ភ្នំពេញ ៖ កងទ័ពរំដោះប្រជាជនចិនដែលមកចូលរួមលំហាត់សមយុទ្ធនាគមាស បានធ្វើដំណើរដល់ប្រទេសចិនចំនួន ២០ថ្ងៃហើយ និងបានប្រកាសថា កងទ័ពទាំងអស់ដែលបានធ្វើដំណើរត្រឡប់ទៅប្រទេសកំណើតវិញ គឺពុំមានជំងឺកូវីដ-១៩នោះទេ។ ចំណែកភាគីកងទ័ពកម្ពុជា ពិសេសកងកម្លាំងនៃកងពលតូចលេខ៧០ ក៏មិនមានអ្នកណាម្នាក់ឆ្លងវីរុសនេះដែរ ក្នុងពេលធ្វើសមយុទ្ធរួមគ្នា។ ការប្រកាសនេះ គឺក្រោយពេលនៅដាច់ដោយឡែកចំនួន១៤ថ្ងៃ និងធ្វើតេស្តចំនួន៦ថ្ងៃមកហើយ។

សូមជម្រាបថា ក្នុងអំឡុងពេលធ្វើសមយុទ្ធរួមគ្នានោះ កងពលតូចលេខ៧០ បានចាត់វិធានការយ៉ាងតឹងរឹងក្នុងការចេញចូលបរិវេណទីតាំងទាំង២ គឺសាលាហ្វឹកហ្វឺនតេជោសែនជុំគិរីរបស់កងពលតូច លេខ៧០ និងបញ្ជាការដ្ឋានកងពលនៅភ្នំពេញ ពិសេសគឺការបាញ់ថ្នាំសម្លាប់មេរោគ តាម គោល ដៅ ដែលថ្នាំមួយចំនួនគឺទទួលបានពីខាងភាគីចិន និងបានអនុវត្តតាមសេចក្តីប្រកាសរបស់ក្រសួងស្ថាប័នពាក់ព័ន្ធផងដែរ ក្នុងការបង្ការជំងឺកូវីដ-១៩ នេះ។

បើតាមភាគីមិត្តចិនបានបញ្ជាក់ថា លទ្ធផលដែលបង្ហាញអំពីការមិនឆ្លងជំងឺរវាងកង ទ័ពនៃប្រទេសទាំង២នេះ គឺជាជោគជ័យមួយដ៏ធំធេង ពោលគឺមិនត្រឹមតែជោគជ័យលើការហ្វឹកហាត់ជំនាញប្រឆាំងអំពើភេវរកម្មរួមគ្នានោះទេ ប៉ុន្តែក៏ជាជោគជ័យនៃការការពារ និងថែទាំសុខភាពជាមួយគ្នាបានយ៉ាងល្អ ក្នុងនាមជាមិត្តផងដែរ ដោយក្នុងនោះមានកងពលតូចលេខ៧០ ជាអ្នកទទួលធានាការពារការពារក្នុងទីលានសមយុទ្ធនៅសាលាតេជោសែនជុំគិរី និងនៅបញ្ជាការដ្ឋានកងពលនៅភ្នំពេញ។

គួរបញ្ជាក់ថា តាមការចង្អុលបង្ហាញពីសម្តេចនាយករដ្ឋមន្ត្រី ក៏ដូចជាមន្ត្រីជំនាញទាំងថ្នាក់ជាតិ និងអន្តរជាតិ កម្ពុជាបានប្រតិបត្តិយ៉ាងតឹងរ៉ឹងនូវវិធានការសុវត្ថិភាពដើម្បីការពារសុខភាពបងប្អូនកងទ័ពនៃប្រទេសទាំងពីរ ដើម្បីធានាឲ្យបាននូវការមិនឆ្លងជំងឺរាតត្បាតកូវីដ – ១៩ នេះ ខណៈដែលប្រទេស កម្ពុជា និងចិន ក៏ដូចជាបណ្ដាប្រទេសជាច្រើននៅក្នុងសកលលោកកំពុងប្រយុទ្ធប្រឆាំងនឹងជំងឺរាតត្បាតដ៏កាចសាហាវនេះ៕

ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បាន​សម្រេចផ្អាកការងារបណ្ដោះអាសន្នចំពោះលោកឧត្តមសេនីយ៍ត្រី ស្រេង សុខា ស្នងការរងនៃស្នងការដ្ឋាននគរបាលខេត្តកណ្ដាល និងបានបញ្ជាឱ្យលោកឧត្តមសេនីយ៍ត្រី ស្រេង សុខា ត្រូវមកបង្ហាញមុខនៅនាយកដ្ឋានបុគ្គលិករៀងរាល់ម៉ោងធ្វើការដើម្បីរង់ចាំការសម្រេចជាថ្មី។ នេះបើយោងតាមប្រកាសចុះថ្ងៃទី២១ ខែមេសា ឆ្នាំ ២០២០នេះ។

សូមជម្រាបថា លោកម៉ៅ ភិរុណ អតីតអភិបាលខេត្តកណ្តាល ប្រធានក្រុមប្រឹក្សាខេត្តកណ្តាលបានបញ្ជាអោយលោកឧត្តមសេនីយ៍ត្រី ឈឿន សុចិត្ត ស្នងការនគរបាលខេត្តកណ្តាល ធ្វើយ៉ាងណាដកតំណែងលោកឧត្តមសេនីយ៍ត្រី ស្រេង សុខា ស្នងការរងខេត្តកណ្តាលឲ្យទាល់តែបាន ព្រោះហ៊ានយកឈ្មោះរបស់លោកបញ្ជាចៅសង្កាត់រកាខ្ពស់ឲ្យកាត់ដីរដ្ឋជាង៤០ហិកតា។

លោក ម៉ៅ ភិរុណ បានបញ្ជាចំពោះមុខលោកឧត្តមសេនីយ៍ត្រី ឈឿន សុចិត្ត ស្នងការនគរបាលខេត្តកណ្តាល និងកណ្តាលចំណោម មនុស្សជាង៧០០នាក់ កាលពីថ្ងៃទី២ ខែមីនា ឆ្នាំ២០២០ ក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០១៩ និង លើកទិសដៅការងារឆ្នាំ២០២០ របស់រដ្ឋបាលខេត្តកណ្ដាល៕

ភ្នំពេញ ៖ ក្រសួងសុខាភិបាល នៅថ្ងៃទី២២ ខែមេសា ឆ្នាំ២០២០នេះ បានចេញប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១១០នាក់។

ចំណែកអ្នកកំពុងសម្រាកព្យាបាលជំងឺកូវីដមានសរុបចំនួន១២នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី២២ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលប ទទួលបានមុននេះបន្តិច៕

ភ្នំពេញ ៖ អាជ្ញាធររាជធានីភ្នំពេញ បានទទួលអំណោយជាសម្ភារសម្រាប់ប្រយុទ្ធប្រឆាំងជំងឺ COVID-19 ពីក្រុងសៀងហៃ ប្រទេសចិន ខណៈដែលជំងឺនេះ បាននិងកំពុងវាយលុកយ៉ាងខ្លាំង នៅលើពិភពលោក ហើយក្នុងនោះប្រទេសកម្ពុជា ក៏កំពុងប្រឈមដែរនោះ។

ពិធីនេះ ត្រូវបានឡើងនារសៀល ថ្ងៃទី២១ ខែមេសា ឆ្នាំ២០២០នេះ ក្រោមអធិបតីភាព លោក ឃួង ស្រេង អភិបាលរាជធានីភ្នំពេញ និងលោក វ៉ាង វិនធាន ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា។ អំណោយជាសម្ភារបរិក្ខាររួមមាន ម៉ាស់ N95 ចំនួន ៣,០០០ម៉ាស់, ម៉ាស់វេជ្ជសាស្ត្រ ចំនួន២០,០០០ម៉ាស់ និងសម្លៀកបំពាក់ការពារមេរោគ ចំនួន៥០០ឈុត។

ក្នុងឱកាសនោះ លោក ឃួង ស្រេង បានថ្លែងនូវអំណរគុណយ៉ាងជ្រាលជ្រៅ ចំពោះប្រទេសចិនដែលតែងតែជួយកម្ពុជា ពិសេសក្នុងកាលៈទេសៈនេះ បើទោះបីថានៅក្នុងប្រទេសចិនបាននិងកំពុងប្រឈមនឹងបញ្ហាការឆ្លងរីករាលដាលជំងឺ COVID-19 ក៏ដោយប៉ុន្តែចិននៅតែបន្តជួយមកកម្ពុជា ដោយបានបញ្ជូននូវគ្រឿងបរិក្ខារ ដើម្បីការពារទប់ស្កាត់នូវជំងឺនេះមកកម្ពុជាដែរ នេះគឺជាមិត្តដ៏ល្អបំផុត ដែលជួយគ្នាក្នុងគ្រាក្រ។

លោកក៏បានអំពាវនាវឲ្យប្រជាពលរដ្ឋទាំងអស់ មានការប្រុងប្រយ័ត្នខ្ពស់ចំពោះជំងឺ COVID-19 នេះ ដោយត្រូវការពារខ្លួនឲ្យបានល្អប្រសើរទៅតាមការណែនាំរបស់ក្រសួងសុខាភិបាល ពោលគឺកុំភ័យខ្លាំងពេក និងកុំហ៊ានខ្លាំងពេក បន្តធ្វើអនាម័យឲ្យបានជាប់ជាប្រចាំពិសេស លាងដៃជាប្រចាំ ពាក់ម៉ាស់ការពារ ជៀសអោយបានការជួបជុំប្រមូលផ្តុំគ្នាជាដើម។

លោក វ៉ាង វិនធាន ក្នុងឱកាសនោះផងដែរ បានលើកឡើងថា ប្រទេសចិននឹងចូលរួមជាមួយកម្ពុជា ដើម្បីទប់ស្កាត់នូវការរីករាលដាលនៃជំងឺ COVID-19 នៅក្នុងប្រទេសកម្ពុជា ។ ប្រទេសចិន គាំទ្រ និងជួយកម្ពុជាជានិច្ចការក្នុងការប្រយុទ្ធប្រឆាំងនឹងជំងឺកូវីដ-១៩នេះ ដោយកន្លងមកយើងបានបញ្ជូននូវគ្រឿងបរិក្ខាជាមួយនឹងពេទ្យជំនាញមកជួយកម្ពុជា ហើយចំពោះមុខប្រទេសចិន នឹងបន្តជួយកម្ពុជា បើប្រទេសកម្ពុជាត្រូវការឲ្យប្រទេសចិនជួយនោះ។

លោកបានបញ្ជាក់ថា នៅគ្រាដែលប្រទេសចិនកំពុងប្រយុទ្ឋប្រឆាំងជំងឺ គឺព្រះរាជាណាចក្រកម្ពុជា បានគាំទ្រយ៉ាងពេញទំហឹងដល់ប្រទេសចិន ដូច្នេះយើងពិតជាដឹងគុណដល់ប្រទេសកម្ពុជា។ ឥឡូវប្រទេសកម្ពុជាក៏កំពុងប្រយុទ្ធប្រឆាំង COVID-19 យើងផ្តល់ការគាំទ្រយ៉ាងអស់ពីលទ្ធភាព ដើម្បីជួយដល់ប្រទសកម្ពុជា ក្នុងការប្រយុទ្ឋប្រឆាំង COVID-19 ដែលជាសត្រូវរបស់ពិភពលោកនេះ។

គួរបញ្ជាក់ផងដែរថា ទីក្រុងសៀងហៃ នៃប្រទេសចិន បានមានទំនាក់ទំនងសហប្រតិបត្តិការណ៍ល្អ ជាមួយរាជធានីភ្នំពេញជាយូរមកហើយ និងបានចងសម្ព័ន្ធមេត្រីភាពជាមួយគ្នា កាលពីថ្ងៃទី០៨ ខែតុលា ឆ្នាំ២០០៨ ដែលមកដល់ពេលនេះ មានអាយុកាលជាង១០ឆ្នាំហើយ៕

ភ្នំពេញ ៖ នៅថ្ងៃទី២២​ ខែ​មេសា ឆ្នាំ​២០២០ វេលា​ម៉ោង​៩​និង​៣០​នាទីនេះ អង្គភាព​អ្នកនាំពាក្យ​រាជរដ្ឋាភិបាល នឹង​រៀបចំ​នូវ​សន្និសីទ​សារព័ត៌មាន​ស្ដ​ពី “​ការគ្រប់គ្រង​ប្រទេស​ជាតិ​ស្ថិត​ក្នុង​ភាពអាសន្ន​” នៅ​ជាន់​ផ្ទាល់​ដី ធ្វើនៅសាលប្រជុំ​ B នៃ​ទីស្ដីការគណៈរដ្ឋមន្ត្រី​។

សេចក្ដីជូនដំណឹង​របស់​អង្គភាព​អ្នកនាំពាក្យ​រាជរដ្ឋាភិបាល​ បានបញ្ជាក់ថា ​សន្និសីទ​នេះ មានវាគ្មិន​គឺ​លោក​ ជិន ម៉ា​លីន រដ្ឋលេខាធិការ និង​ជា​អ្នកនាំពាក្យ​ក្រសួង​យុត្តិធម៌​។ សសន្និសីទនេះមានគោលបំណ ដើម្បី​បង្ហាញជូន​សាធារណជន​ឲ្យបាន​យល់ច្បាស់ ពី​ការប្រឹងប្រែង​របស់​រាជ​រដ្ឋាភិបាល ដើម្បី​ប្រសិទ្ធភាព​ក្នុង​កិច្ចការ​សន្តិសុខ​ជាតិ និង​សណ្ដាប់ធ្នាប់​សាធារណៈ ការពារ​អាយុជីវិត និង​សុខភាព​របស់​ប្រជាពលរដ្ឋ ព្រមទាំង​ការពារ​ទ្រព្យសម្បត្តិ និង​បរិ​សា្ថន​ផងដែរ​៕

ភ្នំពេញ ៖ ដើម្បីធានានូវប្រសិទ្ធភាពការងាររបស់ការិយាល័យទាំង១៥ នៃបញ្ជាការដ្ឋានកងទ័ពជើងគោក សម្តេចអគ្គមហាសេនាបតី តេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត បានឧបត្ថម្ភរថយន្តម៉ាក Mazda BT50 2020 ចំនួន១៥គ្រឿង តាមរយៈ លោក ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរៈភូមិន្ទ មេបញ្ជាការកងទ័ពជើងគោក ដើម្បីប្រតិបត្តិការការងារប្រចាំថ្ងៃឱ្យមានភាពរលូន និងប្រសិទ្ធភាពការងារ ជូនដល់ការិយាល័យចំណុះបញ្ជាការដ្ឋានកងទ័ពជើងគោក។

សូមសម្រាបថា៖ ពិធីប្រគល់ និងទទួលរថយន្តដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត បានធ្វើឡើងនៅថ្ងៃទី២១ ខែមេសា ឆ្នាំ២០២០ នៅបញ្ជាការដ្ឋានកងទ័ពជើងគោក ក្រោមវត្តមាន ឯកឧត្តម ឧត្តមសេនីយ៍ឯក ហ៊ុន ម៉ាណែត និងនាយការិយាល័យទាំង១៥ នៃបញ្ជាការដ្ឋានកងទ័ពជើងគោក ព្រមទាំងនាយទាហានជាច្រើនរូបទៀត៕

បើតាមលោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពល នៃក្រសួងរ៉ែនិងថាមពល បានមានប្រសាសន៍ថាឆ្នាំ ២០២០នេះកម្ពុជារំពឹងថា នឹងមិនមានការខ្វះខាតអគ្គិសនី ប្រើប្រាស់ដូចឆ្នាំ ២០១៩ទៀតនោះទេ ដោយសារតែឆ្នាំនេះ អាងទឹកនៅវារីអគ្គិសនី នានាត្រូវបានត្រៀមទុកសម្រាប់ប្រើប្រាស់ក្នុងការផលិតអគ្គិសនី ហើយឆ្នាំនេះដែរ បើតាមក្រសួងធនធានទឹក និងឧត្តុនិយម បានព្យាករណ៍ថា រដូវវស្សានឹងឆាប់ចូលមកដល់ជាងឆ្នាំមុន ដូច្នេះ បរិមាណទឹកនៅក្នុងអាងវារីអគ្គិសនី នឹងកាន់តែច្រើនហើយអាចផលិតភ្លើងបានកាន់តែច្រើន សម្រាប់បម្រើអោយតម្រូវការនៅតាមលំនៅឋានសហគ្រាសនានាផងដែរ ។

លោកបន្តថា បច្ចុប្បន្ននេះ ការផ្គត់ផ្គង់អគ្គិសនីនៅក្នុងប្រទេសកម្ពុជាមានប្រភពសំខាន់ៗមួយចំនួន ក្នុងនោះប្រភពបានពីដុតប្រេងមានប្រមាណ១៥ភាគរយ ការផលិតពីវារីអគ្គិសនី ប្រមាណ៣៣ភាគរយ ពីធ្យូងថ្មប្រមាណ៣២ភាគរយ ការនាំចូលពីប្រទេសជិតខាងប្រមាណ២៥ភាគរយ និងថាមពលកកើតឡើងវិញ ដូចជាបានមកពីប្រព័ន្ធសូឡាជាដើម ។ លោកថា៖« កម្ពុជាបានចុះកុងត្រាទិញថាមពលអគ្គិសនីពីប្រទេសជិតខាងប្រមាណពី២០ទៅ៣០ឆ្នាំឯណោះ ហើយប្រទេសណាក៏ដូចជាប្រទេសណាដែរ គឺត្រូវការពឹងពាក់គ្នាទៅវិញទៅមកចំពោះវិស័យអគ្គិសនី ។ រដូវខ្លះ កម្ពុជាខ្វះភ្លើង តែប្រទេសជិតខាងសំបូរ ដូច្នេះ កម្ពុជា ត្រូវនាំចូលពីប្រទេសជិតខាងមកបំពេញ ហើយនៅរដូវខ្លះទៀតគេខ្វះអាចនាំពីកម្ពុជាវិញ» ។

លោក បន្តទៀតថា មានអ្នកសួរថា តម្លៃប្រេងធ្លាក់ចុះហើយ ហេតុអ្វីតម្លៃអគ្គិសនី មិនធ្លាក់ចុះ ។ លោកបានបកស្រាយថា បើសិនយកប្រេងទៅផលិតជាអគ្គិសនីនឹងអស់ថ្លៃកាន់តែ ព្រោះដំណើរការម៉ាស៊ីនត្រូវការដើររហូត តែសម្រាប់ថាមពលដែលបានមកពីវារី អគ្គិសនី នឹងមានតម្លៃទាបជាង ដូច្នេះហើយទើបគេត្រូវការបង្កើតវារីអគ្គិសនីដើម្បីទាញយកថាមពលអគ្គិសនីមកប្រើប្រាស់ជំនួសអោយការដុតប្រេង ។

បើយោងតាមរបាយការណ៍របស់ក្រសួងរ៉ែ និងថាមពល បានបង្ហាញពីទិសដៅសម្រាប់អភិវឌ្ឍន៍វិស័យថាមពលក្នុងឆ្នាំ ២០២០ ដោយក្នុងនោះកម្ពុជា នឹងជំរុញ និងតាមដានការសាងសង់គម្រោងថាមពលដើរដោយពន្លឺព្រះអាទិត្យដើម្បីដាក់ឱ្យដំណើរការនៅក្នុងឆ្នាំ ២០២០នេះ ក្នុងនោះនៅកំពង់ស្ពឺ មានថាមពល២០មេហ្កាវ៉ាត់ ពោធិ៍សាត់ ៣០មេហ្កាវ៉ាត់ បាវិត ២០មេហ្កាវ៉ាត់ បាត់ដំបង៦០មេហ្កាវ៉ាត់ និងបន្ទាយមានជ័យ៣០មេហ្កាវ៉ាត់ ។

ក្រៅពីនេះរដ្ឋាភិបាលនឹងជំរុញការសាងសង់គម្រោងរោងចក្រប្រេងខ្មៅ ដែលអាចទទួលបានកំលាំងថាមពល៤០០មេហ្កាវ៉ាត់ ដើម្បីដាក់ឱ្យដំណើរការនៅឆ្នាំ ២០២០ ហើយគម្រោងរោងចក្រអគ្គិសនីដុតធ្យូងថ្មមួយក៏នឹងដាក់ដំណើរការនៅឆ្នាំ ២០២១ផងដែរ ។ដោយឡែកគម្រោងសាងសង់ថាមពលដើរដោយពន្លឺព្រះអាទិត្យនៅខេត្តកំពង់ឆ្នាំង កំលាំង៦០មេហ្កាវ៉ាត់ និងពោធិ៍សាត់៦០មេហ្កាវ៉ាត់ដែរនោះ ក៏នឹងដាកដំណើរការនៅឆ្នាំ ២០២១ផងដែរ បើមិនមានការប្រែប្រួល ។

យោងតាមរបាយការណ៍របស់ក្រសួងដដែលនេះ បានបង្ហាញថាក្នុងឆ្នាំ ២០១៩កន្លងទៅ បរិមាណប្រើប្រាស់ថាមពលអគ្គិសនីទូទាំងប្រទេសមានប្រមាណ១២ពាន់លានគីឡូវ៉ាត់ម៉ោង ខណៈ២០១៨ការប្រើប្រាស់ថាមពលអគ្គិសនីទូទាំងប្រទេសមានប្រមាណជិត១០ពាន់លានគីឡូវ៉ាត់ម៉ោង ។

ក្នុងនោះកម្ពុជានាំចូលពីប្រទេសជិតខាងប្រមាណ៣ពាន់លានគីឡូវ៉ាត់ម៉ោង ដោយពីប្រទេសវៀតណាម ជាង១ពាន់៧០០លានគីឡូវ៉ាត់ម៉ោងពីប្រទេសជាង១ពាន់១៥០លានគីឡូវ៉ាត់ម៉ោងនិងពីប្រទេសឡាប្រមាណ១១០លានគីឡូវ៉ាត់ម៉ោង ៕

ភ្នំពេញ ៖ អនុវត្តតាមការណែនាំរបស់លោក ឃួង ស្រេង អភិបាលរាជធានីភ្នំពេញ ក្នុងរយៈពេល៣ថ្ងៃជាប់គ្នានេះ មន្ទីរសុខាភិបាលរាជធានីភ្នំពេញ បានចុះធ្វើសកម្មភាពបាញ់ថ្នាំសម្លាប់មេរោគនៅតាមបណ្តាផ្សារធំៗមួយចំនួនក្នុងរាជធានីភ្នំពេញ ដើម្បីសុខមាលភាពប្រជាពលរដ្ឋ ក៏ដូចជាអាជីវករលក់ដូរក្នុងផ្សារទាំងអស់ ខណៈដែលវីរុសកូវីដ១៩ បាននឹងកំពុងវាយលុកមិនថា នៅលើពិភពលោក និងនៅក្នុងប្រទេសកម្ពុជានោះទេ។

អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានបញ្ជាក់ឱ្យដឹងនាព្រឹកថ្ងៃទី២១ ខែមេសានេះថា ក្នុងន័យគិតគូរពីសុខភាពប្រជាពលរដ្ឋ ក៏ដូចជាអាជីវករលក់ដូរក្នុងផ្សារ, អភិបាលរាជធានីភ្នំពេញ បានណែនាំឱ្យមន្ទីរសុខាភិបាល ចុះបាញ់ថ្នាំសម្លាប់មេរោគ។ ជាក់ស្តែងនៅព្រលប់ថ្ងៃទី១៨ ដល់ថ្ងៃទី២០ ខែមេសា ក្រុមការងារមន្ទីរសុខាភិបាល បានចុះបាញ់ថ្នាំសម្លាប់មេរោគនៅផ្សារធំថ្មី ទួលទំពូង និងផ្សារកណ្តាល។

ជាមួយគ្នានេះ គណៈកម្មការផ្សារនីមួយៗ ក៏បាននិងកំពុងអនុវត្តការងារទៅតាមការណែនាំរបស់លោក ឃួង ស្រេង អភិបាលរាជធានីភ្នំពេញ ក្នុងការប្រយុទ្ធប្រឆាំង ទប់ស្កាត់ការរាលដាលនៃវីរុសកូវីដ-១៩ ដោយនៅតាមបណ្តាលផ្សារទាំងនោះ ក្រៅពីការបាញ់លាងសំអាតហើយ នៅតាមបណ្តាច្រកចេញ-ចូលផ្សារ ក៏មានកម្លាំងសន្តិសុខ រង់ចាំបាញ់ស្ទង់កំដៅ និងបាញ់អាកុលលាងដៃជូនទៅអាជីវករ ក៏ដូចជាប្រជាពលរដ្ឋផងដែរ៕

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានបន្តអំពាវនាវដល់ប្រជាពលរដ្ឋ រួមគ្នាទប់ស្កាត់ និងបង្ការកុំឱ្យឆ្លងមេរោគកូវីដ១៩ បើទោះបីជារយៈពេល៨ថ្ងៃចុងក្រោយនេះ កម្ពុជា មិនបានរកឃើញករណីឆ្លងថ្មីក៏ដោយ។

តាមរយៈបណ្តាញទំនាក់ទំនងសង្គមផ្លូវការ សម្តេចតេជោ ហ៊ុន សែន បានលើកឡើងថា “រាល់វិនាទី និងជារៀងរាល់ថ្ងៃ សូមបងប្អូនជនរួមជាតិ ចងចាំនិងយកចិត្តទុកដាក់ខ្ពស់បំផុតចំពោះសុខភាពដែលជាអាយុជីវិតផ្ទាល់របស់បងប្អូន ប្តីប្រពន្ឋ កូនចៅ និងក្រុមគ្រួសារ ក្នុងស្ថានភាពដែលប្រទេសជាតិយើងកំពុងប្រយុទ្ធប្រឆាំងកម្ចាត់ជំងឺឆ្លងកូវីដ១៩។ សូមយកជាប់តាមខ្លួនរាល់ពេលធ្វើដំណើរនូវម៉ាស ទឹកអាល់កុល និងជេលសម្លាប់មេរោគ និងបាក់តេរីផ្សេងៗ”។

សម្តេចតេជោ បានលើកទឹកចិត្តឱ្យពលរដ្ឋ ត្រូវបន្តប្រើម៉ាសពាក់ការពារគ្រប់ទីកន្លែង និងត្រូវដុសលាងសម្អាតដៃមុនពេលប៉ះពាល់ និងក្រោយពេលប៉ះពាលក់របស់របរ ឬវត្ថុអ្វីមួយនៅតាមទីផ្សារ និងតាមទីធ្លាសាធារណៈដែលមិនដឹងថា តើរបស់របរ និងសម្ភារទាំងនោះ ត្រូវបានប៉ះពាល់ដោយអ្នកមានមេរោគឆ្លងកូវីដ១៩ឬទេ។

សម្តេចតេជោ បានលើកឡើងបន្ថែមថា “យើងការពារខ្លួនកុំនាំយកមេរោគឆ្លងទៅគេ និងសូមកុំនាំមេរោគពីគេមកយើង និងទៅកាន់ក្រុមគ្រួសារ ហើយត្រូវមានអនាម័យសុខភាពខ្ពស់ជាប្រចាំ ហើយត្រូវស្តាប់តាមការណែនាំរបស់ក្រសួងសុខាភិបាលជានិច្ច”។

សូមបញ្ជាក់ថា នៅថ្ងៃទី២១ ខែមេសា ឆ្នាំ២០២០នេះ ក្រសួងសុខាភិបាល បានប្រកាសឱ្យដឹងថា អ្នកជំងឺកូវីដ១៩ បានជាសះស្បើយថ្មីចំនួន៣នាក់ទៀត ធ្វើឱ្យចំនួនអ្នកជាសះស្បើយសរុប កើនឡើងរហូតដល់ ១១០នាក់ ហើយពុំមានករណីអ្នកឆ្លងជំងឺកូវីដថ្មីទេ។ ចំណែកអ្នកកំពុងសម្រាកព្យាបាលជំងឺកូវីដ បានធ្លាក់ចុះមកត្រឹមចំនួន ១២នាក់ នៃអ្នកឆ្លងសរុប១២២នាក់ បើគិតត្រឹមព្រឹកថ្ងៃទី២១ ខែមេសា ឆ្នាំ២០២០នេះ៕