ព្រះសីហនុ៖ ស្ត្រីឈ្មោះ ឯម រ៉ានី ដែលរងបណ្តឹងប្រើអំពើហិង្សា និងសហាយស្មន់ជាមួយលោកមេធាវី ជា ហៃ ដែលសមត្ថកិច្ចឃាត់ខ្លូននោះ ត្រូវបានតុលាការខេត្តសម្រេចដោះលែងឲ្យត្រឡប់ទៅលំនៅដ្ឋានវិញហើយ។
លោក រស់ សារាំ ព្រះរាអាជ្ញារង អមសាលាដំបូង ខេត្តព្រះសីហនុ បានឲ្យដឹងថា កាលពីរសៀលថ្ងៃទី២៥ ខែតុលា លោក សុខ សឿន ចៅក្រមនៃសាលាដំបូងខេត្ត បានដោះលែង ស្ត្រីម្នាក់ដែលត្រូវប្តីចោទប្រកាន់ថា លួចមានសហាយស្មន់ ជាមួយលោកមេធាវី ជា ហៃ ជាកូនប្រសាររបស់អនុប្រធានតុលាការកំពូល ដែលបាននាំគ្នាប្រើហិង្សា ដោយចេតនា ទៅលើប្តី កាលពីថ្ងៃ២០តុលា កន្លងទៅនេះ ស្ថិតនៅចំណុចផ្ទះ បើកហាងបញ្ចាំមួយកន្លែង នៅក្រុមទី២ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។
មន្ត្រីនគរបាលខេត្តព្រះសីហនុ បានឲ្យដឹងថា ស្ត្រីឈ្មោះ ឯម រ៉ានី ភេទស្រី អាយុ៤៥ឆ្នាំ ជាអ្នកលក់មាស ក្នុងផ្សារលើ ក្រុងព្រះសីហនុ ត្រូវសមត្ថកិច្ចឃាត់ខ្លួន នៅរសៀលថ្ងៃទី២៤ ខែតុលា ឆ្នាំ២០១៥ និងបានបញ្ជូនមកកាន់សាលាដំបូងខេត្តព្រះសីហនុ ដើម្បីធ្វើការចោទប្រកាន់តាមបណ្តឹងរបស់បុរសជាប្តីឈ្មោះ គុណ ប៊ុនថា។ តែក្រោយពេលសាកសួរអស់ជាច្រើនម៉ោងរួចមក ក៏មានការដោះលែងទៅវិញ។
មន្ត្រីសមត្ថកិច្ចបានប្រាប់ថា ការចាប់ឃាត់ខ្លួនជាភារកិច្ចសមត្ថកិច្ច ប៉ុន្តែការដោះលែង ឬឃុំខ្លួនគឺជារឿងរបស់លោកតុលាការ ព្រោះអីសមត្ថកិច្ចបានត្រឹមតែកសាងសំណុំរឿងជាក់ស្តែង និងបញ្ជូនទៅឲ្យតុលាការប៉ុណ្ណោះ៕ដោយ៖រដ្ឋា
