ភ្នំពេញ ៖ បច្ចុប្បន្នមានអ្នកជាប់ពន្ធនាគារនៅទូទាំងប្រទេសប្រហែល ៣ម៉ឺន ១ពាន់នាក់ ហើយ ក្នុងចំនួននេះ ភាគច្រើនជាអ្នកជាប់ពាក់ព័ន្ធនឹងបញ្ហាគ្រឿងញៀន ប្រហែលជិត ២ ភាគ ៣ នៃចំនួនសរុប។

ជាមួយគ្នានេះក្រសួងមហាផ្ទៃ បានសហការជាមួយស្ថាប័នតុលាការ តែមិនហ៊ាននិយាយថា ជម្រុញឲ្យគាត់ត្រូវតែកាត់ក្តីនោះ ទេ តែយើងស្នើឲ្យកាត់ពន្លឿនការកាត់ក្តី ព្រោះបើមិនអ៊ីចឹងទេ ឃើញថាវាសល់ច្រើននូវចំនួន អ្នកជាប់ឃុំដែលពុំទាន់ត្រូវបានកាត់ក្តី នោះហើយគឺជាបញ្ហា ដែលនឹងនាំឲ្យយើងមានការប្រជុំ ពិសេសដាច់ដោយឡែកមួយទៀតទាក់ទងនឹងកិច្ចការនេះ។នេះជាការលើកឡើងរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធីបើកសន្និបាតបូក សរុបការងារឆ្នាំ២០១៨ និងទិសដៅការងារឆ្នាំ២០១៩ របស់ក្រសួងមហាផ្ទៃ នាព្រឹកថ្ងៃទី១៣ កុម្ភៈនេះ។

ជាមួយគ្នានេះសម្តេចក្រឡាហោម ស ខេង ក៏បានលើកឡើងអំពីកិច្ចខិតខំប្រឹងប្រែងជា ទូទៅរបស់ក្រសួងមហាផ្ទៃនាពេលកន្លងទៅផងដែរ ដោយសម្តេចបានគូសបញ្ជាក់ថា ឆ្នាំ ២០១៨ គឺជាឆ្នាំដែលក្រសួងមហាផ្ទៃកាន់តែមានភាពមមាញឹកក្នុងការពង្រឹងតួនាទី ភារកិច្ច និងការទទួលខុសត្រូវរបស់ខ្លួន ដើម្បីចូលរួមអនុវត្តដោយជោគជ័យនូវកម្មវិធីនយោបាយ និង យុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល សម្រាប់នីតិកាលទី៥ នៃរដ្ឋ សភា។

សម្តេចថា ផ្អែកលើមូលដ្ឋាននៃសមិទ្ធផលដែលសម្រេចបានក្នុងការអនុវត្តកម្មវិធី កំណែទម្រង់នានារបស់រាជរដ្ឋាភិបាលឆ្នាំ២០១៨កន្លងទៅនេះ កម្ពុជានៅតែបន្តរក្សាបាននូវ សន្តិភាព សន្តិសុខផ្ទៃក្នុងជាតិ និងកំណើនសេដ្ឋកិច្ចខ្ពស់ ទោះបីសភាពការណ៍សន្តិសុខតំបន់ និងពិភពលោកមានការវិវត្តប្រែប្រួលស្មុគស្មាញ ហើយសេដ្ឋកិច្ចសកលមានភាពមិនទៀងទាត់ យ៉ាងណាក៏ដោយចុះ៕

ភ្នំពេញ ៖ ក្នុងរបាយការណ៍បូកសរុបការងារប្រចាំឆ្នាំរបស់ក្រសួងមហាផ្ទៃ បានឲ្យដឹងថា ពេញ មួយឆ្នាំ២០១៨ សមត្ថិកច្ចរឹបអូសគ្រឿងញៀនបាន ៥៣៦,៣៦ គ.ក្រ ព្រមទាំងមធ្យោបាយ និង ឧបរណ៍វេចខ្ចប់មួយចំនួនទៀត។

របាយការណ៍ដដែលបានលើកឡើងថា ក្នុងការអនុវត្តយុទ្ធនាការប្រយុទ្ធប្រឆាំងគ្រឿង ញៀនខុសច្បាប់លើកទី៣ ចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០១៨ កម្លាំងអនុវត្ត ច្បាប់បង្ក្រាបបាន ៨ពាន់ ២ករណី ឃាត់ខ្លួនអ្នកពាក់ព័ន្ធចំនួន ១៦ពាន់ ២១៦នាក់ ក្នុងនោះស្រី ១ពាន់ ៣៣៣នាក់ រឹមអូសវត្ថុតាង មានគ្រឿងញៀនសរុប ៥៣៦,៣៦ គ.ក្រ ព្រមទាំងមធ្យោ បាយ និងឧបរណ៍វេចខ្ចប់មួយចំនួនទៀត ក្នុងនោះនគរបាលជាតិបង្ក្រាបបាន ៦ពាន់ ៧៩២ ករណី ឃាត់ខ្លួនមនុស្ស ១៣ពាន់ ៣៩៧នាក់ ស្រី ១ពាន់ ១១នាក់។ ដោយឡែកអនុវត្តដីកា ២៤១ដីកា ឃាត់ខ្លួនមនុស្ស ២៣៣នាក់ ស្រី ៩នាក់ ហើយជនល្មើស និងវត្ថុតាងត្រូវបាន កសាងសំណុំរឿងបញ្ជូនទៅតុលាការ។

របាយការណ៍បានបង្ហាញនូវការកត់សម្គាល់ថា ការបង្ក្រាបករណីធំៗ ចាប់ពី ១គ.ក្រ ឡើង បានចំនួន ៤៧ករណី ស្មើ ៤៧ក្រុម ឃាត់ខ្លួនអ្នកជាប់ពាក់ព័ន្ធបានចំនួន ៨៣នាក់ ស្រី ២៤នាក់ ក្នុងនោះមានមេក្លោងជួញដូរគ្រឿងញៀននេះចំនួន ១៩នាក់ផងដែរ៕

ភ្នំពេញ ៖ របាយការណ៍ថ្មីរបស់យូណេស្កូ បង្ហាញថា មានការសម្រេចវឌ្ឍភាព ពុំគ្រប់គ្រាន់ឡើយ ជុំវិញការបញ្ចូលជនចំណាកស្រុក និងជនភៀសខ្លួន ទៅក្នុងប្រព័ន្ធអប់រំជាតិបច្ចុប្បន្ននេះ គេត្រូវការបន្ទប់រៀន ជាងកន្លះលានបន្ទប់ ដើម្បីបំពេញតម្រូវការ កុមារ ជាជនចំណាកស្រុកនិងកុមារជាជនភៀសខ្លួនក្នុងពិភពលោក។

នេះបើតាម របាយការណ៍ពិនិត្យ តាមដានការអប់រំសកលឆ្នាំ២០១៩ របស់យូណេស្កូ ក្រោមប្រធានបទ “ការធ្វើចំណាកស្រុក ការផ្លាសទីលំនៅដោយបង្ខំ និងការអប់រំ” ដែលត្រូវបានក្រសួងអប់រំយុវជន និងកីឡា រួមជាមួយ អង្គការយូណេស្កូ បានប្រកាសផ្សព្វផ្សាយ នាព្រឹកថ្ងៃទី១៣ ខែកុម្ភៈនេះ នៅសណ្ឋាគារកាំបូឌីយ៉ាណា ក្រោមវត្តមាន លោកបណ្ឌិត សភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា និង លោកស្រី អូតទ្រី អាហ៊្សូលៃ (Audrey Azoulay) អគ្គនាយក យូណេស្កូ នៅទីក្រុងប៊ែកឡាំង។

របាយការណ៍នេះ បានបង្ហាញថា ចំនួនកុមារ ជាជនចំណាកស្រុក និងជនភៀសខ្លួន ដែលដល់អាយុចូលរៀន នៅជុំវិញពិភពលោក កើនឡើង ២៦% ចាប់តាំងពីឆ្នាំ២០០០មក ដែលចំនួននេះ អាចបំពេញបន្ទប់រៀន ដល់ទៅជាងកន្លះលានបន្ទប់។ ចំណែកឯ សិទ្ធទទួលបានការអប់រំ ប្រកបដោយគុណភាព របស់កុមារទាំងនេះ ត្បិតត្រូវបានទទួលស្គាល់ កាន់តែច្រើនឡើងៗ លើក្រដាសស្នាមក៏ដោយ តែត្រូវជួបនឹងឧបសគ្គ ក្នុងបន្ទប់រៀន និងក្នុងបរិវេណសាលារៀន ជារៀងរាល់ថ្ងៃ និងត្រូវបានរដ្ឋាភិបាលមួយចំនួនតូច បដិសេធន៍មិនផ្តល់ឱ្យតែម្តង។
លោកស្រី អូតទ្រី អាហ៊្សូលៃ (Audrey Azoulay) បានលើកឡើង នៅក្នុងសិក្ខាសាលា ផ្សព្វផ្សាយ របាយការណ៍នេះថា គ្រប់គ្នានឹងត្រូវខាតបង់ នៅពេលគេមិនយកចិត្តទុកដាក់ លើការអប់រំ សម្រាប់ជនចំណាកស្រុក និងជនភៀសខ្លួន។ ការអប់រំ គឺជាគន្លឹះ ដើម្បីលើកកម្ពស់ បរិយាបន្ន និងភាពចុះសម្រុងគ្នាក្នុងសង្គម។

លោកស្រីបញ្ជាក់ថា សម្រាប់ប្រទេសកម្ពុជា វិស័យអប់រំ ត្រូវបានអភិវឌ្ឍយ៉ាងល្អប្រសើរ តាម រយៈ ការធ្វើកំណែទម្រង់ ស៊ីជម្រៅ របស់រាជរដ្ឋាភិបាល ពោលគឺ រំកិលសាលារៀន ឱ្យទៅជិតនឹងផ្ទះប្រជាពលរដ្ឋ នៅគ្រប់ទីកន្លែង មិនថា ទីប្រជុំជន ឬ ជនបទនោះទេ។ ហើយកម្ពុជា ក៏មិនមានកុមារ ចំណាកស្រុក ឬ ជនភៀសខ្លួន ជាអន្តរជាតិនោះដែរ។ រាជរដ្ឋាភិបាលបានគិតគូរយ៉ាងយកចិត្តទុកដាក់ ដោយសហការជាមួយ ស្ថាប័នពាក់ព័ន្ធ អំពី ផ្តល់ឱកាស ដល់កុមារ និង ជនចំណាកស្រុក បានរៀនសូត្រគ្រប់ទីកន្លែង និងគ្រប់កម្រិត។

លោកបណ្ឌិត សភាចារ្យ ហង់ ជូនណារ៉ុន បានមានប្រសាសន៍ថា ការធ្វើកំណែទម្រង់ វិស័យអប់រំ គឺជារឿងចាំបាច់បំផុត ក្នុងការដោះស្រាយបញ្ហាផ្សេងៗក្នុងពេលបច្ចុប្បន្ន និងទៅអនាគត ។ ដូច្នេះហើយបានជា ក្រសួងអប់រំ បានយកចិត្តទុកដាក់ ជាខ្លាំង ទៅលើកុមារ ចំណាកស្រុក ដោយផ្តល់លទ្ធភាពឱ្យពួកគេបានចូលសិក្សារៀនសូត្របាននៅគ្រប់កម្រិត។

ឯកឧត្តម បញ្ជាក់ថា ដើម្បីបង្កើនប្រសិទ្ធភាព គុណភាព នៃការអប់រំ រាជរដ្ឋាភិបាលបានបង្កើតសាលារៀនបានច្រើន នៅគ្រប់ទីកន្លែង ព្រមទាំងបានពង្រឹងសមត្ថភាពបង្រៀន របស់គ្រូឱ្យបានគ្រប់កម្រិត និងត្រូវដោះស្រាយគ្រូបង្រៀនឱ្យបានច្រើន និង បង្កើនប្រាក់បៀវត្ស ជូនគ្រូបង្រៀន នៅតាមសហគម ដាច់ស្រយ៉ាល ឱ្យបានសមរម្មណ៍ផងដែរ៕

ភ្នំពេញ ៖ នៅយប់ថ្ងៃទី១៣ ខែកុម្ភៈ ឆ្នាំ២០១៩ នេះ ព្រះចៅអធិការវត្តច្បារអំពៅ ហោ សុខុន ត្រូវបានគេដឹកចេញពីវត្តច្បារអំពៅ ឆ្ពោះទៅវត្តបុទុវតី ហើយរៀបចំពិធីផ្សឹកតែម្តង ក្រោម បទ ចោទប្រកាន់ថា ខុសធម៌វិន័យ។

ពិធីផ្សឹកព្រះតេជគុណ ហោ សុខុន មានការរអញ្ជើញចូលរួមពីមន្ត្រីជាន់ខ្ពស់ក្រសួងធម្មការ និងសាសនាបានធ្វើឡើងនៅវត្តបុទុមវតី ចំពោះព្រះភក្ត្រសម្តេចសង្ឃនាយក នន្ទ ង៉ែត និងមន្ត្រីថ្នាក់ដឹកនាំសង្ឃជាច្រើនអង្គផ្សេងទៀត នៅក្នុងយប់នាថ្ងៃដដែល។

បន្ទាប់ពីបានផ្សឹកហើយនោះបព្វជិត ហោ សុខុន ក៏ត្រូវបានបញ្ចប់តួនាទីជាចៅអធិការវត្តច្បារអំពៅ និងទីប្រឹក្សាសម្តេចព្រះសង្ឃរាជ ទេព វង្ស និងសង្ឃនាយក នន្ទ ង៉ែត ផងដែរ។
ការសម្រេចបញ្ចប់តួនាទីនេះ បានធ្វើឡើងតាមរយៈសេចក្តីសម្រេចមួយនៅថ្ងៃទី១៣ ខែកុម្ភៈ ឆ្នាំ២០១៩ នេះ ដែលចុះព្រះហស្ថលេខា និងហត្ថលេខាដោយសម្តេចព្រះសង្ឃរាជ ទេព វង្ស សម្តេចសង្ឃនាយក នន្ទ ង៉ែត រួមនិងលោកទេសរដ្ឋមន្ត្រី ហឹម ឆែម រដ្ឋមន្ត្រីក្រសួងធម្មការ និងសាសនា។

សូមបញ្ជាក់ថា បព្វជិត ហោ សុខុន យល់ព្រមចាកសិក្ខាបទដោយខ្លួនឯង មិនមានការចាប់បង្ខំអ្វីទេ។ ចំពោះតួនាទីជាចៅអធិការវត្ត គោរម្យងារ និងជាទីប្រឹក្សា ត្រូវបានដកហូតអស់ហើយ៕

ខេត្តស្វាយរៀង ៖ ដំណាំអំពៅស្ករប្រមាណ ៨៣ហិកតា របស់ក្រុមហ៊ុនចំនួន២ ស្ថិតក្នុងឃុំគគីរសោម ស្រុកស្វាយទាប ខេត្តស្វាយរៀង ត្រូវភ្លើងឆេះស្ទើរទាំងស្រុង កាលពីថ្ងៃទី១២ ខែកុម្ភៈ ឆ្នាំ២០១៩ មិនទាន់ដឹងមូលហេតុនៅឡើយ។

ម្ចាស់ចម្ការអំពៅម្នាក់ឈ្មោះ កុយ សារ៉េន បានឲ្យដឹងថា មុនពេលមានភ្លើងឆេះគេឃើញមានកម្មករកំពុងកាប់អំពៅ និងមានម៉ាស៊ីនច្រូតក៏កំពុងតែច្រូតផងដែរ ហើយស្រាប់តែ មានអណ្តាតភ្លើងឆេះយ៉ាងសន្ធោសន្ធៅហុយផ្សែងខ្មួលខ្មាញ់ នាំស្លឹកអំពៅសែលឆេះហោះរាយប៉ាយលើអាកាសពិបាកគ្រប់គ្រង។

លោកបន្តថា ខណៈភ្លើងកំពុងឆេះនោះ ក្រុមកម្មករនាំគ្នារត់មកការដ្ឋាន ដើម្បីមកយកត្រាក់ទ័រភ្ជួរកាត់ផ្តាច់ចម្ការអំពៅជាកំណាត់ៗ និងបាញ់ទឹកដែរ ប៉ុន្តែមិនបានជោគជ័យនោះទេ ដោយសារឆេះលឿនពេកកម្មករស្ទើររត់ពុំរួចផង។ ។ បើតាមការប៉ាន់ប្រមាណដំណាំអំពៅរបស់លោកឆេះអស់ចំនួន ៥៨ហិកតា និងក្រុមហ៊ុន សុផាត សំណាង អស់ចំនួន ២៦ហិកតាផងដែរ។

សមត្ថកិច្ចបញ្ជាក់ថា ភ្លើងរលត់ទៅវិញនៅម៉ោង ២:២០នាទីរសៀលថ្ងៃដដែល និងកំពុងធ្វើការស្រាវជ្រាវពីមូលហេតុដែលនាំឲ្យកើតមានអគ្គិភ័យ៕

ភ្នំពេញ ៖ ទេសចរបទេសម្នាក់ បានស្លាប់នៅក្នុងបន្ទប់ទឹក ជាន់ទី២ នៃផ្ទះសំណាក់យីហោ “ណាវិន” ដែលសមត្ថកិច្ចសន្និដ្ឋានថា ដោយសារជំងឺបេះដូង។ ហេតុការណ៍នេះបានធ្វើឱ្យមានការភ្ញាក់ផ្អើលកាលពីវេលាម៉ោង ៣និងរសៀលថ្ងៃទី១២ ខែកុម្ភៈ ឆ្នាំ២០១៩ ស្ថិតនៅតាមបណ្តោយផ្លូវលេខ១៧៨ សង្កាត់ជ័យជំនះ ខណ្ឌដូនពេញ។

សមត្ថកិច្ចបានអោយដឹងថា ជនរងគ្រោះមានឈ្មោះ OARRIE LEONARO អាយុ ៧៩ឆ្នាំ ជាជនជាតិអង់គ្លេស ស្នាក់នៅក្នុងផ្ទះសំណាក់ “ណាវិន” ជាមួយប្រពន្ធ លុះមកដល់រសៀលថ្ងៃកើតហេតុខាងលើ ប្រពន្ធបានប្រទះឃើញដេកស្លាប់នៅក្នុងបន្ទប់ទឹកបាត់ទៅហើយ ទើបរាយការណ៍ជូនទៅម្ចាស់ផ្ទះសំណាក់ ព្រមទាំំងសមត្ថកិច្ចចុះពនិត្យនៅនឹងកន្លែង។

ក្រោយពេលសមត្ថកិច្ចបានធ្វើការពិនិត្យកោសល្យវិច្ឆ័យអស់ជាច្រើនម៉ោង សមត្ថកិច្ចជំនាញបានសន្និដ្ឋានថា ជនរងគ្រោះបានដួលស្លាប់នៅក្នុងបន្ទប់ទឹកដោយសារជំងឺគាស់បេះដូង មិនមែនជាករណីអ្វីផ្សេងនោះទេ។ ក្រោយពេលធ្វើកំណត់ហេតុរួច សពត្រូវបានដឹកទៅដំកើល់រក្សាទុកនៅមន្ទីរពេទ្យរុស្ស៉ី ដើម្បីរៀបចំចាត់ការបន្តទៀត៕

បាត់ដំបង ៖ កងរាជអាវុធហត្ថខេត្តបាត់ដំបង នៅវេលាម៉ោង ១១ព្រឹក នៅថ្ងៃទី១២ ខែកុម្ភៈ ឆ្នាំ២០១ បានចុះបង្ក្រាបគ្រឿងញៀនមួយករណី ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ត្រី មាស សុវណ្ណ មេបញ្ជាការកងរាជអាវុធហត្ថខេត្តបាត់ដំបង បានឃាត់ខ្លួនជនសង្ស័យចំនួន ៣នាក់ (ស្រី២នាក់) ត្រង់ចំណុចក្រុមទី៨ ភូមិកម្មករ សង្កាត់ស្វាយប៉ោ ក្រុងបាត់ដំបង និងដកហូតវត្ថុតាង ថ្នាំញៀនសរុបទម្ងន់ ១៥,៨គីឡូក្រាម ក្នុងនោះ ៖

ប្រភេទថ្នាំញៀនម្សៅក្រាមពណ៌សថ្លារឹង (ទឹកកក) មានទម្ងន់ ៩,៧០ គីឡូក្រាម និងថ្នាំគ្រាប់ ប្រភេទ (WY) ទម្ងន់ ៦,១០ គីឡូក្រាម។
គួររំលឹកថា ជារឿយៗ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការអាវុធហត្ថលើផ្ទៃប្រទេស តែងបានដាក់បញ្ជាឲ្យអនុវត្តន៍យ៉ាងម៉ឺងម៉ាត់ និងជាប្រចាំ ដើម្បីបង្ការ បង្រ្កាប និងសង្រ្គោះ ពិសេសយកចិត្តទុកដាក់លើបញ្ហាភូមិ/ឃុំ មានសុវត្ថិភាព ជូនប្រជាពលរដ្ឋ។

បច្ចុប្បន្ន ជនសង្ស័យទាំង៣នាក់ ត្រូវបានមន្ត្រីជំនាញនៃកងរាជអាវុធហត្ថខេត្តបាត់ដំបង កសាងសំណុំរឿង ដើម្បីបញ្ជូនទៅតុលាការបន្តតាមនីតិវិធី៕ ដោយ ៖ សុផល

សុខភាព ៖ ជំងឺពោះវៀនលូនចូលពងស្វាសកើតឡើងនៅពេលដែល ជាលិការបស់ពោះវៀនតូចអាចជ្រាតចូលទៅក្នុងថង់ពងស្វាស ព្រោះជញ្ជាំងពោះមានភាពខ្សោយ។ ហេតុដូច្នេះហើយទើបធ្វើឲ្យមានថ្នក់ក្នុងពងស្វាសឈឺចាប់ខ្លាំង ជាពិសេសនៅពេលក្អក អោន ឬលើករបស់ធ្ងន់ៗ។

ជំងឺនេះមិនគ្រោះថ្នាក់នោះទេ ប៉ុន្តែវាក៏មិនបាត់វិញដោយខ្លួនឯងដែរ ព្រមទាំងអាចមានផលវិបាកចំពោះអាយុជីវិតថែមទៀត។ នៅពេលគ្រូពេទ្យរកឃើញរឿងនេះ គាត់តែងតែណែនាំឲ្យធ្វើការវះកាត់ក្នុងករណីដែលវាមានការឈឺចាប់ខ្លាំង ឬរីកធំ។

យ៉ាងណាមិញ ជំងឺពោះវៀនលូនចូលក្នុងថង់ពងស្វាសមួយចំនួនគឺមិនមានមូលហេតុនោះទេ ប៉ុន្តែក៏អាចបណ្តាលមកពីរឿងមួយចំនួនដែរដូចជា៖
– សម្ពាធក្នុងពោះកាន់តែខ្លាំងទៅៗ
– ជញ្ជាំងពោះខាងមុខខ្សោយ
– ទាំងពីរចំណុចខាងលើរួមចូលគ្នា
– ប្រឹងបន្ទោបង់ ឬនោមពេក
– ធ្វើសកម្មភាពអ្វីមួយខ្លាំងក្លាពេក
– ក្អក ឬកណ្តាសរ៉ាំរ៉ៃ៕

ខេត្តបន្ទាយមានជ័យ ៖ កម្លាំងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត នាវេលាម៉ោង១៥ រសៀល ថ្ងៃទី១២ ខែកុម្ភៈ ឆ្នាំ២០១៩ នេះ បានទទួលបុរសជនជាតិខ្មែរ-ឥស្លាម៣នាក់ ដែលនគរបាលអន្តោប្រវេសន៍ច្រកទ្វារខ្លងលឹក ខេត្តស្រះកែវ របស់ថៃ មិនប្រថាប់ត្រាអនុញ្ញាតឲ្យចូលប្រទេស។

កម្លាំងនគរបាលប៉ុស្តិ៍ ធ្វើការសួរនាំនូវជនជាតិខ្មែរ-ឥស្លាមទាំង៣នាក់ បានឲ្យដឹងថា សមត្ថកិច្ចអន្តោប្រវេសន៍ថៃ មិនអនុញ្ញាតឲ្យចូលប្រទេស ដោយសារមានភេវរកម្ម និងអសន្តិសុខនៅក្នុងខេត្តភាគខាងត្បូងប្រទេសថៃ។ បន្ទាប់ពីបានសួរនាំរួច កម្លាំងនគរបាលប៉ុស្តិ៍បានណែនាំ និងពន្យល់ដល់ពួកគាត់ថា សមត្ថកិច្ចខាងកម្ពុជា មិនហាមឃាត់ក្នុងការធ្វើដំណើរចេញពីប្រទេសទេ តែការហាមមិនឲ្យចូលប្រទេសថៃ ជាសិទ្ធិរបស់សមត្ថកិច្ចថៃ៕

ភ្នំពេញ ៖ អង្គភាពប្រឆាំងអំពើពុករលួយ (ACU) នៅថ្ងៃទី ១១ កុម្ភៈនេះ បានសម្រេចបើកការស៊ើបអង្កេតពីបទពុករលួយ លើអតីតមេបញ្ជាការកងរាជអាវុធហត្ថខេត្តរតនគីរីគឺ លោក គឹម រស្មី។ ការស៊ើបអង្កេតនេះ បានធ្វើឡើងបន្ទាប់ពីមានការបង្ហោះវីដេអូឃ្លីបមួយតាមបណ្តាញសង្គមហ្វេសប៊ុក ដែលបង្ហាញពីលោក គឹម រស្មី បានចែកប្រាក់ដល់កូនៗរបស់លោកចំនួន៥នាក់ ក្នុងម្នាក់ចំនួន១០ម៉ឺនដុល្លារ។

គួរជម្រាបថា ការស៊ើបអង្កេតនេះដែរ បានធ្វើឡើងក្រោយពីលោក គឹម រស្មី ត្រូវបានព្រះមហាក្សត្រ លុបឈ្មោះចេញពីក្របខណ្ឌមន្ត្រីកងយោធពលខេមរភូមិន្ទ កាលពីថ្ងៃទី៩ ខែកុម្ភៈ។

នៅថ្ងៃទី ១១ កុម្ភៈ នេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានប្រាប់បណ្តាញព័ត៌មាន ថា អង្គភាពរបស់លោកបានសម្រេចបើកការស៊ើបអង្កេតករណីនេះ។លោកថា ការស៊ើបអង្កេតនេះ មិនមានការបង្គាប់បញ្ជា ឬបន្ទាប់ពីមានពាក្យបណ្តឹងពីអង្គការសង្គមស៊ីវិលណាមួយនោះទេ គឺអង្គភាពរបស់លោក បានចាប់ផ្តើមប្រមូលឯកសាររួចហើយនៅក្នុងរឿងនេះ។

លោក គឹម រស្មី អតីតឧត្តមសេនីយ៍ត្រី និងជាមេបញ្ជាការកងរាជអាវុធហត្ថខេត្តរតនគិរី ត្រូវបានព្រះមហាក្សត្រកម្ពុជាចេញព្រះរាជក្រឹត្យលុបឈ្មោះចេញពីក្របខណ្ឌនៃកងយោធពលខេមរភូមិន្ទ កាលពីថ្ងៃទី៩ ខែកុម្ភៈ បន្ទាប់ពីមានសំណើរពីលោកនាយករដ្ឋមន្ត្រី ហ៊ុន សែន។
ព្រះរាជក្រឹត្យដែលចុះថ្ងៃទី៩ ខែកុម្ភៈ នេះ គឺនៅ៤ថ្ងៃក្រោយពីការបែកធ្លាយវីដេអូឃ្លីបស្តីពីកម្មវិធីឃួបកំណើតមួយ កាលពីយប់ថ្ងៃទី៥ ខែកុម្ភៈ ឆ្នាំ២០១៩ ដោយលោក គឹម រស្មី បានប្រកាសពីលើវេទិកាដោយបែងចែកប្រាក់ដល់កូនៗចំនួន៥នាក់ របស់លោក ដោយម្នាក់ៗទទួលបានសែកចំនួន ១០ម៉ឺនដុល្លារ។

មហាជនបានរិះគន់ថា តើឧត្តមសេនីយ៍ត្រី ដែលសម្ញែងលុយដ៏ច្រើនសន្ធឹកសន្ធាប់បែបនេះ អាចមានការពាក់ព័ន្ធនឹងអំពើពុករលួយឬទេ? ចំណែកអ្នកប្រើប្រាស់តាមបណ្តាញសង្គម Facebook មួយចំនួនទៀត ក៏បានដាក់ការចោទប្រកាន់ថា លោក គឹម រស្មី គឺជាអ្នកនៅពីក្រោយនៃការរកស៊ីឈើខុសច្បាប់នៅខេត្តរតនគិរី ។

សម្តេចនាយករដ្ឋមន្ត្រីតេជោ ហ៊ុន សែន បានថ្លែងថា ការលុបឈ្មោះលោក គឹម រស្មី ចេញពីក្របខណ្ឌកងយោធពលខេមរភូមិន្ទនេះ គឺជាការវះកាត់ប្រកបដោយការឈឺចាប់។ ប៉ុន្តែនេះ គឺជាអភិក្រមទី៥ ដែលលោកនាយករដ្ឋមន្ត្រីធ្លាប់បានប្រកាសដាក់ឲ្យមន្ត្រីរបស់លោកអនុវត្តន៍ ឆ្លុះកញ្ចក់ ងូតទឹក ដុសក្អែល ព្យាបាល និងចុងក្រោយ គឺការវះកាត់នេះឯង។

គួរបញ្ជាក់ថា នេះគឺជាករណីទីមួយហើយ ដែលប្រមុខរដ្ឋាភិបាលកម្ពុជាបានធ្វើចំណាត់ការភ្លាមៗ លើករណីសង្ស័យពីការប្រព្រឹត្តអំពើពុករលួយរបស់មន្ត្រីជាន់ខ្ពស់ក្នុងជួររាជរដ្ឋាភិបាល។ ប៉ុន្តែ យ៉ាងណាក៏ដោយ លោកទេសរដ្ឋមន្ត្រី ឱម យិនទៀង បានបដិសេធពីការសន្និដ្ឋានពីទោសកំហុសលឿនពេកថា លោក គឹម រស្មី នឹងត្រូវបានចោទប្រកាន់ពីបទពុករលួយ ឬអត់នោះទេ? ឬថា តើគាត់ត្រូវបានចោទប្រកាន់ពីបទអ្វីនោះដែរ?៕