ខេត្តបន្ទាយមានជ័យ៖ ប្រជាកសិករនៅខេត្តបន្ទាយមានជ័យមួយចំនួនកំពុងតែជួបវិបត្តិទៅនិងផលស្រូវដែលសេសសល់ពីភាពរាំងស្ងួត ឈ្មួញឲ្យតម្លៃថោក ធ្លាក់ថ្លៃប្រហែល៥០ភាគរយ បើធៀបនិងឆ្នាំ២០១៨ កន្លងទៅ។

លោកពូ ហេង ជាប្រជាកសិករ រស់នៅក្នុងភូមិគុត្តសតបញ្ជាក់យ៉ាងគ្រៀមក្រំថា៖ កាលពីអំឡុងឆ្នាំ២០១៨កន្លងទៅផលស្រូវប្រភេទនំាចេញ ប្រភេទផ្ការំដួល ក្រុមឈ្មួញបានប្រមូលទិញក្នុង១តោន តម្លៃជាង១ម៉ឺនបាតប្រាក់ថៃ តែមកដល់អំឡុងឆ្នាំ២០១៩នេះក្រុមឈ្មួញឲ្យ១តោន តម្លៃ៥៥០០បាត ខុសតំលៃគ្នាមួយគុណនឹងពីរ ហើយឈ្មួញគេប្រាប់ថា គេមិនចង់ទិញទៀតផង ដោយក្រុមឈ្មួញចាប់អារម្មណ៍តែស្រូវប្រភេទម្លិៈក្រហមតែប៉ុណ្ណោះ។

លោកបន្ថែមថា៖ មិនដឹងមូលហេតុអ្វីបានជាផលស្រូវចុះថោកបែបនេះ ម្យ៉ាងទៀតការធ្វើស្រូវឆ្នាំនេះជួបគ្រោះរាំងស្ងួតធ្វើឲ្យដំណាំស្រូវ មួយចំនួនដែលបូមទឹកដាក់មិនដល់មិនបានផលជួបបញ្ហាស្កក ចំណែកស្រែខ្លះដែលពួកគាត់បូមទឹកដាក់ដល់ហើយបានផលតិចតួចបែរជាលក់មិនចេញ ឈ្មួញឲ្យតម្លៃថោក មិនសមនិងតម្លៃពលកម្ម មិនអាចទទួលយកបាន ណាជំពាក់ប្រាក់ខ្ចីបុលពីធនាគារដើម្បីយកទិញជីបាចស្រូវពេលបានផលលក់មិនចេញសោះឡើយ។
ចំណែកលោក ជា សារុន ជាប្រជាពលរដ្ឋរស់នៅក្នុងភូមិឃុំគុត្តសត ស្រុកអូរជ្រៅ បានសំដែងអារម្មណ៍ស្រដៀងគ្នាថាតម្លៃស្រូវដែលនៅសេសសល់ពីគ្រោះរាំងស្ងួត ដែលពួកគាត់ប្រឹងបាចឬបូមទឹកដាក់បានផលបន្តិចបន្តួចមកគិតពីតម្លៃស្រូវខុសតម្លៃគ្នាឆ្ងាយដោយមិនអាចទទួលយកបានមិនសមនិងកំលាំងពលកម្មឡើយ។ ពួកគាត់សូមអំពាវនាវដល់រាជរដ្ឋាភិបាលជួយដល់ប្រជាកសិករដែលប្រកបរបរកសិកម្មនេះផង បើផលស្រូវចុះថោកបែបនេះរកប្រាក់សងថ្លៃទិញជីមិនរួចនោះទេ។

លោក ប៉ាង វណ្ណាសេត ប្រធានមន្ទីរកសិកម្មខេត្តបន្ទាយមានជ័យបានប្រាប់តាមទូរសព្ទថា៖ ពាក់ព័ន្ធនឹងបញ្ហានេះ វាអាចទាក់ទងទៅនឹងគុណភាពស្រូវ ដោយលោកបញ្ជាក់ថា នៅខាងស្រុកព្រះនេត្រព្រះ តម្លៃប្រភេទស្រូវរំដួល ១តោន បានតម្លៃ៨០០០បាតដែរ ហើយចំពោះស្រូវប្រជាកសិករនៅខាងស្រុកអូរជ្រៅវិញ លោកមិនទាន់បានចុះទៅពិនិត្យជាក់ស្តែងនោះទេ ហើយលោកនឹងចុះទៅពិនិត្យ។ លោកថា លោកគ្រាន់តែមានការទំនាក់ទំនងទៅប្រធានមន្ទីរពាណិជ្ជកម្មដើម្បីឲ្យក្រុមហ៊ុនបៃតងចុះមកទិញមិនមានវិធានការអ្វីជួយជាប្រាក់កាសនោះទេ ម្យ៉ាងទៀតការប្រមូលផលស្របគ្នាច្រើន ដូចជាប្រទេសថៃ វៀតណាមក៏គេប្រមូលផលបានដែរហើយកសិករយើងបង្ខំលក់គាត់មិនមានជង្រុកទុកដូច្នេះទើបជួបផលវិបាកបែបនេះ ហើយបើទុកយូរផលស្រូវវានិងឡើងតម្លៃវិញហើយ៕

បន្ទាយមានជ័យ ៖ លោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានធ្វើការណែនាំដល់អាជ្ញារស្រុក ក្រុង ឃុំ និងភូមិនៅក្នុងខេត្ត ក្នុងការពិនិត្យមើលស្ថានភាពទឹក និងណែនាំដល់បងប្អូនប្រជាពលរដ្ឋ កសិករ មិនអនុញ្ញាតឲ្យបង្កបង្កើនផលស្រូវប្រាំងជាលើកទី២ នោះទេ ដើម្បីជាវិធានការក្នុងការថែរក្សាទឹកទុកសម្រាប់ប្រើប្រាស់នារដូវប្រាំងខាងមុខ ក៏ដូចជាអនុវត្តតាមសារាចរនៃនាំរបស់រាជរដ្ឋាភិបាលកម្ពុជា ក្នុងការថែរក្សាទឹកទុក ដោយសារព្រះរាជាណាចក្រកម្ពុជាយើង ក៏ដូចជាបណ្តាប្រទសក្នុងតំបន់ទទួលរងនូវឥទ្ធិពលយ៉ាងធ្ងន់ធ្ងរពីបាតុភូត អែលនីណូ (EI Nino)ដែលបានបង្កឲ្យមានកត្តាអវិជ្ជមានជាច្រើនដូចជា ៖ អាកាសធាតុមានសភាពក្តៅហួតហែងខ្លាំង រដូវវស្សាមកដល់មានភាពយឺតយ៉ាវ របាយទឹកភ្លៀងមានភាពរអាករអួលមិនស្មើគ្នា របបទឹកទន្លេមេគង្គមានការប្រែប្រួលខ្លាំង ពិសេសជំនន់មានតែមួយលើក បន្ទាប់មកក៏ស្រកចុះជាបន្តបន្ទាប់ដល់កម្រិតទាបបំផុតមួយដែលមិនធ្លាប់ជួបប្រទះក្នុងរយៈកាលកន្លងមក។

ការលើកឡើង នឹងជម្រុញដល់អាជ្ញាធរមូលដ្ឋាន នេះ ត្រូវបានលើកឡើងនៅក្នុងកិច្ចប្រជុំ សាមញ្ញលេីកទី៦ អាណត្តិ ទី៣ របស់ក្រុមប្រឹក្សាខេត្ត ដែលធ្វើឡើងក្រោមអធិបតីភាព លោក ខេង ស៊ុម ប្រធានក្រុមប្រឹក្សាខេត្ត បន្ទាយមានជ័យ រួមនឹងមានការចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សា ប្រធានមន្ទីរ អង្គភាពពាក់ព័ន្ធជុំវិញខេត្ត អភិបាលក្រុង-ស្រុក បានចូលរួមនៅសាលប្រជុំ ក សាលាខេត្តបន្ទាយមានជ័យ នាថ្ងៃចន្ទ ទី៩ ខែធ្នូ ឆ្នាំ២០១៩។

លោក អ៊ុំ រាត្រី ក៏បានលើកឡើងទៀតថា ៖ ជាក់ស្តែងឥលូវនេះទឹកនៅក្នុងតំបន់ និងស្រុកមួយចំនួន តាមស្ទឹង បឹង បួរ មានការស្រករីងជាបណ្តើរៗហើយ ដោយក្នុងនោះស្រុកមង្គលបូរី ទឹកស្ទឹងកំពុងតែមានភាពស្រកលឿន ហើយកន្លងទៅស្រុកក្រុងទាំង៩ នៅក្នុងខេត្ត ពិសេសស្រុកមង្គលបូរីតែម្តង បានប្រឈមនូវការខ្វះខាត់ទឹកធ្ងន់ធ្ងរជាគេ បន្ទាប់មកមានស្រុកអូរជ្រៅ ស្វាយចេក ព្រះនេត្រព្រះ ថ្មពួក និងស្រុកមួយចំនួនទៀតផងដែរដែលទទួលរងនូវការខ្វះខាតទឹកនាឆ្នាំកន្លងទៅ ផង។

ដើម្បីជាវិធានការ អភិបាលខេត្ត ក៏បានជម្រុញ អាជ្ញាធរ ស្រុកក្រុងទាំង៩ នៅក្នុងខេត្ត អ្នកពាក់ព័ន្ធ ត្រូវមានវិធានការថែរក្សាទឹកទុកប្រេីប្រាស់ តាមរយៈ ការស្តុបទឹកទុក តាមស្ទឹង បឹង បួរ តាមដែលអាចធ្វើទៅបាន ម្យ៉ាងវិញទៀត ត្រូវប្រេីប្រាស់ទឹកមានលក្ខណៈសន្សំសំចៃខ្ពស់ទៅតាមលទ្ធភាព។

សូមបញ្ជាក់ថា ៖ យោងតាមសារាចរណែនាំស្ដីពី ការចាត់វិធានការរក្សាទឹកទុក របស់រាជរដ្ឋាភិបាលកម្ពុជា លេខ១១ សរណន ចុះថ្ងៃទី២១ ខែវិច្ឆិកា ឆ្នាំ ២០១៩កន្លងទៅ បានធ្វេីការណែនាំដូចខាងក្រោម ៖ ១- ការបង្កបង្កើនផលស្រូវប្រាំងក្នុងឆ្នាំ ២០១៩-២០២០ គឺអាចធ្វើបានតែមួយដងប៉ុណ្ណោះ ដោយមិនអាចធ្វើស្រូវប្រាំងលើកទីពីរបានទេ បើទោះបីជាទឹកនៅតាមបណ្ដាអាង ដែលស្តុបទុក និងកន្លែងមួយចំនួនដែលមានទឹកធម្មតាក៏ដោយ គួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ និងដាំដំណាំរួមផ្សំផ្សេងទៀតក្រៅពីដំណាំស្រូវ។ ២-ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវចូលរួមចាត់វិធានការរក្សាទឹកទុកឲ្យបានល្អដើម្បីផ្គត់ផ្គង់សម្រាប់តែការប្រើប្រាស់ប្រចាំថ្ងៃតែប៉ុណ្ណោះរហូតដល់ពេលភ្លៀងធ្លាក់ល្អប្រសើរឡើងវិញ៕

ខេត្តព្រះវិហារ ៖ ពូជកូនត្រីចម្រុះចំនួន១ម៉ឺនកូន ត្រូវបានមេបញ្ជាការវរសេនាធំលេខ១៦ថៃ ឈរជើងជួរមុខទិសទី១ប្រាសាទព្រះវិហារ ធ្វើការផ្តល់ជូនជាលើកទីបី មេបញ្ជាការកងពលតូចអន្តរាគមន៍លេខ៨ ដើម្បីធ្វើពិធីប្រលែងជាបន្តបន្ទាប់ ចូលទៅក្នុងស្រះទឹក ដែលមានទំហំ៦០០ម៉ែត្រ និងជម្រៅជាង៤ម៉ែត្រ។

ពិធីនេះបានប្រារព្ធធ្វើឡើងនាព្រឹកថ្ងៃចន្ទទី១០ ខែធ្នូ ឆ្នាំ២០១៩ ស្ថិតក្រោមវត្តមានលោកឧត្តមសេនីយ៍ត្រី ច័ន្ទ សុខុន មេបញ្ជាការរង តំណាងដ៏ខ្ពង់ខ្ពស់ឯកឧត្តម ឧត្តមសេនីយ៍ទោ លី ស៊ុន មេបញ្ជាការកងពលតូចអន្តរាគមន៍លេខ៨។

ក្រោមការអញ្ជើញចូលរួមពីសំណាក់លោកវរសេនីយ៍ឯក អក្ខរៈផុន មួនប្រាដាប់ មេបញ្ជាការវរសេនាធំលេខ១៦ និងជាមេបញ្ជាការទិសទី១ ប្រាសាទព្រះវិហារ និងលោក វរសេនីយ៍ឯក ប៊ុនសឺម ប៊ុនបាំរ៉ុង ប្រធានក្រុមការងារទំនាក់ទំនងព្រំដែនថៃ.កម្ពុជា ប្រចាំតំបន់ទី១ និងជាមេបញ្ជាការរងវរសេនាធំលេខ១៦ ព្រមទាំងក្រុមយុវជនស្ម័គ្រចិត្តអន្តរៈក្រសួង និងនាយ ពលទាហាន គ្រួសារកងទ័ពយ៉ាងច្រើនកុះករ។

លោកឧត្តមសេនីយ៍ត្រី ច័ន្ទ សុខុន មេបញ្ជាការរង នាយសេនាធិការ បានថ្លែងថា កូនត្រីដែលអង្គភាពធ្វើការប្រលែងនៅថ្ងៃនេះមានចំនួន១ម៉ឺនកូន។ ក្នុងនោះមានពូជកូនត្រីអណ្តែង កូនត្រីឡាប់យ៉ា និងពូជកូនត្រី ប្រភេទផ្សេងៗដ៏ទៃទៀតផងដែរ។ លោកថា ពូជត្រីចម្រុះទាំងអស់នេះ គឺជាការជួយឧបត្ថម្ភពីសំណាក់មេបញ្ជាការវរសេនាធំលេខ១៦ថៃ។នេះក៏ជាលើកទីបីដែរ ដែលអង្គភាពយើងខ្ញុំទទួលបាន ការជួយឧបត្ថម្ភ នូវពូជកូនត្រីចម្រុះ ដើម្បីធ្វើការប្រលែង នៅក្នុងស្រះទឹកទំហំទទឹង៣០០ម៉ែត្រ បណ្តោយ ៦០០ម៉ែត្រ និងមានជម្រៅជាង៤ម៉ែត្រ។ មានទីតាំងស្ថិតនៅក្នុងទីបញ្ជាការកងពលតូចអន្តរាគមន៍លេខ៨ ក្នុងភូមិចំបក់សែនជ័យ ឃុំកន្ទួត ស្រុកជាំក្សាន្ត ខេត្តព្រះវិហារ។

លោកឧត្តមសេនីយ៍ត្រី ច័ន្ទ សុខុន មេបញ្ជាការរង នាយសេនាធិការកងពលតូចអន្តរាគមន៍លេខ៨ បានលើកឡើងដោយបញ្ជាក់បន្ថែមថា កងកម្លាំងប្រដាប់អាវុធកម្ពុជា និងកងកម្លាំងប្រដាប់អាវុធថៃ ឈរជើងជួរមុខតាមបណ្តោយព្រំដែន នៃប្រទេសទាំងពីរ នៅតែបន្តកិច្ចសហប្រតិបត្តិការល្អ ទាំងការដើរល្បាតរួមគ្នា តាមភូមិសាស្ត្រដែលអង្គភាពខ្លួនទទួលខុសត្រូវ ដោយយកចិត្តទុកដាក់ខ្ពស់នៅក្នុងការជួយគ្នាទប់ស្កាត់ នូវរាល់បទល្មើសគ្រប់ប្រភេទ ដែលលបលួចឆ្លងដែនដោយខុសច្បាប់។

ជាមួយគ្នានោះលោកឧត្តមសេនីយ៍ត្រី ច័ន្ទ សុខុន បានលើកឡើងថា ចំពោះត្រីដែលអង្គភាពធ្វើការប្រលែងទាំងអស់នេះ វាមិនមែនជារបស់បុគ្គលណាម្នាក់នោះទេ។ ដូច្នេះយើងត្រូវរួមគ្នាថែរក្សា ដោយមិនអនុញ្ញាតឲ្យនាំយកនូវឧបករណ៍ដែលខុសច្បាប់ ចុះធ្វើការនេសាទ នៅក្នុងស្រះទឹកនេះជាដាច់ខាត។ បើពុំនោះទេនិងត្រូវទទួលខុសត្រូវដោយខ្លួនឯង ក្រោយពីក្រុមការងារបង្ក្រាបបាន។

សូមជម្រាបថា កាលពីឆ្នាំ២០១៧ មេបញ្ជាការវរសេនាធំលេខ១៦ថៃ បានធ្វើការផ្តល់ជូននូវពូជកូនត្រីចម្រុះចំនួន៣ម៉ឺនកូន ដល់អង្គភាពកងពលតូចអន្តរាគមន៍លេខ៨ម្តងហើយ។ ហើយនៅចុងឆ្នាំ ២០១៩នេះ មេបញ្ជាការវរសេនាធំលេខ១៦ថៃ បានបន្តជួយឧបត្ថម្ភនៅពូជកូនត្រីចម្រុះចំនួនពីដងសរុបចំនួន៣ម៉ឺនកូនបន្ថែមទៀត៕

ដោយ ៖ កូវ ប៊ុនហេង

ព្រះវិហារ ៖ ប្រភពព័ត៌មាន បានឱ្យដឹងថា នៅតាមជួរភ្នំ ដងរែក ជាពិសេស នៅតំបន់ប្រាសាទព្រះវិហារ ជាប់ព្រំដែន ថៃ និងជាទូទៅនៅទូទាំងតំបន់វាលទំនាបក្នុងខេត្តព្រះវិហារ អាកាសធាតុបានបន្តចុះត្រជាក់ខ្លាំង ចាប់តាំងពីយប់ថ្ងៃទី៣ ដល់ទី៩ ខែធ្នូ ឆ្នាំ២០១៩ ដែលភាពចុះត្រជាក់ខ្លាំងបែបនេះ ខុសប្លែកកាលពីឆ្នាំ២០១៨។

មន្ត្រីអាជ្ញាធរជាតិព្រះវិហារ ប្រចាំការនៅប្រាសាទព្រះវិហារ បានឱ្យដឹងនៅថ្ងៃទី៨ ខែធ្នូ ឆ្នាំ២០១៩ ថា សីតុណ្ហភាពនៃអាកាសធាតុបានចុះត្រជាក់ខ្លាំងនៅពេលយប់ចន្លោះ ១០-១១អង្សាសេ និង ១៧-១៨ អង្សាសេ នៅពេលថ្ងៃរសៀល ដែលស្ថានភាពនេះបានអូសបន្លាយ ចាប់តាំងពីថ្ងៃទី៣ ដល់ទី៩ ខែធ្នូ ឆ្នាំ២០១៩។ មន្ត្រីដដែលបន្តថា អាកាសធាតុនៅចុងឆ្នាំ២០១៩ នេះ ត្រជាក់ខ្លាំងជាងកាលពីឆ្នាំ២០១៨ ថែមទាំងលាយទ្បំទៅដោយការចុះអ័ព្ទ និងមានខ្យល់បក់ កាន់តែត្រជាក់ថែមទៀត ដែលធ្វើឲ្យពិបាកទ្រាំមែនទែន ហើយទាំងកងកម្លាំង និងប្រជាពលរដ្ឋបាននាំគ្នារកកន្លែងកំដៅ នឹងអង្គុយអាំងភ្លើងប្រើដោយអុស។

មន្ត្រីដដែលបានបន្តថា ចំណែកកងកម្លាំងឈរជើងនៅតំបន់ ប្រាសាទព្រះវិហារ មិនប្រឈមនឹងជំងឺអំពីការចុះត្រជាក់ខ្លាំង បែបនេះទេ ព្រោះរាជរដ្ឋាភិបាលបានចែកអាវរងាក្រាស់ៗ និង ថ្នាំសង្កូវជូនកងកម្លាំងជាប្រចាំរួចអស់ហើយ។

មន្ត្រីធនធានទឹក និងឧតុនិយម ខេត្តព្រះវិហារ បានឱ្យដឹងថា អាកាសធាតុចុះ ត្រជាក់នេះ បានកើតឡើងនៅទូទាំងខេត្ត ខុសគ្នាបន្តិចបន្តួចពីនៅតំបន់ប្រាសាទព្រះវិហារ គឺនៅពេលយប់ ១៣ ដល់១៥ អង្សាសេ និង ១៦ ដល់១៨ អង្សាសេ នៅពេលថ្ងៃរសៀល។ មន្ត្រីដដែលបានបន្តថា អាកាសធាតុចុះ ត្រជាក់បានអូសបន្លាយពេលវេលាដល់ថ្ងៃទី៩ ខែធ្នូ ឆ្នាំ២០១៩ ហើយអាចបន្តរហូតដល់ថ្ងៃទី១៣ ខែធ្នូ ខាងមុខ ដូច្នេះសូម បងប្អូនត្រៀម អាវ រងារ និងត្រៀមបង្ការថែទាំសុខភាពឲ្យបានល្អ ជៀសវាងនូវការកើតជំងឺផ្សេងៗ ដែលបង្កឡើងដោយ អាកាសធាតុត្រជាក់ខ្លាំងបែបនេះ ៕ 

 ​ភ្នំពេញ ៖ កម្លាំង​នគរបាល​រាជធានី​ភ្នំពេញ​ជាង​៨០០​នាក់​បាន​ប្រមូលផ្តុំ​ជា​ទ្រង់ទ្រាយ​ធំ​ទទួល​ផែនការ​និង​បទបញ្ជា​ថ្នាក់លើ ដើម្បី​ចេញ​ប្រតិបត្តិ​ការពង្រឹង​សន្តិសុខ ថែរក្សា​សុវត្ថិភាព ជូន​ដល់​ប្រជាពលរដ្ឋ និង​ថ្នាក់ដឹកនាំ​កំពូលៗ​មកពី​បណ្តា​ប្រទេស​នានា​ដែល​គ្រោង​ចូលរួម​ក្នុង កិច្ចប្រជុំ​អាស៊ី​-​អឺរ៉ុប លើក​ទី​១៣ និង​កិច្ចប្រជុំ​ផ្សេងៗ​ទៀត​នៅពេល​ឆាប់ៗ​ខាងមុខនេះ​។​

​លោក ស ថេត អគ្គ​ស្នងការរង​នគរបាលជាតិ​និង​ជា​ស្នងការ​នគរបាល​រាជធានី​ភ្នំពេញ បាន​ថ្លែង​រំលឹក​ដល់​កងកម្លាំង​ក្រោម​ឱវាទ​ទាំងអស់​ត្រូវ​ប្រមូលផ្តុំ​និង​ការគ្រប់គ្រង​កម្លាំង​ឱ្យបាន​ច្បាស់លាស់​ហើយ​ត្រូវ​មានមុខ​ប្រចាំការ​ទាំងយប់​ទាំង​ថ្ងៃ​ដើម្បី​សហការ​ចេញ​ដោះស្រាយ​សភាពការណ៍​សន្តិ​សុខ និង​ការចេញ​ជួយសង្គ្រោះ​ប្រជាពលរដ្ឋ​និង​បង្ការ​ទប់ស្កាត់​បទល្មើស​ផ្សេងៗ​ទៀត ។

​លោក​បន្តថា ជាពិសេស​ត្រូវ​ធានា​ឱ្យបាន​សុវត្ថិភាព​គ្រប់គ្រាន់​ជូន​ដល់​ប្រជាពលរដ្ឋ និង​ថ្នាក់ដឹកនាំ​កំពូល​ទាំង​នៅក្នុង​ប្រទេស​និង​ថ្នាក់ដឹកនាំ​កំពូល​បណ្តា​ប្រទេស​ដែល​នឹងត្រូវ​ចូលរួម​ក្នុង​កិច្ចប្រជុំ​កំពូល​អាស៊ី​-​អឺរ៉ុប លើក​ទី​១៣ ដែល​កម្ពុជា​ធ្វើជា​ម្ចាស់ផ្ទះ​នាពេលខាងមុខ​នេះ ។ លោក​បន្តថា កិច្ចការងារ​ការពារ​សន្តិសុខ​ឱ្យ​រឹងមាំ​នេះ​ផងដែរ​ឯក​ឧ​ត្ត​ក៏បាន​រំលឹក​ត្រូវតែ​ទាមទារ​មាន​កម្លាំង​គ្រប់គ្រង​ក្នុង​ដៃ​ឱ្យបាន​គ្រប់គ្រាន់​នៅពេល​មាន​សភាពការណ៍​ណាមួយ​កើតឡើង​កម្លាំង​ត្រូវ​ចេញ​ប្រតិបត្តិការ​ជាបន្ទាន់​ដើម្បី​ដោះស្រាយ​សភាពការណ៍​ទាន់ពេលវេលា​។​

​លោក ស ថេត ក៏បាន​ជម្រុញ​ផងដែរ​ឱ្យ​កងកម្លាំង​នគរបាល​រាជធានី​ភ្នំពេញ ត្រូវគោរព​វិន័យ​កងកម្លាំង​នគរបាលជាតិ​ឱ្យបាន​ម៉ឺងម៉ាត់ ទាំង​ស្លៀកពាក់​ឯកសណ្ឋាន​ឱ្យបាន​សមរម្យ ការគោរព​ថ្នាក់ដឹកនាំ​និង​គោរព​អនុវត្ត​បទបញ្ជា​ថ្នាក់លើ ។ ចៀសវាង​ធ្វើ​សកម្មភាព​ទាំងឡាយណា​ខុសពី​ព​វិន័យ​កងកម្លាំង​នគរបាលជាតិ​និង​ខុស​គោលការណ៍​ច្បាប់ ៕

ខេត្តបាត់ដំបង ៖ ពិធីបើកពិព័រណ៍ការងារ ខេត្តបាត់ដំបង ឆ្នាំ២០១៩ បានផ្តល់ឱកាសការងារជាច្រើនកន្លែងពីក្រុមហ៊ុនធំៗចំនួន ៥០ ដល់យុវជន សិស្ស/និស្សិត និងអ្នកស្វែងរកការងារធ្វើនៅក្នុងខេត្តបាត់ដំបង។ ពិព័រណ៍ការងាររយៈពេលពីរថ្ងៃ គឺថ្ងៃទី០៦ និង០៧ ខែធ្នូ ឆ្នាំ២០១៩ កន្លងទៅនេះ នៅបរិវេណវិទ្យាស្ថានបច្ចេកវិទ្យាបាត់ដំបង តាមបណ្តោយផ្លូវជាតិលេខ៥ ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង។

លោក គួច សុមាន អនុប្រធានទីភ្នាក់ងារជាតិមុខរបរ និងការងារ(NEA) លើកឡើងថា កន្លងមកពិព័រណ៍ការងារនេះត្រូវបានរៀបចំឡើងចំនួន ១៣ លើករួចមកហើយ ដែលកម្រិតថ្នាក់ជាតិធ្វើនៅរាជធានីភ្នំពេញមានចំនួន ៩ លើក និងថ្នាក់ខេត្តចំនួន ៤លើក។ សម្រាប់ខេត្តបាត់ដំបង ពិពរណ៍នេះគឺជាព្រឹត្តិការណ៍ការងារដ៏ធំលើកទី២ ដែលត្រូវបានរៀបចំដើម្បីបង្កើតជាវេទិការជួបជុំគ្នារវាងនិយោជក គ្រឹះស្ថានអប់រំបណ្តុះបណ្តាល អ្នកស្វែងរកការងារ និងសិស្ស-និស្សិត ក្នុងការជំរុញសកម្មភាពទីផ្សារការងារ ដោយទទួលបានការចូលរួមតាំងផ្សព្វផ្សាយពីសំណាក់ក្រុមហ៊ុន សហគ្រាស គ្រឹះស្ថាន ក្រសួង-ស្ថាប័នរដ្ឋ និងអង្គការជាតិ-អន្តរជាតិ ចំនួន ៥០ ស្ថាប័ន ដែលនាំមកនូវឱកាសការងារតាមវិស័យនានាជាច្រើនកន្លែង ហើយអ្នកចូលរួមដែលរំពឹងទុកប្រមាណជា ៥ពាន់នាក់ នឹងទទួលបានឱកាសក្នុងការជួបនិងដាក់ពាក្យសម្ភាសន៍រកការងារដោយផ្ទាល់ជាមួយនិយោជក ព្រមទាំងការបង្កើតបណ្តាញទំនាក់ទំនងផ្នែកធនធានមនុស្ស ក្នុងចំណោមភាគីពាក់ព័ន្ធ ។

ក្នុងឱកាសនោះ ក៏នឹងមានការរៀចចំស្របគ្នាផងដែរនូវ សិក្ខាសាលាណែនាំអាជីពការងារ និងវិជ្ជាជីវៈ ដែលជាវេទិការចែករំលែកចំណេះដឹង បទពិសោធន៍ ព័ត៌មានទីផ្សារការងារ មតិយោបល់ និងការអនុវត្តល្អនានា ដែលមានសារសំខាន់សម្រាប់ការរៀបចំផែនការអាជីព ព្រមទាំងការតម្រង់ទិសសម្រាប់ការសិក្សា និងចូលទីផ្សារការងារ ពីសំណាក់វាគ្មិនជាតិ និងអន្តរជាតិដែលមានបទពិសោធន៍ និងជំនាញ។

លោក គួច សុមាន បញ្ជាក់បន្ថែមទៀតថា ការរៀបចំពិព័រណ៍ការងារខេត្តបាត់ដំបង នាថ្ងៃនេះ គឺជាការចូលរួមចំណែកយ៉ាងសកម្មពីសំណាក់ភាគីពាក់ព័ន្ធទាំងអស់ ជាពិសេសរដ្ឋបាលខេត្តបាត់ដំបង ក្នុងការលើកកម្ពស់ និងជំរុញទីផ្សារការងារក្នុងខេត្តរបស់ខ្លួន ឱ្យកាន់តែមានភាពសម្បូរបែបសម្រាប់យុវជន និងអ្នកស្វែងរកការងារ ក៏ដូចជានិយោជកអាចផ្សព្វផ្សាយដំណឹងជ្រើសរើសបុគ្គលិកបានយ៉ាងទូលំទូលាយ។

លោកជឿជាក់ថា តាមរយៈ វត្តមានរបស់មជ្ឈមណ្ឌលការងារ ក្នុងខេត្តបាត់ដំបង និងកិច្ចសហការជិតស្និទ្ធជាមួយអាជ្ញាធរពាក់ព័ន្ធ និងអង្គការដៃគូ ពិព័រណ៍ការងារបែបនេះ អាចនឹងត្រូវបានរៀបចំជាថ្មីម្តងទៀត ឬញឹកញាប់នៅក្នុងខេត្តបាត់ដំបង ដើម្បីពង្រីកលទ្ធភាពទទួលបានការងារ និងជ្រើសរើសកម្លាំងពលកម្មកាន់តែងាយស្រួល និងពង្រីកប្រភពព័ត៌មានអំពីឱកាសការងារកាន់តែខិតជិតដល់ប្រជាពលរដ្ឋ៕

ភ្នំពេញ ៖ នៅវេលាម៉ោង ៤រសៀលថ្ងៃទី៨ ខែធ្នូ ឆ្នាំ២០១៩ មានករណីរថយន្តមួយគ្រឿងម៉ាកកូរ៉ូឡា ពាក់ស្លាកលេខ 1AQ-3750 សង្ស័យជា មន្ត្រីកងរាជអាវុធហត្ថរាជធានីភ្នំពេញដែលបច្ចុប្បន្នមានមុខងារជាជំនួយការកងរាជអាវុធហត្ថខណ្ឌព្រែកព្នៅ។

តាមប្រភពព័ត៌មាន បានអោយដឹងថា មុនកើតហេតុដោយសារតែរឿងគ្រាន់តែបើកបរតាមដងផ្លូវមើលគ្នាបន្តិចបន្តួចសោះ ស្ទុះចុះចេញពីរថយន្តមកវ៉ៃអ្នករត់ Pass App បង្កអោយមានរបួសស្នាម ហើយព្យាយាមបើករថយន្តរត់គេចតែត្រូវប្រជាពលរដ្ឋដេញតាមឃាត់រហូតដល់ស្ពានដែកចំការដូង ក្រោយពេលកើតហេតុសមត្ថកិច្ចបានចុះដល់ទីតាំងខាងលើ ដើម្បីធ្វើការសាកសួរ តែមិនទាន់ដឹងថា ដោះស្រាយយ៉ាងណានៅឡើយទេ៕

ខេត្តព្រះវិហារ ៖ កាលពីព្រឹកថ្ងៃទី៨ ខែធ្នូឆ្នាំ២០១៩ អ្នកយកព័ត៌មាន បានចុះទៅផ្តិតយករូបភាពប្រជាពលរដ្ឋដែលកំពុងរស់នៅភូមិឆែប ១ ឃុំកំពុងស្រឡៅ ១ ស្រុកឆែប ខេត្តព្រះវិហារ  បងប្អូនអាជីករក៏ដូចជាបងប្អូនប្រជាពលរដ្ឋបានបញ្ជាក់ប្រាប់អ្នកយកព័ត៌មានថា ចំពោះប្រជាពលរដ្ឋខ្មែរ ក៏ដូចជាប្រជាពលរដ្ឋឡាវ ដែលនៅជាប់ព្រំប្រទល់ដែន គឺពួកគាត់មានការទំនាក់ទំនងគ្នាបានល្អ ដូចជាការដឹកទំនិញបន្តិចបន្ទួចទៅលក់នៅស្រុកមឿងខូង ខេត្តចំប៉ាសាក់ ប្រទេសឡាវ ។

ខាងភាគីខ្មែរ គឺមានប្រេង សាំង អង្ករ និងបន្លែ បង្កា បន្តិចបន្តួចទៅលក់នៅផ្សារឡាវ គឺដឹកជញ្ជូនតាមការណូត។ ចំណែកឯភាគីឡាវ តែងតែយក ត្រី លៀស ខ្ចៅ ខ្យង មកលក់នៅផ្សារខ្មែរដូចគ្នាដែរ។ ចំពោះការ ឈឺស្កាត់យប់ព្រលប់ខាងភាគីឡាវតែងតែ យោគយល់ដល់ប្រជាពលរដ្ឋខ្មែរ អោយទៅសំរាកនៅមន្ទីពេទ្យរបស់គេផងដែរ មិនថាថ្ងៃ ឬយប់នោះទេ អោយតែបងប្អូនមានសមត្តិភាពទៅព្យាបាល។

ចំពោះប្រជាពលរដ្ឋឡាវ ក៏អាចមកសំរាកព្យាបាលនៅមន្ទីរពេទ្យបង្អែកខ្មែរយើងបានដូចគ្នា។

គួរបញ្ជាក់ថា តំបន់កោះស្មៅនេះ មានទន្លេបែកចេញជាច្រើន ជាប់ព្រំប្រទល់គ្នា រាល់សកម្មភាពការចុះនេសាទ ជាលក្ខណៈគ្រួសារ របស់បងប្អូនប្រជាពលរដ្ឋកម្ពុជា និងបងប្អូនប្រជាពលរដ្ឋឡាវ តែងតែមានការយោគយល់ នឹងមានការទំនាក់ទំនងល្អជាមួយគ្នាជានិច្ច ក្នុងការដោះដូរទំនិញគ្នាទៅវិញទៅមក៕

ភ្នំពេញ ៖ មកដល់ត្រឹមខែធ្នូ ឆ្នាំ២០១៩នេះ ការសាងសង់ផ្លូវល្បឿនលឿនភ្នំពេញ-ព្រះសីហនុ ដែលជាផ្លូវល្បឿនលឿនដំបូងគេនៅកម្ពុជានោះ ដែលបាន​បើកការដ្ឋាន​សាងសង់ កាលពី​ថ្ងៃទី២២ ខែមីនា ឆ្នាំ២០១៩ កន្លង​ទៅ សម្រេច​បាន ៧,៣០% ហើយ ហើយគ្រោងនឹងបញ្ចប់នៅចុងឆ្នាំ ២០២២។ នេះបើយោងតាមក្រសួង​សាធារណការ និង​ដឹកជញ្ជូន។

​កាលពីថ្ងៃទី៨ ខែធ្នូ ឆ្នាំ​២០១៩ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូនបានដឹកនាំគណៈប្រតិភូក្រសួង អញ្ជើញចុះពិនិត្យមើលវឌ្ឍនភាពនៃការសាងសង់ផ្លូវល្បឿនលឿនរាជធានីភ្នំពេញ-ក្រុងព្រះសីហនុ ដោយមានការចូលរួមពីមន្ត្រីជំនាញពាក់ព័ន្ធ តំណាងក្រុមហ៊ុនសាងសង់ តំណាងក្រុមហ៊ុនត្រួតពិនិត្យបច្ចេកទេស និងភាគីពាក់ព័ន្ធ។

គម្រោងផ្លូវល្បឿនលឿនរាជធានីភ្នំពេញ-ក្រុងព្រះសីហនុ ប្រវែងប្រមាណ ១៩០,០៣៥ គីឡូម៉ែត្រ និងគ្រោងប្រើប្រាស់ថវិកាវិនិយោគ ប្រមាណ ២ ពាន់លានដុល្លារសហរដ្ឋអាមេរិក ដែលបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ រហូតមកដល់ពេលនេះដំណើរការសាងសង់សម្រេចបាន ៧,៣០% ហើយគិតត្រឹមខែវិច្ឆិកា ឆ្នាំ២០១៩។ ផ្លូវនេះតភ្ជាប់ពី ភូមិ ១ សង្កាត់សំរោងក្រោម ខណ្ឌពោធិ៍ សែន ជ័យ រាជធានីភ្នំពេញ ដល់ក្រុងព្រះសីហនុ។

ផ្លូវនេះអនុវត្តការងារសាងសង់ដោយក្រុមហ៊ុន Cambodian PPSHV Expressway Co., Ltd និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD. គ្រោងចំណាយថវិកាសាងសង់ប្រមាណ ២ ពាន់លានដុល្លារសហរដ្ឋអាមេរិក ប្រើរយៈពេលសាងសង់៤៨ខែ មានគន្លងផ្លូវចំនួន៤គន្លង ទទឹង ២៤,៥ម៉ែត្រ មានផ្លូវបំបែកទិស៧កន្លែង កន្លែងឈប់សម្រាកចំនួន៣កន្លែង ចំណតរថយន្ត១កន្លង មណ្ឌលប្រតិបត្តិការនិងថែទាំចំនួន៤កន្លង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥ កន្លែង ឆ្លងកាត់រាជធានីភ្នំពេញប្រមាណ ៨,៣ គីឡូម៉ែត្រ និងខេត្តចំនួន ០៤ ទៀត ក្នុងនោះរួមមាន ខេត្តកណ្តាលប្រវែងប្រមាណ ៩,១ គីឡូម៉ែត្រ ខេត្តកំពង់ស្ពឺប្រវែងប្រមាណ ៨០,៨គីឡូម៉ែត្រ ខេត្តកោះកុងប្រវែងប្រមាណ ១,៩២ គីឡូម៉ែត្រ និងខេត្តព្រះសីហនុប្រវែងប្រមាណ ៨៩,៨៩គីឡូម៉ែត្រ៕

ខេត្តកំពង់ចាម ៖ នៅថ្ងៃទី០៨ ធ្នូ ឆ្នាំ២០១៩ ស្ថិតនៅឃុំបាធាយ ស្រុកបាធាយ ខេត្តកំពង់ចាមមាន ការភ្ញាក់ផ្អើលជាខ្លាំងនៅកន្លែងរោងការខណៈដែលស្ត្រីម្នាក់ពរកូនស្រីខ្លួនមកចូលក្នុងរោងការ អះអាងថាខ្លួនជាប្រពន្ធរបស់បុរសម្នាក់ដែលលួចមកការប្រពន្ធក្រោយស្ងាត់ៗដូចខ្លួនមិនមានរឿងអ្វីកើតឡើងអញ្ចឹង។

យោងតាមប្រភពព័ត៌មានបានអោយដឹងថាស្ត្រីរងគ្រោះ ដែលជាអតីតប្រពន្ធដើម មិនទាន់ចប់សាលក្រម ឈ្មោះ រិន រចនា អាយុ១៩ឆ្នាំ បានបីស្រីកូនតូចចូលតវ៉ានៅរោងការ ក្នុងពេលដែលអតីតប្តី ឈ្មោះ ឆែមសុខលី កំពុងតែសំពះផ្ទឹមកាត់សក់ នៅវេលាព្រឹកថ្ងៃអាទិត្យ ទី៨ ខែវិច្ឆិកាឆ្នាំ២០១៩នេះធ្វើព្រងើយ បណ្តាលអោយនាងស្រក់ទឹកភ្នែកគួរអោយអាសូរបំផុត។

ទោះជាយ៉ាងណាមិនមានអំពើហឹង្សាណាមួយកើតឡើងទេ ដោយគ្រាន់តែមានប្រជាពលរដ្ឋជាច្រើនចោមរោមមើល បន្សល់ទុកក្តីអានិតចំពោះប្អូនស្រីកំសត់ត្រូវប្តីតិរិច្ចានលួចមកការស្ងាត់ៗបែបនេះ៕ ដោយ ៖ ប៉ែន សុផល

​ភ្នំពេញ ៖ នៅ​ព្រឹក​នេះ​ក្រសួង​ធនធានទឹក និង​ឧតុនិយម បានចេញ​សេចក្ដីជូនដំណឹង​ស្ដីពី​ស្ថានភាព​ធាតុអាកាស​នៅ​កម្ពុជា ចាប់ពី​ថ្ងៃទី​១០ ដល់​ថ្ងៃទី​១៦ ខែធ្នូ ឆ្នាំ​២០១៩ ដោយបាន​បញ្ជាក់ ឥទ្ធិពល​ជ្រង​សម្ពាធ​ខ្ពស់​ដែល​បាន​គ្របដណ្ដប់​លើ​កម្ពុជា​នោះ នឹង​ចុះថមថយ​ដោយ​រំកិល​ឡើងលើ​ទៅជា​លំដាប់​។​

​ព័ត៌មាន​លម្អិត​សូម​អាន​សេចក្ដី​ជូន​ដ​ណឹ​ងរ​បស់​ក្រសួង​នៅ​ខាងក្រោម​នេះ​៖