ភ្នំពេញ ៖ នៅថ្ងៃទីអាទិត្យ ទី១៧ ខែមីនា ឆ្នាំ២០១៩ នេះ ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រីនរោត្តម មុនិនាថ សីហនុ ព្រះវររាជមាតាជាតិខ្មែរ នឹងយាងទៅពិនិត្យព្រះរាជសុខភាព នៅមន្ទីរពេទ្យ នាទីក្រុងប៉េកាំង ប្រទេសចិន។

បើតាមកម្មវិធី ក្នុងការយាងទៅពិនិត្យព្រះរាជសុខភាពនៅថ្ងៃអាទិត្យ នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា, សម្តេច សាយ ឈុំ ប្រធានព្រឹទ្ធសភា និងសម្តេចហេង សំរិន ប្រធានរដ្ឋ សភា ត្រូវបានរំពឹងថា នឹងអញ្ជើញថ្វាយព្រះរាជដំណើររបស់ព្រះអង្គ ផងដែរ។

ចំណែកកិច្ចការរបស់ប្រមុខរដ្ឋកម្ពុជាស្តីទី នឹងធ្លាក់ទៅលើសម្តេច សាយ ឈុំ ប្រធានព្រឹទ្ធសភា ខណៈដែលព្រះមហាក្សត្រ អវត្តមាននៅក្នុងប្រទេស៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ក៏បានអំពាវនាវដល់មជ្ឈដ្ឋានទូទាំងប្រទេសប្រើប្រាស់ទឹក និងអគ្គិសនីដោយសន្សំសំចៃ ដោយសារពេលនេះ កម្ពុជាកំពុងខ្វះទឹកប្រើប្រាស់ និងខ្វះថាមពលអគ្គិសនីប្រមាណ ៤០០មេហ្គាវ៉ាត់ ក្នុងរដូវប្រាំងឆ្នាំនេះ។ សម្តេចតេជោ បានបញ្ជាក់ថា រាជរដ្ឋាភិបាលកំពុងដោះស្រាយបញ្ហាទាំងនេះយ៉ាងយកចិត្តទុកដាក់។

នៅក្នុងឳកាសអញ្ជើញជាអធិបតីភាព ក្នុងពិធីបើកព្រឹត្តិការណ៌បុណ្យទន្លេលើកទី៥ ដែលរៀបចំធ្វើនៅក្នុងខេត្តកំពង់ឆ្នាំង កាលពីល្ងាចថ្ងៃទី ១៦ ខែមីនា ឆ្នាំ២០១៩ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី បានទស្សនាតាមស្តង់ពិព័រណ៌សមិទ្ធផលនៃក្រសួង មន្ទីរ ស្ថាប័ន រួមនិង វិស័យឯកជននានា ដែលបង្ហាញពីសកម្មភាពនិងសក្តានុពលនៅក្នុងតំបន់ជាប់ដងទន្លេសាបមួយនេះ។

ជាចំនុចសំខាន់ដែល សម្តេចតេជោ នាយករដ្ឋមន្ត្រី បានថ្លែងទាក់ទងនឹងសក្តានុពល និង ស្ថានភាពនៃទឹកទន្លេនោះ សម្តេចក៏បានលើកឡើងដែរថា បច្ចុប្បន្នប្រទេសកម្ពុជាកំពុងខ្វះទឹកប្រើប្រាស់ក្នុងរដូវប្រាំងឆ្នាំនេះ ដែលអាចអូសបន្លាយដល់ខែមិថុនា ដោយសាររងឥទ្ធិពលនៃបាតុភូតធម្មជាតិ ពីក្នុងតំបន់។ បញ្ហាមិនមានប្រភពទឹកគ្រប់គ្រាន់នៅតាមទន្លេទៀតសោត ក៏ជាកត្តាធ្វើអោយ ប្រភពផលិតថាមពលពីវារីអគ្គិសនី ត្រូវថយចុះផងដែរ ដូចនេះទើបធ្វើអោយកម្ពុជា ជួបបញ្ហាខ្វះអគ្គិសនី ដល់ទៅប្រមាណ៤រយមេហ្គាវ៉ាត់ នាពេលនេះ។

ដូចនេះ អ្វីដែលសម្តេចតេជោ អំពាវនាវដល់ប្រជាជនទាំងក្នុងក្រុង និងទីជនបទ ទូទាំងប្រទេស គឺសូមប្រើប្រាស់ទឹក និង អគ្គិសនី ដោយសន្សំសំចៃ។ ដូចគ្នានេះ សម្តេចក៏សូមអោយមានការអធ្យាស្រ័យ ចំពោះបញ្ហាដាច់ចរន្តអគ្គិសនីនៅតាមតំបន់មួយចំនួន ដោយក្នុងនោះ
សម្តេចក៏ស្នើដល់បណ្តាក្រុមហ៊ុនឯកជន និង សណ្ឋាគារជាដើម សូមប្រើប្រាស់ម៉ាស៊ីនភ្លើងជំនួស នៅពេលចាំបាច់។ ទោះជាយ៉ាងណា សម្តេចតេជោ ក៏ថ្លែងបញ្ជាក់ដែរថា រាជរដ្ឋាភិបាលកំពុងរកដំណោះស្រាយចំពោះបញ្ហាទាំងនេះ ដោយពេលនេះកំពុងរង់ចាំការមកដល់នៃនាវារបស់សាធារណៈរដ្ឋតួរគី ដែលដឹកម៉ាស៊ីនភ្លើងសម្រាប់ប្រើប្រាស់ក្នុងអំឡុងពេលកម្ពុជាកំពុងជួបបញ្ហានេះ។

ចំពោះខេត្តកំពង់ឆ្នាំងដែលជាប់នឹងទន្លេសាប សម្តេចតេជោ បានផ្តល់អនុសាសន៌ថា ត្រូវតែធ្វើយ៉ាងណាកុំអោយខេត្តនេះ ត្រឹមតែជាតំបន់ អ្នកទេសចរឆ្លងកាត់ហួសទៅហួសមក មានន័យថា ខេត្តនេះត្រូវតែអភិវឌ្ឍតំបន់ទេសចរណ៌ និង បង្កើតអ្វីដែលទាក់ទាញអ្នកទេសចរមកទស្សនា និង កំសាន្តផងដែរ។

សម្តេចតេជោ ក៏បានប្រកាសថា រាជរដ្ឋាភិបាលសម្រេចហើយថា នឹងសាងសង់ស្ពានឆ្លងកាត់ទន្លេសាប តភ្ជាប់រវាងខេត្តកំពង់ធំ និង ខេត្តកំពង់ឆ្នាំង ដែលមានប្រវែង ៣.៩០០ម៉ែត្រ បូករួមទាំងផ្លូវកៅស៊ូទៀត គឺប្រវែងជាង ៥៧គីឡូម៉ែត្រ។

យោងតាមរបាយការណ៌របស់អភិបាលខេត្តកំពង់ឆ្នាំង ខេត្តនេះមានទន្លេសាប ហូរកាត់ស្រុកកំពង់ត្រឡាច ស្រុករលាប្អៀរ ស្រុកជុលគីរី ស្រុកកំពង់លែង ស្រុកបរិបូណ៌ និង ក្រុងកំពង់ឆ្នាំង ដែលមានប្រវែងសរុប១១០គីឡូម៉ែត្រ។

គួរជម្រាបថា ខេត្តកំពង់ឆ្នាំង មានរមណីយដ្ឋានទេសចរណ៍ចំនួន ២៣កន្លែង ដោយតាមរយៈការជាម្ចាស់ផ្ទះរៀបចំពិធីបុណ្យទន្លេ ឆ្នាំ២០១៩ នេះ ខេត្តកំពង់ឆ្នាំង រំពឹងថា នឹងជំរុញអោយខេត្តនេះ ក្លាយជាគោលដៅទេសចរណ៍ដ៏ទាក់ទាញប្រកបដោយទំនុកចិត្ត៕

ខេត្តកំពង់ចាម ៖ នៅព្រឹកថ្ងៃទី១៦ ខែមីនា ឆ្នាំ២០១៩ វេលាម៉ោង៨:៣០ លោកឧត្តមសេនីយ៍ត្រី សាន សុភា ស្នងការរងទទួលផែនការងារធនធានមនុស្ស តំណាងលោកឧត្តមសេនីយ៍ទោ ឯម កុសល និងសហការី បានអញ្ជើញចូលរួមពិធីកាត់ខ្សែបូរ និងសម្ពោធដាក់ឲ្យប្រើប្រាស់ជាផ្លូវការបណ្ណាល័យ១ខ្នង ខ្លោងទ្វារ ស្រះទឹក និងរបងវិទ្យាល័យ ហ៊ុន សែន ព្រៃទទឹង នៅក្នុងបរិវេណវិទ្យាល័យ ហ៊ុន សែន ព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម ក្រោមអធិបតីភាព លោក ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និង ជាមេបញ្ជាការការកងទ័ពជើងគោក ដោយមានការអញ្ជើញអមដំណើរពីប្រតិភូថ្នាក់ជាតិ លោកអភិបាលនៃគណៈអភិបាលខេត្ត លោក លោកជំទាវ អភិបាលរងខេត្ត អញ្ជើញចូលរួមជាអធិបតីក្នុងពិធីកាត់ខ្សែបូ និង សម្ពោធដាក់ឲ្យប្រើប្រាស់ជាផ្លូវការបណ្ណាល័យ ១ខ្នង ខ្លោងទ្វារ ស្រះទឹក និង របងវិទ្យាល័យ ហ៊ុន សែន ព្រៃទទឹង ។

ពិធីនេះក៏មានវត្តមានអញ្ជើញចូលរួមជាភ្ញៀវកិត្តិយសពីលោក លោកជំទាវ សមាជិកក្រុមប្រឹក្សាខេត្ត អ្នកតំណាងរាស្រ្តមណ្ឌលខេត្តកំពង់ចាម លោក លោកស្រីប្រធានមន្ទីរ អង្គភាពជុំវិញខេត្ត មេបញ្ជាការ បញ្ជាការរងកងកម្លាំងប្រដាប់អាវុធទាំងបី(ថ្នាក់ខេត្ត) លោកអភិបាលនៃគណៈអភិបាលស្រុកព្រៃឈរ លោក លោកស្រីអភិបាលរងស្រុក សមាជិកក្រុមប្រឹក្សាស្រុក ប្រធាន អនុប្រធានការិយាល័យចំណុះ និងជុំវិញស្រុក មេបញ្ជាការ បញ្ជាការរងកងកម្លាំងប្រដាប់អាវុធទាំងបី (ថ្នាក់ស្រុក) អាជ្ញាធរមូលដ្ឋានឃុំ និងមានការចូលរួមពី លោកគ្រូអ្នកគ្រូចូលនិវត្តន៍ អតីតសិស្សវិទ្យាល័យ លោកគ្រូអ្នកគ្រូ សិស្សានុសិស្ស សិស្សកាយរិទ្ធិ+កាកបាទក្រហម យាយជីតាជី និង ប្រជាពលរដ្ឋ យ៉ាងច្រើនកុះករ ប្រមាណជាង ៣.០០០ នាក់។

នាឱកាសនេះដែរ គណៈអធិបតីបានមានមតិសំណេះសំណាល និងបានផ្តល់កិត្តិយសផ្តល់នូវបណ្ណថ្លែងអំណរគុណ ជូនដល់អតីតសិស្សវិទ្យាល័យ ហ៊ុន សែន ព្រៃទទឹង និងសប្បុរសជនដែលបានចូលរួមចំណែក ក្នុងការស្ថាបនាសមិទ្ធផលនានាក្នុងវិទ្យាល័យ៕ ដោយ​ ៖​ សុផល

បន្ទាយមានជ័យ ៖ យ៉ាងហោចផ្ទះយ៉ាងតិច១២ខ្នង និងសាលារៀន០២ខ្នង នៅក្នុងស្រុកថ្មពួក នៃខេត្តបន្ទាយមានជ័យ បានរងនូវការខូចខាតដោយខ្យល់កន្ត្រាក់ ខណ:ដែលមានភ្លៀងកក់ខែកាលពីព្រលប់ថ្ងៃទី១៥ ខែមីនា ឆ្នាំ២០១៩។

លោក ឌៀប ឈួន អភិបាលស្រុកថ្មពួកបានអោយដឹងតាមទូរសព្ទ័នាព្រឹកថ្ងៃទី១៦ ខែមិនាឆ្នាំ២០១៩ នេះថា ភ្លៀងកក់ខែ បានបង្អុររាយប៉ាយពាសពេញទូទាំងស្រុកថ្មពួកដោយក្នុងនោះមានលាយឡំជាមួយនិងខ្យល់កន្ត្រាក់ផងដែរ។ ហេីយមានឃុំចំនួនបីបានរងនូវឥទ្ធិពលនៃខ្យល់កន្ត្រាក់នេះនឹងធ្វេីអោយផ្ទះសម្បែងបងប្អូនប្រជាពលរដ្ឋជាច្រេីនខ្នងរងការខូចខាតធ្ងន់-ស្រាល ព្រមទាំង សាលារៀនផងដែរ។

លោក ឌៀប ឈួន បានបញ្ជាក់អោយដឹងទៀតថា ផ្ទះនិងសាលារៀនដែលរងគ្រោះដោយខ្យល់កន្ត្រាក់ទាំងបីឃុំមាន ភូមិតាយឹងក្នុង ឃុំគំរូខូចខាតផ្ទះបីខ្នង ឃុំគោករមៀត ភូមិគោកព្រិចផ្ទះពីរខ្នង ភូមិស្រែល្អផ្ទះ០៥ខ្នងសាលារៀនបឋមសិក្សាស្រែល្អមួយខ្នង ឃុំថ្មពួក សាលារៀនអន្លង់ត្រាចមួយខ្នង។

នៅក្នុងចំណោមផ្ទះដែលរងផលប៉ះពាល់ទាំង១២ខ្នង មាន៨ខ្នង រងការខូចខាតធ្ងន់ធ្ងរ ខ្លះដួលរលំ ចំណែក៤ខ្នងផ្សេងទៀតគ្រាន់តែរបើកដំបូលតិចតួច។ ចំពោះសាលារៀនទាំងពីរខ្នង គឺរងការខូចខាតធ្ងន់ធ្ងរ។

សូមបញ្ជាក់ផងដែរថាក្រោយមានឧបទ្ទវហតុគ្រោះធម្មជាតិខ្យល់កន្ត្រាក់នេះមិនបានបង្ករអោយមានមនុស្សសត្វ រងគ្រោះថ្នាក់នោះទេ តែគេបានឃើញកម្លាំងអន្តរាគមន៍របស់វរសេនាតូច៥១៤នៃកងពលតូចថ្មើរជើងលេខ៥១ ចំនួន ៧៥នាក់ អធិដ្ឋាននគរបាលស្រុកថ្មពួកចំនួន៥០នាក់បានចេញប្រតិបត្តិការជួយជួសជុល និងរុះរើរង់ចាំកសាងថ្មី៕

សុខភាព ៖ ជំងឺគ្រួសក្នុងតម្រងនោម ក៏អាចសម្លាប់ជីវិតបានផងដែរ ប្រសិនបើអ្នកជំងឺមិនមានការ ព្យាបាលឱ្យជាសះ។ យ៉ាងដូច្នេះហើយទើបក្រុមវេជ្ជបណ្ឌិតផ្នែកឯកទេសខាងជំងឺនេះ បានដាស់តឿនពលរដ្ឋ ដែលបានដឹងថា ខ្លួនមានកើតជំងឺគ្រួសក្នុងតម្រងនោមនេះត្រូវទៅធ្វើការព្យាបាលឱ្យបានត្រឹមត្រូវ និង ទាន់ពេលវេលា។

ថ្លែងក្នុងសន្និសីទសារព័ត៍មានស្តីពីការបើកឱ្យដំណើរការមន្ទីរសម្រាកព្យាបាល អ៊ិនដ្រា ក្នុងរាជធានីភ្នំពេញ ព្រឹកថ្ងៃទី១៥ ខែមីនា ឆ្នាំ២០១៩នេះ ក្រុមវេជ្ជបណ្ឌិតរួមមាន លោក វេជ្ជបណ្ឌិត ចាន់ ប៊ុនថន លោកវេជ្ជបណ្ឌិត យី គក់ និង លោកវេជ្ជបណ្ឌិត លី គឹមហ៊ួរ សុទ្ធតែបានគូសបញ្ជាក់ថា ជំងឺគ្រួសក្នុងតម្រងនោម ដែលកើតឡើងដោយសារការទទួល ទានទឹកដែលមានជាតិកំបោរច្រើន គួបផ្សំនិងចំណីអាហារមួយចំនួនទៀតផងនោះ គួរណាស់ អ្នកជម្ងឺត្រូវទៅរកការព្យាបាលឱ្យបានត្រឹមត្រូវ និង ទាន់ពេលវេលា បើមិនដូច្នោះទេ កាលណា ទុកយូរៗទៅវាក៏អាចគ្រោះថ្នាក់ដល់អាយុជីវិតផងដែរ។

ជាមួយគ្នានេះ ក្រុមវេជ្ជបណ្ឌិតខាងលើបានអះអាងពីសមត្ថភាពរបស់វេជ្ជបណ្ឌិត និង គ្រូពេទ្យក្នុងស្រុក រួមនឹងការធ្វើទំនើបកម្មនៅតាមមន្ទីរពេទ្យ មន្ទីរសម្រាកព្យាបាលនានា ទាំងរដ្ឋ ទាំងឯកជនក្នុងប្រទេសកម្ពុជា តាមរយៈការបំពាក់គ្រឿងបរិក្ខាពេទ្យល្អៗ ទំនើបទាន់ សម័យ គឺដើម្បីឆ្លើយតបទៅនឹងការពិនិត្យ និង ព្យាបាលជម្ងឺជូនពលរដ្ឋឱ្យកាន់តែមាន ប្រសិទ្ធភាពទ្វេឡើង ក្នុងន័យចង់កាត់បន្ថយការធ្វើដំណើរទៅពិនិត្យ និង ព្យាបាលនៅក្រៅ ប្រទេស ដែលអាចជាការចំណាយប្រាក់កាសច្រើនជាងការព្យាបាលនៅក្នុងស្រុក។

បន្ថែមពីលើនេះ វេជ្ជបណ្ឌិតទាំងបីរូបខាងលើក៏បានលើកឡើងអំពីកត្តាក្រមសីលធម៌ វិជ្ជាជីវៈរបស់គ្រូពេទ្យ រួមទាំងតម្លៃ និង លទ្ធផលនៃការព្យាបាលផងដែរថា វាមានសារៈ សំខាន់ខ្លាំងណាស់ក្នុងការទាក់ទាញពលរដ្ឋកម្ពុជា ឱ្យងាកមករកការព្យាបាលនៅក្នុងស្រុក ហើយបើតាមការបញ្ជាក់របស់លោកវេជ្ជបណ្ឌិត ចាន់ ប៊ុនថា ប្រធានមន្ទីរសម្រាកព្យាបាល អ៊ិនដ្រា ថាលោកបានគិតគូខ្ពស់ណាស់អំពីបញ្ហាទាំងនេះ ហើយអ្វីដែលគួរកត់សម្គាល់ជាង នេះទៅទៀតនោះ មន្ទីរសម្រាកព្យាបាល អ៊ិនដ្រា បានដាក់ចេញនូវគោលការណ៍មួយក្នុងការ ជួយសម្រាលការចំណាយចំពោះពលរដ្ឋជាអ្នកជម្ងឺដែលមានជីវភាពខ្វះខាតផងដែរ ដើម្បីជា ការរួមចំណែកជាមួយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្ររបស់ប្រជាពលរដ្ឋ កម្ពុជា៕

ភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ផ្លូវជាតិលេខ៧១C ដែលមានប្រវែងជាង១០០គីឡូម៉ែត្រ តភ្ជាប់ពីខេត្តកំពង់ចាម និងខេត្ត ត្បូងឃ្មុំ គ្រោងនឹងបើកការដ្ឋានសាងសង់ នៅក្នុងឆ្នាំ២០១៩ ដើម្បីសម្រួលដល់ការធ្វើដំណើរ របស់បងប្អូនប្រជាពលរដ្ឋ នៅក្នុងតំបន់នេះ។

ថ្លែងប្រាប់ក្រុម អ្នកសារព័ត៌មាន ក្នុងឱកាសដឹកនាំគណៈប្រតិភូចុះ ពិនិត្យស្ថានភាព និងសិក្សាលទ្ធភាព ក្នុងការសាងសង់ ពង្រីក និងលើកកម្ពស់ គុណភាពផ្លូវជាតិ លេខ៧១សេ កាលពីថ្ងៃទី១៤ ខែមីនា ឆ្នាំ២០១៩ លោក ស៊ុន ចាន់ថុល បានឲ្យដឹងថា ផ្លូវនេះមានប្រវែងសរុបចំនួន ១១៤,៦២ គីឡូម៉ែត្រ បែកចេញពី ផ្លូវជាតិលេខ ៧១ ត្រង់ចំណុចផ្សារ ចំការលើ ស្រុកចំការលើ ខេត្តកំពង់ចាម ឆ្លងស្ពានស្ទឹងត្រង់ ទៅកាន់ភូមិសាស្ត្រ ខេត្តត្បូងឃ្មុំ។

លោកបន្តថា គម្រោងសាងសង់ផ្លូវនេះ ត្រូវបានសិក្សា ដោយក្រុមហ៊ុនសៀងហៃ ហើយ បច្ចុប្បន្នក្រុមហ៊ុននេះ កំពុងសិក្សាបន្ថែម ត្រង់ចំណុច ដែលទទួលរងដោយគ្រោះទឹកជំនន់ ដើម្បីរកដំណោះស្រាយ សមស្របសំដៅធានា ឱ្យបានគុណភាពខ្ពស់។

លោក ទេសរដ្ឋមន្ត្រី បានបញ្ជាក់ថា ឆ្នាំនេះ អាចនឹងមានគម្រោង២ ដែលបើកការដ្ឋាន គឺគម្រោងផ្លូវ៧១Cនេះ និងគម្រោងផ្លូវលេខ១០ ពីសំឡូត ចុះទៅវាលវែង និងឆ្ពោះទៅកោះកុង ហើយកិច្ចព្រមព្រៀងសាងសង់គម្រោងទាំង២នេះ បានចុះហត្ថលេខារួចហើយ នៅឡើយតែប្រាក់កម្ចីធ្វើផ្លូវទាំង២នេះ នៅមិនទាន់បានចុះហត្ថលេខានោះទេ៕

ភ្នំពេញ ៖ លោក មូន ចេអ៊ីន ប្រធានាធិបតីកូរ៉េខាងត្បូង និងលោកជំទាវ បានចាប់ផ្តើមបំពេញទស្សនកិច្ចជាផ្លូវរដ្ឋនៅកម្ពុជា ចាប់ពីថ្ងៃទី១៤ ដល់ថ្ងៃទី១៦ ខែមីនា ឆ្នាំ២០១៩ នេះ តបតាមការអញ្ជើញរបស់ព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី។ លោក និងលោកជំទាវ បានមកដល់អាកាសយានដ្ឋានអន្តរជាតិភ្នំពេញនៅវេលាម៉ោង៣ និង៣០នាទី រសៀលថ្ងៃទី១៤ ខែមីនា នេះ។

នេះគឺជាដំណើរទស្សនកិច្ចជាលើកទី១ របស់លោក មួន ចេអ៊ីន មកកាន់កម្ពុជា និងជាប្រធានាធិបតីកូរ៉េខាងត្បូងទី៣ ដែលបានអញ្ជើញមកទស្សនកិច្ចជាផ្លូវរដ្ឋនៅកម្ពុជា។ អញ្ជើញទទួលដំណើរមកដល់របស់ប្រធានាធិបតីកូរ៉េ មានវត្តមាន សម្តេចចៅហ្វាវាំង គង់ សំអុល ឧបនាយករដ្ឋមន្ត្រីរដ្ឋមន្ត្រីព្រះបរមរាជវាំង លោក ឃួង ស្រេង អភិបាលរាជធានីភ្នំពេញ។ មុនមកដល់កម្ពុជា លោក មួន ចេអ៊ីន (Moon Jae-in) និងលោកជំទាវ របស់លោក គឺលោកស្រី គីម យ៉ុងស៊ុក (Kim Jung-sook) ទើបតែបានបញ្ចប់ដំណើរទស្សនកិច្ចនៅប្រទេសចំនួនពីរនៅតំបន់អាស៊ាន គឺប្រទេសប្រុយណេនិងម៉ាឡេស៊ី។

ក្នុងដំណើរទស្សនកិច្ចរយៈពេល៣ថ្ងៃនៅកម្ពុជា លោក មួន ចេអ៊ីន នឹងចូលគាល់ព្រះមហាក្សត្រកម្ពុជាព្រះបាទសម្តេចព្រះ បរមនាថ នរោត្តម សីហមុនី នៅព្រះបរមរាជវាំងនៅថ្ងៃស្អែក។ បន្ទាប់មក លោក ប្រធានាធិបតីកូរ៉េ នឹងជួបជាមួយសម្តេចតេជោ ហ៊ុន សែន នាយករដ្ឋមន្ត្រីនៅឯវិមានសន្តិភាព។ ភាគីទាំងពីរ នឹងពិភាក្សាអំពីការជំរុញទំនាក់ទំនងទ្វេភាគី និងការពង្រីកកិច្ចសហប្រតិបត្តិការលើវិស័យនានា និងការផ្លាស់ប្តូរយោបល់គ្នាលើបញ្ហាតំបន់និងអន្តរជាតិ ដែលជាក្តីកង្វល់និងផលប្រយោជន៍រួម។ ថ្នាក់ដឹកនាំទាំងពីរ ក៏នឹងអញ្ជើញធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងមួយចំនួនផង។

សម្តេចតេជោនាយករដ្ឋមន្ត្រី បានបញ្ជាក់ថា កម្ពុជានឹងស្នើទៅប្រធានាធិបតីកូរ៉េ ឲ្យជួយទិញផលិតផល កសិផលរបស់កម្ពុជា នៅក្នុងជំនួបនៅថ្ងៃស្អែកនេះ។ ចំពោះគម្រោងក្នុងការ លើកកំពស់ផ្លូវជាតិលេខ៤៨ ស្រែអំបិល-កោះកុង កូរ៉េបានសន្យាផ្តល់ជំនួយ ដល់កម្ពុជា ដើម្បីធ្វើការស្តារ និងលើកកំពស់ឡើងវិញ។

តាមការគ្រោងទុក លោក មួន ចេអ៊ីន និងសម្តេចតេជោនាយករដ្ឋមន្ត្រី ហ៊ុន សែន នឹងអញ្ជើញថ្លែងសុន្ទរកថា ក្នុងវេទិកាធុរកិច្ចកម្ពុជា-កូរ៉េខាងត្បូង ដើម្បីលើកទឹកចិត្តឲ្យមានការវិនិយោគ ការផ្លាស់ប្តូរសេដ្ឋកិច្ច និងពាណិជ្ជកម្ម កាន់តែច្រើនឡើងថែមទៀត។

គិតចាប់ពីឆ្នាំ ២០១៦ដល់ឆ្នាំ២០១៨កន្លងមកនេះ ទំហំពាណិជ្ជកម្មកម្ពុជា-កូរ៉េខាងត្បូង បានកើនឡើងពី៦០២,៦៨២ លានដុល្លារ ដល់៧៤៦,៣៨៥លានដុល្លារ។ ក្រៅពីនេះ ទំហំវិនិយោគរបស់កូរ៉េខាងត្បូងនៅកម្ពុជាមានចំនួន២១៤គម្រោងជាមួយទំហំទឹកប្រាក់ប្រមាណ ៤.៤៧ពាន់លានដុល្លារ គិតចាប់ពីឆ្នាំ១៩៩៦ ដល់ខែមករាឆ្នាំ២០១៩។

សូមបញ្ជាក់ថា នេះគឺជាដំណើរទស្សនកិច្ចលើកទី១ របស់ លោក មួន ចេអ៊ីន មកកាន់កម្ពុជា និងជាប្រធានាធិបតីកូរ៉េខាងត្បូងទី៣ ដែលបានអញ្ជើញមកបំពេញទស្សនកិច្ចជាផ្លូវរដ្ឋនៅកម្ពុជា បន្ទាប់ពីលោក រ៉ូ មូយុន (Roh Moo-hyun) ដែលបានមកទស្សនកិច្ចនៅកម្ពុជា កាលពីខែវិច្ឆិកាឆ្នាំ២០០៦និងលោក លី ម្បុងបាក់ (Lee Myung-bak) ដែលបានធ្វើទស្សនកិច្ចមកកម្ពុជានៅខែតុលាឆ្នាំ២០០៩៕

ភ្នំពេញ ៖ នៅវិមានសន្តិភាពនៅរសៀលថ្ងៃទី១៤ មីនា នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានជួបពិភាក្សាការងារជាមួយ លោក Nguyen Manh Hung រដ្ឋមន្ត្រីព័ត៌មាន និងទូរគមនាគមន៍ នៃសាធារណរដ្ឋសង្គមនិយមវៀតណាម សម្តេចតេជោ ហ៊ុន សែនស្នើឲ្យរដ្ឋមន្ត្រីគមនាគមន៏កម្ពុជា វៀតណាមសហការគគ្នា ក្នុងការពង្រឹកធនធានមនុស្សផ្នែកបច្ចេកវិទ្យា ICT។

នៅក្នុងជំនួបជាមួយ រដ្ឋមន្ត្រីព័ត៌មាន និងទូរគមនាគមន៍ លោក Nguyen Manh Hung សម្តេចតេជោនាយករដ្ឋមន្ត្រី បានស្នើឲ្យក្រសួងទាំងពីរធ្វើយ៉ាងណាចែករំលែកបច្ចេកវិទ្យា និងព័ត៌មានគ្នាទៅវិញទៅមកក្នុងការអភិវឌ្ឍធនធានមនុស្ស ព្រោះថានេះជាកត្តាសំខាន់ដែលអាចជួយកម្ពុជាក្នុងការការអភិវឌ្ឍន៍ផ្នែកបច្ចេកវិទ្យាICT។ លោក Nguyen បានជម្រាបជូនសម្តេចតេជោនាយករដ្ឋមន្ត្រីថា នឹងផ្ដល់អាហារូបករណ៍ដល់កម្ពុជាចំនួន ៤រូបសម្រាប់សិក្សាលើប្រព័ន្ធអេឡិចត្រូនិចICT។ ជាការកត់សំគាល់ វិស័យទូរគមនាគមន៍ប្រទេសវៀតណាម បានបង្កើតនូវបច្ចេកវិទ្យា ការពារសន្តិសុខ តាមបណ្ដាញព័ត៌មាន ដែលអាចតាមដាន ពួកHacker អាចធ្វើការវិភាគទិន្នន័យ និងអាចស្វែងរក និងទប់ស្កាត់ការប្រព្រឹត្តឧក្រិដ្ឋកម្មតាមប្រព័ន្ធអ៊ីនធឺណិត។ នេះបើតាមលោក Nguyen Manh Hung។

លោករដ្ឋមន្ត្រីព័ត៌មាន និងទូរគមនាគមន៍វៀតណាមក៏បានជួបពិភាក្សាការងាត ជាមួយ ឯ.ឧ ត្រាំ អ៊ីវតឹក រដ្ឋមន្រ្តីក្រសួងប្រៃសនីយ៍ និងទូរគមនាគមន៍កម្ពុជាដោយផ្តោតលើបញ្ហា E-Goverment និងប្រព័ន្ធពាណិជ្ជកម្មអេឡិចត្រូនិច(Ecommerce) ក៏ដូចជាទីក្រុងឆ្លាតវៃ។ ភាគីទាំងពីរ បានយល់ស្រប ជាមួយគ្នាក្នុងការពិនិត្យ និងប្រើប្រាស់ប្រព័ន្ធ 5G ក៏ដូចជាប្រព័ន្ធបង់ប្រាក់តាមប្រព័ន្ធអេឡិចត្រូនិច និងការរៀបចំឲ្យមាន Data Centers និងកិច្ចសហប្រតិបត្តិការក្នុងការផ្លាស់ប្ដូរព័ត៌មានក៏ដូចជាកិច្ចសហប្រតិបត្តិការក្នុងការអភិវឌ្ឍន៍ធនធានមនុស្ស។

សម្ដេចតេជោនាយករដ្ឋមន្ត្រី បានសំដែងនូវការអបអរសាទរចំពោះវឌ្ឍនភាពរបស់ប្រទេសវៀតណាម ជាពិសេសលើវិស័យប្រព័ន្ធបច្ចេកវិទ្យា ការពារសន្តិសុខនេះ ហើយក៏បានស្វាគមន៍នូវអ្វីដែលបានពិភាក្សា និងការព្រមព្រៀងគ្នាជាមួយ ឯ.ឧ ត្រាំអ៊ីវតឹក រដ្ឋមន្រ្តីក្រសួងប្រៃសនីយ៍ និងទូរគមនាគមន៍កម្ពុជា៕

​ខេត្តកំពង់ចាម ៖ អគ្គិភ័យដ៏កំណាចមួយ បានឆាបឆេះផ្ទះឈើរបស់ប្រជាពលរដ្ឋអស់ចំនួន២ខ្នង ប្រក់ក្បឿង ខ្ទេចស្ទើរគ្មានសល់ ដែលបណ្តាលមកពីការឆ្លងចរន្តអគ្គិសនី ប៉ុន្តែមិនបណ្តាលឲ្យនរណាម្នាក់រងគ្រោះថ្នាក់ទេ។

ហេតុការណ៍នេះ បានកើតឡើងនៅវេលាម៉ោង១១ និង៣០នាទី ថ្ងៃទី១៤ ខែមីនា ឆ្នាំ២០១៩ ភូមិថ្មី ឃុំរកាគយ ស្រុកកងមាស ខេត្តកំពង់ចាម។

ក្រោយពីទទួលបានព័ត៌មានភ្លាម លោក គួច ចំរើន អភិបាលខេត្តកំពង់ចាម បានចាត់តាំងកម្លាំង អន្តរាគមន៍ចុះជួយ បាញ់ទឹកពន្លត់ដោយប្រើប្រាស់រថយន្តអស់បីគ្រឿង និងប្រើទឹកបួនរថយន្តផងដែរ។

គូរបញ្ជាក់ផងដែរថា អគ្គិភ័យនេះបានឆាប់ឆេះផ្ទះសម្បែងពលរដ្ឋចំនួន២ខ្នង ខូចខាតសម្ភារៈទ្រព្យសម្បត្តិអស់មួយចំនួន និងសត្វគោចំនួន២ក្បាលត្រូវអគ្គិភ័យឆេះងាប់ក្នុងភ្លក់ភ្លើង។

លោក គួច ចំរើន បានស្នើឲ្យកងកម្លាំងសមត្ថកិច្ចបន្តខិតខំជួយដោះស្រាយរាល់ទុកលំបាករបស់ប្រជាពលរដ្ឋតាមមូលដ្ឋាន និងព្យាយាមផ្សព្វផ្សាយលើបញ្ហាអគ្គិភ័យ គឺធ្វើយ៉ាងណាឲ្យបងប្អូនប្រជាពលរដ្ឋជួយរក្សាទឹក និងមានឧបករណ៍ពន្លត់អគ្គិភ័យប្រចាំផ្ទះរៀងៗ ដើម្បីជួយទប់ស្កាត់បន្ទាន់។

លោកបានជំរុញឲ្យកងកម្លាំងពន្លត់អគ្គិភ័យ បន្តត្រៀមបច្ចេកទេសទឹក ដើម្បីជួយសង្គ្រោះ និងទប់ស្កាត់លើបញ្ហាអគ្គិភ័យដែលអាចកើតមានឡើងជាយថាហេតុ៕ ដោយ ៖ សុផល