តួកគី ៖ អតីតទាហានចំនួន៣៤នាក់ត្រូវបានតុលាការមួយរបស់ប្រទេសតួកគីសម្រេចផ្តន្ទាទោសម្នាក់ៗជាប់ពន្ធធនាគារអស់មួយជីវិត ក្រោមបទចោទប្រកាន់ថា បានចូលរួមក្នុងគម្រោងសម្លាប់ លោកប្រធានាធិបតី Recep Tayyip Erdogan នៅអំឡុងពេលប៉ន់ប៉ង់ធ្វើរដ្ឋប្រហារមួយកាលពីឆ្នាំមុន។ នេះបើយោងតាមសារព័ត៌មានរដ្ឋរបស់តួកគី Anadolu Agency ។
លោក Ali Yazici អតីតប្រធានជំនួយការរបស់លោកប្រធានាធិបតី ត្រូវបានផ្តន្ទាទោស ឲ្យជាប់ពន្ធធនាគារចំនួន១៨ឆ្នាំ ខណៈអតីតវរសេនីយ៍ឯកមួយរូប ត្រូវបានរួចផុតពីទោស នៅក្នុងការកាត់ក្តីមួយទៅលើជនសង្ស័យសរុបចំនួន៤៧នាក់ ដោយតុលាការនៅខេត្ត Mugla ភាគខាងត្បូងឆៀងខាងលិច ប្រទេសតួកគី។ ក្រុមចុងចោទ ដែលរងការចោទប្រកាន់ថា បានបង្កើតជាក្រុមវាយប្រហារ ដើម្បីសម្លាប់លោកប្រធានាធិបតីនោះ ក៏ត្រូវបានរងការចោទប្រកាន់ ពីបទព្យាយាមលុបបំបាត់រដ្ឋធម្មនុញ្ញ និងរងការចោទប្រកាន់ថា ពួកគេគឺជាសមាជិករបស់ក្រុមភេរវករប្រដាប់ដោយអាវុធ៕
អេស្ប៉ាញ ៖ រដ្ឋាភិបាលនៅក្នុងតំបន់បានថ្លែងថា មេដឹកនាំតំបន់ កាតាឡាន (Catalonia) អាចនឹងប្រកាសឯករាជ្យផ្ដាច់ខ្លួនពីប្រទេសអេស្ប៉ាញ នៅថ្ងៃចន្ទសប្តាហ៍ក្រោយនេះ ខណៈវិបត្តិមួយ បាននឹងកំពុងកើនឡើង រវាងរដ្ឋាភិបាលទីក្រុង Madrid និងក្រុមមេដឹកនាំពួកផ្តាច់ខ្លួន ស្តីពីការបោះឆ្នោតប្រជាមតិ ទាមទារឯករាជ្យដោយខុសច្បាប់។ នេះបើយោងតាមសារព័ត៌មានAFP ។
ក្រុមមេដឹកនាំពួកផ្តាច់ខ្លួន នៅក្នុងតំបន់ កាតាឡាន បានស្នើឲ្យមានសម័យប្រជុំសភា នៅថ្ងៃចន្ទ ដើម្បីវិភាគអំពីលទ្ធផលនៃការធ្វើប្រជាមតិ ហើយយោងតាមរបៀប វារៈនៃសម័យប្រជុំដែលបានសម្រេចនោះ ឯករាជ្យអាចនឹងត្រូវបានប្រកាសឡើង។ នេះបើតាមការស្រង់សម្តីពីប្រភពមួយដែលសុំមិនបញ្ចេញឈ្មោះ។
ជុំវិញករណីខាងលើនេះរដ្ឋមន្ត្រីយុត្តិធម៌អេស្ប៉ាញ បានបញ្ជាក់ថា ទីក្រុង Madrid នឹងធ្វើអ្វីៗគ្រប់បែបយ៉ាង នៅក្រោមប្រព័ន្ធច្បាប់ដែលមានស្រាប់ ដើម្បីរារាំងការប្រកាសឯករាជ្យនៃតំបន់កាតាឡាន (Catalonia) ព្រមទាំងព្រមានថា ការរឹងទទឹងចង់ទាមទារឯករាជ្យភាពនេះ គឺជាការរំលោភបំពានលើមាត្រា១៥៥ នៃរដ្ឋធម្មនុញ្ញជាតិ ដែលអាចនឹងបង្ខំឲ្យរដ្ឋាភិបាលចូលធ្វើ អន្តរាគមន៍គ្រប់គ្រងតំបន់ស្វយ័តកាតាឡាន៕
ភ្នំពេញ ៖ បណ្តាភាគីសហជីពនៅឆ្នាំនេះ បានប្តេជ្ញានឹងជួយទៅដល់ភាគីនិយោជក គ្រោងនឹងធ្វើលិខិតដាច់ដោយឡែករៀងៗខ្លួន ទៅបណ្តាប្រទេសដែលទទួលបញ្ជាទិញទំនិញពីកម្ពុជា រួមមាន៖ សហរដ្ឋអាមេរិក សហគមអឺរ៉ុប កាណាដា ជប៉ុណ កូរ៉េ ជាដើម ដោយស្នើឱ្យកែសម្រួលលក្ខខ័ន្តពាណិជ្ជកម្ម ដើម្បីធ្វើឱ្យទំនិញរបស់កម្ពុជា អាចទៅកាន់ទីផ្សារសហរដ្ឋអាមេរិក សហគមអឺរ៉ុប និងបណ្តាប្រទេសផ្សេងៗទៀងឱ្យបានកាន់តែច្រើន។
គម្រោងការស្នើនេះ ផ្អែកលើរយៈពេលកន្លងមក សហរដ្ឋអាមេរិក និងសហគមអឺរ៉ុប តែងតែជម្រុញឱ្យភាគីកម្មករ និយោជិត ក៏ដូចជារាជរដ្ឋាភិបាលផ្តល់សច្ចាប័ណ្ណនូវអនុសញ្ញាអន្តរជាតិខាងការងារឱ្យបានច្រើនជាងគេនៅក្នុងតំបន់ មានលក្ខខ័ន្តការងារល្អ តម្លើងប្រាក់ឈ្នួលជារៀងរាល់ឆ្នាំ ជាមួយនឹងការសន្យាថាពង្រីកទីផ្សារការងាររបស់កម្ពុជានៅសហរដ្ឋអាមេរិក និងសហគមអែរ៉ុប ក៏ដូចជាបណ្តាប្រទេសផ្សេងទៀត ពិសេសជួយសម្រួលពាណិជ្ជកម្ម ធ្វើម៉េចឱ្យតែកម្ពុជាអនុវត្តអនុសញ្ញាខាងលើឱ្យបានល្អ។
ទាក់ទិននឹងបញ្ហានេះ លោក ហេង សួរ អនុប្រធានលេខាធិការដ្ឋាន នៃគណៈកម្មការប្រឹក្សាការងារ កាលពីល្ងាចម្សិលម៉ិញនេះបានបញ្ជាក់ថា ជាក់ស្តែងកន្លងមកនេះ ការបញ្ជាទិញរបស់សហរដ្ឋអាមេរិក និង សហគមអឺរ៉ុប នៅមានកម្រិតនៅឡើយ។ ដូច្នេះ ឆ្នាំនេះ ជាមួយនឹងកំណើនប្រាក់ឈ្នួលថ្មី ភាគីសហជីព ជាមួយនឹងនិយោជក នឹងធ្វើការអំពាវនាវដោយផ្ទាល់ ទៅបណ្តាប្រទេសដែលនាំទំនិញកម្ពុជាចូល ឱ្យរក្សាការសន្យារបស់ខ្លួន ព្រោះភាគីពាក់ព័ន្ធ នឹងផ្នែកវាយនភណ្ឌនៅកម្ពុជា បានប្តេជ្ញាបន្តកំណើនប្រាក់ឈ្នួលទៅតាមអ្វីដែលជាលក្ខខណ្ឌតម្រូវ ហើយក៏អនុញ្ញាឱ្យមានគម្រោង អាយឡូ ប៊ី អែហ្វ ស៊ី រួមទាំងពង្រឹងសមត្ថភាពមន្រ្តីអធិការរកិច្ចរបស់ខ្លួន ដើម្បីធានាថា លក្ខខន្តការងាររបស់កម្ពុជាជាលក្ខខន្តពាណិជ្ជកម្មដែលសហរដ្ឋអាមេរិក និងសហគមអឺរ៉យបចង់បាននិងចង់ឃលញជាងគេ ហើយចង់យកកម្ពុជាធ្វើជាងគំរូនោះគឺនឹងមានលទ្ធផលជាក់ស្តែង។
យ៉ាងណាទាំងរដ្ឋាភិបាល និងភាគីពាក់ព័ន្ធ លើផ្នែកវាយនភណ្ឌ កាត់ដេរ និងផលិតស្បែកជើងនៅកម្ពុជា សង្ឃឹមថា បើកម្ពុជាមានការរីកចំរើន និងពង្រីកទីផ្សាររបស់ខ្លួន ទៅកាន់សហរដ្ឋអាមេរិក និងសហគមអឺរ៉ុប នោះបណ្តាប្រទេសនៅក្នុងតំបន់គេនឹងមើលឃើញថា ការសន្យារបស់សហរដ្ឋអាមេរិក និងសហគមអឺរ៉ុប ពិតជាល្អ ហើយគេនឹងធ្វើតាម។ ប៉ុន្តែបើកម្ពុជាមិនទទួលបានការលើកលែង ការអនុគ្រោះ ពីសហរដ្ឋអាមេរិក និង សហគមអឺរ៉ុបទេនោះ ប្រទេសមួយចំនួននៅក្នុងតំបន់ គេនឹងមិនកែសម្រួលលក្ខខ័ន្តការងារ តាមឡើយ ហើយពេលនោះ បេសកម្មរបស់ ILO ,USA and EU ដែលចង់លើកតម្កើងកម្មករ និយោជិត និងលក្ខខន្តការងារផ្សេងៗនោះ ប្រាកដជាបរាជ័យនៅក្នុងតំបន់នេះតែម្តង៕
Garment workers make Adidas apparel at the Shen Zhou garment factory in Phnom Penh, Cambodia, October 18, 2011.
ភ្នំពេញ ៖ ខណៈធនាគារអភិវឌ្ឍន៍អាស៊ី បានព្យាករកំណើនសេដ្ឋកិច្ចកម្ពុជាសម្រាប់ឆ្នាំ២០១៧ និងឆ្នាំ២០១៨ ប្រមាណ៧,១ភាគរយនោះ ធនាគារពិភពលោកបានព្យាករកំណើននេះត្រឹមតែ៦,៨ភាគរយ សម្រាប់ឆ្នាំ ២០១៧ និង ៦,៩ភាគរយ សម្រាប់ឆ្នាំ២០១៨ ប៉ុណ្ណោះ។
តាមរបាយការណ៍របស់ធនាគារពិភពលោក ចេញផ្សាយនៅថ្ងៃពុធទី៤ តុលា នេះថា កំណើនត្រូវបានព្យាករថា មានការថមថយតិចតួចមកនៅត្រឹម៦,៨ភាគរយក្នុងឆ្នាំ២០១៧ ថយពី៧,០នៅឆ្នាំ២០១៦ ។ ការថមថយកំណើននេះមកពីការនាំចេញវាយនភណ្ឌមានការថយល្បឿនបន្តិច ខណៈការនាំចេញគ្រឿងយន្ត បរិក្ខារ និងគ្រឿងបន្លាស់អគ្គិសនី មានការកើនឡើងជំនួសវិញ ។
លោក លី សូដេត សេដ្ឋវិទូជាន់ខ្ពស់នៃធនាគារពិភពលោក ប្រចាំកម្ពុជាបានឱ្យដឹងថា ការព្យាកររបស់ធនាគារពិភពលោក គឺបានពឹងផ្អែកទៅលើឯកសារ តឹកតាងមួយចំនួនដែលខ្លួនបានសិក្សា ។ ម្យ៉ាងទៀតការទម្លាក់ការព្យាករនេះដែរ ក៏ស្រដៀងគ្នាទៅនឹងក្រសួងសេដ្ឋកិច្ច និងហិរញ្ញវត្ថុចេញផ្សាយកាលពីពេលថ្មីៗនេះដែរ ដោយក្នុងនោះ ក្រសួងបានព្យាករថា សេដ្ឋកិច្ចកម្ពុជា នឹងនៅត្រឹម៦,៩ភាគរយ ក្នុងឆ្នាំ ២០១៧ ។
លោកបន្តថា បើក្រលេកមកមើលស្ថានភាពជាក់ស្ដែងវិញ ក៏បានបង្ហាញដូចនេះដែរ ក្នុងនោះឃើញថា វិស័យកាត់ដេរ បានធ្លាក់ចុះបន្តិចតែវាមិនធ្វើឱ្យប៉ះពាល់ដល់កំណើនសេដ្ឋកិច្ចកម្ពុជានោះទេ ព្រោះវាបានជំនួសមកវិញនៅវិស័យទេសចរណ៍ និងការនាំចេញគ្រឿងយន្ត សម្ភារៈអគ្គិសនីជាដើម ។
ពាក់ពន្ធ័នឹងហានិភ័យ សម្រាប់កំណើនសេដ្ឋកិច្ចកម្ពុជា ធនាគារពិភពលោកបានបង្ហាញថា បើសិនជាសេដ្ឋកិច្ចប្រទេសធ្លាក់ចុះយ៉ាងគំហុកនោះ វានឹងធ្វើឱ្យកំណើនសេដ្ឋកិច្ចកម្ពុជា ក៏ត្រូវធ្លាក់ចុះដែរ ។ ដូចនេះមានន័យថា ចិនជាទីផ្សារធំមួយនៅក្នុងប្រទេសកម្ពុជា ដែលជួយជំរុញកំណើសេដ្ឋកិច្ច ឱ្យមានស្ថេរភាព៕
ភ្នំពេញ ៖ ចាប់ពីខែមករា ឆ្នាំ២០១៨ តទៅ កម្មការិនីរោងចក្រដែលមានផ្ទៃពោះ នឹងទទួលបាន ប្រាក់ឧបត្ថម្ភ ៤០ម៉ឺនរៀល នៅពេលសម្រាលកូនបានម្នាក់។ ដោយឡែក កម្មការិនីដែលសម្រាលបានកូនភ្លោះ២ នឹងទទួលបាន៨០ម៉ឺនរៀល និងអ្នកដែលមានកូនភ្លោះ៣ ទទួលបាន១លាន២សែនរៀល។លើសពីនេះទៀតប្រមុខរាជរដ្ឋាភិបាល ក៏ស្នើឲ្យថៅកែរោងចក្រ អនុញ្ញាតឲ្យកម្មការិនី ដែលមានផ្ទៃពោះ អាចចេញមុនម៉ោងការងារយ៉ាងតិច ១៥ នាទី ផងដែរ។
ការផ្តល់ប្រាក់ដល់កម្មការិនីសម្រាលកូននេះ ជាគោលនយោបាយផ្តល់សាច់ប្រាក់ ដែលសម្តេចនាយករដ្ឋមន្ត្រី ហ៊ុន សែន ប្រកាសនៅចំពោះមុខកម្មករ-កម្មការិនីប្រមាណ១ ម៉ឺននាក់ នៅរោងចក្រតំបន់កំបូល តាមផ្លូវជាតិលេខ ៤ នៅព្រឹកថ្ងៃទី៤ ខែតុលា នេះ ។
រាជរដ្ឋាភិបាល ក៏សម្រេចឲ្យកម្មការិនីដែលសម្រាលកូន អាចឈប់សម្រាកមាតុភាព រយៈពេល៣ខែ ហើយអាចទទួលបានប្រាក់ខែចំនួន ១២០ ភាគរយទៀតផង ដែលប្រាក់ ខែនេះ បេឡាជាតិរបបសន្តិសុខសង្គមជាអ្នកផ្តល់ឲ្យ៧០ ភាគរយ និងភាគីរោងចក្រផ្តល់ ជូន៥០ ភាគរយ។
បន្ថែមពីនេះ សម្ដេចតេជោ បានអំពាវនាវឲ្យបង្កើតគិលានដ្ឋាន ទារកដ្ឋាន អាហារ ដ្ឋាន ឲ្យបានគ្រប់រោងចក្រសហគ្រាស ដែលពេលនេះ នៅតាមរោងចក្រ សហគ្រាសមានគិលានដ្ឋានមានប្រមាណ៨០% អាហារដ្ឋានមានជាង៣០% ចំណែកទារកដ្ឋាន មានតែជាង២០%ប៉ុណ្ណោះ៕
ភ្នំពេញ ៖ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចម៉ែ បានស្តេចយាងនិវត្តន៍មកដល់កម្ពុជាវិញហើយ នៅម៉ោង ៣រសៀល ថ្ងៃទី៤ ខែតុលា ឆ្នាំ២០១៧ នេះ បន្ទាប់ពីព្រះអង្គទាំងទ្វេ ស្តេចយាងទៅពិនិត្យព្រះរាជសុខភាព នៅទីក្រុងប៉េកាំង នៃសាធារណរដ្ឋប្រជាមានិតចិន កាលពីចុងខែកក្កដា ឆ្នាំ២០១៧ កន្លងទៅ។
ការយាងត្រឡប់របស់ព្រះមហាក្សត្រ និងសម្តេចម៉ែ នៅឯព្រលានយន្តហោះអន្តរ ជាតិ ភ្នំពេញ មានការទទួលព្រះរាជដំណើរដោយ ព្រះញាតិវង្ស សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចពញាចក្រី ហេង សំរិន ប្រធានរដ្ឋសភា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា ព្រមទាំងមន្ត្រីជាន់ខ្ពស់រាជរដ្ឋាភិបាលកម្ពុជា និងមន្ត្រីព្រះបរមរាជ វាំងផងដែរ។
សូមបញ្ជាក់ថា ព្រះមហាក្សត្រខ្មែរ និងសម្តេចម៉ែ តែងបានយាងទៅពិនិត្យព្រះរាជ សុខភាពយ៉ាងទៀងទាត់នៅទីក្រុងប៉េកាំង ប្រទេសចិន តាមការកំណត់របស់ក្រុមគ្រូពេទ្យ ចិន៕
រាជធានីភ្នំពេញ ៖ លោកស្រី មូរ សុខហួរ អនុប្រធានគណបក្សសង្គ្រោះជាតិ និងជាតំណាងរាស្ត្រផងដែរ ត្រូវបានគេរាយការណ៍ថា បានចាកចេញពីប្រទេសកម្ពុជា កាលពីម្សិលមិញក្រោមហេតុផលថា ខ្លាចមានការចាប់ខ្លួន ពីព្រោះមានជាប់ពាក់ព័ន្ធនឹងករណីលោកកឹម សុខា ចំពោះអំពើក្បត់ជាតិ។
ទន្ទឹមនឹងការចាកចេញនោះកាលពីថ្ងៃ៣តុលា លោកស្រីមូរ សុខហួរ ក៏បានប្រាប់ទីភ្នាក់ងារសារព័ត៌មានរ៉យទ័រថា សភាពការណ៍ក្នុងប្រទេសកម្ពុជា«គ្រោះថ្នាក់ណាស់សំរាប់ក្រុមមេដឹកនាំសង្គ្រោះជាតិ»និងថា លោកស្រីបានឮការគំរាមរបស់នាយករដ្ឋមន្ត្រី និងបានចាកចេញពីប្រទេសកាលពីថ្ងៃអង្គារ។
គួរបញ្ជាក់ថា ក្រោយការចាប់ខ្លួនលោកកឹម សុខា ប្រធានគណបក្សសង្គ្រោះជាតិមកគេឃើញមានមន្ដ្រីជាន់ខ្ពស់គណបក្សសង្គ្រោះជាតិមួយចំនួន បានចាកចេញពីកម្ពុជា ដែលក្នុងនោះរួមទាំង កូនស្រីលោក កឹម សុខា ទាំង២ រូបគឺកញ្ញា កឹម មនោវិទ្យា និងកញ្ញា កឹម សម្មាធីតា ព្រមទាំងមេដឹកនាំយុវជននៃគណបក្សសង្គ្រោះជាតិលោក ហ៊ីង សុខសាន្ត ផងដែរ ៕
រាជធានីភ្នំពេញ ៖ ប្រធានគណបក្សយុវជនកម្ពុជា លោក ពេជ្រ ស្រស់ នៅព្រឹកថ្ងៃទី០៤ ខែតុលា ឆ្នាំ២០១៧នេះ បានដាក់ពាក្យបណ្តឹងស្នើសុំរំលាយ គណបក្សសង្គ្រោះជាតិ ទៅកាន់ក្រសួងមហាផ្ទៃហើយ ហើយការដាក់ពាក្យបណ្តឹងនោះគឺស្របតាមច្បាប់ស្តីគណបក្សនយោបាយផងដែរ ។ ប៉ុន្តែគណបក្សហ្វ៊ុនស៊ិនប៉ិច នៅមិនទាន់បានដាក់នៅឡើយ បន្ទាប់ពីគណបក្សនេះចេញថ្លែងការណ៍ថា នឹងដាក់ពាក្យបណ្តឹងសុំរំលាយគណបក្សសង្គ្រោះជាតិដូចគ្នា ។
យោងតាមពាក្យបណ្តឹងរបស់គណបក្សយុវជនកម្ពុជា បានបញ្ជាក់ថា ការប្តឹងរំលាយគណបក្សសង្គ្រោះជាតិនោះ ព្រោះតែគណបក្សបានប្រព្រឹត្តិអំពើក្បត់ជាតិ ៕
រាជធានីភ្នំពេញ ៖ រដ្ឋបាលរាជធានីភ្នំពេញ គ្រោងសាងសង់ស្ថានីយបូមទឹកមួយកន្លែងទៀត នៅទីតាំងលូប្រាំ តាមផ្លូវវេងស្រេង រួមនឹងការស្តារប្រឡាយមេជាច្រើនខ្សែទៀតក្នុងតំបន់នេះ ដូចជា ប្រឡាយលូប្រាំ ប្រឡាយបារាំង និងប្រឡាយដើមស្លែងជាដើម ដើម្បីរំដោះទឹកនៅក្នុងខណ្ឌចំនួន៣ គឺខណ្ឌមានជ័យ ខណ្ឌសែនសុខ និងខណ្ឌពោធិ៍សែនជ័យ ។
សូមជម្រាបថា ការបង្ហាញពីគម្រោងខាងលើនេះ ត្រូវបានធ្វើឡើងកាលពីល្ងាចថ្ងៃទី២ ខែតុលា ឆ្នាំ២០១៧ ក្នុងកិច្ចប្រជុំបន្ទាន់មួយជាមួយមន្ត្រីជំនាញពាក់ព័ន្ធ និងអាជ្ញាធរខណ្ឌ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានថ្លែងប្រាប់អ្នកសារព័ត៌មានក្រោយកិច្ចប្រជុំនោះថា ក្រោយពីអាជ្ញាធររាជធានី និងមន្ត្រីជំនាញ ចុះធ្វើការត្រួតពិនិត្យពីស្ថានភាពប្រឡាយលូប្រាំ ប្រឡាយបារាំង និងប្រឡាយដើមស្លែង បន្ទាប់ពីលិចលង់ដោយជំនន់ទឹកភ្លៀង លោកអភិបាលរាជធានីភ្នំពេញ បានសម្រេចដាក់គ្រឿងចក្រ ដើម្បីស្តារប្រឡាយមេទាំងនេះ ។ លោកថា គម្រោងការនោះគឺ ដើម្បីជំរុញការងាររំដោះទឹកឲ្យកាន់តែមានប្រសិទ្ធភាព ។
អ្នកនាំពាក្យសាលារាជធានីភ្នំពេញ បានបញ្ជាក់ថា «ក្នុងកិច្ចប្រជុំនេះ លោកអភិបាលក៏បានជំរុញឲ្យមន្ទីរសាធារណការ និងដឹកជញ្ជូនរាជធានីភ្នំពេញ សិក្សាជាកញ្ចប់លើការដោះស្រាយបញ្ហាលិចលង់នេះ ដែលរំពឹងថា ក្រោយការជីក ស្តារប្រឡាយ ទាំង៣ខាងលើ និងក្រោយពីសាងសង់ស្ថានីយ៍បូមទឹកនេះរួចរាល់នឹងអាចរំដោះជំនន់ទឹកភ្លៀងបានល្អប្រសើរ។ ជាគម្រោងត្រូវស្តារបើកមុខប្រឡាយ ដាក់បណ្តាញលូប្រអប់ថ្មី ដែលមានទំហំចាប់ពី២,៥០ម៉ែត្រ ដល់៦ម៉ែត្រ»។
គួរបញ្ជាក់ផងដែរថា រាជធានីភ្នំពេញ បានកសាងស្ថានីយបូមទឹកជាច្រើនកន្លែងហើយ ដើម្បីរំដោះទឹកចេញពីរាជធានីភ្នំពេញ ដូចជា៖ ស្ថានីយបូមទឹកបឹងត្របែក ស្ថានីយបូមទឹក ទួលគោក១ ទួលគោក២ ស្ថានីយបូមទឹកទួលសំពៅ និងស្ថានីយបូមទឹកកប់ស្រូវជាដើម៕
ដាម៉ាស់ ៖ ទីភ្នាក់ងារព័ត៌មានចិន ស៊ីនហួរ ចេញផ្សាយនៅព្រឹកថ្ងៃពុធនេះថា ពលរដ្ឋស្លូតត្រង់យ៉ាងហិចណាស់ចំនួន៤៥នាក់បានស្លាប់ ដោយសារការវាយប្រហារតាមផ្លូវអាកាសរបស់សហរដ្ឋអាមេរិកលើតំបន់គ្រប់គ្រងដោយក្រុមសកម្មប្រយុទ្ធ ISIS នៅទីក្រុង Raqqa ភាគខាងជើងប្រទេសស៊ីរី។
បើតាមសារព័ត៌មានស៊ីរី al-Watan បានរាយការណ៍ថា ក្នុងចំណោមអ្នកដែលបានបាត់បង់ជីវិត នៅក្នុងប្រតិបត្តិការទម្លាក់គ្រាប់ធ្វើឡើងដោយក្រុមចំរុះអន្តរជាតិ ដឹកនាំដោយសហរដ្ឋអាមេរិកមានកុមារ និងស្ត្រីភេទ ខណៈដែលលំនៅឋានចំនួន០២ខ្នង ក្នុងតំបន់ Tawasoiyeh ភាគខាងជើងក្រុង Raqqa ក៏រងការបំផ្លាញផងដែរ៕
បាកដាត ៖ បន្ទាប់ពីការរៀបចំការបោះឆ្នោតប្រកាសប្រជាមតិឯករាជ្យកាលពីខែចុងកញ្ញាកន្លងទៅ រដ្ឋាភិបាលតំបន់ស្វយ័តឃើដអ៊ីរ៉ាក់ គ្រោងនឹងដំណើរការការបោះឆ្នោតជ្រើសរើសប្រធានាធិបតី និងសភាជាតិ នៅថ្ងៃទី០១ ខែវិច្ឆិកាខាងមុខនេះ ខណៈស្ថានភាពនៅក្នុងតំបន់កំពុងឡើងកម្ដៅ។ នេះបើតាមទីភ្នាក់ងារសារព័ត៌មាន Reuters ។
លោក Mohammad Toufic Rahim ដែលជាគូរប្រជែងដ៏សំខាន់របស់ប្រធានាធិបតីឃើដ បច្ចុប្បន្ន លោក Massoud Barzani គឺជាបេក្ខជនតែម្នាក់គត់ដែលគេជឿជាក់ថា នឹងជាប់ឆ្នោតក្លាយជាប្រធានាធិបតីថ្មីរបស់ឃើដ។ ប៉ុន្តែប្រធានាធិបតីតួកគី លោក Tayyip Erdogan បាននិយាយថា ទីក្រុងអង់ការ៉ា អាចនឹងដាក់ទណ្ឌកម្មលើតំបន់ស្វយ័តឃើដ ដោយសារតែការបោះឆ្នោតប្រជាមតិ ដែលលោកគិតថា នឹងបង្កឱ្យមានអស្ថេរភាព និងសង្គ្រាមនៅក្នុងតំបន់។
សូមបញ្ជាក់ថា កាលពីថ្ងៃទី២៥ ខែកញ្ញា ប្រជាជនឃើដ៩០ភាគរយបានបោះឆ្នោតប្រជាមតិគាំទ្រឱ្យតំបន់មួយនេះប្រកាសឯករាជ្យពីអ៊ីរ៉ាក់ និងបង្កើតជារដ្ឋមួយ បើទោះជា មានការព្រមាននឹងជំទាស់ពីអ៊ីរ៉ង់ អ៊ីរ៉ាក់ តួកគី ស៊ីរី និងសហរដ្ឋអាមេរិកក៏ដោយ៕
ខេត្តបាត់ដំបង ៖ ឃាត់ខ្លួនជនសង្ស័យ២នាក់ ករណីអំពើលួចមានស្ថានទម្ងន់ទោស កាលម៉ោង១៧រសៀលថ្ងៃទី១០ខែកញ្ញាឆ្នាំ២០១៧។ លុះម៉ោង២២ថ្ងៃទី៣០ ខែកញ្ញាឆ្នាំ២០១៧បានចុះបង្ក្រាបករណីដាក់ថ្នាំយកម៉ូតូ នៅចំណុចហាងយីហោ ទីក្រុងអាន់ឆឺ២ នៅភូមិវត្តគ សង្កាត់វត្តគ ក្រុងបាត់ដំបង ដោយឃាត់ខ្លួនជនសង្ស័យ២នាក់។
ជនសង្ស័យឃាត់ខ្លួនទី១ឈ្មោះស៊ឹម ចាន់ថនហៅឥណ្ឌា ភេទប្រុស អាយុ៣៥ឆ្នាំរស់នៅភូមិសត្វពង ឃុំឈូក ស្រុកឈូក ខេត្តកំពត។ ទី២ឈ្មោះងួន វណ្ណដាហៅដា ភេទប្រុស អាយុ២៩ឆ្នាំ រស់នៅភូមិក្រសាំង ឃុំឈូក ស្រុកឈូក ខេត្តកំពត។ ជនសង្ស័យទាំង២នាក់បានសារភាពថា ខ្លួនពិតជាបានដាក់ថ្នាំយកម៉ូតូមែន ហលយម៉ូតូនោះ ខ្លួនឲ្យឈ្មោះគឹម សេងដុសហៅពោយ ភេទប្រុស អាយុ២៧ឆ្នាំ រស់នៅភូមិក្រសាំង ឃុំឈូក ស្រុកឈូក ខេត្តកំពត យកទៅឲ្យអ្នកទទួលទិញ នៅឯខេត្តកំពត។ក្រោយទទួលចម្លើយក្រុមបង្កបង្ក្រាបនិងក្រុមជំនាញការិយាល័យព្រហ្មទ័ណ្ឌកំរិតស្រាលនៃស្នងការដ្ឋាននគរបាលខេត្តបាត់ដំបងបានកំណត់មុខសញ្ញា អ្នកទទួលផលចោរកម្ម(អ្នកទិញម៉ូតូ)។
ដោយមានការអនុញ្ញាតិពីឯកឧត្តមស្នងការ ក្រុមបង្កបង្ក្រាបនិងក្រុមជំនាញការិយាល័យព្រហ្មទ័ណ្ឌកំរិតស្រាល បានឌ្វើដំណើរទៅខេត្តកំពតដើម្បីសហការជាមួយនគរបាលខេត្តកំពត។នៅម៉ោង៦និង៣០នាទីព្រឹកថ្ងៃទី២ ខែតុលា ឆ្នាំ២០១៧សមត្ថកិច្ចបានបង្ក្រាបក្រុមទទួលផលចោរកម្មចំនួន៣នាក់ នៅភូមិចំប៉ី ឃុំចំប៉ី ស្រុកអង្គរជ័យ ខេត្តកំពត។ បុរសសង្ស័យទី១ឈ្មោះឃិន ណី ។ទី២ឈ្មោះម៉មហ៊ីន។ ទី៣ឈ្មោះហ៊ី គឹមហៃ ។លុះម៉ោង១១ថ្ងៃត្រង់ ថ្ងៃទី២ ខែតុលា ឆ្នាំ២០១៧សមត្ថកិច្ចបានធ្វើដំណើរទៅឃាត់ខ្លួន ជនសង្ស័យ២នាកើទៀតទី១ឈ្មោះគឹម សេងដុសហៅពោយ ភេទប្រុស អាយុ២៧ឆ្នាំ រស់នៅភូមិក្រសាំង ឃុំឈូក ស្រុកឈូក ខេត្តកំពត។ទី២ឈ្មោះនិន ម៉ាំងភេទប្រុស រស់នៅភូមិក្រសាំង ឃុំឈូក ស្រុកឈូក ខេត្តកំពត។ដកហូតម៉ូតូចំនួន៤គ្រឿងនិងស្លាកលេខចំនួន៦ផ្ទាំងនិងសម្ភារ:មួយចំនួនទៀត។
ក្រុមជនសង្ស័យក្រោយសាកសួរនៅស្នងការដ្ឋាននគរបាលខេត្តបាយ់ដំបង នៅវេលាម៉ោង៣រសៀលថ្ងៃទី៣ ខែតុលា ឆ្នាំ២០១៧ សមត្ថកិច្ចបានកសាងសំណុំរឿងបញ្ជូនទៅកាន់តុលាការខេត្តបាត់ដំបងចាត់ការតាមនិតិវិធី៕
ភ្នំពេញ ៖ បុរសវ័យចំណាស់ម្នាក់បានចុះទៅដាក់ម៉ងក្នុងទឹកប្រឡាយមួយកន្លែងរអិលជើងបណ្តាលអោយលង់ទឹកស្លាប់ហេតុការណ៍ភ្ញាក់ផ្អើលនេះកើតឡើងកាលពីវេលាម៉ោង៣ និង២៥នាទីថ្ងៃទី៣ ខែតុលាឆ្នាំ២០១៧ ស្ថិតនៅភូមិប្រទះឡាង សង្កាត់ប្រទះឡាង ខណ្ឌដង្កោ រាជធានីភ្នំពេញ។ ជនរងគ្រោះមានឈ្មោះ ពេច សឿន ភេទប្រុស អាយុ៥៥ឆ្នាំ ស្នាក់នៅម្តុំកន្លែងកើតហេតុខាងលើ មុខរបរជាកសិករមានប្រពន្ធ និងកូនស្រី១នៅក្នុងបន្ទុក។
តាមសាក្សីដែលជាអ្នកាដាក់ម៉ងដូចគ្នាបានប្រាប់អោយដឹងថា មុនពេលកើតហតុដោយបុរស់ខាងលើបានហូបស្រាលុះដល់ម៉ោងមកដាក់ម៉ងបានមកដាក់នៅក្នុងទឹកបឹងប្រឡាយស្រាប់តែមួយសន្ទុះក្រោយស្រាប់តែបាត់គាត់មិនឃើញបាននាំគ្នាផ្អើលឆោឡោឡើងហើយបាននាំគ្នាចុះទៅជួយរកដែរតែដោយសារទឹកខាងលើជ្រៅពេកក៏បានហៅអ្នកជិតខាងអោយមកជួយក៏មានការភ្ញាក់ផ្អើលដឹងដល់ប្រពន្ធគាត់បាននាំគ្នាមកជួយមុជទឹករកឃើញដោយបុរស់ខាងលើបានស្លាប់បាត់ហើយ។
តាមប្រភពដដែលបានអោយដឹងទៀតថាបុរស់ដែលលង់ទឹកស្លាប់នោះគឺដោយសារតែគាត់ដើររាយម៉ងគឺជើងគាត់ជំពាក់ជាមួយនិងម៉ងហយរុំជើងទើបធ្វើអោយគាត់រអិលជើងចូលទៅក្នុងទឹកជ្រៅបណ្តា់អោយលង់ស្លាប់ចោលប្រពន្ធនិងកូន។
ក្រោយពីសម្ថតកិច្ចចក្ខុរបស់ខណ្ឌដង្កោពិនិត្យរួចហើយថាបុរស់នោះពិតជាលង់ទឹកស្លាប់ហើយបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
