ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី១០ ខែមិថុនា ឆ្នាំ២០២០ បានចេញអនុក្រឹត្យ ស្តីពីការបញ្ចប់មុខតំណែង ទីប្រឹក្សា ជំនួយការ លេខាធិការ និងមន្ត្រីមួយចំនួនដែលមានឋានៈស្មើគ្នា។
យោងតាមអនុក្រឹត្យ សម្រេច បញ្ចប់មុខតំណែងទីប្រឹក្សា ជំនួយការ លេខាធិការ និងមន្ត្រីដែលមានឋានៈស្មើ អមថ្នាក់ដឹកនាំ និងអមក្រសួង នៅក្រសួងយុត្តិធម៌ ក្រសួងប្រៃសណីយ៍និងទូរគមនាគមន៍ ក្រសួងធម្មការនិងសាសនា និងក្រសួងមុខងារសាធារណៈ ដែលបានតែងតាំងដោយអនុក្រឹត្យ មុនថ្ងៃទី៣០ ខែមីនា ឆ្នាំ២០២០។
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងយុត្តិធម៌ រដ្ឋមន្ត្រីក្រសួងប្រៃសណីយ៍និងទូរគមនាគមន៍ រដ្ឋមន្ត្រីក្រសួងធម្មការនិងសាសនា រដ្ឋមន្ត្រីក្រសួងមុខងារសាធារណៈ រដ្ឋមន្ត្រីគ្រប់ក្រសួង និងប្រធានគ្រប់ស្ថាប័នដែលពាក់ព័ន្ធ ត្រូវទទួលខុសត្រូវអនុវត្តអនុក្រឹត្យនេះតាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ៕

ខេត្តព្រះវិហារ ៖ នៅព្រឹកថ្ងៃទី ១៦ ខែ មិថុនា ឆ្នាំ ២០២០ នេះ ឯកឧត្តម យុង គឹមហ៊ាន នាយកប្រតិបត្តិសាខា តំណាងឯកឧត្តម ប្រាក់ សុវណ្ណ ប្រធានគណៈកម្មាធិការសាខាកាកបាទ ក្រហមកម្ពុជាខេត្តព្រះវិហារ និង លោកប៉ុក ងួនអភិបាលក្រុងព្រះវិហារនិងក្រុមការងារបាននាំយកអំណោយមនុស្សធម៌ទៅផ្តល់ជូនជនពិការ សរុបចំនួន៣៥ គ្រួសារ នៅមណ្ឌលតម្បាញ់សូត្រជនពិការកម្ពុជា ឋិតនៅភូមិគោកបេង សង្កាត់កំពង់ប្រណាក ក្រុងព្រះវិហារ ខេត្តព្រះវិហារ។ ក្នុងនោះផងដែល ឯកឧត្តម យុង គឹម ហ៊ាន នាយយកប្រតិបត្តិសាខាតំណាងអោយ ឯកឩត្តម ប្រាក់ សុវណ្ណ អភិបាលនៃគណៈអភិបាលខេត្តព្រះវិហារ។

នៅក្នុងឱកាសនោះដែរលោកនាយកសាខាកាកបាទក្រហមកម្ពុជា ខេត្តព្រះវិហារ បានពាំ នាំប្រសាសន៍ផ្តាំផ្ញើសាកសួរទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែគិតគូរពីសុខ ទុក្ខបងប្អូនប្រជាពលរដ្ឋជានិច្ច ពិសេសបងប្អូនជនពិការ ” ពោលគឺទីណាមានការលំបាក ទីនោះមានកាកបាទក្រហមកម្ពុជា” ។លោក យុង គឹម ហ៊ាន ក៏បានផ្តាំផ្ញើសុំឱ្យបងប្អូនពុកម៉ែ ចូលរួមថែរទាំសុខភាព ត្រូវមានអនាម័យជាប់ជាប្រចាំ ក្នុងការ ចូលរួមទប់ស្កាត់ការរីករាលដាលមេរោគកូវីដ១៩។

ក្នុងនោះដែល សម្ភារផ្តល់ជូនក្នុងមួយគ្រួសារៗរួមមាន ៖ អង្ករ ២៥គីឡូក្រាម មី ១កេស ត្រី ខ ១យួរ ទឹកស៊ីអ៉ីវ ១យួរ និងថវិកាចំនួន ២០,០០០រៀល៕ ដោយ ៖ កូវ ប៊ុនហេង

​ភ្នំពេញ ៖ ក្រសួងពាណិជ្ជកម្ម នៅ​ថ្ងៃទី​១៦ ខែមិថុនា ឆ្នាំ​២០២០​នេះ បានចេញ​សេចក្តីជូនដំណឹង​ថ្មី​មួយ ស្តីពី​ការកំណត់ថ្លៃ​ប្រេងឥន្ធនៈ ត្រូវ​លក់រាយ​តាម​ស្ថានីយ​ចាប់ពី​ថ្ងៃនេះ ដល់​ថ្ងៃទី​៣០ ខែមិថុនា ឆ្នាំ​២០២០ ដោយ​សាំង​ធម្មតា​ត្រូវ​លក់​តម្លៃ​២,៨៥០​រៀល ក្នុង​មួយ​លីត្រ និង​ម៉ា​ស៊ូ​ត​លក់ ក្នុងតម្លៃ ២,៦០០​រៀល​ក្នុង​១​លីត្រ​។​

​សូម​អាន​សេចក្តីជូនដំណឹង របស់​ក្រសួងពាណិជ្ជកម្ម​ទាំងស្រុង​ ៖ 

សេអ៊ូល ៖ អគ្គសេនាធិការកងទ័ពប្រជាជនកូរ៉េខាងជើងនៅថ្ងៃអង្គារនេះបានធ្វើការព្រមានថា កងទ័ពកូរ៉េខាងជើងបានត្រៀមខ្លួនរួចជាស្រេច​ដើម្បីធ្វើសកម្មភាពភា្លមៗ បើសិនជាកូរ៉េខាងត្បូងនៅតែបណ្ដែតបណ្ដោយ​ឱ្យជនជាតិកូរ៉េខាងជើង ដែលកំពុងរស់នៅនិរទេសនៅលើទឹកដីរបស់ខ្លួន បន្តធ្វើយុទ្ធនាការបង្ហោះខិត្តប័ណ្ណ​ឃោសនារិះគន់របបដឹកនាំលោក គីម ជុងអ៊ុន។ នេះបើតាមការចេញផ្សាយដោយ​សារព័ត៌មាន CNA នៅព្រឹកថ្ងៃអង្គារ ទី១៦ ខែមិថុនា ឆ្នាំ២០២០។

អគ្គសេនាធិការកងទ័ពប្រជាជនកូរ៉េខាងជើង ធ្វើការព្រមានបែបនេះតាមប្រព័ន្ធផ្សព្វផ្សាយរដ្ឋ និងតែប៉ុន្មានថ្ងៃប៉ុណ្ណោះ បន្ទាប់ពីប្អូនស្រីលោក គីម ជុងអ៊ុន គឺអ្នកនាង គីម យ៉ូចុង បានអះអាងថា អ្នកនាងបានបញ្ជាឱ្យយោធាកូរ៉េខាងជើង ត្រៀមខ្លួនចាត់វិធានការបន្ទាន់​ប្រឆាំងនឹងក្រុមអ្នករិះគន់បងប្រុសរបស់លោកស្រី។

នៅក្នុងសារព្រមានលើកចុងក្រោយបំផុត នៅថ្ងៃអង្គារនេះ អគ្គសេនាធិការកងទ័ពប្រជាជនកូរ៉េខាងជើង បានគូសបញ្ជាក់ដូច្នេះថា «កងទ័ពកូរ៉េខាងជើង កំពុងសិក្សាពីផែនការសកម្មភាព សម្រុកចូលក្នុងតំបន់ព្រំដែនគ្មានយោធាអន្តរកូរ៉េ ហើយប្រែក្លាយវាឱ្យទៅជាបន្ទាយមួយដ៏រឹងមាំ។ កងទ័ពរបស់យើងនឹងធ្វើសកម្មភាពភ្លាមៗ បើសិនជាមានបញ្ជា ឬការសម្រេចចិត្តណាមួយគណបក្សពលករ និងរដ្ឋាភិបាល»។

ជុំវិញការព្រមាននេះដែរ ប្រធានាធិបតីកូរ៉េខាងត្បូងលោក មូន ចេអ៊ីន បានអំពាវនាវឱ្យកូរ៉េខាងជើងងាកមករកដំណោះស្រាយរួមគ្នាមួយតាមរយៈការសន្ទនាគ្នាជាជាងការប្រើប្រាស់ធម៌ក្តៅ។ លោក មូន ចេអ៊ីន បានសង្កត់ធ្ងន់ថា ដល់ពេលហើយដែលកូរ៉េខាងជើង និងកូរ៉េខាងត្បូង ងាកមកស្វែងរកដំណោះស្រាយរួមគ្នាមួយ វាដល់ពេលហើយ ព្រោះយើងមិនអាចអង្គុយរង់ចាំឲ្យស្ថានការណ៍ឲ្យល្អប្រសើរឡើងខ្លួនឯងនោះឡើយ ដោយលោករំពឹងថា កូរ៉េខាងជើងនឹងបើកទ្វារសន្ទនាឲ្យបានកាន់តែធំ សម្រាប់ភាគីទាំងពីរផងដែរ។

សូមជម្រាបថា ភាពតានតឹងរវាងទីក្រុងព្យុងយ៉ាង និងទីក្រុងសេអ៊ូល បានផ្ទុះឡើងខ្លាំងជាថ្មី បន្ទាប់ពីកូរ៉េខាងជើង ព្រមានកាត់ផ្ដាច់ទំនាក់ទំនងទាំងអស់ជាមួយកូរ៉េខាងត្បូង ជាការសងសឹកនឹងទីក្រុងសេអ៊ូល សម្រាប់ការបណ្ដែតបណ្ដោយឱ្យប្រជាជនកូរ៉េខាងជើង ដែលកំពុងរស់នៅនិរទេសនៅលើទឹកដីរបស់ខ្លួន បន្តធ្វើយុទ្ធនាការបង្ហោះខិត្តប័ណ្ណឃោសនារិះគន់របបដឹកនាំលោក គីម ជុងអ៊ុន។ ទន្ទឹមនោះកូរ៉េខាងត្បូងក៏បានប្ដឹងក្រុមសកម្មជន​ដែលនាំគ្នាបង្ហោះខិត្តប័ណ្ណទាំងនោះដែរ ដោយចោទថាពួកគេដុតញ្ឆេះភាពតានតឹងរវាងកូរ៉េទាំងពីរ៕

ខេត្តព្រៃវែង ៖ កម្លាំងនគរបាលនៃអធិការដ្ឋាននគរបាលស្រុកស៊ីធរកណ្តាល បានតាមបញ្ជារបស់ព្រះរាជអាជ្ញាសាលាដំបូងខេត្តព្រៃវែង ដោយឃាត់ខ្លួនបុរសជាឪពុក ដែលរំលោភកូនស្រីរបស់ខ្លួនអាយុ១៥ឆ្នាំ រហូតបានសម្រេច។

មន្ត្រីនរគបាលខេត្តព្រៃវែងបានដឹងនៅព្រឹកថ្ងៃទី១៦ ខែមិថុនា ឆ្នាំ២០២០នេះថា បុរសជាឪពុករំលោភកូនស្រីបង្កើតរបស់ខ្លួននេះ មានឈ្មោះ ស្រី ហ៊ាង អាយុ៤២ឆ្នាំ ត្រូវបានប្រពន្ធ និងកូនស្រីប្តឹងពីបទ ប្រើអំពើហិង្សាក្នុងគ្រួសារ និងរំលោភសេពសន្ថវៈលើកូនស្រីបង្កើតបានសម្រេចចំនួន៤លើកនៅលើផ្ទះរបស់ខ្លួន ហើយគំរាមកូនស្រី បើហ៊ានប្រាប់គេឲ្យដឹងនឹងសម្លាប់ម្ដាយដែលជាប្រពន្ធរបស់ខ្លួនចោល។

សមត្ថកិច្ចបញ្ជាក់ទៀតថា បច្ចុប្បន្នត្រូវបានឃាត់ខ្លួន ដើម្បីបំពេញនីតិវិធីតាមផ្លូវច្បាប់៕

ភ្នំពេញ ៖ គិតត្រឹមម៉ោង​៨ និង៣០​ព្រឹក ថ្ងៃទី​១៦ ខែមិថុនា​ ឆ្នាំ២០២០នេះ​ ពុំមានរកឃើញករណីជំងឺកូវីដ-១៩​ ថ្មីទេ​ ចំនួនសរុបកូវីដ-១៩​ ចំនួន១២៨នាក់​ដដែល ចំនួនសំរាកពេទ្យនៅ៣នាក់​ ចំនួនជាសះស្បើយសរុប​ចំនួន១២៥នាក់​ និងស្លាប់គ្មាន​។ នេះបើយោងតាមការផ្សាយនៅលើផេកហ្វេសប៊ុកនាយកដ្ឋានប្រយុទ្ធនឹងជំងឺឆ្លង CDC។

CDC បន្តថា ជំងឺកូវីដ-១៩​ នៅតែបន្តគម្រាមកំហែងយើងជាប់ជានិច្ច​ សូមបងប្អូនបន្តប្រយ័ត្នជាប់ជានិច្ច ដោយធ្វើអនាម័យ​ នៅឃ្លាតឆ្ងាយ ពីគ្នា​ មិនចេញក្រៅផ្ទះបើមិនចាំបាច់​ ព្រោះប្រទេសជិតខាងយើង និងពិភពលោកកំពុងបន្តរាតត្បាតជំងឺកូវីដ១៩​ ដ៏ខ្លាំងក្លានៅឡើយ​។ យើងត្រូវបន្តអនុវត្តគម្លាតសង្គមបន្តទៀត​ ដូចជាពន្យារការរៀបអាពាហ៍ពិពាហ៍​ ពិធីជប់លៀង​ ការចាក់ធុងបាសរាំ​។ ល។ ត្រូវបន្តគម្លាតបុគ្គលបន្តទៀត​ ដូចជា​អង្គុយគម្លាតពីគ្នា​ ឈររង់ចាំគម្លាតពីគ្នា​ ឈរជជែកគ្នាគម្លាតពីគ្នា​។ ល។

សូមបញ្ជាក់ថា​ ប្រទេសកម្ពុជារកឃើញករណីជំងឺកូវីដ១៩ដំបូងបំផុតនៅថ្ងៃទី​ ២៧​ មករា​ ២០២០​។ ព័ត៌មានបន្ថែមសូមទាក់ទងលេខ១១៥៕

ភ្នំពេញ ៖ ក្រសួងធនធានទឹក និងឧតុនិយម នៅថ្ងៃទី១៦ ខែមិថុនា ឆ្នាំ២០២០នេះ បានចេញសេចក្ដីជូនដំណឹង ស្ដីពី ស្ថានភាពធាតុអាកាសនៅកម្ពុជា ចាប់ពីថ្ងៃទី១៧ ដល់ថ្ងៃទី ២៣ ខែមិថុនា ឆ្នាំ២០២០។

ក្រសួងបានឲ្យដឹងថា តាមរយៈនៃការប្រែប្រួលជាបន្តបន្ទាប់ នៃស្ថានភាពអាកាសធាតុ សង្កេតឃើញថា ខ្យល់មូសុងនិរតីបក់ក្នុងកម្រិតមធ្យម និងជ្រលងសម្ពាធ ទាបអូសបន្លាយពីលើកម្ពុជា។ ស្ថានភាពបែបនេះធ្វើឱ្យ៖

ភ្នំពេញ ៖ តាមការប្រកាសរបស់ក្រសួងការបរទេសបានឲ្យដឹងថា ប្រជាពលរដ្ឋខ្មែរចំនួន១៤៣ នាក់ ដែលជាប់គាំងនៅប្រទេសម៉ាឡេស៊ី រយៈពេលជាង១ខែ ដោយសារតែការរីករាលដាលនៃជំងឺកូវីដ១៩ នឹងមកដល់កម្ពុជាវិញនៅថ្ងៃទី១៦ ខែមិថុនា ឆ្នាំ២០២០ស្អែកនេះ។

ក្នុងសេចក្តីប្រកាសបានបញ្ជាក់ថា បន្ទាប់ពីបានពិភាក្សាជាបន្តបន្ទាប់ និងសម្របសម្រួលអស់រយៈពេល១ខែកន្លះ រវាងស្ថានទូត និងក្រុមហ៊ុមអាកាសចរណ៍ម៉ាឡេស៊ី ពាក់ព័ន្ធនឹងករជាពលរដ្ឋខ្មែរចំនួន១៤៣នាក់ ដែលខកដំណើរកាលពីថ្ងៃទី០៧ ខែមេសា ឆ្នាំ២០២០ ក្រុមហ៊ុនអាកាសចរណ៍ម៉ាឡេស៊ី បានរៀបចំរួចរាល់នូវជើងហោះហើរពាណិជ្ជកម្មមួយ នៅថ្ងៃទី១៦ ខែមិថុនា ឆ្នាំ២០២០ តាមជើងយន្តហោះ MH762 ដែលនឹងចាកចេញពីទីក្រុងគូឡាឡាំពួ នៅវេលាម៉ោង១៦ និង៣០នាទី ហើយនឹងទៅដល់រាជធានី ភ្នំពេញនៅវេលាម៉ោង១៧ និង២៥នាទី ថ្ងៃដដែល។

ព័ត៌មានលម្អិតសូមអានសេចក្តីប្រកាសរបស់ក្រសួងការបរទេសខាងក្រោម ៖

ភ្នំពេញ ៖ នៅថ្ងៃទី ១៥ ខែ មិថុនានេះ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានប្រកាសដាក់ដំណើរការជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដោយមានការចូលរួមពីសំណាក់ក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ សមាគមតំណាងវិស័យឯកជន និងក្រុមអ្នកសារព័ត៌មាន។

យោងតាមសេចក្តីប្រកាសព័ត៌មាន បានឱ្យដឹងថា “ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន” ជាបង្គោលចរថ្មីមួយនៃការកែទម្រង់មុតស្រួចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលបំណងលើកកម្ពស់ភាពប្រកួតប្រជែង និងធ្វើឱ្យប្រសើរឡើងនូវបរិយាកាសវិនិយោគនៅព្រះរាជាណាចក្រកម្ពុជា ។

ចាប់ពីថ្ងៃទី ១៥ ខែ មិថុនា ឆ្នាំ ២០២០ នេះតទៅ ធុរជន អាចធ្វើការចុះបញ្ជីអាជីវកម្មថ្មីបាន តាមថ្នាលបច្ចេកវិទ្យាព័ត៌មាន ជាកញ្ចប់ ដែលមានអាសយដ្ឋាន www.registrationservices.gov.kh ដូចជា ការចុះបញ្ជីពាណិជ្ជកម្មនៅក្រសួងពាណិជ្ជកម្ម, ការចុះបញ្ជីពន្ធដារនៅអគ្គនាយកដ្ឋានពន្ធដារ និងការធ្វើសេចក្តីប្រកាសផ្តល់ដំណឹងបើកសហគ្រាស ជូនទៅក្រសួងការងារ និងបណ្តុះបណ្តាលវិជ្ជាជីវៈ ក្នុងពេលតែមួយ និងត្រូវការពេលវេលាយ៉ាងយូរត្រឹម ៨ថ្ងៃ នៃថ្ងៃធ្វើការប៉ុណ្ណោះ ជាមួយនឹងការចំណាយតិចជាងមុន រហូតជាងពាក់កណ្តាល។ ទន្ទឹមនឹងនេះ វិនិយោគិនអាចស្នើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់(QIP) តាមថ្នាលបច្ចេកវិទ្យាព័ត៌មាននេះផងដែរ នៅក្រុមប្រឹក្សាអភិវឌ្ឍន៍កម្ពុជា ។

ប្រព័ន្ធចុះបញ្ជីអាជីវកម្ម និងយន្តការថ្មីនេះ គឺជាប្រព័ន្ធទីមួយរបស់រាជរដ្ឋាភិបាល ដែលមានការតភ្ជាប់ផ្លាស់ប្តូរទិន្នន័យជាមួយប្រព័ន្ធបច្ចេកវិទ្យាព័ត៌មានរបស់ក្រសួង-ស្ថាប័នពាក់ព័ន្ធក្នុងក្របខ័ណ្ឌ ជាប្រព័ន្ធអេកូឡូហ្សី ហើយដែលត្រូវបានដាក់ឱ្យប្រើប្រាស់ជាលក្ខណៈអន្តរក្រសួង ដោយទិន្នន័យទាំងអស់ នឹងត្រូវបានបញ្ជូនចែករំលែកដោយស្វ័យប្រវត្តិ ទៅប្រព័ន្ធបច្ចេកវិទ្យាព័ត៌មានរបស់ក្រសួង-ស្ថាប័នពាក់ព័ន្ធ ដើម្បីធ្វើការត្រួតពិនិត្យ និង ផ្តល់កាអនុម័ត។ ដំណើការនៅក្នុងការចុះបញ្ជី, ការដាក់ឯកសារយោង ក៏ដូចជាការទទួលបានមកវិញនូវវិញ្ញាបនបត្រចុះបញ្ជីពាណិជ្ជកម្ម, វិញ្ញាបនបត្រចុះបញ្ជីពន្ធដារ, បណ្ណប៉ាតង់ ក៏ដូចជាឯកសារផ្សេងទៀតទាំងអស់ នឹងត្រូវផ្តល់ និងទទួលបានជាទម្រង់ឌីជីថល ដែលនឹងត្រូវបានធ្វើឡើងទាំងស្រុងនៅលើថ្នាលបច្ចេកវិទ្យាព័ត៌មាន ហើយមិនមានការប្រើប្រាស់ជាឯកសាររូបី ក្នុងទម្រង់រឹងទៀតទេ។ តាមរយៈថ្នាលបច្ចេកវិទ្យាព័ត៌មាននេះ នីតិវិធីស្មុគស្មាញ, ការផ្តល់ព័ត៌មានច្រើនដង និងច្រំដែល, ពេលវេលា និងការចំណាយ ដែលកើតមាននៅតាមបណ្តាដំណាក់កាលនៃការចុះបញ្ជីអាជីវកម្ម នៅក្នុងក្របខណ្ឌយន្តការចាស់ ត្រូវបានកាត់បន្ថយជាអតិបរមា។
លើសពីនេះ ប្រព័ន្ធចុះបញ្ជីអាជីវកម្មថ្មីនេះ នឹងផ្តល់ឱកាសដ៏សំខាន់មួយទៀតផងដែរ ដល់ធុរជនដែលកំពុងស្វែងរកឯកសារគតិយុត្តកំណត់អត្តសញ្ញាណអាជីវកម្មរបស់ខ្លួន ដើម្បីពន្លឿន និងទទួលបានឥណទានពីកម្មវិធីហិរញ្ញប្បទានពិសេសរបស់រាជរដ្ឋាភិបាល ក្នុងវិធានការជួយដល់វិស័យឯកជន ដែលទទួលរងផលប៉ះពាល់ពីការរីករាលដាលនៃជំងឺកូវីដ១៩។
ពិធីប្រកាសដាក់ដំណើរការជាផ្លូវការនូវ “ប្រព័ន្ធចុះបញ្ចីអាជីវកម្មតាមថ្នាលបច្ចេកវិទ្យាព័ត៌មាន” នាពេលនេះគ្រាន់តែជាដំណាក់កាលទី ១ ដែលផ្តោតជាសំខាន់លើការចុះបញ្ជីអាជីវកម្មថ្មីតែប៉ុណ្ណោះ ។ នៅក្នុងដំណាក់កាលបន្ទាប់ រាជរដ្ឋាភិបាលនឹងបន្តពង្រីកវិសាលភាពនៃប្រព័ន្ធនេះ ឈានទៅគ្របដណ្តប់ដល់គ្រប់ក្រសួង-ស្ថាប័នផ្សេងទៀត ដើម្បីរៀបចំការផ្តល់អាជ្ញាបណ្ណនានាតាមថ្នាលបច្ចេកវិទ្យាព័ត៌មានថែមទៀត។
លទ្ធផលនៃការកសាងប្រព័ន្ធនេះ បានបង្ហាញយ៉ាងច្បាស់ថា ទោះបីជាកម្ពុជា ក៏ដូចជាពិភពលោកទាំងមូល កំពុងតែបន្តទទួលរងផលប៉ះពាល់ពីជំងឺកូវីដ-១៩, រាជរដ្ឋាភិបាល ក្រោមការដឹកនាំប្រកបដោយបញ្ញាញាណដ៏ឈ្លាសវៃ, ចក្ខុវិស័យវែងឆ្ងាយ និងភាពប្រាកនិយមរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មិនបានបន្ថយល្បឿននៃការងារកែទម្រង់របស់ខ្លួនទេ។ ផ្ទុយទៅវិញ រាជរដ្ឋាភិបាលបានចាត់ទុកកាលៈទេសៈនៃវិបត្តិនេះ គឺជាកាលានុវត្តភាពសម្រាប់ជំរុញកិច្ចការកែទម្រង់មុតស្រួច ឱ្យកាន់តែសកម្មឡើងថែមទៀត ដើម្បីឆ្លើយតបទៅនឹងវិបត្តិផង និង សំលៀងសម្រួចភាពប្រកួតប្រជែងនៃសេដ្ឋកិច្ចជាតិ សំដៅជំរុញធ្វើពិពិធកម្មមូលដ្ឋាននៃកំណើន និង គាំទ្រដល់កំណើនប្រកបដោយចីរភាពសម្រាប់រយៈពេលវែងផង៕