រាជធានីភ្នំពេញ ៖ កាលពីម្សិលមិញ រដ្ឋាភិបាលនៃប្រទេសចិន បានផ្តល់សំភារៈដែលជាជំនួយគ្មានសំណងដល់ប្រទេសកម្ពុជា ខណដែលសម្ភារៈទាំងនោះមាន ម៉ូតូ តង់ចល័តស្នាក់នៅ ឧបករណ៍រាវមីនជាដើម ។
កម្មវិធីទទូលសម្ភារៈនេះធ្វើឡើងក្រោមអធិបតីភាព លោកទេសរដ្ឋមន្ត្រី សេរីកុសល និងឯកអគ្គរដ្ឋទូតចិន ប្រចាំព្រះរាជាណាចក្រកម្ពុជា ៕
ប៉េកាំង ៖ ឈ្មួយជួញដូរគ្រឿងញៀន០២នាក់ ត្រូវបានតុលាការប្រជាជនកម្រិតមធ្យម ក្រុង Mianyang នៃខេត្ត Sichuan ភាគនិរតីប្រទេសចិនផ្តន្ទាទោសប្រហារជីវិត ជាមួយនិងការព្យួរទោសរយៈពេល០២ឆ្នាំ ដោយតុលាការ។ នេះបើតាមទីភ្នាក់ងារព័ត៌មានចិន ស៊ីនហួរ។ សាលក្រមកាត់ទោសខាងលើត្រូវបានប្រកាសនាថ្ងៃចន្ទម្សិលមិញនេះ។
ជុំវិញរឿងក្តីនេះបុគ្គល ០២នាក់ ផ្សេងទៀតមកពីក្រុមជាមួយគ្នា ត្រូវបានផ្តន្ទាទោសអស់មួយជីវិត ដោយម្នាក់ត្រូវជាប់ពន្ធនាគាររយៈពេល ១៥ឆ្នាំ និងម្នាក់ទៀត ០១ឆ្នាំ នៅក្នុងពន្ធនាគារ។ ដោយឡែកអ្នកដទៃទៀតក្នុងក្រុមឧក្រិដ្ឋជននេះ ត្រូវបានពិន័យដោយការឃុំឃាំង ឬក៏បញ្ជូនទៅកាន់កន្លែងស្តារនីតិសម្បទា។
បើតាមសម្តីរបស់មន្ត្រីប៉ូលិសខេត្ត Sichuan រឿងក្តីផលិត និងជួញដូរគ្រឿងញៀននេះ ដែលមានជាប់ពាក់ព័ន្ធជាមួយមនុស្សសរុបចំនួន ៨២នាក់ គឺជាករណីគ្រឿងញៀនធំបំផុតពុំធ្លាប់មានឡើង នៅក្នុងខេត្តភាគនិរតីនេះឡើយ។ ប៉ូលិសបញ្ជាក់ថា ក្រោយចំណាយពេលធ្វើការស៊ើបអង្កេតអស់ ០៤ខែ កងកម្លាំងសមត្ថកិច្ចចិនបានសម្រុកចូលទៅក្នុងសំបុករបស់ក្រុមឧក្រិដ្ឋជនគ្រឿងញៀននេះ ដែលស្ថិតក្នុងក្រុង Mianyang កាលពីថ្ងៃទី០៥ ខែកក្កដា ឆ្នាំ២០១៦។ នាពេលនេះ ថ្នាំញៀនមេតាំហ្វេតាមីនទម្ងន់ពីរគីឡូក្រាម, មេតាំហ្វេតាមីនជិតផលិតរួចរាល់ទម្ងន់ ៣.២គីឡូម៉ែត្រ, និងថ្នាំ Magu ដែលផ្សំឡើងពីមេតាំហ្វេតាមីន និងកាហ្វេអ៊ីនចំនួន ២,០០០គ្រាប់ ត្រូវបានរឹបអូស។ ជាមួយគ្នានេះ យានជំនិះ ០៥គ្រឿង ក៏ត្រូវបានរឹបអូសដូចគ្នាផងដែរ រួមជាមួយនិងលុយជាង ១.៣លានយ័ន ស្មើនឹង ១៩៥,០០០ដុល្លារអាមេរិក ត្រូវបានបង្កក៕
សេអ៊ូល ៖ ភ្នាក់ងារស៊ើបការណ៍សំងាត់កូរ៉េខាងត្បូង (NIS) បានអះអាងថា កូរ៉េខាងជើងអាចនឹងបាញ់សាកល្បងមីស៊ីលផ្លោងជាថ្មីម្ដងទៀតនៅមុនដំណាច់ឆ្នាំ២០១៧ នេះ គ្រាដែលសកម្មភាពនៅមជ្ឈមណ្ឌលស្រាវជ្រាវមីស៊ីលមានកាន់តែច្រើនឡើង។ នេះបើតាមទីភ្នាក់ងារសារព័ត៌មានកូរ៉េខាងត្បូងយ៉ុនហាប់។
តាមរបាយការណ៍របស់ NIS ដាក់ជូនសភាកូរ៉េខាងត្បូងបានបញ្ជាក់ថា «ខណៈសកម្មភាពយានយន្ដមានកាន់តែច្រើនឡើង នៅឯមជ្ឈមណ្ឌលស្រាវជ្រាវមីស៊ីលមួយ របស់កូរ៉េខាងជើង ការធ្វើតេស្ដម៉ូទ័រមួយទំនងជាត្រូវបានធ្វើឡើងរួចទៅហើយ…ដូច្នេះថា វាមានអាចទៅរួចថាកូរ៉េខាងជើងនឹងបាញ់សាកល្បងមីស៊ីលផ្លោងជាថ្មីម្ដងទៀតនៅមុនដំណាច់ ឆ្នាំ២០១៧នេះ ដោយសំអាងលើការគំរាមកំហែង ពីសំណាក់សហរដ្ឋអាមេរិកជាលេសបង្កើនសមត្ថភាពមីស៊ីល និងអភិវឌ្ឍបច្ចេកវិទ្យាទីអវកាសដោយសន្តិវិធី»។ ទន្ទឹមនោះ NIS បានបន្ថែមថា រ៉ូងក្រោមដីលេខ០៣ នៃទីតាំងធ្វើតេស្ដអាវុធនុយក្លេអ៊ែរ Punggye-ri ទំនងជាបានត្រៀមរួចជាស្រេចសម្រាប់ការធ្វើតេស្ដនុយក្លេអ៊ែរ ដោយរង់ចាំតែបញ្ជា ពីមេដឹកនាំកូរ៉េខាងជើង លោក គីម ជុងអ៊ុន តែប៉ុណ្ណោះ៕
រាជធានីភ្នំពេញ ៖ អគ្គលេខាធិការ នៃអគ្គលេខាធិការដ្ឋានរដ្ឋសភា លោក ឡេង ប៉េងឡុង បានចេញលិខិតមួយច្បាប់ប្រាប់ឲ្យអតីតតំណាងរាស្ត្រ នៃអតីតគណបក្សសង្គ្រោះជាតិ ដែលទើបតែត្រូវបានរំលាយ ដោយអំណាចសាលដីកាតុលាការកំពូល ប្រគល់សម្ភារៈរបស់រដ្ឋ ជូនអគ្គលេខាធិការដ្ឋានរដ្ឋសភាវិញ៕ ព័ត៌មានលម្អិតសូមមេត្តាអានលិខិតខាងក្រោម៖
រាជធានីភ្នំពេញ ៖ អនុប្រធាន និងសមាជិកចំនួន៣រូបរបស់គណៈកម្មាធិការជាតិរៀបចំការបោះឆ្នោត គ.ជ.ប មកពីអតីតគណបក្សសង្គ្រោះជាតិបានដាក់ពាក្យលាលែងពីតួនាទី និងមុខតំណែង។ នេះបបើយោងលិខិតសុំលាលែងរបស់ពួកគេទាំង៣នាក់ ដែលបានដាក់ចូលទៅរដ្ឋសភាកាលពីម្សិលមិញ។
សមាជិក គ.ជ.ប ដែលបានដាក់ពាក្យលាលែងពីតំណែងនោះរួមមាន លោក គួយ ប៊ុនរឿង អនុប្រធានគ.ជ.ប, លោក រ៉ុង ឈុន សមាជិកគ.ជ.ប និងលោកស្រី តែ ម៉ានីរ៉ុង សមាជិកគ.ជ.ប។ ការលាលែងនេះ បានកើតឡើងក្រោយពីតុលាការកំពូល នៃប្រទេសកម្ពុជា សម្រេចរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ ពាក់ព័ន្ធទៅនឹងអំពើក្បត់ជាតិ។ ចំណែកលោក ហ៊ីង ធីឫទ្ធិ សមាជិកគ.ជ.ប កូតាអតីតគណបក្សសង្គ្រោះជាតិដែរនោះ បានប្រកាសថា លោកមិនលាលែងពីតំណែង របស់លោកឡើយ។ លោកបានថ្លែងបញ្ជាក់តាមលិខិតរបស់លោកថា គ.ជ.ប ជាស្ថាប័នឯករាជ្យ ហើយលោកនឹងបម្រើស្ថាប័ននេះតទៅមុខទៀត៕
រាជធានីភ្នំពេញ ៖ អតីតមន្ត្រីមូលដ្ឋាន ឃុំ/សង្កាត់ ស្រុក/ខេត្ត របស់ CNRP នៅមានរយៈពេល៤ថ្ងៃទៀត សម្រាប់ការពិចារណាចូលរួមជាមួយគណបក្សប្រជាជនកម្ពុជា ។ នេះបើយោងតាម ការចុះផ្សាយរបស់សារព័ត៌មានហ្វ្រេស៍ញូស៍ ដែលបានដកស្រង់សំដីរបស់សម្តេចនាយករដ្ឋមន្ត្រី ហ៊ុន សែន នៅព្រឹកថ្ងៃច័ន្ទនេះ ។
បណ្តាញព័ត៌មានហ្វ្រេសញូស៍បានចុះផ្សាយថា នាយករដ្ឋមន្ត្រីកម្ពុជា និងជាប្រមុខដឹកនាំ គណបក្សប្រជាជនកម្ពុជា បានប្រកាសតាមបណ្តាញ Fresh News ឲ្យដឹងថា ការស្ម័គ្រចិត្តចុះចូលពី សំណាក់អតីតមន្ត្រីរបស់គណបក្សសង្គ្រោះជាតិ ចូលគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ។
តាមហ្វ្រេសញូស៍ឲ្យដឹងថា នៅព្រឹកថ្ងៃទី២០ ខែវិច្ឆិកា ឆ្នាំ២០១៧នេះ សម្តេចតេជោ ហ៊ុន សែន បានផ្តល់កិច្ចសម្ភាសន៍ដ៏ពិសេសមួយជាមួយលោក លឹម ជាវុត្ថា នាយកប្រតិបត្តិបណ្តាញព័ត៌មាន Fresh News ឲ្យដឹងថា៖ «ការស្ម័គ្រចិត្តចុះជាមួយគណបក្សប្រជាជនកម្ពុជា មានត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គជប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។
សម្តេចតេជោ ហ៊ុន សែន បានប្រសាសន៍អំពាវនាវឲ្យអតីតមន្ត្រីគណបក្សសង្គ្រោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមថ្ងៃទី២៤នេះធ្វើឡើងតាមលក្ខខ័ណ្ឌរបស់គជប ៕
រាជធានីភ្នំពេញ ៖ សាលារាជធានីភ្នំពេញ បានចេញនូវសេចក្តីជូនដំណឹងមួយស្តីពីការ ប្រារពពិធីសូត្រមន្ត បង្សុកូល និងរាប់បាត្រ ឧទ្ទិសកុសលជូនវិញ្ញាណក្ខន្ធជនរងគ្រោះក្នុងឧបទ្ទវហេតុលើអតីតស្ពានពេជ្រនៃទីក្រុងកោះពេជ្រ ។
តាមសេចក្តីជូនដំណឹងពិធីនេះនឹងរៀបចំធ្វើនៅវេលាម៉ោង៧ និង០០នាទី ថ្ងៃទី២២ ខែវិច្ឆិកា ឆ្នាំ២០១៧ ខាងមុខនេះ នៅស្តូបក្បែរស្ពាននាគនៃទីក្រុងកោះពេជ្រ៕
ឥណ្ឌា ៖ សត្វដំរីអាស៊ីជិតផុតពូជចំនួន២ក្បាលត្រូវបានរថភ្លើងដឹកអ្នកដំណើរមួយគ្រឿងបុកបណ្ដាលឲ្យស្លាប់នៅជិតទីក្រុងហ្គូវ៉ាហាទីនៅភាគឦសានប្រទេសឥណ្ឌា។
មន្ត្រីអភិរក្សសត្វព្រៃលោក ប្រូឌីបតា បារូ បាននិយាយថា សត្វដំរីដែលស្លាប់ទាំង២ក្បាលនេះគឺស្ថិតនៅចំណោមហ្វូងដំរីចំនួន១៥ក្បាលដែលបានដើរផ្សងព្រេងឆ្លងទៅចូលក្នុងតំបន់នេះដើម្បីរកចំណីនៅមុនពេលព្រះអាទិត្យរះកាលពីថ្ងៃអាទិត្យ។ មន្ត្រីអភិរក្សរូបនេះបានបញ្ជាក់ថា ហ្វូងដំរីទាំងនេះបាននាំគ្នាដើរឆ្លងកាត់ផ្លូវរថភ្លើង ហើយដំរី២ក្បាលដែលស្លាប់នេះបានដើរក្រោយគេដែលត្រូវបានរថភ្លើងបុកបណ្ដាលឲ្យស្លាប់តែម្ដង។
គ្រោះថ្នាក់នេះបានកើតឡើងនៅរដ្ឋអាស្សាមជាតំបន់ដែលមានសត្វដំរីអាស៊ីរាប់ពាន់ក្បាលតាំងជម្រកនៅទីនោះ ហើយក៏តែងតែរងគ្រោះដោយសាររថភ្លើងបុកបណ្ដាលឲ្យស្លាប់ឬរបួសជាប្រចាំផងដែរ៕
ប៉េកាំង ៖ ប្រព័ន្ធផ្សព្វផ្សាយព័ត៌មានផ្លូវការរបស់ចិនបានរាយការណ៍ពីថ្ងៃអាទិត្យថា គ្រោះអគ្គិភ័យមួយបានកើតឡើងនៅផ្ទះល្វែងជួលមួយចំនួននៅភាគខាងត្បូងទីក្រុងប៉េកាំងប្រទេសចិនដោយបានសម្លាប់មនុស្សចំនួន១៩នាក់ និងចំនួន៨នាក់ទៀតរងរបួស។
ទីភ្នាក់ងារព័ត៌មានស៊ីនហួបាននិយាយថា ក្រុមអ្នកពន្លត់អគ្គិភ័យបានប្រើរយៈពេល៣ម៉ោងដើម្បីគ្រប់គ្រងអគ្គិភ័យនេះ។ លំនៅឋាននេះភាគច្រើនត្រូវបានជួលក្នុងតម្លៃថោកឲ្យកម្មករចំណាកស្រុកដែលបានប្រើកម្លាំងពលកម្មខ្លាំងតែទទួលបានប្រាក់បៀវត្សរ៍ទាបនៅក្នុងទីក្រុងប៉េកាំង។
ទោះយ៉ាងណាមកដល់ពេលនេះ គេមិនទាន់មានព័ត៌មានណាមួយបញ្ជាក់ពីមូលហេតុដែលនាំឲ្យមានគ្រោះអគ្គិភ័យនេះនៅឡើយទេ៕
កេនយ៉ា ៖ ក្រុមមេដឹកនាំបក្សប្រឆាំងនៅប្រទេសកេនយ៉ានិយាយថា ប៉ូលិសកំពុងប្រើកាំភ្លើង និងឧស្ម័នបង្ហូរទឹកភ្នែកដើម្បីបំបែកប្រជាពលរដ្ឋនៅតំបន់ក្រីក្រក្នុងទីក្រុងមួយកន្លែងដែលតវ៉ាប្រឆាំងការសម្លាប់ប្រជាពលរដ្ឋចំនួន៤នាក់ក្នុងការវាយប្រហារមួយដែលគេសង្ស័យថា មានការពាក់ព័ន្ធនឹងបញ្ហាជាតិសាសន៍។
ប៉ូលិសនៅទីក្រុងណៃរ៉ូប៊ីប្រទេសកេនយ៉ាលោក ចាផេត កូម បានចាត់ទុកការសម្លាប់មនុស្សកាលពីយប់ថ្ងៃអាទិត្យថា អំពើឃាតកម្ម ហើយមេបក្សប្រឆាំងលោក រ៉ៃឡា អូឌីងហ្គា និយាយថា អ្នកស្លាប់ទាំងនេះគឺរស់នៅសហគមន៍មួយដែលគាំទ្រគណបក្សប្រឆាំងរបស់លោក។ មេបក្សប្រឆាំងរូបនេះក៏បានបញ្ជាក់ដែរថា សមាជិកសភាម្នាក់ក៏បានរងការបាញ់ប្រហាររបួសជើងនៅពេលធ្វើបាតុកម្មនេះដែរ ហើយលោកបានសុំឲ្យអន្តរជាតិជួយធ្វើអន្តរាគមន៍ពីវិបត្តិនយោបាយនេះ។
សូមបញ្ជាក់ថា ភាពតានតឹងរវាងជាតិសាសន៍នៅប្រទេសនេះបានកើនឡើងខ្លាំងតាំងពីតុលាការបានបដិសេធការជាប់ឆ្នោតជាថ្មីរបស់ប្រធានាធិបតីលោក អ៊ូហ៊ូរូ កេនយ៉ាតា កាលពីខែសីហាក្រោយពីលោក អូឌីងហ្គា បានជំទាស់នឹងជ័យជម្នះនេះនៅតុលាការកំពូលដោយសារការលួចបន្លំសន្លឹកឆ្នោត៕
ខេត្តបន្ទាយមានជ័យ ៖ ជនសង្ស័យចំនួន១៦នាក់ដែលក្នុងនោះមានពលករខ្មែរចំនួន១៥នាក់ ផងនោះ ត្រូវបានកំលាំងចម្រុះថៃធ្វើការចាប់ខ្លួន ព្រមទាំងបានបញ្ជូនទៅអោយកំលាំងជំនាញស្រុកវឌ្ឍនាណៈខន ដើម្បីសាកសួរបន្តផងដែរ ខណៈដែលពួកគេទាំងអស់គ្នាបានលបលួចចូលទៅកាប់ និងស្ពាយឈើគ្រញូងជាច្រើនផ្ទាំង ចេញពីតំបន់ព្រៃហាមឃាត់។
យោងតាមរបាយការណ៍របស់ភាគីថៃបានអោយដឹងថា នៅថ្ងៃទី១៦ ខែវិច្ឆិកា ឆ្នាំ២០១៧ វេលាម៉ោង ៧ ព្រឹក កំលាំងចម្រុះដែលមានក្រុមទាហានឈុតខ្មៅ តម្រួត មន្ត្រីអនុរក្សតំបន់ ឧទ្យានជាតិ ប៉ាងស៊ីដា និងកំលាំងរដ្ឋបាលព្រៃឈើ សរុបប្រមាណ៣០នាក់បានធ្វើការឡោមព័ទ្ធ និងរុកចូលទៅក្នុងព្រៃ ក្នុងតំបន់ហាមឃាត់ខាងលើ បន្ទាប់ពីទទួលបានព័ត៌មានថា មានមនុស្សជាច្រើននាក់បានលបចូលទៅក្នុងព្រៃដើម្បីស្ពាយផ្ទាំង ឈើគ្រញូងចេញមកក្រៅ ប្រគល់ទៅអោយមេឈ្មួញខ្មែរ។
នៅក្នុងកិច្ចប្រតិបត្តិការចម្រុះនេះ កំលាំងសមត្ថកិច្ចបានឃាត់ខ្លួនមនុស្សសរុបចំនួន១៦នាក់ ដែលក្នុងនោះមានជនជាតិថៃម្នាក់ និងជនជាតិខ្មែរចំនួន១៥នាក់ ព្រមទាំងបានដកហូតឈើគ្រញូងបានចំនួន ៤៣ ផ្ទាំង កាំភ្លើងកែច្នៃ ចំនួន៦ដើមនិងកញ្ឆាមួយចំនួនដែលទីតាំងនៃការឃាត់ខ្លួននេះស្ថិតក្នុងតំបន់ម៉ៃសិរីចំប៉ាក្នុងឃុំណងម៉ាកហ្វាយ ស្រុក
វឌ្ឍនាណៈខនខេត្តស្រះកែវប្រទេសថៃ ។
ក្រោយពីធ្វើការឃាត់ខ្លួនព្រមទាំងបានដកហូតនូវវត្ថុតាងមួយចំនួនរួចមកសមត្ថកិច្ច បានបញ្ជូនខ្លួនជនសង្ស័យទាំងអស់ ទៅកាន់ផែ្នករដ្ឋបាលព្រៃឈើ ស្រុកវឌ្ឍនាណៈខន ដើម្បីសាកសួរបន្ត រកមេក្លោងដែលនៅពីក្រោយខ្នង ក្នុងការអនុវត្ត តាមផ្លូវច្បាប់ ៕
ខេត្តកំពង់ចាម ៖ ឯកឧត្តម គួច ចំរើន អនុប្រធាន គណបក្សប្រជាជនកម្ពុជា ខេត្តកំពង់ចាម សម្ពោធដាក់ឲ្យប្រើប្រាស់ទីស្នាក់ការគណបក្សប្រជាជនកម្ពុជា ឃុំផ្អាវ និង សំណេះសំណាលជាមួយ ក្រុមការងារស្រុកបាធាយនិងប្រជាពលរដ្ឋចូលរួមជាង១ពាន់នាក់ នៅព្រឹកថ្ងៃទី១៨ ខែវិច្ឆិកា ឆ្នាំ២០១៧។
ទីស្នាក់ការគណបក្សប្រជាជនកម្ពុជា ឃុំផ្អាវ ឯកឧត្តម មានប្រសាសន៍ ទៅកាន់បងប្អូនប្រជាពលរដ្ឋ ថា ប្រទេស មានសុខសន្តិភាព រីកចំរើនដល់សព្វថ្ងៃនេះ ដោយគុណបំណាច់ របស់គណៈបក្សប្រជាជនកម្ពុជា ជាពិសេស គឺសម្តេច តេជោ ហ៊ុន សែន ផ្តើមកសាងដោយ ឯកឧត្តម គួច ចំរើន និងលោកជំទាវ ចំនួន២០.៩៨៥ដុល្លារលោកជី ប៊ុន ថន និងអ្នកស្រី ផ្តល់ទីតាំងសាងសង់ មានទំហំ៥២៥ម៉ែត្រការ៉េ
លោកឧកញ៉ា ទី សុភាព និងលោកជំទាវ ចំនួន២៥០០ដុល្លារ ឧកញ៉ា ស្រី ចាន់ ថន ចំនួន១០០០ នៅក្នងឱកាសនោះ ឯកឧត្តម គួច ចំ រើន បានថ្លែងអំណរអគុណដល់បងប្អូនទាំងអស់បានចូលរួមថវិកាផ្ទល់ខ្លួនដើម្បីរួមចំណែក ក៏សាងទីស្នាក់គណៈបក្សប្រជាជនកម្ពុជា ឃុំផ្អាវ ស្រុកបាធាយយើងនេះ៕
រាជធានីភ្នំពេញ ៖ នៅព្រឹកថ្ងៃទី១៨ ខែវិច្ឆិកា ឆ្នាំ២០១៧នេះ ស្លាកទីស្នាក់កណ្តាលរបស់គណបក្សសង្គ្រោះជាតិ នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នពេញ ត្រូវបានចុះរុះរើ ទម្លាក់ចេញហើយក្រោយតុលាការ កាត់ទោសរំលាយចោល និងការចេញសេចក្តីប្រកាសរបស់ក្រសួងមហាផ្ទៃ។
ក្រសួងមហាផ្ទៃកាលពីថ្ងៃទី១៧ ខែវិច្ឆិកា ឆ្នាំ២០១៧នេះ បានចេញលិខិតមួយទៀត បង្គាប់ឲ្យអាជ្ញាធរ គ្រប់រាជធានី-ខេត្ត ចាប់ផ្ដើមចុះអនុវត្ដសាលដីកា របស់តុលាការកំពូល ដោយទម្លាក់ស្លាក, បដា និងពាក្យស្លោកផ្សេងៗ របស់គណបក្សសង្គ្រោះជាតិ នៅទូទាំងប្រទេស ក្រោយពីគណបក្សនេះត្រូវបានតុលាការកាត់ទោសរំលាយចោល៕
រាជធានីភ្នំពេញ ៖ ក្រសួងមហាផ្ទៃ ចេញសេចក្តីប្រកាសសម្រេចលុបឈ្មោះ គណបក្សសង្គ្រោះជាតិ ចេញពីបញ្ជីគណបក្សនយោបាយ នៅក្រសួងមហាផ្ទៃ នេះបើយោងតាមសេចក្តីប្រកាស ព័ត៌មានរបស់ក្រសួងមហាផ្ទៃ។
ការចេញសេចក្តីប្រកាសសម្រេចលុបឈ្មោះគណបក្សសង្គ្រោះជាតិចេញពីបញ្ជីឈ្មោះរបស់ក្រសួងមហាផ្ទៃ ធ្វើឡើងបន្ទាប់ពីកាលពីថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូលបានប្រកាសកាត់រំលាយគណបក្សសង្គ្រោះជាតិ៕
រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ នៅថ្ងៃទី១៧ ខែវិច្ឆិកា ឆ្នាំ២០១៧នេះ បានចេញលិខិតមួយទៀត បង្គាប់ឲ្យអាជ្ញាធរ គ្រប់រាជធានី-ខេត្ត ចាប់ផ្ដើមចុះអនុវត្ដសាលដីកា របស់តុលាការកំពូល ដោយទម្លាក់ស្លាក, បដា និងពាក្យស្លោកផ្សេងៗ របស់គណបក្សសង្គ្រោះជាតិ នៅទូទាំងប្រទេស ក្រោយពីគណបក្សនេះត្រូវបានតុលាការកាត់ទោសរំលាយចោល។
សូមបញ្ជាក់ថា នៅល្ងាចថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូលរបស់កម្ពុជា បានប្រកាសសាលដីកាសម្រេចឲ្យរំលាយគណបក្សសង្គ្រោះជាតិ ចាប់ពីថ្ងៃចេញដីកានេះតទៅ ដោយសារតែគណបក្សនេះ បានប្រព្រឹត្តអំពើក្បត់ជាតិជាប្រព័ន្ធឃុបឃិតជាមួយបរទេស ក្នុងគោលដៅផ្តួលរំលំរាជរដ្ឋាភិបាលស្របច្បាប់របស់កម្ពុជា។ ជាមួយគ្នានេះ តុលាការកំពូល ក៏បានប្រកាសហាមឃាត់ដល់មន្ត្រីថ្នាក់ដឹកនាំ គណបក្សសង្គ្រោះជាតិ ចំនួន១១៨នាក់ មិនឲ្យធ្វើនយោបាយ រយៈពេល៥ឆ្នាំផងដែរ៕
