ដោយ ៖ សុផល
ពោធិ៍សាត់ ៖ ក្នុងរយៈពេល៥ថ្ងៃ កម្លាំងចម្រុះក្នុងស្រុកចំនួន៣ របស់ខេត្តពោធិ៍សាត់ គឺចាប់ពីថ្ងៃទី១៨ ដល់ថ្ងៃទី២២ ខែកក្កដា ឆ្នាំ២០១៩នេះ បានចុះរឹបអូស និងដុតកម្ទេចចោលជាក់ស្តែងនូវវត្ថុតាងដែលជាមធ្យោបាយប្រព្រឹត្តបទល្មើសចំនួន២២គ្រឿង។

ប្រតិបត្តិការបង្ក្រាបបទល្មើសព្រៃឈើនេះ ដឹកនាំដោយប្រធានគណៈបញ្ជាការខេត្តព្រមទាំងមានមានការសម្របសម្រួលពីលោក ព្រះរាជអាជ្ញាអមសាលាដំបូងខេត្តពោធិ៍សាត់ កម្លាំងកងរាជអាវុធហត្ថខេត្ត សហការជាមួយកម្លាំងមូលដ្ឋានអាវុធហត្ថស្រុក កម្លាំងបរិស្ថាន កម្លាំងអធិការស្រុក ចំនួន៣ស្រុក រួមមានស្រុកក្រគរ ស្រុកភ្នំក្រវាញ និងស្រុកវាលវែង។

បើយោងតាមរបាយការណ៍របស់បញ្ជាការដ្ឋានកងរាជអាវុធហត្ថខេត្ត ដែលភ្នាក់ងារព័ត៌មានបានទទួល នាល្ងាចថ្ងៃទី២២ ខែកក្កដា ឆ្នាំ២០១៩ នេះ បានឲ្យដឹងថា គិតចាប់ពីថ្ងៃទី១៨ រហូតដល់ថ្ងៃទី២២ ខែកក្កដានេះ កម្លាំងចម្រុះ ក្រោមការបញ្ជាផ្ទាល់ពីសំណាក់លោកមេបញ្ជាការ កងរាជអាវុធហត្ថខេត្ត កម្លាំងបានចុះទៅដល់ស្រុកគោលដៅចំនួន៣ នឹងបានដកហូតនូវវត្ថុតាង រថយន្តរ៉េវ ឬរថយន្តប៉ាកុង គ្មានស្លាកលេខ ចំនួន២២គ្រឿង។

គួរជម្រាបថា វត្ថុតាងរថយន្តរ៉េវ ឬរថយន្តប៉ាកុងចំនួន ២២គ្រឿង ត្រូវបានសមត្ថកិច្ចចម្រុះធ្វើការដុតបំផ្លាញចោលនៅកន្លែង ដោយផ្អែកលើការលំបាកក្នុងការដឹកជញ្ជូនចេញមកក្រៅ៕

ខេត្តព្រះសីហនុ : អ្នកធ្វើដំណើរនៅលើ វិថីឯករាជ្យមានការភ្ញាក់ផ្អើលដោយសារមានករណីជនជាតិចិន វ័យជាង 20 ឆ្នាំ ម្នាក់បាន ប៉ុនប៉ងលោតសម្លាប់ខ្លួនពីលើកាស៊ីណូ ប៊ីវីន តែមិនបានសម្រេច ។ ករណីនេះសង្ស័យថា ចាញ់ល្បែង។

ហេតុការណ៍នេះ បានកើតឡើងនៅវេលាម៉ោង 6 និង 45 នាទីយប់ថ្ងៃទី 18 ខែកក្កដាឆ្នាំ 2019។នៅត្រង់ចំណុចអតីត កែងតុលាការចាស់ ស្ថិតនៅក្នុងភូមិ 2 សង្កាត់ 4 ក្រុង -ខេត្តព្រះសីហនុ។ ដែលមានកម្លាំងសមត្ថកិច្ចគ្រប់ស្ថាប័ននិងក្រុមអ្នកជួយសង្គ្រោះ 711 ដែលប្រចាំការនៅក្រុង-ខេត្តព្រះសីហនុ ជាច្រើននាក់កំពុង ជួយសង្គ្រោះ បុរ koសម្នាក់ នេះ ឲ្យរួចផុតពីការប៉ុនប៉ង លោតសម្លាប់ខ្លួន ប៉ុន្តែ មិនបានសម្រេច។

តាមការឲ្យដឹង ពីបុគ្គលិក កាស៊ីណូឈ្មោះ ប៊ី វីន ជាច្រើននាក់បាន ឲ្យដឹងថា ករណីបុរសជនជាតិចិនវ័យ ជាង 20ឆ្នាំរូប បានចូលមកលេងល្បែង ក្នុងកាស៊ីណូ ប៊ីនវីន នេះ តាំងពីព្រលឹម រហូតដល់ព្រលប់ ដោយសារតែការលេងរបស់ខ្លួន កាន់តែចាញ់លុយច្រើនពេក ហើយលង់ខ្លួនមិនអាចរកប្រាក់ដែលចាញ់ល្បែងនៅក្នុងកាស៊ីណូនេះមកវិញក៏សម្រេចចិត្តប៉ុនប៉ង លោតសំលាប់ខ្លួនពីលើអាគារដែលមានកំពស់ 10 ជាន់ តែការដែលប៉ុនប៉ងលោតនោះគឺត្រឹមតែកម្ពស់ 5 ជាន់ប៉ុណ្ណោះតែមិនបានសម្រេច ដោយសារត្រូវបានបុរស និងស្ត្រី ជនជាតិចិនដូចគ្នាពួកគេទាំងអស់ព្យាយាមនិយាយលួងលោម បុរសរូបនោះអស់រយៈពេលជិត១ម៉ោងទើបជនរងគ្រោះម្នាក់នេះ ព្រមចុះពីលើបង្អួចនៃអគារជាន់ទី 5 ហើយដើរចូលមកក្នុងបន្ទប់វិញ។

ក្រោយពីលួងលោមបុរសជនជាតិចិនម្នាក់នេះបានហើយត្រូវបានជនជាតិចិនដូចគ្នាចាប់ក្រៀកនឹងនាំមកដាក់រថយន្តសង្គ្រោះរបស់ក្រុមសង្គ្រោះលេខ 711 បើកចេញទៅបាត់។
គួរបញ្ជាក់ ផងដែរ ថាការងារដឹកជនជាតិចិនដែលប៉ុនប៉ងលោតសម្លាប់ខ្លួនមិនបានសម្រេចម្នាក់នេះទៅសួរនាំនៅបញ្ជាការដ្ឋាននោះឥឡូវនេះបុរសជនជាតិចិននោះត្រូវបានកម្លាំងសមត្ថកិច្ចឲ្យស្នាក់នៅក្នុងបញ្ជាការដ្ឋាននោះចំនួនមួយយប់ផងដែរ៕

ដោយ ៖ សុផល

ខេត្តបន្ទាយមានជ័យ ៖ យុវវ័យឈាមរាវបង្ហោះម៉ូតូ ទៅបុកជាមួយរថយន្ត ស្លាប់ពីនាក់ រងរបួសធ្ងន់ម្នាក់នៅក្រុងប៉ោយប៉ែត ហេតុការណ៍នេះកើតឡើងនៅវេលាម៉ោង១៤និង៣០នាទី ថ្ងៃទី១៧ ខែកក្តដា ឆ្នាំ២០១៩ លើផ្លូវជាតិលេខ៥ នៅមុខសមាគមន៍ខ្មែរ ចិន ក្រុងប៉ោយប៉ែត ក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត។

ប្រភពពីសមត្ថកិច្ចបានអោយដឹងថាអ្នកបើកបរម៉ូតូ ១.ឈ្មោះ ចាន់ រ៉ូសា ភេទប្រុស អាយុ១៨ឆ្នាំ អ្នកបើកបរស្លាប់។

២.ឈ្មោះ មាន សង្ហា ភេទប្រុស អាយុ១៧ឆ្នាំ អ្នករួមដំណើរស្លាប់ អ្នកទាំងពីរជិះម៉ូតូម៉ាកឌ្រីមស៊េរីឆ្នាំ២០០៨ ពណ៍ខ្មៅ គ្មានស្លាកលេខ ។

ទី៣.ឈ្មោះ ទី ណូ ភេទប្រុស អាយុ១៧ឆ្នាំ អ្នកបើកបរម៉ូតូ របួសធ្ងន់ ម៉ាកឌ្រីម ស៊េរីឆ្នាំ ២០១៩ ពណ៍ខ្មៅពាក់ស្លាកលេខ ប.ជ 1T-1777 ហេីយទាំងបីនាក់ រស់នៅក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត។

ប្រភពពីកន្លែងកើតហេតុបានឲ្យដឹងថា មុនកើតហេតុ គេឃើញម៉ូតូម៉ាឌ្រីមស៊េរីឆ្នាំ២០០៨ គ្មានស្លាកលេខ ដែលជិៈគ្នាពីរនាក់បានបង្ហោះម៉ូតូ ពីទិសកើតទៅលិច ទៅកៀរចំកន្ទុយរថយន្តបញ្ច្រាស់ទិសមួយគ្រឿងម៉ាក AVANZA ពណ៍ខ្មៅ ពាក់ស្លាកលេខ ប.ជ 2A-6104រួចជ្រុលទៅបុករថយន្តបញ្ច្រាស់ទិសមួយគ្រឿងទៀតម៉ាក ហាយឡិនដឺ ពណ៍ទឹកប្រាក់ ពាក់ស្លាកលេខ ភ្នំពេញ2Y-0996ហើយម៉ូតូម៉ាឌ្រីមស៊េរីឆ្នាំ២០១៩ ក៏ទៅបុករថយន្តបន្ថែម ដែលហេតុការណ៍នេះបង្កឲ្យស្លាប់ម្នាក់របួសធ្ងន់ស្រាល០២ នាក់។

ក្រោយពេលកើតហេតុ អ្នករងរបួសទាំងពីរនាក់ ត្រូវបានរថយន្តសង្គ្រោះ ដឹកទៅព្យាបាលនៅមន្ទីរពេទ្យបង្អែកប៉ោយប៉ែត២ និងសពត្រូវបានសាច់ញាតិយកទៅធ្វើបុណ្យតាមប្រពៃណី។

រថយន្តឃាត់បានមួយគ្រឿង ចំណែកឯរថយន្តហាយឡិនដឺ បន្សល់ទុកតែកាងមុខនិងស្លាកលេខប៉ុណ្ណោះ ហើយបើករត់គេច សមត្ថកិច្ចកំពុងដាក់កម្លាំងតាមស្ទាក់ចាប់៕

​ដោយ ៖ សុត្ថារ៉ា

ភ្នំពេញ ៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេច ស ខេង បានបញ្ជាឲ្យសមត្ថកិច្ច ពាក់ព័ន្ធទាំងអស់ត្រូវចាប់បញ្ចូនជនអន្តោប្រវេសន៍ណា ដែលជ្រៀតចូលខុសច្បាប់នៅតាមព្រំដែនខុសច្បាប់ ឲ្យខានតែបាន។ សម្តេចក៏បានក្រើនរំលឹកដល់កម្លាំងនគរបាលយកចិត្តទុកដាក់គ្រប់គ្រងជនបរទេស ឱ្យបានម៉ត់ចត់ និងទទួលខុសត្រូវខ្ពស់។

ថ្លែងនៅក្នុងកិច្ចប្រជុំផ្សព្វផ្សាយ លទ្ធផលការងារដកហូតឯកសាររដ្ឋបាលកម្ពុជាមិនប្រក្រតីនៅថ្ងៃទី១៧ ខែកក្កដា ឆ្នាំ២០១៩ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីមហាផ្ទៃ បានបញ្ជាក់ថា ការគ្រប់គ្រងលើជនបរទេសនៅក្នុងប្រទេសកម្ពុជាជាកិច្ចការសំខាន់មួយដែលត្រូវតែយកចិត្តទុក ដាក់ ដោយមិនត្រូវទុកឱ្យជនបរទេសស្ថិតនៅក្រៅសំណា ញ់ច្បាប់ អាចបង្កឱ្យមានស្ថានភាពច្របូកច្របល់មិនអាចគ្រប់គ្រងបាន និងជះឥទ្ធិពលអវិជ្ជមាន ប៉ះពាល់ដល់សន្តិសុខ សណ្តាប់ធ្នាប់ និងសុវត្ថិភាពសង្គម កម្មវិធីអភិវឌ្ឍន៍ជា តិ និងសិទ្ធិមនុស្សនោះ។

សម្តេច ស ខេង បានបញ្ជាឲ្យកងកម្លាំងសមត្ថកិច្ច «ស្នងការដ្ឋាននគរបាលរាជធានី ខេត្ត អធិការដ្ឋានស្រុក ក្រុង ខណ្ឌ និងប៉ុស្តិ៍នគរបាលរដ្ឋបាល ឃុំសង្កាត់ ត្រូវយកចិត្តទុកដាក់គ្រប់គ្រងជនបរទេសឱ្យបានម៉ត់ចត់ ប្រកបដោយការទទួលខុសត្រូវ និងត្រូវមានវិធានការចាប់បណ្តេញចេញពីកម្ពុជាជាបន្ទាន់ចំពោះជនបរទេសទាំងឡាយណា ដែលច្រៀតចូលមកស្នាក់នៅខុសច្បាប់ ដើម្បីបង្ការទប់ស្កាត់កុំឱ្យស្ថានភាពច្រំដែលកើតមានឡើងសាជាថ្មី»។
សម្តេច ស ខេង បានបញ្ជាក់ថា សព្វថ្ងៃនេះ មានជនបរទេសកំពុងរស់នៅកម្ពុជាចំនួន៨៨.១១២នាក់តែប៉ុណ្ណោះ ដែលភាគច្រើនគឺជាជនជាតិវៀតណាម។

យោងតាមលទ្ធផលការងារ ការដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកាន់កាប់ប្រើប្រាស់ និងការទទួលពាក្យសុំប្រកាសទទួលស្គាល់ ជាជនបរទេសអន្តោប្រវេសន្ត និងប័ណ្ណស្នាក់នៅអចិន្ត្រៃយ៍ ដែលបានអនុវត្តន៍រយៈពេល២ឆ្នាំ៦ខែ បានរកឃើញថា ជនបរទេសបែបអន្តោប្រវេសន្តនៅកម្ពុជាមានចំនួន ១១សញ្ជាតិ ៤៩,៦០៣គ្រួសារ ស្មើនឹង ១៨ម៉ឺន២,៦៧៣នាក់ នារី៨២,៤៨៨នាក់។ អ្នកកាន់កាប់ឯកសាររដ្ឋបាលកម្ពុជាមិនប្រក្រតី មានចំនួន២០,២១៨គ្រួសារ ស្មើនឹង ៧ម៉ឺន៣,៣៩៧នាក់ នារី ៣៥,៨៨៨នាក់។ គណៈកម្មការជំរឿន និងគ្រប់គ្រងជនបរទេសរាជធានី ខេត្ត ដកហូតឯកសារជនបរទេសបែបអន្តោប្រវេសន្តដែលកំពុងប្រើប្រាស់បានចំនួន ៣៧,៤៤១ច្បាប់ ស្មើនឹង ៩៤.៩៨ភាគរយ។ ឯកសារត្រូវបានដកហូតពី ២០,០៩៣គ្រួសារ ស្មើនឹង ៦៩,៨៧១នាក់ នារី ៣៣,៨៣៣នាក់។

ជនបរទេសដែលមិនបានដាក់ពាក្យសុំប្រកាសទទួលស្គាល់ជាជនបរទេសអន្តោប្រវេសន្តមានចំនួន ១៦,៨៦៨គ្រួសារ ស្មើនឹង ៧៩,៣០៧នាក់ នារី ៣២,៤០៤នាក់។ អាយុ ១៨ឆ្នាំឡើង ៥៣,៩០២នាក់ នារី ២០,២០១នាក់ ស្មើនឹង ៤២.៨២ភាគរយ។

ក្នុងនោះជនបរទេសដែលមិនបានដាក់ពាក្យសុំប័ណ្ណស្នាក់នៅអចិន្ត្រៃយ៍មានចំនួន ២ម៉ឺន១,០៣២គ្រួសារ ស្មើនឹង ៩៤,៥៦១នាក់ នារី ៤០,៣០៣នាក់ អាយុ ១៨ឆ្នាំឡើង ៦៣,៣៦២នាក់ នារី ២៤,៧៤៣នាក់ ស្មើនឹង ៥០.៣៣ភាគរយ៕

​ដោយ ៖​ មករា

ខេត្តព្រះសីហនុ ៖ កុងទឺន័រជាង៨០ទូដែលផ្ទុកកាកសំណល់នាំមកពី សហរដ្ឋអាមេរិក និងកាណាដា ត្រូវបានសមត្ថកិច្ចរក ញក្នុង កំពង់ផែក្រុងព្រះសីហនុ។ កុងទីន័រផ្ទុកសំរាមនេះ ត្រូវគេបិទស្លាក បន្លំជា ប្រភេទទំនិញកែច្នៃ នេះជាលើកដំបូងដែលកម្ពុជា បានរកឃើញទាន់ពេលវេលា។ កុងទឺន័រដែលផ្ទុកសំរាមនោះ មានចំនួន៨៣ទូ ដែល ផ្ទុកកាក់សំណល់សំរាម នាំមកពីសហរដ្ឋអាមេរិក និងកាណាដា។

បណ្តាប្រទេសមួយចំនួននៅប្រទេសអាស៊ី មុននេះ ត្រូវបានក្រុមប្រទេស អ្នកមានបានបញ្ជួនកាកសំរាមមកចាក់ចោលតាមទូរកុងតឺន័រ ក្រោមស្លាក បន្លំថា ជាទំនិញផ្សេងៗ ឬទំនិញកែច្នៃ ដូចជានៅប្រទេសហ្វីលីពីន, ម៉ាឡេស៊ី និងឥណ្ឌូណេស៊ី ជាដើម គឺជាប្រទេសដែលធ្លាប់បានទទួលទំនិញសំរាមដូចគ្នានេះផងដែរ នាវេលាឆ្នាំថ្មីៗកន្លងមក ប៉ុន្តែប្រទេសទាំងនោះ បានចាត់វិធានការណ៍បញ្ជួនសំរាមទាំងនោះ ត្រឡប់ទៅកាន់សាមីប្រទេសនោះវិញ។

សំរាមក្នុងកុងតឺន័រ ដែលកម្ពុជាបានរកឃើញនេះ នៅមិនទាន់មានវិធានការនឹងត្រូវបញ្ជួនទៅវិញ ឬនឹងត្រូវធ្វើអ្វីទៀតក្នុងជំហាន បន្ទាប់មកទៀតនោះឡើយ បុន្តែមន្ត្រីអ្នកនាំពាក្យក្រសួងបរិស្ថានលោក នេត ភក្ត្រា បានថ្លែងថា សមត្ថកិច្ចនឹងធ្វើការ កំណត់ថា តើទំនិញនោះ នាំមកពីប្រភពណា ហើយនឹងត្រូវបញ្ជួនទៅប្រភពដើមវិញនៅពេលណា ប៉ុន្តែត្រូវធ្វើការផាកពិន័យ លើក្រុមហ៊ុនដែលនាំចូលនោះ តាមច្បាប់ របស់កម្ពុជា៕

ខេត្តកណ្តាល ៖

សកម្មភាពដ៏គគ្រឹកគគ្រេងដែលគេសង្ស័យថា ជាករណីរំលោភដីបឹងរាប់រយហិកតា នៅក្នុងភូមិកំពង់ពោធិត្បូង ឃុំក្រាំងយ៉ូវ ស្រុកស្អាង ខេត្តកណ្តាល ដោយមនុស្សមួយក្រុមបានដាក់គ្រឿងចក្រជាច្រើនគ្រឿងជីកទំនប់ហ៊ុព័ទ្ធ ដោយកម្លាំងកម្មករបើកគ្រឿងចក្រធ្វើជីកទន្ទ្រានព្រៃធ្វើជាទំនប់ទាំងយប់ទាំងថ្ងៃ ។ សកម្មភាពនេះបានធ្វើជាច្រើនថ្ងៃមកហើយ ប៉ុន្តែលោកមេឃុំបដិសេធថា មិនបានដឹងរឿងនេះទេ។

លោក លន់ លាង មេឃុំក្រាំងយ៉ូវ បានប្រាប់កាលពីថ្ងៃទី១៤ ខែកក្កដា នេះថា លោកមិនបានដឹងរឿងនេះទេ លោកគ្រាន់តែបានដឹងមានករណីគ្រឿងចក្រធ្វើផ្លូវបានជីកចូលដីប្រជាពលរដ្ឋផ្សេងទៀត ហើយបានចាត់ឲ្យជំទប់ទី១ និងទី២ ចុះទៅឃាត់ហើយ និងបង្គាប់ឲ្យចាក់ដីលុបឲ្យប្រជាពលរដ្ឋវិញ ប៉ុន្តែរហូតមកដល់រសៀលថ្ងៃទី១៥ ខែកក្កដា នេះ គ្រឿងចក្រនៅតែបន្តធ្វើសកម្មភាពដូចសេចក្តីរាយការណ៍ដដែល។

ចំណែកលោក មត់ មាន ជំទី២ ឃុំក្រាំងយ៉ូវ បានបញ្ជាក់ពាក់ព័ន្ធនឹងករណីនេះ ថា លោកមិនបានទៅដល់ចំណុចគោលដៅនោះទេ លោកទៅមើលត្រឹមគ្រឿងចក្រកំពុងធ្វើផ្លូវ ។ លោកថា លោកជាប់រវល់ដើរស្រង់ស្ថិតិចំនួនសត្វជ្រូកកើតជំងឺប៉េស្តជ្រូកអាហ្វ្រិកនៅតាមភូមិ ។

គួរបញ្ជាក់ថា ពាក់ព័ន្ធនឹងករណីក្រុមឈ្មួញដាក់គ្រឿងចក្រជីកទំនប់ហ៊ុព័ទ្ធ ឈូសឆាយ កិនកម្ទេចព្រៃ ឬជីកយកអាចម៌ដីលក់ជាដើមនោះ អាជ្ញាធរខេត្តបានហាមដាច់ខាតមិនឲ្យធ្វើសកម្មភាពឡើយ ។ ប៉ុន្តែផ្ទុយទៅវិញ រយៈពេលក្នុងអំឡុងខែកក្កដា នេះ គេបានឃើញមានគ្រឿងចក្រ នៅតែបន្តធ្វើសកម្មភាពឈូសឆាយ កិនកម្ទេចព្រៃ ជីកទំនប់ហ៊ុព័ទ្ធរំលោភយកដីបឹង និង ជីកយកអាចម៌ដីបឹង ក្រោមលេសស្តារ និងបកដីបឹង លក់យ៉ាងអនាធិបតេយ្យ។ ជាក់ស្តែង ករណីស្រដៀងគ្នានេះ បានកើតមានជាច្រើនកន្លែង ដូចនៅចំណុចដីបឹងទួលព្រះហឹង ស្ថិតក្នុងឃុំពោធិបាន ស្រុកកោះធំ ចំណុចបឹងអន្លុងកុល ឬបឹងត្រពាំងឈូក ( តាមប្រជាពលរដ្ឋបានហៅ ) ស្ថិតក្នុងភូមិព្រែករាំង ឃុំទឹកវិល ស្រុកស្អាង ចំណុចបឹងព្រា ស្ថិតក្នុងឃុំព្រែកលួង ស្រុកខ្សាច់កណ្តាលជាដើម ។ ចំណែកអាជ្ញាធរថ្នាក់ក្រោម បានត្រឹមតែប្រាប់ថា ចាំឲ្យគេចុះទៅមើល និងមានចំណាត់ការ ប៉ុន្តែផ្ទុយទៅវិញ គ្រឿងចក្រនៅតែបន្តធ្វើសកម្មភាពរុករានទន្ទ្រានរំលោភដីបឹង ព្រៃលោចទឹក ជារបស់ រដ្ឋ ដែលធ្វើឲ្យប្រជាពលរដ្ឋអស់ជំនឿទាំងស្រុងលើអាជ្ញាធរដែនដី និងសមត្ថកិច្ចពាក់ព័ន្ធ៕

​ដោយ ៖ សុត្ថារ៉ា

ភ្នំពេញ ៖ ព្រះសង្ឃគ្រប់ឋានានុក្រម រួមនឹងប្រជាពុទ្ធបរិស័ទខ្មែរ បានសម្តែងនូវមនោសញ្ចេតនាយ៉ាង ជ្រាលជ្រៅ អបអរសាទរចំពោះសម្តេចព្រះវនរ័ត ណយ ច្រឹក ព្រះសង្ឃនាយករងទី៣ អនុប្រធានទី១ ថេរៈសភាព្រះពុទ្ធសាសនា នៃព្រះរាជាណាចក្រកម្ពុជា ដែលជាព្រះចៅអធិការវត្តច័ន្ទបុរីវង្ស រាជធានីភ្នំពេញ ដែលសម្តេចទទួលបានពានរង្វាន់មេដាយឥស្សរជនឆ្នើមលំដាប់ពិភពលោកផ្នែកចិត្តវិញ្ញាណ កំពូលប្រចាំឆ្នាំ២០១៩ ពីវេទិកានៃកិច្ចប្រជុំស្តីពីនិរន្តរភាពនៃមនុស្សធម៌ ឆ្ពោះទៅកាន់របៀបវារៈឆ្នាំ ២០៣០ របស់អង្គការសហប្រជាជាតិ ដែលបានប្រព្រឹត្តទៅនៅការិយាល័យអង្គការសហប្រជាជាតិ ទីក្រុងហ្សឺណែវ ប្រទេសស៊្វីស ពីថ្ងៃទី១១ ដល់ថ្ងៃទី១២ ខែកក្កដា ឆ្នាំ២០១៩ កន្លងទៅ។

មានថេរៈដីកាប្រាប់អ្នកសារព័ត៍មាននៅអាកាសយានដ្ឋានអន្តរជាតិភ្នំពេញ ក្រោយពីនិវត្តន៍ពី ទីក្រុងហ្សឺណែវ នារសៀលថ្ងៃច័ន្ទម្សិលមិញសម្តេចព្រះវនរ័ត ណយ ច្រឹក ឱ្យដឹងថា ម្ចាស់ក្សត្រី ម៉ារៀ អាម៉ូ ថូរ៉េស ប្រធានអង្គការ We Care For Humanity បាននិមន្តសម្តេចឱ្យទៅចូលរួមកិច្ចប្រជុំស្តីពី និរន្តរភាពនៃមនុស្សធម៌ ឆ្ពោះទៅកាន់របៀបវារៈឆ្នាំ២០៣០ របស់អង្គការសហប្រជាជាតិ នៅការិយាល័យអង្គការសហប្រជាជាតិ ទីក្រុងហ្សឺណែវ ប្រទេសស៊្វីស ដោយកិច្ចប្រជុំនេះមានការចូលរួមពីឥស្សរ ជនសំខាន់ៗ ទាំងផ្នែកអាណាចក្រ និងខាងផ្នែកសាសនា មកពីជាង ១០ប្រទេស ហើយក្រោយកិច្ច ប្រជុំនេះបានបិទបញ្ចប់ សម្តេចផ្ទាល់ក៏ទទួលបានពានរង្វាន់មេដាយឥស្សរជនឆ្នើមលំដាប់ពិភពលោក ផ្នែកចិត្តវិញ្ញាណកំពូលប្រចាំឆ្នាំ២០១៩ ដែលបានប្រគល់ដោយរដ្ឋមន្ត្រីការបរទេសនៃប្រទេសវ៉ាណូទូ។

សម្តេចព្រះវនរ័ត ណយ ច្រឹក ឱ្យដឹងផងដែរថា នៅក្នុងកិច្ចប្រជុំនេះ សម្តេចត្រូវបានអង្គប្រជុំ និមន្តឱ្យថ្លែងនូវសុន្ទរកថា និងធ្វើជាវាគ្មិនកិត្តិយសឆ្លើយដោះស្រាយនូវសំណួរមួយចំនួនដែលទាក់ទង ទៅនឹងជំនឿ និងសាសនា ក្នុងការដោះស្រាយបញ្ហាសង្គមមានដូចជាបញ្ហាស្ត្រី សង្គ្រាម និងសន្តិភាព សន្តិសុខ ការដោះស្រាយអំពើហិង្សា និងថាតើសម្តេចមានតួនាទីយ៉ាងដូចម្តេច ក្នុងការចូលរួមកាត់ បន្ថយភាពក្រីក្រនៅកម្ពុជា ដើម្បីចូលរួមសម្រេចឱ្យបានជោគជ័យនូវរបៀបវារៈអភិវឌ្ឍប្រកបដោយចីរភាព ឆ្នាំ២០៣០ របស់អង្គការសហប្រជាជាតិជាដើម៕

ដោយ ៖ សុផល

ខេត្តសៀមរាប ៖ រថយន្តទេសចរណ៍ ដឹកអ្នកដំណើរពីភ្នំពេញមកលេងភ្នំគូលែន ក្រឡាប់ បណ្តាលអោយមនុស្ស១២នាក់ រងរបួសធ្ងន់និងស្រាល ក្នុងចំណោមអ្នកដំណើរ២៨ នាក់ខណ: ចុះ ពីលើ ភ្នំ វិញ ជាន់ហ្វ្រាំងមិនស៊ី ហេតុការណ៍នេះកើតឡើងនៅត្រង់ផ្លូវចុះពីលើ ភ្នំ គូ លែនថ្មី ផ្នែកខាងកើត ស្ថិតនៅ ភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប កាលពីរ សៀ ល ថ្ងៃទី ១៥ ខែកក្កដា ឆ្នាំ២០១៩។

លោក វរសេនីយ៍ឯក ស៊ុន អេង អធិការនគរបាលស្រុកស្វាយលើ បានឱ្យដឹងថា ក្នុងហេតុការណ៍នោះបង្កឡើងដោយខ្លួនឯង រថយន្តម៉ាក HYUNDAICOUNTYពាក់ស្លាកលេខភ្នំពេញ3E-6998 ។

អ្នកបើកបរឈ្មោះ កែវ មករា អាយុ ២៨ ឆ្នាំ រស់នៅខេត្តកណ្តាល អ្នករួមដំណើរសរុប ២៨ នាក់ ។

លោក បន្តថា អ្នករងរបួស សរុប ១២ នាក់ ស្រី ៩ នាក់ រួមមាន
១.ឈ្មោះ កែម សីហា ភេទប្រុសអាយុ៣០ឆ្នាំ
២.ឈ្មោះ សុ ត សំអុន ភេទស្រីអាយុ៤៣ឆ្នាំ
៣.ឈ្មោះ ផាត សោភា ភេទស្រីអាយុ៤៨ឆ្នាំ
៤.ឈ្មោះ ងួន សារ៉ាន់ ភេទស្រីអាយុ៥៧ឆ្នាំ
៥.ឈ្មោះ ងួន សុគុណ ភេទស្រីអាយុ៥៧ឆ្នាំ
៦.ឈ្មោះ ពេជ្រ ច័ន្ទបូរមី ភេទស្រីអាយុ១១ឆ្នាំ
៧.ឈ្មោះ សុខ សុវណ្ណ រ៉ា ភេទប្រុស អាយុ៣៨ឆ្នាំ
៨.ឈ្មោះ ហួន សុគន្ធា រី ភេទ ស្រី អាយុ ៤៣ ឆ្នាំ
៩.ឈ្មោះ ប៉េ ន សុហាន ភេទប្រុសអាយុ៤១ឆ្នាំ
១០.ឈ្មោះ លឿង គឹមសៀង ភេទស្រីអាយុ៣៨ឆ្នាំ
១១.ឈ្មោះ គីម ចំរើន ភេទស្រីអាយុ៤៦ឆ្នាំ
១២.ឈ្មោះ ប៉ុក សុគុណ ភេទស្រី អាយុ៤៧ឆ្នាំ។

លោកបាន បញ្ជាក់ថា បច្ចុប្បន្ន អ្នករងរបួស ទាំងអស់ បាន ដឹក ទៅពិនិត្យ នៅ មន្ទីរពេទ្យបង្អែក ស្រុក សូទ្រនិគម ចំពោះ រថយន្ត សមត្ថកិច្ច បាន យកមក រក្សាទុក នៅ អធិការដ្ឋាន នគរបាល ស្រុក ដើម្បី ដោះស្រាយ តាម នីតិវិធី ៕

​ដោយ ៖ សុផល

ខេត្តកំពង់ចាម ៖ ស្ថិតក្នុងដំណើរអញ្ជើញចុះ ជួប សំណេះសំណាល ជាមួយ នឹង មន្ត្រី រាជការ នៃ ស្រុក កោះសូទិន និងស្រុកស្រីសន្ធរ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម រួមនិងមន្ត្រី ពាក់ព័ន្ធ បានចុះពិនិត្យស្ថានភាពសាងសង់ផ្លូវកៅស៊ូ ១ខ្សែ និងផ្លូវបេតុងជាច្រើនគីឡូម៉ែត្រ តភ្ជាប់ពីស្រុកកោះសូទិន ទៅស្រុកស្រីសន្ធរ ខេត្តកំពង់ចាម ខណៈ ដែល ប្រជាពលរដ្ឋបានសំដែងនូវទឹកចិត្តត្រេកអរ និងថ្លែងអំណរគុណជាអនេកចំពោះអាជ្ញាធរគ្រប់លំដាប់ថ្នាក់ អង្គភាពពាក់ព័ន្ធ ក៏ដូចសប្បុរសជន ជាពិសេសរាជរដ្ឋាភិបាលកម្ពុជា ដែលបានផ្តល់ជាផ្លូវជាច្រើនគីឡូម៉ែត្រ ជូនដល់ពួកគាត់ងាយស្រួលក្នុងការធ្វើដំណើរ។

ដោយការស្ថាបនាផ្លូវក្រាលកៅស៊ូ ប្រភេទ DBST ១ខ្សែ ដែលមានមានប្រវែង ៣.២០០ម៉ែត្រ ទទឹង ៨ម៉ែត្រ តភ្ជាប់ពីចំណុច ឃុំមហាខ្ញូង និងឃុំព្រែកតានង់ នៃស្រុកកោះសូទិន ឆ្ពោះទៅកាន់ស្រុកស្រីសន្ធរ ដោយសម្រេចលទ្ធផលបានប្រមាណជា ៦០% ហើយ ។

ចំណែកផ្លូវបេតុង ១ខ្សែ ជាអំណោយដ៏ថ្លៃថ្លា របស់សម្តេចតេជោ ហ៊ុន សែន និងសម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន ផ្តល់ជូនប្រជាពលរដ្ឋក្នុងស្រុកស្រីសន្ធរ តាមរយៈក្រុមហ៊ុន ប៉េងហួត ដែល រហូតមកដល់ពេលនេះគឺ ចាក់បេតុងទាំងសងខាងផ្លូវសម្រេចបានប្រវែង ១៣គីឡូម៉ែត្រ និងចាក់មួយចំហៀងបានប្រវែង ១៤គីឡូម៉ែត្រ។

បើទោះបីជាសមិទ្ធផល ដែលកំពុងតែដំណើរការស្ថាបនាក៏ដោយ ក៏បងប្អូនប្រជាពលរដ្ឋ សម្ដែងនូវសេចក្ដីរីរាយជាខ្លាំង ក៏ព្រោះតែមកដល់ពេលនេះ ពួកគាត់មិននឹកស្មានថា ទទួលបានផ្លូវកៅស៊ូ និងផ្លូវបេតុងដ៏ប្រណីតយ៉ាងដូច្នេះឡើយ ។

គួរបញ្ជាក់ថាក្នុងដំណើរចុះពិនិត្យស្ថានភាពផ្លូវខាងលើនេះដែរ លោក អ៊ុន ចាន់ដា អភិបាលខេត្តកំពង់ចាម ក៏បានអញ្ជើញចូលសំណេះសំណាលជាមួយមន្ត្រីរាជការ និងអជ្ញាធរមានសមត្ថកិច្ច ក្នុងស្រុកកោះសូទិន និងស្រុកស្រីសន្ធរ ដោយក្នុងនោះ លោកក៏បានផ្តាំផ្ញើទៅដល់មន្ត្រីរាជការ និងអាជ្ញាធរមានសមត្ថកិច្ចទាំងអស់ ក្នុងនាមជាអ្នកបម្រើរាស្ត្រពិតប្រាកដ និងជាប្រតិបត្តករ គឺត្រូវខិតខំបម្រើសេវាសាធារណៈ និងសេវារដ្ឋបាល ជូនប្រជាពលរដ្ឋឲ្យបានលឿន និងមានប្រសិទ្ធភាព ហើយត្រូវដោះស្រាយ រាល់បញ្ហា និងក្តីកង្វល់ជូនប្រជាពលរដ្ឋឲ្យបានលឿនបំផុត។

ជាងនេះទៅទៀតលោកអភិបាលខេត្ត ក៏បានជំរុញ និងលើកទឹកចិត្តទៅដល់រដ្ឋបាលស្រុកទាំងពីរខាងលើ ត្រូវយកចិត្តទុកដាក់ចំពោះបញ្ហាការគ្រប់គ្រងមន្ត្រីរាជការ បញ្ហាប្រឈមដោយការបាក់ច្រាំងទន្លេ និងបញ្ហាដីធ្លី ដែក្នុងនោះលោកមេភូមិ លោកមេឃុំ ត្រូវពិនិត្យឯកសារឲ្យបានត្រឹមត្រូវ មុននឹងស៊ីញ៉េទៅលើឯកសារណាមួយ៕

ភ្នំពេញ ៖ លោកបណ្ឌិត Henry C. Theriault ប្រធានអង្គសន្និសីទអន្តរជាតិនៃអ្នកស្រាវជ្រាវជាន់ខ្ពស់ពីអំពើប្រល័យពូជសាសន៍បានសម្តែង “ភាពខ្មាស់អៀននិងសូមអភ័យទោសដល់ពលរដ្ឋខ្មែរចំពោះការទម្លាក់គ្រាប់បែករបស់សហដ្ឋអាមេរិកមកលើប្រទេសកម្ពុជា” ចាប់ពីឆ្នាំ១៩៦៩ ដល់ដើមទសវត្សរ៍៧០។

លោកបណ្ឌិត Henry ជនជាតិអាមេរិក និងជាប្រធានសមាគមអន្តរជាតិនៃអ្នកស្រាវជ្រាវជាន់ខ្ពស់ពីអំពើប្រល័យពូជសាសន៍បានមានប្រសាសន៍បែបនេះរហូតដល់ទៅពីរដងក្រោយពីមកដល់ទីក្រុងភ្នំពេញតែប៉ុន្មានម៉ោងប៉ុណ្ណោះ ប៉ុន្តែក្នុងនាមជាពលរដ្ឋអាមេរិកមួយរូបមិនតំណាងឱ្យអង្គសន្និសីទទាំងមូលឬរដ្ឋាភិបាលអាមេរិកនោះទេ។

សហរដ្ឋអាមេរិកបានទម្លាក់គ្រាប់បែកចំនួន២.៧ លានតោនមកលើប្រទេសកម្ពុជាលើសពីចំនួនគ្រាប់បែកដែលបានទម្លាក់នៅជប៉ុនក្នុងអំឡុងសង្គ្រាមលោកលើកទី២ (រួមទាំងនៅហ៊ីរ៉ូស៊ីម៉ា និងណាហ្គាសាគី) ជិតមួយលានតោន។ ក្នុងអំឡុងពេលបួនឆ្នាំ (១៩៦៩ ដល់១៩៧៣) ប្រជាពលរដ្ឋខ្មែរ ប្រហែល៣០ភាគរយនៅទូទាំងប្រទេសត្រូវបានផ្លាស់ទីលំនៅដើម្បីគេចចេញពីវិនាសកម្មការទម្លាក់គ្រាប់បែករបស់អាមេរិក។

នៅឯពិធីបើកអង្គសន្និសីទអន្តរជាតិនៅទីក្រុងភ្នំពេញ កាលពីល្ងាចថ្ងៃអាទិត្យម្សិលមិញ ហើយដែលមានអ្នកស្រាវជ្រាវជាន់ខ្ពស់ជិត៥០០នាក់ មកពីទូទាំងពិភពលោកបានចូលរួម លោកបណ្ឌិត Henry ក្រៅពីសុំទោសពលរដ្ឋខ្មែររឿងអតីតកាល ក៏បានធ្វើការចាប់អារម្មណ៍ផងដែរពីទុក្ខលំបាកនិងសោកនាដកម្មនានាដែលកើតចេញពីរបបប្រល័យពូជសាសន៍។

អំពើប្រល័យពូជសាសន៍នៅកម្ពុជា គឺជាប្រធានបទមួយក្នុងចំណោមប្រធានបទជាច្រើនដែលត្រូវលើកមកពិភាក្សា ក្នុងនោះរួមមាន សេរ៉ាឡេអន រ៉ូវ៉ាន់ដា និងឥទ្ធិពលរបស់សហគមអឺរ៉ុបកាលពីអតីតកាលទៅលើប្រទេសប៊ុលហ្គារីនិងស៊ែកប៊ី ជាដើម។

ការរៀបចំសន្និសីទអន្តរជាតិរយៈពេល៤ថ្ងៃចាប់ពីថ្ងៃទី១៤ដល់១៧ ខែកក្កដាឆ្នាំ២០១៩ របស់ក្រុមអ្នកស្រាវជ្រាវជាន់ខ្ពស់ជិត៥០០នាក់មកពីទូទាំងពិភពលោកពេលនេះបានឆ្លុះបញ្ចាំងពីលំហូរនៃសេរីភាពការបញ្ចេញមតិដ៏ទូលំទូលាយនៅប្រទេសកម្ពុជានិងជាការឆ្លុះបញ្ចាំងពីភាពរីកចម្រើន ពីវិសាលភាព និងពីគុណភាពអប់រំដែលគេស្ទើរពុំជឿមុនពេលមកដល់ទឹកដីកម្ពុជា។

លោកបណ្ឌិត Kenneth Dunn ប្រធានសាកលវិទ្យាល័យអាមេរិកាំងភ្នំពេញ បានថ្លែងថា «កាលពី៤០ឆ្នាំមុន កម្ពុជាជាកន្លែងដែលត្រូវបានបំផ្លិចបំផ្លាញស្ទើរគ្មានសល់។ ថ្ងៃនេះ យើងសូមស្វាគមន៍អ្នក ក្នុងនាមជាប្រទេសកម្ពុជាថ្មី ដែលបានក្លាយជាគំរូមួយអំពីរបៀបដែលប្រទេសមួយនេះ អាចកសាងលើគំនរផេះផង់កាលពីអតីតកាលដ៏សោកសៅ ដើម្បអនាគតថ្មីប្រកបដោយសុទិដ្ឋិនិយម»។

សន្និសីទនេះ ត្រូវបានប្រព្រឹត្តទៅនៅសាកលវិទ្យាល័យអាមេរិកាំងភ្នំពេញ (AUPP) ជាម្ចាស់ផ្ទះសហការរួមគ្នាជាមួយសាកលវិទ្យាល័យ Rutgers University មកពីសហរដ្ឋអាមេរិក។

សមាគមអន្តរជាតិនៃអ្នកស្រាវជ្រាវជាន់ខ្ពស់ ស្តីពីអំពើប្រល័យពូជសាសន៍ បង្កើតឡើងក្នុងឆ្នាំ១៩៩៤ គឺជាអង្គការអន្តរជាតិដែលមិនប្រកាន់និន្នាការនយោបាយ ហើយបង្កើតឡើងក្នុងគោលបំណងស្វែងរកការស្រាវជ្រាវបន្ថែមលើផលវិបាកនៃអំពើប្រល័យពូជសាសន៍ ព្រមទាំងដើម្បីជំរុញការសិក្សាគោលនយោបាយស្តីពីការទប់ស្កាត់អំពើប្រល័យពូជសាសន៍៕

ភ្នំពេញ : ក្រោយពីមានហេតុការណ៍អគ្គីភ័យឆេះផ្ទះមួយខ្នងបណ្តាលអោយស្ត្រីជាប្រពន្ធស្លាប់នៅក្នុងផ្ទះ ចំណែកបុរសជាប្តីគ្រាន់តែរងរបួសត្រូវបានក្រុមគ្រួសារបញ្ជូនទៅសង្គ្រោះនៅឯមន្ទីរពេទ្យភ្នំពេញ សមត្ថកិច្ច ក៏បានដាក់ការសង្ស័យលើករណីនេះ ។

មូលហេតុដែលសមត្ថកិច្ចបានដាក់ការសង្ស័យនេះ ដោយសារបុរសជាប្តីត្រូវបានគេសង្ស័យថា បានបើកទ្វារចាកចេញពីផ្ទះដោយមិនបានស្រែកហៅឲ្យអ្នកជិតខាងជួយ ក្នុងខណៈដែលភ្លើងកំពុងឆាបឆេះ ។ នេះបើយោងតាមប្រភពព័ត៌មានពីប្រជាពលរដ្ឋ នៅកន្លែងកើតហេតុ ។

ប្រភពបានបន្តទៀតថា នៅពេលដែលភ្លើងកំពុងឆាបឆេះផ្ទះយ៉ាងសន្ធរសន្ធៅនោះប្រជាពលរដ្ឋក៏បានផ្អើលឆោរឡោឡើងនាំគ្នាខ្លះដងទឹកជះ និង ខ្លះទៀតបានរាយទុយោបាញ់ទឹកពន្លត់អគ្គីភ័យដែលកំពុងឆាបឆេះនោះ ។ មុនដំបូងអ្នកស្រុកបានសន្និដ្ឋានក្រុមគ្រួសារប្តីប្រពន្ធនិងកូនស្រីពីរនាក់ដែលកូនច្បងអាយុ 8 ឆ្នាំ និង ប្អូនមានអាយុទើបតែ 4 ខែកន្លះ អាចស្លាប់នៅក្នុងភ្នក់ភ្លើង ប៉ុន្តែលុះក្រោយពេលដែលពន្លត់ភ្លើងរលត់ហើយ អ្នកស្រុកបានប្រទះឃើញតែសពម្តាយ ចំណែកក្មេងស្រីទាំងពីរ និង ប្តីមិនបានឃើញនោះឡើយ ។  ក្រោយមកក៏បានដឹងដំណឹងថា បុរសជាប្តីក៏រងរបួសដែរ ដោយសារភ្លើងឆេះ ហើយត្រូវបានសាច់ញាតិបងប្អូនបញ្ជូនទៅព្យាបាលនៅមន្ទីរពេទ្យភ្នំពេញ ។ ស្នាមរបួសនៅលើខ្លួនប្រាណបុរសជាប្តីត្រូវបានគេពិនិត្យឃើញមានរបួសនៅលើដៃទាំងពីរនិងសាច់ទ្រូង ។ ជាងនេះទៅទៀត រឿងដែលកាន់តែធ្វើឲ្យសមត្ថកិច្ចដាក់ការសង្ស័យនោះ ត្រង់ចំណុចសពស្ត្រីរងគ្រោះមានស្នាមឆេះសក់ក្បាលអស់មួយចំហៀងនិងសាច់ក្បាលពោះ ដៃជើងនៅត្រង់មានសភាពដូចមនុស្សដេកលក់ ហើយមានខោអាវជាច្រើននៅលើសពគ្របត្រឹមចង្កេះរហូតដល់ក្បាល ដូចមិនសាកសមនឹងសភាពមនុស្សរស់ត្រូវបានភ្លើងឆាបឆេះរហូតដល់ស្លាប់ឡើយ ។

ក្នុងករណីនេះដែរគេបានប្រទះឃើញម៉ូតូម៉ាក Wave ពណ៌ប្រផេះដែលជារបស់ម្ចាស់ផ្ទះមានស្នាមកាត់ផ្តាច់ទុយយោប្រេងសាំង ។ ចំណែកប្រេងសាំងត្រូវបានបង្ហូរចេញអស់ពីធុងសាំងម៉ូតូ ។

គួរបញ្ជាក់ថា ហេតុការណ៍នេះបានកើតឡើងកាល ពីវេលាម៉ោងជាង២រំលងអធ្រាតថ្ងៃទី១៤ ខែកក្កដា ឆ្នាំ២០១៩ នៅចំណុចភូមិពោធិក្រោម ឃុំត្រើយស្លា ស្រុកស្អាង ខេត្តកណ្តាល ។

ជនរងគ្រោះជាប្រពន្ធឈ្មោះ ហាន ស្រីមុំ ភេទស្រី អាយុ៣៣ឆ្នាំ (ស្លាប់នៅកន្លែងកើតហេតុ និងមានកូនស្រីចំនួន២នាក់ ទី១ អាយុ៨ឆ្នាំ និងទី២ អាយុ៤ខែកន្លះ) រីឯបុរសជាប្តីឈ្មោះ វ៉េង វិរះ អាយុ៣០ឆ្នាំ (រងរបួស) ។

ក្រោយកើតហេតុគេឃើញនគរបាលជំនាញស្រុក ខេត្ត សហការជាមួយនគរបាលក្រសួងមហាផ្ទៃ បានចុះស្រាវជ្រាវ និង ពិនិត្យសាកសពមួយថ្ងៃពេញ តាំងពីព្រឹករហូតដល់ល្ងាច ប៉ុន្តែ មិនទាន់បានទទួលលទ្ធផលថា សាកសពស្លាប់ដោយសារមូលហេតុអ្វីនោះឡើយ រួចក៏បន្តដឹកសាកសពយកទៅក្លាស្សេនៅវត្តស្ទឹង មានជ័យ នៅឯភ្នំពេញដើម្បីអោយជំនាញពិនិត្យបន្ត។

ប្រជាពលរដ្ឋដែលជាអ្នកជិតខាងក៏បានបន្ថែមទៀតថា ការស្លាប់របស់ស្ត្រីរងគ្រោះពួកគាត់ហាក់បីដូចជាមិនអស់ចិត្តសោះ ព្រោះថានៅពេលដែលហេតុការណ៍កំពុងតែកើតឡើង ហើយពួកគាត់បានចូលទៅជួយសង្គ្រោះ បែរជាមិនឃើញបុរសជាប្តីនោះទេ ឃើញតែសាកសពប្រពន្ធដេកស្លាប់តែម្នាក់ឯង នៅក្នុងបន្ទប់ឡៅតឿ  ហើយបុរសជាប្តីបើកទ្វារចេញទៅបាត់ ដោយមិនហៅញាតិមិត្តជិតខាងអោយជួយពន្លត់អគ្គីភ័យ ។ បច្ចុប្បន្នសពស្ត្រីរងគ្រោះត្រូវបានសមត្ថកិច្ចបញ្ជូនមកដល់ស្នងការដ្ឋាននគរបាលខេត្តកណ្តាលវិញហើយ បន្ទាប់ពីនគរបាលជំនាញនៅក្រសួងមហាផ្ទៃបាននាំយកទៅពិនិត្យស្រាវជ្រាវកាលពីល្ងាចម្សិលមិញនេះ ។ នេះបើយោងតាមប្រភពព័ត៌មានពីសមត្ថកិច្ចបានឲ្យដឹងនៅម៉ោងប្រមាណជិត១២ថ្ងៃត្រង់មុននេះបន្តិច ។ សាច់ញាតិបងប្អូនសពស្ត្រីរងគ្រោះនិងប្រជាពលរដ្ឋកំពុងទន្ទឹងរង់ចាំលទ្ធផលរបស់សមត្ថកិច្ច ៕

ភ្នំពេញ ៖ មនុស្សម្នាក់ស្លាប់ និងម្នាក់ទៀតរងរបួសធ្ងន់ធ្ងរ គៀបជាប់ក្នុងកាប៊ីនរថយន្តតែម្តង បន្ទាប់ពីជួបនូវឧប្បត្តិហេតុ គ្រោះថ្នាក់ចរាចរណ៍ រវាងរថយន្តកូរ៉េឃ្លប់ដឹកទឹកសុទ្ធក្រុមហ៊ុន ជីង ឡុង បើកបោះពួយថយន្តដឹកដីបុករថយន្តដឹកទឹកសុទ្ធស្លាប់ម្នាក់ របួសធ្ងន់  ឈ្នះ ភូមស្រែតេជៈ សង្កាត់សំរោងក្រោម ខណ្ឌពោធិសែនជ័យ ។

តាមប្រភពនៅកន្លែងកើតហេតុបានឲ្យដឹង មុនកើតហេតុ រថយន្តកូរ៉េ ឃ្លប់ ម៉ាកហុីយ៉ាន់ដាយ ពណ៌ស ពាក់ស្លាកលេខ ភ្នំពេញ 3E-4116 ដឹកទឹកសុទ្ធ នៅសង្កាត់ឃ្មួញ ខណ្ឌសែនសុខ ជិះគ្នា២នាក់ បើកបរដោយយុវជនម្នាក់ ជាអ្នកបម្រើការការងារ ក្រុមហ៊ុនទឹកសុទ្ធ បានស្លាប់គៀបជាប់ក្នុងកាប៊ីន រួមដំណើរដោយឈ្មោះ ឡេង សុវណ្ណតុង ភេទប្រុស អាយុ១៩ឆ្នាំ មុខរបរ ក្រុមហ៊ុនទឹកសុទ្ធ ជីង ឡុង មានទីលំនៅ ភូមិបន្លស្អិត សង្កាត់ឃ្មួញ ខណ្ឌសែនសុខ រងរបួសជើងឆ្វេង ។ រថយន្តខាងលើ បើកក្នុងល្បឿនលឿនពីជើងទៅត្បូង លុដល់ចំណុចកើតហេតុ បានបុកពីទទឹងរថយន្ត កូរ៉េ ម៉ាកហុីយ៉ាន់ដាយ ពណ៌ស ពាក់ស្លាកលេខ ភ្នំពេញ 3E-6687 សណ្តោយទ្រុងបែនដឹកដី អ្នកបើកបរ រត់គេចបាត់ក្រោយកើតហតុភ្លាមៗ ដែលបើកចេញពីផ្លូវបេតុងវត្តភ្នៀត ឆ្លងកាត់ទទឹងមហាវិថីឈ្នះ ឈ្នះ បណ្តាលឲ្យ រថយន្តដឹកទឹកសុទ្ធ ខ្ទេចរួញកាប៊ីន ជាប់ជនរងគ្រោះ ត្រូវបាន ក្រុមសង្គ្រោះ របស់អង្គភាព៧១១ កងពលតូចលេខ៧០ បញ្ជូនរថយន្ត សម្ភារៈ ឧបករណ៍ កាត់ វះ ទាញយកជនរងគ្រោះចេញ ដឹកបញ្ជូនទៅមន្ទីរពេទ្យព្រះកុសុមៈ និងទាញយកសាកសពជនរងគ្រោះម្នាក់ទៀត ដើម្បីប្រគល់ជូនសមត្ថកិច្ច បន្តការងារពិនិត្យតាមនីតិវិធី ។

ករណីគ្រោះថ្នាក់ចរាចរណ៍ខាងលើ មនុស្សម្នាក់បានស្លាប់ក្នុងហេតុការណ៍ និងម្នាក់ទៀតរងរបួសធ្ងន់ធ្ងរ រថយន្តមួយគ្រឿងរងខូចខាតខ្ទេចកាប៊ីន ហើយត្រូវបាន សមត្ថកិច្ចជំនាញ ចុះទៅពិនិត្យ វាស់វែងរួចយកទៅរក្សាទុកនៅការិយាល័យចរាចរណ៍ជើងគោក ស្នងការក្រុង កសាងសំណុំរឿងតាមនីតិវិធី ៕

ខេត្តកំពង់ស្ពឺ ៖ យ៉ាងហោចណាស់ក៏មានមនុស្សជិត៣០នាក់ រងរបួសធ្ងន់ស្រាលត្រូវបានរថយន្តសាមុយដឹកយកទៅសង្គ្រោះនៅគ្លីនិកឯកជននិងតាមបណ្តាលមណ្ឌលសុខភាពមួយចំនួនខណៈដែលរថយន្តដឹកមនុស្សក្រឡាប់ដោយសារដាច់ហ្វាំងកាលពីវេលាម៉ោង០៣និង៣០នាទីរសៀលថ្ងៃទី១៤ ខែកក្កដា ឆ្នាំ២០១៩នៅលើកំណាត់ផ្លូវជាតិលេខ៤១ក្នុងភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ។

នគរបាលស្រុកបាននិយាយអោយដឹងថា មានករណីគ្រោះថ្នាក់ចរាចរណ៍ រថយន្តដាច់ហ្វ្រាំងក្រឡាប់ខ្លួនឯងនៅចំណុចផ្លូវចូលប្រាសាទមាសប្រាសាទប្រាក់ ស្ថិតនៅក្នុងភូមិស្រង់ ឃុំស្រង់ ស្រុកគងពិសី ។ រថយន្តម៉ាកហ៊ីយ៉ាន់ដាយពណ៌ស ពាក់ស្លាកលេខតាកែវ3A-3441 បើកបរដោយឈ្មោះ ឯម សលភេទប្រុស អាយុ ៣២ឆ្នាំ នៅភូមិអង្គរាំង ឃុំត្រាញ់ខាងជើង ស្រុកសំរោង ខេត្តតាកែវ នៅមុនពេលកើតហេតុបានបើកតាមបណ្តោយផ្លូវជាតិលេខ៤១ក្នុងទិសដៅពីទិសខាងជើងទៅទិសខាងត្បូងលុះពេលធ្វើដំណើរមកដល់ចំណុចកើតហេតុខាងលើដាច់ហ្វាំង បណ្តាលឲ្យរបួសមនុស្ស ២៧នាក់ ស្រី ២០នាក់ របួសធ្ងន់ ១៤នាក់ ស្រី​ ១២នាក់ ស្រាល ១៣នាក់ ស្រី ០៨នាក់ផងដែរ។

ក្រោយពីគ្រោះថ្នាក់ដោយខ្លួនឯងរួចមកនគរបាលស្រុកបានហៅរថយន្តសាមុយដឹកយកទៅសង្គ្រោះតាមមណ្ឌលសុខភាពនិងគ្លីនិកឯកជនក្បែរកន្លែងកើតហេតុ។ចំពោះរថយន្តនគរបាលយកទៅរក្សាទុកនៅអធិការដ្ឋាននគរបាលស្រុករង់ចាំធ្វើការដោះស្រាយនៅពេលក្រោយ៕