ខេត្តកណ្តាល ៖ កម្លាំងចម្រុះ​នគរបាល​បាន​សហការ​តាម​ចាប់ខ្លួន​មន្ត្រីនគរបាល​ប៉ុស្តិ៍ បាក់​ខែង ដែល​បាន​បាញ់សម្លាប់​ប្អូនថ្លៃ នៅ​ឃុំ​ឧកញ៉ា​តី ស្រុក​ខ្សាច់កណ្តាល រហូតដល់​ខេត្តស្ទឹងត្រែង ហើយ​បាន​ចាប់ខ្លួន​ជនសង្ស័យ​កាលពី​ម្សិលមិញ​នៅ​ចំណុច​ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង​។​

​សូមបញ្ជាក់ថា អំពើ​ឃាតកម្ម​ឈានដល់​បាញ់សម្លាប់​គ្នា​នេះ កើតឡើង​នៅ​ម៉ោង​៦,៣០​នាទី​យប់ ថ្ងៃទី​១៥ ខែមេសា ឆ្នាំ​២០២០ នៅ​ចំណុច​ភូមិ​ចុង​កោះ ឃុំ​កោះ​ឧកញ៉ា​តី ស្រុក​ខ្សាច់កណ្តាល ខេត្តកណ្តាល ដោយ​បងថ្លៃ​ជា​មន្ត្រីនគរបាល​ប៉ុស្តិ៍​បាក់​ខែង​ម្នាក់ បាន​បាញ់សម្លាប់​ប្អូនថ្លៃ ព្រោះតែ​ភ្លើង​ប្រចណ្ឌ​។​

​ចំណែក​ជនរងគ្រោះ​ឈ្មោះ ម៉ៅ ប៊ុនហេង ភេទ​ប្រុស អាយុ​២៥​ឆ្នាំ ជនជាតិខ្មែរ មុខរបរ​លក់ដូរ​។ ចំណែក​ជនសង្ស័យ​មានឈ្មោះ សែន រ៉ា​នុ​ន ភេទ​ប្រុស អាយុ​៣៥​ឆ្នាំ ជនជាតិខ្មែរ មុខរបរ​មន្ត្រីនគរបាល​ប៉ុស្តិ៍​រដ្ឋបាល​បាក់​ខែង​។ ដោយ​ប្រពន្ធ​ជនសង្ស័យ និង​ជនរងគ្រោះ ជា​បងប្អូន​បង្កើត​នឹង​គ្នា៕

ភ្នំពេញ ៖ ក្រសួងសុខាភិបាល នៅថ្ងៃទី២៣ ខែមេសា ឆ្នាំ២០២០នេះ បានចេញប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១១០នាក់។

ចំណែកអ្នកកំពុងសម្រាកព្យាបាលជំងឺកូវីដមានសរុបចំនួន១២នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី២៣ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលប ទទួលបានមុននេះបន្តិច៕ 

ភ្នំពេញ ៖ តំបន់​មួយ​ចំនួន​ក្នុងរាជធានីភ្នំពេញ នឹងត្រូវអគ្គិសនី​កម្ពុជា ផ្អាកការផ្គត់ផ្គង់​ភ្លើង​ចាប់ពីថ្ងៃទី២៣ ដល់ ២៦ ខែមេសា ឆ្នាំ​២០២០ ​ដើម្បី​អនុវត្តការងារ​ជួសជុល ផ្លាស់ប្តូរដំឡើង​បរិក្ខារ និង​រុះរើ​គន្លង​ខ្សែបណ្តាញ​បង្ក​លក្ខណៈ​ដល់ការដ្ឋាន​ពង្រីកផ្លូវ។

សូម​អាន​បន្ថែម​ក្នុងសេចក្តីជូនដំណឹង​ខាងក្រោម៖

ភ្នំពេញ ៖ លោក ជិន ម៉ាលីន អ្នកនាំពាក្យក្រសួងយុត្តិធម៌ បញ្ជាក់ថា កម្ពុជាមិនចាំបាច់ដាក់ប្រទេសក្នុងភាពអាសន្ននោះទេ បើស្ថានភាពនៃការគ្រប់គ្រងកូវីដ១៩ បានល្អ ដូចពេលបច្ចុប្បន្ននេះ។ ការបញ្ជាក់នេះ ធ្វើឡើនៅក្នុងសន្និសីទសារព័ត៌មាន នៅព្រឹក២២ ខែមេសា នេះនៅទីស្តីការគណៈរដ្ឋមន្ត្រី។

លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ មានបញ្ជាក់ថា សេចក្តីព្រាងច្បាប់ក្នុងការដាក់ប្រទេស ក្នុងភាពអាសន្ន អាចអនុវត្តទៅបានគឺស្ថិតនៅក្នុងដំណាក់កាលប្រទេសជាតិជួបគ្រោះអាសន្នធ្ងន់ធ្ងរ និងត្រូវមានការឯកភាពពីឥស្សរជនជាន់ខ្ពស់ចំនួន៣រូប រួមមាននាយករដ្ឋមន្ត្រី ប្រធានរដ្ឋសភា និងព្រឹទ្ធសភា។

បើតាមអ្នកនាំពាក្យ កម្ពុជាមិនចាំបាច់ដាក់ប្រទេសក្នុងភាពអាសន្ននោះទេ បើស្ថានភាពនៃការគ្រប់គ្រងកូវីដ១៩ បានល្អដូចពេលបច្ចុប្បន្ននេះ។

សេចក្តីព្រាងច្បាប់ស្ដីពី ការគ្រប់គ្រងប្រទេសក្នុងភាពអាសន្ន បានទៅដល់ដៃក្រុមប្រឹក្សារដ្ឋធម្មនុញ្ញហើយនៅព្រឹកថ្ងៃទី២២ មេសា នេះ។

រដ្ឋមន្ត្រីក្រសួងយុត្តិធម៌ លោក កើត រិទ្ធ បានអញ្ជើញទៅការពារច្បាប់ស្ដីពីការគ្រប់គ្រងប្រទេសក្នុងគ្រាអាសន្ននៅក្រុមប្រឹក្សារដ្ឋធម្មនុញ្ញ។

លោក ជិន ម៉ាលីន បញ្ជាក់ថា សេចក្តីព្រាងច្បាប់ស្ដីពីការគ្រប់គ្រងប្រទេស ត្រូវបានដាក់ឲ្យអនុវត្តជាផ្លូវការហើយនោះ មិនមែនមានន័យថា កម្ពុជាត្រូវដាក់ប្រទេសក្នុងគ្រាអាសន្ននោះទេ។ លោកថាច្បាប់ស្ដីពីការគ្រប់គ្រងប្រទេសក្នុងភាពអាសន្ន មិនមែនដើម្បីបំបិទសិទ្ធិសេរីភាព ឬរំលោភសិទ្ធិប្រជាពលរដ្ឋនោះទេ ប៉ុន្តែគឺដើម្បីប្រជាធិបតេយ្យ នីតិរដ្ឋ និងសិទ្ធិមនុស្ស និងដើម្បីការពារផលប្រយោជន៍សាធារណៈជូនប្រជាពលរដ្ឋកម្ពុជា។

សូមជម្រាបថា មកដល់ពេលនេះ មានប្រទេសចំនួន ៧០ហើយ ដែលបានដាក់ប្រទេសក្នុងគ្រាអាសន្ន ដើម្បីទប់ស្កាត់ការឆ្លងរីករាលដាលវីរុសកូវីដ១៩ ហើយក្នុងតំបន់អាស៊ានក៏មានប្រទេសចំនួន ៦ហើយ ដែលបានដាក់ប្រទេសក្នុងគ្រាអាសន្ន។ លោកបន្ថែមថា ការរៀបចំសេចក្តីព្រាងច្បាប់នេះ គឺអនុលោមទៅតាមច្បាប់អន្តរជាតិ និងមានភាពត្រឹមត្រូវ។ បណ្ដាប្រទេសផ្សេងទៀតអនុវត្តបាន ចុះហេតុអ្វីកម្ពុជា អនុវត្តមិនបាន៕

ដោយ ៖ កូវ ប៊ុនហេង

ខេត្តព្រះវិហារ ៖ ប្រធានគណៈកម្មាធិការសហភាពសហព័ន្ធយុវជនកម្ពុជា ខេត្តព្រះវិហារ លោក យុង គឹមហ៊ាន បានដឹកនាំកិច្ចប្រជុំមួយ ស្តីពីការ រៀបចំផែនការ ក្នុងការចូលរួមប្រយុទ្ធប្រឆាំង នឹងជំងឺកូវីដ១៩ ឲ្យបានផុលផុសថែមទៀត ដោយអនុវត្តន៍តាមបទបញ្ជារបស់រាជរដ្ឋាភិបាល និង តាមការណែនាំរបស់ក្រសួងសុខាភិបាលកម្ពុជា ដើម្បីឈានឆ្ពោះទៅសម្រេចបានប្រសិទ្ធភាពការងារក្នុងការផ្សព្វផ្សាយ ពីវិធានការទប់ស្កាត់ ការរីករាលដាលជំងឺកូវីដ១៩ និងបញ្ជ្រៀបការយល់ដឹងដល់ប្រជាពលរដ្ឋ នៅគ្រប់មូលដ្ឋាន នៅទូទាំងខេត្តព្រះវិហារ។

កិច្ចប្រជុំនេះ បានធ្វើឡើងក្រោមការបង្ហាញវត្ត មានឯកឧត្តម យុង គឹម ហ៊ាន និងមានការចូលរួមពីប្រធាន អនុប្រធាន សសយក ក្រុង ស្រុក សមាជិកគណៈកម្មាធិការ សសយកខេត្ត ព្រម ទាំងសសយកតាមបណ្តាមន្ទីរ និងអង្គភាពជុំវិញខេត្ត កាលពីថ្ងៃទី២២ខែមេសា ឆ្នាំ ២០២០។

អនុប្រធានគណៈកម្មាធិការសហភាពសហព័ន្ធយុវជនកម្ពុជា ខេត្តបានឲ្យដឹងថា ដើម្បីបញ្ជ្រៀបការយល់ដឹងដល់ប្រជាជន ឲ្យបានយល់ច្បាស់ អំពី ភាពគ្រោះថ្នាក់ នៃជំងឺកូវីដ១៩ សហភាពសហ ព័ន្ធយុវជនកម្ពុជាខេត្ត នឹងយកវិធានការណ៍សំខាន់ៗ ចំនួន៥មកអនុវត្ត ក្នុងនោះ គឹការបង្កើតក្រុមការងារផ្សព្វផ្សាយ ដែលស្រុក និងខេត្តរៀបចំសេចក្តីសម្រេចរួម, ធ្វើយ៉ាងណាឲ្យសសយក ក្រុង ស្រុក ខេត្ត មានការយល់ដឹងកាន់តែច្បាស់ រួមជាមួយអ្នកពាក់ព័ន្ធ និងវិធានការការពារជំងឺកូវីដ១៩ ដើម្បីបន្តផ្សព្វផ្សាយដល់ប្រជាពលរដ្ឋ, ក្រុមការងារ សសយក តាមវិស័យ ត្រូវត្រៀមខ្លួនចូលរួមជាមួយសុខាភិបាល ក្នុងករណីណាមានការផ្ទុះជំងឺកូវីដ១៩ក្នុងខេត្ត ឬ ក្នុងករណីចបាច់, បន្តធ្វើការផ្សព្វផ្សាយតាមឃោសនស័ព្ទចល័ត ឬ តាមបណ្តាញសង្គមជាបន្តទៀត ដើម្បីកុំឲ្យប្រជាពលរដ្ឋខ្វះការប្រុងយ័ត្ន និងឲ្យពួកគាត់ បន្តចូលរួមប្រយុទ្ធនឹងជំងឺកូវីដ១៩ និងសសយក ថ្នាក់ក្រុង ស្រុក ត្រូវត្រៀមសមាជិកសកម្មសំខាន់ៗ ដើម្បីចូលរួមធ្វើការផ្សព្វផ្សាយ ពីការទប់ស្កាត់ជំងឺ Covid-19 នេះ។

ប្រធានគណៈកម្មាធិការសហភាពសហព័ន្ធកម្ពុជា ខេត្តបានមានប្រសាសន៍ថា ដើម្បីឲ្យមាន ប្រសិទ្ធភាព ក្នុងការប្រយុទ្ធប្រឆាំងនឹងជំងឺកូវីដ១៩ ចាំបាច់ត្រូវមានការសហការ និងការ ចូលរួមពីគ្រប់អ្នកពាក់ព័ន្ធ។ លោកបន្តថា ដើម្បីឲ្យប្រជាពលរដ្ឋយល់ដឹង ពីវិធានការការពារខ្លួន ពីជំងឺកូវី១៩ កាន់តែច្បាស់ ប្រធាន សសយក ថ្នាក់ក្រុង និងស្រុក ត្រូវសហការជាមួយមន្ទីរសុខាភិបាល ចុះធ្វើយុទ្ធនាការឲ្យកាន់តែសកម្ម និងផុសផុលបន្ថែមទៀត អំពីភាពគ្រោះថ្នាក់នៃជំងឺកូវីដ១៩ ជាពិសេស ត្រូវជំរុញឲ្យបានកាន់តែខ្លាំង ដល់អាជីវករ និងអ្នកទិញ ត្រូវប្រើម៉ាស់ អាល់កុល ឬសាប៊ូលាងដៃ មិនត្រូវប៉ះពាល់ជាមួយនឹងភ្នែក ច្រមុះ និងមាត់ ជាដាច់ខាត។ លោកបានជម្រុញមន្ត្រីក្រោមឧិវាទ ត្រូវបន្តចុះផ្សព្វផ្សាយ និងណែនាំដល់ប្រជាពលរដ្ឋ នៅគ្រប់មូលដ្ឋានក្នុងក្រុង ស្រុក ក្នុងខេត្ត នៅតាមទីប្រជុំជន កសិដ្ឋាន មន្ទីរ និងអង្គភាព អោយបានយល់ដឹងកាន់តែច្បាស់ ធ្វើយ៉ាងណាឲ្យអត្រាការឆ្លង ថយមកនៅកម្រិតទាបបំផុត។

បានឧបត្ថម្ភ អង្ករ ០៦បេ ទឹកស៊ីអ៊ីវ ០៦ ត្រី ខ ៣០កំប៉ុង ម៊ី៦០កញនចប់ ទឹកសុទ្ធ ៦យ៉ួរ សាប៊ូ ៥០ដុំ អាកុល ២លីត្រនិងដបបាញ់ ទឹកអាកុល ថវិកា ១០០/០០០រៀលនិងសម្ភារៈមួយចំនួន ធំផងដែរ៕

ភ្នំពេញ ៖ ឪពុកម្តាយ និងអាណាព្យាបាលសិស្សនៃសាលាអន្តរជាតិ ស៊ីអាយអេ ជាច្រើននាក់ បានប្រមូលផ្តុំគ្នានៅមុខសាលារៀន ដើម្បីស្នើសុំឲ្យសាលារៀនស៊ីអាយអេ ធ្វើការបញ្ចុះតម្លៃសិក្សា៥០ភាគរយ ក្នុងដំណាក់កាលនៃកូវីដ១៩។

ក្រុមអាណាព្យាបាលសិស្ស បានបញ្ជាក់ថា ការស្នើសុំឲ្យសាលារៀនបញ្ចុះតម្លៃ៥០ភាគរយនេះ ដើម្បីសម្រាលការលំបាករបស់ពួកគាត់ គ្រាដែលវិបត្តិកូវីដ១៩ នៅបន្តអូសបន្លាយដោយមិនដឹងពេលណាបញ្ចប់។

លោក ប៉ា ចំរើន ជាអាណាព្យាបាលសិស្សម្នាក់ បានបញ្ជាក់ថា ការបង្រៀនតាមអន ឡាញសម្រាប់សិស្សតូចៗ គឺមិនបានពេញលេញនោះទេ មួយថ្ងៃបានមួយម៉ោងទៅ មួយម៉ោងកន្លះ ហើយឪពុកម្តាយត្រូវនៅបង្រៀន និងណែនាំដល់ កូនៗ ក្នុងពេលសិក្សាថែមទៀត។ លោកបញ្ជាក់ថា ក្នុងដំណាក់កាលនេះ ការរកចំណូលផ្សេងក៏មិនងាយស្រួលនោះដែរ ធ្វើឲ្យការបង់ថ្លៃសាលារៀន ខ្ទង់ពាន់នេះ គឺអាណាព្យាបាលមិនអាចរត់រួចនោះទេ។ នៅក្នុងញ្ញត្តិរបស់អាណាព្យាបាលសិស្ស ស្នើពីរចំណុចគឺ១-ស្នើអោយសាលាផ្អាករៀនអនឡាញ ប្រសិនបើសាលានៅតែគិតថ្លៃសិក្សា១០០% ២-គាំទ្រការរៀនអនឡាញតទៅទៀត ប្រសិនបើសាលាគិតថ្លៃសិក្សា ៥០% ។

នៅក្នុងសេចក្តីជូនដំណឹងរបស់សាលារៀនអន្តរជាតិ CIA First កាលពីម្សិលម៉ិញ បានបញ្ជាក់ថា តាមរយៈការជួបពិភាក្សាជាមួយអាណាព្យាបាលសិស្សជាច្រើនលើក សាលារៀនបានសម្រេចបញ្ចុះតម្លៃសម្រាប់ថ្នាក់មតេយ្យសិក្សា សម្រាប់ K3+K4+K5 ចំនួន២៥ភាគរយ និងសម្រាប់សិស្សថ្នាក់ទី១ ដល់ថ្នាក់ទី ១២ បញ្ចុះតម្លៃ១៥ភាគរយ។ សាលារៀន ស៊ីអាយអេ ថែមទាំងសុំការយោគយល់ពីអាណាព្យាបាលសិស្សទាំងចំពោះផលវិបាករបស់សាលារៀន ដែលនេះជាការដោះស្រាយអស់លទ្ធភាពរបស់សាលារៀនហើយ។ ក្រសួងអប់រំ យុវជន និងកីឡា មិនទាន់ឆ្លើយតបចំពោះការស្នើសុំរបស់អាណាព្យាបាលទៅលើការបញ្ចុះតម្លៃនេះនោះទេ៕

ភ្នំពេញ ៖ នៅក្នុងកាលៈទេសៈជំងឺកូវីដ ១៩ កំពុងរាលដាលនៅក្នុងប្រទេសកម្ពុជា និងនៅលើពិភពលោកទាំងមូល គម្រោងសាងសង់សំណង់នៅក្នុងប្រទេសកម្ពុជា មួយចំនួនត្រូវបានផ្អាក និងមួយចំនួនទៀតនៅតែបន្ត ហើយក្នុងនោះគម្រោងមិនទាន់សាងសង់មួយចំនួនទៀតក៏គ្រោងនឹងចាប់ផ្ដើមការដ្ឋានសំណង់ផងដែរ ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា នៅក្នុងកាលៈទេសៈនេះ ការអភិវឌ្ឍសំណង់នៅក្នុងប្រទេសកម្ពុជា ពិតជារងផលប៉ះពាល់ធំណាស់ ដោយមានការដ្ឋានសំណង់ជាច្រើនត្រូវបានផ្អាក ហើយការទិញលក់ទៅលើអចលនទ្រព្យក៏មានការធ្លាក់ចុះច្រើនផងដែរ ក្នុងពេលកូវីដ ១៩ កំពុងរាលដាលនៅក្នុងប្រទេសកម្ពុជា ។ លោកថា នៅក្នុងការដ្ឋានសំណង់ ជៀសមិនផុតពីការធ្វើទំនាក់ទំនងគ្នារវាងកម្មករនិងកម្មករ ដូច្នេះដើម្បីសុវត្ថិភាពកម្មករ គម្រោងអភិវឌ្ឍន៍មួយចំនួនត្រូវបង្ខំចិត្តផ្អាកការសាងសង់បណ្ដោះអាសន្នសិន ។

លោកបន្តថា ក្រៅពីនោះ ក៏មានគម្រោងអភវិឌ្ឍន៍មួយចំនួននៅតែបន្តសាងសង់ដដែល ក៏ប៉ុន្តែពួកគេ មិនយកកម្មករសំណង់ណាថ្មីៗចូលធ្វើការឡើយ ដោយសុទ្ធចិត្តធ្វើការយឺតប្រសើរជាងយកកម្មករថ្មីៗដែលមិនដឹងប្រវត្តិថាបានពាក់ព័ន្ធជាមួយនឹងអ្នកជំងឺកូវីដ ១៩ដែរឬទេ ។ ដោយឡែកសម្រាប់គម្រោងដែលនឹងត្រូវសាងសង់ថ្មីៗនៅក្នុងដំណាក់កាលនេះក៏មានដែរ ជាក់ស្ដែងគម្រោងផ្សារទំនើបអ៊ីអនម៉លទី៣ជាដើម ។ ដោយសារតែគម្រោងនេះ ជាគម្រោងធំ និងមានផែនការគម្រោងទុកជាយូរមកហើយនោះ វាប្រហែលជាមិនមានផលប៉ះពាល់ដល់ហិរញ្ញវត្ថុនោះទេ ហើយម្យ៉ាងទៀតវាក៏ជាគម្រោងមកពីបរទេសដែរ ។

ក្រៅពីគម្រោង អ៊ីអន ម៉ល ដែលហាក់ដូចជាមិនបានប្រកាសផ្អាកនោះ មានគម្រោងអគារខ្ពស់មួយទៀត ក្រោមការវិនិយោគដោយក្រុមហ៊ុន Oxley Gem Cambodia គឺគម្រោង The Peak ក៏បានប្រកាសថា ខ្លួនកំពុងដំណើរការ ការដ្ឋានសាងសង់សំណង់របស់ខ្លួនជាមួយនឹងក្រុមហ៊ុនអ្នកម៉ៅការថ្មីបន្ទាប់ពីក្រុមហ៊ុនអ្នកម៉ៅការសំណង់ចាស់ជួបប្រទះនឹងបញ្ហាហិរញ្ញវត្ថុ ហើយក៏បានផ្ដាច់កុងត្រាចោល ។

តាមសេចក្ដីប្រកាសរបស់ក្រុមហ៊ុនអភិវឌ្ឍន៍គម្រោងអគារ The Peak បានបញ្ជាក់បន្ថែមថា ទោះបីជាស្ថានភាពបែបណាក៏ដោយ គម្រោងThe Peak នៅតែបន្តការសាងសង់ ដើម្បីអោយបញ្ចប់គម្រោងទៅតាមការគ្រោងទុក ធ្វើអោយអតិថិជនអ្នកទិញគម្រោងនេះមានទំនុកចិត្ត ។

បើតាមលោកផន សុភាពប្រធានការដ្ឋាននៃក្រុមហ៊ុន OCIC បានអោយដឹងថាទោះបីជាកូវីដកំពុងរាលដាលក្ដី ក៏ប៉ុន្តែគម្រោងអភិវឌ្ឍន៍នៅក្នុងទីក្រុងរណបជ្រោយចង្វារ នៅតែបន្តដំណើរការសាងសង់ ធ្វើយ៉ាងណាដើម្បីបញ្ចប់ការសាងសង់ទៅតាមផែនការ និងការគ្រោងទុកជាពិសេសគម្រោងអភិវឌ្ឍន៍មជ្ឈមណ្ឌលសន្និបាតនិងពិព័រណ៍នៅទីក្រុងរណបជ្រោយចង្វារ ដើម្បីយកទីតាំងនេះ សម្រាប់រៀបចំកិច្ចប្រជុំកំពូលអាស៊ីអឺរ៉ុប នៅឆ្នាំ ២០២០នេះ ។

ក្រៅពីគម្រោងនេះ ក៏មានគម្រោងមួយចំនួនទៀតបានបន្តដំណើរការសាងសង់របស់ខ្លួន ក៏ប៉ុន្តែសម្រាប់គម្រោងដែលមិនទាន់សាងសង់ មួយរយៈនេះហាក់នៅសំងំសិន ដោយមិនទាន់មានគម្រោងធំៗណាមួយបានចាប់ផ្ដើមគម្រោងនោះទេ ៕

ដោយប៉ៃនសុផល

ខេត្តកំពង់ចាម ៖​ ស្ថិតក្នុងកាលៈទេសៈដ៏លំបាកនៃការរាតត្បាតរបស់វីរុសកូវីដ-១៩ (COVID-19) នៅទូទាំងប្រទេសកម្ពុជា និងសកល លោក អូត ឈាងលី អភិបាលនៃគណៈអភិបាលស្រុកជើងព្រៃដឹកនាំដោយផ្ទាល់បានរៀបចំយុទ្ធនាការចែកអំណោយជួនដល់ប្រជាពលរដ្ឋក្រីក្រខ្វះខាត។

នៅព្រឹកថ្ងៃទី២១ ខែមេសា ឆ្នំា២០២០នេះ លោក អូត ឈាងលី អភិបាលនៃគណៈអភិបាលស្រុកជើងព្រៃ បានដឹកនំាក្រុមការងារចុះចែកអំណោយជួនដល់ប្រជាពលរដ្ឋក្រីក្រខ្វះខាតដែលជាអំណោយដ៍ថ្លៃថ្លារបស់ឯកឧត្តមវេង សាខុន ប្រធានក្រុមការងាររាជរដ្ឋាភិបាលចុះជួយស្រុកជើងព្រៃ ផ្តល់ជូនបងប្អូនប្រជាពលរដ្ឋក្រីក្រនៅក្នុងឃុំផ្តៅជុំចំនួន ១០គ្រួសារ។

សមាសភាពនៃការរួមមានលោកវរសេនីយ៍ឯកប្រាក់ សុគន្ធ អធិការស្រុកជេីងព្រៃ លោកខាត់ សុខនរួមជាមួយក្រុមការងារ លោកមេឃុំ លោកមេភូមិនឹងមន្ដ្រីក្រោមឱវាទ។

ដោយក្នុង១គ្រួសារ ទទួលបាន អង្ករ ៥០គីឡូក្រាម ត្រីខ ៥កំប៉ុង ទឹកដោះគោខាប់ ៣កំប៉ុង សាប៊ូលាងដៃ ១ដុំ មី ១កេះ ទឹកស៊ីអ៉ីវ ២ដប ស្ករស ១គីឡូក្រាម និងថវិកាចំនួន ៤ម៉ឺនរៀល។

ដោយឡែកនាព្រឹកថ្ងៃទី២២ខែមេសាឆ្នាំ២០២០នេះលោក អូត ឈាងលី អភិបាលនៃគណៈអភិបាលស្រុកជើងព្រៃអមដំណេីរដោយលោកវរសេនីយ៍ឯកប្រាក់ សុគន្ធ អធិការស្រុកជេីងព្រៃ នឹងលោកខាត់ សុខនរួមជាមួយនឹងក្រុមការងារបាននាំយកអំណោយដ៍ថ្លៃថ្លារបស់ឯកឧត្តមវេង សាខុន ចែកជួនបងប្អូនប្រជាពលរដ្ឋក្រីក្រខ្វះខាតរស់នៅឃុំគោករវៀង ស្រុកជេីងព្រៃ ចំនួន11 គ្រួសារទៀត។

ដោយក្នុង១គ្រួសារ ទទួលបាន អង្ករ ៥០គីឡូក្រាម ត្រីខ ៥កំប៉ុង ទឹកដោះគោខាប់ ៣កំប៉ុង សាប៊ូលាងដៃ ១ដុំ មី ១កេះ ទឹកស៊ីអ៉ីវ ២ដប ស្ករស ១គីឡូក្រាម និងថវិកាចំនួន ៤ម៉ឺនរៀលផងដែរ ។

ក្នុងឱកាសនោះដែរលោក អូត ឈាងលី ក៍ណែនាំបងប្អូនប្រជាពលរដ្ឋទាំពីរឃុំរួមគ្នាប្រយុទ្ធប្រឆាំងនឹងជម្ងឺកូវីដ-19នឹងវីធីការការពារជម្ងឺកូវីដ-19ដោយលាងដៃនឹងសាប៊ួ អាកុល ជែលអោយបានញឹកញាប់នឹងជៀសនៃការជួបជុំ៕

ភ្នំពេញ ៖ យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បញ្ជាក់ថា លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នឹងអញ្ជើញចូលរួមកិច្ចប្រជុំ រដ្ឋមន្ត្រីការបរទេសអាស៊ាន-សហរដ្ឋអាមេរិក តាមរយៈប្រព័ន្ធវីដេអូ (Videoconference) ស្តីពីកិច្ចសហប្រតិបត្តិការប្រយុទ្ធប្រឆាំងនឹងជំងឺកូវីដ-១៩ (COVID-19) នាថ្ងៃទី២៣ ខែមេសា ឆ្នាំ២០២០ ស្អែកនេះ នៅទីស្តីការក្រសួងការបរទេស។

បើតាបរបៀបវារៈ កិច្ចប្រជុំដែលមានលោក ម៉ៃឃើល ផុមផេអូ រដ្ឋមន្ត្រីការបរទេសអាមេរិក ចូលរួមផងដែរនោះ នឹងផ្លាស់ប្តូរទស្សនៈទៅវិញទៅមក និងពិភាក្សាអំពីវិធីសាស្ត្រនានា ដើម្បីពង្រឹងកិច្ចសហប្រតិបត្តិការ និងការភាពជាដៃគូរវាងអាស៊ាន និងសហរដ្ឋអាមេរិក ក្នុងការប្រយុទ្ធប្រឆាំងរួមគ្នាទៅនឹងការរីករាលដាលនៃជំងឺ COVID-19 ក្នុងក្របខណ្ឌភាពជាដៃគូយុទ្ធសាស្ត្រអាស៊ាន-អាមេរិក៕

ភ្នំពេញ ៖ សេចក្តីព្រាងច្បាប់ស្ដីពី ការគ្រប់គ្រងប្រទេសក្នុងភាពអាសន្ន បានទៅដល់ដៃក្រុមប្រឹក្សារដ្ឋធម្មនុញ្ញហើយ។ នៅព្រឹកថ្ងៃទី ២២ មេសា នេះ រដ្ឋមន្ត្រីក្រសួងយុត្តិធម៌ ឯកឧត្តមមកើត រិទ្ធ បានអញ្ជើញទៅការពារច្បាប់ស្ដីពីការគ្រប់គ្រងប្រទេសក្នុងគ្រាអាសន្ននៅក្រុមប្រឹក្សារដ្ឋធម្មនុញ្ញ។ ក្រុមប្រឹក្សារដ្ឋធម្មនុញ្ញនិងធ្វើការពិនិត្យថាតើសេចក្តីព្រាងច្បាប់នេះរំលោភទៅលើរដ្ឋធម្មនុញ្ញ ឬក៏យ៉ាងណា។

​លោក ជិន ម៉ាលីន បញ្ជាក់ថា មិនមែនច្បាប់ស្ដីពីការគ្រប់គ្រងប្រទេសត្រូវបានដាក់ឲ្យអនុវត្តជាផ្លូវការហើយភ្លាម នឹងត្រូវដាក់ប្រទេសក្នុងគ្រា អាសន្ននោះទេ។ ប្រទេសកម្ពុជា មិនទាន់ស្ថិតនៅក្នុងដំណាក់កាលធ្ងន់ធ្ងរ ឡើងនឹងត្រូវដាក់ឲ្យអនុវត្តច្បាប់ស្ដីពីការគ្រប់គ្រងប្រទេសក្នុងគ្រាអាសន្ននោះឡើយ៕