ខេត្តសៀមរាប ៖ មុនចាប់ផ្តើមពិធីបើកសន្និសីទ អគ្គព្រះរាជអាជ្ញាអាស៊ាន-ចិន លើកទី១២, នៅទីក្រុងសៀមរាប នាព្រឹកថ្ងៃពុធ ទី៦ ខែវិច្ឆិកា ឆ្នាំ២០១៩ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជួបពិភាក្សាការងារ ជាមួយលោកជំទាវ HAJAH ZURAINI BINTI HAJI SHARBAWI ប្រធានប្រតិភូ នៃប្រតិភូ អគ្គព្រះរាជអាជ្ញា រដ្ឋអាជ្ញា នៃបណ្តាលប្រទេសអាស៊ាន-ចិន នៅខេត្តសៀមរាប។

លោកជំទាវ HAJAH ZURAINI ប្រធានប្រតិភូនៃ ប្រតិភូអគ្គព្រះរាជ្ញា រដ្ឋអាជ្ញាមកពីបណ្ដាប្រទេសអាស៊ាន-ចិន បានគោរពសម្តែងនូវការដឹងគុណចំពោះ សម្ដេចតេជោនាយករដ្ឋមន្ត្រី ដែលបានឆ្លៀតឱកាសដ៏មមាញឹកមកធ្វើជាអធិបតីភាពដ៏ខ្ពង់ខ្ពស់ក្នុងវេទិកាព្រះរាជអាជ្ញា រដ្ឋអាជ្ញា អាស៊ាន-ចិន នាពេលនេះ។ លោកជំទាវ បានមានប្រសាសន៍ថានេះពិតជាកិត្តិយសណាស់ដែលបាន សម្តេចតេជោ អញ្ជើញមកចូលរួមជាអធិបតីហើយក៏បានគោរពជម្រាបជូនសម្ដេចតេជោផងដែរថាវេទិកាដែលបានរៀបចំឡើងនៅពេលនេះគឺដើម្បីធ្វើការរួមគ្នាក្នុងការពង្រឹកកិច្ចសហប្រតិបត្តិការឱ្យបានកាន់តែស៊ីជម្រៅក្នុងការប្រយុទ្ធប្រឆាំងនឹងអំពើឧក្រិដ្ឋកម្មឆ្លងដែន ជាពិសេសលើការជួញដូរមនុស្ស។

ជាការឆ្លើយតប សម្ដេចតេជោ ហ៊ុន សែន នាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះប្រតិភូព្រះរាជអាជ្ញា រដ្ឋអាជ្ញាទាំងអស់ដែលបានមកកាន់ទីក្រុងសៀមរាបដែលជាទឹកដីអតីតរាជធានីកម្ពុជាតាំងពីជាងមួយពាន់ឆ្នាំមុន។ សម្ដេចតេជោបានលើកឡើងថា ប្រធានបទការប្រយុទ្ធប្រឆាំងការជួញដូរមនុស្សក្នុងវេទិកានេះ គឺជាប្រធានបទដ៏ត្រឹមត្រូវមួយព្រោះថានេះគឺជាអ្វីដែលយើងធ្វើដើម្បីជួយដល់មនុស្សស្លូតត្រង់ជាពិសេសពលករដែលកំពុងតែមានចលនាកំពុងតែមានលំហូរទៅតាមតំបន់អាស៊ានហើយតែងតែមានជនខិលខូចឬឧក្រិដ្ឋជនខិលខូច ឆ្លៀត បន្លំកេងប្រវ័ញ្ចលើជូនសុទ្ធស្លូតត្រង់ទាំងនេះ។ តាមរយៈវេទិកានេះ សម្ដេចតេជោនាយករដ្ឋមន្ត្រីបានផ្តោតក្តីសង្ឃឹមខ្លាំងថា ក្នុងកិច្ចសហប្រតិបត្តិការរវាងប្រទេសទាំងអស់ជាពិសេស រវាងព្រះរាជអាជ្ញា រដ្ឋអាជ្ញា នៃប្រទេសអាស៊ាន-ចិន នឹងមានការពង្រឹងកាន់តែខ្លាំងក្លា រឹងមាំថែមទៀតដើម្បីជាផលប្រយោជន៍ ក្នុងការទប់ស្កាត់ អំពើឧក្រិដ្ឋកម្មឆ្លងដែនផងក៏ដូចជាអំពើឧក្រិដ្ឋកម្មទាំងឡាយដែលមានទៅលើប្រជាពលរដ្ឋស្លូតត្រង់នៅក្នុងតំបន់អាស៊ាន-ចិនផងដែរ។

ភ្នំពេញ ៖ ក្រសួងធនធានទឹក និងឧតុនិយម បានសេចក្ដីជូនដំណឹងដោយបញ្ជាក់ថា កម្ពុជានឹងទទួលឥទ្ធិពលព្យុះទី២៤ ឈ្មោះ ណាគ្រី ដែលធ្វើឲ្យមានភ្លៀងធ្លាក់ចាប់ពីថ្ងៃទី០៧ ដល់ថ្ងៃទី១៣ ខែវិច្ឆិកា ឆ្នាំ២០១៩។

ក្រសួងធនធានទឹក បានបញ្ជាក់ទៀតថា ឥទ្ធិពលព្យុះនេះ នឹងធ្វើឲ្យបណ្ដាខេត្តក្រុងនានា នៅភាគខាងក្រោម និងតំបន់មាត់សមុទ្រ នឹងអាចមានភ្លៀងធ្លាក់តិចតួច ចាប់ពីថ្ងៃទី០៧ ដល់ថ្ងៃទី១៣ ខែវិច្ឆិកា។

ដោយឡែក ចាប់ពីថ្ងៃទី០៧ ដល់ថ្ងៃទី០៩ បណ្ដាខេត្តនៅភាគកណ្ដាលខាងជើង និងខ្ពង់រាបឦសាន នឹងអាចមានភ្លៀងធ្លាក់តិចតួច។ បន្ទាប់មកនៅថ្ងៃទី១០ ដល់ថ្ងៃទី១១ ខែវិច្ឆិកា នឹងអាចមានភ្លៀងតិច ទៅមធ្យម៕

ភ្នំពេញ ៖ នៅព្រឹកថ្ងៃទី៥ ខែវិច្ឆិកា ឆ្នាំ២០១៩ នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដឹកនាំគណៈ ប្រតិភូនិវត្តន៍មកដល់កម្ពុជាវិញហើយ ជាមួយនឹងលទ្ធផលផ្លែផ្កាជាច្រើនទាំងទ្វេភាគី អនុតំបន់ តំបន់ និងអន្តរជាតិ បន្ទាប់ពីបានចំណាយពេលវេលា ៤ថ្ងៃ នៅទីក្រុងបាងកក ប្រទេសថៃ ដើម្បីចូលរួមកិច្ចប្រជុំកំពូលអាស៊ានលើកទី៣៥ និងកិច្ចប្រជុំពាក់ព័ន្ធដទៃទៀតជាច្រើន។

បើតាមការបញ្ជាក់របស់ លោកបណ្ឌិត កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់ប្រាប់អ្នកកាសែតនៅអាកាសយានដ្ឋាន អន្តរជាតិភ្នំពេញ ថា សម្តេចតេជោ ហ៊ុន សែន បានចូលរួមកិច្ចប្រជុំសំខាន់ៗចំនួន១១ ដោយឡែកពីគ្នាជាមួយថ្នាក់ដឹកនាំប្រទេសជាសមាជិកអាស៊ាន និងពិភពលោកផ្សេងទៀត ហើយក៏មានជំនួបទ្វេភាគីទៀតផង។ តាមរយៈកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ថ្នាក់ដឹកនាំកំពូលតំបន់ និងអន្តរជាតិ បានអនុម័តលើឯកសារសំខាន់ចំនួន៦ កត់សំគាល់ឯកសារចំនួន១០ និងបានចេញសេចក្តីប្រកាសឯកសារចំនួន៤ផ្សេងទៀត។

លោកបណ្ឌិតកៅ គឹមហួន បានវាយតម្លៃថា តាមរយៈកិច្ច ប្រជុំកំពូលអាស៊ាន និងកិច្ចប្រជុំពាក់ព័ន្ធនាពេលនេះ បានផ្តល់អត្ថប្រយោជន៏ ជាច្រើនសម្រាប់កម្ពុជា ក្នុងការពង្រីកនយោបាយការទូតកម្ពុជា ជាមួយទ្វេភាគី អនុតំបន់ តំបន់ និងអន្តរជាតិ តាមរយៈការគៀងគរជំនួយ និងហិរញ្ញប្បទាន សម្រាប់អភិវឌ្ឍប្រទេសជាតិ។

ក្នុងពិធីបិទកិច្ចប្រជុំកំពូលអាស៊ានលើកទី៣៥ កាលល្ងាចថ្ងៃទី៤វិច្ឆិកា ឯកឧត្តមឧត្តមសេនីយ៍ ប្រាយុទ្ធ ចាន់អូឆា នាយករដ្ឋមន្រ្តីថៃ បានប្រគល់ញញួរដល់ឯកឧត្តម ង្វៀន សួនហ៊្វុក នាយករដ្ឋមន្រ្តី នៃសាធារណរដ្ឋសង្គមនិយមវៀតណាម ដើម្បីទទួលធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៣៦ និងលើកទី៣៧ នៅសាធារណរដ្ឋ សង្គមនិយមវៀតណាម ក្នុងឆ្នាំ២០២០ខាងមុខ។

លោក ង្វៀន សួនហ៊្វុក នាយករដ្ឋមន្រ្តី នៃសាធារណរដ្ឋសង្គមនិយមវៀតណាម បានធ្វើការប្តេជ្ញាចិត្តចំពោះមុខមេដឹកនាំអាស៊ាន ក្នុងការដឹកនាំធ្វើជា ម្ចាស់ផ្ទះកិច្ចប្រជុំកំពូលអាស៊ាននៅឆ្នាំ២០២០ ឲ្យកាន់តែទទួលបានជោគជ័យខ្ពង់ខ្ពស់ថែមទៀត ពិសេស គឺដើម្បីបម្រើឲ្យផលប្រយោជន៍ នៃប្រជាជនអាស៊ានទាំងជាង ៦៥០លាននាក់៕

ភ្នំពេញ ៖ លោក ឯក ថា អ្នកនាំពាក្យទីស្តីការគណៈរដ្ឋមន្ត្រី បានថ្លែងថា កិច្ចប្រជុំកំពូលអាស៊ីប៉ាស៊ីហ្វិកលើកទី២ នឹងត្រូវធ្វើឡើងនៅក្នុងប្រទេសកម្ពុជាចាប់ពីថ្ងៃទី១៨ដល់ថ្ងៃ ទី២០ ខែវិច្ឆិកា ឆ្នាំ២០១៩ខាងមុខនេះ ដែលនឹងមានប្រមុខរដ្ឋ ប្រមុខរដ្ឋាភិបាលមកពីបណ្តាជាង ៥០ប្រទេសចូលរួម ដើម្បីរួមគ្នាដោះស្រាយនូវបញ្ហាប្រឈមនានាក្នុងពេលបច្ចុប្បន្នតាមរយៈកិច្ចប្រជុំកំពូល ប្រចាំឆ្នាំមួយនេះ។

នៅក្នុងសន្និសីទសារព័ត៍មាននាព្រឹកថ្ងៃទី៥ ខែវិច្ឆិកា ស្ដីពីដំណើរឆ្ពោះទៅការរៀបចំកិច្ចប្រជុំ កំពូលអាស៊ីប៉ាស៊ីហ្វិកនេះ លោក ឯក ថា បានថ្លែងថា វាជាកិច្ចប្រជុំដ៏មានសារ:សំខាន់ណាស់ ដែលកម្ពុជាធ្វេីជាម្ចាស់ផ្ទួះ ដោយកិច្ចប្រជុំនេះមានប្រទេសជាង៥០ ចូលរួម ក្នុងនោះមានប្រធានាធិបតី នាយករដ្ឋមន្ត្រី សមាជិក ព្រឹទ្ធសភា រដ្ឋសភា និងភាគីពាក់ព័ន្ធនានាសរុបខ្ទង់ពាន់នាក់។

លោកថា កម្ពុជាត្រូវបានគេមើលឃើញថា ជាប្រទេសដែលមានសុខសន្តិភាព ការផ្សះផ្សាបង្រួប បង្រួមជាតិ និងជាប្រទេសដែលកំពុងមានការអភិវឌ្ឍខ្លាំង ដែលសមជាទីកន្លែងរៀបចំកិច្ចប្រជុំជា លក្ខណៈអន្តរជាតិធំៗ ដែលកម្ពុជាធ្លាប់មានបទពិសោធន៍ និងទទួលបានជោគជ័យក្នុងការរៀបំកិច្ចប្រជុំជា លក្ខណៈអន្តរជាតិនេះជាច្រើនវេទិកាមកហើយ។
,
ដោយឡែក លោកបណ្ឌិត Julius Malicedem ជានាយកអង្គការសហព័ន្ធសន្តិភាពសកល តំបន់អាស៊ីអាគ្នេយ៍បានថ្លែងថា សហព័ន្ធសន្តិភាពសកល សូមថ្លែងអំណរគុណសម្តេចនាយករដ្ឋមន្ត្រី ហ៊ុន សែន ដែលបានអនុញ្ញាតអោយសហព័ន្ធសន្តិភាពសកល រៀបចំកិច្ចប្រជុំកំពូលអាស៊ីប៉ាស៊ីហ្វិក លើកទី២ នៅកម្ពុជា ដែលលើកទី១បានធ្វើឡើងនៅប្រទេសនេប៉ាល់កាលពីឆ្នាំកន្លងទៅ។លោកថាប្រធាន
បទកិច្ចប្រជុំកំពូលអាស៊ីប៉ាស៊ីហ្វិកលើកទី២នេះ គឺការដោះស្រាយបញ្ហាប្រឈមនាពេលបច្ចុប្បន្ន, សន្តិ ភាព, ការផ្សះផ្សាជាតិ, ការពឹងអាស្រ័យគ្នាទៅវិញទៅមក និងគុណតម្លែជាសកល៕

ភ្នំពេញ ៖ បដិវត្តន៍ឧស្សាហកម្មទី៤ នឹងផ្តល់នូវកាលានុវត្តន៍យ៉ាងច្រើនដល់បណ្តាប្រទេសកំពុង អភិវឌ្ឍន៍ដូចកម្ពុជា ក្នុងការប្រើប្រាស់បច្ចេកវិទ្យាសម្រាប់ធ្វើការពង្រួញផ្លូវ និងពន្លឿនការអភិវឌ្ឍប្រទេស ការបង្តើនផលិតភាព, ប្រសិទ្ធភាព និងភាពប្រកួតប្រជែង។ ក៏ប៉ុន្តែបដិវត្តន៍ឧស្សាហកម្មទី៤នេះ ក៏នឹង នាំមកនូវបញ្ហាប្រឈមថ្មីៗ បន្ថែមពីលើបញ្ហាប្រឈមនានាដែលមានស្រាប់ថែមទៀត។ ក្នុងបរិបទនេះ កម្ពុជាចាំបាច់ត្រូវគិតគូរឱ្យបានគ្រប់ជ្រុងជ្រោយនូវយុទ្ធសាស្រ្តនៃការអភិវឌ្ឍរបស់ខ្លួន ដើម្បីសម្រេចបាន នូវកំណើនសេដ្ឋកិច្ចខ្ពស់ ប្រកបដោយបរិយាប័ន្ន និងធន់ រឹងមាំ ពិសេសការសម្រេចបាននូវឋានៈ ជាប្រទេសចំណូលមធ្យមកម្រិតខ្ពស់នៅឆ្នាំ២០៣០។

នេះបើតាមការបញ្ជាក់របស់លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ អនុប្រធានឧត្តមក្រុមប្រឹក្សាសេដ្ឋកិច្ចជាតិ និងជាប្រធានក្រុមការងាររៀបចំក្របខណ្ឌគោលនយោបាយសេដ្ឋកិច្ច ឌីជីថល នៅកម្ពុជា។

លោក វង្សី វិស្សុត ថ្លែងថា ពិតណាស់ថា ក្នុងកិច្ចប្រជុំពិគ្រោះយោបល់ក្រោមប្រធានបទ ការប្រមើលមើលពីការប្រែក្លាយសេដ្ឋកិច្ច នៅកម្ពុជា៖ ក្របខណ្ឌយុទ្ធសាស្រ្តសម្រាប់សេដ្ឋកិច្ចឌីជីថលនៅកម្ពុជា ដែលសហការរៀបចំដោយក្រសួង សេដ្ឋកិច្ច និងហិរញ្ញវត្ថុ ស្ថានទូតអូស្ត្រាលីប្រចាំកម្ពុជា វិទ្យាស្ថាន ODI និង CDRI។

លោក វង្សី វិស្សុត មានប្រសាសន៍ថា រាជរដ្ឋាភិបាលបាន និងកំពុងដាក់ចេញនូវវិធានការ ជាបន្តបន្ទាប់ដើម្បីលើកស្ទួយដល់ការអភិវឌ្ឍសេដ្ឋកិច្ចឌីជីថល និងសហគ្រិនភាពនៅកម្ពុជាដូចជា៖ (១).ការបង្កើត និងដាក់ឱ្យដំណើរការមូលនិធិអភិវឌ្ឍន៍ជំនាញ,  (២).ការបង្កើត និងដាក់ឱ្យដំណើរការ មជ្ឈមណ្ឌលបណ្តុះធុរកិច្ចថ្មីតេជោ,(៣).ការបង្កើត និងដាក់ឱ្យដំណើរការមូលនិធិអភិវឌ្ឍន៍សហគ្រិនភាព  និងមជ្ឈមណ្ឌលលើកកម្ពស់សហគ្រិនភាព  និង(៤).ការរៀបចំបង្កើតធនាគារសហគ្រាសធុនតូច និង មធ្យមជាដើម ហើយជាលទ្ធផលជាក់ស្តែង ការរៀបចំថ្នាល និងប្រព័ន្ធអេកូឡូស៊ីសម្រាប់ការបង្កើតធុរកិច្ចថ្មី និងសហគ្រិនភាពកំពុងតែមានវឌ្ឍនភាពទៅមុខគួរឱ្យកត់សម្គាល់ ដោយក្នុងនោះ វប្បធម៌សហគ្រិនភាព កាន់តែត្រូវបានលើកកម្ពស់, ក្រុមហ៊ុនមួយចំនួនចាប់ផ្តើមជំរុញនវានុវត្តន៍ និងធ្វើឌីជីថលភាវូបនីយកម្ម នៅក្នុងអាជីវកម្មរបស់ខ្លួន ហើយក៏មានគ្រឹះស្ថានបណ្តុះបណ្តាល និងសកលវិទ្យាល័យខ្លះបានដំណើរការកម្មវិធីបណ្តុះបណ្តាលជំនាញ និងសហគ្រិនភាពជាបណ្តើរៗផងដែរ៕

ភ្នំពេញ ៖  លោក  វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោក ម៉ាសាហ៊ីរ៉ូ សាណុ ប្រធានអង្គការ កុកិសៃ KJO ជប៉ុន លោកសុខ សម្បត្តិ អភិបាលនៃគណៈអភិបាលខណ្ឌព្រែកព្នៅ បានអញ្ជើញចែកកង់ដែល ជាអំណោយ របស់អង្គការ កុកិសៃ KJO ប្រទេសជប៉ុន ចែកជូនដល់ សិស្សានុសិស្សក្រីក្រចំនួន៤០០នាក់ នៅក្នុងសាលាបឋមសិក្សាពញ្ញាពន់ ស្ថិតក្នុងសង្កាត់ពញ្ញាពន់ ខណ្ឌព្រែកព្នៅ នាព្រឹកថ្ងៃទី៥ ខែវិច្ឆិកា ឆ្នាំ២០១៩។

ក្នុងឱកាសនោះ  លោក វង សូត បានថ្លែងនូវ ការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ លោក លោកស្រី ដែលជាថ្នាក់ដឹកនាំ និងមន្ត្រី របស់ក្រសួង សង្គមកិច្ច អតីតយុទ្ធជន និងយុវនីតិសម្បទា អង្គការកុមារ អាជ្ញាធរដែនដី សង្កាត់ពញ្ញាពន់ និងសាលាខណ្ឌព្រែកព្នៅ ទាំងអស់ដែលបានសហការ រៀបចំពិធីចែកកង់ដែល ជាអំណោយរបស់ អង្គការ កុកិសៃ KJO ជប៉ុន និងអង្គការ ASPECA នេះ ជាការបង្ហាញឲ្យឃើញ ពីការចិត្តសប្បុរស របស់រាជរដ្ឋាភិបាល នៃប្រទេសជប៉ុន ប្រជាជនជប៉ុន និយាយជារួម និងនិយាយដោយឡែក របស់លោក ម៉ាសាហ៊ីរ៉ូ សាណុ ប្រធានអង្គការ កុកិសៃ KJO ជប៉ុន និងអង្គការ ASPECA ដែលបានចុះ កិច្ចព្រមព្រៀង ជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា បានខិតខំអំពាវនាវ និងគៀងគរ ជំនួយពីសប្បុរសជន នៃប្រទេសជប៉ុន ដើម្បីជួយសម្រួល ដល់ការលំបាក់ របស់សិស្សានុសិស្ស ក្រីក្រ ខ្វះមធ្យោបាយ សម្រាប់ធ្វើដំណើរទៅសិក្សារៀនសូត្រ ដើម្បីក្លាយ ជាសិស្សល្អ កូនល្អ និងពលរដ្ឋល្អ មានប្រយោជន៍ ដល់សង្គមនាពេលអនាគត់។

លោករដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍បន្តថា ៖ ក្រោមកិច្ចសហការ ជាមួយអង្គការ កុមារអាស៊ីអាស្ដេកា និងអង្គការកុកិសៃ KJO ជប៉ុន ដែលទទួលបានកង់ចំនួន ៤០០គ្រឿង បន្ថែមសម្រាប់ធ្វើ ការចែកជូនស ដល់ក្មួយៗកុមារ សិស្សានុសិស្ស នៅក្នុងសាលាបឋមសិក្សាពញ្ញាពន់ដែលកំពុងប្រារព្ធ ឡើងនាពេលនេះ។

ជាមួយគ្នានោះលោក វង សូត បានផ្ដាំផ្ញើ ដល់ក្មួយៗកុមារទាំងអស់ សូមឲ្យក្មួយៗ យកចិត្តទុកដាក់ ខិតខំរៀនសូត្រ ស្ដាប់បង្កាប់ ឪពុកម្ដាយ អ្នកគ្រូ លោកគ្រូ និងត្រូវខិតខំរៀន សូត្រឲ្យទៅជាកូនល្អ សិស្សល្អ មិត្តល្អ និងក្លាយជាពលរដ្ឋល្អ សម្រាប់ពេលអនាគត់ ក្លាយជាទំពាំងស្នងឬស្សី សសម្រាប់បន្តវេណ មនុស្សជំនាន់ក្រោយៗទៀត។

ម៉្យាងវិញទៀត នៅពេលដែលក្មួយៗ ទទួលបាននូវកង់ ដល់ស្រស់ស្អាតនេះ ត្រូវចេះថែរក្សា ឲ្យបានគង់វង្ស និងសូមក្មួយៗ ជិះកង់ដោយប្រុងប្រយ័ត្ន និងត្រូវគោរពច្បាប់ ចរាចរឲ្យបានខ្ចាប់ខ្ជួន ដើម្បីបង្ការ កុំឲ្យមានគ្រោះថ្នាក់ ចរាចរបណ្ដាល ឲ្យខាតបង់ទ្រព្យសម្បត្តិ ប្រាក់កាស អាយុជីវិត និងពេលវេលា រៀនសូត្រទៀតផង។

លោកបានផ្តាំផ្ញើរដល់ លោកគ្រូ អ្នកគ្រូ និងប្រជាពលរដ្ឋទាំងអស់សូមកុំស្ដាប់តាមការញុះញង់ និង ចូលរួមសកម្មភាព ជាមួយទណ្ឌិតសម រង្ស៊ី និងបក្សពួក ព្រោះសកម្មភាពទាំងនោះគឺជាទង្វើ ខុសច្បាប់ដែលត្រូវផ្ដន្ទាទោស ហើយយើងទាំងអស់គ្នា សូមត្រៀមលក្ខណៈចូលរួម ក្នុងពិធីបុណ្យអុំទូក អកអំបុក សំពះព្រះខែ និងចូលរួមតាមការអំពាវនាវរបស់រាជរដ្ឋាភិបាល ក្នុងការហូបអំបុកសាមគ្គីជាតិ នៅថ្ងៃទី០៩ ខែវិច្ឆិកា ឆ្នាំ២០១៩ ទាំងអស់គ្នាដើម្បីការពារជាតិ សាសនា ព្រះមហាក្សត្រ ឲ្យបានស្ថិតស្ថេរ គង្សវង្ស៕

ខេត្តបន្ទាយមានជ័យ ៖ លោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ អមដំណើរដោយ លោក សុខ ផល រដ្ឋលេខាធិការក្រសួងមហាផ្ទៃ. លោក ខេង សុមេធ អគ្គស្នងការរងនគរបាលជាតិ .ឯកឧត្តម អ៊ុ រាត្រី អភិបាលខេត្តបន្ទាយមានជ័យ និងមេបញ្ជាការគ្រប់កងកម្លាំងគណៈបញ្ជាការកាលពីថ្ងៃទី៥វិច្ឆិកា២០១៩ បានអញ្ជើញចុះត្រួតពិនិត្យ និងសួរសុខទុក្ខកងកម្លាំងទាំងបីប្រភេទដែលឈរជើងការពារខ្សែក្រវ៉ាត់ព្រំដែនកម្ពុជា~ថៃ ក្នុងភូមិសាស្ត្រខេត្តបន្ទាយមានជ័យយ៉ាងរឹងមាំ ។

លោក សក់ សេដ្ឋា បានបញ្ជាក់ថា ភាពអង់អាចក្លាហ៑ានរបស់កងកម្លាំងប្រដាប់អាវុធការពារបូរណភាពទឹកដី ការពារសុខសុវត្ថិភាពការពារសន្តិភាព ជូនប្រជាពលរដ្ឋ ការពារប្រទេសជាតិ ដើម្បីរក្សាតម្លៃនៃសន្តិភាពដែលបានមកដោយសារការខិតខំប្រឹងប្រែង របស់រាជរដ្ឋាភិបាលស្របច្បាប់ដែលកើតចេញមកពីបេះដូងប្រជាពលរដ្ឋកម្ពុជាពិតប្រាកដ ជាពិសេស ការស្វែងរកតម្លៃសន្តិភាពរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ខិតខំប្រឹងប្រែងអស់ពីកម្លាំងកាយចិត្ត ដើម្បីអភិវឌ្ឍន៍ប្រទេសជាតិ និងបង្កើន ដើម្បីឈានទៅរកតម្លៃ នៃសន្តិភាពដែលធ្វើឲ្យទទួលស្គាល់នៅលើឆាកអន្តរជាតិ។

លោក សក់ សេដ្ឋា បានបញ្ជាក់ទៅកាន់កម្លាំងទាំងអស់ទៀតថា កងកម្លាំងប្រដាប់អាវុធទាំងអស់ ត្រូវមានស្មារតីសេហ្នាជាតិ ការពារសន្តិភាពជូនប្រទេសជាតិ មិនត្រូវជឿលើសម្តីនៃការញុះញង់របស់ជនក្បត់ជាតិទណ្ឌិត សម រង្ស៊ី ជាជនក្បត់ជាតិ ចង់ផ្តួលរំលំរាជរដ្ឋាភិបាលស្របច្បាប់កំពុងមានសន្តិភាពឲ្យធ្លាក់ចូលក្នុងភាពវឹងវវិញ។

លោករដ្ឋលេខាធិការបានបន្តទៀតថា កងកម្លាំងប្រដាប់អាវុធទាំង៣ប្រភេទ ត្រូវប្តេជ្ញាចិត្តការពាររក្សាតម្លៃ នៃសន្តិភាពជាតិមាតុប្រទេសឲ្យបានសុខបូរណភាព សាច់ស្រស់ឈាមស្រស់ មិនឲ្យជនក្បត់ជាតិទណ្ឌិត សម រង្ស៊ី និងបក្សពួកឧទ្ទាមក្រៅច្បាប់ មកបំផ្លាញសន្តិភាពដែលកើតចេញពីការបោះ ឆ្នោតស្របច្បាប់ពិតៗ ហើយប្តេជ្ញាមិនឲ្យជនក្បត់ជាតិនេះចូលមកលើទឹកដីកម្ពុជាបានឡើយ៕