីកម្ពុជាបានបែបនេះ។

ករណីខាងលើលោក ឈុន សុធាវណ្ណារី អនុប្រធានគយចល័តក្រសួង ស្រាវជ្រាវ និងបង្ក្រាបអំពើរត់ពន្ធតំបន់៥ ប្រចាំខាងលិចស្ពានទឹកថ្លា ខេត្តបន្ទាយមានជ័យ ប្រាប់ថា ការដែលលោកសហការដឹកនាំកំលាំងចម្រុះចុះចាប់កន្លែងលក់ម៉ូតូខាងលើនេះ គឺលក់ម៉ូតូអត់ពន្ធ និងគ្មានពន្ធនាំចូល ដែលម្ចាស់លក់ម៉ូតូ នាំចូលតាមច្រករបៀងមកដាក់តាំងលក់ដោយគ្មានច្បាប់ ហ៊ានរំលោភលើកម្មសិទ្ធិបញ្ញារបស់ក្រុមហ៊ុន (ហុងដា.HONDA)ដែលនាំចូលផ្តាច់មុខនៅក្នុងប្រទេសកម្ពុជា។

លោកបានបន្ត ថា ម៉ូតូសេរីទំនើបផលិតឆ្នាំ២០១៩/២០២០ មានចំនួន ១០គ្រឿងជាង ត្រូវបានកំលាំងលោករឹបអូសបាន គឺខាងលោកយករថយន្តដឹកយកទៅទីចាត់ការគយនិងរដ្ឋាករក្រសួង ដើម្បីអោយម្ចាស់សាមី ចូលទៅបង់ពន្ធជូនចូលរដ្ឋអោយបានត្រឹមត្រូវតែប៉ុណ្ណោះ៕

ខេត្តបាត់ដំបង ៖ ទំនប់ស្ទាក់ទឹកស្ទឹងដូនទ្រី ដែលមានទីតាំងស្ថិតក្នុងឃុំបាសាក់ ស្រុករុក្ខគិរី បានខេត្តបាត់ដំបង គ្រោងនឹងបញ្ចប់ការសាងសង់នៅឆ្នាំ២០២៣ ខាងមុខនេះ។ ទំនប់នេះ អាចផ្គត់ផ្គង់ទឹកទៅដល់ដីកសិកម្មប្រមាណជា៤ម៉ឺនហិកតា ហើយជួយកាត់បន្ថយការជន់លិចក្នុងតំបន់បានប្រមាណ ៣០ភាគរយទៀតផង។

លោក ជុង តំណាងក្រុមហ៊ុនកូរ៉េ ដែលកំពុងសាងសង់ទំនប់ស្ទាក់ទឹកស្ទឹងដូនទ្រី បានមានប្រសាសន៍ថា រហូតមកដល់ពេលនេះ ទំនប់ស្ទឹងដូនទ្រី សម្រេចការសាងសង់បានប្រមាណ ២០ភាគរយ ទំនប់ស្ទាក់ទឹកនេះ អាចផ្ទុកទឹកបាន ១៧៧លានម៉ែត្រគីប។ពេលសាងសង់រួច រាល់នឹងអាចជួយកាត់បន្ថយការជន់លិចនៅក្នុងតំបន់នោះបានប្រមាណ៣០ភាគរយ ហើយគម្រោងនេះ គ្រោងនឹងបញ្ចប់ការសាងសង់នៅឆ្នាំ២០២២ ប៉ុន្តែដោយមានការកែប្រែខ្លះ ទើបការសាងសង់អូសបន្លាយដល់ឆ្នាំ២០២៣។

លោក ឡុង ផល្គុន ប្រធានមន្ទីរធនធានទឹក និងឧតុនិយមខេត្តបាត់ដំបង បានប្រាប់ឲ្យដឹងថា នៅព្រឹកថ្ងៃ ២៣ ខែមេសា នេះថា ទំនប់ស្ទាក់ទឹកស្ទឹងដូនទ្រី មានសមត្ថភាពអាចជួយស្រោចស្រពលើផ្ទៃដីកសិកម្ម បានប្រមាណជាង ៤ម៉ឺនហិកតានៅក្នុងស្រុកចំនួន៣ មានស្រុករុក្ខៈគិរី ស្រុកមោងឫស្សី និងស្រុកគាស់ក្រឡ។ទំនប់នេះសាងសង់ឡើង ក្នុងលក្ខណៈបច្ចេកវិទ្យាទំនើប ដោយមានការចោះភ្នំ ខណៈដែលប្រព័ន្ធធារាសាស្ត្រផ្សេងៗនៅក្នុងប្រទេសកម្ពុជាពុំទាន់មានធ្វើបែបនេះនៅឡើយ។ ទំនប់នេះនឹងបើកឲ្យទៅផ្គត់ផ្គងដល់ទំបន់បាសាក់ សម្រាប់ចែកចាយបន្ត។

គួរបញ្ជាក់ផងដែរថានៅក្នុងខេត្តបាត់ដំបង មានប្រព័ន្ធធារាសាស្ត្រ បានសាងសង់ចប់រួចរាល់និងបានជួយស្រោចស្រពដំណាំកសិកម្ម របស់ប្រជាពលរដ្ឋ មានដូចជា ទំនប់ពហុបំណងសេកសក់ ទំនប់កង្ហត់ ទំនប់បឹងកំពីងពួយ ទំនប់ស្ទឹងបវេល និងទំនប់បាសាក់ ។នៅមានប្រព័ន្ធធារាសាស្ត្រមួយចំនួនទៀតដែលកំពុងធ្វើការសាងសង់ មានដូចជា ទំនប់ស្ទាក់ទឹកស្ទឹងដូនទ្រី ទំនប់អាងត្រជាក់ចិត្ត ទំនប់អាងរាមគន់ ទំនប់អាងពោធិ៍ និងទំនប់សាលាតាអនជាដើម។ទំនប់ទាំងអស់នេះនឹងជួយបង្កើនការដាំដុះ ពិសេសដំណាំស្រូវរបស់កសិករ បានធ្វើច្រើនដងក្នុងមួយឆ្នាំៗ ។ ទំនប់ស្ទាក់ទឹកស្ទឹងដូនទ្រី គឺជាគម្រោងអភិវឌ្ឍន៍ប្រព័ន្ធធារាសាស្ត្រដ៏ធំមួយបន្ថែមទៀត របស់រាជរដ្ឋាភិបាល ជាប្រយោជន៍សម្រាប់ស្រោចស្រពដំណាំកសិកម្មរបស់ពលរដ្ឋនៅស្រុកមួយចំនួនក្នុងខេត្តបាត់ដំបង៕

ខេត្តបាត់ដំបង ៖ ប្រជាពលរដ្ឋរស់នៅក្នុងភូមិលំផាត់ ឃុំអូរដារស្រុកកំរៀង បានប្រទះឃើញគ្រាប់កាំភ្លើងផ្លោង 105 mm សេសសល់ពីសម័យសង្រ្គាមជាច្រើនគ្រាប់កប់នៅក្នុងដី ហើយរាយការណ៍ភ្លាមៗដល់កម្លាំងសមត្ថកិច្ចកាលពីថ្ងៃទី ២២ ខែមេសាឆ្នាំ២០២០។

លោកវរសេនីយ៍ឯក គឹម ពន្លក អធិការនៃអធិការដ្ឋាននគរ បាលស្រុកកំរៀង បានឲ្យដឹងថាប្រជាពលរដ្ឋឈ្មោះ ឈុត ហឿប ភេទប្រុស អាយុ៦៦ឆ្នាំ ជាម្ចាស់ដីចម្ការមួយកន្លែងស្ថិតនៅក្នុងមូលដ្ឋានខាងលើ បានប្រើប្រាស់ត្រាក់ទ័រភ្ជួរ ដីចម្ការរបស់គាត់ ដើម្បីបង្កបង្កើនផលដូចរាល់ឆ្នាំ ប៉ុន្តែឆ្នាំ នេះពេលគាត់កំពុងភ្ជួរដី បានប្រទះ ឃើញវត្ថុកប់នៅក្នុងដីដែលគួរឲ្យសង័្សយ។ពេលគាត់ឈប់ភ្ជួរដោយត្រាក់ទ័រ យកដៃកាយពិនិត្យមើលក៏ឃើញយុទ្ធភ័ណ្ឌមិនទាន់ផ្ទុះ ទើបគាត់ផ្តល់ព័ត៌មានទៅដល់មន្រ្តីនគរបាលប៉ុស្តិ៍រដ្ឋបាលមូលដ្ឋានភ្លាមៗក្រោយពេល ពិនិត្យ បានរាយការណ៍ជូនទៅមន្រ្តីអង្គភាពកំចាត់មីនកម្ពុជាCM ACមកពិនិត្យតែម្ដង។យុទ្ធភ័ណ្ឌទាំងនោះជាសំណល់ពីសង្រ្គាមនេះហើយវាជាប្រភេទក្បាលគ្រាប់កាំភ្លើងផ្លោង១០៥មីល្លីម៉ែត្រមានចំនួន៥៨គ្រាប់ ដែលកប់ទុកក្នុងដីកាលពីសម័យសង្គ្រាមជាយូរមកហើយ។

លោកវរសេនីយ៍ឯក គឹម ពន្លក បានបញ្ជាក់ឲ្យដឹងថាដោយ សារភូមិសាស្រ្ត ស្រុកកំរៀង ជាស្រុកមួយនៅជាប់ព្រំដែនកម្ពុជា ថៃ ហើយជាភូមិសាស្រ្តដែលជោគជាំទៅដោយសង្រ្គាមបង្ហូរឈាមពីអតីតកាលសម័យប៉ុល ពត ដូច្នេះនៅមូលដ្ឋាននេះតែងតែមានបន្សល់ទុកនូវប្រភេទ យុទ្ធភ័ណ្ឌមិនទាន់ផ្ទុះស្ទើរគ្រប់ប្រភេទនិងរាយប៉ាយនៅច្រើនកន្លែង។

ឯកឧត្តម ឧត្តមសេនីយ៍ទោ អ៊ុច សុខុន បានអំពាវនាវដល់ប្រជាពលរដ្ឋនៅមូលដ្ឋានចូលរួមផ្តល់ព័ត៌មានជាបន្ទាន់ទៅដល់មន្រ្តីនគរបាលមូលដ្ឋាននៅពេលបានប្រទះឃើញយុទ្ធភ័ណ្ឌមិនទាន់ផ្ទុះចៀសវាងការចាប់កាន់ ការប៉ះពាល់ឬនាំយកទៅកែច្នៃជាវត្ថុផ្សេងៗ ដែលជាហេតុនាំបង្កឲ្យមានករណីគ្រោះថ្នាក់ដល់អាយុជីវិតឬពិការភាពដោយសារយុទ្ធភ័ណ្ឌទាំងនេះ។
គួរបញ្ជាក់ផងដែរថាអង្គភាពកំចាត់មីនកម្ពុជា CMAC បានប្រមូលយកយុទ្ធភ័ណ្ឌទាំងនោះតាមលក្ខណៈបច្ចេក ទេស ដើម្បីរក្សាទុកនិងធ្វើការបំផ្លាញចោលហើយ៕

ភ្នំពេញ ៖ ក្រសួងសុខាភិបាល នៅថ្ងៃទី២៤ ខែមេសា ឆ្នាំ២០២០នេះ បានចេញប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១១០នាក់។

ចំណែកអ្នកកំពុងសម្រាកព្យាបាលជំងឺកូវីដមានសរុបចំនួន១២នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី២៤ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលប ទទួលបានមុននេះបន្តិច៕ 

ដោយ ៖ ប៉ែន សុផល

ខេត្តកំពង់ចាម ៖ នៅថ្ងៃព្រហស្បតិ៍២កើត ខែពិសាខ ឆ្នាំជូតទោស័ក ព.ស ២៥៦៣ ត្រូវនឹងថ្ងៃទី២៣ ខែមេសា ឆ្នាំ២០២០ លោកអូត ឈាងលី អភិបាលនៃគណៈអភិបាលស្រុកជើងព្រៃ លោកស្រី ឃី លាងស៊ីម អភិបាលរងនៃគណ:អភិបាលស្រុក ក្រុមការងារអនុសាខាកាកបាទក្រហមកម្ពុជា ស្រុក និងលោក យន់ ឈុនលាង ប្រធានគណកម្មាធិការសហភាពសហព័ន្ធយុវជនកម្ពុជាស្រុក និងក្រុមការងារ បាននាំយកអំណោយដ៍ថ្លៃថ្លារបស់លោក វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់និងនេសាទនិងជាប្រធានក្រុមការងាររាជរដ្ឋាភិបាលចុះជួយស្រុកជើងព្រៃ ចុះចែកជូនដល់ប្រជាពលរដ្ឋក្រីក្រដល់ខ្នងផ្ទះចំនួន១០គ្រួសារនៅឃុំព្រៃចារ។

ដោយក្នុងមួយគ្រួសារទទួលបាន ឣង្ករ៥០គីឡូក្រាម ទឹកក្រូច១កេះ និងថវិកាចំនួន ៤៉៉ម៉ឺនរៀល និងម៉ាស់មួយចំនួនផងដែរ។

ក្នុងឱកាសនោះដែរលោក អូត ឈាងលី ក៍ណែនាំបងប្អូនប្រជាពលរដ្ឋរស់នៅឃុំព្រៃចារ រួមគ្នាប្រយុទ្ធប្រឆាំងនឹងជំងឺកូវីដ-19 និងវីធីការការពារជំំំងឺកូវីដ-19 ដោយលាងដៃនឹងសាប៊ួ​ អាកុល ជែល អោយបានញឹកញាប់នឹងជៀសនៃការជួបជុំគ្នា៕

ភ្នំពេញ៖ ឃ្លាំងស្តុកអេតចាយមួយកន្លែងត្រូវបានអគ្គីភ័យឆាបឆេះអស់ទាំងស្រុងតែម្តងខណៈម្ចាស់ចាក់សោទ្វារទុកចោលហើយនាំគ្នាទៅលេងស្រុកកំណើត។

ហេតុការណ៏អគ្គីភ័យឆាបឆេះខាងលើនេះបានកើតឡើងកាលពីវេលាម៉ោង២និង៣០នាទីរៀលថ្ងៃទី២៣ខែមេសាឆ្នាំ២០២០
ស្ថិតនៅផ្លូវលំភូមិដំណាក់ធំ១សង្កាត់ស្ទឹងមានជ័យទី២ខណ្ឌមានជ័យរាជធានីភ្នំពេញ។
ប្រភពព័ត៍មាននៅកន្លែងកើតហតុបានឲ្យដឹងថាមុនពេលកើតហេតុឃ្លាំងអេតចាយខាងលើម្ចាស់បានចាក់សោទ្វារទុកចោលហើយក៏នាំគ្នាទៅលេងស្រុកកំណើតលុះនៅថ្ងៃកើតហេតុខាងលើស្រាប់តែគេឃើញមានអណ្តាតភ្លើងឆេះចេញមកពីក្នុុងឃ្លាំងបង្កឲ្យមានផ្សែងខ្មៅហុយយ៉ាងខ្មួលខ្មាញ់ធ្វើឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចខណ្ឌមានជ័យ ភ្លាមៗនោះដែរក៏មានរថយន្តពន្លត់អគ្គីភ័យរបស់កងរាជអាវុធហត្ថចំនួន៣គ្រឿងនិងរថយន្តពន្លត់អគ្គីភ័យរបស់ស្នងការនគរបាលរាជធានីភ្នំពេញរថយន្តចំនួន២គ្រឿងនិងរថយន្តក្រុមហ៊ុនស្រាបៀកម្ពុជាចំនួន២គ្រឿងចេញទៅអន្តរាគមន៏ជួយបាញ់ពន្លត់ឲ្យរលត់ជាស្ថាពរទៅវិញនៅវេលាម៉ោង៣និង២០នាទីថ្ងៃដដែល។

សមត្ថកិច្ចបានបញ្ជាកឲ្យដឹងថាអគ្គីភ័យដែលឆាបឆេះឃ្លាំងអេតចាយខាងលើគឺបណ្តាលមកពីឆ្លងចរន្តអគ្គីសនី ក្នុងហេតុការណ៏អគ្គីភ័យខាងលើនេះមិនបណ្តាលឲ្យមានអ្នករងគ្រោះនោទេគ្រាន់តែខូចខាតសម្ភារះអេតចាយអស់មួយចំនួនធំនិងឆេះឃ្លាំងស្តុកអេតចាយអស់ទាំងស្រុងតែម្តង៕

ថ្លែងនៅក្នុងសន្និសីទសារព័ត៌មាន នាទីស្ដីការគណៈរដ្ឋមន្ត្រីកាលពីព្រឹកថ្ងៃទី២៣ មេសា ២០២០នេះលោក ហេង សុខគង់ រដ្ឋលេខាធិការក្រសួងឧស្សាកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា បច្ចុប្បន្ននេះកម្ពុជា មានស្ថាប័នផ្គត់ផ្គង់ទឹកស្អាតពីរធំៗ រួមមានរដ្ឋករទឹកស្វយ័តក្រុងភ្នំពេញ និងអង្គភាពរដ្ឋករទឹកខេត្តសៀមរាប ។ ក្រៅពីនេះដែរក៏មានអង្គភាពរដ្ឋករទឹករបស់រដ្ឋ១១ផ្សេងទៀត រួមជាមួយនឹងវិស័យឯកជនប្រមាណ២៦០អង្គភាពផងដែរ ។

លោកបន្តថា ក្រសួងក៏បានដាក់ផែនការរួចហើយផងដែរ ត្រឹមឆ្នាំ ២០២៣ ប្រជាពលរដ្ឋទាំងអស់ប្រមាណ៩០ភាគរយទទួលបានទឹកស្អាតប្រើប្រាស់ ហើយនៅឆ្នាំ ២០២៥ គឺ១០០ភាគរយនៃប្រជាជននៅទីប្រជុំមានទឹកស្អាតប្រើប្រាស់ និងមានគុណភាព ។

លោក បន្ថែមថា បច្ចុប្បន្ននេះបញ្ហាកង្វះទឹកបានចោទជាបញ្ហាធំមួយសម្រាប់ប្រជាពលរដ្ឋកម្ពុជា ដោយសារតែ សម្ពាធទឹកខ្សោយ ។ ការខ្សោយសម្ពាធទឹកនេះ គឺបណ្ដាលមកពីកំណើននៃអគារខ្ពស់ៗកាន់តែច្រើន ដោយអគារទាំងនោះត្រូវទាញទឹកយកទៅប្រើប្រាស់ក្នុងអគាររបស់ខ្លួនទាំងអគារដែលសាងសង់រួច និងអគារកំពុងសាងសង់ ។ ការទាញយកទឹកទៅប្រើប្រាស់របស់ពួកគាត់គឺធ្វើឡើងតាមរយៈការប្រើម៉ូទ័របូមឡើងដូច្នេះហើយ ទើបធ្វើអោយសម្ពាធទឹកក្នុងទុយោ កាន់តែខ្សោយនិងធ្វើអោយលំនៅឋាននៅតាមជាយរាជធានីភ្នំពេញ មិនមានទឹកប្រើប្រាស់គ្រប់គ្រាន់ ។

បើតាមលោក សោម សិទ្ធិប្រធាននាយកដ្ឋានទឹកស្អាតនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអោយដឹងថា បច្ចុប្បន្នរដ្ឋករទឹកស្វយ័តក្រុងភ្នំពេញទាំងមូលផលិតទឹកបានតែប្រមាណ៦០ម៉ឺនម៉ែត្រគូបប៉ុណ្ណោះ ខណៈការប្រើប្រាស់របស់ពលរដ្ឋដែលតពី រដ្ឋករទឹកភ្នំពេញ មានប្រមាណដល់ទៅជាង៧០ម៉ឺនម៉ែត្រគូប ទើបធ្វើអោយទីតាំងមួយចំនួននៅចុងបណ្ដាញមានសម្ពាធខ្សោយ ។

លោកបន្តថាការកាត់នូវតំបន់មួយចំនួនពីខេត្តជាប់រាជធានី ចូលក្នុងដែនរាជធានីភ្នំពេញ ធ្វើអោយតម្រូវការទឹកប្រើប្រាស់កាន់តែច្រើនឡើងថែមទៀត ។ ដើម្បីបង្គ្រប់នូវការប្រើប្រាស់ទឹកស្អាតរបស់ពលរដ្ឋក្នុងរាជធានីភ្នំពេញ រដ្ឋករទឹកស្វយ័តក្រុងភ្នំពេញ បានបន្ថែមផែនការមេ ដោយសាងសង់អាងពិពិធកម្មទឹកស្អាតថ្មីមួយទៀតនៅបាក់ខែង ដែលអាចផលិតបានប្រមាណ២០ម៉ឺនម៉ែត្រគូប ។ អាងពិពិធកម្មនេះ នឹងបញ្ចប់រួចរាល់នៅចុងឆ្នាំ ២០២២ ។ជំហានបន្ទាប់រដ្ឋករទឹកក៏នឹងសាងសង់អាងពិពិធកម្មទឹកស្អាតមួយទៀត អាចផ្គត់ផ្គង់ទឹកបាន ២០ម៉ឺនម៉ែត្រគូប ដើម្បីត្រៀមទប់ទល់នឹងកំណើននៃការប្រើប្រាស់ ។ ក្រៅពីនេះ ជប៉ុនក៏បានជួយសាងសង់អាងពិពិធកម្មមួយទៀតនៅក្រុងតាខ្មៅ ដែលអាចផលិតបាន៣ម៉ឺនម៉ែត្រ ដូច្នេះនៅពេលរួចរាល់ហើយ កម្ពុជា នឹងមានទឹកសម្រាប់ផ្គត់ផ្គង់១លានម៉ែត្រគូបក្នុងមួយថ្ងៃ ដែលអាចធានាបាននូវការផ្គត់ផ្គង់ទឹកស្អាតដល់ឆ្នាំ ២០៣០ ៕

ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៣ ខែមេសា ឆ្នាំ២០២០នេះ បានចេញសេចក្តីប្រកាសមួយទៀត ដើម្បីបង្ហាញអំពីការធ្វើបត្តាឡីស័កចំពោះកម្មកររោងចក្រ ក្នុងរាជធានីភ្នំពេញ បន្ទាប់ពីឈប់សម្រាកអំឡុងពេលបុណ្យចូលឆ្នាំ ហើយត្រឡប់ចូលបម្រើការជាវិញ។ នេះបើតាមសេចក្តីប្រកាសក្រសួងការងារ។

បើតាមរបាយការណ៍ដែលបង្ហាញដោយក្រសួងការងារ និងបណ្តុះបណ្តាលវិជ្ជាជីវៈ, លទ្ធផលនៃការត្រួតពិនិត្យសុខភាព កម្មកររោងចក្រ ថ្ងៃទី២២ ខែមេសា ឆ្នាំ២០២០ គិតត្រឹមម៉ោង ១៨:០០នាទីយប់ មានកម្មកររោងចក្រមកត្រួតពិនិត្យសុខភាពចំនួន ៥១៦នាក់ ក្នុងនោះដាក់ឱ្យធ្វើចត្តាឡីស័កនៅផ្ទះ១៤ថ្ងៃ ៥០៥នាក់, ដាក់ឱ្យស្នាក់នៅមណ្ឌលចត្តាឡីស័កកម្រិត១ (វិទ្យាល័យជម្ពូវន) ចំនួន៦នាក់, ដាក់ឱ្យស្នាក់នៅមណ្ឌលបត្តាឡីស័កកម្រិត២ (វិទ្យាវ័យជម្ពូវ័ន) ចំនួន ៥នាក់ និងយកសំណាកទៅពិសាធបន្ត ចំនួន៦នាក់។ ទន្ទឹមនឹងនេះ ក្រុមគ្រូពេទ្យបានអនុញ្ញាតឱ្យធ្វើចត្តាឡីស័កនៅផ្ទះ ចំនួន៦០នាក់ ក្នុងនោះ ចេញពីមណ្ឌលចត្តាឡីស័កកម្រិត១ ចំនួន ១១នាក់ និងកម្រិត២ ចំនួន ៤៩នាក់។

ដោយឡែកលទ្ធផលទី២៣ ខែមេសា ឆ្នាំ២០២០ គិតត្រឹមម៉ោង ១១:០០នាទីព្រឹក មានកម្មករ រោងចក្រមកត្រតពិនិត្យសុខភាព ចំនួន ៩៥នាក់ ក្នុងនោះ ដាក់ឱ្យធ្វើចត្តាឡីស័កនៅផ្ទះ ១៤ថ្ងៃ ចំនួន ៩៣នាក់, ដាក់ឱ្យស្នាក់នៅមណ្ឌលចត្តាឡីស័កកម្រិត១ ចំនួន ០០នាក់ និងដាក់ឱ្យស្នាក់នៅបណ្ដូលចត្តាឡីស័កត២ ចំនួន២នាក់។ នេះបើតាមសេចក្តីប្រកាសដដែ៕