ភ្នំពេញ ៖ នៅថ្ងៃទី១៥ ខែឧសភា ឆ្នាំ២០២០នេះ ក្រសួងសុខាភិបាល បានចេញសេចក្តីប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២១នាក់។

ចំណែកអ្នកកំពុងសម្រាកព្យាបាលជំងឺកូវីដសល់តែម្នាក់ប៉ុណ្ណោះ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី១៥ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាលដែល ទទួលបានមុននេះបន្តិច៕

ភ្នំពេញ​ ៖ នៅ​ថ្ងៃ​សុក្រ ៩​រោច ខែ​ពិសាខ ឆ្នាំជូត ទោស័ក ព​.​ស​.២៥៦៤ ត្រូវ​នឹង​ថ្ងៃទី​១៥ ខែឧសភា ឆ្នាំ​២០២០ វេលា​ម៉ោង ៨ និង​៣០​នាទី​ព្រឹក គណៈរដ្ឋមន្ត្រី នឹង​បើក​កិច្ចប្រជុំពេញអង្គ​គណៈរដ្ឋមន្ត្រី ក្រោម​អធិបតីភាព​ដ៏​ខ្ពង់ខ្ពស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​។​

កិច្ចប្រជុំពេញអង្គ​គណៈរដ្ឋមន្ត្រី នឹង​ពិភាក្សា និង​ឆ្លង​លើ​របៀបវារៈ​ដូចខាងក្រោម​៖

១- សេចក្តីព្រាងច្បាប់​ស្តីពី​ការប្រឆាំង​ហិរញ្ញប្បទាន​ដល់​ការរីក​សាយភាយ​អាវុធ​មហា​ប្រល័យ​។​

២- សេចក្តីព្រាងច្បាប់​ស្តីពី​ការប្រឆាំង​ការសម្អាត​ប្រាក់​និង​ហិរញ្ញប្បទាន​ភេរវកម្ម​

៣- សេចក្តីព្រាងច្បាប់​ស្តីពី​ការជួយ​គ្នា​ទៅវិញទៅមក​ផ្នែក​ច្បាប់​ក្នុង​វិស័យ​ព្រហ្មទណ្ឌ​។​

៤-​បញ្ហា​ផ្សេងៗ សំណើសុំ​ការយល់ព្រម​ពី​គណៈរដ្ឋមន្ត្រី ដើម្បី​សុំ​ការអនុម័ត​ពី​ស្ថាប័ន​នីតិប្បញ្ញត្តិ​លើ​៖

៤.១- សេចក្តីព្រាងច្បាប់​ស្តីពី​ការអនុម័ត​យល់ព្រម​លើ កិច្ច​ព្រៀង​ស្តីពី​ការលុបបំបាត់​ការយកពន្ធ​ត្រួតគ្នា​ពាក់ព័ន្ធ​នឹង​ពន្ធ​លើ​ប្រាក់ចំណូល និង​ការបង្ការ​គេចវេះ​ពន្ធ និង​ការចៀសវាង​ពន្ធ រវាង​ព្រះរាជាណាចក្រ​កម្ពុជា និង​ម៉ាឡេស៊ី​។​

៤.២- សេចក្តីព្រាងច្បាប់​ស្តីពី​ការអនុម័ត​យល់ព្រម​លើ កិច្ចព្រមព្រៀង​ស្តីពី​ការលុបបំបាត់​ការយកពន្ធ​ត្រួតគ្នា​ពាក់ព័ន្ធ​នឹង​ពន្ធ​លើ​ប្រាក់ចំណូល និង​ការបង្ការ​គេចវេះ​ពន្ធ និង​ការចៀសវាង​ពន្ធ រវាង​ព្រះរាជាណាចក្រ​កម្ពុជា និង​សាធារណរដ្ឋ​កូរ៉េ​។​

៤.៣- សេចក្តីព្រាងច្បាប់​ស្តីពី​ការអនុម័ត​យល់ព្រម​ឱ្យ ព្រះរាជាណាចក្រ​កម្ពុជា​ចូល​ជា​ភាគី​នៃ​អនុសញ្ញា​ទីក្រុង​ប៊ែ​ន​ស្តីពី​កិច្ចការពារ​ស្នាដៃ​អក្សរសាស្ត្រ និង​សិល្បៈ​ឆ្នាំ​១៨៨៦ និង​វិសោធនកម្ម​ឆ្នាំ​១៩៧៩​។​

​សូមបញ្ជាក់ថា ចាប់តាំងពី​មាន​ជំងឺ​កូ​វីដ​១៩ បានកើត​មាននៅ​ប្រទេស​កម្ពុជា​មក រាជរដ្ឋាភិបាល បានប្រកាស​​ផ្អាក​កិច្ចប្រជុំពេញអង្គ​គណៈរដ្ឋមន្ត្រី ហើយ​នៅថ្ងៃនេះ គឺជា​កិច្ចប្រជុំ​ដំបូង បន្ទាប់ពី​ជំងឺ​កូ​វីដ​១៩​កម្ពុជា បាន​ធូរស្រាល​ស្ទើរតែ​ទាំងស្រុង ព្រោះ​នៅសល់តែ​អ្នកជំងឺ​ម្នាក់​គត់​កំពុង​សម្រាក​ព្យាបាល​៕

ភ្នំពេញ ៖ នៅថ្ងៃទី១៤ ខែឧសភា ឆ្នាំ២០២០នេះ នគរបាលចរាចរណ៍ទូទាំងប្រទេស បានរកឃើញយានយន្តល្មើស ចំនួន៧៦៥គ្រឿង ក្នុងនោះ មានម៉ូតូ៤៨២គ្រឿង និងរថយន្ត២៨៣ គ្រឿង។ នេះបើតាមរបាយការណ៍ របស់អគ្គស្នងការដ្ឋាននគរបាលជាតិ។

សម្រាប់បទល្មើសម៉ូតូ គឺភាគច្រើនមិនពាក់មួកសុវត្ថិភាព និងល្មើសផ្សេងៗ។ ដោយឡែកបទល្មើសរថយន្ត ភាគច្រើនអត់ខ្សែក្រវាត់ បើកលើសល្បឿន ផ្ទុកលើសចំណុះ និងមិនគោរពភ្លើងសញ្ញា។

បើសរុបយានយន្តល្មើសទាំងរយៈពេល១៤ថ្ងៃ (ថ្ងៃទី០១-១៤ ខែឧសភា) មានចំនួន២២,៨០៧រឿង ក្នុងនោះម៉ូតូចំនួន១៦,៦១៦គ្រឿង និងរថយន្ត៦,១៩១គ្រឿង។

សូមជម្រាបថា ដើម្បីផ្តល់ភាពងាយស្រួល ដល់បងប្អូនប្រជាពលរដ្ឋ ដែលមានចម្ងល់អំពីច្បាប់ចរាចរណ៍ ពិសេសការអនុវត្តន៍ការផាកពិន័យ ចំពោះការល្មើសច្បាប់ចរាចរណ៍ តាមអនុក្រឹត្យថ្មីនោះ អគ្គស្នងការដ្ឋាននគរបាលជាតិ បានដាក់ឲ្យដំណើរការជាផ្លូវការ លេខទូស័ព្ទទាន់ហេតុការណ៍ ១១៧ ដែលមានមន្ត្រីប្រចាំការ២៤ម៉ោងលើ២៤ម៉ោង។ ការទូរស័ព្ទសាកសួរអំពីចម្ងល់នានា ពាក់ព័ន្ធច្បាប់ចរាចរណ៍ទៅលេខ១១៧ គឺមិនមានការគិតប្រាក់ទេ សម្រាប់គ្រប់ប្រព័ន្ធទាំងអស់៕

ខេត្តតាកែវ ៖ អាជ្ញាធរមានសមត្ថកិច្ច ដឹកនាំដោយលោកប្រធានមន្ទីរធម្មការ នឹងចុះទៅវត្តភ្នំបូរី ក្នងស្រុកអង្គបូរី ដើម្បីធ្វើកំណត់ហេតុ និងឃាត់ខ្លួនព្រះតេជគុណ ឡុង ចន្ថា ប្រសិនបើមិនគោរពតាមការសន្យាគិតត្រឹមម៉ោង ៥និង៣០នាទីល្ងាចថ្ងៃទ១៤ ខែឧសភា នេះ ។ នេះជាការបញ្ជាក់របស់លោក ជួង វ៉ាន ប្រធានមន្ទីរធម្មការ និងសាសនាខេត្តតាកែវ នៅរសៀលថ្ងៃទី១៤ ខែឧសភា នេះ។

គណៈកម្មធិកាអាច្យារវត្តភ្នំបូរី ស្រុកអង្គបូរី និយាយថា ព្រះសង្ឃ ឡុង ចន្ថា មិនបានគង់ក្នុងវត្តភ្នំបូរីនេះ ដើម្បីសឹកតបតាមការសរសេលាយលក្ខណ៍អក្សរដែលព្រះអង្គសរសេរផ្ទាល់ដៃ ថា នឹងសឹកនៅថ្ងៃទី១៤ ខែឧសភា នេះឡើយ ។

លោក សំរិទ្ធ ស៊ុន បានប្រាប់ថា ភិក្ខុ ឡុង ចន្ថា ត្រូវបានក្រុមគ្រួសារនាំចេញពីវត្តនេះ បីថ្ងៃកន្លងមកហើយ ប្រហែលជានាំទៅវត្តមួយដែលលោកបានបួសកាលពីនៅតូច នៅក្នុងស្រុកបូរីជលសារ។

សូមបញ្ជាក់ថា ភិក្ខុ ឡុង ចន្ថា គង់នៅវត្តភ្នំបុរី ឃុំព្រែកផ្ទោល ស្រុកអង្គរបុរី ខេត្តតាកែវ កាលពីរសៀលថ្ងៃទី៤ ខែឧសភា ឆ្នាំ២០២០ បានសម្រេចចិត្តលាចាកសិក្ខាបទដោយខ្លួនឯង បន្ទាប់ពីមានការបែកធ្លាយវីដេអូ ឆាតញ៉ែស្រីម្នាក់ ប្រើពាក្យលែបខាយក្នុងន័យស្នេហាតាម Facebook ។ ក្នុងកិច្ចសន្យាដែលបានធ្វើឡើងនៅវត្តតុំ ជាវត្តព្រះមេគណ មានទីតាំងនៅភូមិតុំ សង្កាត់រកាក្រៅ ស្រុកដូនកែវ បព្វជិត ឡុង ចន្ថា បានថ្លែងថា បើគិតជាទោសក្នុងព្រះវិន័យ មិនដល់ថ្នាក់សឹកទេ ប៉ុន្តែកុំឱ្យខូចតម្លៃព្រះពុទ្ធសាសនា ភិក្ខុ ឡុង ចន្ថា សម្រេចលាចាកសិក្ខាបទដោយខ្លួនឯង នៅថ្ងៃទី១៤ ខែឧសភា ឆ្នាំ២០២០ នេះ។

នៅថ្ងៃទី៤ ខែឧសភា សម្តេចសង្ឃ នន្ទ ង៉ែត សម្តេចគណៈសង្ឃនាយក បានស្នើឲ្យមេគណខេត្តតាកែវ និមន្តភិក្ខុ ឡុង ចន្ថា ចូលទៅដោះស្រាយក្នុងរឿងអាស្រូវដែលផ្ទុះឡើងនេះ ។ ក្រោយឆ្លងកាត់ការដោះស្រាយជាមួយគ្នាព្រះសង្ឃ ឡុង ចន្ថា ក៏សរសេរកិច្ចសន្យាពីការសុខចិត្តលាចាកសិក្ខាបទដោយខ្លួនឯង។

គួររំលឹកថា បព្វជិត ឡុង ចន្ថា ប្រាប់បណ្តាញសារព័ត៌មានកាលពីល្ងាចថ្ងៃទី៤ ខែឧសភា ថា ព្រះមេគណពុំបានបង្ខំឲ្យអាត្មាសឹកឡើយ តែជាការយល់ព្រមដោយអង្គឯង ។ កុំឲ្យប៉ះពាល់ដល់តម្លៃព្រះពុទ្ធសាសនា កុំឲ្យរឿងវែងឆ្ងាយអាត្មាសុខចិត្តសឹក ។

ទោះជាយ៉ាងនេះក្តី បើតាមហ្វេសប៊ុកផ្ទាល់ខ្លួនរបស់បព្វជិត ឡុង ចន្ថា នៅថ្ងៃនេះ បានលើកឡើងថា លោកមិនទាន់អស់និស័យ្សនឹងព្រះទេ។បើតាមន័យនេះ លោកទំនងជាមិនព្រមសឹកតាមការសន្យានោះឡើយ ទើបបានជាមន្ត្រីធម្មការ និងអាជ្ញាធរមានសមត្ថកិច្ច នៅថ្ងៃទី១៤ ខែឧសភា នេះបានប្រកាសស្វែងបព្វជិត ឡុង ចន្ថា ដើម្បីអនុវត្តតាមការសន្យា។

សូមរំលឹកថា កាលពីថ្ងៃទី១៥ ខែមីនា ឆ្នាំ២០១៨ បន្ទាប់ពីលោករដ្ឋមន្រ្តីក្រសួងពត៌មាន ខៀវ កញ្ញារិទ្ធិ បានចេញសាររិះគន់តាម Facebook ទៅលើព្រះសង្ឃ ឡុង ចន្ថា ដែលគង់នៅវត្តមួយក្នុងខេត្តតាកែវ ថា ជា«ព្រះសង្ឃបំផ្លាញ» នៅយប់ថ្ងៃដដែលនោះ ព្រះសង្ឃ ឡុង ចន្ថា ដែលពូកែលេងសើចសំដីបែបអ្នកមានអាជីពកំប្លែង បានចេញ ឃ្លីបវិដេអូ តាម Facebook ដោយ សុំទោសចំពោះសាធារណជននូវកំហុសខុសឆ្គងរបស់ខ្លួន ដែលទេសនាកន្លងមក និងនាំអោយមានការរិះគន់៕

ភ្នំពេញ ៖ សម្តេច ស ខេង ឧបនាយករដ្ឋមន្រ្តី រដ្ឋមន្រ្តី​ក្រសួង​មហាផ្ទៃ បាន​ចេញលិខិតប្រាប់​ទៅបណ្តាអភិបាលខេត្តជាប់ព្រំដែន ឱ្យទប់ស្កាត់​ប្រជាពលរដ្ឋខ្មែរ កុំឱ្យ​ឆ្លងដែន​ដោយខុសច្បាប់​ចូលទៅប្រទេសជិតខាងតាមច្រក​របៀងនានា ខណៈ​ដែលប្រទេសជិតខាងទាំងនោះ កំពុង​ដាក់ប្រទេស​ក្នុងគ្រាអាសន្ន ដើម្បីបង្ការ ទប់ស្កាត់​ការរីករាល​នៃជំងឺកូវីដ១៩។

សម្តេចក្រឡាហោម បាន​ណែនាំ​ថា ក្នុងករណី​ដែលសមត្ថកិច្ច​នៃប្រទេសជិតខាង​ បាន​ចាប់ឃាត់​បងប្អូន​ប្រជាពលរដ្ឋខ្មែរដែល​បាន​ឆ្លងដែន​ដោយខុសច្បាប់​ចូលទៅប្រទេសជិតខាង​តាមច្រក​របៀង​នានា រដ្ឋបាលខេត្ត​ត្រូវ​ទំនាក់ទំនង និង​សម្របសម្រួលជាមួយ​សមត្ថកិច្ច​នៃប្រទេស​ជិតខាង ដែលមាន​ព្រំប្រទល់​ជាប់គ្នា​ឱ្យបានឆាប់ ដើម្បី​ស្នើឱ្យ​សមត្ថកិច្ចនៃប្រទេសជិតខាងចាត់បញ្ជូនពួកគាត់​វិលត្រឡប់​មកកម្ពុជាវិញ និង​យកចិត្ត​ទុកដាក់​ត្រួតពិនិត្យ​សុខភាព ការអនុវត្ត​វិធានការចត្តាឡីស័ក និង​ការដឹកជញ្ជូន​បងប្អូន​ទៅកាន់លំនៅឋាន​រៀងៗខ្លួន​ឱ្យបានសមស្រប។

សូមអានបន្ថែមខាងក្រោម៖

ខេត្តបន្ទាយមានជ័យ ៖ ថ្វីត្បិតតែផ្អាកប្រារព្ធពិធីមិទ្ទីញអបអរខួបលើកទី១៥៧ ទិវាពិភពលោកកាកបាទក្រហម អឌ្ឍចន្ទក្រហម ០៨ ឧសភាតែសាខាកាកបាទក្រហមខេត្តបន្ទាយមានជ័យ អាចគៀងគររកមូលនិធិបាន១៧៩៥២ដុល្លានិង១១០០០បាតសម្រាប់តែមួយក្រុងក្នុងក្រុងប៉ោយប៉ែត នេះបើយោងតាមរបាយការណ៍របស់សាខាកាកបាទក្រហមខេត្តបន្ទាយមានជ័យធ្វើឡើងនៅព្រឹកថ្ងៃទី១៤ខែឧសភាឆ្នាំ២០២០នាក្រុងប៉ោយប៉ែត។

នៅក្នុងជំនួបសំណេះសំណាលជាមួយពាណិជ្ជករ អាជីវករ នៅក្រុងប៉ោយប៉ែត លោក អ៊ុំ រាត្រី បានមានប្រសាសន៍ថា ក្នុងឆ្នាំ២០២០នេះ សាខាកាកបាទក្រហមខេត្ត សម្រេចការផ្អាកប្រារព្ធមិទ្ទីញអបអរខួបលើកទី១៥៧ ទិវាពិភពលោកកាកាបាទក្រហម អឌ្ឍចន្ទក្រហម ០៨ឧសភា  ដើម្បីចូលរួមចំណែក ក្នុងការទប់ស្កាត់ការរាតត្បាតវីរ៉ុសកូរ៉ូណា កូវីដ១៩ ដែលកន្លងមកថ្មីៗនេះ សម្តេចតេ ជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា  បានធ្វើការអំពាវនាវ ដល់ប្រជាពលរដ្ឋកម្ពុជា យើងរក្សាការប្រុងប្រយ័ត្នខ្ពស់ ចំពោះជម្ងឺឆ្លងកូវីដ១៩ដោយផ្អាកអោយមានការជួបជុំជាលក្ខណៈទ្រង់ទ្រាយធំ  ដែលផ្តល់ភាពងាយស្រួលក្នុងការចម្លងមេរោគផ្លូវដង្ហើយថ្មីកូរ៉ូណា កូវិដ១៩។

លោក អ៊ុំ រាត្រី បានមានប្រសាសន៍បន្តថា បើទោះបីជាសាខាកាកបាទក្រហមខេត្ត មិនបានប្រារព្ធពិធីអបអរខួបលើកទី១៥៧ ទិវាពិភពលោកកាកបាទក្រហម អវឌ្ឍចណ្ទក្រហម ក្នុងទ្រង់ទ្រាយធំក្តី តែក៏បានធ្វើការកោះអញ្ជើញ អស់លោក លោកស្រីដែលជាអាជីវករ ពាណិជ្ជករ ក្នុងក្រុងប៉ោយប៉ែត នាថ្ងៃនេះក្នុងន័យ គៀងគរកមូលនិធីនិងស្វាគមន៍ការចូលរួមបរិច្ចាគជាថវិកាដោយស្ម័គ្រចិត្ត ពីសំណាក់អស់លោក លោកស្រី ប្រកបដោយសន្តានចិត្តសប្បុរស ដើម្បីចូលរួមចំណែកជាកម្លាំងមនុស្សធម៌ ក្នុងការឆ្លើយតបដល់ជនរងគ្រោះនិងងាយរងគ្រោះដូចជា ជនពិការ ចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា  ជនក្រីក្រជម្ងឺរ៉ាំរ៉ៃ និងប្រជាពលរដ្ឋរងគ្រោះដោយគ្រោះធម្មជាតិ ។

លោក អ៊ុំ រាត្រី បានគូសបញ្ជាក់ថា ថវិកាដែលទទួលបានពីសប្បុរសជនដែលជាពាណិជ្ជករ អាជីវករ នាពេលនេះ សាខាកាកបាទក្រហមខេត្តនឹងយកទៅផ្តល់ដល់ជនរងគ្រោះនិងងាយរងគ្រោះឲ្យចំគោលដៅនិងមានប្រសិទ្ធភាព និងសូមថ្លែងនូវអំណរគុណយ៉ាងជ្រាលជ្រៅ ដល់អស់លោក លោកស្រី ដែលបានបរិច្ចាគទ្រព្យធនផ្ទាល់ខ្លួនចូលរួមជាកម្លាំងមនុស្សធម៌ កាយវិកានិងសន្តានចិត្តទាំងនេះគឺពិតជាបានយកចិត្តទុកដាក់យ៉ាងសកម្មដោយស្មារតីមនុស្សធម៌ខ្ពស់។

គួរបញ្ជាក់ថា ថវិកាដែលទទួលបាននាពេលនេះ សរុបជាប្រាក់ខ្មែរចំនួន ២៣លាន ៨សែន ៩ម៉ឺនរៀល ប្រាក់អាមេរិក ចំនួន១ម៉ឺន១ពាន់ ៩រយ ៨០ ដុល្លារ ,ច្រាក់ថៃ១ម៉ឺន ១ពាន់បាត។ សរុបទាំង៤លើក ដេលសាខាកាកបាទក្រហមខេត្តធ្វើការកៀរគរមូលនិធីពីសប្បុរសជនក្នុងខេត្ត សរុបជាប្រាក់អាមេរិកចំនួន១០.០៩៨០ ដុល្លារ (១០ម៉ឺន ៩រយ ៨០ដុល្លារ )៕

ខេត្តបន្ទាយមានជ័យ ៖ យោធាតំបន់ប្រតិបត្តិការសឹករងខេត្តបន្ទាយមានជ័យ និងយុវជនមជ្ឈមណ្ឌលជីវិតថ្មីភ្នំបាក់ បានចុះជួយរុះរើសំណល់ពីអគ្គិភ័យឆាបឆេះផ្ទះ និងរៀបចំទុកដាក់សំភារៈផ្សេងៗ ដើម្បីសម្រួលការលំបាករបស់ពលរដ្ឋរងគ្រោះ ។
កម្លាំងយោធាតំបន់ប្រតិបត្តិការសឹករងខេត្បន្ទាយមានជ័យ ដែលបានចុះជួយរុះរើ សំណល់ខាងលើនេះ ស្ថិតក្រោមការអន្តរាគមន៍ និងការសម្របសម្រួលពីលោកឧត្តមសេនីយ៍ទោ ឈុន ម៉ៅ មេបញ្ជារងភូមិភាគ៥ និងការបញ្ជាផ្ទាល់ពីលោក ជឹម ប៊ុនអាន មេបញ្ជាការតំបន់ប្រតិបត្តិការសឹករងខេត្តបន្ទាយមានជ័យ ។
គួររំលឹកថា កាលពីថ្ងៃទី១១ ខែឧសភា ឆ្នាំ២០២០ កន្លងទៅនេះ មានករណីអគ្គីភ័យឆាបឆេះផ្ទះ១ខ្នងរបស់លោក អេម ពៅ និងអ្នកស្រី ឈុន វណ្ណា ស្ថិតនៅចំណុចក្រោយផ្សារអូរអំបិល ក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ដែលមានទទឹង៨ម៉ែត្រ និងបណ្តោយ២០ សង់អំពីឈើលើថ្មក្រោម បណ្តាលឲ្យខូចខាតអស់ទាំងស្រុង សរុបជាទឹកប្រាក់ប្រមាណជា៩ម៉ឺនដុល្លាសហរដ្ឋអាមេរិក ។
ឆ្លើយតបទៅនឹង ចុះជួយនេះលោក អេម ពៅ និងភរិយា បានមានប្រសាសន៍ថ្លែងអំណរគុណចំពោះ លោកមេបញ្ជាការតំបន់ប្រតិបត្តិការសឹករងខេត្ត ជឹម ប៊ុនអាន និងកម្លាំងអាវុធហត្ថ នគរបាល ក៏ដូចជាថ្នាក់ដឹកនាំខេត្ត មន្ទីរស្ថាប័នមួយចំនួន និងក្រុមយុវជនចលនាយុវជនកម្ពុជាក្រុម១៥៧ និងយុវជនសហភាពសហព័ន្ធយុវជនកម្ពុជា ក៏ដូចជាមិត្តភក្ត័ទាំងអស់ ដែលបានសួរសុខទុក្ខ តាំងពីពេលកើតហេតុរហូតមកទល់ពេលនេះ ៕

ភ្នំពេញ ៖  លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាល រាជធានីភ្នំពេញ​ បានណែនាំដល់មន្ត្រីអនុវត្តច្បាប់ទាំងអស់ ត្រូវតែមានការអត់ធ្មត់ខ្ពស់ មានអាកប្បកិរិយា និងសំដីសមរម្យជាមួយប្រជាពលរដ្ឋ។ លោកស្នងការ បានសង្កត់ធ្ងន់ថា ក្នុងពេលអនុវត្តរឹតបន្តឹងច្បាប់ចរាចរណ៍នេះ បើមន្ត្រីណាប្រព្រឹត្តិខុសពីការណែនាំរបស់ថ្នាក់ដឹកនាំ មន្ត្រីនោះ នឹងត្រូវដាក់ពិន័យ ក៏ដូចជាការអនុវត្តតាមវិន័យកងកម្លាំង។

លោកឧត្តមសេនីយ៍ឯក ស ថេត បានលើកឡើងដូច្នេះ កាលពី​ព្រឹកថ្ងៃទី១៤ ខែឧសភា ឆ្នាំ២០២០ ក្នុងពេល​អញ្ជើញជួបជាមួយមន្ត្រីនៃការិយាល័យចរាចរណ៍ និងមន្ត្រីចរាចរណ៍ តាមបណ្តាអធិការខណ្ឌទាំង១៤ នៅភ្នំពេញ​ ដែលមានមន្ត្រីចូលរួម​សរុបចំនួន ៧២៨ នាក់ ( បែកចែកជា ៤ វេន ផ្សេងគ្នា ) ដើម្បីផ្សព្វផ្សាយការប្រជុំដកពិសោធន៍នៃការអនុវត្តរឹតបន្តឹងច្បាប់ចរាចរណ៍របស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ។

​លោកស្នងការ បានកោតសរសើរដល់កម្លាំងទាំងអស់ ដែលបានខិតខំទាំងយប់ថ្ងៃ ក្នុងគោលបំណងការពារអាយុជីវិត ទ្រព្យសម្បត្តិរបស់ប្រជាពលរដ្ឋ ជាលទ្ធផលនៃការអនុវត្តរឹតបន្តឹងច្បាប់ចរាចរណ៍រយ:ពេល ១៣ថ្ងៃកន្លងមកនេះ បានបង្ហាញជាលទ្ធផលវិជ្ជមាន ដោយកាត់បន្ថយគ្រោះចរាចរណ៍បានរហូតដល់ ៤០% ជាពិសេសធ្វើឲ្យអ្នកបើកបរភាគច្រើន បានចូលរួមគោរពច្បាប់ ដោយពាក់មួកសុវត្ថិភាព ពាក់ខ្សែក្រវ៉ាត់ គោរពភ្លើង និងស្លាកសញ្ញាចរាចរណ៍។ ល ។

​លោកស្នងការ ក៏បាន​បញ្ជាក់យ៉ាងច្បាស់ដល់មន្ត្រីទាំងអស់ ត្រូវតែធ្វើជាគំរូល្អដល់ប្រជាពលរដ្ឋ ក្នុងការគោរពច្បាប់ចរាចរណ៍ ត្រូវតែពាក់មួកសុវត្ថិភាព មានស្លាកលេខ ពាក់ខ្សែក្រវ៉ាត់ និងកុំនិយាយទូរស័ព្ទពេលបើកបរ ( អាចនិយាយបានដោយប្រើកាស )។ បន្ថែមលើនេះលោកស្នងការ ក៏បានណែនាំដល់មន្ត្រីទាំងអស់ ត្រូវតែប្រុងប្រយ័ត្នក្នុងការថែទាំសុខភាព ដោយពាក់ម៉ាស់ជាប្រចាំ លាងដៃជាមួយសាប៊ូ ឬទឹកអាល់កុលឲ្យបានញឹកញាប់ ដើម្បីបង្ការ និងទប់ស្កាត់ការឆ្លងរាលវីរុសកូវីដ១៩ ដោយអនុវត្តតាមការណែនាំរបស់រាជរដ្ឋាភិបាល និងក្រសួងសុខាភិបាល​៕​​