ភ្នំពេញ ៖ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានសង្កត់ធ្ងន់ថា ទោះបីមាន ឬគ្មាន EBA ពីសហភាពអឺរ៉ុប ក៏កម្ពុជាបានតាំងចិត្តរួចហើយថា ការលើកកម្ពស់លក្ខខណ្ឌការងារ ការគោរពសិទ្ធិសេរីភាពរបស់កម្មករនិយោជិត ជាអាទិភាពរបស់រាជរដ្ឋាភិបាលកម្ពុជាជានិច្ច រយៈពេល២០ឆ្នាំមកនេះ កម្ពុជាមិនដែលងាកចេញពីគោលនយោបាយនេះនោះទេ

ការថ្លែងបែបនេះរបស់លោករដ្ឋលេខាធិការបែបនេះធ្វើឡើងក្នុងកិច្ចប្រជុំពិគ្រោះយោបល់លើផែនការរួមរបស់គម្រោងរោងចក្រកាន់តែល្អប្រសើរនៅកម្ពុជា (BFC) ដែលបានរៀបចំឡើងនៅសណ្ឋាគារកាំបូឌីយ៉ាណា នាថ្ងៃទី១៧ ខែកុម្ភៈ ឆ្នាំ២០២០ ខណៈមានការរិះគន់ចំពោះការសម្រេចដកផ្នែកខ្លះនៃ EBA ដែលសហភាពអឺរ៉ុបទើបតែធ្វើដាក់កម្ពុជានាពេលថ្មីៗមកនោះ។

លោករដ្ឋលេខាធិការបានបញ្ជាក់ថា កម្ពុជាមិនមែនជាប្រទេសដែលអាក្រក់ដូចដែលគេបានចោទនោះទេ កម្ពុជាតែងតែប្រៀបធៀបខ្លួនឯងជាមួយប្រទេសដទៃផ្សេងទៀត ហើយមានអង្គការអន្តរជាតិខាងការងារ (ILO) គម្រោង BFC និងម្ចាស់ពាណិជ្ជសញ្ញា (Brand) ទាំងអស់ជាសាក្សីថា កម្ពុជាអនុវត្តបានល្អយ៉ាងណាខ្លះក្នុងរយៈពេល២០ឆ្នាំមកនេះ ពាក់ព័ន្ធនឹងលក្ខខណ្ឌការងារ និងសេរីភាពរបស់អង្គការវិជ្ជាជីវៈ។

បើតាមលោក ហេង សួរ នៅពេលអឺរ៉ុបសម្រេចដកផ្នែកខ្លះនៃ EBA វាមិនមែនដោយសារកម្ពុជាមិនបានផ្ដល់លក្ខខណ្ឌដល់ការងារកម្មករនិយោជិត រឺសិទ្ធសេរីភាពទៅឱ្យអង្គការវិជ្ជាជីវៈនោះទេ ប៉ុន្តែវាដោយសារបញ្ហានយោបាយ ដែលប្រទេសមួយចំនួនតម្រូវកម្ពុជាធ្វើតាមគោលនយោបាយការបរទេសរបស់ពួកគេ ដែលជាការអនុវត្តស្ដង់ដាពីរ។ តែទោះជាយ៉ាងណា ពួកគេមិនគួរភ្ជាប់លក្ខខណ្ឌការងារទៅនឹងនយោបាយនោះឡើយ។

លោករដ្ឋលេខាធិការបានបន្តថា «ជនជាតិកម្ពុជាទាមទារយុត្តិធម៌ កម្ពុជាមិនចង់បានលើសគេទេ ប៉ុន្តែសុំឱ្យមានសមភាពក្នុងការសម្រេចចិត្ត ហើយសូមឱ្យមានសុភវិនិច្ឆ័យនូវអ្វីដែលជាការខិតខំរបស់កម្ពុជា»។ លោកបានអះអាងថា កម្ពុជាបានត្រៀមនូវអ្វីដែលជាកញ្ចប់ឆ្លើយតបទៅនឹងផលប៉ះពាល់ណាមួយ ដែលប៉ះពាល់ទៅលើវិស័យពាណិជ្ជកម្មកម្ពុជា ដោយសារតែការសម្រេចចិត្តដោយអយុត្តិធម៌។ ទោះបីជាមាន ឬគ្មាន EBA រាជរដ្ឋាភិបាលកម្ពុជាបានតាំងចិត្តរួចហើយថា ការលើកកម្ពស់លក្ខខណ្ឌការងារ ការគោរពនូវសេរីភាពរបស់កម្មករនិយោជិត វាគឺជាអាទិភាព ដូច្នេះបានជាកម្ពុជាភ្ជាប់ពាណិជ្ជកម្មទៅនឹងលក្ខខណ្ឌការងារ។

រយៈពេល២០ឆ្នាំមកនេះ កម្ពុជាមិនបានងាកចេញពីគោលនយោបាយនេះទេ សូម្បីតែផែនការយុទ្ធសាស្ត្រអភិវឌ្ឍន៍វិស័យការងារ ២០១៩-២០២៣ ក៏កម្ពុជានៅតែបញ្ជាក់យ៉ាងច្បាស់ពីភាពចាំបាច់នៃការធានាលក្ខខណ្ឌការងារ សេរីភាពអង្គការវិជ្ជាជីវៈនៅកម្ពុជា ដើម្បីធានាថាផលិតផលដែលផលិតបាននៅកម្ពុជា គឺជាផលិតផលដែលមានភាពស្អាតស្អំ និងគោរពតាមស្ដង់ដាអន្តរជាតិ ហើយអនុសញ្ញាអន្តរជាតិនានាដែលកម្ពុជាបានផ្ដល់សច្ចាប័ន កម្ពុជានៅតែបន្តពិនិត្យ និងបន្តសហការយ៉ាងជិតស្និទ្ធជាមួយអង្គការ ILO បើទោះបីគេមិនជឿលើកម្ពុជា ក៏គេជឿលើអ្វីដែលជាយន្តការរបស់អង្គការ ILO ដែលកំពុងតែអនុវត្តនៅកម្ពុជានេះស្រាប់៕

ភ្នំពេញ ៖ សម្តេច​តេ​ជោ ហ៊ុន សែន ​បាន​បញ្ជា​ទៅ​ក្រសួង​ប្រៃសណីយ៍ និង​ទូរគមនាគមន៍ឱ្យ​បិទ​រាល់​គណនី Facebook ផ្សាយ​លក់​ផលិតផល​ដែល​បញ្ចេញ​អស់​កេរ្តិ៍ខ្មាស​ ចំណែក​អ្នក​មិន​បញ្ចេញ​កេរ្តិ៍ខ្មាស​មិន​អី​នោះទេ​។

សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ​និង​ជា​អនុប្រធាន​កិត្តិយស «​ក្រុមប្រឹក្សា​ជាតិ​ដើម្បី​ស្ត្រី​» បាន​មានប្រសាសន៍ថា ការ Live បែបនេះ ​នាំឱ្យមាន​ការបំពាន​ផ្លូវភេទ​ស្រី​ក្នុង​សង្គម​នាពេល​បច្ចុប្បន្ន ​ហើយ​អាច​នាំ​ឱ្យ​កើតមាន​ករណី​ចាប់​រំលោភ​ផងដែរ​។

សម្តេច​តេ​ជោ ហ៊ុន សែន ថ្លែងបែបនេះ​ ក្នុងឱកាស​​សម្តេច​ បាន​អញ្ជើញ​ជា​អធិបតី​ក្នុង​កិច្ចប្រជុំ​បូកសរុប​ផ​លទ្ធផល​ការងារ​ឆ្នាំ​២០១៩​ និង​លើក​ផែនការ​សកម្មភាព​ការងារ​ឆ្នាំ​២០២០ ​របស់​ក្រុម​ប្រឹក្សា​ជាតិ​ដើម្បី​ស្ត្រី​ នៅ​វិមាន​សន្តិភាព​ នា​ព្រឹក​ថ្ងៃទី​១៧ ខែកុម្ភៈ ឆ្នាំ​២០២០​នេះ​៕

ខេត្តសៀមរាប ៖ លោក ហង់ ពៅ អគ្គនាយកអាជ្ញាធរជាតិអប្សរាបានលើកឡើងថា ក្រៅពីប្រាសាទដ៏ល្បីលាញ ឧទ្យានអង្គរនៅមានមរតករស់ដែលគេហៅថាជា បេតិកភណ្ឌអរូបីដូចជា ទំនៀមទម្លាប់ ប្រពៃណី ពិធីបុណ្យទាន បន់ស្រន់ សាសនា ព្រមទាំងសិប្បកម្ម និងរបៀបរបបរស់នៅប្រចាំថ្ងៃដែលអ្នកស្រុកនៅតំបន់អង្គរបានប្រកាន់ខ្ជាប់ខ្ជួន និងប្រតិបត្តិតៗគ្នារាប់ជំនាន់មកហើយ។

ក្នុងឱកាសគម្រប់ខួប២៥ឆ្នាំនៃការបង្កើតអាជ្ញាធរជាតិអប្សរា លោក ហង់ ពៅ បន្តថា ទាំងនេះសុទ្ធសឹងជាអ្វីដែលភ្ញៀវទេសចរចង់ឃើញ ចង់ដឹង និងចង់ស្រាវជ្រាវស្វែងយល់អំពីមរតករស់ក្រៅពីប្រាសាទ។ ការរៀបចំភូមិឋាន ផ្ទះ កន្លែងសិប្បកម្មតាមបែបបុរាណ មធ្យោបាយធ្វើដំណើរតាមរទេះគោ សុទ្ធតែជាផលិតផលបន្ថែមទៀតសម្រាប់ភ្ញៀវទេសចរទស្សនា ដែលទទួលបានបទពិសោធន៍ ហើយនាំអារម្មណ៍ភ្ញៀវទាំងនោះឱ្យមើលឃើញអំពីរបៀបរបបនៃការរស់នៅរបស់ប្រជាជនខ្មែរយើងកាលពីសម័យអង្គរ។

លោកបន្តទៀតថា បច្ចុប្បន្នប្រពៃណីមួយចំនួន ដែលអ្នកនៅតំបន់ផ្សេងៗបានបំភ្លេចចោល ឬមិនសូវយកចិត្តទុកដាក់ ហើយអ្នកស្រុកតំបន់អង្គរនៅតែកំពុងបន្តប្រតិបត្តិនៅឡើយ ដូចជា ពិធីកោរជុក ពិធីឡើងអ្នកតា ពិធីហៅទឹកភ្លៀង ពិធីហៅព្រលឹង។ល។ អាជ្ញាធរជាតិអប្សរា ដែលមានភារកិច្ចគ្រប់គ្រងនិងអភិវឌ្ឍន៍រមណីយដ្ឋានអង្គរ កំពុងផ្តោតការយកចិត្តទុកដាក់យ៉ាងខ្លាំងលើទំនៀមទាំងអស់នេះ ដោយធ្វើយ៉ាងណាឱ្យទំនៀមទាំងអស់នេះអាចគង់វង្សតកូនតចៅរហូតទៅ និងអាចទាក់ទាញភ្ញៀវទេសចរបន្ថែមទៀត។

គួរបញ្ជាក់ផងដែរថា តំបន់អង្គរ ឬរមណីយដ្ឋានអង្គរ ដែលត្រូវបានចុះបញ្ជីជាបេតិកភណ្ឌពិភពលោកនេះនាឆ្នាំ១៩៩២ មានផ្ទៃដីសរុប៤០១ គីឡូម៉ែត្រក្រឡា ដែលក្នុងនោះរួមមានទាំងប្រាសាទ បុរាណដ្ឋាន ស្ថានីយបុរាណវិទ្យាចំនួន៩១ បរិស្ថាន និងសហគមន៍មនុស្សផងដែរ៕

ភ្នំពេញ ៖ នៅព្រឹកថ្ងៃចន្ទ ៩រោច ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៧ ខែកុម្ភៈ ឆ្នាំ២០២០នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំបូកសរុបលទ្ធផលការងារឆ្នាំ២០១៩ និងលើកទិសដៅការងារសម្រាប់ឆ្នាំ២០២០ របស់ «ក្រុមប្រឹក្សាជាតិកម្ពុជា ដើម្បីស្ត្រី» ដែលធ្វើឡើងនៅវិមានសន្តិភាព។

«ក្រុមប្រឹក្សាជាតិកម្ពុជា ដើម្បីស្ត្រី» មានព្រះមហាក្សត្រី នរោត្តម មុនិនាថ សីហនុ ជាព្រះប្រធានកិត្តិយស និងមានសម្តេចតេជោ ហ៊ុន សែន ជាអនុប្រធានកិត្តិយស។ ចាប់តាំងពីឆ្នាំ២០០៦មក ថ្នាក់ដឹកនាំនៃ «ក្រុមប្រឹក្សាជាតិកម្ពុជា ដើម្បីស្រ្តី» ដែលមានលោកស្រី អ៉ឹង កន្ថាផាវី រដ្ឋមន្ត្រីក្រសួងកិច្ចការនារីជាប្រធាន តែងតែបើកកិច្ចប្រជុំជាទៀងទាត់រៀងរាល់មួយឆ្នាំម្តង ក្រោមអធិបតីភាពសម្តេចតេជោ ហ៊ុន សែន។ កិច្ចប្រជុំធ្វើឡើងដើម្បីតាមដាន និងត្រួតពិនិត្យរាល់សកម្មភាពការងារ និងការអនុវត្តរាល់អនុសាសន៍លើការងារមួយចំនួនរបស់ «ក្រុមប្រឹក្សាជាតិកម្ពុជា ដើម្បីស្ត្រី» ក្នុងការចូលរួមចំណែកជាមួយរាជរដ្ឋាភិបាល ដើម្បីលើកកម្ពស់សិទ្ធិសេរីភាពឋានៈតួនាទី ពិសេសការចូលរួមដោះស្រាយរាល់ការងារជាអាទិភាពនានារបស់ស្ត្រី៕

ខេត្តកំពង់ចាម​ ៖ ដើម្បី​ជាការលើក​ទឹកចិត្ត​​ដល់​ក្មួយៗ​កុមារ​កំព្រា​​ឲ្យ​មាន​ការ​ខិតខំ​រៀនសូត្រ​ ក្រេបជញ្ជក់​យក​ចំណេះដឹង​ ដើម្បី​យក​ទៅ​កសាង​អនាគត​ខ្លួន​ឯងផងនោះ​ នៅ​ថ្ងៃ​ទិវា​នៃ​ក្ដី​ស្រលាញ់​១៤​ កុម្ភៈ​ ឆ្នាំ​២០២០នេះ​ អភិបាល​នៃ​គណៈ​អភិបាល​ខេត្តកំពង់ចាម​ លោក​​ អ៊ុន​ ចាន់ដា​ បាន​​ផ្កល់​អាហារ​យ៉ាង​ឈ្ងុយឆ្ងាញ់​សម្រាប់ក្មួយៗ​ដែល​ជា​កុមារ​កំព្រា​ នៃ​មជ្ឈមណ្ឌល​កុមារ​កំព្រា​ខេត្ត​កំពង់ចាម​ ព្រមទាំង​បាន​សន្យា​ថា​នឹង​ផ្តល់​អាហារ​ពិសេស​នៅ​ថ្ងៃ​៨មីនា​ និង​ថ្ងៃ​ជិត​ចូល​ឆ្នាំថ្មី​ប្រពៃណី​ជាតិ​ខ្មែរ​ ជា​បន្តបន្ទាប់នាថ្ងៃខាងមុខ​ផង​ដែរ​​។

លោក ​នៅ​ វណ្ណៈ​ ប្រធាន​មជ្ឈមណ្ឌល​កុមារ​កំព្រា​ខេត្ត​កំពង់ចាម​ បាន​ឲ្យដឹងថា​ មជ្ឈមណ្ឌលនេះ ស្ថិតក្នុងការគ្រប់គ្រងដោយមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ហើយកន្លងមក ទាំងអាជ្ញាធរខេត្ត ពិសេសរាជរដ្ឋាភិបាល បានយកចិត្តទុកដាក់ក្នុងការលើកកម្ពស់សុខមាលភាពកុមារកំព្រាគ្រប់ទីកន្លែង​ បូករួមទាំងនៅក្នុងខេត្តកំពង់ចាមនេះផងដែរ។​
ជាមួយ​គ្នា​នោះ​មជ្ឈមណ្ឌលកុមារកំព្រាខេត្តកំពង់ចាម​ មាន​កុមារ​ក្នុង​មណ្ឌល​សរុប​៧៣នាក់​ ក្នុង​នោះ​កុមារ​រៀនខាងក្រៅ១០នាក់​ ផ្នែក​អគ្គិសនី​៣នាក់​ ផ្នែក​លេខាធិការ​៥នាក់​ និង​ផ្នែក​រីសីប២នាក់​ ផង​ដែរ។ ដោយ​ឡែក​ មន្ត្រីក្របខណ្ឌ​ និងបុគ្គលិកកិច្ចសន្យា១១នាក់ ដែល​កំពុងអនុវត្តផែនការសកម្មភាពប្រចាំឆ្នាំរបស់មណ្ឌល លទ្ធផលសម្រេចបាន​៖​ សេវាគាំទ្រការបង្កើនប្រសិទ្ធភាពសេវាសុខុមាលភាពសង្គម​ ប្រជុំមេដោះ០២សប្តាហ៏ម្តង និង១ខែម្តង​ ក្នុងការមើលថែទាំកុមារ ម្ហូបអាហារ សំលៀកបំពាក់ អនាម័យ និងតាមដានការសិក្សារបស់កូនៗតាមបន្ទប់​។ ប្រជុំកុមារ ១ខែម្តង អំពីវិន័យ ការគោរពបទបញ្ជាផ្ទៃក្នុងមណ្ឌល ស្តាប់ដំបូន្មានមេដោះ គោរពចាស់ទុំ ចេះស្រលាញ់គ្នា ចេះជួយគ្នាទៅវិញទៅមក ជាសពិសេសជំរុញការសិក្សាឱ្យកុមារខិតខំរៀនសូត្រ​ដើម្បី​ថ្ងៃអនាគត​។ ទំនេរ​ពី​ការ​សិក្សា​ មេដោះបាននាំកុមារដាំដំណាំ​ បន្លែ​ស្ពៃក្ដោប​ ផ្កា​ខាត់ណា​ ស្ពៃខៀវ​ ត្រកួន​ពោត​ និង​ដំឡូង​ ព្រមទាំង​ចិញ្ចឹមមាន់ ទា និងត្រី​ ផង​ដែរ​៕ ដោយ ៖ ស៊ាន ច័ន្ទដា

ភ្នំពេញ ៖ ក្រសួងពាណិជ្ជកម្ម នៃព្រះរាជាណាចក្រកម្ពុជា បាន​ចេញសេចក្ដីជូនដំណឹងដល់​សាធារណជន អំពី​មុខ​ទំនិញ​ចំនួន៤០ (សែសិប) មុខនៃបន្ទាត់ពន្ធ ៦ (ប្រាំមួយ) ខ្ទង់ ដែល​ផលិត​នៅ​កម្ពុជា​ហើយ​មាន​សមត្ថភាព​ប្រកួតប្រជែង ដែល​អ្នក​នាំ​ចេញ​កម្ពុជា​មាន​លទ្ធភាព​អាច​បង់​ពន្ធនាំចេញ ទៅ​កាន់​ទីផ្សារ​អឺរ៉ុប។

ទន្ទឹមនោះ នៅសល់មុខទំនិញប្រមាណជាង ៩ពាន់ (ប្រាំបួនពាន់) មុខទៀត នៅ​តែទទួល បាន​ភាព​អនុគ្រោះ​ពី​សហភាព​អឺរ៉ុប​ក្រោម​ប្រព័ន្ធ​គ្រប់​មុខ​ទំនិញ​លើក​លែង​សព្វាវុធ (EBA) ក្នុង​គោល​បំណង​បន្ត ជួយដល់កម្ពុជាក្នុងការធ្វើពិពិធកម្មសេដ្ឋកិច្ច រក្សា​ការ​ងារ និងប្រភពចំណូលជូនកម្មករ-កម្មការិនី និងក្រុមគ្រួសារ។

សេចក្ដីប្រកាសនេះ​បាន​ចេញ​នៅ​ថ្ងៃទី១៣ ខែកុម្ភៈ ឆ្នាំ២០២០ ថា​ក្រសួង​ពាណិជ្ជកម្ម​បាន​ទទួល​លិខិត​លេខ Ares (2020) 868510 ចុះ​ថ្ងៃទី១២ ខែកុម្ភៈ ឆ្នាំ២០២០ របស់គណៈកម្មការអឺរ៉ុប (European Commission) តាម​រយៈ​ស្ថាន​ទូត​សហ​ភាពអឺរ៉ុបប្រចាំ នៅព្រះរាជាណាចក្រកម្ពុជា អំពី​នីតិវិធី​នៃ​ការ​ព្យួរ​ជា​បណ្ដោះ​អាសន្ន​នូវ​សម្បទាន​ពន្ធ ចំពោះមុខទំនិញមួយចំនួន ក្រោម​ក្របខ័ណ្ឌ​អនុ​គ្រោះ​ពន្ធ «គ្រប់​មុខ​ទំនិញ​លើក​លែង​សព្វាវុធ (EBA)»។

តាមនីតិវិធីនៃបទប្បញ្ញត្តិស្ដីពីក្របខ័ណ្ឌអនុគ្រោះពន្ធទូទៅរបស់សហភាពអឺរ៉ុប មុខ​ទំនិញ​ដែល​បាន​ស្នើ​សុំ​ព្យួរ សម្បទានពន្ធជាបណ្ដោះអាសន្នចំនួន ៤០ មុខខាងលើ នឹងត្រូវដាក់ជូនក្រុមប្រឹក្សាអឺរ៉ុប និង​សភា​អឺរ៉ុប ពិនិត្យលើ ទម្រង់ និងគតិច្បាប់ ដែលត្រូវប្រើពេលវេលាប្រមាណ ២ (ពីរ)​ខែ​ជា​បន្ត​​ទៀត ចាប់​ពី​ថ្ងៃទី១២ ខែកុម្ភៈ ឆ្នាំ២០២០។ ក្នុងន័យនេះ សភា​អឺរ៉ុប​មាន​សិទ្ធិ​ជំទាស់​ទៅ​នឹង​សេចក្ដី​ស្នើ​ច្បាប់​សុំព្យួរ​ជាបណ្ដោះអាសន្នរបស់គណៈកម្មការអឺរ៉ុប។ ក្នុងករណីចាំបាច់ សភា​អឺរ៉ុប​អាច​ប្រើ​ពេល​វេលា ២ (ពីរ)ខែបន្ថែមទៀត ដើម្បីធ្វើការពិចារណា។

តាមការពិគ្រោះយោបល់ជាមួយតំណាងរោងចក្រដែលកំពុងផលិតនិងនាំចេញផលិតផលទាំង ៤០​មុខ ទៅ កាន់ទីផ្សារអឺរ៉ុប ឃើញថា បើមានការសម្រេចឲ្យព្យួរសម្បទានពន្ធជាបណ្ដោះ​អាសន្ន​នៅ​ចុង​ឆ្នាំ២០២០ មែននោះ បណ្ដារោងចក្រទាំងនោះ នៅតែមានលទ្ធភាពបន្តផលិតកម្មនៅកម្ពុជា ដើម្បី​នាំ​ចេញ​ទៅ​កាន់ទីផ្សារអឺរ៉ុបដដែល ដោយសារ រាជរដ្ឋាភិបាលបាន និង​កំពុង​អនុវត្ត​នូវ​កំណែ​ទម្រង់​មុត​ស្រួចជាកញ្ចប់ ដែលបានដាក់ចេញក្នុងវេទិកា រវាងរាជរដ្ឋាភិបាល និងវិស័យឯកជន កាលពីថ្ងៃទី២៩ ខែមីនា ឆ្នាំ២០១៩៕

ខេត្តសៀមរាប ៖ អស់រយៈពេលបីថ្ងៃ ចាប់ពីថ្ងៃទី១១ ដល់ថ្ងៃទី១៣ ខែកុម្ភៈ ឆ្នាំ២០២០ ដែលសវនករស្ថាប័នធានាគុណភាពជប៉ុន (JQA) ធ្វើសវនកម្មផ្ទៃក្រៅតាមដានការងារបរិស្ថាន-អង្គរ ដើម្បីពិនិត្យវាយតម្លៃតាមនាយកដ្ឋាន អង្គភាពចំណុះនៃអាជ្ញាធរជាតិអប្សរា តាមប្រព័ន្ធគ្រប់គ្រងបរិស្ថានរបស់អាជ្ញាធរជាតិអប្សរា ថាបានអនុលោមតាមចំណុចទាមទារនៃស្តង់ដារ ISO14001:2015 ដែរឬទេនោះ ជាលទ្ធផលពុំមានឃើញភាពមិនអនុលោមទេ។

នេះបើតាមលើកឡើងរបស់លោក ម៉ាម៉ូរុ យ៉ាម៉ាដា (Mamoru YAMADA) តំណាងស្ថាប័ន JQA ក្នុងឱកាសបិទកម្មវិធីសវនកម្មផ្ទៃក្រៅតាមដានការងារបរិស្ថាន-អង្គរ នៅទីស្នាក់ការនៃអាជ្ញាធរជាតិអប្សរា កាលពីថ្ងៃទី១៣ ខែកុម្ភៈ ឆ្នាំ២០២០។

លោក ម៉ាម៉ូរុ យ៉ាម៉ាដា បន្តថា ប្រព័ន្ធគ្រប់គ្រងបរិស្ថានអង្គររបស់អាជ្ញាធរជាតិអប្សរានៅតែបន្តត្រឹមត្រូវតាមចំណុចដែលទាមទារ។ ប៉ុន្តែលោកបានផ្តល់អនុសាសន៍៤ចំណុចសម្រាប់កែលម្អ ដូចជាទំនាក់ទំនងផ្ទៃក្នុង ផ្ទៃក្រៅការកំណត់គោលដៅការងារបរិស្ថាន និងគ្រប់គ្រងកំណត់ត្រានៃការកត់ត្រា ដើម្បីបង្កើនប្រសិទ្ធិភាពប្រើប្រាស់ ISO14001:2015។

លោក យិត ចាន់ដារដ្ឋ អគ្គនាយករងនៃអាជ្ញាធរជាតិអប្សរា មានប្រសាសន៍ថា លទ្ធផលទាំងនេះបង្ហាញឱ្យឃើញពីការខិតខំ និងការចូលរួមរបស់មន្រ្តី-បុគ្គលិកជំរុញបរិស្ថាននៅតាមនាយកដ្ឋាននីមួយៗ រួមទាំងថ្នាក់ដឹកនាំគ្រប់ជាន់ថ្នាក់ បានយកចិត្តទុកដាក់អនុវត្តធ្វើយ៉ាងណាឆ្លើយតបនូវលក្ខខណ្ឌនានាដើម្បីទទួលបានវិញ្ញាប័នបត្រ ISO14001:2015។

លោកបានបញ្ជាក់ថា ករណីនេះដូចជាវិញ្ញាសារប្រឡងមួយ កម្រនឹងមានភាពឥតខ្ចោះណាស់ តែងមានកំហុសមួយចំនួន តែវាមិនធ្ងន់ធ្ងរដែលមិនអាចកែសម្រួលបានទេ យើងត្រូវទទួលស្គាល់កំហុស ដើម្បីដឹងនូវចំណុចខ្វះខាតរបស់ខ្លួន។ លោកក៏បានថ្លែងអំណរគុណចំពោះសវនករស្ថាប័នធានាគុណភាពជប៉ុន (JQA) លោក ម៉ាម៉ូរុ យ៉ាម៉ាដា ដែលបានខិតខំបំពេញការងារនឹងលះបង់ពេលវេលាមកវាយតម្លៃប្រកបដោយវិជ្ជាជីវៈនិងសុក្រិតភាព ឆ្លុះបញ្ចាំងការពិតជាក់ស្តែង ដែលអាជ្ញាធរជាតិអប្សរាបានអនុវត្តទៅតាមគោលនយោបាយរបស់ស្ថាប័នធានាគុណភាពជប៉ុន(JQA)៕

ខេត្តព្រះសីហនុ ៖ បន្ទាប់ពីអនុញ្ញាតឲ្យនាវាទេសចរណ៍ដ៏ធំមួយរបស់សហរដ្ឋអាមេរិក ចូលសំចតនៅក្នុងកំពង់ផែ ខេត្តព្រះសីហនុ និងសម្រួលគ្រប់កិច្ចការពាក់ព័ន្ធជូននោះ ប្រមុខនៃរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសអនុញ្ញាតឲ្យអ្នកដំណើរ ក្នុងនាវាជាង២,០០០នាក់ ដើរលេងកម្សាន្ដនៅក្នុងប្រទេសកម្ពុជា ដោយគ្មានការភ័យខ្លាចអ្វីទាំងអស់។

ក្នុងឱកាសអញ្ជើញជួបស្វាគមន៍ដោយផ្ទាល់ជាមួយអ្នកដំណើរចាកចេញពីនាវាទេសចរណ៍ Westerdam នៅឯកំពង់ផែក្រុងព្រះសីហនុ ព្រមទាំងបានជូនផ្កា ដល់អ្នកទេសចរ នៅព្រឹកថ្ងៃទី១៤ ខែកុម្ភៈ ឆ្នាំ២០២០នេះ សម្ដេចតេជោ ហ៊ុន សែន ក៏ប្រកាសមិនឲ្យមានការរើសអើងភ្ញៀវទេសច ដែលចេញពីនាវានេះទេ មិនតែនៅខេត្តព្រះសីហនុ ឬនៅទីណានោះឡើយ។

សម្ដេចតេជោ ហ៊ុន សែន បានមានប្រសាសន៍ទៀតថា សម្ដេចបានណែនាំឲ្យត្រៀមលក្ខណៈរួចរាល់ហើយ ដើម្បីសម្រួលដល់ការធ្វើដំណើររបស់អ្នកនៅលើនាវា ទៅតាមកោះនានានៅក្នុងខេត្តព្រះសីហនុ ប្រសិនបើអ្នកទាំងអស់នោះត្រូវការ ខណៈដែលយន្ដហោះចំនួន៤គ្រឿង របស់ក្រុមហ៊ុនអាកាសចរណ៍កម្ពុជាអង្គរអ៊ែរ ក៏ត្រៀមដើម្បីដឹកមកអាកាសយាន្ដដ្ឋានអន្ដរជាតិភ្នំពេញផងដែរ។

សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ថ្ងៃនេះខ្ញុំបើកឱកាសសម្រាប់អ្នកនៅលើនាវាទាំងអស់ អាចចាកចេញទៅធ្វើដំណើរកម្សាន្ដ នៅក្នុងខេត្តព្រះសីហនុ ហើយបើសិនមានបំណងទៅទស្សនកិច្ច នៅខេត្តសៀមរាប ទីនោះយើងនឹងបង្កលក្ខណៈងាយស្រួលមានក្រុមហ៊ុន អាកាសចរណ៍កម្ពុជាអង្គរអ៊ែរ៤គ្រឿង ដែលបានត្រៀមរៀបចំសម្រាប់ការជួយដឹកជញ្ជូន គឺផ្ដល់ឱកាសសម្រាប់អ្នកដែលនៅនាវាដើម្បីចុះទៅងូតទឹកសមុទ្រ និងកន្លែងនានាដែលលោកតំណាងសហរដ្ឋអាមេរិកបានលើកសំណើមិញ ខ្ញុំបានឆ្លើយតបរួចហើយអនុញ្ញាត ឲ្យពួកគាត់បានចុះទៅលេងកម្សាន្ដ»។

បន្ថែមពីនេះ សម្ដេចតេជោនាយករដ្ឋមន្ដ្រី ក៏បានផ្ដាំផ្ញើដល់ប្រជាពលរដ្ឋកម្ពុជា ពិសេសអ្នកបម្រើការងារនៅតាមសណ្ឋាគារ ភោជនីយដ្ឋាននៅក្នុងខេត្តព្រះសីហនុ មិនត្រូវរើសអើង និងមិនត្រូវភ័យខ្លាចអំពីរឿងនេះទេ បើសិនជាមានការឆ្លងណាមួយ គឺឆ្លងចំពោះសម្ដេចតែម្ដង។

ប្រមុខនៃរាជរដ្ឋាភិបាលកម្ពុជា បានបង្ហាញនូវក្ដីសង្ឃឹមយ៉ាងមុតមាំថា ប្រជាពលរដ្ឋកម្ពុជា នឹងយកការទទួលខុសត្រូវមួយក្នុងឋានៈជាអ្នកដែលបានចូលរួមចំណែក ដើម្បីលើកស្ទូយដល់សិទ្ធិរស់រានមានជីវិត សិទ្ធិដើរហើរដោយសេរី និងសិទ្ធិមិនត្រូវបានគេរើសអើង ហើយសម្រាប់ពីព្រលានយន្ដហោះកងកេង ទៅកាន់ព្រលានយន្ដហោះភ្នំពេញ បានរៀបចំនៅទីកន្លែងនោះយ៉ាងល្អហើយដែរ ដូច្នេះសូមកុំមានការភ័យខ្លាចអំពីការដែលត្រូវឆ្លងជំងឺនេះ ឬជំងឺនោះ។

យោងតាមបញ្ជីអ្នកដំណើរបង្ហាញឲ្យឃើញថា នាវាទេសចរណ៍ខ្នាតយក្សនេះផ្ទុកអ្នកទេសចរណ៍ចំនួន ៤១ជាតិសាសន៍ ក្នុងនោះជនជាតិអាមេរិកច្រើនជាងគេ មានចំនួនរហូតដល់៦៥១នាក់ ជនជាតិកាណាដា២៧១នាក់ អង់គ្លេស១២៧នាក់ ជាតិសាសន៍ដទៃជាបន្តបន្ទាប់ ក្នុងនោះមានជនជាតិខ្មែរដែលចូលសញ្ជាតិកាណាដា ចំនួន៥នាក់ផងដែរ៕

ភ្នំពេញ ៖ អភិបាលរាជធានីភ្នំពេញលោក ឃួង ស្រេង អមដំណើរដោយអភិបាលរង លោក កើត ឆែ និងលោក មាន ចាន់យ៉ាដា ព្រមទាំងអភិបាលខណ្ឌពោធិ៍សែនជ័យ និងមន្ដ្រីពាក់ព័ន្ធមួយចំនួនទៀតនៅព្រឹកថ្ងៃទី១៤ ខែកុម្ភៈ ឆ្នាំ២០២០នេះ បានធ្វើដំណើរទៅកាន់ព្រលានយន្ដហោះអន្ដរជាតិភ្នំពេញដើម្បីទទួលស្វាគមន៍ និងជូនដំណើរក្រុមភ្ញៀវទេសចរទាំង ១៤១នាក់ នៅលើកប៉ាល់ Westerdam ដែលជាក្រុមជើងទី២។

សូមបញ្ជាក់ថា ក្រុមភ្ញៀវទេសចរនៅលើនាវា Westerdam ចំនួន១១៩នាក់ ជាក្រុមជើងទី១ បានធ្វើដំណើរតាមយន្ដហោះត្រឡប់ទៅកាន់ប្រទេសរបស់ពួកគេវិញ នៅវេលាថ្ងៃត្រង់ទី១៤ ខែកុម្ភៈ ឆ្នាំ២០២០នេះ ពេលមកដល់ព្រលានយន្តហោះអន្តរជាតិភ្នំពេញ នៅវេលាម៉ោង ៩៖២០នាទីព្រឹកមិញ ហើយនៅរសៀលថ្ងៃដដែលនេះ ក្រុមទី២ ដែលមានជាង១០០នាក់ផងដែរនោះ ក៏បានធ្វើដំណើរចេញពីខេត្តព្រះសីហនុ និងបន្ដចាកចេញតាមព្រលានយន្ដហោះអន្ដរជាតិភ្នំពេញ ឆ្ពោះទៅកាន់ទឹកដីកំណើតរបស់ពួកគេវិញ៕