ភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានអំពាវនាវឲ្យអ្នកនាំពាក្យតាមក្រសួង ស្ថាប័នទាំងអស់ ត្រូវយកចិត្តទុកដាក់ចំពោះករណីនេះ ហើយសហការគ្នាឆ្លើយតប និងទប់ស្កាត់ព័ត៌មានប្រឌិតទាំងអស់នេះឲ្យមានប្រសិទ្ធភាព។ ការអំពាវនាវរបស់លោករដ្ឋមន្រ្តីបែបនេះ នៅក្នុងពិធីបិទសិក្ខាសាលាស្តីពី អភិបាលកិច្ចល្អនៅក្នុងបរិបទលំហូរព័ត៌មាន នាយុគសម័យបច្ចេកវិទ្យាឌីជីថល កាលពីល្ងាចថ្ងៃទី២២ ខែតុលា នេះ នៅទីស្តីការគណៈរដ្ឋមន្ត្រី។
ជាមួយគ្នានោះលោករដ្ឋមន្រ្តីក៏បានសម្តែងការព្រួយបារម្ភយ៉ាងខ្លាំងចំពោះព័ត៌មានក្លែងក្លាយដែលបាននិងកំពុងកើតមានឡើងនាពេលបច្ចុប្បន្ននេះ។ លោកថា អ្វីដែលគួរឲ្យបារម្ភបំផុតនោះ គឺការបំលែងព័ត៌មានពិត ទៅជារឿងផ្សេងៗទៀតដែលបង្កឲ្យមានភាពចលាចល ឬ បង្ខូចកិត្តិយសអ្នកផ្សេងជាដើម។
លោក ខៀវ កាញារីទ្ធ បានប្រសាសន៍ថា “ព័ត៌មានដែលគ្រោះថ្នាក់បំផុតនោះ គឺព័ត៌មានពិត ប៉ុន្តែគេបំលែងរឿងពិតនោះទៅជារឿងផ្សេង”។
លោក ខៀវ កាញារីទ្ធ បានលើកជាឧទាហរណ៍ករណីឡានពេទ្យឆ្លងកាត់ក្បួនដែលត្រូវនគរបាលឃាត់នោះថា “មែនទែនទៅ គេឲ្យអាទិភាពឡានពេទ្យ ប៉ុន្តែមិនអាចគេចផុតអំពីក្បួនខ្ពស់ នៃការការពារសុវត្ថិភាពខ្ពស់បំផុត ប៉ុន្តែទីបំផុតរឿងឡានពេទ្យនេះ គេទាញរឿងនេះក្លាយជារឿងខុសនោះគឺ រាជរដ្ឋាភិបាលមើលងាយជីវិតប្រជាជន”។ លោកបន្តថា នេះជាព័ត៌មានគ្រោះថ្នាក់បំផុត៕
លោកប្រធានាធិបតីឥណ្ឌូនេស៊ី បានថ្លែងអំ ណរគុណសម្តេចតេជោនាយករដ្ឋមន្ត្រី ដែលបានអញ្ជើញចូលរួមក្នុងពិធីស្បថចូលកាន់តំណែងរបស់លោក។ លោក ក៏បានអរគុណសម្តេចតេជោ ហ៊ុន សែន ដែលបានជំរុញកិច្ចសហការទ្វេភាគីដ៏រឹងមាំរវាងឥណ្ឌូនេស៊ី និងកម្ពុជា។ សម្តេចតេជោ ហ៊ុន សែន បានបង្ហាញក្តីសង្ឃឹមថាក្នុងអាណត្តិថ្មីនេះ លោកប្រធានាធិបតីនឹងរកពេលវេលាសមស្របទៅទស្សនកិច្ចនៅកម្ពុជា ខណៈដែលអតីតប្រធានាធិបតីឥណ្ឌូនេស៊ីចំនួន៤រូបមកហើយ បានបំពេញទស្សនកិច្ចនៅកម្ពុជា។
ក្នុងកិច្ចប្រជុំត្រៀមរៀបចំពិធីបុណ្យសមុទ្រលើកទី៨ នៅសាលាខេត្តកំពត នាថ្ងៃទី២០ តុលា លោក រដ្ឋមន្ត្រី ថោង ខុន បានលើកឡើងពីវិធានការភ្លាមៗនៅចំពោះមុខ គឺត្រូវទប់ច្រាំងនៅកន្លែងមួយចំនួននៃដងព្រែក កំពង់បាយ ដើម្បីរក្សាច្រាំងព្រែកឱ្យបានយូរអង្វែង រាំងខ្ទប់អោយបានការបូមខ្សាច់ដែអាចធ្វើអោយប៉ះពាល់ដល់ តំបន់នេះ ពីព្រោះកន្លែងខ្លះដូចជាផ្លូវធ្វើដំណើរនៅជិតមាត់ព្រែក និងផែទូកកាណូតទេសចរណ៍តូចៗ ប្រសិនបើ ដាច់ច្រាំង គឺដូចជាបាត់ផ្លូវធ្វើដំណើរ និងមិនអាចធ្វើសកម្មភាពទេសចរណ៍បាន។ ម្យ៉ាងទៀត តំបន់ទេសចរណ៍នៅ ព្រែកកំពង់បាយនេះ មិនត្រូវឱ្យមានការកាប់ទន្ទ្រានព្រៃឈើ រុក្ខជាតិនានាដូចជាដើមចាក យកធ្វើដីចម្ការតទៅទៀត ឡើយ ព្រោះធនធានធម្មជាតិទាំងនោះ ក៏ជាកត្តាចាំបាច់ក្នុងការទាក់ទាញភ្ញៀវទេសចរផងដែរ ម្យ៉ាងទៀត ត្រូវរក្សា ស្ថិរភាពទឹក និងភាពស្អាតនៅក្នុងព្រែកឱ្យបានជាប់ជានិច្ច។
លោក រដ្ឋមន្ត្រី ថោង ខុន បានបន្តថា ប្រព័ន្ធផ្សព្វផ្សាយត្រូវជួយផ្សព្វផ្សាយឱ្យកាន់តែទូលំទូលាយ ពិសេសត្រូវផលិតជាវីដេអូស្ប៉តអំពីតំបន់ទេសចរណ៍ទាំងនោះឱ្យកាន់តែខ្លាំងក្លាដើម្បីឱ្យប្រជាពលរដ្ឋ និងភ្ញៀវទេស ចរបានដឹងពីសក្ដានុពលនៃតំបន់នេះឱ្យបានសុះសាយបន្ថែមទៀត។
បើតាមលោក សយ ស៊ីណុល ប្រធានមន្ទីរទេសចរណ៍ខេត្តកំពតបានឱ្យដឹងថា រយៈពេល៩ខែ ឆ្នាំ ២០១៩នេះ ខេត្តកំពតទទួលបានភ្ញៀវទេសចរសរុបជាង ១លាន ៣សែននាក់ កើនឡើង ១៧.៤៨% ក្នុងនោះភ្ញៀវ ជាតិមានជាង ១លាន ១សែននាក់ កើនឡើង ១៧.៥២% និងភ្ញៀវអន្តរជាតិជាង ១សែន ៥ម៉ឺននាក់ កើនឡើង ១៧.១៦% បើប្រៀបធៀបនឹងរយៈពេលដូចគ្នានៅឆ្នាំ២០១៨៕
បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃព្រហស្បតិ៍ទី២៤ ខែតុលា ឆ្នាំ២០១៩ វេលាម៉ោង៨:០០នាទីព្រឹក ដើម្បីបើកសម័យប្រជុំលើកទី៤ ព្រឹទ្ធសភា នីតិកាលទី៤ ដោយលើកយករបៀបវារៈតែមួយគត់ គឺស្តាប់របាយការណ៍ គណៈកម្មាធិការអចិន្ត្រៃយ៍ ស្តីពី សកម្មភាពការងាររបស់ព្រឹទ្ធសភា នៅចន្លោះសម័យប្រជុំ លើកទី៣ និងលើកទី៤ នីតិកាលទី៤៕
លោក ឃួង ស្រេង អភិបាលរាជធានីភ្នំពេញ ចង់ឲ្យមានការភ្ជាប់ទំនាក់ទំនង រវាង វិស័យ ដឹកជញ្ជូនអ្នកដំណើរ តាមរយៈរថយន្តក្រុង ពីរាជធានីភ្នំពេញ ទៅខេត្ត បារៀ-វង់កាវ នៃប្រទេសវៀតណាម ឬពីខេត្តខេត្ត បារៀ-វង់កាវ មកកាន់រាជធានីភ្នំពេញវិញ ដើម្បីបង្ករលក្ខណៈងាយស្រួល ដល់អ្នកទេសចរ នៃប្រទេសទំាងពី បានទៅទស្សនាកម្សាន្តនៅតំបន់ទេសចរណ៍សំខាន់ៗ ទំាងនៅ រាជធានីភ្នំពេញ និងខេត្ត បារៀ-វង់កាវជាដើម។
លោក ឃួង ស្រេង បានអៈអាងថា គម្រោងតភ្ជាប់វិស័យទេសចរណ៍ រវាង រាជធានី ខេត្ត នៃប្រទេសទំាងពីនេះ និងជាកញ្ចប់ផលិតផលថ្មី ក្នុងការទាក់ទាញភ្ញៀវទេសចរ ខណៈដែល រាជធានីភ្នំពេញ និងបារៀ-វង់កាវ សម្បូរទៅដោយតំបន់ទេសចរណ៍ ធម្មជាតិ ប្រវត្តិសាស្រ្ត ដ៏ច្រើនដូចគ្នា។បន្ថែមពីនេះទៀត គឺការផ្លាស់ប្តូរវិនិយោគលើវិស័យទេសចរណ៍ ដែលបង្កលក្ខណៈងាយស្រួល ដល់ប្រជាជន នៃប្រទេសទំាង២បានធ្វើដំណើរកម្សាន្តទៅវិញទៅមកផងដែរ។
