ភ្នំពេញ ៖ ទន្ទឹមនឹងការអបអរសាទរចំពោះចំនួនភ្ញៀវទេសចរបរទេសដែលកម្ពុជាទទួលបានក្នុង រយៈពេល២ខែ ដើមឆ្នាំ២០១៨នេះ ដែលមានរហូតដល់ជាង ១លាននាក់ រដ្ឋមន្ត្រីក្រសួងទេស ចរណ៍ លោក ថោង ខុន នាព្រឹកថ្ងៃទី២៩ មីនា នេះ បានថ្លែងប្រាប់អ្នកសារព័ត៍មាននៅ ក្រោយកិច្ចប្រជុំប្រចាំត្រីមាសទី១ ឆ្នាំ២០១៨ ថា យើងមានការរីករាយជាខ្លាំងដែលកម្ពុជា គ្រាន់តែរយៈពេល២ខែ ដើម្បីឆ្នាំ២០១៨ នេះទទួលបានភ្ញៀវទេសចរបរទេសជាង ១លាននាក់ ក្នុងកំណើន ១២% ហើយយើងត្រូវតែមានកិច្ចខិតខំប្រឹងប្រែងអោយបានសកម្មថែមទៀតដើម្បី កំណើនភ្ញៀវទេសចរ។
ជាមួយគ្នានេះឯកឧត្តមរដ្ឋមន្ត្រីក៏បានប្រាប់ផងដែរថា យើងមានហើយ នូវអនុក្រឹត្យ ដើម្បីកំណត់ពីការដាក់ទោសទណ្ឌចំពោះអ្នកដែលបានលក់គ្រឿងអលង្កាក្លែងក្លាយទៅអោយភ្ញៀវមាន ពេជ្រ និងត្បូងជាដើម ដោយយើងលែងនិយាយពីការព្រមានទៀត ហើយ។
សូមជម្រាបជូនថា នៅក្នុងកិច្ចប្រជុំនេះ លោករដ្ឋមន្ត្រី ថោង ខុន បានធ្វើការ ត្រួតពិនិត្យទៅតាមអគ្គនាយកដ្ឋាននីមួយៗចំណុះក្រសួងទេសចរណ៍ អំពីការអនុវត្តយុទ្ធសាស្ត្រនានាដើម្បីភាពកាន់តែប្រសើរឡើងនៅក្នុងវិស័យទេសចរណ៍ ដែលអគ្គនាយកដ្ឋាន នីមួយៗ ត្រូវដឹកនាំនាយកដ្ឋានចំណុះអនុវត្តអោយបានត្រឹមត្រូវ ព្រោះនាយកដ្ឋាននីមួយៗ សុទ្ធតែមានថវិកាកម្មវិធីរបស់ខ្លួន ដោយរដ្ឋមន្ត្រីសាមីក្រសួងបានចង្អុលណែនាំអោយការប្រើ ប្រាស់ថវិកាកម្មវិធីនេះអោយមានប្រសិទ្ធភាព និងគុណភាពការងារ មិនមែនប្រើប្រាស់អោយ តែអស់លុយនោះទេ មានន័យថា ប្រើលុយអស់ហើយត្រូវអោយមានប្រសិទ្ធភាព និងគុណ ភាពការងារផងដែរ៕
