ជប៉ុន៖រដ្ឋមន្ត្រីក្រសួងការពារជាតិជប៉ុនបាននិយាយថា វេលាម៉ោង៥ម៉ោងនៅជប៉ុនថ្ងៃទី៧ធ្នូម្សិលមិញនេះយន្ដហោះចម្បាំងអាមេរិកធុន McDonnell Douglas FA-18 Hornet មួយគ្រឿង បានធ្លាក់នៅឯតំបន់ Kochi ស្ថិតនៅភាគខាងត្បូងទីប្រជុំកោះសិនកាគូ។ នេះបើយោងទីភ្នាក់ងារសារព័ត៌មានជប៉ុន NHK ។
លោករដ្ឋមន្ត្រីបន្តថា ខណៈដែលយន្តហោះកំពុងធ្លាក់ អ្នកបើកយន្ដហោះចម្បាំង FA-18 បានលោតឆត្រយោងចុះទាន់ពេលវេលា។ ទន្ទឹមនោះរដ្ឋាភិបាលជប៉ុនបញ្ជូនយន្ដហោះ៦គ្រឿង និងនាវា២គ្រឿង ទៅកាន់តំបន់យន្ដហោះធ្លាក់ភ្លាមៗ។ ទោះបីយ៉ាងណាពេលនេះអាជ្ញាធរបាននិងកំពុងបើកការ ស៊ើបអង្កេតផងដែរ។
គួរបញ្ជាក់ថា កាលពីខែកញ្ញាកន្លងទៅ យន្ដហោះចម្បាំងអាមេរិកធុន Harrier ក៏បានធ្លាក់ផងដែរនៅភាគខាងកើតកោះ Okinawa៕
ដោយ៖បញា
ភ្នំពេញ៖លោក ឃឹម ស៊ុនសូដា អភិបាលរងខណ្ឌពោធិ៍សែនជ័យតែងតែចុះបង្ក្រាបទីតាំងបាញ់ត្រីខុសច្បាប់កន្លែងដដែលៗតែបង្ក្រាបមិនចេះអស់ ហើយប៉ុន្មានខែកន្លមកនេះថៅកែហ្គេមបញាត្រីបានបើកយ៉ាងសេរីក្នុងទឹកដីខណ្ឌពោធិ៍សែនជ័យ។
អ្វីដែលគេមើលឃើញថា ជារឿងដ៏គឃ្លើនបំផុតដែលថៅកែហ្គេមបាញ់ត្រី ប្រមាណជាច្រើនកន្លែងក្នុងខណ្ឌពោធិ៍សែនជ័យត្រូវបានគេបើកលេង ២៤ម៉ោង តែម្ដង អ្នកលេងភាគច្រើន ជាយុវសិស្ស និងមុខសញ្ញា មកពពាក់ពពូនគ្នា។ ទីតាំងបើកហ្គេមបាញ់ត្រី ២៤ម៉ោងលើ២៤ម៉ោង ជាច្រើនន្លែង ក្នុងទឹកដីខណ្ឌពោធិ៍សែនជ័យទាំងនេះជាពិសេសនៅផ្លូវវែងស្រេង និងផ្លូវ២០០៤ និងទីតាំងផ្សេងៗទៀត ត្រូវបានសិស្ស និស្សិតរួមទាំងក្មេងទំនើង ក្រុមបងតូច-ធំ បានមកចូលលេង ខ្លះទៀតសំងំដេក និងសេពគ្រឿងញៀន ប្រមូលផ្ដុំគ្នាបង្កើតបទល្មើសលួច ឆក់ ប្លន់ ផ្សេងៗក្នុងសង្គមរាល់ថ្ងៃ។
ប្រជាពលរដ្ឋដែលរស់ក្នុងខណ្ឌពោធិ៍សែនជ័យស្ទើរតែអស់ជំនឿទុកចិត្តលើអាជ្ញាធរខណ្ឌហើយ ព្រោះរាល់ការចុះបង្ក្រាបម្តងៗម្ចាស់ទីតាំងទាំងនោះដូចដឹងក្លិនមុនបន្សល់ទុកតែសំបកទូរតែប៉ុនណ្ណោះ ហាក់ដូចជាការសម្តែងល្ខោនចឹង។
អាណាព្យាបាលសិស្ស និស្សិតតែងតែបានសំណូមពរ រាល់វេទិកាសាធារណៈ ដែលធ្វើឡើងរវាងអាជ្ញាធរ និងសមត្ថកិច្ចជាមួយប្រជាពលរដ្ឋជាការអនុវត្ដតាមគោលនយោបាយ ភូមិ-សង្កាត់មានសុវត្ថិភាព។
សូមបញ្ជាក់ថា នៅមានទីតាំងលួចបើកភ្នាល់បាល់ កត់កន្ទុយលេខ ហ្គេមស៊ីសងជាច្រើនទៀតមានប្រមាណជាជិត៥០កន្លែងបើកលេង យ៉ាងរលូន។ ប្រជាពលរដ្ឋសូមសំណូមពរដល់លោក នេត សាវឿន អគ្គស្នងការនគរបាលជាតិ និងស្នងការនគរបាល ក្រុងភ្នំពេញ លោកជួន សុវណ្ណ មេត្តាចាត់វិធានការ បង្ក្រាបទីតាំងល្បែង កន្ទុយលេខ ភ្នាល់បាល់ ហ្គេម នៅក្នុងភូមិសាស្ត្រ ខណ្ឌពោធិ៍សែនជ័យផង ព្រោះសព្វថ្ងៃនេះសម្បូរខ្លាំងណាស់៕
ដោយ៖ប៉ែន សុផល
បាត់ដំបង៖ករណីលួចឆក់មួយត្រូវបាន កម្លាំងជំនាញអធិការដ្ឋាននគរបាលក្រុងបាត់ដំបងបង្ក្រាបបាន ។
សមត្ថកិច្ចបានចុះធ្វើការបង្ក្រាបករណីលួចឆក់មួយ នៅពេលបន្ទាប់ពីកន្លងទៅថ្មីៗនេះគេមើលឃើញថាមនុស្សប្រុសស្រីជាច្រើននាក់រងការចាប់ខ្លួនជាបន្តបន្ទាប់ដោយកម្លាំង នគរបាលខេត្តបាត់ដំបង ក្នុងយុទ្ធនាការប្រឆាំងបទល្មើសនៅក្នុងខេត្តបាត់ដបង ដែលអនុវត្តតាមផែនការនិងដាក់ចេញបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោសថេតស្នងការនគរបាលខេត្តបាត់ដំបង ។
បើតាមរបាយការណ៍ លោកវរសេនីយ៍ត្រី ប៉ាងហៀង អធិការក្រុងបាត់ដំបងបានឲ្យដឹងថា នៅថ្ងៃទី២៩ វិច្ឆិកា ២០១៦វេលាម៉ោង៥ទៀបភ្លឺមានករណីអំពើរលួចឆក់មួយបានកើតឡើងត្រង់ចំណុចមន្ទីរពេទ្យបង្អែកខេត្តបាត់ដំបងដែលបង្កដោយជនសង្ស័យមិនស្គាល់អត្តសញ្ញាននឹងចំនួនបានចូលលួចយកទូរសព្វ័ដៃជនរងគ្រោះឈ្មោះ ឌឿន រ៉ាវី ភេទប្រុស អាយុ៣៣ឆ្នាំមានទីលំនៅភូមិបឌិននៀវ សង្កាត ប៉ៃលិន ក្រុងប៉ៃលិនពេលដែលខ្លួនដាក់សាកថ្មចោលនៅលើក្បាលដំណេក ។ សំភារៈបាត់បង់មានះ
ទូរសព្វ័ដៃម៉ាក Samsung note2។
ក្រោយពីទទួលបណ្តឹងភ្លាមកម្លាំងផ្នែកជំនាយបានធ្វើការស្រាវជ្រាវនិងស៊ើបអង្កេតយ៉ាងយកចិត្តទុកដាក់ នឹងទទួលបាននូវមុខសញ្ញាជាក់ស្តែងនិងឈានដល់ការឃាត់ខ្លួនជនសង្ស័យម្នាក់ ។
លុះដល់ថ្ងៃទី៧ ធ្នូ ២០១៦ វេលាម៉ោង00″30នាទីកំលាំងផ្នែកជំនាញបានសហការជាមួយកម្លាំងបង្កាបង្ក្រាបខេត្តបាត់ដំបងបានធ្វើការឃាត់ខ្លួនជនសង្ស័យឈ្មោះ ជា ម៉ៅហៅ រ៉ា ភេទប្រុសអាយុ៤៤ឆ្នាំមានទីលំនៅមិនពិតប្រាកដដើម្បីមកធ្វើការសាកសួរ ចម្លើយចំពោះមុខសមត្ថកិច្ច ។ ក្រោយពីការសាកសួរចម្លើយជនសង្ស័យរូបនោះបានសារភាពថាខ្លួនបានធ្វើសកម្មភាពលួចឆក់យកសំភារះបានចំនួន៤លើកនៅក្នុងមន្ទីរពេទ្យបង្អែកខេត្តបាត់ដំបងពិតប្រាកដមែន។ ចំពោះសំភារៈដែលលួចឆក់បានខ្លួនយកទៅលក់អោយអ្នករើសអេតចាយ ។
បច្ចុបន្បជនសង្ស័យនឹងត្រូវសមត្ថកិច្ចកសាងសំណុំរឿងដើម្បីបញ្ជូនទៅការិយាល័យជំនាញចាត់ការជាបន្តទៅតាមនីតិវិធី៕
ស៊ីរី៖ក្រុមឃ្លាំមើលមួយបានឲ្យដឹងថា កងទ័ពស៊ីរីនិងសម្ព័ន្ធមិត្តបានរុលចូលទៅក្នុងផ្នែកមួយដែលពួកឧទ្ទាមកាន់កាប់នៃទីក្រុងចំណាស់របស់អាឡេប៉ូកាលពីថ្ងៃអង្គារដោយឈានកាន់ជិតដើម្បីសម្រេចបាននូវការទទួលជ័យជម្នះសំខាន់បំផុតរបស់ពួកគេនៃសង្គ្រាមស៊ីវិលរយៈពេលប្រាំឆ្នាំនេះដោយជំរុញក្រុមឧទ្ទាមឲ្យចេញពីបន្ទាយចុងក្រោយរបស់ខ្លួន។
ទោះបីជាយ៉ាងណាក៏ដោយមន្ត្រីក្រុមឧទ្ទាមបាននិយាយថា ពួកគេនឹងមិនបោះបង់ចោលទីក្រុងអាឡេប៉ូទេបន្ទាប់ពីមានរបាយការណ៍ថា អ្នកការទូតសហរដ្ឋអាមេរិកនិងរុស្ស៊ីត្រៀមពិភាក្សាអំពីការចុះចាញ់និងការជម្លៀសពួកឧទ្ទាមចេញពីទឹកដីដែលពួកគេកាន់កាប់សម្រាប់រយៈពេលជាច្រើនឆ្នាំ។
រដ្ឋមន្ត្រីការបរទេសរុស្ស៊ីលោក Sergei Lavrov បានឲ្យដឹងថា កិច្ចពិភាក្សាជាមួយសហរដ្ឋអាមេរិកអំពីការដកក្រុមឧទ្ទាមនឹងចាប់ផ្តើមក្នុងទីក្រុងហ្សឺណែវនៅល្ងាចថ្ងៃអង្គារឬព្រឹកថ្ងៃពុធ។ ប៉ុន្តែក្រោយមក ប្រភពដែលដឹងពីផែនការនេះបានប្រាប់ Reuters ថា មិនមានកិច្ចពិភាក្សាណាមួយនឹងប្រព្រឹត្តទៅឡើយនៅសប្តាហ៍នេះក្នុងទីក្រុងរបស់ប្រទេសស្វីសមួយនេះ។
ពួកឧទ្ទាមដែលបានគ្រប់គ្រងផ្នែកដ៏ធំនៃភាគខាងកើតទីក្រុងអាឡេប៉ូសម្រាប់រយៈពេលជិតប្រាំឆ្នាំមកហើយនោះគឺបានបាត់បង់ប្រមាណពីរភាគបីនៃទឹកដីរបស់ខ្លួននៅក្នុងទីក្រុងមួយនេះក្នុងរយៈពេលពីរសប្តាហ៍ចុងក្រោយ៕
រាជធានីភ្នំពេញ៖ប្រធានស្តីទីគណបក្សសង្គ្រោះជាតិ និងជាប្រធានក្រុមមតិភាគតិច នៅក្នុងរដ្ឋសភា បានអំពាវនាវឱ្យសាធារណជនទាំងអស់ ចៀសវាងនូវការជេរប្រមាថ លាបពណ៌ ដែលនាំឱ្យមានការឈឺចាប់ និងការបែកបាក់សង្គមកម្ពុជា។
លោក កឹម សុខា បានធ្វើការអំពាវនាវដូច្នេះនៅក្នុងប្រជុំសភា នាថ្ងៃទី០៧ ខែធ្នូ ឆ្នាំ២០១៦នេះ ដែលជាការចូលរួមប្រជុំដំបូងរបស់លោក បន្ទាប់ពីអាក់ខានរយះពេលជាងមួយឆ្នាំមកនេះ ។
លោក កឹម សុខា លើកឡើងថា ដើម្បីចៀសវាងនូវការជេរប្រមាថ លាបពណ៌ នាំឱ្យមានការឈឺចាប់ នាំឱ្យមានការបែកបាក់សង្គម នេះគឺជាអ្វីដែលខ្ញុំ បានជជែកជាមួយសម្តេចនាយករដ្ឋមន្ត្រី ហើយយើងព្យាយាមធ្វើកិច្ចការនេះឱ្យសម្រេចដល់គោលដៅ ដែលយើងចង់បានទាំងអស់គ្នា ។ លោកបន្តថា អ្វីដែលគណបក្សនយោបាយ ត្រូវបន្តធ្វើទៅមុខទៀតនោះ គឺជាការស្វែងរកឯកភាពជាតិ ដើម្បីឱ្យជាតិកម្ពុជា បានរីកចំរើន ហើយលោកស្នើ គ្រប់ភាគីទាំងអស់ មានការប្រុងប្រយ័ត្ន កុំឱ្យដំណើរនេះមិនដល់គោលដៅ។
លោក កឹម សុខា បានបញ្ជាក់បន្ថែមថា «ថ្ងៃនេះ ជាថ្ងៃចាប់ផ្តើម ហើយកុំឱ្យមាន គឺយើងត្រូវប្រុងប្រយ័ត្ន គឺប្រុងប្រយ័ត្នទាំងអស់គ្នា ធ្វើយ៉ាងម៉េចកុំឱ្យមានការរំខានណាមួយ ដែលធ្វើឱ្យដំណើរការរបស់យើងអត់ដល់គោលដៅរបស់យើង អញ្ចឹងខ្ញុំសូមបងប្អូនជនរួមជាតិខ្មែរទាំងអស់ លោកមេត្តារង់ចាំមើល សូមលោកចូលរួមជាមួយយើងខ្ញុំ ធ្វើដំណើរទៅដល់គោលដៅមួយ ឯកភាពជាតិ សន្តិភាព និងអភិវឌ្ឍសម្រាប់ជាតិ និងប្រជាពលរដ្ឋរបស់យើង៕
បាងកក៖ចំនួនអ្នកស្លាប់ដោយសារគ្រោះទឹកជំនន់ ដែលបង្កឡើងដោយភ្លៀងធ្លាក់យ៉ាងជោគជាំ នៅភាគខាងត្បូងប្រទេសថៃ បានកើនដល់១៤នាក់ហើយ។ នេះបើយោងតាមការចេញផ្សាយដោយសារព័ត៌មាន Channel News Asia។
រដ្ឋាភិបាលថៃក៏បានចេញសេចក្តីណែនាំឲ្យ មជ្ឈមណ្ឌលការពារគ្រោះមហន្តរាយទាំងឡាយធ្វើការឃ្លាំមើល និងប្រុងប្រយ័ត្នខ្ពស់ចំពោះគ្រោះរអិលបាក់ដីក៏ដូចជាគ្រោះទឹកជំនន់ដែលកើតមានឡើងនៅក្នុងតំបន់រងគ្រោះហើយត្រូវត្រៀមលក្ខណៈជានិច្ច ដើម្បីចាត់ចែងក្រុមប្រតិបត្តិការសង្គ្រោះផ្តល់ជំនួយ ជាសម្ភារៈផ្សេងៗនៅតាមទីតាំងណាដែលត្រូវការជាចាំបាច់៕
រាជធានីភ្នំពេញ៖សម្តេច ហ៊ុន សែន នាយករដ្ឋមន្ត្រីនៃកម្ពុជា បានប្រកាសនៅក្នុងសភាថា លោក កឹម សុខា គឺជាដៃគូពិភាក្សាការងារសភាជាមួយសម្តេចក្រឡា ហោម ស ខេង ហើយជាដៃគូពិភាក្សារឿងប្រទេសជាតិ ជាមួយនិងសម្តេចផ្ទាល់ផងដែរ។
សម្តេច ហ៊ុន សែន ក៏បានពន្យល់ផងដែរ អំពីការតែងតាំងប្រធានថ្នាក់ដឹកនាំតំណាងរាស្ត្រ និងប្រធានក្រុមមតិភាគតិចដោយបញ្ជាក់ថា តំណែងទាំងពីរនេះ គឺតែមួយទេ នេះបើយោងតាមមាត្រា៤៨ថ្មី ( ៣ ) នៃបទបញ្ជាផ្ទៃក្នុងរបស់សភា។
ចំណែកលោក កឹម សុខា ក៏បានថ្លែងថា បញ្ហាតំណែងតួនាទីមិនសំខាន់នោះទេ សំខាន់គឺត្រូវធ្វើយ៉ាងណានាំមកនូវការឯកភាពជាតិ និងនាំមកនូវប្រយោជន៍សម្រាប់ជាតិ ដូចដែលរូបលោកបានពិភាក្សាផ្ទាល់ ជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
លោក កឹម សុខា បានបញ្ជាក់ថា លោកបានពិភាក្សាជាមួយសម្តេចនាយករដ្ឋមន្ត្រី ហើយបានរកឃើញគំនិតរួម មួយចំនួនសំរាប់អភិវឌ្ឍន៍សង្គម និងស្វែងរក ឯកភាពជាតិ។ លោកបន្តថា ការរិះគន់ប្រកបដោយស្ថាបនា និងរក្សាតម្លៃថ្លៃថ្នូរគឺស្វាគមន៍ ហើយលោកក៏សូមអរគុណ អង្គសភាទាំងមូលដែលបានដោះស្រាយបញ្ហាខ្មែរ និងខ្មែរ។ លោកក៏សុំឲ្យប្រជាជនតាមដានមើលអំពីការធ្វើការដោយប្រុងប្រយ័ត្នអំពីទង្វើបស់យើង។ លោកបានអំពាវនាវឲ្យមានការអត់ធ្មត់ និងបញ្ឈប់រាល់ការជេរប្រមាថ ដែលនាំឲ្យមានការបែកបាក់គ្នា៕
ខេត្តរតនគិរី៖កម្លាំងអាវុធហត្ថខេត្តរតនគិរី បានចុះបង្ក្រាបបទល្មើសព្រៃឈើ រឹបអូសបានឈើសុក្រំ ២០០កំណាត់ នៅម៉ោង២ និង០០នាទី រសៀលថ្ងៃទី៦ ខែធ្នូនេះ ខណៈក្រុមឈ្មួញ ព្យាយាមលាក់ទុកនៅទីតាំងមួយកន្លែង ស្ថិតក្នុងភូមិបាដល ឃុំសេសាន្ត ស្រុកអូរយ៉ាដាវខេត្តរតនគិរី ។ ប្រតិបត្តិការនេះធ្វើឡើងកាលពីរសៀលម្សិលមិញ។
លោក សុខ មីន មេបញ្ជាការអាវុធហត្ថស្រុកអូរយ៉ាដាវ បានឲ្យដឹងថា បន្ទាប់ពីបង្ក្រាបឈើសុក្រំខាងលើកម្លាំងជំនាញ បានប្រមូលឈើគរទុកមួយកន្លែង និងដាក់កម្លាំងឈាមកាម ដោយខ្លាចក្រែងមានបក្ខពួកក្រុមឈ្មួញមករំដោះយកឈើ ហើយនៅព្រឹកថ្ងៃទី៧ ខែធ្នូ នឹងប្រគល់ឲ្យមន្ត្រីរដ្ឋបាលផ្នែកបរកែវ ដឹកយកទៅរក្សាទុកដើម្បីស្វែងរកម្ចាស់ឈើមកធ្វើការផាកពិន័យតាមច្បាប់ស្តីពីព្រៃឈើ៕
រាជធានីភ្នំពេញ៖អតីតអ្នកគាំទ្រ CNRP កញ្ញា ធី សុវណ្ណថា បានស្នើឱ្យលោក កឹម សុខា អនុប្រធានគណបក្សសង្គ្រោះជាតិ ធ្វើការសុំទោសជាសាធារណៈពាក់ព័ន្ធការបរិហាកេរ្តិ៍ ។ កញ្ញា ធី សុវណ្ណថា បានសរសេរដូចនេះលើទំព័រហ្វេសប៊ុករបស់កញ្ញាកាលពីម្សិលមិញ។
អតីតអ្នកគាំទ្របក្សប្រឆាំងរូបនោះព្រមថា បើលោក កឹម សុខា មិនសុំទោសនាង នាងនឹងដាក់ពាក្យប្តឹងទៅតុលាការដើម្បីឲ្យតុលាការបន្តនិតិវិធីសំណុំរឿងផ្សេងទៀតរបស់លោក ដូចជា បរិហាកេរ្តិ៍ ជួញដូរផ្លូវភេទ សូកប៉ាន់សាក្សីជាដើម ។ នាងសរសេរថា “សារផ្ញើជូនលោក កឹម សុខា បណ្តឹងនាងខ្ញុំ បានធ្វើឲ្យលោកជាប់ឃុំ ៦ខែក្នុងស្នាក់ការបក្ស នាងខ្ញុំរីករាយដែលបានឃើញលោកទទួលស្គាល់កំហុស លោកបានស្នើសុំនិងទទួលព្រះរាជទានទោសពីព្រះមហាក្សត្រនាងខ្ញុំក្នុងនាមជាជនរងគ្រោះពីអំពើបរិហាកេរ្តិ៍របស់លោក ស្នើឲ្យលោកសុំទោសនាងខ្ញុំជាសាធារណ: ដើម្បីបញ្ចប់រឿង។ បើលោក មិនសុំទោសនាងខ្ញុំទេ នាងខ្ញុំនឹងបន្តដាក់ពាក្យប្តឹង ដើម្បីឲ្យតុលាការបន្តនីតិវិធីសំនុំរឿងផ្សេងទៀតរបស់លោក ដូចជា បរិហាកេរ្តិ៍ ជួញដូរផ្លូវភេទ សូកសាក្សី ជាដើម”។
កញ្ញា ធី សុវណ្ណថា បានបន្តថា នាងមិនតូចចិត្តជីវិតខ្លួនឯងទេដែលរងការជេរប្រមាថជាច្រើនពីអ្នកគាំទ្របក្សសង្គ្រោះជាតិ ដោយសារតែនាងដឹងច្បាស់ចំពោះសកម្មភាពខ្លួនឯង។ នាងបញ្ជាក់ថា សកម្មភាពរបស់នាង ដើម្បីភាពត្រឹមត្រូវយុត្តិធម៌ ដើម្បីជាតិ ដើម្បីជួយពលរដ្ឋ និងយុវជនក្រីក្រ មិនមែនដើម្បីបក្សណាមួយ រឺ បុគ្គលណាមួយនោះឡើយ។
នាងបានបញ្ជាក់បន្ថែមទៀតថា នាងខ្ញុំសុំទោស និងសូមអរគុណ អ៊ុំពូមីង តំណាងរាស្ត្រ CNRP ទាំងអស់ ដែលតែងតែបានណែនាំ លើកទឹកចិត្តនាងខ្ញុំកន្លងមក តែដោយព្រោះនាងខ្ញុំមិនអាចទ្រាំអត់ធ្មត់ នឹងការជាន់ឈ្លី មើលងាយជាច្រើនដង ពីលោក កឹម សុខា និងកូន ទើបនាងខ្ញុំសម្រេចប្រឆាំងដាក់ពាក្យប្តឹង ដើម្បីទាមទារយុត្តិធម៌។ សុំទោសបងប្អូនអ្នកគាំទ្របក្សសង្គ្រោះជាតិដែលខ្ញុំបានប្តឹងលោក កឹម សុខា ព្រោះខ្ញុំចង់ព្រមានគាត់ និងកូនគាត់ កុំឲ្យមើលងាយយុវជនជំនាន់ក្រោយបន្តទៀត។ពីនាងខ្ញុំ ធី សុវណ្ណថាយុវជនម្នាក់ធ្លាប់ពលិកម្មយ៉ាងធ្ងន់ធ្ងរគាំទ្របក្សសង្គ្រោះជាតិ ហើយត្រូវបានលោក កឹម សុខា និងកូន ប្រមាថមើលងាយចេញលិខិតបដិសេធ បណ្តេញចេញពីលើវេទិកាបក្ស និងបណ្តេញចេញក្បួនហែរបក្ស សូមអរគុណបងប្អូនជាច្រើន នៅតែបន្ត ចុចLikeជួយគាំទ្រ ផ្តល់កម្លាំងចិត្ត និងអាណិតស្រលាញ់នាងខ្ញុំ ៕
រាជធានីភ្នំពេញ៖ប្រធានក្រុមមតិភាគតិច និងជាប្រធានស្តីទីគណបក្សសង្គ្រោះជាតិ លោក កឹម សុខា បានអញ្ជើញចូលប្រជុំសភាពេញអង្គឡើងវិញនៅព្រឹកថ្ងៃទី០៧ ខែធ្នូ ឆ្នាំ២០១៦នេះ បន្ទាប់ពីទទួលបានការលើកលែងទោសពីព្រះមហាក្សត្រនាពេលថ្មីៗនេះ។
ការចូលប្រជុំពេញអង្គរបស់ លោក កឹម សុខា ពេលនេះគឺជាលើកដំបូងហើយ បន្ទាប់ពីលោកត្រូវបានរដ្ឋសភាបោះឆ្នោត ទម្លាក់ចេញតំណែងពីអនុប្រធានទី១ នៃរដ្ឋសភា កាលពីចុងខែតុលា ឆ្នាំ២០១៥កន្លងមក ហើយនៅយប់មិញនេះត្រូវបានរដ្ឋសភា ប្រកាសទទួលស្គាល់ជាប្រធានក្រុមមតិភាគតិច ដែលនេះជាតំណែងរបស់លោក សម រង្ស៊ីកាលពីមុន។
គួរបញ្ជាក់ថា កិច្ចប្រជុំសភាពេញអង្គនៅព្រឹកថ្ងៃទី០៧ ខែធ្នូនេះ គឺបោះឆ្នោតអនុម័តចំពោះការដាក់បេក្ខភាព លោក សួន រីដា ជំនួសតំណែងតំណាងរាស្ត្ររបស់ លោក ប៉ែន សុវណ្ណ ដែលមកពីគណបក្សសង្គ្រោះជាតិ ដែលបានទទួលមរណភាព៕
រាជធានីភ្នំពេញ៖ក្រុមប្រតិបត្តិការចម្រុះនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍នៅព្រឹកព្រលឹម ថ្ងៃទី៧ ខែធ្នូ ឆ្នាំ២០១៦នេះបានសហកាជាមួយស្នងការដ្ឋាននគរបាលរាជធានីភ្នំពេញ ក្រោមការសម្របសម្រួលពីលោក សៀង សុខ ព្រះរាអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យផ្ទះជួល និងសិប្បកម្មឈើ ស្ថិតនៅផ្ផ្ទះលេខ៣៦៩ ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ប្រធាននាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ លោកឧត្តមសេនីយ៍ទោ អ៊ុក ហៃសីឡា បានឲ្យដឹងថា ក្រុមប្រតិបត្តិការចម្រុះបានត្រួតពិនិត្យឃើញមានជនបរទេសចំនួន០៩ នាក់ ស្រី០៥នាក់ ជាជនជាតិវៀតណាម បានលួចឆ្លងដែន ស្នាក់នៅ និងប្រកបរបរខុសច្បាប់ គ្មានលិខិតឆ្លងដែន។ លោកបានបន្តទៀតថា ក្រោយការឃាត់ខ្លួន ជនជាតិវៀតណាមទាំង៩ នាក់ ដែលគ្មានលិខិតឆ្លងដែន ត្រូវបាននាំមកកាន់អគ្គនាយកដ្ឋានអន្តោប្រវេសន៍ ដើម្បីត្រួតពិនិត្យឯកសារ និងអនុវត្តតាមនីតិវិធី៕
ភ្នំពេញ៖ស្ត្រីវ័យប្រហែល៣០ឆ្នាំម្នាក់ បានហៅក្មេងស្រីអាយុ១៦ឆ្នាំម្នាក់ទៀតទៅជួប ហើយបានសុំលេខ ទូរស័ព្ទម្ដាយរបស់នាង ដើម្បីខលទៅទារលុយ ព្រោះម្ដាយក្មេងស្រីខាងលើនោះ ជំពាក់លុយចំនួន៨០ដុល្លារ មិនមានលទ្ធភាពសង ប៉ុន្តែខណៈនោះនាងមិនបានប្រាប់ទេ ស្រាប់តែស្ត្រីម្ចាស់ បំណុល មានការខឹងសម្បារ ដាច់ក្បាលដាច់កន្ទុយ បង្កជាជម្លោះប្រតាយប្រតប់គ្នាកើតឡើង បណ្ដាលឲ្យ ក្មេងស្រីរូបនោះ រងរបួសដាច់ រយះដៃដោយសារក្រចក របស់ស្ត្រីម្ចាស់បំណុលរូបនោះ។ ពេលនោះបានបង្កឲ្យមានការភ្ញាក់ផ្អើលយ៉ាងខ្លាំង ព្រោះមនុស្សចាស់វាយក្មេង បង្កឲ្យមានរបួសស្នាមបែបនេះ ហើយមានមនុស្សទៅចោមរោមមើល យ៉ាងច្រើន ថែមទៀតផង និងបានចូលទៅជួយចាប់ មិនឲ្យស្ត្រីម្ចាស់បំណុលនោះវាយធ្វើបាបក្មេងនោះឡើយ។
ហេតុការណ៏នោះ បានបង្កឲ្យមានការភ្ញាក់ផ្អើលឡើង កាលពីវេលាម៉ោង៤និង១៥នាទីល្ងាច ថ្ងៃទី៧ ខែធ្នូ ឆ្នាំ២០១៦ នៅក្នុងផ្សារទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ស្ត្រីជាម្ចាស់ បំណុលដែលបង្ករបួសស្នាមលើក្មេងស្រីជាអនិតិជននោះឈ្មោះ ពៅ អាយុប្រមាណជាង៣០ឆ្នាំមុខេបរ ជាអាជីវករលក់គ្រឿងអលង្ការកាឡៃ នៅក្នុងផ្សារទួលពង្រនោះ ចំណែកក្មេងស្រីរងគ្រោះ ឈ្មោះ ឃឹម សុវណ្ណារី អាយុ១៦ឆ្នាំ មុខរបរបញ្ចូលភ្លេងទូរស័ព្ទ មានស្រុកកំណើត នៅក្នុងភូមិសំបូរ ឃុំសំបូរ ស្រុកសំបូរ ខេត្តក្រចេះ និងមានម្តាយឈ្មោះ ហ៊ុក វណ្ណី អាយុ៣០ឆ្នាំ មានមុខរបរលក់ទឹកអំពៅស្នាក់ផ្ទះជួលភូមិទួលពង្រ ជាមួយគ្នាដែរ។
ក្រោយពេលកើតហេតុ ស្ត្រីខាងលើនិងក្មេងស្រីរងគ្រោះ ត្រូវបានសន្តិសុខផ្សារនាំទៅកាន់ទីស្នាក់ការផ្សារទួល ពង្រនោះ ដើម្បីធ្វើការដោះស្រាយគ្នា ប៉ុន្តែភ្លាមៗនោះស្ត្រីដៃដល់ មិនបានទទួលខុសនោះទេ បានបដិសេធន៏ ថាខ្លួនមិនបានវាយទៅលើក្មេងស្រីនោះទេ គឺជាការប្រតាយប្រតប់គ្នា ទៅវិញទៅមកតែប៉ុណ្ណោះ ម្យ៉ាងខ្លួន មានបីកូនតូចនៅក្នុងដៃទៀតផង។បន្ទាប់ពីមានការន្រកែកគ្នាបែបនេះ កម្លាំងនគរបាលប៉ុស្ដិ៍ចោមចៅ បានប្រុងនាំខ្លួនទៅកាន់ប៉ុស្ដិ៍ ទើបស្ត្រីរូបនោះសុខចិត្ត សម្របសម្រួលគ្នាជាមួយ ក្មេងស្រីរងគ្រោះ បញ្ចប់រឿងដោយការលុបចោលបំណុលដែលម្ដាយក្មេងស្រីនោះជំពាក់៕
រាជធានីភ្នំពេញ៖បន្ទាប់ពីទទួលបានការលើកលែងទោសពីព្រះមហាក្សត្រ លោក កឹម សុខា ប្រធានស្តីទីគណបក្សសង្គ្រោះជាតិ បានរងនូវការចោទប្រកាន់ជាបន្តបន្ទាប់ពីសំណាក់សកម្មជនគាំទ្របក្សប្រឆាំង ខណដែលពួកគេបានចោទលោក កឹម សុខា ថា បានលក់ខ្លួនឲ្យសម្តេច ហ៊ុន សែន ជាថ្នូរការលើកលែងទោស។
នៅលើ Facebook ដាក់ឈ្មោះថា Pen Sorana បានសរសេរថា « គ្រាន់តែចង់ប្រាប់ទៅមេដឹកនាំជាន់ខ្ពស់គណបក្សសង្គ្រោះជាតិថា អ្នកនយោបាយណាក៏ដោយ ឲ្យតែលក់ក្បាល់ឲ្យ ហ៊ុន សែន ដើម្បីលុយនោះអស់លោកនឹងមានវាសនាដូចសម្តេចក្រុមព្រះ ន.រណឫទ្ធ ។ កន្លងមកប្រជារាស្ត្រខ្មែរ ស្នេហា យុត្តិធម៌ ខំគាំទ្រគណបក្សសង្គ្រោះជាតិ ដោយសារតែអស់លោកមិនលក់ក្បាលឲ្យ ហ៊ុន សែន ។ ប៉ុន្តែបើអស់លោកលក់ក្បាលឲ្យ ហ៊ុន សែន កុំសង្ឃឹមថា ប្រជារាស្ត្រខ្មែរទៅតាមអ្នកនយោបាយដែលលក់ក្បាលឲ្យ ហ៊ុន សែន ឲ្យសោះ ។ សូមចាំទុកសម័យនេះ ជាសម័យហ្វេសប៊ុក ! ដូចនេះអស់លោកមិនចេះតែធ្វើអ្វីបោកប្រាស់ប្រជារាស្ត្រខ្មែរបានឡើយ ។
ក្រៅពីហ្វេសប៊ុកខាងលើ ក៏មានហ្វេសប៊ុកមួយចំនួនទៀតបានបង្ហោះជាសាររិះគន់ និងចោទប្រកាន់លោក កឹម សុខា ថា បានលក់ខ្លួនក្បាលឲ្យសម្តេច ហ៊ុន សែន ដូចគ្នា ហើយថែមទាំងបញ្ជាក់ថា ពួកគេលែងជឿមេដឹកនាំ CNRP បន្តទៀតហើយ ។
យ៉ាងណាក៏ដោយ លោក កឹម សុខា ធ្លាប់បានថ្លែងថា ការលើកលែងទោសដល់លោក គឺពុំមានដោះដូរអ្វីទាំងអស់ជាមួយសម្តេច ហ៊ុន សែន ។ ចំណែកសម្តេច ហ៊ុន សែន ក៏ធ្លាប់បានលើកឡើងផងដែរថា មានតែអ្នកនយោបាយធន់អន់នោះទេ ដែលឲ្យគេទិញក្បាលបាន ។ ប៉ុន្តែសម្តេចគ្មានលុយឯណា ដើម្បីទៅទិញក្បាលអ្នកនយោបាយនោះដែរ ៕
ខេត្តកោះកុង៖បុរសវ័យចំណាស់ជាអ្នកចំការម្នាក់ត្រូវជ្រូកព្រៃទម្ងន់ជាង១០០គីឡូក្រាមគាស់បណ្តាលឲ្យរងរបួសធ្ងន់ធ្ងរ ដែលករណីនេះកើតឡើងកាលពីរសៀលថ្ងៃទី៦ ខែធ្នូ ឆ្នាំ២០១៦ម្សិលមិញនេះ ស្ថិតនៅក្នុងព្រៃក្នុងភូមិកោះប៉ោរ ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
តាមការរៀបរាប់ពីជនរងគ្រោះឈ្មោះ សេង ណែម អាយុ៥០ឆ្នាំ បានឲ្យដឹងថា មុនពេលកើតហេតុខ្លួនបានដើរទៅចំការដោយមានឆ្កែគាត់២-៣ក្បាល ទៅជាមួយ ពេលនោះឆ្កែគាត់បានដេញព្រុះយ៉ាងខ្លាំង ទើបគាត់រត់ទៅមើលស្រាប់តែជ្រូកព្រៃដ៏ធំនោះ បានរត់មករកគាត់វិញទាំងកម្រោល គាត់រត់ឡើងដើមឈើ តែឡើងមិនទាន់បានផងជ្រូកព្រៃនោះវ័តជើង ទើបវាទៅបាត់។ ជនរងគ្រោះថា ដល់ពេលវាទៅបាត់ទើបគាត់ទាញទូរស័ព្ទហៅក្រុមគ្រួសារ មកយករួចហើយបញ្ជូនមកមន្ទីរពេទ្យបង្អែកខេត្តដើម្បីធ្វើការព្យាបាល៕
រាជធានីភ្នំពេញ៖បន្ទាប់ពីមានសកម្មភាពប្លន់ប្រដាប់អាវុធ ឆក់ប្រដាប់អាវុធ និងអំពើចោរកម្ម បានកើតឡើងផ្ទួនៗ ស្ទើរជារៀងរាល់យប់ ក្នុងរាជធានីភ្នំពេញមកនោះ នាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបើកកិច្ចប្រជុំដាក់ផែនការយ៉ាងម៉ឺងម៉ាត់បំផុត ដល់កងកម្លាំងនគរបាលពាក់ព័ន្ធ បើកការស៊ើបអង្កេត និងស្រាវជ្រាវដើម្បីឈានទៅ ដល់ការចាប់ខ្លួនក្រុមចោរប្លន់ទាំងនេះឲ្យខាងតែបាន ។
ក្រោយមានបញ្ជាពីនាយឧត្តមសេនីយ៍ស្នងការ និងក្រោមការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូង រាជធានីភ្នំពេញ កម្លាំងនគរបាលការិយាល័យព្រហ្មទណ្ឌកម្រិតធ្ងន់ កម្លាំងនគរបាលព្រហ្មទណ្ឌកម្រិតស្រាល កម្លាំងនគរបាលទាំង ១២ខណ្ឌ សហការជាមួយកម្លាំងនគរបាលស្រុកអង្គស្នួល ខេត្តកណ្ដាល និងកម្លាំងនគរបាលខេត្តព្រះសីហនុ បានតាមបង្ក្រាប ក្រុមចោរប្លន់ប្រដាប់អាវុធទាំងនេះ បានចំនួន២ក្រុម មានគ្នា១៥នាក់ ចាប់តាំងពីថ្ងៃទី០២ រហូតដល់ថ្ងៃទី០៥ ខែធ្នូ ឆ្នាំ២០១៦។
លោក អេង សោភា បានបញ្ជាក់ថា ជនសង្ស័យទាំង១៥នាក់ ដែលត្រូវបានបង្ក្រាប បានជាបន្តបន្ទាប់នេះ មាន២ក្រុម ដោយក្រុមទី១ ជាក្រុមប្លន់ម៉ូតូ មានចំនួន១០នាក់ ក្នុងនោះខ្លះមានមុនរបបមិនពិតប្រាកដ មានរបបជាបុគ្គលិកនៅណាហ្គាវើល និងជាអ្នកបើករថយន្ត និងមាន២នាក់ទៀតជា អ្នកទទួលផលចោរកម្ម និងជួញដូរគ្រឿងញៀនយ៉ាងសកម្មផងដែរ។
លោកបានបញ្ជាក់ថា ក្នុងប្រតិបត្តិការបង្ក្រាបក្រុមចោរទាំងនេះ កម្លាំងសមត្ថកិច្ចបានដកហូតម៉ូតូចំនួន១៤គ្រឿង អាវុធខ្លី២ដើម ម៉ាកកា៥៤គ្រឿងញៀន៧១កញ្ចប់ ក្នុងនោះ៤៤កញ្ចប់ធំ ស្លាកលេខម៉ូតូចំនួន ៧ កាំបិតប័ងតោ និងទូរស័ព្ទដៃ ១គ្រឿងផងដែរ។
យ៉ាងណាក៏ដោយ ក្រុមចោរទាំង២ក្រុមនេះ បានធ្វើសកម្មភាពប្លន់ចំនួន១៣ករណីនៅសង្កាត់បឹងកក់ទី២ ខណ្ឌទួលគោក នៅសង្កាត់ចោមចៅ ខណ្ឌពោធិ៍សែនជ័យ នៅសង្កាត់ទន្លេបាសាក់ ខណ្ឌចំការមន នៅសង្កាត់ទំនប់ទឹក ខណ្ឌចំការមន នៅសង្កាត់ភ្នំពេញថ្មី ខណ្ឌសែនសុខ នៅសង្កាត់ច្បារអំពៅ១ ខណ្ឌច្បារអំពៅ នៅសង្កាត់វាលវង់ ខណ្ឌ៧មករា នៅសង្កាត់ផ្សារដេប៉េ៣ ខណ្ឌទួលគោក នៅសង្កាត់បឹងកក់២ ខណ្ឌទួលគោក នៅសង្កាត់ទួលស្វាយព្រៃទី១ ខណ្ឌចំការមន នៅសង្កាត់បឹងសាឡាង ខណ្ឌទួលគោក និងនៅសង្កាត់ដង្កោ ខណ្ឌដង្កោ ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
