បរទេស ៖ គិតត្រឹមម៉ោង ៨៖០០នាទីព្រឹកថ្ងៃសៅរ៍ ទី២៥ ខែមេសា ឆ្នាំ២០២០នេះ ចំនួនករណីឆ្លងជំងឺ COVID-19 នៅទូទាំងពិភពលោក បានកើនឡើងរហូតដល់ ២,៨២៨,៥៧៥ករណីហើយ ក្នុងនោះមនុស្សស្លាប់សរុបមានចំនួន ១៩៧,០៩០នាក់ និងជាសះស្បើយឡើងវិញ ៧៩៨,៣៧១ នាក់។ នេះបើយោងតាមទិន្នន័យពីគេហទ័ពអន្តរជាតិ Worldometer។
Worldometer បញ្ជាក់ថា សហរដ្ឋអាមេរិក កំពុងតែឈានឆ្ពោះទៅរកតួលេខ ១លាននាក់ដូចការព្យាករណ៍ហើយ សម្រាប់ករណីឆ្លងជំងឺ COVID-19 សុរបនៅទូទាំងប្រទេសមហាអំណាចមួយនេះ៕
ភ្នំពេញ ៖ ក្រសួងសុខាភិបាល នៅថ្ងៃទី២៥ ខែមេសា ឆ្នាំ២០២០នេះ បានចេញប្រកាសនូវដំណឹងល្អបន្តទៀតថា អ្នកជំងឺកូវីដ១៩ បានជាសះស្បើយថ្មីចំនួន៧នាក់ទៀត ធ្វើឲ្យចំនួនអ្នកជាសះស្បើយ កើនឡើងរហូតដល់១១៧នាក់ ហើយពុំមានករណីអ្នកឆ្លងជំងឺកូវីដថ្មីទេ។
ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៥នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី២៥ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលទទួលបានមុននេះបន្តិច
អ្នកជាសះស្បើយចំនួន០៧នាក់រួមមាន៖
* បុរសជនជាតិម៉ាឡេស៊ី អាយុ៦៦ឆ្នាំ មកពីប្រទេសម៉ាឡេស៊ី ដើរធ្វើការងារសាសនានៅខេត្តកែប ដែលបាន បញ្ជូនពីមន្ទីរពេទ្យខេត្តកែប មកព្យាបាលបន្តនៅមន្ទីរពេទ្យមិត្តភាពខ្មែរ-សូវៀត ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។
* បុរសជនជាតិខ្មែរ អាយុ៣៧ឆ្នាំ នៅក្រុងសៀមរាប ជាអ្នកបើករថយន្តឱ្យក្រុមអ្នកទេសចរបារាំង បានព្យាបាលជាសះស្បើយ ដោយទទួលបានលទ្ធផលអវិជ្ជមានវីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរពេទ្យខេត្តសៀមរាប។
* ស្ត្រីជនជាតិខ្មែរ អាយុ២០ឆ្នាំ នៅរាជធានីភ្នំពេញ ជានិស្សិតខ្មែរដែលបានវិលត្រឡប់ មកពីសិក្សានៅប្រទេសអង់គ្លេស បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសក្ខវីដ-១៩ ចំនួន០២ដងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។
* ស្ត្រីជនជាតិវៀតណាម អាយុ២៧ឆ្នាំ នៅ Apartment Diamond1 កោះពេជ្រ សង្កាត់ទន្លេបាសាក់ ខណ្ឌចម្ការមន រាជធានីភ្នំពេញ បានព្យាបាលជាសះស្បើយ ដោយទទួលបានលទ្ធផលអវិជ្ជមានវីរុសកូវីដ-១៩ ចំនួន០២ដង និង ត្រូវបានអនុញ្ញាតឱ្យចេញ ពីមណ្ឌលសុខភាពចាក់អង្រែក្រោម។
* ស្ត្រីជនជាតិវៀតណាម អាយុ២៤ឆ្នាំ ជាអ្នកទេសចរស្នាក់នៅបន្ទប់ជួលនៅផ្លូវលេខ៣០២ សង្កាត់បឹងកេងកង១ រាជធានីភ្នំពេញបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូដ-១៩ ចំនួន០២ដង ត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។
* ស្ត្រីជនជាតិចិន អាយុ៣០ឆ្នាំ ស្នាក់នៅ Olympia អគារ C1 ជាអ្នកទេសចរ និងចង់បើកហាងនៅកម្ពុជា ជាករណីប៉ះពាល់ផ្ទាល់ជាមួយដៃគូ (បុរសជនជាតិចិនមានវីរុសកូវីដ-១៩ រកឃើញនៅប្រទេសចិន) បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន ០២ដង និងត្រូវបានអនុញ្ញាតឱ្យ ចេញពីមន្ទីរពេទ្យមិត្តភាពខ្មែរ-សូវៀត។
* ស្ត្រីជនជាតិចិន អាយុ៣១ឆ្នាំ ស្នាក់នៅផ្លូវ៣៥២ សង្កាត់បឹងកេងកង១ រាជធានីភ្នំពេញ បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមាន វីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមន្ទីរ ពេទ្យមិត្តភាពខ្មែរ-សូវៀត៕
ភ្នំពេញ ៖ ខណៈតម្រូវការប្រើប្រាស់ទឹកបានកើនឡើងលើសពីការផ្គត់ផ្គង់ អង្គភាពរដ្ឋករទឹកស្វយ័តក្រុងភ្នំពេញ បានរៀបចំផែនការដើម្បីសាងសង់អាងពិពិធកម្មទឹកស្អាតបន្ថែម ដើម្បីបង្កើនការផលិតនិងផ្គត់ផ្គង់ទៅកាន់ប្រជាពលរដ្ឋ និងបំពេញតម្រូវការប្រើប្រាស់ក្នុងប្រទេសកម្ពុជា ។ ជាលទ្ធផល ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បញ្ជាក់ថា ឆ្នាំ ២០៣០ កម្ពុជានឹងអាចផ្គត់ផ្គង់ទឹកបានប្រមាណ១លានម៉ែត្រគូបក្នុងមួយថ្ងៃ ដើម្បីផ្គត់ផ្គង់នៅក្នុងប្រតេសកម្ពុជា ។
បើយោងតាមលោកហេង សុខគង់ រដ្ឋលេខាធិការនិងជាអ្នកនាំពាក្យនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងវានុវត្តន៍ បានមានប្រសាសន៍ថា តម្រូវការទឹកស្អាតនៅក្នុងប្រទេសកម្ពុជាមានការកើនឡើងគួរអោយតក់សម្គាល់ នៅក្នុងរយៈពេលប៉ុន្មានឆ្នាំចុងក្រោយនេះ ដែលធ្វើអោយតម្រូវការបានកើនឡើងលើសពីការផ្គត់ផ្គង់ និងជំរុញអោយរដ្ឋករទឹកស្វយ័តក្រុងភ្នំពេញ ត្រូវរកវិធីសាស្ត្រ និងយុទ្ធសាស្ត្រ ដើម្បី ផ្គត់ផ្គង់អោយគ្រប់ទៅតាមតម្រូវការ ។
លោកបន្តថា ពេលនេះរដ្ឋករទឹកបាននិងកំពុងសាងសង់អាងពិពិធកម្មទឹកស្អាតមួយកន្លែងនៅបាក់ខែដែលអាចមានសមត្ថភាពផលិតបាន២០ម៉ឺនម៉ែត្រគូប ហើយអាងពិពិធកម្មនេះ នឹងរួចរាល់នៅឆ្នាំ ២០២៣ និងអាចផ្គត់ផ្គង់បានផងដែរ ។ នៅជំហានទី២នឹងសង់អាងពិពិធកម្មនេះ អាចមានសមត្ថភាពផ្គត់ផ្គង់បាន២០ម៉ែត្រគូបទៀត ហើយបូកជាមួយជាមួយការផ្គត់ផ្គង់នាពេលបច្ចុប្បន្ននេះប្រមាណ៦០ម៉ែត្រគូបទៀតនឹងបានដល់១លានម៉ែត្រគូប នៅឆ្នាំ ២០៣០ ។
លោកបន្តថា ក្រៅពីអង្គភាពរដ្ឋករទឹករបស់រដ្ឋទាំងពីរ រួមមានរដ្ឋករទឹកស្វយ័តក្រុងភ្នំពេញ និងរដ្ឋករទឹកស្វយ័តខេត្តសៀមរាបក៏មានអង្គភាពផ្គត់ផ្គង់របស់ឯកជនប្រមាណ២៦០ស្ថាប័នទៀត ដូច្នេះនៅក្នុងឆ្នាំ ២០៣០ខាងមុខ ទីប្រជុំជនទូទាំងប្រទេស នឹងមានទឹកស្អាតប្រើប្រាស់គ្រប់គ្រាន់និងប្រកបដោយគុណភាពមិនមានការខ្វះមុខខ្វះក្រោយឡើយ ។
លោកបានបញ្ជាក់ថា ការអភិវឌ្ឍទឹកស្អាតមានភាពពិបាកជាងការអភិវឌ្ឍអគ្គិសនី ទើបធ្វើអោយការដោះស្រាយបញ្ហាខ្វះខាតអគ្គិសនីបានឆាប់ជាងការដោះស្រាយបញ្ហាខ្វះទឹក ។ ការអភិវឌ្ឍបណ្ដាញអគ្គិសនី មានភាពងាយស្រួលជាងទឹក ព្រោះថាការតបណ្ដាញទឹកត្រូវជីករូងក្រោមដីដើម្បី បង្កប់ទុយោ ហើយក៏ត្រូវគាស់តបណ្ដាញទឹកចូលផ្ទះនីមួយផងដែរ ។ ទាំងនេះហើយ ទើបធ្វើអោយការតទឹកត្រូវប្រើពេលយូរជាងអគ្គិសនី ។
បើតាមលោកសោម សិទ្ធិប្រធាននាយកដ្ឋានទឹកស្អាតនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងបច្ចេកវិទ្យាបានមានប្រសាសន៍ផងដែរថា បច្ចុប្បន្ន រដ្ឋករទឹកស្វយ័តក្រុងភ្នំពេញទាំងមូលផលិតទឹកបានតែប្រមាណ៦០ម៉ឺនម៉ែត្រគូបប៉ុណ្ណោះ ខណៈការប្រើប្រាស់របស់ពលរដ្ឋដែលតពី រដ្ឋករទឹកភ្នំពេញ មានប្រមាណដល់ទៅជាង៧០ម៉ឺនម៉ែត្រគូប ទើបធ្វើអោយទីតាំងមួយចំនួននៅចុងបណ្ដាញមានសម្ពាធខ្សោយ ។
លោកបន្តថាការកាត់នូវតំបន់មួយចំនួនពីខេត្តជាប់រាជធានី ចូលក្នុងដែនរាជធានីភ្នំពេញ ធ្វើអោយតម្រូវការទឹកប្រើប្រាស់កាន់តែច្រើនឡើងថែមទៀត ។យ៉ាងណាក៏ដោយ តាមរយៈការអភិវឌ្ឍន៍អាងពិពិធកម្មទឹកស្អាត ដែលកំពុងអភិវឌ្ឍន៍នឹងអាចផ្គត់ផ្គង់បានគ្រប់ទៅតាមតម្រូវការអ្នកប្រើប្រាស់ ៕
ភ្នំពេញ ៖ ទោះបីជាសកម្មភាពការងារ នៅក្នុងអាកាសយានដ្ឋានអន្តរជាតិកម្ពុជា មានភាពស្ងប់ស្ងាត់ជាងមុន ក្រោយពេលស្ថានភាពកូវីដ ១៩ នៅលើពិភពលោកកាន់តែអាក្រក់ ក៏អង្គភាពមួយនេះ មិនមានផែនការកាត់បន្ថយបុគ្គលិកឡើយដោយទុកបុគ្គលិកនៅបម្រើការងារនៅដដែល ខណៈបណ្ដាក្រុមហ៊ុនទេសចរណ៍និងអាកាសចរណ៍នានាត្រូវបានកាត់បន្ថយបុគ្គលិកជាបន្តបន្ទាប់ ។
ក្នុងកិច្ចជំនួប លោក Alain Brun នាយក ប្រតិបត្តិ ក្រុមហ៊ុនអាកាសយានដ្ឋានកម្ពុជានិងលោកម៉ៅ ហាវណ្ណាល់រដ្ឋលេខាធិការអាកាសចរណ៍ស៊ីវិល លោក Alain Brun បានលើកឡើងនូវចំនុចសំខាន់ចំនួន២ បើទោះបីជាមាន វិប្បត្តិជម្ងឺ COVID19 ក៏ដោយ គឺ ៖១- បន្តការរក្សាបុគ្គលិកធ្វើការ និង ២ បន្តអភិវឌ្ឍន៍អាកាសយានដ្ឋានអន្តរជាតិខេត្តព្រះសីហនុ តាមផែនការ ។
លោក Alain Brun នាយក ប្រតិបត្តិ ក្រុមហ៊ុន អាកាសយានដ្ឋានកម្ពុជា បានបញ្ជាក់ថា បើទោះបីមាន ផលប៉ះពាល់ដោយ COVID19 ដោយមានការថយចុះ ចាប់តាំងពីខែមករា រហូតដល់ខែមេសា ឆ្នាំ២០២០ មានចំនួនធ្លាក់ចុះ នៃការហោះហើរ ចំនួន៩៥% ក្តី ក៏ក្រុមហ៊ុន អាកាសយានដ្ឋានកម្ពុជា នៅតែរក្សាចំនួនបុគ្គលិក ដែលមានចំនួនជិត ១៨០០ នាក់ដដែល ដោយមិនមានការកាត់បន្ថយបុគ្គលិកទេ។ ដោយគ្រាន់តែរក្សានូវបុគ្គលិកធ្វើការ តាមវិធីសាស្ត្របែងចែកការងារធ្វើការពេញម៉ោង និងបុគ្គលិកសំរាកបណ្ដោះអាសន្ន ដោយកាត់ប្រាក់ខែតែ២០% ចំពោះបុគ្គលិក ដែលមានប្រាក់ខែច្រើនជាង ៥០០ ដុល្លា ក្នុង០១ ខែ ចំពោះបុគ្គលិក ដែលមានប្រាក់ខែចំនួន៥០០$ ចុះក្រោមគឺរក្សានៅដដែលមិនមានការកាត់ទេ ៕
ភ្នំពេញ ៖ កំឡុងពេលកូវីដ១៩ កំពុងរាលដាលទូទាំងពិភពលោក ផលប៉ះពាល់ក៏បានចាប់ផ្ដើមកើតឡើងបន្តបន្ទាប់ ទៅលើសេដ្ឋកិច្ច ក្នុងនោះ ចរន្តនៃការផ្ទេរប្រាក់របស់ពលករចំណាកស្រុក ក៏ត្រូវបានព្យាករណ៍នឹងមានការធ្លាក់ចុះមិនធ្លាប់មានដែរ គឺបណ្ដាលមកពីការបាត់ការងារធ្វើ បាត់ចំណូលជាដើម ។
យោងតាមការសិក្សារបស់ធនាគារពិភពលោក បានព្យាករណ៍ថា ការផ្ញើប្រាក់ចេញនៅទូទាំងសាកលលោក ត្រូវបានរំពឹងថា នឹងធ្លាក់ចុះយ៉ាងខ្លាំង ចំនួនប្រមាណជាង២០ភាគរយ នៅក្នុងឆ្នាំ ២០២០នេះ ដោយសារតែវិបត្តិបណ្ដាលមកពីការរាលដាលនៃជំងឺកូវីដ ១៩ និងការបិទសកម្មភាព សេដ្ឋកិច្ចសឹងតែគ្រប់ផ្នែកទាំងអស់ ។ សម្រាប់មូលហេតុដែលនាំឱ្យមានការធ្លាក់ចុះ ក្នុងសភាពយ៉ាងគំហុកមិនធ្លាប់មានក្នុងប្រវត្តិសាស្ត្រថ្មីកន្លងទៅនេះ គឺមួយភាគធំមកពីការធ្លាក់ចុះនៃចំនួនប្រាក់បៀវត្សរ៍ និងការងាររបស់ពលករចំណាកស្រុក ដែលសុទ្ធជាក្រុមមនុស្សងាយបាត់បង់ការងារនិងប្រាក់បៀវត្សរ៍មុនគេ នៅក្នុងបណ្ដាប្រទេសដែលពួកគេកំពុងធ្វើការ កាលណាមានវិបត្តិសេដ្ឋកិច្ចកើតឡើង។
លំហូរការផ្ញើប្រាក់ចេញទៅកាន់ប្រទេសមានចំណូលទាបនិងមធ្យម ត្រូវបានព្យាករណ៍ទុកថានឹងស្រុតចុះប្រហែល ១៩,៧ភាគរយ គឺសមមូលទៅនឹង ៤៤៥ពាន់លានដុល្លារអាមេរិក ដែលជាការបាត់បង់នូវប្រភពហិរញ្ញវត្ថុចិញ្ចឹមជីវិតដ៏សំខាន់មួយសម្រាប់គ្រួសារងាយរងគ្រោះ ។
ការសិក្សានានាបានបង្ហាញថា ការផ្ញើប្រាក់ចេញរបស់ពលករចំណាកស្រុកបានជួយសម្រាលភាពក្រីក្រនៅតាមប្រទេសមានចំណូលទាបនិងមធ្យម, ធ្វើឱ្យអាហារូបត្ថម្ភមានភាពប្រសើរឡើង, រួមចំណែកបង្កើនការចំណាយទៅលើវិស័យអប់រំ និងជួយកាត់បន្ថយពលកម្មកុមារនៅតាមគ្រួសារទីទ័លក្រ។ ប៉ុន្តែកាលណាចំនួនប្រាក់ផ្ញើចេញធ្លាក់ចុះ វានឹងជះផលមិនល្អទៅលើលទ្ធភាពចាយវាយរបស់គ្រួសារនានាទៅលើផ្នែកទាំងនេះ ដោយសារតែគេចាំបាច់ត្រូវបង្វែរធនធានហិរញ្ញវត្ថុកាន់តែច្រើនទៅដោះស្រាយបញ្ហាខ្វះខាតស្បៀងអាហារ និងសេចក្តីត្រូវការបន្ទាន់នៅក្នុងជីវភាពរស់នៅ ជាមុនសិន ។
លោក ដេវីដ ម៉ាល់ប៉ាស់ ប្រធានធនាគារពិភពលោក មានប្រសាសន៍ថា ការផ្ញើប្រាក់មកពីក្រៅជាប្រភពចំណូលដ៏សំខាន់សម្រាប់បណ្តាប្រទេសកំពុងអភិវឌ្ឍន៍ ។ ឱនភាពសេដ្ឋកិច្ចដែលកំពុងកើតឡើងដោយសារជំងឺកូវីដ១៩នេះ បង្កការប៉ះទង្គិចយ៉ាងដំណំលើលទ្ធភាពរបស់ពលករក្នុងការផ្ញើលុយទៅផ្ទះ អាស្រ័យហេតុនេះ វាកាន់តែសំខាន់ថែមទៀតដែលយើងត្រូវខិតខំធ្វើយ៉ាងណាឱ្យសេដ្ឋកិច្ចនៃប្រទេសជឿនលឿនឆាប់ងើបឡើងវិញ ។ ប្រាក់ផ្ញើពីក្រៅ ជួយដល់ក្រុមគ្រួសារក្នុងការចាយវាយលើស្បៀងអាហារ, លើការថែទាំសុខភាព, និងលើសេចក្តីត្រូវការចាំបាច់ជាមូលដ្ឋានផ្សេងៗ។
ក្នុងខណៈដែលក្រុមធនាគារពិភពលោកអនុវត្តវិធានការរហ័ស និងមានទ្រង់ទ្រាយទូលំទូលាយមួយដើម្បីជួយដល់ប្រទេសដែលជួបការលំបាក យើងកំពុងតែព្យាយាមរក្សាបណ្តាញផ្ទេរប្រាក់ចេញឱ្យនៅដំណើរការដដែល និងជួយសហគមន៍ក្រីក្រឱ្យមានលទ្ធភាពទទួលបានរាល់តម្រូវការចាំបាច់បំផុតទាំងនេះ សម្រាប់ទ្រទ្រង់ការរស់នៅប្រចាំថ្ងៃ។»
ក្នុងន័យនេះ ធនាគារពិភពលោកកំពុងតែជួយដល់ប្រទេសដែលជាសមាជិករបស់ខ្លួន នៅក្នុងការតាមដានទៅលើរំហូរប្រាក់ផ្ញើចេញតាមរយៈបណ្តាញនានា, ទៅលើថ្លៃចំណាយនិងភាពងាយស្រួលក្នុងការផ្ញើលុយទៅស្រុក, និងទៅលើបទប្បញ្ញត្តិសម្រាប់ការពារសុចរិតភាពហិរញ្ញវត្ថុដែលមានឥទ្ធិពលទៅលើរំហូររបស់ប្រាក់ផ្ទេរ។
ក្រុមធនាគារពិភពលោកកំពុងធ្វើសហការគ្នាជាមួយក្រុមប្រទេស G20 និងជាមួយសហគមន៍អន្តរជាតិ ដើម្បីកាត់បន្ថយថ្លៃចំណាយលើការផ្ទេរប្រាក់ និងជួយបង្កើនបរិយាប័ន្នហិរញ្ញវត្ថុសម្រាប់ជាប្រយោជន៍ដល់ជនក្រីក្រ។ ក្នុងឆ្នាំ ២០១៩ ប្រាក់ដែលផ្ញើពីក្រៅ នៅទូទាំងពិភពលោកមានរហូតដល់៥៥៤ពាន់លានដុល្លារអាមេរិក ហើយភាគច្រើនផ្ញើទៅប្រទេសមានចំណូលទាបនិងមធ្យម ។
សម្រាប់ឆ្នាំ២០២១ ធនាគាពិភពលោកធ្វើការប៉ាន់ប្រមាណថា ការផ្ញើប្រាក់ចេញទៅកាន់ប្រទេសមានចំណូលទាបនិងមធ្យម នឹងងើបមុខឡើងវិញ ដោយវានឹងកើនប្រហែល ៥,៦ភាគរយ គឺមានចំនួនប្រហែល ៤៧០ប៊ីលានដុល្លារអាមេរិក ។
គួរបញ្ជាក់ផងដែរថា សម្រាប់ប្រទេសកម្ពុជា ការផ្ញើប្រាក់ពីបរទេសភាគច្រើនមកពីប្រទេសកូរ៉េ និងប្រទេសថៃ ដោយប្រាក់ផ្ញើពីក្រៅប្រទេសទាំងនេះ ក៏បានជួយលើកកម្ពស់ជីវភាពពលរដ្ឋកម្ពុជាបានមួយកម្រិតផងដែរ ដូច្នេះរាជរដ្ឋាភិបាលក៏បានចាត់បញ្ជូលពលរកខ្លួនទៅបម្រើការងារនៅប្រទេសសំខាន់បី ផងដេរគឺកូរ៉េ ម៉ាឡេស៊ី និងប្រទេសថៃ ៕ 
ខេត្តកំពង់ចាម ៖ ប្រជាពលរដ្ឋដែលជួបការលំបាកក្នុងជីវភាពរស់នៅប្រចាំថ្ងៃចំនួន៥៣គ្រួសារនៅក្នុង ឃុំព្រែកក្របៅ ស្រុកកងមាស ខេត្តកំពង់ចាមបានទទួលអំណោយពីប្រិយសម្ព័ន្ធគ្រិស្តបរិស័ទកម្ពុជា និងប្រជាជាតិអាស៊ី តាមរយៈក្រុមជុំនំគ្រួសារថ្មីក្នុងព្រះគ្រីស្ត ដែលពិធីនេះត្រូវបានធ្វើឡើងនាព្រឹកថ្ងៃទី ២៤ ខែមេសា ឆ្នាំ២០២០ ក្រោមវត្តមានលោក ខាន់ ខុន ទីប្រឹក្សាក្រសួងធម្មកា និងសាសនា ព្រឹទ្ធបូជា ចារ្យសរពលៈសមាជិកក្រុមប្រឹក្សាភិបាលទទួលបន្ទុកបេសកកម្ម និងជាប្រធានសម្របសម្រួល បេសកកម្មកម្ពុជាក្នុងប្រិយសម្ព័ន្ធគ្រិស្តបរិស័ទកម្ពុជាព្រមទាំងមានការចូលរួមពីមន្ត្រីអាជ្ញាធរមូលដ្ឋាន ផងដែរ។
ឆ្លៀតក្នុងឱកាសនោះដែរ គណៈអធិបតីបានក្រើនរំលឹកដល់បងប្អូនប្រជាពលរដ្ឋឲ្យចូលរួមអំពីការ ការពារទប់ស្កាត់ការរីករាលដាល នៃជំងឺកូវីដ១៩ ដោយផ្តើមចេញពីការថែរក្សាអនាម័យផ្ទាល់ខ្លួនក្នុង គ្រួសារក៏ដូចជានៅក្នុងសហគមន៍ទាំងមូល ពោលគឺត្រូវជៀសវាងការជួបជុំគ្នាក្នុងពិធីធំៗ និងត្រូវពាក់ម៉ាស់នៅទីប្រជុំជន ព្រមទាំងលាងសម្អាតដៃដោយសាប៊ូ អាល់កុល ឬជែលសម្លាប់មេរោគជាញឹកញាប់ ស្របតាមការណែនាំរបស់ក្រសួងសុខាភិបាល ព្រោះជំងឺកូវីដ១៩នេះមិនមានការរើសអើង ឬយោគយល់ចំពោះអ្នកណាម្នាក់នោះទេ គឺមិនថា អ្នកមាន អ្នកក្រ មន្ត្រីតូចធំ អ្នកកាន់ព្រះពុទ្ធសាសនា ឥស្លាម សាសនា ឬអ្នកជឿព្រះយេស៊ូគ្រិស្តនោះទេ ឲ្យតែមានការធ្វេសប្រហែស គឺជាការផ្តល់ឱកាសឲ្យមាន ការឆ្លងជំងឺនោះជាមិនខាន ដូច្នេះយើងត្រូវទាមទារឲ្យមានការប្រុងប្រយ័ត្នខ្ពស់ទាំងអស់គ្នា។
គួរបញ្ជាក់ផងដែរថា អំណោយដែលបានប្រគល់ជូនក្នុង១គ្រួសារៗត្រូវទទួលបាន អង្ករ០១បេស្មើនឹង ១៥គីឡូក្រាម មី០១កេស ទឹកស៊ីអ៊ីវ០១យួរ ទឹកត្រី០១ដប ក្រម៉ា០២ និងអាហារបំប៉ន១០កញ្ចប់ផងដែរ ៕ ដោយ ៖ ប៉ែន សុផល
ដោយ ៖ កូវ ប៊ុនហេង
ខេត្តព្រះវិហារ ៖ រសៀលថ្ងៃទី២៤ ខែមេសា ឆ្នាំ២០២០ ក្នុងការអញ្ជើញចុះត្រួតពិនិត្យរាល់សកម្មភាពចិញ្ចឹមសត្វ និងដាំបន្លែនៅតាមបណ្តាអង្គភាពនីមួយៗរបស់មន្ត្រីកងរាជអាវុធហត្ថទូទាំង ៨ក្រុង ស្រុក និងដើម្បីផ្សព្វផ្សាយពីពិធីសាស្ត្រការពារប្រយុទ្ធនឹងប្រឆាំងមេរោគ covid19 អោយយល់កាន់តែច្បាស់បន្ថែមទៀត។
លោកឩត្តមសេនីយ៏ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារបានលើកឡើងថា ក្នុងនាមយើងជាមន្រ្តីនគរបាលយុត្តិធម៌ដែលជាអ្នកអនុវត្តន៍ច្បាប់ធ្វើយ៉ាងណាត្រូវប្រកាន់អោយខ្ជាប់នូវសច្ចភាពស្មោះត្រង់ ត្រូវមុឺងម៉ាត់យកច្បាប់ជាគោល ព្រោះភាពស្មោះត្រង់ជាគ្រឹះដោយមិនអាចខ្វះបាននោះឡើយ។លោកសង្កត់ធ្ងន់ថា នៅពេលមន្ត្រីយើងចុះអនុវត្តន៍ច្បាប់ទៅលើបុគ្គលដែលជាជនសង្ស័យណាមួយ មិនត្រូវប្រើអំពើហឹង្សាទៅលើជនសង្ស័យដែលនាំឲ្យប្រាសចាកក្រមសីលធម៌ក្នុងនាមជាមន្ត្រីដែលប្រសូតចេញពីប្រជាពលរដ្ឋហើយក៏ជាអ្នកបំរើប្រពលរដ្ឋនោះដែរ។
ទទឹមនោះលោកមេបញ្ជាការក៏បានកោតសរសើរដល់លោកមេបញ្ជាការ មេបញ្ជារង ទូទាំង ៨ក្រុង ស្រុក ដោយមួយរយ:កាលកន្លងមកនេះ បានខិតខំប្រឹងប្រែងចូលរួមទប់ស្កាត់បាននូវរាល់បទល្មើសនានាមិនថាបទល្មើសធនធានធម្មជាតិ ឬបទល្មើសគ្រឿងញៀននោះទេ ដោយកំលាំងសមត្ថកិច្ចកងរាជអាវុធហត្ថទាំងអស់ដែលចេះសហកាបានល្អជាមួយនិងអាជ្ឋាធរដែនដីនោះ។ចំនុចត្រង់នេះ លោកមេបញ្ជាការក៏បានស្នើសុំអោយមេបញ្ជាការ មេបញ្ជាការង ទាំងអស់បន្តរអនុវត្តន៍តទៅទៀត។
ជាមួយគ្នានោះដែរ លោកមេបញ្ជាការក៏បានលើកឡើងផងដែរពាក់ពន្វ័ទៅនឹងជំងឺcovid19 ដោយបច្ចុប្បន្ន បើទោះបើមន្ត្ត្រីកងរាជអាវុធហត្ថមានចុះចំនួនជាង២មុឺននាក់នៅទូទាំងប្រទេសនៅមិនទាន់មានមន្ត្រី នាយ និងពលអាវុធហត្ថណាម្នាក់បានឆ្លងជំងឺcovid19 នេះក៏ដោយចុះ ក៏មិនត្រូវធ្វេសប្រហែស និងមើលស្រាលទៅលើសត្រូវដែលគ្មានស្រមោលនោះបានដែរ។ក៏ប៉ុន្តែសត្រូវដែលគ្មានស្រមោលមួយនេះ ក៏យើងនឹងអាចការពារវាមិនអោយឆ្លងបានដែរ បើសិនជាយើងគោរព និងអនុវត្តទៅតាមកាណែនាំត្រឹមត្រូវរបស់ក្រសួងសុខាភិបាលនោះ។
ជាចុងក្រោយលោកមេបញ្ជាការ បានណែនាំដល់មេបញ្ជាកាបញ្ជារងទាំងអស់ដោយចាប់ពីពេលនេះតទៅ ធ្វើយ៉ាងណាក្នុងម្នាក់ចិញ្ចឹមមាន់យ៉ាងតិចអោយបាន ៣០ក្បាលនោះដែរ ដើម្បីជាការឆ្លើយតបតាមបទបញ្ជានឹងការណែនាំរបស់នាយឩត្តមសេនីយ សៅនសុខា អគ្គមេបញ្ជាការងនៃកងយោធពលខេរ:ភូមិន្ននឹងជាមេបញ្ជាការកងរាជអាវុហត្ថលើផ្ទៃប្រទេសដាក់អោយមកអនុវត្តន៍៕
ប៉េកាំង ៖ ក្នុងរយៈពេលពេញមួយថ្ងៃព្រហស្បតិ៍ម្សិលមិញនេះ ចិនរកឃើញករណីឆ្លងថ្មីៗ នៃជំងឺ COVID-19 ចំនួន ០៦ករណីតែប៉ុណ្ណោះ នៅទូទាំងប្រទេស ដោយក្នុងនោះមាន ០២ករណីនាំចូលពីក្រៅប្រទេស និង០៤ ករណីទៀត ជាករណីឆ្លងស្រុក។ នេះបើយោងតាមទីភ្នាក់ងារព័ត៌មានស៊ីនហួរ។
បើតាមអាជ្ញាធរសុខាភិបាលចិនបានរាយការណ៍ឲ្យដឹងថា ករណីឆ្លងក្នុងស្រុកទាំង ០៤ករណីខាងលើ មាន០៣ករណី ត្រូវបានគេរាយការណ៍នៅក្នុង ខេត្តហៃឡុងជាំង (Heilongjiang) និង០១ករណីទៀតនៅខេត្តក្វាងទុង (Guangdong)។
សម្រាប់របាយការណ៍ប្រចាំថ្ងៃ ស្តីពីតួលេខអ្នកជាសះស្បើយពីជំងឺ COVID-19 វិញ គណៈកម្មការក៏បានបង្ហាញឲ្យដឹងដែរថា ចំនួនសរុបនៃអ្នកដែល បានជាសះស្បើយ នៅទូទាំងប្រទេសចិនបានហក់ឡើងដល់ ៧៧,២៥៧នាក់ហើយ បន្ទាប់ពីអ្នកជំងឺចំនួន ៥០នាក់បន្ថែមទៀតទើបតែបានជាសះស្បើយ និងបានចាកចេញពីមន្ទីរពេទ្យ។
នៅក្នុងរបាយការណ៍ថ្មីចុងក្រោយនេះដដែល NHC ថែមទាំងបានបញ្ជាក់អំពីចំនួនករណីឆ្លងសរុប នៃវីរុសកូរ៉ូណាថ្មី ឬ COVID-19 នៅទូទាំងចិនដីគោកផងដែរថា បើបូកបញ្ជូលទាំងករណីឆ្លងថ្មីៗ ដែលបានរាយការណ៍នៅថ្ងៃនេះ វាបានកើនដល់ ៨២,៨០៤ករណី ដោយក្នុងនោះតួលេខ នៃករណីស្លាប់នៅតែរក្សានៅត្រឹម ៤,៦៣២ នាក់ដដែល ដោយករណីស្លាប់ មិនមានឡើយសូម្បីតែម្នាក់នៅទូទាំងប្រទេសចិនតែម្តង ពេញមួយថ្ងៃព្រហស្បតិ៍៕
វ៉ាស៊ីនតោន ៖ រដ្ឋមន្ត្រីក្រសួងការបរទេសសហរដ្ឋអាមេរិកលោក Mike Pompeo បាននិយាយថាការធ្វើកំណែទម្រង់ជាមូលដ្ឋានរបស់អង្គការសុខភាពពិភពលោកគឺចាំបាច់ បន្ទាប់ពីការដោះស្រាយរបស់ខ្លួនលើការឆ្លងរាតត្បាតសកលនៃជំងឺCOVID -19 ហើយថា សហរដ្ឋអាមេរិកដែលជាម្ចាស់ជំនួយធំបំផុត របស់អង្គការសុខភាពពិភពលោកអាចនឹងមិនផ្ដល់មូលនិធិ ដល់ក្រុមប្រឹក្សាអង្គការសហប្រជាជាតិមួយនេះទៀតទេ។ នេះបើយោងតាមប្រភពពី CNA។
នៅពេលដែលលោក Pompeo ចាប់ផ្តើមវាយប្រហារថ្មីៗ លើក្រុមប្រឹក្របស់អង្គការសហប្រជាជាតិកាលពីថ្ងៃពុធ ក្រុមអ្នកប្រជាធិបតេយ្យនៅក្នុងសភាតំណាងសហរដ្ឋអាមេរិកបានចោទប្រកាន់រដ្ឋបាល Trump ថាបានព្យាយាមទម្លាក់កំហុសលើអង្គការសុខភាពពិភពលោក (WHO) ដើម្បីបង្វែរអារម្មណ៍របស់ខ្លួនចេញពីការដោះស្រាយការផ្ទុះឡើងនៃជំងឺ COVID -19។
នៅក្នុងលិខិតផ្ញើជូនប្រធានាធិបតីលោក Donald Trump ពួកគេបានអំពាវនាវឱ្យមានការផ្ដល់ឡើងវិញ នូវមូលនិធិរបស់សហរដ្ឋអាមេរិកភ្លាមៗដែលលោក Trump បានបង្កកកាលពីសប្ដាហ៍មុន ដោយចោទប្រកាន់អង្គការសុខភាពពិភពលោកថា ផ្ដោតការយកចិត្តទុកដាក់តែលើប្រទេសចិន និងផ្សព្វផ្សាយព័ត៌មានមិនពិតរបស់ចិនអំពីការផ្ទុះឡើងនេះជំងឺនេះ។
យ៉ាងណាមិញ ប្រមុខអង្គការសុខភាពពិភពលោកបាននិយាយកាលពីថ្ងៃពុធថា លោកសង្ឃឹមថា រដ្ឋបាលលោក Trump នឹងពិចារណាឡើងវិញលើការផ្អាកការផ្ដល់មូលនិធិរបស់ខ្លួន ប៉ុន្តែការផ្ដោតសំខាន់របស់លោក គឺលើការបញ្ចប់ការរាលដាលជំងឺសកលនេះ និងជួយសង្គ្រោះជីវិតមនុស្ស៕
ភ្នំពេញ ៖ បើទោះបីប្រទេសខ្លួន មានពលរដ្ឋរាប់ពាន់នាក់បានឆ្លងមេរោគកូវីដ១៩ ក្ដី ក៏ស្ថានទូតម៉ាឡេស៊ី ប្រចាំកម្ពុជា បានបង្ហាញការចូលរួមរបស់ខ្លួនជាមួយរាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងការឆ្លងជំងឺកូវីដ១៩ក្នុងប្រទេសកម្ពុជា ។ ជាក់ស្ដែងក្នុងរយៈពេលពីរថ្ងៃ ពីថ្ងៃទី ២២ និង២៣ មេសា ២០២០ ស្ថានទូតម៉ាឡេស៊ី ប្រចាំទីក្រុងភ្នំពេញ បានឧបត្ថម្ភអាហារគ្រៀងចំនួន១០០កញ្ចប់ជួយដល់វិហារអ៊ីស្លាម វត្តប្រជុំសាគរ វិហារយាយម៉ៅនិងវិហារនៃសាសនាយ៉េស៊ូផងដែរ ។ 
លោក Khairul Gadafi Kamaludin អនុប្រធានបេសកកម្ម នៃស្ថានទូតម៉ាឡេស៊ីប្រចាំកម្ពុជា បានអោយដឹងថានៅពេលដែលមានស្ថានភាពធ្ងន់ធ្ងរដូចជាករណីជំងឺកូវិឲីដ១៩នេះ វាទាមទារអោយយីងម្នាក់ៗប្រមូលកំលាំងកាយកំលាំងចិត្តដីម្បីប្រយុទ្ធប្រឆាំងជំងឺដ៏កាចសាហាវ និងប៉ះពាល់យដល់អាយុជីវិតនេះ ។លោកថា៖« បុគ្គលម្នាក់ៗ អាចប្រឆាំងនឹងជំងឺនេះបាន ប៉ុន្តែយើងមិនអាចផ្តួលវាបានទេ ប្រសិនបើយើងគ្រប់គ្នាមិនបោះបង់ចោលនូវទំលាប់នៃការស្តីបន្ទោស ភាពខ្មាសអៀន និងងាកមករួបរួមគ្នាវិញ ។ យើងព្យាយាមអោយមនុស្សទាំងអស់គ្នាយល់ថាបើទោះបីជាយើងមានសាសនាឬក៏ជំនឿខុសពីគ្នាក៏ពិតមែនតែជំងឺនេះវាមិនបានកើតឡើងខុសភាពគ្នារវាងអ្នកមានឬអ្នកក្រ សុខភាពល្អឫមិនល្អ តែវាគឺជាសត្រូវរបស់យើងម្នាក់ៗ» ។
លោកបន្តថា យើងបរិច្ចាគក្រោមកម្មវិធី យើងយកចិត្តទុកដាក់យើងចែករំលែក” មានន័យថាយើងយកចិត្តទុកដាក់ចំពោះគ្រប់គ្នាដែលយើងអាចជួយបាន, ដូចដែរយើងជ្រាបហើយថាប្រទេសម៉ាឡេស៊ីក៏ដូចជាប្រទេសកម្ពុជាដែរ ប្រជាជនមានជំនឿនិងគោរពសាសនា ផ្សេងៗគ្នាហើយកម្មវិធីរបស់យើងបានបង្កើតឡើងដើម្បីឈានទៅដល់សមាគមន៏តូចៗដែរមានប្រជាជនគោរពជំនឿខុសៗគ្នា។
លោកបានកោតសរសីរប្រជាជនកម្ពុជាដែលមានការគោរពនិងអនុវត្តតាមច្បាប់និងបទបញ្ជារដែររដ្ឋាភិបាលបានកំណត់ដើម្បីកុំអោយមានការរាតត្បាតពីមេរោគនេះ។ ស្ថាតទូតម៉ាឡេស៊ី នឹងធ្វើការបរិច្ចាកស្រដៀងគ្នានេះនៅសប្តាហ៍ក្រោយជូនដល់មន្ទីពេទ្យមួយចំនួននៅក្នុងទីក្រុងភ្នំពេញ ដើម្បីបង្ហាញនិងគាំទ្រចំពោះការខិតខំប្រឹងប្រែងរបស់ក្រុមគ្រូពេទ្យស្មគ្រ័ចិត្ត នឹងបុគ្គលិកដទៃដែលបានខិតខំបំពេញភារកិច្ចដោយគ្មានការឈប់សំរាកក្នុងការជួយទប់ស្កាត់មិនអោយមានការរីករាលដាលនៃមេរាគនេះ ។
គួរបញ្ជាក់ថា គិតត្រឹមព្រឹកថ្ងៃទី២៤ មេសា ២០២០ នេះ ប្រទេសកម្ពុជា មានអ្នកឆ្លងជំងឺកូវីដ ១៩ ចំនួន១២២ នាក់ ក៏ប៉ុន្តែមានអ្នកជាសះស្បើយចំនួន១១០នាក់ និងកំពុងសម្រាកព្យាបាលក្នុងមន្ទីរពេទ្យចំនួន១២នាក់ទៀត ។ ដោយឡែកប្រទេសម៉ាឡេស៊ី មានឆ្លងជំងឺនេះ ចំនួន ៥.៦០៣នាក់ ក្នុងនោះក៏មានអ្នកស្លាប់ចំនួន៩៥នាក់ផងដែរ ៕
ភ្នំពេញ ៖ នៅក្នុងរយៈពេល១០ថ្ងៃចុងក្រោយនេះ ស្ថានភាពជំងឺកូវីដ ១៩ នៅកម្ពុជា មិនមានអ្នកឆ្លងថ្មីទេ តែមានអ្នកជាសះស្បើយពីជំងឺនេះកាន់តែច្រើន ធ្វើអោយចំនួនអ្នកកំពុងព្យាបាល ក្នុងមន្ទីរពេទ្យ មានតែ១២នាក់ប៉ុណ្ណោះ ។ ដោយឃើញស្ថានភាពបែបនេះ ពលរដ្ឋកម្ពុជា ក៏ចាប់ផ្ដើមចេញក្រៅផ្ទះ ដោយសង្កេតឃើញថាចរាចរតាមដងផ្លូវក៏ចាប់ផ្ដើមមមាញឹកនិងណែនណាន់តាន់តាប់ឡើងវិញ ។
សម្ដេចហ៊ុន សែន នាយករដ្ឋមន្ត្រី បានបង្ហាញការព្រួយបារម្ភ និងក្រើនរំលឹកដល់ប្រជាពលរដ្ឋបង្កើនការប្រុងប្រយ័ត្ន និងបន្តស្នាក់នៅក្នុងផ្ទះ បើពុំចាំបាច់សូមកុំចេញក្រៅយផ្ទះដើម្បីទប់ស្កាត់ការឆ្លងរាលដាលនៃជំងឺនេះ ។
យោងតាមគេហទំព័រហ្វេសប៊ុករបស់សម្ដេចហ៊ុន សែន នាយករដ្ឋមន្ត្រីបានអោយដឹងថា ក្នុងប៉ុន្មានថ្ងៃកន្លងមកនេះ នៅក្នុងប្រទេសកម្ពុជា ទោះបីអត្រាឆ្លងរោគកូវីដ-១៩ មិនបានកើនឡើងខ្លាំងដូចប្រទេសដទៃ ហើយចំនួនអ្នកព្យាបាលដែលបានជាសះស្បើយក៏កាន់តែមានច្រើនពិតមែន ប៉ុន្តែយើងត្រូវមានការប្រុងប្រយ័ត្នជាប់ខ្លួនជានិច្ច ជាពិសេស ត្រូវបង្កើនការប្រុងប្រយ័ត្នទេ្វដង ព្រោះមេរោគកូរ៉ូណា២០១៩ (Coronavirus 2019) ដែលយើងហៅថាកូវីដ-១៩ (covid-19)ដែលជាជំងឺឆ្លងដ៏កាចសាហាវនេះគឺពុំទាន់មានថ្នាំព្យាបាលនៅឡើយទេ។
សម្ដេចបន្តថា ក្នុងប៉ុន្មានថ្ងៃនេះ នៅតាមដងផ្លូវក៏មានការធ្វើដំណើររណែនរកកស្ទះចរាចរណ៍ទៀតផង។ សូមក្រើនរំឮកដល់បងប្អូនប្រជាពលរដ្ឋត្រូវចងចាំនឹងបង្កើនការប្រុងប្រយ័ត្នជាប់ខ្លូនជានិច្ច គឺត្រូវពាក់ម៉ាសការពារ មានទឹកអាល់កុល និងជែលសម្អាតមេរោគនិងបាក់តេរីផ្សេងៗ ចៀសវាងការចម្លងរោគពីម្នាក់ទៅម្នាក់ដោយសារខ្វះការប្រុងប្រយ័ត្នឬគិតស្រាលៗថាស្រុកយើងមិនអីទេនោះ ៕
ភ្នំពេញ ៖ យោងតាមការចុះផ្សាររបស់កាសែត The Nation របស់ប្រទេសថៃ បានដាក់ប្រទេសចំនួន៥ក្នុងនោះ ក៏មានកម្ពុជាផងដែរ ជាប្រទេសដែលមានហានិភ័យខ្ពស់នៃការឆ្លងរាលដាលជំងឺកូវីដ ១៩ខ្ពស់ ។ប្រទេសទាំងបួននោះ រួមមានកម្ពុជា ម៉ាឡេស៊ី ឡាវ ឥណ្ឌូនេស៊ី និងប្រទេសមីយ៉ាន់ម៉ា ។
ការចុះផ្សាយរបស់កាសែត The Nation នេះ គឺយោងទៅតាមគេហទំព័រ Royal Gazette ហើយក្រសួងសុខាភិបាលថៃ ក៏បានចុះហត្ថលេខាទទួលស្គាល់ថាដូច្នោះដែរ ។
សូមរំលឹកថាកាលពី ថ្ងៃទី ៦ ខែមីនាកន្លងទៅ ប្រទេសថៃក៏បានដាក់ឈ្មោះប្រទេសចំនួន ៤ គឺចិន (រួមមានហុងកុងនិងម៉ាកាវ) កូរ៉េខាងត្បូងអ៊ីតាលីនិងអ៊ីរ៉ង់ដែលជាហានិភ័យខ្ពស់នៃការឆ្លងមេរោគ Covid-19 ដែរ ។
គិតត្រឹមថ្ងៃទី ២៤ ខែមេសា ២០២០ នេះ ថៃ មានអ្នកមានឆ្លងមេរោគកូវីដ ១៩ ចំនួន ២.៨៣៩នាក់ មានអ្នកស្លាប់ ៥០នាក់ ប្រទេសឥណ្ឌូនេស៊ី មានអ្នកឆ្លងមេរោគនេះ ចំនួន ៧.៧៧៥នាក់ មានអ្នកស្លាប់៦៤៧នាក់ ប្រទេសម៉ាឡេស៊ីមានអ្នកឆ្លង ៥.៦០៣នាក់ ក្នុងនោះអ្នកស្លាប់មាន៩៥នាក់ ប្រទេសមីយ៉ាន់ម៉ា មានអ្នកឆ្លង១៣២នាក់ មានអ្នកស្លាប់៥នាក់ និងប្រទេសកម្ពុជា ដែលកាសែតថៃ បានចាត់ទុកថាជាប្រទេសមានហានីភ័យខ្ពស់ឆ្លងខ្ពស់មានអ្នកឆ្លងជំងឺនេះ ចំនួន ១២២នាក់ និងមិនទាន់មានអ្នកស្លាប់នៅឡើយ ៕
ភ្នំពេញ ៖ ក្នុងអំឡុងវិបត្តិកូវីដ១៩នេះ ធនាគារជាតិនៃកម្ពុជាស្នើសុំការយោគយល់ពីគ្រប់គ្រឹះស្ថានធនាគារ និងហិរញ្ញវត្ថុ ផ្តល់ការអនុគ្រោះបន្ថែមដល់អតិថិជនដើម្បីជួយសម្រាលបន្ទុករបស់ពួកគាត់មួយកម្រិតទៀតក្នុងគ្រាលំបាកនេះ ដូចជាការបន្ធូរបន្ថយកម្រៃសេវាផ្សេងៗពាក់ព័ន្ធនឹងឥណទាន និង/ឬ លើកលែងការផាកពិន័យផ្សេងៗចំពោះអតិថិជនរបស់ខ្លួន រហូតដល់ដំណាច់ខែធ្នូ ឆ្នាំ២០២០។
សូមអានបន្ថែមក្នុងលិខិតខាងក្រោម៖
ខេត្តតាកែវ ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុ ខណៈពេលជនសង្ស័យនឹងជនរងគ្រោះជាបងប្អូនថ្លៃ ហើយពេលកំពុងផឹកស៊ីក៏ទាស់ពាក្យសំដី រហូតដល់ប្អូនថ្លៃយកកាំបិតកាប់ទៅលើបងថ្លៃជាច្រើនកាំបិត បណ្តាលឲ្យស្លាប់នៅក្នុងថ្លុកឈាម។ ក្រោយពេលកើតហេតុជនសង្ស័យបានរត់គេចខ្លួនបាត់។ ហេតុការណ៍នេះកើតឡើងកាលពីថ្ងៃ២៣ ខែមេសា ឆ្នាំ២០២០ វេលាម៉ោង២០ និង១៥នាទីយប់ ស្ថិតក្នុងភូមិតាស្រែន ឃុំខ្វាវ ស្រុកទ្រាំង ខេត្តតាកែវ។
នគរបាលស្រុកទ្រាំងបានឲ្យដឹងថា ករណីឃាតកម្មនេះ គឺបង្កឡើងដោយជនសង្ស័យឈ្មោះ យន់ រង្សី ភេទប្រុស អាយុ ២០ឆ្នាំ មុខរបបរធ្វើស្រែ រស់នៅភូមិឃុំកើតហេតុ (ត្រូវជាប្អូនថ្លៃ) បានយកកាំបិតបុ័ងតោកាប់ជាច្រើនកាំបិតទៅលើជនរងគ្រោះជាបងថ្លៃ ឈ្មោះ សោ វុទ្ធី ភេទប្រុស អាយុ៥៣ឆ្នាំ ចំនួន៧កាំបិតបណ្តាលឲ្យស្លាប់ភ្លាមៗ នៅក្នុងថ្លុកឈាមជនរងគ្រោះមានមុខរបបរធ្វើស្រែរស់នៅភូមិជាមួយគ្នា។
តាមមន្ត្រីនគរបាលស្រុកបានអោយដឹងទៀតថាមុនពេលកើតហេតុ បុរសដែលជាជាសាច់ថ្លៃចំនួន៤នាក់(ប្រពន្ធៗជាបងប្អូនបង្កើតនឹងគ្នា) បានអង្គុយផឹកស៊ីជាមួយគ្នានឹងបាននិយាយជជែកគ្នាជាធម្មតាស្រាប់តែជនរងគ្រោះជាបងថ្លៃនិយាយលេងសើចទៅកាន់ជនសង្ស័យជាប្អូនថ្លៃថានៅតែផ្ទះដើរស៊ីផឹកមិនគិតរកស៊ីចឹញ្ចឹមប្រពន្ធកូនទេ។
ប្រភពបន្តថា ភ្លាមៗនោះជនសង្ស័យជាប្អូនថ្លៃបានស្ទុះយកកាំបិតបុ័ងតោកាប់ជាច្រើនកាំបិត ទៅលើបងថ្លៃរបស់ខ្លួនស្លាប់ក្នុងថ្លុកឈាមហើយក្រុមគ្រួសារបងថ្លៃនេះមិនបានរាយការណ៍មកដល់កំលាំងនគរបាលភ្លាមៗនោះទេគឺទុករហូតព្រឹកថ្ងៃទី២៣ ខែមេសា ឆ្នាំ២០២០ ទើបមកប្តឹងនគរបាលប៉ុស្តិ៍រដ្ឋបាលឃុំខ្វាវនេះជាការរៀបចំ ដើម្បីទុកពេលអោយជនសង្ស័យដើម្បីរត់គេចខ្លួនតែប៉ុណ្ណោះ។ មន្ត្រីនគរបាលស្រុកបានបញ្ជាក់ថា កំលាំងជំនាញ សហការដើម្បីស្រាវជ្រាវស្វែងរកចាប់ខ្លួនជនសង្ស័យដែលជាប្អូនថ្លៃយកមកផ្តន្ទាទោសទៅតាមផ្លូវច្បាប់អោយទាល់តែបាន៕
ភ្នំពេញ ៖ កម្ពុជាត្រូវបានគេដឹងថា បានត្រៀមរួចជាស្រេចហើយនូវក្រុមមន្ត្រីឆ្លើយតបរហ័សជិត៥ម៉ឺននាក់ ដើម្បីប្រយុទ្ធនឹងជំងឺ COVID-19 បើទោះបីជាបច្ចុប្បន្ននេះស្ថានភាពនៃជំងឺរាតត្បាតមួយនេះនៅស្រួចស្រាលនៅឡើយក៏ដោយចុះ។
នេះបើយោងតាមការថ្លែងឲ្យដឹងរបស់លោកស្រីវេជ្ជបណ្ឌិត យក់ សម្បត្ដិ រដ្ឋលេខាធិការក្រសួងសុខាភិបាល ដែលបានធ្វើឡើងនៅក្នុងកិច្ចប្រជុំគណៈកម្មការអន្តរក្រសួងលើកទី៣លើការងារឆ្លើយតបការរាតត្បាតនៃជំងឺ COVID-19 កាលពីម្សិលមិញនៅទីស្តីការក្រសួង។
លោកស្រីបញ្ជាក់ថា ក្រសួងសុខាភិបាល នៅតែបន្ដបណ្ដុះបណ្ដាល និងពង្រឹងក្រុមមន្ដ្រីឆ្លើយតបរហ័សប្រមាណ៤-៥ម៉ឺននាក់ សម្រាប់ត្រៀមឆ្លើយតបទៅនឹងជំងឺកូវីដ១៩ (COVID-19) ទោះបច្ចុប្បន្ន ស្ថានភាពជំងឺនេះនៅស្រួចស្រាលនៅឡើយ។
លោកស្រីរដ្ឋលេខាធិការ បានបញ្ជាក់បន្ថែមថា ខណនេះគណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ១៩ (COVID-19) បានលើកយកនូវផែនការយុទ្ធសាស្ដ្រជាបន្ដបន្ទាប់ និងត្រៀមនូវសម្ភារបរិក្ខារពេទ្យឱ្យគ្រប់គ្រាន់ជានិច្ច ដោយបច្ចុប្បន្ន មានម៉ាសចំនួន១១លានម៉ាស, ម៉ាសN95 ចំនួន៥០ម៉ឺន (បច្ចុប្បន្នមានជាង៣០ម៉ឺនម៉ាសហើយ), សម្លៀកបំពាក់សុវត្ថិភាពររបស់មន្ដ្រីសុខាភិបាល៥ពាន់សម្រាប់ និងមុងភួយកន្ទេលខ្នើយ សម្រាប់ អ្នកជំងឺមកសម្រាកព្យាបាលនៅតាមមន្ទីរពេទ្យ។
ប៉ុន្តែបើសិនជាមានការរាតត្បាតនៃជំងឺកូវីដ១៩ ទ្រង់ទ្រាយធំដ៏ធ្ងន់ធ្ងរបំផុត រហូតដល់ប្រកាសដាក់ប្រទេសក្នុងភាពអាសន្ននោះ កម្លាំងពេទ្យរបស់បច្ចុប្បន្នចំនួន៦ពាន់នាក់ គឺមិនគ្រប់គ្រាន់នោះឡើយ យើងនឹងអាចបញ្ចេញកម្លាំងយ៉ាងហោចក៏ជាង១ម៉ឺននាក់ សម្រាប់កម្លាំងពេទ្យនៅក្នុងក្រសួងសុខាភិបាល កម្លាំងយោធា៥ពាន់ នាក់ និងប៉ូលីសរាប់ពាន់នាក់ទៀត ដែលសរុបទូទាំងប្រទេសប្រមាណ ៤-៥ម៉ឺននាក់ ដែលបានបណ្ដុះបណ្ដាល នឹងរួមគ្នាប្រយុទ្ធនឹងជំងឺរាតត្បាតមួយនេះ៕
