All posts by មេគង្គ ប៉ុស្តិ៍

ក្រុមហ៊ុន Samsung សងជិត៥៤០លានដុល្លារឲ្យក្រុមហ៊ុន Apple ក្នុងជម្លោះចម្លងម៉ូដទូរស័ព្ទ

June 29, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ទីបំផុត សង្គ្រាមផ្លូវច្បាប់ រវាងក្រុមហ៊ុន Apple និងក្រុមហ៊ុន Samsung ជុំវិញករណីការចម្លងការរចនាម៉ូដទូរស័ព្ទ iPhone រយៈពេលជាច្រើនឆ្នាំមកហើយ ត្រូវបានបញ្ចប់ ដោយតុលាការអាមេរិកបានចេញបញ្ជាឲ្យក្រុមហ៊ុន Samsung បង់ប្រាក់ឲ្យក្រុមហ៊ុន Apple ជិត៥៤០ លានដុល្លារអាមេរិក
ក្រុមហ៊ុន Samsung និង ក្រុមហ៊ុន Apple ដែលជាក្រុមហ៊ុនផលិតស្មាតហ្វូនធំជាងគេក្នុងពិភពលោក បានប្តឹងប្តល់គ្នាជុំវិញការលួចចម្លងការរចនាម៉ូដទូរស័ព្ទiPhone រយៈពេល៧ឆ្នាំមកហើយ។

ប៉ុន្តែយោងតាមឯកសាររបស់តុលាការអាមេរិកកាលពីថ្ងៃពុធ បញ្ជាក់ថាសង្គ្រាមដណ្តើមប៉ាតង់រវាងក្រុមហ៊ុនយក្សទាំងពីរនេះ បានឈានដល់ការបញ្ចប់ជម្លោះហើយ បន្ទាប់ពីចៅក្រមតុលាការសហព័ន្ធរបស់សហរដ្ឋអាមេរិកបានចេញបញ្ជាឲ្យក្រុមហ៊ុន Samsung បង់ប្រាក់ឲ្យក្រុមហ៊ុន Apple ប្រហែល ៥៣៩ លានដុល្លារដោយសារការចម្លងលក្ខណពិសេសប៉ាតង់ទូរស័ព្ទ iPhone។

ទោះជាយ៉ាងណា ចំពោះលក្ខខណ្ឌដំណោះស្រាយដោយទូទាត់តាមរយៈហិរញ្ញវត្ថុនេះ មិនត្រូវបានបង្ហាញជាសាធារណៈនោះទេ ហើយក៏មិនមានក្រុមហ៊ុនណាមួយក្នុងចំណោមក្រុមហ៊ុនទាំង២ អត្ថាធិប្បាយលម្អិតនៅក្នុងបទបញ្ជាតុលាការដែលបានច្រានចោលជម្លោះដែលកើតមានតាំងពីឆ្នាំ ២០១១ នេះដែរ។

ប៉ុន្តែចំនួនប្រាក់ដែលតុលាការបញ្ជាឲ្យក្រុមហ៊ុន Samsung បង់នោះ ត្រូវបានចាត់ទុកថាជាជោគជ័យមួយសម្រាប់ក្រុមហ៊ុនApple ដែលបានអះអាងនៅតុលាការថាការរចនាមានសារៈសំខាន់ចំពោះទូរស័ព្ទ iPhone៕

ច្រកអន្តរជាតិកម្ពុជាថៃ គីឡូត៍១៣ ឲ្យក្មេងអាយុក្រោម១៥ឆ្នាំអូសរទេះដឹកទំនិញឆ្លងដែនដោយសេរី

June 29, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

បាត់ដំបង ៖ ថ្វីត្បិតច្រកតំបន់គីឡូ13 ស្ថិតក្នុងស្រុកសំពៅលូន ខេត្តបាត់ដំបង ឈមទៅនឹងទឹក ដីថៃ ច្រកខៅឌីន ស្ថិតក្នុងស្រុកខ្លងហាត ខេត្តស្រះកែវ បានប្រែក្លាយជាច្រកអន្តរជាតិគីឡូត៍១៣ (ហៅ ច្រកភ្នំ)ដី ទៅហើយក្តី ប៉ុន្តែនៅតែមានការិះគន់ជាខ្លាំង ពីសំណាក់មហាជននៅជុំវិញតំបន់ ច្រកមួយ នេះ ទៅលើអ្វីដែលពួកគាត់បានចាត់ទុកថា សមត្ថកិច្ចនៅច្រកនេះ គ្មានការកែប្រែឡើយ គឺក្មេងអូស រទេះដឹកទំនិញ នៅតែកើតមានយ៉ាងច្រើនជារៀងរាល់ព្រឹក ខុសពីច្រកទ្វារអន្តរជាតិប៉ោយប៉ែត ក្នុង ខេត្ត បន្ទាយមានជ័យ។

ប្រភពនៅច្រកខាងលើឧ្យដឹងថា ខាងភាគីថៃ គេបានទប់ស្កាត់មិនឲ្យក្មេងៗទាំងនោះ អូសរទេះ ចូលទៅទឹកដីរបស់គេនោះទេ គឺខុសពីខាងកម្ពុជា សែលសមត្ថកិច្ចជំនាញពាក់ព័ន្ធបែរជានាំគ្នាអោបដៃ ឬអង្គុយមើលមិនទប់ស្កាត់ទៅវិញ ឬក៏អាចកោសរូសក្មេងៗនោះទៀតផង។

មជ្ឈដ្ឋានលើកឡើងថាៈបើច្រកខាងលើ បានប្រែក្លាយពីច្រកតំបន់ ទៅជាច្រកអន្តរជាតិទៅ ហើយ ហេតុអ្វីនៅច្រកទ្វារមួយនេះ គួរតែមានការកែប្រែដូចគ្នាទើបល្អ ពិសេសករណីក្មេងប្រុសស្រី អូសរទេះដឹកទំនិញតែម្តង។

ជំវិញករណីខាងលើសមត្ថកិច្ចច្រកទ្វារអន្តរជាតិភ្នំដី(គីឡូត៏១៣)ប្រាប់ថា ពេលអូសរទេះចេញពីកម្ពុជា មនុស្សធំជាអ្នកអូស ព្រោះខាងភាគីថៃ គេទប់ស្កាត់មិនឲ្យមានកុមារមិនគ្រប់អាយុអូសរទេះ ចូលលើទឹកដីគេឡើយ ប៉ុន្តែរទេះមួយចំនួន ខណៈអូសត្រឡប់ចេញផុតពីមុខសមត្ថកិច្ចថៃ បែរជា មនុស្ស ធំបណ្តោយឲ្យក្មេងៗអូសជំនួសវិញ កាត់មុខសមត្ថកិច្ចខ្មែរ គ្រប់ជំនាញដែលអង្គុយចាំទារប្រាក់ ពីមុខទំនិញប៉ុណ្ណោះ។

បញ្ហានេះលោកអភិបាលស្រុកសំពៅលូនងៀវ ប៊ុនយៀងមានប្រសាសន៏តាមទូរសព្ទថាៈ បញ្ហា នេះ មិនមែនតែទើបមានឥឡូវនោះទេ តែលោកចាប់អារម្មណ៏យូរណាស់មកហើយ តាំងតែពីលោក នៅជាមន្ត្រីម្ល៉េះ ព្រោះលោកធ្លាប់ធ្វើការផ្នែកខាងជួយក្មេងៗ នេះ។ លោកបន្ថែមថា ក៏ប៉ុន្តែវាមិនអស់ ដោយសារតែពលរដ្ឋមួយចំនួនគាត់ចំណាកស្រុកមកពីចម្ងាយ ដូច្នេះ ក្មេងទាំងនោះ មកធ្វើការជាមួយ ម្ដាយរបស់គាត់ តែលោកព្យាយាមដែរតែធ្វើទៅវាមិនទាន់អស់។

យ៉ាណាក៏ដោយក្មេងទាំងនោះ គេឃើញថា មានអូររទេះដឹកទំនិញច្រើនឆ្នាំមកហើយ គឺមិនទាន់ មានមន្ត្រីជំនាញណាមានវិធានការលុបបំបាត់នោះទេ ធ្វើឧ្យពួកគាត់បាត់បង់ការសិក្សាដែលឪពុកម្ដាយ បង្ខំលក់កម្លាំងពលកម្មរបស់ពួកគេជារាងរាល់ថ្ងៃ ដើម្បីជួយរកចំណូលបន្ថែមបំពេញសេចក្តី ត្រូវការក្នុង គ្រួសារ៕

កងទ័ព ប្រារព្ធពិធីរំលឹកខួបលើកទី៣០ឆ្នាំ ថ្ងៃបង្កើតយោធភូមិភាគទី៥

June 29, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

បាត់ដំបង ៖ កាលពីថ្ងៃទី២៨ ខែមិថុនា ឆ្នាំ២០១៨ នៅទីបញ្ជាការយោធភូមិភាគទី៥ ខេត្ត បាត់ដំបង បានរៀបចំពិធីអបអរសាទរខួបអនុស្សាវរីយ៍លើកទី៣០ឆ្នាំ ថ្ងៃបង្កើតយោធភូមិភាគ ទី៥ ថ្ងៃទី ២៨ ខែមិថុនា ១៩៨៨ ថ្ងៃទី។ពិធីអបអរសាទររំលឹកខួប៣០ឆ្នាំនៃថ្ងៃបង្កើតយោធភូមិភាគទី៥ នេះ ត្រូវបានប្រព្រឹត្តទៅ ក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងមានការ ចូលរួមពីសំណាក់នាយទាហាន នាយទាហានរង និង ពលទាហាន យោធភូមិភាគទី ៥ ចំនួន ២០៨៨នាក់។

លោក ឧត្តមសេនីយ៍ឯក ប៊ុន សេង មេបញ្ជាការយោធភូមិភាគទី៥ បានឱ្យដឹងថា ៖ យោធភូមិភាគទី៥ មានចំនួន៤ខេត្តរួមមាន៖ ខេត្តបាត់ដំបង, ខេត្តប៉ៃលិន, ខេត្តពោធិ៍សាត់, ខេត្ត បន្ទាយមានជ័យ។ ក្នុងរយៈពេល៣០ឆ្នាំ កន្លងទៅនេះ យោធភូមិភាគទី ៥ បានបង្កើតនូវស្នាដៃ ធំៗជាច្រើនជូនប្រទេសជាតិ ក្នុងកិច្ចការការ ពារសន្តិសុខ និង ការពារបូរណភាពទឹកដី ការងារ ហ្វឹកហ្វឺន ការកសាងអង្គភាពកិច្ចសហប្រតិបត្តិការជាមួយប្រទេសជិតខាង និង ការងារមនុស្សធម៌ និង កិច្ចការសង្គម ។
នៅក្នុងពិធីអបអរសាទរខួបអនុស្សាវរីយ៍លើកទី៣០ឆ្នាំ ថ្ងៃបង្កើតយោធភូមិភាគទី៥ ថ្ងៃទី ២៨ ខែមិថុនា ១៩៨៨ ថ្ងៃទី ២៨ ខែមិថុនា ២០១៨ នាឱកាសនោះ យោធភូមិភាគបាន រៀបចំ ធ្វើក្បួនព្យុះហយាត្រា ដែលមានចំនួន ២៩ ផែន ដែលមានផែនដើរ ផែនគ្រឿងចក្រ បង្ហាញជូន ភ្ញៀវទស្សនាផងដែល ។

ថ្លែងទៅកាន់ពិធីអបអរសាទរខួបអនុស្សាវរីយ៍លើកទី៣០ឆ្នាំ ថ្ងៃបង្កើតយោធភូមិភាគទី៥ សម្តេចពិជ័យសេនា ទៀ បាញ់ បានសំដែងនូវការកោតសរសើរចំពោះ មេបញ្ជាការ មេបញ្ជាការរង នាយទាហាន នាយទាហនរង និ ងពលទាហាន ក្នុងយោធភូមិភាគទី ៥ ទាំងអស់ ដែលក្នុងរយៈ ពេល ៣០ កន្លងមកនេះ បានធ្វើពលីកម្មគ្រប់បែបយ៉ាងក្នុងបុព្វហេតុជាតិមាតុភូមិ កម្ពុជា រហូត ដណ្តើមបាននូវស្នាដៃធំៗជាច្រើនជូនជាតិ មាតុភូមិ ។

សម្តេចបានជំរុញដល់នាយទាហាន នាយ ទាហានរង និងពលទាហាន យោធភមិភាគទី ៥ ទាំងអស់ត្រូវបន្តការពារឱ្យបាននូវសុខសន្តិភាព ហើយមិនថាកាលៈទេសៈណានោះទេត្រូវកំចាត់ចោលនូវរាល់បុគ្គលណា ដែលមានចេតនា ចង់ បំផ្លិតបំផ្លាញជាតិនោះ ។ សម្តេចពិជ័យសេនា ទៀ បាញ់ ក៏បានជំរុញឱ្យគ្រប់បណ្តាអង្គភាព យោធភូមិ ភាគទី ៥ ត្រូវបន្តការកសាងធនធានមនុស្ស តាមរយៈការងារហ្វឹកហ្វឺន បណ្តុះបណ្តាល ជំនាញវិជ្ជាជីវៈកងទ័ព ដើម្បីឱ្យកងទ័ពកាន់តែមានសមត្ថភាពខ្ពស់ ក្នុងកិច្ចការបំពេញភារកិច្ចការពារជាតិមាតុភូមិ ។ ដោយយោធភូមិភាគទី ៥ បានដើរតួនាទីសំខាន់ក្នុងការអនុវត្តនយោបាយឈ្នះ ឈ្នះ របស់សម្តេចតេជោ ហ៊ុន សែន នោះ សម្តេចពិជ័យសេនា ទៀ បាញ់ បានប្រកាសក្នុងពិធីនោះ អំពីការយកទីតាំងខេត្ត ប៉ៃលិន សំរាប់ធ្វើការសាងសង់វិមានឈ្នះ ឈ្នះ ដើម្បីទុកជានិមិត្តរូប នៃ សន្តិភាពទៅថ្ងៃអនាគត ។ ជាចុងក្រោយសម្តេចពិជ័យសេនា ទៀ បាញ់បានជំរុញដល់នាយ ទាហាន នាយទាហនរង និ ងពលទាហាន យោធភមិភាគទី ៥ ទាំងអស់ឱ្យទៅចូលរួមបោះឆ្នោត ឱ្យបានគ្រប់ៗគ្នា នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដើម្បីគាំទ្រសម្តេចតេជោ ហ៊ុន សែន ធ្វើជានាយករដ្ឋមន្ត្រីបន្តទៀត ដើម្បីថែរក្សាសុខសន្តិភាព ស្ថិរភាពនយោបាយ និងការអភិវឌ្ឍ របស់ប្រទេសអោយកាន់តែមានការរីកចំរើនទៅថ្ងៃអនាគត៕

ប្លន់សម្លាប់ស្ត្រីរកស៊ីចងការប្រាក់ នៅសង្កាត់ស្ទឹងមានជ័យ

June 29, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ កម្លាំងនាយកដ្ឋានព្រហ្មទណ្ឌក្រសួងមហាផ្ទៃ សហការណ៍ជាមួយនគរបាលព្រហ្មទណ្ឌ រាជធានីភ្នំពេញ និងនគរបាលប៉ុស្តិស្ទឹងមានជយ័១ បាននាំខ្លួនជនសង្សយ័ដែលជាឃាតករ ប្រុស ស្រីចំនួន៣នាក់ មកចង្អុលទីកន្លែងដែលពួកគេវាយសម្លាប់នារីរកស៊ីរាប់លុយម្នាក់ មកទំលាក់ចោល ក្នុងប្រឡាយទឹកស្អុយ ស្ថិតនៅតាមផ្លូវ៣៧១ ភូមិអូបែកក្អម សង្កាត់អូបែកក្អម ខណ្ឌសែនសុខ កាលពីវេលាម៉ោង ១០និង៣០នាទីព្រឹក ថ្ងៃទី២៩ ខែមិថុនា ឆ្នាំ២០១៨ ។

យោងតាមចម្លើយសារភាពពីជនសង្សយ័បានអោយដឹងថា នៅយប់ថ្ងៃទី២០ ខែមិថុនា ឆ្នាំ ២០១៨ វេលាម៉ោង ៥ល្ងាច ជនសង្សយ័ បានទូរស័ព្ទហៅនារីរងគ្រោះអោយទៅផ្ទះរបស់ខ្លួន ដើម្បី ខ្ចីលុយ ហើយនារីរងគ្រោះបានទៅផ្ទះជនសង្សយ័ ដោយនឹកស្មានមិនដល់ថា ជនសង្សយ័រៀបចំ គម្រោង វាយប្លន់សម្លាប់នោះឡើយ។ ជនសង្សយ័បានរៀបរាប់ប្រាប់សមត្ថកិច្ចថា ពួកគេមានគ្នីគ្នា ចំនួន ៤នាក់ បានបិទទ្វារព្រួតវាយនារីរងគ្រោះ នៅក្នុងបន្ទប់ជួលរបស់ជនសង្ស័យ ស្ថិតនៅភូមិទ្រា ២ សង្កាត់ស្ទឹងមានជយ័១ ខណ្ឌមានជ័យ រហូតដល់ស្លាប់ ហើយបានប្រមូលយកលុយដែល មាន នៅក្នុងខ្លួនរបស់ជនរងគ្រោះ។ លុះនៅវេលាម៉ោង៩យប់ ថ្ងៃដដែល ក្រុមជនសង្ស័យទាំង៤នាក់ បានយកសពនារីរងគ្រោះដាក់ចូលក្នុងកញ្ឆេដាក់នំបុង័មួយ រួចសែងទៅដាក់លើ រទេះអូសយកមក ទម្លាក់ចោលចូលក្នុងប្រឡាយទឹកស្អុយមួយកន្លែងនៅផ្លូវ៣៧១ ព្រំប្រទល់ជាមួយ ខណ្ឌមានជយ័ និងខណ្ឌសែនសុខ។
ក្រោយទទួលបានពាក្យបណ្តឹង ក្រសួងមហាផ្ទៃបានស្រាវជ្រាវឃាត់ខ្លួនជនសង្ស័យចំនួន៣ នាក់នៅខេត្តព្រៃវែង ដែលមានឈ្មោះដូចខាងក្រោម៖ ១. ឈ្មោះ កែវ សុផានិត ភេទប្រុស អាយុ ២៨ឆ្នាំ។ ២ ឈ្មោះ អាន អឿន ភេទស្រី អាយុ៣១ឆ្នាំ និងទី៣ ឈ្មោះ រ៉ាន់ ដារ៉ា ភេទប្រុស អាយុ ១៩ឆ្នាំ ទាំងបីនាក់រស់នៅ ភូមិម្រេញ ឃុំត្រពាំងស្រែ ស្រុកមេសាង។

សមត្ថកិច្ចបានអោយដឹងថា នារីរងគ្រោះខាងលើមានឈ្មោះ ខ្នើយ សឹង អាយុ៣១ឆ្នាំ មុខរបរ ជាអ្នកចងការលុយ ស្នាក់នៅភូមិទ្រា២ សង្កាត់ស្ទឹងមានជយ័១ ខណ្ឌមានជយ័ ដោយមានការបាត់ សមាជិកក្រុមគ្រួសាររយៈពេល១០ថ្ងៃ បងប្អូនជនរងគ្រោះបានដាក់ពាក្យបណ្តឹង នៅប៉ុស្តិ៍នគរបាល ស្ទឹងមានជយ័ទី១។ ក្រោយពីទទួលបានពាក្យបណ្តឹងពីបងប្អូនជនរងគ្រោះ សមត្ថកិច្ចប៉ុស្តិ ស្ទឹងមាន ជយ័ ទី១ សហការណ៍ជាមួយកម្លាំងព្រហ្មទណ្ឌខណ្ឌមានជយ័ នគរបាលព្រហ្មទណ្ឌក្រុង និងនគរ បាលនាយកដ្ឋានព្រហ្មទណ្ឌក្រសួងមហាផ្ទៃបានបើកការស្រាវជ្រាវឈានដល់ការចាប់ឃាតករដែលជាបុរសសង្សយ័ប្រុសចំនួន២នាក់ និងស្ត្រីម្នាក់ ចំណែកជនសង្ស័យម្នាក់ទៀត កំពុងរត់គេចខ្លួន។

បច្ចុប្បន្នជនសង្សយ័ទាំង៣នាក់ខាងលើ ត្រូវសមត្ថកិច្ចបន្តការសាកសួរបន្ថែម ដើម្បីរៀបចំ សំណុំរឿង និងជាពន្លឺសម្រាប់បន្តស្រាវជ្រាវឈានទៅរកមុខសញ្ញាម្នាក់ទៀត ដែលកំពុងរត់គេច ខ្លួន៕

ឃាត់រថយន្តមួយគ្រឿង ដឹកជញ្ជូនស្រោមអាវុធវែង ខ្លី និងសម្លៀកបំពាក់ទ័ព

June 29, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

បន្ទាយមានជ័យ ៖ កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តបន្ទាយមានជ័យ បានចុះប្រតិបត្តិការបង្រ្កាបស្ទាក់ចាប់ឃាត់រថយន្តក្រុងដឹកអ្នកដំណើរនៅវេលាម៉ោង៩និង៥០នាទីយប់ថ្ងៃពុធ១៥កើតខែបឋមាសាឍ ឆ្នាំច សំរឹទ្ធិស័ក្ត ពស ២៥៦២ ត្រូវនឹងថ្ងៃទី២៧ខែមិថុនាឆ្នាំ២០១៨ នៅលើកំណាត់ផ្លូវជាតិលេខ៥ ក្នុងភូមិសាស្ត្រ ភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ រួចនាំយកមកស្នងការដ្ឋាននគរបាលខេត្ត ដើម្បីត្រួតពិនិត្យ។

លោកវរសេនីយ៍ត្រី យឹម នី នាយរងការិយាល័យ នគរបាលប្រឆាំងបទល្មើសសេដ្ឋកិច្ច បានឲ្យដឹងថា៖បន្ទាប់ពីទទួលបានព័ត៌មានថា មានរថយន្តក្រុងដឹកអ្នកដំណើរ លោកបានស្នើសុំបទបញ្ជាពីលោកឧត្តមសេនីយ៍ស្នងការ និងមានការសម្របសម្រួលពីលោក សេងគឹមឡាក់ ព្រះរាជអាជ្ញារងអមសាលាដំបូងខេត្ត បន្ទាយមានជ័យ កម្លាំងនគរបាលជំនាញ ប្រឆាំងបទល្មើសសេដ្ឋកិច្ចចំនួន៣នាក់ ដឹកនាំដោយ លោកវរសេនីយ៍ទោ រស់ អៀម នាយរងការិយាល័យ ប្រឆាំងបទល្មើសសេដ្ឋកិច្ច ចុះធ្វើការស្ទាក់ចាប់រថយន្តក្រុងដឹកអ្នកដំណើរ១គ្រឿងនេះម៉ាក ហ៊ីយុនដាយ ពណ៌ស លឿង ចង្កូតឆ្វេង ផលិតនៅឆ្នាំ១៩៩៩ ពាក់ស្លាកលេខ ភ្នំពេញ 3A-9545 ដែលជារបស់ក្រុមហ៊ុនK S Oដែលបើកបរដោយឈ្មោះ អ៊ុក ចំរើន ភេទប្រុសអាយុ ៣៥ឆ្នាំ ទីលំនៅរាជធានីភ្នំពេញយកមកស្នងការដ្ឋាននគរបាលខេត្ត។

លោកឧត្តមនីយ៍ត្រីចាប សុផាប្ញទ្ធិ ស្នកងាររង ទទួលផែន ប្រឆាំងបទល្មើស បានឲ្យដឹងថា៖នៅថ្ងៃ១រោចខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨ខែមិថុនាឆ្នាំ២០១៨ កម្លាំងជំនាញ ដែលមានការចូលរួមពី ស្ថាប័នអយ្យការផងនោះ បានធ្វើការត្រួតពិនិត្យរកឃើញមានទំនិញចម្រុះចំនួន១២មុខ ក្នុងនោះសម្ភារៈកងទ័ពមាន អាវយឺត រូបកាំភ្លើងមាន.ក ចំនួន៣៥ អាវ,អាវយឺតវៀល.ក ពណ៌ត្រេអ៊ីចំនួន១៥អាវ,កាបូបដាក់អាវុធចំនួន៩,ស្រោម ខ្នោះដៃចំនួន៥៥,ស្រោមអាវុធខ្លីចំនួន១២,ស្រោមអាវុធខ្លីមានខ្សែ ចំនួន១០ ,ខ្សែអាវុធវែង AK 47ចំនួន៥០ខ្សែ។ចំពោះទំនិញទាំងនេះ កម្លាំងនគរបាលជំនាញកំពុង កសាងសំណុំរឿងតាមនិតិវិធីច្បាប់៕

រាជធានីភ្នំពេញនឹងសាងសង់ស្ពានអាកាស និងផ្លូវក្រវ៉ាត់ក្រុងទី៣បន្ថែមទៀត

June 29, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ការកកស្ទះចរាចរណ៍នៅតែបញ្ហាធំមួយសម្រាប់ប្រជាពលរដ្ឋរស់រាជធានីភ្នំពេញ ដែល តម្រូវឲ្យរកវិធីដោះស្រាយបន្ទាន់។ ឆ្លើយតបចំពោះបញ្ហានេះ សម្តេច តេជោ ហ៊ុន សែន នាយករដ្ឋ មន្ត្រីបានបង្ហាញនូវមហិច្ចតា ក្នុងការសាងសង់ស្ពាន អាកាសបន្ថែមទៀត ដើម្បីរំដោះចរាចរណ៍ ក្នុង ក្រុង កាត់បន្ថយការកកស្ទះចរាចរ ណ៍ តាមរយៈយុទ្ធសាស្ត្រយកក្រុងចិញ្ចឹមក្រុង។

ថ្លែងនៅក្នុងពិធីបើកការដ្ឋានសាងសង់ស្ពានអាកាស និងផ្លូវក្រោមដីនៅរង្វង់មូល ចោមចៅ នៅព្រឹកថ្ងៃសុក្រទី២៩ ខែមិថុនា សម្តេចតេជោ ហ៊ុន សែន នាយក រដ្ឋមន្ត្រីនៃព្រះរាជា ណាចក្រកម្ពុជា បានបង្ហាញនូវមហិច្ចតារបស់រាជរដ្ឋាភិបាល ក្នុងការបន្តសាងសង់ស្ពានអាកាស បន្ថែមទៀត ជាមួយនឹងការសាងសង់ផ្លូវក្រវ៉ាត់ក្រុងដំណាក់កាលទី៣នាពេលខាងមុខ ដើម្បីសម្រួល ការកកស្ទះចរាចរណ៍ ក្នុងរាជធានីភ្នំពេញនាពេលបច្ចុប្បន្ន។
ការកកស្ទះបានក្លាយជាបញ្ហាប្រឈមមួយ នៅក្នុងក្រុង នៅគ្រាដែលកំណើនប្រជាជនចេះតែ កើនឡើង ជាមួយនឹងវត្តមាន យាន្តយន្តជាង២លានគ្រឿងក្នុងរាជធានីភ្នំពេញ ដែលធ្វើឲ្យប្រជាពល រដ្ឋរអ៊ូរទាំ រៀងរាល់ថ្ងៃ។

បើតាមសម្តេចតេជោ តាមរយៈយុទ្ធសាស្ត្រយកក្រុងចិញ្ចឹមក្រុង រឺយុទ្ធ សាស្ត្រ យកស្លឹកត្នោតខ្ចប់ស្ករត្នោតបានធ្វើឲ្យសមិទ្ធផលជាស្ពានអាកាសចំ នួន៥ហើយត្រូវ បាន លេចចេញជារូបរាង ក្នុងនោះស្ពានអាកាសក្បាលថ្នល់ ស្ពាន អាកាសស្ទឹងមានជ័យ ស្ពានអាកាស ៧មករា ស្ពានអាកាស៥មករា និងស្ពានអា កាសផ្សារដីហុយ ដែលនឹងត្រូវសម្ពោធនៅថ្ងៃទី០២ កក្កដាខាងមុខនេះ។

ក្រៅពីមហិច្ចតានៃការសាងសង់ស្ពានអាកាស សម្តេចតេជោបានបញ្ជាក់ថា រាជ រដ្ឋាភិបាល បានស្នើទៅជប៉ុនដើម្បីសិក្សាក្នុងការសាងសង់រថភ្លើងលើអាកាសចាប់ពីរាជធានីម្តុំផ្សារថ្មីដល់ព្រលានយន្តហោះ។ ទន្ទឹមនឹងនោះសម្តេចក៍បានស្នើសុំ ទៅកាន់ភាគីចិនដើម្បីធ្វើការសាងសង់ផ្លូវ ក្រវ៉ាត់ ក្រុងដំណាក់កាលទី៣បន្ថែមទៀត គោលបំណងតែមួយគឺបម្រើផលប្រយោជន៍ប្រជាជន និងកាត់ បន្ថយការស្ទះ ចរាចរណ៍។

គួរបញ្ជាក់ថា សាងសង់ស្ពានអាកាស និងផ្លូវក្រោមដីរង្វង់មូលចោមចៅនេះនឹងត្រូវសាងសង់ ដោយក្រុមហ៊ុន វិនិយោគទុនអាណិកជនកម្ពុជា (OCIC) ដោយគ្រោងប្រើប្រាស់ថវិកា សាង សង់ ២២លានដុល្លារអាមេរិក។តាមគម្រោងស្ពានអាកាស និងផ្លូវក្រោមដី នឹងប្រើរយៈពេលសាង សង់ ៣០ខែ ពោលចាប់ពីថ្ងៃទី២៩ ខែមិថុនា ឆ្នាំ២០១៨ ដល់ថ្ងៃទី២៩ ខែធ្នូ ឆ្នាំ២០២០៕

រដ្ឋាភិបាលស្នើការយោគយល់ ខណៈទឹកជន់លិចទីក្រុងពេលមានភ្លៀងខ្លាំង

June 29, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ជំនន់ទឹកភ្លៀងលិចទីក្រុងភ្នំពេញ តែងតែកើតមានញឹកញាប់នៅពេលមានភ្លៀងធ្លាក់ខ្លាំងជាប់ៗគ្នាម្តងៗ។ សម្តេចតេជោ នាយករដ្ឋមន្ត្រីបានសុំការយោគយល់ពីប្រជាពលរដ្ឋក្នុងក្រុងភ្នំពេញ ចំពោះបញ្ហាទឹកលិចក្រុង។ យ៉ាងណាក៍ដោយសម្តេចតេ ជោបានពន្យល់ថា បញ្ហាលិចក្រុងនៅពេលភ្លៀងធ្លាក់នោះ មិនមែនទើបនឹងកើត ឡើងនោះទេស្ថានភាពបែបនេះ កើតឡើងតាំងពីពេល សម្តេចមករស់ នៅ ភ្នំពេញ ដំបូងមកម្ល៉េះ។ ការលិចក្រុងគឺដោយសារទឹកភ្លៀងមានចំនួនច្រើន ស្របពេល ដែល ប្រឡាយ និងលូមិនអាចទប់ទល់នឹងធារទឹកដែលមានលើសលុប។ ជាវិធានការរបស់សាលាក្រុង បានបន្តការស្តារប្រឡាយឲ្យបានជ្រៅ និងការស្តារលូនៅតាមខណ្ឌ ដើម្បីពង្រីកធារទឹកឲ្យបាន ធំ ជាងមុន។

សម្តេចតេជោ ក៏បានស្នើឲ្យប្រជាពលរដ្ឋ ចូលរួមទុកដាក់ថង់ប្លាស្ទីក ឲ្យបានល្អកុំឲ្យហូរចូលលូ បង្កឲ្យ មានការកកស្ទះលូជាដើម។

សម្តេចតេជោ នាយករដ្ឋមន្ត្រីបានប្រកាសប្រាប់ប្រជាពលរដ្ឋដែលរស់នៅតាម បណ្តោយ ប្រឡាយ នានា កុំឲ្យមានការភ័យបារម្ភ រដ្ឋបាលក្រុងបានសម្រេចជា គោលការណ៍គឺផ្តល់ ដីកម្មសិទ្ធិ ស្រប ច្បាប់ ជូនពួកគាត់នៅលើប្រឡាយនោះ តាម រយៈការបង្រួមទំហំប្រឡាយ និងជីកប្រឡាយ ឲ្យជ្រៅ ជាងមុនដើម្បីសល់ដីសម្រា ប់ជូនប្រជាពលរដ្ឋ៕

ភ្លៀងធ្លាក់ខ្លាំង ផ្អាកការតាមរកក្រុមកីឡាករក្មេងៗថៃ ដែលបាត់ខ្លួនក្នុងរូងភ្នំនៅខេត្តឈៀងរ៉ៃ

June 29, 2018ព័ត៌មានថ្មីចុងក្រោយ, ព័ត៌មានអន្តរជាតិ, ព្រឹត្តិការណ៍កម្ពុជាមេគង្គ ប៉ុស្តិ៍

ថៃ ៖ ការស្វែងរកក្រុមកីឡាករបាល់ទាត់ក្មេងៗ១២នាក់ និងគ្រូម្នាក់ ដែលបាត់ខ្លួនក្នុងរូងភ្នំ ថាមលួង ក្នុងខេត្តឈៀរ៉ៃ ត្រូវបានផ្អាកបណ្តោះអាសន្ននៅយប់ ថ្ងៃទី២៨ ខែមិថុនា ឆ្នាំ២០១៨ នេះ ដោយសារភ្លៀងបន្តធ្លាក់ខ្លាំង ធ្វើឲ្យមានការពិបាកដល់ក្រុមសង្គ្រោះមិនអាចរុលទៅមុខតាមរូងភ្នំដែលមានប្រវែងប្រមាណ១០ គីឡូម៉ែត្រនោះទៀតបាន។

កាសែត Bangkok Post បានរាយការណ៍ថា ខណៈនេះ ( ម៉ោង១០ យប់ ថ្ងៃទី២៨ មិថុនា) ឧបករណ៍រុករកខួង និងបូមទឹក ត្រូវបានយកចេញពីរូងភ្នំសិន ដោយត្រូវរង់ចាំកម្រិតទឹកជំនន់ស្រកចុះ ទើបប្រតិបត្តិការសង្គ្រោះអាចបន្តទៅទៀតបាន។

សូមម្រាបថា គិតតមកដល់ថ្ងៃនេះ សមាជិកកីឡាបាល់ទាត់ដែលមានក្មេងៗ១២នាក់ (អាយុពី ១១ឆ្នាំ ដល់ ១៦ឆ្នាំ) និងគ្រូបង្វឹកម្នាក់អាយុ ២៥ឆ្នាំ បានបាត់ខ្លួននៅក្នុងរូងភ្នំខាងលើអស់រយៈពេល៥ថ្ងៃមកហើយ ខណៈដែលក្រុមអ្នជំនាញភូមិសាស្ត្រជឿជាក់ថា ពួកគេបានរុលចូលយ៉ាងជ្រៅទៅក្នុងរូងភ្នំដែលមានជម្រៅប្រមាណ១០គីឡូម៉ែត្រ ហើយទំនងជាដោយសារតែផ្លូវដែលពួកគេត្រូវចេញមកវិញនោះ ត្រូវបានទឹកលិចក្រោយភ្លៀងធ្លាក់ខ្លាំង ធ្វើឲ្យពួកគេបន្តរុលទៅមុខទៀត។ បើតាមប្រវត្តិនៃរូបថតមួយចំនួនរបស់ក្រុមក្មេងៗកីឡាករទាំងនេះ គឺពួកគេធ្លាប់ទៅកាន់ទីនោះកាលពីចុងឆ្នាំ២០១៦។

កាសែត បាងកកប៉ុស្តិ៍ បន្តថា នៅល្ងាចថ្ងៃទី២៨ ម្សិលមិញនេះ នាយករដ្ឋមន្ត្រីថៃលោក ប្រាយុទ្ធ ចាន់អូចា ក៏បានចុះទៅដល់កន្លែងកើតហេតុដោយផ្ទាល់ ដើម្បីពិនិត្យសកម្មភាពនៃការជួយសង្គ្រោះ និងលើកទឹកចិត្តសមាជិកក្រុមគ្រួសារនៃមនុស្សទាំង ១៣នាក់ ដែលកំពុងរង់ចាំចម្លើយពីក្រុមសង្គ្រោះ។
យ៉ាងណាក៏ដោយ រហូតមកទល់នឹងយប់ថ្ងៃទី២៨ ខែមិថុនា នេះ ប្រតិបត្តិការជួយសង្គ្រោះនៅតែបន្តដដែល ហើយមិនទាន់មានតម្រុយអ្វីគួរឲ្យកត់សម្គាល់នៅឡើយទេ តែក្រុមសង្គ្រោះដែលមានទាំងអ្នកជំនាញមកពីអង់គ្លេស និងអាមេរិកផងដែរ បានសម្រេចផ្អាកការរុករកសិនដោយសារតែភ្លៀងក្នុងតំបនភ្នំ ថាមលួង ខេត្តឈៀងរ៉ៃ បានបន្តធ្លាក់ខ្លាំងជាថ្មីទៀត៕

ស្ពានអាកាស និងផ្លូវក្រោមដីនៅរង្វង់មូលចោមចៅ ចាប់ផ្តើមសាងសង់

June 28, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ស្ពានអាកាស និងផ្លូវក្រោមដី នៅរង្វង់មូលចោមចៅ ដែលមានតម្លៃប្រមាណ២២លានដុល្លារអាមេរិក នៅរសៀលថ្ងៃទី ២៨ ខែមិថុនា ឆ្នាំ២០១៨ នេះ លោក ឃួង ស្រេង អភិបាលរាជធានីភ្នំពេញ បានប្រារពពិធីក្រុងពាលី ដើម្បី សុំសេចក្តីសុខ ពីម្ចាស់ទឹក ម្ចាស់ដី សម្រាប់ដំណើរការសាងសង់ ដែលនឹងចាប់ផ្តើមបើកការដ្ឋាន សាងសង់នៅថ្ងៃទី២៩ ខែ មិថុនានេះ ក្រោមអធិបតីដ៏ខ្ពង់ខ្ពស់សម្តេច តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។

ស្ពានអាកាស និងផ្លូវក្រោមដី រង្វង់មូលចោមចៅនេះ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ដែលត្រូវស្ថាបនាដោយក្រុមហ៊ុនម៉ៅការ គឺក្រុមហ៊ុនវិនិយោគទុនអាណិកជនកម្ពុជា (OCIC) ក្រោមគម្រោង របស់រាជរដ្ឋាភិបាល តាមរយៈរដ្ឋបាលរាជធានីភ្នំពេញ ដែលគ្រោងនឹងបញ្ចប់នៅថ្ងៃទី២៩ ខែធ្នូ ឆ្នាំ២០២០ក្នុងរយៈពេល៣០ខែ។

បើតាមអ្នកបច្ចេកទេស នៃមន្ទីរសាធារការបង្ហាញនូវលក្ខណៈបច្ចេកទេស នៃគម្រោងស្ថាបនាស្ពានអាកាស និងផ្លូវក្រោមដី រង្វង់មូលចោមចៅនេះ គឺមាន ស្ពានទី១៖ ជាស្ពានអាកាសមេ តភ្ជាប់ចរាចរ ពីមហាវិថីសហព័ន្ធរុស្ស៊ី មកផ្លូវជាតិលេខ៣ មានប្រវែងសរុប៤០៨ម៉ែត្រ ទទឹង១៥,៨ម៉ែត្រ ដែលមានចរាចរពីរគន្លងទៅ នឹងពីរគន្លងមក ជម្រាលស្ពាន ៤,៥ម៉ែត្រ និងមានកម្ពស់ អតិបរមា ដែលអាចចរាចរក្រោមស្ពាន មាន៥,៥ម៉ែត្រ។

ស្ពានទី២៖ បំបែកចេញពីស្ពានអាកាសមេ បត់ឆ្វេងតភ្ជាប់ចរាចរពីមហាវិថីសហព័ន្ធរុស្ស៊ីឆ្ពោះទៅ ផ្លូវ វេងស្រេង សម្រាប់ចរាចរមួយទិស ដែលមានមួយគន្លងរថយន្ត និងមួយគន្លងទោចក្រយានយន្ត មានប្រវែងសរុប២០២ម៉ែត្រ (ស្ពានអាកាស ប្រវែង៤០ម៉ែត្រ ផ្លូវក្រោមដី ប្រវែង១១៨ម៉ែត្រ និងផ្លូវលើដីប្រវែង ៤៤ម៉ែត្រ) ទទឹង៥,២៥ម៉ែត្រ។

ស្ពានទី៣៖ ជាស្ពានកោងបត់ឆ្វេងតភ្ជាប់ចរាចរពីផ្លូវវេងស្រេង មកផ្លូវជាតិលេខ៣ មានប្រវែងសរុប ២០៦ម៉ែត្រ (ស្ពានអាកាសប្រវែង៦០ម៉ែត្រ ផ្លូវក្រោមដីប្រវែង១១៨ម៉ែត្រ និងផ្លូវលើដីប្រវែង២៨ម៉ែត្រ) ទទឹង៥,២៥ម៉ែត្រ សម្រាប់ចរាចរមួយទិស ដែលមានមួយគន្លងរថយន្ត និងមួយគន្លងទោចក្រយានយន្ត។

ផ្លូវនិងផ្លូវក្រោមដី ៖ ជាផ្លូវកោង តភ្ជាប់ចរាចរពីផ្លូវវេងស្រេង មកផ្លូវជាតិលេខ៤ មានប្រវែងសរុប ១៣០ម៉ែត្រ (ផ្លូវក្រោមដី ប្រវែង១៣ម៉ែត្រ និងផ្លូវលើដី ប្រវែង១១៧ម៉ែត្រ) ទទឹង៨,៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។

លើផ្ទៃដី ៖ជាផ្លូវមេតភ្ជាប់ចរាចរពីផ្លូវជាតិលេខ៤ មកផ្លូវវេងស្រេង មានប្រវែងសរុប ២៣៥ម៉ែត្រ ទទឹង៨,៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។
ផ្លូវក្រោមដី ៖ ជាផ្លូវតភ្ជាប់ចរាចរពីផ្លូវជាតិលេខ៤ មកមហាវិថីសហព័ន្ធរុស្ស៊ី ដែលមានប្រវែងសរុប ៤៧០ម៉ែត្រ ទទឹង៨,៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។ ល្បឿនសុវត្ថិភាព ៤០គីឡូម៉ែត្រ ក្នុងមួយម៉ោង សម្រាប់ផ្លូវទទឹងទំហំ ទទឹង៨,៥ម៉ែត្រ ។ ល្បឿនសុវត្ថិភាព ២៥គីឡូម៉ែត្រ ក្នុងមួយម៉ោង សម្រាប់ផ្លូវទទឹងទំហំ ៥,២៥ម៉ែត្រ និងទំហំ៥,៥ម៉ែត្រ ។

សូមបញ្ជាក់ថា ស្ពាននេះនឹងមានអាយុកាល១០០ឆ្នាំ មានបំពាក់បង្គោលភ្លើងបំភ្លឺផ្លូវ រៀបចំបណ្តាញជុំវិញបរិវេណស្ពានអាកាស និងអាងស្តុកទឹកក្រោមដី មានទាំងបំពាក់ម៉ូទ័របូមទឹកស្វ័យប្រវត្តិផងដែរ៕

កម្ពុជានាំចេញកង់ជាង១,៤លានគ្រឿងទៅទីផ្សារសហភាពអឺរ៉ុប នាំមុខកោះ តៃវ៉ាន់

June 28, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ កម្ពុជា ឆ្នាំ២០១៧ បាននាំចេញកង់ល្អបំផុតទៅប្រទេសទាំង២៨ នៃសហភាពអ៉ឺរ៉ុប ដែលបានជំរុញឲ្យកម្ពុជាបានក្លាយជាប្រទេសនាំចេញកង់ច្រើនជាងគេទៅកាន់ទីផ្សារ ដោយជំនួសតំណែងទី១ របស់កោះតៃវ៉ាន់ ដែលជាអ្នកនាំចេញកង់ច្រើនជាងគេទៅ EU អស់រយៈពេលជាង ២០ឆ្នាំ ជាបន្តបន្ទាប់។

យោងតាមរបាយការណ៍ថ្មីមួយរបស់គេហទំព័រ Bike-EU.com ដែលចេញផ្សាយកាលពីថ្ងៃទី២៦ ខែមិថុនា នេះ បង្ហាញថា ប្រទេសកម្ពុជា បាននាំចេញកង់ចំនួនជាង១លាន៤សែន២ម៉ឺនគ្រឿង នៅក្នុងឆ្នាំ២០១៧ ទៅកាន់ទីផ្សារសហភាពអ៊ឺរ៉ុប ដែលមានប្រទេសទាំង២៨។ ចំនួននាំចេញកង់នេះបានកើនឡើង ៩ ភាគរយ ធៀបនឹងឆ្នាំ ២០១៦ ដែលមានចំនួនជិត ១លាន៣សែនគ្រឿង។

ចំណែក កោះតៃវ៉ាន់ដែលជាអ្នកនាំចេញកង់លេខមួយទៅ EU កន្លងមកបាន ធ្លាក់ចុះ១៥ ភាគរយ មកនៅត្រឹមជាង១លាន៣សែន ក្នុងឆ្នាំ២០១៧ គឺបរិមាណនាំចេញបានថយចុះជាងកាលពីឆ្នាំ២០១៦ ដែលមាន ១លាន៥សែន៦ម៉ឺន គ្រឿង។ ក្រសួងពាណិជ្ជកម្មកម្ពុជា ក៏ធ្លាប់បានបញ្ជាក់ថា ការផលិតកង់របស់កម្ពុជាបានផ្លាស់ប្តូរជាបណ្ដើរៗពីការនាំចូលគ្រឿងបន្លាស់សម្រាប់ការដំឡើងទៅជាឧស្សាហកម្មមួយដែលផលិតគ្រឿងផ្គុំក្នុងស្រុកកាន់តែច្រើន។

វិធានការនេះបានជួយកម្ពុជាអាចបំពេញលក្ខខណ្ឌតម្រូវពីសហភាពអឺរ៉ុប ដើម្បីនាំចេញកង់ដោយរួចពន្ធ។ កង់ដែលផលិតនៅកម្ពុជាអាចចូលទៅសហភាពអឺរ៉ុបដោយរួចពន្ធ ដោយសារការកែសម្រួលលក្ខខណ្ឌច្បាប់ដែលធ្វើឡើងចាប់តាំងពីឆ្នាំ ២០១៤ ដែលតម្រូវឲ្យមានគ្រឿងផ្គុំ៣០ ភាគរយផលិតនៅកម្ពុជា ទើបអាចនាំចេញទៅEU ដោយស្ថិតក្នុងប្រព័ន្ធអនុគ្រោះពន្ធរបស់សហភាពអឺរ៉ុប។ ការអនុគ្រោះពន្ធនេះបានអនុញ្ញាតឲ្យក្រុមហ៊ុនដាក់បញ្ចូលគ្រឿងបន្លាស់ពីប្រទេសម៉ាឡេស៊ី និងសិង្ហបុរីជាគ្រឿងផ្គុំក្នុងស្រុក។ ប៉ុន្តែការលើកលែងគ្រឿងផ្គុំក្នុងស្រុកអប្បបរមាត្រូវផុតកំណត់កាលពីឆ្នាំ២០១៧ ទើបរាជរដ្ឋាភិបាលកំពុងស្វែងរកការបន្តរយៈពេល ៣ឆ្នាំទៀតដើម្បីការពារឧស្សាហកម្មនេះ។

ភាគច្រើននៃក្រុមហ៊ុនផលិតកង់ទាំងអស់នៅកម្ពុជាមកពីកោះតៃវ៉ាន់ ហើយមានការិយាល័យកណ្ដាលនៅក្នុងប្រទេសកម្ពុជា ។ បច្ចុប្បន្ន ក្នុងប្រទេសកម្ពុជា មានក្រុមហ៊ុនផលិតកង់ចំនួន៥ ដែលមានទីតាំងនៅក្នុងតំបន់សេដ្ឋកិច្ចពិសេស៕

មិនទាន់រកឃើញទេ កីឡាករថៃ១២នាក់ និងគ្រូម្នាក់ ដែលបាត់ខ្លួនក្នុងរូងភ្នំ

June 28, 2018ព័ត៌មានថ្មីចុងក្រោយ, ព័ត៌មានអន្តរជាតិ, ព្រឹត្តិការណ៍កម្ពុជាមេគង្គ ប៉ុស្តិ៍

បាងកក ៖ ក្រុមអ្នកជំនាញរុករកក្រោមរូងភ្នំបីនាក់ មកពីអង់គ្លេស កំពុងចូលរួមក្នុងប្រតិបត្តិការជួយសង្គ្រោះ និងតាមស្វែងរកក្មេងជំទង់ ១២នាក់ និងគ្រូបង្វឹកបាល់ទាត់របស់ពួកគេម្នាក់ ដែលបានបាត់ខ្លួនយ៉ាងអាថ៌កំបាំងក្នុងរូងល្អាងភ្នំមួយក្នុងខេត្តឈៀងរ៉ៃ តាំងតែពីថ្ងៃសៅរ៍មកម្ល៉េះ។ នេះបើតាមការចេញផ្សាយដោយសារព័ត៌មាន The Nation នៅព្រឹកថ្ងៃព្រហស្បតិ៍ ទី២៨ ខែមិថុនា ឆ្នាំ២០១៨ នេះ។

ក្មេងជំទង់ ១២នាក់ ដែលជាកីឡាករបាល់ទាត់មកពីក្លឹប មូប៉ា (Mu Pa Academy) និងគ្រូបង្វឹកបាល់ទាត់របស់ពួកគេម្នាក់ បានបាត់ខ្លួនយ៉ាងអាថ៌កំបាំង តាំងតែពីថ្ងៃសៅរ៍សប្តាហ៍មុនមកម្ល៉េះ រីឯក្រុមអ្នកជួយសង្គ្រោះជឿជាក់ថា អ្នកទាំងនេះកំពុងជាប់នៅក្នុងរូងភ្នំ ថាមលួង ណាង ណុន (Tham Luang Nang Non) ដែលស្ថិតភាគជើងនៃខេត្ត ឈៀងរ៉ៃ (Chiang Rai) និងជារូងភ្នំវែងជាងគេបំផុតទី០៤ របស់ថៃ។

ក្មេងទាំងនេះមានអាយុចន្លោះពី ១១ឆ្នាំ ដល់ ១៦ឆ្នាំ ហើយគ្រូបង្វឹកបាល់ទាត់របស់ពួកគេមានអាយុ ២៥ឆ្នាំ ត្រូវបានគេរាយការណ៍ថា មិនអាចចាកចេញពីរូងភ្នំនេះបានឡើយ នៅមុនពេលមានទឹកជន់លិច ដោយសារតែភ្លៀងធ្លាក់ខ្លាំង ដែលកំពុងបង្កការរំខានដល់ក្រុមអ្នកជួយសង្គ្រោះ។

ប៉ុន្តែយ៉ាងណា មកទល់ពេលនេះ ប្រតិបត្តិការជួយសង្គ្រោះនៅតែបន្តធ្វើឡើង ដោយរដ្ឋមន្ត្រីមហាផ្ទៃថៃផ្ទាល់ លោក អនុពង្ស ផាវចិន្តា (Anupong Paochinda) បានឱ្យដឹងថា ក្រុមអ្នកជួយសង្គ្រោះកំពុងចាប់ផ្តើមជីកប្រហោងមួយចូលទៅកាន់រូងភ្នំ ដើម្បីចូលទៅដល់ កន្លែងអ្នកបាត់ខ្លួន។ លើសពីនេះទៅទៀត ក្រុមអ្នកជំនាញរុករកក្រោមល្អាងភ្នំបីនាក់ មកពីអង់គ្លេស ដែលមកដល់ប្រទេសថៃកាលពី ថ្ងៃពុធ រួមទាំងក្រុមកុម្ម៉ង់ដូពិសេសអាមេរិក SEAL ក៏កំពុងចូលរួមក្នុងប្រតិបត្តិការជួយសង្គ្រោះនេះដែរ ជាមួយក្ដីរំពឹងថាអាចនឹង រកឃើញអ្នកបាត់ខ្លួនទាំងនោះ។

គួរបញ្ជាក់ថា យោធាថៃ ក៏បានដាក់ពង្រាយទាហានរបស់ខ្លួនច្រើនជាង ១,០០០នាក់ ឱ្យទៅជួយក្រុមអ្នកជួយសង្គ្រោះទាំង ១២ក្រុម ផងដែរខណៈការបាត់ខ្លួនរបស់ជងរងគ្រោះ បានឈានចូលដល់ថ្ងៃទី០៥ហើយ៕

ភ្នំពេញ សាងសង់ចំណតរថយន្តក្រោមដីថ្មី នៅក្រោមសួនច្បារខាងលិចវត្តភ្នំ

June 28, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ សាលារាជធានីភ្នំពេញ បាននិងកំពុងសាងសង់ចំណតរថយន្តក្រោមដីនៅសួនច្បារមិត្តភាពកម្ពុជា-ថៃ ដែលស្ថិតនៅខាងលិចវត្តភ្នំ ក្នុងសង្កាត់វត្តភ្នំ ខណ្ឌដូនពេញ។ នេះបើតាមការបញ្ជាក់របស់ឯកឧត្តមឃួង ស្រេងអភិបាលរាជធានីភ្នំពេញ នៅក្នុងជំនួបពិភាក្សាការងារ ជាមួយឯកឧត្តមប៉ានីយ៉ារ៉ាក់ពល់ធុបឯកអគ្គរាជទូតវិសាមញ្ញនិងពេញសមត្ថភាពរបស់ប្រទេសថៃឡង់ដ៏ប្រចាំនៅកម្ពុជាកាលពីព្រឹកថ្ងៃទី២៨ខែមិថុនាឆ្នាំ២០១៨ នៅសាលារាជធានីភ្នំពេញ។

ក្នុងជំនួបនោះ លោក ឃួង ស្រេង បានលើកឡើងថា នៅរាជធានីភ្នំពេញ មានសួនច្បារជាច្រើន ក្នុងនោះមានសួនច្បាមួយ ដែលជាសួនច្បារនិមិត្តរូប នៃចំណងមិត្តភាព សាមគ្គីភាព រវាងប្រទេសទាំងពីរ កម្ពុជា- ថៃ ដោយប្រមុខរដ្ឋាភិបាលទាំងពីរ បានរួមគ្នាដាំដើមឈើជានិមិត្តរូប នៅលើសួននេះ។ ប៉ុន្តែជាគម្រោងសម្រាប់រាជធានីភ្នំពេញ ក្រោមការឯកភាពពីរាជរដ្ឋាភិបាលទីតាំងសួនច្បារនេះ ត្រូវសាងសង់ចំណត់រថយន្ត នៅផ្នែកខាងកើត ដែលទាមទារឱ្យមានការរុះរើសួនច្បារចាស់ចេញ។

លោក អភិបាលបញ្ជាក់ថា ក្រោយការស្ថាបនាចំណតរថយន្តក្រោមដីហើយ នឹងស្ថាបនាសួនឡើងវិញ ដោយរក្សាទ្រង់ទ្រាយដើម ហើយមានក្រុមអ្នកបច្ចេកទេសមកពីប្រទេសថៃ មកមើលផងដែរ។ ការរុះរើសួនច្បារសាងសង់ចំណតរថយន្តក្រោមដីនេះ វាមិនប៉ះពាល់ ដល់ដើមឈើប្រភេទធំៗ ដែលប្រមុខរដ្ឋាភិបាលទាំងពីរបានដាំនោះទេ ដោយហេតុថា ដើមឈើទាំងនោះ ស្ថិតនៅលើសួនច្បារប៉ែកខាងលិចប៉ុណ្ណោះ។

ក្រៅពីការលើកឡើងខាងលើ លោក ឃួង ស្រេង នូវបានលើកឡើងពីការរីកចំរើន របស់រាជធានីភ្នំពេញ ចេញពីបាតដៃទទេ ក្រោយរបបប្រល័យពូជសាសន៍ ដែលពេលនេះមានសំណង់អគារខ្ពស់ៗ ផ្លូវថ្នល់ ស្ពានអាកាស សាលា វត្តអារាមជាច្រើន ខណៈដែលកំណើនប្រជាពលរដ្ឋមានការកើនឡើងជាលំដាប់ ធ្វើឱ្យសេដ្ឋកិច្ចមានការវិវត្តន៍រីកចំរើន ពិសេសលើវិស័យអចលនទ្រព្យ។ ទន្ទឹមនឹងការរីកចំរើននេះហើយ បានជារាជធានីភ្នំពេញ ជួបនូវបញ្ហាប្រឈមជាច្រើន ដូចជាបញ្ហាកកស្ទះចរាចរ បញ្ហាសំរាម និងគ្រឿងញៀន ដែលទាមទារឱ្យមានការយកចិត្តទុកដាក់គិតគូរ និងដោះស្រាយជាបន្តបន្ទាប់។
លោក ប៉ានីយ៉ារ៉ាក់ពល់ធុប បានលើកឡើងផងដែរថា ឆ្លើយតបនឹងតម្រូវការជាក់ស្តែងរបស់រាជធានីភ្នំពេញ ដែលមានកង្វះចំណតរថយន្ត នៅចំពោះមុខនោះ ភាគីថៃ មិនមានអ្វីទំទាស់នោះឡើយ គ្រាន់តែស្នើឱ្យអ្នកជំនាញការរួមគ្នាសិក្សាឱ្យបានល្អិនល្អ ដើម្បីរក្សាឱ្យបាននូវទ្រង់ទ្រាយដើម របស់សួនមិត្តភាព កម្ពុជា-ថៃនេះ។

ជាមួយគ្នានោះ ឯកអគ្គរាជទូត ក៏បានស្នើឱ្យប្រតិភូ រដ្ឋបាលរាជធានីភ្នំពេញ ទៅបំពេញទស្សនកិច្ច និងផ្លាស់ប្តូរបទពិសោធន៍ នៅទីក្រុងបាងកក នៅពេលខាងមុខនេះ។

គួរបញ្ជាក់ផងដែរថា រាជធានីភ្នំពេញ និងទីក្រុងបាងកក បានចងសម្ព័ន្ធមេត្រីភាព ជាមួយគ្នា តាំងពីឆ្នាំ២០១៣មកម្ល៉េះ ហើយភាគីទាំងពីចង់ឱ្យកិច្ចសហប្រតិបត្តិការនេះ កាន់តែល្អប្រសើរថែមទៀត៕

រដ្ឋបាលរាជធានី និង Jica ចុះកិច្ចព្រមព្រៀងអភិវឌ្ឍន៍សមត្ថភាព ប្រព័ន្ធប្រឡាយលូ

June 28, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ក្រុមការងាររៀបចំផែនការលម្អិត និងអាជ្ញាធរពាក់ព័ន្ធកម្ពុជា ព្រមជាមួយអង្គការ Jica ប្រទេសជប៉ុន នៅព្រឹកថ្ងៃទី២៨ ខែមិថុនា ឆ្នាំ២០១៨ នេះ បានចុះហត្ថលេខា លើកិច្ចសហប្រតិ្តបត្តការបច្ចេកទេសប្រទេសជប៉ុន សម្រាប់ គម្រោងការអភិវឌ្ឍន៍សមត្ថភាពលើការងារគ្រប់គ្រង់ ប្រព័ន្ធប្រឡាយ លូ នៅភ្នំពេញ និងដើម្បីពង្រឹងសមត្ថភាព ដល់មន្ត្រីជំនាញ ដើម្បីទ្រទ្រង់ ដល់ដំណើរការ កែលម្អរបរិស្ថាន ក៏ដូចជាការអភិវឌ្ឍ នៅរាជធានីភ្នំពេញ នាពេលអនាគត ។

ពិធីចុះហត្ថលេខានេះ បានសម្រេចបង្កើត “គណៈកម្មការធិការ សម្របសម្រួលរួម និងគណៈកម្មាធិការបច្ចេកទេស ” ហៅកាត់ថា JCC និង TC រៀងៗខ្លួន ។ ក្នុងនោះរដ្ឋបាល រាជធានី បានឯកភាពទទួលយក គម្រោងផែនការម៉ាទ្រីច (Project Design Matrix) របស់ក្រុមជំនាញការ ដែលបានគ្រោងសម្រាប់ ការអនុវត្តគម្រោង នាពេលខាងមុខ ។

គម្រោងផែនការម៉ាទ្រីចនេះ នឹងប្រើប្រាស់ សម្រាប់ធ្វើជាឧបករណ៍ ដើម្បីត្រួតពិនិត្យ វាយតម្លៃ និងតាមដាន លើការងារគ្រប់គ្រងប្រព័ន្ធប្រឡាយលូ ក្នុងរាជធានីភ្នំពេញ។ សម្រាប់គម្រោងនេះ អាចនឹងកែសម្រួល ទៅតាមតម្រូវការ នៅក្នុងអំឡុងពេល នៃដំណាក់កាលអនុវត្តគម្រោង ដោយមានការពិគ្រោះយោបល់គ្នា ទៅវិញទៅមករវាងភាគីកម្ពុជានិង JICA ។
លោក ឃួង ស្រេង អភិបាលរាជធានីភ្នំពេញបានមានប្រសាសន៍ថា ពិធីចុះហត្ថលេខានេះ មានសារៈសំខាន់ខ្លាំងណាស់ ក្នុងការពង្រឹងសមត្ថភាព ដល់មន្ត្រីជំនាញ ដើម្បីទ្រទ្រង់ ដល់ដំណើរការ កែលម្អរ បរិស្ថាន ក៏ដូចជាការអភិវឌ្ឍ នៅរាជធានីភ្នំពេញ នាពេលអនាគត ឱ្យមាននិរន្តរភាព និងប្រសិទ្ធភាព។

លោកបណ្ឌិត អិតូ អិមប៉េអិ ប្រធានគ្រប់គ្រងបរិស្ថានក្រុមការងារទី១ នៃនាយកដ្ឋានបរិស្ថានសកល Jica ប្រទេសជប៉ុន បានលើកឡើងថា “រដ្ឋាភិបាលជប៉ុន តែងតែមានការសហការជាមួយ រដ្ឋាភិបាលកម្ពុជា ដោយស្ថាប័នទាំងពីរ មានការសហការគ្នាយ៉ាងល្អ លើវិស័យនេះ ទោះបីជាស្ថាប័ននីមួយៗ មានការអភិវឌ្ឍន៍ផ្សេងៗគ្នាយ៉ាងណាក៏ដោយ តែសម្រាប់ព័ត៌មាន ក៏ដូចជាបញ្ហាសហការនានា គឺបានផ្លាស់ប្តូរគ្នា និងបានសហការយ៉ាងជិតស្និត ។

ប្រធានគ្រប់គ្រងបរិស្ថានរូបនេះបន្តថា អង្គការ Jica មិនត្រឹមតែធ្វើការងារ អភិវឌ្ឍគម្រោង ផ្នែកបច្ចេកទេសនោះទេ ក៏ប៉ុន្តែមានគម្រោង ជំនួយឥតសំណងជាច្រើនទៀត ដែលធ្វើការងារ ដើម្បីអភិវឌ្ឍ ក្នុងរយៈពេលវែង នៃស្ថាប័នទាំងពីរ ក៏មានសំរៈសំខាន់ផងដែរ។
លោកបណ្ឌិត បញ្ជាក់ថា ប្រទេសជប៉ុន តាមរយៈ Jica ក៏បានសម្រេចចិត្តគាំទ្រ និងផ្តល់ជំនួយ សម្រាប់គម្រោងរយៈពេល៤ឆ្នាំ ដែលនេះជាការចាប់ផ្តើមអនុវត្តគម្រោង ក្រោមកិច្ចសហការ ជាមួយក្រសួងសាធារណការ និងដឹកជញ្ជូន និងសាលារាជធានីភ្នំពេញ។ គម្រោងនេះសង្ឃឹមថា នឹងទទួលបានលទ្ធផលជាផ្លែផ្កា លើការអភិវឌ្ឍន៍ប្រឡាយលូនៅភ្នំពេញ៕

នាយករដ្ឋមន្ត្រីអំពាវនាវវិនិយោគិនពង្រីកអាជីវកម្មនៅខេត្តកំពង់ឆ្នាំង

June 28, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

កំពង់ឆ្នាំង ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអំ ពាវនាវដល់អ្នករកស៊ី ក្នុង និងក្រៅប្រទេស មកវិនិយោគលើវិស័យនានានៅខេត្តកំពង់ឆ្នាំង ត្បិតខេត្តមួយនេះនៅមានសក្តានុពលច្រើនវិស័យនៅឡើយ។ រាជរដ្ឋាភិបាល នឹងខិតខំរក្សាវត្តមានរោងចក្រនៅកម្ពុជាឲ្យគង់វង្ស ជាមួយនឹងការទាក់ទាញវិនិយោគ បង្កើតរោងចក្រឲ្យបានកាន់ច្រើន ដើម្បីបង្កើតការងារធ្វើជូនកម្មករ កម្មារិនី ។

នៅក្នុងពិធីជួបសំណេះសំណាលជាមួយកម្មករ កម្មការិនីប្រមាណ២ម៉ឺន១ពាន់នាក់មកពីរោងចក្រចំនួន១៤ នៅឃុំសេដ្ឋី ស្រុកសាមគ្គីមានជ័យ ខេត្តកំពង់ ឆ្នាំងនៅព្រឹកថ្ងៃព្រហស្បត្តិ៍ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជាបានបញ្ជាក់ថា ការវិនិយោគនៅខេត្តកំពង់ឆ្នាំង នៅមិនទាន់អស់សក្តានុពលនៅឡើយទេ កំពង់ឆ្នាំងនៅមានលទ្ធភាពទាក់ទាញនូវបណ្តារោងចក្រដើម្បីមកវិនិយោគ។ ការវិនិយោគនោះមិនមែនត្រឹមតែវិស័យកាត់ដេរ និងដេរស្បែកជើងតែមួយមុខទេ ប៉ុន្តែអាចមានវិនិយោគថ្មីៗបន្ថែមទៀតអាចស្វែងរកឱកាសវិនិយោគ និងទទួលបានប្រាក់ចំណេញ។ សម្តេចបានអះអាងថា ប្រាក់ចំណេញរបស់អ្នកវិនិយោគ ក៍ជាប្រាក់ចំណេញរបស់ប្រជាជន ក្នុងការទទួលបានការងារបន្ថែមទៀត។ សម្តេចតេជោ បានបង្ហាញនូវមោទនភាពចំពោះវត្តមាន របស់រោងចក្រជាច្រើននៅខេត្តកំពង់ឆ្នាំង ដែលបានផ្តល់ការងារធ្វើជូនកម្មករ កម្មការិនីរហូតដល់ជាង៤ម៉ឺន៣ពាន់នាក់ ដែលមានប្រាក់ឈ្នួលសរុបជាង៩៤លានដុល្លារអាមេរិកក្នុងមួយឆ្នាំ។
សម្តេចបន្តថា យើងកំពុងរក្សាចាស់ និងបង្កើនថ្មីតាមរយៈខិតខំធានាធ្វើយ៉ាងណាឲ្យរោងចក្រនៅកម្ពុជាដែលកំពុងមានសព្វថ្ងៃនេះ បន្តរក្សាវត្តមាននៅក្នុងប្រទេសរបស់យើង និងទាក់ទាញការវិនិយោគមកពីក្រៅ ប្រទេសបន្ថែមទៀត ដើម្បីបង្កើតការងារថ្មីឲ្យប្រជាពលរដ្ឋរបស់យើង។ ក្មួយៗមានការងារធ្វើដឹងថា ប្អូនមិនទាន់មានការងារធ្វើ ដូច្នោះហើយបានជាយើងត្រូវបន្តរួមគ្នាដើម្បីដោះស្រាយការងារធ្វើជាបន្តទៀត។

សម្តេចតេជោបានអះអាង ដែរថា អ្វីដែលធ្វើឲ្យវិនិយោគិនមករកស៊ីនៅកម្ពុជា ក៍ព្រោះកត្តាសន្តិភាព និងស្ថេរភាពនយោបាយទូទាំងប្រទេស ពិសេសការផ្តល់លទ្ធភាពឲ្យវិនិយោគិនបោះទុនវិនិយោគ១០០ភាគរយ ដោយមិនបាច់ចាប់ដៃគូជាមួយក្រុមហ៊ុន ក្នុងស្រុកនោះទេ។អ្វីដែលរដ្ឋាភិបាលបន្តធ្វើនោះគឺការខិតខំបញ្ចុះតម្លៃអគ្គិសនីការសាងសង់ហេដ្ឋារចនាសម្ពូ័ន្ធប្រទាក់ក្រឡាគ្នា សាងសង់កំពង់ផែថ្មីជាមួយនឹងការបង្កលក្ខណៈងាយស្រួលដល់ការវិនិយោគនៅកម្ពុជា។

សម្តេចតេជោបានបង្ហាញនូវមោទនភាពចំពោះគោលនយោបាយពង្រាយរោងចក្រនៅតាមបណ្តាខេត្តដែលបានផ្តល់ការងារធ្វើយ៉ាងច្រើនសន្ធឹកសន្ធាប់ជូនដល់ប្រជាពលរដ្ឋនៅមូលដ្ឋាន ដោយកាត់បន្ថយការចំណាយនានានិងមិនចាំបាច់ប្រមូលផ្តុំគ្នាតែនៅទីក្រុង ។

សម្តេច ក៍មោទនភាពចំពោះប្រាក់បៀវត្សរបស់កម្មករ កម្មការិនីដែលបន្តកើនឡើងរហូតដល់១៧០ដុល្លារអាមេរិកក្នុងមួយខែ បូករួមជាមួយប្រាក់ អត្ថប្រយោជន៍នានា បានធ្វើឲ្យជីវភាពរបស់ពួកគាត់កាន់តែប្រសើរថែមទៀត។ សម្តេចអះអាងថា រាជរដ្ឋាភិបាលមិនទាន់ស្កប់ស្កល់នូវប្រាក់ខែ១៧០ដុល្លារសម្រាប់កម្មករនោះទេ ឆ្នាំ២០១៩ និងឆ្នាំបន្តទៀត នឹងនៅតែបន្តកើនឡើងបន្ថែមទៀតផងដែរ៕

អតីតអភិបាលខេត្តតាកែវ ឡាយ វណ្ណៈ ដែលកំពុងជាប់ឃុំត្រូវបានដំឡើងឋានៈ

June 27, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ អតីតៈអភិបាលខេត្តតាកែវ លោក ឡាយ វណ្ណៈ ត្រូវបានព្រះមហាក្សត្រចេញព្រះរាជក្រឹត្យដំឡើងថានៈពីឧត្តមមន្ត្រីថ្នាក់លេខ៤ មកជាឧត្តមមន្ត្រីថ្នាក់លេខ៣ បើទោះបីជាលោកកំពុងស្ថិតក្នុងការស៊ើបអង្កេតក្នុងរឿងក្ដីពាក់ព័ន្ធករណីឃាតកម្មទៅលើស្រីកំណាន់របស់ខ្លួន និងកំពុងត្រូវឃុំខ្លួនជាបណ្ដោះអាសន្នយ៉ាងណាក្តី។

ព្រះរាជក្រឹត្យដែលចុះថ្ងៃទី១៣ ខែមិថុនា ឆ្នា២០១៨ នេះ បានធ្វើឡើងយោងតាមសេចក្ដីក្រាបបង្គំទូលថ្វាយរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយបានត្រាស់បង្គាប់ដំឡើងថ្នាក់តាមវេនប្រចាំឆ្នាំដល់មន្ត្រីរាជការ ១៧៩រូប ក្នុងថានន្តរស័ក្តិ «ឧត្តមមន្ត្រី» នៃក្របខ័ណ្ឌមន្ត្រីរដ្ឋបាលជាន់ខ្ពស់ក្រសួងមហាផ្ទៃ។ នៅក្នុងចំណោមមន្ត្រីដែលតែងតាំងទាំង១៧៩នាក់នោះ គេឃើញមានឈ្មោះ លោក ឡាយ វណ្ណៈ ដែលស្ថិតនៅលេខរៀងទី៤៧ ត្រូវបានដំឡើងតំណែងពីឧត្តមមន្ត្រីថ្នាក់លេខ៤ មកជាថ្នាក់លេខ៣ ផងដែរ។

បន្ទាប់ពីព្រះរាជក្រឹត្យនេះត្រូវបានចែកផ្សាយ មានមហាជនជាច្រើនបានងឿងឆ្ងល់យ៉ាងខ្លាំង ព្រោះគេឃើញឈ្មោះលោក ឡាយ វណ្ណៈ ម្នាក់នៅក្នុងការដំឡើងឋានៈនោះ ខណៈដែលលោកកំពុងាជាប់ឃុំឃាំងនៅពន្ធនាគារPJជាបណ្ដោះអាសន្ននៅឡើយ ពាក់ព័ន្ធនឹងអំពើមនុស្សឃាតទៅលើស្ត្រីកំណាន់របស់ខ្លួនឈ្មោះ ចេវ សុវឌ្ឍនា កាលពីថ្ងៃទី២៦ ខែមករា ឆ្នាំ២០១៨ នៅក្នុងភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ។

គួររំលឹកថា លោក ឡាយ វណ្ណៈ ត្រូវបានព្រះមហាក្សត្រចេញព្រះរាជក្រឹត្យបញ្ចប់តំណែងជាអភិបាលខេត្តតាកែវ កាលពីថ្ងៃចន្ទ ទី២៦ ខែមីនា ឆ្នាំ២០១៨ ហើយត្រូវបានឃាត់ខ្លួននៅក្រុងដូនកែវ កាលពីថ្ងៃអាទិត្យទី១ ខែមេសា ឆ្នាំ២០១៨ នៅចំណុចមុខវិទ្យាល័យ ជា ស៊ីម បន្ទាប់ពីបានចេញពីពិធីផ្ទេរតំណែងរបស់លោកពីប្រធានគណបក្សប្រជាជនកម្ពុជាប្រចាំខេត្តតាកែវទៅឲ្យលោក អ៊ូច ភា ដែលជាអភិបាលខេត្តថ្មី។ លោក ឡាយ វណ្ណៈ និងបងប្រុសឈ្មោះ ឡាយ ណារិទ្ធ ត្រូវបានព្រះរាជអាជ្ញារងក្រុងភ្នំពេញចោទប្រកាន់ពីបទមនុស្សឃាត ហើយបើសិនជាចៅក្រមស៊ើបសួររកឃើញថា ពិតជាបានប្រព្រឹត្តដូចការចោទប្រកាន់មែន លោក និងបងប្រុសអាចជាប់ពន្ធនាគារពី១០ ទៅ១៥ឆ្នាំ។

គួរបញ្ជាក់ថា នៅក្នុងសំណុំរឿងឃាតកម្មលើអ្នកស្រី ចេវ សុវឌ្ឍនា នេះមានជនសង្ស័យ ៥នាក់ផ្សេងទៀតដែលត្រូវបានចាប់ខ្លួនមានលោក ឡាយ ណារិទ្ធ អតីតស្នងការងខេត្តតាកែវ និងជាបងប្រុសលោក ឡាយ វណ្ណៈ ,ឈ្មោះ ចាន់ រី ភេទស្រី និងប្តីឈ្មោះ ជឹម វុធ ជាអ្នកបម្រើនៅផ្ទះនាង ចេវ សុវឌ្ឍនា ដែលជានារីរងគ្រោះ ឈ្មោះ មេន សម័យ អ្នកបើកឡានឲ្យលោក ឡាយ វណ្ណៈ និងឈ្មោះ តាក់ រតនា ជាអ្នកបើកឡានឲ្យលោក ឡាយ ណារិទ្ធ។ ការចាប់ខ្លួននេះត្រូវបានចោទប្រកាន់ពីបទលាក់បាំងបទល្មើស មិនរាយកាណ៍ឲ្យសមត្ថកិច្ច។ ខណៈនោះ ក្រោយការសួរ មាននាំមនុស្ស២នាក់ត្រូវបានដោះលែងអោយទៅផ្ទះវិញ។

នៅមុនពេលចាប់ខ្លួនលោក ឡាយ វណ្ណៈ បានទទួលស្គាល់តាមហ្វេសប៊ុករបស់លោកថា លោកពិតជាមានទំនាក់ទំនងស្នេហាជាមួយនឹងស្ត្រីមេម៉ាយកូន ៣ ឈ្មោះ ចេវ សុវឌ្ឍនា ពិតមែន ហើយលោកក៏បានបង្ហោះរូបថតស្និទ្ធស្នាលជាច្រើនសន្លឹកជាមួយស្ត្រីមេម៉ាយរូបនេះផងដែរ។ ទោះយ៉ាងណា លោកបានបដិសេធថា លោក និងបងប្រុសរបស់លោក មិនបានប្រព្រឹត្តអំពើមនុស្សឃាតនោះទេ។ប៉ុន្តែលោកថា ការស្លាប់របស់នាង ចេវ សុវឌ្ឍនា គឺមកពីការធ្វើអត្តឃាតដែលលោកអះអាងថា នាងបានប៉ុនប៉ងសម្លាប់ខ្លួនជាច្រើនលើករួចមកហើយ។

គេនៅចាំបានថា នៅមុនពេលត្រូវចាប់ខ្លួន លោក ឡាយ វណ្ណៈ សរសេរក្នុងហ្វេសប៊ុកថា «ខ្ញុំសូមបញ្ជាក់អះអាងថា រូបខ្ញុំ និងប្អូនស្រី ចេវ សុវឌ្ឍនា មានទំនាក់ទំនងស្នេហាស្រឡាញ់គ្នា ពិតប្រាកដមែនក្នុងរយៈពេលជាង១ឆ្នាំកន្លងមកនេះ! ក្រោយមកខ្ញុំបានសុំកាត់ផ្តាច់ទំនាក់ទំនងជាមួយគាត់ដែលធ្វើឲ្យគាត់ខឹងសម្បានឹងខ្ញុំ រហូតដល់គាត់គិតខ្លីធ្វើអត្តឃាតខ្លួនឯង! នេះជារឿងពិត! អ្វីដែលខ្ញុំធ្វើខុសឆ្គង ខ្ញុំហ៊ានទទួល»៕