ភ្នំពេញ ៖ ក្រុមប្រឹក្សាជាតិអភិវឌ្ឍដោយចិរភាព បាននឹងកំពុងសិក្សាស្រាវជ្រាវវិធីសាស្ត្រថ្មីៗ ដើម្បីធ្វើការកែច្នៃថាមពលស្អាតឲ្យបានកាន់តែច្រើន ដើម្បីនិរន្តរភាពបរិស្ថាន។ ក្រុមប្រឹក្សាជាតិក៏កំពុងសិក្សាទាញយកឥន្ធនៈពីសំណល់រឹង និងកែច្នៃប្រភពថាមពលកកើតឡើងវិញឲ្យមានប្រសិទ្ធិភាព។

ថ្លែងនៅក្នុងសិក្ខាសាលាត្រួតពិនិត្យលទ្ធផលការងារអភិវឌ្ឍន៏ដោយចីរ ភាពឆ្នាំ ២០១៩ និងទិសដៅបន្តឆ្នាំ២០២០ នៅទីស្តីការក្រសួងបរិស្ថាន លោក សៅ សុភាព រដ្ឋលេខាធិការក្រសួងបរិស្ថាន បានបញ្ជាក់ថា កំណើនសេដ្ឋកិច្ចបច្ចុប្បន្នបានជំរុញឲ្យមានតម្រូវការថាមពលអគ្គិសនីកើនឡើងខ្លាំង ដែលក្រសួងចាំបាច់ត្រូវធ្វើពិពិធកម្មថាមពលពីគ្រប់ថាមពល ពិសេសថាមពលកកើតឡើងវិញ ដូចជាថាមពលពន្លឺព្រះអាទិត្យ ខ្យល់ ការផលិតផលពីសំណល់ សំដៅធានាឲ្យបានសន្តិសុខថាមពល។ ក្រុមប្រឹក្សាជាតិ ក៏កំពុងសហការរៀបចំ និងអនុវត្តគំរូអាជីវកម្ម សម្រាប់ផ្គត់ផ្គង់ដល់តំបន់ដាច់ ស្រយាល ដោយផ្តោតលើការប្រើប្រាស់ថាមពលពន្លឺព្រះអាទិត្យតាមខ្នងផ្ទះ និងបណ្តាញខ្នាតតូច។ ជាការកត់សំគាល់កម្ពុជា បានអនុម័តគម្រោងថាមពល ពន្លឺព្រះអាទិត្យខ្នាតធំរហូតដល់ជាង៤០០MW ស្មើនឹងប្រមាណ២០ភាគរយ នៃការផលិតថាមពលអគ្គិសនីនៅកម្ពុជា។ ទន្ទឹមនេះ រាជរដ្ឋាភិបាលកម្ពុជា បានគោលដៅផ្គត់ផ្គង់អគ្គិសនីឲ្យគ្រប់ភូមិនៅត្រឹមឆ្នាំ២០២០ និងយ៉ាងហោច ណាស់៧០ភាគរយនៃខ្នងផ្ទះប្រជាជនទាំងអស់នៅទូទាំងប្រទេស មានអគ្គិសនីប្រើប្រាស់ក្នុងតម្លៃសមរម្យនៅត្រឹមឆ្នាំ២០៣០។

បើតាមលោក តាំង ម៉េងអៀង ប្រធាននាយកដ្ឋានសេដ្ឋកិច្ចបៃតង នៃក្រុមប្រឹក្សាជាតិអភិវឌ្ឍដោយចិរភាព បញ្ជាក់ឲ្យដឹងថា ក្រុមប្រឹក្សាជាតិ បានជួយគាំទ្រដល់សាលារាជធានីភ្នំពេញក្នុងការរៀបចំ និងប្រកាសដាក់ឲ្យប្រើប្រាស់នូវផែនការអភិវឌ្ឍទីក្រុងនិរន្តរភាពសម្រាប់រាជធានីភ្នំពេញ ២០១៨-២០៣០។ ទន្ទឹមគ្នាក្នុងការខិតខំបន្តរៀបចំបញ្ចប់នូវផែនការនេះ សម្រាប់ទីក្រុងគោលដៅចំនួន៧ផ្សេងទៀតដូចជា ក្រុងសៀមរាប ក្រុងព្រះសីហនុ ក្រុងកំពង់ចាម ក្រុងប៉ោយប៉ែត ក្រុងស្វាយរៀង និងក្រុងសួងជាដើម។

គួរបញ្ជាក់ថា ក្រុមប្រឹក្សាជាតិអភិវឌ្ឍដោយចីរភាព គឺជាស្ថាប័នអន្តរក្រសួង ដើម្បីទទួលបន្ទុកគិតគូររៀបចំគោលនយោបាយ និងយុទ្ធសាស្ត្រនានា សំដៅ ធានានូវតុល្យភាពរវាងសេដ្ឋកិច្ច បរិស្ថាន សង្គម និងវប្បធម៌នៅកម្ពុជា។ ក្រុមប្រឹក្សាជាតិនេះ បំពេញភារកិច្ចដោយផ្អែកលើការសិក្សាស្រាវជ្រាវលក្ខណៈវិទ្យាសាស្ត្រ ដើម្បីធ្វើកំណែទម្រង់កិច្ចគាំពារបរិស្ថាន និងការគ្រប់គ្រងធនធានធម្មជាតិ៕

ភ្នំពេញ ៖ អ្នកនាំពាក្យគ្រប់ក្រសួង ស្ថាប័ន ក្នុងរាជធានី ខេត្ត ចំនួន ៥៤ស្ថាប័ន បានមកជួបជុំគ្នានៅព្រឹកថ្ងៃទី២១ ខែតុលា នេះ ដើម្បីពិភាក្សា ចែករំលែក រកវិធីសាស្ត្រទប់ស្កាត់ និងបន្សាបព័ត៌មានក្លែងក្លាយ ដែលមានគោលដៅបំភ្លៃ វិទ្ធង្សនា និងវិច្ឆេទកម្មបំផ្លាញសន្តិភាព និងសមិទ្ធផលរបស់រាជរដ្ឋាភិបាល។

ថ្លែងនៅក្នុងសិក្ខាសាលាស្តីពី«អភិបាលកិច្ចល្អ នៅក្នុងបរិបទលំហូរព័ត៌មាន នាយុគសម័យបច្ចេកវិទ្យាឌីជីថល» នៅស្តីការគណៈរដ្ឋមន្ត្រី ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានបញ្ជាក់ថា ភាពទូលំទូលាយ នៃវិថីព័ត៌មានដែលធ្វើចរាចរណ៏ដោយសំបូរបែប ទាំងរូបភាព ទាំងសម្លេង ទាំងទិន្នន័យ បានផ្តល់នូវឱកាស និងការប្រឈម ដល់មនុស្សជាតិគ្រប់ជាតិសាសន៏។ ព័ត៌មានចម្រុះ និងសំបូរបែប ជាមួយនឹងនិន្នាការបានធ្វើឲ្យអ្នកប្រើប្រាស់ត្រូវតែមានសមត្ថភាព ក្នុងកិច្ចធ្វើអត្តសញ្ញាណកម្ម ដើម្បីជ្រើសរើស និងប្រើប្រាស់ប្រយោជន៏របស់ខ្លួនជាដើម។

គួរកត់សំគាល់ដែរថា នៅកម្ពុជាអ្នកប្រើប្រាស់ប្រព័ន្ធទូរស័ព្ទបច្ចុប្បន្នមានជាង២០លានស៊ីមកាត បាននឹងកំពុងដំណើរការ និងចំនួនអ្នកប្រើប្រាស់ប្រព័ន្ធបណ្តាញសង្គមមានចំនួនជាង១១លានគណនី ដែលកំពុងប្រតិបត្តិការយ៉ាងសកម្ម។ រីឯក្រសួង ស្ថាប័នផ្លូវការរបស់ជាតិមានចំនួនត្រឹម២៩ និងរាជធានីខេត្តក្រុង មានចំនួន២៥ ដូច្នោះត្រូវទាមទារឲ្យមន្ត្រីធ្វើការយ៉ាងសកម្ម និងប្រសិទ្ធភាព ក្នុងការឆ្លើយតបជាមួយនឹងអ្នកប្រើប្រាស់ជាមធ្យមយ៉ាងហោចណាស់ជាង១០លាននាក់។

សាស្ត្រាចារ្យសារព័ត៌មាន លោក ឆាយ សុផល បានបញ្ជាក់ថា អ្នកនាំពាក្យ ត្រូវមានជំនាញច្បាស់លាស់ និងបត់បែន ដើម្បីឆ្លើយតបទៅនឹងសំណួររបស់ មហាជន ពិសេសអ្នកសារព័ត៌មាន។ អ្នកនាំពាក្យ និងអ្នកកាសែត គឺជាដៃគូមិនអាចខ្វះបាន ដែលរួមសហការគ្នាដោះស្រាយបញ្ហា។ លោកសាស្ត្រាចារ្យ ថា ធ្វើជាអ្នកនាំពាក្យកុំឲ្យខ្លាចអ្នកកាសែត តែត្រូវផ្តល់ព័ត៌មានដែលពិត និងច្បាស់លាស់ដល់ពួកគេ តែបើអ្នកកាសែតធ្វើខុសវិជ្ជាជីវៈ មន្ត្រីអាចប្តឹងអ្នកកាសែត ទៅតាមច្បាប់ស្តីពីសារព័ត៌មាន។

លោក ផាត់ សាលីន ប្រធានលេខាធិការដ្ឋាន អង្គភាពអ្នកនាំពាក្យរាជរដ្ឋាភិបាលកម្ពុជា បានឲ្យដឹងថា នេះគឺជាសិក្ខាសាលាលើកទី២ គោលបំណងដើម្បីទប់ស្កាត់ និងបន្សាបព័ត៌មានក្លែងក្លាយទាំងឡាយណា ដែលមានគោលដៅបំភ្លៃ វិទ្ធង្សនា និងវិច្ឆេទកម្មបំផ្លាញសន្តិភាព និងសមិទ្ធផលនានា ពិសេសមានទិសដៅពង្រឹងកម្លាំងសរុប គ្រប់ស្ថាប័ន គ្រប់អង្គភាព ក្នុងការគ្រប់គ្រង និងប្រើប្រាស់ព័ត៌មាន ដើម្បីពង្រឹងការយល់ដឹងដ៏ត្រឹមត្រូវ របស់សាធារណជន ដែលជាចំណែកមួយក្នុងភាពជាដៃគូ នៃកិច្ចថែរក្សាការពារជាតិ សាសនា ព្រះមហាក្សត្រ និងការអភិវឌ្ឍប្រកបដោយចីរភាព អភិបាលកិច្ចល្អ៕

ភ្នំពេញ ៖ តុលាការរាជធានីភ្នំពេញ សម្រេចផ្ដន្ទាទោសលោក សម រង្ស៊ី ក្នុងសំណុំរឿងថ្មីមួយទៀត ជាមួយមន្ត្រីបក្សប្រឆាំង ៣នាក់ គឺលោក ហូ វ៉ាន់ និងលោក កាក់ កុម្ភារ នៅថ្ងៃទី១៨ ខែតុលា ពាក់ព័ន្ធនឹងករណីបង្ហោះសារប្រមាថលោក ហ៊ុន សែន និងញុះញង់ឱ្យប្រព្រឹត្តបទឧក្រិដ្ឋជាអាទិ៍។

ចៅក្រមជំនុំជម្រះសាលាដំបូងរាជធានីភ្នំពេញ លោក ពេជ្រ វិជ្ជាធរ បានប្រកាសសាលក្រមផ្ដន្ទា ទោស លោក សម រង្ស៊ី អតីតតំណាងរាស្ត្របក្សប្រឆាំង លោក ហូ វ៉ាន់ និងអតីតសមាជិកប្រតិបត្តិបក្សសង្គ្រោះជាតិប្រចាំក្រុងភ្នំពេញ លោក កាក់ កុម្ភារ ឱ្យជាប់ពន្ធនាគារ ម្នាក់ៗ ១ឆ្នាំ ៨ខែ ពីបទផ្ដើមគំនិតក្នុងអំពើប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទិ៍។

ជាមួយគ្នានេះដែរ នៅរសៀលថ្ងៃទី១៨ ខែតុលា ដដែលនេះ សាលាដំបូងរាជធានីភ្នំពេញ ក៏បាន ចេញសាលក្រមដាច់ដោយឡែកមួយផ្សេទៀត ដោយផ្តន្ទាទោសឈ្មោះ គង់ ម៉ាស់ និងឈ្មោះ វឿន គឹមលន់ ដាក់ពន្ធនាគារម្នាក់ៗ ១ឆ្នាំ ៦ខែ ពីបទប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយផ្អែកតាមបញ្ញតិ្តមាត្រា ៤៩៥ និងមាត្រា ៥០២ នៃក្រមព្រហ្មទណ្ឌ ដូចគ្នា។

បើតាមរបាយការណ៍របស់សមត្ថកិច្ច បង្ហាញថា ក្រោយការចាប់ខ្លួនក្រុមឧទ្ទាមទាំងនេះ សមត្ថកិច្ច បានរកឃើញមានឯកសារសំខាន់ៗជាច្រើន ដែលទាក់ទងនឹងផែនការប៉ុនប៉ងផ្តួលរំលំ រាជរដ្ឋាភិ បាល កម្ពុជា តាមបញ្ជារបស់លោក សម រង្សី។

គួរជម្រាបជូនផងដែរថា ក្នុងចំណោមជនជាប់ចោទទាំងនោះ គឺមានតែឈ្មោះ គង់ ម៉ាស់ ជាសកម្ម ជននៃអតីតគណបក្សសង្គ្រោះជាតិក្នុងខេត្តស្វាយរៀង ម្នាក់ប៉ុណ្ណោះ ដែលត្រូវបានសមត្ថកិច្ចឃាត់ ខ្លួនបាន នៅថ្ងៃទី១៦ ខែមករា ឆ្នាំ២០១៩ ហើយត្រូវបានតុលាការឃុំខ្លួនបណ្តោះអាសន្ននៅពន្ធនា គារ ព្រៃ ស ក្រោមការចោទប្រកាន់ពីបទប្រមាថ និងបទញុះញង់ឲ្យបង្កចលាចល កាលពីថ្ងៃទី១៩ ខែមករា ឆ្នាំ២០១៩។ ចំណែក លោក សម រង្ស៊ី វិញ កំពុងជាប់បណ្ដឹងនៅតុលាការចំនួន ១៥ បទ ល្មើសហើយ ដោយក្នុងនោះ ៩សំណុំរឿង មានសាលក្រមស្ថាពរ៕

ភ្នំពេញ ៖ គណៈប្រតិភូជាន់ខ្ពស់សភា នៃព្រះរាជាណាចក្រកម្ពុជា ដឹកនាំដោយលោកជំទាវកិត្តិសង្គហ បណ្ឌិត ឃួន សុដារី អនុប្រធានទី២ នៃរដ្ឋសភា និងជាប្រធានក្រុមសភាជាតិកម្ពុជា នៃអ្នកនយោ បាយ សភាស្រ្តី នាព្រឹកថ្ងៃទី១៩ តុលា បាននិវត្តន៍មកដល់មាតុប្រទេសវិញហើយ បន្ទាប់ពីបាន អញ្ជើញទៅចូលរួមហាសន្និបាតសហភាព អន្តរសភា (IPU) លើកទី១៤១ នៅទីក្រុងប៊ែលក្រាត សាធារណរដ្ឋស៊ែប៊ី ពីថ្ងៃទី១៣- ដល់១៧ ខែតុលា ឆ្នាំ២០១៩ ដោយគណៈប្រតិភូសភា កម្ពុជាបាន ហៅវេទិកាមហាសន្និបាតសហភាពអន្តរសភា (IPU) លើកទី១៤១ នេះថា ជា ជោគជ័យដ៏ធំធេង របស់សភាកម្ពុជា និងការបរាជ័យយ៉ាងអាម៉ាស់បំផុតរបស់លោក សម រង្ស៊ី។

សូមជម្រាបជូនថា មហាសន្និបាតសហភាពអន្តរសភា (IPU) លើកទី១៤១ នៅទីក្រុងប៊ែលក្រាត សាធារណរដ្ឋស៊ែប៊ី នេះ មានសមាជិកចូលរួមចំនួនជាង ២០០០នាក់ មកពី១៤៩ប្រទេស ក្នុងនោះ មានប្រធានសភាចំនួន ៧០នាក់ និងអនុប្រធានសភាចំនួន៤០ និងសមាជិក សមាជិកាសភា ក្នុងនោះសមាជិក សភាវ័យក្មេងប្រមាណ១៧% និងសមាជិកសភាជាស្រ្តី មានចំនួន៣០% រួមទាំង សមាជិកសង្កេតការណ៍ និងអង្គការដៃគូមួយចំនួន ដោយមហាសន្និបាតប្រព្រឹត្តទៅក្រោមមូលបទ ការពង្រឹងច្បាប់អន្តរជាតិ៖ តួនាទី យន្តការសភា និងការចូលរួមចំណែកកិច្ចសហប្រតិបត្តិការ ក្នុង តំបន់។ ថ្លែងក្នុងមហាសន្និបាតនេះលោកជំទាវ ឃួន សុដារី ប្រធានគណៈប្រតិភូសភាកម្ពុជា បាន សង្កត់ធ្ងន់ទៅលើសារៈសំខាន់នៃច្បាប់អន្តរជាតិ ក្នុងការថែ រក្សាសន្តិសុខ សន្តិភាព និងការអភិវឌ្ឍ ជាពិសេសការពង្រឹងយន្តការពហុភាគី ដែលមានលក្ខណៈទូលំទូលាយ ប្រកបដោយបរិយាប័ន្ន និងមានប្រសិទ្ធភាព ហើយជាមួយគ្នានេះលោកជំទាវក៏បានលើកឡើងពីភាពចាំបាច់ នៃការគោរព គោលការណ៍មិនជ្រៀតជ្រែកកិច្ចការផ្ទៃក្នុងរបស់រដ្ឋណាមួយ ការគោរពអធិបតេយ្យគ្នា ទៅវិញទៅ មក ការពឹងពាក់គ្នាទៅវិញទៅមកជាវិជ្ជមាន ដើម្បីកសាងសណ្តាប់ធ្នាប់ពិភពលោកមួយ ដែលផ្អែក លើវិធានច្បាប់ និងតួនាទីរបស់សភានៅក្នុងការជំរុញកិច្ចពិភាក្សា និងកិច្ចសហប្រតិបត្តិការអន្តរជាតិ ដោយសភាកម្ពុជាបាន ប្តេជ្ញាបន្តចូលរួមយ៉ាងសកម្មថែមទៀតក្នុងការគោរពសមភាព បរិយាប័ន្ន គោរពគ្នាទៅវិញទៅមក ភាពថ្លៃថ្នូរ និងសាមគ្គីភាពជាពិសេសកម្ពុជាបានស្នើបន្ថែមនូវគោលការណ៍ ពីរទៀត គឺពិពិធកម្ម និងការគោរពអធិបតេយ្យភាព ដែលជាសសរស្តម្ភដ៏សំខាន់នៃសន្តិភាព និងវិបុលភាពសកលលោក៕