ភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានថ្លែងថា លោកមិនដែលឃើញមានអ្នកកាសែតមានវិជ្ជាជីវៈត្រឹមត្រូវណា មួយត្រូវបានគេប្តឹង ឬត្រូវជាប់ទោសទណ្ឌទៅតុលាការពាក់ព័ន្ធទៅនឹងចុះផ្សាយព័ត៌មានណាស់ លើកលែងតែការចុះផ្សាយទាំងនោះមានចេតនាបង្ខូចកេរ្តិ៍ធ្ងន់ធ្ងរ និងចេតនាប្រឌិតព័ត៌មានក្លែងក្លាយជាដើម។

លោក ខៀវ កាញារីទ្ធ បានថ្លែងបែបនេះនៅក្នុងទិវាសេរីភាពសារព័ត៌មានពិភពលោក ដែល អ្នកកាសែតចម្រុះស្ថាប័ន មានទាំងរដ្ឋមន្ត្រីក្រសួងព័ត៌មាន តំណាងអង្គការយូណេស្កូប្រចាំកម្ពុជា និងមន្ត្រីស្ថានទូតស៊ុយអ៊ែត បានចូលរួមប្រារព្ធទិវាសារព័ត៌មាន ពិភពលោក ក្រោមប្រធានបទ«តួនាទីប្រកបដោយសក្តានុពលរបស់សារព័ត៌មានក្នុងការគាំទ្រសន្តិភាព និងប្រជាធិបតេយ្យនៅព្រឹកថ្ងៃទី ០៣ ឧសភា នៅសណ្ឋាគារ Raffle Le Royal » ។

រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានក្រើនរំលឹកដល់អ្នកកាសែតក្នុងស្រុកនៅកម្ពុជា កុំឲ្យយកឈ្មោះ រឺយីហោជាអ្នកកាសែតទៅប្រព្រឹត្តល្មើល ខុសក្រមសីលធម៌វិជ្ជាជីវៈ ដែលនាំឲ្យខូចតម្លៃជាអ្នកកាសែត និងប៉ះពាល់ដល់កិត្តិយសដល់អ្នកកាសែតដទៃទៀត ដែលមានវិជ្ជាជីវៈត្រឹមត្រូវ។ អ្នកសារព័ត៌មានត្រូវរក្សានូវភាពថ្លៃថ្នូរ ចៀសវាងការប្រព្រឹត្តខុសច្បាប់ ក្នុងការយកតួនាទីទៅកាងបទល្មើសឈើ ទារលុយពីអ្នករកស៊ីខុសច្បាប់ និងបញ្ហាទំនាស់ដីធ្លីនានា ដែលប្រាសចាកពីក្រមសីលធម៌អ្នកកាសែត។

លោករដ្ឋមន្ត្រី បានទាត់ចោលនូវរបាយការណ៏ និងចំណាត់ថ្នាក់របស់អ្នកសារព័ត៌មានគ្មានព្រំដែន ថាជារបាយការណ៏មិនបានឆ្លុះបញ្ចាំងពីស្ថានភាពពិតស្តីពីសារព័ត៌មាន នៅកម្ពុជា។ លោក នៅតែអះអាងថា រាជរដ្ឋាភិបាលមិនដែលបិទកាសែត រឺវិទ្យុ ណាមួយនោះទេ គឺកាសែត និងវិទ្យុទាំងនោះបិទដោយខ្លួនឯងប៉ុណ្ណោះ។

នៅក្នុងសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាក្នុងឱកាសទិវាសេរីភាពសារព័ត៌មាននៅកម្ពុជាបានជម្រុញលើកទឹកចិត្តឲ្យអ្នកកា សែតក្លាហានហ៊ាននិយាយការពិត ធ្វើការរិះគន់ក្នុងន័យស្ថាបនា និងហ៊ាន ទទួលយកការពិត ដើម្បីឲ្យព័ត៌មានរបស់ខ្លួនក្លាយជាព័ត៌មានពីត ហើយធ្វើការឆ្លុះបញ្ចាំងឲ្យឃើញគ្រប់តថភាពសង្គម ដើម្បីចូលរូមចំណែកកសាងសង្គមមួយ ឲ្យមានភាពយុត្តិធម៌ សុខសន្តិភាព និងមានការអភិវឌ្ឍ ដែលជាបំណងប្រាថ្នារបស់មនុស្សជាតិនៅទូទាំងសកលលោក។ ដូចគ្នាទៅនឹងរដ្ឋមន្ត្រីព័ត៌មាន សម្តេចតេជោ នាយករដ្ឋមន្ត្រីបានអំពាវនាវឲ្យអ្នកកាសែតក្នុងស្រុក និងបរទេសក្តីត្រូវគោរពក្រមសីលធម៌វិជ្ជាជីវៈ ជៀសវាងការផ្សាយព័ត៌មានតែ មួយជ្រុង ដោយមិនបានផ្ទៀងផ្ទាត់ព័ត៌មានឲ្យបានគ្រប់ជ្រុងជ្រោយ។ ពិសេស កុំផ្សាយព័ត៌មានក្លែងក្លាយបំប៉ោងសភាពការណ៏ បន្តុះបង្អាប់ ញុះញង់អុជអាលឲ្យមានការស្អប់ខ្ពើម ប្រកាន់ពូជសាសន៏ ជំនឿ សាសនាជាដើម៕

ភ្នំពេញ ៖ នៅល្ងាចថ្ងៃទី៣ ខែឧសភា ឆ្នាំ២០១៩ នេះ លោក ឌួង ណាគ្រី មានតួនាទីជា អនុប្រធាននាយក ដ្ឋាននគរបាលព្រហ្មទណ្ឌក្រសួងមហាផ្ទៃ ត្រូវបានបញ្ជូនមកអយ្យការអមសាលាដំបូងរាជធានីភ្នំពេញ ដេីម្បីចាត់ការតាមច្បាប់ ករណីបាញ់ចំនួន ៥គ្រាប់ បណ្តាលឱ្យបែកកញ្ចក់ឡាន ក្នុងគោល បំណងប៉ុនប៉ងឃាតកម្ម។

ការសម្រេចចាប់ខ្លួនលោក ឌួង ណាគ្រី នេះ បន្ទាប់ពីមហាជនរិះគន់យ៉ាងខ្លាំងក្លា ថា”សមត្ថកិច្ចពុំគួរពិន័យត្រឹមវិន័យរដ្ឋបាលរបស់កងកម្លាំងនោះទេ”គួរចាត់ការតាមបទល្មើសព្រហ្មទណ្ឌ ។ ទោះបីយ៉ាង ណា ពេលនេះ មជ្ឈដ្ឋានជាច្រើនរង់ចាំមើលថា តើតុលាការនឹងសម្រេចយ៉ាងដូច ម្ដេច ចំពោះលោក ឌួង ណាគ្រី ។

សូមបញ្ជាក់ថា ជនបង្កដែលបាញ់ ៥គ្រាប់សំដៅរថយន្តម៉ាក រេនរ៉ូវ័រ មួយគ្រឿងដែលមានបុរសស្ត្រី ជា ប្តីប្រពន្ធជិះនៅក្នុងនោះ បណ្ដាលបែកកញ្ចក់រថយន្តជនរងគ្រោះផ្នែកខាងក្រោយ តែមិនមាន គ្រោះថ្នាក់ដល់មនុស្សទេ។ទោះជាយ៉ាងនេះក្តី ទង្វើរបស់លោកវរសេនីយ៍ទោ ឌួង ណាគ្រី អនុ ប្រធាន នាយកដ្ឋាននគរបាលព្រហ្មទណ្ឌក្រសួងមហាផ្ទៃ ត្រូវបានភាគីជនរងគ្រោះដាក់បណ្តឹងចោទ ថា ជាបទល្មើសប៉ុន ប៉ងឃាតកម្ម។ បុរសជនរងគ្រោះ ឈ្មោះ ភូរិស្ស ស្តូរ៉ា់ ជាអគ្គនាយកក្រុមហ៊ុនសន្តិសុខ CPS ។

ជនរងគ្រោះ ភូរិស្ស ស្តូរ៉ា់ ថ្លែងប្រាប់ថា លោកពុំដែលស្គាល់ ឬធ្លាប់មានទំនាស់ជាមួយជនបង្កនោះ ទេ ។ប៉ុន្តែនៅយប់កើតហេតុ គឺ ជនបង្កមានលក្ខណៈស្រវឹងជោកជាំ ទើបឈានដល់ការបាញ់បំបែកកញ្ចក់ឡានរបស់លោក ។ ពេលនេះ លោកបានដាក់ពាក្យបណ្ដឹងជាផ្លូវការហើយ ដេីម្បីឱ្យសមត្ថ កិច្ចចាត់ការតាមច្បាប់ទៅលេីជនបង្ករូបនេះ ។

ប្រភពព័ត៌មានច្បាស់ការណ៍មួយ ថ្លែងប្រាប់ថា បន្ទាប់ពីហេតុការណ៍បាញ់ប្រហារកេីតឡើងកាល ពីវេលាម៉ោង ០០៖៥៥នាទី រំលងអាធ្រាត្រឈានចូលថ្ងៃទី២ ខែឧសភា ឆ្នាំ២០១៩ ស្ថិតនៅចំណុចផ្លូវលេខ៣៦៣កែងផ្លូវ៦៤៨ ភូមិព្រែក សង្កាត់ច្បារអំពៅ១ ខណ្ឌច្បារអំពៅ គឺ មានអន្តរាគមន៍ជា ច្រើនពីមន្ត្រីគ្រាក់ៗឱ្យមានការសម្របសម្រួលគ្នា ។ ប៉ុន្តែដោយសារជនរងគ្រោះមិនព្រមទើបឈាន ដល់ការដាក់ពាក្យបណ្ដឹង ឃាត់ខ្លួនជនបង្កតែម្តង ។

មជ្ឈដ្ឋានជាច្រើនកត់សម្គាល់ថា ឱ្យតែជនសង្ស័យជាមន្ត្រី ឬអ្នកមានស្តុកស្តម្ភនៅពេល ដែលត្រូបានចាប់ខ្លួនបញ្ជូនមកតុលាការម្ដងៗ សមត្ថកិច្ចតែងតែបេីកឡានចូលដល់ក្នុងតុលាការ ដែលអ្នកសារព័ត៌មានគ្មានសិទ្ធិចូលថតរូបឡើយ ដែលខុសគ្នាទាំងស្រុងពីជនសង្ស័យ ដែលមានសភាពក្រីក្រតោកយ៉ាក ត្រូវបណ្តេីរចូលតុលាការយ៉ាងសន្សឹមៗ ។

មាត្រា២៧ នៃក្រមព្រហ្មទណ្ឌ ចែងថា”ការប៉ុនប៉ងក្នុងបទឧក្រិដ្ឋ ឬ ក្នុងករណីដែលច្បាប់បានចែងទុកក្នុងបទមជ្ឈិម អាចត្រូវផ្តន្ទាទោសបាន កាលណាលក្ខខណ្ឌខាងក្រោមនេះ ត្រូវបានបំពេញ ៖

-ចារីបានចាប់ផ្ដើមអនុវត្តបទល្មើស មានន័យថា ចារីបានប្រព្រឹត្តអំពើដែលមានគោលបំណងដោយផ្ទាល់ដេីម្បីប្រព្រឹត្តបទល្មើស និង ចារីមិនបានបញ្ឈប់អំពើរបស់ខ្លូនទៅវិញដោយស្ម័គ្រចិត្ត តែត្រូវបានរាំងស្ទះ ឬ អាក់ខាន ដោយឥទ្ធិពលនៃកាលៈទេសៈក្រៅឆន្ទៈរបស់ខ្លូន ។

អំពើត្រៀមបម្រុងដែលពុំមានគោលបំណងដោយផ្ទាល់ ដេីម្បីប្រព្រឹត្តបទល្មើស មិនមែនជាការចាប់ផ្ដើមអនុវត្តទេ ។ ការប៉ុនប៉ងក្នុងបទលហុ ពុំទទួលការផ្តន្ទាទោសទេ”។

មាត្រា១៩៩នៃក្រមព្រហ្មទណ្ឌ ចែងថា”អំពើសម្លាប់មនុស្សដោយចេតនា ដោយប្រេីអាវុធ ឬ មិនប្រើអាវុធ ដោយគ្មានស្ថានទម្ងន់ណាមួយដូចបានកំណត់ក្នុងមាត្រា២០០(បទឃាតកម្មគិតទុកជាមុន)ដល់មាត្រា២០៥(បទឃាតកម្មដោយមានទារុណកម្ម អំពើឃោរឃៅ ឬ អំពើរំលោភសេព សន្ថវៈ)នៃក្រមនេះ គឺ ជាឃាតកម្ម ។ ហើយបទល្មើសក្នុងអំពើឃាតកម្ម ត្រូវផ្តន្ទាទោសដាក់ពន្ធនា គារពី១០ឆ្នាំទៅ១៥ឆ្នាំ ៕

ខេត្តព្រៃវែង ៖ កុដិព្រះសង្ឃមួយខ្នងមានទំហំ8ម៉ែត្រគុណហ្នឹង៩ម៉ែត្រ ឈើលើ ថ្មក្រោម ប្រក់ក្បឿងត្រូវភ្លើងឆាបឆេះយ៉ាងសន្ធោសន្ធៅ បង្កការភ្ញាក់ផ្អើលដល់ព្រះសង្ឃ គណៈកម្មាការអាចារ្យវត្តនិងពុទ្ធបរិស័ទចំណុះជើងវត្ត សមត្ថកិច្ចមកជួយអន្តរាគមន៍បាញ់ទឹកពន្លត់។

ហេតុការណ៍គ្រោះអគ្គីភ័យនេះបានបង្កអោយមានការភ្ញាក់ផ្អើលឡើងកាលពីវេលាម៉ោង2និង40នាទីរសៀលថ្ងៃទី៣ ខែឧសភា ឆ្នាំ២០១៩ នៅវត្តឫស្សីជុកខាងត្បូង ស្ថិតក្នុងភូមិឫស្សីជុក ឃំុរកា ស្រុកពារាំង ខេត្តព្រៃវែង។ ផយោងតាមរបាយការណ៍របស់សមត្ថកិច្ចនគរបាលបានអោយដឹងថា បន្ទាប់ពីទទួលបានព៌តមាននូវករណីគ្រោះអគ្គីភ័យឆេះកុដិក្នុងវត្តនេះភ្លាមកម្លាំងជំនាញបានចេញរថយន្តពន្លត់អគ្គីភ័យទៅជួយអន្តរាគមន៍សហការជាមួយប្រជាពុទ្ធបរិស័ទចំណុះជើងវត្តបាញ់ទឹកអស់3ឡាន។ប៉ុន្តែដោយសារអាកាសធាតុក្តៅពេក ទើបធ្វើអោយអណ្តាតភ្លើងឆាបឆេះអស់ឈើខាងលើទាំងស្រុង នៅសល់តែថ្មខាងក្រោម ព្រមទាំងខូចខាតសម្ភារៈ(គរុភ័ណ្ឌ)មួយចំនួនបើគិតជាទឹកប្រាក់ប្រមាណជា 30.000.000៛(សាមសិបលានរៀល)។រ

បាយការណ៍បញ្ជាក់បន្ថែមថា ទោះយ៉ាងណាករណីនេះមិនមានមនុស្សគ្រោះថ្នាក់ឫមិនមានឆេះរាលដាលដល់កន្លែងដទៃទៀតឡើយ ហើយមូលហេតុនៃការឆេះនេះបើតាមការស្រាវជ្រាវពិនិត្យឃើញថាបណ្តាលមកពីឆ្លងចរន្តអគ្គីសនី៕

ភ្នំពេញ ៖ សៀវភៅអានស្តីពីការអភិវឌ្ឍន៍ទីក្រុង ជាពិសេសការផ្លាស់ប្តូរទីក្រុងអោយមានពណ៌បៃតង ដែលចំណាយថវិការបោះពុម្ភ១២ម៉ឺនដុល្លារ ត្រូវបានប្រារព្ធធ្វើពិធីផ្សព្វផ្សាយ កាលពីរសៀលថ្ងៃទី០២ ឧសភានេះ ។

សៀវភៅក្រុងភ្នំពេញការពង្រីកនិងការផ្លាស់ប្ដូរសៀវភៅដំឡើងក្នុងក្របខ័ណ្ឌកិច្ចសហប្រតិបត្តិការ រវាងរដ្ឋបាលរាជធានីភ្នំពេញនិងសាលាក្រុងប៉ារីសត្រូវបានធ្វើពិធីផ្សព្វផ្សាយ ក្រោមវត្តមាន លោក នួន ផារ័ត្នអភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញនិងលោកស្រី Valentine Gigaudaut តំណាងស្ថានទូតបារាំងប្រចាំនៅប្រទេសកម្ពុជា។

សៀវភៅនេះចែកចេញជាពីរប្រភេទសំខាន់ ដោយការផ្លាស់ប្ដូរទីក្រុងឲ្យទៅជាទីក្រុងមានពណ៌បៃតងនិងមានបរិស្ថានល្អ។ សៀវភៅនេះបានសរសេរគិតទុកជាមុនពីបញ្ហាបរិស្ថាន បញ្ហាទឹកជំនន់ និងលើកទឹកចិត្តចំពោះអ្នកអាន ពិសេសអ្នកដែលពាក់ព័ន្ធនឹងធ្វើការងារអភិវឌ្ឍន៍ទីក្រុង។

លោក នួន ផារ័ត្ន អភិបាលរងរាជធានីភ្នំពេញ មានប្រសាសន៍ក្នុងពិធីផ្សព្វផ្សាយសៀវភៅខាងលើថាសៀវភៅនេះគឺបានគិតទុកជាមុនពីបញ្ហាបរិស្ថាន បញ្ហាការអភិវឌ្ឍទីក្រុងសំរាប់ពេលអនាគត លោកអភិបាលរងរាជធានីក្នុងឱកាសនោះក៏បានថ្លែងអំណរគុណចំពោះ ទីក្រុងប៉ារីស ដែលបានបង្កើតប្លង់គោល ដែលជាប្លង់តម្រង់ទិសសម្រាប់រាជធានីភ្នំពេញ ឆ្ពោះទៅរកការអភិវឌ្ឍន៍និងរីកចំរើន។ ក្រៅពីនេះលោកក៏បានថ្លែងអំណរគុណចំពោះក្រុមការងារដែលរួមសហការគ្នារវាងទីក្រុងភ្នំពេញនិងទីក្រុងប៉ារីសបង្កើតឲ្យមានឡើងនូវសៀវភៅដ៏ល្អនេះនឹងបំពេញបន្ថែមនូវអ្វីដែលមាននៅក្នុងដៃ រក្សាបាន ទីក្រុងមានភាពបៃតង ជាទីក្រុងវៃឆ្លាត៕

ភ្នំពេញ ៖ មន្ត្រីម្នាក់នៃអង្គភាពនគរបាលព្រហ្មទណ្ឌក្រសួងមហាផ្ទៃ កំពុងប្រឈមនឹងការចោទប្រកាន់ការប៉ុនប៉ងអំពើ ឃាតកម្មក្នុងហេតុការណ៍ប្រើកាំភ្លើងខ្លីរបស់ខ្លួនបាញ់ចំនួន៥គ្រាប់ដាក់លើរថយន្ត RANGE ROVER មួយគ្រឿង ដែលមានមនុស្ស២នាក់ប្តីប្រពន្ធ បានស្ថិតក្នុងរថយន្តនោះ។

វរសេនីយ៍ទោ ឈ្មោះ ដួង ណាគ្រី ដែលជាអនុប្រធាននាយកដ្ឋាននៃនគរបាលព្រហ្មទណ្ឌក្រសួងមហាផ្ទៃ បានរងការចាប់ខ្លួន ក្រោយហេតុការណ៍បាញ់៥គ្រាប់ បណ្តាលអោយបែកកញ្ចក់រថយន្ត RANGE ROVER ដែលពាក់ស្លាកលេខភ្នំពេញ 2U-4448 បើកបរដោយបុរស ម្នាក់ឈ្មោះ ភូរិស្ស ស្តូរ៉ាន់ ជាមួយនិងភរិយា កាលពីវេលាម៉ោង ១២និង៥៥នាទី រំលងអធ្រាត្រ ឈានចូលថ្ងៃទី២ ខែឧសភា ឆ្នាំ២០១៩ ស្ថិតនៅចំណុចផ្លូវលេខ៣៦៣ កែងផ្លូវ៦៤៨ ភូមិព្រែក សង្កាត់ច្បារអំពៅ១ ខណ្ឌច្បារអំពៅ។ លោក ភូរិស្ស ស្តូរ៉ាន់ ដែលជាអគ្គនាយកក្រុមហ៊ុនសន្តិសុខ CPS បានថ្លែងថា លោកពុំដែលស្គាល់គ្នា ឬធ្លាប់មានទំនាស់ជាមួយនឹងមន្ត្រីនគរបាលម្នាក់នោះឡើយ។

យោងតាមសមត្ថកិច្ចនគរបាលខណ្ឌច្បារអំពៅ លោកវរសេនីយ៍ទោដួង ណាគ្រី នាពេលនោះមានអាការៈស្រវឹង និងកំពុងជិះក្នុងរថយន្តរបស់ខ្លួនប្រភេទ LEXUS RX350 ពណ៌ស ពាក់ស្លាកលេខសៀមរាប 2B-5153។ មន្ត្រី គរបាលរួបនោះ បានចុចស៊ីប្លេរថយន្តជាច្រើនដង ពីក្រោយរថយន្ត RANGE ROVER ដែលក្រោយមកក៏បានបង្កជាជម្លោះពាក្យសម្តី និងបណ្តាលអោយកើតឡើងជាអំពើបាញ់ប្រហារចំនួន៥គ្រាប់បណ្តាលឲ្យបែកខ្ទេចកញ្ចក់រថយន្តផ្នែកខាងក្រោយ ប៉ុន្តែលោក ភូរិស្ស ស្តូរ៉ាន់ និង ភរិយាដែលស្ថិតក្នុងរថយន្ត RANGE ROVER បានរួចផុតពីគោលដៅនៃគ្រាប់បាញ់តំរង់ចំនួន៥គ្រាប់នេះ។

ក្រោយអំពើបាញ់នោះមក ជនបង្កហេតុបានបើករថយន្តទៅបាត់មួយសន្ទុះក្រោយមក ក៏ត្រឡបមកវិញ ក៏ត្រូវសមត្ថកិច្ចនគរបាលខណ្ឌច្បារអំពៅ រាជធានីភ្នំពេញ បានឃាត់ខ្លួនតែម្តង។ វរសេនីយ៍ទោ ដួង ណាគ្រី ត្រូវបានគេបញ្ជូនទៅតុលាការនៅថ្ងៃទី២ ខែឧសភា នេះ ដើម្បីរង់ចាំអនុវត្តន៍នីតិវិធីតាមផ្លូវតុលាការបន្តទៀត។

បោះតាម Fresh News បានឲ្យដឹងថា លោក ភូរិស្ស ស្តូរ៉ាន់ ដែលជាជនរងគ្រោះក្នុងហេតុការណ៍នេះពីរនាក់ប្រពន្ធ បានទាមទារសំណងចំនួន៣៥.០០០ដុល្លារក៏ពិតមែន ប៉ុន្ដែពាក្យបណ្ដឹងព្រហ្មទណ្ឌ ដែលប្ដឹងពីបទប៉ុនប៉ងមនុស្សឃាតដោយចេតនានោះ គឺនៅរក្សាដដែល។

ជនរងគ្រោះបានបញ្ជាក់យ៉ាងដូច្នេះថា «នៅពេលនេះ ខ្ញុំបានដាក់ពាក្យបណ្ដឹងទាមទារសំណងជំងឺចិត្ត និងការខូចខាត ចំនួន៣៥,០០០ដុល្លារ ហើយប្រគល់ឡានរបស់ខ្ញុំ ទៅឲ្យគាត់ (ជនបង្ក) ខ្ញុំយកតែលុយដែលទាមទារប៉ុណ្ណោះ ប៉ុន្ដែឥលូវខ្ញុំមិនទាន់បានទទួលដំណឹងអ្វីត្រឡប់មកវិញនោះទេ។ ហើយពាក្យបណ្ដឹងព្រហ្មទណ្ឌ គឺខ្ញុំនៅរក្សាដដែលអត់ដកទេ»៕

ភ្នំពេញ ៖ ជនជាតិចិនម្នាក់ ស្ពាយកាបូបដាក់វត្ថុម្យ៉ាង ដែលសង្ស័យជាគ្រាប់បែក ចូលហាងជនជាតិចិនលក់គុជ “ហឺហឺ” កាលពីវេលាម៉ោង៨និង៤០នាទីព្រឹក ថ្ងៃទី១ ខែឧសភា ឆ្នាំ២០១៩ នៅផ្ទះជួលផ្លូវបេតុង មុខផ្សារកាណាឌីយ៉ា ផ្លូវទី៣ ក្រុម៣ ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិសែនជ័យ បង្កឲ្យមានការភ្ញាក់ផ្អើដល់ពលរដ្ឋភ័យស្លន់ស្លោ រាយការណ៍ប្រាប់សមត្ថកិច្ចឲ្យចុះទៅអន្តរាគមន៍ភ្លាមៗ។

រហូតដល់វេលាម៉ោង៩និង៣០នាទីព្រឹកថ្ងៃដដែល ជនសង្ស័យជាជនជាតិចិនម្នាក់ ត្រូវកម្លាំងសមត្ថកិច្ចខណ្ឌពោធិសែនជ័យ ចុះទៅឃាត់ខ្លួនបានហើយ រួមជាមួយវត្ថុតាង ដុំរមូ សង្ស័យជារំសេវផ្ទុះ ត្រូវបានដកហូតយកចេញ រួចនាំទៅប៉ុស្តិ៍ចោមចៅ១ ចំណែកជនជាតិចិន ចំនួន៤នាក់ផ្សេងទៀត ស្នាក់នៅក្នុងផ្ទះនោះ ក៏សមត្ថកិច្ចហៅនាំទៅសាកសួរដែរ។

បច្ចុប្បន្ន លោក យឹម សារ៉ាន់ អធិការនគរបាលខណ្ឌពោធិ៍សែនជ័យ សហការជាមួយកម្លាំងនគរបាល នៃស្នងការដ្ឋាននគរបាល រាជធានីភ្នំពេញ កម្លាំងអាវុធហត្ថ និងកម្លាំងស៊ីម៉ាក់ បានចាប់ខ្លួនបុរសជនជាតិចិនរូបនេះ នៅក្រោយផ្សារឯករាជ្យ១ ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ ជាមួយកាបូបពណ៌ខ្មៅ ដោយនៅក្នុងកាបូបនោះ មានគ្រាប់កែច្នៃជាច្រើនគ្រាប់។

ខណៈពេលនេះ កម្លាំងសមត្ថកិច្ចកំពុងតែធ្វើការសួរនាំ នៅអធិការដ្ឋាននគរបាលខណ្ឌពោធិ៍សែនជ័យ ដើម្បីចាត់វិធានការតាមនីតិធី។
ដោយឡែកលោកសថេតអគ្គស្នងការរងនិងជាស្នងការនគរបាលរាជធានីភ្នំពេញបានបង្ហោះតាមផេកផ្ទាល់ខ្លួនតាមបណ្តាញសង្គមហ្វេសបុកបញ្ជាក់ប្រាប់មហាជនឱ្យបានដឹងថាគ្រាប់បែកចំនួន៥គ្រាប់ដែលរបស់ជនជាតិចិនខាងលើនេះមិនមែនជាគ្រាប់បែកពិតប្រាកដនោះព្រោះនៅក្នុងបំពងទាំងអស់សុទ្ធតែខ្សាច់គ្មានជាតិរំសេវនោះទេ៕

ភ្នំពេញ ៖ ក្រសួងធនធានទឹក បានប្រកាសជួនដំណឹងឲ្យប្រជាពលរដ្ឋនៅទូទាំងប្រទេស បង្កើនការប្រុងប្រយ័ត្នខ្ពស់ ចំពោះបាតុភូតធម្មជាតិដែលបង្កឥ្យមានផ្គរ រន្ទះ និងខ្យល់កន្ត្រាក់ ចាប់ពីពេលនេះ រហូតដល់ចុងសប្តាហ៍ក្រោយ។

ក្នុងសេចក្ដីជូនដំណឹងស្ដីពីស្ថានភាពអាកាសធាតុ ដែលចេញផ្សាយនៅថ្ងៃទី២៩ ខែមេសានេះ ក្រសួងធនធានទឹក និងឧតុនិយម បានបញ្ជាក់ថា ឥទ្ធិពលនៃ Global Warming បានធ្វើឲ្យស្ថានភាពអាកាសធាតុ ប្រែប្រួលឆាប់រហ័ស បង្កជាបាតុភូត្តផ្គរ រន្ទះ និងខ្សល់កន្រ្ដាក់ ចាប់ពីថ្ងៃទី២៩ ខែមេសា ដល់ថ្ងៃទី៥ ខែឧសភា ទៅតាមទីកន្លែង និងពេលវេលាដូចខាងក្រោម ៖

១. ថ្ងៃទី២៩ ខែមេសា
• បណ្ដាខេត្តភាគពាយ័ព្យ ដូចជាខេត្តឧត្តរមានជ័យ បន្ទាយមានជ័យ សៀមរាប និងបាត់ដំបង នឹងអាចមានភ្លៀងកក់ខែ ពីតិចទៅមធ្យម នៅស្រុក-ក្រុងមួយចំនួន។
• នៅបណ្ដាខេត្តដទៃទៀត អាចមានភ្លៀងកក់ខែតិចតួច។
២. ចាប៉ពីថ្ងៃទី៣០ ខែមេសា ដល់ថ្ងៃទី ២ ខែឧសភា
• ខេត្តត្បូងឃ្មុំ កំពង់ចាម ព្រៃវែង ស្វាយរៀង តាកែវ កំពត ព្រះសីហនុ កណ្ដាល កំពង់ស្ពឺ កំពង់ឆ្នាំង និងរាជធានីភ្នំពេញ អាចមានភ្លៀងកក់ខែពីតិចទៅបង្គួរ។
បន្ទាប់ពីនោះ ដល់ថ្ងៃទី៥ ខែឧសភា បណ្ដាខេត្តមួយចំនួនអាចមានភ្លៀងកក់ខែ ក្នុងកម្រិតពីខ្សោយ ទៅមធ្យម។
• សីតុណ្ហភាពអតិបរមា ជាទូទៅ មានពី ៣៥ ទៅ ៣៧អង្សារសេ។ បន្តពីនោះ សីតុណ្ហភាពបន្តកើនឡើង ដោយសីតុណ្ហភាពអតិបរមា អាមានពី ៣៧ ទៅ ៤១ អង្សារសេ៕

ភ្នំពេញ ៖ ឋានន្តរស័ក្តិមន្ត្រីជាន់ខ្ពស់នៅក្រសួងមហាផ្ទៃមួយចំនួន បានស្ថិតក្នុងបញ្ជីធ្វើកំណែទម្រង់ស៊ីជម្រៅ ក្នុងជួរនគរបាលជាតិ ដោយបញ្ចុះស័ក្តិស្នងការនគរបាលរាជធានី-ខេត្ត មកនៅត្រឹមស័ក្តិ ៥ វិញ ខណៈឋានន្តរស័ក្តិបច្ចុប្បន្ននៃស្នងការនគរបាលរាជធានី-ខេត្ត ពាក់ផ្កាយ១ ឬផ្កាយ២ ចំណែកមន្ត្រីពាក់ផ្កាយ ៤ ត្រូវបានរក្សាទុកចំពោះតែរដ្ឋលេខាធិការក្រសួងមហាផ្ទៃ និងអគ្គស្នងការនគរបាលជាតិប៉ុណ្ណោះ។

នេះបើយោងតាមគេហទំព័រ របស់លោក វឌ្ឍនា សារពង្ស ទេសរដ្ឋមន្រ្តី និងជាសមាជិកឧត្តមក្រុមប្រឹក្សា ពិគ្រោះ និងផ្ដល់យោបល់។

យោងតាមឯកសារបែកធ្លាយ ស្ដីពីការបង្ហាញលំដាប់ឋានន្តរស័ក្តិ ផ្នែកនគរបាល និងក្របខណ្ឌក្រសួងមហាផ្ទៃ បានឲ្យដឹងថា ក្រសួងមហាផ្ទៃ បានកែទម្រង់ ដោយរដ្ឋលេខាធិការក្រសួងមហាផ្ទៃ និងអគ្គស្នងការនគរបាលជាតិ រក្សាទុកឋានៈជានាយឧត្តមសេនីយ៍ ផ្កាយ៤ រីឯអនុរដ្ឋលេខាធិការ និងអគ្គនាយក នៃអគ្គនាយកដ្ឋានចំណុះក្រសួងមហាផ្ទៃ ជាឧត្តមសេនីយ៍ឯក និងឧត្តមអគ្គានុរក្ស ថ្នាក់លេខ១ ដែលមានផ្កាយ៣។ រីឯអគ្គនាយករង នៃអគ្គនាយកដ្ឋានចំណុះក្រសួងមហាផ្ទៃ ជាឧត្តមសេនីយ៍ទោ និងឧត្តមអគ្គានុរក្ស ថ្នាក់លេខ២ ផ្កាយ២។ រីឯប្រធាននាយកដ្ឋានកណ្តាលទទួលផែននៃអគ្គស្នងការ គឺជាឧត្តមសេនីយ៍ទោ ផ្កាយ ២។

ចំណែក ប្រធាននាយកដ្ឋានចំណុះអគ្គស្នងការ ឬអគ្គនាយកដ្ឋាន ជាឧត្តមសេនីយ៍ត្រី ឬឧត្តមអគ្គានុរក្ស ថ្នាក់លេខ៣ ផ្កាយ១។ អនុបប្រធាននាយកដ្ឋានកណ្តាល ទទួលផែន នៃអគ្គស្នងការ អនុប្រធាននាយកដ្ឋាន ចំណុះអគ្គនាយកដ្ឋាន ស្នងការនគរបាលរាជធានីខេត្ត គឺជាវរសេនីយ៍ឯក ត្រឹមតែស័ក្តិ ៥ប៉ុណ្ណោះ។ រីឯ អនុប្រធាននាយកដ្ឋាន ចំណុះអគ្គនាយកដ្ឋានពន្ធនាគារ ប្រធានមណ្ឌលអប់រំកែប្រែ/ ប្រធានពន្ធនាគាររាជធានីខេត្ត ជាវរអគ្គានុរក្ស ថ្នាក់លេខ ស័ក្តិ៥។

ឯកសារដដែល បង្ហាញដែរថា ប្រធានការិយាល័យថ្នាក់កណ្តាល ស្នងការរងនៃស្នងការដ្ឋាននគរបាលរាជធានីខេត្ត និងប្រធានការិយាល័យកណ្តាលទទួលផែន ជាវរសេនីយ៍ទោ ស័ក្តិ ៤កន្លះ។ ក្នុងនោះ ប្រធានការិយាល័យកណ្តាល និងអនុប្រធានមណ្ឌលអប់រំកែប្រែ / អនុប្រធានពន្ធនាគាររាជធានី ខេត្ត ជាវរៈអគ្គានុរក្សថ្នាក់លេខ២ ឬស័ក្តិ ៤កន្លះ។ រីឯអនុប្រធានការិយាល័យថ្នាក់កណ្តាល អនុប្រធានការិយាល័យកណ្តាល ទទួលផែន និងប្រធានការិយា ល័យនៃស្នងការដ្ឋាន នគរបាលរាជធានីខេត្ត គឺជាវរសេនីយ៍ត្រី សក្តិ៤។ រីឯអនុប្រធានការិយា ល័យថ្នាក់កណ្តាល និងប្រធានការិយាល័យនៃមណ្ឌលអប់រំ និងពន្ធនាគាររាជធានីខេត្ត គឺជាវរអគ្គានុរក្ស ថ្នាក់លេខ៣ សក្តិ៤។

ចំណែក ប្រធានផ្នែកថ្នាក់កណ្តាល អធិការនគរបាលខណ្ឌ/ស្រុក និងអនុប្រធានការិយាល័យ នៃស្នងការដ្ឋាននគរបាលរាជធានីខេត្ត គឺជាអនុសេនីយ៍ឯក សក្តិ៣។ ប្រធានផ្នែកថ្នាក់កណ្តាល និងអនុប្រធានការិយាល័យ នៃមណ្ឌលអប់រំកែប្រែ/ ពន្ធនាគាររាជធានីខេត្ត គឺជាអគ្គានុរក្ស ថ្នាក់លេខ១ សក្តិ៣។

ដោយឡែក អនុប្រធានផ្នែកថ្នាក់កណ្តាល ប្រធានផ្នែកនៃស្នងការនគរបាលរាជធានីខេត្ត និងអធិការរងនគរបាលខណ្ឌស្រុក ជាអនុសេនីយ៍ទោ ស័ក្តិ២។ អនុប្រធានផ្នែកថ្នាក់កណ្តាល និងប្រធានផ្នែក នៃមណ្ឌលអប់រំកែប្រែ / ពន្ធនាគាររាជធានីខេត្ត ជាអគ្គានុរក្សថ្នាក់លេខ២ សក្តិ២។ រីឯអនុប្រធានផ្នែក នៃស្នងការនគរបាលរាជធានីខេត្ត និងប្រធានប៉ុស្តិ៍រដ្ឋបាល ជាអនុសេនីយ៍ត្រី សក្តិ១។ ក្នុងនោះ អនុប្រធានផ្នែក នៃមណ្ឌលអប់រំកែប្រែ / ពន្ធនាគាររាជធានីខេត្ត អគ្គានុរក្សថ្នាក់លេខ៣ ស័ក្តិ១។ ដោយឡែកអនុប្រធានប៉ុស្តិ៍រដ្ឋបាល ជាព្រិន្ទបាលឯក។ មន្ត្រីនគរបាល ជាព្រឹន្ទបាលទោ ពលបាលឯក ពលបាលទោ ពលបាលត្រី។ រីឯអនុរក្សពន្ធនាគារ ជាអគ្គានុរក្សថ្នាក់លេខ៤ អនុរក្សថ្នាក់លេខ១ អនុរក្សថ្នាក់លេខ២ អនុរក្សថ្នាក់លេខ៣។

គួរបញ្ជាក់ថា ការធ្វើកំណែទម្រង់ឋានន្តរស័ក្តិរបស់មន្ត្រីជាន់ខ្ពស់ក្រសួងមហាផ្ទៃនាពេលនេះ បានធ្វើឡើងក្រោយពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ណែនាំផ្ទាល់មាត់ជូន សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ ឲ្យបញ្ចុះស័ក្តិក្នុងជួរទាហាន និងសម្តេចក្រឡាហោម ស ខេង ឧបនាយករដ្ឋមន្រ្តីរដ្ឋមន្ត្រីក្រសួងមហាផ្ទៃ ឲ្យកាត់បន្ថយផ្កាយ ក្នុងជួរនគរបាល។

​អ្នកនាំពាក្យ​រដ្ឋាភិបាល​លោក ផៃ ស៊ី​ផាន បាន​ថ្លែងថា គម្រោង​របស់​លោកនាយ​ក​រដ្ឋមន្ត្រី ធ្វើឡើង​មាន​គោលបំណង​ចំនួន​៣ គឺ​ទី​១ ដើម្បី​ធ្វើ​អភិបាលកិច្ច​ល្អ​ក្នុងការ​បំពេញការងារ​របស់​ក្រសួង​ទាំងពីរ ប្រកបដោយ​ប្រសិទ្ធ និង ភាព​ទទួលខុសត្រូវ ទី​២ រដ្ឋាភិបាល​មើលឃើញថា ឋានន្តរស័ក្តិ​បច្ចុប្បន្ន​វា​កើន​ខ្ពស់​ពេក ធ្វើឱ្យ​គោលដៅ​បទបញ្ជា​មាន​ភាព​ច្របូកច្របល់ និង​ទី​៣ ឋានន្តរស័ក្តិ​មន្ត្រី​កម្ពុជា​ខ្ពស់​ដែល​មិន​សម​នឹង​ជជែក​ជាមួយ​មន្ត្រី​ពី​បរទេស​ដែលមាន​ឋាន​ទាប​ជាង​៕​

ភ្នំពេញ ៖ ប្រធានាធិបតីចិន ស៊ី ជិនពីង បានប្រកាសផ្តល់ជំនួយជាង ៦០០លានយ័ន ស្មើនឹងជាង៨៩លានដុល្លារអាមេរិក ដើម្បីជួយពង្រឹងវិស័យការពារជាតិរបស់កម្ពុជា។ ការបញ្ជាក់របសលោក ស៊ី ជីនពីង បានធ្វើឡើងនៅក្នុងជំនួបទ្វេភាគីនៅទីក្រុងប៉េកាំង ប្រទេសចិន នៅព្រឹកថ្ងៃទី២៩ ខែមេសា នេះ។

លោកបណ្ឌិត កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបញ្ជាក់ប្រាប់អ្នកកាសែតនៅក្រោយជំនួបថា សម្ដេចតេជោ ហ៊ុន សែន នាយករដ្ឋមន្ត្រី បានស្នើអោយមេដឹកនាំចិនបន្តធ្វើការជាមួយសហភាពអឺរ៉ុប ពាក់ព័ន្ធនឹងការគំរាមដកប្រព័ន្ធអនុគ្រោះពន្ធ EBA ពីកម្ពុជា។

ប្រធានាធិបតីចិន ស៊ី ជិនពីង បានអះអាង នៅចំពោះសម្តេចតេជោថា ចិននឹងបន្តជួយកម្ពុជាក្នុងការរក្សាសិទ្ធិស្របច្បាប់របស់ខ្លួន ក្នុងការ អនុវត្តច្បាប់របស់កម្ពុជា។ ទោះបីអឺរ៉ុបព្រមានដកប្រព័ន្ធអនុគ្រោះពន្ធក្តី តែចិននឹងនៅតែបន្តជួយកម្ពុជាឲ្យបានខ្លាំងក្លា។

សម្តេចក៏បានស្នើឲ្យក្រុមហ៊ុនចិន ដែលកំពុងវិនិយោគនៅប្រទេសកម្ពុជាជាពិសេស ក្រុមហ៊ុនចិនដែលមានរោងចក្រ ជាង៧០០ក្នុងចំណោមជាង ១០០០ រោងចក្រ អោយនៅបន្តធ្វើការវិនិយោគនៅក្នុងប្រទេសកម្ពុជា និងសុំឲ្យមានការចូលមកវិនិយោគពីបណ្ដាក្រុមហ៊ុនថ្មីៗ បន្ថែមទៀត។

ប្រធានាធិបតីចិន ស៊ី ជីនពីង បញ្ជាក់ថា កម្ពុជា និងចិនគឺជាមិត្តល្អ ដោយបានចុះហត្ថលេខាលើឯកសារខ្សែក្រវាត់ និងផ្លូវ ហើយយើងនឹងបន្តធ្វើការជាមួយគ្នា ទៅតាមផែនការសកម្មភាព និងត្រូវតែបន្តថែទាំនូវទំនាក់ទំនងមិត្តភាព រវាងប្រទេសទាំងពីរ។ ពាក់ព័ន្ធនឹងផែនការខ្សែក្រវ៉ាត់ និងផ្លូវនេះយើងនឹងបន្តជំរុញការកសាងតំបន់សេដ្ឋកិច្ចពិសេស ផ្លូវល្បឿនលឿននិងព្រលានយន្តហោះ ជាពិសេសនឹងបន្តនាំចូលអង្ករពីប្រទេសកម្ពុជាទៅកាន់ទីផ្សារប្រទេសចិន ទៅតាមចំនួនកូតាដែលបានផ្ដល់ជូនចំនួន៤០ម៉ឺនតោននោះ។

ភាគីចិន បានថ្លែអះអាងថា នឹងបន្តជួយដល់វិស័យការពារជាតិរបស់កម្ពុជា ដោយបានប្រកាសថា នឹងផ្តល់ថវិកាចំនួន៦០០លានយ័ន (ជិត៩០លានដុល្លារ)ដល់វិស័យការពារជាតិកម្ពុជា។

លោកប្រធានាធិបតី Xi Jinping ប្រធានាធិបតី ស៊ី ជីនពីង បានអះអាងដែរថា ប្រទេសចិន នឹងបន្តគាំទ្រប្រទេសកម្ពុជាក្នុងក្របខ័ណ្ឌ យុទ្ធសាស្ត្រគ្រប់ជ្រុងជ្រោយ គ្រាដែលទំនាក់ទំនងទ្វេភាគីរវាងប្រទេសទាំងពីរបានឡើងដល់កម្រិតថ្មីមួយទៀត។ ក្នុងនោះដែរ ប្រធានាធិបតីចិន ក៏បានអះអាងថា ចិននឹងបន្តជួយដល់ប្រទេសកម្ពុជា ដើម្បីកម្ពុជារក្សានូវសិទ្ធិស្របច្បាប់របស់ខ្លួន ទោះបីអឺរ៉ុបដកប្រព័ន្ធអនុគ្រោះពន្ធ៕