ភ្នំពេញ ៖ សម្តេចតេជោ ហ៊ុន សែន បានថ្លែងថា «បើនិយាយពីវៀតណាម ធ្វើផ្លូវច្រើនណាស់ ផ្លូវជាតិដែលពីមុនតូចៗ ឥឡូវវៀតណាម ពង្រីកទៅជាផ្លូវហាយវេអស់ហើយ។ អ៊ីចឹង ! យើងត្រូវតភ្ជាប់ជាមួយវៀតណាម ពីភ្នំពេញ ទៅបាវិត ខេត្តស្វាយរៀង ថែមទៀត»។ សម្តេចបានថ្លែងបែបនេះ នៅក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-ព្រះសីហនុ នាព្រឹកថ្ងៃទី២២ ខែមីនា ឆ្នាំ២០១៩។

សម្តេចនាយករដ្ឋមន្រ្តី ហ៊ុន សែន បានបង្ហាញពីបំណងចង់ឱ្យមានការសាងសង់ផ្លូវល្បឿនលឿន ភ្នំពេញ-បាវិត (ព្រំដែនកម្ពុជា-វៀតណាម) តាមរូបភាព សាងសង់-ធ្វើអាជីវកម្ម-ផ្ទេរ (BOT)។

បើតាមការលើកឡើងរបស់លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជុន បានឱ្យដឹងកាលពីខែធ្នូ ឆ្នាំ២០១៨ កន្លងទៅថា ការសិក្សាផ្លូវល្បឿនលឿនភ្នំពេញ-បាវិត ត្រូវបានចប់សព្វគ្រប់អស់ហើយ ដែលត្រូវចំណាយថវិកាប្រមាណ ៣៨០០លានដុល្លារ។

រដ្ឋមន្រ្តីរូបនេះ បានគូសបញ្ជាក់ថា ការចំណាយយ៉ាងច្រើន ដោយសារតែផ្លូវដែលត្រូវសាងសង់ គឺមានលិចទឹក ហើយកាត់តាមបឹង ឬតំបន់លិចទឹកច្រើន ដែលមានប្រវែងរហូតដល់ ៨០គីឡូម៉ែត្រ ជាហេតុធ្វើឱ្យតម្លៃក្នុងការចំណាយសាងសង់ច្រើន។

គួរជម្រាបថា កន្លងមករាជរដ្ឋាភិបាលកម្ពុជា បានអនុញ្ញាតឱ្យទីភ្នាក់ងារសហប្រតិបត្តិការអន្ដរជាតិនៃប្រទេសជប៉ុន (JICA) ធ្វើការសិក្សាផ្លូវល្បឿនលឿនពីភ្នំពេញទៅបាវិត ដែលមានចម្ងាយផ្លូវប្រវែង ១៦០គីឡូម៉ែត្រ ដើម្បីធ្វើការសាងសង់ផ្លូវនេះ។ តែទោះជាយ៉ាងណាក្តី ក៏មកដល់ពេលនេះ រាជរដ្ឋាភិបាល មិនទាន់ប្រកាសជាផ្លូវការពីកាលបរិច្ឆេទនៃការចាប់ផ្តើមគម្រោងនេះ នៅឡើយទេ៕

ភ្នំពេញ ៖ ក្រុមការងារបច្ចេកទេស ផ្គត់ផ្គង់អគ្គិសនី របស់ប្រទេសតួកគី នឹងមកដល់កម្ពុជា នៅថ្ងៃទី២៣ មីនា នេះ ដើម្បីសិក្សាពីផ្លូវទឹក និងការប្រើប្រាស់អគ្គិសនី ដើម្បីនាំយកនាវាផលិតអគ្គិសនី ពីប្រទេសតួកគី ដែលអាចផលិតថាមពល ២០០មេកាវ៉ាត់ មកផ្គត់ផ្គត់នៅទីក្រុងភ្នំពេញ។

លោក ទី នរិន្ទ រដ្ឋលេខាធិការក្រសួងរ៉ែ និងថាមពល បានបញ្ជាក់បែបនេះ នៅក្នុងសន្និសីទសារព័ត៌មាន ស្ដីពីបច្ចុប្បន្នភាពផែនការថាមពលសាធារណៈ (អគ្គិសនី) នៅរសៀលថ្ងៃទី២២ ខែមីនា ឆ្នាំ២០១៩។ លោក ថា ក្រុមការងារបច្ចេកទេសតួកគី នឹងមកដល់ប្រហែលជាម៉ោង១២ ថ្ងៃត្រង់ ថ្ងៃទី២៣ ខែមីនា នេះ ដើម្បីពិភាក្សាជាមួយមន្ត្រីជំនាញពីការប្រើប្រាស់ចរន្តអគ្គិសនីរបស់កម្ពុជា និងពិនិត្យមើលផ្លូវទឹកចូលមកតាមទន្លេអ្នកលឿងមករាជធានីភ្នំពេញ។

គួររំឭកថា នាពេលថ្មីនេះ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានជំរុញឲ្យលោក ស៊ុយ សែម រដ្ឋមន្រ្តីក្រសួងរ៉ែ និងថាមពល និងលោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយកអគ្គិសនីកម្ពុជា បន្ថែមនូវបច្ចេកវិទ្យាទំនើបៗ សម្រាប់ការផ្គត់ផ្គង់អគ្គិសនី ខណៈកម្ពុជាបាន និងកំពុងចរចាទិញនាវាផលិតអគ្គិសនីពីប្រទេសតួកគី។ ជាមួយគ្នានេះដែរ សម្តេចតេជោ ក៏បានឲ្យប្រធានអគ្គិសនីកម្ពុជា ប្រញាប់រូតរះទៅប្រទេសតួកគី ដើម្បីចរចានាំយកនាវាផ្ទុកម៉ាស៊ីនភ្លើងឋាមពល ២០០ ម៉េហ្គាវ៉ាត់ មកប្រើប្រាស់ ខណៈកម្ពុជាកំពុងប្រឈមនឹងការខ្វះខាតឋាមពលអគ្គិសនីក្នុងអំឡុងរដូវប្រាំងក្តៅហួតហែងពីពេលនេះ រហូតដល់ខែឧសភា ខាងមុខ៕  (រូបតំណាង)

ភ្នំពេញ ៖ លោក ទី នរិន្ទ រដ្ឋលេខាធិការក្រសួងរ៉ែ និងថាមពល បានថ្លែងអះអាងថា នៅឆ្នាំ២០១៩ នេះ កម្ពុជានៅខ្វះខាតឋាមពលអគ្គិសនី និងទឹកប្រើប្រាស់ តែចាប់ពីឆ្នាំ២០២០ តទៅ កម្ពុជា នឹងលែងខ្វះអគ្គីសនីប្រើប្រាស់ទៀតហើយ។

ក្នុងសន្និសីទសារព័ត៌មាន ស្ដីពី បច្ចុប្បន្នភាព ផែនការថាមពលសាធារណៈ (អគ្គិសនី) នៅរសៀលថ្ងៃទី២២ ខែមីនា ឆ្នាំ២០១៩ លោក ទី នរិន្ទ មានប្រសាសន៍ថា “ក្នុងនាមខ្ញុំក្រសួងរ៉ែ និងថាមពល ខ្ញុំសន្យានៅទីនេះហើយថា នៅឆ្នាំនេះ ឆ្នាំ២០២០ ហើយបន្ដទៀត មិនកើតទៀតទេ ព្រោះយើងរៀនសូត្រនៅថ្ងៃនេះ ពីគ្រោះរាំងស្ងួត” ។

លោក ទី នរិន្ទ បានបន្ថែមថា កាលពីឆ្នាំ២០១៨ កម្ពុជាបានប្រើប្រាស់អគ្គិសនី សរុប ៩៣០០លានគីឡូវ៉ាត់ម៉ោង ពោលគឺ២៥,៥លានគីឡូវ៉ាត់ម៉ោងក្នុង១ថ្ងៃ។ កំណើននៃការប្រើប្រាស់ កើនឡើងយ៉ាងគំហុក ចាប់ពីខែមករា និងខែកុម្ភៈកន្លងមក ដោយឈានដល់ ៣១លានគីឡូវ៉ាត់ម៉ោងក្នុង១ថ្ងៃ។

គួររំឭកដែរថា តាមការព្យាកររបស់ក្រសួងធនធានទឹក និងឧតុនិយម នៅអំឡុងខែ មីនា-មេសា-ឧសភា ឆ្នាំ២០១៩ នេះ អាកាសធាតុនៅទូទាំងកម្ពុជា នឹងឡើងកម្តៅខ្លាំង ក្នុងនោះសីតុណ្ហភាពនឹងឡើងកម្តៅចន្លោះពី ៤០អង្សា ដល់៤២អង្សាសេ ដែលនាំឲ្យមានគ្រោះរាំងស្ងួតហួតហែង៕

ភ្នំពេញ ៖  លោក ដុក អេរិសិន Duog Ericksen សមាជិកព្រឹទ្ធសភានៃរដ្ឋ វ៉ាស៊ីនតោននៃសហរដ្ឋអាមេរិក នៅវិមាន សន្តិភាពនៅរសៀលថ្ងៃទី២២ មីនា។សមាជិកព្រឹទ្ធសភានៃរដ្ឋវ៉ាស៊ីនតោន សហរដ្ឋអាមេរិក មក ទស្សនកិច្ចកម្ពុជាដើម្បីជំរុញពង្រឹងទំនាក់ទំនងរវាងកម្ពុជា និងសហរដ្ឋអាមេរិកឲ្យតែមានភាព ល្អ ប្រសើរឡើងថែមទៀត។

លោក Ericksen សមាជិកព្រឹទ្ធសភានៃរដ្ឋវ៉ាស៊ីនតោនសហរដ្ឋអាមេរិកបានបញ្ជាក់ជូនសម្តេច តេជោ នាយករដ្ឋមន្ត្រីថា បំណងនៃដំណើរទស្សនកិច្ច របស់លោកមកកាន់កម្ពុជា គឺមកធ្វើយ៉ាង ណាជំរុញពង្រឹងទំនាក់ទំនងរវាងកម្ពុជា និងសហរដ្ឋអាមេរិកឲ្យកាន់តែខ្លាំងឡើង គ្រាដែល ទំនាក់ ទំនង រវាងប្រទេស ហាក់ជួបភាពរកាំរកូសក្នុងរយៈពេលចុងក្រោយនេះ។ ជាការឆ្លើយតប សម្ដេច តេជោ ហ៊ុន សែន បានស្វាគមន៍ចំពោះកិច្ចពិភាក្សាដើម្បីពង្រឹងទំនាក់ទំនងរវាងប្រទេសទាំងពីរ ដែលមានន័យថា សហរដ្ឋអាមេរិក និងកម្ពុជានឹងសហការគ្នាឡើងវិញ ក្នុងការស្វែងរកអដ្ឋិធាតុ របស់ជនជាតិ អាមេរិកាំង ដែលបានបាត់ខ្លួននៅក្នុងសម័យសង្គ្រាម។

សម្រាប់ លោក Duog Ericksen បានថ្លែងនូវការអរគុណចំពោះរាជរដ្ឋាភិបាលកម្ពុជា ពិសេស សម្តេច តេជោ ដែលបាន ចូលរួមចំណែកជួយដល់កិច្ចការមនុស្សធម៌នេះ ដែលមានន័យថា អាមេរិក និងកម្ពុជានឹងបន្ត សហ ការ គ្នាឡើងវិញ ក្នុងការស្វែងរកអដ្ឋិធាតុរបស់ជនជាតិអាមេរិកាំង ដែលបាត់ខ្លួនក្នុងសម័យសង្គ្រាម នោះជាបន្តទៀត

គួរបញ្ជាក់ដែរថា សមាជិកព្រឹទ្ធសភានៃរដ្ឋវ៉ាស៊ីនតោនសហរដ្ឋអាមេរិក ធ្លាប់ បានមកបំពេញទស្សន កិច្ចនៅកម្ពុជាកាលពីឆ្នាំ២០១៦។ លោកសង្កេតឃើញថា កម្ពុជាមានការអភិវឌ្ឍន៍យ៉ាងឆាប់រហ័ស ជាមួយនឹងសុខសន្តិភាព ស្ថេរភាព ដែលប្រជាជនកាន់តែមានជីវភាពល្អប្រសើរ។ ឆ្នាំ២០១៨លោក ក៏បាន មកសង្កេតការណ៍បោះឆ្នោតនៅកម្ពុជាផងដែរ ហើយការបោះឆ្នោតកន្លងទៅ មានសុខ សន្តិភាព អហិង្សា និងជោគជ័យ ហើយការបោះឆ្នោតនោះ ឆ្លុះបញ្ចាំងនូវបំណងប៉ងប្រាថ្នា របស់ ប្រជា ជនកម្ពុជា៕

ភ្នំពេញ ៖ រដ្ឋលេខាធិការក្រសួងរ៉ែ និ ឋាមពល លោក ទី នរិន្ទ បានថ្លែងថា បញ្ហារអាក់រអួល អគ្គិសនីនារយៈពេលប៉ុន្មានថ្ងៃនេះ គឺបណ្តាលមកការប្រើប្រាស់បានកើនឡើងយ៉ាងគំហុក ខណៈដែលទំនប់វារីអគ្គិសនីខ្លះ បានផ្អាកដំណើរការជាបណ្តោះអាសន្ន បណ្តាលមកពីការខ្វះខាតទឹក នារដូវប្រាំងដ៏ហូតហែងនេះ។

លោក ទី នរិន្ទ ក្នុងសន្និសីទសារព័ត៍មាន នៅទីស្តីការគណៈរដ្ឋមន្ត្រីស្តីអំពីបញ្ហា អគ្គិសនី នារសៀលថ្ងៃទី២២ មីនានេះថ្លែងថា ឆ្នាំ២០១៩នេះ ទំហំនៃការប្រើប្រាស់អគ្គិសនី កើនឡើងខ្ពស់ជាងឆ្នាំ២០១៨ ដែលយើងអាចនិយាយបានថា ជាការកើនឡើងយ៉ាងគំហុក ខណៈដែលយើងកំពុងខ្វះខាតទឹកនៅតំបន់ផលិតវារីអគ្គិសនីផងនោះ ធ្វើឱ្យការផ្គត់ផ្គង់អគ្គិស នីមានការរអាក់រអួល ដោយនៅពេលថ្ងៃអាចដាច់អគ្គិសនីរហូតដល់ទៅ ៦ម៉ោង តែនៅពេល យប់ការផ្គត់ផ្គង់អាចមានជាប្រក្រតី។

លោករដ្ឋលេខាធិការបានគូសបញ្ជាក់ថា គម្រោងនៃ ការវិនិយោគនៅឆ្នាំ២០១៩នេះគឺមានការកើនឡើងខ្លាំងជាងឆ្នាំ២០១៨ នៅរាជធានីភ្នំពេញ ខេត្តកណ្តាល និងខេត្តកំពង់ស្ពឺ។ ដូច្នេះហើយតម្រូវការ នៃការប្រើប្រាស់ក៏មានការកើនឡើង ផងដែរ ក្នុងនោះវិស័យសំណង់ដែលមានកំណើន៧០០% បានធ្វើឱ្យប្រភពថាមពលអគ្គិសនី ពុំអាចផ្គត់ផ្គង់បានគ្រប់គ្រាន់ដូចកាលពីឆ្នាំកន្លងទៅៗទេ តែទោះជាយ៉ាងនេះក៏ដោយចុះ លោកថា នេះគឺគ្រាន់តែជាការប្រឈមមួយក្នុងរយៈពេលខ្លីប៉ុណ្ណោះ ដែលវាអាចនឹង អូសបន្លាយត្រឹមចុងខែឧសភា ពោលគឺមានរយៈពេល៧២ថ្ងៃ ដែលយើងមានកង្វះខាត ថាមពលអគ្គិសនីចំនួន ៤០០មេហ្កាវ៉ាត់ ស្មើនឹង១៣% សម្រាប់ការផ្គត់ផ្គង់ទូទៅ។

លោក ទី នរិន្ទ បានបន្ថែមថា រាជរដ្ឋាភិបាលបានសុំទៅខាងភាគីថៃ ឡាវ និង ភាគីវៀតណាមឱ្យបង្កើនថាមពលអគ្គិសនីមកឱ្យយើង ក្នុងនោះថៃ និង ឡាវ បានសន្យាថានឹង បង្កើនជូន រីឯវៀតណាមអាស្រ័យដោយខ្លួនកំពុងខ្វះខាតអគ្គិសនីដែលទាញយកពីវារីអគ្គិសនី ដែរនោះបានសុខចិត្តផ្តល់មកឱ្យកម្ពុជាក្នុងទំហំដដែល ហើយក្រៅពីនេះកម្ពុជាកំពុងតែធ្វើការ ជាមួយខាងភាគីតួគីដើម្បីឱ្យគេបញ្ជូននាវាផលិតអគ្គិសនីកម្លាំង ២០០មេហ្កាវ៉ាត់ មកកាន់ រាជធានីភ្នំពេញផងដែរ ហើយជាការឆ្លើយតបនឹងសំណើនេះខាងភាគីតួគីនឹងបញ្ជូនអ្នកបច្ចេក ទេសរបស់ខ្លួនឱ្យមកពិនិត្យផ្លូវទឹកសម្រាប់នាវាដែលមានបណ្តោយជាង ១០០ម៉ែត្រ អាចចូល មកភ្នំពេញថាបាន ឬក៏មិនបាន។

រដ្ឋលេខាធិការក្រសួងរ៉ែ និង ថាមពលរូបនេះបានហៅបញ្ហាប្រឈមឆ្នាំ២០១៩នេះថា ជាបទពិសោធន៍ និង ជាមេរៀនសម្រាប់ឆ្នាំ២០២០ និង បណ្តាឆ្នាំខាងមុខៗទៀតរបស់កម្ពុជា ដោយឯកឧត្តមបានគូសបញ្ជាក់ថា ជាឆ្នាំដែលមិនអាចធ្វើឱ្យមានបញ្ហាអគ្គិសនីនេះទៀតទេ៕

ភ្នំពេញ ៖ រថយន្តមួយគ្រឿង ត្រូវអ្នកបើកបរ លួច យកពីខេត្តកំពង់សោម ហើយ តាមរយះជីភីអេស ត្រូវបានម្ចាស់និងបងប្អូនតាមរកឃើញ ចតទុកចោល នៅតាមដងផ្លូវ នៅក្នុងរាជធានីភ្នំពេញ។

ហេតុការណ៍បង្កអោយមានការភ្ញាក់ផ្អើល កាលពីវេលាម៉ោង១និង៤៥នាទីរសៀលនៅត្រង់ចំណុចមុខក្រុមហ៊ុនផលិតទឹកសុទ្ធវីតាល់តាមផ្លូវលេខ៥៩៨ភូមិទួលថ្ងាន់សង្កាត់ទួលសង្កែ២ខណ្ឌឬស្សីកែវហើយ ម្ចាស់ក៍បានទៅប្តឹងនគរបាលអោយដកហូតយកមកទុកនៅស្នាក់ការប៉ុស្តិ៍ ទួលសង្កែ ២ ។ទោះបីជាយ៉ាងជនសង្ស័យ បានរត់គេចខ្លួនបាត់ មុនពេលដែលម្ចាស់ និងនគរបាលទៅដល់។

រថយន្តនោះម៉ាកហ៊ីយ៉ាន់ដាយពណ៌សរពាក់ស្លាកលេខភ្នំពេញ2E-0980 ជាប្រភេទរថយន្តបែនដឹកដីចំណុះ ៥ តោនម្ចាស់ឈ្មោះ ទុំ ចាន់រតនា ភេទប្រុសអាយុ ៣១ ឆ្នាំ មានស្រុកកំណើតនៅភូមិសូយោង ឃុំសូយោង ស្រុកបារាយណ៍ខេត្តកំពុងធំ ។

ចំណែកជនសង្ស័យជាអ្នកបើកបរ ម្ចាស់ពុំបានប្រាប់អោយស្គាល់អត្តសញ្ញាណឡើយ។
តាមម្ចាស់ បានអោយនគរបាលដឹងថា រថយន្តនោះត្រូវបានជនសង្ស័យ ជាអ្នកបើកបរ បានលួចយកពីខេត្តកំពង់សោម នៅវេលាព្រឹកថ្ងៃ២១ខែមិនាឆ្នាំ២០១៩ដោយជនសង្ស័យបានប្រាប់ម្ចាស់ថា រថយន្តខូចហើយ យករថយន្តចេញពីភូមិ១ សង្កាត់១ ក្រុងព្រះសីហនុ ខេត្តព្រះសីហនុ ទៅជួលជុល។លុះក្រោយមកបើកបររថយន្តក៍បានបិតទូរស័ព្ទរហូត។

តាមរយៈជីភីអេស ម្ចាស់ក៍បានដឹងថា រថយន្តនោះត្រូវបានជនសង្ស័យបើកមកភ្នំពេញ ហើយក៍ប្រាប់បងប្អូននៅភ្នំពេញអោយតាមរកតាមទិសដៅ ក៍បានប្រទះឃើញរថយន្តនោះចតទុកនៅតាមដងផ្លូវតែម្តង។រថយន្តត្រូវបាននគរបាលនាំយកទៅរក្សាទុកនៅស្នាក់ប៉ុស្តិ៍នគរបាលទួលសង្កែទី២ ដើម្បីអោយម្ចាស់យកឯកភាព មកបង្ហាញនិងយករថយន្តត្រឡប់ទៅវិញ ៕

ភ្នំពេញ ៖ ការបរាជ័យរហូតគ្មានកន្លែងឈរជើងទាំងស្រុងរបស់អតីតបក្សប្រឆាំង ក៏ព្រោះតែបក្សប្រឆាំងវាយតម្លៃស្ថានការណ៍ខុស និងតែងតែលាបពណ៌សហការីរបស់ខ្លួន ដែលបានចាកចេញពីបក្សរបស់ខ្លួន។ សម្តេចតេជោ បានថ្លែងចំអកដល់អតីតមេបក្សបក្សប្រឆាំង ដែលកំពុងបន្តរាំងខ្ទប់សមាជិក និងសហការីរបស់ខ្លួនមិនឲ្យសុំសិទ្ធិធ្វើនយោបាយ ជាអ្នកប្រជាធិបតេយ្យក្លែងក្លាយ។

នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានមានប្រសាសន៍យ៉ាងដូច្នេះនៅក្នុងពិធីចែកសញ្ញាបត្រជូនដល់និស្សិតជ័យលាភីនៃសកលវិទ្យាល័យ អាស៊ីអឺរ៉ុបប្រមាណ ១ពាន់៥នាក់ នៅវិទ្យាស្ថានជាតិអប់រំ នៅព្រឹកថ្ងៃទី២១ ខែមីនា នេះ។ សម្តេច បានថ្លែងចំអកឲ្យអតីតមេដឹកនាំគណបក្សប្រឆាំងថា ការបាត់បង់កន្លែងឈរជើងទាំងស្រុងនៅក្នុងសមរភូមិនយោបាយនៅកម្ពុជា គឺដោយសារតែបក្សប្រឆាំងតែងតែវាយតម្លៃខុស គ្រប់ទិដ្ឋភាពនយោបាយ និងចូលចិត្តលាបពណ៌ មិនថា មន្ត្រី និងសហការីរបស់ខ្លួន និងមន្ត្រីគណបក្សប្រជាជន ដោយសង្ឃឹមទទួលផលពីការបែកបាក់របស់គណបក្សប្រជាជន។

នយោបាយរង់ចាំគណបក្សប្រជាជនបែកផ្ទៃក្នុង គឺជារឿងមិនអាចទៅរួចឡើយ គ្រាដែលរយៈពេល៤០ឆ្នាំជាបក្សកាន់អំណាច គណបក្សប្រជាជនកម្ពុជា នៅរក្សាសាមគ្គីភាពផ្ទៃក្នុងយ៉ាងរឹងមាំ។ អតីតមេបក្សប្រឆាំងគឺលោក សម រង្ស៊ី តែងតែចោទសម្តេចតេជោ ថា រកគ្រប់វិធីដើម្បីបំបែកលោក ចេញលោក កឹម សុខា ដើម្បីឲ្យអតីតគណបក្សសង្គ្រោះបែកខ្ញែកគ្នា។ សម្តេចតេជោ បានចំអកដែរថា អតីតមេបក្សប្រឆាំងមិនសាកសម ធ្វើមេបក្សនយោបាយនោះទេ ព្រោះជាមេដឹកនាំអសមត្ថភាពដែលធ្វើឲ្យបក្សខ្លួនត្រូវរំលាយ និងបាត់បង់ទីតាំងឈរជើងទាំងស្រុង។ ការលើកឡើងថា សម្តេចតេជោបំបែកលោក សម រង្ស៊ី ចេញពីលោក កឹម សុខាហាក់បីដូចជាបន្តុះបង្អាប់ខ្លួនឯងទៅវិញទេដែលគ្មានសមត្ថភាពគ្រប់គ្រងផ្ទៃក្នុងបក្ស។

គួរកត់សំគាល់ដែរ អតីតមេបក្សប្រឆាំង លោក សម រង្ស៊ី ពីក្រៅប្រទេសនៅតែ គៀងគរ និងរាំងខ្ទប់សហការីរបស់ខ្លួនមិនឲ្យសុំសិទ្ធិធ្វើនយោបាយ គ្រាដែល លោក សម រង្ស៊ីផ្ទាល់ និងមនុស្សជំនិតរបស់លោក៧រូបផ្សេងទៀត ត្រូវបានតុលាការចេញដី ការតាមចាប់ខ្លួនពីគឺរួមគំនិតក្បត់ និងញុះញង់ឲ្យប្រព្រឹត្តិបទឧក្រិដ្ឋជាអាទិ៍នៅកម្ពុជា និងកន្លែងផ្សេងទៀត៕

ភ្នំពេញ ៖ ថ្លែងក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យអាស៊ីអឺរ៉ុប នៅវិទ្យាស្ថានជាតិអប់រំ នាព្រឹកថ្ងៃទី២១ ខែមីនា ឆ្នាំ២០១៩ នេះ សម្តេចនាយករដ្ឋមន្រ្តី ហ៊ុន សែន បានបញ្ជាក់ថា គណៈប្រតិភូសហគមន៍អឺរ៉ុបដែលកំពុងធ្វើទស្សនកិច្ចនៅកម្ពុជា គឺមិនទាន់មានកម្រិតអាចជួបពិភាក្សាការងារជាមួយសម្តេចបានឡើយ។ សម្តេចបន្ថែមថា កម្រិតដែលអាចជួបជាមួយនឹងសម្តេចបាន លុះត្រាតែជា មេ EU ឬស្នងការ EU ជាដើម។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ ថា «ឥឡូវនេះ គេថា ពេលដែលពួកអឺរ៉ុបទៅជួប ស ខេង និយាយផ្សេង ពេលដែលទៅជួប ប្រាក់ សុខុន និយាយផ្សេង ហើយគេមក មិនជួបជាមួយ ហ៊ុន សែន ទេ។ កម្រិតហ្នឹង អត់ត្រូវជួបជាមួយនឹងហ៊ុន សែន ទេ ជួបធ្វើអី? កម្រិតថ្នាក់នាយកដ្ឋាន ថ្នាក់ស្អីៗហ្នឹង ជួបដល់ឧបនាយករដ្ឋមន្រ្តី វាខ្ពស់ពេកទៅហើយ»។

សូមជម្រាបថា ជាកិច្ចចាប់ផ្តើមដំណើរទស្សនកិច្ចនៅកម្ពុជា កាលពីថ្ងៃទី ២០ ខែមីនា ឆ្នាំ២០១៩ លោកស្រី Poala Pampaloni នាយករងផ្នែកគ្រប់គ្រងប្រចាំការតំបន់អាស៊ីប៉ាស៊ីហ្វិច និងជាប្រធានគណៈប្រតិភូសហគមន៍អឺរ៉ុប បានចូលជួបពិភាក្សាជាមួយសម្តេច ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងលោក ប្រាក់ សុខុន ឧបនាយករដ្ឋមន្ត្រី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ។
ក្នុងជំនួបទាំង២នេះ គឺដើម្បីបង្កើននូវកិច្ចសហប្រតិបត្តិការរវាងភាគីកម្ពុជា និងអឺរ៉ុប ពោលគឺមិនមានគោលដៅដកប្រព័ន្ធអនុគ្រោះពន្ធ EBA ពីកម្ពុជានោះទេ៕

ភ្នំពេញ ៖ ដើម្បីអនុវត្តការងារជួសជុល ផ្លាស់ប្តូរ ដំឡើងបរិក្ខារ និងរុះរើគន្លងខ្សែបណ្តាញបង្កលក្ខណៈដល់ការដ្ឋានពង្រីកផ្លូវ អគ្គិសនីកម្ពុជា នឹងផ្អាកការផ្គត់ផ្គង់ភ្លើង នៅតាមតំបន់មួយចំនួន នៅថ្ងៃអាទិត្យ ទី២៤ ខែមីនា ឆ្នាំ២០១៩ ចាប់ពីម៉ោង៩ព្រឹក ដល់ម៉ោង ៥ល្ងាចតំបន់ភ្លើងមួយចំនួនដែលនឹងត្រូវផ្អាកការផ្គង់ផ្គង់ភ្លើងរួមមាន៖ សង្កាត់ទួលសង្កែទី២,គីឡូម៉ែត្រលេខ៦, ឃ្មួញ, ក្រាំងធ្នង់, សំរោងក្រោម, ត្រពាំងក្រសាំង, គោករកា, កោះដាច់ និងបាក់ខែង។ ក្រៅពីនេះ រួមមាន ស្រុកល្វាឯម ស្រុកខ្សាច់កណ្តាល ស្រុកមុខកំពូល ខេត្តកណ្តាល និងស្រុកពារាំង ខេត្តព្រៃវែង៕

ភ្នំពេញ ៖ លោក សួន សេរីរដ្ឋា សរសេរនៅលើបណ្តាញ Facebook របស់លោកថា គណៈស្ថាបនិកគណបក្ស និងក្រុមប្រឹក្សានយោបាយ បានសម្រេចយក ថ្ងៃទី១៨ ខែមីនា ឆ្នាំ២០១៩ ជាថ្ងៃកំណើតបង្កើតគណបក្ស និងបានរើសយកឈ្មោះ ចំនួន២ ដើម្បីដាក់ជូនក្រសួងមហាផ្ទៃសម្រេច គឺទី១ គណបក្សខ្មែរកែទម្រង់ (គ.ខ.ក) Khmer Reform Party (K.R.P) និងទី២ គណបក្សផ្តល់អំណាចពលរដ្ឋ (គ.ផ.អ.ព) People Empowerment Party (P.E.P)។ ឯបាវចនាគឺ ជាតិ ទឹកដី សេរីភាព។

សូមរំលឹកថា មុននឹងឈានដល់ការសម្រេចចិត្តបង្កើគណបក្សនយោបាយថ្មីពេលនេះ លោក សួន សេរីរដ្ឋា ធ្លាប់បានប្តឹងទាមទារគណបក្សអំណាចខ្មែររបស់លោក ពីលោក សួង សុភ័ណ្ឌ មកវិញដែរ នៅក្រោយពេលដែលលោកចេញពីពន្ធនាគារវិញ តែមិនបានជោគជ័យ ហើយមកដល់ពេលនេះ លោក សួន សេរីរដ្ឋា អតីតប្រធានគណបក្សអំណាចខ្មែរ បានសម្រេចបង្កើតគណបក្សថ្មីមួយទៀត បន្ទាប់ពីគណបក្សអំណាចខ្មែររបស់លោក ត្រូវធ្លាក់ក្នុងកណ្តាប់ដៃលោកសួង សុភ័ណ្ឌ អំឡុងពេលលោកជាប់ក្នុងពន្ធនាគារ កន្លងមក។

ទោះជាយ៉ាងនេះក្តី មកដល់ពេលនេះ ក្រសួងមហាផ្ទៃ នៅមិនទាន់សម្រេចបែបណា លើការបង្កើតគណបក្សថ្មីរបស់លោកសួន សេរីរដ្ឋា នេះនៅឡើយទេ៕