ភ្នំពេញ ៖ ក្រោយត្រឹមស្មើ U22 ថៃ នៅជុំចុងក្រោយ U22 វៀតណាមបានបន្តឈរលេខ១ក្នុងពូលB មាន១៣ពិន្ទុ ត្រូវទៅប៉ះក្រុមលេខ២ពូលA គឺ U22កម្ពុជា នៅវគ្គបន្ទាប់។ ចំណែកU22 ឥណ្ឌូណេស៊ី លេខ២ មាន១២ពិន្ទុ ក្រោយឈ្នះ U22 ឡាវ ៤-០ ត្រូវឡើងទៅប៉ះក្រុមលេខ១ពូល A គឺ U22 មីយ៉ាន់ម៉ា។ ចំណែក U22 ថៃ លេខ៣ មាន១០ពិន្ទុ។
សូមជម្រាបថា ការប្រកួតវគ្គពាក់កណ្តាលផ្តាច់ព្រ័ត្រ នឹងធ្វើឡើងនៅថ្ងៃទី៧ ខែធ្នូខាងមុខនេះ៕
ភ្នំពេញ ៖ សម្ដេចតេជោ ហ៊ុន សែន នាយករដ្ឋមមន្រ្តី នៃព្រះរាជាណាចក្របានបង្ហោះនៅលើគណនីហ្វេសបុកផ្ទាល់ខ្លួនថា «សូមជម្រាបជូនបងប្អូនជនរួមជាតិជាទីគោរពស្រឡាញ់ថា ចំណូលដែលសប្បុរសជនចូលរួមដើម្បីធ្វើទំនើបកម្មមន្ទីរពេទ្យកាល់ម៉ែតរហូតព្រឹកថ្ងៃទី៦ ខែធ្នូ ឆ្នាំ២០១៩ នេះមានចំនួន៧០ ១៩១ ៩៩៤ដុល្លារ និងប្រាក់រៀលចំនួន ៣២ ១១០០០០រៀល»។
សម្ដេចបានបន្តថា «បើគិតទាំងថវិកា ៣០លានដុល្លាររបស់រាជរដ្ឋាភិបាលផងចំនួនទឹកប្រាក់ឡើងដល់ជាង ១០០លានដុល្លារដែលធ្វើឱ្យយើងមានលទ្ធភាព រៀបចំមន្ទីរពេទ្យកាល់ម៉ែតឱ្យក្លាយទៅជាមជ្ឈម ណ្ឌលពហុបច្ចេកទេសសម្រាប់ការពិនិត្យព្យាបាលជូនប្រជាជនយើងឱ្យកាន់តែមានប្រសិទ្ធភាព»។
សូមជម្រាបថា នាពេលថ្មីៗសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសអំពាវនាវឲ្យបងប្អូនជនរួមជាតិ និងមិត្តបរទេស ជួយចូលរួមបរិច្ចាគដល់មន្ទីរពេទ្យកាល់ម៉ែត ឱ្យក្លាយទៅជាមន្ទីរពេទ្យបង្អែករបស់ជាតិ ដែលមានលក្ខណៈទំនើប និងពហុឯកទេស៕
ភ្នំពេញ ៖ នៅព្រឹកថ្ងៃទី៦ ខែធ្នូ ឆ្នាំ២០១៩ កម្លាំងសមត្ថកិច្ចនៃនាយកដ្ឋាននគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ បានធ្វើការដុតបំផ្លាញទំនិញក្លែងក្លាយចំនួន ១២មុខ សរុបជាង ១០០តោន នៅភូមិច្រេស សង្កាត់គោកឃ្លាង ខណ្ឌសែនសុខ រាជធានីភ្នំពេញ ក្រោមអធិបតីភាពរបស់លោក តេង សាវង្ស រដ្ឋលេខាធិការក្រសួងមហាផ្ទៃ។
ទំនិញក្លែងក្លាយទាំងនោះរួមមាន ៖ សំបកកញ្ចប់បារីគ្រប់ប្រភេទ, សំបកសុងបារីចម្រុះ, បារីចម្រុះម៉ាក, សសៃថ្នាំជក់, ឧបករណ៍សម្ភារៈបម្រើឱ្យការផលិតបារី, ផលិតផលគ្រឿងសំអាងគ្រប់ប្រភេទ, ឧបករណ៍សម្ភារៈបម្រើឱ្យការផលិតគ្រឿងសំអាង, ផលិតផលធូប និងធូបមូស។
លោកឧត្តមសេនីយ៍ឯក ចាន់ វ៉ាន់ធឿន បានសូមសំណូមពរដល់អង្គភាព និងស្ថាប័នជំនាញពាក់ព័ន្ធទាំងអស់បន្តចូលរួមសហការ ឲ្យកាន់តែមានប្រសិទ្ធភាពខ្ពស់ បន្ថែមទៀត និងសំណូមពរប្រជាពលរដ្ឋឲ្យមានការប្រុងប្រយ័ត្នចំពោះផលិតផលក្លែងក្លាយ និងចូលរួមសហការផ្តល់ព័ត៌មាន ជូនសមត្ថកិច្ចក្នុងករណីពិនិត្យសង្ស័យឃើញថា មានទីតាំងផលិតផលផ្សេងៗ ដែលខុសច្បាប់ដើម្បីចូលរួមទប់ស្កាត់ និងការពារសុខុមាលភាពជូនប្រជាពលរដ្ឋ។
ថ្លែងក្នុងឱកាសនោះ រដ្ឋលេខាធិការក្រសួងមហាផ្ទៃ លោក តេង សាវង្ស បានគូសបញ្ជាក់ថា គោលដៅដែលនាយកដ្ឋាននគរបាលប្រឆាំងបទល្មើសសេដ្ឋកិច្ច ធ្វើការបង្ក្រាបនេះ គឺជាទីតាំងលួចលាក់ផលិត ដែលមិនមានអាជ្ញាប័ណ្ណ ឬទិដ្ឋាការពីក្រសួងឧស្សាហកម្ម និងសិប្បកម្ម និងពីក្រសួងសុខាភិបាលនោះទេ ហើយផលិតផលដែលលួច លាក់ផលិតនោះគឺ ៖ ជាផលិតផលដែលពុំមានការត្រួតពិនិត្យត្រឹមត្រូវ និងបានក្លែងបន្លំម៉ាក សញ្ញារបស់ក្រុមហ៊ុន ដែលមានសិទ្ធិស្របច្បាប់ទៀតផង៕
ខេត្តកណ្តាល ៖ លោកបណ្ឌិត ម៉ៅ ភិរុណ អភិបាល ខេត្តកណ្តាល និងជាប្រធាន អនុគណៈកម្មការ សុវត្ថិភាព ចរាចរណ៍ផ្លូវគោក ខេត្តកណ្តាលបានលើកឡើងថា សុវត្ថិភាពចរាចរណ៍ ជាបញ្ហាសុភាពសាធារណៈ ដែលជាអាទិភាពចំបង ទាមទារឲ្យមានការដោះស្រាយ ជាបន្ទាន់។ ការលើកឡើងរបស់អភិបាលខេត្តបែបនេះធ្វើឡើងក្នុងទិវា អន្តរជាតិ រំលឹកដល់ជនរងគ្រោះ ដោយគ្រោះថ្នាក់ចរាចរណ៍ លើកទី១៤ ដែលប្រារព្ធធ្វើឡើង នាព្រឹកថ្ងៃទី៦ ខែធ្នូ ឆ្នាំ២០១៩នេះ នៅសួនច្បារមាត់ទន្លេបាសាក់ ក្រុងតាខ្មៅ ដោយមានប្រជាពលរដ្ឋ អាជ្ញាធរឃុំ សង្កាត់ កងកម្លាំងមានសមត្ថកិច្ច និងសិស្សានុសិស្សចូលរួមជាង ៥០០នាក់។
ថ្លែងក្នុងពិធីនេះ លោកអភិបាលខេត្ត បានបញ្ជាក់ថា គោលបំណង នៃការប្រារព្ធ ទិវានេះឡើងគឺមិនគ្រាន់តែ ចូលរួមរំលឹក ដល់ជនរងគ្រោះ ដោយសារគ្រោះថ្នាក់ ចរាចរណ៍ ប៉ុណ្ណោះទេ ប៉ុន្តែថែមទាំងបានពញ្ញាក់ ស្មារតីប្រជាជនឲ្យយល់ដឹង អំពីហានិភយ័ នៃគ្រោះថ្នាក់ចរាចរណ៍ ដែលបណ្តាល មកពីបើកបរធ្វេសប្រហែស មិនគោរព ច្បាប់ចរាចរណ៍ដូចជាការបើកបរ ហួសល្បឿនកំណត់ មិនគោរពសិទ្ធអាទិភាព ការបត់ ឬជែងទាំងប្រថុយប្រថាន ការបើកបរ ក្រោមឥទ្ធិពលស្រវឹង ការដឹកលើសទម្ងន់កំណត់ ការមិនពាក់មួកសុវត្តិភាព ឬការមិនពាក់ ខ្សែក្រវ៉ាត់សុវត្ថិភាពជាដើម។
លោកបានបន្តថា ក្នុងទិវានេះវាបានជួយជំរុញ និងលើកទឹកចិត្តឲ្យមានការចូលរួម ពីគ្រប់ មជ្ឈដ្ឋានជាតិ និងអន្តរជាតិ ដើម្បីទប់ស្កាត់ កាត់បន្ថយគ្រោះថ្នាក់ចរាចរណ៍ឲ្យនៅកំរឹតទាបតាម បំណងរបស់រាជរដ្ឋាភិបាល និងអង្គការ សហប្រជាជាតិ ដែលកំណត់យកថ្ងៃអាទិត្យ សប្តាហ៍ទី៣ នៃខែវិច្ឆិកាជារៀងរាល់ឆ្នាំ។
លោក ម៉ឹង យូឡេង ប្រធានមន្ទីរសាធារណការ ខេត្តកណ្តាល និងជាប្រធាន លេខាធិការដ្ឋាន សុវត្ថិភាពចរាចរណ៍ ផ្លូវគោក ខេត្តកណ្តាល បានអោយដឹងថា ក្នុងរយះពេល ៩ខែ ឆ្នាំ២០១៩គ្រោះថ្នាក់ចរាចរណ៍ បានកើតឡើង នៅទឹកដី ខេត្តកណ្តាល មានចំនួន ១៦៩លើក ថយចុះ ៧លើក ស្មើនិង ៤% ក្នុងនោះ កំរឹតស្រាល ចំនួន ៥៨លើក បណ្តាលអោយ មនុស្សចំនួន ១១៩នាក់ ថយចុះចំនួន៤នាក់ ស្មើនិង៣% ក្នុងនោះស្រីចំនួន ១៥នាក់។
សូមជម្រាបថា ក្នុងទិវានេះ ក៍មានរៀបចំ និមន្តព្រសង្ឃ បង្សុកូល ឧទ្ទិសដល់ជនរងគ្រោះ ដែលបាន បាត់បង់ជីវិតដោយគ្រោះថ្នាក់ចរាចរណ៍ និងមានចែកមួក សុវត្ថិភាព ផងដែរ៕
អាហ្វ្រិក ៖ អង្គការអន្តរជាតិសម្រាប់ជនភៀសខ្លួន (IOM) ដែលជាទីភ្នាក់ងារមួយរបស់អង្គការសហប្រជាជាតិ បាននិយាយកាលពីថ្ងៃពុធថាយ៉ាងហោចណាស់មនុស្ស ៥៨ នាក់បានស្លាប់បន្ទាប់ពីទូកដឹកជនអន្តោប្រវេសន៍រាប់សិបនាក់បានក្រឡាប់លិចនៅឯឈូងសមុទ្រម៉ូរីតានីនៃប្រទេសអាហ្វ្រិកខាង នៃនៅថ្ងៃពុធសប្ដាហ៍នេះ។ នេះបើយោងតាមប្រភពពី CGTN។
អាជ្ញាធរម៉ូរីតានី បាននិយាយថា មនុស្ស៥៨នាក់បានស្លាប់ ក្រោយទូកដឹកជនអន្តោប្រវេសន៍មួយគ្រឿង បានលិចនៅឯឈូងសមុទ្រនៃប្រទេសអាហ្រិ្វកមួយនេះ នៅថ្ងៃពុធនេះបន្ទាប់ពីទូកមួយគ្រឿងដឹកជនអន្តោប្រវេសន៍១៥០នាក់ ចេញដំណើរពី ប្រទេសហ្គាំប៊ី កាលពីថ្ងៃទី២៧ ខែវិច្ឆិកា ឆ្ពោះទៅកាន់អ៊ីរ៉ុប។ ទោះបីយ៉ាងណា IOM មិនបានលម្អិតពីចំនួនអ្នកបាត់ខ្លួន ឬអ្នកដែលត្រូវបានជួយសង្គ្រោះនោះទេ។
ផ្លូវសមុទ្រដ៏គ្រោះថ្នាក់ពីទ្វីបអាហ្រ្វិកខាងលិច ទៅកាន់អឺរ៉ុប គឺជាផ្លូវធ្វើដំណើរមួយដ៏សំខាន់សម្រាប់ ជនអន្តោប្រវេសន៍ ដើម្បីស្វែងរកការងារធ្វើ និងកសាងជីវិត នៅលើទឹកដីអឺរ៉ុប បើទោះជាពួកគេដឹងថាត្រូវប្រឈមមុខ នឹងគ្រោះថ្នាក់ដល់អាយុជីវិតក៏ដោយ៕
ប៉ូឡូញ ៖ អាជ្ញាធរបាននិយាយថា យ៉ាងហចោណាស់មនុស្សចំនួន៨នាក់ ក្នុងនោះមានកុមារ៤នាក់បានបាត់បង់ជីវិត នៅពេលអគារកម្ពស់៣ជាន់មួយខ្នងបានដួលរំលំ នៅក្រុង Szczyrk ភាគខាងត្បូង ប្រទេសប៉ូឡូញ។
បើតាមទីភ្នាក់ងារព័ត៌មាន ស៊ីនហួរបានឲ្យដឹងថា ហេតុការណ៍ស្រុតអគារខាងលើបានកើតឡើងកាលពីយប់ថ្ងៃពុធ បន្ទាប់ពីមាន ការផ្ទុះបំពង់ឧស្ម័ននៅទីនោះ ខណៈអគារបានរលំអំឡុងម៉ោង០៦ និង៣០នាទីយប់ថ្ងៃពុធ។ សាកសពជនរងគ្រោះ២នាក់ចុងក្រោយ ក្នុងចំណោម៨នាក់ ទើបត្រូវបានរកឃើញនៅរសៀលថ្ងៃព្រហស្បតិ៍ ក្រោយប្រតិបត្តិការជួយសង្រ្គោះដែលបានប្រព្រឹត្តយ៉ាងសស្រាក់សស្រាំ ក្រោមការចូលរួមពីក្រុមភ្នាក់ងារពន្លត់អគ្គីភ័យជាង១០០នាក់។
អាជ្ញាធរប៉ូឡូញបាននិយាយថា ពុំមានជនរងគ្រោះណាផ្សេងៗ ក្រៅពីជនរងគ្រោះទាំង០៨នាក់ខាងលើឡើយ ដូច្នេះប្រតិបត្តិការ រុករកនិងជួយសង្រ្គោះមិនបន្តទៀតទេ។ បន្ទាប់ពីមានហេតុការណ៍នេះ ការផ្គត់ផ្គង់ឧស្ម័នទៅកាន់តំបន់កើតហេតុ ត្រូវបានផ្អាកជាបណ្តោះអាសន្ន។
ការិយាល័យរដ្ឋអាជ្ញាប៉ូឡូញ បានបើកការស៊ើបអង្កេតជុំវិញករណីសោកនាដកម្មនេះ ខណៈសាកសពនឹងត្រូវឆ្លងកាត់ ការធ្វើកោសល្យវិច្ច័យ៕
ម៉ានីល ៖ អបអរសាទរ! ក្រុមកីឡាការិនីប៉េតង់កម្ពុជា ឈ្នះមេដាយមាស ១គ្រឿងនៅព្រឹត្តិការណ៍ស៊ីហ្គេមលើកទី៣០ នៅប្រទេសហ្វីលីពីនក្រោយឈ្នះម៉ាឡេស៊ីក្នុងលទ្ធផល ១៣-៤ពិន្ទុ។
ក្រុមកីឡាការិនីប៉េតង់កម្ពុជា ដណ្តើមបានមេដាយមាស ១គ្រឿង ក្នុងវិញ្ញាសា ៣នាក់ទល់នឹង៣នាក់ រួមមាន ស្រ៊ាង សុរ៉ាឃីម, ដួង ឌីណា និងកីឡាការិនី អ៊ុន ស្រីយ៉ា។
គួរបញ្ជាក់ផងដែរថា នេះគឺជាមេដាយមាស លើកទី២ របស់កម្ពុជាដែលដណ្តើមបាននៅ SEA Games លើកទី៣០ ឆ្នាំ២០១៩ ដែលមានហ្វីលីពីនធ្វើម្ចាស់ផ្ទះ បន្ទាប់ពីកីឡាគុនល្បុក្កតោ ដណ្តើមបានមេដាយមាស ១គ្រឿងដែរកាលពីដើមសប្តាហ៍ ដោយពេលនេះកម្ពុជា ឈ្នះមេដាយសរុបកើនដល់ ២២គ្រឿងហើយរួមមាន មាស២ ប្រាក់៣ និងសំរិទ្ធ១៧គ្រឿង៕
អាមេរិក ៖ យ៉ាងហោចណាស់មនុស្ស៣នាក់បានស្លាប់ និងម្នាកទៀតរងរបួស បន្ទាប់ពីហេតុការណ៍បាញ់ប្រហារមួយលើនៅមូលដ្ឋានទ័ពជើងទឹកអាមេរិក ភាលហាប៊ឺ (Pearl Harbor) នៃកោះហាវ៉ៃនៅថ្ងៃពុធសប្ដាហ៍នេះ (ម៉ោងក្នុងតំបន់) ខណៈខ្មាន់កាំភ្លើងបានសម្រេចចិត្តបញ្ចប់ជីវិតខ្លួនឯង។ នេះបើតាម សារព័ត៌មាន CNA។
រហូតទល់នឹងពេលនេះនៅតែមិនទាន់មានការបញ្ជាក់ឲ្យច្បាស់លាស់ថា តើការបាញ់បោះនោះមានគោលបំណងអ្វីឱ្យប្រាកដនោះទេ រីឯអត្តសញ្ញាណខ្មាន់កាំភ្លើង ក៏មិនទាន់ត្រូវបានបញ្ជាក់នៅឡើយដែរ ប៉ុន្តែមន្ត្រីអាមេរិកដែលទទួលបន្ទុកលើបញ្ហានេះ បានចូលរួមសម្តែងមរណទុក្ខ ចំពោះក្រុមគ្រួសារនៃជនរងគ្រោះទាំងអស់។
បើតាមសាក្សីមិនបញ្ជាក់បញ្ចេញឈ្មោះម្នាក់បានអះអាងថា បុរសជាខ្មាន់កាំភ្លើង ស្លៀកឯកសណ្ឋានជានាវិកនៃកងនាវាអាមេរិក បានបាញ់ត្រង់ក្បាលសម្លាប់ខ្លួនឯង ក្រោយពីបានបាញ់ប្រហារមនុស្សបីនាក់ខាងលើ។ ជនរងគ្រោះទាំងបីនាក់ខាងលើនេះ គឺសុទ្ធតែជាមន្ត្រីស៊ីវិល ដែលបម្រើការងារឲ្យក្រសួងការពារជាតិអាមេរិក៕
ភ្នំពេញ ៖ ក្នុងជំនួបពិភាក្សាការងាររវាង លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជាមួយ លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ភាគីទាំងពីរបានបង្ហាញការរំពឹងទុកថា កិច្ចសហប្រតិបត្តិការលើវិស័យការងាររវាងកម្ពុជា-អាមេរិក នឹងកាន់តែមានវឌ្ឍនភាពបន្តទៅទៀត ខណៈទំនាក់ទំនងការទូតរវាងប្រទេសទាំងពីរកំពុងមានភាពល្អប្រសើរ។ ជំនួបពិភាក្សានេះធ្វើឡើងកាលពីថ្ងៃទី ៤ ខែធ្នូ នៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ។
លោក អ៊ិត សំហេង មានសុទិដ្ឋិនិយមថា ក្នុងអាណត្តិបេសកកម្មរបស់ឯកឧត្តម W. Patrick Murphy កម្ពុជា-អាមេរិក នៅតែពង្រឹងកិច្ចសហប្រតិបត្តិការលើវិស័យការងារ និងបណ្ដុះបណ្ដាលវិជ្ជាជីវៈជាមួយគ្នាកាន់តែជិតស្និទ្ធថែមទៀត។
ជាមួយគ្នានោះ លោក អ៊ិត សំហេង បានរៀបរាប់ពីវឌ្ឍនភាពលើវិស័យការងារ និងបណ្ដុះបណ្ដាលវិជ្ជាជីវៈរបស់កម្ពុជា ក្រោមកិច្ចសហប្រតិបត្តិការល្អជាមួយរដ្ឋាភិបាលសហរដ្ឋអាមេរិក ក៏ដូចជាអង្គការដៃគូនានារបស់សហរដ្ឋអាមេរិកផងដែរ ខណៈដែលពេលថ្មីៗនេះ គម្រោងរោងចក្រកាន់តែល្អប្រសើរនៅកម្ពុជា បានសម្រេចបន្តកិច្ចសហប្រតិបត្តិការជាមួយរាជរដ្ឋាភិបាលកម្ពុជា រយៈពេល៣ឆ្នាំទៀត (២០២០-២០២២)។
លោករដ្ឋមន្ត្រីបានបន្ដថា កម្ពុជាទទួលស្គាល់ធាតុចូលសំខាន់នានា ដែលសហរដ្ឋអាមេរិកបានចូលរួមផ្ដល់ឱ្យកម្ពុជាក្នុងការរៀបចំច្បាប់ បទបញ្ញត្តិ លិខិតបទដ្ឋានគតិយុត្ត ក៏ដូចជាគម្រោងអភិវឌ្ឍន៍មួយចំនួន ក្នុងនោះច្បាប់ស្ដីពីការងារក៏ជាសមិទ្ធផលមួយ ដែលសហរដ្ឋអាមេរិកបានចូលរួមជួយដល់កម្ពុជា។
លោក អ៊ិត សំហេង និងលោក W. Patrick Murphy បានបង្ហាញគោលបំណងរួមគ្នាថា នៅតែបន្តកិច្ចសហប្រតិបត្តិការលើវិស័យការងារ និងបណ្ដុះបណ្ដាលវិជ្ជាជីវៈ ក៏ដូចជាវិស័យពាណិជ្ជកម្មរវាងកម្ពុជា និងសហរដ្ឋអាមេរិកឱ្យកាន់តែជិតស្និទ្ធ ខណៈដែលប្រមុខរាជរដ្ឋាភិបាលកម្ពុជា សម្ដេច ហ៊ុន សែន និងប្រធានាធិបតីសហរដ្ឋអេមរិក លោក ដូណាល់ ត្រាំ ក៏បានផ្ញើសារទំនាក់ទំនងការទូតឱ្យគ្នាទៅវិញទៅមក ប្រកបដោយភាពជិតស្និទ្ធផងដែរ៕
ភ្នំពេញ ៖ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និង លោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា បានចុះហត្ថលេខា លើលិខិតប្ដូរសារស្ដីពីការផ្ដល់ហិរញ្ញប្បទានឥតសំណងរបស់រដ្ឋាភិបាលជប៉ុន ដែលមានទឹកប្រាក់ សរុបចំនួន ២ ៤០៥ ០០០ ០០០ យ៉េន (ជាង២២លានដុល្លារ) សម្រាប់អនុវត្តគម្រោង «ពង្រីកប្រព័ន្ធផ្គត់ផ្គង់ ទឹកស្អាត នៅខេត្តពោធិ៍សាត់»។ ពិធីចុះហត្ថលេខានេះធ្វើឡើងកាលពីថ្ងៃទី៤ ខែធ្នូ នៅទីស្ដីការក្រសួងការ បរទេស និងសហប្រតិបត្តិការអន្តរជាតិ។
ការផ្ដល់ហិរញ្ញប្បទានឥតសំណងនេះ គឺជាការបង្ហាញអំពីការបេ្តជ្ញាចិត្តរបស់ប្រទេសជប៉ុន ក្នុងការរួមចំណែកធ្វើឲ្យប្រសើរឡើងនូវបរិស្ថានរស់នៅក្នុងប្រទេសកម្ពុជា ជាពិសេសវិស័យទឹកស្អាត។ លោក មិកាមិ ម៉ាសាហ៊ីរ៉ូ បានថ្លែងថា លោកមានសេចក្តីសោមនស្សរីករាយយ៉ាងក្រៃលែង ដែលបានចូលរួមក្នុងពិធីចុះហត្ថលេខាលើលិខិតប្ដូរសារសម្រាប់ “គម្រោងពង្រីកប្រព័ន្ធផ្គត់ផ្គង់ទឹកស្អាតខេត្តពោធិ៍សាត់” ដែលជាហិរញ្ញប្បទានឥតសំណងរបស់ជប៉ុន។
លោកបន្តថា តាមរយៈហិរញ្ញប្បទានឥតសំណងប្រមាណ ២២លានដុល្លារអាមេរិក (២៤០៥លានយ៉េន) ដែលបានចុះហត្ថលេខានេះ ជប៉ុននឹងសាងសង់រោងចក្រប្រព្រឹត្តិកម្មទឹកស្អាត និងរៀបចំប្រព័ន្ធចែកចាយទឹកជាដើម ក្នុងក្រុងពោធិ៍សាត់។
ឯកអគ្គរាជទូតជប៉ុនបានបញ្ជាក់ថា ទំនាក់ទំនងកិច្ចសហប្រតិបត្តិការរវាងជប៉ុន និងកម្ពុជាបាននឹងកំពុងពង្រីកដល់វិស័យជាច្រើន ហើយទាំងអស់ក៏ទទួលបានលទ្ធផលដ៏ធំធេង ដូច្នេះហើយលោកគិតថា កិច្ចសហប្រតិបត្តិការទាំងនេះ បានចូលរួមចំណែកក្នុងការអភិវឌ្ឍន៍សេដ្ឋកិច្ចនិងសង្គមកម្ពុជា ទោះបីជាតិចតួចក្តី។
ក្នុងនោះ កិច្ចសហប្រតិបត្តិការក្នុងវិស័យផ្គត់ផ្គង់ទឹកស្អាត គឺគួរឲ្យកត់សម្គាល់សម្រាប់រយៈពេលដ៏វែងនិងទំហំដ៏ធំនៃសមិទ្ធផលដែលសម្រេចបាន។ តាមរយៈកិច្ចខិតខំប្រឹងប្រែងរបស់អ្នកជំនាញការបច្ចេកទេសជប៉ុន និងកម្ពុជា យើងអាចសម្រេចបាននូវសមទ្ធផលដែលត្រូវបានហៅថា “ភ្នំពេញអច្ឆរិយៈ” នៅរាជធានីភ្នំពេញ។ ប៉ុន្តែអត្រាផ្គត់ផ្គង់ទឹកស្អាត និងគុណភាពទឹកនៅតំបន់ជាច្រើននៅក្នុងខេត្តក្រុងផ្សេងទៀតមានស្ថានភាពខ្វះខាតច្រើន។ ក្រសួងឧស្សាហកម្ម និងសិប្បកម្មបានកំណត់គោលដៅនៃអត្រាផ្គត់ផ្គង់ទឹកស្អាតឲ្យបាន១០០ភាគរយនៅគ្រប់តំបន់ទូទាំងប្រទេសកម្ពុជាត្រឹមឆ្នាំ ២០២៥ ។
តាមរយៈគម្រោងនេះ លោករំពឹងថាអត្រាផ្គត់ផ្គង់ទឹកស្អាតក្នុងក្រុងពោធិ៍សាត់នឹងមានការកើនឡើង ហើយអត្រាផ្គត់ផ្គង់ទឹកស្អាតនៅទីក្រុងផ្សេងទៀតនឹងមានការអភិវឌ្ឍកាន់តែខ្លាំង។ ទោះបីជាបច្ចុប្បន្ននេះកម្ពុជាមានការរីកចម្រើនគួរឲ្យកត់សម្គាល់ក៏ដោយ លោកគិតថាមិនត្រឹមតែការផ្គត់ផ្គង់ទឹកស្អាតប៉ុណ្ណោះទេ ប៉ុន្តែកម្ពុជានៅមានកិច្ចការជាច្រើនដែលត្រូវដោះស្រាយដើម្បីលើកកម្ពស់ជីវភាពប្រជាជន ដូចជាប្រព័ន្ធទឹកកខ្វក់បញ្ហាសំរាម និងការកកស្ទះចរាចរណ៍ជាដើម។ ប្រទេសជប៉ុនសង្ឃឹមថានឹងអាចជួយដោះស្រាយបញ្ហាទាំងនោះបានដោយប្រើប្រាស់នូវគម្រោងកិច្ចសហប្រតិបត្តិការសេដ្ឋកិច្ចផ្សេងៗ៕
ភ្នំពេញ ៖ គ្រប់គិលានដ្ឋាននៅតាមសហគ្រាស គ្រឹះស្ថាន ត្រូវធានាថាដំណើរការបានល្អ មានសម្ភារបរិក្ខារ ឱសថប្រើប្រាស់គ្រប់គ្រាន់ និងមានបុគ្គលិកសុខាភិបាលធ្វើការទៀងទាត់តាមការកំណត់ និងប្រកបដោយវិជ្ជាជីវៈ។
នេះជាសារអំពាវនាវរបស់ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ទៅកាន់ម្ចាស់-និយោជកគ្រឹះស្ថាន សហគ្រាសទាំងឡាយនៅកម្ពុជា ក្នុងពិធីបើកសិក្ខាសាលាចែករំលែកបទពិសោធន៍ស្តីពី ការៀបចំគិលានដ្ឋាន សហគ្រាស គ្រឹះស្ថាននៅសណ្ឋាគារភ្នំពេញ កាលពីថ្ងៃទី០៤ ខែធ្នូ ឆ្នាំ២០១៩។
ដើម្បីធានានូវសុវត្ថិភាព និងសុខភាពការងាររបស់កម្មករនិយោជិតនៅតាមគ្រឹះស្ថាន សហគ្រាស លោក រដ្ឋមន្ត្រី បានអំពាវនាវដូចខាងក្រោម៖
ចំពោះនិយោជក៖
១. រៀបចំគិលានដ្ឋានសហគ្រាស គ្រឹះស្ថានឱ្យបានសមស្រប និងត្រឹមត្រូវតាមវិធាន និងបទប្បញ្ញតិ្តដែលបានកំណត់ក្នុងច្បាប់ស្តីពីការងារ និងលិខិតបទដ្ឋានពាក់ព័ន្ធ ពិសេសប្រកាសរួមលេខ៣៣០ និង ១៣៩។
២. ធានាថាគិលានដ្ឋានសហគ្រាស គ្រឹះស្ថាន ដំណើរការបានល្អ មានសម្ភារបរិក្ខារ ឱសថប្រើប្រាស់គ្រប់គ្រាន់ និងមានបុគ្គលិកសុខាភិបាលធ្វើការទៀងទាត់តាមការកំណត់។
៣. ត្រូវផ្តល់ និងថែរក្សាកន្លែងធ្វើការឱ្យមានអនាម័យ និងសុវត្ថិភាព។
៤. រៀបចំមធ្យោបាយបង្ការទប់ស្កាត់ ឬវិធានការការពារប្រកបដោយប្រសិទ្ធភាពនូវហានិភ័យទាំងឡាយ។
៥. ធានាថាកម្មករនិយោជិតទទួលបាន និងប្រើប្រាស់សម្ភារៈ ឧបករណ៍ការពារពលកម្មបានត្រឹមត្រូវ និងណែនាំឱ្យគាត់ថែរក្សាទុកដាក់សម្ភារឧបករណ៍ទាំងនោះឱ្យបានល្អ។
៦. ត្រូវអប់រំ និងពន្យល់ណែនាំដល់កម្មករនិយោជិតឱ្យបានដឹងអំពីវិធាន ឬបទប្បញ្ញត្តិថ្មីៗ ដែលចេញដោយស្ថាប័នមានសមត្ថកិច្ច ជាពិសេសក្រសួងទទួលបន្ទុកវិស័យការងារ ដែលទាក់ទងនឹងសុវត្ថិភាព និងសុខភាព ការងាររបស់កម្មករនិយោជិត។
៧. ជូនដំណឹងពីជំងឺ និងគ្រោះថ្នាក់ការងាររបស់កម្មករនិយោជិត ទៅបេឡាជាតិរបបសន្តិសុខសង្គមឱ្យបានទាន់ពេលវេលា និងធ្វើការបញ្ជូនគាត់ទៅមន្ទីរពេទ្យឱ្យបានឆាប់រហ័សតាមបែបបទ និងនីតិវិធីរបស់បេឡាជាតិរបបសន្តិសុខសង្គម។
ចំពោះកម្មករនិយោជិត ៖ ត្រូវចូលរួមអនុវត្ត និងផ្សព្វផ្សាយនូវវិធាន និងបទប្បញ្ញត្តិនានាពាក់ព័ន្ធនឹងសុខភាព និងសុវត្ថិភាពការងារឱ្យមានប្រសិទ្ធភាពខ្ពស់។
ក្នុងនាមក្រសួងការងារ និងបណ្តុះបណ្តាលវិជ្ជាជីវៈ ក៏ដូចជារាជរដ្ឋាភិបាល លោក អ៉ិត សំហេង បានស្នើភាគីនិយោជកចូលរួមអនុវត្តគោលការណ៍ណែនាំនេះឱ្យបានកាន់តែល្អប្រសើរថែមទៀត ក្នុងការរៀបចំគិលានដ្ឋាន និងសេវាសុខភាព និងសុវត្ថិភាព ដែលជាសេចក្តីត្រូវការរបស់កម្មករនិយោជិតនៅក្នុងសហគ្រាស គ្រឹះស្ថានរបស់ខ្លួន៕
ភ្នំពេញ ៖ ក្នុងឱកាសចូលជួបសម្តែងការគួរសមនិងជម្រាបលា សម្តេចអគ្គមហាពញាចក្រី ហេង សំរិន ប្រធានរដ្ឋសភា លោកស្រី អានជីឡា ខូកូរ៉ាន់ ( Angela Corcoran ) ឯកអគ្គរដ្ឋទូត នៃប្រទេស អូស្ត្រាលីប្រចាំនៅកម្ពុជា ដែលត្រូវចប់អាណត្តិ បានសម្តែងក្តីរីករាយចំពោះកិច្ចសហប្រតិបត្តិការដ៏ល្អរវាងប្រទេសកម្ពុជានិងអូស្រា្តលី ទាំងខាងស្ថាប័ននីតិប្បញ្ញត្តិនិងនីតិប្រតិបត្តិ។ ហើយប្រទេសអូស្រ្តាលីនៅតែបន្តគំាទ្រដល់ការអភិវឌ្ឍរបស់កម្ពុជាទៅមុខទៀត។
នៅក្នុងជំនួបនៅវិមានរដ្ឋសភា នាព្រឹកថ្ងៃព្រហស្បតិ៍ទី៥ ខែធ្នូ ឆ្នាំ២០១៩នេះ លោកស្រី អានជីឡា ខូកូរ៉ាន់ បានជម្រាបសម្តេចប្រធានរដ្ឋសភាថាចាប់តាំងពីឆ្នាំ១៩៩៣ មកអូស្រ្តាលីបានចូលរួមចំណែកអភិវឌ្ឍន៍នៅកម្ពុជាជាច្រើនវិស័យ មានការអប់រំ កសិកម្ម សុខាភិបាលនិងការបោសសំអាតមីន ជាដើម។ កម្ពុជានិងអូស្រ្តាលី មានកិច្ចសហប្រតិបត្តិការល្អជាមួយក្នុងការប្រយុទ្ធប្រឆំាងអំពើភេវរកម្មនានា ដូចការជូញដូរមនុស្ស និងគ្រឿងញៀនជាដើម។
លោកស្រីឯកអគ្គរដ្ឋទូតបានគូសបញ្ជាក់ថា ចាប់ពីឆ្នាំ១៩៩៤មក មាននិស្សិតកម្ពុជាបានទៅសិក្សានៅប្រទេសអូស្រ្តាលី ចំនួន២៩០០នាក់។ ក្នុងនោះនិស្សិតកម្ពុជាចំនួន៩៩៤នាក់ ទទួលបានអាហារូបករណ៍ពីរដ្ឋាភិបាលអូស្រ្តាលី។ ទន្ទឹមនោះលោកស្រីបានជម្រាបសម្តេចប្រធានរដ្ឋសភាថា ប្រទេសអូស្រ្តាលី បន្តគាំទ្រនិងបង្កើនកិច្ចសហប្រតិបត្តិការជាមួយកម្ពុជានៅលើគ្រប់វិស័យ។ ដោយឡែកនៅក្នុងឆ្នាំ២០២០ខាងនេះ អូស្រ្តាលី នឹងខិតខំជំរុញឲ្យមានដំណើរទស្សនកិច្ចផ្លាស់ប្តូរបទពិសោធន៍របស់តំណាងរាស្រ្តវ័យក្មេងកម្ពុជាទៅកាន់ប្រទេសអូស្រ្តាលី។
ជាមួយគ្នានោះប្រទេសអូស្រា្តក៏បានត្រៀមស្វាគមន៍យ៉ាងកក់ក្តៅ ចំពោះវត្តមាននៃការអញ្ជើញចូលរួមកិច្ចប្រជុំប្រចំាឆ្នាំលើកទី២៨វេទិកា សភាអាស៊ី-ប៉ាស៊ីហ្វិក (APPF) របស់សម្តេចប្រធានរដ្ឋសភានិងគណៈ ប្រតិភូសភាកម្ពុជា ក្នុងប្រទេសអូស្រ្តាលី នាដើមខែមករា ឆ្នាំ២០២០ខាងមុខនេះផងដែរ។
សម្តេចអគ្គមហាពញាចក្រី ហេង សំរិន បានវាយតម្លៃខ្ពស់ចំពោះកិច្ចខិតខំប្រឹងប្រែងក្នុងអាណត្តិការទូតរបស់ លោកស្រី អានជីឡា ខូកូរ៉ាន់ ដែលបានរួមចំណែកដល់ការបន្តថែរក្សាទំនាក់ទំនង មិត្តភាពជាប្រពៃណី និង កិច្ចសហប្រតិបត្តិការរវាង កម្ពុជា-អូស្រ្តាលី ឲ្យមានការ រីកចម្រើនថែមមួយកម្រិតទៀត។ ទន្ទឹមនោះសម្តេចជឿជាក់ថា ក្នុងរយៈពេល៣ឆ្នាំ ដែលលោកស្រីឯកអគ្គរដ្ឋទូតស្នាក់នៅកម្ពុជា លោកស្រីពិតជាបានឃើញជាក់ស្តែងនូវការអភិវឌ្ឍន៍រីកចម្រើនជាបន្តបន្ទាប់របស់កម្ពុជា រួមទំាងសភាពការពិតនៅកម្ពុជាដែលផ្ទុយពីការបំពងសម្លេងពីខាងក្រៅ ដើម្បីកេងចំណេញប្រយោជន៍នយោបាយបុគ្គលមួយចំនួនតូច។
ជាមួយគ្នានេះសម្តេចប្រធានរដ្ឋសភា មានក្តីសង្ឃឹមថា ទោះបីលោកស្រី អានជីឡា ខូកូរ៉ាន់ បានចប់បេសកកម្មនៅកម្ពុជា តែលោកស្រីនៅតែមនោសញ្ចេតនា និងទំនាក់ទំនងល្អជាមួយប្រជាជាតិកម្ពុជាជានិច្ច៕
បាល់ទាត់ ៖ ក្រោយពេលក្រុម U22 កម្ពុជា បានបំបាក់ U22 ម៉ាឡេស៊ី ៣-១ ដើម្បីឡើងទៅកាន់វគ្គពាក់កណ្ដាលផ្ដាច់ព្រ័ត្រលើកដំបូង ក្នុងព្រឹត្តិការណ៍កីឡាស៊ីហ្គេម លើកទី៣០ នៅប្រទេសហ្វីលីពីន កាលពីល្ងាចមិញលោក Felix G.Dalmas គ្រូបង្វឹកក្រុមជម្រើសជាតិ U22 កម្ពុជា បានប្រាប់កូនក្រុមត្រូវត្រៀមខ្លួនឲ្យកាន់តែល្អថែមទៀត ដើម្បីប្រជែងមេដាយមាសជូនជាតិ។
លោក Felix បាននិយាយថា «ថ្ងៃនេះយើងពិតជាធ្វើបានអសា្ចរ្យ ហើយខ្ញុំជឿជាក់លើពួកយើងទាំងអស់គ្នាតាំងពីដើម ខ្ញុំមានទំនុកចិត្តលើកីឡាករទាំង ២០នាក់។ ឥឡូវយើងធ្វើបានមួយដំណាក់កាលហើយ ដូច្នេះយើងត្រូវត្រៀមវគ្គបន្ដក្នុងការឆ្ពោះទៅរកមេដាយ ហើយយើងអត់មានគិតរឿងលេខ៣ អីទេ គឺយើងគិតរឿងពាន យើងដាក់គោលដៅដណ្ដើមមេដាយមាសសិន»។
លោកថា «ឥឡូវបេសកកម្មរបស់យើង មិនទាន់ចប់ទេ យើងត្រូវថែរក្សារៀងកាយរបស់យើង វាមិនបញ្ហារឿងលទ្ធផលទេ បញ្ហាគឺយើងត្រូវការរីកចម្រើនបន្ដទៀត យើងរីកចម្រើនហើយ ការប្រកួតបន្ទាប់ យើងកាន់តែល្អជាងនេះទៀត»៕
ម៉ានីល ៖ ទីបំផុតក្រុមជម្រើសជាតិ U22 កម្ពុជា បានបង្កើតកំណត់ត្រាប្រវត្តិសាស្ដ្រឡើងវគ្គពាក់កណ្ដាលផ្ដាច់ព្រ័ត្រលើកដំបូង ក្នុងការប្រកួតកីឡាស៊ីហ្គេម(SEA Games) លើកទី៣០ នៅប្រទេសហ្វីលីពីន បន្ទាប់ពីលត់ក្រុម U22 ម៉ាឡេស៊ី ដោយលទ្ធផល ៣-១ ក្នុងជំនួបបញ្ចប់ពូល A នៅកីឡដ្ឋាន Rizal Memorial នាទីក្រុងម៉ានីល។
៣ ពិន្ទុដ៏សំខាន់នេះ ស៊ុតបានដោយកីឡាករ អ៊ិន សូដេវីត សៀង ចន្ធា និងកែវ សុផេង ជួយឲ្យកម្ពុជារកបាន ៧ ពិន្ទុស្មើហ្វីលិពីន ត្រូវឡើងទៅជាមួយមីយ៉ាន់ម៉ា ទៅវគ្គបន្ត។ ខណៈដែល នៅចុងម៉ោង ហ្វីលីពីន មានគ្រាប់បាល់ស្មើនឹងកម្ពុជាទៅហើយ តែត្រូវបាន ទីម័រ ដាក់១ គ្រាប់នៅម៉ោងបន្ថែម(ចប់ប្រកួត ៦-១) (ហ្វីលីពីន ខាតមួយគ្រាប់)៕
ខេត្តឧត្តរមានជ័យ ៖ សមាគមអតីតយុទ្ធជនកម្ពុជា រាជធានីភ្នំពេញ បានជូនដំណើរសមាជិកសមាគម ចំនួន១០១គ្រួសារ ដែលស្ម័គ្រចិត្តទៅរស់នៅខេត្តឧត្តរមានជ័យ ដោយទទួលបានផ្ទះ និងដីធ្លីត្រឹមត្រូវពិតប្រាកដ ក្រោយពីពួកគាត់បានចាប់ឆ្នោតយកផ្ទះ និងការផ្តល់ដីលំនៅឋានដែលបានកសាងរួចរាល់ចំនួន១០១ខ្នង ពីសមាគមអតីតយុទ្ធជនកម្ពុជា រាជធានីភ្នំពេញ កាលពីកន្លងទៅនេះ។
ការជូនដំណើរសមាជិកសមាគអតីតយុទ្ធជនកម្ពុជារាជធានីភ្នំពេញធ្វើឡើងនៅព្រឹកថ្ងៃទី៣ ខែធ្នូ ឆ្នាំ២០១៩ តាមមធ្យោបាយរថយន្តក្រុងចំនួន៦គ្រឿង ចេញដំណើរពីស្នងការដ្ឋាននគរបាលរាជធានីភ្នំពេញ ឆ្ពោះទៅខេត្តឧត្តរមានជ័យ ដែលមានការជួយផ្គត់ផ្គង់ឧបត្ថម្ភថវិកាសម្ភារៈ និងការចំណាយផ្សេងៗ ពីសមាគមអតីតយុទ្ធជនកម្ពុជារាជធានីភ្នំពេញ ក្រោមការដឹកនាំដោយអភិបាលរាជធានីភ្នំពេញ និងជាប្រធានកិត្តិយសសមាគអតីតយុទ្ធជនកម្ពុជា រាជធានីភ្នំពេញលោក ឃួង ស្រេង និងប្រធានសមាគមអតីតយុទ្ធជនកម្ពុជា រាជធានីភ្នំពេញ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញ។
សមាជិកសមាគមអតីតយុទ្ធជនកម្ពុជារាជធានីភ្នំពេញដែលធ្វើដំណើរទៅរស់នៅខេត្តឧត្តរមានជ័យ ក៏បានលើកឡើងសំដែងចេញនូវទឹកចិត្តរីករាយដែលសមាគមអតីតយុទ្ធជនកម្ពុជា រាជធានីភ្នំពេញ ក៏ដូចជារាជរដ្ឋាភិបាលកម្ពុជា បានយកចិត្តទុកដាក់គិតគូសុខទុក្ខ និងការរស់នៅរបស់ពួកគាត់។ ពួកគាត់ក៏សូមថ្លែងអំណគុណ និងប្តេជ្ញាតស៊ូទៅរស់នៅទីនោះដើម្បីកសាងជីវភាពថ្មី។
សូមបញ្ជាក់ថា សមាជិកសមាគម១០១គ្រួសារ ពួកគាត់នៅភ្នំពេញ គ្មានផ្ទះ និងទីជម្រកពិតប្រាកដនោះទេ ពួកគាត់រស់នៅបច្ចុប្បន្នក្នុងតំបន់អនាធិបតេយ្យ និងជួលផ្ទះគេរស់នៅបណ្តោះអាសន្ន ក្នុងជីវភាពលំបាក។ ពួកគាត់ក៏បានដាក់ពាក្យស្នើសុំមកសមាគមអតីតយុទ្ធជនកម្ពុជារាជធានីភ្នំពេញ ដើម្បីជួយដោះស្រាយផ្ទះ និងដីធ្លីមួយចំនួនសម្រាប់បង្កបង្កើនផលផ្គត់ផ្គង់ជីវភាពឱ្យកាន់តែល្អប្រសើរ។ទន្ទឹមនោះរាជរដ្ឋាភិបាលកម្ពុជា ក៏ដូចជាសមាគមអតីតយុទ្ធជនកម្ពុជា ក្នុងការឆ្លើយតបទៅនិងគុណបំណាច់របស់ពួកគាត់ដែលលះបង់សព្វបែបយ៉ាង ដើម្បីជាតិនិងមាតុភូមិក៏បានគិតគូ រកដីសម្បទានសង្គមកិច្ច និងបានកសាងផ្ទះជូនដល់ពួកគាត់១០១គ្រួសារ នៅស្រុកចុងកាល់ ខេត្តឧត្តរមានជ័យ ដើម្បីដោះស្រាយការលំបាក។ ផ្ទះកសាងអំពីឈើប្រក់ស័ង្កសីទំហំ ៤ម៉ែត្រគុណ ៦ម៉ែត្រ លើដីលំនៅឋាន ៣០ម៉ែត្រ គុណ ៨០ម៉ែត្រ បំពាក់ដោយភ្លើងសូឡា មានស្រះទឹកមួយ ទំហំ១០០ម៉ែត្រគុណ១០០ម៉ែត្រ ជម្រៅ៤ម៉ែត្រ និងអណ្តូងទឹកស្នប់ចំនួន ៣អណ្តូង ដែលមានការជួយឧបត្តម្ភពីសមាគមអតីតយុទ្ធជនកម្ពុជា រាជធានីភ្នំពេញ៕
