ភ្នំពេញ ៖ ក្រសួងធនធានទឹក និងឧតុនិយម បានចេញសេចក្តីជូនដំណឹង ស្តីពីស្ថានភាពធាតុអាកាសនៅកម្ពុជា ចាប់ពីថ្ងៃទី១៨ ដល់ ២៤ ខែកុម្ភៈ ឆ្នាំ២០២០ ដោយសីតុណ្ហភាពអប្បបរមា ពី២២-២៧ អង្សាសេ និងអតិបរមាពី៣១-៣៥អង្សាសេ។

ក្រសួងបានឲ្យដឹងទៀតថា នៅរយៈពេលនេះ នៅផ្នែកខ្លះនៃតំបន់មាត់សមុទ្រ នឹងអាចមានភ្លៀងខ្សោយ៕

ភ្នំពេញ ៖ នៅព្រឹកថ្ងៃអង្គារ ១០រោច ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៨ ខែកុម្ភៈ ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នឹងអញ្ជើញប្រគល់សញ្ញាបត្រដល់គរុសិស្ស គរុនិស្សិតបញ្ចប់ការសិក្សាឆ្នាំ២០១៨-២០១៩ សរុប១,៩៧៧នាក់ នារី ៨១៥នាក់។ ពិធីនេះប្រារព្ធឡើងនៅវិទ្យាស្ថានជាតិអប់រំ។

គរុសិស្ស និស្សិតដែលទទួលសញ្ញាបត្រនៅព្រឹកនេះ រួមមាន ៖ និស្សិតអធិការអប់រំ ៥៦នាក់ នារី ៩នាក់, បរិញ្ញាបត្រជាន់ខ្ពស់ផ្នែកគ្រប់គ្រងអប់រំ ៤០នាក់ នារី ៥នាក់, គ្រូបង្រៀនកម្រិតឧត្តម (បរិញ្ញា+១) ចំនួន ៨៤៦នាក់ នារី ៣៩៣នាក់, គ្រូបង្រៀនកម្រិតមូលដ្ឋាន (១២+២) ចំនួន ៣០នាក់ នារី ២០នាក់, គ្រូបង្រៀនកម្រិតមូលដ្ឋានតាមប្រព័ន្ធពន្លឿនចំនួន ១,០០៥នាក់ នារី ៣៨៨នាក់៕

 ភ្នំពេញ ៖ ភ្ញៀវទេសចរចំរុះជាតិសាសន៏ចំនួន ១៨៦នាក់ ក្នុងចំណោម ៦២០នាក់ឡើងមកពីកប៉ាល់ Westerdam  ដែលចូលចតនៅកំពង់ផែក្រុងព្រះសីហនុ ពេលនេះកំពុងស្នាក់នៅសណ្ឋាគារសុខាភ្នំពេញ រេស៊ីដង់ ក្នុងភូមិសាស្ត្ររាជធានីភ្នំពេញ ដោយត្រូវបាន លោក ឃួង ស្រេង អភិបាលនៃគណៈអភិបាលរាជធានីភ្នំពេញ និង លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងមន្ត្រីក្រោមឧិវាទ អញ្ជើញទៅសួរសុខទុក្ខដល់ទីតាំងស្នាក់នៅ និងបានជូនដំណើរ ទស្សនាទេសភាពរាជធានីភ្នំពេញ នារសៀលថ្ងៃទី១៧ ខែកុម្ភៈ នេះ ដែលជាការផ្តល់នូវភាពកក់ក្តៅ និងជាកាយវិការមនុស្សធម៌ពិតៗ សំរាប់ភ្ញៀវទេសចរតាមកប៉ាល់ Westerdam  ដែលបណ្តាប្រទេសនានាមានការព្រួយបារម្មណ៏ពីការរីករាលដាលនៃជំងឺឆ្លង Covid.19។

តាមរយះរថយន្តក្រុងចំនួន១០គ្រឿង បានដឹកភ្ញៀវទេសចរ ទាំង ១៨៦នាក់ទស្សនាទីក្រុងភ្នំពេញ ដោយក្តីរីករាយ និងពុំមានការព្រួយបារម្មណ៏ពីផលប៉ះពាល់ និងពុំមានភ្ញៀវទេសចរ ណាម្នាក់ ត្រូវបានរកឃើញវិជ្ជមាននៃ ជំងឺ Covid .19 នោះទេ។ តាមការបញ្ជាក់ពីមន្ត្រីសុខាភិបាល ដែលប្រចាំការនៅសណ្ឋាគារសុខាភ្នំពេញ រ៉េស៊ីដង់ បានឲ្យដឹងថា ៖ ពេលនេះមានភ្ញៀវទេសចរចម្រុះជាតិសាសន៍ចំនួន ៦២០នាក់ កំពុងស្នាក់នៅក្នុងសណ្ឋាគារខាងលើ និងត្រូវបានត្រួតពិនិត្យសុខភាពជាប្រចាំដោយការយកចិត្តទុកដាក់បំផុត តាមលក្ខណៈវេជ្ជសាស្ត្រ ហើយមកដល់ពេលនេះ ពួកគេពុំបានរកឃើញចំណុចវិជ្ជមានណាមួយកើតមានលើភ្ញៀវទេសចរណាម្នាក់នោះឡើយជាមួយគ្នានេះ ក៏មានការចូលរួមពីតំណាងស្ថានទូតសាមី ចូលរួមសហការដោយយកចិត្តទុកដាក់ផងដែរ។

សូមបញ្ជាក់ថា ភ្ញៀវទេសចរទាំងអស់មកពីកប៉ាល់ Westerdam ដែលបានចូលចតនៅខេត្តព្រះសីហនុ ត្រូវបានទទួលស្វាគមន៏យ៉ាងកក់ក្តៅ និងរាក់ទាក់បំផុតពីសម្តេចអគ្គមហាសេនា បតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា ក្នុងនាមមនុស្សធម៌ ចំពោះមនុស្សផងគ្នា ដែលកប៉ាល់មួយនេះត្រូវបានបដិសេធមិនឲ្យចូលចតតាមបណ្តាប្រទេសមួយចំនួនដោយសារការភ័យខ្លាចការឆ្លងជំងឺ Covid…19មួយនេះ៕

បន្ទាយមានជ័យ ៖ ឆ្នាំ២០២០ នេះ រដ្ឋបាលខេត្តបន្ទាយមានជ័យបានត្រៀមរួចជាស្រេចហើយ នូវការរៀបចំកម្មវិធី«ចូលឆ្នាំបន្ទាយឆ្មារ» យ៉ាងគគ្រឹកគគ្រេងជូនប្រជាពលរដ្ឋមកកម្សាន្តសប្បាយរីករាយ នៅទីតាំងប្រាសាទបន្ទាយឆ្មារ ស្ថិតនៅខាងជើងទីរួមខេត្តបន្ទាយមានជ័យ ក្នុងឃុំបន្ទាយឆ្មារស្រុកថ្មពួកនាពេលពិធីបុណ្យចូលឆ្នាំថ្មីប្រពៃណីខ្មែរនាឆ្នាំ២០២០ ខាងមុខនេះ។

ដោយការត្រៀមរៀបចំនេះបានឆ្លងដល់ការប្រជុំជាលើកទី២កាលពីថ្ងៃទី១៧ ខែកុម្ភៈ ឆ្នាំ២០២០ក្រោមវត្តមាន ឯកឧត្តម ស សុខា រដ្ឋលេខាធិការអប់រំ យុវជននិងកីកា និងលោកជំទាវ កែ សួនសុភី លោកអភិបាលខេត្ត អ៊ុំ រាត្រី ព្រមទាំងអង្គភាពជុំវិញខេត្ត។
កិច្ចប្រជុំជាលើកទី២នេះ ក្នុងន័យត្រៀម រៀបចំកម្មវិធីចូលឆ្នាំបន្ទាយឆ្មារ ចាប់ពីថ្ងៃទី១៣ ដល់១៦ ខែមេសា ឆ្នាំ២០២០ជូនប្រជាពលរដ្ឋមកកម្សាន្តសប្បាយរីករាយ នៅទីតាំងប្រាសាទបន្ទាយឆ្មារ ។ដោយមានការរៀបចំអោយមាន៖

១.ការតាំងបង្ហាញពិព័រណ៌ផលិតផលតាមស្តង់
២.ការលេងល្បែងប្រជាប្រិយ
៣.ការសម្តែងក្បាច់គុនល្បុក្កតោ
៤.កម្មវិធីកម្សាន្តបន្ទាយឆ្មារត្រជាក់ចិត្ត
៥.កម្មវិធីរាំវង់ស្គរដៃ
៦.កម្មវិធីប្រទ្បងពាក់កណ្តាលផ្តាច់ព្រ័ត្រជ្រើសរើសបវរស្រ្តីវ័យចំណាស់ ។

ប្រាសាទបន្ទាយឆ្មារជាប្រាសាទដែលត្រូវបានកសាងឡើងចុងសតវត្សរ៍ទី១២ដល់ដើមសតវត្សរ៍ទី១៣ ក្នុងរជ្ជកាលព្រះបាទជ័យវរ្ម័នទី៧ ដើម្បីឧទ្ទិសដល់បុត្រា និងមេទ័ព៤នាក់របស់ព្រះអង្គដែលបានពលីនៅក្នុងសមរភូមិដេញចាមនៅឆ្នាំ១១៧៧។ ប្រាសាទបន្ទាយឆ្នារ មានទីតាំងស្ថិតនៅ ភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ និងមានចំងាយប្រមាណ៧គីឡូម៉ែត្រពីទីប្រជុំជនខេត្តបន្ទាយមានជ័យខាងជើង។

សូមបញ្ជាក់ថា ប្រាសាទបន្ទាយឆ្មារត្រូវបានជួសជុលឡើងវិញនិងបានរៀបចំឧបត្ថម្ភយ៉ាងយកចិត្តទុកដាក់ឲ្យមានការចាប់អារម្មពីភ្ញៀវជាតិនិងអន្តរជាតិមកទស្សនាយ៉ាងច្រើនកុះករពីសំណាក់លោកជំទាវ ម៉ៅ ម៉ាល័យ កែគឹមយ៉ាន។

ដោយលោកជំទាវបានចំណាយថវិការជាច្រើនចូលរួមឧបត្ថក្នុងការជុសជុលប្រាសាទឡើងវិញមិនថែមតែប៉ុណ្ណោះលោកជំទាវ ម៉ៅម៉ាល័យ បានចំណាយពេលវេលាដ៍មានតំលៃចុះជាប់ជាប្រចាំរៀបចំហេដ្ឋារចនាសម្ព័ន្ធផ្សេងនៅតាមប្រាសាទនិងជំវិញប្រាសាទ។ អ្វីដែលពិសេសជាងនោះទៀតក្នុងរយះពេលចុងកក្រោយនេះលោកជំទាវបានផ្តួចផ្តើមកសាង ស្ពានភ្ជាប់និស្ស័យបារាយណ៍មេបុណ្យស្ពានបណ្តែតទឹកអាងជើងគ្រុស កន្លែងទស្សនាថ្ងៃលិចនៅអាងជើងគ្រុស ។ដែលសមទ្ធិផលទាំងនេះបានធ្វើអោយមានការចាប់អារម្មទៅទស្សនាយ៉ាងច្រើនកាលពីបុណ្យចូកឆ្នាំនិងបុណ្យភ្ជុំបិណ្យកាលពីឆ្នាំទៅ។

រដ្ឋបាលខេត្តបន្ទាយមានជ័យ សង្ឃឹមថា នៅក្នុងឱកាសបុណ្យចូលឆ្នាំប្រពៃណីជាខាងមុខ តាមការរៀបចំរបស់រដ្ឋបាលខេត្តប្រាសាទបន្ទាយឆ្មារ និងកាន់តែមានការចូលរួមពីភ្ញៀវជាតិ និងអន្តរជាតិកាន់ច្រើនជាងឆ្នាំមុន៕

បន្ទាយមានជ័យ : យ៉ាងហោចណាស់ មនុស្សម្នាក់បានរងបួសធ្ងន់ខណៈដែលរថភ្លើង បុកជាមួយគ្រឿងចក្រឈូសឆាយដី ។

ក្នុងហេតុការណ៍នៃការបុកនេះបានកើតឡើងនៅវេលាម៉ោង៧និង៥៥ នាទីព្រឹកថ្ងៃទី១៦ខែកុម្ភៈ ឆ្នាំ២០២០ចំនុចប្រសព្វផ្លូវជាតិវាងក្រុងនិងកំណាត់ផ្លូវដែក មុខរោងម៉ាស៊ីនកិនស្រូវឥណ្ឌា ស្ថិតក្នុងភូមិបាណយ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។

ប្រភពពីមន្ត្រីនគរបាល បានឲ្យដឹងថា៖នៅមុនពេលកើតហេតុ រថភ្លើងបានធ្វើដំណើរ ក្នុងទិសដៅពីលិចទៅកើត ពេលមកដល់ចំណុចកើតហេតុ មានគ្រឿងចក្រកំពុងឈូសដី(សាសើ) បានបើកឆ្លងកាត់ផ្លូវរថយន្តភ្លើង បណ្តាលឲ្យរថភ្លើងបុកពេញទំហឹងក្រឡាប់ គ្រឿងចក្រសង្កត់លើអ្នកបើកបរបណ្តាលអោយរងរបួសធ្ងន់។

សមត្ថកិច្ចដដែលបានបញ្ជាក់អោយដឹងថាអ្នករងគ្រោះក្នុងហេតុការណ៍បុកនោះមានឈ្មោះ រឿង វាសនា ភេប្រុសអាយុ៣២ឆ្នាំ រស់នៅភូមិកំពង់ថ្ម ឃុំកំពង់ថ្ម ស្រុកកំពង់ធំ ខេត្តកំពង់ធំ ហើយបានបញ្ជូនទៅសង្រ្គោះនៅមន្ទីរពេទ្យបង្អែកមិត្តភាពកម្ពុជា ជប៉ុន នាស្រុកមង្គលបូរី ។ចំណែកគ្រឿងចក្រឈូសដីនិងរថភ្លើងរងនូវការខូចខាតធ្ងន់ទាំង២គ្រឿង ។

ប្រភពដដែលបានបញ្ជាក់ថា៖នៅក្នុងហេតុការណ៍បណ្តាលឲ្យថ្នាក់ចរាចរណ៍នេះ គឺបង្កឡើងដោយ គ្រឿងចក្រឈូសដី(សាសើ) បើកបំពានរំលោភសិទ្ធអាទិភាពរបស់រថភ្លើង។ករណីនេះ ភាគីតំណាងក្រុមហ៊ុនទាំងសងខាងបានសម្របសម្រួលដោះស្រាយគ្នានៅកន្លែងកើតហេតុ ដើម្បីបញ្ចប់រឿង៕

​ភ្នំពេញ ៖ លោកស្រី អ៊ឹង កន្ថាផាវី រដ្ឋមន្ត្រីក្រសួង​កិច្ចការនារី បាន​ថ្លែង​ឲ្យ​ដឹង​កាលពី​ព្រឹក​ថ្ងៃនេះ​ថា ស្ត្រីៗ ដែល​កំពុង​ជាប់ឃុំ​នៅ​ពន្ធនាគារ​ភាគច្រើន​ពាក់ព័ន្ធ​នឹង​បទល្មើស​គ្រឿងញៀន​ដូចជា ជួញដូរ​ចែកចាយ​និង​រក្សាទុក​គ្រឿងញៀន​ជាដើម។​

​លោកស្រីរដ្ឋមន្ត្រីក្រសួង​កិច្ច​ការិនី​បានឱ្យដឹងថា ដោយ​អនុវត្តន៍​តាម​អនុសាសន៍​របស់​សម្តេច​តេ​ជោ ក្រុមប្រឹក្សា​ជាតិ​កម្ពុជា​ដើម្បី​ស្ត្រី និង​ក្រសួង​កិច្ចការនារី បាន​ចុះ​ពិនិត្យ​ស្ថានភាព​ស្ត្រី​កំពុង​ជាប់ឃុំ​ក្នុង​ពន្ធនាគារ​ចំនួន​២៨ នៅ​ទូទាំង​២៥​រាជធានី​-​ខេត្ត ហើយ​បាន​រកឃើញថា ស្ត្រី​កំពុង​ជាប់ពន្ធនាគារ​ភាគច្រើន បាន​ប្រព្រឹត្ត​បទល្មើស​ពាក់ព័ន្ធ​គ្រឿង​នឹង​គ្រឿងញៀន ដូចជា​ជួញដូរ ចែកចាយ និង​រក្សាទុក​។​

​សូមជម្រាបថា បើតាម​របាយការណ៍រ​បស់​អគ្គនាយកដ្ឋាន​ព​ន្ធ​នាគារ​បាន​បង្ហាញថា ប​ច្ចុ​ប្ប​នេះ​មាន​ស្ត្រី​ជាង ៣​ពាន់​នាក់​កំពុង​ជាប់ពន្ធនាគារ ក្នុងចំណោម​អ្នក​ជាប់ពន្ធនាគារ​ប្រមាណ ៣៦,០០០​នាក់​ក្នុង​ទូទាំងប្រទេស៕

ភ្នំពេញ ៖ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានសង្កត់ធ្ងន់ថា ទោះបីមាន ឬគ្មាន EBA ពីសហភាពអឺរ៉ុប ក៏កម្ពុជាបានតាំងចិត្តរួចហើយថា ការលើកកម្ពស់លក្ខខណ្ឌការងារ ការគោរពសិទ្ធិសេរីភាពរបស់កម្មករនិយោជិត ជាអាទិភាពរបស់រាជរដ្ឋាភិបាលកម្ពុជាជានិច្ច រយៈពេល២០ឆ្នាំមកនេះ កម្ពុជាមិនដែលងាកចេញពីគោលនយោបាយនេះនោះទេ

ការថ្លែងបែបនេះរបស់លោករដ្ឋលេខាធិការបែបនេះធ្វើឡើងក្នុងកិច្ចប្រជុំពិគ្រោះយោបល់លើផែនការរួមរបស់គម្រោងរោងចក្រកាន់តែល្អប្រសើរនៅកម្ពុជា (BFC) ដែលបានរៀបចំឡើងនៅសណ្ឋាគារកាំបូឌីយ៉ាណា នាថ្ងៃទី១៧ ខែកុម្ភៈ ឆ្នាំ២០២០ ខណៈមានការរិះគន់ចំពោះការសម្រេចដកផ្នែកខ្លះនៃ EBA ដែលសហភាពអឺរ៉ុបទើបតែធ្វើដាក់កម្ពុជានាពេលថ្មីៗមកនោះ។

លោករដ្ឋលេខាធិការបានបញ្ជាក់ថា កម្ពុជាមិនមែនជាប្រទេសដែលអាក្រក់ដូចដែលគេបានចោទនោះទេ កម្ពុជាតែងតែប្រៀបធៀបខ្លួនឯងជាមួយប្រទេសដទៃផ្សេងទៀត ហើយមានអង្គការអន្តរជាតិខាងការងារ (ILO) គម្រោង BFC និងម្ចាស់ពាណិជ្ជសញ្ញា (Brand) ទាំងអស់ជាសាក្សីថា កម្ពុជាអនុវត្តបានល្អយ៉ាងណាខ្លះក្នុងរយៈពេល២០ឆ្នាំមកនេះ ពាក់ព័ន្ធនឹងលក្ខខណ្ឌការងារ និងសេរីភាពរបស់អង្គការវិជ្ជាជីវៈ។

បើតាមលោក ហេង សួរ នៅពេលអឺរ៉ុបសម្រេចដកផ្នែកខ្លះនៃ EBA វាមិនមែនដោយសារកម្ពុជាមិនបានផ្ដល់លក្ខខណ្ឌដល់ការងារកម្មករនិយោជិត រឺសិទ្ធសេរីភាពទៅឱ្យអង្គការវិជ្ជាជីវៈនោះទេ ប៉ុន្តែវាដោយសារបញ្ហានយោបាយ ដែលប្រទេសមួយចំនួនតម្រូវកម្ពុជាធ្វើតាមគោលនយោបាយការបរទេសរបស់ពួកគេ ដែលជាការអនុវត្តស្ដង់ដាពីរ។ តែទោះជាយ៉ាងណា ពួកគេមិនគួរភ្ជាប់លក្ខខណ្ឌការងារទៅនឹងនយោបាយនោះឡើយ។

លោករដ្ឋលេខាធិការបានបន្តថា «ជនជាតិកម្ពុជាទាមទារយុត្តិធម៌ កម្ពុជាមិនចង់បានលើសគេទេ ប៉ុន្តែសុំឱ្យមានសមភាពក្នុងការសម្រេចចិត្ត ហើយសូមឱ្យមានសុភវិនិច្ឆ័យនូវអ្វីដែលជាការខិតខំរបស់កម្ពុជា»។ លោកបានអះអាងថា កម្ពុជាបានត្រៀមនូវអ្វីដែលជាកញ្ចប់ឆ្លើយតបទៅនឹងផលប៉ះពាល់ណាមួយ ដែលប៉ះពាល់ទៅលើវិស័យពាណិជ្ជកម្មកម្ពុជា ដោយសារតែការសម្រេចចិត្តដោយអយុត្តិធម៌។ ទោះបីជាមាន ឬគ្មាន EBA រាជរដ្ឋាភិបាលកម្ពុជាបានតាំងចិត្តរួចហើយថា ការលើកកម្ពស់លក្ខខណ្ឌការងារ ការគោរពនូវសេរីភាពរបស់កម្មករនិយោជិត វាគឺជាអាទិភាព ដូច្នេះបានជាកម្ពុជាភ្ជាប់ពាណិជ្ជកម្មទៅនឹងលក្ខខណ្ឌការងារ។

រយៈពេល២០ឆ្នាំមកនេះ កម្ពុជាមិនបានងាកចេញពីគោលនយោបាយនេះទេ សូម្បីតែផែនការយុទ្ធសាស្ត្រអភិវឌ្ឍន៍វិស័យការងារ ២០១៩-២០២៣ ក៏កម្ពុជានៅតែបញ្ជាក់យ៉ាងច្បាស់ពីភាពចាំបាច់នៃការធានាលក្ខខណ្ឌការងារ សេរីភាពអង្គការវិជ្ជាជីវៈនៅកម្ពុជា ដើម្បីធានាថាផលិតផលដែលផលិតបាននៅកម្ពុជា គឺជាផលិតផលដែលមានភាពស្អាតស្អំ និងគោរពតាមស្ដង់ដាអន្តរជាតិ ហើយអនុសញ្ញាអន្តរជាតិនានាដែលកម្ពុជាបានផ្ដល់សច្ចាប័ន កម្ពុជានៅតែបន្តពិនិត្យ និងបន្តសហការយ៉ាងជិតស្និទ្ធជាមួយអង្គការ ILO បើទោះបីគេមិនជឿលើកម្ពុជា ក៏គេជឿលើអ្វីដែលជាយន្តការរបស់អង្គការ ILO ដែលកំពុងតែអនុវត្តនៅកម្ពុជានេះស្រាប់៕

ភ្នំពេញ ៖ សម្តេច​តេ​ជោ ហ៊ុន សែន ​បាន​បញ្ជា​ទៅ​ក្រសួង​ប្រៃសណីយ៍ និង​ទូរគមនាគមន៍ឱ្យ​បិទ​រាល់​គណនី Facebook ផ្សាយ​លក់​ផលិតផល​ដែល​បញ្ចេញ​អស់​កេរ្តិ៍ខ្មាស​ ចំណែក​អ្នក​មិន​បញ្ចេញ​កេរ្តិ៍ខ្មាស​មិន​អី​នោះទេ​។

សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ​និង​ជា​អនុប្រធាន​កិត្តិយស «​ក្រុមប្រឹក្សា​ជាតិ​ដើម្បី​ស្ត្រី​» បាន​មានប្រសាសន៍ថា ការ Live បែបនេះ ​នាំឱ្យមាន​ការបំពាន​ផ្លូវភេទ​ស្រី​ក្នុង​សង្គម​នាពេល​បច្ចុប្បន្ន ​ហើយ​អាច​នាំ​ឱ្យ​កើតមាន​ករណី​ចាប់​រំលោភ​ផងដែរ​។

សម្តេច​តេ​ជោ ហ៊ុន សែន ថ្លែងបែបនេះ​ ក្នុងឱកាស​​សម្តេច​ បាន​អញ្ជើញ​ជា​អធិបតី​ក្នុង​កិច្ចប្រជុំ​បូកសរុប​ផ​លទ្ធផល​ការងារ​ឆ្នាំ​២០១៩​ និង​លើក​ផែនការ​សកម្មភាព​ការងារ​ឆ្នាំ​២០២០ ​របស់​ក្រុម​ប្រឹក្សា​ជាតិ​ដើម្បី​ស្ត្រី​ នៅ​វិមាន​សន្តិភាព​ នា​ព្រឹក​ថ្ងៃទី​១៧ ខែកុម្ភៈ ឆ្នាំ​២០២០​នេះ​៕

ខេត្តសៀមរាប ៖ លោក ហង់ ពៅ អគ្គនាយកអាជ្ញាធរជាតិអប្សរាបានលើកឡើងថា ក្រៅពីប្រាសាទដ៏ល្បីលាញ ឧទ្យានអង្គរនៅមានមរតករស់ដែលគេហៅថាជា បេតិកភណ្ឌអរូបីដូចជា ទំនៀមទម្លាប់ ប្រពៃណី ពិធីបុណ្យទាន បន់ស្រន់ សាសនា ព្រមទាំងសិប្បកម្ម និងរបៀបរបបរស់នៅប្រចាំថ្ងៃដែលអ្នកស្រុកនៅតំបន់អង្គរបានប្រកាន់ខ្ជាប់ខ្ជួន និងប្រតិបត្តិតៗគ្នារាប់ជំនាន់មកហើយ។

ក្នុងឱកាសគម្រប់ខួប២៥ឆ្នាំនៃការបង្កើតអាជ្ញាធរជាតិអប្សរា លោក ហង់ ពៅ បន្តថា ទាំងនេះសុទ្ធសឹងជាអ្វីដែលភ្ញៀវទេសចរចង់ឃើញ ចង់ដឹង និងចង់ស្រាវជ្រាវស្វែងយល់អំពីមរតករស់ក្រៅពីប្រាសាទ។ ការរៀបចំភូមិឋាន ផ្ទះ កន្លែងសិប្បកម្មតាមបែបបុរាណ មធ្យោបាយធ្វើដំណើរតាមរទេះគោ សុទ្ធតែជាផលិតផលបន្ថែមទៀតសម្រាប់ភ្ញៀវទេសចរទស្សនា ដែលទទួលបានបទពិសោធន៍ ហើយនាំអារម្មណ៍ភ្ញៀវទាំងនោះឱ្យមើលឃើញអំពីរបៀបរបបនៃការរស់នៅរបស់ប្រជាជនខ្មែរយើងកាលពីសម័យអង្គរ។

លោកបន្តទៀតថា បច្ចុប្បន្នប្រពៃណីមួយចំនួន ដែលអ្នកនៅតំបន់ផ្សេងៗបានបំភ្លេចចោល ឬមិនសូវយកចិត្តទុកដាក់ ហើយអ្នកស្រុកតំបន់អង្គរនៅតែកំពុងបន្តប្រតិបត្តិនៅឡើយ ដូចជា ពិធីកោរជុក ពិធីឡើងអ្នកតា ពិធីហៅទឹកភ្លៀង ពិធីហៅព្រលឹង។ល។ អាជ្ញាធរជាតិអប្សរា ដែលមានភារកិច្ចគ្រប់គ្រងនិងអភិវឌ្ឍន៍រមណីយដ្ឋានអង្គរ កំពុងផ្តោតការយកចិត្តទុកដាក់យ៉ាងខ្លាំងលើទំនៀមទាំងអស់នេះ ដោយធ្វើយ៉ាងណាឱ្យទំនៀមទាំងអស់នេះអាចគង់វង្សតកូនតចៅរហូតទៅ និងអាចទាក់ទាញភ្ញៀវទេសចរបន្ថែមទៀត។

គួរបញ្ជាក់ផងដែរថា តំបន់អង្គរ ឬរមណីយដ្ឋានអង្គរ ដែលត្រូវបានចុះបញ្ជីជាបេតិកភណ្ឌពិភពលោកនេះនាឆ្នាំ១៩៩២ មានផ្ទៃដីសរុប៤០១ គីឡូម៉ែត្រក្រឡា ដែលក្នុងនោះរួមមានទាំងប្រាសាទ បុរាណដ្ឋាន ស្ថានីយបុរាណវិទ្យាចំនួន៩១ បរិស្ថាន និងសហគមន៍មនុស្សផងដែរ៕