បាត់ដំបង ៖ បន្ទាប់ពីមានការចុះផ្សាយ ពីអង្គភាពសារព័ត៌មាន មេគង្គប៉ុស្តិ៍ ពាក់ព័ន្ធករណីយកលុយដាក់ខែពីក្រុមឈ្មួញ នាពេលកន្លងមក ស្ថាប័នគយច្រកទ្វារអន្តរជាតិគីឡូ១៣(ហៅច្រកភ្នំដី)ត្រូវបានគេរាយការណ៍ថា បានបញ្ឈប់ឲ្យក្រុមឈ្មួញនាំត្រីក្លាសេចូលពីប្រទេសថៃ ដែលសម្រាប់ធ្វើជាចំណីឲ្យក្រពើស៊ីនៅខេត្តសៀមរាប តាមច្រកទ្វារព្រំដែនអន្តរជាតិខាងលើនេះទៀតហើយ និងក៏បានបង្វិលលុយដាក់ខែសងម្ចាស់ដើមវិញផងដែរ។
ប្រភពព័ត៌មានបានរាយការណ៍ ថា មួយរយៈដែលស្ថាប័នគយច្រកទ្វារខាងលើ បានបិទមិនឲ្យនាំត្រីក្លាសេសម្រាប់ធ្វើជាចំណីក្រពើនោះ គឺក្រពើនៅខេត្តសៀមរាប ត្រូវខ្វះខាតចំណីអស់មួយរយៈ ។ ប្រភពបន្តថា ប្រាក់ដែលក្រុមឈ្មួញរកស៊ីនាំត្រីក្លាសេពីថៃចូលកម្ពុជា ត្រូវបង់ដាក់ខែឲ្យទៅស្ថាប័នគយមួយខែៗ ១លាន ២សែនរៀល ជារៀងរាល់ខែនោះ ត្រូវបានលោកមេគយធ្វើការចែកជាពីរចំណែក គឺឲ្យទៅកូនចៅមួយចំណែកក្នុងមួយខែៗ ៤០ម៉ីនរៀល និងមួយចំណែកទៀត លោកមេគយទុកខ្លួនឯងចំនួន ៨០ម៉ីនរៀល ។ ប៉ុន្តែ ក្រោយពេលផ្ទុះរឿងពុករលួយឮដល់បណ្តាញព័ត៌មាន លោក មេគយបញ្ជាឲ្យហៅក្រុមឈ្មួ្ញញមកទទួលយកលុយពុករលួយដាក់ខែនោះត្រឡប់ទៅវិញ អមដោយការហាមឃាត់ មិនឲ្យនាំចូលត្រីក្លាសេនោះទៀតឡើយ។
ប្រភពដដែលបន្តថា ករណីអំពើរពុករលួយនេះ មិនមែនទើបតែកើតមាននោះទេ គឺមានយូរហើយ ទើបធ្វើឲ្យមជ្ឈដ្ឋាមួយចំនួនបានរិះគន់ឥតសំចៃមាត់ទេ រហូតលេចឮដល់បណ្តាញព័ត៌មាន ទើបធ្វើឲ្យលោកគយ កើតការខឹងសម្បារឈានដល់ការបង្វិលលុយដាក់ខែសងវិញ និងប្រកាសបិទច្រកតែម្តង ដែលទង្វើនេះ ត្រូវបានក្រុមឈ្មួញ និងប្រជាពលរដ្ឋបានចាត់ទុកថា ជាការផ្ចាញ់ផ្ចាលដើម្បីសងសឹក។
ប្រភពបានរំលឹកពីការត្អូញត្អែររបស់ក្រុមអ្នករកស៊ីថា ប្រជាពលរដ្ឋដែលមានគំនិតបើករកស៊ីស្របច្បាប់ ដើម្បីចញ្ចឹមក្រុមគ្រួសារនោះ គឺជាការល្អប្រសើរ ដែលអាចជួយកាត់បន្ថយភាពក្រីក្រ និងការធ្វើចំណាកស្រុកផងដែរ។តែផ្ទុយទៅស្ថាប័នគយច្រកទ្វារព្រំដែនអន្តជាតិខាងលើនេះ បែរជាធ្វើផ្ទុយពីគោលនយោបាយរបស់រាជរដ្ឋាភិបាលទៅវិញ មិនត្រឹមតែប៉ុណ្ណោះទេ នៅមុនពេលបែកធ្លាយរឿងពុករលួយនៅច្រកទ្វារមួយនេះ អស់លោកគយ បានប្រើតួនាទី និងអំណាចក្នុងស្ថាប័នរដ្ឋជំរិតទារលុយដាក់ខែ ឬរាប់ក្បាលឡានយកលុយដោយកំហិតឲ្យបង់ប្រាក់យ៉ាងចាស់ដៃ គ្មានការលើកលែងមួយករណីណាឡើយ បើទោះបីជាមានការអង្វរឲ្យបន្ធូរបន្ថយតម្លៃក៏ដោយ។
នៅព្រឹកថ្ងៃទី១២ ខែសីហា ឆ្នាំ២០១៨ ភ្នាក់ងារព័ត៌មាន មេគង្គប៉ុស្តិ៍ មិនអាចសុំការពន្យល់ពាក់ព័ន្ធនឹងព័ត៌មានដូចខាងលើនេះបានទេ ដោយសារលោក អ៊ុយ វិត ប្រធានការិយាល័យគយ និងរដ្ឋាករប្រចាំច្រកទ្វារអន្តរជាតិគីឡូ១៣ ឬច្រកភ្នំដី មិនទទួលទូរស័ព្ទ៕
