ដោយ ៖ អ. សុផល

ខេត្តកំពង់ចាម ៖ ទារិកាអាយុត្រឹមតែ១៧ខែ ទើបតែចេះដើរ បានស្លាប់នៅអាងទឹកក្នុងបន្ទប់ទឹកផ្ទះឪពុកម្តាយរបស់ខ្លួន ក្នុងខណៈឪពុកម្តាយរវល់ធ្វើការងារភ្លេចខ្លួន។ ហេតុការណ៍នេះ បានកើតឡើងនៅថ្ងៃទី២៦ ខែធ្នូ ឆ្នាំ២០១៩ វេលាម៉ោងប្រហែល១៦៖០០នាទីនៅចំណុចក្នុងអាងបន្ទប់ទឹក នៅភូមិអង្គរបានទី៤ ឃុំអង្គរបាន ស្រុកកងមាស ខេត្តកំពង់ចាម។

ប៉ូលិសបានអោយដឹងថាមជនរងគ្រោះឈ្មោះធារិន្ទអុីចិនភេទស្រីអាយុ១៧ ខែនៅភូមិអង្គរបានទី៤ឃុំអង្គរបានស្រុកកងមាស-ខេត្តកំពង់ចាម មានឪពុកឈ្មោះចាំ ធារិន្ទ ម្តាយឈ្មោះ នឿនសុខអឿននៅភូមិខាងលើ។ប៉ូលិសបានអោយដឹងថានៅពេលកើតហេតុអាណាព្យាបាលរវល់ធ្វើការងារភ្លេចខ្លួន ខណៈក្មេងរងគ្រោះដើរទៅងូតទឹកនៅកន្លែងកើតហេតុតែម្នាក់ឯង បណ្តាលអោយលង់ស្លាប់។

ក្រោយពីទទួលពត៌មាននេះភ្លាម សមត្ថកិច្ចបានបង្កើត គណៈកម្មការចំរុះត្រួតពិនិត្យទៅលើសពឃើញថា-ផ្នែកក្បាល ដងខ្លួន និងអវៈយវៈពុំមានស្នាកស្នាមអ្វីឡើយ ហើយពុំមានពាក់ព័ន្ធបទល្មើសព្រហ្មទណ្ឌទេ។ ក្រោយពីបានពិនិត្យសាសពរួច គណៈកម្មការបានប្រគល់សពទៅអោយក្រុមគ្រួសារធ្វើបុណ្យតាមគន្លងប្រពៃណី៕

ដោយ ៖ អ.សុផល

ខេត្តកំពង់ចាម ៖ យ៉ាងហោចណាស់មានមនុស្សប្រុសស្រី ក្មេងចាស់ ចំនួន ៥នាក់ បានរងរបួសធ្ងន់ ដោយសាររថយន្តថយចុះច្រាំងទន្លេហើយច្រឡំជាន់ហ្គែរស្មានថាជាហ្វ្រាំង ធ្វើអោយរថយន្តថយលឿនជ្រុលទៅក្រោយបុកផ្ទប់ជញ្ជាំងរបាំងទូកដរប៉ះចំអ្នកដំណើរ។ គ្រោះថ្នាក់នេះបានកើតឡើងនៅវេលាម៉ោង ១៧ថ្ងៃទី២៦ ខែធ្នូ ឆ្នាំ២០១៩ ចំណុចច្រាំងទន្លេកំពង់ចម្លង ព្រែកពោធិ ឃុំព្រែកពោធិ ស្រុកស្រីសន្ធរ ខេត្តកំពង់ចាម។

តាមប្រភពពត៌មានពីកន្លែងកើតហេតុបានអោយដឹងថា នៅមុនកើតហេតុឝេឃើញទូកដរដឹកចម្លងអ្នកដំណើរ រួមជាមួយម៉ូតូមួយចំនួន និងរថយន្តមួយគ្រឿង បានចេញពីកំពង់ចម្លងស្វាយស្រណោះ មកកំពង់ចម្លងព្រែកពោធិ ស្រុកស្រីសន្ធរ ខេត្តកំពង់ចាម។ ប្រភពដដែលបានបន្តថា នៅពេលទូកចម្លងខាងលើ មកដល់កំពង់ចម្លងព្រែកពោធិ ត្រើយម្ខាងទៀត គេឃើញអ្នកដំណើរ និងម៉ូតូខ្លះបានដើរ និងជិះឡើងច្រាំងធ្វើដំណើរទៅកាន់គោលដៅរៀងៗខ្លួន។ ក្នុងខណៈនោះគេឃើញរថយន្តម៉ាក LexusRX 330 ពាក់ស្លាកលេខភ្នំពេញ 2AU 4122 បើកចេញពីទូកដរឡើងច្រាំងដែរ តែបានបន្តិចក៏ទុចងក់ទំនងឡើងមិនរួច។ ឃើញដូច្នោះមានបុរសម្នាក់ជាអ្នកបើកទូកដរបានទៅឈរពីខាងក្រោយរថយន្ត ធ្វើសញ្ញាបញ្ជាទៅអ្នកបើកបររថយន្តអោយថយក្រោយសិន ។ ខណៈនោះស្រាប់តែរថយន្ត LEXUS បានថយក្រោយយ៉ាងលឿនបុកអ្នកធ្វើសញ្ញា រួមនិងអ្នកដំណើរដែលនៅលើទូកដរ នោះ រុញទៅផ្ទប់នឹងរនាំងទូកដរ បណ្តាលអោយរងរបួសធ្ងន់ចំនួន ៥នាក់ ក្នុងនោះមានស្រីចំនួន ២នាក់ បុរសអ្នកបើកទូកដរ១នាក់ និងកុមារាចំនួន ២នាក់។

ប៉ូលិសបានអោយដឹងថា ក្រោយកើតហេតុភ្លាម ប្រជាពលរដ្ឋ និងសមត្ថកិច្ចបានជួយនាំយកអ្នករបួសទៅកាន់មន្ទីរ។ ក្នុងហេតុការណ៍នេះ គេមិនទាន់ស្គាល់អត្តសញ្ញាណរបស់ជនរងគ្រោះនៅឡើយទេ ចំណែកអ្នកបើបររថយន្ត ក៏អត់ស្គាល់អត្តសញ្ញាណដូចគ្នាដែរ រីឯសមត្ថកិច្ច ក៏មិនទាន់បំភ្លឺអោយបានច្បាស់នៅឡើយ រង់ចាំធ្វើការស្រាវជ្រាវអោយបានចប់សិន៕

ខេត្តកំពង់ចាម ៖ ព្រះករុណា ព្រះមហាក្សត្រ នៃព្រះរាជាណាចក្រកម្ពុជា យាងសួរសុខទុក្ខ និងប្រោស ព្រះរាជទានព្រះរាជអំណោយជូនដល់ប្រជាកសិករក្រីក្រ នៅតាមដងទន្លេតូច ស្ថិតក្នុងភូមបឹងទឹង ឃុំទងត្រឡាច ស្រុកស្រីសន្ធរ ខេត្តកំពង់ចាម ចំនួន ៤៦០គ្រួសារ។

នាវេលាព្រឹកថ្ងៃទី២៧ ខែធ្នូ ឆ្នាំ២០១៩ នេះ ព្រះករុណាជាអម្ចាស់ជីវិតលើត្បូង ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរព សក្ការៈដ៏ខ្ពង់ខ្ពស់បំផុត ក្រោមព្រះរាជហឫទ័យទុកដាក់ខ្ពស់អំពីសុខទុក្ខប្រជានុរាស្រ្តជាកូនចៅ ព្រះ អង្គសព្វព្រះរាជហឫទ័យស្តេចយាងសំណេះសំណាលសាកសួរសុខទុក្ខ និងប្រោសព្រះរាជទាន ព្រះ រាជអំណោយ ជូនដល់ប្រជាកសិករក្រីក្រ លោកគ្រូអ្នកគ្រូ សិស្សានុសិស្ស និងក្រុមគ្រូពេទ្យ នៅតាមដងទន្លេតូច ស្ថិតក្នុងភូមបឹងទឹង ឃុំទងត្រឡាច ស្រុកស្រីសន្ធរ ខេត្តកំពង់ចាម ចំនួន ៤៦០ សារ។

ក្នុងព្រះរាជដំណើរតាមព្រះទីនាំងរថយន្ត ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ ខ្ពង់ខ្ពស់បំផុត ត្រូវបានដង្ហែព្រះរាជដំណើរដោយសម្តេចចៅហ្វាវាំង វរវៀងជ័យ អធិបតី ស្រឹង្គារ៍ គង់ សំអុល ឧបនាយករដ្ឋមន្រ្តី រដ្ឋមន្រ្តីក្រសួងព្រះបរមរាជវាំង ឯកឧត្តម គុយ សុផល ឧត្តមក្រុមប្រឹក្សា ផ្ទាល់ព្រះមហាក្សត្រ និងជាទេសរដ្ឋមន្រ្តីទទួលបន្ទុកកិច្ចការទូទៅអមក្រសួងព្រះបរមរាជវាំង ឯក ឧត្តម ឈា ហន រដ្ឋមន្ត្រីអមក្រសួងព្រះបរមរាជវាំងព្រមទាំងនាម៉ឺនសព្វមុខមន្រ្តី នៃក្រសួងព្រះ បរម រាជវាំងជាច្រើនរូប។

ស្ថិតក្នុងឱកាសស្តេចយាងដល់នៅភូមិឯលិច ឃុំច្រណូក ព្រះករុណា ព្រះមហាក្សត្រ នៃព្រះរាជា ណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គបានសព្វព្រះរាជហឫទ័យ ស្តេចយាង ប្រោសព្រះរាជទាន នូវព្រះរាជអំណោយដោយផ្ទាល់ព្រះហស្តរបស់ព្រះអង្គ និងយាងជួបសំណេះ សំណាលនិងទតដោយផ្ទាល់ព្រះភក្ត្ររបស់ព្រះអង្គ ចំពោះគ្រួសារប្រជាកសិករចំនួន ៥គ្រួសារ ដល់ ក្នុងលំនៅឋាន ព្រមទាំងបានប្រោសព្រះរាជទានព្រះរាជអំណោយដល់គ្រួសារទាំង ៥ ផងដែរ។

មានព្រះរាជបន្ទូលទៅកាន់លោកយាយលោកតា និងប្រជារាស្រ្តជាកូន ជាចៅរបស់ព្រះអង្គនា ឱកាសនោះ ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទី សក្ការៈដ៏ខ្ពង់ខ្ពស់បំផុត ព្រះអង្គបានសម្ដែងនូវព្រះរាជហឫទ័យសប្បាយរីករាយ ដោយបានជួប លោក តា លោកយាយ និងប្រជារាស្រ្តជាកូន ជាចៅរបស់ព្រះអង្គ ជាពិសេសព្រះអង្គបានទត និង ជួបផ្ទាល់ជាមួយប្រជារាស្រ្តជាកសិករ ព្រមទាំងមានព្រះរាជបន្ទូលពីព្រះរាជបណ្តាំសាកសួរសុខទុក្ខ ពីសំណាក់សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ សម្តេចម៉ែ សម្តេចយាយ សមេ្តចយាយទួត ជូនប្រជារាស្ត្រជាកូន ជាចៅ ចៅទូត ចៅលូតរបស់ព្រះអង្គ ដែល ព្រះ អង្គតែងតែយកព្រះរាជហឫទ័យទុកដាក់ពីសុខទុក្ខ និងការលំបាក ក៏ដូចជាការរស់នៅរបស់ ប្រជារាស្ត្ររបស់ព្រះអង្គគ្រប់ពេលវេលា។

ព្រះករុណា ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក៏បាន មានព្រះរាជបន្ទូលកោតសរសើរចំពោះថ្នាក់ដឹកនាំព្រឹទ្ធសភា រដ្ឋសភា ពិសេសរាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណា ចក្រកម្ពុជា ដែលបាននាំមកនូវសុខសន្តិភាព ស្ថិរភាពនយោបាយ ព្រមទាំងបានធ្វើឱ្យប្រទេស ជាតិ របស់យើង មានការអភិវឌ្ឍរីកចម្រើនលើគ្រប់វិស័យ ដែលកត្តាទាំងនេះ បានធ្វើឱ្យជីវភាពរស់នៅ របស់ប្រជារាស្ត្រកាន់តែល្អប្រសើរឡើង៕

ភ្នំពេញ ៖ ប្រធានមូលនិធិគន្ធបុប្ផាកម្ពុជា នៅរសៀលថ្ងៃទី២៦ ខែធ្នូ ម្សិលមិញ បានចុះហត្ថលេខា លើអនុស្សរណៈយោគយល់ ជាមួយក្រុមហ៊ុនទ្រូម៉ាន់នី ដើម្បីផ្តល់លទ្ធភាពឲ្យសប្បុរសជនអាចចូលរួមវិភាគទានជូនមូលនិធិគន្ធបុប្ផា ក្នុងការទ្រទ្រង់ សកម្មភាព និងប្រតិបត្តិការរបស់មន្ទីរពេទ្យកុមារមួយនេះ។
ការចុះអនុស្សរណៈយោគយល់គ្នានេះ ស្តីពី «ការប្រើប្រាស់សេវាកម្មកៀគរ និងទទួលវិភាគទានសប្បុរសធម៌ជូនមូលនិធិគន្ធបុប្ផា» រវាងក្រុមហ៊ុនទ្រូម៉ាន់នី និងមូលនិធិគន្ធបុប្ផា ដែលរៀបចំនៅមជ្ឈមណ្ឌល ព៏ត៌មានរបស់មន្ទីរពេទ្យគន្ធបុប្ផាភ្នំពេញ កម្ពុជា។
ក្នុងឱកាសនោះ លោក ចន ណារិទ្ធ អគ្គលេខាធិការក្រុមប្រឹក្សាជាតិគាំពារសង្គម និងប្រធានលេខាធិការដ្ឋានមូលនិធិគន្ធបុប្ផា កម្ពុជា មានប្រសាសន៏ថា កិច្ចសហការនេះ នឹងផ្តល់លទ្ធភាពសប្បុរសជន អាចចូលរួមបរិច្ចាក ទោះបីតិចក្តី ច្រើនក្តីជូនមូលនិធិគន្ធបុប្ផាកម្ពុជា ក្នុងការ ចូលរួមគាំទ្រដល់ការព្យាបាល និងសង្គ្រោះកុមារកម្ពុជា ដើម្បីនាំមកនូវភាពញញឹមដល់ពួកគេ ដែលជាអនាគតរបស់ជាតិ។

លោក ឈន់ សកល នាយកផ្នែកទីផ្សារនៃក្រុមហ៊ុនទ្រូម៉ាន់នី ខេមបូឌា បានបញ្ជាក់ថា នេះជាកិច្ចសហការថ្មី ក្នុងការផ្តល់ជម្រើសបន្ថែមជូនសប្បុរសជន ដែលមានបំណងបរិច្ចាក ថវិកាជូនមូលនិធិគន្ធបុប្ផាកម្ពុជា ឲ្យមានលក្ខណៈកាន់តែងាយស្រួល តាមរយៈសេវាផ្ទេរប្រាក់ របស់ក្រុមហ៊ុនទ្រូម៉ាន់នី នៅតាមគ្រប់ភ្នាក់ងារទាំងអស់នៅទូទាំងប្រទេស ឫកម្មវិធីទ្រូម៉ាន់នីអេប។ លោកបន្ថែមថា តាមរយៈ ក្រុមហ៊ុនទ្រូម៉ាន់នី បានផ្តល់កម្មវិធីពិសេសជូនសប្បុរសជនទាំងអស់ ដែលបានដំឡើងកម្មវិធីTrue Money App រួចដាក់លុយទៅក្នុងគណនីនោះ នឹងធ្វើការបរិច្ចាកក្នុងចំនួនទោះតិចក្តី ច្រើនក្តី ជូនមូលនិធិគន្ធបុប្ផាកម្ពុជាក្រុមហ៊ុននឹងរួមចំណែកបរិច្ចាកបន្ថែមចំនួន២០០០រៀលជូនមូលនិធិគន្ធបុប្ផាកម្ពុជាភ្លាមៗដែរ។

លោកវេជ្ជបណ្ឌិត គី សន់ទី ប្រធានមន្ទីរពេទ្យគន្ធបុប្ផា បានបញ្ជាក់ថា មន្ទីរពេទ្យត្រូវការការចូលរួមពីប្រជាពលរដ្ឋទូទៅ ដើម្បីបន្តនិរន្តភាពមន្ទីរពេទ្យ ដោយត្រូវចំណាយ៤០លានដុល្លារអាមេរិក្នុងមួយឆ្នាំ។ លោកវេជ្ជបណ្ឌិតអរគុណចំពោះមូលនិធិគន្ធបុប្ផាកម្ពុជា ដែលបានរួមចំណែកដ៏សំខាន់ជាមួយមូល និធិស្វីស សម្រាប់ទ្រទ្រង់ដល់ដំណើរការមន្ទីរពេទ្យ។

ក្នុងរយៈពេល១១ខែ ក្នុងឆ្នាំ២០១៩ មូលនិធិគន្ធបុប្ផាកម្ពុជា បានប្រគល់ថវិកាសរុបចំនួន១០លាន ៨សែន ៩ម៉ឺន ២៤០៤ដុល្លារអាមេរិក ដែលបានមកពីការបរិច្ចាគនានា ជូនមន្ទីរពេទ្យគន្ធបុប្ផា ដើម្បីចូលរួមធានាឲ្យបាននូវនិរន្តរភាព នៃកិច្ចដំណើរការរបស់មន្ទីរពេទ្យនេះ ក៏ដូចជាការបន្តនាំមកនូវភាពញញឹមដល់កុមារ ដែលជាអនាគតដ៏ភ្លឺស្វាងរបស់កម្ពុជា»។

មូលនិធិគន្ធបុប្ផាកម្ពុជា បានឲ្យដឹងទៀតថា ថវិកាចំនួន១០,៨៩២,៤០៤ដុល្លារអាមេរិកនេះ គិតរួមទាំងថវិកាចំនួន ៨៣៦,១៣៨ដុល្លារអាមេរិក ត្រូវបាន ឯ.ឧ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាល មូលនិធិគន្ធបុប្ផាកម្ពុជា ប្រគល់ជូនមន្ទីរពេទ្យគន្ធបុប្ផា កាលពីចុងខែវិច្ឆិកាកន្លងទៅ៕

ខេត្តព្រៃវែង​ ៖​ កម្លាំង​នគរបាល​ស្រុក​ស៊ី​ធរ​កណ្តាល​ បាន​ឃាត់ខ្លួន​ជនសង្ស័យ​ម្នាក់​ ដោយ​អនុវត្ត​តាម​ដីកា​បង្គាប់​ឲ្យ​ឃាត់ខ្លួន​ចំនួន​៤​ ពាក់ព័ន្ធ​ករណី​លួច​មាន​ស្ថាន​ទម្ងន់ទោស​។​ ប្រតិបត្តិការ​ខាងលើ​បាន​ធ្វើ​ឡើង​នៅ​ថ្ងៃ​ទី​២៦​ ខែធ្នូ​ ឆ្នាំ​២០១៩​ នៅ​វេលា​ម៉ោង​១៣ និង​២០​នាទី​ នៅ​ភូមិ​បឹង​ជ័រ​ ឃុំ​ព្រៃ​ទឹង​ ស្រុក​ស៊ី​ធរ​កណ្តាល​ ខេត្តព្រៃវែង​។​

​មន្ត្រី​នគរបាល​ខេត្តព្រៃវែង​ បាន​ឲ្យ​ដឹង​ថា ​ជនសង្ស័យ​ឈ្មោះ​ ស៊ន់​ ស្រ៊ា​ង​ ភេទ​ប្រុស​ អាយុ​៤៧​ឆ្នាំ​ ស្រុក​កំណើត​នៅ​ភូមិ​បឹង​ជ័រ​ ឃុំ​ព្រៃ​ទឹង​ ស្រុក​ស៊ី​ធរ​កណ្ដាល​ ខេត្តព្រៃវែង​។​ បច្ចុប្បន្ន​រស់នៅ​ភូមិ​ស្វាយ​អ​ន្ទ​រ​ទី​១​ ឃុំ​ស្វាយ​អ​ន្ទ​រ​ ស្រុក​ស្វាយ​អ​ន្ទ​រ​ ខេត្តព្រៃវែង​។​

​ប្រភព​ដដែល​បន្ត​ថា​ ដីកា​ចំនួន​រួម​មាន ៖ ដីកា​ទី​១-​បង្គាប់​ឲ្យ​ចាប់ខ្លួន​លេខ​០៣/១៩​ ចុះ​ថ្ងៃ​ទី​០៥​ ខែមករា​ ឆ្នាំ​២០១៩​។​ ដីកា​ទី​២-​ដីកា​បង្គាប់​ឲ្យ​ចាប់ខ្លួន​លេខ​០៤/១៩​ ចុះ​ថ្ងៃ​ទី​០៩​ខែមករា​ ឆ្នាំ​២០១៩​ បង្គាប់​ឲ្យ​ចាប់ខ្លួន​ឈ្មោះ​ ស៊ន់​ ស្រ៊ា​ង​ ពី​បទ​លួច​មាន​ស្ថាន​ទម្ងន់ទោស​ ប្រព្រឹត្ត​នៅ​ភូមិ​សត្វ​ពង​ ឃុំ​សត្វ​ពង​ ស្រុក​ឈូក​ ខេត្តកំពត​ ចេញ​ដោយ​លោក​ អាំង​ សុភា​ ចៅក្រម​ស៊ើបសួរ​សាលាដំបូង​ខេត្តកំពត​។​ ដីកា​ទី​៣-​ បង្គាប់​ឲ្យ​ចាប់ខ្លួន​លេខ​១៥​ដប​ច​ព្រ​/​ទ​២០១៩​ ចុះ​ថ្ងៃ​ទី​២២​ ខែមករា​ ឆ្នាំ​២០១៩​ ចេញ​ដោយ​លោក​ សាំង​ សេរី​ ចៅក្រម​ស៊ើបសួរ​សាលាដំបូង​ខេត្តព្រៃវែង​ ពី​បទ​ប្រើប្រាស់​ឯកសារ​ក្លែង​ និងដីកា​ទី​៤-​ ដីកា​បង្គាប់​ឲ្យ​ចាប់ខ្លួន​លេខ​១៧០/១៩​ ចុះ​ថ្ងៃ​ទី​១៩​ ខែសីហា​ ឆ្នាំ​២០១៩​ ឲ្យ​ចាប់ខ្លួន​ឈ្មោះ​ ស៊ន់​ ស្រ៊ា​ង​ ពី​បទ​ប្រើប្រាស់​ឯកសារ​ក្លែង​ចេញ​ដោយ​លោក​ រស់​ បូ​ផា​ណា​ ចៅក្រម​ជំនុំជម្រះ​សាលាដំបូង​ខេត្តព្រៃវែង​។​
​
ប្រភពបន្តថា វត្ថុ​តាង​ដកហូត​រួម​មាន ៖ ម៉ូតូ​ម៉ាក​C125​ ពណ៌​ខ្មៅ​ ផលិត​ឆ្នាំ​២០២០​ លេខ​តួ​ និង​លេខ​ម៉ាស៊ីន​5609031​ គ្មាន​ស្លាក​លេខ​ចំនួន​១​គ្រឿង​,​ ស្លាក​លេខ​ម៉ូតូ​១៦,​ កញ្ចក់​ម៉ូតូ​ចំនួន​៥​គូរ​,,​ដុំ​សោរ​ម៉ូតូ​ចំនួន​៤​សម្រាប់​,​ សោរលេខ​១២​ចំនួន​,​ កាំបិត​កៃ​ចំនួន​,​ កា​តាប​ពណ៌​ខ្មៅ​ចំនួន​១,​ វិ​ក្កយ​ប​ត្រ​ពេទ្យ​ចំនួន​១​សន្លឹក​,​ ទូរស័ព្ទ​ម៉ាក​ណូ​គា​ពណ៌​ខ្មៅ​ចំនួន​១​គ្រឿង​។​

​បច្ចុប្បន្ន​មុខសញ្ញា​ខាងលើ​ និង​វត្ថុ​តាង​សមត្ថកិច្ច​យក​មក​ អធិការដ្ឋាន​នគរបាល​ស្រុក​ស៊ី​ធរ​កណ្ដាល​ ដើម្បី​បំពេញ​សំណុំរឿង​តាម​នីតិវិធី​៕

ភ្នំពេញ ៖ លោក ហេង រតនា ប្រតិភូរាជរដ្ឋាភិបាលទទួលបន្ទុកជា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) ដាក់ចេញផែនការសំខាន់ៗចំនួន៥ចំណុច សម្រាប់អនុវត្តន៍ឆ្នាំ២០២០ ដោយក្នុងនោះរំដោះផ្ទៃដីមានមីន និងគ្រាប់ចំនួន១១៦គីឡូម៉ែត្រក្រឡា និងកំទេចគ្រាប់មីនឲ្យបាន៤ម៉ឺនគ្រាប់

ផែនការសមាហរណកម្មបោសសម្អាតមីន​២០២០​ របស់អង្គភាពស៊ីម៉ាក់​ មានគោលដៅសំខាន់ៗដូចខាងក្រោម៖​

១- កិច្ចប្រតិបតិ្តការរំដោះផ្ទៃដីចំការមីន ចំការគ្រាប់​ចំនួន១១៦គីឡូម៉ែត្រក្រឡា​ ក្នុងនោះមានចំការមីនចំនួនប្រមាណ៧៩គីឡូម៉ែត្រក្រឡា​ និងចំការគ្រាប់ចំនួន៣៨គីឡូម៉ែត្រក្រឡា។ នៅចំពោះមុខនេះមានការបញ្ជាក់គំរោងចាប់ផ្តើមអនុវត្តបានមានចំនួនជាង៨០គីឡូម៉ែត្រក្រឡា​ ហើយនៅសល់៣៦គីឡូម៉ែត្រក្រឡា​ កំពុងរង់ចាំនិងស្វែងរកដៃគូជំនួយដើម្បីគាំទ្រផែនការនេះ​ ដើម្បីសំរេចបានគោលដៅរំដោះដី១១៦គីឡូម៉ែត្រក្រឡានេះ​ ត្រូវការកំលាំងជំនាញសរុបជាង១.៦០០នាក់។ កំលាំងអន្តរាគមន៍កម្ទេចចោលគ្រាប់មីន និងសំណល់ជាតិផ្ទុះពីសង្គ្រាមអាចកំទេចគ្រាប់ចំនួនប្រមាណ៤០.០០០គ្រាប់ និងត្រូវឆ្លើយតបតាមសំណើសុំអន្ដរាគមន៍បន្ទាន់ៗ​ចំនួន៥.០០០ករណី។

២- ការងារអប់រំយល់ដឹងពីគ្រោះថ្នាក់ដោយសារមីន៖ អង្គភាពស៊ីម៉ាក់នឹងបន្ដពង្រឹងកិច្ចសហការជាមួយអគ្គស្នងការដ្ឋាននគរបាលជាតិនិងអាជ្ញាធរមូលដ្ឋាន​ ដើម្បីហ្វឹកហ្វឺនពង្រីកបណ្ដាញស្ម័គ្រចិត្តតាមមូលដ្ឋាននៅទូទាំងប្រទេស ដែលត្រូវប្រព្រឹតិ្តទៅ១២,០០០លើក​ មានចំនួន​ ១០០,០០០ខ្នងផ្ទះ​ មានមនុស្សរាយចំនួ​ន៧០ម៉ឺននាក់។

៣- ការងារស្រាវជ្រាវព័ត៌មានចម្ការមីន និងសំណល់ជាតិផ្ទុះពីសង្គ្រាម ៖ បន្ដខិតខំកៀរគរជំនួយដើម្បីបញ្ចប់ការងារស្រាវជ្រាវព័ត៌មានកម្រិតមូលដ្ឋានឲ្យបានចប់ក្នុងក្របខ័ណ្ឌទូទាំងប្រទេសស្របតាមផែនការយុទ្ធសាស្រ្ដរបស់អាជ្ញាធរមីន។

សូមបញ្ជាក់ថា តំបន់ដែលមិនទាន់បានចុះស្រាវជ្រាវព័ត៌មានភាគច្រើនជាតំបន់គ្រាប់បែកចង្កោម និងសំណល់ជាតិផ្ទុះពីសង្គ្រាម ដែលបច្ចុប្បន្ននេះកម្លាំងស្រាវជ្រាវអង្គភាពស៊ីម៉ាក់មានចំនួន១២ក្រុម អាចបន្ដបំពេញភារកិច្ចនេះតាមសំណូមពរបាន។ ក្នុងឆ្នាំ២០២០កំលាំងអាចស្រាវជ្រាវលើចំនួន៨០០ភូមិ។

៤- ការងារហ្វឹកហ្វឺន ៖ នឹងសហការផ្ដល់ការហ្វឹកហ្វឺនដល់កងទ័ពជើងគោក ដើម្បីរួមចំណែកក្នុងភារកិច្ចបោសសម្អាតមីនមានចំនួនប្រមាណ៥០០នាក់ទាំងនៅវិទ្យាស្ថានបច្ចេកទេសសកម្មភាពមីន និងនៅមូលដ្ឋានកងទ័ព​និងហ្វឹកហ្វឺនអន្តរជាតិដូចជាមកពីប្រទេសអ៊ីរ៉ាក់​ កូឡុំប៊ី​ ឡាវ​ជាដើមចំនួន៥វគ្គមានសិក្ខាកាមអន្តរជាតិជាង១០០នាក់។

៥- ការងារពង្រឹងសមត្ថភាពមន្ត្រី​ ការអភិវឌ្ឍ​នីតិវិធីស្តង់ដាប្រតិបត្តិការ​ និងការងារសហការកិច្ចការសន្តិសុខនានាជាដើម។ ល។

សូមជម្រាបថា នៅរយៈពេល១២ខែ ឆ្នាំ២០១៩ ស៊ីម៉ាក់ បានរកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះសរុបជាង៣៦,១៦៥គ្រាប់ ក្នុងនោះមានមីនប្រឆាំងមនុស្សចំនួន៥,៤១៥គ្រាប់ មីនប្រឆាំងរថក្រោះ ចំនួន៧៥គ្រាប់ មីនច្នៃចំនួន១៥គ្រាប់ គ្រាប់យុទ្ធភណ្ឌមិនទាន់ផ្ទុះចំនួន ៣០,៦៦០គ្រាប់។ នៅក្នុងប្រតិបត្តិការឆ្នាំ២០១៩ ស៊ីម៉ាក់បានរំដោះផ្ទៃដីចំការមីន និងសំណល់ជាតិផ្ទុះពីសង្គ្រាមបានទំហំ៦៦,៩៦៦,៥៤៤ ម៉ែត្រក្រឡា លើចំការមីន/ចំការគ្រាប់ចំនួន ៤៨៧ ទីតាំង៕

ដោយ :កូវ ប៊ុនហេង
រះវិហារ ៖ ការងារលេចធ្លោក្នុងឆ្នាំ២០១៩ របស់មន្ទីរសាធារណការនិងដឹកជញ្ជូនខេត្តព្រះវិហាររួមមានការដ្ឋានជួសជុល ថែទាំផ្លូវនិងការស្ថាបនាស្ពាន២កន្លែងនៅខេត្តព្រះវិហារ គ្រោងស្ថាបនាឱ្យបានរួចរាល់នៅមុនពិធីបុណ្យចូលឆ្នាំខ្មែរខាងមុខនេះ ដើម្បីដាក់ឱ្យប្រជាពលរដ្ឋធ្វើដំណើរបានស្រួល។

ពាក់ព័ន្ធការងារខាងលើលោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារបានឱ្យដឹងថា ចំពោះការងារជួសជុលថែទាំផ្លូវ នៅខេត្តព្រះវិហារមន្ទីរសាធារណការនិងដឹកជញ្ជូនខេត្តព្រះវិហារបានធ្វើការជួសជុលថែទាំផ្លូវបានប្រវែង ៨០០គីឡូម៉ែត្រ ក្នុងចំនួននេះ មានផ្លូវក្រាលកៅស៊ូចំនួន៤០០គីឡូម៉ែត្រ ក្នុងនោះមានដូចជាការថែទាំ និងជួសជុលផ្លូវជាតិលេខ៦២ ប្រវែង ២គីឡូ ២០០ ម៉ែត្រ។ ក្រៅពីនេះយើងបាននឹងកំពុងស្ថាបនាស្ពានចំនួនពីរកន្លែងផងដែរ។ដោយឡែកសម្រាប់ឆ្នាំនេះដែរ យើងបានពង្រីកផ្លូវកោះកែរ បន្ថែម ៤ម៉ែត្រកន្លះ នៅក្នុងទីរួមខេត្ត ប្រវែង ២២៧០ម៉ែត្រជាមួយនឹងការពុះទ្រូងផ្លូវដាក់សួនច្បារនៅកណ្តាល បំពាក់ទៅដោយអំពូលភ្លើង ។ ទន្ទឹមនឹងនោះនៅក្នុងទីរួមខេត្តនេះដែរយើងបានអ៊ុតកៅស៊ូACនៅមុខសាលាខេត្តមានប្រវែងប្រមាណជា ៧ ម៉ឺនម៉ែត្រការ៉េ។ ក្រៅពីនេះ យើងក៏នឹងស្ថាបនាផ្លូវបេតុងឆ្អឹងដែកកាត់ទទឹង ការដាក់លូ អក្សU នៅតាមបណ្តោយផ្លូវដោយយើងបានបើកការដ្ឋានកាលពីព្រឹកថ្ងៃទី២៥ ធ្នូនេះដើម្បីរំដោះទឹកចេញពីទីរួមខេត្ត។

លោកបានបញ្ជាក់ផងដែរថា សម្រាប់ឆ្នាំ២០២០ខាងមុខនេះ មន្ទីរសាធារណការនិងដឹកជញ្ជូនខេត្តព្រះវិហារមានគម្រោងអ៊ុតកៅស៊ូACនៅទីរួមខេត្តបន្តទៀតដែលមានប្រវែងប្រមាណ៥គីឡូម៉ែត្រ ។

លោកសំ លាងទ្រីក៏បានបញ្ជាក់ទៀតថា ផ្លូវនៅក្នុងទីរួមខេត្តព្រះវិហារមានអាយុកាលប្រមាណជា១០ឆ្នាំហើយ ដែលធ្វើឱ្យកៅស៊ូងាប់តែនៅពេលយើងធ្វើការអ៊ុតកៅស៊ូ ac នេះនឹងធ្វើឲ្យជីវិតកៅស៊ូមានជីវិតឡើងវិញហើយប្រើប្រាស់បានពី៥ទៅ៦ឆ្នាំទៀត។ ជាគម្រោងនៅក្នុងឆ្នាំ២០២០នោះផងដែរ ផ្លូវកាត់ទទឹងទាំងអស់នៅក្នុងទីរូបខេត្តមន្ទីរសាធារណការនិងធ្វើការស្ថាបនាដោយចាក់បេតុងឆ្អឹងដែក ដើម្បីអោយប្រជាពលរដ្ឋបានធ្វើដំណើរដោយភាពសុខសប្បាយ ។

លោកសំ លាងទ្រីក៏បានបញ្ជាក់បន្តថា ចំពោះសកម្មភាពជួសជុលថែទាំផ្លូវទាំងប៉ុន្មានខាងលើ ជាមួយនឹងការស្ថាបនាស្ពាន ២កន្លែងលើបណ្ដោយផ្លូវ៩៥ មន្ទីរសាធារណការនិងអនុវត្តការងារនេះឲ្យបានរួចរាល់នៅមុនពិធីបុណ្យចូលឆ្នាំខ្មែរខាងមុខនេះ ដើម្បីសម្រួលដល់ប្រជាពលរដ្ឋបានធ្វើដំណើរឆ្លងកាត់បានស្រួល។

គួរបញ្ជាក់ផងដែរថា ការស្ថាបនាស្ពាន ២កន្លែងលើបណ្ដោយផ្លូវ៩៥ មន្ទីរសាធារណការនិងដឹកជញ្ជូនខេត្តព្រះវិហារអនុវត្តការងារបានប្រមាណ៨០ភាគរយហើយ ដោយស្ពានទី១ មានប្រវែង៤៥ម៉ែត្រទទឹក១២ម៉ែត្រ៥០ ស្ពានទី២មានប្រវែង១៨ម៉ែត្រទទឹង១០ម៉ែត្រ៩ ស្ថិតនៅក្នុងភូមិ ឃុំ ស្រុកឆែបខេត្តព្រះវិហា៕

ដោយ : ប៉ែន សុផល

ខេត្តកំពង់ចាម​ ៖ ខណ្ឌរដ្ឋបាលជលផលកំពង់ចាម​ សហការជាមួយ​ អាជ្ញារធរស្រុកព្រៃឈរ​ កម្លាំងប៉ុស្តិ៍នគរបាលរដ្ឋបាលមៀន​ សហគមន៍​នេសាទសាមគ្គី​ឃុំមៀន​ និង​សហគមន៍​នេសាទវិហារធំ​ នាព្រឹក​ថ្ងៃ​ទី​២៦​ ខែធ្នូ​ ឆ្នាំ​២០១៩ នេះ បាន​ចុះបង្រ្កាបបទស្មេីលជលផល​ បាន​ចំនួន​៣ករណី ព្រមទាំង​បាន​បំផ្លាញ​ចោល​នូវ​ឧបករណ៍​នេសាទខុសច្បាប់​ ​និង​ពន្លែង​កូន​ត្រី​ចូល​ទៅ​ក្នុង​បឹងធម្មជាតិ​វិញ​ផង​ដែរ​។

លោក​អ៊ុក​ ណារិន​ នាយ​ខណ្ឌ​រដ្ឋបាល​ជលផល​ខេត្ត​កំពង់ចាម​ បាន​ឲ្យដឹងថា​ ការ​ចុះ​បង្ក្រាប​នេះ​ កម្លាំង​សមត្ថកិច្ច​ចម្រុះ​បាន​ធ្វើ​ការ​ ករណី​ទី១: លូស្បៃមុងចំនួន​ ១៥មាត់​ របាំងស្បៃមុងប្រវែង​៧៥០ម៉ែត្រ​ និងបង្គោលចម្រឹងឬស្សីចំនួន​ ២២៥ដេីម ព្រមទាំង​ចាក់លែងត្រីចម្រុះទម្ងន់​១០គីឡូក្រាម​ ចូលក្នុងបឹង​ធម្មជាតិ​វិញ​ នៅចំណុច​ជ្រោយអណ្តូង​ ឃុំមៀន​ ស្រុក​ព្រៃឈរ​។

ករណី​ទី២: លូស្បៃមុងចំនួន​ ១២មាត់ របាំងស្បៃមុងប្រវែង​ ៦០០ម៉ែត្រ និងបង្គោលចម្រឹងឬស្សីចំនួន ១៨០ដេីម ព្រមទាំង​ចាក់លែងត្រីចម្រុះទម្ងន់​០៨គីឡូក្រាម​ចូលក្នុងបឹង​ធម្មជាតិ​វិញ​ នៅចំណុច​បាំងដៃ​ ឃុំមៀន​ ស្រុកព្រៃឈរ។

និងករណី​ទី៣: លូស្បៃមុងចំនួន​០៨មាត់​ របាំងស្បៃមុងប្រវែង​៤០០ម៉ែត្រ​ និង​បង្គោលចម្រឹងឬស្សីចំនួន​ ១២៥ដេីម ព្រមទាំង​ចាក់លែងត្រីចម្រុះទម្ងន់​០៥គីឡូក្រាម​ចូលក្នុងបឹង​ធម្មជាតិ​វិញ​ នៅចំណុច​ខ្ទមលោកយាយ​ ឃុំមៀន​ ស្រុក​ព្រៃឈរ​។

លោក​នាយខណ្ឌ​បាន​បញ្ជាក់​ថា​ ដោយមានការអនុញ្ញាតពីលោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម ឧបករណ៍ល្មើសច្បាប់ខាងលើត្រូវបានបង្កើតគណៈកម្មការដុតបំផ្លាញចោលនៅនឹងកន្លែងផងដែរ ៕ 

ខេត្តកំពង់ចាម ៖ អភិបាលនៃគណៈអភិបាលខេត្តកំពង់ចាម លោក អ៊ុន ចាន់ដា បានថ្លែងថា ទោះបីជា បងប្អូនមានពិការភាពរូបរាងកាយក៏ពិតមែន តែមិនពិការភាពផ្លូវចិត្តទេ ហើយជនពិការភាពមួយចំនួនក៏មាន សមត្ថភាពធ្វើជាលោកឧកញ៉ា ទៀតផង​។

ដោយមិនផ្តេកផ្តួលតាមរូបរាងកាយឡើយ ការថ្លែងយ៉ាងដូច្នេះក្នុងឱកាស ប្ររព្ធទិវាជនមានពិការភាពកម្ពុជាលើកទី២១ និងជនមានពិការភាពអន្តរជាតិលើកទី៣៧ ក្រោម ប្រធានបទលុបបំបាត់ឧបសគ្គរារាំងជនមានពិការភាព ដើម្បីសង្គមមួយប្រកបដោយបរិយាបន្នដែលបាន ធ្វើឡើងនាព្រឹកថ្ងៃទី២៦ ខែធ្នូ ឆ្នាំ២០១៩ នៅវត្តអ្នកតាស្នឹង ស្ថិតក្នុងឃុំបឹងណាយ ស្រុកព្រៃឈរខេត្ត កំពង់ចាម។

ស្ថិតក្នុងពិធីនោះដែរ លោក អ៊ុន ចាន់ដា អភិបាលខេត្តកំពង់ចាម បានថ្លែងតាមព្រះរាជ សារព្រះករុណាព្រះបាទសម្តេចព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា ដែលមានខ្លឹមសារថា ក្រោម ការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន ប្រធានកិត្តិយសក្រុមប្រឹក្សាសកម្មភាពជនពិការ បានធ្វើឱ្យជីវភាពរស់នៅរបស់ជនមានពិការភាពមានភាពប្រសើរឡើង តាមរយៈការលើកកម្ពស់កំណើនការងារ និងអាជីពសមស្រប ព្រមទាំងការពង្រឹងភាពជាម្ចាស់ការ ដោយលើកទឹកចិត្តដល់ជនមានពិការភាព មានមុខរបរផ្ទាល់ខ្លួន សំដៅកាត់បន្ថយភាពក្រីក្រនៅក្នុងសង្គម។ ដោយសមិទ្ធផលរយៈពេល៥ឆ្នាំនៃការអនុវត្តផែនការយុទ្ធសាស្ត្រជាតិស្តីពីពិការភាព ២០១៤-២០១៨ នាពេលកន្លងមក បានធ្វើឱ្យជនមានពិការភាពទទួលបានទាំងសេវាសុខភាព ប្រកបដោយគុណភាព និងសមធម៌ ព្រមទាំងការស្តារលទ្ធភាពពលកម្មកាយសម្បទា និងសតិបញ្ញាបានល្អ
ប្រសើរ ។

ការលើកកម្ពស់ការចូលរួមរបស់ជនមានពិការភាព ដើម្បីសម្តែងមតិទទួលព័ត៌មាន និងចូលរួមជីវភាពនយោបាយ ត្រូវបានលើកទឹកចិត្តទាំងនៅកម្រិតថ្នាក់ជាតិ និងអន្តរជាតិ រួមទាំង ការធានាបាននូវសកម្មភាពសង្គម វប្បធម៌ សាសនា កីឡា សិល្បៈ ការសម្រាកលម្លៃ ដែលធ្វើឱ្យជនមានពិការភាពទទួលបានការអភិវឌ្ឍន៍ឥតឈប់ឈរពីរាជរដ្ឋាភិបាល ផងដែរ ។

គួរបញ្ជាក់ថា គិតមកដល់ខែធ្នូ ឆ្នាំ២០១៩ នេះ មជ្ឈមណ្ឌលស្តារខេត្តកំពង់ចាម បានគាំទ្រដល់ជនមានពិការភាពចំនួន ២.២៨០នាក់ ក្នុងនោះមានស្រ្តី ៧៦៥ កុមារី ៤៥៦នាក់ និងកុមារ ៦០២នាក់ ដោយបានផ្តល់ ជូននូវអវៈយវៈ សិប្បនិម្មិតចំនួន ២៦៤ រណប ៤៣៦ រទេះរុញ ១៦៨គ្រឿង ឈើច្រត់៣៦៨ និងសេវាព្យាបាលចលនា និងសេវាសង្គមផងដែរ។

ជនមានពិការភាព០៨នាក់ ត្រូវបានបញ្ជូនទៅសិក្សានៅសាលាចំណេះដឹងទូទៅ និងបញ្ជូនទៅបណ្តុះបណ្តាលវិជ្ជាជីវៈ បានជួសជុល និងសាងសង់ជម្រាលសម្រាប់ជនពិការនៅតាមសហគមន៍ចំនួន៤កន្លែង និងបញ្ជូនទៅវះកាត់ចំនួន៣២នាក់។

ចំពោះការកសាងសមត្ថភាពឡើងវិញ ដោយ បានបណ្តុះបណ្តាល លើប្រធានបទស្តីពី ពិការភាពសេវាស្តាលទ្ធភាពពលកម្ម និងដ្យាក្រាមបញ្ជូនប្រភេទពិការ ដល់បុគ្គលិកមន្ទីរសុខាភិបាល មន្ទីរពេទ្យខេត្ត មន្ទីរពេទ្យបង្អែក មណ្ឌលសុខភាព ចំនួន២០ និងក្រុមប្រឹក្សា ឃុំចំនួន២០ ផងដែរ ៕ ដោយ ៖ ប. សុផល

ភ្នំពេញ ៖ ក្រុមប្រឹក្សាឃុំ សង្កាត់ កាន់តែមានលទ្ធភាពច្រើនឡើងថែមទៀតក្នុងការដោះស្រាយ នូវតម្រូវការជាអាទិភាពនានានៅក្នុងមូលដ្ឋានរបស់ខ្លួន ដែលចាប់ពីឆ្នាំ២០២០ តទៅ រាជរដ្ឋាភិបាលនឹងទម្លាក់ ថវិកាបន្ថែមទៅឱ្យឃុំ សង្កាត់ នៅទូទាំងប្រទេសលើកលែងតែរាជធានីភ្នំពេញ ដោយរដ្ឋបាលឃុំ សង្កាត់ នីមួយៗនឹងទទួលបានការដំឡើងជាមធ្យមឱ្យឡើងដល់ ១២ម៉ឺនដុល្លារអាមេរិក ដែលក្នុងនោះថវិកា សម្រាប់ចំណាយទៅលើការអភិវឌ្ឍក្នុងមូលដ្ឋានមានប្រមាណជា ៧ម៉ឺនដុល្លារ ពោលគឺកើនឡើងទ្វេដង បើប្រៀបធៀបនឹង ឆ្នាំ២០១៩ នេះ។ នេះបើតាមការគូសបញ្ជាក់របស់ឯកឧត្តម សក់ សេដ្ឋា រដ្ឋលេ ខាធិការប្រចាំការក្រសួងមហាផ្ទៃ ក្នុងឱកាសនៃការបើកមហាសន្និបាតអាណត្តិទី៣ របស់សម្ព័ន្ធភាពជាតិ សមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ នាព្រឹកថ្ងៃទី២៦ ធ្នូ នេះ។

លោករដ្ឋលេខាធិការប្រចាំការក្រសួងមហាផ្ទៃ សក់ សេដ្ឋា បានបន្ថែមថា ជាងនេះទៅទៀត ការ ដំឡើងថវិកាដល់ឃុំ សង្កាត់ នឹងត្រូវបន្តកើនឡើងជារៀងរាល់ឆ្នាំដែលរហូតដល់ឆ្នាំ២០២៣ រដ្ឋបាលឃុំ សង្កាត់នីមួយៗនឹងទទួលបានជាមធ្យមចំនួនជាង ១៩ម៉ឺនដុល្លារអាមេរិក ដែលការកើនឡើងនូវចំនួន ថវិកានេះ នឹងធ្វើឱ្យឃុំ សង្កាត់ធំៗមួយចំនួនអាចទទួលបានកញ្ចប់ថវិការហូតទៅដល់ជាង ៤៥ម៉ឺនដុល្លារ អាមេរិកនៅត្រឹមឆ្នាំ២០២៣ មានដូចជាសង្កាត់ប៉ោយប៉ែតនៃក្រុងប៉ោយប៉ែត និងឃុំក្រែកនៃស្រុកពញា ក្រែក ខេត្តត្បូងឃ្មុំជាដើម។

ក្នុងឱកាសនេះ ក្នុងនាមសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក សក់ សេដ្ឋា បានសម្តែងនូវការអបអរសាទរចំពោះសមិទ្ធផលដែលសម្ព័ន្ធភាពជាតិសមាគម ក្រុមប្រឹក្សាក្រុង ស្រុក ខណ្ឌ ឃុំ សង្កាត់ សម្រេចបានក្នុងរយៈពេលពីរអាណត្តិរបស់ខ្លួនកន្លងមកនេះ និង បានជម្រុញឱ្យមន្ត្រីនៅតាមមូលដ្ឋាននីមួយៗ បង្កើននូវការយកចិត្តទុកដាក់ថ្មីៗបន្ថែមទៀត ក្នុងការបំរើ ប្រជាពលរដ្ឋនៅក្នុងមូលដ្ឋានរបស់ខ្លួន ជាពិសេសគឺការអភិវឌ្ឍនៅតាមមូលដ្ឋាន ខណៈដែលរាជរដ្ឋាភិ បាលបានយកចិត្តទុកដាក់ខ្ពស់ទៅលើការអភិវឌ្ឍនៅមូលដ្ឋាន តាមរយៈការបន្ថែមចំនួនថិកាទៅឱ្យរដ្ឋ បាលឃុំ សង្កាត់ ចាប់ពីឆ្នាំ២០២០ តទៅនោះ។

ក្នុងមហាសន្និបាតនេះ ប្រធានសម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ ដែលហៅកាត់ថា សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន លោក សយ កុសល មានប្រសាសន៍ថា សម្ព័ន្ធភាពជាតិមួយនេះ គឺជាស្ថាប័នតំណាងឱ្យក្រុមប្រឹក្សាក្រុង ស្រុក ខណ្ឌ ឃុំ សង្កាត់ ទូទាំងប្រទេស ដែលមានក្រុមប្រឹក្សាក្រុង ស្រុក ខណ្ឌ ចំនួន២០៣ និងក្រុមប្រឹក្សាឃុំ សង្កាត់ចំនួន១៦៤៦ ជាសមាជិក ដោយសម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់នេះ ត្រូវបានបង្កើតឡើងតាមរយៈ ការប្រមូលផ្តុំដោយស្ម័គ្រចិត្តនូវសមាគមក្រុមប្រឹក្សាថ្នាក់មូលដ្ឋាន ដើម្បីអនុវត្តសកម្មភាពក្នុងគោលបំណង ការពារ និងបំរើផលប្រយោជន៍រួមរបស់សមាជិក និងលើកកម្ពស់គុណភាពជីវិត និងសុខុមាលភាពរបស់ ប្រជាជន ដោយក្នុងរយៈពេលកន្លងមកនេះ សម្ព័ន្ធភាពជាតិបានធ្វើកិច្ចការងារនេះជាច្រើនមកហើយ ហើយនឹងបន្តធ្វើឱ្យមានសមិទ្ធផលថ្មីៗជាច្រើនបន្ថែមទៀត នៅក្រោយមហាសន្និបាតលើកទី៣ របស់ខ្លួន នាពេលនេះ៕

ខេត្តព្រះវិហារ ៖ នៅព្រឹកថ្ងៃពុធ ទី ២៥ ខែធ្នូ ឆ្នាំ២០១៩ នេះ កាកបាទក្រហមកម្ពុជា ដែលមាន បានសម្ពោធឱ្យប្រើប្រាស់អណ្តូងទឹកស្អាត ប្រភេទអាហ្រ្វីដេស ចំនួន ១៥អណ្តូង ជូនប្រជាពលរដ្ឋខ្វះខាតទឹកប្រើប្រាស់ចំនួន ៣៣២គ្រួសារ ស្មើនឹងមនុស្ស ៩៣៧នាក់ រស់នៅក្នុងភូមិចំនួន ៧ របស់ឃុំម្លូព្រៃ១ ឃុំម្លូព្រៃ២ និងឃុំសង្កែ២ ក្នុងស្រុកឆែប ខេត្តព្រះវិហារ។

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា និងលោកជំទាវ ចឹក ហេង អនុប្រធានអចិន្ត្រៃយ៍សាខាកាកបាទក្រហមកម្ពុជា ខេត្តព្រះវិហារ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីនឹករលឹក និងការគិតគូរពីសុខុមាលភាពរបស់លោកយាយលោកតា និងប្រជាពលរដ្ឋទាំងអស់។ ជាមួយគ្នានេះ សម្តេចកិត្តិព្រឹទ្ធបណ្ឌិត ក៏បានផ្តាំផ្ញេីជូនប្រជាពលរដ្ឋទាំងអស់សូមគិតគូរថែទាំសុខភាពឱ្យបានល្អ ពិសាទឹកដាំពុះ សម្អាតបរិស្ថាន និងលើកទឹកចិត្តដល់ប្រជាពលរដ្ឋចូលរួមប្រេីប្រាស់ទឹកដោយសន្សំសំចៃដោយសារតំបន់នេះអាចប្រឈមនឹងគ្រោះរាំងស្ងួត និងរួមគ្នាថែរក្សាសមិទ្ធផលអណ្តូងទឹកស្អាតទាំងនេះឱ្យបានគង់វង្សយូរអង្វែងតទៅ។

លោក យុង គឹមហ៊ាន នាយកប្រតិបត្តិសាខាកាកបាទក្រហមកម្ពុជា ខេត្តព្រះវិហារ បានឱ្យដឹងថា ចាប់តាំងពីឆ្នាំ២០១២ ដល់ឆ្នាំ២០១៩ នេះ ខេត្តព្រះវិហារ បានទទួលអណ្តូងទឹកស្អាត សរុបចំនួន ២៣៥ អណ្តូង ពីកាកបាទក្រហមកម្ពុជា ហើយជំនួសមុខឱ្យប្រជាពលរដ្ឋទាំងអស់ ឯកឧត្តម បានសំដែងនូវក្តីរំភើបរីករាយ និងការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែយកចិត្តទុកដាក់ គិតគូរ ជួយដោះស្រាយបញ្ហាទឹកស្អាត និងបំពេញសេចក្តីត្រូវការរបស់ប្រជាពលរដ្ឋជួបការលំបាក ដោយគ្មានការរើសអើងអ្វីឡើយ។

សូមបញ្ជាក់ថា ប្រជាពលរដ្ឋចំនួន ៦០នាក់ ដែលចូលរួមក្នុងពិធី សម្ពោធអណ្តូងនោះ ក៏ទទួលបានក្នុងម្នាក់ៗ សារុង១ ក្រមា១ និងថវិកា ២ម៉ឺនរៀលជាអនុស្សាវរីយ៍ដែរ៕ ដោយ ៖ ក. ប៊ុនហេង

ភ្នំពេញ ៖ នាយករដ្ឋមន្ត្រីនៃ ព្រះរាជាណាចក្រកម្ពុជា សម្តេចតេជោ ហ៊ុន សែន បានបញ្ជាក់ថា មរតកដូនតាដែលបានបន្សល់ទុកលើសពី ៥០ឆ្នាំឡើងទៅ នឹងត្រូវនាំគ្នាថែរក្សា និងអភិរក្ស ដោយគ្មានការរុះរើ ឬវាយកម្ទេចនោះទេ។ ចំពោះស្ពានថ្មចាស់សល់ពីសម័យបារាំង មានអាយុកាលជាង ១០០ឆ្នាំ ស្ថិតនៅមុខសាលាខេត្តបាត់ដំបង គឺត្រូវតែរក្សាទុកដាច់ខាត។

ថ្លែងនៅក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យ ភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច (RULE) នាព្រឹកម៉ិញនេះ សម្ដេចតេជោ ហ៊ុន សែន នាយករដ្ឋមន្ត្រី បានប្រាប់ទៅអាជ្ញាធរខេត្តបាត់ដំបង ត្រូវរកវិធីកុំឲ្យប្រជាពលរដ្ឋឆ្លងកាត់លើស្ពាននោះទៀត ជំនួសមកវិញដោយធ្វើស្ពានបន្ថែមនៅក្បែរនោះ ដោយមិនត្រូវវាយស្ពានចាស់ចោលនោះទេ។

សម្តេចតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានបញ្ជាក់ថា មរតកដូនតាដែលបានបន្សល់ទុកលើសពី ៥០ឆ្នាំឡើងទៅ នឹងត្រូវនាំគ្នាថែរក្សា និងអភិរក្សដោយគ្មានការរុះរើ ឬវាយកម្ទេចនោះទេ។
(សម្ដេចតេជោ ហ៊ុន សែន៖នាទីទី២០៖៣០៖ កន្លងទៅស្រាប់តែនាំគ្នាផ្អើលពេញហ្វេសប៊ុក ថាយើងនាំគ្នាប្រុងវាយស្ពាន សល់ពីសម័យបារាំងនៅបាត់ដំបង សូមបញ្ជាក់ រឿងអ្វីដែលបន្សល់ទុកលើសពី៥០ឆ្នាំទៅ គឺខិតខំរក្សា អាហ្នឹងក្លាយទៅជាសមិទ្ធផល អានោះជាង១០០ឆ្នាំ រឿងអីត្រូវទៅវាយចោល ខិតខំរក្សាវា ជួសជុលធ្វើម៉េចទប់ដើម្បីកុំឲ្យវាបាក់»)។

រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកជំទាវ ភឿង សកុណា កាលពីសប្តាហ៏មុន បានដាក់លិខិតទៅក្រសួងដែនដី ដើម្បីស្នើសុំឱ្យអ្នកជំនាញចុះពិនិត្យមើលស្ពានថ្មចាស់សល់ពីសម័យបារាំងមួយ ស្ថិតនៅមុខសាលាខេត្តបាត់ដំបង ក្នុងភូមិកម្មករ សង្កាត់ស្វាយប៉ោ។ លោកជំទាវ ភឿង សកុណា បញ្ជាក់ក្នុងលិខិតថា រដ្ឋបាលខេត្តបាត់ដំបង បានស្នើសុំគោលការណ៍ ដើម្បីអនុញ្ញាតរុះរើស្ពានថ្មចាស់សម័យបារាំងនោះ ប៉ុន្តែក្រសួងវប្បធម៌ និងវិចិត្រសិល្បៈ យល់ឃើញថា ពុំគួររុះរើឡើយ ដោយសារស្ពាននេះ មានអាយុកាលចំណាស់ជាង១០០ឆ្នាំ កសាងក្នុងសម័យអាណានិគមបារាំង និងជាសំណង់បេតិកភណ្ឌទីក្រុង នៅសេសសល់ នៅក្នុងប្រទេសកម្ពុជា ហើយមានតម្លៃជាប្រវត្តិសាស្ត្រ ស្ថាបត្យកម្ម នគរូបនីយកម្ម និងបរិស្ថាន។

ក្រសួងវប្បធម៌ ផ្ដល់យោបល់ថា ស្ពានថ្មចាស់នេះ ត្រូវបានគេចាត់ទុកជាមរតកដ៏កម្របន្សល់ទុកពីសម័យអាណានិគមបារាំង ម្ល៉ោះហើយស្ពាននេះ គួរត្រូវបានថែរក្សាទុក និងជួសជុលឡើងវិញ សម្រាប់ប្រើប្រាស់ជាស្ពានថ្មើរជើង។ រដ្ឋបាលសាលាខេត្តបាត់ដំបង កាលពីថ្ងៃទី១៣ ធ្នូ បានជូនដំណឹងហាមអ្នកដំណើរឆ្លងកាត់ស្ពានថ្មចាស់មុខសាលាខេត្ត ដើម្បីបង្ការគ្រោះថ្នាក់ ជាយថាហេតុពីការពុកផុយបាក់ស្រុត នៃស្ពានថ្មចាស់នេះ។ ស្ពានថ្មចាស់ នៅមុខសាលាខេត្តបាត់ដំបង បានកសាងនៅឆ្នាំ១៩១៦ ក្នុងសម័យអាណានិគមបារាំង។ មកដល់បច្ចុប្បន្ន ស្ពាននេះមានអាយុកាល ១០៣ឆ្នាំ។ កាលពីអំឡុងឆ្នាំ២០០០ ស្ពាននេះក៏ធ្លាប់បានស្នើសុំរុះរើ រួចម្ដងមកហើយ តែដោយសារមានប្រតិកម្ម ពីប្រជាពលរដ្ឋ អ្នកប្រវត្តិសាស្ត្រមួយចំនួន និងស្ថានទូតបារាំងផងនោះ ស្ពាននេះត្រូវបានជួសជុលទុក រហូតមកដល់បច្ចុប្បន្ន៕

ខេត្តកំពង់ចាម ៖ កម្លាំងអធិការដ្ឋាននគរបាលស្រុកស្ទឹងត្រង់ បានចុះបង្រ្កាបសង្វៀនបញ្ជល់មាន់អមដោយល្បែងអាប៉ោង ១វង់ ដកហូតបានតែវត្ថុ តាងម៉ូតូមួយចំនួន នៅកន្លែងកើតហេតុ រីឯអ្នកលេងបានរត់គេចអស់។

ប៉ូលិសបានអោយដឹងថា កិច្ចប្រតិបត្តិការបង្ក្រាបែល្បងស៊ីសង ដោយខុសច្បាប់(ជល់មាន់ និងអាប៉ោង) ផ្តើមឡើងនៅថ្ងៃទី២៥ ខែធ្នូ ឆ្នាំ២០១៩ វេលាម៉ោង ១៣ មានប្រជាពលរដ្ឋទូរស័ព្ទថា មានលេងល្បែងជល់មាន់ និងអាប៉ោង នៅចំណុចក្នុងចំការកៅស៊ូ តំបន់ 82 ស្ថិតនៅក្នុងទឹកដីភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម។

ប៉ូលិសបានបន្តថា ទទួលពត៌មានភ្លាមលោក ប៉ាក ជាតិ អធិការនគរបាលស្រុកស្ទឹងត្រង់ បានចាត់បញ្ជាកំលាំងជំនាញនៃអធិការដ្ឋាន នគរបាលស្រុកស្ទឹងត្រង់ សហការជាមួយកំលាំងនគរបលប៉ុស្តិ៍អារក្សត្នោត បានចុះទៅដល់កន្លែងកើតហេតុ។

ប៉ូលិសបានបន្តថានៅពេលកំលាំងសមត្ថកិច្ចចុះទៅដល់ក្រុមអ្នកលេងបានដឹងមុនបានរត់គេចខ្លួនបាត់អស់ដោយបន្សល់នូវវត្ថុតាងរួមមាន:.សង្វៀនជល់មាន់(ដោយមានចងខ្សែនីឡុងចំនួន១កន្លែងពុំមានប្រក់ដំបូលនឹងហ៊ុជាសង្វៀនទេ).ម៉ូតូចំនួន៧គ្រឿង.ស៊ុដែកសំរាប់ក្រុងមាន់ចំនួន៧.មេអាប៉ោងចំនួន៣គ្រាប់.តុហាន់តោអាប៉ោងចំនួន១.ចានសំរាប់បាញ់អាប៉ោងចំនួន១ ផ្ទិលជ័រសំរាប់គ្របចំនួន១.ជញ្ជើងប៉ុងចំនួន១នឹងបង់សំរាប់រុំជើងមាន់ចំនួន៤០ដុំ.កៅអីជ័រចំនួន៥.កៅស៊ូតង់ចំនូន១ផ្ទាំង ប៉ូលិសបានបញ្ជាក់ថា បច្ចុប្បន្នកំលាំងសមត្ថកិច្ចបានដឹកជញ្ជូនសំភារះវត្ថុតាងខាងលើយកទៅរក្សាទុកនៅអធិការដ្ឋាននគរបាលស្រុកស្ទឹងត្រង់ដើម្បីចងក្រងសុំណុំរឿងតាមនីតិវិធី៕