ខេត្តរតនគិរី ៖ រដ្ឋលេខាធិការក្រសួងបរិស្ថាន សហការណ៍ជាមួយក្រសួងសេដ្ឋកិច្ច និងហិរញ្ញវត្ថុ ព្រម ទាំងកម្លាំងមន្ទីបរិស្ថានខេត្ត ចុះពិនិត្យសំណាកដើមឈើមួយដើម ក្លាយជាថ្ម ជំនាញបានសន្និដ្ឋាន បឋមថា មានអាយុកាលរាប់លានឆ្នាំ មកហើយ បន្ទាប់ពីមន្ត្រីការិយាល័យបេតិកភណ្ឌវប្បធម៌ នៃ នាយកដ្ឋានតំបន់វប្បធម៌ របស់ក្រសួងបរិស្ថាន បានចុះស្រាវជ្រាវរយៈពេលកន្លងមកនេះ។
នៅរសៀលថ្ងៃសុក្រ កន្លងមកនេះ ឯកឧត្ដម សូ ឫទ្ធីគុណ រដ្ឋលេខាធិការ ក្រសួងបរិស្ថាន និងជា ប្រធានគណៈកម្មាធិការមូលនិធិបរិស្ថាន និងសង្គម សហការណ៍ជាមួយក្រសួងសេដ្ឋកិច្ច និងហិរញ្ញ វត្ថុ មន្ទីបរិស្ឋានខេត្តរតនគីរី បានអញ្ជើញចុះដល់ទីតាំងដើមឈើ ក្លាយជាថ្មនេះ មានទីតាំងចំណុច ត្រពាំង ឈូក ស្ថិតក្នុងភូមិ សាយ៉ស់ ឃុំកាលែង ស្រុកលំផាត់ ខេត្តរតនគិរី។
លោក លឹម វ៉ាន់ចាន់ ប្រធានការិយាល័យ បេតិកភណ្ឌវប្បធម៌ នៃនាយកដ្ឋានតំបន់វប្បធម៌ របស់ ក្រសួងបរិស្ថាន បានឲ្យដឹងថា នេះគឺជាផូសស៊ីលដើមឈើ បានន័យថា ជាដើមឈើបានក្លាយ ជា ថ្ម។ ដែលក្រុមការងារលោកបានចុះសិក្សាស្រាវជ្រាវក្នុងឆ្នាំ២០១៩នេះ បានចំនួន ១១ទីតាំងហើយ ហើយនេះគឺជាទីតាំងមួយក្នុងចំណោមទាំង១១ ខាងលើនោះ លោកថា ក្រុមការងារលោកបាន សិក្សាស្រាវជ្រាវឃើញផូសស៊ីលពពួកសត្វសមុទ្រនៅខេត្តបន្ទាយមានជ័យ និងខេត្តមណ្ឌលគិរី ហើយផូសស៊ីសឈើ នៅខេត្តរតនគិរី នេះ ចំណែកខេត្តស្ទឹងត្រែង ក៏មានភុសស៊ីលឈើនេះដែរ។

លោកបន្តថា គោលដៅនៃការសិក្សានេះគឺសិក្សារកព័ត៌មានទិន្នន័យ ដែលពាក់ព័ន្ធទៅនឹងភុសស៊ីល ទាំងអស់នេះថា តើការប្រែប្រួលរបស់វាយ៉ាងម៉េច ជាពិសេសទិន្នន័យស្រុកយើង អត់ទាន់មានទេ ដូច្នេះគឺជាការចាប់ផ្ដើមថ្មីមួយរបស់យើង ក្នុងប្រទេសកម្ពុជា។ លោកបញ្ជាក់ថា មុននឹងឈាន ដល់ ការចុះស្រាវជ្រាវនេះ គឺលោកទទួលបានព័ត៌មានពីមន្ទីរបរិស្ថានខេត្តរតនគិរី ហើយការស្រាវជ្រាវ នេះ លោកបានកាយអស់រយៈពេល២សប្ដាហ៍ កន្លងមកហើយជីកបានប្រមាណ ១៦ម៉ែត្រ ប៉ុន្តែ ដើម ឈើមួយដើមនេះ ទើបតែជីកបាន ១៤ម៉ែត្រ នៅមិនទាន់ផុតទេ ដូច្នេះការសិក្សានេះលោកនឹង បន្តទៅទៀត ។ លោកបញ្ជាក់ថា នៅទីតាំងនេះ មិនមែនមានតែដើមឈើ ប៉ុណ្នឹងទេ គឺប្រហែលជា ១គីឡូម៉ែត្រជុំវិញនេះ គេរកឃើញមានលេចចេញដើមឈើប្រែក្លាយជាថ្មច្រើនទៀត លោកគ្រាន់ តែ រាប់ចំនួនបណ្ដោះអាសន្ន ឃើញមាន ៣៥ដើមហើយ គ្រាន់តែចំណាយពេលត្រឹមមួយព្រឹក ប៉ុណ្ណោះ ។ លោកក៏បានបញ្ជាក់ដែរថា បើតាមការស្រាវជ្រាវ តំបន់នេះ ជាតំបន់សមុទ្រ ពីព្រោះចំងាយ ប្រមាណ ជា ៥គីឡូម៉ែត្រ ពីទីតាំងនេះ មានភស្ដុតាងថ្មកំបោរ។

រីឯ លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរី បានបញ្ជាក់ប្រាប់ក្រុមអ្នកសារព័ត៌មាន នៅព្រឹកថ្ងៃទី១៤ ខែធ្នូ ឆ្នាំ២០១៩ នេះថា ក្រសួងនឹងបន្តស្រាវជ្រាវជំរុញទីតាំងនេះឲ្យក្លាយជាតំបន់ បែបទេសចរណ៍សិក្សាស្រាវជ្រាវមួយ ដើម្បីទាញយលផលប្រយោជន៍ ជូនបងប្អូនសហគមន៍ មូល ដ្ឋានផងដែរ។ ហើយលោកក៏រៀបចំជាស្នាក់ការរងមួយ ដើម្បីគ្រប់គ្រងទីតាំងនេះ និងជំរុញឲ្យមាន ការសិក្សា ស្រាវជ្រាវបន្ថែមទៀត ពីក្រសួង នឹងសុំអោយមាននិស្សិតមកពីចំងាយ ដូចជាភ្នំពេញ និង តាមបណ្ដាខេត្តផ្សេងៗ ដែលចង់សិក្សាស្វែងយល់ពីភូតហេតុ ដែលបណ្ដាលឲ្យដើមឈើ ប្រែក្លាយ ជាថ្ម នេះ គឺខាងមន្ទីរបរិស្ថានរបស់លោកនឹងរង់ចាំស្វាគមន៍ជានិច្ច៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាន បញ្ជាក់ថា កម្ពុជាកំពុងរៀបចំច្បាប់វិនិយោគ ដើម្បីជាការលើកទឹកចិត្ត បើកចំហ និងផ្តល់សិទ្ធិដល់វិនិយោគិនបរទេសធ្វើការវិនិយោគនៅកម្ពុជា។ សម្តេចតេជោ សង្ឃឹមថា ពិពរណ៏ផលិតផលខ្មែរ នឹងជួយបង្កើនការវិនិយោគលើកែច្នៃផលិតផលកម្ពុជា សម្រាប់នាំចេញទៅក្រៅប្រទេស។

ថ្លែងនៅក្នុងពិធីបើកពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជានៅរសៀលថ្ងៃអាទិត្យនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបានបញ្ជាក់ថា រាជរដ្ឋាភិបាលកំពុងរៀបចំច្បាប់វិនិយោគ និងច្បាប់ស្ដីពីតំបន់សេដ្ឋកិច្ចពិសេស ក្នុងគោលបំណងបង្កើតនូវក្របខ័ណ្ឌគតិយុត្ត ដែលបើកចំហមានតម្លាភាព ដើម្បីទាក់ទាញវិនិយោគិនពីក្រៅប្រទេសបន្ថែមទៀត។ បើតាម សម្តេចតេជោ ក្របខ័ណ្ឌច្បាប់ដែលបានចែងខាងលើនេះគឺជាការលើកទឹកចិត្តប្រកបដោយតម្លាភាព គ្មានការរើសអើង មានលក្ខណៈប្រកួតប្រជែងស្មើភាពដល់ការការពារនូវសិទ្ធិនិងផលប្រយោជន៍ស្របច្បាប់របស់វិនិយោគិន។ សម្តេចតេជោ បញ្ជាក់ថា ពិពរណ៏ផលិតផលខ្មែរ និងទំនិញនាំចេញ នាំចូលកម្ពុជា បានឆ្លុះបញ្ចាំងពីបរិយាកាសធុរកិច្ច និងវិនិយោគដ៏មានសក្តានុពលរបស់កម្ពុជា តាមរយៈការរក្សាបាននូវសុខសន្តិភាព ស្ថេរភាពសង្គម និងកំណើនសេដ្ឋកិច្ចខ្ពស់ និងការរីកចំរើនលើគ្រប់វិស័យ ដែលផ្តល់ឱកាសដល់ធុរជនកម្ពុជា និងបរទេសទាំងអស់បានជួបពិភាក្សាគ្នា ដើម្បីជំរុញការធ្វើធុរកិច្ច និងការវិនិយោគជាដើម។

តាមរយៈ ព្រឹត្តិការណ៍នេះ ក៏ជាកាលានុវត្តភាពក្នុងការជួយកម្ពុជាលើការផ្សព្វផ្សាយអំពីសក្តានុពល វិនិយោគរបស់កម្ពុជា ជាឱកាសស្វែងរកទីផ្សារនាំចេញ ការផ្សព្វផ្សាយវប្បធម៌ និងពង្រឹងកិច្ចសហប្រតិបត្តិការលើគ្រប់វិស័យសេដ្ឋកិច្ច ពាណិជ្ជកម្ម និងវិស័យផ្សេងៗទៀតជាមួយបណ្ដាប្រទេសដៃគូនៅក្នុងតំបន់និងពិភពលោក។ គួរកត់សំគាល់ថា រាជរដ្ឋាភិបាលកម្ពុជា បានដាក់ចេញនូវគោលនយោបាយបើកចំហរដល់ធុរជនទាំងអស់ ដើម្បីចូលមកវិនិយោគនៅកម្ពុជានឹងបង្កើតធុរកិច្ចនៅកម្ពុជា។ ការហូរចូលរបស់វិនិយោគទុនបរទេសមកកាន់កម្ពុជា បានធ្វើឲ្យកម្ពុជា ទទួលបាននូវធនធានហិរញ្ញវត្ថុ បច្ទេកវិទ្យា ជំនាញ ចំណេះដឹងនៃការប្រើប្រាស់បច្ចេកវិទ្យាទំនើប បទពិសោធន៍ សហគ្រិន និងការបង្កើតការងារថ្មីសម្រាប់ប្រជាជន ការពង្រីកផលិតកម្មក្នុងស្រុកកាន់តែទូលំទូលាយថែមទៀត។
លោក ប៉ាន សូរស័ក្ត រដ្ឋមន្ត្រីក្រសួងពាណិជ្ជកម្ម បានឲ្យដឹងថា ពិព័រណ៍ផលិតផលខ្មែរនិងទំនិញនាំចេញ-នាំចូលកម្ពុជាលើកទី១៤ កម្រិតអន្តរជាតិឆ្នាំ២០១៩ មានការចូលរួមពី ប្រទេសចិន ជប៉ុន ឥណ្ឌូនេស៊ី ថៃ ម៉ាឡេស៊ី មីយ៉ាន់ម៉ា វៀតណាម និងប្រទេសឡាវ ព្រមទាំងមន្ទីរពាណិជ្ជកម្មទាំង២៥ រាជធានី-ខេត្ត សភាពាណិជ្ជកម្មកម្ពុជា សហព័ន្ធស្រូវអង្ករ អង្គការ សមាគមអាជីវកម្ម ក្រុមហ៊ុនក្នុងស្រុក និងក្រុមហ៊ុនបរទេសដែលកំពុងធ្វើប្រតិបត្តិការអាជីវកម្មនៅកម្ពុជា។ ពិព័រណ៍នេះមានស្ដង់សរុបចំនួន៣៧២ស្ដង់ ហើយទំនិញ និងសេវាជាច្រើនប្រភេទ ត្រូវបានដាក់តាំងបង្ហាញក្នុងព្រឹត្ដិការណ៍ពាណិជ្ជកម្មនេះ រួមមាន៖ ផលិតផលកសិកម្ម កសិ-ពាណិជ្ជកម្ម ផលិតផលសិប្បកម្ម ផលិតផលធ្វើពីសូត្រអង្ករ ម្រេច ដំឡូងមី វត្ថុអនុស្សាវរីយ៍សម្ភារៈការិយាល័យ ក្រណាត់ និងសម្លៀកបំពាក់សម្ភារៈប្រើប្រាស់ទូទៅផលិតផលសម្រាប់តុបតែងក្នុងគេហដ្ឋាន គ្រឿងអលង្ការ និងត្បូងថ្មមានតម្លៃ។ ក្នុងនោះក៏មានផលិតផលឱសថបរិក្ខារពេទ្យ និងគ្រឿងសម្អាង ម្ហូបអាហារកែច្នៃនិងភេសជ្ជៈ គ្រឿងឧបភោគ-បរិភោគ ផលិតផលបា្លស្ទីក គ្រឿងអេឡិចត្រូនិកគ្រឿងបន្លាស់ គ្រឿងសង្ហារិមផលិតផលពាក់ព័ន្ធវិស័យទូរគមនាគមន៍ និងព័ត៌មានវិទ្យា គ្រឿងម៉ាស៊ីន សម្ភារៈសំណង់ ផលិត ផលបម្រើឲ្យសេវាសណ្ឋាគារទេសចរណ៍ សេវាអប់រំសេវាធនាគារ និងគម្រោងវិនិយោគ ជាដើម។ល។
លោក ប៉ាន សូរស័ក្តិ បានឱ្យដឹងថា ពិព័រណ៍ពាណិជ្ជកម្មនេះគឺជាព្រឹត្តិការណ៍ពាណិជ្ជកម្មកម្រិតអន្តរជាតិប្រចាំឆ្នាំរបស់កម្ពុជា ត្រូវបានបង្កើតឡើងក្នុងគោលបំណងជំរុញសកម្មភាពពាណិជ្ជកម្ម បង្កើតឱកាសទីផ្សារ បង្ហាញពីបរិយាកាសធុរកិច្ច និងសក្ដានុពលវិនិយោគដ៏ល្អប្រសើរ ព្រមទាំងបង្ហាញអំពីគោលនយោបាយគាំពារវិនិយោគ និងធុរកិច្ចនៅកម្ពុជា៕

ភ្នំពេញ ៖ ក្រសួងធនធានទឹក និងឧតុនិយម បានចេញសេចក្តីជូនដំណឹងថ្មីមួយ ស្តីពីស្ថានភាពអាកាសធាតុនៅកម្ពុជា ចាប់ពីថ្ងៃទី១៧ ដល់ ថ្ងៃទី២៣ ខែធ្នូ ឆ្នាំ២០១៩ ដោយបញ្ជាក់ថា អាកាសធាតុអប្បបរមាមានពី២០-២៥អង្សាសេ និងអតិបរមាមានពី២៨-៣២អង្សាសេ។

យោងតាមសេចក្តី ជូនដំណឹងរបស់ក្រសួងធនធានទឹកបានឲ្យដឹងថា តាមរយៈការតាមដានស្ថានភាពធាតុអាកាសជាប់បន្ត សង្កេតឃើញថា ជ្រលងសម្ពោធខ្ពស់បាននិងកំពុងរំកិលទៅលើ និងមានឥទ្ធិពលខ្សោយលើកម្ពុជា៕

ខេត្តកំពង់ចាម:ជនសង្សយ័ត្រូវសមត្ថកិច្ចឃាត់ខ្លួនដោយយោងតាមបណ្តឹងរបស់នារីរងគ្រោះចោទពីបទរំលោភសេពសន្ថវ:នៅផទះសំណាក់។ 

តាមប្រភពពត៌មានពីប៉ូលិសបានអោយដឹងថានៅថ្ងៃទខែធ្នូឆ្នាំ ២០១៩វេលាម៉ោង២៣នាទី សមត្ថកិច្ចនគរបាលបានទទួលពត៌មាននិងបណ្តឹងពីឈ្មោះ (ក ញ)ភេទស្រី អាយុ១៨ឆ្នាំ ជាតិខ្មែរ មានទីលំនៅភូមិដូនដី ឃុំជ្រៃវៀន ស្រុកព្រៃឈរ ខេត្តកំពង់ចាម ប្តឹងពីឈ្មោះ ជា ដារ៉ា ភេទប្រុស អាយុ២៧ឆ្នាំ ជាតិខ្មែរ មានទីលំនៅភូមិព្រែកតាឡុងទី១សង្កាត់ចក្រអង្រែក្រោម ខណ្ឌមានជ័យ រាជធានីភ្នំពេញ។

នារីរងគ្រោះបានបញ្ជាក់ថាៈ នាងបានស្គាល់ជនសង្សយ័តាមហ្វេប៊ុកហើយក៏បានណាត់ជួបគ្នារហូតមានការថ្លោះធ្លោយបែបនេះ។  នារងគ្រោះបានបញ្ជាក់ថាជនសង្សយ័បានធ្វើសកម្មភាពចាប់រំលោភចាប់រំលោភសេពសន្ថវះ មកលើខ្លួនរហូតបានសម្រេច នៅចំណុចផ្ទះសំណាក់មេគង្គ២ស្ថិតនៅចំណុចភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម កាលពីថ្ងៃទី១៣ខែធ្នូឆ្នាំ២០១៩វេលាម៉ោង២០និង៤៥នាទី ខណះពេលដែលខ្លួនបានណាត់ជួបគ្នាហើយនាំគ្នាដើរលេង ដោយជនសង្ស័យព្យាយាមចាប់បង្ខំជនរងគ្រោះរហូតមានស្លាកស្នាមជាំ លើ កដៃ របស់ជនរងគ្រោះ    ។

ប៉ូលិសបានអោយដឹងថា បន្ទាប់ពីទទួលបានព័ត៌មាន និងបណ្តឹងភ្លាមកម្លាំងសមត្ថកិច្ចបានចុះដល់ទីកន្លែងកើតហេតុ ធ្វើការពិនិត្យស្រាវជ្រាវរហូតបានឃាត់ខ្លួនបានជនសង្ស័យខាងលើ យកមកសួរនាំនៅអធិការ ដ្ឋាននគរបាលស្រុកកំពង់សៀម ។  នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានចាប់រំលោភសេពសន្ថវះលើជនរងគ្រោះរហូតបានសម្រេចពិតមែនហើយករណីនេះសមត្ថកិច្ចយើងកំពុងរៀបចំកសាងឯកសារ និងសំណុំរឿងតាមនីតិវិធី ៕ 

ភ្នំពេញ ៖ ឯកអគ្គរដ្ឋទូត​វិសាមញ្ញ និង​ពេញ​សមត្ថភាព​នៃ​សហរដ្ឋអាមេរិកប្រចាំកម្ពុជា លោក Patrick Murphy បាន​បញ្ជាក់​ថា រដ្ឋាភិបាល​អាមេរិកនឹង​បន្តជួយ​កម្ពុជា តាមរយៈការ​ផ្តល់​ហិរញ្ញប្បទាន​ឥតសំណង​សម្រាប់​កម្មវិធី​សុខភាព​សាធារណៈ និង​ការអប់រំ, កម្មវិធី​កសិកម្ម និង​បរិស្ថាន, កម្មវិធីដោះមីន និង​យុទ្ធភណ្ឌ​មិនទាន់ផ្ទុះ, ការ​ផ្តល់ជំនួយ​បច្ចេកទេស និង​ការអភិវឌ្ឍ​ធនធាន​មនុស្ស សំដៅ​រួមចំណែក​ដល់ការ​អភិវឌ្ឍ​នៅកម្ពុជា។

ការបញ្ជាក់របស់លោកឯកអគ្គរដ្ឋទូតបែបនេះធ្វើឡើងក្នុងជំនួបជាមួយលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តី​ក្រសួង​សេដ្ឋកិច្ច និង​ហិរញ្ញវត្ថុកាលពីថ្ងៃទី១២ ខែធ្នូ ឆ្នាំ​២០១៩។ នេះបើតាម​សេចក្តី​ប្រកាស​ព័ត៌មានរបស់​ក្រសួង​សេដ្ឋកិច្ច​ និងហិរញ្ញវត្ថុ។ លោកឯកអគ្គរដ្ឋទូតបន្ថែមថា អាមេរិកនឹង​បន្តជួយផងដែរ​ដល់វិស័យ​ឯកជន​នៅកម្ពុជា តាមរយៈ​កម្មវិធី​លើកកម្ពស់​អភិបាលកិច្ច​ និង​ការបង្កើន​កិច្ចសហប្រតិបត្តិការ​ផ្នែក​វិនិយោគ និង​ពាណិជ្ជកម្ម​រវាង​ប្រទេស​ទាំង២។

ជាឆ្លើយតបលោក​ឧបនាយករដ្ឋមន្រ្តី​បាន​ថ្លែងថា រាជរដ្ឋាភិបាល​កម្ពុជា នឹង​បន្ត​ធ្វើកំណែទម្រង់​លើកកម្ពស់​អភិបាលកិច្ច, កែលម្អ​បរិយាកាស​វិនិយោគ, សាងសង់​ហេដ្ឋារចនាសម្ព័ន្ធ, អភិវឌ្ឍ​ធនធានមនុស្ស, បង្កើន​ល្បឿន​នៃការ​ធ្វើ​ពិពិធកម្ម​សេដ្ឋកិច្ច និង​ពង្រឹង​សមត្ថភាព​ប្រកួតប្រជែង​របស់​កម្ពុជា ដើម្បី​បន្ត​រក្សា​កំណើន​សេដ្ឋកិច្ច​ខ្ពស់​នៅក្នុងរយៈពេល​វែង សំដៅ​ប្រែក្លាយ​ប្រទេស​កម្ពុជា ទៅជាប្រទេស​មាន​ចំណូល​មធ្យម​កម្រិតខ្ពស់​នៅឆ្នាំ​២០៣០ និង​ជាប្រទេស​មាន​ចំណូល​ខ្ពស់​នៅឆ្នាំ​២០៥០។

សូមជម្រាបថា ចាប់ពី​ឆ្នាំ​១៩៩២ ដល់ឆ្នាំ​២០១៩នេះ អាមេរិកបាន​ផ្តល់​ហិរញ្ញប្បទាន​ឥតសំណង​ប្រមាណ១៥០០​លានដុល្លារសម្រាប់​អនុវត្ត​គម្រោង​អភិវឌ្ឍន៍​នានា​នៅកម្ពុជា ដោយ​ផ្តោតលើ​វិស័យ​អប់រំ សុខាភិបាល កសិកម្ម និង​បរិស្ថាន៕

ភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានថ្លែង ក្នុងពេលធ្វើជាអធិបតីក្នុងពិធីប្រគល់សញ្ញាបត្រដល់និស្សិតជាង ៦ ៧០០នាក់ នៅកោះពេជ្រ កាលពីម្សិលមិញ ថា «មិនខ្វល់ទេ ប្រសិនបើគេចង់ធ្វើអ្វីក៏ធ្វើចុះ» ។ ការដកប្រព័ន្ធអនុគ្រោះពន្ធ EBA គឺប្រៀបដូចជាសហភាពអឺរ៉ុប (EU) បំផ្លាញសមិទ្ធផលខ្លួនឯងដែលបានធ្វើនៅកម្ពុជា និងជាការសម្លាប់ក្រុមអ្នកប្រឆាំងផ្កាប់មុខ។

តាមរបាយការណ៍របស់សហភាពអឺរ៉ុបបង្ហាញថា សហភាពអ៊ឺរ៉ុប បានគំរាមដកការអនុគ្រោះពន្ធអ្វីគ្រប់យ៉ាងលើកលែងតែអាវុធ (EBA) ពីកម្ពុជា បន្ទាប់ពីគណៈកម្មការអឺរ៉ុបបានរកឃើញថា រដ្ឋាភិបាលកម្ពុជាបានបង្ក្រាបក្រុមប្រឆាំង សង្គមស៊ីវិល និងប្រព័ន្ធផ្សព្វផ្សាយដែលនៅថ្ងៃទី១២ ខែធ្នូ នេះ គឺជាថ្ងៃចុងក្រោយ ដែលកម្ពុជាឆ្លើយតបនឹងការចោទប្រកាន់នេះ។

នាយករដ្ឋមន្ត្រី បានថ្លែងថា សម្តេចធ្លាប់ប្រាប់សហភាពអឺរ៉ុបរួចហើយថា កម្ពុជាអាចធ្វើបានចំពោះអ្វីដែលជាជម្រើសរបស់ខ្លួនប៉ុណ្ណោះ។ អ្វីដែលពាក់ព័ន្ធនឹងច្បាប់កម្ពុជា គឺកម្ពុជាមិនអាចធ្វើតាមអឺរ៉ុបបានទេ។ លោកបន្តថា សហភាពអឺរ៉ុបក៏ត្រូវតែដឹងដែរ ផលប៉ះពាល់ពីការដក EBA នេះមិនមែនគ្រាន់តែកម្ពុជាទេ គឺប្រជាជននៅសហភាពអឺរ៉ុបក៏ប៉ះពាល់ដែរ ដោយពួកគេត្រូវបង់ថ្លៃពន្ធច្រើនជាងមុន។

នាយករដ្ឋមន្ត្រីកម្ពុជា បានអះអាងថា «សមិទ្ធផលដែលអ្នកឯងជួយខ្ញុំ ក៏ដូចជានិរាករណ៍ចោលដែរ។ ទឹកមាត់អ្នកឯងជាមួយខ្ញុំ ក៏នឹងកាត់បន្ថយដែរ មានន័យថា បានរួមចំណែកសម្លាប់ពួកអាប្រឆាំងផ្កាប់មុខតែម្ដង។ ព្រោះដំណើរការក្ដី គឺតុលាការគេប្រកាសហើយ។ អ្នកណាត្រូវជាប់យ៉ាងម៉េចអីយ៉ាងម៉េច កាត់យ៉ាងម៉េចអី ពេលណាគេកាត់ពេលណាគេអីអាហ្នឹងដំណើរការរបស់តុលាការទៅ»។

គួររំឭកថា ប្រទេសលោកខាងលិចមួយចំនួន បានរិះគន់ការចាប់ខ្លួនមេដឹកនាំគណបក្សប្រឆាំងគឺលោក កឹម សុខា តាំងពីឆ្នាំ២០១៧ មុនពេលគណបក្សសង្គ្រោះជាតិរបស់លោកត្រូវបានរំលាយនៅមុនការបោះឆ្នោតកាលពីឆ្នាំមុន និងករណីលោក កឹម សុខា ត្រូវបានដោះលែងពីការឃុំខ្លួនក្នុងផ្ទះកាលពីខែមុន ប៉ុន្តែត្រូវហាមឃាត់មិនឲ្យធ្វើសកម្មភាពនយោបាយទេ ហើយដើមសប្តាហ៍នេះ ការជំនុំជម្រះសំណុំរឿងរបស់លោក កឹម សុខា នឹងត្រូវតុលាការគ្រោងបើកសវនាការនៅថ្ងៃទី១៥ ខែមករា ឆ្នាំ២០២០ ខាងមុខ៕

ភ្នំពេញ ៖ អាជ្ញាធររាជធានីភ្នំពេញ ជាមួយក្រសួងសាធារណការ និង ដឹកជញ្ជូន គ្រោងបើកផ្លូវ២ខ្សែនៅអមសងខាងផ្លូវរថភ្លើង ដើម្បីរំដោះចរាចរណ៍ ផ្លូវសហព័ន្ធរុស្ស៊ី ខណៈដែលសហព័ន្ធរុស្ស៊ីបាននិងកំពុងជួបបញ្ហាកកស្ទះចរាចរណ៍ជារៀងរាល់ថ្ងៃ។

ដើម្បីជំរុញឲ្យគម្រោង នៃការស្ថាបនាផ្លូវ២ខ្សែនេះ ទទួលបានជោគជ័យ អភិបាលនៃគណៈអភិបាលរាជធានីភ្នំពេញ លោក ឃួងស្រេងនិងឯ.ឧ ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការនិងដឹកជញ្ជូន កាលពីរសៀលថ្ងៃទី១១ខែធ្នូឆ្នាំ២០១៩ បានអញ្ជើញជិះរថភ្លើងចុះទៅពិនិត្យដោយផ្ទាល់ តាមបណ្តោយផ្លូវរថភ្លើង ចាប់ពីស្ថានីយ៍រាជាយស្ម័យាន មុខសត្យមុនីចេតីយ៍ រហូតទៅដល់ផ្លូវកប់ស្រូវ (មហាវិថីឈ្នះឈ្នះ)។

ក្នុងដំណើរចុះពិនិត្យនោះ លោក ឃួង ស្រេង បានបញ្ជាក់ថា ក្នុងគម្រោងនៃការស្ថាបនាផ្លូវ២ខ្សែនេះ គឺមិនអាចផ្ដាច់បានជាមួយនឹងការស្ថាបនាផ្លូវរថភ្លើងនោះទេ ដោយសារថា ផ្លូវរថភ្លើងមានសារៈសំខាន់ខ្លាំង សម្រាប់សេដ្ឋកិច្ចកម្ពុជា ព្រោះការដឹកជញ្ជូនតាមរថភ្លើងមានតម្លៃថោកហើយវាក៏មិនធ្វើឲ្យខូចផ្លូវជាតិផងដែរ។

ប៉ុន្តែទោះបីជាយ៉ាងណាក្តីឯ.ឧអភិបាលមិនបានបញ្ជាក់ពីគម្រោងនេះថា នឹងចាប់ផ្ដើមបើកការដ្ឋាននៅពេលណានៅឡើយទេ ដោយគ្រាន់តែចុះធ្វើការត្រួតពិនិត្យ ដើម្បីធ្វើការសិក្សាទៅលើផលប៉ះពាល់ របស់ប្រជាពលរដ្ឋនៅតំបន់សងខាងផ្លូវរថភ្លើងនេះប៉ុណ្ណោះ។
ចំណែក លោក ស៊ុន ចាន់ថុល បានមានប្រសាសន៍ឱ្យដឹងថា ការចុះពិនិត្យនេះ ដើម្បីពិនិត្យ លទ្ធភាព ក្នុងការសាងសង់ផ្លូវមេតុងអាមេអមសងខាងផ្លូវរថភ្លើងចាប់ពីចំណុចមហាវិថី គឹម អ៊ីលស៊ុង ដល់វិថីឈ្នះឈ្នះ (ហៅផ្លូវទំនប់កប់ស្រូវ ) តភ្ជាប់ទៅផ្លូវល្បឿនលឿន រាជធានីភ្នំ ពេញ–ខេត្តព្រះសីហនុដើម្បីរំដោះការកកស្ទះចរាចរណ៍នាពេលបច្ចុប្បន្ន នៅលើផ្លូវសហព័ន្ធ រុស្សី ក៏ដូចជាដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋក្នុងរាជធានីភ្នំពេញ និងសម្រួលដល់ការដឹកទំនិញឆ្លងកាត់ចូលក្នុងរាជធានីភ្នំពេញផងដែរ។

លោកទេសរដ្ឋមន្ត្រីបានគូសបញ្ជាក់ថា ក្រសួងសាធារណការនិងដឹកជញ្ជូននឹងសហការជាមួយសាលារាជធានីភ្នំពេញនិងក្រុមហ៊ុនរាជាយស្ម័យយានកម្ពុជាធ្វើការសិក្សាលទ្ធភាពនិងផលប៉ះពាល់កំណាត់ ផ្លូវនេះដើម្បើលើកសំណើដាក់ជូនរាជរដ្ឋាភិបាលពិនិត្យសម្រេចនិងស្វែងរកថវិកាសាងសង់។

គួរបញ្ជាក់ផងដែរថា ផ្លូវសម្រាប់យានយន្តនៅសងខាងបណ្តោយផ្លូវរថភ្លើងនេះ ត្រូវបានស្ថាបនាឡើងដោយកន្លែង ពោលគឺកន្លែងខ្លះ ត្រូវបានស្ថាបនាជាបណ្តោះអាសន្នរួច ដែលមានទទឹងពី៥ម៉ែត្រទៅ៧ម៉ែត្រ ហើយក្នុងនោះកន្លែងខ្លះ ក៏មិនទាន់មានការសាងសង់ផ្លូវដែរ ដោយនៅជាផ្លូវដី និងកន្លែងខ្លះប្រជាពលរដ្ឋរស់នៅផងដែរ៕

ភ្នំពេញ ៖ ទេសរដ្ឋមន្រ្តី រដ្ឋមន្រ្តីក្រសួងសាធារណការនិងដឹកជញ្ជូន លោក ស៊ុន ចាន់ថុល នៅព្រឹកថ្ងៃទី១២ ខែធ្នូ ឆ្នាំ២០១៩ បានបើកឱ្យប្រើប្រាស់ មជ្ឈមណ្ឌលត្រួតពិនិត្យ លក្ខណៈបច្ចេកទេសយានយន្ត ឬហៅថា ឆៀក នៅសង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ ជាផ្លូវការហើយ ដោយមានការចូលរួមពីថ្នាក់ដឹកនាំ ក្រសួង ស្ថាប័ន មន្ត្រីរាជការ និងភាគីពាក់ព័ន្ធ ជាច្រើនទៀត។

មជ្ឈមណ្ឌលត្រួតពិនិត្យលក្ខណៈបច្ចេកទេសយានយន្តថ្មីនេះ មានទំហំដីប្រមាណជិត១ហិកតា ចាប់ផ្តើមសាងសង់ក្នុងខែមីនា និងចប់សព្វគ្រប់នៅ ចុងខែសីហា ឆ្នាំ២០១៩ ទាំងសំណង់អគារ និង ការបំពាក់ឧបករណ៍ឆៀកចំនួន៣ខ្សែ ស៊េរីឆ្នាំ២០១៩ ផលិតនៅប្រទេសចិន ក្នុងនោះឧបករណ៍ឆៀកមាន៨ប្រភេទ ៖ ឧបករណ៍វាស់ផ្សែងសាំង វាស់ផ្សែង ម៉ាស៊ូត វាស់ល្បឿន វាស់ស៊ីផ្លេ វាស់លំងាកចង្កូត វាស់បាច់ពន្លឺហ្វាកូត ថ្លឹងទម្ងន់យាន និងវាស់កម្លាំងហ្វ្រាំង និងមើលដោយភ្នែក៖ មើលជុំវិញយាន មើលបាតយាន ក្នុងយាន និងប្រព័ន្ធម៉ាស៊ីន។

លោក ទេសរដ្ឋមន្ត្រី បានគូសបញ្ជាក់អំពីគោលនយោបាយរបស់រាជរដ្ឋាភិបាលក្នុងការផ្តល់សេវាសាធារណៈ សេវាចាំបាច់ ប្រកបដោយតម្លាភាព ប្រសិទ្ធភាព និង ឆាប់ រហ័ស ជូនបងប្អូនប្រជាពលរដ្ឋនិងការផ្តល់សេវាផ្សេងៗទៀត ដូចជាការដាក់ឱ្យដំណើរការមណ្ឌលប្តូរបណ្ណបើកបរ នៅផ្សារទំនើបអ៊ីអន១ និងអ៊ីអន២ ដើម្បីផ្តល់ភាពងាយស្រួលដល់បងប្អូនប្រជាពលរដ្ឋ ដែលមានបំណងចង់ប្តូរ ឬ ពន្យាបណ្ណបើកបរ ការដាក់ឱ្យប្រើប្រាស់ប្រព័ន្ធអនឡាញ ចុះបញ្ជីយានយន្ត ការស្នើសុំឆៀករថយន្ត តាមប្រព័ន្ធអនឡាញអាចឱ្យប្រជាពលរដ្ឋស្នើសុំពេលវេលា ថ្ងៃខែដើម្បីទទួលសេវាឆៀក។

ជាមួយគ្នានោះ លោកទេសរដ្ឋមន្ត្រីបានលើកឡើងថា ក្រសួងនឹងបន្តខិតខំរកនីតិវិធីផ្សេងទៀតដើម្បីផ្តល់សេវាងាយស្រួលជូនប្រជាពលរដ្ឋ និងបន្តសាងសង់ប្រព័ន្ធហេដ្ឋារចនាសម្ព័ន្ធបន្ថែមទៀតដូចជា៖ ការពង្រីកនិងពង្រឹងគុណភាពផ្លូវ ការសាងសង់ស្ពាន និងកំពង់ផែ ដើម្បីឱ្យប្រព័ន្ធដឹកជញ្ជូន មានភាពប្រកួតប្រជែង អាចដឹកជញ្ជូនបានក្នុងតម្លៃថោក និងអាចទាក់ទាញ វិនិយោគិនបង្កើតការងារធ្វើ បង្កើនប្រាក់ចំណូលរបស់ប្រជាពលរដ្ឋ។

លោក ស៊ុន ចាន់ថុល បានអំពាវនាវដល់ក្រុមហ៊ុនដឹកជញ្ជូនឱ្យគោរពច្បាប់ មិនត្រូវដឹកជញ្ជូនទំនិញលើសទម្ងន់កម្រិតកំណត់ និងសូមឱ្យប្រជាពលរដ្ឋ ដែលប្រើប្រាស់ផ្លូវ ត្រូវគោរពច្បាប់ចរាចរណ៍ មិនត្រូវបើកបរលើសល្បឿនកំណត់ មិនត្រូវប្រើគ្រឿងស្រវឹង និង ទូរស័ព្ទពេលកំពុងបើកបរ ហើយយករថយន្តរបស់ខ្លួនទៅឆៀកឱ្យបានទៀងទាត់តាមច្បាប់ ដើម្បីកាត់បន្ថយគ្រោះថ្នាក់ចរាចរណ៍នៅតាមដងផ្លូវ។

លោកទេសរដ្ឋមន្ត្រី បានជម្រុញឱ្យក្រុមហ៊ុន CMVIC ខិតខំប្រឹងប្រែងផ្តល់សេវា ឱ្យបានល្អ មានតម្លាភាព ប្រសិទ្ធភាព ស្មើភាពគ្នា និងខិតខំស្វែងរកបង្កើតមណ្ឌល ឆៀកបន្ថែមទៀត នៅតាមខេត្ត ដើម្បីបង្វិតសេវានេះ ទៅកៀកនឹងប្រជាពលរដ្ឋនិងបានស្នើឱ្យមន្ត្រីក្រសួង សហការជិតស្និទ្ធជាមួយដៃគូផ្នែកឯកជន ដើម្បីពង្រឹងនិងពង្រីកសេវាសាធារណៈនេះ ឱ្យបានល្អជូនប្រជាពលរដ្ឋ តាមអនុសាសន៍ដ៏ថ្លៃថ្លារបស់សម្តេចតេជោនាយករដ្ឋមន្ត្រី។

សូមបញ្ជាក់ថា បច្ចុប្បន្ននេះ មានមណ្ឌលឆៀកយានយន្តសរុប១៣កន្លែង និងឆៀកចល័ត៣គ្រឿង ក្នុងនោះ រាជធានីភ្នំពេញមាន៤កន្លែង និង៩កន្លែងនៅតាមខេត្ត ដូចជាបាត់ដំបង កំពង់ចាម សៀមរាប ព្រះសីហនុ កំពង់ស្ពឺ កំពង់ឆ្នាំង ក្រចេះ រតនគិរីនិងខេត្តព្រះវិហារ ដោយឡែកឆៀកចល័ត៣គ្រឿងកំពុងធ្វើប្រតិបត្តិការឆៀក របស់ខ្លួននៅតាមខេត្តឆ្ងាយៗមួយចំនួនដែលមិនទាន់មានមណ្ឌលឆៀកនៅឡើយ៕

ភ្នំពេញ ៖ ក្រុមអ្នកអភិរក្សាអក្សរសាស្រ្ដជាតិ បានបង្ហាញពីក្ដីព្រួយបារម្ភនិងកត្តាហានីភ័យ ចំពោះការប្រើប្រាស់ អក្សអគ្លេស សំនៀងខ្មែរ ដែលបច្ចុប្បន្ននេះ យុវជន យុវតី កម្ពុជាបាននិងកំពុងប្រើប្រាស់យ៉ាងពេញនិយម លើបណ្ដាញទំនាក់ទំនងសង្គម ដែលអាចជះឥទ្ធិពលមិនល្អសម្រាប់ អក្សរសាស្រ្ដជាតិទៅថ្ងៃខាងមុខ។

ការប្រើប្រាស់អក្សរអគ្លេស សំនៀងខ្មែរនេះ ត្រូវបានក្រុមអ្នកអភិរក្ស អក្សរសាស្រ្ដជាតិ លោកខេមរៈ ប៊ុនណា បានបង្ហាញក្ដីព្រួយបារម្ភជាខ្លាំងជាពិសេសចំពោះ មនុស្សជំនាន់ ក្រោយ ព្រោះការប្រើប្រាស់អក្សរអគ្លេស សំនៀងខ្មែរនេះ បានហូរចូលដល់កុមារ តាម រយៈបណ្ដាញសង្គមទំនាក់ទំនង ខណៈបច្ចុប្បន្នមានការប្រើប្រាស់យ៉ាងទូលំទូលាយ។

បច្ចុប្បន្នក្រុមអ្នកអភិរក្សអក្សរសាស្រ្ដជាតិ បានខិតខំប្រឹងប្រែងយ៉ាងខ្លាំង ដើម្បីធ្វើយ៉ាងណាឲ្យកូនខ្មែរបញ្ឈប់ ការសសេរអក្សរអគ្លេស ជាសំនៀងខ្មែរ, ហើយព្យាយាមសសេរអក្សរសាស្រ្ដជាតិ ឬ អក្សរអង់គ្លេសតែម្តងនៅក្នុងបណ្ដាញសង្គម សូមកុំប្រើអក្សរ អង់គ្លេស សសេរជាសំនៀងភាសាខ្មែរតទៅទៀត ព្រោះវាគ្មានប្រយោជន៍អ្វីចម្រាប់ចំណេះដឹងនោះទេ។

លោកបន្ថែមថា អក្សរសាស្រ្ដជាតិកំពុងតែមានកត្តាហានីភ័យជាខ្លាំងជាពិសេសសម្រាប់កុមារតែម្ដង ជាក់ស្ដែងកុមារមួយចំនួន មិនអាចសសេរអក្សរសាស្រ្ដជាតិ បានត្រឹមត្រូវនោះឡើយ។

ក្រុមអ្នកអភិរក្សអក្សរសាស្រ្ដជាតិ បានធ្វើការអំពាវនាវដល់ក្រសួង ស្ថាប័នពាក់ព័ន្ធជួយត្រួតពិនិត្យ និងកែសម្រួលលើបញ្ហាខាងលើនេះ។ ក្រុមអភិរក្សអក្សរសាស្រ្ដជាតិ នឹងបន្តចុះផ្សព្វផ្សាយ ដល់បងប្អូនតាមមូលដ្ឋាននិងសហគមន៍ ពិសេសលើបណ្ដាញសង្គម ដើម្បីឱ្យយុវជននាំគ្នាលើកកម្ពស់អក្សសាស្រ្តជាតិ៕