ភ្នំពេញ ៖ នាយករដ្ឋមន្ត្រីនៃសាធារណរដ្ឋប្រជាមានិតចិន បានសន្យាថា រដ្ឋាភិបាលចិន នឹងជួយឱ្យអស់លទ្ធភាព ដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះនៅកម្ពុជា ឱ្យបានឆាប់រហ័ស ។
នៅក្នុងជំនួបទ្វេភាគី រវាងសម្តេចនាយករដ្ឋមន្ត្រីកម្ពុជា ជាមួយ លោក លី កឺជាំង នាយករដ្ឋមន្ត្រីនៃសាធារណរដ្ឋប្រជាមានិតចិន កាលពីល្ងាចថ្ងៃទី១៣ ខែវិច្ឆិកា នៅក្នុងទីក្រុងម៉ានីល សាធារណរដ្ឋហ្វីលីពីន ភាគីទាំងពីរ បានជំរុញកិច្ចការ ដោះមីន និងយុទ្ធភ័ណ្ឌមិនទាន់ផ្ទុះនៅកម្ពុជា ដែលបានបន្សល់ទុកពីសង្គ្រាមរាំរ៉ៃនៅកម្ពុជារាប់ទស្សវត្សកន្លងមកហើយ។ លោក លី កឺជាំង បានបញ្ជាក់ថា ការដោះមីន និងយុទ្ធភ័ណ្ឌមិនទាន់ផ្ទុះជាសកម្មភាពអទិភាពមួយរបស់រដ្ឋាភិបាលចិន ក្នុងការជួយប្រទេសនានា ដែលកំពុងជួបប្រទះនូវបញ្ហានេះ។ ក្នុងបរិការនេះ រដ្ឋាភិបាលចិនសន្យាថា នឹងជួយឱ្យអស់លទ្ធភាព ដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះឱ្យបានឆាប់រហ័ស និងស្នើឱ្យស្ថាប័នពាក់ព័ន្ធនៃប្រទេសទាំងពីរធ្វើការពិភាក្សាលើទិដ្ឋភាពជាក់ស្តែង និងដាក់ជូនថ្នាក់ដឹកនាំទាំងពីរពិនិត្យ និងសម្រេច។ ជារួមគឺត្រូវធ្វើអោយបានមុនពេលដំណើរទស្សនកិច្ចផ្លូវការរបស់លោកនាយករដ្ឋមន្ត្រីចិននៅកម្ពុជានាពេលខាងមុខនេះ។ ទន្ទឹមនេះ លោក លី កឺជាំង បានបញ្ជាក់សាជាថ្មីថា នឹងការគាំទ្រ ដល់កម្ពុជា ក្នុងការថែរក្សាសុខសន្តិភាព, ស្ថិរភាព និងការអភិវឌ្ឍរបស់កម្ពុជា។ លោកនាយករដ្ឋមន្ត្រីចិន បានបញ្ជាក់បន្ថែមផងដែរ នូវការប្តេជ្ញារួមគ្នា ក្នុងការជំរុញទំនាក់ទំនងរវាងប្រទេសទាំងពីរឱ្យដល់កម្រិតខ្ពស់មួយថែមទៀត។ ក្នុងន័យនេះ ភាគីចិនបានសន្យាថានឹងខិតខំប្រឹងប្រែងឱ្យអស់ពីសមត្ថភាព ក្នុងការជួយជំរុញឱ្យការកសាងគម្រោងផ្លូវល្បឿនលឿនភ្នំពេញ-ក្រុងព្រះសីហនុ ដែលជាផ្លូវសេដ្ឋកិច្ចដ៏សំខាន់មួយរបស់កម្ពុជា អោយបានសម្រចទៅយ៉ាងឆាប់រហ័ស ដើម្បីចូលរួមវិភាគទានជំរុញកំណើនសេដ្ឋកិច្ច និងលើកតម្កើងជីវភាពរស់នៅរបស់ប្រជាជនកម្ពុជា។ នៅក្នុងជំនួបពិភាក្សាការងារនេះដែរ នាយករដ្ឋមន្ត្រីកម្ពុជា ក៏បានអញ្ជើញលោកនាយករដ្ឋមន្ត្រី លី កឺជាំង ចូលរួមក្នុងកិច្ចប្រជុំកំពូលមេគង្គ-ឡានឆាងលើកទី ២ នៅ ដែលនឹងរៀបចំធ្វើនៅរាជធានីភ្នំពេញ នាខែ មករា ឆ្នាំ ២០១៨ ខាងមុខនេះផងដែរ៕
ភ្នំពេញ ៖ រោងចក្រកាត់ដេរសម្លៀកបំពាក់ម៉ាកាឡូត ហ្គាមិន ខូអិលធីឌី ស្ថិតក្នុងសួនឧស្សាហកម្មវឌ្ឍនអគារអូ ស្ថិតនៅតាមផ្លូវវេងស្រេង ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ត្រូវបានភ្លើងឆេះអស់ទាំងស្រុង នៅព្រឹកព្រលឹងថ្ងៃទី១៤ វិច្ឆិកា នេះ តែមិនទាន់បញ្ជាក់ពីមូលហេតុពិត រហូតដល់អគ្គីភ័យនៅឡើយទេ។
អគ្គីភ័យបានលេបត្របាក់អគាររោងចក្រកាត់ដេរសំលៀកបំពាក់ ម៉ាកាឡូត ហ្គាមិន ខូអិលធីឌីទាំងស្រុង និងបានបំផ្លាញសម្ភារៈរោងចក្រជាច្រើនក្នុងរោងចក្រតាំងពីម៉ោង ៤ និង៣០នាទីព្រឹករហូតដល់ម៉ោង ៨ និង ៣០នាទីព្រឹកថ្ងៃទី ១៤ វិច្ឆិការនេះ ពោលភ្នាក់ងារពន្លត់អគ្គីភ័យបានប្រើពេលរហូតដល់ជាង ៤ម៉ោង ដើម្បីពន្លត់អគ្គីភ័នេះ។ រោងចក្រដែលឆាបឆេះ មានទំហំប្រមាណ៤៨ម៉ែត្រគុណ១២០ម៉ែត្រ មានចំនួន២ អគារជាប់គ្នាមានកម្មករបម្រើការងារជាង១០០០នាក់ធ្វើការ ។ ទោះយ៉ាងណា មូលហេតុពិតប្រាកដនៅមិនទាន់ដឹងនៅឡើយទេ ខណៈពេលនេះក្រុមជំនាញ កំពុងធ្វើការពិនិត្យរកមូលហេតុ។
បើតាមសន្តិសុខយាមនៅកន្លែងកើតហេតុបានឲ្យដឹងថា មុនពេលកើតហេតុពួកគាត់កំពុងតែយាមល្បាត សុខៗស្រាប់តែបានលឺសំលេងផ្ទុះចេញពីបរិវេណខាងក្រោយរោងចក្រ ដោយសារតែលឺសំលេងផ្ទុះខ្លាំង ហើយពួកគាត់ជាសន្តិសុខបានរត់ទៅមើលឃើញមានអណ្តាតភ្លើងឆេះចេញយ៉ាងសន្ធោសន្ធៅទៅហើយ ហើយពួកគាត់បានរត់ទៅយកបំពង់ពន្លត់អគ្គិភ័យមកបាញ់ពន្លត់អស់ជាច្រើន តែភ្លើងមិនរលត់កាន់តែឆេះខ្លាំងទៅៗ ។ ពួកគាត់បានផ្តល់ដំណឹងនេះទៅប្រាប់សមត្ថកិច្ចមូលដ្ឋាន និងរថយន្តពន្លត់អគ្គិភ័យបានមកជួយអន្តរាគមន៍បាញ់ពន្លត់អស់ជាច្រើនគ្រឿង។
ប៉ុន្តែបើតាមលោក យឹម សារ៉ាន់ អធិការដ្ឋានបានដឹងថា នៅពេលល្ងាចមុនថ្ងៃកើតហេតុ មានជាងដែកមកផ្សាជួសជុលដំបូល ហើយនៅវេលាម៉ោង៤ទៀបភ្លឺស្រាប់តែផ្កាភ្លើងដែលជាងដែកផ្សាបានធ្លាក់កម្ទេចធ្លាក់មក លើកម្ទេចក្រណាត់ធ្វើឲ្យឆាបឆេះម្តងរួចមកហើយ តែបានពន្លត់រលត់ទៅវិញ ។ រោងចក្របានបិទ ទ្វារស្រាប់តែវេលាទាបភ្លឺនេះក៍កើតអគ្គិភ័យតែម្តង។
ក្រោយប្រតិបត្តិរយៈពេលបួនម៉ោង គឺចាប់ពីម៉ោង ៤ និង៣០នាទីរហូតដល់ម៉ោង ៨និង៣០នាទីទើបភ្នាក់ងារពន្លត់អគ្គិភ័យគ្រប់គ្រងស្ថានការណ៍បានទាំងស្រុង ប៉ុន្តែសមត្ថកិច្ចនៅតែបន្តបាញ់ទឹកពន្លត់រហូតដល់ម៉ោង ១០ព្រឹក។ នគរបាល បានប្រើប្រាស់រថយន្តពន្លត់អគ្គីភ័យចំនួន៣២គ្រឿង និងបានបាញ់ទឹកពន្លត់អស់ ១៣៤គ្រឿង ក្នុងនោះរថយន្តរបស់នគរបាលក្រុង ២០គ្រឿង រថយន្តរបស់ ង ៧០ ចំនួន៥គ្រឿង រថយន្តរបស់ក្រុងរណបចំនួន៤គ្រឿង រថយន្តរបស់ស្របៀរកម្ពុជា ចំនួន១គ្រឿង និងរថយន្តរបស់កាណឌីយ៉ាចំនួន២គ្រឿង។គេនៅមិនទាន់ដឹងពីទំហំនៃការខូចខាតនៃអគ្គីភ័យនៅឡើយទេ៕
បាត់ដំបង ៖ កម្លាំងអន្តរាគមន៍ប្រឆាំងបទល្មើសនៃស្នងការដ្ឋាននគរបាលខេត្តបាត់ដំបងបានចុះប្រតិបត្តិការបង្ក្រាបទីតាំងល្បែងស៊ីសងអាប៉ោងខុសច្បាប់ចំនួន១កន្លែងដកហូតមេអាប៉ោង២គ្រាប់ឃាត់ខ្លួនមនុស្ស៧នាក់។
លោកវរសេនីយ៍ទោ សុខ និមល នាយការិយាល័យប្រឆាំងបទល្មើសនៃស្នងការដ្ឋាននគរបាលខេត្តបាត់ដំបងបានប្រាប់អោយដឹងថា៖ដោយមានការចង្អុលបង្ហាញពីលោកឧត្តមសេនីយ៍ទោ អ៊ុច សុខុន ស្នងការនគរបាលខេត្តក៏ដូចជាលោកវរសេនីយ៍ឯក កុយ ហៀង ស្នងការរង ទទួលផែននគរបាលប្រឆាំងបទល្មើសបានដាក់បទបញ្ជារយ៉ាងម៉ឺងម៉ាត់ក្នុងការទប់ស្កាត់បង្ក្រាបអោយបានរាល់បទល្មើសនិងល្បែងស៊ីសងខុសច្បាប់គ្រប់ប្រភេទ
ជាលទ្ធផលជាក់ស្ដែងនៅវេលាម៉ោង១១-០០នាទីថ្ងៃទី១៤ខែវិច្ឆិកា ឆ្នាំ២០១៧នេះ លោកបានដឹកនាំកម្លាំងចុះទៅលើទីតាំងនៅត្រង់ចំណុចភូមិអន្លង់វិល ឃុំអន្លង់វិល ស្រុកសង្កែដោយបានប្រតិបត្តិការបង្ក្រាបនូវល្បែងស៊ីសងអាប៉ោង ចំនួន១កន្លែង។
លោកបន្តថា៖នៅក្នុងកិច្ចប្រតិបត្តិការជាក់ស្ដែងសមត្ថកិច្ចជំនាញបានឃាត់ខ្លួនក្រុមអ្នកលេងល្បែងស៊ីសងចំនួន៧នាក់រួមនិងវត្ថុតាងរួមមាន៖ គ្រាប់អាប៉ោងចំនួន២គ្រាប់ -ចានអាប៉ោងចំនួន១ឈុត-កំរាលចាក់អាប៉ោងចំនួន១ផ្ទាំង-ប្រាក់មួយចំនួនរួមនិងសម្ភារៈប្រើប្រាស់សំរាប់លេងមួយចំនួនទៀត។
បច្ចុប្បន្នក្រុមអ្នកលេងទាំង៧នាក់រួមនិងវត្ថុតាងដកហូតបានត្រូវសមត្ថកិច្ចបញ្ជូនយកទៅការិយាល័យជំនាញនៃស្នងការដ្ឋាននគរបាលខេត្តបាត់ដំបងដើម្បីចាត់ការតាមនីតិវិធី៕
ខេត្តកំពង់ធំ ៖ កាលពីម្សិលមិញសមត្ថកិច្ចនគរបាលខេត្តកំពង់ធំ បានបង្ក្រាបរថយន្តដឹកឈើប្រណីត១គ្រឿង នៅចំណុចភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ហើយរកឃើញឈើប្រភេទធ្នង់ប្រមាណ៦២ដុំ ។
រថយន្តដឹកឈើខុសច្បាប់ជាប្រភេទរថយន្តសាំងយ៉ុង ពណ៌ស ស្លាកលេខ សៀមរាប2A-4506 ។ ចំណែកអ្នកបើកបរបានរត់គេចខ្លួនភ្លាមៗ បន្ទាប់ពីសមត្ថកិច្ចចុះទៅដល់ចំណុចខាងលើ ៕
រាជធានីភ្នំពេញ ៖ ថ្លែងនៅក្នុងសន្និសិទកាសែតព្រឹកថ្ងៃទី១៤ ខែវិច្ឆិកា ឆ្នាំ២០១៧នេះ អ្នកនាំពាក្យគណបក្ស ហ្ទ៊ុនស៊ិនប៉ិច បានអះអាងថា គណបក្សបានដាក់ពាក្យបណ្ដឹងទី២ ប្ដឹងលោក លឺ ឡាយស្រេង ពីបទចោទប្រកាន់ សម្ដេចក្រុមព្រះនរោត្តម រណឫទ្ធិ ថាបានទទួលសំណូក ចំនួន១០ម៉ឺនដុល្លារ ក្នុងការផ្ដល់តំណែងជាអភិបាលខេត្ត ដល់មន្ត្រីម្នាក់ គណបក្សហ្វ៊ុនស៊ិនប៉ិច នាអំឡុងឆ្នាំ១៩៩៣កន្លងទៅ ។
លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច បានចាត់ទុកសម្តីលោក លឺ ឡាយស្រេង ដែលបានផ្តល់បទសម្ភាសន៍ក្នុងវិទ្យុអាស៊ីសេរីនាពេលថ្មីៗនេះ ដោយចោទសម្តេចក្រុមព្រះថា បានទទួលសំណូកជាថ្នូរនឹងការប្រគល់តំណែងនោះ គឺជាការប្រមាថ និងបរិយាកេរ្តិ៍ធ្វើឲ្យប៉ះពាល់ដល់ព្រះកិត្តិយសរបស់ព្រះប្រធានគណបក្សហ្វ៊ុនស៊ិនប៉ិច ។
គួរម្លឹកថា មេធាវីការពារក្តីសម្តេចក្រុមព្រះ នរោត្តម រណឫទ្ធិ ព្រះប្រធាន គណបក្សហ្វ៊ុនស៊ិនប៉ិច ធ្លាប់បានដាក់ពាក្យបណ្តឹងម្តងរួចហើយ ទៅកាន់សាលាដំបូងរាជធានីភ្នំពេញ ដើម្បីប្ដឹងលោក លឺឡាយស្រេង ពីបទប្រមាថព្រះចេស្តា ព្រះមហាក្សត្រ និងសម្តេចក្រុមព្រះ៕
រាជធានីភ្នំពេញ ៖ កាលពីម្សិលមិញកម្លាំងនគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ សហការជាមួយកម្លាំងសមត្ថកិច្ចមូលដ្ឋានបានចុះបង្ក្រាបហាងស្តុក និងចែកចាយសាប៊ូក្លែងបន្លំពាណិជ្ជសញ្ញា (ម៉ាក) និងគ្មានច្បាប់អនុញ្ញា (រំលោភច្បាប់កម្មសិទ្ធិបញ្ញា) ជាង១១តោន នៅផ្ទះលេខ ០៩Eo ផ្លូវលំ ភូមិទ្រា សង្កាត់ស្ទឹងមានជ័យ១ ខណ្ឌមានជ័យ។
តាមសមត្ថកិច្ចបានឲ្យដឹងថា ម្ចាស់ហាងល្មើសច្បាប់ខាងលើនេះ មានឈ្មោះ តៅ ប្រសិទ្ធ អាយុ៣៨ឆ្នាំ ប៉ុន្តែក្នុងពេលចុះឆែកឆេរនោះ ម្ចាស់ហាងមិននៅនោះទេ នៅតែអ្នកមើលការខុសត្រូវម្នាក់ឈ្មោះ ញឹម ស៊ីណា។ សមត្ថកិច្ចបន្តថា ក្រោយការឆែកឆេរជាក់ស្តែងរួចមក កម្លាំងសមត្ថកិច្ចចម្រុះបានរកឃើញវត្ថុតាងជាច្រើន រួមមាន៖ សាប៊ូក្លែងបន្លំម៉ាក Viera និងម៉ាក Lavita ចំនួន១៣កេះ តាមពាក្យបណ្តឹងរបស់ក្រុមហ៊ុន ពេជ្រ ប៊ី ធី ហើយថែមទាំងរកឃើញសាប៊ូជាង ១០មុខទៀត ដែលសង្ស័យថា គ្មានច្បាប់អនុញ្ញាតជិត ៨០០កេះទៀត ស្មើនឹងជាង ១០តោន សរុបផលិតផលខុសច្បាប់ទាំងអស់មានជាង ១១តោន។
ចំពោះវត្ថុតាងទាំងអស់ លោកព្រះរាជអាជ្ញារងបានសម្រេចឲ្យកម្លាំងសមត្ថកិច្ចដកហូតសាប៊ូក្លែងបន្លំម៉ាក Viera និង Lavita ចំនួន១៣កេះ យកទៅរក្សាទុកជាបណ្តោះអាសន្ន នៅនាយកដ្ឋាននគរបាលប្រឆាំងបទល្មើសសេដ្ឋកិច្ច និងក្រៅពីនោះ កម្លាំងសមត្ថកិច្ចបានវិចខ្ចប់ទុកដាក់ក្នុងហាងខាងលើ រង់ចាំម្ចាស់ចូលខ្លួនដោះស្រាយ៕
រាជធានីភ្នំពេញ ៖ សេចក្តីរាយការណ៍បានឲ្យដឹងថា ខណៈនេះមានគ្រោះអគ្គិភ័យបាននិងកំពុងឆាបឆេះរោងចក្រកាត់ដេរសម្លៀកបំពាក់ដ៏ធំមួយកន្លែង ឈ្មោះ ម៉ាកាឡូត ហ្គាមេន ដែលមានទីតាំងស្ថិតក្នុង សួនឧស្សាហកម្មវឌ្ឍនៈ ភូមិត្រពាំថ្លឹង សង្កាត់ចោមចៅ ខណ្ឌពោធិ៍សែនជ័យ។
បើតាមសេចក្តីរាយការណ៍ករណីឆេះរោងចក្រនេះ កើតឡើងតាំងពីម៉ោងប្រមាណ៤ជាងទៀបភ្លឺ យប់រំលងអធ្រាត្រឈានចូលថ្ងៃទី១៤ ខែវិច្ឆិកា ឆ្នាំ២០១៧ រហូតមកដល់ម៉ោង៧ព្រឹក អគ្គិភ័យនេះមិនទាន់រលត់នៅឡើយទេ ខណៈការខូចខាតរោងចក្រស្ទើរទាំងស្រុងទៅហើយ។
ជាមួយគ្នានេះ គេឃើញរថយន្តពន្លត់អគ្គិភ័យ របស់សមត្ថកិច្ចពន្លត់អគ្គិភ័យចំនួន២៥គ្រឿង ធ្វើប្រតិបត្តិការបាញ់ទឹកពន្លត់ ហើយចំពោះមូលហេតុនៃការឆាបឆេះនេះ នៅមិនទាន់មានការបញ្ជាក់នៅឡើយទេ៕
តេហេរ៉ង់ ៖ មនុស្សស្លាប់កើនដល់៤០២នាក់ហើយ ខណៈមនុស្សជាង៦,៦៥០នាក់ទៀតរងរបួស គិតចាប់តាំងពីថ្ងៃអាទិត្យក្រោយគ្រោះរញ្ជួយដីកម្រិត ៧.៣រ៉ិចទ័រ ដ៏កក្រើកមួយបានវាយប្រហារចំតំបន់ព្រំដែនរវាងអ៊ីរ៉ាក់ និងអ៊ីរ៉ង់។ នេះបើតាមការចេញផ្សាយដោយសារព័ត៌មាន CNN។
យោងតាមប្រព័ន្ធផ្សព្វផ្សាយក្នុងប្រទេសអ៊ីរ៉ង់ ចំណុចរំញ័រនៃហេតុការណ៍រញ្ជួយផែនដីខាងលើ បានកើតឡើងនៅចម្ងាយប្រមាណ ១០៣គីឡូម៉ែត្រ ភាគអាគ្នេយ៍ទីក្រុង Sulaymaniyah នៃប្រទេសអ៊ីរ៉ាក់ និងជះឥទ្ធិពលយ៉ាងកក្រើកដល់ខេត្តចំនួន ១៤ ឯណោះរបស់អ៊ីរ៉ង់ ដែលនៅជាប់ព្រំដែនជាមួយអ៊ីរ៉ាក់។ អាជ្ញាធរអ៊ីរ៉ង់បានបញ្ជាក់ឲ្យដឹងថា សម្រាប់មនុស្សស្លាប់ និងរបួសទាំងជិត ៦,៦៥០នាក់ ខាងលើនេះ គឺភាគច្រើនបំផុត ស្ថិតនៅក្នុងប្រទេសអ៊ីរ៉ង់តែម្តង ខណៈនៅអ៊ីរ៉ាក់គឺមនុស្សស្លាប់មានចំនួន ០៨នាក់ និងរងរបួស ប្រមាណជាង ២០០នាក់។ ក្រៅពីមនុស្សបាត់បង់ជីវិត អគារជាច្រើនខ្នង ក៏បានទទួលរងការបំផ្លិចបំផ្លាញក៏ដូចជាដួលរលំផងដែរ។
សូមបញ្ជាក់ថា កាលពីឆ្នាំ២០០៣ តំបន់ទីក្រុងបុរាណ Bam ដែលស្ថិតនៅក្បែរតំបន់រងគ្រោះពេលនេះ ធ្លាប់រងគ្រោះរញ្ជួយដីដ៏សាហាវ ផ្តាច់ជីវិតមនុស្សដល់ទៅ ២៦,០០០នាក់ នៅក្នុងប្រទេសអ៊ីរ៉ង់ និងកាលពីខែសីហា ឆ្នាំ២០១២ គ្រោះរញ្ជួយដីបានកើតមាននៅខេត្តភាពខាងកើតប្រទេស អាហ្សែបៃហ្សង់ ស្លាប់មនុស្សជាង ៣០០នាក់៕
រាជធានីភ្នំពេញ ៖ លោក ឡេង ប៉េងឡុង អ្នកនាំពាក្យរដ្ឋសភាបានបញ្ជាក់ប្រាប់អ្នកសារព័ត៌មានកាលពីព្រឹកមិញថា តំណាងរាស្ត្រ CNRP នឹងបាត់បង់ប្រាក់ខែ ដោយស្វ័យប្រវត្តិថា ប្រសិនបើគណបក្សសង្គ្រោះជាតិ ត្រូវរំលាយនោះ។ ទន្ទឹមនោះប្រាក់ខែរបស់ជំនួយការ និងទីប្រឹក្សាក៏ត្រូវកាត់ផ្តាចដែរ៕
រាជធានីភ្នំពេញ ៖ ក្រុមមេធាវីតំណាងក្រសួងមហាផ្ទៃ នារសៀលនេះ នឹងដាក់ភស្តុតាងសំខាន់ៗ ចំនួន៣បន្ថែមទៀត ក្នុងនោះក៏មានបញ្ជីឈ្មោះថ្នាក់ដឹកនាំបក្សប្រឆាំងដែលត្រូវហាមឃាត់ធ្វើនយោបាយរយះពេល៥ឆ្នាំ ជូនទៅតុលាការកំពូលនឹងជំនុំជម្រះបណ្ដឹងសុំរំលាយគណបក្សសង្គ្រោះជាតិ ។
តាមគម្រោងតុលាការកំពូល នឹងបើកសវនាការ ទាក់ទងបណ្តឹងសុំរំលាយណបក្សសង្គ្រោះជាតិ នៅថ្ងៃទី១៦ ខែវិច្ឆិកា ខាងមុខនេះ ។ តាមការកត់សម្គាល់គណបក្សសង្គ្រោះជាតិ មិនគ្រាន់តែប្រឈមការរំលាយនោះទេ ប៉ុន្តែថ្នាក់ដឹកនាំគណបក្សនេះប្រមាណជាង១០០នាក់ នឹងត្រូវប្រឈមមុខការហាមឃាត់មិនឲ្យធ្វើនយោបាយរយះពេល៥ឆ្នាំផងដែរ ៕
រាជធានីភ្នំពេញ ៖ លោក ហេង ធារ៉ា ដែលគេស្គាល់ថា ជាប្រធានក្រុមសិល្បៈនៃគណបក្សសង្គ្រោះជាតិ បានប្រកាសលាលែងចេញពីគណបក្សសង្គ្រោះជាតិ ហើយសុំចូលរួមជីវភាពនយោបាយ ជាមួយគណបក្សប្រជាជនកម្ពុជា ។
លោក ហេង ធារ៉ា តាមរយះលិខិតផ្ទាល់ខ្លួនបានសរសេរថា ខ្ញុំបាទមិននឹកស្មានថា ការតស៊ូដណ្តើមអំណាច តាមរយៈការបោះឆ្នោត និងលទ្ធិប្រជាធិបតេយ្យពិតប្រាកដ។ ប៉ុន្តែក្រោយមកនេះ ខ្ញុំបាទបានឃើញសកម្មភាពជាក់ស្តែង ញុះញង់ ការបំបែកបំបាក់ខ្មែរជាពីរ ដោយលោក កឹម សុខា និងគណបក្សសង្គ្រោះជាតិ សុខចិត្តអោនក្បាលបំរើបរទេស ដើម្បីអំណាច មិនគិតពីភាពមហន្តរាយរបស់ជាតិមាតុភូមិ នេះហើយជាអំពើក្បត់ជាតិ ។
លោក ហេង ធារ៉ា បានបន្តថា លោកបានមើលឃើញថា មានតែគណបក្សប្រជាជនកម្ពុជាតែមួយប៉ុណ្ណោះ ដែលមានការអភិវឌ្ឍន៍ក្នុងប្រទេស និងជឿលឿនលើគ្រប់វិស័យ ។ លោក សូមប្រកាសគាំទ្រគោលនយោបាយរបស់គណបក្សប្រជាជនកម្ពុជាគ្រប់កាលៈទេសៈ ៕
តេហេរ៉ង់ ៖ សារព័ត៌មានរុស្ស៊ី Russia Today (RT) ចេញផ្សាយនៅព្រឹកនេះថា មនុស្សយ៉ាងតិច១៤១នាក់បាត់បង់ជីវិត និងដល់ទៅជាង១,០០០នាក់បាត់បង់ជីវិត បន្ទាប់ពីគ្រោះរញ្ជួយដីកម្រិត៧.៣រ៉ិចទ័រដ៏កក្រើកមួយ បានវាយប្រហារចំតំបន់ព្រំដែនរវាងអ៊ីរ៉ាក់-អ៊ីរ៉ង់ គិតចាប់តាំងពីថ្ងៃអាទិត្យម្សិលមិញ (តំបន់ក្នុងតំបន់រងការវាយប្រហារ)៕
ឥណ្ឌា ៖ ប្រជាពលរដ្ឋនៅទីក្រុងញូវដែលីប្រទេសឥណ្ឌាបានព្យាយាមដោះស្រាយនឹងកម្រិតនៃការបំពុលបរិយាកាសដ៏គ្រោះថ្នាក់កាលពីថ្ងៃអាទិត្យ ខណៈទីក្រុងនេះកំពុងគ្របដណ្ដប់ដោយផ្សែងអ័ព្ទយ៉ាងខ្លាំង។
សន្ទស្សន៍គុណភាពខ្យល់ (AQI) ដែលជារង្វាស់កំហាប់ជាតិពុលនៅលើអាកាសបានកើនដល់៦១៤កាលពីថ្ងៃអាទិត្យ ហើយតាមធម្មតាកម្រិតគុណភាពខ្យល់ជាអតិបរមាមានចំនួន៥០០ តែបើលើសពីកម្រិតនេះត្រូវបានចាត់ទុកថា ជាសញ្ញាមួយធ្វើឲ្យប៉ះពាល់ដល់សុខភាពដោយការបំពុលបរិយាកាស។
ប្រជាពលរដ្ឋថ្មើរជើង អ្នករត់ និងអ្នកជិះកង់ហាត់ប្រាណបាននាំគ្នាត្អូញត្អែរពីផលលំបាកនៃការដកដង្ហើមដោយសារការបំពុលបរិស្ថាននេះ។
ទីលានឥណ្ឌាហ្គេត (India Gate) ដែលជាកន្លែងគោរពវិញ្ញាណក្ខន្ធ និងកន្លែងមួយចំនួនទៀតចាប់ពីវិមានប្រធានាធិបតីរហូតដល់កន្លែងវីចាយចូក (Vijay Chowk) ត្រូវបានគ្របដណ្ដប់ដោយផ្សែងអ័ព្ទពុល និងផ្សែងហុយចេញពីកន្លែងដុតដំណាំនៅតាមរដ្ឋធ្វើកសិកម្មមួយចំនួន និងការបំភាយផ្សែងពីយានយន្ត៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
