បាល់ទាត់៖ក្រុមជម្រើសជាតិកម្ពុជាបានយកឈ្នះក្រុមភ្ញៀវប្រ៊ុយណេដោយលទ្ធផល ៦-១សម្រាប់ការប្រកួតបាល់ទាត់លក្ខណៈមិត្តភាពអន្តរជាតិកាលពីយប់មិញនៅពហុកីឡដ្ឋានជាតិ។
៦ គ្រាប់រប់សម្ចាស់ផ្ទះកម្ពុជារកបានដោយកីឡាករ ប្រាក់ មុន្នីឧត្ដម ចំនួន២គ្រាប់ កែវ សុខផេង ២ គ្រាប់ វ៉ា សុខថន ១ គ្រាប់ និង សឿយ វិសាល ១ គ្រាប់។ ចំណែក ១គ្រាប់របស់ក្រុមភ្ញៀវប្រ៊ុយណេវិញរកបានដោយខ្សែប្រយុទ្ធ Bin Ali Rahman៕
រាជធានីភ្នំពេញ៖នៅព្រឹកថ្ងៃទី៤ ខែវិច្ឆិកា ឆ្នាំ២០១៥នេះ តុលាការបើកសវនាការលើបណ្តឹងឧទ្ធរណ៍របស់លោក ហុង សុខហួរ អតីតសមាជិកព្រឹទ្ធសភាគណបក្សសម រង្ស៊ី។ បណ្តឹងឧទ្ធរណ៍នេះបានធ្វើឡើងបន្ទាប់ពីលោក ហុង សុខហួរ ប្រឆាំងនឹងការសម្រេចរបស់តុលាការក្រុងដែលមិនអនុញ្ញាតឱ្យលោកនៅក្រៅឃុំ។
តាមសេចក្តីរាយការណ៍ឲ្យដឹងថា លោក ហុង សុខហួរ មិនត្រូវបានគេនាំខ្លួនចូលក្នុងសវនាការទេ គឺមានតែតំណាងមេធាវីរបស់គាត់ប៉ុណ្ណោះ។
គួរបញ្ជាក់ថា លោក ហុង សុខហួរ ត្រូវបានតុលាការចោទប្រកាន់ពីបទក្លែងឯកសារ ប្រើប្រាស់ឯកសារក្លែង និងបទញុះញង់ ពាក់ព័ន្ធសន្ធិសញ្ញាព្រំដែនកម្ពុជា-វៀតណាម៕
ភ្នំពេញ៖ លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រកាសនៅព្រលប់ថ្ងៃទី០៣វិច្ឆិកា នេះថា ជនដៃដល់៣នាក់ ដែលបង្ករបួសស្នាមដល់អ្នកតំណាងរាស្ត្រគណបក្ស សង្គ្រោះជាតិ កាលពីថ្ងៃទី២៦តុលានោះ បានចេញមកសារភាពហើយ។
នៅចំពោះមុខ គណៈកម្មការស្រាវជ្រាវ ស៊ើបអង្កេតរបស់ក្រសួងមហាផ្ចៃ ករណីបង្ករបួសស្នាមលើអ្នកតំណាងរាស្ត្រ២រូបនៃគណបក្សសង្គ្រោះជាតិ ។
អ្នកនាំពាក្យក្រសួងមហាផ្ទៃលោក ខៀវ សុភ័គ បានបញ្ជាក់ក្នុងសេចក្តីប្រកាសថា ជនសារភាពទាំង៣នាក់នោះ មានឈ្មោះដូចខាងក្រោម ៖
១- ឈ្មោះ ចាយ សារិទ្ធ ភេទប្រុស អាយុ៣៣ឆ្នាំ មានទីលំនៅ នៅសង្កាត់តាខ្មៅ ក្រុងតាខ្មៅ ខេត្តកណ្តាល
២- ឈ្មោះ ម៉ៅ ហឿន ភេទប្រុស អាយុ៣៤ឆ្នាំ មានទីលំនៅ ឃុំព្រែកខ្សាយ ស្រុកពាមរក៍ ខេត្តព្រៃវែង
៣- ឈ្មោះ ស៊ុត វណ្ណនី ភេទប្រុស អាយុ៤៥ឆ្នាំ មានទីលំនៅសង្កាត់កំពង់សំណាញ់ ក្រុងតាខ្មៅ ខេត្តកណ្តាល។
សេចក្តីប្រកាសដូច្នេះ បានធ្វើឡើង នៅពេលដែលលោក សម រង្ស៊ី និងលោក កឹម សុខា ប្រធាន និងអនុប្រធានគណបក្សសង្គ្រោះជាតិ បានវិលត្រលប់ពីក្រៅប្រទេស មកដល់រាជធានីភ្នំពេញ នាម៉ោងជិត ០៨:០០នាទីយប់ ថ្ងៃអង្គារ ទី០៣ ខែវិច្ឆិកា នេះ។
គួររំលឹកថា បន្ទាប់ពីហេតុការណ៍ បង្កអំពើហិង្សាវាយលើតំណាងរាស្ត្រ ២រូប ឲ្យរបួស កាលពីថ្ងៃទី២៦តុលា គឺភ្លាមៗរាជរដ្ឋាភិបាលបានបង្កើតគណៈកម្មការពិសេសមួយដឹកនាំដោយលោកនាយឧត្តមសេនីយ៍ ឯម សំអាន រដ្ឋលេខាធិការក្រសួងមហាផ្ទៃ ដើម្បីស្រាវជ្រាវស៊ើបអង្កេតករណីវាយតំណាងរាស្ត្រនោះ។
នៅថ្ងៃទី២៨តុលា លោកនាយករដ្ឋមន្ត្រី ហ៊ុន សែន ក៏បានប្រកាសបញ្ជាឲ្យនគរបាលសមត្ថកិច្ច តាមចាប់ខ្លួនជនបង្កអំពើហិង្សាទាំងនោះ មកផ្តន្ទាទោស ដោយគ្មានការលើកលែង ទោះបីជាជននោះ ជាអ្នកគាំទ្រគណបក្សនយោបាយណា រាប់ទាំងអ្នកគាំទ្រគណបក្សប្រជាជនកម្ពុជា និងគាំទ្ររដ្ឋាភិបាលក៏ដោយ៕ដោយះខេមរា
ភ្នំពេញ៖លោក គង់ គាំ បានប្រកាសចូលនិវត្តពីឆាកនយោបាយកាលពីថ្ងៃទី២ វិច្ឆិកា ម្សិលមិញនេះ ដោយបញ្ជាក់នៅក្នុងលិខិតជាផ្លូវការថា បណ្តាលមកពីមូលហេតុសុខភាពមិនបរិបូរណ៍ និងស្ថិតក្នុងភាពជរាព្យាធិជាប្រចាំក្នុងពេលដែលលោកមានអាយុ៧៥ឆ្នាំទៅហើយ ។
ក្រៅពីបញ្ហាសុខភាព នៅក្នុងលិខិតនោះក៏មានបញ្ជាក់ត្រួសៗពីការវិវត្តន៍នៃនយោបាយកម្ពុជាចាប់ពីអំឡុងទសវត្សរ៍ទី៧០រហូតមកដល់បច្ចុប្បន្នផងដែរ ។អ្នកវិភាគបានលើក ឡើងថា ការទម្លាក់ចោលកិច្ចការនយោបាយរបស់លោក គង់ គាំ នាពេលនេះគឺមិនមែនអាស្រ័យដោយជរាពាធនោះឡើយ ប៉ុន្តែអាចមានហេតុផលផ្សេងទៀតទើបធ្វើឲ្យបុរសវ័យចំណាស់ម្នាក់នេះ ដកខ្លួនចេញពីឆាកនយោបាយកម្ពុជាយ៉ាងតក់ក្រហល់បែបនេះ ?
លោក គង់ គាំ បច្ចុប្បន្នជាប្រធានក្រុមសមាជិកព្រឹទ្ធសភាគណបក្ស សម រង្ស៊ី និងជាប្រធានគណៈកម្មការសិទ្ធិមនុស្ស ទទួលពាក្យបណ្តឹង និងអង្កេតក្នុងស្ថាប័នកំពូលព្រឹទ្ធសភា និងជាប្រធានគណបក្សសម រង្ស៊ី អស់រយៈពេលជាច្រើនឆ្នាំមកហើយនោះ បានប្រកាសចូលនិវត្តយ៉ាងតក់ក្រហល់គឺបានធ្វើឡើងតែប៉ុន្មានថ្ងៃប៉ុណ្ណោះក្រោយពីលោក គង់ សុភា ដែលត្រូវជាកូនប្រុសបង្កើតរបស់លោកដែលជាតំណាងរាស្ត្រគណបក្សសង្គ្រោះជាតិត្រូវបានក្រុមជនដៃដល់វាយឲ្យរងរបួសធ្ងន់នៅក្បែររបងមន្ទីររដ្ឋសភា កាលពីថ្ងៃ២៦ តុលា កន្លងមកនេះ។
ក្នុងលិខិតផ្លូវការចំនួន ៤ទំព័រ លោកគង់ គាំ បានសុំការអនុគ្រោះ និងយោគយល់ពីការសុំចូលនិវត្តរបស់លោកពីប្រជាជនដែលធ្លាប់គាំទ្រ រូបលោកនាពេលកន្លងមក។លោកក៏បានសុំអនុគ្រោះសំដែងចំពោះមេដឹកនាំទាំងឡាយដែលលោកចាត់ទុកកំពុងមាន«ជំងឺតួឯក» ដែលចេះតែមានគំនិតជានិច្ចថា«មានតែខ្លួន បើគ្មានខ្លួន» មិនអាចដឹកនាំការ «ការពារ និងកសាង» កម្ពុជាឲ្យមានសន្តិភាព ប្រជាធិបតេយ្យ និងការអភិវឌ្ឍន៍ ដូចសព្វថ្ងៃ និងតទៅមុខបានទេនោះ សូមឲ្យមេដឹកនាំ «អត្តាធិបតេយ្យ» ត្រូវតែឆាប់ប្តូរគំនិត «មានតែអញ» ចោលទៅ ។
លោកគង់ គាំ ក៏បានបង្ហាញពីចំណុចអវិជ្ជមានជាច្រើនចំណុចក្នុងនោះរួមមានទាំងការនិយាយពីប្រវត្តិនៃព្រឹត្តិការណ៍សំខាន់ ៗជាច្រើននៅកម្ពុជាដូចជាថ្ងៃ១៧ មេសា ១៩៧៥ , ៧មករា ១៩៧៩, ២៣តុលា១៩៩១ជាដើម និងការសន្ទនារវាងមេដឹកនាំគណបក្សកាន់អំណាចទាំងពីរលោក ហ៊ុន សែន និងលោក សម រង្ស៊ី ផងដែរ។
គួរបញ្ជាក់ថា បច្ចុប្បន្នលោក គង់ គាំ កំពុងតែស្ថិតនៅក្នុងប្រទេសថៃដើម្បីពិនិត្យសុខភាព និងទៅសួរសុខទុក្ខកូនប្រុសរបស់លោកផងដែរ ប៉ុន្តែមិនដឹងថា លោកបានចាកចេញពីប្រទេសកម្ពុជាតាំងពីពេលណា និងត្រឡប់មកវិញនៅពេលណានោះទេ៕ដោយ៖ខេមរា
បាល់ទាត់៖ក្រុមយក្សរបស់អេស្ប៉ាញស្តេចស Real Madrid នឹងបើកទ្វារពហុកីឡដ្ឋាន Santiago Bernabeu ដើម្បី ស្វាគមន៍ក្រុមភ្ញៀវជើងឯកបារាំង Paris Saint Germain វិញម្តងរាត្រីម៉ោង ២.៤៥នាទីរំលងអធ្រាត្រ ក្នុង ជើងទី២នៃ Champions League ។
ក្រុម របស់លោក Rafael Benintez ទប់បានស្មើ ០-០ ក្នុងទឺកដីរបស់ PSG ហើយក៏ជាក្រុមខ្លាំងដែលកំពុងឈរលើកំពូលតារាងពូល A បណ្តោះអាសន្នផងដែរ ក្រៅពី Paris តាមពីក្រោយ៧ពិន្ទុស្មើគ្នានោះ ។ ការលេងបាន ស្មើនៅទឹកដីប្រទេសបារាំង មានន័យថា Real Madrid មានថ្វីជើងមិនអន់ឡើយ ហើយអាចនឹងរកបាន៣ពិន្ទុផងដែរ ក្នុងទឹកដីរបស់ខ្លួនយប់នេះ ។
កីឡាករដែលអវត្តមានមិនបានចូលលេងឲ្យ Real Madridរួមមានខ្សែបម្រើ James Rodriguezនិងខ្សែប្រយុទ្ធ Gareth Baleរីឯ Paris Saint Germainវិញអវត្តមានកីឡាករខ្សែការពារ Marquinhosនិងកីឡាករខ្សែបម្រើ Javier Pastore។
យប់នេះ Real Madridលេងប្រព័ន្ធ ៤.៣.៣ ហើយ កីឡាករ១១នាក់ដំបូងរួមមាន ៖អ្នកចាំទី: Keylor Navasខ្សែការពារ Sergio Ramos. Danilo .Marcelo. Raphael Varaneខ្សែបម្រើ កីឡាករ Toni Kroos. Casemiro .Luka Modricខ្សែប្រយុទ្ធកីឡាករ Cristiano Ronaldo. Karim Benzemaនិងកីឡាករ Isco រីឯ Paris Saint Germainយប់នេះប្រព័ន្ធដូចគ្នាហើយកីឡាករ១១នាក់ដំបូងរួមមាន អ្នកចាំទី Kevin Trappខ្សែការពារ Maxwell. Thiago Silva. David Luiz. Serge Aurierខ្សែបម្រើ កីឡាករ Thiago. Marco Verratti. Blaise Matuidiខ្សែប្រយុទ្ធកីឡាករ Edinson Cavani.Zlatan Ibrahimovicនិងកីឡាករ Angel Di Maria៕
ប្រដាល់៖សេចក្ដីរាយការណ៍មួយបានឲ្យដឹងថា អ្នកប្រដាល់សញ្ជាតិហ្វីលីពីន Manny Pacquiao នឹងត្រូវឡើងសង្វៀនប្រកួតជាលើកចុងក្រោយនៅថ្ងៃទី៩ ខែមេសា ឆ្នាំ២០១៦ បន្ទាប់មកគាត់នឹងបញ្ចប់អាជីពមួយនេះហើយងាកទៅប្រឡូកក្នុងឆាកនយោបាយរបស់ប្រទេសហ្វីលីពីន។
លោក Bob Arum អ្នករៀបចំកម្មវិធីប្រកួតបានឲ្យដឹងថា Manny Pacquiao នឹងចូលនិវត្តពីអាជីពជាអ្នកប្រដាល់សកលក្រោយបញ្ចប់ការប្រកួតដែលបានគ្រោងទុកក្នុងវ័យ៣៦ឆ្នាំ ដើម្បីចូលរួមក្នុងឆាកនយោបាយប្រទេសហ្វីលីពីន។
យោងតាមសារព័ត៌មាន espn.com បានចុះផ្សាយថា គូបដិបក្សរបស់ Pacquiao មិនទាន់ត្រូវបានគេដឹងថា ជាអ្នកប្រដាល់រូបណានៅឡើយទេ ដោយគ្រាន់តែដឹងថាមានអ្នកប្រដាល់ជាច្រើនដូចជា Kell Brook, Timothy Bradley, Juan Manuel Marquez និង Terence Crawford ក្នុងនោះក៏មានអ្នកប្រដាល់សញ្ជាតិអង់គ្លេស Amir Khan ដែលអាចនឹងទៅប៉ះជាមួយ Pacquiao ផងដែរ។
Pacquiao និយាយថា ៖ នៅពាក់កណ្ដាលខែឧសភានឹងមានការបោះឆ្នោត ដូច្នេះខ្ញុំអាចនឹងជាប់ជាសមាជិកព្រឹទ្ធសភារបស់ហ្វីលីពីន ហើយប្រសិនបើខ្ញុំជាប់មែន ខ្ញុំមិនអាចចូលរួមក្នុងការប្រកួតប្រដាល់ទៀតឡើយ ពីព្រោះខ្ញុំត្រូវការផ្ដោតសំខាន់ទៅលើការងារក្នុងព្រឹទ្ធសភា ហើយខ្ញុំត្រូវតែមានការចូលរួមដើម្បីបម្រើការងារមួយនេះ» ។
គួរបញ្ជាក់ថា Pacquiao មិនបានឡើងសង្វៀនប្រកួតចាប់តាំងពីរងបរាជ័យក្រោមស្នាដៃអ្នកប្រដាល់សញ្ជាតិអាមេរិក Floyd Mayweather កាលពីខែឧសភា បន្ទាប់ពីមានការសម្រេចជាឯកច្ឆ័ន្ទពីសំណាក់លោកអាជ្ញាកណ្ដាលទាំងបី៕
បាល់ទាត់៖នាវេលាម៉ោង៦ និង៣០នាទីល្ងាចនេះ ក្រុមបាល់ទាត់ជម្រើសជាតិកម្ពុជានឹងបើកទ្វារពហុកីឡដ្ឋានជាតិអូឡាំពិកទទួលក្រុមប្រ៊ុយណេ ដែលជាក្រុមមួយមានចំណាត់ថ្នាក់ខ្សោយជាងគេក្នុង FIFA Ranking នៅតំបន់អាស៊ាននេះ លក្ខណៈមិត្តភាពកម្ដៅសាច់ដុំមុនបន្តយុទ្ធនាការជម្រុះបាល់ទាត់ ពិភពលោកឆ្នាំ២០១៨ ពូល E នៅតំបន់អាស៊ី ជុំទី២ ជើងទី២ ជាមួយប្រទេសអាហ្វហ្គានីស្ថាន និងទទួលក្រុមខ្លាំងជប៉ុន៕
រាជធានីភ្នំពេញ៖តារាសម្តែងកញ្ញា ដេននី លេងកាន់ខ្លាំងដៃជាងមុនហើយ ខណៈពីមុនត្រឹមតែស្លៀកប៊ីគី ឬឈុតដេកស្តើងបញ្ចេញសាច់ទ្រូង និងផ្ចិត នៅផ្ទះដើម្បីថតឲ្យអ្នកលេងហ្វេសប៊ុកដែលជាប្រិយមិត្តរបស់នាងមើល កម្សាន្តនិងសរសើរនាងប៉ុណ្ណោះ។ ប៉ុន្តែពេលនេះតារារូបនេះបានព្រលែងខ្លួនចេញថតបែបសិចស៊ីនៅទីសាធារណៈដោយមិនអៀនខ្មាសឡើយ។
ប៉ុន្តែថ្មីៗនេះគណនីហ្វេសប៊ុករបស់នាង “Denny Kwan” បានបង្ហោះរូបនាងដោយផ្ទាល់ក្នុងឈុតហែលទឹកពណ៌ទឹកក្រូចដ៏ស្រស់ស្អាត គួរស្រឡាញ់ឈរមាត់សមុទ្រ និងបានសរសេរថា ”ទោះខ្ញុំសិចស៊ីក៏ខ្ញុំមិនដែលបំភ្លេចនូវវប្បធម៌ខ្មែរយើងនោះដែល…សូមមិត្តដែលតែងតែគាំទ្រនាងខ្ញុំនាពេលកន្លងមកកុំយល់ច្រលំថានាងខ្ញុំpost រូបភាពសិចស៊ីដើម្បីទាក់ភ្នែកតាៗ។ ភាពសិចស៊ីនេះនាងខ្ញុំចូលចិត្តតាំងពីខ្ញុំមិនទាន់ចូលសិល្បៈមកម្ល៉េះ ចឹងហើយសូមកុំវាយតម្លៃនាងខ្ញុំដោយគ្រាន់តែឃើញនាងខ្ញុំស្លៀកពាក់សិចស៊ី”។
ជាពិសេសនាងថតរូបនាងអត់ពាក់អាវហើយ ថតបែរខ្នងបញ្ចេញរាងយ៉ាងស្រលូនរបស់នាងជាមួយសាច់សខ្ចីដូចពងមាន់ បកមួយផុសចេញពីផ្ទៃទឹកសមុទ្រពណ៌ខៀវ។ សម្រាប់រូបថតបញ្ចេញសាច់ខ្នងនោះនាងសរសេរថា “ខ្ញុំស្រឡាញ់សេរីភាពខ្ញុំ។ សមុទ្រធំវែងក៏គង់មានច្រាំង ក្តីទុក្ខទោះធ្ងន់ក៏គង់មានថ្ងៃរសាយ”។
គួរបញ្ជាក់ថា កញ្ញា ដេននី ត្រូវបានគេមើលឃើញថា ជាតារាស្រីម្នាក់ដែលតែងតែស្លៀកពាក់សិចស៊ី ទោះបីជាដើរហើរក្រៅក៏ដោយក៏នាងមិនទម្លាក់ដៃឲ្យឈ្មោះជាតារាសិចស៊ីបាត់បង់ឡើយ។ ទោះជាយ៉ាងណាក្នុងគណនីហ្វេសប៊ុករបស់នាងដែលមានមិត្តបានត្រឹម៥ពាន់នាក់នោះ តែងតែចូលចិត្ត និងគាំទ្រសកម្មភាពសិចស៊ីរបស់នាង៕
បាល់ទាត់៖ក្លិបអធិរាជស Real Madrid មានគម្រោងនាំយកខ្សែបម្រើជម្រើសជាតិប៊ែលហ្សិក Eden Hazard ពីក្លិបតោខៀវ Chelsea នៅពេលទីផ្សារដោះដូរកីឡាករបើកទ្វារនាខែមករាខាងមុខ។
កីឡាករវ័យ២៤ឆ្នាំរូបនេះត្រូវបានអ្នកចាត់ការ Jose Mourinho ដកចេញពីជម្រើសដំបូងកាលប៉ះ Aston Villa ខណៈដែលមកទល់ពេលនេះ គេជឿថាកីឡាករ Playmaker រូបនេះ ក៏កំពុងតែមានបញ្ហាស្មុគស្មាញ និងអន់ចិត្តជាមួយអ្នកចាត់ការរហស្សនាម “Special One” រូបនេះផងដែរ។
គួរបញ្ជាក់ថា Hazard ក៏បានមហិច្ឆតាចង់លេងឲ្យក្រុមយក្សរបស់អេស្ប៉ាញមួយនេះផងដែរ ខណៈដែល Real គឺជាក្រុមមួយ ដែលរូបគេគាំទ្រតាំងពីតូច៕
ប្រសិទ្ធភាពរបស់ផ្សិត ត្រូវបានគេដឹងថាជាថ្នាំបង្កើនឥទ្ធិពលប្រព័ន្ធភាពស៊ាំ និងជាអ្នកប្រឆាំងនឹងជំងឺ។ វាបានបង្កើនសកម្មភាពនៃប្រព័ន្ធភាពស៊ាំនិងចំនួនកោសិការបស់វា ដើម្បីប្រឆាំងនឹងការឆ្លងមេរោគនិងមហារីក។ វាក៏បានបង្ហាញពីប្រសិទ្ធភាពនៃការការពារប្រព័ន្ឋសរសៃឈាម- បេះដូង, ជួយអ្នកជំងឺបេះដូងចៀសវាងការកើតឡើងវិញឬជំងឺកាន់តែធ្ងន់ធ្ងរ។ វីតាមីននិងសារធាតុរបស់វា មានប្រសិទ្ធភាពចំពោះអ្នកមានជំងឺទឹកនោមផ្អែម ប្រភេទទី ២ និងការប្រឆាំងនឹងការរលាក (anti-inflammatory properties)។
នៅតំបន់ភ្នំនៃ Ideate ដែលនៅជិតទីក្រុងសៅប៉ូឡូ( Sao Paulo )ប្រទេសប្រេស៊ីលជាតំបន់ដែលអ្នកស្រុកយកផ្សិតធ្វើជាអាហារប្រចាំ ថ្ងៃរបស់គេ ដែលគេហៅថា “Cogmelo de Deus” ឬ “ផ្សិតរបស់ព្រះ (Mushroom of God)”។ អ្នកស្រាវជ្រាវបានសម្គាល់ថាអ្នកស្រុកមានសុខភាពល្អខុសពីធម្មតា ដែលគេសន្មតថាមកពីការទទួលទានផ្សិត។ ឈ្មោះបច្ចេកទេសរបស់ផ្សិត គឺ Agaricus blazei Murrill ដែលគេច្រើនតែហៅថា ផ្សិត ABM។ ក្រុមហ៊ុនផលិតថ្នាំធ្វើពីរុក្ខជាតិព្រៃ បានប្រើផ្សិតធ្វើជាគ្រឿងផ្សំសំខាន់ ដែលបានបានទទួលជោគជ័យក្នុងការប្រឆាំងនឹងមហារីកនិងជំងឺផ្សេងទៀត ។
ប្រភេទផ្សិតម្យ៉ាងទៀតគឺ Coriolus versicolor, វាមានប្រសិទ្ធភាពសំរាប់ព្យាបាលរោគមហារីកឈាមសព្រមទាំងមហារីកក្រពះ , មហារីកបំពង់អាហារ (esophageal), មហារីកពោះវៀន (colorectal) និងមហារីកសួត។ ផ្សិត Shiitake ជួយបន្ទាបជាតិ cholesterol និងបង្កើនតួនាទីប្រព័ន្ធភាពស៊ាំ, និងមានសារសំខាន់ក្នុងការបង្ការសំពាធឈាមខ្ពស់និងជំងឺបេះដូង, គ្រប់គ្រងកំរិតកូឡេស្តេរ៉ុល , ពង្រឹងប្រព័ន្ធប្រឆាំងនឹងមេរោគនិងប្រឆាំងជំងឺដូចជា ជំងឺអេដស៍និងមហារីក។ ផ្សិត Shiitake តែងមានលក់ស្រស់ៗហើយវាមានរសជាតិឆ្ងាញ់ពេលចំអិនរួច។ ប្រសិនបើអ្នកមិនអាចរកបានផ្សិតស្រស់ អ្នកក៏អាចយកផ្សិតក្រៀមមកជំនួសដែរ។
ផ្សិត Maiitake មានពួកប៉ូលីសាការីត( polysaccharide compound) beta-1.6-glucan ខ្ពស់ ដែលបង្កើនប្រព័ន្ធភាពស៊ាំនិងបន្ទាបសម្ពាធឈាម។ វាមានប្រយោជន៍សំរាប់អ្នកធាត់ខ្លាំងនិងអ្នកជំងឺទឹកនោមផ្អែម, ហើយវាប្រហែលជាត្រូវបានគេស្គាល់ដោយសារសមត្ថភាពប្រឆាំងនឹងរោគ មហារីករបស់វា។
ផ្សិត reishi អាចបង្កើនការផលិត interleukins ដែលមានប្រសិទ្ធភាពផ្ទាល់លើការរារាំងការដុះលូតលាស់នៃការដុះដុំ សាច់។ ផ្សិត reishi មានប្រសិទ្ធភាពមួយចំនួនទៀតលើរាងកាយ ដូចជា ប្រឆាំងនឹងការឈឺចាប់ (analgesic), ប្រឆាំងនឹងការរលាក(inflammatory),ប្រឆាំងអុកស៊ីតកម្ម( antioxidant), ប្រឆាំងនឹងមេរោគវីរុស និង ជួយកម្លាំងបេះដូង(cardiotonic)។ ផ្សិត Cordyceps គឺជាពពួកផ្សិត ascomycete fungi ដែលពពួកនេះមានដូចជា Cordyceps mycelium ដែលគេច្រើនប្រើវាធ្វើជាថ្នាំ។
ប្រភេទដែលមានច្រើនផលិតផលលើទីផ្សារមាន Cordyceps sinensis និង Cordyceps militaris ដែលជាគ្រឿងផ្សំថ្នាំបុរាណច្រើនតែប្រើសំរាប់ បង្កើនកំលាំង (tonic) និងក្នុងគោលបំណងព្យាបាលផ្សេងទៀតក្នុងអាស៊ីខាងកើត។ Cordyceps sinensis ត្រូវបានគេណែនាំឱ្យប្រើសំរាប់ការប្រឆាំងនឹងការដុះដុំសាច់, ការជំរុញភាពស៊ាំ(immunostimulant) និង សកម្មភាពប្រឆាំងអុកស៊ីតកម្ម( antioxidant)។
Cordyceps ជួយបង្កើនសុខភាពថ្លើម និងប្រឆាំងនឹងរោគទឹកនោមផ្អែម។ អ្នកស្រាវជ្រាវជនជាតិកូរ៉េបាននិយាយថាវាមានឥទ្ធិពលលើ កោសិកាមហារីកឈាមស leukemia។
អ្នកស្រាវជ្រាវពីតៃវ៉ាន់បានសម្គាល់នូវប្រសិទ្ធភាពនៃ Cordyceps sinensis ទៅលើការបញ្ចេញអ័រម៉ូនtestosterone, ប្រសិទ្ធភាពនេះគឺអាស្រ័យលើចំនួននិងពេលវេលា។
ផ្សិតគ្រប់ប្រភេទត្រូវបានគេយកទៅផលិតជាថ្នាំ(supplement) ប៉ុន្តែចំនួននៃការទទួលទានសំរាប់ ប្រយោជន៍នៃសុខភាព អាចធ្វើឱ្យប៉ះពាល់សមត្ថភាពនៃពោះវៀន។ ផលប៉ះពាល់បណ្តាលមកពីការទទួលទាន ផ្សិតមិនត្រូវបានគេលើកឡើងនោះទេ។ ជាទូទៅចំនួនផ្សិតដែលគួរទទួលទានជាថ្នាំនោះគឺ៤០០ ទៅ ៦០០ mg ក្នុង ១ ថ្ងៃ៕
សិល្បៈ៖ទីបំផុតបេក្ខជនមកពីខេត្តកំពង់ធំ នី រតនា បានឈ្នះជ័យលាភីក្នុងកម្មវិធីប្រឡងចម្រៀងលំដាប់ពិភពលោក Cambodian Idol ក្រោយជម្រុះសល់បេក្ខជនបីរូប គឺ សៅ ឧត្តម បេក្ខជនមកពីខេត្តស្វាយរៀង ម៉ៅ ហាជី មកខេត្តបាត់ដំបង និង នី រតនា មកពីខេត្តកំពង់ធំ បន្ទាប់ពីបកស្រាយបទចម្រៀង៤ជុំ ស្មើនឹង៤បទរៀងខ្លួន។
គួរបញ្ជាក់ថា ម្ចាស់ជយលាភី នី រតនា ទទួលបានប្រាក់រង្វាន់ពីកម្មវិធី ១០០លានរៀល រង្វាន់ពីម្ចាស់ឧត្ថម្ភកម្មវិធី ខារ៉ាបាវ ២៥០០ដុល្លារ និងក្លាយជាតារាចម្រៀងចុះកុងត្រាជាមួយផលិតកម្មហង្សមាសទៀតផង។ ដោយឡែក បេក្ខជនពីររូបទៀត សៅ ឧត្តម និង ម៉ៅ ហាជីទទួលបានប្រាក់រង្វាន់ពីអគ្គនាយកទូរទស្សន៍ហង្សមាសលោក អ៊ឹង សុងងួន១០០០ដុល្លារក្នុងម្នាក់ និងរង្វាន់ពីម្ចាស់ឧបត្ថម្ភកម្មវិធី ខារ៉ាបាវ ២០០០ដុល្លារសហរដ្ឋអាមេរិក៕
បាល់ទាត់៖ក្រុមបាល់ទាត់បឹងកេតអង្គរដែលតំណាងឲ្យប្រទេសកម្ពុជា ក្នុងព្រឹត្តិការណ៍ពានរង្វាន់អនុតំបន់ទន្លេមេគង្គ TOYOTA Mekong Club ឆ្នាំ២០១៥ នេះ បានយកឈ្នះក្រុមម្ចាស់ផ្ទះ Lao Toyota FC ២-០ ដាច់ក្នុងវគ្គជម្រុះជុំទី១ កាលពីម្សិលមិញនៅកីឡដ្ឋាន Anouvong ។
គ្រាប់ទី១របស់បឹងកេតធ្វើបានដោយកីឡាករ ចាន់ វឌ្ឍនាកា នៅនាទីទី៤៤ បន្ទាប់ដាក់បញ្ចូលជំនួយខ្សែបម្រើកណ្តាល ឈុន សុធារ័ត្ន បញ្ចប់តង់ទី១ បឹងកេតអង្គរនាំមុខម្ចាស់ផ្ទះ១-០។ ចូលដល់តង់ទី២ ចាន់ វឌ្ឍនាកា បានបន្ថែមគ្រាប់ទី២នៅនាទីទី៨៨ បន្ទាប់ពីទទួលបានបាល់ពីមិត្តរួមក្រុម ហើយញាក់បាល់ដាច់ខ្សែការពារ និងអ្នកចាំទីរបស់ Laos Toyota ដើម្បីទម្លាយសំណាញ់ទីយ៉ាងស្អាត។ ចប់ការប្រកួតបឹងកេតអង្គរបានយកឈ្នះដោយលទ្ធផល ២-០។
គួរបញ្ជាក់ថា ជ័យជម្នះនេះធ្វើឲ្យក្រុមបឹងកេតអង្គរកាន់តែមានសង្ឃឹមច្រើនសម្រាប់ការធ្វើដំណើរទៅកាន់ប្រទេសវៀតណាមដើម្បីជួប ក្រុមជើងឯកវៀតណាមនៅវគ្គពាក់កណ្តាលផ្តាច់ព្រ័ត្រ ប៉ុន្តែនៅថ្ងៃទី២៩ ខែវិច្ឆិកា ខាងមុខនេះ បឹងកេតអង្គរ ត្រូវភ្ញៀវជាក្រុមជើងឯកមីយ៉ាន់ម៉ានៅពហុកីឡដ្ឋានជាតិ៕
សូម៉ាលី៖យ៉ាងហោចណាស់មនុស្ស១២នាក់បានស្លាប់ ក្នុងព្រឹត្តិការណ៍វាយប្រហារដោយបំផ្ទុះក្នុងបរិវេណសណ្ឋាគារមួយនៅក្នុងរដ្ឋធានីប្រទេសសូម៉ាលីកាលពីម្សិលមិញ។
តាមប្រភពព័ត៌មានពីប៉ូលិសសូម៉ាលីខ្មាន់កាំភ្លើងនៃក្រុមសកម្មប្រយុទ្ធShebab បានប្រើប្រាស់រថយន្តផ្ទុករំសេវផ្ទុះទៅបំផ្ទុះក្នុងបរិវេណសណ្ឋាគារ ហើយខ្មាន់កាំភ្លើងបានសម្រុកបាញ់ប្រហារដល់ក្នុងសណ្ឋាគារ។
ប្រភពបញ្ជាក់ថា ក្រុមShebab មានទំនាក់ទំនងជាមួយក្រុមAl-Qaeda បានទាមទារទទួលខុសត្រូវលើការវាយប្រហារនៅសណ្ឋាគារSahafi ជាសណ្ឋាគារដ៏មានប្រជាប្រិយភាពសម្រាប់សមាជិកសភា បុគ្គលិករដ្ឋាភិបាល និងអ្នកជំនួញ។ ប៉ុន្តែអាជ្ញាធរមិនបានបង្ហាញអត្តសញ្ញាណជនរងគ្រោះដែលស្លាប់នៅក្នុង ការវាយប្រហារខាងលើនៅឡើយទេ៕
ភ្នំពេញ៖ ឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិនៃប្រទេសកម្ពុជា នៅរសៀលថ្ងៃសុក្រ ទី៣០តុលានេះ បានពន្យល់អំពីមូលហេតុនៃការដកតំណែងលោក កឹម សុខា ចេញពីអនុប្រធានទី១ នៃរដ្ឋសភា ដល់បណ្តាអង្គទូត និងតំណាងអង្គការអន្តរជាតិនានាប្រចាំនៅកម្ពុជា។
ក្នុងកិច្ចប្រជុំជាមួយទូតបរទេស និងភ្នាក់ងារតំណាងអង្គការសហប្រជាជាតិ ប្រចាំនៅកម្ពុជា លោករដ្ឋមន្ត្រីក្រសួងការបរទេសកម្ពុជា បានរៀបរាប់អំពីហេតុផល និងដំណើរការ ដែលឈានដល់ការសម្រេចចិត្តដកតំណែងលោក កឹម សុខា ចេញពីអនុប្រធានទី១នៃរដ្ឋសភា ដោយហេតុលោក កឹម សុខា បានប្រើប្រាស់តួនាទីរបស់ខ្លួនជាអនុប្រធានទី១ នៃរដ្ឋសភា បានមួរបង្កាច់ ការវាយប្រហារ និងការដើរអុចអាលញុះញង់ប្រជាជនឲ្យប្រឆាំងរាជរដ្ឋាភិបាល និងគណបក្សប្រជាជនកម្ពុជា ទាំងក្នុង និងក្រៅប្រទេស។
លោករដ្ឋមន្ត្រីក្រសួងការបរទេសកម្ពុជា ហោ ណាំហុង ក៏បានបញ្ជាក់ទៅកាន់មន្ត្រីទូតបរទេស និងភ្នាក់ងារអង្គការសហប្រជាជាតិថា លោក កឹម សុខា បានរំលោភយ៉ាងធ្ងន់ធ្ងរលើស្មារតីនៃការអនុវត្ត “វប្បធម៌សុន្ទនា” រវាងគណបក្សប្រជាជនកម្ពុជា និងគណបក្សសង្គ្រោះជាតិ។
លោក ហោ ណាំហុង បានបញ្ជាក់ថា វប្បធម៌សន្ទនា បានតម្រូវឲ្យភាគីទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ ត្រូវស្មោះត្រង់ជាមួយគ្នា គោរព និងអោយតម្លៃគ្នាទៅវិញទៅមក ជៀសវាងឲ្យខានតែបាននូវការញុះញង់ លុបបំបាត់នយោបាយប្រកាន់ពូជសាសន៍ជ្រុលនិយម និងអប់រំសមាជិកបក្សឲ្យចូលរួមអនុវត្តនូវស្មារតីទាំងនេះ។កិច្ចប្រជុំនោះ មានរយៈពេលខ្លី ត្រឹមតែ ២០នាទីប៉ុណ្ណោះ ដោយមិនអនុញ្ញាតឲ្យអ្នកកាសែត នៅស្តាប់ឡើយ។ បន្ទាប់ពីកិច្ចប្រជុំតំណាងអង្គទូត និងភ្នាក់ងារសហប្រជាជាតិ ប្រចាំកម្ពុជា មិនបានឆ្លើយតបនឹងក្រុមអ្នកកាសែតនោះទេ៕
ការសិក្សាមួយបានរកឃើញថា ការបន្ថែមអាហារបំប៉នជាឬសខ្ញីហាក់បីដូចជាជួយកាត់បន្ថយការរលាក នៅក្នុងពោះវៀន។ នេះជាសញ្ញាដ៏សំខាន់មួយដែលថាជាវាអាចកាត់បន្ថយ ការប្រឈមនឹងជំងឺមហារីកពោះវៀនធំបាន។
ទោះបីជាយ៉ាងណាក៏ដោយ ការសិក្សាជាច្រើនទៀតត្រូវតែធ្វើបន្ថែម ហើយអ្នកស្រាវជ្រាវជាច្រើនមិនទាន់បានណែនាំអោយមនុស្សគ្រប់គ្នា ត្រូវតែមានអាហារបំប៉នបែបនេះ ឬត្រូវបរិភោគខ្ញីទាំងដុំៗនៅពេលទទួលទានអាហារនោះដែរ។
ផ្អែកទៅលើការសិក្សា និងស្រាវជ្រាវនាយកនិពន្ធ ស៊ូហ្សានណា អឹមហ្សីក គ្រូពេទ្យព្យាបាលជំងឺដោយប្រើឱសថធម្មជាតិ និងជាសាស្ត្រាចារ្យរងនៅឯសាកលវិទ្យាល័យ Michigan Medical Center បាននិយាយថា “ប្រសិនបើអ្នកចង់បន្ថែមខ្ញីទៅក្នុងរបបអាហាររបស់អ្នកដើម្បីទទួល បានសុខភាព នោះវាគឺជារឿងដ៏ល្អមួយ។ ប៉ុន្តែអ្នកមិនអាចវិនិច្ឆ័យអំពីអត្ថប្រយោជន៍ពិតប្រាកដរបស់វា ទាក់ទងនឹងសុខភាពបានទេ”។
ការសិក្សានេះត្រូវបានរកឃើញដោយវិទ្យាស្ថានជាតិជំងីមហារីកអាមេរិក និងបានចុះផ្សាយតាមប្រព័ន្ធអ៊ីនធើណែន Cancer Prevention Research កាលពីថ្ងៃទី១១ ខែតុលានេះ។
ខ្ញីគឺជាឬសឈើដែលត្រូវបានប្រើសម្រាប់ជាអាហារបំប៉ន និងនៅក្នុងអាហារជាច្រើនប្រភេទអាហាររបស់ពលរដ្អអាស៊ី។ ការស្រាវជ្រាវបានគាំទ្រលើការប្រើប្រាស់ខ្ញីជាឱសថសម្រាប់ព្យាបាល បញ្ហានៅក្នុងក្រពះដូចជា ការក្អួត និងចង្ហោ។ មន្ត្រីម្នាក់របស់បណ្ណាល័យវេជ្ជសាស្ត្រជាតិសហរដ្ឋអាមេរិកនិយាយថា វា “ទំនងជាមានសុវត្ថិភាព”ថ្វីបើមានមនុស្សមួយចំនួនមានផលរំខានតិចតួចពីការទទួលទានខ្ញីក៏ដោយ។
អ្នកស្រីហ្សីកបានកត់ចំណាំថា ការសិក្សាមុនៗទៅលើសត្វបានអោយដឹងថា ខ្ញីអាចកាត់បន្ថយការរលាក ប៉ុន្តែមិនបង្កជាឥទ្ធិពលអាក្រក់ទៅលើក្រពះដូចថ្នាំអាស្ពីរីនទេ។ អ្នកវិទ្យាសាស្ត្របានទាញទំនាក់ទនងនេះអោយដូចជាការព្យាបាលទៅលើ ការរលាករ៉ាំរ៉ៃក្នុងពោះរៀនរហូតដល់មហារីកពោះវៀនធំ ហើយការធ្វើដូច្នេះអាចលុបបំបាត់ការរលាក និងបន្ថយការប្រឈមនឹងជំងឺ។
ការសិក្សាថ្មីមួយដែលដឹកនាំដោយក្រុមរបស់លោកហ្សីក បានសិក្សាទៅលើមនុស្សចំនួន ៣០នាក់ ដោយពួកគេម្នាក់ៗតម្រូវអោយទទួលទានថ្នាំឬសខ្ញីមួយថ្ងៃ ២ក្រាម ឬថ្នាំPlacebo ជារៀង រាល់ថ្ងៃ រយៈពេល ២៨ថ្ងៃ។ ពួកគេបានកំណត់ទៅលើកម្រិតនៃការរលាកក្នុងពោះវៀនរបស់មនុស្ស ទាំងអស់ មុន និងក្រោយពេលការធ្វើតេស្ត។
អ្នកស្រាវជ្រាវជាច្រើនបានរកឃើញថា កំរិតនៃការរលាកក្នុងប្រធានបទនេះ អ្នកដែលបានប្រើថ្នាំជាខ្ញីបានថយចុះជាមធ្យម ២៨ភាគរយ ចំណែកឯអ្នកប្រើថ្នាំ Placebo វិញបែរជានៅដដែលមិនចុះថយសោះ។
អ្នកស្រីហ្សីកនិយាយថា ប្រសិនបើមានការស្វែករកបន្ថែមទៀតមែន អ្នកស្រាវជ្រាវសង្ឃឹមថា អាចនឹងធ្វើការសិក្សាមួយដែលធំជាងនេះ។ ប៉ុន្តែអ្នកស្រីបានបន្ថែមទៀតថា សម្រាប់ពេលបច្ចុប្បន្ន “ប្រសិនបើអ្នកចង់ទទួលយកខ្ញីដើម្បីបរិភោគដោយសារតែអ្នកចូលចិត្ត រស់ជាតិរបស់វា សូមធ្វើវាចុះ” ប៉ុន្តែវាមិនទាន់មានអំណះអំណាងណាដែលច្បាស់លាស់ថាអាចបង្ការ ជំងឺមហារីកពោះវៀនធំបាននៅឡើយទេ៕
