ភ្នំពេញ ៖ នាយឧត្តមសេនីយ៍ ឈុំ សុជាត អនុរដ្ឋលេខាធិការ និងជាអ្នកនាំពាក្យក្រសួងការពារជាតិ នៅព្រឹកថ្ងៃទី២៦ ខែកក្កដា នេះ បានដឹកនាំអ្នកសារព័ត៌មានទៅពិនិត្យមើលមូលដ្ឋានកងទ័ពជើងទឹករាម ក្នុងខេត្តព្រះសីហនុ បន្ទាប់ពីមានការចោទថា កម្ពុជាអនុញ្ញាតឱ្យចិន សាងសង់មូលដ្ឋានទ័ពនៅទីនោះ។

ដូចការគ្រោងទុក នៅព្រឹកនេះ អ្នកនាំពាក្យ អ្នកសារព័ត៌មានជាតិ និងអន្តរជាតិសរុប៧៣នាក់ បានធ្វើដំណើរចុះពិនិត្យមើលទីតាំងមូលដ្ឋានកងទ័ពជើងទឹករាម នៅខេត្តព្រះសីហនុ ដើម្បីស្វែងរកការពិត។ តាមការកត់សម្គាល់ ក្រៅពីសារព័ត៌មាន Fresh News និងប្រព័ន្ធផ្សព្វផ្សាយសំខាន់ៗនៅក្នុងប្រទេសកម្ពុជា តំណាងស្ថាប័នព័ត៌មានបរទេសមួយចំនួនទៀត ដែលនឹងចូលរួមពិនិត្យមើលមូលដ្ឋានកងទ័ពជើងទឹករាមនេះ មានដូចជា AP, Reuters, VOA, Cambodia China Times, AFP, Xinhua, Cambodia China Friendship Radio និង Japanese TV ជាដើម។

គួររំលឹកថា គម្រោងដឹកនាំអ្នកកាសែតទៅមើលមូលដ្ឋានកងទ័ពជើងទឹករាមនេះ បន្ទាប់ពីសារព័ត៌មាន មួយរបស់សហរដ្ឋអាម៉េរិកឈ្មោះ the Wall Street Journal បានចុះផ្សាយថា កម្ពជា បានចុះកិច្ចព្រមព្រៀងជាសម្ងាត់ជាមួយរដ្ឋាភិបាលចិន កាលពីប៉ុន្មានខែមុននេះ ដើម្បីអនុញ្ញាតឱ្យកងទ័ពចិនបោះទីតាំងឈរជើងក្នុងមូលដ្ឋានទ័ពជើងទឹករាមរបស់កម្ពុជា។
ជាមួយគ្នានេះ មានការផ្សព្វផ្សាយព័ត៌មានក្លែងក្លាយមួយថា «កម្ពុជាបដិសេធចំពោះជំនួយសហរដ្ឋអាមេរិក ក្នុងការជួសជុលអគារមួយកន្លែង នៅមូលដ្ឋានកងទ័ពជើងទឹករាម»។

ក្រោយការផ្សព្វផ្សាយនេះ ឧបការីរងក្រសួងការពារជាតិអាមេរិក ទទួលបន្ទុកតំបន់អាស៊ីខាងត្បូង និងអាស៊ីអាគ្នេយ៍ លោក Joseph Felter បានសរសេរលិខិតមួយផ្ញើទៅរដ្ឋមន្ត្រីក្រសួងការពារជាតិកម្ពុជា សម្ដេច ទៀ បាញ់ ដើម្បីឱ្យពន្យល់អំពីមូលហេតុដែលកម្ពុជា បដិសេធជំនួយរបស់សហរដ្ឋអាមេរិក ក្នុងការជួសជុលអគារហ្វឹកហ្វឺន និងផ្ទុកសម្ភារៈ នៅមូលដ្ឋានកងទ័ពជើងទឹករាម។ មន្រ្តីយោធាជាន់ខ្ពស់អាមេរិករូបនេះ ដាក់ការសង្ស័យថា ពាក់ព័ន្ធនឹងរឿងនេះ កម្ពុជាអាចបើកផ្លូវឲ្យចិនមានវត្តមាននៅមូលដ្ឋានទ័ពជើងទឹកសមុទ្ររាម។

លោកនាយឧត្តមសេនីយ៍ ឈុំ សុជាត បានធ្លាប់បានបញ្ជាក់ថា ការចុះផ្សាយថា «កម្ពុជាបដិសេធចំពោះជំនួយសហរដ្ឋអាមេរិក ក្នុងការជួសជុល អគារមួយកន្លែង នៅមូលដ្ឋានកងទ័ពជើងទឹករាម» គឺជាដំណឹងមិនពិតនោះទេ ដោយហេតុថា ក្រសួងការពារជាតិ ពុំដែលបានស្នើទៅអាមេរិក ដើម្បីជួសជុលអគារខាងលើនេះម្តងណាទេ។

បើតាមអ្នកនាំពាក្យ, ពាក់ព័ន្ធនឹងលិខិតរបស់ ឧបការីរងក្រសួងការពារជាតិសហរដ្ឋអាមេរិកនោះ ក្រសួងការពារជាតិកម្ពុជា ក៏បានអញ្ជើញអនុព័ន្ធយោធាប្រចាំការនៅក្នុងស្ថានទូតអាមេរិក មកស្តាប់ការបំភ្លឺ អំពីមូលហេតុដែលកម្ពុជាមិនទាន់មានភាពចាំបាច់ ក្នុងការទទួលជំនួយសហរដ្ឋអាមេរិក ដើម្បីជួសជុលអគារខាងលើនេះផងដែរ៕

​ដោយ ៖​ សុត្ថារ៉ា

ភ្នំពេញ ៖ លោក ផៃ ស៊ីផាន អ្នកនាំពាក្យក្រសួងការពារជាតិ និងលោកនាយឧត្តមសេនីយ៍ ជុំ សុជាត បានប្រកាសបដិសេធជាថ្មីម្តងទៀត នូវព័ត៌មានដែលបានផ្សាយដោយសារព័ត៌មានអាមេរិកដែលថា កម្ពុជា-ចិន ចុះហត្ថលេខាលើកិច្ចព្រមព្រៀងយោធាសម្ងាត់ ដើម្បីឲ្យចិនប្រើប្រាស់មូលដ្ឋានទ័ពជើងទឹកកម្ពុជា។

ការប្រកាសបដិសេធជាថ្មី ដោយផ្ទាល់មាត់នេះ បានធ្វើឡើង ក្នុងសន្និសីទកាសែត ប្រចាំសប្តាហ៍ រៀបចំដោយអង្គភាពអ្នកនាំពាក្យរាជរដ្ឋាភិបាល នាព្រឹកថ្ងៃទី២៥ ខែកក្កដា ឆ្នាំ២០១៩ នៅទីស្តីការគណៈរដ្ឋមន្ត្រី។

លោក ផៃ ស៊ីផាន ក៏បានប្រកាសដែរថា ក្រសួងការពារជាតិ នឹងរៀបចំនាំក្រុមអ្នកសារព័ត៌មាន ទៅពិនិត្យដោយផ្ទាល់នៅមូលដ្ឋានកងទ័ពជើងទឹក រាម នៅខេត្តព្រះសីហនុ នាថ្ងៃសុក្រ ទី២៦ ខែកក្កដា ឆ្នាំ២០១៩ នេះ ដើម្បីបញ្ជាក់ជាសាធារណៈ និងជាការឆ្លើយតបទៅនឹងការប្រឌិតរបស់សារព័ត៌មានសហរដ្ឋអាមេរិក៕

ក្រុងព្រះសីហនុ ៖ នៅវេលាម៉ោង ៣:០០នាទី ទៀបភ្លឺ ថ្ងៃទី២៥ ខែកក្កដា ឆ្នាំ២០១៩ នេះ លោក គួច ចំរើន អភិបាលខេត្តព្រះសីហនុ បានដឹកនាំកម្លាំងចុះបង្ក្រាបទីតាំងគ្រឿងញៀនមួយកន្លែងនៅក្លឹបអូបាម៉ា KTV ដែលលួចលាក់ជួញដូរ និងប្រើប្រាស់គ្រឿងញៀន ក្នុងសង្កាត់លេខ៤ ក្រុង-ខេត្តព្រះសីហនុ.​។

នេះជាការបង្ក្រាបគ្រឿងញៀនទ្រង់ទ្រាយធំនៅក្រុងព្រះសីហនុ ជាលើកដំបូងរបស់លោកអភិបាលទើបចូលកាន់តំណែងថ្មី ដោយក្នុងប្រតិបត្តិការបង្ក្រាបនោះ បានធ្វើការឃាត់ខ្លួនមនុស្សចំនួនជាង ១០០នាក់ ដើម្បីយកមកធ្វើការសាកសួរ និងធ្វើតេស្តរកសារធាតុញៀន។
រហូតមកដល់វេលាថ្ងៃត្រង់ ថ្ងៃទី២៥ កក្កដា នេះ សមត្ថកិច្ចនៅមិនទាន់បញ្ជាក់ពីលទ្ធផលនៃការបង្ក្រាបនោះនៅឡើយទេ៕

ភ្នំពេញ ៖ អង្គភាពប្រឆាំងអំពើពុករលួយ ACU នៅថ្ងៃទី២៤ ខែកក្កដា ឆ្នាំ២០១៩ នេះ បានបញ្ជូនមន្ត្រីនគបាល៣នាក់ទៅកាន់តុលាការម្តងទៀត ដើម្បីបន្តស៊ើបសួរជាថ្មីករណីរត់ការសូកប៉ាន់ដោះលែងជនចិនតៃវ៉ាន់ចំនួន១៨នាក់ ។

 ក្រោយពីការឃាត់ខ្លួន មន្ដ្រីនគរបាលទាំង៣រូបនោះ ធ្លាប់ត្រូវបានសមត្ថកិច្ចបញ្ជូនទៅតុលាការ កាលពីថ្ងៃទី២១ ខែកក្កដា ឆ្នាំ២០១៩ ក្នុងនោះមាន២នាក់ ជាមន្ត្រីនៅអគ្គនាយកដ្ឋានអត្តសញ្ញាណកម្ម (ឋានន្ដរស័ក្ដិ ឧត្តមសេនីយ៍ និងវរសេនីយ៍ត្រី) និងម្នាក់ទៀតនៅការិយាល័យស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍។ ប៉ុន្តែទោះជាយ៉ាងនេះក្តី ទាំងសមត្ថកិច្ច និងតុលាការនៅមិនទាន់ហ៊ានបង្ហើបអំពីឈ្មោះអ្នកទាំងនេះនៅឡើយទេ។

ជនជាតិចិនចំនួន១៨នាក់ ដែលនគរបាលទាំង៣រូប រត់ការឱ្យដោះលែងនេះ ត្រូវកម្លាំងសមត្ថកិច្ចខេត្តកំពង់ស្ពឺ បង្ក្រាបបានកាលពីថ្ងៃទី១៨ ខែកក្កដា ឆ្នាំ២០១៩ ពាក់ព័ន្ធករណីជំរិតទារប្រាក់តាមប្រព័ន្ធអ៊ីនធឺណេត។បន្ទាប់ពីឃាត់ខ្លួនឧក្រិដ្ឋជនចិននេះរួចមក មន្ដ្រីនគរបាលទាំង៣នាក់នោះ បានចេញមុខរត់ការដោះលែង រហូតដឹងដល់ថ្នាក់ដឹកនាំ ទើបឈានទៅការចាត់វិធានការតាមផ្លូវច្បាប់តែម្តង។

សូមបញ្ជាក់ថា កងកម្លាំងនគរបាលនៃស្នងការដ្ឋាននគរបាលខេត្ដកំពង់ស្ពឺ ដឹកនាំដោយលោក ខៃ សម្ជស្ស ព្រះរាជអាជ្ញារងអយ្យការអមសាលាដំបូងខេត្តកំពង់ស្ពឺ និងមានការចូលរួមពីលោក ឧត្ដមសេនីយ៍ត្រី ញ៉ែម សៅ ស្នងការរងខេត្ត លោកឈឺន សុធន អភិបាលស្រុកបរសេដ្ឋ កងកម្លាំងនគរបាលជំនាញពាក់ព័ន្ធ បានប្រតិបត្ដិការជាក់ស្តែងនៅទីតាំងដីចំការស្វាយមួយកន្លែង ស្ដិតនៅក្នុងភូមិចា ឃុំស្វាយចចឹប ស្រុកបរសេដ្ឋ ខេត្តកំពង់ស្ពឺ នៅវេលាម៉ោង ៩និង៣០នាទី នាថ្ងៃទី១៧ ខែកក្កដា ឆ្នាំ២០១៩ កម្លាំងនគរបាល បានចូលឆែកឆេរទីតាំងដីចំការស្វាយ (ឃ្លាំងប្រក់សង្ក័សីទំហំ ៤០ គុណ ១០០ ម៉ែត្រ រកឃើញមនុស្សជនជាតិ ចិន ១៨នាក់ សញ្ជាតិតៃវ៉ាន់១២នាក់ សម្ភារៈឧបករណ៍បច្ចេកទេសគ្រឿងបំពាក់ Wifi កាមេរ៉ាសុវត្ថិភាពជុំវិញទីតាំង ម៉ាស៊ីនកុំព្យូទ័រ ៦គ្រឿង ម៉ាស៊ីនភ្ជាប់ដុំWifi ៤គ្រឿង ទូរស័ព្ទចល័តដាក់លើតុខ្សែ ៣៣គ្រឿង ទូរស័ព្ទដៃប្រភេទចម្រុះ ៣៣គ្រឿង អាយផេត ៤គ្រឿង ម៉ាស៊ីនសឺវឺ មួយឈុត អង់តែនទាញសេវាទូរស័ព្ទ ឡាំងក្រដាសបិតស្នោរការពារសំឡេងរំខានដាក់លើតុ ចំនួន២០ ម៉ាស៊ីនភ្លើងកម្លាំង 150LS ចំនួន២គ្រឿង ឯកសារភស្តុតាងភាសាចិន មានរូបថតជនជាតិចិន ឯកសារផ្ទេរប្រាក់តាមធនាគារ ឯកសារភស្ដុតាងរួមផ្សំមួយចំនួន ទៀត។

តាមការបញ្ជាក់ឲ្យដឹងពីឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ និងសមត្ថកិច្ចមូលដ្ឋានថា ដីចំការស្វាយគឺជាកម្មសិទ្ធរបស់លោក ហេ ជីវ អេង មុខរបរជាមេធាវី បានជួលទៅឲ្យឈ្មោះ រ័ត្ន ពិន្ទ (ជាតំណាងឈរឈ្មោះឲ្យបុគ្គលម្នាក់ទៀត នៅរាជធានីភ្នំពេញ មិនស្គាល់ឈ្មោះ) ក្នុងតម្លៃ ២២០០០ដុល្លារអាមេរិក៕

ដោយ ៖ សុត្ថារ៉ា

ភ្នំពេញ ៖ សមាជិកសភាអឺរ៉ុប ៦នាក់ រួមមានជនជាតិអង់គ្លេស ព័រទុយហ្គាល់ ប៊ុលហ្គារី ហូឡង់ ស៊ុយអ៊ែត និងអេស្ប៉ាញ ត្រូវបានក្រសួងការបរទេស ប្រកាសផ្សព្វផ្សាយ និងដាក់ក្នុងបញ្ជីរឹតបន្តឹងចូលកម្ពុជា។ ជាមួយនឹងសេចក្តីប្រកាសនេះ ក្រសួងក៏បានបង្ហាញឈ្មោះ និងរូបថតរបស់សមាជិកសភាអឺរ៉ុបទាំង៦នាក់នោះផងដែរ ដើម្បីបញ្ជូនភ្ជាប់នឹងលិខិតជម្រាបទៅកាន់ឯកអគ្គរាជទូត និងអគ្គកុងស៊ុល កុងស៊ុលកិត្តិយសកម្ពុជាទាំងអស់ដែលប្រចាំនៅបរទេស។

ជនបរទេស ៦នាក់ ជាសមាជិកសភាអឺរ៉ុប ដែលក្រសួងការបរទេស បានដាក់ចូលក្នុងបញ្ជីរឹតបន្តឹង ហាមចូលកម្ពុជា រួមមាន ៖ ១-លោក Phill Bennion ជនជាតិ អង់គ្លេស ២-លោកស្រី Ana Gomes ជនជាតិ ព័រទុយហ្គាល់ ៣-លោក Ithan Kyuchyuk ជនជាតិ ប៊ុលហ្គារី ៤-លោក Johannes Cornelis van Baalen ជនជាតិ ហូឡង់ ៥-លោកស្រី Abir Al Sahlani ជនជាតិ ស៊ុយអែត ៦-លោក Javier Nart ជនជាតិ អេស្ប៉ាញក្នុងលិខិត ចុះថ្ងៃទី១៥ ខែកក្កដា ឆ្នាំ២០១៩ ឯ.ឧ ឧបនាយករដ្ឋមន្ត្រី ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស បានជម្រាបទៅឯកអគ្គរាជទូត អគ្គកុងស៊ុល និងកុងស៊ុលកិត្តិយសកម្ពុជា ប្រចាំនៅបរទេសក្នុងកម្មវត្ថុ ស្តីពីការរឹតបន្តឹងសន្តិសុខ និងសុវត្ថិភាពពេលផ្តល់ទិដ្ឋាការចូលកម្ពុជា។

គឺក្រសួងការបរទេស ស្នើស្ថានតំណាងកម្ពុជា ប្រចាំបរទេសទាំងអស់៖ ពិនិត្យមើលឲ្យបានហ្មត់ចត់ និងច្បាស់លាស់ពីគោលបំណងរបស់ជនបរទេស ដែលស្នើសុំទិដ្ឋា ការចូលកម្ពុជា ដើម្បីធានាសន្តិសុខ និងសុវត្ថិភាព ក៏ដូចជាការពារអធិបតេយ្យភាពជាតិ។ បដិសេធការផ្តល់ទិដ្ឋាការដល់ជនបរទេសណា ដែលមានបំណងគាំទ្រ ឬការពារជនទាំងឡាយណា ដែលត្រូវបានផ្តន្ទាទោសឬកំពុងជាប់ទោសដោយសាលដីកាតុលាការកម្ពុជា៕

​ដោយ ៖​ ផានូរ៉ាត

ភ្នំពេញ ៖ រដ្ឋាភិបាលប្រទេសស៊ុយអែត សម្រេចជួយអភិវឌ្ឍន៍នៅកម្ពុជា រយៈពេល៥ឆ្នាំបន្ថែមទៀត ដើម្បីអោយកម្ពុជាកាន់តែមានភាពរីកចម្រើន ជាពិសេសប្រែក្លាយជាប្រទេសដែលមានចំណូលសេដ្ឋកិច្ចខ្ពស់។

ថ្លែងក្នុងឱកាសចូលជួបជម្រាបលា លោក ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្ដរជាតិ នៅថ្ងៃទី២៤ ខែកក្កដា លោកជំទាវ Maria Sargren ឯកអគ្គរដ្ឋទូតស៊ុយអ៊ែត ដែលត្រូវចប់អាណត្តិប្រចាំនៅប្រទេសកម្ពុជា បានបញ្ជាក់ថា រដ្ឋាភិបាលប្រទេសស៊ុយអែតកំពុងតែកសាងយុទ្ធសាស្ត្រអភិវឌ្ឍន៍នៅកម្ពុជា រយៈពេល៥ឆ្នាំទៀត ដោយគិតចាប់ពីឆ្នា២០២០-២០២៤ខាងមុខនេះ ដើម្បីជួយដល់កម្ពុជាអោយកាន់តែមានភាពជឿនលឿន និងប្រែក្លាយទៅជាប្រទេស ដែលមានការអភិវឌ្ឍន៍ខ្ពស់ ប្រកបដោយចីរភាព។

នេះបើតាមការឲ្យដឹងពី លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ដែលបានប្រាប់អ្នកសារព័ត៌មាននៅក្រោយជំនួបទ្វេភាគីនេះ។លោក កេត សោផាន់ បានអោយដឹងទៀតថា លោកជំទាវឯកអគ្គរដ្ឋទូត បានលើកពីការប្ដេជ្ញាចិត្តបន្តជួយគាំទ្រដំណើរការអភិវឌ្ឍន៍នៅកម្ពុជា ពីសំណាក់រដ្ឋាភិបាលស៊ុយអែត ក៏ដូចជារំលេចឲ្យឃើញ នូវកិច្ចសហប្រតិបត្តិការទ្វេភាគី និងភាពជាដៃគូយ៉ាងល្អ រវាងរដ្ឋាភិបាលប្រទេសស៊ុយអែត និងរាជរដ្ឋាភិបាលកម្ពុជាផងដែរ ។

បើតាមការបញ្ជាក់របស់លោក កេត សោផាន់ គឺឯកឧត្ដម ឧបនាយករដ្ឋមន្ត្រី ប្រាក់ សុខុន បានរំលឹកពីប្រទេសស៊ុយអែត ដែលធ្លាប់ផ្ដល់ជំនួយសហប្រតិបត្តិការ បោសសម្អាតមីននៅកម្ពុជា ចាប់តាំងពីឆ្នាំ២០១៤ ហើយសង្ឃឹមថា ស៊ុយអែតនឹងពិចារណាបន្តនូវគម្រោងជួយបោសសម្អាតមីននៅកម្ពុជាបន្ដទៀត បន្ទាប់ពីបានផ្អាកមួយរយៈ។

លោក ឧបនាយករដ្ឋមន្ត្រី ក៏បានបន្តទៀតថា កម្ពុជា-ស៊ុយអែត បានប្ដេជ្ញារួមគ្នា ក្នុងការជំរុញទំហំពាណិជ្ជកម្មរវាងប្រទេសទាំងពីរ ឲ្យកាន់តែមានទំហំធំជាងមុនថែមទៀត៕

​ដោយ ៖ សុត្ថារ៉ា

ភ្នំពេញ ៖ អ្នកនាំពាក្យក្រសួងការពារជាតិចិនបានថ្លែងច្រានចោលការចោទប្រកាន់ដែលថា ចិននិងកម្ពុជាមានកិច្ចព្រមព្រៀងសម្ងាត់អនុញ្ញាតឲ្យយោធាចិនឈរជើងនៅមូលដ្ឋានកងទ័ពកម្ពុជា សមុទ្ររាម។ ប្រតិកម្មរបស់ក្រសួងការពារជាតិចិន បានធ្វើឡើងបន្ទាប់ពីការច្រានចោលព្រមៗគ្នារបស់ក្រសួងការបរទេសចិន និងប្រមុខរដ្ឋាភិបាលកម្ពុជាលោក ហ៊ុន សែន។

ពីទីក្រុងប៉េកាំង ប្រទេសចិន លោក Wu Qian អ្នកនាំពាក្យក្រសួងការពារជាតិចិន បានចាត់ទុកថា ការផ្សាយរបស់កាសែតអាមេរិក The Wall Street Journal ជុំវិញកិច្ចព្រមព្រៀងសំងាត់រវាងចិន និងកម្ពុជាដែលអនុញ្ញាតឲ្យយោធាចិនឈរនៅកម្ពុជា ថាជាពាក្យចចាមអារាម និងជាព័ត៌មានមិនពិត។ តាមលោក Wu ប្រទេសចិន និងកម្ពុជា មានត្រឹមកិច្ចសហប្រតិបត្តិការលើការហ្វឹកហ្វឺនជំនាញជាមួយគ្នាព្រមទាំងការផ្តល់ជំនួយ ដល់គ្នាទៅវិញទៅមកហើយកិច្ចសហប្រតិបត្តិការទ្វេភាគីនេះគឺគ្មានការកំណត់គោលដៅទៅលើប្រទេសទីបីណាមួយឡើយ។

សម្តេចតេជោ ហ៊ុន សែននាយករដ្ឋមន្ត្រីកាលពីថ្ងៃច័ន្ទ ក៏បានអះអាងដែរថា ការផ្សព្វផ្សាយព័ត៌មានស្តីអំពីកម្ពុជាចុះហត្ថលេខាជាសម្ងាត់ ជាមួយចិន ប្រើប្រាស់មូលដ្ឋានយោធានៅកម្ពុជា គឺជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា។ សម្តេចតេជោនាយករដ្ឋមន្ត្រី ចោទសួរថាតើកម្ពុជាត្រូវការវត្តមានយោធាចិនលើទឹកដីរបស់ខ្លួនដើម្បីអ្វី? យើងមិនដែលបានពិភាក្សាណាមួយជាមួយមេដឹកនាំចិននោះឡើយ កុំថាឡើយដល់មានចុះហត្ថលេខាលើកិច្ចព្រមព្រៀង។ ល្មមឈប់ប្រើព័ត៌មានក្លែងបន្លំអំពីវត្តមានកងទ័ពចិនលើទឹកដីកម្ពុជាដើម្បីប្រឆាំងនិងយើងហើយ។ នេះបើតាមលោក ហ៊ុន សែន។

កាលពីពេលថ្មីៗនេះ កាសែត The Wall Street Journal តាមរយៈសម្តីមន្ត្រីអាមេរិកម្នាក់បានចុះផ្សាយថា កម្ពុជាបានអនុញ្ញាតឲ្យចិនប្រើប្រាស់មូលដ្ឋានយោធាសមុទ្ររាម ខេត្តព្រះសីហនុរយៈពេល៣០ឆ្នាំ ហើយអាចបន្តសុពលភាពជាស្វ័យប្រវត្តិរៀងរាល់១០ឆ្នាំម្ដង។ កាសែតអាមេរិកមួយនេះបន្តថា មូលដ្ឋានកងទ័ពចិន នឹងមានកន្លែងស្ដុកអាវុធ ព្រមទាំងកន្លែងចតនាវាចម្បាំងផងដែរ៕

ខេត្តព្រះសីហនុ : សាលាដំបូងខេត្តព្រះសីហនុ បានសម្រេចដោះលែងអ្នកសារព័ត៌មាន ២នាក់ឲ្យនៅក្រៅឃុំ ប៉ុន្តែស្ថិតនៅក្រោមការត្រួតពិនិត្យរបស់ តុលាការ កាលពីល្ងាចថ្ងៃទី២៣ ខែ កក្កដា ម្សិលមញនេះ ប៉ុន្តែពលរដ្ឋ 5 នាក់ផ្សេងទៀតនៅបន្តជាប់ឃុំជាបណ្ដោះអាសន្ន។

ចៅក្រមស៊ើបសួរសាលាដំបូងខេត្តព្រះសីហនុ កាលពីល្ងាចថ្ងៃទី២៣ ខែកក្កដា ម្សិលមិញនេះ សម្រេចមិនឃុំខ្លួនអ្នក សារព័ត៌មាន ២នាក់ តែដាក់អោយស្ថិតក្រោមការត្រួតពិនិត្យ របស់តុលាការ ។ ចំណែកពលរដ្ឋ៥នាក់ ត្រូវបានឃុំខ្លួនដាក់ពន្ធនាគារបណ្តោះអាសន្ន ពាក់ព័ន្ធករណីទំនាស់ដីធ្លីជាមួយឧកញ៉ា ខូវ សម្បត្តិ ។ នេះបើតាមការបញ្ជាក់របស់លោក លឹម ប៊ុនហេង អ្នកនាំពាក្យអយ្យការអមសាលាដំបូងខេត្តព្រះសីហនុ កាលពីថ្ងៃ ទី២៣ ខែ កក្កដា ម្សិលមិញនេះ។

លោក លឹម ប៊ុនហេង បន្តថា លោក កៀង សុន្ទរោ ព្រះរាជអាជ្ញារងអមសាលាដំបូងខេត្តព្រះសីហនុ បានសម្រេចចោទប្រកាន់ ឈ្មោះ កែរ រតនា ចាងហ្វាងកាសែត TN និង ឈ្មោះ ហ៊ុន សុខា ប្រធានក្លឹបអ្នកកាសែតឯករាជ្យ ពីបទ ញុះញង់អោយប្រព្រឹត្តបទឧក្រិដ្ឋជាអាទិ៍ , ញុះញង់ អោយប្រព្រឹត្តតាមផ្លូវសារព័ត៌មាននិងសមគំនិតក្នុងអំពើហិង្សាលើអ្នកកាន់កាប់អចលនវត្ថុដោយសុចរិត តាមមាត្រា៤៩៥ មាត្រា៤៩៧ និង មាត្រា២៩ នៃក្រមព្រហ្មទណ្ឌ និង មាត្រា២៥៣នៃច្បាប់ភូមិបាល ។

ដោយឡែកប្រជាពលរដ្ឋ៥នាក់មានឈ្មោះ ហង្ស សុភា ហៅ អ៊ីស៊ីន ភេទស្រី អាយុ៤៩ឆ្នាំ , ឈ្មោះ ហង្ស ចិន្តា ភេទស្រី អាយុ៥១ឆ្នាំ , ឈ្មោះ សែន លក្ខិណា ភេទស្រី អាយុ៣២ឆ្នាំ , ឈ្មោះ ប៉ែន ស៊ីណាត ភេទស្រី អាយុ៥៧ឆ្នាំ និង ឈ្មោះ ហេង យោង ភេទប្រុស អាយុ៥០ឆ្នាំ ត្រូវបានចោទប្រកាន់ពីបទ ប្រើអំពើហិង្សាលើអ្នកកាន់កាប់អចលនវត្ថុដោយសុចរិត , បទញុះញង់អោយប្រព្រឹត្តបទឧក្រិដ្ឋជាអាទិ៍ , និង កំហែងយក តាមមាត្រា២៥៣នៃច្បាប់ភូមិបាល , មាត្រា៣៦៣ និង មាត្រា៣៦៤ នៃក្រមព្រហ្មទណ្ឌ ។

សូមបញ្ជាក់ផងដែរថា សមត្ថកិច្ចកងរាជអាវុធហត្ថខេត្តព្រះសីហនុ បាន ធ្វើការ ឃាត់ខ្លួន ជនសង្ស័យទាំងអស់ កាលពីរសៀលថ្ងៃទី១៩ ខែកក្កដា កន្លងទៅ បន្ទាប់ពីបានប្រព្រឹត្តបទល្មើសនៅចំណុច ក្នុង ក្រុម៨ ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ៕

​ដោយ ៖ ផានូរ៉ាត /

ភ្នំពេញ ៖ មន្ត្រីនៃនាយកដ្ឋានអង្គរក្សម្នាក់ និងគ្នីគ្នាម្នាក់ នៅរសៀលថ្ងៃទី២៣ ខែកក្កដា ឆ្នាំ២០១៩ នេះ ត្រូវបានបញ្ជូនទៅកាន់សាលាដំបូងរាជធានីភ្នំពេញ បន្ទាប់ពីសមត្ថកិច្ចតាមប្រមាញ់ចាប់ខ្លួនបាននៅពីរកន្លែងផ្សេងពីគ្នា ក្រោយពេលអ្នកទាំងពីរបានប្លន់យកលុយជាង ២លានដុល្លារពីបុគ្គលិកក្រុមហ៊ុន ឆាយ វ៉ាន់ ម្នាក់ក្នុងពេលបើកប្រាក់ចេញពីធនាគារ។

តាមរបាយការណ៍បានឲ្យដឹងថា ជនសង្ស័យម្នាក់មានឈ្មោះ អៀម សំអន ភេទប្រុស អាយុ៣៨ឆ្នាំ បម្រើការងារនៅនាយកដ្ឋានអង្គរក្ស មានឋានន្តរស័ក្តិអនុសេនីយ៍ឯក មុខងារជំនួយការស្រាវជ្រាវសន្តិសុខ មានទីលំនៅផ្ទះសង់ថ្មី ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ និងម្នាក់ទៀតឈ្មោះ វ៉ា សុខ ភេទប្រុស អាយុ៣៨ឆ្នាំ ស្នាក់នៅផ្ទះលេខ២០២អឺ៣ ផ្លូវលេខ១៣០ ផ្សារកណ្តាលទី២ ខណ្ឌដូនពេញ មុខរបរអ្នកបើកបររថយន្តនៅក្រុមហ៊ុន ឆាយ វ៉ាន់។

របាយការណ៍ដដែលបង្ហាញថា កាលពីថ្ងៃទី១៦ ខែកក្កដា ឆ្នាំ២០១៩ នៅវេលាម៉ោង ៧៖៤០នាទីយប់ គណនេយ្យក្រុមហ៊ុន ឆាយ វ៉ាន់ បានឲ្យសែកមួយសន្លឹកមានទឹកប្រាក់ ៥លានដុល្លារ ទៅបុគ្គលិកក្រុមហ៊ុនម្នាក់ឈ្មោះ នី សំអាត និងអ្នកបើករថយន្តឈ្មោះ វ៉ា សុខ ដើម្បីទៅបើកលុយពីធនាគារមួយនៅជិតអតីតក្រសួងពាណិជ្ជកម្ម។ បន្ទាប់ពីបើកលុយបានហើយឈ្មោះ នី សំអាត បានយកទុកក្នុងថង់១ និងសាក់កាដូ២។ ពេលបើករថយន្តដល់ចំណុចផ្លូវលេខ៣១០ ក្នុងសង្កាត់បឹងកេងកងទី២ ខណ្ឌចំការមន ឈ្មោះ វ៉ា សុខ ជាអ្នកបើកបររថយន្តបានប្រើល្បិចឈប់រថយន្ត ហើយចុះទៅបើកទ្វាររថយន្តខាងក្រោយយកសាក់កាដូមួយដែលមានលុយ ២លាន ៤សែនដុល្លារ រួចគំរាមឈ្មោះ នី សំអាត មិនឲ្យស្រែកហើយស្ទុះរត់ទៅជិះម៉ូតូដែលមានឈ្មោះ ចាន់ ជាអ្នកបើកចេញទៅបាត់តែម្តង។ លុះនៅថ្ងៃទី១៨ ខែកក្កដា ឆ្នាំ២០១៩ សមត្ថកិច្ចបានតាមស្វែងរកចាប់ខ្លួនបានឈ្មោះ វ៉ា សុខ នៅក្រុងបាវិត ខេត្តស្វាយរៀង រកឃើញលុយជាង ១៣ម៉ឺនដុល្លារ ហើយនៅថ្ងៃទី១៩ ខែកក្កដា ឆ្នាំ២០១៩ ចាប់ខ្លួនបានម្នាក់ទៀតឈ្មោះ អៀម សំអន រកឃើញលុយ ២៥ម៉ឺនដុល្លារ ដែលគេទុកនៅក្នុងផ្ទះ និងដកហូតវត្ថុតាងមួយចំនួន។

ក្រោយពេលសាកសួរ និងប្រមូលភស្តុតាងរួចមក ជនត្រូវចោទទាំងពីរនាក់ ត្រូវបានសមត្ថកិច្ចបញ្ជូនទៅកាន់តុលាការរាជធានីភ្នំពេញ ដើម្បីចាត់ការបន្តតាមច្បាប់៕

​ដោយ ៖ ផានូរ៉ាត /

ភ្នំពេញ ៖ កម្ពុជាគឺគោលដៅរបស់ឧក្រិដ្ឋជន ប្រើប្រាស់ដើម្បីឆ្លងកាត់ការជួញដូរផលិតផលសត្វព្រៃ ពិសេសកុយរមាស ភ្លុកដំរីជាដើមមុននឹងយកបន្តទៅតំបន់អាស៊ី។ចំណូលដែលឧក្រិដ្ឋជនរកបានពីការជួញដូរសត្វព្រៃមានពី៧ទៅ២៣ពាន់លានដុល្លារអាមេរិកក្នុងមួយឆ្នាំ នៅទូទាំងពិភពលោក។

ថ្លែងនៅក្នុងសិក្ខាសាលាស្តីពីតួនាទីរបស់សារព័ត៌មានក្នុងការឆ្លើយតបទៅនឹងការជួញដូរសត្វព្រៃ នៅសណ្ឋាគារកាំបូឌីយ៉ាណា នៅព្រឹកថ្ងៃទី ២៣ កក្កដានេះ លោក កែន សេរីរដ្ឋា ប្រធាអង្គការសមាគមអភិរក្សសត្វព្រៃកម្ពុជា WCS បានបញ្ជាក់ថា កម្ពុជាបានក្លាយជាគោលដៅសម្រាប់ឧក្រិដ្ឋជន ដើម្បីប្រើប្រាស់ដឹកឆ្លងកាត់ផលិតផលសត្វព្រៃទៅកាន់តំបន់អាស៊ី ពីទ្វីអាហ្រ្វិក ពិសេសភ្លុកដំរី និងកុយរមាស ស្រកា និងពង្រួល។ ការជួញដូរសត្វព្រៃ ត្រូវបានគេចាត់ទុកថា ជាបទល្មើសឆ្លងដែនមួយ ក្នុងចំណោមបទល្មើសឆ្លងដែន ជាច្រើនដែលអាចរកប្រាក់បានច្រើនបំផុតនៅលើពិភពលោក គិតជាប្រាក់ចន្លោះពី៧ទៅ២៣ពាន់លានដុល្លារអាមេរិក។ ត្បិតកម្ពុជា ត្រូវបានឧក្រិដ្ឋជន យកមកប្រើប្រាស់ ដើម្បីជួញដូរ ប៉ុន្តែសត្វព្រៃរបស់កម្ពុជា មួយចំនួនក៏ត្រូវបានគេយកទៅជួញដូរក្នុងប្រទេសនិងនាំចេញទៅខាងក្រៅថែមទៀត។

បើតាមលោកស្រី Sarah Brook ទីប្រឹក្សាបច្ចេកទេសទប់ស្កាត់ការជួញដូរសត្វព្រៃ បានបញ្ជាក់ថា សត្វក្តាន់ ខ្ទីង ខ្លារខិន ត្រូវបានគេបរបាញ់ និងជួញដូរស្ទើរផុតពូជ នឹងលួចលាក់នាំចេញទៅប្រទេសវៀតណាម គ្រាដែលសត្វប្រភេទ ល្មូន អណ្តើក ពស់ ពង្រួល ត្រូវបានគេជួញដូរយ៉ាងច្រើនទាំងក្នុងស្រុក និងនាំចេញទៅកាន់ប្រទេសថៃ។

លោក កែន សេរីរដ្ឋា ប្រធាអង្គការសមាគមអភិរក្សសត្វព្រៃកម្ពុជា WCS បទល្មើសជួញដូរសត្វព្រៃនៅកម្ពុជាបានថយចុះ ប៉ុន្តែចំនួនសត្វព្រៃរបស់កម្ពុជា ក៏បានបាត់បង់ច្រើន រហូតមានសត្វខ្លះបានបាត់វត្តមានជាបណ្តើរ ដូចជាខ្លារដំបង រមាំងជាដើម។កត្តាដែលធ្វើឲ្យបាត់បង់សត្វព្រៃនៅកម្ពុជា គឺដោយសារ កំណើននៃការបរបាញ់ ការកើនឡើងនៃដីកសិកម្ម ធ្វើឲ្យបាត់បង់ជម្រកសត្វព្រៃ។

បើតាមរបាយការណ៏របស់កម្មវិធីលើកកំពស់បរិស្ថាន UNEP បានបង្ហាញថា ការជួញដូរសត្វព្រៃគឺជាការគំរាម កំហែងមួយក្នុងចំណោមការគំរាមកំហែងដ៏ធ្ងន់ធ្ងរបំផុតចំពោះសត្វព្រៃនៅទូ ទាំងពិភពលោក ធ្វើឲ្យប៉ះពាល់ដល់នីតិរដ្ឋ ចម្លងជំងឺមកមនុស្ស និងប៉ះពាល់ ដល់ជីវភាពរស់នៅរបស់សហគមន៏មូលដ្ឋាន។ ការជួញសត្វព្រៃត្រូវបានគេចាត់ទុកថា ជាបទល្មើសធ្ងន់ធ្ងរមួយ ដូចទៅនឹងបទល្មើសជួញដូរគ្រឿងញៀន ជួញដូរមនុស្ស និងជួញដូរអាវុធដែរ។ ដោយឡែក ក្នុងតំបន់អាស៊ីប៉ាស៊ីហ្វិក ប្រាក់ចំណូលបានមកពីការលក់សត្វព្រៃខុសច្បាប់ មានចំនួន២,៥ពាន់លានដុល្លារក្នុងមួយឆ្នាំ៕

 ដោយ ៖ សហការី

ព្រះវិហារ ៖ ប្រធានមន្ទីរសាធារណការ និងដឹកជញ្ជូនខេត្តព្រះវិហារ កាលពីថ្ងៃទី២២ខែកក្ក ដា ឆ្នាំ២០១៩ បានធ្វើដំណើរចុះត្រួតពិនិត្យផ្លូវពីរខ្សែ ប្រវែងជាង ១០០គីឡូម៉ែត្រ ដែលទើបបញ្ចប់ការជួសជុល ក្រោយរងការកាត់ផ្តាច់ដោយសារទឹកភ្លៀងជាអន្លើៗ នៅក្នុងរដូវស្សាឆ្នាំនេះ។

លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានថ្លែងប្រាប់ភ្នាក់ងារព័ត៌មានថា ផ្លូវជាតិក្រាលកៅស៊ូ និងផ្លូវក្រាលគ្រួសក្រហម ចំនួនពីរខ្សែ សរុបប្រវែង ១០០គីឡូម៉ែត្រ ដែល១ខ្សែស្ថិតនៅក្នុងស្រុកឆែប និង១ខ្សែទៀត តភ្ជាប់ពីទីរួមខេត្តព្រះវិហារ មកដល់ព្រំប្រទល់ខេត្តស្ទឹងត្រែង បានទទួលការគ្រប់គ្រង និងជួសជុលសារឡើងវិញ ដោយមន្ទីរសាធារណការ និងដឹកជញ្ជូនខេត្តនោះហើយ។

លោកប្រធានមន្ទីរបន្តថា ផ្លូវទំាងពីរខ្សែនេះ បានរងការប្រេះដាច់ជាអន្លើៗ ដោយសារទឹកភ្លៀងហូរកាត់នៅក្នុងរដូវវស្សានេះ ហើយខណៈនេះត្រូវបានថែទាំ និងជួសជុលឡើងវិញ បានរួចរាល់នោះហើយ។ សំរាប់ប្រជាពលរដ្ឋដឹកទំនិញ និងកសិផលនានា ទៅកាន់ទីផ្សារ ក៏ដូចជាសម្រួលដល់ការចុះបំពេញការងារ របស់មន្ត្រីរាជការសាធារណៈ ផងនោះដែរ។ លោកថា ផ្លូវទាំងពីរប្រភេទ ទី១.គឺផ្លូវជាតិលេខ៩៤ ជាផ្លូវក្រាលក្រួសក្រហម មានប្រវែង៦១គីឡូម៉ែត្រ តភ្ជាប់ពីទីរួមស្រុកឆែប រហូតដល់ឃុំកំពង់ស្រឡៅ១ ជាប់មាត់ទន្លេព្រំប្រទល់ផ្លូវទឹក ប្រទេសឡាវ និងទី២.ផ្លូវជាតិលេខ៩ តភ្ជាប់ពីទីរួមខេត្តព្រះវិហារ រហូតដល់ព្រំប្រទល់ខេត្តស្ទឹងត្រែង មានប្រវែង៦១គីឡូម៉ែត្រ ផ្លូវទាំងពីរខ្សែ មានប្រវែងសរុប ១២២គីឡូម៉ែត្រ។

លោកថា ផ្លូវជាតិលេខ៩៤ កំពុងដំណើរការកៀរសម្រួលជិតរួចរាល់ហើយ រីឯផ្លូវជាតិលេខ៩ ត្រូវបានបញ្ចប់ការជួសជុល១០០%ហើយ។ ដោយឡែក ស្ពានថ្ម ចំនួន២កន្លែង នៅផ្លូវជាតិលេខ៩៥ តភ្ជាប់ពីទីរួមស្រុកឆែប ទៅកាន់ស្រុកជ័យសែន មន្ត្រីជំនាញស្ពានផ្លូវ របស់មន្ទីរសាធារណការ និងដឹកជញ្ជូនខេត្ត កំពុងតែដំណើរការស្ថាបនានោះហើយ និងនៅមានស្ពាន១ខ្សែទៀត ប្រវែងជាង១០០ម៉ែត្រ កំពុងរងនូវការចាស់ទ្រុឌទ្រោមខ្លាំង។

ជាមួយគ្នានោះ លោកក៏បានស្នើដល់ក្រសួងសាធារណការ និងដឹកជញ្ជូន មេត្តាពិនត្យតាមលទ្ធភាព ក្នុងការសាងសង់ស្ពានថ្មី សម្រាប់ប្រជាពលរដ្ឋបានធ្វើដំណើរ ផុតពីក្តីបារម្ភ។ លោកប្រធានមន្ទីរសាធារណការ និងដឹកជញ្ជូនខេត្តព្រះវិហារ បានថ្លែងរកការយោគយល់ ពីប្រជាពលរដ្ឋគ្រប់ស្រទាប់វណ្ណៈ ដែលបានធ្វើដំណើរឆ្លងកាត់លើកំណាត់ផ្លូវខាងលើ នាពេលកន្លងទៅ ហើយជួបការលំបាកក្នុងការធ្វើដំណើរ ដែលក្រុមការងាររបស់មន្ទីរ បានធ្វើការជួសជុលមានភាពយឺតយ៉ាវ។ ប៉ុន្តែបច្ចុប្បន្ននេះ ផ្លូវទាំងអស់នោះ ត្រូវបានធ្វើការថែទាំ និងជួសជុលរួចរាល់ហើយ។

លោក សំ លាងទ្រី បានបញ្ជាក់ជំហរថា មន្ទីរសាធារណការ និងដឹកជញ្ជូនខេត្ត នៅតែបន្តយកចិត្តទុកដាក់ជួសជុល និងថែទាំផ្លូវទាំងអស់នេះ ដូចជាលុបស្នាមប្រេះ ស្នាមស្រុត សម្អាតរុក្ខជាតិតាមដងផ្លូវ និងធ្វើការកៀរសម្រួលផ្លូវក្រួសក្រហមជាដើម។ បន្ថែមពីនេះ លោកប្រធានមន្ទីរ ក៏បានអំពាវនាវដល់ប្រជាពលរដ្ឋ សូមធ្វើដំណើរប្រកបដោយសុវត្ថិភាព បន្ទាប់ពីផ្លូវជាតិទាំងពីរខ្សែនេះ បានបញ្ចប់នូវការថែទាំង និងជួសជុលរួចរាល់ជាស្ថាពរហើយនោះ៕