ភ្នំពេញ៖ស្រ្តីជាជនជាតិខ្មែរវ័យ32ឆ្នាំម្នាក់បានចុះពីលើយន្ត ទាំងមានសតិមិនប្រក្រតីវង្វេងវង្វន់ ដែលគេសង្ស័យ ថានាងបានចាញ់បោកមេខ្យល់នាំយកទៅលក់នៅប្រទេសចិនហើយ ត្រូវបានសមត្ថកិច្ចចិនបញ្ជូន ត្រឡប់មកប្រទេសកម្ពុជាវិញ។

ស្រ្តីរូបនោះ ត្រូវបានគេប្រទះឃើញ បន្ទាប់ពីចុះពីលើយន្តហោះកាលពីវេលាម៉ោង១យប់រំលងអាធ្រាត្រឈានចូលថ្ងៃទី២៨ ខែសីហា ឆ្នាំ២០១៩ នៅក្នុងព្រលានយន្តហោះអន្តរជាតិភ្នំពេញ ដែលស្ថិតនៅភូមិក្បាលដំរី សង្កាត់កាកាប១ ខណ្ឌពោធិ៍សែនជ័យហើយ នៅវេលាម៉ោងប្រមាណ៨ព្រឹកត្រូវបានគេរាយការណ៍ប្រាប់នគរបាលមូលដ្ឋានចុះទៅទទួល។

តាមសមត្ថកិច្ចបានឲ្យដឹងថា នៅជាប់ខ្លួនស្រ្តីរូបនេះមិនមានលិខិតឆ្លងដែនឬអត្តសញ្ញាណប័ណ្ណទេ គឺមានតែលិខិត១សន្លឹកដែលខាងប្រទេសចិនបញ្ជូននាងមក ។

តាមរយៈលិខិតនោះនាងត្រូវបានគេស្គាល់ឈ្មោះតុន សោភ័ណ អាយុ៣២ឆ្នាំ ប៉ុន្តែមិនដឹងថា មានទីលំនៅក្នុងភូមិ ឃុំ ស្រុក ខេត្តណាឡើយ។តាមព័ត៌មានអោយដឹងទៀតថា នៅពេលសួរនាំ ពីស្រុកកំណើត នាងពុំចាំនោះទេ គឺវង្វេងតែនាងបាននិយាយថា នាងចាញ់បោកមេខ្យល់នាំយកទៅលក់នៅប្រទេសចិនរយៈពេល៥ខែមកហើយ ត្រូវបានគេធ្វើបាបជាខ្លាំង។

ស្រ្តីរូបនោះ ត្រូវបានសមត្ថកិច្ចមានការសង្ស័យ ថានាង ត្រូវបានគេនាំយកទៅលក់នៅប្រទេសចិន ហើយធ្វើបាបរហូតមានសតិមិនប្រក្រតីហើយ ត្រូវបានសមត្ថកិច្ចចិនបញ្ចូនតាមយន្តហោះមកកាន់កាន់ប្រទេសកំណើតវិញ។ទោះបីជាយ៉ាងណា គេពុំដឹងច្បាប់ពីរឿងរ៉ាវដែលធ្វើអោយស្រ្តីរូបនោះធ្លាក់ខ្លួនបែបនោះឡើយ ។

នៅព្រឹកនោះដែរ បន្ទាប់ពីសាកសួរមិនដឹងពីផ្ទះសម្បែង ខាងវទ្យុអេប៊ីស៊ីក៍បានអោយសមត្ថកិច្ច បញ្ជូនទៅកាន់ស្ថាននីយ៍ដើម្បីស្រាវជ្រាវរកបងប្អូន៕ម៉េង ធា

ភ្នំពេញ ៖ ក្នុងពិធីសង្ឃសន្និបាតរាជធានីភ្នំពេញនៅវត្តលង្កាព្រះកុសុមារាមព្រឹកថ្ងៃទី២៨ ខែសីហានេះ លោកជំទាវ ទូច សារុំ រដ្ឋលេខាធិការក្រសួងធម្មការ និងសាសនា និងសម្តេចព្រះពុទ្ធជ័យមុនី ឃឹម សន ព្រះមេគណរាជធានីភ្នំពេញ បានជម្រុញឱ្យព្រះសង្ឃទាំងអស់អង្គគោរពឱ្យបាននូវវិន័យសង្ឃ ដើម្បីបានជាការលើកតម្លៃព្រះពុទ្ធសាសនានៅ កម្ពុជាដែលពលរដ្ឋខ្មែរបានគោរពប្រណិបត្តិអស់កាលដ៏យូរលង់ណាស់មកហើយនោះឱ្យបានស្ថិតស្ថេរគង់វង្ស និង រីកចំរើនតទៅមុខបន្ថែមទៀត។

លោកជំទាវ ទូច សារុំ មានប្រសាសន៍ថា ក្រសួងធម្មការ និងសាសនា ពិតជាបានយកចិត្តទុកដាក់ខ្ពស់បំផុត ចំពោះរាល់បណ្តាសាសនាដែលមាននៅកម្ពុជា តែព្រះពុទ្ធសាសនាដែលជាសាសនារបស់រដ្ឋត្រូវបានពង្រឹងឱ្យមាន ភាពរឹងមាំ តាមរយៈការកសាងនូវសមិទ្ធផលជាច្រើនដែលមានការចូលរួមពីប្រជាពុទ្ធបរិស័ទ។ ដូច្នេះព្រះសង្ឃដែល ជាភេទអ្នកបួស តោងគោរពប្រណិបត្តិឱ្យបានល្អចំពោះធម្មវិន័យនៃព្រះពុទ្ធសាសនា។

ដោយឡែកសម្តេចព្រះពុទ្ធជ័យមុនី ឃឹម សន ព្រះមេគណរាជធានីភ្នំពេញមានថេរដិកាថា សូមរួមគ្នាធ្វើ អ្វីៗឱ្យមានផលល្អចំពោះព្រះពុទ្ធសាសនា កុំធ្វើឱ្យព្រះពុទ្ធសាសនានៅកម្ពុជាមានភាពធាក់ថយឱ្យសោះ នោះគឺការ គោរពឱ្យបានមាំទាំចំពោះវិន័យនៃព្រះពុទ្ធសាសនា។ សម្តេចបានគូសបញ្ជាក់ថា កាលពីសម័យ ៣ឆ្នាំ ៨ខែ និង២០ ថ្ងៃ ព្រះពុទ្ធសាសនាពិតជាបានវិនាសហិនហោចទៅហើយក៏ពិតមែន តែនៅក្រោយរបបឥតសាសនាមួយនេះត្រូវ ដួលរលំអ្វីៗត្រូវបានស្តារឡើងវិញ ក្នុងនោះក៏មានវិស័យព្រះពុទ្ធសាសនាផងដែរ ហើយវិស័យមួយនេះបានដើរតួ នាទីយ៉ាងសំខាន់ក្នុងការជួយដល់សង្គមកម្ពុជាតាំងតែពីដើម រហូតមកទល់នឹងពេលបច្ចុប្បន្ននេះ ដូចនេះ ទាំងព្រះ សង្ឃ ទាំងពុទ្ធបរិស័ទ ចាំបាច់ត្រូវមានការរួបរួមគ្នានៅជុំវិញព្រះពុទ្ធសាសនា ជាពិសេសព្រះសង្ឃដែលមានភេទអ្នក បួសត្រូវគោរពឱ្យខាងតែបាននូវវិន័យព្រះពុទ្ធសាសនា ជៀសវាងការប្រព្រឹត្តនូវអំពើឆ្គាំឆ្គងណាមួយដែលនាំឱ្យ ស្រអាប់ដល់តម្លៃព្រះពុទ្ធសាសនា។

ក្នុងពិធីនេះសម្តេចព្រះពុទ្ធជ័យមុនី ឃឹម សន ក៏បានលើកឡើងពីករណីដែលកើតមានឡើងដដែលជា ដដែលនូវជនក្លែងបន្លំធ្វើជាព្រះសង្ឃ គ្រងស្បង់ចីវដើរបិណ្ឌបាតដោយខុសច្បាប់ ក៏ដូចជាក្រុមអ្នកដើររៃអង្គាសពាស វាលពាសកាល ដែលបានធ្វើឱ្យប៉ះពាល់យ៉ាងធ្ងន់ធ្ងរចំពោះតម្លៃព្រះពុទ្ធសាសនាផង និងប៉ះពាល់ដល់តម្លៃជាតិនៃ កម្ពុជាផង ហើយបើទោះបីជាយើងបានខិតខំទប់ស្កាត់យ៉ាងក្តី ក៏ករណីដ៏គួរឱ្យអៀនខ្មាសមួយនេះនៅតែកើតមាន ដដែលជាដដែល ដែលបង្កឡើងដោយក្រុមជនមិនខ្លាចបាប និងមិនខ្មាសបាប៕

ភ្នំពេញ ៖ ប្រធានរាជបណ្ឌិត្យសភាកម្ពុជា លោកបណ្ឌិត សភាចារ្យ សុខ ទូច សុំកុំឱ្យប្រជាជនជឿអ្នកនយោបាយ ព្រោះថា ពាក់ព័ន្ធនិងលុយកាកជំពាក់ឬខ្ចីបុលគេ ត្រូវតែសងគេ បើទោះជាត្រូវផ្លាស់ប្តូមេដឹកនាំប្រទេស រូបណាក៏ដោយ។ ការលើកឡើងដូច្នេះ បន្ទាប់ពីពេលថ្មីៗនេះ មានអ្នកនយោយបាយមួយចំនួន បានធ្វើរលកនយោបាយ ដោយប្រើប្រាស់បញ្ហាមីក្រូហិរញ្ញវត្ថុ ដើម្បីវាយប្រហារមកលើរាជរដ្ឋាភិបាល ក្រោមលេសថា ពលរដ្ឋខ្មែរជំពាក់លុយគេរាប់ម៉ឺនដុល្លារក្នុងម្នាក់ៗ។

លោក សុខ ទូច បានរំលឹកថា បន្ទាប់ពីមានការប្រកាសចូលស្រុកវិញ របស់អ្នកនយោបាយមួយក្រុមនោះ ក៏បានបញ្ចេញស្នៀតចាស់ ដែលពួកគេធ្លាប់បានធ្វើកាលពីអំឡុង ឆ្នាំ២០១៣ដោយបង្កើតឱ្យមានរលកនយោបាយមួយ គឺយកបញ្ហាមីក្រូហិរញ្ញវត្ថុនេះ ធ្វើជាប្រធានបទ ដើម្បីវាយប្រហារមកលើរាជរដ្ឋាភិបាល ដោយគេលើកឡើងថា ធនាគារ និង មីក្រូហិរញ្ញវត្ថុទាំងអស់ជារបស់រដ្ឋ ហើយបើពួកគេឈ្នះអំណាច ពួកគេនឹងដោះបំណុលឱ្យទាំងអស់ ដែលនោះជាចេតនាបំពុលអារម្មណ៍ ប្រជាពលរដ្ឋមួយចំនួន ដែលលោកមិនមានចំណេះដឹងផ្នែកហិរញ្ញវត្ថុ ជាពិសេសគឺកូរឱ្យមានបញ្ហា ទំលាក់បន្ទុកទៅលើរាជរដ្ឋាភិបាលដើម្បីទាញប្រជាប្រិយ៍ភាព និងកេងចំណេញនយោបាយរបស់ពួកគេតែប៉ុណ្ណោះ។

បញ្ហាខាងលើនេះ ត្រូវបានរាជបណ្ឌិតសភា យកគម្រោងនោះទៅសិក្សាស្រាវជ្រាវ ដោះបញ្ហា និងបានបញ្ជាក់យ៉ាងច្បាស់ថា ធនាគារ និង មីក្រូហិរញ្ញវត្ថុទាំងអស់ ជារបស់ឯកជន មិនមែនជារបស់រដ្ឋទេ មានតែធនាគាជាតិមួយ ជារបស់រដ្ឋ។ ហើយឥឡូវនេះ ស្នៀតដដែល ត្រូវបានអ្នកនយោបាយក្រៅស្រុកលើកយកមកជាថ្មីម្តងទៀត ក្រោយប្រកាសចូលស្រុកនៅថ្ងៃទី៩វិច្ឆិកាខាងមុខនេះ។

លោកបណ្ឌិតសភាចារ្យ សុខ ទូច បានលើកឡើងដូចនេះនាព្រឹកថ្ងៃទី២៨ខែសីហា ខណៈរាជបណ្ឌិត្យសភាកម្ពុជា បានរៀបចំកិច្ចពិភាក្សាតុមូលមួយ ក្រោមប្រធានបទ «ដំណើរប្រព្រឹត្តទៅ និងភាពជាដៃគូ នៃសេវាកម្មធនាគារ និង គ្រឹះស្ថានមីក្រូហិរញ្ញវត្ថុនៅកម្ពុជា» ដែលកិច្ចពិភាក្សានេះ ធ្វើឡើងនៅសាលប្រជុំ វិទ្យាស្ថានខុងជឺ នៃរាជបណ្ឌិត្យសភាកម្ពុជា។កិច្ចពិភាក្សាតុមូល របស់រាជបណ្ឌិត្យសភាកម្ពុជា មានការអញ្ជើញចូលរួមធ្វើជាវាគ្មិនកិត្តិយសរួមមាន៖ ឯកឧត្តម រ័ត្ន សុវណ្ណនរៈ តំណាងធនាគារជាតិនៃកម្ពុជា និងលោក គា បូរាណតំណាងសមាគមមីគ្រូហិរញ្ញវត្ថុកម្ពុជា និងមានអ្នកចូលរួមមកពីស្ថាប័នពាក់ព័ន្ធ និស្សិតផ្នែកហិរញ្ញវត្ថុ និងអ្នកសារព័ត៌មាន មកពីស្ថាប័នជាតិ អន្តរជាតិ ជាច្រើននាក់។

សូមបញ្ជាក់ផងដែរថា កិច្ចពិភាក្សាតុមូលនេះ ធ្វើឡើងបន្ទាប់ពីពេលថ្មីៗនេះ មានទស្សនៈលើកឡើង ទាំងវិជ្ជមាន និងអវិជ្ជមាន ពាក់ព័ន្ធនឹងតួនាទី និងភាពជាដៃគូ នៃស្ថាប័នធនាគារ និងគ្រឹះស្ថានមីក្រូហិរញ្ញវត្ថុនៅកម្ពុជា ក្នុងការអភិវឌ្ឍសេដ្ឋកិច្ចសង្គម ជាពិសេស មានការលើកឡើងពីករណី រំលោភបំពាន សិទ្ធិមនុស្ស ដូចជាការបង្ខំឱ្យលក់ដី ការកេងប្រវ័ញ្ចកម្លាំងពលកម្មកុមារ ការធ្វើចំណាកស្រុក ភ្ជាប់ទៅនឹងប្រតិបត្តិការ របស់ស្ថានប័នធនាគារ និងគ្រឹះស្ថានមីក្រូហិរញ្ញវត្ថុនៅក្នុងប្រទេសកម្ពុជាផងដែរ៕

ភ្នំពេញ ៖ ក្នុងពិធីសំណេះសំណាល ជាមួយមន្ត្រីរាជការ ក្រោមឱវាទ ក្រសួងនាព្រឹកថ្ងៃទី២៨ ខែសីហា ឆ្នាំ២០១៩ នេះ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសថា នឹងរៀបចំបង្កើតឱ្យមានផែនការមេ សម្រាប់រៀបចំគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈហៅកាត់ថា TVET ឱ្យកាន់តែល្អប្រសើរជាងមុន ធានាសម្រេចឱ្យបានកំណើនធនធានមនុស្សប្រកបដោយគុណភាព ក្នុងវិស័យនេះ​។

លោកបណ្ឌិត រដក្ឋមន្រ្តីបានលើកឡើងទៀតថា វឌ្ឍនភាពទាំងនេះ គឺបានមកដោយសារកត្តាចំបាច់ ជាច្រើន ប៉ុន្តែអ្វីដែលសំខាន់ជាងគេនោះ គឺសន្តិភាព និង ស្ថិរភាព នយោបាយ ដែលកំពុងរក្សាបានក្រោមការដឹកនាំរបស់ ប្រមុខរាជរដ្ឋាភិបាលនៃព្រះរាជាណាចក្រកម្ពុជា។

លោកបណ្ឌិតថា សុខដុមនីយកម្ម ក្នុងវិស័យកាត់ដេរ ដែលរាជរដ្ឋាភិបាលបាន និងកំពុងអនុវត្ត បញ្ជៀសបាននូវបញ្ហាបាតុភាពនានា ហើយផលិតភាពការងារក៏នៅតែបន្ត ព្រមទាំងកំពុងជំរុញឱ្យមានការបង្កើនផលិតភាពបន្ថែមទៀតផងដែរ។ ចំណែកប្រាក់ឈ្នួលអប្បរមា សម្រាប់កម្មករ និយោជិត ក៏ត្រូវបានដំឡើងជារៀងរាល់ឆ្នាំ តួយ៉ាងនៅឆ្នាំ២០១៩នេះ ប្រាក់ឈ្នួលអប្បរមារបស់កម្មករបានឡើងដល់១៨២ដុល្លារ ហើយសម្រាប់ឆ្នាំ២០២០ ក្រុមប្រឹក្សាជាតិ ប្រាក់ឈ្នួលអប្បបរមា នឹងចាប់ផ្តើមបើកកិច្ចពិភាក្សាគ្នា ស្ដីពី ការកំណត់ប្រាកឈ្នួល អប្បបរមា ផ្នែកវាយនភណ្ឌ កាត់ដេរ និងផលិតស្បែកជើង នៅថ្ងៃស្អែកនេះ។

លោក អ៊ិត សំហេង បានបង្ហាញការព្រួយបារម្ភ ពីបញ្ហាកង្វះធនធានមនុស្ស ក្នុងវិស័យ TVET ដែលកំពុងមានការខ្វះខាតក្នុងទីផ្សារការងារបច្ចុប្បន្ន។ តែទោះជាយ៉ាងណា រាជរដ្ឋាភិបាលកម្ពុជា ក៏ដូចជា ក្រសួងការងារ កំពុងជំរុញការដោះស្រាយបញ្ហានេះយ៉ាងសកម្ម នៅតាមគ្រឹះស្ថានអប់រំបណ្ដុះបណ្ដាល បច្ចេកទេស និងវិជ្ជាជីវៈទូទាំងប្រទេស ហើយ ក្រសួង ក៏បាននិងកំពុងចុះជាប់នៅតាមគ្រឹះស្ថានទាំងនោះផងដែរ។

លោកបណ្ឌិតបញ្ជាក់ថា នៅចុងឆ្នាំ២០១៩នេះ ក្រសួងការងារនឹងបង្កើតឱ្យបានផែនការមេ (Master Plan) រៀបចំហេដ្ឋារចនាសម្ព័ន្ធ ក្នុងគ្រឹះស្ថាន TVET នៅទូទាំងប្រទេស ដោយគិតគូរទៅលើអគារសិក្សា រោងជាង គ្រូបណ្ដុះបណ្ដាល ការបង្រៀន ពីបច្ចេកវិទ្យាថ្មីៗ សម្រាប់បណ្ដុះបណ្ដាល សិក្ខាកាម សំដៅធ្វើយ៉ាងណាដើម្បីសម្រេចបានធនធានមនុស្ស ក្នុងវិស័យនេះ ទាំងបរិមាណ និងគុណភាព។ទន្ទឹមនេះ ក៏គ្រោងបង្កើតឱ្យមានគណៈកម្មការស្ថិតិការងារមួយ ដែលមានឯកឧត្តមផ្ទាល់ ជាប្រធាន ក្នុងនោះនឹងរៀបចំឱ្យមានកិច្ចប្រជុំទៀងទាត់ បង្កើតឱ្យមានជនបង្គោល ស្ថិតិការងារ នៅតាមមូលដ្ឋានការងារនីមួយៗ ព្រោះកន្លងមកការងារបូកសរុបស្ថិតិការងារ នៅផ្នែកមួយចំនួន ហាក់នៅមានភាពយឺតយ៉ាវនៅឡើយ។

យ៉ាងណា លោករដ្ឋមន្ត្រី ក៏បានជំរុញឱ្យមន្រ្តីទាំងអស់ ត្រូវអនុវត្តការងារតាមផ្នែក តាមវិស័យរៀងៗខ្លួន ប្រកបដោយក្រមសីលធម៌ ជៀសវាងការប្រព្រឹត្តបទល្មើសនានា ដែលនាំទៅដល់ការទទួលទោសទណ្ឌ និងអាប់ឱនកិត្តិយស កេរ្តិ៍ឈ្មោះស្ថាប័ន៕

ភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៨ ខែសីហា នេះ បានចេញនូវប្រកាសស្តីពីការកំណត់ប្រភេទមុខរបរ និងការងារដែលត្រូវហាមឃាត់ ចំពោះជនបរទេស ដោយកំណត់ នូវប្រភេទមុខរបរស្វ័យនិយោជន៍ ដែលត្រូវបានហាមឃាត់ចំពោះជនបរទេស ក្នុងការប្រកបមុខរបរ និងធ្វើការនៅក្នុងព្រះរាជាណាចក្រកម្ពុជា។

ប្រកាសដដែលបានបញ្ជាក់ថា បុគ្គលស្វ័យនិយោជន៍សំដៅដល់ជន ដែលប្រកបការងារឬ មុខរបររកចំណូលផ្ទាល់ខ្លួន ដោយមិនពាក់ព័ន្ធនឹងប្រាក់ឈ្មួល ប្រាក់បៀវត្ស ដែលផ្តល់ដោយនិយោជក ឬ រដ្ឋតាមកិច្ចសន្យាការងារ។

ត្រូវហាមឃាត់សកម្មភាពស្វ័យនិយោជន៍ ដោយជនបរទេស នូវ មុខរបរ និងការងារដូចខាងក្រោម ៖ ទី១អ្នកបើកបរយានជំនិះគ្រប់ប្រភេទ ជាលក្ខណៈអាជីវកម្ម មានជាអាទី អ្នកបើកទោចក្រយានយន្ត អ្នកបើកត្រីចក្រយានយន្ត អ្នកបើកទោចក្រយានយន្តសណ្តោងរ៉ឺម៉ក អ្នកបើកម៉ូតូកង់បួន អ្នកបើករថយន្តដឹក អ្នកដំណើរនិងដឹកទំនិញ, ២. អ្នកលក់ដូរដោយមធ្យោបាយថ្មើរជើង ឬយានជំនិះគ្រប់ប្រភេទ នៅទីសាធារណៈ , ៣. អ្នកម៉ាស្សា ចាប់សរសៃតាមទីសាធារណៈ ,៤. អ្នកកាត់សក់ អ៊ុតសក់ និងថែរក្សាសម្ផស្ស,៥. អ្នកផ្តល់សេវាកម្មដែរ និងសម្លាតស្បែកជើង,៦. អ្នកកាត់ដេរ ,៧. អ្នកប៉ះកង់ ជាងជួសជុលយានយន្ត ,៨. អ្នកផលិតវត្ថុអនុស្សាវរីយ៍ខ្មែរ ,៩. អ្នកផលិតឧបករណ៍ភ្លេងខ្មែរ បាត្រលោក ព្រះពុទ្ធរូប និង ១០. ជាងទង ជាងច្នៃត្បូងពេជ្រ។

មួយវិញទៀត ក្រសួងការងារ និងបណ្តុះបណ្តាលវិជ្ជាជីវៈ និងមិនផ្តល់ ឬ មិនបន្តសុពលភាព យកសៀវភៅការងារដល់ជនបរទេស ដែលកំពុងប្រកបមុខរបរ និងការងារដូចមានកំណត់ខាងលើ នៃប្រកាសនេះ។ ជនណាដែលប្រព្រឹត្តផ្ទុយនឹងបទប្បញ្ញត្តិ នៃប្រកាសនេះ ត្រូវធ្វើការពិន័យជាប្រាក់និងផ្តន្ទាទោស តាមបទប្បញ្ញត្តិនៃច្បាប់ស្តីពីការងារ និងបទប្បញត្តិជាធរមាន។ ហើយបទប្បញ្ញត្តិទាំងឡាយណា ដែលផ្ទុយនឹងប្រកាសនេះ ទុកជានិរាករណ៍ៈ៕

ភ្នំពេញ ៖ កិច្ចប្រជុំឧត្តមក្រុមប្រឹក្សាពិគ្រោះ និងផ្តល់យោបល់ដើម្បីពិនិត្យសមិទ្ធផលការងារមួយឆ្នាំ ជាមួយសម្តេចតេជោ ហ៊ុន សែន នាយករដ្ឋមន្ត្រី បានចំណាយពេលជិត៦ម៉ោង ក្នុងការស្តាប់ការរាយការណ៍ និងធ្វើការដោះស្រាយដោយផ្ទាល់។ សម្ដេចតេជោនាយករដ្ឋមន្ត្រីបានបញ្ជាក់ថា យន្តការក្រុមប្រឹក្សាពិគ្រោះ និងផ្ដល់យោបល់ ដល់សារៈសំខាន់ និងផលប្រយោជន៍ច្រើនជាងគណបក្សប្រឆាំង នៅក្នុងរដ្ឋសភា។

នៅក្នុងកិច្ចប្រជុំបូកសរុបការងាររយៈពេលមួយឆ្នាំរបស់ឧត្តមក្រុមប្រឹក្សាពិគ្រោះ និងផ្ដល់យោបល់នៅព្រឹកថ្ងៃទី២៨ សីហានេះ សម្ដេចតេជោ ហ៊ុន សែនននាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកយន្តការ ឧត្តមក្រុមប្រឹក្សាពិគ្រោះ និងផ្ដល់យោបល់ បានជួយដល់ការកែទម្រង់ ស៊ីជម្រៅ និងការកំណែទំរង់រដ្ឋបាលស្អាតស្អំ របស់រាជរដ្ឋាភិបាលកម្ពុជា។ នោះក៏ដោយសារ តែ ឧត្តមក្រុមប្រឹក្សាពិគ្រោះ និងផ្ដល់យោបល់ បានរួមចំ ណែកពហុគំនិត ប្រើប្រាស់នូវគោលគំនិតចំរុះដែលសម្ដេចយល់ឃើញថាយន្តការនេះ មានតួនាទីផ្ដល់នូវប្រយោជន៍ ធៀបទៅនឹងគណបក្សប្រឆាំង នៅក្នុងរដ្ឋស ភាកាលពីកន្លងមកទៅទៀត។ នេះបើតាមការបញ្ជាក់របស់លោក ឈឹម ផលវរុណ ប្រធានលេខាធិ ការដ្ឋា ន នៃឧត្តមក្រុមប្រឹក្សា ពិគ្រោះ និងផ្តល់យោបល់ បានបញ្ជាក់ប្រាប់អ្នកកាសែតនៅក្រោយជំនួសជាង៦ ម៉ោង ។ លោកបញ្ជាក់ថា ឧត្តមក្រុមប្រឹក្សាពិគ្រោះនិងផ្ដល់យោបល់នេះមាន១៦ គណបក្សប៉ុន្តែមានការរិះគន់ក្នុងន័យស្ថាបនា ដោយផ្ដល់ធាតុចូល ជាទស្សនៈយល់ឃើ ញផ្សេងគ្នា ជូនសម្ដេចនាយករដ្ឋមន្ត្រី ប៉ុន្តែពុំមានចរិកក្នុងការកេងចំណេញផលលប្រយោជន៍នយោបាយ ឬវាយប្រហារគណបក្សកាន់អំណាចដូចគណបក្សប្រឆាំងនោះដែរ។ សម្ដេចទទួលស្គាល់ថាយន្តការឧត្តមក្រុមប្រឹក្សាពិគ្រោះ និងផ្ដល់យោបល់នេះ គឺជាយន្តការដ៏សំខាន់ ដែលជួយដាស់តឿនដល់ភាពអសកម្មរបស់បុគ្គលដែលជាមន្ត្រីគ្រប់ថ្នាក់។

សម្តេចតេជោ ថ្លែងថា ដោយសារតែមានភាពរស់រវើកនៃឧត្តមក្រុមប្រឹក្សាពិគ្រោះនិងផ្ដល់យោបល់ រាល់ភាពអសកម្មនានានៅថ្នាក់ក្រោមនិងមូលដ្ឋានបានទៅដល់សម្ដេចតេជោតាមរយៈការធ្វើរបាយការណ៍ដោយផ្ទាល់ទៅសម្ដេចតេជោ។ ដូច្នោះហើយឃើញថាមន្ត្រីថ្នាក់ជាតិ និងថ្នាក់ក្រោមជាតិហាក់ដូចជាមានភាពរស់រវើកជាងមុន ជាយន្តការមួយជួយដាស់តឿននិងជំរុញឲ្យមានភាពរស់រវើករបស់មន្ត្រី។

នៅក្នុងកិច្ចប្រជុំនោះ ឧត្តមក្រុមប្រឹក្សាពិគ្រោះ និងផ្ដល់យោបល់ បានបញ្ជាក់ថា ក្នុងឆ្នាំខាងមុខ សមាជិកទាំង អស់ នឹងផ្ដួចផ្ដើមគំនិតតាក់តែងសេចក្តីព្រាងច្បាប់មួយ ក្នុងការដាក់ទោសលើមន្ត្រីគ្រប់ថ្នាក់ ដែលមិនគោរពច្បា ប់ មិនគោរពអនុក្រឹត្យ មិនគោរពបទបញ្ជា និងមិនគោរពសេច ក្តីណែនាំរបស់រាជរដ្ឋាភិបាល ជាពិសេសរបស់នាយករដ្ឋមន្ត្រី។ គ្រប់គណបក្សដែលជាសមាជិករបស់ឧត្តមក្រុមប្រឹក្សាមើលឃើញថា រឿងអសកម្ម ដែលកើតមាន គឺដោយសារបុគ្គលខិលខូច មិនមែនជាកំហុសដោយសារការដឹកនាំឬដោយសារគោលនយោ បាយរបស់រាជរដ្ឋាភិបាលនោះទេ។ ភាពអសកម្ម គឺដោយ សារតែពួកគេមិនខ្លាចច្បាប់ ហើយអត់មានទោសនៅពេលធ្វើខុសច្បាប់ ។ សម្តេចតេជោ ក៏បានចាត់ចែងដោះស្រា យ និងវះកាត់ចំពោះមន្ត្រីខិលខូច តាមរយៈការបង្កកទ្រព្យសម្បត្តិ នឹងឈានទៅដល់ការរឹបអូសទ្រព្យសម្បត្តិ ចំពោះបុគ្គលដែលទទួលផលដោយទុច្ចរិត។ សម្ដេចបានបញ្ជាក់ថា បើគ្រាន់តែការដាក់ពិន័យ និងទណ្ឌកម្មតាមផ្លូវច្បាប់ចំពោះមន្ត្រីខិលខូចជាប់គុក គឺមិនគ្រប់គ្រាន់ទេ ព្រោះទ្រព្យសម្បត្តិរបស់ពួកគេរាប់សិបលាននៅមាន ហើយនៅពេលដែលគេចេញពីគុកនោះ ពួកគេនៅតែមិនគោរពច្បាប់ ដោយសារតែគេមានលុយ។

គួរបញ្ជាក់ផងដែរថា ក្នុងរយៈពេលមួយឆ្នាំកន្លងទៅនេះ ឧត្តមក្រុមប្រឹក្សាពិគ្រោះនិងផ្ដល់យោបល់ បានចុះទៅដល់មូលដ្ឋានដើម្បីធ្វើការសិក្សា ពីបញ្ហាផ្សេងៗ ដូចជាបញ្ហារំលោភដីធ្លី រំលោភយកដីរបស់រដ្ឋ បញ្ហាបរិស្ថាន បទល្មើសព្រៃឈើ រួមជាមួយបញ្ហាផ្សេងទៀតចំនួន ២៩៥លើក និងបានធ្វើរបាយការណ៍ដាក់ជូនដោយផ្ទាល់ទៅសម្ដេចតេជោនាយករដ្ឋមន្ត្រីចំនួន ២៥១របាយការណ៏។ ឧត្តមក្រុមប្រឹក្សាពិគ្រោះ និងផ្តល់យោបល់ត្រូវបានបង្កើតឡើងតាមព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨ ដោយមានការស្នើសុំរបស់សម្តេចតេជោ ហ៊ុន សែន ក្រោយពេលបោះឆ្នោត ជាតិអាណត្តិទី៦។ ឧត្តមក្រុមប្រឹក្សាពិគ្រោះ និងផ្តល់យោបល់មានសមាសភាពមកពីគណបក្សយោបាយចំនួន១៦ ក្នុងចំណោមគណបក្សនយោបាយចំនួន២០ ដែលបានចូលរួមការបោះឆ្នោត។ ឧត្តមក្រុមប្រឹក្សាពិគ្រោះ និងផ្តល់យោបល់ ជាយន្តការពិគ្រោះ និងផ្តល់យោបល់របស់គណបក្សនយោបាយជូនរាជរដ្ឋាភិបាលក្រៅក្របខណ្ឌសភា ក្នុងគោលដៅលើកស្ទួយប្រសិទ្ធភាពការងារ ដើម្បីជាប្រយោជន៍ដល់ការបម្រើសេវាប្រជាជន និងការអភិវឌ្ឍសង្គមប្រកបដោយសក្តានុពល៕

ភ្នំពេញ ៖ លោកបណ្ឌិត មហាធា មហាម៉ាត់ នាយករដ្ឋមន្រ្តីនៃប្រទេសម៉ាឡេស៊ី នឹងអញ្ជើញដឹកនាំគណប្រតិភូជាន់ខ្ពស់ ទស្សនកិច្ចផ្លូវការនៅកម្ពុជា នាដើមកញ្ញាខាងមុខនេះ។ នេះបើតាមកិច្ចប្រជុំគណៈកម្មាធិការជាតិរៀបចំបុណ្យជាតិ-អន្តរជាតិ ជាមួយអន្តរក្រសួងនៅព្រឹកថ្ងៃទី២៧ សីហាព្រឹកម៉ិញនេះ។

លោកបណ្ឌិត មហាធា មហាម៉ាត់ នាយករដ្ឋមន្រ្តីនៃប្រទេសម៉ាឡេស៊ី និងលោកជំទាវ រួមជាមួយនិងគណៈប្រតិភូជាន់ខ្ពស់ និងអញ្ជើញទស្សនកិច្ចនៅកម្ពុជា រយះពេល ៣ថ្ងៃ គឺចាប់ពីថ្ងៃទី០២ ដល់ថ្ងៃទី៤ នាដើមខែកញ្ញាខាងមុខនេះ។ នេះបើតាមការបញ្ជាក់អោយដឹង របស់ឯកឧត្តម ឈិន កេតនា អនុប្រធានអចិន្ត្រៃយ៍ និងជាអគ្គលេខាធិការ គណៈកម្មាធិការជាតិរៀបចំបុណ្យជាតិអន្តរជាតិនៅព្រឹកម៉ិញ។

លោកឈិន កេតនា បានបញ្ជាក់ថា យោងទៅតាមគម្រោងនៃការអញ្ជើញទស្សនៈកិច្ចផ្លូវការនៅព្រះរាជាណាចក្រកម្ពុជា លោកបណ្ឌិត មហាធា មហាម៉ាត់ នាយករដ្ឋមន្ត្រី នៃប្រទេសម៉ាឡេស៊ី និងគោរពវិញ្ញាណក្ខន្ធនៅវិមានឯករាជ្យ អញ្ជើញថ្វាយកម្រងផ្កាគោរពព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ នៅមណ្ឌបសួនច្បារខាងកើតវិមានឯករាជ្យ។ ចំពោះពិធីទទួលបដិសណ្ឋារកិច្ចផ្លូវការ នឹងធ្វើឡើងនៅវិមានសន្តិភាព និងបន្តកិច្ចប្រជុំទ្វេភាគី រវាងសម្តេចតេជោ ហ៊ុន សែន នាយករដ្ឋមន្រ្តី ជាមួយនិងឯកឧត្តមបណ្ឌិត មហាធា មហាម៉ាត់ នាយករដ្ឋមន្ត្រី នៃប្រទេសម៉ាឡេស៊ីផងដែរ។ លោកនាយករដ្ឋមន្រ្តី ក៏និងអញ្ជើញចូលជួបសម្តែងការគួរសម សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា -អញ្ជើញចូលជួបសម្តែងការគួរសម សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជាផងដែរ ។

ក្រៅអំពីការចូលជួបសម្តែងការគួរសម និងពិភាក្សាការងារ ឯកឧត្តមបណ្ឌិត មហាធា មហាម៉ាត់ នាយករដ្ឋមន្ត្រី នៃប្រទេសម៉ាឡេស៊ី ក៏នឹងអញ្ជើញធ្វើបឋកថាពិសេស ស្តីពីសេដ្ឋកិច្ចម៉ាឡេស៊ី ទៅកាន់និស្សិតនៃសាកលវិទ្យាល័យភូមិន្ទភ្នំពេញ។ ដោយឡែក លោកជំទាវបណ្ឌិត ស៊ីទី ហាស់ម៉ា មហាម៉ាត់ អាលី (ភរិយានាយករដ្ឋមន្ត្រី) ក៏និងអញ្ជើញទៅកាន់ទីស្នាក់ការកាកបាទក្រហមកម្ពុជា ចូលជួបសម្តែងការគួរសម សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា-ហើយលោគជំទាវក៏និងអញ្ចើញ បំពេញទស្សនកិច្ចសារមន្ទីរព្រះស្រីឦសានវរ្ម័នផងដែរ៕

ភ្នំពេញ ៖ គណៈកម្មការមហាផ្ទៃ ការពារជាតិ និងមុខងារសាធារណៈរបស់រដ្ឋសភាកម្ពុជា បានធ្វើជាម្ចាស់ផ្ទះប្តូរវេន រៀបចំកិច្ចប្រជុំលើកទី៤ ក្រោមប្រធានបទ ៖ តួនាទី ភារកិច្ច ក្នុងការពិនិត្យតាមដានរបស់គណៈកម្មការ/គណៈកម្មា ធិការការពារជាតិ និងសន្តិសុខ នៃរដ្ឋសភាប្រទេសទាំងបី កម្ពុជា ឡាវ វៀតណាម ក្នុងការកសាងសហប្រតិបត្តិការ និងអភិវឌ្ឍន៍ព្រំដែនមួយប្រកបដោយសន្តិភាព និងមិត្តភាព នៅសណ្ឋាគាររ៉េស៊ីដង់សុខាភ្នំពេញ រាជធានីភ្នំពេញ ចាប់ពីថ្ងៃទី២៦ ដល់ថ្ងៃទី ២៩ ខែសីហា ឆ្នាំ២០១៩។

លោក ងួន ញ៉ិល អនុប្រធានទី១ រដ្ឋសភា ដែលជាតំណាងដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា បានអញ្ជើញជាអធិបតីបើកកិច្ចប្រជុំនេះនៅព្រឹកថ្ងៃទី២៧ ខែសីហា ដែល មានការចូលរួមពីប្រធានគណៈកម្មាធិការការពារជាតិ និងសន្តិសុខរបស់រដ្ឋសភា នៃសាធារណរដ្ឋប្រជាធិបតេយ្យ ប្រជាមានិតឡាវ ប្រធានគណៈកម្មាធិការការពារជាតិ និងសន្តិសុខរបស់រដ្ឋសភា នៃសាធារណរដ្ឋសង្គមនិយម វៀតណាម និងប្រធានគណៈកម្មការមហាផ្ទៃ ការពារជាតិ និងមុខងារសាធារណៈរបស់រដ្ឋសភា នៃព្រះរាជាណា
ចក្រកម្ពុជា ដែលត្រូវធ្វើការពិភាក្សាលើប្រធានបទសំខាន់ៗមួយចំនួនដូចជា៖ លទ្ធផលការងារ និងទិសដៅអនុវត្ត បន្ត ក្នុងការរក្សាសន្តិសុខតាមបណ្តោយព្រំដែន- វឌ្ឍនភាព និងតួនាទី ភារកិច្ច របស់គណៈកម្មការ/គណៈកម្មាធិការ ក្នុងការពិនិត្យតាមដាន និងលើកកម្ពស់កិច្ចសហប្រតិបត្តិការ និងការអភិវឌ្ឍព្រំដែនមួយប្រកបដោយសន្តិភាព និង មិត្តភាព,ការពិនិត្យ,ពិភាក្សានិងចុះហត្ថលេខាលើកំណត់ហេតុនៃកិច្ចប្រជុំលើកទី៤នេះជាដើម។

នៅក្នុងកិច្ចប្រជុំនេះ ឧត្តមសេនីយ៍ឯក បៃ ឌឹកហាញ់ មេបញ្ជាការរងកងទ័ពការពារព្រំដែន និងជាតំណាង ក្រសួងការពារជាតិវៀតណាម បានថ្លែងអះអាងថា នៅតាមព្រំដែនវៀតណាម-កម្ពុជា បូរណភាពទឹកដីមានស្ថេរភាព ជាធម្មតា។ ប្រទេសទាំងពីរបានបន្តពន្លឿនដំណើរការបោះបង្គោលព្រំដែន និងការងារបោះបង្គោលខណ្ឌសីមា
ដើម្បីសម្រេចគោលដៅ នៃការបញ្ចប់ឯកសារបោះបង្គោលព្រំដែន និងខណ្ឌសីមា។ លោកថា មកទល់ថ្ងៃទី២០ ខែសីហា ឆ្នាំ២០១៩នេះ បានកំណត់ការបោះបង្គោលព្រំដែនលេខ ៣១៧ និង ៣៧១ សម្រេចបានប្រមាណ ៨៥,៤% បានសាងសង់បង្គោលព្រំដែនលេខ ៣១៥ និង ៣៧១ សម្រេចបានប្រមាណ ៨៤,៩០% មានប្រវែង ១០៤២ លើ ១១ ៣៧ គ.ម គឺប្រហែល ៩១,៦០% បានបោះរួចរាល់ហើយ។

ថ្លែងបើកកិច្ចប្រជុំជាផ្លូវការកាលពីព្រឹកមិញនេះ ឯកឧត្តមបណ្ឌិត ងួន ញុិល បានគូសបញ្ជាក់ថា កិច្ចប្រជុំលើក ទី៤ ស្តីពី “តួនាទី ភារកិច្ច ក្នុងការពិនិត្យតាមដានរបស់គណៈកម្មការជំនាញរបស់រដ្ឋសភាទទួលបន្ទុកវិស័យការពារ ជាតិ និងសន្តិសុខនៃប្រទេសទាំងបីក្នុងការកសាងកិច្ចសហប្រតិបត្តិការ និងអភិវឌ្ឍន៍ព្រំដែនមួយប្រកបដោយ សន្តិភាព និងមិត្តភាព” នាពេលនេះ ជាកិច្ចប្រជុំមួយដ៏មានសារៈសំខាន់ និងស្របទៅនឹងបរិបទរបស់ប្រទេសយើង ទាំងបី ក៏ដូចជាស្របទៅនឹងបរិបទតំបន់ និងសកលលោក ដែលកំពុងមានការវិវត្តប្រែប្រួលយ៉ាងឆាប់រហ័ស។ ឯកឧត្តមថា វិស័យសន្តិសុខ និងការពារជាតិ ជាវិស័យមួយដ៏មានសារៈសំខាន់ និងជាបុរេលក្ខណៈដ៏ចាំបាច់បំផុត ក្នុងការកសាង និងអភិវឌ្ឍប្រទេសជាតិនៅគ្រប់កាលៈទេសៈ និងនិយាយដោយឡែក សម្រាប់ការជំរុញ និងគាំទ្រដល់ កិច្ចអភិវឌ្ឍតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ដែលប្រទេសទាំងបីបាន និងកំពុងយកចិត្តទុកដាក់ ខ្ពស់ សំដៅធ្វើយ៉ាងណាប្រែក្លាយពីតំបន់ដែលមានការអភិវឌ្ឍតិចតួច ឲ្យទៅជាតំបន់ប្រកបដោយសក្តានុពល សេដ្ឋកិច្ច ពាណិជ្ជកម្ម វិនិយោគ និងទេសចរណ៍ ដើម្បីទទួលបាននូវកំណើនសេដ្ឋកិច្ចខ្ពស់ ឈានទៅលុបបំបាត់ភាពអត់ឃ្លានកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាពលរដ្ឋនៅតំបន់នោះ ឲ្យកាន់តែមានភាពប្រសើរឡើង៕