ម៉ូស្គូ ៖ ទីភ្នាក់ងារព័ត៌មាន Reuters រាយការណ៍នៅព្រឹកនេះថា ជាការឆ្លើយតបចំពោះទណ្ឌកម្មថ្មី ដែលត្រូវបានអនុម័តដោយសភាអាមេរិក ប្រធានាធិបតីរុស្ស៊ី វ៉ា្លឌីមៀ ពូទីន បានប្រកាសថា សហរដ្ឋអាមេរិកត្រូវតែកាត់បន្ថយបុគ្គលិកស្ថានទូតរបស់ខ្លួន នៅក្នុងប្រទេសរុស្ស៊ីចំនួន៧៥៥នាក់ឲ្យបានមុនថ្ងៃទី០១ ខែកញ្ញាខាងមុខ។
លោកប្រធានាធិបតីរុស្ស៊ីបានលើកឡើងថា ដោយសារតែមនុស្សជាង ១,០០០នាក់ រួមមានបុគ្គលិកផ្នែកការទូត និងបច្ចេកទេសកំពុងតែបម្រើការងារនៅក្នុងប្រទេសរុស្ស៊ី បុគ្គលិក ៧៥៥នាក់ ក្នុងចំណោមនោះ ត្រូវតែបញ្ឈប់សកម្មភាពរបស់ពួកគេ នៅក្នុងសហព័ន្ធរុស្ស៊ី។ ប្រការនេះនឹងធ្វើឲ្យចំនួនបុគ្គលិកស្ថានទូតអាមេរិក នៅទីក្រុងម៉ូស្គូនៅសល់ប្រមាណ៤៥៥នាក់ ដូចគ្នាទៅនឹងចំនួនបុគ្គលិកស្ថានទូតរុស្ស៊ីប្រចាំនៅឯទីក្រុងវ៉ាស៊ីនតោនដែរ។
គួរបញ្ជាក់ថា ការដឹក់ទណ្ឌកម្មខាងលើ គឺចំពោះការសន្និដ្ឋានរបស់បណ្តាសហគមន៍ស៊ើបការណ៍សម្ងាត់ នៃសហរដ្ឋអាមេរិកដែលថា រុស្ស៊ីបានលូកដៃចូលក្នុងការបោះឆ្នោតជ្រើសរើសប្រធានាធិបតីអាមេរិក កាលពីឆ្នាំ២០១៦ និងជាការដាក់ពិន័យថែមទៀត សម្រាប់ការដណ្តើមតំបន់គ្រីមៀពីប្រទេសអ៊ុយក្រែនកាលពីឆ្នាំ២០១៤៕
រាជធានីភ្នំពេញ ៖ គណបក្ស សម រង្ស៊ី ត្រូវបានប្តូរឈ្មោះជាគណបក្ស ភ្លើងទៀន វិញហើយ នេះបើយោងតាមតាមការបញ្ជាក់របស់មន្ត្រីជាន់ខ្ពស់អតីតគណបក្ស សម រង្ស៊ី ។
ការសម្រេចប្តូរឈ្មោះថ្មីរបស់ គណបក្ស សម រង្ស៊ី ធ្វើឡើងបន្ទាប់ពី វិសោធនកម្មច្បាប់គណបក្សនយោបាយ បានចូលជាធរមាន កាលពីថ្ងៃទី២៨ ខែកក្កដា ឆ្នាំ២០១៧ កន្លងទៅនេះ ខណដែលច្បាប់នោះបានហាមការយកឈ្មោះបុគ្គលទៅដាក់ជាឈ្មោះគណបក្សនយោបាយ៕
ខេត្តស្ទឹងត្រែង ៖ នៅពន្ធនាគារខេត្តស្ទឹងត្រែងកើតមានករណីទណ្ឌិត៥នាក់ កំពុងជាប់ឃុំខ្លួននៅពន្ធនាគារនេះ បាននាំគ្នាហែកដំបូលពន្ធនាគារបម្រុងរត់ចេញ តែត្រូវមន្ដ្រីអនុរក្សពន្ធនាគារឃើញទាន់ និងបានឃាត់ខ្លួនមកវិញ។ ហេតុការណ៍នេះកើតឡើងកាលពីថ្ងៃទី២៨ ខែកក្កដា ឆ្នាំ២០១៧។
តាមមន្ត្រីពន្ធនាគារបានបញ្ជាក់ថា ទណ្ឌិតទាំង៥នាក់នោះមានមេក្លោងជាជនជាតិឡាវ ជាប់ពាក់ព័ន្ធនឹងបទល្មើសគ្រឿងញៀន ។ យ៉ាងណាកដោយ សកម្មភាពបម្រុងរត់គេចខ្លួនរបស់អ្នកទោសទាំងនោះមិនបានសម្រេចនោះទេ ដោយសារតែមន្ត្រីអនុរក្សពន្ធនាគារបានឃើញ ហើយបានចាប់ក្រសោកយកមកវិញទាំងអស់៕
រាជធានីភ្នំពេញ ៖ ក្រុមអ្នកស្រាវជ្រាវបានប្រទះឃើញចម្លាក់បដិមាដ៏ធំ ដែលសន្និដ្ឋានជាបឋមថាជាទ្វារបាល ។ ការប្រទះឃើញនេះស្ថិតនៅមន្ទីរពេទ្យ ទន្លេស្ងួតខាងជើងក្រុងអង្គរធំ ប្រហែល១គីឡូម៉ែត្រ នៅថ្ងៃទី៣០ ខែកក្កដា ឆ្នាំ២០១៧។
បដិមាដ៏ធំមានកម្ពស់១,៩០ម៉ែត្រ និងស្មាទទឹង០,៥៨ម៉ែត្រ ស្ថិតក្នុងរចនាបថបាយ័ន។ បដិមានេះកំបុតដៃទាំងពីរត្រឹមស្មា កំបុតជើងស្តាំត្រឹមកជើង និងជើងឆ្វេងត្រឹមគល់ភ្លៅ។ ចំណែកដងខ្លួននិងព្រះកេសនៅមានក្បាច់ ចម្លាក់សម្លៀកបំពាក់ និងក្បាំងសក់នៅស្អាតទាំងអស់។ បដិមានេះកប់ជ្រៅក្នុងដីប្រមាណត្រឹម៤ តឹកប៉ុណ្ណោះក្នុងពេលអ្នកស្រាវជ្រាវធ្វើកំណាយរកឃើញ ដោយដេកផ្ងារពោះបែរព្រះកេសទៅទិសខាងលិច ទៅព្រះវិហារនៃមន្ទីរពេទ្យនេះ។
លោក ខៀន ច័ន្ទ មន្ត្រីជំនាញផ្នែកបុរាណវិទ្យា នៃអាជ្ញាធរជាតិអប្សរា នៅការដ្ឋានកំណាយនេះបញ្ជាក់ថា វាជាការប្រទះដោយចៃដន្យ ក្នុងពេលដែលក្រុមការងារធ្វើកំណាយ ដើម្បីសិក្សាអំពីទំនាក់ទំនងរវាង ប្រឡាយមុខមន្ទីរពេទ្យ និងរចនាសម្ព័ន្ធ នៃមន្ទីរពេទ្យទន្លេស្ងួត។ ការប្រទះឃើញចម្លាក់ដ៏ធំនេះ ក៏ចាត់ថាជាសំណាងល្អមួយ ដែលអាចឲ្យយើងយកទៅរក្សាទុកក្នុងទីកន្លែងសមរម្យ ហើយងាយស្រួលសម្រាប់ អ្នកស្រាវជ្រាវ ដើម្បីសិក្សាលម្អិត បន្ថែមទៀត ៕
ខេត្តកណ្តាល ៖ បុរសជាជនរងគ្រោះម្នាក់បានស្លាប់នៅនិងកន្លែង ដោយសារម្ចាស់កសិដ្ឋានចិញ្ចឹមជ្រូកនិងមាន់មួយកន្លែងបានរាយខ្សែលួសចាប់អាគុយប្រើដុំឆក់កណ្តុរការពារកុំឲ្យចូលស៊ីមាន់នៅក្នុងកសិដ្ឋាន។ ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៤ និង៣០នាទីព្រឹកថ្ងៃទី៣០ ខែកក្កដា ឆ្នាំ២០១៧ នៅក្នុងកសិដ្ឋានចិញ្ចឹមជ្រូក។
តាមព័ត៌មានបានឲ្យដឹងថា ម្ចាស់កសិដ្ឋានមានឈ្មោះ គីម ឌីណា ភេទប្រុស អាយុ៣៧ឆ្នាំ នៅក្នុងភូមិជ័យឧត្តម២ ឃុំសំរោងធំ ស្រុកកៀនស្វាយ ខេត្តកណ្តាល ។ ចំណែកជនរងគ្រោះដែលត្រូវខ្សែភ្លើងឆក់ស្លាប់នោះឈ្មោះ និត យ៉ាន ភេទប្រុស អាយុ២៥ឆ្នាំ ជនជាតិខ្មែរមុខរបរមិនពិតប្រាកដមានទីលំនៅភូមិ.ឃុំកើតហេតុខាងលើ។
ក្រោយពិនិត្យរួចក្រុមគណៈកម្មការចម្រុះបានបញ្ជាក់ថា សពជនរងគ្រោះពិតជាស្លាប់ដោយសារឆក់ចរន្តអគ្គិសនីពិតប្រាកដមែន។ តាមការសន្និដ្នានជនរងគ្រោះប្រហែលជាមានបំណងចូលមកលួចមាន់ជល់។
វត្ថុតាងត្រូវសមត្ថកិច្ចនគរបាលកសាងសំណុំរឿងចាត់តាមនីវិធីច្បាប់។ ចំណែកសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ រីឯម្ចាស់កសិដ្ឋានដែលជាអ្នកបង្កឲ្យមានមនុស្សស្លាប់មិនឃើញសមត្ថកិច្ចធ្វើការឃាត់ខ្លួនឡើយ៕
សេអ៊ូល ៖ កូរ៉េខាងជើងបានចេញមុខប្រកាសពីជោគជ័យ បន្ទាប់ការបាញ់សាកល្បងមីស៊ីលផ្លោងឆ្លងទ្វីប ICBM Hwasong-14 កាលពីយប់ថ្ងៃសុក្រម្សិលមិញនេះ ដែលនេះជាជោគជ័យលើកទី២ បន្ទាប់ពី កាលពីដើមខែកក្កដានេះរដ្ឋកុម្មុយនិស្តមួយនេះ ក៏បានធ្វើតេស្តមីស៊ីលប្រភេទនេះផងដែរ។
យោងតាមទីភ្នាក់ងារព័ត៌មានរដ្ឋកូរ៉េខាងជើង KCNA បានផ្សាយថា ការបាញ់សាកល្បងមីស៊ីលកាលពីយប់ថ្ងៃសុក្រម្សិលមិញនេះ ធ្វើឡើងក្រោមការបង្គាប់បញ្ជាពីសំណាក់ ប្រមុខដឹកនាំរបស់ខ្លួន គឺលោក គីម ជុនអ៊ុន។ មីស៊ីលនេះរត់បានចម្ងាយ៩៩៨គីឡូម៉ែត្រ ក្នុងរយៈពេលប្រមាណ៤៧នាទី ហើយធ្លាក់ចូលទៅក្នុងសមុទ្រខាងកើត ឬហៅថាសមុទ្រជប៉ុន ក្រោយពីវាបានឡើងដល់កម្ពស់ជាអតិបរមា៣,៧២៤.៩គីឡូម៉ែត្រ។
ទីភ្នាក់ងារសារព័ត៌មាន KCNA បានបញ្ជាក់ថា ការតេស្តថ្មីចុងក្រោយបំផុតនេះ បានស្តែងឲ្យឃើញយ៉ាងជាក់ច្បាស់ ពីភាពគួរឲ្យទុកចិត្តបាននៃមីស៊ីលផ្លោងឆ្លងទ្វីបរបស់យើង រួមទាំងសមត្ថភាពនៃការបាញ់បង្ហោះវា ក្នុងស្ថានភាពដែលនឹងបង្កភាពភ្ញាក់ផ្អើលគ្មានការដឹងទុកជាមុន នៅគ្រប់ទីកន្លែងនិងគ្រប់ពេលវេលាទាំងអស់។ ជាងនេះទៅទៀត មេដឹកនាំរបស់យើង បានលើកឡើងថា សហរដ្ឋអាមេរិក គឺស្ថិតនៅក្នុងរយៈចម្ងាយនៃការវាយប្រហាររបស់ពួកយើង៕
ជប៉ុន ៖ នាយករដ្ឋមន្ត្រីជប៉ុន លោក ស៊ីនហ្សូ អាបេ បានឲ្យដឹងថា កាលពីម្សិលមិញកូរ៉េខាងជើងបានបាញ់សាកល្បងមីស៊ីលមួយគ្រាប់ទៀតហើយ បន្ទាប់ពីគម្រប់ខួបសង្គ្រាមកូរ៉េឆ្នាំ១៩៥០-១៩៥៣ កន្លងផុតទៅបានមួយថ្ងៃ។ នេះបើតាមការផ្សាយដោយសារព័ត៌មានអង់គ្លេស BBC។
នាយករដ្ឋមន្ត្រីជប៉ុនរូបនបានបន្តថា មីស៊ីលនោះទំនងជាបានធ្លាក់ចូលទៅក្នុងតំបន់សេដ្ឋកិច្ចផ្តាច់មុខ ដែលស្ថិតក្នុងដែនសមុទ្រជប៉ុន ដែលហោះមានចំងាយប្រមាណ១០០០គីឡូម៉ែត្រ។
ជាមួយគ្នានេះ អគ្គសេនាធិការចម្រុះនៃយោធាកូរ៉េខាងត្បូង ក៏បានឲ្យដឹងផងដែរថា មីស៊ីលនេះត្រូវបានបាញ់ចេញពីខេត្ត Jagang ភាគខាងជើង នៃប្រទេសកូរ៉េខាងជើង កាលពីវេលាម៉ោង១១ និង៤១នាទីយប់ថ្ងៃសុក្រនេះ (ម៉ោងនៅកូរ៉េខាងត្បូង)។ ម្យ៉ាងវិញទៀត ក្រសួងការពារជាតិអាមេរិក ក៏បានបញ្ជាក់ដែរថា សកម្មភាពបាញ់គ្រាប់មីស៊ីលផ្លោងចំនួនមួយគ្រាប់ត្រូវចាប់សញ្ញាបានពីកូរ៉េខាងជើង៕
ប៉ាគីស្ថាន ៖ តុលាការកំពូលប៉ាគីស្ថានកាលពីម្សិលមិញបានសម្រេចចិត្តដកតំណែងនាយករដ្ឋមន្ត្រី លោក Nawaz Sharif បន្ទាប់ពីរកឃើញមានអំពើពុករលួយពាក់ព័ន្ធនឹងទ្រព្យសម្បតិ្តគ្រួសាររបស់លោក។ នេះបើយោងតាមទីភ្នាក់ងារសារព័ត៌មាន Reuters។
ចៅក្រម Ejaz Afzal Khan នៅក្នុងតុលាការបានថ្លែងថា ការសម្រេចចិត្តបែបនេះរបស់តុលាការកំពូលប៉ាគីស្ថាន ធ្វើឡើងក្រោយលេចធ្លាយនូវរឿងអាស្រូវពុករលុយ Panama Papers កាលពីឆ្នាំ២០១៥ ដែលថា កូនប្រុសរបស់នាយករដ្ឋមន្ត្រីរូបនេះ មានក្រុមហ៊ុនលួចលាក់ជាច្រើននៅឯបរទេស។ លោកបានបញ្ជាក់ថា លោក Nawaz Sharif លែងមានសិទ្ធិស្របច្បាប់ ធ្វើសមាជិកសភាទៀតបានឡើយ ហើយគាត់ត្រូវបញ្ចប់តួនាទីជានាយករដ្ឋមន្ត្រី។
ទោះជាបែបនេះក្តីនាយករដ្ឋមន្ត្រីវ័យ៦៧ឆ្នាំដែលឡើងកាន់តំណែងចាប់តាំងពីឆ្នាំ២០១៣មក បានបដិសេធ ហើយបានហៅការស៊ើបអង្កេតនេះថា លំអៀង និងមិនត្រឹមត្រូវ ខណៈតុលាការកំពូល ក៏បានបង្គាប់ឱ្យបើកការស៊ើបអង្កេត លើបទឧក្រិដ្ឋប្រឆាំងនឹងនាយករដ្ឋមន្ត្រីរូបនេះផងដែរ៕
រាជធានីភ្នំពេញ ៖ មន្ត្រីបរិស្ថានបានអះអាងថា យ៉ាងតិចកូនសត្វត្រដក់ធំ ជិតផុតពូជនៅលើពិភពលោកប្រមាណ១៧៥សំបុកបានញាស់ចេញដោយជោគជ័យក្នុងប្រទេសកម្ពុជា ខណកូនត្រដក់ធំទាំងនោះត្រូវបានមើលថែនិងការពារដោយយកចិត្តទុកដាក់បំផុត ។
បើតាមមន្ត្រីក្រសួងបរិស្ថានឲ្យដឹងថា កូនសត្វត្រដក់ធំជិតផុតពូជ ដែលបានញាស់ចេញនេះ ស្ថិត នៅតំបន់រ៉ាមសារ ព្រែកទាល់ ស្ថិតក្នុងស្រុកសង្កែ ខេត្តបាត់ដំបង និងបានហោះចាកចេញពីសំបុកទៅទីជម្រកធម្មជាតិនានាក្នុងប្រទេសកម្ពុជា។
យោងតាមការចុះផ្សាយរបស់ក្រសួងបរិស្ថាន សំបុកសត្វត្រដក់ធំទាំងនោះ បានទទួលការមើលថែ និងការពារយ៉ាងយកចិត្តទុកដាក់ សម្រាប់រយៈពេល៦ខែកន្លងទៅ ពីសំណាក់មន្ត្រីឧទ្យានុរក្សរបស់ក្រសួងបរិស្ថាន ប្រជាជននៅភូមិព្រែកទាល់ និងអង្គការសមាគមអភិរក្សសត្វព្រៃ (WCS)។
សូមជម្រាបថា សត្វត្រដក់ធំមានកម្ពស់ដល់ទៅ១.៥ម៉ែត្រ និងជាប្រភេទសត្វ ជិតផុតពូជលើពិភពលោក ដោយមានចំនួនចន្លោះពី៨០០ទៅ១ពាន់ក្បាលប៉ុណ្ណោះ។ ដោយឡែកនៅកម្ពុជា សត្វត្រដក់ធំនេះ មានចំនួនពី១៥០ទៅ២០០គូប៉ុណ្ណោះ ៕
រាជធានីភ្នំពេញ ៖ តុលាការក្រុងភ្នំពេញ នៅរសៀលថ្ងៃទី២៨ ខែកក្កដា ឆ្នាំ២០១៧ម្សិលមិញនេះបាន សម្រេចឃុំខ្លួនគ្រូជនជាតិបរទេស នៅសាលាអន្ដរជាតិ GOLDEN BRIDGE ដែលបាននាំសិស្សស្រីអាយុទើប៥ឆ្នាំទៅរួមភេទដល់ផ្ទះ ។
តាមមន្ត្រីតុលាការការអះអាងថា ជនសង្ស័យត្រូវប្រឈមបទចោទប្រកាន់ពីបទប្រទូស្តកេរ្តិ៍ខ្មាសមានស្ថានទម្ងន់ទោសតាមមាត្រា២៤៦និងមាត្រា២៤៨នៃក្រមព្រហ្មទណ្ឌ ។ បទល្មើសប្រទូស្តកេរ្តិ៍ខ្មាសមានស្ថានទម្ងន់ទោសនេះកំណត់ការផ្តន្ទាទោសដាក់ពន្ធនាគារពី ២ឆ្នាំទៅ៥ឆ្នាំ និងពិន័យជាប្រាក់ពី៤លានរៀលទៅ១០លានរៀល ៕
រាជធានីភ្នំពេញ ៖ យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមបានឲ្យដឹងថា កូនរដូវប្រាំង នឹងចាប់ផ្តើមពីថ្ងៃទី ២៩ ខែកក្កដា ដល់ថ្ងៃទី ០៩ ខែសីហា ឆ្នាំ ២០១៧ នឹងធ្វើឱ្យរាជធានីខេត្តមួយចំនួន ដូចជា រាជធានីភ្នំពេញ ខេត្តកំពត កែប តាកែវ កំពង់ស្ពឺ និងខេត្តកណ្តាល មានភ្លៀងធ្លាក់តិចតួច ។សូមអានព័ត៌មានលម្អិតរបស់ក្រសួងទាំងស្រុងនៅខាងក្រោមនេះ៖
ខេត្តបាត់ដំបង ៖ បុរសម្នាក់ស្លាប់ភ្លាមៗ នៅកន្លែងកើត ខណៈដែល២នាក់ផ្សេងទៀតរងរបួសធ្ងន់ក្នុងករណីគ្រោះថ្នាក់រវាងរថយន្តដឹកសាំងបុករ៉ឺម៉កពេញទំហឹង ដែលករណីនេះកើតឡើងកាលវេលាម៉ោង១១ និង៣០នៅថ្ងៃទី២៨ ខែកក្កដា ឆ្នាំ២០១៧នេះ ស្ថិតនៅស្ពានលេខ២ ក្នុងភូមិរាមគុណ ឃុំគៀ ស្រុកកមោងឫស្សី ខេត្តបាត់ដំបង។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញមានរថយន្តស៊ីទែនដឹកសាំងបើកបរបញ្ចាសទិសគ្នា ជាមួយរ៉ឺម៉កជិតគ្នា៣នាក់។ ប្រភពបន្តថា លុះមកដល់ចំណុចកើតហេតុ ដោយស្រាប់តែរ៉ឺម៉កបទចូលក្នុងផ្លូវលំក៏ត្រូវរថយន្តស៊ីទែនសាំងបុកពេញទំហឹងតែម្តង បណ្តាលឲ្យអ្នកជិះលើរ៉ឺម៉កស្លាប់ម្នាក់ និងរងរបួសធ្ងន់២នាក់៕
ការ៉ាកាស់ ៖ ទីភ្នាក់ងារព័ត៌មានចិន ស៊ីនហួរ ចេញផ្សាយនៅព្រឹកនេះថា បាតុកម្មដែលអូសបន្លាយចាប់តាំងពីដើមខែមេសាមកនៅប្រទេសវេណេស៊ុយអេឡាបានបណ្តាលឲ្យមនុស្សយ៉ាងហោចណាស់ចំនួន១០៥នាក់បានស្លាប់បាត់បង់អាយុជីវិត។
ពាក់ព័ន្ធនឹងរឿងនេះ ភាគីទាំងសងខាងគឺរដ្ឋាភិបាលនិងបក្សប្រឆាំង (MUD) បានទម្លាក់កំហុសលើគ្នាទៅវិញទៅមក សម្រាប់ការស្លាប់ទាំងនេះ ដោយរដ្ឋាភិបាលវេណេស៊ុយអេឡា បានចោទប្រកាន់ MUD ថាបានទៅជួលពួកឧក្រិដ្ឋជនបាតផ្សារ ឲ្យដើរបង្កភាពចលាចលនិងអំពើហិង្សា ខណៈគណបក្សប្រឆាំងបានចង្អុលមុខក្រុមមន្ត្រីប៉ូលិសនិងកម្លាំងយោធាក្រោមការបង្គាប់របស់រដ្ឋាភិបាលថា ជាអ្នកបង្កហេតុ។នេះតាមអគ្គរដ្ឋអាជ្ញាវេណេស៊ុយអេឡា។
លោកបន្តថា ផ្ទុះបាតុកម្មនៅប្រទេសអាមេរិកឡាទីនក្នុងគោលបំណងទាមទារឲ្យមានការបោះឆ្នោតជ្រើស មេដឹកនាំថ្មីមុនពេលកំណត់, ទាមទារឲ្យមានការដោះលែងអ្នកទោសនយោបាយនានា, និងបញ្ឈប់ការប៉ុនប៉ងរបស់រដ្ឋាភិបាលលោក Nicolas Maduro ដែលចង់កែប្រែរដ្ឋធម្មនុញ្ញឡើងវិញ តាមរយៈការបង្កើតសភាធម្មនុញ្ញ ANC៕
រាជធានីភ្នំពេញ ៖ សាកសពនាយរងប៉ុស្តិ៍ជ្រោយចង្វាមួយរូប ដែលឈរបត់ជើងតូច ហើយងងឹតមុខធ្លាក់ដួលចូលទៅក្នុងទឹកទន្លេក្រោមស្ពានជ្រោយចង្វាចាស់ត្រើយខាងកើត ភូមិដើមគ សង្កាត់ជ្រោយចង្វា ខណ្ឌជ្រោយចង្វា ត្រូវបានប្រទះឃើញផុសអណ្តែទើជាប់នឹងបែត្រី ខាងជើងស្ពានជ្រោយចង្វា ចំងាយ២,៥គីឡូម៉ែត្រ ក្នុងភូមិដើមគ សង្កាត់ជ្រោយចង្វា កាលពីល្ងាចម្សិលមិញ។
សាកសពត្រូវបានស្គាល់ឈ្មោះ សាយ សឿន ភេទប្រុស អាយុ៥៣ឆ្នាំ ជានាយរងប៉ុស្តិ៍ជ្រោយចង្វាមានទីលំនៅភូមិព្រែកតាកាវ ឃុំសំរោងធំ ស្រុកកៀនស្វាយ ខេត្តកណ្តាល ។
គួររំលឹកថា កាលពីវេលាម៉ោង២ និង៤៥នាទីរសៀលថ្ងៃទី២៦ ខែកក្កដា ឆ្នាំ២០១៧ ជនរងគ្រោះពិសាស្រា ហើយទៅឈរបត់ជើងតូចនៅមាត់ទន្លេក្រោមជ្រោយចង្វាចាស់ត្រើយខាងកើត ក្បែរកន្លែងលោកប្រចាំការ តែដោយសារកើតមានអាការៈងងឹតវិលមុខដួលដាំដូងចូលទៅក្នុងទន្លេ បើមានការអន្តរាគមន៍ពីសំណាក់ ក្រុមអ្នកមុជរាវរក ច្រើននាក់ ទាំងសមត្ថកិច្ច ទាំងប្រជាពលរដ្ឋ ក៏ដោយ តែរកមិនឃើញ រហូតមកដល់ល្ងាចថ្ងៃទី២៧ ខែកក្កដា នេះទើបសាកសពផុសអណ្តែតតែម្តង។
សាកសពក្រោយប្រទះឃើញ សមត្ថកិច្ចជំនាញ ស្រង់ឡើងគោក ហើយធ្វើការពិនិត្យនិងកោសល្យវិច័យ ជាមុនសិន មុននឹងប្រគល់ជូនក្រុមគ្រួសារ ដឹកយកទៅធ្វើបុណ្យតាមប្រពៃណីនៅស្រុកំណើត ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
