ភ្នំពេញ ៖ ក្រសួងអប់រំយុវជន និងកីឡា នាព្រឹកថ្ងៃទី១៤​ តុលា ២០១៩ បានរៀបចំកិច្ចប្រជុំស្ដីពីការប្រកាសសមាសភាព និង​តួនាទីភារកិច្ចរបស់គណៈកម្មការ និងរបាយការណ៍វឌ្ឍនភាពក្នុងការ​រៀបចំព្រឹត្តិការណ៍​វេទិកា​អាហារូបត្ថម្ភ​កុមារ​សកល លើកទី២១ ប្រចាំឆ្នាំ២០១៩។

នេះ​ជា​វេទិកា​មួយ​ដើម្បី​លើក​កម្ពស់​ការ​យក​ចិត្ត​ទុក​ដាក់​ទៅលើការថែទាំសុខភាពកុមារ ខណៈដែលអាហារូបត្ថម្ភ ដែលសមស្រប គឺជាមូលដ្ឋានគ្រឹះ សម្រាប់​ការ​រស់រាន​លូតលាស់​ទាំងផ្នែករាងកាយស្មារតីខួរក្បាលនិងការអភិវឌ្ឍរបស់កុមារ។ កិច្ចប្រជុំនេះបានប្រព្រឹត្តទៅក្រោមការដឹកនាំដោយលោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា នៅទីស្តីការក្រសួង។

សូមជម្រាបថានា ខែធ្នូ ឆ្នាំ២០១៩ខាងមុខនេះព្រះរាជាណាចក្រកម្ពុជា នឹងធ្វើជាម្ចាស់ផ្ទះ​ទទួលរៀបចំព្រឹត្តិការណ៍វេទិកាសកលស្តីពីអាហារូបត្ថម្ភកុមារលើកទី២១ដែលនឹងប្រព្រឹត្តទៅនៅខេត្តសៀមរាបសហការរៀបចំដោយក្រសួងអប់រំយុវជននិងកីឡាមជ្ឈមណ្ឌលឧត្ដមភាពប្រឆាំងនឹងទុរភិក្សនៃកម្មវិធីស្បៀងអាហារពិភពលោកនិងមូលនិធិសកលសម្រាប់អាហារូបត្ថម្ភកុមារ។ ព្រឹត្តិការណ៍​នេះ​នឹង​មានការចូលរួម ពី​សំណាក់មន្រ្តីជាន់ខ្ពស់ ប្រមាណ​៣០០រូប មក​ពី​៤០ប្រទេស៕

ភ្នំពេញ ៖ លោក មីកាមិ ម៉ាសាហ៊ីរុ (MIKAMI Masahiro ) ឯកអគ្គរាជទូតជប៉ុន ទើបតែងតាំងថ្មី ប្រចំាព្រះរាជាណាចក្រកម្ពុជាសន្យាថានឹងខិតខំជំរុញវិស័យពាណិជ្ជកម្មរវាងកម្ពុជា និងជប៉ុនឱ្យកាន់តែកើនឡើង។ លើសពីនេះលោកឯកអគ្គរាជទូតបានសន្យាថានឹងខិតខំជំរុញ ទំនាក់ទំនាក់រដ្ឋសភាប្រទេសទំាងពីរឱ្យកាន់តែរឹងមាំថែមទៀត។

ការសន្យាបែបនេះធ្វើឡើងនៅក្នុងឱកាសចូលសម្តែងការគួរសម ជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា នៅវិមានរដ្ឋសភានាព្រឹកថ្ងៃទី១៤ ខែតុលាឆ្នាំ២០១៩នេះ។ ទន្ទឹមនោះលោកក៏កោតសរសើរខ្ពស់ចំពោះការខិតខំតស៊ូ របស់រដ្ឋសភា រាជរដ្ឋាភិបាល និងប្រជាជនកម្ពុជា ដែលបានកសាងអភិវឌ្ឍន៍ប្រទេសជាតិ ចេញពីសង្រ្គាមទទួលបាននូវវឌ្ឍនភាពយ៉ាងក្រៃលែងដូចសព្វថ្ងៃ។ លោកបញ្ជាក់ថា រដ្ឋាភិបាលជប៉ុន មានមោទនភាពដែលបានចូលរួមចំណែកស្វែងរកសុខសន្តិភាព និងការអភិវឌ្ឍជាមួយជាប្រជាជនកម្ពុជា។

ក្នុងឱកាសនោះ ឯកអគ្គរាជទូតជប៉ុន បានជម្រាបសម្តេចប្រធានរដ្ឋសភាថា ដោយសង្កេតឃើញកំណើនសេដ្ឋកិច្ចកម្ពុជាខ្ពស់ អ្នកវិយោគទុនជប៉ុនជាច្រើន មានបំណងមកបណ្តាក់ទុកនៅកម្ពុជា ហើយក្នុងបេសកកម្មការទូតនៅកម្ពុជានេះ។

សម្តេចអគ្គមហាពញាចក្រី ហេង សំរិន បានអបអរសាទរនូវ ជោគជ័យទាំងឡាយដែលកម្ពុជា និង ជប៉ុន សម្រេចបាន ពិតជាមិនអាចកាត់ផ្តាច់បានពីការខិតខំប្រឹងប្រែង របស់ឯកអគ្គរាជទូតជប៉ុនគ្រប់រូប ដែលបានអនុវត្តន៍ការងារយ៉ាងសកម្ម និងហ្មត់ចត់ជាមួយកម្ពុជា។ សម្តេចប្រធាន មានក្តីសង្ឃឹមថា ឯកឧត្តម មីកាមិ ម៉ាសាហ៊ីរុ នឹងបន្តបេសកកម្មដ៏ល្អនេះតទៅទៀតដើម្បីបម្រើផលប្រយោជន៍ដ៏ឧត្តុង្គឧត្តមនៃប្រទេសទំាងពីរ។

សម្តេចអគ្គមហាពញាចក្រី ហេង សំរិន បានថ្លែងអំណរដល់រាជរដ្ឋាភិបាល និងប្រជាជនជប៉ុន ដែលបានចូលរួមស្វែងរកសុខសន្តិភាព និងការបង្រួបបង្រួមជាតិ ដើម្បីស្តារ និងកសាងប្រទេសឡើងវិញ និងនៅតែបន្តជួយកម្ពុជារហូតសព្វថ្ងៃ។

សម្តេចអគ្គមហាពញាចក្រី ហេង សំរិនបានស្នើដល់ភាគីជប៉ុន ដែលជួយបណ្តុះបណ្តាលជំនាញបច្ចេកទេសដល់ប្រជាជនកម្ពុជាបន្ថែម ហើយរដ្ឋសភាត្រៀមខ្លួនជាសេ្រចក្នុងការធ្វើកិច្ចសហប្រតិបត្តិការពេញលេញជាមួយលោក មីកាមិ ម៉ាសាហ៊ីរុ ដើម្បីឱ្យបេសកកម្មការទូតនៅកម្ពុជាទទួលបានជោគជ័យ៕

ភ្នំពេញ ៖ នាយករដ្ឋមន្ត្រីកម្ពុជា សម្ដេច ហ៊ុន សែន កាលពីរសៀលថ្ងៃទី១៣ ខែតុលា ឆ្នាំ២០១៩ នេះ បានអញ្ជើញដល់ ទីក្រុងប្រាត (Prague, Czech) ដោយមានបងប្អូនប្រជាពលរដ្ឋខ្មែរ និស្សិតខ្មែរ និងមន្ត្រីស្ថានទូតជាច្រើនរូប បានទទួលស្វាគមន៍ ដោយក្តីគោរពស្រឡាញ់នៅក្នុងសណ្ឋាការមួយ។

តាមកម្មវិធីរសៀលដដែលនេះ គឺសម្ដេចតេជោ គ្រោងនឹងអញ្ជើញទៅទស្សនាទីក្រុងចាស់របស់ប្រទេសឆែក ប៉ុន្តែ សម្ដេចតេជោ បានលុបចោលកម្មវិធីនេះ ហើយបានអញ្ជើញផ្តល់កិត្តិយសជួបជុំជាមួយបងប្អូនខ្មែរដែលបានមករង់ចាំទទួល សម្ដេច វិញ។

គួរជម្រាបថា ប្រទេសកម្ពុជា និងឆែក គឺមានទំនាក់ទំនងល្អជាមួយគ្នាតាំងពីរវាងឆ្នាំ១៩៦០ មកម្ល៉េះ ហើយអតីត ព្រះករុណាព្រះបាទសម្ដេចព្រះ បរមនាថ នរោត្តម សីហមុនី ក៏ធ្លាប់ជានិស្សិតសិក្សានៅប្រទេសឆេកូនេះផងដែរ។ ទំនាក់ទំនងការទូតរវាងប្រទេសយើងទាំងពីរ គឺល្អជាពិសេស គឺចាប់តាំង ពីឆ្នាំ១៩៧៩-១៩៩០ ដែលពេលនោះ រាជរដ្ឋាភិបាលកម្ពុជា បានបញ្ជូននិស្សិតមកសិក្សានៅទីនេះបានច្រើនតាមរយៈអាហារូបករណ៍ដែលកម្ពុជាទទួលបាន។

សូមបញ្ជាក់ផងដែរថា អតីតស្ថានទូតប្រទេសឆែកពីមុន គឺមានទីតាំងនៅស្ថានទូតអឺរ៉ុបសព្វថ្ងៃនេះ ។ ប្រទេសឆែកក៏មានទំនាក់ទំនងល្អជាមួយអាស៊ានដែរ ហើយទន្ទឹមនឹងនេះ ឆែក បានសម្រេចផ្តល់ជំនួយអភិវឌ្ឍន៍គំរូដល់កម្ពុជាក្នុងមួយឆ្នាំ១លានដុល្លារកន្លះ ចាប់ពីឆ្នាំ២០២០ ខាងមុខនេះ៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៅព្រឹកថ្ងៃទី១៣ តុលានេះ បានដឹកនាំគណៈប្រតិភូជាន់ខ្ពស់ចាកចេញពីកម្ពុជា ដើម្បីទស្សនកិច្ចប្រទេសចំនួនពីរ និងចូលរួមប្រជុំចំនួន១ នៅប្រទេសចំនួន៣ ក្នុងតំបន់អឺរ៉ុបកណ្តាល រយៈពេល៥ថ្ងៃ។

សម្តេចតេជោ ហ៊ុន សែន នាយករដ្ឋមន្រ្តីនៃព្រះរា ជាណាចក្រកម្ពុជា នៅព្រឹកថ្ងៃអាទិត្យនេះ បានដឹកនាំ គណៈប្រតិភូជាន់ខ្ពស់ អញ្ជើញបំពេញទស្សនកិច្ចនៅប្រទេសចំនួនបីនៅតំបន់អឺរ៉ុបក្នុងនោះ សាធារណរដ្ឋឆែក ហុងគ្រី និងសាធារណរដ្ឋប៊ុលហ្គារី ពីថ្ងៃទី ១៣ ដល់ថ្ងៃទី ១៧ ខែតុលា ឆ្នាំ២០១៩ ។

បើតាមរដ្ឋមន្ត្រីប្រតិភូអមនាយករដ្ឋមន្ត្រី លោក ស្រ៊ី ថាមរង្គ បានបញ្ជាក់ប្រាប់អ្នកកាសែតនៅអាកាសយានដ្ឋានអន្តរជាតិភ្នំពេញថា អញ្ជើញអមដំណើរសម្តេចតេជោនាយករដ្ឋមន្រ្តី រួម មាន លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេសនិងសហប្រតិបត្តិការអន្តរជាតិ លោក ប៉ាន សូរស័ក្តិ រដ្ឋមន្រ្តីពាណិជ្ជកម្ម លោក លឹម គានហោ រដ្ឋមន្រ្តីធនធានទឹក និងឧតុនិយម លោក ថោង ខុន រដ្ឋមន្រ្តីទេសចរណ៍ ព្រមទាំងឥស្សរៈជនជាន់ខ្ពស់ នៃរាជរដ្ឋាភិបាល និងថ្នាក់ដឹកនាំធុរកិច្ចជាច្រើនទៀតរបស់សភាពាណិជ្ជកម្មកម្ពុជាផងដែរ។

លោករដ្ឋមន្ត្រីប្រតិភូអមនាយករដ្ឋមន្ត្រី បានឲ្យដឹងថា សម្តេចនឹងទស្សនកិច្ចផ្លូវការនៅសាធារណរដ្ឋឆែក តបតាមការអញ្ជើញរបស់លោក អេនដ្រេហ្គ បាប៊ីស (Andrej Babiš) នាយករដ្ឋមន្រ្តីនៃសាធារណរដ្ឋឆែក ចាប់ពីថ្ងៃទី១៣ ដល់ទី ១៤ ខែតុលា ឆ្នាំ២០១៩។ ក្នុងអំឡុងពេលទស្សនកិច្ច សម្តេចតេជោនាយករដ្ឋមន្រ្តី នឹងអញ្ជើញចូលជួបសម្តែងការគួរសមជាមួយលោក ចារ៉ូស្លាវ គុបេរ៉ា (Jaroslav Kubera) ប្រធានព្រឹទ្ធសភានៃសាធារណរដ្ឋឆែក។ សម្តេចតេជោនាយករដ្ឋមន្រ្តី និងលោកនាយករដ្ឋមន្រ្តី អេនដ្រេហ្គ បាប៊ីស នឹងជួបពិភា ក្សាទ្វេភាគីលើទិដ្ឋភាពផ្សេងៗនៃកិច្ចសហប្រតិ បត្តិការទ្វេភាគី ហើយនៅក្រោយជំនួបផ្លូវការនេះ នាយករដ្ឋមន្រ្តីទាំងពីរ នឹងអញ្ជើញជាអធិបតីក្នុងពិធីចុះហត្ថ លេខាលើឯកសារមួយចំនួន ស្តីពីកិច្ចសហប្រតិបត្តិការទ្វេភាគី និងធ្វើសេចក្តីប្រកាសព័ត៌មានរួមគ្នា។

នៅថ្ងៃទី១៥ ខែតុលា សម្តេចតេជោ នឹងអញ្ជើញទៅកាន់នៅទីក្រុងប៊ុយដាប៉ែស ប្រទេសហុងគ្រី ដើម្បីចូលរួមកិច្ចប្រជុំកំពូលប៊ុយដាប៉ែសស្តីពីទឹក លើកទី៣ ក្រោមប្រធានបទ «ការទប់ស្កាត់វិបត្តិទឹក»។ កិច្ចប្រជុំកំពូល ប៊ុយដាប៉ែសស្តីពីទឹក នឹងផ្តល់ឱកាសដល់ថ្នាក់ដឹកនាំ និងអ្នកចូលរួមទាំងអស់ចែករំលែកបទពិសោធន៍ និងផ្លាស់ប្តូរទស្សនៈ ដើម្បីជំនះនូវបញ្ហាប្រឈមនានា ទាំងនៅក្នុងតំបន់ និងសកលលោកនាពេលបច្ចុប្បន្ន សំដៅធ្វើយ៉ាងណាសម្រេចឲ្យបាន នូវការរីកលូតលាស់ប្រកប ដោយចីរភាព និងបរិយាប័ន្ន ជាពិសេសទប់ស្កាត់វិបត្តិទឹកឲ្យបាន។

តាមការគ្រោងទុក សម្តេចតេជោនាយករដ្ឋមន្រ្តី នឹងអញ្ជើញថ្លែងសុន្ទរកថានៅក្នុងពិធីបើកកិច្ចប្រជុំកំពូលនេះ ដោយផ្តោតទៅលើអាទិភាព យុទ្ធសាស្រ្ត និងកម្មវិធីការងារច្បាស់លាស់របស់កម្ពុជា ដើម្បីសម្រេចបាននូវការគ្រប់គ្រង និងការអភិវឌ្ឍធនធានទឹកប្រកបដោយប្រសិទ្ធភាព និងនិរន្តរភាព។ សម្តេចតេជោនាយករដ្ឋមន្រ្តី ក៏នឹងលើកឡើងពីភាពចំាបាច់ក្នុងកិច្ចប្រឹងប្រែងរួមគ្នាសម្រាប់សន្តិសុខទឹក និងនិរន្តរភាពបរិស្ថាន និងបញ្ហាប្រឈមដទៃទៀត ដូចជា និន្នាការនៃការឡើងកំដៅភពផែនដី កំណើនប្រជាជនក្នុងសកល លោក និងជម្លោះក្នុងការប្រើប្រាស់ទឹកឆ្លងដែន។ ក្នុងអំឡុងពេលស្នាក់នៅទីក្រុងប៊ុយដាប៉ែស សម្តេចតេជោនាយករដ្ឋមន្រ្តី នឹងអញ្ជើញចូលជួប សម្តែងការគួរសមជាមួយឯកឧត្តម យ៉ាណូស អាឌ័រ ប្រធានា ធិបតីហុងគ្រី ព្រមទាំងទទួលការចូលជួបសម្តែងការគួរសមដាច់ដោយឡែកដោយ ឯកឧត្តម លី យ៉ុង (Li Yong) អគ្គនាយកអង្គការអភិវឌ្ឍឧស្សាហកម្មសហប្រជាជាតិ (UNIDO)។

ក្រៅពីនេះ សម្តេចតេជោ នឹងដឹកនាំគណៈប្រតិភូ ទស្សនកិច្ចផ្លូវការនៅសាធារណរដ្ឋប៊ុលហ្គារី ពីថ្ងៃទី១៥ ដល់ទី១៦ ខែតុលា ឆ្នាំ២០១៩ ។ ទស្សនកិច្ចនេះធ្វើឡើងតបតាមការអញ្ជើញរបស់ លោក បូយកូ បូរីសសូវ នាយករដ្ឋមន្រ្តីនៃសាធារណរដ្ឋប៊ុលហ្គារី។ ក្នុងអំឡុងពេលទស្សនកិច្ច សម្តេចតេជោនាយករដ្ឋមន្រ្តី នឹងអញ្ជើញចូលជួបសម្តែងការគួរសមជាមួយលោក រូមិន រ៉ាដេវ (Rumen Radev) ប្រធានាធិបតីនៃសាធារណរដ្ឋប៊ុលហ្គារី ។

សម្តេចតេជោនាយករដ្ឋមន្រ្តី នឹងជួបពិភាក្សាទ្វេភាគីជាមួយសមភាគីប៊ុលហ្គារី លោកនាយករដ្ឋមន្រ្តីបូយកូ បូរីសសុវ ដែលនៅក្នុងឱកាសនោះ នាយករដ្ឋមន្រ្តីទាំងពីរ នឹងពិភាក្សាលើបញ្ហានានាពាក់ព័ន្ធនឹងកិច្ចសហ ប្រតិបត្តិការទ្វេភាគី តំបន់ និងអន្តរជាតិ ដែលមានផលប្រយោជន៍ទៅវិញទៅមក និងការបារម្ភរួមគ្នា។ នៅចុងប ញ្ចប់នៃជំនួប នាយករដ្ឋមន្រ្តីទាំងពីរ នឹងអញ្ជើញជាអធិបតីក្នុងពិធីចុះហត្ថលេខាលើឯកសារកិច្ចសហប្រតិបត្តិការមួយចំនួន៕

ភ្នំពេញ ៖ គ្រោះថ្នាក់ចរាចរណ៍រវាងរថយន្ត ២គ្រឿងបានបើកបំបុកគ្នាយ៉ាងពេញទំហឹងបណ្តាលក្រឡាប់ផ្ងារជើងទាំង២គ្រឿងតែម្តង។ហេតុការណ៏គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង ៧ព្រឹកថ្ងៃទី១៣ ខែតុលា ឆ្នាំ២០១៩ស្ថិតនៅតាមបណ្តោយផ្លូវ១០៤ ភូមិក្រពើទ្រោម សង្កាត់រលួស ខណ្ឌដង្កោ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានអោយដឹងថា មុនពេលកើតហេតុគេឃើញរថយន្តដឹកខ្សាច់ពណ៌ស្វាយ គ្មានស្លាកលេខបើកបរដោយបុរសម្នាក់មិនស្គាល់អត្តសញ្ញាណធ្វើដំណើរពីទិសដៅពីលិចទៅកើត លុះដល់ចំណុចកើតហេតុក៏មានរថយន្តដឹកដីមួយគ្រឿងទៀតពណ៌ស គ្មានស្លាកលេខដូចគ្នាបើកបរដោយបុរសម្នាក់មិនស្គាល់អត្តសញ្ញាណទិសដៅបញ្រ្ចាសគ្នាបានក្នុងល្បឿនលឿនបានរេចង្កូតបុកជាមួយរថយន្តដឹកខ្សាច់ខាងលើលាន់ឮដូចរន្ទះបណ្តាលអោយរថយន្តទាំងពីគ្រឿងក្រឡាប់នៅផ្លូវធ្វើអោយមានការកកស្ទះចរាចរណ៏យ៉ាងខ្លាំង។ចំណែកអ្នកបើកបររថយន្តទាំង២នាក់បានបើកទ្វាររថយន្តចុះរត់គេចខ្លួនបាត់អស់។

ក្រោយពេលកើតហេតុសមត្ថកិច្ចមូលដ្ឋានបានសហការណ៏ជាមួយចរាចរណ៏ជំនាញខណ្ឌចុះធ្វើការវាស់វែងនិងជួយសម្រួលចរាចរណ៏នៅកន្លែងកើតហេតុបន្ទាប់មកក៏បានហៅរថយន្តស្ទូចមកស្ទូចយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌដង្កោដើម្បីដោះស្រាយគ្នានៅពេលក្រោយ៕

ខេត្តកំពង់ចាម ៖ អភិបាលនៃគណៈ អភិបាល ខេត្តកំពង់ចាម លោក អ៊ុន ចាន់ដា បានថ្លែង អំពាវនាវដល់បងប្អូនប្រជាពលរដ្ឋឲ្យចូលរួមប្រឆាំងជាដាច់ខាត់ ចំពោះការប៉ុនប៉ង បង្កើតបដិវត្តពណ៌ ចង់ផ្តួលរំលំរាជរដ្ឋាភិបាលស្របច្បាប់ដែលជាការ រៀបចំឡើងដោយក្រុមអ្នកនយោបាយប្រឆាំងក្រៅច្បាប់ ហើយនាំគ្នាចូលរួមពិធីពិសាអំបុកខ្មែរ ដើម្បីការពារជាតិ សាសនា ព្រះមហាក្សត្រ នៅថ្ងៃទី៩ ខែវិច្ឆិកា ខាងមុខនេះ នៅតាមទីវត្តអារាមនានា ក៏ដូចជានៅតាម គេហដ្ឋានបងប្អូនក៏សូម រៀបចំពិធីនេះផងដែរ ការថ្លែងយ៉ាងដូច្នេះ ក្នុងឱកាសដែល ក្រុមការងារគ្រូពេទ្យស្ម័គ្រចិត្តរបស់លោក ហ៊ុន ម៉ានី ចុះពិនិត្យព្យាបាលជម្ងឺទូទៅ និងផ្តល់ថ្នាំដោយឥតគិតថ្លៃជូនបងប្អូនប្រជាពលរដ្ឋប្រមាណជា៥០០០នាក់ មកពីឃុំចំនួន៣ ក្នុងស្រុកកោះសូទិន ខេត្តកំពង់ចាម នាព្រឹកថ្ងៃទី១៣ ខែតុលា ឆ្នាំ ២០១៩ ក្រោមបរិយាកាសរីករាយ និងស្និទ្ធស្នាលជាមួយប្រជាពលរដ្ឋ។

ឆ្លៀតក្នុងឱកាសនោះដែរលោក អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណចំពោះក្រុមគ្រូពេទ្យស្ម័គ្រចិត្ត របស់លោក ហ៊ុន ម៉ានី ដែលសុទ្ធសឹងតែជាអ្នកមានជំនាញ បទពិសោធន៍ច្បាស់លាស់ទទួលការសិក្សានៅបរទេស ហើយលះបង់ពេលវេលាចុះជួយពិនិត្យ និងព្យាបាលជំងឺជូន បងប្អូនប្រជាពលរដ្ឋ នាពេលនេះ ដោយមិនគិតពីការនឿយហត់ដែលកើតចេញពីស្មារតីមនុស្សធម៌សុទ្ធសាធ ស្តែងចេញពីសេចក្តីស្រឡាញ់ បងប្អូនប្រជាពលរដ្ឋក្នុងនាមឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការ ពិនិត្យ ព្យាបាលមិនប្រកាន់បក្សពួកសាសនា ឬនិន្នាការនយោបាយណាមួយឡើយ។

ជាមួយគ្នានោះលោកអភិបាលខេត្ត ក៏បានលើកឡើងផងដែរ ថា ការចុះពិនិត្យ និងព្យាបាលជំងឺជូនបងប្អូនប្រជាពលរដ្ឋ ដល់មូលដ្ឋានដោយផ្ទាល់ នាឱកាសនេះ គឺដើម្បីចូលរួមចំណែកទ្រទ្រង់ដល់ជីវភាពក្នុងគ្រួសារបងប្អូនដោយបងប្អូន មិនត្រូវចំណាយពេលវេលា និងថវិកាទៅពិនិត្យ និងព្យាបាល ជំងឺនៅទីឆ្ងាយៗនោះឡើយ។ ទាំងនេះ ក៏ព្រោះតែប្រទេស ជាតិយើងមានសុខសន្តិភាព ដូច្នេះសូមឲ្យពុកម៉ែ បងប្អូន រួម គ្នាថែរក្សាសុខសន្តិភាព នេះឲ្យបានឋិតថេរគង់វង្ស ដើម្បីបន្ត ការអភិវឌ្ឍរីកចម្រើនផងដែរ ។

សូមបញ្ជាក់ផងដែរថា ក្រុមគ្រូពេទ្យស្ម័គ្រចិត្តលោក ហ៊ុន ម៉ានី ប្រមាណជា ៦០០នាក់ដែលបានចុះពិនិត្យ និងព្យាបាលជូនប្រជាពលរដ្ឋប្រមាណជា ៥០០០នាក់នេះ រួមមាន៖ ជំងឺទូទៅ មានវះកាត់ខ្នាតតូច ជំងឺផ្លូវចិត្ត ជំងឺទូទៅផ្នែកកុមារ រោគស្ត្រី ឬសដូងបាត សួត ក្រពះ ពោះវៀន ជំងឺផ្លូវដង្ហើម ប្រដាប់រំលាយអាហារ សើស្បែក ព្រូន ស្លេកស្លាំង សន្លាក់ឆ្អឹង រលាកថ្លើម កាមរោគ គ្រុនចាញ់ គ្រុនឈាម ភ្នែក សុខភាពមាត់ធ្មេញ ទឹកនោមផ្អែម បេះដូង លើសឈាម ត្រចៀក ច្រមុះ បំពង់ករ តម្រងនោម អេកូសាស្ត្រ ព្យាបាលរបួស វាស់ចង្វាក់បេះដូង មន្ទីរពិសោធន៍(វិភាគឈាម) ចាដើម៕ ដោយ   ៖ ប៉ែនសុផល