ខេត្តរតនគិរីៈ អភិបាលស្រុកអូរយ៉ាដាវ បានចោទប្រកាន់អ្នកសារពត៌មានដោយចាត់ទុកថាជាអ្នកផ្សាយព័ត៌មានលាបពណ៌ ដែលបង្កជាក្តីបារម្ភយ៉ាងខ្លាំងពីសុវត្ថិភាពសម្រាប់អ្នកកាសែតនៅក្នុងខេត្តនេះ។ដោយឡែកអភិបាលស្រុកអណ្តូងមាស បានត្អូញត្អែរផ្តោតលើការលំបាកក្នុងករណីការបង្ក្រាបទល្មើសផ្សេងៗដែលតែងកើតឡើងជាញឹកញាប់ទៅវិញ។
ទស្សនៈផ្ទុយគ្នារបស់អភិបាលស្រុកទាំងពីរ បានលើកឡើងនៅក្នុងពិធីផ្សព្វផ្សាយសារាចរលេខ០២ របស់រាជរដ្ឋាភិបាល ស្តីពីអំពីការទប់ស្កាត់ និងបង្ក្រាបបទល្មើសព្រៃឈើ ក្រោមអធិបតីភាពលោក ម៉ាន សុគ្រី អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទ នៅសាលាខេត្តរតនគិរី កាលពីព្រឹកថ្ងៃទី២៤ ខែមីនា ឆ្នាំ២០១៥នេះ។
អភិបាលស្រុកអូរយ៉ាដាវ លោក ម៉ា វិចិត្រ បានមានប្រសាសន៍នៅក្នុងពីធីផ្សព្វផ្សាយនោះថា “យោងតាមការចុះបង្ក្រាប និងអង្កេតកន្លងមក ករណីបទល្មើសព្រៃឈើនៅក្នុងតំបន់របស់លោកមិនសូវកើតមានដូចមានការលើកឡើងនោះទេ ផ្ទុយទៅវិញបទល្មើសមានតិចតួចបំផុត”។ លោកបានមានប្រសាសន៍ថា “អ្វីដែលជាការប្រឈមនោះ គឺអ្នកសារពត៌មានទៅវិញ ដែលយកករណីចុះបង្ក្រាបនៅក្នុងតំបន់របស់លោកថាជាការទារលុយទារកាក់”។ លោកថា អ្នកសារពត៌មានបានចោទថាខ្ញុំជាអ្នកទទួលសំណូកពីបទល្មើសចំនួន១៧.០០០$ ដែលការផ្សាយនោះគឺជាការបំផ្លើស ឫហៅថាជាសារព័ត៌មាន “លាបពណ៌”ឫក៏ករណី “ជះទឹកដាក់គ្នា”។បើទោះបីជាលោកមិននិយាយចំត្រង់ៗក្តី ក៏
មជ្ឈដ្ឋានទូទៅក្នុងខេត្តរតនគីរី ដែលបានដឹងរឿងនេះបានវាយតម្លៃថា លោក ម៉ា វិចិត្រ បានចាត់ទុកអ្នកកាសែតជាឆ្អឹងទទឹង.ក ព្រោះលោកមិនចង់ឲ្យមានការផ្សាយព័ត៌មានស្តីពីបទល្មើសព្រៃឈើដែលកំពុងកើតមានយ៉ាងគគ្រឹកគគ្រេងក្នុងដែនសមត្ថកិច្ចរបស់លោកនោះទេ។
ទោះជាយ៉ាងនេះក្តី លោក ម៉ា វិចិត្រ មិនបានបញ្ជាក់ត្រង់ៗទៅលើអង្គភាពសារព័ត៌មាន ណាមួយនោះទេ ហើយកន្លងមកគេមិនទាន់ឃើញមានអ្នកសារព័ត៌មានណាម្នាក់ត្រូវលោកមេស្រុករូបនេះប្តឹងពីបទបរិហារកេរ្តិ៍នោះដែរ។
ដោយឡែកអភិបាលស្រុកអណ្តូងមាសលោក នង ដារិទ្ធ បានមានប្រសាន៍នៅក្នុងពិធីផ្សព្វផ្សាយនោះដោយផ្តោតជាសំខាន់ថា “ការចុះបង្ក្រាបបទល្មើសបានប្រឈមនឹងបញ្ហាជាច្រើនដូចជាករណីចុះបង្ក្រាបបទល្មើបានហើយ គ្មានមធ្យោបាយដឹកជញ្ជូន ដែលតម្រូវឲ្យរដ្ឋបាលស្រុកជួលមធ្យោបាយឯកជន ។ករណីខ្លះវត្ថុតាងនៃបទល្មើសដែលបង្ក្រាបបានត្រូវបាត់បង់ទៅវិញដោយសារតែខ្វះកន្លែងទុកដាក់មានសុវត្ថិភាពជាដើម។ បើទោះបីជាអាជ្ញាស្រុកមានសិទ្ធិគ្រប់គ្រងកម្លាំងប្រដាប់អាវុធទាំងបីប្រភេទក្តី ក៏ការសហការដឹកនាំកម្លាំងនៅមិនទាន់បានរលូននៅឡើយ។
មានប្រសាសន៍ឆ្លើយតនឹងសេចក្តីរាយការណ៍លើលោក ម៉ាន សុគ្រី អនុលេខាធិការក្រសួងកសិកម្មបានថ្លែងថា កងកម្លាំងប្រដាប់អាវុធដែលជាប់ពាក់ព័ន្ធនឹងបទល្មើសសូមដកខ្លួនអោយឆ្ងាយ ហើយចូលរួមសហការ និងរាយការណ៍លម្អិតពីបទល្មើសជាក់ស្តែងដើម្បីចុះអនុវត្តទទួលបានជោគជ័យ។ លោកបានថ្លែងបន្តថា អ្នកសារពត៌មានមួយចំនួនតែងតែបំលែងការពិត ប៉ុន្តែក៏មានអ្នកសារព័ត៌មានមួយចំនួនទៀតបានផ្សព្វផ្សាយព័ត៌មានពិត និងសច្ចះភាពផងដែរ។
លោកបានមានប្រសាសន៍បញ្ជាក់ទៀតថា ការមិនសហការគ្នាបានល្អ វាតែងតែបង្កអោយសមត្ថកិច្ចដែលចុះទៅបង្ក្រាបនោះក្លាយទៅជាជនរងគ្រោះទៅវិញ ដូចជាករណីជនល្មើសធ្វើសកម្មភាពពន្លិចទូកបង្ក្រាបរបស់សមត្ថកិច្ចជាដើម។ល។
សមាជិក សមាជិការ រួមនិងអ្នកកាសែត ទូរទស្សន៍ជាច្រើននាក់ក្នុងពិធីនេះ បានសម្តែងការងឿងឆ្ងល់គ្រប់ៗគ្នាថា ហេតុអ្វីបានជាការផ្សព្វផ្សាយព័ត៌មានបទល្មើសដែលកើតមានឡើងក្នុងស្រុកអូរយ៉ាដាវ ដែលជាដែនសមត្ថកិច្ចរបស់លោក ម៉ា វិចិត្រ បែរជាត្រូវលោកចាត់ទុកថា ជាការបំផ្លើស ឬជាការលាបព័ណ៌សំរាប់លោកទៅវិញ។
គួរំលឹកផងដែរថា អ្នកកាសែតមួយចំនួនត្រូវបានរងគ្រោះជាប់ពន្ធនាគារដោយការមួលបង្កាច់ ហើយមួយចំនួនទៀតត្រូវរងគ្រោះដោយអំពើឃាតកម្មពីសំណាក់ជនទុច្ចរិតព្រៃឈើដើម្បីបំបិទមាត់ និងគំរាមកំហែងដល់អ្នកកាសែតដទៃទៀតមិនឲ្យផ្សព្វផ្សាយពីសកម្មភាពរកស៊ីក្នុងបទល្មើសរបស់ពួកគេ។អង្គការសង្គមស៊ីវិលជាតិ និងអន្តរជាតិ រួមនិងអង្គភាពប្រឆាំងនឹងអំពើពុករលួយរបស់លោក ឱម យ៊ិនទៀង កំពុងផ្តោតការយកចុត្តទុកដាក់យ៉ាងខ្លាំងចំពោះករណីដូចខាងលើនេះ។
គួរជម្រាបថា កន្លងមកបទល្មើសព្រៃឈើបានកើតមាននៅតាមស្រុកមួយចំនួនក្នុងខេត្តរតនគិរីយ៉ាងពេញបន្ទុក ប៉ុន្តែកម្លាំងមានសមត្ថកិច្ច ឬមន្ត្រីជំនាញ អាចបង្ក្រាបបានដោយអន្លើតែប៉ុណ្ណោះ។ ចន្លោះប្រហោងនៃការបង្ក្រាបបទល្មើសផ្សេងៗ ពិសេសបទល្មើសព្រៃឈើត្រូវគមើលឃើញថា មានកត្តាពីរយ៉ាង :១- អត់បង្ក្រាបទេ ព្រោះមានអំពើពុករលួយ ២- បង្ក្រាបតែឈ្មួញណាដែលមានសែស្រឡាយខុសគ្នា ឬជជែកតម្លៃសូកប៉ាន់មិនត្រូវគ្នា៕ ស . រ
លោក ម៉ាន សុគ្រី អនុរដ្ឋលេខាធិការក្រសួងកសិកម្ម
លោក ម៉ា វិចិត្រ មេស្រុក អូរយ៉ាដាវ ដែលមិនចង់ឲ្យកាសែត ផ្សាយពីបទល្មើសដែលកើត មានក្នុងដែនសមត្ថកិច្ចរបស់ខ្លួន។
អ្នកកាសែតម្នាក់ដែលត្រូវក្រុមរកស៊ីបទល្មើសព្រៃឈើស្ទាក់បាញ់សម្លាប់នាពេលកន្លងមក។
