រាជធានីភ្នំពេញ ៖ ក្រសួងមហាផ្ទៃ នៅថ្ងៃនេះបានស្នើទៅរតនាគារជាតិ ដើម្បីសុំបង្កកការបើកប្រាក់ឧបត្ថម្ភប្រចាំខែសមាជិកក្រុមប្រឹក្សាឃុំ សង្កាត់ មកពីគណបក្សសង្គ្រោះជាតិ ក្រោមហេតុផលថា គណបក្សសង្គ្រោះជាតិត្រូវបានរំលាយដោយតុលាការ នោះបញ្ជីបេក្ខជន និងសមាជិកក្រុមប្រឹក្សាឃុំសង្កាត់ទាំងអស់នៃគណបក្សនេះ លែងមានសុពលភាព និងលែងមានគុណសម្បត្តិតទៀតហើយ ៕
រាជធានីភ្នំពេញ ៖ បន្ទាប់ពីបានតាមដានស្ថានភាពអាកាធាតុរួចមក ឃើញថា នៅក្នុងសមុទ្រចិនខាងត្បូង មានសម្ពាធទាមសកម្មមួយបាននឹងកំពុងធ្វើដំណើរមកភាគខាងលិច។ សម្ពាធទាបសកម្មនេះនឹងបន្តវិវត្តទៅជាវិសម្ពាធ ហើយនឹងបន្តដំណើរដល់តំបន់ដីសណ្ដរទន្លេមេគង្គ ដែលបង្កឲ្យ មានភ្លៀងនឹងបន្តធ្លាក់នៅតាមបណ្តារាជធានី-ខេត្តនានា ក្នុងនោះ រាជធានី-ខេត្តមួយចំនួន នឹងមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី ១៩-២១ វិច្ឆិកា ២០១៧៕
ខេត្តព្រះវិហារ ៖ តាចាស់វ័យជាង៦០ឆ្នាំម្នាក់ត្រូវបានសមត្ថកិច្ចចាប់វ៉ៃខ្នោះ បន្ទាប់ពីតាល្មោភកាមរូបនេះបានល្បួងក្មេងស្រីជាអនិតិជន ចាប់រំលោភរហូតបានសម្រេច។ ករណីឃាត់ខ្លួននេះ ធ្វើឡើងកាលពីល្ងាច ថ្ងៃទី១៥ វិច្ឆិកា កន្លងទៅ នៅភូមិប៉ាលហាល សង្កាត់ប៉ាលហាល ក្រុងព្រះវិហារ ។ ជនសង្ស័យឈ្មោះ ដួង សំភេទ ភេទប្រុស អាយុ៦៧ឆ្នាំ មុខរបរកសិករ។ ចំណែកក្មេងស្រីរងគ្រោះ អាយុទើប១០ឆ្នាំប៉ុណ្ណោះ ហើយជាសិស្សនិង ,ទាំង២នាក់រស់នៅភូមិឃុំខាងលើជាមួយគ្នាផងដែរ៕
រាជធានីភ្នំពេញ ៖ នៅព្រឹកថ្ងៃទី១៧ ខែវិច្ឆិកានេះ សាលាឧទ្ធរណ៍បានបើកការជំនុំជម្រះរឿងក្តីលោក គឹម សុខ អ្នកឃ្លាំមើលបញ្ហាសង្គមនិងនយោបាយ ពាក់ព័ន្ធការចោទប្រកាន់ គណបក្សប្រជាជនកម្ពុជាថា ជាអ្នកសម្លាប់លោក កែម ឡី ។
គួរបញ្ជាក់ថា កាលពីថ្ងៃទី១០ ខែកញ្ញា ឆ្នាំ២០១៧ លោក គឹម សុខ ត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគាររយៈពេល១៨ខែ ពិន័យជាប្រាក់ចំនួន៨លានរៀល និងសងសំណងជំងឺចិត្តដល់ដើមបណ្ដឹងរដ្ឋប្បវេណី ចំនួន៨០០លានរៀល ៕
អាហ្វហ្គានីស្ថាន ៖ មនុស្សយ៉ាងតិច៩នាក់បានស្លាប់បាត់បង់ជីវិត បន្ទាប់ពីក្រុមរដ្ឋអ៊ីស្លាមបានបំផ្ទុះគ្រាប់បែកអត្តឃាតនៅកន្លែងប្រមូលផ្ដុំនយោបាយមួយនៅទីក្រុងកាប៊ូលប្រទេសអាហ្វហ្គានីស្ថាន កាលពីថ្ងៃព្រហស្បតិ៍ម្សិលមិញ។
មន្ត្រីនាំពាក្យប៉ូលិសនៅទីក្រុងកាប៊ូលបាននិយាយថា ក្នុងចំណោមអ្នកស្លាប់ទាំងនេះគឺមានមន្ត្រីប៉ូលិសចំនួន៧នាក់និងជនស៊ីវិលចំនួន២នាក់ ខណៈមន្ត្រីប៉ូលិសចំនួន៧នាក់ និងជនស៊ីវិលចំនួន៣នាក់ទៀតបានរងរបួសដោយការវាយប្រហារនេះ។
មន្ត្រីនាំពាក្យក្រសួងមហាផ្ទៃលោក ណាជីប ដានីស បាននិយាយថា អ្នកវាយប្រហារបានចុះបំផ្ទុះគ្រឿងផ្ទុះនៅច្រកចូលទៅកន្លែងដែលគេកំពុងរៀបចំពិធីអាពាហ៍ពិពាហ៍មួយ។
ទីភ្នាក់ងារព័ត៌មាននៅប្រទេសនេះបាននិយាយថា ក្រុមរដ្ឋអ៊ីស្លាមបានអះអាងទទួលខុសត្រូវចំពោះការវាយប្រហារនេះ ហើយក្រុមតាលីបង់បានបដិសេធថា ខ្លួនមិនបានពាក់ព័ន្ធនឹងការវាយប្រហារនេះទេ៕
រុស្ស៊ី ៖ ប៉ូលិសតំបន់បាននិយាយពីថ្ងៃព្រហស្បតិ៍ថា រថយន្តក្រុងនិងរថយន្តធំបានបើកបុកគ្នានៅភាគកណ្ដាលប្រទេសរុស្ស៊ីស្លាប់មនុស្សយ៉ាងតិច១៥នាក់។
ប៉ូលិសនៅតំបន់ម៉ារីអែលនៅប្រទេសរុស្ស៊ីបាននិយាយថា រថយន្តទាំង២នេះបានបើកបុកគ្នាកាលពីល្ងាចថ្ងៃម្សិលមិញនេះនៅខាងក្រៅទីក្រុងយ៉ូស្កាអូឡា (Yoshkar Ola) នៅតំបន់ម៉ារីអែលដែលស្ថិតនៅចម្ងាយ៧៦៥គីឡូម៉ែត្រខាងកើតទីក្រុងម៉ូស្គូនៅប្រទេសរុស្ស៊ី។
មន្ត្រីប៉ូលិសមូលដ្ឋានបាននិយាយពីយប់មិញថា ចំនួនអ្នកស្លាប់បានកើនឡើងដល់ចំនួន១៥នាក់ក្រោយពីស្ត្រីម្នាក់បានស្លាប់នៅតាមផ្លូវបញ្ជូនទៅមន្ទីរពេទ្យ ខណៈមនុស្សចំនួន៤នាក់ទៀតត្រូវបានបញ្ជូនទៅមន្ទីរពេទ្យក្នុងនោះមានមនុស្សចំនួន២នាក់រងរបួសធ្ងន់។
ប៉ូលិសបញ្ជាក់ថា ដើមហេតុនៃគ្រោះថ្នាក់នេះគឺរថយន្តក្រុងកំពុងធ្វើដំណើរតាមផ្លូវ ហើយក៏បានព្យាយាមបើកវ៉ារថយន្តមួយទៀតធ្វើឲ្យជ្រុលទៅបុកនឹងរថយន្តធំដឹកឈើដែលកំពុងធ្វើដំណើរបញ្ច្រាសទិសគ្នាតែម្ដង ហើយអាកាសធាតុអាចជាកត្តាចម្បងនៃគ្រោះថ្នាក់នេះព្រោះនៅតំបន់នោះមានការធ្លាក់ព្រិលខ្លាំង៕
រាជធានីភ្នំពេញ ៖ នាព្រឹកថ្ងៃទី១៧ ខែវិច្ឆិកា ឆ្នាំ២០១៧នេះ គណៈកម្មាធិការជាតិរៀបចំការបោះឆ្នោត គ.ជ.ប នឹងបើកកិច្ចប្រជុំផ្សព្វផ្សាយ ពីលទ្ធផលបណ្ដោះអាសន្ន នៃការចុះឈ្មោះបោះឆ្នោត ឆ្នាំ២០១៧ ក្រោមវត្តមានលោក ឯម សុផាត សមាជិក គ.ជ.ប នៅទីស្ដីការ គ.ជ.ប៕
រាជធានីភ្នំពេញ ៖ រដ្ឋសភាកម្ពុជានៅព្រឹកនេះបានបើកសម័យប្រជុំរបស់ខ្លួនលើកទី៩ ដើម្បីពិភាក្សានិងអនុម័ត លើច្បាប់ថវិកាជាតិឆ្នាំ២០១៨ និងរបៀបវារៈ មួយចំនួន ក្រោមអធីបតីភាព សម្តេច ហេង សំរិន ប្រធានរដ្ឋសភា ដោយមានការចូលរួមពីសមាជិកសភាមកពីគណបក្សប្រជាជនកម្ពុជាចំនួន៦៥រូប ។
យោងតាមសេចក្តីជូនដំណឹងរបស់អគ្គលេខាធិការដ្ឋានរដ្ឋសភា បានឲ្យដឹងថា សម័យប្រជុំពេញអង្គ រដ្ឋសភា នីតិកាលទី៥ លើកទី៩ មានរបៀបវារៈដូចជា៖
១៖ការបោះឆ្នោតជ្រើសតំណាងសមាជិក គណៈកម្មការនានា នៃរដ្ឋសភាបន្ថែមចំនួន ០២រូប។
២៖ ការពិភាក្សានិងអនុម័តសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០១៨
៣៖ ការពិភាក្សានិងអនុម័តនូវ សេចក្តីព្រាងច្បាប់ស្តីពី ការអនុម័តយល់ព្រមលើ៖
១. កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និង រដ្ឋាភិបាលនៃសាធារណរដ្ឋសឹង្ហបុរី ស្តីពីការចៀសវាងយកពន្ធត្រួតគ្នា និងការបង្ការការកិបកេងបន្លំ ពន្ធពាក់ព័ន្ធ និងពន្ធលើប្រាក់ចំណូល។
២. កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និង រដ្ឋាភិបាល នៃសាធារណរដ្ឋប្រជាមានិតចិន ស្តីពីការចៀសវាងការយកពន្ធត្រួតគ្នា និងការបង្ការ ការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
៣. កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និង រាជរដ្ឋាភិបាល នៃព្រះចៅស៊ុលតង់ និងយ៉ាងឌឺពើរតួននៃប្រទេសប្រ៊ុយណេដារូសាឡឹម ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
៤៖ កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និង រាជរដ្ឋាភិបាលនៃព្រះរាជាណាចក្រថៃ ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
៥៖ ការពិភាក្សា និងអនុម័តសេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៦៕
រាជធានីភ្នំពេញ ៖ រដ្ឋាភិបាលប្រទេសកាណាដា បានសម្រេចផ្តល់ជំនួយជាង១៣ម៉ឺនដុល្លារ ដើម្បីសកម្មភាពបោសសំអាតមីន និងជួយជនក្រីក្ររងគ្រោះដោយសារគ្រាប់មីននៅកម្ពុជា ។
ការសម្រេចផ្តល់ជំនួយរបស់កាណាដាដល់កម្ពុជានេះ ធ្វើឡើងក្នុងរវាងលោកទេសរដ្ឋមន្ត្រី លី ធុជ អនុប្រធានទី២ និងជាអគ្គលេខាធិការអាជ្ញាធរមីន ជាមួយលោកស្រី ALLISION STEWART តំណាងស្ថានទូតកាណាដា ប្រចាំនៅប្រទេសកម្ពុជា ។
ទេសរដ្ឋមន្ត្រីលោក លី ធុជ អនុប្រធានទី២ និងជាអគ្គលេខាធិការអាជ្ញាធរមីនបានបញ្ជាក់ថា នេះជាជំហានថ្មីមួយទៀត ដែលកាណាដា បានសម្រេចផ្តល់ជំនួយដល់កម្ពុជា បន្ទាប់ពីបានផ្អាករយៈពេលប៉ុន្មានឆ្នាំចុងក្រោយនេះ ។ លោកបានថ្លែងអំណរគុណចំពោះ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ចំពោះការគាំទ្រលើវិស័យបោសសម្អាតមីន និងកិច្ចសហប្រតិបត្តការល្អរវាងកម្ពុជា និងប្រទេសកាណាដា៕
រាជធានីភ្នំពេញ ៖ នៅម៉ោង១៧ និង០៥នាទីរសៀលថ្ងៃទី១៦ ខែវិច្ឆិកា ឆ្នាំ២០១៧នេះ តុលាការកំពូលបានប្រកាសសាលដីកាសម្រេចឱ្យ រំលាយគណបក្សសង្គ្រោះជាតិហើយ។
ជាមួយគ្នានេះតុលាការក៏បានប្រកាសហាមឃាត់ដល់មន្ត្រីថ្នាក់ដឹកនាំគណបក្សសង្គ្រោះជាតិចំនួន១១៨នាក់ មិនឱ្យធ្វើនយោបាយ រយៈពេល៥ឆ្នាំផងដែរ៕
រាជធានីភ្នំពេញ ៖ សាលដីការបស់តុលាការកំពូល ដែលកាត់ទោស «រំលាយគណបក្សសង្គ្រោះជាតិ» នឹងត្រូវប្រកាសនៅល្ងាចថ្ងៃទី១៦ ខែវិច្ឆិកា ឆ្នាំ២០១៧នេះតែម្តង ដោយមិនរង់ចាំដល់ថ្ងៃស្អែកនោះទេ។ នេះបើអ្នកនាំពាក្យតុលាការកំពូលលោក អ៊ុក គឹមសិទ្ធិ បានថ្លែងប្រាប់ក្រុមអ្នកសារព័ត៌មាន នៅមុននេះ ៕
ចិន ៖ មនុស្សយ៉ាងតិច១៨នាក់បានស្លាប់បាត់បង់ជិវិត និង២១នាក់ទៀតបានរងរបួសនៅក្នុងករណីគ្រោះថ្នាក់ចរាចរណ៍មួយកើយឡើងដោយសារយានយន្តជាង៣០គ្រឿងបានបុកតគ្នា ព្រោះតែ ចុះអ័ព្ទនៅលើផ្លូវអ៊ិចប្រេស វេយ៍ (expressway) មួយខ្សែស្ថិតក្នុងខេត្តអានហួយ (Anhui) ភាគខាងកើតប្រទេសចិនកាលពីម្សិលមិញ។
អាជ្ញាធរក្នុងតំបន់បាននិយាយថា ភ្លើងបានចាប់ផ្តើមឆាបឆេះនៅពេលដែលយានយន្តមួយគ្រឿងបានបើកទៅបុកធុងប្រេងរបស់រថយន្តក្រុង ហើយបណ្តាលឲ្យឆាបឆេះយានជំនិះជាច្រើនទៀត។ ឧទ្ធម្ភាគចក្រសង្គ្រោះបន្ទាន់មួយគ្រឿងត្រូវបានបញ្ជូនទៅកាន់កន្លែងកើតហេតុភ្លាមៗ បន្ទាប់ពីក្រុមអ្នកពន្លត់អគ្គិភ័យបានយកមនុស្ស១៧នាក់ចេញពីគំនររថយន្តដែលបានឆាបឆេះ។ អាជ្ញាធរបញ្ជាក់ថា តាមការស៊ើបអង្កេតបឋមបានបង្ហាញថា យានជំនិះយ៉ាងតិច៧០គ្រឿងត្រូវបានរងការខូចខាត ដោយក្នុងរថយន្តដឹកទំនិញធំៗត្រូវបានខូចខាតខ្លាំងជាងគេ។
ដោយឡែកបើតាមមន្ទីរពេទ្យក្នុងតំបន់បាននិយាយថា ជនរងគ្រោះភាគច្រើនបានរងរបួសឆ្អឹង និងខួរក្បាល នៅពេលដែលត្រូវបានបញ្ជូនទៅកាន់មន្ទីរពេទ្យ។
ជាមួយគ្នានោះនាយកដ្ឋានអាកាសធាតុក្នុងតំបន់បាននិយាយថា ការចុះអ័ព្ទនឹងប្រហែលជាបន្តកើតមានឡើង ហើយក៏បានដាស់តឿនអ្នកបើកបរទាំងអស់ឲ្យប្រុងប្រយ័ត្នផងដែរ៕
កូរ៉េខាងត្បូង ៖ ការរញ្ជួយដីដ៏ខ្លាំងក្លាកម្រិត ៥.៤ រិចទ័របានវាយប្រហារភាគនិរតីប្រទេសកូរ៉េខាងត្បូងកាលពីរសៀលថ្ងៃពុធដែលជាការរញ្ជួយដីដ៏មានឥទ្ធិពលបំផុតទីពីរនៅលើកំណត់ត្រានៅក្នុងប្រទេសដែលកម្រមានការរញ្ជួយខ្លាំង ។
រដ្ឋបាលឧតុនិយមកូរ៉េបាននិយាយថា ការរញ្ជួយដីដែលត្រូវបានគេដឹងនៅទូទាំងប្រទេសរួមទាំងនៅទីក្រុងសេអ៊ូលផងនោះបានវាយប្រហារនៅជម្រៅរាក់ដែលមានចំងាយប្រាំបួនគីឡូម៉ែត្រនៅជិតទីក្រុងឧស្សាហកម្ម Pohang នៅម៉ោងប្រហែល ២ និង ៣០ នាទីរសៀល ខណៈដែលឧបទ្វីបកូរ៉េកម្រមានការព្រួយបារម្ភអំពីការរញ្ជួយដីនេះនោះទេ ។
ប៉ុន្តែសកម្មភាពរញ្ជួយត្រូវបានត្រួតពិនិត្យយ៉ាងយកចិត្តទុកដាក់ពីព្រោះការកើនឡើងសកម្មភាពជាញឹកញាប់ជាការបង្ហាញដំបូងថាកូរ៉េខាងជើងបានធ្វើតេស្តនុយក្លេអ៊ែរ ។
ទីក្រុងកំពង់ផែ Pohang របស់កូរ៉េខាងត្បូងគឺជាទីស្នាក់ការធំរបស់ក្រុមហ៊ុន Posco ដែលជាក្រុមហ៊ុនផលិតដែកថែបធំបំផុតទីបួនរបស់ពិភពលោក ។រូបថត និងខ្សែវីដេអូដែលត្រូវបានផ្ញើទៅស្ថានីយទូរទស្សន៍ក្នុងស្រុកបានបង្ហាញពីជញ្ជាំង និងគ្រឿងសង្ហារឹមរលំបាក់នៅក្នុងផ្ទះរបស់មនុស្ស ។
ទីភ្នាក់ងាររ៉េអាក់ទ័រនុយក្លេអ៊ែរក្នុងស្រុកបានដំណើរការដោយគ្មានការរំខាន ។ នេះបើយោងតាមទីភ្នាក់ងារព័ត៌មានយ៉ុនហាបដោយលើកឡើងពីមន្ត្រីនៅក្រុមហ៊ុន Korea Hydro និង Nuclear Power ។
សូមបញ្ជាក់ថា ការរញ្ជួយដីភាគច្រើនបានកត់ត្រានៅភាគខាងត្បូងគឺការរញ្ជួយកម្រិត ៥.៨ រ៉ិចទ័រដែលបានវាយប្រហារលើទីក្រុង Gyeongju ភាគអាគ្នេយ៍កាលពីខែកញ្ញាឆ្នាំមុន ៕
រាជធានីភ្នំពេញ ៖ សវនាការរឿងរំលាយគណបក្សសង្គ្រោះជាតិ ដែលពាក់ព័ន្ធនឹងបទល្មើសក្បត់ជាតិរបស់តុលាការកំពូលនៅព្រឹកថ្ងៃទី១៦ ខែវិច្ឆិកា ឆ្នាំ២០១៧នេះ បានធ្វើឡើងដោយពុំមានការតវ៉ាពីសកម្មជនរបស់គណបក្សប្រឆាំងទេ បើទោះជាលោកស្រី មួរ សុខហួរ អនុប្រធានគណបក្សនេះបានអំពាវនាវឱ្យសកម្មជន និងអ្នកគាំទ្រ ប្រមូលផ្តុំគ្នានៅមុខតុលាការក៏ដោយ។
សូមបញ្ជាក់ថា កាលពីពេលថ្មីៗនេះលោកស្រី មួរ សុខហួរ អនុប្រធានគណបក្សសង្គ្រោះជាតិ បានអំពាវនាវឲ្យអ្នកគាំទ្រគណបក្សសង្គ្រោះជាតិ ប្រមូលផ្តុំគ្នានៅមុខតុលាការកំពូលនៅថ្ងៃទី ១៦ ខែវិច្ឆិកា ឆ្នាំ២០១៧ ដើម្បីតវ៉ាប្រឆាំងនឹងការកាត់ទោសគណបក្សសង្គ្រោះជាតិ៕
ខេត្តបាត់ដំបង ៖ អាជ្ញាធរក្រុងបាត់ដំបងចុះឆែកឆេរកន្លែងធ្វើអាជីវកម្ម១កន្លែងយីហោ (រតនៈសំនៀង)ស្ថិតនៅភូមិកម្មករ, សង្កាត់ស្វាយប៉ោ,ក្រុងនឹងខេត្តបាត់ដំបង ដែលសង្ស័យថា បានជួលកន្លែងស្ទីតយ៉ូលួចធ្វើព័ត៌មានទៅខាងក្រៅប្រទេស ខណៈដែលការចុះឆែកឆេរនេះធ្វើឡើងនៅថ្ងៃទី១៥ ខែវិច្ឆិកា ឆ្នាំ២០១៧ វេលាម៉ោង១១ និង៣០នាទី ដែលដឹកនាំដោយកម្លាំអយ្យកាអមសាលាដំបូងខេត្ត។
តាមសម្តីម្ចាស់ទីតាំងបានប្រាប់ថា មិនការជួលអោយបុគ្គលណាម្នាក់មកលួចជួលធ្វើព័ត៌មានដូចការសង្ស័យនោះឡើយ គឺមានតែអតិថិជនមកច្រៀងជាលក្ខណៈឯកជន និងជាលក្ខណៈគ្រួសារទេ ហើយការបើកអាជីវកម្មនេះក៏មានអាជ្ញាប័ណ្ណ និងការទទួលស្គាល់ពីក្រសួងជាយូរឆ្នាំមកហើយដែរ៕
