All posts by មេគង្គ ប៉ុស្តិ៍

ស្ត្រីខ្មែរវ័យក្មេង៤នាក់ទៀត ដែលចាញ់ បោកមេខ្យល់ត្រូវបានសង្គ្រោះពីប្រទេសម៉ាឡេស៊ី

October 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ៖ស្ត្រីវ័យក្មេងខ្មែរ៤នាក់ថ្មីទៀតជាកូនចៅប្រជាកសិកររស់នៅខេត្តព្រៃវែង កណ្ដាល កំពង់ឆ្នាំង និងខេត្តកំពង់ធំ ដែលចាញ់បោកមេខ្យល់ទៅធ្វើការងារតាមផ្ទះនៅប្រទេសម៉ាឡេស៊ី ត្រូវបានជួយសង្គ្រោះនាំយកមកស្រុកកំណើតវិញហើយកាលពីរសៀលថ្ងៃពុធនេះ តាមច្រកអាកាសយានដ្ឋានអន្តរជាតិភ្នំពេញ។

ក្រសួងការបរទេសកម្ពុជា នៅថ្ងៃទី២៨ ខែតុលា នេះបានឲ្យដឹងថា ស្ត្រីខ្មែរចំនួន ៤នាក់ ដែលចាញ់បោកមេខ្យល់នាំយកទៅធ្វើជាអ្នកបម្រើតាមផ្ទះនៅប្រទេស ម៉ាឡេស៊ី ត្រូវបានជួយសង្គ្រោះ។ ពលការិនីខ្មែររងគ្រោះម្នាក់មកពីខេត្តព្រៃវែង បានមកដល់អាកាសយានដ្ឋានអន្តរជាតិភ្នំពេញ នៅថ្ងៃទី២៨ ខែតុលា វេលាម៉ោង ៤រសៀល តាមជើងយន្តហោះ AK ៥៣៤។ ដោយឡែកពលការិនីខ្មែរ ៣នាក់ទៀតដែលរស់នៅខេត្តកណ្ដាល កំពង់ឆ្នាំង និងខេត្តកំពង់ធំ នឹងមកដល់អាកាសយានដ្ឋានអន្តរជាតិភ្នំពេញ នៅថ្ងៃទី២៩ ខែតុលា វេលាម៉ោង ៧ និង ៥០នាទីព្រឹក តាមជើងយន្តហោះ AK ៥៣៦។

សេចក្តីប្រកាសដដែលបញ្ជាក់ថា អំឡុងរង់ចាំការត្រឡប់មកកម្ពុជាវិញ ស្ថានទូតកម្ពុជា ប្រចាំប្រទេសម៉ាឡេស៊ី បានផ្តល់កន្លែងស្នាក់នៅ និងហូបចុកជូនដល់ពលការិនីទាំង ៤នាក់នោះ។

ជាងនេះទៀត ក្រសួងការបរទេសកម្ពុជា ក៏បានអំពាវនាវដល់ពលរដ្ឋខ្មែរ ជាពិសេសនារីខ្មែរដែលជាជនងាយរងគ្រោះ ត្រូវប្រុងប្រយ័ត្នចំពោះការឆបោកពីសំណាក់មេខ្យល់ ដែលភូតកុហកថា ទៅធ្វើការនៅប្រទេសម៉ាឡេស៊ី នឹងទទួលបានប្រាក់ខែច្រើន។

ស្ត្រីរងគ្រោះទាំង ៤នាក់នោះរួមមាន៖
១- ពលការិនីខ្មែររងគ្រោះឈ្មោះ អ៊ី តូច នៅភូមិព្រះធាតុ ឃុំព្រះធាតុ ស្រុកកំពង់ត្របែក ខេត្តព្រៃវែង បានទៅធ្វើការតាមផ្ទះនៅប្រទេសម៉ាឡេស៊ីតាមរយៈមេខ្យល់ កាលពីថ្ងៃទី៥ ខែវិច្ឆិកា ឆ្នាំ២០១៤ បានមកស្ថានទូត នៅថ្ងៃទី២២ ខែតុលា ឆ្នាំ២០១៥ សុំជួយឲ្យបានវិលត្រឡប់មកកម្ពុជាវិញ។ ពលការិនី អ៊ី តូច នឹងមកដល់អាកាសយានដ្ឋានអន្តរជាតិភ្នំពេញ នៅថ្ងៃទី២៨ ខែតុលា ឆ្នាំ២០១៥ វេលាម៉ោង ១៦ៈ០០នាទីរសៀល តាមជើងយន្តហោះ AK ៥៣៤។

២- ពលការិនីខ្មែររងគ្រោះ ៣នាក់ទៀត ដែលនឹងមកដល់អាកាសយានដ្ឋានអន្តរជាតិភ្នំពេញ នៅថ្ងៃទី២៩ ខែតុលា ឆ្នាំ២០១៥ វេលាម៉ោង ០៧ៈ៥០នាទី ព្រឹក តាមជើងយន្តហោះ AK ៥៣៦មានឈ្មោះ៖

– នៅ ស្រីនាង អាយុ២២ឆ្នាំ នៅភូមិព្រែកតូច ឃុំព្រែកដាច់ ស្រុកលើកដែក ខេត្តកណ្ដាល បានមកស្ថានទូត នៅថ្ងៃទី១៤ ខែតុលា ឆ្នាំ២០១៥ សុំជួយឲ្យបានវិលត្រឡប់មកកម្ពុជាវិញ។ ពលការិនីរូបនេះត្រូវបានបងស្រីបង្កើតនាំយកទៅប្រទេសម៉ាឡេស៊ី កាលពីថ្ងៃទី២៦ ខែសីហា ឆ្នាំ២០១៤ ធ្វើការនៅហាង បោកគក់សំលៀកបំពាក់។

– ឌី ចាន់ស្រ៊ូ អាយុ២០ឆ្នាំ នៅភូមិកំពង់បឹង ឃុំកំពង់ហាវ ស្រុកកំពង់លែង ខេត្តកំពង់ឆ្នាំង បានមកស្ថានទូតនៅថ្ងៃទី១៤ ខែតុលា ឆ្នាំ២០១៥ សុំជួយឲ្យបាន វិលត្រឡប់មកកម្ពុជាវិញ។ ពលការិនីរូបនេះ បានទៅប្រទេសម៉ាឡេស៊ីតាមរយៈមេខ្យល់ កាលពីថ្ងៃទី១១ ខែសីហា ឆ្នាំ២០១៤ ធ្វើការតាមផ្ទះ។

– សំ ស៊ីណា (ឈ្មោះពិត សំ ស៊ីណែត) អាយុ២០ឆ្នាំ នៅភូមិតាញ៉ោក ឃុំប្រាសាទ ស្រុកសន្ទុក ខេត្តកំពង់ធំ បានមកស្ថានទូត នៅថ្ងៃទី១៧ ខែតុលា ឆ្នាំ២០១៥ សុំជួយឲ្យបានវិលត្រឡប់មកកម្ពុជាវិញ។ ពលការិនីរូបនេះ បានទៅប្រទេសម៉ាឡេស៊ី តាមរយៈមេខ្យល់ កាលពីឆ្នាំ២០១២ ធ្វើការនៅហាងលក់បាយ៕ដោយ៖គឹម បញ្ញា

ហូលីវូដ នឹងថតខ្សែភាពយន្តខ្នាតធំពីរបបខ្មែរក្រហមនៅខេត្តសៀមរាប

សៀមរាប៖ ហូលីវូដ (Holly Wood) ដែលជាក្រុមហ៊ុនផលិតខ្សែភាពយន្តល្បីបំផុតរបស់សហរដ្ឋអាមេរិក នឹងមកថតខ្សែភាពយន្តស្តីពីរបបខ្មែរក្រហមនៅតាមតំបន់មួយចំនួនក្នុងទឹកដីខេត្តសៀមរាប ដោយចំណាយពេលប្រមាណ ៣ខែ ចាប់ពីអំឡុងខែវិច្ឆិកា ឆ្នាំ២០១៥ រហូតដល់អំឡុងខែមករា ឆ្នាំ២០១៦។

អែអេហ្វអា បានសរសេរនៅថ្ងៃនេះថា គោលបំណងដែលយកទីតាំងជាច្រើននៅក្នុងខេត្តសៀមរាប នេះ គឺដើម្បីផលិតជាខ្សែភាពយន្តខ្នាតធំមួយ ដែលនិយាយអំពីសោកនាដកម្មក្នុងរបបខ្មែរក្រហម ចាប់ពីអំឡុងឆ្នាំ១៩៧៥ រហូតដល់ឆ្នាំ១៩៧៩។

ផលិតករភាពយន្តរបស់ក្រុមហ៊ុនហូលីវូដ សហរដ្ឋអាមេរិក បានចូលជួបពិភាក្សាជាមួយ
អភិបាលខេត្តសៀមរាប កាលពីព្រឹកថ្ងៃពុធ ទី២៨ ខែតុលា ក្នុងបំណងសម្ដែងការគួរសម ព្រមទាំងស្នើសុំការអនុញ្ញាតរើសយកទីតាំងនៅតាមតំបន់ខ្លះនៃខេត្ត នេះ ដើម្បីថតផលិតជាភាពយន្តខ្នាតធំមួយ ដែលនឹងចាប់ផ្ដើមឡើងនៅខែក្រោយនេះ។
ខ្សែភាពយន្តខ្នាតធំ ដែលមានចំណងជើងថា «ជាដំបូងពួកគេសម្លាប់ឪពុករបស់ខ្ញុំ» (The first they kill my father) គឺជារឿងដែលនិយាយអំពីជីវិតរបស់ក្មេងស្រីខ្មែរម្នាក់ និងសោកនាដកម្មជាច្រើនក្នុងរបបខ្មែរក្រហម នឹងចាប់ផ្ដើមដឹកនាំការផលិតដោយតារាសម្ដែងដ៏ល្បីល្បាញម្នាក់របស់ ហូលីវូដ គឺអ្នកស្រី អែនជេលីណា ចូលី ភីត (Angelina Jolie-Pitt) នៅលើទឹកដីខេត្តសៀមរាប ចាប់ពីអំឡុងខែវិច្ឆិកា ឆ្នាំ២០១៥។

ផលិតករខ្សែភាពយន្តរបស់ហូលីវូដ គឺលោក ប៊ីល វីលសុន (Bill Wilson)។ លោកមានប្រសាសន៍កាលពីព្រឹកថ្ងៃពុធ ទី២៨ ខែតុលា ក្នុងពេលជួបជាមួយអភិបាលខេត្តសៀមរាប ថា ក្រុមហ៊ុនហូលីវូដ នឹងចំណាយពេលជិត ៣ខែ ដើម្បីថតខ្សែភាពយន្តរឿង «ជាដំបូងពួកគេសម្លាប់ឪពុកខ្ញុំ» នៅក្នុងទឹកដីខេត្តសៀមរាប។ លោក ប៊ីល វីលសុន បញ្ជាក់ទៀតថា ការថតកុននៅក្នុងទឹកដីខេត្តសៀមរាប នេះ គឺក្រុមហ៊ុនបានរើសយកទីតាំងជាច្រើន ដើម្បីថតឈុតដែលពួកខ្មែរក្រហមជម្លៀសប្រជាពលរដ្ឋចេញពីទីក្រុង ឈុតអំពើព្រៃផ្សៃដែលខ្មែរក្រហមប្រើអាវុធបាញ់ប្រជាពលរដ្ឋ ព្រមទាំងកន្លែងខ្លះមានប្រើឧបករណ៍បំផ្ទុះ ធ្វើជាសមរភូមិប្រយុទ្ធទៀតផង។ ការថតឈុតទាំងនេះ គឺក្រុមហ៊ុនត្រូវការចំណាយប្រាក់ជាច្រើន ដើម្បីជួលប្រជាពលរដ្ឋខ្មែរឲ្យសម្ដែង៖ «យើងនឹងជួលកម្លាំងពលកម្ម ពីប្រជាពលរដ្ឋខ្មែរ ប៉ុន្តែខ្ញុំមិនទាន់ប្រាកដថាចំនួនប៉ុន្មាននាក់ពិតប្រាកដទេ។ បើតាមខ្ញុំប៉ានប្រមាណ គឺយើងនឹងត្រូវប្រើប្រាស់កម្លាំងប្រជាពលរដ្ឋកម្ពុជា ប្រហែល ២.៥០០នាក់ទៅ ៣.០០០នាក់ ឲ្យធ្វើឆាក ធ្វើជាអ្នកសម្ដែង និងក្រុមអ្នកបច្ចេកទេស ជាដើម»។

អាជ្ញាធរខេត្តសៀមរាប សម្ដែងការត្រេកអរចំពោះក្រុមហ៊ុនហូលីវូដ ដែលចាប់អារម្មណ៍ទៅលើទេសភាពខេត្តសៀមរាប ដើម្បីថតកុននេះ។

អភិបាលខេត្តសៀមរាប លោក ឃឹម ប៊ុនសុង មានប្រសាសន៍ថា ខេត្តសៀមរាប គឺជាតំបន់ដែលទាក់ទាញទេសចរបំផុតរបស់កម្ពុជា។ លោកសំណូមពរឲ្យក្រុមហ៊ុន នៅពេលដែលត្រូវការថតឈុតគ្រឿងផ្ទុះ គួរតែទៅរកតំបន់ឲ្យឆ្ងាយពីទីក្រុង ដើម្បីកុំឲ្យមានការភ្ញាក់ផ្អើលដល់ភ្ញៀវទេសចរ។ ក្នុងដំណើរការថតកុននេះ អាជ្ញាធរខេត្តសៀមរាប នឹងបញ្ជូនមន្ត្រីនៃមន្ទីរពាក់ព័ន្ធមួយចំនួន ឲ្យចូលរួមសហការពិនិត្យមើលភូមិសាស្ត្រ និងទីកន្លែង៖ «មន្ទីរជំនាញ គឺទំនាក់ទំនងគ្នាជាប់ជាមួយនឹងភាគីថតខ្សែភាពយន្តនេះ ដើម្បីបានទទួលដឹង និងជួយដោះស្រាយបញ្ហាផ្សេងៗ»។

មន្ត្រីក្រសួងវប្បធម៌ និងវិចិត្រសិល្បៈ លោក ជៀប សុវិជ្ជា មានប្រសាសន៍ថា ការថតខ្សែភាពយន្តខ្នាតធំរឿង «ជាដំបូងពួកគេសម្លាប់ឪពុករបស់ខ្ញុំ» នេះ នឹងធ្វើឲ្យប្រជាពលរដ្ឋខ្មែរមានការងារធ្វើ ហើយមួយផ្នែកទៀត គឺវាអាចជួយផ្សព្វផ្សាយផ្នែកទេសចរណ៍ឲ្យពិភពលោកបានស្គាល់កម្ពុជា កាន់តែច្រើនឡើងនៅពេលអនាគត។

ខ្សែភាពយន្តខ្នាតធំរឿង «ជាដំបូងពួកគេសម្លាប់ឪពុករបស់ខ្ញុំ» ដែលនិយាយអំពីជីវិតក្មេងស្រីម្នាក់ឈ្មោះ លឿង អ៊ុង (Loung Ung) នៅក្នុងរបបខ្មែរក្រហមនេះ ក្រៅតែពីចំណាយពេលជិត ៣ខែសម្រាប់ថតនៅខេត្តសៀមរាប ក៏មានគម្រោងទៅថតឈុតខ្លះទៀតនៅក្នុងទឹកដីខេត្តបាត់ដំបង ចាប់ពីខែកុម្ភៈ ឆ្នាំ២០១៦ ខាងមុខ៕ប្រភព៖អែអេហ្វអា

ផលិតករខ្សែភាពយន្តក្រុមហ៊ុនហូលីវូដ (Holly Wood) របស់សហរដ្ឋអាមេរិក គឺលោក ប៊ីល វីលសុន (Bill Wilson) [កណ្ដាល] ជួបពិភាក្សាជាមួយ លោក ឃឹម ប៊ុនសុង អភិបាលខេត្តសៀមរាប នៅថ្ងៃទី២៨ ខែតុលា ឆ្នាំ២០១៥។

លោក កឹម សុខា សុំជួបលោក ស ខេង ពេលបញ្ហានយោបាយឡើងកម្តៅ

October 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ មន្ត្រីជាន់ខ្ពស់គណបក្សសង្គ្រោះជាតិ បានឲ្យដឹងថា ប្រធានស្តីទីគណបក្សសង្គ្រោះជាតិ លោក កឹម សុខា បានធ្វើលិខិតមួយច្បាប់ដាក់ជូនទៅសម្តេចក្រឡាហោម ស ខេង ប្រធានក្រុមតំណាងរាស្ត្រមតិភាគច្រើន ដើម្បីសុំជួបពិភាក្សាបញ្ហាមួយចំនួន តែនៅមិនទាន់មានការឆ្លើយតបនៅឡើយទេ។

ការស្វែងរកជួបលោក ស ខេង បន្ទាន់របស់លោក កឹម សុខា ធ្វើឡើងនៅក្រោយ ពេលមានករណីហិង្សាលើអ្នកតំណាងរាស្ត្រ និងការរំខានលំនៅដ្ឋានរបស់លោក កឹម សុខា កាលពីថ្ងៃចន្ទ ។ ករណីនោះ គឺគណបក្សសង្គ្រោះជាតិ បានឲ្យលោក ជូង ជូងី មេធាវីរបស់គណបក្សសង្គ្រោះជាតិ រៀបចំពាក្យបណ្តឹងដាក់ទៅតុលាការផងដែរ។ ប៉ុន្តែមេធាវី នៅមិនទាន់យកពាក្យបណ្តឹង ទៅដាក់នៅឡើយទេ។

មន្ត្រីដដែល បានបន្តថា គណបក្សសង្គ្រោះជាតិ បានធ្វើញ្ញត្តិដាក់ទូលថ្វាយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងបណ្តាស្ថានទូត ប្រចាំនៅក្នុងប្រទេសកម្ពុជា និងរាជរដ្ឋាភិបាល កាលពីនៅថ្ងៃទី២៧ ខែតុលា ឆ្នាំ២០១៥ អំពីហេតុការណ៍អំពើហិង្សាលើអ្នកតំណាងរាស្ត្រគណបក្សសង្គ្រោះជាតិ។

លិខិតស្នើសុំជួបនេះ ធ្វើឡើងខណះសម្តេចក្រឡាហោម ស ខេង កំពុងបំពេញទស្សនកិច្ច ចូលរួមកិច្ចប្រជុំ នៅប្រទេសវៀតណាម ចំណែកលោកកឹមសុខា និងភរិយា ព្រមទាំងតំណាងរាស្ត្រគណបក្សសង្គ្រោះជាតិមួយចំនួនទៀត កំពុងស្ថិតនៅប្រទេសថៃ ក្នុងគោលបំណងសួរសុខទុក្ខអាការៈជំងឺរបស់តំណាងរាស្ត្រពីររូបដែលត្រូវគេវាយគឺលោក ញ៉យ ចំរើន និងលោក គង់សុភា៕ដោយ៖រដ្ឋា

អាវុធហត្ថខេត្ត និងគយ ឃាត់រថយន្តដឹកទំនិញធំៗជាង៩០គ្រឿងដែលដឹក មកពីថៃ

October 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តកោះកុង៖ នៅវេលាម៉ោង៥ល្ងាច ថ្ងៃទី២៧ តុលា ឆ្នាំ២០១៥ នេះ កងអាវុធហត្ថខេត្ត និងសមត្ថកិច្ចគយ បានស្ទាក់ឃាត់រថយន្តដឹកទំនិញធំៗ ជាង៩០គ្រឿង នៅចំណុចរង្វង់មូល អេស៊ីលីដា ក្បែរមន្ទីរពទ្យបង្អែកខេត្តកោះកុង ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ដែលដឹកទំនិញចេញពីប្រទេសថៃ ចូលមកកម្ពុជាឆ្ពោះទៅរាជធានីភ្នំពេញ។

បើតាមសម្ដីរបស់មេការដឹកទំនិញខាងលើ បាននិយាយថា ការដឹកទំនិញទាំងនេះ មានការឯកភាពគ្នាត្រឹមត្រូវ ហើយសុទ្ធតែជាទំនិញស្របច្បាប់ទាំងអស់។

ចំណែកមន្ត្រីគយ បានឲ្យដឹងថា ក្នុងប្រតិបត្តិការស្ទាក់ឃាត់ទំនិញនេះ
លោកធ្វើឡើងដើម្បីត្រួតពិនិត្យឯកសារម្តងទៀត ឲ្យបានច្បាស់លាស់ចៀសវាងការបន្លំផ្សេងៗ ហើយបើខាងលោកពិនិត្យឃើញថា មានលិខិតស្នាមមិនត្រឹមត្រូវ ក៏លោកមិនអនុញ្ញាតឲ្យចេញដំណើរនោះដែរ៕ដោយ៖អ៊ួង វឹង

អត្ថប្រយោជន៍ផ្លែខ្នុរចំពោះសុខភាពដែលនឹកស្មានមិនដល់

October 28, 2015សុខភាពមេគង្គ ប៉ុស្តិ៍

ផ្លែខ្នុរសំបូរដោយវីតាមីនជាច្រើនយ៉ាងដូចជា វីតាមីន A, វីតាមីន C, ជាតិដែក, ប៉ូតាស្យូម, កាល់ស្យូម, niacin, Thiamine, និង Riboflavin។ ខាងក្រោមគឺផលប្រយោជន៍មួយចំនួនរបស់ផ្លែខ្នុរដែល៖
បង្កើនប្រពន្ធ័ភាពស៊ាំ៖ ផ្លែខ្នុរមានផ្ទុកទៅដោយវីតាមីន C ដែលជួយការពារបាក់តេរី និងការពារការឆ្លងមេរោគព្រោះវាជួយបង្កើនដល់មុខងារនៃកោសិកាឈាមស។
ការពារជំងឺមហារីក៖ ផ្លែខ្នុរសំបូរទៅដោយសារធាតុចិញ្ចឹម ដូចជា lignant, saponins និងសារជាតិ Isoflavones។ សារធាតុចិញ្ចឹមទាំងអស់នេះមានគុណសម្បត្តិក្នុងការជួយប្រយុទ្ធ ប្រឆាំងនឹងជំងឺមហារីក និងប្រឆាំងនឹងភាពចាស់របស់យើង។
ជួយសំរួលក្នុងការរំលាយអាហារ៖ ផ្លែខ្នុរមានសារៈប្រយោជន៍ក្នុងការរំលាយអាហារ និងជួយប្រឆាំងនឹងការទល់លាមក។
ជួយបង្កើនថាមពល ៖ ជាតិផ្អែមនៅក្នុងផ្លែខ្នុរបានផ្តល់ថាមពលជាច្រើនលើសលុបទៅឲ្យរាងកាយយើង ហើយមិនធ្វើកម្រិតជាតិស្ករកើនឡើង។
កាត់បន្ថយជំងឺគាំងបេះដូង៖ សារធាតុប៉ូតាស្យូមដ៍ច្រើននៅក្នុងផ្លែខ្នុរ បានជួយសំរួលចរន្តឈាម ដែលអាចជួយកាត់បន្ថយឱកាសនៃការកើតជំងឺគាំងបេះដូង និងជំងឺដាច់សរសៃឈាមខួរក្បាលដោយស្វ័យប្រវត្តិ។
ព្យាបាលជំងឺហឺត៖ តាមការសិក្សាមួយចំនួនក៏បានបង្ហាញដែរថា ប្រសិនបើអ្នកយកឬសខ្នុរមកដាំឲ្យពុះ ហើយទទួលទានវានឹងជួយកាត់បន្ថយការកើតជំងឺហឺតរបស់អ្នក។
បង្ការជំងឺខ្វះឈាម៖ ផ្លែខ្នុរអាចជួយទប់ស្កាត់បញ្ហាខ្វះឈាមបានយ៉ាងល្អ ។ ផ្លែរខ្នុរបានបង្កើនចលនាឈាមរត់ និងព្យាបាលភាពស្លេកស្លាំង។
ធ្វើឲ្យឆ្អឹងរឹងមាំ៖ ឆ្អឹងរបស់អ្នកត្រូវការជាតិកាល់ស្យូមដើម្បីឲ្យវាកាន់តែរឹងមាំ។ ផ្លែខ្នុរជាប្រភពនៃម៉ាញេស្យូម ដែលមានប្រយោជន៍យ៉ាងខ្លាំងក្នុងការស្រូបយកជាតិកាល់ស្យូម។ ឆ្អឹងរបស់អ្នកនឹងកាន់តែរឹងមាំ កាត់បន្ថយជំងឺពុកឆ្អឹងនិងជំងឺរលាកសន្លាក់ឆ្អឹង ប្រសិនបើអ្នកទទួលទានផ្លែខ្នុរ ។
ការបង្ការភាពចាស់និងជួយស្បែករបស់អ្នក៖ ផ្លែខ្នុរ គឺសម្បូរទៅដោយសារធាតុប្រឆាំងអុកស៊ីតកម្ម ។ ដូច្នះវាមានសារប្រយោជន៍ក្នុងការប្រឆាំងភាពចាស់ ចំណែកឯជាតិទឹកនៅក្នុងផ្លែខ្នុរនឹងធ្វើឱ្យស្បែករបស់អ្នកមានសំណើម ។
ធ្វើឲ្យភ្នែកភ្លឺល្អ៖ ផ្លែខ្នុរ គឺសម្បូរទៅដោយវីតាមីន A ដែលជាជំនួយក្នុងការរក្សាភ្នែករបស់អ្នកមើលឃើញច្បាស់ ។ វាអាចការពារពីកាំរស្មី UV ហើយមិនធ្វើឲ្យយើងកើតជំងឺភ្នែកឡើងបាយ ។
ទប់ស្កាត់ជំងឺមហារីកពោះវៀនធំ៖ សារធាតុប្រឆាំងអុកស៊ីតកម្មនៅក្នុងផ្លែនេះ និងកាត់បន្ថយហានិភ័យនៃជំងឺមហារីកពោះវៀនធំ ។ ជាតិសរសៃ នៅក្នុងផ្លែខ្នុរ បានការពារការទល់លាមកផងដែរ ។
មានប្រយោជន៍ដល់ស្ត្រីមានផ្ទៃពោះ៖ វីតាមីន B នៅក្នុងផ្លែខ្នុរ គឺមានប្រយោជន៍យ៉ាងខ្លាំង សម្រាប់ស្ត្រីដែលមានផ្ទៃពោះ និងស្ត្រីដែលបំបៅដោះកូន ហើយវាជួយត្រួតពិនិត្យអ័រម៉ូន និងបង្កើនប្រព័ន្ធការពាររាងកាយ៕

ក្រុមម្ចាស់រថយន្តធុនធ្ងន់ខុសច្បាប់ប្រមូលផ្តុំតវ៉ាឲ្យគយបន្ធូរបន្ថយប្រាក់ពន្ធ និងមិនកែចង្កូត (មានវីដេអូ)

October 28, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ ក្រុមប្រជាពលរដ្ឋដែលមានរថយន្តធុនធំ ឬធុនបែនគ្មានបង់ពន្ធនាំចូលហើយរកស៊ីដឹកទំនិញ ឬដឹកអាចម៍ដីនៅជុំវិញរាជរាធនីភ្នំពេញ និងខេត្តនានាបានប្រមូលផ្តុំគ្នានៅមុខទីស្តីការក្រសួងសារធារណការ និងដឹកជញ្ជូន កាលវេលាម៉ោង ១០:០០ព្រឹក ថ្ងៃទី២៨ ខែតុលា ឆ្នាំ២០១៥ ប្រយោជន៍ស្នើឲ្យស្ថាប័នគយ មេត្តាបន្ធូរបន្ថយ និងពន្យារពេលបង់ពន្ធទៅលើរថយន្តរបស់ពួកគាត់។

នៅមុខទីស្តីការក្រសួងសាធារណការ និងដឹកជញ្ជូន ជិតរមណីយដ្ឋានវត្តភ្នំ កាលពីព្រឹកមិញនេះ មានប្រជាពលរដ្ឋដែលជាម្ចាស់រថយន្តបែនធុនធ្ងន់បានមកជួបជុំគ្នាដាក់លិខិតស្នើសុំទៅរដ្ឋមន្ត្រីដើម្បីឲ្យមានការបន្ធូរបន្ថយ ឬពន្យារពេលបង់ប្រាក់ពន្ធនាំចូលលើរថយន្តរបស់ពួកគាត់។

ការប្រមូលផ្តុំគ្នានេះ ធ្វើឡើងនៅក្រោយពេលដែលស្ថាប័នគយ និងរដ្ឋាករ បានចុះបង្ក្រាបរឹបអូសយករថយន្តដែលមិនបានបង់ពន្ធត្រឹមត្រូវ រថយន្តចង្កូតស្តាំ ពិសេសគឺការបង់ពន្ធនាំចូល។

បងប្រុសម្នាក់ដែលមកចូលក្នុងការតវ៉ានេះបានបញ្ជាក់ថា ពួកគាត់មានលទ្ធភាពតិចតួច បានយកប្លង់ដី-ផ្ទះទៅបញ្ចាំនៅធនាគារ យកប្រាក់ទៅទិញរថយន្តនេះ ដើម្បីធ្វើអាជីវកម្មដឹកដី ឬទំនិញ ដោយបង់រំលោះអោយទៅធនាគារជារៀងរាល់ខែ រហូតមកដល់ពេលនេះមិនរួចបំណុលនៅឡើយទេ ប៉ុន្តែរថយន្តមានភាពទ្រុឌទ្រោមស្ទើរអស់ទៅហើយ គឺរកមួយថ្ងៃបានត្រឹមមួយថ្ងៃទប់ទល់នឹងជីវភាពប្រចាំថ្ងៃ និបំណុលធនាគារតែប៉ុណ្ណោះ។

នៅក្នុងលិខិតដែលពួកគាត់បានបង្ហាញ មេគង្គប៉ុស្តិ៍ បានសរសេរថា «ពួកយើងទាំងអស់គ្នាបានសំណូមពរ ៣ចំណុច ៖
១, សូមមេត្តា កុំអោយកែចង្កូតពីស្តាំ ទៅឆ្វេង
២, សូមមេត្តា បន្ធូរបន្ថយតំលៃពន្ធត្រឹម ៥០% និងកុំគិតការផាកពិន័យ ទាំងរថយន្តដែលបានឃាត់ទុក និងរថយន្តដែលមិនទាន់បានឃាត់ទុក។
៣, មេត្តាផ្អាកប្រត្តិបត្តិការចុះចាប់រថយន្ត តាមផ្លូវ តាមផ្ទះជាបណ្តោះអាសន្ត ដើម្បីអោយពួកខ្ញុំមានឪកាសបានរកប្រាក់ចំណូលដើម្បីបង់ពន្ធជូនរដ្ឋ និងធនាគារ។

នៅវេលាជិតថ្ងៃត្រង់នាថ្ងៃដដែល បងប្អូនប្រជាពលរដ្ឋទាំងនោះ បាននាំគ្នារំសាយខណៈ ដែលក្រសួងសាធារណការ និងដឹកជញ្ជូន រួមទាំងស្ថាប័នគយ នៅមិនទាន់បញ្ជាក់ពីដំណោះស្រាយលើសំណូមពរនោះនៅឡើយ។

គួរបញ្ជាក់ថា កន្លងមកមានរថយន្តដឹកទំនិញធុនធ្ងន់ ឬធុនបែនខុសច្បាប់ជាច្រើនគ្រឿងបានចរាចរណ៍ធ្វើអាជីវកម្មនៅទូទាំងប្រទេស ក្នុងនោះមានរថយន្តខ្លះមិនបានបង់ពន្ធនាំចូលត្រឹមត្រូវនោះទេ ហើយក្នុងចំណោមរថយន្តដែលមិនបានបង់ពន្ធនាំចូលខ្លះនោះគឺដោយសារម្ចាស់រថយន្ត បានទិញរថយន្តកាប់សាច់ដែលក្រុមហ៊ុនមួយចំនួនបានឃុប ឃិតជាមួយស្ថាប័នគយ នាំចូលរថយន្តចង្កូតស្តាំកាប់សាច់(កាត់ ត) ដោយចុះបញ្ជីបង់ពន្ធនាំចូលដាក់ថាជាគ្រឿងបន្លាស់ចាស់ៗ ឬដែកអេតចាយ ។ពួកគាត់បានទិញឡានកាប់សាច់យកទៅតភ្ជាប់ និងបណ្តុះបែន(ស្ទូច)ដោយខ្លួនឯង រួចធ្វើចរាចរណ៍ដឹកជញ្ជូនតែម្តង ដោយមិនចាំបាច់បង់ពន្ធនាំចូល ហើយក៏គ្មានឯកសារត្រឹមត្រូវណាសម្រាប់បំពេញបែប បទបង់ពន្ធផ្លូវនោះដែរ ៕ ដោយ៖គ.បញ្ញា

Isco ចង់ចាកចេញពី Real Madrid ខណៈក្លិបធំ៣ចង់បាន

October 28, 2015កីឡាមេគង្គ ប៉ុស្តិ៍

បាល់ទាត់៖ខ្សែបម្រើ Isco កំពុងតែមានបំណងចង់ចាកចេញពីក្លិបយក្សអេស្ប៉ាញអធិរាជស Real Madrid ដើម្បីស្វែងរកទ្រនំថ្មីមួយទៀត។ នេះបើយោងតាមសារព័ត៌មាន The Daily Express។
ប្រភពដដែលបានឲ្យដឹងថា មូលហេតុដែល Iscoចង់ចាកចេញពីក្លិបយក្សស Real Madrid ដោយសារតែកីឡាកររូបនេះមិនជាប់ជម្រើសដំបូងរបស់គ្រូបង្វឹកលោក Rafael Benitez ខណៈដែល Real Madrid នាំយកខ្សែបម្រើ Mateo Kovacs ពីក្លិប Inter Milan។
គួរបញ្ជាក់ថា ក្រោយពីលេចឮកីឡាករខ្សែបម្រើ Isco ចង់ចាកចេញនោះមានក្លិបធំ៣នៅក្របខ័ណ្ឌ Premier League របស់អង់គ្លេសចង់បានដូចជា Arsenal, Chelsea និង Liverpool ជាដើម៕

ការវាយប្រហារតាមអាកាសរបស់ក្រុមសម្ព័ន្ធមិត្តអារ៉ាប៊ីសាអីឌីតធ្លាក់ចំមន្ទីរពេទ្យនៅយេមែន

October 28, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

យេមែន៖ក្រុមគ្រូពេទ្យគ្មានព្រំដែនបានអះអាងថាមន្ទីរពេទ្យ របស់ខ្លួនមួយមានទីតាំងស្ថិតនៅភាគខាងជើងប្រទេសយេមែនបានរង ការបំផ្លាញពីការបាញ់ប្រហារជាច្រើនលើកពីលើដែនអាកាស។
ប្រភពបន្តថា ការវាយប្រហារលើកដំបូងបានកើតឡើងនៅវេលាម៉ោង២២ និង៣០នាទី ម៉ោងនៅក្នុងតំបន់ ថ្ងៃទី២៦ ខែតុលា ឆ្នាំ២០១៥ ដោយបំផ្លាញទៅលើបរិវេណអគារមន្ទីរពេទ្យស្ថិតនៅក្នុងខេត្ត Saada។
ប្រភពបន្តថា នៅវេលាប្រមាណ១០នាទីក្រោយមក ការវាយប្រហារលើកទី២បានកើតឡើងទៅលើទីតាំងដដែលនេះ ប៉ុន្តែនៅពេលនោះ បុគ្គលិកសុខាភិបាល រួមទាំងអ្នកជំងឺទាំងអស់ត្រូវជម្លៀសខ្លួនបានមុនគេចផុតពីគ្រោះថ្នាក់ដល់អាយុជីវិត។
ទោះបីយ៉ាងណាកម្លាំងសម្ពន្ធមិត្តដឹកនាំដោយអារ៉ាប៊ីសាអ៊ូឌីតដែលធ្វើប្រតិបត្តិ ការវាយប្រហារប្រឆាំងទៅលើក្រុមឧទ្ទាម Houthi នៅក្នុងទឹកដីយេមែននោះបានច្រានចោលថា សកម្មភាពវាយប្រហារពីដែនអាកាសរបស់ពួកគេគោលដៅទៅលើមន្ទីរពេទ្យ។
អ្នកនាំពាក្យកងកម្លាំងសម្ពន្ធមិត្ត ដឹកនាំដោយអារ៉ាប៊ីសាអ៊ូឌីត លោក Ahmed al-Asiri បានអះអាងថា លោកមិនអាចបញ្ជាក់ប្រាប់បានទេ នៅពេលដែលមិនទាន់ការស៊ើបអង្កេតណាមួយត្រូវបានធ្វើឡើងនោះ ។ កាលពីពេលកន្លងមក លោក Ahmed al-Asiri បានថ្លែងថា កងកម្លាំងសម្ពន្ធមិត្តដឹកនាំដោយអារ៉ាប៊ីសាអ៊ូឌីតនឹងបើកយុទ្ធនា ការបំផ្លាញរាល់យន្តហោះចម្បាំងនៅក្នុងប្រទេសយេមែន។ ជម្លោះនៅក្នុងប្រទេសយេមែនរហូតមកដល់ពេលនេះបានបណ្តាលឲ្យមនុស្សជាង៥.៦០០នាក់ស្លាប់ក្នុងនោះ២.៦១៥នាក់គឺជាជនស៊ីវិល។
ទោះជាយ៉ាងណាក្រុមគ្រូពេទ្យគ្មានព្រំដែនបានទាមទារឲ្យមានការស៊ើបអង្កេតដោយឯករាជ្យ ទៅលើការទម្លាក់គ្រាប់បែកលើមន្ទីរពេទ្យទាំងនោះ ដោយក្រុមនេះអះអាងថា វាជាទង្វើឧក្រិដ្ឋកម្មសង្គ្រាម ។ អាមេរិកបានអះអាងថា មានការវាយប្រហារខុសគោលដៅដោយទម្លាក់គ្រាប់បែកទៅលើមន្ទីរពេទ្យ ហើយលោកប្រធានាធិបតីអាមេរិក បារ៉ាក់ អូបាម៉ា ក៏បានសុំអភ័យទោសផងដែរ។
គួរបញ្ជាក់ថា យុទ្ធនាការរបស់កងកម្លាំងសម្ពន្ធមិត្តវាយប្រហារតាមដែនអាកាសក្នុងប្រទេសយេមែនបានចាប់ផ្តើមឡើងតាំងពីចុងខែមីនាឆ្នាំ២០១៥រហូតមកដល់ពេលបច្ចុប្បន្ន៕

អ្នកស្លាប់ក្នុងគ្រោះរញ្ជួយដីនៅប៉ាគីស្ថាន និងអាហ្វហ្គានីស្ថានឡើងដល់៣៥០នាក់

October 28, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉ាគីស្ថាន៖គ្រោះរញ្ជួយដីកម្រិត ៧,៥រ៉ិចទ័រ បានធ្វើការវាយប្រហារតំបន់ភាគខាងជើង ឈៀងខាងលិចប៉ាគីស្ថាន និងប្រទេសអាហ្វហ្គានីស្ថានជាប្រទេសជិតខាងបានសម្លាប់មនុស្សកើនដល់៣៥០នាក់ហើយ។ នេះយោងតាមព័ត៌មាន Xinhua ចេញផ្សាយនៅយប់ថ្ងៃទី២៧ ខែតុលា ឆ្នាំ២០១៥។
មន្ត្រីក្នុងតំបន់បានរាយការណ៍ថា ចំនួនអ្នកស្លាប់នៅមានជិត២៧០នាក់ ជាមួយនឹងជាង ២០០០នាក់រងរបួស ខណៈអាជ្ញាធរគ្រប់គ្រងគ្រោះមហន្តរាយជាតិ បានបញ្ជាក់ថា មានមនុស្ស២៣០នាក់ស្លាប់ និង១៦២៩នាក់រងរបួស គ្រាដែលរដ្ឋាភិបាល,កងកម្លាំង និងអង្គការមនុស្សធម៌ប៉ាគីស្ថាន បាននឹងកំពុងបន្តនូវកិច្ចខិតខំប្រឹងប្រែង ក្នុងការជួយសង្គ្រោះផងដែរ។
តាមប្រភពដដែលបានបញ្ជាក់ថា ភាគច្រើននៃក្រុមជួយសង្គ្រោះ ត្រូវបានបញ្ជូនទៅកាន់ភាគខាងជើងឈៀងខាងលិច ខេត្ត Khyber Pakhtunkhwa ជាតំបន់ដែលរងការវាយប្រហារខ្លាំងជាងគេ នៅក្នុងតំបន់ភ្នំ Hindu Kush ស្ថិតនៅតាមបណ្តោយព្រំដែនជាមួយ ប៉ាគីស្ថាន និងអាហ្វហ្គានីស្ថាន ដោយនៅតំបន់នេះមានមនុស្សចំនួន១៨៥នាក់បានស្លាប់ និងផ្ទះ ២,១០២ខ្នងត្រូវបានបំផ្លាញ៕

បញ្ហាផ្លូវភេទដែលឧស្សាហ៍កើតឡើងចំពោះបុរស និងស្ត្រី

October 27, 2015សុខភាពមេគង្គ ប៉ុស្តិ៍

បញ្ហាសុខភាពផ្លូវភេទមានសណ្ឋាន និងលក្ខណៈខុសប្លែកៗពីគ្នា ដែលត្រូវបានគេចាត់ទុកថាជា បញ្ហាផ្លូវកាយ និងបញ្ហាសតិអារម្មណ៍ ពីព្រោះវាអាចធ្វើអោយដៃគូស្នេហាទាំងពីរនាក់អាចមានបញ្ហាផ្សេងៗ ក៏ដូចជាមិនសូវពេញចិត្តនឹងទំនាក់ទំនងផ្លូវភេទរបស់ពួកគេ។
បញ្ហាដែលឧស្សាហ៍កើតឡើងទាំងអស់នោះមានដូចជា៖បញ្ហាប្រូស្តាត,ការកាត់បន្ថយការហូរឈាមទៅចិញ្ចឹមលិង្គ ដោយសារតែជំងឺទឹកនោម ផ្អែម, ជំងឺបេះដូង,ក្តីបារម្ភអំពីសុខភាពផ្សេងៗទៀត ឬក៏ការថយចុះនៃអ័រម៉ូន។
ចំពោះស្ត្រីវិញនោះគឺ បញ្ហាបាត់បង់ ឬ កង្វះចំណង់នៃការរួមភេទ ដែល បណ្តាលមកពីការថយចុះនៃអ័រម៉ូន, ក្រពេញទីរ៉ូតអ៊ីតមានដំណើរការមិនប្រក្រតី, រួមទាំងការឈឺចាប់នៅពេលរួមភេទ (បណ្តាលមកពីបញ្ហាប្រដាប់ភេទ ឬ កង្វះជាតិរំអិល)។
ដៃគូស្នេហាមួយចំនួនរកឃើញដោយខ្លួនឯងថា ការទទួលទានថ្នាំមួយចំនួនក៏អាច បណ្តាលអោយមានបញ្ហាសុខភាពផ្លូវភេទនេះផងដែរ៕

Problem in bed

ប្រធានក្លិប Barcelona បដិសេធព័ត៌មានចាកចេញរបស់ Messi

October 27, 2015កីឡាមេគង្គ ប៉ុស្តិ៍

បាល់ទាត់៖បន្ទាប់ពីមានសារព័ត៌មានជាច្រើនបានចុះផ្សាយថា Lionel Messi នឹងចាកចេញពីអ្នកមានបុណ្យ Barcelona នោះ លោក Josep Maria Bartomeu ប្រធានក្លិប Barcelona បានឆ្លើយតបទាំងកំហឹងថា វាជារឿងឡប់សតិគួរឲ្យខ្មាសអៀនមួយ។
លោក Josep Maria Bartomeu ប្រាប់ដល់ 8TV ថា បច្ចុប្បន្ន Messi កំពុងសម្រាកព្យាបាលរបួសជង្គង់ដើម្បីឲ្យជាទាន់ប្រកួត Madrid-Barcelona។ បុរសវ័យ៥២ឆ្នាំរូបនេះបានបញ្ជាក់ថា Messi បានរងរបួសជង្គង់ខាងឆ្វេងធ្ងន់ធ្ងរ កាល Barca ឈ្នះ Las Palmas ទាំងប្រផុតប្រផើយ ២-១ កាលចុងខែកញ្ញា ។លោកបន្តថា ទោះជាយ៉ាងណាកីឡាករដ៏សំខាន់រូបនេះ នឹងមិនចាកចេញទៅណាទេ។
គួរបញ្ជាក់ថា កាលពីប៉ុន្មានថ្ងៃមុននេះមានសារព័ត៌មានជាច្រើនលើកឡើងថា តារាឆ្នើមម្ចាស់ពានរង្វាន់ Ballon d’Or ៤សម័យកាល Lionel Messi ចង់ចាកចេញពីកីឡដ្ឋាន Camp Nou ដែលអាចផ្ទេរទៅ Premier League លេងឲ្យក្រុម Chelsea, Manchester City និង Manchester United ជាដើម៕

បក្សសង្គ្រោះជាតិបញ្ជូនតំណាងរាស្ត្រ២រូបដែលរងរបួសទៅព្យាបាលនៅថៃ

October 27, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖តំណាងរាស្ត្រគណបក្សសង្គ្រោះជាតិពីររូបដែលរងការវាយប្រហារឲ្យរងរបួសកាលពីថ្ងៃចន្ទ ទី២៦តុលា ត្រូវបានគណបក្សរៀបចំបញ្ជូនទៅព្យាបាលនៅប្រទេសថៃ ដោយគេអះអាងថាបានរងរបួសធ្ងន់ធ្ងរ។

លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានសរសេរក្នុងហ្វេសប៊ុករបស់ខ្លួននៅព្រឹកថ្ងៃអង្គារ ទី២៧ នេះថា គណបក្សសង្គ្រោះជាតិសម្រេចបញ្ជូនតំណាងរាស្ត្រមណ្ឌលស្វាយរៀង លោក គង់ សភា និងតំណាងរាស្ត្រមណ្ឌលកំពង់ចាម លោក ញ៉យ ចំរើន ទៅព្យាបាលនៅក្រៅប្រទេស ដោយមានរបួសធ្ងន់ និងមានបាក់ឆ្អឹងជាច្រើនកន្លែង។ លោកបន្តថា៖ “នៅក្នុងវិមានរដ្ឋសភា លោក ញ៉យ ចំរើន រង់ចាំរថយន្តពេទ្យ សង្គ្រោះបន្ទាន់ ជិត២ម៉ោង តែនៅតែគ្មានរថយន្តមកដល់។ យើងបានសម្រេចនាំគាត់មកស្នាក់ការគណបក្ស ដើម្បីទទួលបានការសង្គ្រោះបន្ទាន់ រួចបានបញ្ជូនលោកទាំងពីរទៅថត”។ លោកបន្ថែមថា៖ “សេចក្ដីសម្រចចុងក្រោយ ត្រូវបញ្ជូនលោកទាំងពីរទៅព្យាបាលនៅប្រទេសថៃជាបន្ទាន់ នៅព្រឹកថ្ងៃទី២៧ តុលា ២០១៥ នេះ”។

គួររំឭកថា កាលពីព្រឹកថ្ងៃចន្ទ ទី២៦ តុលា ប្រជាពលរដ្ឋរាប់ពាន់នាក់ដែលប្រឆាំងនឹងលោក កឹម សុខា បានធ្វើបាតុកម្ម និងដាក់ញត្តិជូនសម្តេច ហេង សំរិន ប្រធានរដ្ឋសភា ដើម្បីឲ្យដកតំណែងអនុប្រធានរដ្ឋសភាពីលោក កឹម សុខា ដោយពួកគាត់ចាត់ទុកថាលោក កឹម សុខា ជា”មនុស្សបោកប្រាស់ ក្រឡេចក្រឡុក និងជាអ្នកដែលនាំទុក្ខដល់ប្រជាពលរដ្ឋ”។លុះដល់វេលាថ្ងៃត្រង់ក្នុងថ្ងៃដដែល មានមនុស្សមួយក្រុមបានប្រើហិង្សាលើតំណាង២រូបគឺលោក ញ៉យ ចំរើន និងលោកគង់ សុភា ខណះអ្នកតំណាងរាស្ត្រទាំង២នាក់នោះចេញពីប្រជុំសភាតាមទ្វារក្រោយ។

ក្រោយពីមានហិង្សាកើតឡើងលើតំណាងរាស្រ្ ទាំងគណបក្សប្រជាជនកម្ពុជា ទាំងគណបក្សសង្គ្រោះជាតិបានចេញសេចក្តីថ្លែងការណ៍មួយ ដោយថ្កោលទោសនិងចាត់ទុកអំពើហិង្សាដែលកើតមានមកលើតំណាងរាស្ត្រ របស់ខ្លួននេះថា ជាអំពើព្រៃឃោរឃៅ និងរំលោភអភ័យឯកសិទ្ធិអ្នកតំណាងរាស្ត្រ។

លោក គង់ សភា តំណាងរាស្ត្រគណបក្សសង្គ្រោះជាតិ ដែលរងនូវអំពើហិង្សាបណ្តាលឲ្យរងរបួសនោះ ប្រាប់អ្នកសារព័ត៌មានកាលពីថ្ងៃចន្ទថា ពេលលោកចេញពីរដ្ឋសភាមានបុរសម្នាក់រត់មកឈរពីខាងមុខរថយន្តរបស់ លោក ហើយបុរសនោះបានទាញទ្វាររថយន្តរបស់លោកនិងបានទាញរូបលោកចេញពីរថយន្ត រួចវាយដំរូបលោកជាមួយបក្សពួកផ្សេងទៀត។ លោកក៏បានសម្តែងការខកចិត្តចំពោះសមត្ថកិច្ចចរាចរណ៍ដែលមានវត្តមាននៅក្បែរនោះ និងមិនបានជួយអន្តរាគមន៍ទប់ស្កាត់អំពើហិង្សានេះ។

នៅប្រទេសបារាំង កាលពីល្ងាចថ្ងៃទី២៥ខែតុលា ក្នុពិធីជួបសំណេះសំណាលជាមួយនិស្សិតខ្មែរនៅទីនោះ លោកនាយករដ្ឋមន្ត្រី ហ៊ុន សែន បានថ្លែងថា បាតុកម្មប្រឆាំងលោកនៅបារាំងគឺជាសិទ្ធិប្រជាពលរដ្ឋ ហើយបាតុកម្មប្រឆាំងលោក កឹម សុខា នៅទីក្រុងភ្នំពេញក៏ជាសិទ្ធិរបស់ប្រជាពលរដ្ឋដូចគ្នាដែរ។ លោកនាយករដ្ឋមន្ត្រីថ្លែងថា៖“បើលេងកុំខឹង បើខឹងកុំលេង បើគេលេងនៅភ្នំពេញវិញ កុំខឹងនឹងគេ ហើយលេងហ្នឹងប្រហែលជាអស់តំណែងអនុប្រធានសភាទៀត”។

ចំណែក លោក កឹម សុខា បានអះអាងថា សមត្ថកិច្ចមិនបានអើពើធានាសុវត្ថិភាពរូបលោកនិងក្រុមគ្រួសារនៅគេហឋាន ករណីបាតុកម្មទាមទារឲ្យលោកចុះចេញពីតំណែង ដោយលោកថា បើទោះជាមានការសុំអន្តរាគមន៍ក៏ដោយ៕ដោយ៖ខេមរា

(រូបថតពីហ្វេសប៊ុករបស់លោក យ៉ែម បុញ្ញឫទ្ធិ)

អ្នកស្លាប់ក្នុងគ្រោះរញ្ជួយដីនៅព្រំដែន ប៉ាគីស្ថានឡើងជិត៣០០នាក់

October 27, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉ាគីស្ថាន៖តាមប្រភពព័ត៌មានពី BBC បានផ្សាយថា ចំនួនអ្នកស្លាប់ក្នុងគ្រោះរញ្ជួយដីនៅជិតព្រំប្រទល់ប្រទេសប៉ាគីស្ថាន និងអាហ្វហ្គានីស្ថានកាលពីម្សិលមិញបានកើនឡើងដល់២៨០នាក់ហើយ ខណៈដែលបណ្តាញទំនាក់ទំនងត្រូវបានកាត់ផ្តាច់ផងដែរ។
ប្រភពបញ្ជាក់ថា ក្នុងចំណោមមនុស្សស្លាប់នោះភាគច្រើនគឺជនជាតិប៉ាគីស្ថាន ដែលរស់នៅក្បែរតំបន់កើតហេតុ ជិតព្រំប្រទល់អាហ្វហ្គានីស្ថាន។ រញ្ជួយដីខាងលើនេះបានកើតឡើងក្នុងចំណុចកណ្ដាលនៃតំបន់ជួរភ្នំ Hindu Kush ប្រទេសអាហ្វហ្គានីស្ថាន។
ហេតុការណ៍ខាងលើធ្វើឲ្យក្មេងស្រីសិស្សសាលា អាហ្វហ្គានីស្ថាន១២នាក់បានស្លាប់ និង ២៥នាក់រងរបួស បន្ទាប់ពីពួកគេព្យាយាមចេញពីសាលា ប៉ុន្តែខាងមន្ត្រីរដ្ឋាភិបាលថា យ៉ាងហោចណាស់មានមនុស្ស៦៣នាក់បានស្លាប់ ដោយសារគ្រោះធម្មជាតិនេះ។
ក្នុងប្រទេសប៉ាគីស្ថានវិញ គឺមានមនុស្សយ៉ាងតិច២១៤នាក់បានស្លាប់ ក្រៅពីនោះគឺមានមនុស្សជាង១៨០០នាក់បានរងរបួសក្នុងខេត្ត Khyber Pakhtunkhwa (ភាគខាងជើងប្រទេសប៉ាគីស្ថាន) ។ នេះបើតាមអាជ្ញាធរក្នុងតំបន់។
យ៉ាងណានេះក្តីចំនួនអ្នកស្លាប់អាចនឹងកើនឡើងជាបន្តបន្ទាប់ទៀត ខណៈដែលអាជ្ញាធរក្នុងប្រទេសទាំងពីរកំពុងជួយសង្គ្រោះមនុស្សពីគំនរនៃអគារបាក់បែក៕

Afghan men remove debris after a powerful earthquake hit Kabul on October 26, 2015. A powerful 7.5 magnitude earthquake killed at least 74 people as it rocked parts of south Asia, including 12 Afghan girls crushed in a stampede as they fled their collapsing school. Hundreds more were injured as as the quake shook a swathe of the subcontinent, sending thousands of frightened people rushing into the streets in Afghanistan, Pakistan and India. AFP PHOTO / AREF KARIMI

រញ្ជួយដីនៅប៉ាគីស្ថាន និងអាហ្វហ្គានីស្ថាន សម្លាប់មនុស្ស១៨០នាក់

October 27, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាហ្វហ្គានីស្ថាន៖យោងតាមព័ត៌មានCNN ចេញផ្សាយថា មនុស្សជាង១៨០នាក់បានស្លាប់នៅក្នុងគ្រោះរញ្ជួយដីកម្រិតធ្ងន់ ដែលបានវាយប្រហារភាគខាងជើង ឆៀងខាងកើត ប្រទេសប៉ាគីស្ថាន និងអាហ្វហ្គានីស្ថាន។
សេចក្តីរាយការណ៍មួយ ឲ្យដឹងដែរថា មានក្មេងស្រីសិស្សសាលា អាហ្វហ្គានីស្ថាន ចំនួន១២នាក់បានស្លាប់ ក្នុងហេតុការណ៍រត់ជាន់គ្នា ខណៈពួកគេព្យាយាមរត់ចេញពីអគារសាលា នៅពេលគ្រោះរញ្ជួយដីកើតឡើង។ ក្នុងនោះផងដែរព័ត៌មាន CNN បានចេញផ្សាយឲ្យដឹងថា មានមនុស្សចំនួន៥៨៩នាក់រងរបួសនៅក្នុងគ្រោះរញ្ជួយដីកម្រិត ៧,៥រ៉ិចទ័រនេះ។
ទោះយ៉ាងណាក៏ដោយបើតាមការបញ្ជាក់ពីអាជ្ញាធរបានឲ្យដឹងថា ចំនួនអ្នកស្លាប់អាចនឹងមានការកើនឡើងបន្តទៀត៕

កងទ័ពការពារព្រំដែនកម្ពុជា-ថៃ ធ្វើញ្ញត្តិទាមទារដកតំណែងអនុប្រធានសភាពីលោក កឹម សុខា

October 26, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ខណៈនៅភ្នំពេញមានបាតុកម្មប្រឆាំងនឹងលោក កឹម សុខា នៅឯព្រំដែនភាគខាងលិចប្រទេស ក៏មាននាយទាហាន នាយទាហានរង និងពលទាហានទាំងអស់ដែលកំពុងបំពេញភារកិច្ចជាឆ្មាំការពារព្រំដែនកម្ពុជាជាប់ប្រទេសថៃ បានធ្វើញ្ញត្តិស្នើសុំសម្តេច ហេង សំរិន ប្រធាន រដ្ឋសភា និងអ្នកតំណាងរាស្ត្រទាំងអស់ឲ្យដកលោក កឹម សុខា ចេញពីអនុប្រធានទី១ រដ្ឋសភា។

ញ្ញត្តិ ដែលបានដាក់ទៅសម្តេចប្រធានរដ្ឋសភាបានសរសេរថា “យើងខ្ញុំទាំងអស់គ្នា បានតាមដានយ៉ាងយកចិត្តទុកដាក់បំផុតអំពីសភាពការណ៍នយោបាយរបស់ ប្រទេសជាតិ និងបានមើលឃើញពីសកម្មភាពដ៏ពិសពុលរបស់លោក កឹម សុខា អនុប្រធានទី១ រដ្ឋសភា និងជាអនុប្រធានគណបក្សសង្គ្រោះជាតិ ដែលកំពុងធ្វើការឃោសនាបើកប្រាស់ប្រជាពលរដ្ឋ ញុះញង់អុចអាលលាបពណ៌ បង្កកំហឹងរើសអើងពូជសាសន៍ និងឈានទៅបង្កសង្គ្រាមផ្ទៃក្នុង ដែលមិនសមជាទង្វើថ្នាក់ដឹកនាំ នៃស្ថាប័នកំពូលរបស់ជាតិ។ ដើម្បីសុខសន្តិភាពរបស់ប្រទេសជាតិ និងការរស់នៅប្រកបដោយភាពសុខដុមរមនារបស់ប្រជាពលរដ្ឋ ជាថ្មីម្តងទៀត យើងខ្ញុំទាំងអស់គ្នា សូមធ្វើការអំពាវនាវដល់សម្តេចប្រធានរដ្ឋសភា និងអ្នកតំណាងរាស្ត្រទាំងអស់ មេត្តាដកលោកកឹម សុខា ចេញពីអនុប្រធានទី១ រដ្ឋសភា ឲ្យបានឆាប់តាមដែលអាចធ្វើបាន។ យើងខ្ញុំសង្ឃឹមថា សម្តេចប្រធាន និងអ្នកតំណាងរាស្ត្រទាំងអស់ នឹងចាត់វិធានការតាមការស្នើសុំរបស់យើងខ្ញុំ និងប្រជាពលរដ្ឋទាំងអស់ជាក់ជាមិនខាន”។

កាលពីព្រឹកថ្ងៃទី២៦តុលានេះ ក្រុមបាតុកររាប់រយនាក់បានប្រមូលផ្តុំគ្នានៅមុខវិមានរដ្ឋសភាជាតិចាប់តាំងពីព្រឹកព្រលឹមរហូតដល់វេលាថ្ងៃត្រង់ ដើម្បីទាមទារឲ្យដកលោក កឹម សុខា អនុប្រធានគណបក្សសង្គ្រោះជាតិ ចេញពីតំណែងអនុប្រធានរដ្ឋសភាជាតិ។

ការទាមទារនេះត្រូវក្រុមបាតុករអះអាងថា រយៈពេលកន្លងមកនេះ លោក កឹម សុខា អនុប្រធានរដ្ឋសភា ដែលជាអនុប្រធានគណបក្សសង្គ្រោះជាតិ បានធ្វើសកម្មភាពឃោសនា បោកប្រាស់ ញុះញង់ បំបែកបំពាក់ បង្កអស្ថិរភាពជាតិ ព្រមទាំងធ្វើការអុកឡុកបង្កឲ្យមានកំហឹងពូជសាសន៍ និងអាចឈានបង្កឲ្យមានសង្គ្រាម កើតមានក្នុងផ្ទៃប្រទេសទៀតផង ដែលសកម្មភាពទាំងនេះ ពិតជាមិនស័ក្តិសមជាថ្នាក់ដឹកនាំនៃស្ថាប័នកំពូលរបស់ជាតិនោះទេ។

តាមសេចក្តីរាយការណ៍ក្រោយពេលកើតហេតុភ្លាមៗបានឲ្យដឹងថា រហូតមកដល់វេលាម៉ោងជាង ១២ ថ្ងៃត្រង់ ថ្ងៃទី២៦តុលានេះ នៅពេលអ្នកតំណាងរាស្ត្រចេញពីកិច្ចប្រជុំរដ្ឋសភា ក្រុមបាតុករបានវាយតំណាងរាស្ត្រពីររូបរបស់គណបក្សសង្គ្រោះជាតិ គឺលោក ញ៉យ ចំរើន និងលោក គង់ សុភា បណ្តាលឲ្យរបួសយ៉ាងដំណំ។ លោក ញ៉យ ចំរើន បានសន្លប់ បែកភ្នែកម្ខាង បាក់កដៃ និងបាក់ខ្ទង់ច្រមុះ។ក្រុមបសតុករ ក៏បានបន្តដំណើរទៅស្រែកដិះដៀលដល់មុខផ្ទះលោក កឹម សុខា និងបានប្រើពាក្យអសុរោះឲ្យលោក កឹម សុខា ចេញមកខាងក្រៅផ្ទះ។

អ្នកនាំពាក្យសាលារាជធានីភ្នំពេញលោក ឡុង ឌីម៉ង់ បានចាត់ទុកហិង្សាដែលបណ្តាលឲ្យតំណាងរាស្ត្រគណបក្សសង្គ្រោះជាតិពីររូបរងរបួសជា”រឿងនឹកស្មានមិនដល់” ហើយថាបាតុកម្មប្រឆាំងលោក កឹម សុខា មិនបានសុំការអនុញ្ញាតពីសាលារាជធានីភ្នំពេញនោះទេ។

លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានច្រានចោលនូវការលើកឡើងរបស់លោក សម រង្ស៊ី ដែលថា បាតុករទាំងនោះជាក្រុមបាតុករដែលរៀបចំដោយគណបក្សប្រជាជនកម្ពុជា។

ក្រោយមានព្រឹត្តិការណ៍គួរឲ្យភ្ញាក់ផ្អើលនេះ ទាំងតំណាងរាស្ត្រគណបក្សប្រជាជនកម្ពុជា គណបក្សសង្គ្រោះជាតិ និងមន្ត្រីរដ្ឋាភិបាល ព្រមទាំងស្ថានទូតសហរដ្ឋអាមេរិកបានចេញសេចក្តីថ្លែងការណ៍ថ្កោលទោសដាច់ដោយឡែកពីគ្នា និងទាមទារឲ្យសមត្ថកិច្ចវែកមុខរកជនដៃដល់យកមកផ្តន្ទាទោសឲ្យខាងតែបាន។

ទោះជាយ៉ានេះក្តី ប្រធានរដ្ឋសភា សម្តេច ហេង សំរិន នៅមិនទាន់មានការឆ្លើយតបបែបណានៅឡើយទេ ចំពោះកាស្នើសុំដកតំណែងលោក កឹម សុខា ពីសំណាក់បាតុករ និងពីកងកម្លាំងប្រដាប់អាវុធការពារព្រំដែនកម្ពុជា៕ដោយ៖ខេមរា