ភ្នំពេញ ៖ នៅព្រឹកថ្ងៃទី ៣ កុម្ភៈ នេះ សម្តេចតេជោ ហ៊ុន សែន នឹងដឹកនាំគណៈប្រតិភូជាន់ខ្ពស់កម្ពុជាទៅចូលរួមកិច្ចប្រជុំកំពូលនៃអង្គការសហព័ន្ធសន្តិភាពសកល (UPF) ស្តីពីសន្តិភាព សន្តិសុខ និងការអភិវឌ្ឍមនុស្ស ដែលរៀបចំឡើងនៅសាធារណរដ្ឋកូរ៉េ (កូរ៉េខាងត្បូង) ចាប់ពីថ្ងៃទី៣-៥ កុម្ភៈ ២០២០។

មន្ត្រីដែលអមដំណើរសម្តេចតេជោ រួមមាន ៖ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំងឥស្សរជនជាន់ខ្ពស់មួយចំនួននៃរាជរដ្ឋាភិបាល និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជា។ នៅក្នុងដំណើរអញ្ជើញទៅកូរ៉េខាងត្បូងនេះ សម្តេចតេជោនាយករដ្ឋមន្ត្រី ក៏នឹងជួបសំណេះសំណាលជាមួយសហគមន៍កម្ពុជា សិស្ស-និស្សិត និងពលករកម្ពុជា ដែលកំពុងរស់នៅ និងធ្វើការនៅកូរ៉េខាងត្បូងផងដែរ។

តាមសេចក្តីប្រកាសព័ត៌មានរបស់ក្រសួងការបរទេស បានឱ្យដឹងថា ក្នុងអំឡុងពេលស្នាក់នៅកូរ៉េខាងត្បូងនេះ សម្តេចតេជោនាយករដ្ឋមន្ត្រីនឹងអញ្ជើញជួបប្រជុំជាមួយ លោក មូន ចេអ៊ីន (Moon Jae-in) ប្រធានាធិបតីកូរ៉េខាងត្បូង ដើម្បីពិភាក្សាលើកិច្ចសហប្រតិបត្តិការទ្វេភាគី ក៏ដូចជាបញ្ហាតំបន់ និងអន្តរជាតិ ដែលជាការយកចិត្តទុកដាក់រួម។ សម្តេចតេជោ ក៏នឹងអញ្ជើញចូលរួមពិធីពិសាអាហារថ្ងៃត្រង់រៀបចំដោយ លោក ជុង សៃឃ្យូន (Chung Sye-kyun) នាយករដ្ឋមន្ត្រីកូរ៉េខាងត្បូងផងដែរ។

កិច្ចប្រជុំកំពូលពិភពលោក សម្តេចតេជោនាយករដ្ឋមន្រ្តី នឹងអញ្ជើញថ្លែងសុន្ទរកថាគន្លឹះ លើមូលបទរបស់កិច្ចប្រជុំកំពូលស្តីពី «សន្តិភាព សន្តិសុខ និងការអភិវឌ្ឍមនុស្ស» រួមជាមួយនឹងឥស្សរជនបរទេសមួយចំនួនទៀត ដែលចូលរួមកិច្ចប្រជុំកំពូលពិភពលោក២០២០ នៃអង្គការសហព័ន្ធសន្តិភាពសកល។

សូមបញ្ជាក់ថា អង្គការ UPF ជាបណ្តាញអន្តរជាតិ-អន្តរសាសនានៃក្រុមបុគ្គលក៏ដូចជាស្ថាប័ន រួមមានអ្នកតំណាងមកពីសាសនាផ្សេងៗ មកពីរដ្ឋាភិបាល សង្គមស៊ីវិល និងវិស័យឯកជនទាំងឡាយ ដែលមានគោលដៅខិតខំប្រឹងប្រែងកសាងសន្តិភាពសម្រាប់ពិភពលោក។ អង្គការ UPF ត្រូវបានបង្កើតឡើងដោយលោក Sun Myung Moon និងភរិយារបស់គាត់ គឺលោកស្រី Dr. Hak Ja Han Moon នៅឆ្នាំ២០០៥ មានតួនាទីផ្តល់យោបល់ពិសេស ជូនក្រុមប្រឹក្សាសេដ្ឋកិច្ច និងសង្គម នៃអង្គការសហប្រជាជាតិ។

ក្នុងនាមជាអង្គការក្រៅរដ្ឋាភិបាល ដែលមានឋានៈពិសេសក្នុងការប្រឹក្សាយោបល់ជាមួយក្រុមប្រឹក្សាសេដ្ឋកិច្ចនិងសង្គមនៃអង្គការសហប្រជាជាតិនោះ UPF គាំទ្រដល់កិច្ចការងារនានារបស់អង្គការសហប្រជាជាតិ ពិសេសក្នុងផ្នែកកសាងសន្តិភាពបែបចម្រុះសាសនា ការអប់រំអំពីសន្តិភាព ព្រមទាំងការពង្រឹងចំណងអាពាហ៍ពិពាហ៍និងគ្រួសារជាដើម៕

ភ្នំពេញ ៖ ក្នុងឆ្នាំ២០១៩ ភ្ញៀវទេសចរអន្តរជាតិមានចំនួនសរុប៦,៦១០,៥៩២នាក់មកទស្សនាកម្ពុជា កើនឡើង៦.៦% បើធៀបនឹងឆ្នាំ២០១៨។ នេះបើតាមការបញ្ជាក់ពីលោក ថោង ខុន រដ្ឋមន្ត្រីក្រសួងទេសចរណ៍កាលពីថ្ងៃទី០១ ខែកុម្ភៈ ឆ្នាំ២០២០។ លោកថា ទោះបីស្ថានភាពសេដ្ឋកិច្ចពិភពលោកជួបបញ្ហាប្រឈមមួយចំនួនក្តី ក៏កម្ពុជានៅការរក្សាបានកំណើនភ្ញៀវទេសចរ ដោយ សារតែមានសុខសន្តិភាព ស្ថិរភាពនយោបាយល្អ ធានាបាននូវសុខសុវត្ថិភាពជូនភ្ញៀវទេសចរ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ប្រមុខរាជរដ្ឋាភិបាលនៃកម្ពុជា។
លោករដ្ឋមន្ត្រីបញ្ជាក់ថា «ឆ្នាំ២០១៩ កម្ពុជាទទួលបានទេសចរអន្តរជាតិ ៦.៦១លាននាក់ ក្នុងកំណើន ៦.៦% ប្រៀប២០១៨ និងមានទេសចរកម្ពុជាធ្វើដំណើរចេញក្រៅប្រទេស ចំនួន២.០១លាននាក់ ក្នុងកំណើន២.០១% បើប្រៀបធៀប២០១៨»។
ចំនួនទេសចរអន្ដរជាតិផ្ទៃក្នុងទៅទស្សនាតំបន់អាទិភាព (ឆ្នាំ២០១៩ ធៀបនឹងឆ្នាំ២០១៨) រួមមាន ៖  តំបន់ភ្នំពេញ ទទួលបានទេសចរអន្ដរជាតិ ចំនួន៤,៤០៤,៨៩៥នាក់ ស្មើនឹង៥៥.៨ភាគរយ នៃចំនួនសរុបកើនឡើង ២២ភាគរយធៀបនឹងឆ្នាំ២០១៨។ សៀមរាបអង្គរ ទទួលបានទេសចរអន្ដរជាតិ ចំនួន២,២០៥,៦៩៧នាក់ ស្មើនឹង២៧.៩ភាគរយ នៃចំនួនសរុបថយចុះ១៤.៩ភាគរយ ធៀបនឹងឆ្នាំ២០១៨។ តំបន់ឆ្នេរសមុទ្រទទួលបានទេសចរអន្ដរជាតិ ចំនួន១,២០៤,៣៧៤នាក់ ស្មើនឹង១៥.៣ភាគរយ នៃចំនួនសរុបកើនឡើង ៣៧.៣ភាគរយ ធៀបនឹងឆ្នាំ២០១៨។ តំបន់អេកូទេសចរណ៍ភូមិភាគឦសាន្ដទទួលបានទេសចរអន្ដរជាតិ ចំនួន៨១,៥៨៨នាក់ ស្មើនឹង១ភាគរយនៃចំនួនសរុបកើនឡើង ៨.៦ភាគរយ ធៀបនឹងឆ្នាំ២០១៨ និងតំបន់ប្រាសាទព្រះវិហារ ទទួលបានទេសចរអន្ដរជាតិ ចំនួន៥៤,៦០៦នាក់ ថយចុះ ៣.៥ភាគរយ ធៀបនឹងឆ្នាំ២០១៨។
នៅឆ្នាំ២០១៩កន្លងទៅនេះ ទេសចរបរទេសសក្តានុពល ដែលបានមកដល់កម្ពុជារួមមាន ៖ ចិន ២,៣៦១,៨៤៩នាក់ កើនឡើង១៦.៧%។ វៀតណាម ៩០៨,៨០៣នាក់ កើនឡើង១៣.៦%។ ថៃ ៤៦៦,៤៩៣នាក់ កើនឡើង២២%។ ឡាវ ៣៦៣,៩៥១នាក់ ថយចុះ ១៤.៦%។ កូរ៉េ ២៥៤,៨៧៤នាក់ ថយចុះ ១៥.៥%។ អាមេរិក ២៤៨,៨៦៣នាក់ ថយចុះ ០.៨%។ ជប៉ុន ២០៧,៦៣៦នាក់ ថយចុះ ១.៣%។ ម៉ាឡេស៊ី ២០៣,០០៨នាក់ កើនឡើង០.៩%។ បារាំង ១៦៤,១១៧នាក់ ថយចុះ ៣.៩% និងអង់គ្លេស ១៦៣,១៧៧នាក់ កើនឡើង០.៥%។
ជាមួយគ្នានេះ លោករដ្ឋមន្រ្តីបញ្ជាក់ទៀថា ចំពោះទេសចរក្នុងស្រុកឆ្នាំ២០១៩ មានចំនួនប្រមាណ១១.៥លាននាក់កើន២.១% ប្រៀបធៀបនឹង២០១៨ ។ ដោយឡែកភ្ញៀវទេសចរកម្ពុជា ចេញទៅទេសចរនៅក្រៅប្រទេស មានចំនួន ២,០៣៨,២៨៤នាក់ កើនឡើង ២.១%៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា នយោបាយទណ្ឌកម្មសង្កត់លើប្រទេសតូច ជានយោបាយមិនត្រឹមត្រូវនោះឡើយ ប៉ុន្តែគួ ផ្តល់ជំរើសដល់ប្រទេសនោះ ដើរលើផ្លូវរបស់ខ្លួនសម្រាប់អភិវឌ្ឍប្រទេស។ ការបញ្ជាក់នេះ ធ្វើឡើងនៅក្នុងពិធីបិទសន្និបាតប្រចាំឆ្នាំរបស់ក្រសួងការបរទេសនិងសហប្រតិបត្តិការអន្តរជាតិ និងសហប្រតិបត្តិការអន្តរជាតិ នៅវិមានសន្តិភាព នៅព្រឹកថ្ងៃទី៣១ ខែមករា នេះ។

ថ្លែងនៅចំពោះមុខមន្ត្រីការទូតកម្ពុជា រាប់រយនាក់ នៅវិមានសន្តិភាព នៅព្រឹកថ្ងៃ ទី ៣១ ខែមករា សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា សហគមន៍ អន្តរជាតិ គប្បីជួយកម្ពុជាឱ្យបានខ្លាំងឡើង ឯកភាពរឹងមាំឡើង ជាជាងបំបែកបំបាក់ បន្ទុច បង្អាក់ឱ្យចុះខ្សោយ តាមវិធានការដែលនឹងអាចក្លាយជាកំហុសលើកទី៣ របស់ខ្លួន។ សម្តេចសង្កត់ធ្ងន់ថា នយោបាយទណ្ឌកម្មសង្កត់លើប្រទេសតូច ជានយោបាយមិនត្រឹម ត្រូវ នោះឡើយ ប៉ុន្តែគួរផ្តល់ជំរើសដល់ប្រទេសនោះ ដើរលើផ្លូវរបស់គេ ដើម្បីអនុវត្តបែប ផែននយោបាយ របស់ប្រទេសទាំងនោះ ដោយមិនគួរបង្ខំឲ្យប្រទេសតូច ត្រូវជ្រើសរើសអ្វី មួយទៅតាមបន្ទាត់នយោបាយរបស់ខ្លួននោះឡើយ។ សម្តេចកត់សំគាល់ថា ភាពអន្តរាយ នានាដែលកើតឡើងថ្មីៗនេះ គឺបានកើតឡើងដោយសារការជ្រៀតជ្រែក របស់មហា អំណាចធំៗ ក្នុងនាមនៃការស្តារលទ្ធិប្រជាធិបតេយ្យ ចូលកិច្ចការផ្ទៃក្នុងរបស់ប្រទេស អធិបតេយ្យដូចគ្នា នៅតំបន់មជ្ឈឹមបូព៌ា អាហ្វ្រិក អាមេរិកឡាទីន ឬនៅអាស៊ី។

សម្តេចតេជោ បន្ថែមថា ការប្រើលេសស្តីពីការលើកស្ទួយលទ្ធិប្រជាធិបតេយ្យ និងសិទ្ធិ មនុស្ស តាមស្តង់ដារទ្វេ និងមិនសមស្រប ដើម្បីជ្រៀតជ្រែកចូលកិច្ចការផ្ទៃក្នុង ប្រទេស ទីទៃ តាមការប្រើប្រាស់ឧបករណ៍ នយោបាយនិងសេដ្ឋកិច្ច នឹងបន្តដាក់សម្ពាធ ធ្ងន់ធ្ងរលើ ប្រទេសទន់ខ្សោយ រាប់ទាំងកម្ពុជាផង។ ស្ថានការណ៍បែបនេះ តម្រូវឱ្យកម្ពុជាប្រកាន់ នយោបាយការបរទេសមួយ ដែលបំរើ លើកស្ទួយ និងការពារផលប្រយោជន៍ គោលរបស់ ជាតិ តាម រយៈការពារឯករាជ្យ អធិបតេយ្យ បូរណភាពទឹកដី អព្យាក្រឹត្យភាព រក្សាការពារ ឱ្យបានគត់ម៉ុតនូវ សន្តិភាព សន្តិសុខ ស្ថិរភាព សណ្តាប់ធ្នាប់ និងឯកភាពសង្គម។ ពិសេសអនុវត្តនយោបាយ «បង្កើនមិត្តខាងក្រៅ ដោយឈរលើស្មារតីឯករាជ្យជាតិ»។

បើតាម លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិ ការអន្តរជាតិបានឲ្យដឹងថា កម្ពុជាបានភ្ជាប់ទំនាក់ទំនងការទូតជាមួយប្រទេសចំនួន១៧៤ ហើយមានស្ថានតំណាងប្រចាំនៅបរទេសចំនួន៦៣។ កម្ពុជាបានទិញអគាររៀបចំស្ថានទូតនៅទីក្រុងអង់ការ៉ា ចាប់ផ្តើមជួសជុលស្ថានទូត យើង នៅក្រុងសូហ្វីយ៉ា និងបែលក្រាដ ព្រមទាំងបើកស្ថានអគ្គកុងស៊ុលថ្មីនៅទីក្រុងហៃគូ។ ក្រសួងបានបង្កើតកិច្ចពិគ្រោះយោបល់នយោបាយទ្វេភាគីចំនួន៨បន្ថែមទៀត ធ្វើឱ្យចំនួន សរុបកើនដល់៣៤៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាន ឯកភាពឲ្យ ក្រសួងការបរទេសបើកស្ថានទូតពីរទៀតនៅទ្វីបអាហ្រ្វិក និងអាមេរិកឡាទីន នៅឆ្នាំ ២០២០ និង២០២១ ជាមួយនឹងការត្រៀមថវិកាដើម្បីដំណើរការស្ថានទូត។

ការឯកភាពរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅពេលនេះ គឺ ក្រោយពីមានសំណើសុំបើកស្ថានទូតបន្ថែមពីររបស់ឧបនាយករដ្ឋមន្ត្រីរដ្ឋមន្ត្រីការបរទេស លោក ប្រាក់ សុខុន ក្នុងសន្និបាតបូកសរុបការងារឆ្នាំ២០១៩ និងលើកទិសដៅការងារ ថ្មីឆ្នាំ ២០២០។ បច្ចុប្បន្ននៅទ្វីបអាហ្វ្រិក កម្ពុជាមានស្ថានទូតតែមួយប៉ុណ្ណោះនៅទីក្រុងគែ ប្រទេស អេហ្ស៉ីប ដោយឡែកនៅអាមេរិកឡាទីន មិនទាន់មាននោះឡើយ។

លោក ឧបនាយករដ្ឋមន្ត្រី ប្រាក់ សុខុន បានបញ្ជាក់ថា ការបង្កើនចំនួនស្ថាន បេសកកម្ម នៅលើពិភពលោក គឺជាការដាក់ទម្ងន់បន្ថែមនៅលើស្មាសម្រាប់រាជរដ្ឋាភិបាល។ ប៉ុន្តែ កម្ពុជា សង្ឃឹមមុតមាំថា រាជរដ្ឋាភិបាលនឹងផ្តល់ក្តោងកាន់តែធំ ខណៈទូករបស់ កម្ពុជារីក កាន់តែធំ ដើម្បីស្រូបខ្យល់រុញទូកក្នុងល្បឿនមួយ ដែលស្របនឹងល្បឿននៃការវិវត្តន៍ សភាពការណ៍ និងការផ្លាស់ប្តូរនៃពិភពលោក។ លោក ឧបនាយករដ្ឋមន្ត្រី បានឲ្យដឹងថា កម្ពុជាបានភ្ជាប់ទំនាក់ទំនងការទូតជាមួយប្រទេសចំនួន១៧៤ ហើយមានស្ថានតំណាង ប្រចាំនៅបរទេសចំនួន៦៣។ កម្ពុជាបានទិញអគាររៀបចំស្ថានទូតនៅទីក្រុងអង់ការ៉ា ចាប់ ផ្តើមជួសជុលស្ថានទូតយើងនៅក្រុងសូហ្វីយ៉ា និងបែលក្រាដ ព្រមទាំងបើកស្ថានអគ្គ កុងស៊ុល ថ្មី នៅទីក្រុងហៃគូ។ ក្រសួងបានបង្កើតកិច្ចពិគ្រោះយោបល់នយោបាយទ្វេភាគីចំនួន៨បន្ថែមទៀត ធ្វើឱ្យចំនួន សរុប កើនដល់៣៤៕

ភ្នំពេញ ៖ តូបលក់ខោអាវក្បែររោងចក្រកាត់ដេរត្រូវភ្លើងឆេះលេបត្របាក់អស់ទាំងស្រុងក្រោយពេលភ្លើងមួយមេធ្លាក់យ៉ាងខ្លាំងបណ្តាលអោយឆ្លងចរន្តប្រអប់បង្គោលភ្លើងរាលឆេះតូបលក់ខោអាវប្រជាពលរដ្ឋអស់មួយល្វែងស្មើនិង៣០តូបដែលនៅជាប់និងបង្គោលភ្លើង។
ហេតុការណ៏ភ្ញាក់ផ្អើលខាងលើនេះបានកើតឡើងកាលពីវេលាម៉ោង៤ជិតភ្លឺថ្ងៃទី៣១ខែមករាឆ្នាំ២០២០ស្ថិតនៅតាមបណ្តោយផ្លូវវែងស្រេង(ផ្លូវចោមចៅ)។
ប្រភពព័ត៍មាននៅកន្លែងកើតហេតុបានអោយដឹងថាមុនពេលកើតហេតុមានភ្លើងមួយមេធ្លាក់យ៉ាងខ្លាំងបណ្តាលអោយឆ្លងចរន្តប្រអប់បង្គោលភ្លើងចេញជាអណ្តាតភ្លើងយ៉ាងសន្ធសន្ធៅរាលឆ្លងឆេះតូបផ្សារលក់ខោអាវអស់មួយល្វែង។
ក្នុងហេតុការណ៏អគ្គីភ័យខាងលើនេះសមត្ថកិច្ចបានបញ្ជូនរថយន្តពន្លត់អគ្គីភ័យចំនួន៦គ្រឿងទៅជួយបាញ់ទប់ស្កាត់កុំអោយមានការរីករាលដាលដល់ផ្ទះប្រជាពលរដ្ឋដែលនៅក្បែៗកន្លែងកើតហេតុ
ហើយអគ្គីភ័យនេះត្រូវបានរលត់ជាស្ថាពរទៅវិញនៅវេលាម៉ោង៥និង៣០នាទីព្រឹកថ្ងៃដដែល។
សមត្ថកិច្ចបានបញ្ជាក់អោយដឹងថាមូលហេតុនៃការឆេះតូបលក់ខោអាវខាងលើគឺបណ្តាលមកពីឆ្លងចរន្តខ្សែរភ្លើងខណះភ្លើងមួយមេបានធ្លាក់យ៉ាងខ្លាំង។
ក្នុងហេតុការណ៏ខាងលើនេះពុំមាននណាម្នាក់រងរបួសនោះទេគ្រាន់តែខូចខាតអស់តូបមួយល្វែងចំនួន៣០កន្លែងនិងម៉ូតូមួយគ្រឿងរួមនិងខោអាវមួយចំនួនធំ៕

ខេត្តព្រះវិហារ ៖ មានសេចក្តីរាយមកថា ដីស្នាក់ការមុខព្រួញអចិន្ត្រៃយ៍ស្ថិតភូមិធម្មជាតិ ឃុំស្រអែម ស្រុកជាំក្សាន្ត ត្រូវបានលោកឧត្តមសេនីយ៍ត្រី ប៉ូច សុជា អតីតប្រធានស្នាក់ការមុខព្រួញអចិន្ត្រៃយ៍ការិយាល័យទី២នៃកងទ័ពជើងគោកប្រចាំទិសព្រះវិហារនិងបច្ចុប្បន្នមានតួនាទីនាយរងអធិការកិច្ចកងទ័ពជើងគោក បានប្រើអំណាចរំលោភយកដីស្នាក់ការខាងលើចែកគ្នីគ្នា និងលក់បន្តជាច្រើនដំណាក់ ប៉ុន្តែលោក ប៉ូច សុជា បានបដិសេធចំពោះព័ត៌មានខាងលើនេះ។

បើយោងតាមប្រភពពីមន្ត្រីក្នុងស្រុក បានបង្ហើបថា ដីស្នាក់ការនោះ មានទទឹងជាង១០០ម៉ែត្រ ជាប់ថ្នល់កៅស៊ូ និងបណ្តោយ២០០ម៉ែត្រ ត្រូវបានលោកផ្កាយ ១រូបនេះយកធ្វើជាកម្មសិទ្ធិបុគ្គលលក់អោយឈ្មួញយ៉ាងរំភើយ ដោយគេព័ទ្ធរបងយកស្ទើរជាន់បង្គោលដងទងជាតិទៅហើយ។

ពលរដ្ឋដែលរស់នៅក្នុងភូមិឃុំខាងលើ ដែលដឹងពីប្រវត្តិនោះថាដីស្នាក់ការខាងលើ គេកាត់លក់ និងចែកគ្នាតាំងពីជំនាន់លោក ប៉ូច សុជា នៅគ្រប់គ្រងមកម្ល៉េះ ទើបតែបែកធ្លាយពេលថ្មីៗនេះ ក្រោយពីគេធ្វើរបងព័ទ្ធកំណត់ព្រំដី។ ពលរដ្ឋបន្តថាមិននឹកស្មានដល់ដីស្នាក់ការមុខព្រួញអចិន្ត្រៃយ៍(ដឺបេ)ខាងលើដែលជាសម្បត្តិរដ្ឋ និងរបស់ក្រសួងការពារជាតិត្រូវបានរំលោភយកក្រោមស្នាដៃលោកឧត្តមសេនីយ៍ត្រី ប៉ូច សុជា អញ្ចឹងសោះ។ ឥឡូដីនោះ នៅសល់ទទឹងតែជាង ១០ម៉ែត្រ និងបណ្តោយជាង៥០ម៉ែត្រប៉ុណ្ណោះ ក្រៅពីនេះ គេលក់អស់ហើយ។

ចំពោះករណីនេះ ត្រូវបានមហាជនដាក់ការសង្ស័យថា អាចមានការឃុបឃិតគ្នាជាប្រព័ន្ធក្នុងស្ថាប័នការិយាល័យទី ២នៃកងទ័ពជើងគោក(ដឺបេ)ទើបគេអាចប្រព្រឹត្តទៅបានយ៉ាងរលូនបែបនេះ។

ជុំវិញការលើកឡើងនេះ លោកឧត្តមសេនីយ៍ត្រី ប៉ូច សុជា អតីតៈប្រធានស្នាក់ការ(ដឺបេ)ប្រចាំទិសព្រះវិហារបានអោយភ្នាក់ងារព័ត៌មានដឹងនៅព្រឹកថ្ងៃទី២៩ ខែមករា ឆ្នាំ២០២០ នេះថា ដីនោះ លោកមិនបានរំលោភពុះលក់ ឬចែកគ្នាទេ គឺឯកឧត្តម ដុំ ហាក់ អតិតមេ(ដឺបេ)កងទ័ពជើងគោកបច្ចុប្បន្ន(ស្លាប់)ជាអ្នកបែងចែកអោយមន្ត្រីក្រោមឱវាទខ្លះ និងអោយកូនក្មួយគាត់ខ្លះ។

ចំណែកលោក គុយ សាវ៉ាត់ ប្រធាន(ដឺបេ)មណ្ឌល៤(ភូមិភាគ៤)បានថ្លែងថា បញ្ហានេះលោកអត់បានដឹងទេ ព្រោះលោកទើបតែទទួលការងារបន្តពីអតីតៈមេមុនៗ គឺគេប្រគល់ដីស្នាក់ការអោយតែ ១៧ម៉ែត្រប៉ុណ្ណោះ។

ដោយឡែក មានករណីស្រដៀងគ្នានេះដែរ លោកឧត្តមសេនីយ៍ត្រី ប៉ូច សុខជា នាយរងការិយាល័យអធិការកិច្ចកងទ័ពជើងគោក ឈរជើងទិសប្រាសាទព្រះវិហារ បានថ្លែងបញ្ជាក់ថា លោកមិនបានរំលោភយកដីរបស់គេចំនួន ៥ម៉ែត្រ នៅភូមិអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ ដូចការផ្សព្វផ្សាយតាមបណ្តាញសង្គមនោះទេ។

លោកឧត្តមសេនីយ៍ត្រី ប៉ូច សុខជា បានរៀបរាប់ប្រវត្តិដីទំនាស់ឲ្យដឹងថា ដីនេះដំបូងឡើយគឺលោកបានប្រគល់ឲ្យលោក សុក ហៃ អតីតអភិបាលស្រុកជាំក្សាន្ត បច្ចុប្បន្នជាអភិបាលរងខេត្តកំពង់ធំ ដែលមានទំហំ ២០ម៉ែត្រ គុណ១៥០ម៉ែត្រ ដោយឥតគិតថ្លៃ លុះក្រោយមកលោក សុក ហៃ បានលក់ដីនេះបន្តទៅឲ្យលោកស្រី ឌុច គឹមយ៉ាន ហើយក្រោយមកទៀតចេះតែមានការលក់ទិញបន្តគ្នារហូតមក៕

ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិកម្ពុជា នៅព្រឹកថ្ងៃទី៣០ ខែមករា ម្សិល មិញនេះ បានរៀបចំសន្និបាតប្រចាំឆ្នាំ២០២០ របស់ខ្លួនរយៈពេលពីរ ថ្ងៃគឺថ្ងៃទី៣០ ដល់ថ្ងៃ ទី៣១ ខែមករា ឆ្នាំ២០២០ ដើម្បីពិនិត្យឡើងវិញពីសកម្មភាព និងការប្រឈមនានា នៅក្នុង ឆ្នាំ២០១៩ ព្រមទាំងកំណត់ទិសដៅការទូត និងការងារសម្រាប់ឆ្នាំ២០២០។
សន្និបាតបូកសរុបការងារប្រចាំនេះប្រព្រឹត្តិក្រោមវត្តមាន ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងមានការចូល រួម ពីថ្នាក់ដឹកនាំ មន្ត្រីរាជការ ឯកអគ្គរាជទូត តំណាងអចិន្ត្រៃយ៍ អគ្គកុងស៊ុល កុងស៊ុល កិត្តិយស និងតំណាងក្រសួង-ស្ថាប័ន ពាក់ព័ន្ធជាច្រើន។
ឯកឧត្តម ប្រាក់ សុខុន បានចាត់ទុកសន្និបាតប្រចាំឆ្នាំនេះ ផ្តល់នូវកាលានុវត្តភាព សម្រាប់ អ្នកការទូតកម្ពុជា អាចពង្រីកចំណេះដឹងប្រតិបត្តិ និងកម្រិតវិភាគកាន់តែទូលំទូលាយ លើ បញ្ហាសំខាន់ៗ ដែលពាក់ព័ន្ធនឹងបច្ចុប្បន្នភាពសេដ្ឋកិច្ចកម្ពុជា ស្ថានភាពវិនិយោគ បរទេស នៅកម្ពុជា និងយុទ្ធសាស្ត្រសមាហរណកម្មពាណិជ្ជកម្មរបស់កម្ពុជា ដើម្បីពង្រឹងការទូត សេដ្ឋកិច្ចប្រកបដោយប្រសិទ្ធភាព នៅលើឆាកអន្តរជាតិ។
ឯកឧត្តមឧបនាយករដ្ឋមន្រ្តីបញ្ជាក់ផងដែរថា កិច្ចប្រជុំលើប្រធានបទនានា ពាក់ព័ន្ធនឹងការ ងារហិរញ្ញវត្ថុ ការងារការទូតសេដ្ឋកិច្ច ការរៀបចំធ្វើជាម្ចាស់ផ្ទះ ASEM-13 និងការ ពិភាក្សា ជាក្រុមៗ ស្តីពី វិធានការ និងមធ្យោបាយ ដើម្បីបង្កើនប្រសិទ្ធភាព ក្នុងការអនុវត្តការងារ ធំ ៗ ទាំង៥របស់ក្រសួង បានចាប់ដំណើរការ២ថ្ងៃរួចមកហើយ។ នារសៀលនេះ ថ្នាក់ដឹក នាំ ក្រសួង និង ឯកអគ្គរាជទូត អគ្គកុងស៊ុលទាំង១៤៨នាក់ នឹងប្រជុំចង្អៀត ដើម្បីពិភាក្សាលើ បញ្ហាសំខាន់ៗពាក់ព័ន្ធនឹងការងារការទូត និង រកវិធីដោះស្រាយបញ្ហាលំបាក និងរសើប នានាដែលបានជួបប្រទះក្នុងឆ្នាំកន្លងមក។ លទ្ធផលសំខាន់ៗ នៃកិច្ចពិភាក្សាទាំងនេះ នឹង ត្រូវបូកសរុបរាយការណ៍ ជូនសម្តេចតេជោនាយករដ្ឋមន្រ្តី នាពិធីបិទសន្និបាត ដើម្បីទទួល នូវអនុសាសន៍ណែនាំដ៏ខ្ពង់ខ្ពស់បំផុតពីសម្តេច។
យ៉ាងណា ឯកឧត្តម ប្រាក់ សុខុន បានបញ្ជាក់ជូនថា ឆ្នាំ២០២០ និងបណ្តាឆ្នាំទៅមុខ ពិភព លោកនឹងបន្តវិវឌ្ឍនៅលើផ្លូវដ៏លំបាក ស្មុគស្មាញ ពិបាកប៉ាន់ស្មានបាន ក្នុងដំណើរ ទៅរក របបពហុប៉ូល។ ការប្រកួតប្រជែង រវាងមហាអំណាចធំៗ នឹងបន្តក្នុងលក្ខណៈស្វិត ស្វាញ ជះឥទ្ធិពលដោយផ្ទាល់ និងមិនផ្ទាល់ដល់ដំណើរ និងកិច្ចការពិភពលោកទាំងវិស័យ នយោ បាយ សេដ្ឋកិច្ច យោធា សន្តិសុខ និងបច្ចេកវិទ្យា។
ប្រព័ន្ធពហុភាគីនិយមនឹងបន្តទទួលសម្ពាធខ្លាំងក្លាដោយសារតែការកើនឡើងនៃទំនោរឯកតោភាគីនិយម។ សង្រ្គាមពាណិជ្ជកម្ម និងការប្រកាន់ នយោបាយគាំពារ និយមក៏នឹង បង្កហានិភ័យច្រើនដល់សេដ្ឋកិច្ច ពាណិជ្ជកម្ម និងហិរញ្ញវត្ថុតំបន់ និងពិភពលោក។ ភាព តានតឹង និងភ្នក់ជំលោះនៅតំបន់មួយចំនួន នឹងបង្កអស្ថិរភាព និងភាពមិនប្រាកដ ប្រជា ទាំងសំរាប់តំបន់នោះផង ទាំងសំរាប់ពិភពលោកផងដែរ។ សម្រាប់ការកែទំរង់នៅក្នុងក្រសួង ក៏ត្រូវបានឯកឧត្តមរដ្ឋមន្រ្តីបញ្ជាក់ផងដែរថា លក្ខខណ្ឌ ការងារសំរាប់ មន្ត្រីត្រូវបានកែលំអ ដោយមានរបបប្រាក់រង្វាន់សំរាប់មន្ត្រី និងបុគ្គលិកក្នុង ក្រសួង ការតំឡើងប្រាក់ខែជូនមន្ត្រីការទូតនៅឯក្រៅប្រទេស ការបង្កើនកញ្ចប់ថវិកា ចំណាយទូទៅសំរាប់ស្ថានតំណាងនៅបរទេស ការកែលំអកន្លែងធ្វើការ ការបង្កើត វិទ្យា ស្ថានដើម្បីបំពាក់បំប៉ននិងបណ្តុះបណ្តាលមន្ត្រីការទូតជាដើម។ ប៉ុន្តែអ្វីដែលសំខាន់ជាងគេ គឺការដាក់បញ្ចូលប្រព័ន្ធគុណធិបតេយ្យក្នុងការជ្រើសរើស តែង តាំង តំឡើងឋានៈ តួនាទីមន្ត្រី ដែលជាមធ្យោបាយតែមួយគត់ ដើម្បីធានាគុណភាព ប្រសិ ទ្ធិ ភាព ការងារ និងសមធម៌នៅក្នុងក្រសួង ដើម្បីធានាថា មន្ត្រីការទូត អ្នកមានសមត្ថភាព ពេញលេញ ជំនាញ វិជ្ជាជីវៈខ្ពស់ រៀងវៃ និងស្មោះត្រង់ ក្នុងការការពារផលប្រយោជន៍ គោលរបស់ជាតិ និងប្រជាជន ជាគោលដៅនិងមហិច្ឆតាតែមួយគត់ ដែលប្រទេសជាតិនិង ប្រជាជនចង់បានពីអ្នកការទូតទាំងអស់គ្នា។
សូមបញ្ជាក់ថា សន្និបាតបូកសរុបការងារប្រចាំឆ្នាំនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា នឹងអញ្ជើញជាអធិបតីដ៏ខ្ពង់ខ្ពស់ ក្នុងពិធីបិទសន្និបាតនេះ នៅវិមានសន្តិភាព ដើម្បីផ្តល់អនុសាសន៍ និងការណែនាំដ៏មានតម្លៃសម្រាប់ អ្នកការទូត កម្ពុជា ក្នុងការអនុវត្តបេសកកម្មការទូត។ ក្នុងឱកាសនោះ សម្តេចតេជោនាយករដ្ឋមន្ត្រី នឹងអញ្ជើញប្រកាសជាផ្លូវការការទទួលធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ ឆ្នាំ២០២០ នៅកម្ពុជាហើយអង្គទូតបរទេសប្រចាំកម្ពុជា ក៏នឹងត្រូវបានអញ្ជើញ ឲ្យចូលរួមផងដែរ៕

ភ្នំពេញ ៖ ដើម្បីឲ្យមានភាពទាក់ទាញ ដល់ភ្ញៀវទេសចរជាតិ និងអន្តរជាតិ រដ្ឋបាលរាជធានី ភ្នំពេញ បានពិភាក្សា លើផែនការបង្កើត កញ្ចប់ទេសចរណ៍ ថ្មើរជើងថ្មីមួយកន្លែង ក្នុងរាជ ធានីភ្នំពេញ ស្របតាមដងទន្លេសាប ចាប់ពីតំបន់រមណីយដ្ឋានវត្តភ្នំ ដល់មុខព្រះបរម រាជវំាង ។

នៅក្នុងកិច្ចប្រជុំ ក្រុមការងារបច្ចេកទេស ដឹកនាំដោយ លោក ឃួង ស្រេង អភិបាលរាជ ធានីភ្នំពេញ នៅសាលារាជធានីភ្នំពេញ ក្រុមការងារពិសេសរបស់រដ្ឋបាលរាជធានីភ្នំពេញ បានចុះសិក្សាពីបញ្ហាផ្សេងៗ និងកំណត់ ទីតំាងមួយចំនួន ដើម្បីឆ្ពោះទៅបង្កើតផ្លូវថ្មើរជើង ដែលចេញពីមុខប្រៃសណីយ៍កម្ពុជា រហូតដល់តំបន់ មុខព្រះបរមរាជវាំង នាពេលឆាប់ៗ ខាងមុខនេះ ដើម្បីឆ្លើយតប ទៅនឹងតម្រូវការភ្ញៀវទេសចរជាតិ និងអន្តរជាតិ។

លោក ឃួង ស្រេង អភិបាលរាជធានីភ្នំពេញ បានឲ្យដឹងថា គម្រោងបង្កើតផ្លូវថ្មើរជើង នេះ នឹងក្លាយជាកញ្ចប់ទេសចរណ៍ថ្មី សម្រាប់រាជធានីភ្នំពេញ ដើម្បីទាក់ទាញភ្ញៀវទេសចរ អោយមកលេងរាជធានីភ្នំពេញ បានកាន់តែច្រើន។ លោក អភិបាល បានបញ្ជាក់ថា ផ្លូវ ថ្មើរជើងនេះនេះ ភ្ញៀវទេសចរអាចមានជម្រើស  ដើរ លេងកម្សាន្តច្រើន ដូច ជានៅតំបន់ រមណីយដ្ឋានប្រវត្តិសាស្រ្ត វត្តភ្នំ សួនកុមារ ប្រៃសណី ផ្សាររាត្រី តំបន់ទេសភាពមាត់ទន្លេ ដ៏ស្រស់ស្អាត វត្តឧណ្ណាលោម សារៈមន្ទីរជាតិ ព្រះបរមរាជវំាង ដែលធ្វើឲ្យភ្ញៀវដើរទស្សនា  កម្សាន្តសប្បាយ ប្រកបដោយភាពរីករាយ។ ក្នុងកិច្ចប្រជុំនោះដែរ ឯកឧត្តមអភិបាល បាន ណែនាំដល់ក្រុមការងារ ឱ្យសិក្សាពីពេល វេលា ប្រព័ន្ធបញ្ជៀសចរាចរណ៍ និងកន្លែង ចំណតយានយន្ត អោយបានត្រឹមត្រូវ ដើម្បីអោយ កញ្ចប់សេវាទេសចរណ៍ថ្មីនេះ បានធ្វើ ដំណើរការដោយរលូន គ្មានការរំខានដល់ប្រជាពល រដ្ឋ ។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា អាជ្ញាធរត្រៀមកែលម្អផ្លូវ ចិញ្ចើមផ្លូវ សួនច្បារ ដាំដើមឈើ និងភ្លើងលម្អពណ៌ នាពេល រាត្រី រួមទំាងផ្សាររាត្រី ផាប់ស្ទ្រីត ផ្សារណាត់ ផ្សារកសិផល ក្លឹបកម្សាន្ត ស្កាយបា កន្លែង លក់វត្ថុអនុស្សាវរីយ ផលិតផលកសិកម្ម ចំណតយានយន្ត និងចំណតផែទូកទេសចរណ៍ ដែលឆ្លើយតបទៅ នឹងតម្រូវការ នៃការបង្កើតផ្លូវថ្មើរជើង ប្រកបដោយភាពទាក់ទាញ់ ។

ប្រធានមន្ទីរសាធារណការ ក៏បានបញ្ជាក់ថា គម្រោងកែលម្អទំាងនេះ  គឺមានភាពបន្ស៊ីគ្នា ដែលធានាបានសុខដុម នីយកម្មរវាងវិស័យទេសចរណ៍ និងការរៀបចំហេដ្ឋារចនា សម្ព័ន្ធ ទីក្រុង ពោលគឺធានាបាន សណ្តាប់ចរាណ៍ និងមិនរំខាន់ដល់ផ្លូវថ្មើរជើង។

សូមបញ្ជាក់ថា កញ្ចប់ទេសចរណ៍ផ្លូវថ្មើរជើងនេះ  អាចបង្កើតឡើងក្នុងមួយសប្តាហ៍ ចំនួន ៣ថ្ងៃ គឺចាប់ពីថ្ងៃសុក្រ ថ្ងៃសៅរ៍ និងថ្ងៃអាទិត្យ ចាប់ពីម៉ោង១៦រសៀល ដល់ម៉ោង១២យប់ ហើយមិនអនុញ្ញាតិ អោយមានយាន្តជំនិះផ្សេងៗ ឆ្លងកាត់ឡើយ គឺសម្រាប់តែថ្មើរជើង តែ ប៉ុណ្ណោះ។គម្រោងបង្កើតកញ្ចប់ទេសចរណ៍ ថ្មើរជើងនេះ បានធ្វើឡើង ក្រោមកិច្ចសហការ  រវាងរដ្ឋបាលសាលារាជធានីភ្នំពេញ និងក្រសួងទេសចរណ៍ ក្រោមការចង្អុលបង្ហាញ ពី ឧបនាយករដ្ឋមន្រី្ត អូន ព័ន្ធមុន្នីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ៕

ភ្នំពេញ ៖ ហង្ស សាមឿន អនុប្រធានគណៈកម្មាធិការជាតិគ្រប់គ្រងគ្រោះ មហន្ត រាយ តំណាង នាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធានទី១ គណៈ កម្មាធិការជាតិគ្រប់គ្រងគ្រោះមហន្តរាយ នៅព្រឹកថ្ងៃទី៣០ ខែមករា នេះ បានដឹកនាំកិច្ច ប្រជុំជាមួយតំណាងក្រសួងសុខាភិបាល និងក្រសួង កសិកម្ម រុក្ខាប្រមាញ់ និងនេសាទ ដើម្បីត្រៀមបង្ការជំងឺរលាកផ្លូវដង្ហើម កូរ៉ូណា ខណៈដែលមានការអះ អាងថា កម្ពុជាអាច គ្រប់គ្រងសភាពការណ៍នេះបាន។

ថ្លែងក្នុងកិច្ចប្រជុំនេះ លោក ហង្ស សាមឿន មានប្រសាស៍គូសបញ្ជាក់ថា ជំងឺរលាក ផ្លូវដង្ហើម កូរ៉ូណា ដែលមានប្រភពចេញពីទីក្រុងវូហាន ប្រទេសចិន បាន និងកំពុងរាត ត្បាតដល់បណ្តាប្រទេសមួយ ចំនួន ជាពិសេសនៅប្រទេសចិនតែម្តង ដែលបានបណ្តាល ឱ្យមានមនុស្សស្លាប់កើនឡើងជាបន្តបន្ទាប់ តែ សម្រាប់កម្ពុជា យើងហាក់អាចគ្រប់គ្រង សភាពការណ៍នេះបានយ៉ាងល្អប្រសើរ បើទោះបីជាថ្មីៗនេះយើង បានរកឃើញមួយករណី នៅខេត្តព្រះសីហនុ ដែលមានជនជាតិចិនម្នាក់មានផ្ទុកមេរោគរលាកផ្លូវដង្ហើម នេះក្តី ហើយដែលក្រុមគ្រូពេទ្យរបស់យើងកំពុងព្យាបាលគាត់ឱ្យជាសះស្បើយ។

បើតាមការអះអាងរបស់តំណាងក្រសួងសុខាភិបាលនៅក្នុងកិច្ចប្រជុំនេះថា យើងអាចគ្រប់ គ្រង បានចំពោះជំងឺរលាកផ្លូវដង្ហើម កូរ៉ូណានេះ ព្រមទាំងបានអំពាវនាវដល់បងប្អូន ប្រជា ពលរដ្ឋ សូមកុំឱ្យមានការព្រួយបារម្ភខ្លាំងពេកចំពោះបញ្ហានេះ។

ដោយឡែកតំណាងកគណៈកម្មាធិការជាតិគ្រប់គ្រងគ្រោះមហន្តរាយ គឺលោក ហង្ស សាមឿន មានប្រសាសន៍ថា យើងនៅតែបន្តតាមដាន យ៉ាងយកចិត្តទុកដាក់ជាទីបំផុត ទៅលើករណីជំងឺរលាកផ្លូវ ដង្ហើម កូរ៉ូណានេះ ដោយផ្នែកពាក់ព័ន្ធទាំងអស់ បានត្រៀម បង្ការខ្ពស់បំផុត និងបានអំពាវនាវបងប្អូនប្រជា ពលរដ្ឋមានការប្រុងប្រយ័ត្ន តែសូមកុំព្រួយ បារម្ភខ្លាំងពេក ព្រោះយើងកំពុងតែគ្រប់គ្រងសភាពការណ៍នេះ បានយ៉ាងល្អប្រសើរ៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា ប្រឈមនឹងវីរុសថ្មី កូរ៉ូណានេះ កម្ពុជា នឹងមិនបិទជើងហោះហើរពីប្រទេសចិន រឺ ជម្លៀសមន្ត្រីទូត និងនិស្សិត របស់កម្ពុជា កំពុងសិក្សានៅចិនកម្ពុជានោះទេ។ ការបិទជើងហោះហើរមកពីប្រទេសចិន គឺប្រៀបបាននឹងសម្លាប់សេដ្ឋកិច្ចកម្ពុជា និងផ្តាច់ទំនាក់ទំនងជាមួយចិន នោះដែរ។

នៅក្នុងសន្និសីទកាសែត នៅវិមានសន្តិភាព នៅព្រឹកថ្ងៃទី៣០ ខែមករា នេះ សម្តេច តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអះអាងថាជំងឺពិតប្រាកដ ដែលកំពុងកើតនៅកម្ពុជា គឺជំងឺភ័យខ្លាចហួសហេតុរបស់ពលរដ្ឋ បន្ថែមដោយការបំពុល របស់ព័ត៌មានក្លែងក្លាយមួយចំនួន ដែលគ្មានការទទួលខុសត្រូវ គឺមិនមែនដោយសារ វីរុសកូរ៉ូណា ទេ។ វីរុសកូរ៉ូណា មិនចោទជាបញ្ហាធំឡើយនៅកម្ពុជា គ្រាដែលក្រសួងសុខា ភិបាល កំពុងតាមដាន និងដោះស្រាយយ៉ាងម៉ត់ចត់ ព្រមជាមួយការព្យាបាលជនជាតិចិន ដែលកំពុងដាក់នៅដោយឡែកនៅខេត្តព្រះសីហនុ។

សម្តេចតេជោមានប្រសាសន៏ថា ការភ័យខ្លាចរបស់ប្រជាពលរដ្ឋ បាននាំឲ្យមានការស្នើ ទៅសម្តេចផ្ទាល់ គឺការស្នើឲ្យបិទ ជើងហោះហើរពីប្រទេសចិនមកកាន់កម្ពុជា និងស្នើឲ្យ សុំឲ្យមានការជម្លៀស និស្សិត មន្ត្រីទូតកម្ពុជា វិលត្រលប់មកកម្ពុជាវិញ។

ប៉ុន្តែសម្តេចតេជោ បានអះអាងថា កម្ពុជាមិនយកវិធានការជម្លៀសមន្ត្រីទូត រឺនិស្សិតមក កាន់កម្ពុជាវិញនោះទេ ទោះបីប្រទេសផ្សេងយកវិធានការនេះក៏ដោយ។ សម្តេចតេជោ លើកទឹកចិត្តមន្ត្រីទូត និងនិស្សិតកម្ពុជា ចូលរួមជាមួយប្រជាជន និងរដ្ឋាភិបាលចិន ដោយ មិនត្រូវរត់ចោលគ្នា ក្នុងពេលមានអាសន្ននោះទេ។ ការបិទជើងហោះហើរពីចិន នឹងអាច សម្លាប់សេដ្ឋកិច្ចរបស់ កម្ពុជា និងប្រៀបបានទៅនឹងកាត់ផ្តាច់ទំនាក់ទំនងជាមួយចិន បើ កម្ពុជា សម្រេចចិត្តជម្លៀសមន្ត្រីទូត កុងស៊ុល និងនិស្សិតវិលមកកម្ពុជាវិញភ្លាមៗនោះ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអំពាវនាវឲ្យប្រជាពលរដ្ឋ កុំឲ្យភ័យ ខ្លាចហួសពីការពិត ធ្វើឲ្យបាត់បង់ពេលវេលា និងខាតបង់ថវិកាហើយ ត្រូវចូលរួមចែក រំលែក និងផ្សព្វផ្សាយព័ត៌មានពិត ដែលមានប្រភពច្បាស់លាស់ពីក្រសួងសុខាភិបាល។

សម្តេចក៏ស្នើឲ្យសមត្ថកិច្ចយកវិធានការម៉ឺងម៉ាត់ចំពោះ អ្នកផ្សព្វផ្សាយព័ត៌មានមិនពិត ត្រូវ យកគាត់មកអប់រំ។ ក្រៅពីនេះ សម្តេចតេជោ ហាមមិនឲ្យបិទស្ថាប័នទាំងថ្នាក់ជាតិ ថ្នាក់ ក្រោមជាតិ ផ្សារលក់ដូរ ទីវត្តអារាម ដោយសារវីរុសកូរ៉ូណានោះទេ ព្រោះមិនជះឥទ្ធិពល ខ្លាំងក្លាឡើយ។ ជាមួយគ្នានេះ សម្តេចតេជោ បានស្នើឲ្យក្រសួងអប់រំ និងគ្រឹះស្ថានសិក្សា ទាំងអស់ ត្រូវយកចិត្តទុកដាក់ខ្ពស់ចំពោះសិស្សានុសិស្ស ក្នុងការលើកកំពស់អនាម័យ និងមិនត្រូវបិទសាលារៀននោះទេ។ សម្តេចតេជោ បានក្រើនរំលឹកឲ្យអ្នក លក់ម៉ាសទាំង ឡាយ កុំតម្លើងថ្លៃម៉ាស់ ក្នុងពេលដែលប្រជាពលរដ្ឋត្រូវការម៉ាស់ការពារ ហើយពលរដ្ឋ ត្រូវរក្សាអនាម័យ និងពាក់ម៉ាស់នៅកន្លែងចាំបាច់៕

ខេត្តកំពង់ស្ពឺ ៖ ព្រះករុណា ព្រះបាទ សម្តេច ព្រះបរមនាថ នរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា នាព្រឹកថ្ងៃទី៣០ ខែមករា ឆ្នាំ២០២០នេះ ព្រះអង្គស្តេចយាងចែក ព្រះរាជអំណោយជូនពលរដ្ឋជួបការលំបាកចំនួន ៥៦០គ្រួសារ រស់នៅភូមិទឹកលង១ និងភូមិទឹកលង២ ឃុំរុងរឿង ស្រុកថ្ពង ខេត្តកំពង់ស្ពឺ។

ព្រះរាជបន្ទូលព្រះមហាក្សត្រ បណ្តាំផ្ញើដោយក្តីនឹករលឹកពីសម្តេចព្រះមហាក្សត្រី នរោត្តម មុនិនាថ សីហនុ ព្រះវរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជូនចំពោះកូន ចៅ ចៅទួត របស់ព្រះអង្គ ប្រកបដោយក្តីនឹករលឹកបំផុតពីចម្ងាយ។

ជាមួយគ្នានោះ ព្រះមហាក្សត្រ ព្រះអង្គ បានកោតសសើរចំពោះសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចជាកាល បានយកចិត្តទុកដាក់ សុខទុក្ខរបស់ប្រជាពលរដ្ឋជាកូនជាចៅរបស់ព្រះអង្គ។

មុននិងស្តេចយាងនិវត្តមកកាន់ព្រះមរម្យរាជវាំង ព្រះមហាក្សត្រទ្រង់ យាងចែកព្រះរាជអំណោយជូនប្រជារាស្ត្រចំនួន ៤៦៩គ្រួសារ និងស្តេចយាងតាមព្រះរាជទីនាំងទត កូនចៅ ដែលឈរចាំទទួលអមតាមដងផ្លូវ ដោយព្រះរាជហាទ័យរីករាយក្រៃលែង៕