ខេត្តរតនគិរី៖ពលរដ្ឋថា មេឈ្មួញឈើដ៏ល្បីឈ្មោះ និងមានឥទ្ធិពលដែលមន្ត្រីគ្រប់លំដាប់ថ្នាក់ក្នុងខេត្តរតនគិរី មិនហ៊ានប៉ះនោះមានលំនៅដ្ឋានភូមិថ្មីសង្កាត់ឡាបានសៀកក្រុងបានលុងខេត្ត។
បើតាមសេចក្ដីរាយការណ៍ប្រជាពលរដ្ឋរស់នៅក្រុងបានលុងខេត្តរតនគិរីស្ទើរគ្រប់ៗគ្នាតែងតែកោតសសើរទៅលើមេឈ្មួញទាំងពីរនាក់ប្ដីប្រពន្ធនោះថា ទោះបីប្រទេសជាតិយើងឥឡូវនេះសម្ដេចតេជោ ហ៊ុនសែន បានដាក់បញ្ជាដ៏ក្ដៅគគុក និងប្រគល់ដាវអាជ្ញាសឹកទៅឲ្យនាយឧត្តមសេនីយ៍ សៅ សុខា បង្ក្រាបនិងទប់ស្កាត់ឲ្យទាល់តែបាននូវបទល្មើសព្រៃឈើដែលកំពុងរងនូវកាកាប់បំផ្លាញយ៉ាងរង្គាលនោះ។ តែដោយឡែកគេសង្កេតឃើញ មេឈ្មួញទាំងពីនាក់ប្ដី ប្រពន្ធរូបនេះនៅតែបន្តដឹកយ៉ាងសស្រាក់សស្រាំទាំងយប់ទាំងថ្ងៃយ៉ាងរលូនដោយធ្វើដំណើរចេញពីស្រុក វ៉ឺសៃ។ ប្រភពបន្តថា ឈ្មួញ២នាក់ប្តីប្រពន្ធនេះបានទិញឈើដែលប្រជាពលរដ្ឋលួចចូលកាប់នៅក្នុងតំបន់អភិរក្សសត្វតូច និងឧទ្យានជាតិវិរៈជ័យដែលជាតំបន់ហាមឃាត់ ។
បើតាមសម្ដីរបស់មន្ត្រីដែលមានឋានៈតូចតាចបានបង្ហើបឲ្យដឹងថា សព្វថ្ងៃកំលាំងជំនាញគ្រប់ជំនាញតែងតែទទួលបានលាភសក្ការៈ រឺថាជាប្រាក់ខែពីលោកទូច និងចែណាតប្រចាំខែអស់ហើយ ដោយតាមធំ តាមតូច។ ប្រភពបញ្ជាក់ថា បើអ្នកធំៗចាប់ពី៥០០០ដុល្លារមក៣៥០០ដុល្លារ បើមន្ត្រីល្មមៗចាប់ពី២០០០ដុល្លារចុះមក១៥០០ដុល្លារ ដូច្នេះហើយបើពលរដ្ឋណាឃើញរថយន្ដដឹកឈើរបស់លោកទូចនិងចែណាត រឺក៏អ្នកសារព័ត៌មានណារាយការណ៍យ៉ាងណាក៏ដោយ ក៏គ្មានជំនាញណាមួយចេញមុខមកបង្ក្រាបនោះទេ ទោះបីបើកកាត់ក្រុងទាំងថ្ងៃក៏ដោយ៕
ព្យុងយ៉ាង៖មេដឹកនាំកូរ៉េខាងជើងលោក គឹម ជុងអ៊ុន បានហៅការដាក់ទណ្ឌកម្មសិទ្ធិមនុស្សរបស់សហរដ្ឋអាមេរិកមកលើប្រទេសកូរ៉េខាងជើងគឺ «ជាការប្រកាសសង្គ្រាម» សុទ្ធសាធ។ នេះបើតាមសារព័ត៌មានអាមេរិក US TODAY ចេញផ្សាយនាព្រឹកថ្ងៃសុក្រ ទី០៨ ខែកក្កដា ឆ្នាំ២០១៦នេះ។
ទីភ្នាក់ងារ Reuters ថា នេះមិនមែនជាលើកទីមួយទេក្នុងឆ្នាំ ២០១៦នេះ ដែលប្រទេស កូរ៉េខាងជើង បានគំរាមថាទង្វើអាមេរិក ឬអន្តរជាតិមកលើទីក្រុងព្យុងយ៉ាង ជាការបញ្ឆេះសង្គ្រាមនោះ ហើយបើតាមដឹង នេះជាការគំរាមលើកទីបួនហើយ ចាប់តាំងពីប្រទេសនេះបានព្យាយាមធ្វើតេស្តគ្រាប់មីស៊ីល និង អាវុធប្រល័យ ដែលជាការផ្គើនម្តងហើយម្តងទៀត ចំពោះច្បាប់ហាមឃាត់ចេញដោយអន្តរជាតិ។
គួរបញ្ជាក់ថា ក្រសួងការបរទេសអាមេរិកបានហៅរដ្ឋាភិបាលកូរ៉េខាងថា ជាអ្នករំលោភសិទ្ធិមនុស្ស និងបានកត់ចូលក្នុងបញ្ជីខ្មៅរបស់អាមេរិកផងដែរ៕
ខេត្តបន្ទាយមានជ័យ៖អគ្គកុងស៊ុលកម្ពុជាប្រចាំនៅខេត្តសាកែវប្រទេសថៃសហការជាមួយសមត្ថកិច្ចកម្ពុជា-ថៃបានបញ្ជូនសាកសពពលករខ្មែរ២នាក់ដែលស្លាប់នៅស្រុកថៃដោយជំងឺគាំងបេះដូងតាមច្រកទ្វារអន្តជាតិប៉ោយប៉ែតក្នុងខេត្តបន្ទាយមានជ័យយកមកឲ្យបងប្អូនយកទៅធ្វើបុណ្យតាមប្រពៃណីកាលពីព្រឹកថ្ងៃទី៧ ខែកក្កដា ឆ្នាំ២០១៦។
លោកវរសេនីយ៍ត្រី ជា ដា មេបញ្ជាការកងរាជអាវុធក្រុងប៉ោយប៉ែតបានឲ្យដឹងថា ជនរងគ្រោះទាំង២នាក់ទី១ឈ្មោះ ជឹម វណ្ណសាក់ ភេទប្រុស អាយុ២៦ឆ្នាំ មានស្រុកកំណើតនៅភូមិពញាក្រែក ស្រុកពញាក្រែក ខេត្តត្បូងឃ្មុំ មុខរបរ ធ្វើកម្មករនៅខេត្តសមុទ្រប្រាកាន ប្រទេសថៃ បានស្លាប់ដោយជំងឺខ្យល់គរ កាលពីថ្ងៃទី៥ ខែកក្កដា ឆ្នាំ២០១៦ វេលាម៉ោង៤ និង៣០នាទីនៅបន្ទប់ជួលប្រទេសថៃ និងទី២ ឈ្មោះ ឈឺន គីម ភេទប្រុស អាយុ៣១ឆ្នាំមានទីលំនៅភូមិគោកថ្មី ឃុំព្រៃជ្រូក ស្រុកពួក ខេត្តសៀមរាប មុខរបរ ជាកម្មករសំណង់នៅខេត្តកូរ៉ាត ប្រទេសថៃស្លាប់ដោយជំងឺគាំងបេះដូង កាលពីថ្ងៃទី៥ ខែកក្កដា ឆ្នាំ២០១៦ វេលាម៉ោង១៥ និ០០នាទីនៅបន្ទប់ជួលប្រទេសថៃ។
លោកបញ្ជាក់ថា សាកសពពលករទាំង២នាក់ត្រូវបានតម្រួតថៃបញ្ជូនមកដល់ច្រកអន្តរជាតិនៅព្រឹកថ្ងៃទី៧ ខែកក្កដា ឆ្នាំ២០១៦ ក្នុងពេលនោះមានក្រុមគ្រួសារសពបានមកទទួលយកទៅស្រុកកំណើតដើម្បី ធ្វើបុណ្យតាមប្រពៃណីនៅផ្ទះរៀងៗខ្លួន៕
បាដាដ៖មនុស្សយ៉ាងហោច៣៥នាក់បានស្លាប់បាត់បង់ជីវិត បន្ទាប់ពីហេតុវាយប្រហារដោយគ្រាប់បែកនៅរទីសក្ការៈបូជានិកាយស៊ីអ៊ីតមួយនៅភាគខាងជើងទីក្រុងបាដាដ។ នេះបើយោងអ្នកនាំពាក្យសន្ដិសុខម្នាក់បាននិយាយនៅថ្ងៃសុក្រ។
អ្នកនាំពាក្យបញ្ជាការប្រតិបត្តិការរួមបានឲ្យដឹងក្នុងសេចក្តីថ្លែងការណ៍មួយថា ការវាយប្រហារពេញមួយយប់នៅទីសក្ការៈបូជា Sayyid Mohammed ដែលមានរួមទាំងការបំផ្ទុះគ្រាប់បែកអត្តឃាត បាញ់កាំភ្លើងនិងកាំភ្លើងត្បាល់ផងដែរនោះក៏បានបង្ករបួសដល់មនុស្ស៥០នាក់ផងដែរ ។ ការវាយប្រហារនេះបានកើតឡើងបន្ទាប់ពីការបំផ្ទុះគ្រាប់បែកនៅទីក្រុងបាដាដក្នុងតំបន់ដើរទិញឥវ៉ាន់មួយដែលមានមនុស្សច្រើនកាលពីថ្ងៃអាទិត្យនៃថ្ងៃឈប់សម្រាកបុណ្យ Eid Al-Fitr ។មនុស្ស២៩២នាក់ត្រូវបានសម្លាប់ក្នុងការវាយប្រហារនោះ។
បើយោងតាមសេចក្តីថ្លែងការណ៍ស្តីពីការវាយប្រហារនេះបាននិយាយថា ទីសក្ការៈបូជា Sayyid Mohammed ដែលមានទីតាំងស្ថិតនៅតំបន់ Balad ចម្ងាយ៧០គីឡូម៉ែត្រពីភាគខាងជើងនៃទីក្រុងបាដាដគឺត្រូវបានកំណត់គោលដៅជាលើកដំបូងដោយកាំភ្លើងត្បាល់។ សេចក្តីថ្លែងការណ៍បានអះអាងថា ការវាយប្រហារនេះជាស្នាដៃរបស់ក្រុមជីហាដ IS ។
គួរបញ្ជាក់ថា ការវាយប្រហារនេះបានកើតឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីរដ្ឋមន្ត្រីក្រសួងសុខាភិបាលអ៊ីរ៉ាក់ Adila Hamoud បានប្រកាសថា ចំនួនអ្នកស្លាប់ពីការបំផ្ទុះគ្រាប់បែកកាលពីថ្ងៃអាទិត្យបានឡើងដល់២៩២នាក់៕
រាជធានីភ្នំពេញ៖បុរសម្នាក់ត្រូវកម្លាំនគរបាលខណ្ឌសែនសុនចាប់ខ្លួនបន្ទាប់ពីកាប់បុរសម្នាក់នឹងកាំបិតបុ័ងតោ បណ្ដាលឱ្យដាច់ម្រាមដៃអស់៤ ដោយសារតែកើតទំនាស់ ក្រោយពេលស្រវឹងស្រា។ ហេតុការណ៍នេះកើតឡើងនៅយប់ថ្ងៃទី០៧ ខែកក្កដា ឆ្នាំ២០១៦ ស្ថិតនៅមុខផ្ទះជួល ក្នុងភូមិច្រេស សង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីសមត្ថកិច្ចបានឱ្យដឹងថា ជនសង្ស័យដែលចាប់ខ្លួនឈ្មោះ សំនៀង ស្រស់ អាយុ២២ឆ្នាំ មុខរបរជាងពិដាន។ រីឯជនរងគ្រោះឈ្មោះ មាន វាសនា អាយុ២៤ឆ្នាំ រងរបួសដាច់ម្រាមដៃអស់៤ម្រាម។ ប្រភពបញ្ជាក់ថា បន្ទាប់ពីកើតហេតុសមត្ថកិច្ចបានដកហូតបានកាំបិតបុ័ងតោមួយ។
បច្ចុប្បន្នជនសង្ស័យត្រូវបញ្ជូនខ្លួនទៅអធិការដ្ឋានខណ្ឌ ដើម្បីកសាងសំណុំរឿងចាត់ការតាមនីតិវិធី៕
ខេត្តមណ្ឌលគិរី៖រថយន្តលោតឆ័ត្រដឹកឈើ១គ្រឿង ឆេះម៉ត់ខណៈកំពុងបើកបោះពួយតាមបណ្តោយផ្លូវជាតិលេខ៧៦ ក្នុងដែនជំរកសត្វព្រៃកែវសីមា ស្ថិតក្នុងភូមិអូរណា ឃុំស្រែខ្ទុម ស្រុកកែវសីមា ខេត្តមណ្ឌលគិរី។ ហេតុការណ៍នេះ បានកើតឡើងនៅម៉ោងប្រមាណជា៦ និង៣០នាទីព្រលប់ ថ្ងៃទី០៧កក្កដា២០១៦។
អ្នកឃើញហេតុការណ៍អោយដឹងថា គេឃើញរថយន្តម៉ាកបាឡែន ពណ៌សំបកឪឡឹកខាងលើបោះពួយយ៉ាងលឿនមកពីស្រុកអូរាំង ថែមទាំងមានផ្ទុកឈើប្រណិតផងដែរ។ បន្តិចក្រោយមក គេឃើញមានផ្សែងហុយ រួចមានមនុស្សរត់ចេញពីក្នុងរថយន្តទាំងភ័យភិត ហើយក៏ស្ទុះស្ទារ ទាញឈើចេញពីក្នុងរថយន្ត ជំលៀសដាក់កន្លែងមានសុវត្ថភាពតែម្តង។ ប្រភពបញ្ជាក់ថារថយន្តខាងលើឆេះដោយមូលហេតុឆ្លងចរន្តភ្លើង។ ក្រោយកើតហេតុគេមិនបានឃើញមានសមត្ថកិច្ច និងមន្ត្រីជំនាញបរិស្ថាន ព្រមទាំងរដ្ឋបាលព្រៃឈើ ចុះទៅពិនិត្យកន្លែងកើតហេតុនោះទេ។
ទោះជាយ៉ាងណាឈើប្រណីតដែលមានម្ចាស់ឈ្មោះ នាថ ត្រូវបានជំលៀសចេញ ដោយសុវត្ថិភាព ចំណែករថយន្តរងគ្រោះ គឺត្រូវអណ្តាតភ្លើងឆាបឆេះសល់តែគ្រោងឆ្អឹងតែប៉ុណ្ណោះ៕
ខេត្តពោធិ៍សាត់៖ផ្តើមចេញពីទំនាស់បន្តិចបន្តួចក្នុងក្រុមគ្រួសារឈានដល់ខ្លាំងរៀងៗខ្លួនរហូតកើតជាហិង្សាប្អូបថ្លៃកាប់បងថ្លៃមួយពូថៅពីក្រោយចំក្បាលបណ្តាលឲ្យស្លាប់ពេលបញ្ជូនទៅដល់មន្ទីរពេទ្យ។ ហេតុការណ៍នេះកើតឡើងកាលពីវេលាម៉ោង ៨ និង១៥នាទីយប់ ថ្ងៃទី៧ ខែកក្កដា ឆ្នាំ២០១៦ នៅចំណុចផ្ទះជនរងគ្រោះ និងជនសង្ស័យ ស្ថិតក្នុងភូមិអូរអញ្ចាញ ឃុំបឹងកន្ទួត ស្រុកក្រគរ ខេត្តពោធិ៍សាត់ ។
បុរសរងគ្រោះដែលត្រូវប្អូនថ្លៃកាប់១ពូថៅឈ្មោះ ឃុត ឃាង ភេទប្រុស អាយុ៥០ឆ្នាំ ជនជាតិខ្មែរ បច្ចុប្បន្នរស់នៅភូមិឃុំកើតហេតុខាងលើ។ ចំណែកជនដៃដល់ជាប្អូនថ្លៃនោះឈ្មោះ បាន ខ្លឹម ភេទប្រុស អាយុ៣០ឆ្នាំ ជនជាតិខ្មែរ រស់នៅភូមិឃុំកើតហេតុជាមួយគ្នា។
អធិការនគរបាលស្រុកក្រគរ លោក ឯម រុន បានឲ្យដឹងថា ជនរងគ្រោះ និងជនដៃដល់ជាបងប្អូនថ្លៃ ដោយប្រពន្ធ និងប្រពន្ធជាបងប្អូនបង្កើតនឹងគ្នា ។ លោកអធិការបន្តថា ករណីឃាដកម្មដែល ឈានដល់កាប់១ពូថៅចំក្បាលពីក្រោយបណ្តាលឲ្យស្លាប់បងថ្លៃដោយសារតែទំនាស់ក្នុងគ្រួសារបន្តិចបន្តួចទើបឈានដល់យកខ្លាំងរៀងៗខ្លួន។ ក្រោយពេលកើតហេតុជនដៃដល់ បានរត់គេចខ្លួនបាត់ ហើយសាកសពជនរងគ្រោះត្រូវបានក្រុមគ្រួសារយកមកធ្វើបុណ្យតាមប្រពៃណី៕
ខេត្តឧត្តរមានជ័យ៖ប៉ូលិសការពារព្រំដែនគោកលេខ៩០៥កម្ពុជា ថៃបានបង្ក្រាបក្រុមក្មេងទំនើង២ក្រុមជិះម៉ូតូ ជាច្រើនគ្រឿងប្រដេញ វាយកាប់ចាក់គ្នា សំណាងល្អប៉ូលីសបង្ក្រាបទាន់ឃាត់ខ្លួន២៤នាក់កាលពីវេលាម៉ោង៣.៣០នាទីល្ងាច់ថ្ងៃទី០៧ ខែកក្កដា ឆ្នាំ២០១៦បានបង្កឲ្យមានការភ្ញាក់ផ្អើល។ ហេតុការណ៍នេះបានកើតឡើងនៅតាមបណ្តោយផ្លូវជាតិលេខP.R ១៧១ស្ថិតនៅក្នុងភូមិទួលស្វាយ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។
អ្នកភូមិទួលស្វាយបានរៀបរាប់ឲ្យដឹងថា មុនពេលកើតហេតុគេបានឃើញមានក្រុមក្មេងៗជិះម៉ូតូជាច្រើនគ្រឿង ដោយអ្នកខ្លះដៃកាន់ដំបង អ្នកខ្លះដៃកាន់ដែកបំពង់ទីព និងអ្នកខ្លះទៀតដៃកាន់ដាវសាំម៉ូរ៉ៃ។អ្នកភូមិបានបញ្ជាក់ថា បន្តិចក្រោយមក ក្មេងទំនើងទាំង២ក្រុមនេះបានជិះម៉ូតូប្រដេញវាយកាប់ចាក់គ្នាដូចក្នុងសាច់រឿងហុងកុងបានបង្កឲ្យមានការភ្ញាក់ផ្អើលដល់ពលរដ្ឋតែសំណាងល្អបានប៉ូលិសបង្ក្រាបទាន់កុំអីមានអ្នកស្លាប់ និងមានអ្នកដេកគុក។
លោកវរសេនីយ៍ឯក ស៊ុំ សារឿន មេបញ្ជាការវរៈសេនាតូចលេខ៩០៥ប៉ូលិសការពារព្រំដែនគោកកម្ពុជា ថៃបានឲ្យដឹងថា មុនពេលធ្វើការឃាត់ខ្លួនក្រុមក្មេងទំនើងទាំង២ក្រុមនេះ ដោយបានទទួលព័ត៌មានរាយការណ៍ពីប្រជាពលរដ្ឋមកថា មានក្រុមក្មេងជិះម៉ូតូដេញវាយ កាប់ចាក់គ្នា ភ្ញាមៗនោះនោះលោកបានបញ្ជាកំលាំង ធ្វើការបង្ក្រាបបានជាបន្តបន្ទាប់ មុនពេលធ្វើសកម្មភាពកាប់ចាក់គ្នា។
លោកវរៈសេនីយ៍ឯកបានបញ្ចាក់ថា ក្រុមក្មេងទំនើងទាំង២ក្រុម មានមួយក្រុមមកពីតំបន់អូរស្មាច់ក្រុងសំរោង ជិះម៉ូតូ១១គ្រឿង មានបក្ខពួក១៤នាក់ នឹងមួយក្រុមទៀតមកពីស្រុកអន្លង់វែងជិះម៉ូតូ៧គ្រឿង មានបក្ខពួក១០នាក់។សមត្តកិច្ចឃាត់ខ្លួន២៤នាក់ ក្នុងនោះភាគច្រើនមានអាយុចាប់ពី១៥ទៅ១៦ឆ្នាំ នឹងដកហូតបានម៉ូតូ១៨គ្រឿង ដាវសាំម៉ូរ៉ៃ២ ដែកបំពង់ទីប១ដើមប្រវែង៨តឹក ដែកថ្នាំងអំពៅ១ដើមប្រវែង៦តឹកទូស័ព្ទដៃ២១គ្រឿង លោកបានកសាងសំណុំរឿង ក្រុមក្មេងទំនើងទាំង២ក្រុម រួមទាំងវត្ថុតាង ទៅស្នងការដ្ឋាននគបាលខេត្តឧត្តរមានជ័យ ចាត់ការបន្តតាមនីតិវិធីច្បាប់៕
រាជធានីភ្នំពេញ៖កម្ពស់ទឹកជំនន់ ប្រចាំថ្ងៃទី០៨ ខែកក្កដា ឆ្នាំ២០១៦នេះ នៅតាមបណ្តាស្ថានីយ ជលសាស្ត្រ រួមមានស្ថានីយ ទន្លេមេគង្គ-ស្ទឹងត្រែង, ស្ថានីយទន្លេមេគង្គ-ក្រចេះ, ស្ថានីយទន្លេ មេគង្គ-កំពង់ចាម, ស្ថានីយបាសាក់-ចតុមុខ, ស្ថានីយមេគង្គ-អ្នកលឿង, ស្ថានីយបាសាក់-កោះខែល និង ស្ថានីយទន្លេសាប-ព្រែកក្តាម ៕ ព័ត៌មានលម្អិតសូមអាន ព្រឹត្តិបត្រព័ត៌មាន របស់ក្រសួងធនធានទឹកទាំងស្រុង៖
រាជធានីភ្នំពេញ៖កម្លាំងនគរបាលជាតិបានបង្ក្រាបបទល្មើសជួញដូរ រក្សាទុក និងប្រើប្រាស់៥ករណីនៅថ្ងៃទី០៧ ខែកក្កដា ឆ្នាំ២០១៦ ម្សិលមិញនេះ ឃាត់មនុស្ស១២នាក់ (ស្រី៤នាក់) ក្នុងនោះមុខសញ្ញាជួញដូរ៦នាក់ និងមុខសញ្ញាប្រើប្រាស់៦នាក់ដកហូតថ្នាំមេតំហ្វេតាមីន (ice) ០.៣៧ក្រាម, ១កញ្ចប់ធំ និង៦កញ្ចប់តូច និងថ្នាំមេតំហ្វេតាមីន (wy) ៦គ្រាប់។
យោងតាមរបាយការណ៍របស់អគ្គស្នងការនគរបាលជាតិបញ្ជាក់ថា ជនសង្ស័យទាំងនោះត្រូវបានឃាត់ខ្លួននៅ ខេត្តកណ្ដាលបង្ក្រាប២ករណី ឃាត់ខ្លួន៣នាក់, ខេត្តកំពតបង្ក្រាប១ករណី ឃាត់ខ្លួន២នាក់, ខេត្តតាកែវបង្ក្រាប១ករណី ឃាត់ខ្លួន២នាក់ និងខេត្តបន្ទាយមានជ័យបង្ក្រាប១ករណី ឃាត់ខ្លួន៥នាក់៕
រាជធានីភ្នំពេញ៖នៅថ្ងៃទី៧ ខែកក្កដា ឆ្នាំ២០១៦ម្សិលមិញនេះមានករណីគ្រោះថ្នាក់ចរាចរណ៍នៅទូទាំងប្រទេសកើតឡើងចំនួន៥លើក (យប់២លើក) បណ្តាលឲ្យមនុស្សស្លាប់៤នាក់ (ស្រី២នាក់) រងរបួសធ្ងន់៦នាក់ និងរបួសស្រាល២នាក់។ នេះបើតាមរបាយការណ៍របស់អគ្គស្នងការនគរបាលជាតិ។
ប្រភពដដែលបន្តថា នៅក្នុងហេតុការណ៍គ្រោះថ្នាក់ចរាចរណ៍៥លើកនេះ បណ្តាលឲ្យខូចខាតយានយន្តសរុបចំនួន៩គ្រឿង រួមមានម៉ូតូចំនួន៤គ្រឿង រថយន្តធុនតូចចំនួន៣គ្រឿង, រថយន្តធុនធំ១គ្រឿង, យានផ្សេងៗ ១គ្រឿង។ ប្រភពបញ្ជាក់ថា មូលហេតុដែលបណ្តាលឲ្យកើតមាន ករណីគ្រោះថ្នាក់ចរាចរណ៍ រួមមានល្មើសល្បឿន២លើក, ស្រវឹង២លើក, ប្រជែង១លើក។
ជាមួយគ្នានោះនៅថ្ងៃទី៧ ខែកក្កដា ឆ្នាំ២០១៦ម្សិលមិញលទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោករកឃើញថា យានយន្តដែល្មើសសរុបទូទាំងប្រទេសមាន ចំនួន ៤,៣៦៨គ្រឿង ក្នុងនោះបានធ្វើការអប់រំចំនួន ២,០២៨គ្រឿង និងពិន័យសរុប ២,៣៤០ គ្រឿង៕
ភ្នំពេញ៖កាលពីរសៀលម៉ោង ២ និង ០០នាទី ថ្ងៃទី៧ ខែ កក្ដដា ឆ្នាំ ២០១៦ មន្ដ្រីនគបាលប្រឆាំងបទល្មើសសេដ្ឋកិច្ចក្រសួងមហាផ្ទៃ នឹង មន្ដ្រីកាន់កុងត្រូលបានរៀបចំពិធីដុតកំទេចផលិតផលក្លែងក្លាយនៅក្នុងទីលានចាក់សំរាមស្ថិតនៅក្នុងភូមិរលួស សង្កាត់ជើងឯក ខណ្ឌដង្កោ។
ដោយមានការចូលរួមពីឧត្តមសេនីយ៍ឯក វ៉ាន់ ចាន់ធឿនប្រធាននាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ ឧត្តមសេនីយ៍ទោ ឡុង ស្រេង អនុប្រធាននាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ លោកលឿង រដ្ឋា អគ្គនាយករងកាន់តុងត្រូល និង មានការចូលរួមពីលោក សៀង សុខ ព្រះរាអាជ្ញារងអមសាលាដំបូងរាជធានីភ្នំពេញ។
គួររំលឹកដែរថាផលិតផលក្លែងក្លាយទាំងនោះត្រូវបាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃបានរឹបអូសកាលពីថ្ងៃទី ២២ ខែ មីនា ឆ្នាំ ២០១៦ កន្លងមកហើយដកហូតបាននូវគ្រឿងឧបភោគបរិភោគខូចគុណភាពចំនួន ៧ មុខក្នុងនោះមានដូចជា Vin Cafe ចំនួន ២៤០ កេស និង ២០ បាវ.។ Cool Tea ៧០ កេស Cafe ពោត Day to Day ១៤៤ កេស ទឹកត្រី Hao houng នឹងទឹកត្រី (ដបជ័រ) សរុបចំនួន ៤០៤ កេស និង មេស្រាចំនួន ៤០ ដប។
យោងតាមប្រសាសន៍របស់លោក ឡុង ស្រេង អនុប្រធាននាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ នឹង លោកលឿង រដ្ឋា អគ្គនាយករងកាន់តុងត្រូល បានបញ្ជាក់អោយដឹងថាកម្លាំងរបស់លោកនឹងបន្ដហសការធ្វើការសើបអង្កេត និង ស្រាវជ្រាវ បន្ដដើម្បីរកផលិតផលក្លែងក្លាយដែលបណ្ដាលអោយមានផលប៉ះពាល់ដល់សុខភាពរបស់ប្រជាពលរដ្ឋដើម្បីយកមកដុតកំទេចចោលដូចករណីខាងលើ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
