All posts by មេគង្គ ប៉ុស្តិ៍

Real គ្រោងនាំយក Hazard នៅពេលទីផ្សារបើកទ្វារ

November 2, 2015កីឡាមេគង្គ ប៉ុស្តិ៍

បាល់ទាត់៖ក្លិបអធិរាជស Real Madrid មានគម្រោងនាំយកខ្សែបម្រើជម្រើសជាតិប៊ែលហ្សិក Eden Hazard ពីក្លិបតោខៀវ Chelsea នៅពេលទីផ្សារដោះដូរកីឡាករបើកទ្វារនាខែមករាខាងមុខ។
កីឡាករវ័យ២៤ឆ្នាំរូបនេះត្រូវបានអ្នកចាត់ការ Jose Mourinho ដកចេញពីជម្រើសដំបូងកាលប៉ះ Aston Villa ខណៈដែលមកទល់ពេលនេះ គេជឿថាកីឡាករ Playmaker រូបនេះ ក៏កំពុងតែមានបញ្ហាស្មុគស្មាញ និងអន់ចិត្តជាមួយអ្នកចាត់ការរហស្សនាម “Special One” រូបនេះផងដែរ។
គួរបញ្ជាក់ថា Hazard ក៏បានមហិច្ឆតាចង់លេងឲ្យក្រុមយក្សរបស់អេស្ប៉ាញមួយនេះផងដែរ ខណៈដែល Real គឺជាក្រុមមួយ ដែលរូបគេគាំទ្រតាំងពីតូច៕

ផ្សិតជួយបង្កើនសមត្ថភាពមនុស្សប្រឆាំងនឹងជំងឺ

November 2, 2015សុខភាពមេគង្គ ប៉ុស្តិ៍

ប្រសិទ្ធភាពរបស់ផ្សិត ត្រូវបានគេដឹងថាជាថ្នាំបង្កើនឥទ្ធិពលប្រព័ន្ធភាពស៊ាំ និងជាអ្នកប្រឆាំងនឹងជំងឺ។ វាបានបង្កើនសកម្មភាពនៃប្រព័ន្ធភាពស៊ាំនិងចំនួនកោសិការបស់វា ដើម្បីប្រឆាំងនឹងការឆ្លងមេរោគនិងមហារីក។ វាក៏បានបង្ហាញពីប្រសិទ្ធភាពនៃការការពារប្រព័ន្ឋសរសៃឈាម- បេះដូង, ជួយអ្នកជំងឺបេះដូងចៀសវាងការកើតឡើងវិញឬជំងឺកាន់តែធ្ងន់ធ្ងរ។ វីតាមីននិងសារធាតុរបស់វា មានប្រសិទ្ធភាពចំពោះអ្នកមានជំងឺទឹកនោមផ្អែម ប្រភេទទី ២ និងការប្រឆាំងនឹងការរលាក (anti-inflammatory properties)។
នៅតំបន់ភ្នំនៃ Ideate ដែលនៅជិតទីក្រុងសៅប៉ូឡូ( Sao Paulo )ប្រទេសប្រេស៊ីលជាតំបន់ដែលអ្នកស្រុកយកផ្សិតធ្វើជាអាហារប្រចាំ ថ្ងៃរបស់គេ ដែលគេហៅថា “Cogmelo de Deus” ឬ “ផ្សិតរបស់ព្រះ (Mushroom of God)”។ អ្នកស្រាវជ្រាវបានសម្គាល់ថាអ្នកស្រុកមានសុខភាពល្អខុសពីធម្មតា ដែលគេសន្មតថាមកពីការទទួលទានផ្សិត។ ឈ្មោះបច្ចេកទេសរបស់ផ្សិត គឺ Agaricus blazei Murrill ដែលគេច្រើនតែហៅថា ផ្សិត ABM។ ក្រុមហ៊ុនផលិតថ្នាំធ្វើពីរុក្ខជាតិព្រៃ បានប្រើផ្សិតធ្វើជាគ្រឿងផ្សំសំខាន់ ដែលបានបានទទួលជោគជ័យក្នុងការប្រឆាំងនឹងមហារីកនិងជំងឺផ្សេងទៀត ។
ប្រភេទផ្សិតម្យ៉ាងទៀតគឺ Coriolus versicolor, វាមានប្រសិទ្ធភាពសំរាប់ព្យាបាលរោគមហារីកឈាមសព្រមទាំងមហារីកក្រពះ , មហារីកបំពង់អាហារ (esophageal), មហារីកពោះវៀន (colorectal) និងមហារីកសួត។ ផ្សិត Shiitake ជួយបន្ទាបជាតិ cholesterol និងបង្កើនតួនាទីប្រព័ន្ធភាពស៊ាំ, និងមានសារសំខាន់ក្នុងការបង្ការសំពាធឈាមខ្ពស់និងជំងឺបេះដូង, គ្រប់គ្រងកំរិតកូឡេស្តេរ៉ុល , ពង្រឹងប្រព័ន្ធប្រឆាំងនឹងមេរោគនិងប្រឆាំងជំងឺដូចជា ជំងឺអេដស៍និងមហារីក។ ផ្សិត Shiitake តែងមានលក់ស្រស់ៗហើយវាមានរសជាតិឆ្ងាញ់ពេលចំអិនរួច។ ប្រសិនបើអ្នកមិនអាចរកបានផ្សិតស្រស់ អ្នកក៏អាចយកផ្សិតក្រៀមមកជំនួសដែរ។
ផ្សិត Maiitake មានពួកប៉ូលីសាការីត( polysaccharide compound) beta-1.6-glucan ខ្ពស់ ដែលបង្កើនប្រព័ន្ធភាពស៊ាំនិងបន្ទាបសម្ពាធឈាម។ វាមានប្រយោជន៍សំរាប់អ្នកធាត់ខ្លាំងនិងអ្នកជំងឺទឹកនោមផ្អែម, ហើយវាប្រហែលជាត្រូវបានគេស្គាល់ដោយសារសមត្ថភាពប្រឆាំងនឹងរោគ មហារីករបស់វា។
ផ្សិត reishi អាចបង្កើនការផលិត interleukins ដែលមានប្រសិទ្ធភាពផ្ទាល់លើការរារាំងការដុះលូតលាស់នៃការដុះដុំ សាច់។ ផ្សិត reishi មានប្រសិទ្ធភាពមួយចំនួនទៀតលើរាងកាយ ដូចជា ប្រឆាំងនឹងការឈឺចាប់ (analgesic), ប្រឆាំងនឹងការរលាក(inflammatory),ប្រឆាំងអុកស៊ីតកម្ម( antioxidant), ប្រឆាំងនឹងមេរោគវីរុស និង ជួយកម្លាំងបេះដូង(cardiotonic)។ ផ្សិត Cordyceps គឺជាពពួកផ្សិត ascomycete fungi ដែលពពួកនេះមានដូចជា Cordyceps mycelium ដែលគេច្រើនប្រើវាធ្វើជាថ្នាំ។
ប្រភេទដែលមានច្រើនផលិតផលលើទីផ្សារមាន Cordyceps sinensis និង Cordyceps militaris ដែលជាគ្រឿងផ្សំថ្នាំបុរាណច្រើនតែប្រើសំរាប់ បង្កើនកំលាំង (tonic) និងក្នុងគោលបំណងព្យាបាលផ្សេងទៀតក្នុងអាស៊ីខាងកើត។ Cordyceps sinensis ត្រូវបានគេណែនាំឱ្យប្រើសំរាប់ការប្រឆាំងនឹងការដុះដុំសាច់, ការជំរុញភាពស៊ាំ(immunostimulant) និង សកម្មភាពប្រឆាំងអុកស៊ីតកម្ម( antioxidant)។
Cordyceps ជួយបង្កើនសុខភាពថ្លើម និងប្រឆាំងនឹងរោគទឹកនោមផ្អែម។ អ្នកស្រាវជ្រាវជនជាតិកូរ៉េបាននិយាយថាវាមានឥទ្ធិពលលើ កោសិកាមហារីកឈាមស leukemia។
អ្នកស្រាវជ្រាវពីតៃវ៉ាន់បានសម្គាល់នូវប្រសិទ្ធភាពនៃ Cordyceps sinensis ទៅលើការបញ្ចេញអ័រម៉ូនtestosterone, ប្រសិទ្ធភាពនេះគឺអាស្រ័យលើចំនួននិងពេលវេលា។
ផ្សិតគ្រប់ប្រភេទត្រូវបានគេយកទៅផលិតជាថ្នាំ(supplement) ប៉ុន្តែចំនួននៃការទទួលទានសំរាប់ ប្រយោជន៍នៃសុខភាព អាចធ្វើឱ្យប៉ះពាល់សមត្ថភាពនៃពោះវៀន។ ផលប៉ះពាល់បណ្តាលមកពីការទទួលទាន ផ្សិតមិនត្រូវបានគេលើកឡើងនោះទេ។ ជាទូទៅចំនួនផ្សិតដែលគួរទទួលទានជាថ្នាំនោះគឺ៤០០ ទៅ ៦០០ mg ក្នុង ១ ថ្ងៃ៕

នី រតនា ឈ្នះជ័យលាភី Cambodian Idol រដូវកាលទី១

November 2, 2015សិល្បៈ / កម្សាន្តមេគង្គ ប៉ុស្តិ៍

សិល្បៈ៖ទីបំផុតបេក្ខជនមកពីខេត្តកំពង់ធំ នី រតនា បានឈ្នះជ័យលាភីក្នុងកម្មវិធីប្រឡងចម្រៀងលំដាប់ពិភពលោក Cambodian Idol ក្រោយជម្រុះសល់បេក្ខជនបីរូប គឺ សៅ ឧត្តម បេក្ខជនមកពីខេត្តស្វាយរៀង ម៉ៅ ហាជី មកខេត្តបាត់ដំបង និង នី រតនា មកពីខេត្តកំពង់ធំ បន្ទាប់ពីបកស្រាយបទចម្រៀង៤ជុំ ស្មើនឹង៤បទរៀងខ្លួន។
គួរបញ្ជាក់ថា ម្ចាស់ជយលាភី នី រតនា ទទួលបានប្រាក់រង្វាន់ពីកម្មវិធី ១០០លានរៀល រង្វាន់ពីម្ចាស់ឧត្ថម្ភកម្មវិធី ខារ៉ាបាវ ២៥០០ដុល្លារ និងក្លាយជាតារាចម្រៀងចុះកុងត្រាជាមួយផលិតកម្មហង្សមាសទៀតផង។ ដោយឡែក បេក្ខជនពីររូបទៀត សៅ ឧត្តម និង ម៉ៅ ហាជីទទួលបានប្រាក់រង្វាន់ពីអគ្គនាយកទូរទស្សន៍ហង្សមាសលោក អ៊ឹង សុងងួន១០០០ដុល្លារក្នុងម្នាក់ និងរង្វាន់ពីម្ចាស់ឧបត្ថម្ភកម្មវិធី ខារ៉ាបាវ ២០០០ដុល្លារសហរដ្ឋអាមេរិក៕

បឹងកេតអង្គរយកឈ្នះម្ចាស់ផ្ទះឡាវ ២-០ ពាន់រង្វាន់ TOYOTA Mekong Club

November 2, 2015កីឡាមេគង្គ ប៉ុស្តិ៍

បាល់ទាត់៖ក្រុមបាល់ទាត់បឹងកេតអង្គរដែលតំណាងឲ្យប្រទេសកម្ពុជា ក្នុងព្រឹត្តិការណ៍ពានរង្វាន់អនុតំបន់ទន្លេមេគង្គ TOYOTA Mekong Club ឆ្នាំ២០១៥ នេះ បានយកឈ្នះក្រុមម្ចាស់ផ្ទះ Lao Toyota FC ២-០ ដាច់ក្នុងវគ្គជម្រុះជុំទី១ កាលពីម្សិលមិញនៅកីឡដ្ឋាន Anouvong ។
គ្រាប់ទី១របស់បឹងកេតធ្វើបានដោយកីឡាករ ចាន់ វឌ្ឍនាកា នៅនាទីទី៤៤ បន្ទាប់ដាក់បញ្ចូលជំនួយខ្សែបម្រើកណ្តាល ឈុន សុធារ័ត្ន បញ្ចប់តង់ទី១ បឹងកេតអង្គរនាំមុខម្ចាស់ផ្ទះ១-០។ ចូលដល់តង់ទី២ ចាន់ វឌ្ឍនាកា បានបន្ថែមគ្រាប់ទី២នៅនាទីទី៨៨ បន្ទាប់ពីទទួលបានបាល់ពីមិត្តរួមក្រុម ហើយញាក់បាល់ដាច់ខ្សែការពារ និងអ្នកចាំទីរបស់ Laos Toyota ដើម្បីទម្លាយសំណាញ់ទីយ៉ាងស្អាត។ ចប់ការប្រកួតបឹងកេតអង្គរបានយកឈ្នះដោយលទ្ធផល ២-០។
គួរបញ្ជាក់ថា ជ័យជម្នះនេះធ្វើឲ្យក្រុមបឹងកេតអង្គរកាន់តែមានសង្ឃឹមច្រើនសម្រាប់ការធ្វើដំណើរទៅកាន់ប្រទេសវៀតណាមដើម្បីជួប ក្រុមជើងឯកវៀតណាមនៅវគ្គពាក់កណ្តាលផ្តាច់ព្រ័ត្រ ប៉ុន្តែនៅថ្ងៃទី២៩ ខែវិច្ឆិកា ខាងមុខនេះ បឹងកេតអង្គរ ត្រូវភ្ញៀវជាក្រុមជើងឯកមីយ៉ាន់ម៉ានៅពហុកីឡដ្ឋានជាតិ៕

វាយប្រហារនៅសណ្ឋាគារមួយក្នុងប្រទេសសូម៉ាលីសម្លាប់មនុស្ស១២នាក់

November 2, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

សូម៉ាលី៖យ៉ាងហោចណាស់មនុស្ស១២នាក់បានស្លាប់ ក្នុងព្រឹត្តិការណ៍វាយប្រហារដោយបំផ្ទុះក្នុងបរិវេណសណ្ឋាគារមួយនៅក្នុងរដ្ឋធានីប្រទេសសូម៉ាលីកាលពីម្សិលមិញ។
តាមប្រភពព័ត៌មានពីប៉ូលិសសូម៉ាលីខ្មាន់កាំភ្លើងនៃក្រុមសកម្មប្រយុទ្ធShebab បានប្រើប្រាស់រថយន្តផ្ទុករំសេវផ្ទុះទៅបំផ្ទុះក្នុងបរិវេណសណ្ឋាគារ ហើយខ្មាន់កាំភ្លើងបានសម្រុកបាញ់ប្រហារដល់ក្នុងសណ្ឋាគារ។
ប្រភពបញ្ជាក់ថា ក្រុមShebab មានទំនាក់ទំនងជាមួយក្រុមAl-Qaeda បានទាមទារទទួលខុសត្រូវលើការវាយប្រហារនៅសណ្ឋាគារSahafi ជាសណ្ឋាគារដ៏មានប្រជាប្រិយភាពសម្រាប់សមាជិកសភា បុគ្គលិករដ្ឋាភិបាល និងអ្នកជំនួញ។ ប៉ុន្តែអាជ្ញាធរមិនបានបង្ហាញអត្តសញ្ញាណជនរងគ្រោះដែលស្លាប់នៅក្នុង ការវាយប្រហារខាងលើនៅឡើយទេ៕

ក្រសួងការបរទេសកម្ពុជាពន្យល់អង្គ ទូត និងអង្គការបរទេសពីការដក តំណែងលោក កឹម សុខា

October 30, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ ឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិនៃប្រទេសកម្ពុជា នៅរសៀលថ្ងៃសុក្រ ទី៣០តុលានេះ បានពន្យល់អំពីមូលហេតុនៃការដកតំណែងលោក កឹម សុខា ចេញពីអនុប្រធានទី១ នៃរដ្ឋសភា ដល់បណ្តាអង្គទូត និងតំណាងអង្គការអន្តរជាតិនានាប្រចាំនៅកម្ពុជា។

ក្នុងកិច្ចប្រជុំជាមួយទូតបរទេស និងភ្នាក់ងារតំណាងអង្គការសហប្រជាជាតិ ប្រចាំនៅកម្ពុជា លោករដ្ឋមន្ត្រីក្រសួងការបរទេសកម្ពុជា បានរៀបរាប់អំពីហេតុផល និងដំណើរការ ដែលឈានដល់ការសម្រេចចិត្តដកតំណែងលោក កឹម សុខា ចេញពីអនុប្រធានទី១នៃរដ្ឋសភា ដោយហេតុលោក កឹម សុខា បានប្រើប្រាស់តួនាទីរបស់ខ្លួនជាអនុប្រធានទី១ នៃរដ្ឋសភា បានមួរបង្កាច់ ការវាយប្រហារ និងការដើរអុចអាលញុះញង់ប្រជាជនឲ្យប្រឆាំងរាជរដ្ឋាភិបាល និងគណបក្សប្រជាជនកម្ពុជា ទាំងក្នុង និងក្រៅប្រទេស។

លោករដ្ឋមន្ត្រីក្រសួងការបរទេសកម្ពុជា ហោ ណាំហុង ក៏បានបញ្ជាក់ទៅកាន់មន្ត្រីទូតបរទេស និងភ្នាក់ងារអង្គការសហប្រជាជាតិថា លោក កឹម សុខា បានរំលោភយ៉ាងធ្ងន់ធ្ងរលើស្មារតីនៃការអនុវត្ត “វប្បធម៌សុន្ទនា” រវាងគណបក្សប្រជាជនកម្ពុជា និងគណបក្សសង្គ្រោះជាតិ។

លោក ហោ ណាំហុង បានបញ្ជាក់ថា វប្បធម៌សន្ទនា បានតម្រូវឲ្យភាគីទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ ត្រូវស្មោះត្រង់ជាមួយគ្នា គោរព និងអោយតម្លៃគ្នាទៅវិញទៅមក ជៀសវាងឲ្យខានតែបាននូវការញុះញង់ លុបបំបាត់នយោបាយប្រកាន់ពូជសាសន៍ជ្រុលនិយម និងអប់រំសមាជិកបក្សឲ្យចូលរួមអនុវត្តនូវស្មារតីទាំងនេះ។កិច្ចប្រជុំនោះ មានរយៈពេលខ្លី ត្រឹមតែ ២០នាទីប៉ុណ្ណោះ ដោយមិនអនុញ្ញាតឲ្យអ្នកកាសែត នៅស្តាប់ឡើយ។ បន្ទាប់ពីកិច្ចប្រជុំតំណាងអង្គទូត និងភ្នាក់ងារសហប្រជាជាតិ ប្រចាំកម្ពុជា មិនបានឆ្លើយតបនឹងក្រុមអ្នកកាសែតនោះទេ៕

ការស្រាវជ្រាវ៖ខ្ញីជួយបបង្ការជំងឺមហារីកពោះវៀនធំ

October 30, 2015សុខភាពមេគង្គ ប៉ុស្តិ៍

ការសិក្សាមួយបានរកឃើញថា ការបន្ថែមអាហារបំប៉នជាឬសខ្ញីហាក់បីដូចជាជួយកាត់បន្ថយការរលាក នៅក្នុងពោះវៀន។ នេះជាសញ្ញាដ៏សំខាន់មួយដែលថាជាវាអាចកាត់បន្ថយ ការប្រឈមនឹងជំងឺមហារីកពោះវៀនធំបាន។
ទោះបីជាយ៉ាងណាក៏ដោយ ការសិក្សាជាច្រើនទៀតត្រូវតែធ្វើបន្ថែម ហើយអ្នកស្រាវជ្រាវជាច្រើនមិនទាន់បានណែនាំអោយមនុស្សគ្រប់គ្នា ត្រូវតែមានអាហារបំប៉នបែបនេះ ឬត្រូវបរិភោគខ្ញីទាំងដុំៗនៅពេលទទួលទានអាហារនោះដែរ។
ផ្អែកទៅលើការសិក្សា និងស្រាវជ្រាវនាយកនិពន្ធ ស៊ូហ្សានណា អឹមហ្សីក គ្រូពេទ្យព្យាបាលជំងឺដោយប្រើឱសថធម្មជាតិ និងជាសាស្ត្រាចារ្យរងនៅឯសាកលវិទ្យាល័យ Michigan Medical Center បាននិយាយថា “ប្រសិនបើអ្នកចង់បន្ថែមខ្ញីទៅក្នុងរបបអាហាររបស់អ្នកដើម្បីទទួល បានសុខភាព នោះវាគឺជារឿងដ៏ល្អមួយ។ ប៉ុន្តែអ្នកមិនអាចវិនិច្ឆ័យអំពីអត្ថប្រយោជន៍ពិតប្រាកដរបស់វា ទាក់ទងនឹងសុខភាពបានទេ”។
ការសិក្សានេះត្រូវបានរកឃើញដោយវិទ្យាស្ថានជាតិជំងីមហារីកអាមេរិក និងបានចុះផ្សាយតាមប្រព័ន្ធអ៊ីនធើណែន Cancer Prevention Research កាលពីថ្ងៃទី១១ ខែតុលានេះ។
ខ្ញីគឺជាឬសឈើដែលត្រូវបានប្រើសម្រាប់ជាអាហារបំប៉ន និងនៅក្នុងអាហារជាច្រើនប្រភេទអាហាររបស់ពលរដ្អអាស៊ី។ ការស្រាវជ្រាវបានគាំទ្រលើការប្រើប្រាស់ខ្ញីជាឱសថសម្រាប់ព្យាបាល បញ្ហានៅក្នុងក្រពះដូចជា ការក្អួត និងចង្ហោ។ មន្ត្រីម្នាក់របស់បណ្ណាល័យវេជ្ជសាស្ត្រជាតិសហរដ្ឋអាមេរិកនិយាយថា វា “ទំនងជាមានសុវត្ថិភាព”ថ្វីបើមានមនុស្សមួយចំនួនមានផលរំខានតិចតួចពីការទទួលទានខ្ញីក៏ដោយ។
អ្នកស្រីហ្សីកបានកត់ចំណាំថា ការសិក្សាមុនៗទៅលើសត្វបានអោយដឹងថា ខ្ញីអាចកាត់បន្ថយការរលាក ប៉ុន្តែមិនបង្កជាឥទ្ធិពលអាក្រក់ទៅលើក្រពះដូចថ្នាំអាស្ពីរីនទេ។ អ្នកវិទ្យាសាស្ត្របានទាញទំនាក់ទនងនេះអោយដូចជាការព្យាបាលទៅលើ ការរលាករ៉ាំរ៉ៃក្នុងពោះរៀនរហូតដល់មហារីកពោះវៀនធំ ហើយការធ្វើដូច្នេះអាចលុបបំបាត់ការរលាក និងបន្ថយការប្រឈមនឹងជំងឺ។
ការសិក្សាថ្មីមួយដែលដឹកនាំដោយក្រុមរបស់លោកហ្សីក បានសិក្សាទៅលើមនុស្សចំនួន ៣០នាក់ ដោយពួកគេម្នាក់ៗតម្រូវអោយទទួលទានថ្នាំឬសខ្ញីមួយថ្ងៃ ២ក្រាម ឬថ្នាំPlacebo ជារៀង រាល់ថ្ងៃ រយៈពេល ២៨ថ្ងៃ។ ពួកគេបានកំណត់ទៅលើកម្រិតនៃការរលាកក្នុងពោះវៀនរបស់មនុស្ស ទាំងអស់ មុន និងក្រោយពេលការធ្វើតេស្ត។
អ្នកស្រាវជ្រាវជាច្រើនបានរកឃើញថា កំរិតនៃការរលាកក្នុងប្រធានបទនេះ អ្នកដែលបានប្រើថ្នាំជាខ្ញីបានថយចុះជាមធ្យម ២៨ភាគរយ ចំណែកឯអ្នកប្រើថ្នាំ Placebo វិញបែរជានៅដដែលមិនចុះថយសោះ។
អ្នកស្រីហ្សីកនិយាយថា ប្រសិនបើមានការស្វែករកបន្ថែមទៀតមែន អ្នកស្រាវជ្រាវសង្ឃឹមថា អាចនឹងធ្វើការសិក្សាមួយដែលធំជាងនេះ។ ប៉ុន្តែអ្នកស្រីបានបន្ថែមទៀតថា សម្រាប់ពេលបច្ចុប្បន្ន “ប្រសិនបើអ្នកចង់ទទួលយកខ្ញីដើម្បីបរិភោគដោយសារតែអ្នកចូលចិត្ត រស់ជាតិរបស់វា សូមធ្វើវាចុះ” ប៉ុន្តែវាមិនទាន់មានអំណះអំណាងណាដែលច្បាស់លាស់ថាអាចបង្ការ ជំងឺមហារីកពោះវៀនធំបាននៅឡើយទេ៕

បាក់ឆាកប្រគំតន្ត្រីនៅចិនបណ្តាលឲ្យមនុស្សម្នាក់ស្លាប់ និងរបួស១៣នាក់

October 30, 2015សិល្បៈ / កម្សាន្តមេគង្គ ប៉ុស្តិ៍

កម្មករម្នាក់បានស្លាប់បាត់បង់ជីវិត និង១៣ នាក់ទៀតត្រូវរងរបួសក្នុងហេតុការណ៍បាក់ឆាកប្រគំតន្ត្រីរបស់កំពូលតារាចម្រៀងតៃវ៉ាន់ Jolin Tsai នៅ ក្រុង Nanning ខេត្ត Guangxi ប្រទេសចិនកាលពីម្សិលមិញ ខណៈដែលក្រុមកម្មករកំពុងដំឡើង។
ប្រភពពីប៉ូលិសបានឲ្យដឹងថា គ្រោះថ្នាក់នេះកើតឡើងដោយសារតែកំហុសធ្វេសប្រហែសរបស់ក្រុម ការងារបច្ចេកទេស។ ប្រភពបន្តថា ជនរងគ្រោះដែលរងរបួសទាំងអស់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យផងដែរ។ ទោះជាយ៉ាងណាភ្នាក់ងារប៉ូលិសបានឲ្យដឹងថាពួកគេកំពុងស្វែងរកមូលហេតុបណ្ដាល ឲ្យកើតមានបញ្ហានេះ ហើយនឹងប្រកាសក្នុងពេលខាងមុខ។
គួរបញ្ជាក់ថា ការប្រគំតន្ត្រីរបស់ Jolin Tsai នឹងត្រូវប្រព្រឹត្តឡើងនៅថ្ងៃទី៣០ ខែតុលា នេះ។ យ៉ាងណាក្ដី ដោយសារតែគ្រោះថ្នាក់មួយនេះ Jolin បានសម្រេចចិត្តរំសាយ ការប្រគំតន្ត្រីមួយនេះចោលនៅនាទីចុងក្រោយ៕

Ramires បន្តកុងត្រាថ្មីរយៈពេល៤ឆ្នាំទៀតជាមួយ Chelsea

October 30, 2015កីឡាមេគង្គ ប៉ុស្តិ៍

បាល់ទាត់៖ខ្សែបម្រើ Ramires បានយល់ព្រមបន្តកុងត្រាថ្មីរយៈពេល៤ឆ្នាំទៀតជាមួយ Chelsea ដែលធ្វើឲ្យកីឡាករវ័យ២៨ឆ្នាំរូបនេះ នឹងបន្តនៅភាគខាងលិចទីក្រុងឡុងដុងនេះរហូតដល់ឆ្នាំ ២០១៩។ នេះបើយោងតាមប្រភពពីគេហទំព័រក្លិប។
នៅដូវកាលនេះកីឡាករសញ្ជាតិប្រេស៊ីលរូបនេះ ត្រូវបានលោក Mourinho ឲ្យលេងភាគច្រើនជាកីឡាករបម្រុងប៉ុណ្ណោះ ។ តែយ៉ាងណាក៏ដោយ Ramires ត្រូវបានក្លិបឃើញថា ជាកីឡាករមានអត្តចរិតល្អ និងមានការប្រឹងប្រែង។
គួរបញ្ជាក់ថា Ramires បានចូលមកលេងឲ្យតោខៀវកាលពីឆ្នាំ២០១០ ក្រោយផ្លាស់ចេញពីក្លិបព័រទុយហ្គាល់ Benfica ក្នុងតម្លៃខ្លួន២២លានអឺរ៉ូ ក្នុងកុងត្រារយៈពេល៥ឆ្នាំនៅ Stamford Bridge ចូលលេងបាន១៥៤ប្រកួត និងស៊ុតបញ្ចូលទីបាន១៨គ្រាប់៕

សង្គ្រាមអាចនឹងកើតឡើងបើអាមេរិកនៅតែជ្រៀតជ្រែកក្នុងជម្លោះសមុទ្រចិនខាងត្បូង

October 30, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉េកាំង៖មេបញ្ជាការកងទ័ពចិនលោក Wu Shengli បានប្រាប់សមភាគីអាមេរិកក្នុងសន្និសីទកាសែត តាមទូរស័ព្ទថា សង្គ្រាមអាចនឹងកើតឡើងនៅក្នុងសមុទ្រចិនខាងត្បូងមិនខាន បើសិនជាអាមេរិកនៅតែបន្តបង្កជម្លោះនៅសមុទ្រចិនខាងត្បូង ។ ទន្ទឹមនោះលោកប្រធានកងទ័ពជើងទឹកចិនរូបនេះ បានប្រកាសថ្កោលទោសចំពោះអាមេរិកដែលបង្កការគំរាមកំហែងដល់អធិបតេយ្យភាពរបស់ខ្លួន។
ដោយឡែកលោកJohn Richardson បាននិយាយថា នាវាចម្បាំងរបស់អាមេរិកនៅក្នុងសមុទ្រចិនខាងត្បូង គឺជាសិទ្ធិសេរីភាពក្នុងការធ្វើនាវាចរ ហើយគ្មានប៉ះពាល់ទៅដល់ភាគីណាមួយឡើយ ព្រោះសកម្មភាពរបស់អាមេរិក គឺស្របច្បាប់។
ទោះជាយ៉ាងណាកិច្ចចរចារតាមរយៈការធ្វើសិន្និសីទកាសែតតាមទូរស័ព្ទកាលពីថ្ងៃទី ២៩តុលា គឺមានភាពមិនចុះសម្រុងឡើយ តែភាគីទាំងពីរប្រកាសថា នឹងបើកកិច្ចចរចាតាមរយៈការធ្វើសិន្និសីទកាសែតជាវីដេអូម្ដងទៀតនៅចុងឆ្នាំ២០១៥នេះ៕

Wu Shengli, China’s commander-in-chief of the People’s Liberation Army Navy, speaks during an opening session of the Western Pacific Naval Symposium in Qingdao, Shandong province April 22, 2014. More than 20 countries with interests in the western Pacific signed a framework maritime communication deal on Tuesday in what could be a step towards ensuring that miscommunications between naval vessels would not develop into a conflict. REUTERS/China Daily (CHINA – Tags: POLITICS MILITARY) CHINA OUT. NO COMMERCIAL OR EDITORIAL SALES IN CHINA

លោក ហ៊ុយ សាន់ អតីតតារាសម្តែងជើងចាស់ទទួលមរណភាព

October 29, 2015ព័ត៌មានថ្មីចុងក្រោយ, សិល្បៈ / កម្សាន្តមេគង្គ ប៉ុស្តិ៍

រាជធានីភ្នំពេញ៖លោក ហ៊ុយ សាន់ ដែលជាអតីតតារាសម្តែង និងជាចាងហ្វាងផលិតកម្មតាំងពីសង្គម បានទទួលមរណភាពហើយ ក្នុងជន្មាយុ៧៧ឆ្នាំ ដោយជរាពាធ នៅឯទឹកដីសហរដ្ឋអាមេរិក។ ដំណឹងមរណភាពរបស់លោក ហ៊ុយ សាន់ ត្រូវបានផ្សព្វផ្សាយតាមបណ្តាញសង្គមហ្វេសប៊ុកពីសំណាក់កូនប្រុស របស់លោក ហើយមានការចែករំលែកពីម្នាក់ទៅម្នាក់ផងដែរ។
បើតាមការបញ្ជាក់នៅក្នុងគណនេយ្យហ្វេសប៊ុករបស់លោក ដេវីដ ចាន់ណាយវ៉ា ដែលជាកូនប្រុសរបស់លោក ហ៊ុយ សាន់ បានឲ្យដឹងថា ឪពុករបស់លោកបានទទួលមរណភាពកាលពីវេលាម៉ោង៨ និង៣០នាទីយប់ ថ្ងៃចន្ទ ទី២៦ តុលា ២០១៥ ក្នុងជន្មាយុ៧៧ឆ្នាំ។ លោកបន្តថា ពិធីបញ្ចុះសពឪពុករបស់លោកប្រារព្ធធ្វើឡើងនៅថ្ងៃព្រហស្បតិ៍ ទី២៩ ខែតុលា ឆ្នាំ២០១៥នេះ វេលាម៉ោង៩ព្រឹក នៅ DOLAN FUNERAL HOME, INC សហរដ្ឋអាមេរិក ។
លោក ចាន់ណាវ៉ា បានឲ្យដឹងថា លោក ហ៊ុយ សាន់ កើតនៅថ្ងៃទី១១ ធ្នូ ១៩៣៨ ។ លោកបញ្ជាក់ថា កាលពីជំនាន់សង្គមរាស្ត្រនិយមមកដល់សម័យយើងសព្វថ្ងៃនេះឪពុករបស់លោកជា គ្រូក្បាច់គុនដំបងខ្មែរ បុរាណ ជាកីឡាករជើងឯកទទួលពានរង្វាន់អូឡាំពិច ជាតារាភាពយន្ត និងជាអ្នកផលិតខ្សែភាពយន្ដផងដែរ
ទោះយ៉ាងណាក៏ដោយព័ត៌មានលម្អិតនៃមរណភាពរបស់អតីតតារាសម្តែងតួអង្គកាច រូបនេះមិនត្រូវបានក្រុមគ្រួសាររបស់លោកបញ្ជាក់ឱ្យបានលម្អិតឡើយ គ្រាន់តែមានការជូនដំណឹង និងបញ្ជាក់ពីការធ្វើបុណ្យ និងការបញ្ចុះសពតែប៉ុណ្ណោះ៕

ទទួលទានទឹកប៉េងប៉ោះរាល់ថ្ងៃ ជួយបន្ថយទំហំចង្កេះ

October 29, 2015សុខភាពមេគង្គ ប៉ុស្តិ៍

ការស្រាវជ្រាវមួយ ថ្មីៗនេះ បានបង្ហាញថា ទទួលទានទឹកប៉េងប៉ោះទៀងទាត់រាល់ថ្ងៃ នឹងជួយបន្ថយទំហំចង្កេះយ៉ាងមានប្រសិទ្ធភាព ទន្ទឹមនោះក៏អាចការពារសុខភាពបានល្អប្រសើរទៀតផង។
យោងតាមការសិក្សាស្រាវជ្រាវមួយដែលបានចុះផ្សាយលើទស្សនាវដ្តី Nutirion បានបញ្ជាក់ថា ស្ត្រីទទួលទានទឹកប៉េងប៉ោះទៀងទាត់រាល់ថ្ងៃ ក្នុង៨សប្តាហ៍អាចបន្ថយទំហំចង្កេះបានជិត៣សង់ទីម៉ែត្រ ទោះបីមិនផ្លាស់ប្តូររបបទទួលទាន និងរបៀបរបបរស់នៅ។ លើសពីនេះបរិមាណកូឡេស្តេរ៉ូលរបស់គេក៏មានការថយចុះ១០%ផងដែរ។
ក្នុងប៉ុន្មានឆ្នាំកន្លងទៅនេះ, ប៉េងប៉ោះក្លាយជាកំពូលអាហារមួយ ព្រោះត្រូវបានពួកអ្នកវិទ្យាសាស្ត្របញ្ជាក់ថា អាចជួយបន្ថយហានិភ័យមហារីក, ជំងឺបេះដូង និងជំងឺផ្លូវចិត្ត។ ប៉េងប៉ោះសម្បូរ Lycopene, សារជាតិមួយមានលទ្ធភាពបន្ថយ ១/៤ ហានិភ័យជំងឺបេះដូង។ទឹកប៉េងប៉ោះផ្គត់ផ្គង់ Lycopene ច្រើនជាងប៉េងប៉ោះស្រស់។
អ្នកជីវជាតិវិទ្យា Azmina Covindji គាំទ្ររបកគំហើញខាងលើ និងសន្និដ្ឋានថា ប៉េងប៉ោះមានលទ្ធភាពជួយបញ្ចុះទម្ងន់ដ៏អស្ចារ្យ៕

ចិនប្រកាសមិនខ្លាចធ្វើសង្គ្រាម ក្រោយអាមេរិកបញ្ជូននាវាទៅជិតប្រជុំកោះ Spratly

October 29, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉េកាំង៖ប្រទេសចិនមិនមានឆន្ទៈនោះទេ ប៉ុន្តែមិនភ័យខ្លាចក្នុងការធ្វើសង្គ្រាមជាមួយអាមេរិកនៅក្នុងតំបន់នេះឡើយ ខណៈដែលវត្តមាននាវា USS Lassen របស់អាមេរិកបង្ហាញខ្លួននៅជិតប្រជុំកោះ Spratly ដែលមានជម្លោះ។ នេះបើយោងតាមសារព័ត៌មានជាតិនិយមរបស់ចិន Global Times ។
ប្រភពដដែលបានឲ្យដឹងថា ការធ្វើដំណើររបស់នាវាពិឃាតនាំមីស៊ីល USS Lassen របស់កងទ័ពជើងទឹកអាមេរិកឆ្លងកាត់កោះសិប្បនិម្មិតមួយនៅថ្មប៉ប្រះទឹក Subi នៃប្រជុំ Spratly គឺស្ថិតនៅក្រោមការត្រួតពិនិត្យរបស់យោធាចិន។
សហរដ្ឋអាមេរិកបានបដិសេធចំពោះការរិះគន់របស់ប្រទេសចិនលើការល្បាត របស់ខ្លួននៅសមុទ្រចិនខាងត្បូងដោយបាននិយាយថា ប្រតិបត្តិការនេះត្រូវបានអនុវត្តនៅក្នុងការអនុលោមតាមច្បាប់អន្តរជាតិ ហើយមិនចាំបាច់តម្រូវឲ្យមានការអនុញ្ញាតពិសេសណាមួយឡើយ។
ទោះបីយ៉ាងណាក៏ដោយរដ្ឋមន្ត្រីការពារជាតិអាមេរិកលោក Ashton Carter បានបញ្ជាក់ថា អាមេរិកនឹងធ្វើប្រតិបត្តិការស្រដៀងគ្នានេះបន្តទៀតក្នុងសមុទ្រចិន ខាងត្បូងនាពេលអនាគត៕

អ្នកស្លាប់ដោយគ្រោះរញ្ជួយដីកើន ឡើងដល់ជាង៤០០នាក់ហើយ

October 29, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉ាគីស្ថាន៖ចំនួនអ្នកស្លាប់ដោយសាររញ្ជួយដីកម្រិត៧.៥វ៉ិចទ័រ នៅប៉ាគីស្ថាន បានកើនឡើងដល់ជាង៤២៦នាក់ហើយមកដល់ពេលនេះ។ នេះបើតាមសារព័ត៌មានReuters ចេញផ្សាយនៅថ្ងៃទី២៩តុលានេះ។
ក្រុមអ្នកជួយសង្គ្រោះបានបញ្ជាក់ថា ចំនួនអ្នកស្លាប់ត្រូវបានគេរំពឹងថា អាចនឹងកើនឡើង ខណៈក្រុមស្រាវជ្រាវបានធ្វើដំណើរទៅដល់តំបន់ដាច់ស្រយាល ដែលរងការវាយប្រហារដោយគ្រោះរញ្ជួយដីកម្រិត៧,៥រ៉ិចទ័រនេះបានបង្កជាការបាក់ដី និងការជម្លៀសខ្លួនជាច្រើនសន្ធឹកសន្ធាប់ បន្ទាប់ពីគ្រោះរញ្ជួយដីបានបង្កឲ្យបាក់អគារនានា និងកាត់ផ្តាច់ប្រព័ន្ធទូរគមនាគមន៍។ ដោយឡែកបើតាមសេចក្តីរាយការណ៍បានឲ្យដឹងថា ត្រឹមតែក្នុងប្រទេសប៉ាគីស្ថាន មានមនុស្សរហូតដល់៣១១នាក់ស្លាប់ និងជាង១.៦០០នាក់រងរបួស។
បើតាមទីភ្នាក់ងារអង្គការសហប្រជាជាតិUNICEFបានបញ្ជាក់ថា កុមារប្រឈមមុខនឹងស្លាប់ជាបន្តបន្ទាប់នៅតំបន់ដាច់ស្រយាលស្ថិតនៅភាគខាងជើងប្រទេសប៉ាគីស្ថាន។ យ៉ាងណាក៏ដោយទីភ្នាក់ងារផ្ដល់ជំនួយបានបញ្ជាក់ថា នឹងត្រៀមខ្លួនសម្រាប់ផ្ដល់ជំនួយប្រជាពលរដ្ឋដែលរងគ្រោះដោយសារបាក់ ដី និងរញ្ជួយដីជាដើម៕

តុលាការទម្លាក់បទចោទដាក់ពន្ធនាគារមួយជីវិតករណីចម្លងរោគអេដស៍នៅបាត់ដំបង

October 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

បាត់ដំបង៖តុលាការខេត្តបាត់ដំបង បន្ទាប់ពីបើកសវនាការរយះពេល៥ថ្ងៃកន្លងមក នៅព្រលប់ថ្ងៃទី២៨ តុលានេះ បានសម្រេចទម្លាក់ចោលបទចោទប្រកាន់លើគ្រូពេទ្យតាមភូមិម្នាក់ ឈ្មោះ យ៉ែម ជ្រិន ដែលជាប់ពាក់ព័ន្ធនឹងការចាក់ថ្នាំចម្លងមេរោគអេដស៍ទៅអ្នកភូមិជាង២០០នាក់។

គួររំឭកថា កាលពីចុងឆ្នាំ២០១៤ មានការភ្ញាក់ផ្អើលចំពោះការឆ្លងមេរោគអេដស៍ដែលបណ្តាលឲ្យអ្នកភូមិប្រមាណ២៣៨នាក់ រស់នៅក្នុងឃុំរកាបានឆ្លងមេរោគអេដស៍ ហើយក្រោយមកមានអ្នកជំងឺប្រមាណ១០នាក់ ដែលភាគច្រើនជាមនុស្សចាស់បានស្លាប់។
គ្រូពេទ្យភូមិដែលត្រូវបានចោទប្រកាន់ឈ្មោះ យ៉ែម ជ្រិន អាយុ៥៦ឆ្នាំ ត្រូវបានព្រះរាជអាជ្ញាចោទប្រកាន់លើចំណុច៣នៃបទចោទ គឺទី១ ការចម្លងជំងឺអេដស៍ទៅអ្នកដទៃ ទី២ ពាក់ព័ន្ធនឹងក្រមព្រហ្មទណ្ឌ(អំពើឃោរឃៅមានទារុណកម្ម) និងទី៣ ពាក់ព័ន្ធនឹងខុសវិជ្ជាជីវៈពេទ្យ ។ ក្រោមបទចោទទាំងនេះ លោក យ៉ែម ជ្រិន អាចត្រូវជាប់ពន្ធនាគារមួយជីវិត។

តាមការគ្រោងទុកតុលាការខេត្តបានបើកសវនាការរយះពេល៥ថ្ងៃចាប់តាំងពីថ្ងៃទី២០ ខែតុលា មក ហើយបានបិទបញ្ចប់សវនាការជំនុំជម្រះនៅយប់ថ្ងៃពុធនេះ។ ក្នុងសវនាការចុងក្រោយនេះ តុលាការបានសាកសួរសាក្សីដាក់បន្ទុកចំនួន១០នាក់ បន្ថែមលើដើមបណ្តឹង៨៥នាក់ក្នុងចំណោម១២០នាក់។ សាក្សីដាក់បន្ទុកនោះ គឺជាអ្នកជំនាញមកពីក្រសួងសុខាភិបាល ក្រុមប្រឹក្សាស្រុក ប្រធានមន្ទីរសុខាភិបាលខេត្ត និងអ្នកជំនាញពាក់ព័ន្ធផ្សេងៗទៀត។ ពួកគេបាននិយាយថា លោក យ៉ែម ជ្រិន បានចាក់ថ្នាំខុសវិជ្ជាជីវៈពេទ្យ និងពុំមានអនាម័យ។ ប៉ុន្តែសាក្សីដោះបន្ទុកដែលជាក្រុមគ្រួសារ និងសាច់ញាតិបានបដិសេធការចោទប្រកាន់នេះ។

នៅម៉ោងប្រមាណ៧និង៣០នាទីយប់ នាថ្ងៃទី២៨ នេះ ប្រធានអង្គសវនាការបានប្រកាសថាតុលាការសម្រេចទម្លាក់ចោលការចោទប្រកាន់លើលោក លោក យ៉ែម ជ្រិន ត្រង់មាត្រា២០៥ នៃក្រមព្រហ្មទណ្ឌ ក្រោយពីបានស្តាប់សាក្សី ស្តាប់មេធាវី និងសំដីជនជាប់ចោទ ប៉ុន្តែសាលក្រមនឹងត្រូវនៅថ្ងៃទី៣ ខែធ្នូ ឆ្នាំ២០១៥ វេលាម៉ោង៩ព្រឹក។

យោងតាមមាត្រា១៨នៃច្បាប់ ហាមឃាត់ដាច់ខាតចំពោះអ្នកដែលដឹងថា ខ្លួនមានមេរោគអេដស៍/ជំងឺអេដស៍ទៅប្រព្រឹត្តក្នុងចេតនាចម្លងទៅអ្នកដទៃ ។ ទោសបញ្ញត្តិនៃច្បាប់នេះគឺជនណាដែលប្រព្រឹត្តល្មើសនឹងមាត្រា១៨ ត្រូវផ្តន្ទាទោសដាក់ពន្ធនាគារពី១០ឆ្នាំទៅ១៥ឆ្នាំ៕ដោយ៖រដ្ឋា