ម៉ិចស៊ីកូ ៖ ទីភ្នាក់ងារព័ត៌មានចិន ស៊ីនហួរ ចេញផ្សាយនៅព្រឹកថ្ងៃសុក្រនេះថា ចំនួនមនុស្សស្លាប់ដោយសារតែគ្រោះរញ្ជួយដីដ៏កក្រើកនៅភាគកណ្តាលប្រទេសម៉ិចស៊ីកូកាលពីថ្ងៃអង្គារកន្លងទៅ បានកើនឡើងដល់ ២៧៣នាក់ហើយ ខណៈដែលអ្នករងរបួសមានជាង ២,៦០០នាក់។
យោងតាមសេចក្តីប្រកាសពីទីភ្នាក់ងារគាំពារជនស៊ីវិលជាតិម៉ិចស៊ីកូបានឲ្យដឹងថា មនុស្សចំនួន១៣៧នាក់បានបាត់បង់ជីវិត នៅក្នុងរដ្ឋធានីម៉ិចស៊ីកូស៊ីធី, ៧៣នាក់នៅរដ្ឋម៉ូរេឡូស, ៤៣នាក់ នៅរដ្ឋភឺប្លា, ១៣នាក់ នៅរដ្ឋម៉ិចស៊ីកូ, ០៦នាក់ នៅរដ្ឋហ្គឺរេរ៉ូ, និងម្នាក់នៅរដ្ឋអូសាខា ។ ក្រៅពីនេះអគារប្រមាណ ៤០ខ្នង បានដួលរលំទាំងស្រុង ស្របពេលដែល ២,៩០០ខ្នង បានរងការខូចខាត។
ដោយឡែកបើតាមក្រសួងសុខាភិបាលម៉ិចស៊ីកូ មន្ទីរពេទ្យនានា បានទទួលព្យាបាលអ្នករបួសចំនួន ២,៦៣៣នាក់ ដោយភាគច្រើនគឺនៅក្នុងរដ្ឋធានីរបស់ប្រទេសតែម្តង ជាទីដែលមានមនុស្សប្រមាណ ១,៩៩៨នាក់ បានរងរបួសធ្ងន់ស្រាល។
ទោះបីយ៉ាងណាបើតាមទីភ្នាក់ងារដដែលបានបញ្ជាក់ថា ចំនួននេះទំនងជាអាចនឹងកើនឡើងខ្លាំងថែមទៀត ខណៈដែលប្រតិបត្តិការជួយសង្គ្រោះកំពុងបន្តប្រព្រឹត្តនៅឡើយ គ្រាដែលសាកសពបន្ថែម កំពុងត្រូវគេទាញចេញពីគំនរបាក់បែកនៃអគារ ដែលបានទទួលរងការបំផ្លិចបំផ្លាញ ដោយសារគ្រោះរញ្ជួយផែនដីកម្រិតធ្ងន់ធ្ងររហូតដល់ ៧.១រ៉ិចទ័រដ៏សាហាវប្រចាំឆ្នាំនេះ៕
ញូយ៉ក ៖ រដ្ឋមន្ត្រីការបរទេសកូរ៉េខាងជើង លោក Ri Yong-ho បានថ្លែងថា មេដឹកនាំលោក គីម ជុងអ៊ុន បានអំពាវនាវឱ្យមានការចាត់វិធានការសកម្មភាពកំរិតខ្ពស់បំផុត នៅក្នុងប្រវត្តិសាស្ត្រកូរ៉េខាងជើង ប្រឆាំងនឹងសហរដ្ឋអាមេរិក ព្រមពេលជាមួយគ្នានេះកូរ៉េខាងជើង អាចនឹងដឹកនាំការធ្វើតេស្ដគ្រាប់បែកនុយក្លេអ៊ែរអ៊ីដ្រូសែនដ៏មានឥទ្ធិពលរបស់ខ្លួន នៅឯមហាសមុទ្រប៉ាស៊ីហ្វិកផងដែរ។ នេះបើតាមទីភ្នាក់ងារសារព័ត៌មាន យ៉ុនហាប់ ចេញផ្សាយនៅព្រឹកថ្ងៃសុក្រនេះ។
ការថ្លែងបែបនេះរបស់ លោក Ri Yong-ho ធ្វើឡើងបន្ទាប់ពី លោក គីម ជុងអ៊ុន ព្រមានចាត់វិធានការសងសឹក ឆ្លើយតបទៅនឹងប្រធានាធិបតីអាមេរិក លោក ដូណាល់ ត្រាំ ដែលបានគំរាមកម្ទេចកូរ៉េខាងជើងឱ្យក្លាយជាផេះ។ លោក Ri បានបញ្ជាក់ថា «វិធានការទាំងនោះ អាចជាការធ្វើតេស្ដបំផ្ទុះគ្រាប់បែកនុយក្លេអ៊ែរអ៊ីដ្រូសែន នៅក្នុងមហាសមុទ្រប៉ាស៊ីហ្វិក… តែយ៉ាងណា យើងនៅមិនទាន់ដឹងថា ផែនការសកម្មភាពនេះអាចនឹងត្រូវអនុវត្តន៍ ឬយ៉ាងណានោះទេ ត្បិតវាស្ថិតនៅក្រោមបញ្ជាដោយ លោក គីម ជុងអ៊ុន»។
លោក ដូណាល់ ត្រាំ នៅក្នុងមហាសន្និបាតនៃអង្គការសហប្រជាជាតិនៅឯទីស្នាក់ការកណ្តាល UN នាបុរីញូយ៉កកាលពីថ្ងៃព្រហស្បតិ៍បានព្រមានកម្ទេចកូរ៉េខាងជើង ឱ្យក្លាយជាផេះ ដើម្បីការពារសន្តិភាព និងសន្តិសុខក្នុងតំបន់ នៅក្នុងករណីទីក្រុងព្យុងយ៉ាង ហ៊ានគំរាមកំហែងដល់សម្ព័ន្ធមិត្ត និងសហរដ្ឋអាមេរិក៕
រាជធានីភ្នំពេញ ៖ យោងតាមសេចក្តីប្រកាសព័ត៌មានព្យាករណ៍អាកាសធាតុប្រចាំសប្តាហ៍របស់ក្រសួងធនធានទឹក និងឧតុនិយមបានឲ្យដឹងថា ភ្លៀងនឹងធ្លាក់រាយប៉ាយកើនឡើងជាបន្តបន្ទាប់ក្នងកំរិតពីមធ្យមទៅច្រើនក្នុងក្របខ័ណ្ឌស្ទើរទូទាំងប្រទេសចាប់ពីថ្ងៃទី ២០ ដល់ថ្ងៃទី២៧ ខែកញ្ញា ឆ្នាំ២០១៧។
សូមអានសេចក្តីប្រកាសព័ត៌មានព្យាករណ៍អាកាសធាតុរបស់ក្រសួងធនធានទឹកខាងក្រោម៖
រាជធានីភ្នំពេញ ៖ ៣ថ្ងៃចុងក្រោយនៃពិធីបុណ្យភ្ជុំបិណ្ឌ គ្រោះថ្នាក់ចរាចរណ៍នៅទូទាំងប្រទេសកើតឡើងចំនួន៥២លើក បណ្តាលឲ្យមនុស្ស២៦នាក់ បានស្លាប់បាត់បង់ជីវិត ក្នុងនោះមាននារី៤នាក់ និងរបួសធ្ងន់ស្រាល ៩០នាក់។ បើធៀបនឹងឆ្នាំ២០១៦ ចំនួនគ្រោះថ្នាក់ចរាចរណ៍កើនឡើង១០ ខណៈចំនួនអ្នកស្លាប់ និងរបួសកើន៣១នាក់។ គ្រោះថ្នាក់ចរាចរណ៍៥២លើកនេះ បណ្តាលឲ្យម៉ូតូខូច៧៣គ្រឿង រថយន្តតូច២២គ្រឿង រថយន្តធំ ១គ្រឿង យានយន្តផ្សេងៗ ១គ្រឿង។
យោងតាមរបាយការណ៍បូកសរុបគ្រោះថ្នាក់ចរាចរណ៍អំឡុងបុណ្យភ្ជុំបិណ្ឌ៣ថ្ងៃចុងក្រោយរបស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឲ្យដឹងនៅល្ងាចថ្ងៃទី២១ ខែកញ្ញា ឆ្នាំ២០១៧នេះថា កត្តាដែលនាំឲ្យកើនមានគ្រោះថ្នាក់ចរាចរពីថ្ងៃទី១៩ ដល់ ២១ ខែកញ្ញា នេះ រួមមាន៖ ល្បឿនលឿន ១៣លើក, ស្រវឹង ៨លើក, ប្រជែង ៥លើក, មិនគោរពសិទ្ធិ ៩លើក, មិនប្រកាន់ស្តាំ ៧លើក, បត់គ្រោះថ្នាក់៩លើក, កត្តាយានយន្ត១លើក។
របាយការណ៍បន្តថា ខេត្តព្រៃវែង កើតមានគ្រោះថ្នាក់ចរាចរណ៍៤លើក ស្លាប់៧នាក់ របួស៦នាក់, កំពង់ស្ពឺ ២លើក ស្លាប់៤នាក់, កណ្តាល៤លើក ស្លាប់៤នាក់, កំពង់ចាម៦លើក ស្លាប់៣នាក់ របួស៧នាក់, កំពង់ធំ ៣លើក ស្លាប់២នាក់ របួស៣នាក់, តាកែវ ៣លើក ស្លាប់ម្នាក់ របួស៦នាក់ និងខេត្តព្រះសីហនុ កើតចំនួន ២លើក ស្លាប់ម្នាក់ របួស៣នាក់៕
បាត់ដំបងៈស្ត្រីពពោះគ្រប់ខែមកសំរាកសំរាលកូននៅមន្ទីរពេទ្យពហុព្យាបាលសុវណ្ណស្លាប់បាត់បង់ជីវិតទាំងម្តាយនិងកូនក្នុងផ្ទៃ ក្រោយពេលក្រុមគ្រូពេទ្យពិនិត្យ និងព្បាបានដោយឲ្យលេបថ្នាំ ចាក់សេរ៉ូម បានប៉ុន្មានជិកន្លះម៉ោង ក៌ប្រត្តិកម្មថ្នាំបែក ពពុះទឹកមាត់និងហូរឈាមចេញតាមមាតប្រកាច់ស្លាប់តែម្តង។ នេះបើតាមការបញ្ជាក់របស់ សាច់ញាតិស្ត្រីរងគ្រោះ ។
ហេតុការណ៌នេះបានកើតឡើងនៅវេលាម៉ោង18.00នាទីថ្ងៃទី16 .9.2017នៅមន្ទីពហូព្យាបាល សុវណ្ណ ស្ថិត ក្នុង ភូមិកំពង់ក្របី សង្កាត់ស្វាយប៉ោក្រុង និខេត្តបាត់ដំបង។
លោក ទង អេលីយ៉ា ភេទប្រុសអាយុ22ឆ្នាំ មុខរបរជាកម្មករ រស់នៅភូមិអូរតាពៅ ឃុំតាគ្រាមស្រុកបាណន់បាននិយាយថាៈគាត់បាននាំប្រពន្ធមកពិនិត្យផ្ទៃពោះនៅមន្ទីរពេទ្យសុវណ្ណនៅម៉ោង8,30នាទីថ្ងៃទី16ខែ9ឆ្នា2017 គ្រូពេទ្យពិនិត្យ ថាៈឈឺពោះកើតកូននៅ ពេល ល្ងាច ឬ យប់នេះ ។ គាត់បន្តថា ពេទ្យឱ្យ លេបថ្នាំ ប៉ុន្មាន គ្រាប់ ប្រពន្ធគាត់លេបថ្នាំរួចហើយនៅពេល ម៉ោង ១។
បើយោងតាមរបាយការណ៌របស់សមត្ថកិច្ចនគរបាលស្រុកបានអោយដឹងថាៈកម្លាំងការិយា លយ័បច្ចេកទេសនគរបាលខេត្តនិងកម្លាំងការិយាលយ័ព្រហ្មទណ្ឌ័កំរិតធ្ងន់កម្លាំងអធិកាស្រុក នគរបាលប៉ុស្តិរដ្ធ បាលតាគ្រាមក្រុមប្រឹក្សាឃុំរួមនិកម្លាំងជំនាញពេទ្យខេត្តបានធ្វើកាត្រួតពិនត្យសាកសពស្ត្រីរងគ្រោះអ៊ុំសុភណ្ឌ័ភេទស្រីអាយុ42ឆ្នាំនៅក្រុមទី7ភូមិអូរតាពៅឃុំតាគ្រាមស្រុកបាណន់ដែលបានស្លាប់នៅមន្ទីរពេទ្យពហុព្យាល សុវណ្ណ នៅវេលាម៉ោងប្រហែល18,00ថ្ងៃទី16ខែ9ឆ្នាំ2017 ។
សមត្ថកិច្ចបញ្ជាក់ថាៈ ក្រោយពីពិនិត្យសាកសពជនរងគ្រោះអ៊ុំសុភណ្ឌ័ រួចបានប្រគល់ ទៅ អោយឈ្មោះ នង អេលី យ៉ា ជាប្តីយកទៅធ្វើបុណ្យតាមប្រពៃណី ។
សូមបញ្ជាក់ថាៈ ជនរង គ្រោះ ត្រូវបាន ប្តី នាំយកមកពិនិត្យផ្ទៃពោះដែលគ្រប់ខែ នៅមន្ទីរពេទ្យ ពហុព្យាបាល សុវណ្ណ នៅបាត់ដំបង ហើយក៌បានស្លាប់នៅទីនោះបន្ទាប់ពីក្រុមគ្រូបេទ្យបានពិនិត្យនិងចាក់ថ្នាំ បណ្តោងសេរ៉ូម៕
សេអ៊ូល ៖ មេដឹកនាំកំពូលផុតលេខកូរ៉េខាងជើង លោក គីម ជុងអ៊ុន បានប្តេជ្ញាយ៉ាងមុតមាំថា នឹងសម្រេចកម្មវិធីនុយក្លេអ៊ែរ នៃប្រទេសរបស់លោកឲ្យបានដោយ ។ នេះបើតាមការចេញផ្សាយដោយ ទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅព្រឹកនេះ។
លោក គីម បានលើកឡើងបែបនេះ ក្នុងអំឡុងពេលចុះត្រួតពិនិត្យ ការតេស្តបាញ់មីស៊ីលផ្លោងរយៈចម្ងាយមធ្យមធុន Hwasong-12 ដែលបានហោះរំលងប្រទេសជប៉ុន កាលពីព្រលឹមថ្ងៃសុក្រម្សិលមិញ។ នាឱកាសនោះដែរមេដឹកនាំកូរ៉េខាងជើងរូបនេះបានថ្លែងថា «យើងគួរតែបង្ហាញឲ្យច្បាស់ៗ ដល់ពួកមហាអំណាចថា យើងនឹងនៅអាចសម្រេចគោលដៅ នៃការអភិវឌ្ឍនុយក្លេអ៊ែរបានដោយរបៀបណា ទោះបីជាមានការដាក់ទណ្ឌកម្ម និងរារាំងរាប់មិនអស់ពីពួកគេយ៉ាងណាក្តី»។
លោក គីម ជុនអ៊ុន បានបន្តថា «គោលដៅធំចុងក្រោយរបស់យើង គឺដើម្បីបង្កើតឲ្យមានតុល្យភាពនៃឥទ្ធិពលយោធាជាមួយសហរដ្ឋអាមេរិក ហើយធ្វើឲ្យមេដឹកនាំអាមេរិកទាំងឡាយ លែងហ៊ាននិយាយពីជម្រើសនៃការប្រើប្រាស់កងទ័ពរបស់ពួកគេទៀត មកលើកូរ៉េខាងជើង»៕
ប៉េកាំង ៖ រដ្ឋាភិបាលចិនបាននិយាយថា ខ្លួនជំទាស់យ៉ាងខ្លាំងទៅនឹងការបាញ់សាកល្បងមីស៊ីលផ្លោង ICBM យ៉ាងគគ្លើនជាថ្មីម្តងទៀតរបស់កូរ៉េខាងជើង ហើយចាត់ទុកថា ជាទង្វើប្រឆាំងនឹងដំណោះស្រាយរបស់ក្រុមប្រឹក្សាសន្តិសុខនៃអង្គការសហប្រជាជាតិ។ នេះបើតាមការចេញផ្សាយដោយសារព័ត៌មានចិនស៊ីនហួរ។
ថ្លែងនៅក្នុងសេចក្ដីថ្លែងការណ៍របស់ខ្លួន អ្នកនាំពាក្យក្រសួងការបរទេសចិន លោកស្រី Hua Chunying បានបញ្ជាក់ថា៖ «ចិនជំទាស់នឹងការធ្វើតេស្ដមីស៊ីលរបស់កូរ៉េខាងជើង ដែលជាទង្វើរំលោភបំពានលើ ដំណោះស្រាយក្រុមប្រឹក្សាសន្តិសុខ»។ លោកស្រី Hua បន្ថែមទៀតថា ស្ថានភាពនៅលើឧបទ្វីបកូរ៉េ កំពុងស្ថិតនៅក្នុងសភាពស្មុគស្មាញ រសើប និងគួរឱ្យព្រួយបារម្ភ ដូច្នេះភាគីពាក់ព័ន្ធទាំងអស់ គួរតែរក្សាភាពអត់ធ្មត់ និងជៀសវាងការធ្វើសកម្មភាពទាំងឡាយណាបង្កឱ្យភាពតានតឹងកាន់តែកើនឡើង។
សូមរម្លឹកថា កាលពីព្រឹកថ្ងៃសុក្រកូរ៉េខាងជើងបានបាញ់សាកល្បងមីស៊ីលផ្លោងរយៈចំងាយមធ្យមមួយគ្រាប់ចេញពីតំបន់ស៊ូណាន Sunan ក្នុងទីក្រុងព្យុងយ៉ាង ដោយវារត់បានចម្ងាយប្រមាណ ៣,៧០០គីឡូម៉ែត្រ និងហោះឡើងកម្ពស់ប្រហែល៧៧០គីឡូម៉ែត្រ រំលងពីលើដែនអាកាសនៃកោះហុកកៃដូ មុននឹងធ្លាក់នៅចម្ងាយប្រហែលជា ២,០១៥គីឡូម៉ែត្រភាគខាងកើតប្រទេសជប៉ុន ទៅក្នុងមហាសមុទ្រប៉ាស៊ីហ្វិក៕
រាជធានីភ្នំពេញ ៖ លោក ប៉ាក ច័ន្ទសំបូរ ប្រធានក្រុមប្រឹក្សាជំនុំជម្រះសាលាឧទ្ធរណ៍ សម្រេចតម្កល់សាលក្រមសាលាដំបូងរាជធានីភ្នំពេញ ទុកជាបានការដដែល ពោលគឺផ្តន្ទាទោសលោក គឹម សុខ អ្នកឃ្លាំមើលបញ្ហាសង្គម និងនយោបាយ ហើយមជ្ឈដ្ឋានមួយចំនួនហៅថា អ្នកវិភាគមាត់ដាច នោះ ដាក់ពន្ធនាគារ១៨ខែដដែល ។ ការសម្រេចបែបនេះធ្វើឡើងក្រោយបញ្ចប់សវនាការនៅថ្ងៃទី១៥ ខែកញ្ញា ឆ្នាំ២០១៧។
គួររំលឹកថា សាលាដំបូងរាជធានីភ្នំពេញ កាលពីរសៀលថ្ងៃទី១០ ខែសីហា ឆ្នាំ២០១៧ ប្រកាសសាលក្រមផ្តន្ទាទោសលោកគឹម សុខ ដាក់ពន្ធនាគាររយៈពេល១៨ខែ ពិន័យ៨លានរៀលចូលថវិការដ្ឋ និង សងសំណងជំងឺចិត្តដល់ដើមបណ្ដឹងចំនួន៨០០លានរៀល ករណីចោទប្រកាន់ថា គណបក្សប្រជាជនកម្ពុជា ជាអ្នកសម្លាប់បណ្ឌិត កែម ឡី ។
លោក គឹម សុខ ជាប់ចោទចំនួនពីរបទល្មើស គឺ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ។
បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចតេជោ ដូចគ្នា គឺពាក់ព័ន្ធការដែលលោក គឹម សុខ បានចោទប្រកាន់ ថា រាជរដ្ឋាភិបាលកម្ពុជា បានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ៕
រាជធានីភ្នំពេញ ៖ ថ្លែងទៅកាន់កម្មករ កម្មការិនីរាប់ម៉ឺននាក់ កាលពីព្រឹកមិញសម្តេច ហ៊ុន សែន បានថ្លែងថា « យើងមិនបានចោទប្រកាន់សហរដ្ឋអាមេរិកនោះទេ ប៉ុន្តែ កឹម សុខា ទេ ដែលចោទសហរដ្ឋអាមេរិក, ដូច្នេះសូមឲ្យអាមេរិកក៏ដូចទូតអាមេរិកប្រចាំកម្ពុជា ស្តាប់ឲ្យច្បាស់ ហើយឆ្លើយតបឬបកស្រាយឲ្យបានច្បាស់លាស់អំពីសំដី កឹម សុខា ។
សម្តេច ហ៊ុន សែន ប្រកាសខ្លាំងៗដោយចោទសួរឯកអគ្គរដ្ឋទូតអាមេរិកនៅកម្ពុជាថា តើការនិយាយរបស់លោក កឹម សុខា អំពីផែនការរៀបចំធ្វើបដិវត្តពណ៌ ពិត ឬមិនពិត ? ដូច្នេះស្នើឲ្យឯកអគ្គរដ្ឋទូតចេញមុខមកពន្យល់ដល់ប្រជាពលរដ្ឋកម្ពុជា ។ ទន្ទឹមនោះសម្តេចក៏ បានប្រកាសអំពាវនាវដល់ប្រជាពលរដ្ឋខ្មែរទាំងអស់ត្រូវរួបរួមគ្នាលើកកម្ពស់ជាតិនិយម ហើយកំចាត់ពួកបរទេសឈ្លានពាន ដើម្បីឯករាជ្យ សេរីភាព និងអធិបតេយ្យភាពរបស់កម្ពុជា ៕
រាជធានីភ្នំពេញ ៖ តុលាការរាជធានីភ្នំពេញបានបដិសេធសំណើរបស់ លោក ម៉ៅ មុនីវណ្ណ តំណាងរាស្ត្រគណបក្សសង្គ្រោះជាតិ ដែលស្នើសុំសួរសុខទុក្ខ លោក កឹម សុខា នៅក្នុងពន្ធនាគារត្រពាំងផ្លុង ក្នុងខេត្តត្បូងឃ្មុំ ខណដែលតុលាការបញ្ជាក់ថា ដោយសារតែសំណុំរឿង លោក កឹម សុខា កំពុងស្ថិតនៅក្នុងចំណាត់ការស៊ើបសួរ និងស្រាវជ្រាវប្រមូលភស្តុតាងនានា ហើយចៅក្រមមិនទាន់បានសាកសួរជនត្រូវចោទនៅឡើយ ។
សូមបញ្ជាក់ថា កាលពីថ្ងៃទី១៤ ខែកញ្ញា ឆ្នាំ២០១៧នេះ លោក ម៉ៅ មុនីវណ្ណ បានដាក់លិខិតទៅ សាលាដំបូងរាជធានីភ្នំពេញ ដើម្បីស្នើសុំឱ្យរូបលោក និងសមាជិកគណបក្សសង្គ្រោះជាតិ ១១នាក់ផ្សេងទៀត ចូលសួរសុខទុក្ខ លោក កឹម សុខា នៅពន្ធនាគារត្រពាំងផ្លុង នាថ្ងៃទី១៨ ខែកញ្ញា ឆ្នាំ២០១៧៕
រាជធានីភ្នំពេញ ៖ នាយករដ្ឋមន្ដ្រីនៃព្រះរាជាណាចក្រកម្ពុជា សម្តេច ហ៊ុន សែន បានប្រកាសថា កម្ពុជានឹងផ្អាកកិច្ចសហប្រតិបត្តិការ ជាមួយសហរដ្ឋអាមេរិក លើការស្វែងរកឆ្អឹងខ្មោចទាហានអាមេរិកនៅទឹកដីកម្ពុជា ខណដែលគេដឹងថា ទាហានអាមេរិកតិចជាង៩០នាក់ទេ ដែលបានស្លាប់នៅកម្ពុជាអំឡុងពេលសង្គ្រាមស៊ីវិលនៅកម្ពុជា ក្នុងនោះអដ្ឋិធាតុទាហានអាមេរិក ជាង៤០នាក់ប៉ុណ្ណោះ ដែលបានរកឃើញនាពេលកន្លងទៅ ។
សម្តេច ហ៊ុន សែន នាយករដ្ឋមន្ត្រីនៃកម្ពុជា លើកឡើងថា កម្ពុជាផ្អាកកិច្ចសហប្រតិបត្តិការជាមួយសហរដ្ឋអាមេរិកក្នុងការស្វែងរកឆ្អឹងខ្មោចទាហានអាមេរិក ដែលបានបាត់ខ្លួននៅកម្ពុជាកាលពីសម័យសង្គ្រាម ។ សម្តេចបញ្ជាក់ថា ក្រសួងការបរទេសកម្ពុជានឹងផ្ញើកំណត់ទូតទៅកាន់សហរដ្ឋអាមេរិក នាពេលឆាប់ៗនេះ ជុំវិញការផ្អាកកិច្ចសហប្រតិបត្តិការរវាងកម្ពុជានិងសហរដ្ឋអាមេរិកលើការស្វែងរកឆ្អឹងខ្មោចទាហានអាមេរិកលើទឹកដីកម្ពុជា ៕
បាកដាដ ៖ ទីភ្នាក់ងារព័ត៌មានចិន ស៊ីនហួរ ចេញផ្សាយនៅព្រឹកនេះបានឲ្យដឹងថា គិតត្រឹមព្រឹកថ្ងៃសុក្រនេះចំនួនមនុស្សស្លាប់បានកើនឡើងរហូតដល់៨៣នាក់ហើយ ខណៈ៩៣នាក់រងរបួសនៅក្នុងសកម្មភាពវាយប្រហារដោយបំផ្ទុះរថយន្ត និងបាញ់រះនៅក្បែរទីក្រុង ណាស្រ៊ីយ៉ាហ៍ (Nasriyah) ក្នុងខេត្ត ឌីការ (Dhi Qar) ភាគខាងត្បូងប្រទេសអ៊ីរ៉ាក់ កាលពីម្សិលមិញ។
ប្រធាននាយកដ្ឋានសុខាភិបាលប្រចាំខេត្តខាងលើបានប្រាប់ឲ្យដឹងថា «តួលេខនៃចំនួនអ្នករងគ្រោះចុងក្រោយបំផុត ដោយសារហេតុការណ៍វាយប្រហារដោយបំផ្ទុះរថយន្ត និងបាញ់រះនៅតំបន់ ហ្វាដាក់ (Fadak) ក្នុងខេត្ត Dhi Qar បានកើនដល់ ៨៣នាក់ស្លាប់ និង ៩៣នាក់របួស ស្របពេលដែលមនុស្សជាច្រើននាក់ទៀត ក្នុងចំណោមនោះកំពុងស្ថិតក្នុងស្ថានភាពធ្ងន់ធ្ងរខ្លាំង»។
សកម្មភាពពាក់ព័ន្ធគ្នាទាំងពីរករណី បានកើតឡើងនៅពេលដែលខ្មាន់កាំភ្លើងមួយក្រុមបានសម្រុកចូលវាយប្រហារទៅលើអាហារដ្ឋានមួយកន្លែង ក្នុងតំបន់ Fadak ភាគខាងលិចក្រុង Nasriyah ដែលនៅប្រមាណ ៣៧៥គីឡូម៉ែត្រ ភាគខាងត្បូងនៃទីក្រុងបាកដាដ ខណៈរថយន្តបង្កៃគ្រាប់បែកមួយគ្រឿង ត្រូវបានគេបំផ្ទុះនៅប៉ុស្តិ៍ត្រួតពិនិត្យមួយកន្លែង នៅមិនឆ្ងាយប៉ុន្មានពីអាហារដ្ឋាន ដែលបានរងការវាយប្រហារ។
ទោះយ៉ាងណាក្រោយមកក្នុងថ្ងៃដដែល ក្រុមភេរវករ ISIS បានចេញមុខអះអាង តាមបណ្តាញសារព័ត៌មានរបស់ខ្លួនថា ជាអ្នកនៅពីក្រោយខ្នងនៃទង្វើនេះ៕
រាជធានីភ្នំពេញ ៖ សាលាឧទ្ធរណ៍នៅព្រឹកថ្ងៃទី១៥ ខែកញ្ញានេះបានបើកសវនាការលោក គឹម សុខ អ្នកឃ្លាំមើលបញ្ហាសង្គម និងនយោបាយករណីចោទប្រកាន់ថា គណបក្សប្រជាជនកម្ពុជា សម្លាប់បណ្ឌិតកែម ឡី ។
លោក គឹម សុខ ត្រូវបានសាលាដំបូងរាជធានីភ្នំពេញ ប្រកាសសាលក្រមផ្តន្ទាទោសដាក់ពន្ធនាគាររយៈពេល១៨ខែ ពិន័យ៨លានរៀលចូលថវិការដ្ឋ និង សងសំណងជំងឺចិត្តដល់ដើមបណ្ដឹងចំនួន៨០០លានរៀល ករណីចោទប្រកាន់ថា គណបក្សប្រជាជនកម្ពុជា ជាអ្នកសម្លាប់បណ្ឌិតកែម ឡី ។
លោក គឹម សុខ ជាប់ចោទចំនួនពីរបទល្មើស គឺ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ ជាសាធារណៈ តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ ៕
ខេត្តកំពត ៖ សមត្ថកិច្ចចាប់វ៉ៃខ្នោះឪពុកល្មោភកាមម្នាក់បន្ទាប់ពីចាប់រំលោភកូនស្រីបង្កើតខ្លួនឯង រហូតបានសម្រេច ដែលការឃាត់ខ្លួនធ្វើឡើងកាលពីម៉ោង៤រសៀលថ្ងៃទី១៤ ខែកញ្ញា ឆ្នាំ២០១៧ នៅចំណុចផ្ទះជនល្មើស ស្ថិតក្នុងស្រុកជុំគិរី ខេត្តកំពត។
សមត្ថកិច្ចនគរបាលបានឲ្យដឹងថា នៅវេលាថ្ងៃត្រង់ ថ្ងៃទី១៤ ខែកញ្ញា ២០១៧ អធិការនគរបាលស្រុកជុំគីរី បានទទួលបណ្តឹង ពីស្ត្រីអាយុ៣៣ឆ្នាំ រស់នៅភូមិ ឃុំ កើតហេតុខាងលើ ថា ប្តីរបស់ខ្លួនអាយុ៣៨ឆ្នាំ រស់នៅជាមួយគ្នា ចាប់កូនស្រីបង្កើតខ្លួនឯង រំលោភ រហូតបានសំរេចចំនួន១ដង ដែលកើតឡើង នៅវេលាម៉ោង៥ជិតភ្លឺ ថ្ងៃទី១៤ ខែកញ្ញា ឆ្នាំ២០១៧ នៅលើផ្ទះភូមិ ឃុំខាងលើ ពេលដែលគាត់មិននៅផ្ទះ។
លោកអធិការនគរបាលស្រុកជុំគីរី បានឲ្យដឹងថា បន្ទាប់ពីទទួលបានព័ត៌មាននោះលោកដឹកនាំមន្ត្រីនគរបាលជំនាញ ចុះដល់កន្លែងកើកហេតុ ហើយហៅក្មេងស្រីរងគ្រោះ អាយុ១១ឆ្នាំ មកសាកសួរ បានបញ្ជាក់ថា ឪពុកខ្លួន ពិតជាបានចាប់រំលោភមែន។ តាមរយៈនេះ លោកអធិការ នគរបាលស្រុកជុំគីរី ក៏បានឃាត់ខ្លួនជនសង្ស័យតែម្តង ។ ចំពោះមុខសមត្ថកិច្ចជនល្មើសបានសារភាពថា ខ្លួនគេ ពិតជាបាន រំលោភកូនរបស់ខ្លួនពិតមែន ៕
កូរ៉េខាងជើង ៖ នាយករដ្ឋមន្ត្រីជប៉ុនបាននិយាយថា កូរ៉េខាងជើងបានបាញ់សាកល្បងមីស៊ីល Ballistic រំលងប្រទេសជប៉ុនជាថ្មីម្តងទៀត នាព្រឹកថ្ងៃសុក្រ។ នេះយោងតាមសារព័ត៌មានស៊ិនហួរ ចេញផ្សាយមុននេះបន្តិច៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
