អ៊ីរ៉ាក់ ៖ ក្រុមមន្ត្រីនៅប្រទេសអ៊ីរ៉ាក់បាននិយាយថា រណ្ដៅកប់សាកសពមួយចំនួនដែលត្រូវបានរកឃើញនៅតំបន់មួយដែលទើបដណ្ដើមបានពីក្រុមរដ្ឋអ៊ីស្លាមនោះអាចមានសាកសពរហូតដល់ចំនួន៤០០នាក់។
អភិបាលខេត្តគើគូក (Kirkuk) បាននិយាយពីថ្ងៃអាទិត្យថា សាកសពជនស៊ីវិលនិងកងសន្តិសុខទាំងនេះត្រូវបានរកឃើញនៅមូលដ្ឋានដែលគេបោះបង់ចោលមួយកន្លែងនៅជិតទីក្រុងហាវីចានៅភាគខាងជើងប្រទេសអ៊ីរ៉ាក់ដែលគេទើបដណ្ដើមបានពីក្រុមរដ្ឋអ៊ីស្លាមកាលពីខែតុលា។
ប្រជាពលរដ្ឋម្នាក់បាននិយាយថា ក្រុមរដ្ឋអ៊ីស្លាមធ្លាប់បាននាំចំណាប់ខ្មាំងទៅកន្លែងនេះហើយបាញ់ប្រហារឬចាក់សាំងដុតពួកគេទាំងរស់ ហើយគេបានឃើញអ្វីៗនៅក្នុងរណ្ដៅទាំងនេះមានសណ្ឋានដូចជាខោអាវដាច់រហែក និងបំណែកឆ្អឹងព្រមទាំងលលាដ៍ក្បាលមនុស្ស។
កងកម្លាំងអ៊ីរ៉ាក់បានវាយបណ្ដេញក្រុមរដ្ឋអ៊ីស្លាមចេញពីដែនដីដែលក្រុមជ្រុលនិយមនេះបានធ្លាប់បានគ្រប់គ្រងកន្លងមកស្ទើរតែទាំងអស់ ហើយអាជ្ញាធរបានរកឃើញរណ្ដៅកប់សាកសពមួយចំនួននៅតំបន់ដែលគេទើបរំដោះបានថ្មីៗនេះជាបន្តបន្ទាប់ផងដែរ៕
បាត់ដំបង ៖ នៅម៉ោង១០ និង៣៥នាទីថ្ងៃទី១២ ខែវិច្ឆិកា ឆ្នាំ២០១៧នៅចំណុចក្រុម២ ភូមិព្រៃដំរី ឃុំព្រៃតូច ស្រុកមោងប្ញស្សី លើផ្លូវជាតិលេខ៥ មានករណីគ្រោះថ្នាក់ចរាចរណ៍មួយកើតឡើងរវាងរថយន្ត និងរថយន្ត។
រថយន្តបង្កម៉ាកកូរ៉េ Frontier ពណ៌ខៀវ ពាក់ស្លាកលេខ ភ្នំពេញ2S 9723 ធ្វើដំណើរពីទិសបាត់ដំបងទៅភ្នំពេញ អ្នកបើកបរមិនស្គាល់អត្តសញ្ញាណ( គេចខ្លួន )លុះមកដល់ចំណុច កើតហេតុ បានរ៉េចង្កូតទៅបុក រថយន្តមួយគ្រឿងទៀត ម៉ាកសាំងយ៉ុង ពណ៌ ស្លែ គ្មានស្លាកលេខ អ្នកបើកបរឈ្មោះ ជាយ ចាន់រិត ភេទប្រុស អាយុ៣៧ឆ្នាំមុខរបរ បើកបរមានទីលំនៅ ភូមិ បឹងស្មុក ឃុំស្វាយស ស្រុកបាកាន ខេត្តពោធិ៍សាត់ ធ្វើដំណើរ ច្រាស់ទិសគ្នា បណ្តាលអោយរបួសមនុស្សម្នាក់ឈ្មោះ អឿន អុល ភេទស្រី អាយុ៤៣ឆ្នាំមុខរបរ ធ្វើស្រែ រស់នៅភូមិស្វាយដូនកែវ ឃុំស្វាយដូនកែវ ស្រុកបាកាន ខេត្តពោធិ៍សាត់( របួសធ្ងន់ ) ។
បច្ចុប្បន្នជនរងគ្រោះបញ្ជូនទៅសម្រាកព្យាបាលនៅមន្ទីរពេលបង្អែកស្រុកមោងប្ញស្សី ចំណែករថយន្តរក្សាទុកនៅប៉ុស្តិ៍នគរបាលឃុំព្រៃតូច រង់ចាំដោះស្រាយនៅពេលកក្រោយ៕
ខេត្តស្ទឹងត្រែង ៖ កម្លាំងជំនាញរដ្ឋបាលព្រៃឈើធ្វើការឃាត់ចាប់កាមរីគូទស្វិតកាត់គូទ១គ្រឿង ខណៈ លួចដឹកឈើប្រណីត ប្រភេទធ្នង់ នាងនួនពេញរថយន្តបំរុងលោតឆ័ត្រដឹកចេញទៅក្រៅខេត្ត នៅត្រង់ចំណុចផ្លូវលំមួយកន្លែង ស្ថិតនៅក្នុងសង្កាត់ស្ទឹងត្រែង ក្រុងស្ទឹងត្រែង កាលពីល្ងាច ថ្ងៃទី១២ ខែវិច្ចិកានេះ ។
សមត្ថកិច្ចជំនាញបានឲ្យដឹងថា រថយន្តកាមរីគូទស្វិតកាត់គូទដឹកឈើប្រណីតខាងលើនេះ ពណ៌ប្រផេះបិទស្កុតពណ៌ខៀវមួយកំណាត់ខាងក្រោយ ស្លាក់លេខ (ង 4950 ភ) ចំណែកតៃកុងរថយន្ត និងព្រូបានរត់គេចខ្លួនបាត់។
បច្ចុប្បន្នទាំងរថយន្ត និងឈើប្រណីតទាំងអស់នោះត្រូវបានសមត្ថិកច្ចជំនាញអូសយកមករក្សារទុកនៅខណ្ឌរដ្ឋបាលព្រៃឈើ។ ដោយឡែកចំនួនឈើនៅមិនទាន់ដឹងនៅឡើយទេ ដោយរង់ចាំជំនាញធ្វើការវាស់វែងតាមក្រោយ៕
រាជធានីភ្នំពេញ ៖ អធិការរងនគរបាលខណ្ឌពោធិ៍សែនជ័យ លោក ជា សុវណ្ណ បានប្រាប់អ្នកសារព័ត៌មានថា ករណីឃាតកម្មអារ-កសម្លាប់ ហើយរត់ទៅចងកខ្លួនឯងតាមក្រោយនោះ ដែលជំហានដំបូងសមត្ថកិច្ចថា អ្នកទាំង២ជាប្ដីប្រពន្ធនឹងគ្នា ប៉ុន្ដែក្រោយការស្រាវជ្រាវ គឺមិនមែននោះទេ ដោយគ្រាន់តែជាស្រីកំណាន់ប៉ុណ្ណោះ ហើយមូលហេតុវិញដោយសារតែឥទ្ធិពលភ្លើងប្រច័ណ្ឌ។
លោកអធិការរងបានបញ្ជាក់ថា បុរសជាជនបង្កឈ្មោះ សោម កាន់ ហៅតាខ្លី អាយុ៤៧ឆ្នាំ មានស្រុកកំណើតនៅភូមិក្ដុលពី ឃុំគោកព្រីង ស្រុកស្វាយជ្រំ ខេត្តស្វាយរៀង និងស្ដ្រីដែលជាស្រីកំណាន់នោះ ឈ្មោះហៅក្រៅថា ចែ ស អាយុប្រហែល៤០ឆ្នាំ។
សូមបញ្ជាក់ថា ករណីខាងលើនេះកើតឡើង និងបង្កការភ្ញាក់ផ្អើលទាំងព្រឹកព្រលឹមថ្ងៃទី១១ ខែវិច្ឆិកា ឆ្នាំ២០១៧នេះ នៅក្នុងបន្ទប់ជួល សង្កាត់ចោមចៅ១ ខណ្ឌពោធិ៍សែនជ័យ៕
អាល្លឺម៉ង់ ៖ នៅក្នុងសន្ទស្សន៍មួយដែលចេញផ្សាយកាលពីថ្ងៃព្រហស្បតិ៍បានបង្ហាញថា ប្រទេសហៃទីដែលត្រូវបានរងការវាយប្រហារពីខ្យលព្យុះកំបុតត្បូងដ៏មានឥទ្ធិពលកាលពីឆ្នាំមុននោះបានស្ថិតក្នុងលេខរៀងទី១នៃប្រទេសដែលរងគ្រោះខ្លាំងជាងគេបំផុតនៅលើពិភពលោកដោយសារការប្រែប្រួលអាកាសធាតុនៅក្នុងឆ្នាំ២០១៦។
ប្រទេសស៊ីមបាវ៉េដែលបានទទួលរងគ្រោះរាំងស្ងួតធ្ងន់ធ្ងរបានស្ថិតក្នុងលេខរៀងទី២ ហើយប្រទេសហ្វ៊ីជីដែលបានរងការវាយប្រហារដោយព្យុះស៊ីក្លូនត្រូពិចដ៏ខ្លាំងបំផុតមិនធ្លាប់មាននៅក្នុងដែនកោះរបស់គេនោះបានស្ថិតក្នុងលេខរៀងទី៣នៅក្នុងសន្ទស្សន៍ហានិភ័យអាកាសធាតុដែលចេញផ្សាយប្រចាំឆ្នាំដោយអង្គការជឺមេន វ៉ច (Germanwatch) ដែលជាអង្គការបរិស្ថានមិនរកប្រាក់ចំណេញមានមូលដ្ឋានក្នុងប្រទេសអាល្លឺម៉ង់។
សន្ទស្សន៍ហានិភ័យអាកាសធាតុបានបង្ហាញថា សហរដ្ឋអាមេរិកស្ថិតក្នុងចំណាត់ថ្នាក់លេខ១០ ដោយមានអ្នកស្លាប់ចំនួន២៦៧នាក់ ហើយទំហំទឹកប្រាក់នៃការខូចខាតដែលបណ្តាលមកពីអាកាសធាតុមានចំនួន៤៧.៧ពាន់លានដុល្លារអាមេរិក។
យោងតាមរបាយការណ៍នោះ, នៅចន្លោះឆ្នាំ១៩៩៧ និងឆ្នាំ២០១៦, មនុស្សជាង៥២ម៉ឺននាក់បានបាត់បង់ជីវិតដោយសារបញ្ហាអាកាសធាតុជាង១ម៉ឺន១ពាន់ករណីដែលរួមមានដូចជាព្យុះ, ទឹកជំនន់ និងរលកកំដៅនៅទូទាំងពិភពលោក។ ហើយការខូចខាតផ្នែកសេដ្ឋកិច្ចមានចំនួនប្រហែល៣.១៦ទ្រីលានដុល្លារអាមេរិក។
គួរបញ្ជាក់ថា ប្រទេសហ្វ៊ីជីគឺជាប្រធាននៅក្នុងកិច្ចពិភាក្សារបស់អង្គការសហប្រជាជាតិទៅលើបញ្ហាអាកាសធាតុនៅក្នុងឆ្នាំនេះ ហើយរដ្ឋជាច្រើននៅក្នុងប្រទេសនេះកំពុងជំរុញឲ្យមានចំណាត់ការបន្ទាន់ដើម្បីទប់ស្កាត់ការបញ្ចេញកម្តៅភពផែនដីដែលត្រូវបានគេរំពឹងថានឹងបង្កឲ្យមានព្យុះ, ទឹកជំនន់ និងគ្រោះរាំងស្ងួតកើតឡើងកាន់តែញឹកញាប់ និងធ្ងន់ធ្ងរ៕
ខេត្តស្ទឹងត្រែង ៖ កម្លាំង PM ខេត្តស្ទឹងត្រែងបានបង្ក្រាបរថយន្តដឹកឈើប្រណីត១គ្រឿង ម៉ាក់កាមរីស្វិត ពណ៌សពាក់ស្លាក់លេខ កណ្ដាល ២A-3449 ដែលបានដឹកឈើប្រណីតប្រភេទធ្នង់ពេញរថយន្ត ចូលមកក្នុងទីរួមខេត្ត រួចបម្រុងបន្ត ទៅកាន់ប្រទេសវៀតណាម ។ ប្រតិបត្តិការបង្ក្រាបនោះធ្វើឡើងនៅចំនុចក្បែរ កាឡាក់ស៊ី សង្កាត់ស្រះឫស្សី នាយប់ថ្ងៃទី០៩ ខែវិច្ឆិកា ឆ្នាំ២០១៧។
តាមសេចក្ដីរាយការណ៍បញ្ជាក់ថា រថយន្តដឹកឈើប្រណីតខាងលើ បានធ្វើសកម្មភាពដឹកឈើ ចេញពីស្រុកសៀមប៉ាង ស្ទើរតែរាល់យប់ តែមិនមានសមត្ថកិច្ច នៅតាមគោលដៅធ្វើការបង្ក្រាបទាល់តែសោះ បែរជាបណ្ដោយឲ្យរថយន្តដឹកឈើប្រណីត ទាំងនេះ ទៅបានដោយរលូនទៅវិញ។
បច្ចុប្បន្ន ទាំងរថយន្ត និងឈើប្រណីត ត្រូវកម្លាំងអាវុធហត្ថអូសយកមករក្សាទុកនៅបញ្ជាការ ដ្ឋានកងរាជអាវុធហត្ថខេត្ត ដើម្បីធ្វើកំណត់ហេតុ បញ្ជូនទៅកាន់រដ្ឋបាលព្រៃឈើ ដើម្បីចាត់ការបន្តទៀត ៕
ខេត្តសៀមរាប ៖ ក្រុមអ្នកយកព័ត៌មានរបស់ស្ថានីយទូរទស្សន៍ CNC ៣នាក់បានរងរបួសធ្ងន់ស្រាលដោយសារគ្រោះថ្នាក់ចរាចរណ៍ក្រឡាប់រថយន្ដ ខណៈពេលកំពុងធ្វើដំណើរទៅយកព័ត៌មានតំបន់អន្លង់វែង ខេត្តឧត្តរមានជ័យ។ ហេតុការណ៍នេះកើតឡើងនៅចន្លោះគីឡូម៉ែត្រលេខ៣៧១ ក្នុងតំបន់ស្រែណូយ ស្រុកវ៉ារិន ខេត្តសៀមរាប កាលពីល្ងាចថ្ងៃទី១០ ខែវិច្ឆិកា ឆ្នាំ២០១៧។
តាមប្រភពព័ត៌មានបានឲ្យដឹងថា ករណីគ្រោះថ្នាក់ចរាចរណ៍នោះគឺបង្កឡើយដោយខ្លួនឯងតែប៉ុណ្ណោះ ពោលគឺពេលកំពុងបើកបរស្រាប់តែរេចង្កូតប្រឡាប់ធ្លាប់ផ្លូវតែម្ដង។ ប្រភពបន្តថា ក្នុងហេតុការណ៍នេះបណ្តាលឲ្យមនុស្ស៣នាក់រងរបួស រួមមាន ៖ លោក ថាំង ចាន់ថារ៉ាន់ អ្នកអធិប្បាយព័ត៌មាន រងរបួសធ្ងន់, លោក ង៉ាន់ សំណាង រងរបួសធ្ងន់ និងលោក លោក ទេព ពិសិដ្ឋ អ្នកបើកបររងរបួស។
ក្រោយកើតហេតុភ្លាមៗជនរងគ្រោះទាំង៣នាក់ ត្រូវបានបញ្ជូនទៅសង្គ្រោះនៅមន្ទីរពេទ្យផងដែរ៕
កីឡា ៖ ការប្រកួតព្រឹត្តិការណ៍ One FC នៅ ទីក្រុងម៉ានីល ប្រទេសហ្វីលីពីន កាលពីយប់មិញ កីឡាករកម្ពុជា២រូប ប្រកួតចាញ់កីឡាករចិនទាំង២នាក់។
ក្នុងនោះកីឡាករ ថៃ រិទ្ធី បានគោះកំរាលសុំចុះចាញ់ត្រឹមទឹកទី១ ក្រោយជាប់ក្លេករបស់កីឡាករចិន ខណៈ ផាត់ សូដា បានរបួសក្បាលនិងក ធ្ងន់ធ្ងរ ព្រោះត្រូវបាន ដោយកីឡាកររបស់ចិនបានចាប់បោកក្បាលមកមុនដែលនេះ គឺជាការបំពានច្បាប់ ដែល one fc បានកំណត់ ហើយ ផាត់ សូដា ក៏បានបញ្ជូនទៅមន្ទីរពេទ្យផ្នែក សង្គ្រោះបន្ទាន់ភ្លាមៗផងដែរ៕
រាជធានីភ្នំពេញ ៖ នាព្រឹកព្រលឹមថ្ងៃទី១១ ខែវិច្ឆិកា ឆ្នាំ២០១៧នេះមានអំពើឃាតកម្មមួយបានកើតឡើងនៅសង្កាត់ចោមចៅ១ ខណ្ឌពោធិ៍សែនជ័យ ដោយបុរសជាប្ដីបានអារ-កសម្លាប់ប្រពន្ធរបស់ខ្លួនចោល រួចរត់ទៅចងកសម្លាប់ខ្លួនឯងតាមក្រោយ នៅក្នុងបន្ទប់ជួល។
តាមប្រភពព័ត៌មាននៅកន្លែងកើតហេតុ បានឲ្យដឹងថា អំពើឃាតកម្មដ៏សាហាវនេះ សមត្ថកិច្ចបានដាក់ការសង្ស័យថា ប្ដីជាអ្នកអារ-កសម្លាប់ប្រពន្ធ រួចបានទៅចងកសម្លាប់ខ្លួនតាមក្រោយ ដោយស្ថានភាពស្លាប់វិញ ប្រពន្ធដេកស្លាប់នៅក្នុងមុងស្លៀកសារ៉ុងចង់ពុង ហើយប្ដីវិញស្លាប់ទាំងអាក្រាតកាយ នៅជាប់នឹងចំរឹងបង្អួច។
សមត្ថកិច្ចបានបញ្ជាក់ថា បុរសជាប្ដីឈ្មោះហៅថា តាខ្លី អាយុប្រហែល៤០ឆ្នាំ ហើយប្រពន្ធឈ្មោះហៅថា ចែ ស អាយុប្រហែល៤០ឆ្នាំ។
ទោះបីយ៉ាងណានៅមិនទាន់មានប្រភពព័ត៌មានណាមួយបញ្ជាក់ពីមូលហេតុច្បាប់នៅឡើយទេ ជុំវិញករណីខាងលើនេះ៕
រាជធានីភ្នំពេញ ៖ នៅថ្ងៃទី១០ វិច្ឆិកា ឆ្នាំ២០១៧នេះ នគរបាលការិយល័យចរចរណ៍ផ្លូវគោកបានបញ្ជូនមន្ត្រីនគរបាលម្នាក់ឡើងតុលាការ ពាក់ព័ន្ធករណីបើកបរក្នុងស្ថានភាពស្រវឹងបង្កគ្រោះថ្នាក់ចរាចរណ៍ បណ្ដាលឲ្យស្លាប់មន្ត្រីយោធាម្នាក់ ក្រោយបញ្ជូនទៅដល់មន្ទីរពេទ្យព្រះកេតុមាលា។
ជនបង្កឈ្មោះ ឈាង វិជ្ជា ភេទប្រុស អាយុ៣០ឆ្នាំ ជាមន្ត្រីនគរបាល មានលំនៅស្ថានលេខ២៩៩២ ផ្លូវហាណូយ សង្កាត់ឃ្មួញ ខណ្ឌសែនសុខ ជាអ្នកបើករថយន្តម៉ាកឡិចស៊ីស ពណ៌ប្រផេះ ពាក់ស្លាកលេខភ្នំពេញ 2AQ 1434។ ជនរងគ្រោះឈ្មោះ មាជ រី ភេទប្រុស អាយុ៤៦ឆ្នាំ ជាមន្ត្រីយោធា មានលំនៅស្ថានលេខ ៤៩ ផ្លូវលំ ដង្កាត់ស្រះចក ខណ្ឌដូនពេញ ជាអ្នកជិះម៉ូតូមាក សេ១២៥ ពណ៌ខ្មៅ ពាក់ស្លាកលេខ ភ្នំពេញ 1S 3398។
សូមជម្រាបថា កាលពីវេលាម៉ោង១ និង៥នាទីយប់ថ្ងៃទី៨ វិច្ឆិកា ឆ្នាំ២០១៧ នៅចំណុចផ្លូវលេខ ១០៦កែងផ្លូវលេខ៥១ ភូមិ២ សង្កាត់ស្រះចក ខណ្ឌដូនពេញ រថយន្តឡិចស៊ីសមួយគ្រឿងដែលអ្នកបើកបរស្ថិតក្នុងស្ថានភាពស្រវឹងបានបុកម៉ូតូធ្វើដំណើរច្រាសទិសគ្នា បណ្ដាលឲ្យអ្នកបើកម៉ូតូរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យព្រះកេតុមាលា ប៉ុន្តែដោយស្ថានភាពអ្នករបួសធ្ងន់ធ្ងរពេកជនរងគ្រោះបានស្លាប់នៅមន្ទីរពេទ្យ៕
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា ប្រទេសទាំងឡាយណា ដែលមិនទទួលស្គាល់លទ្ធផលបោះឆ្នោតកម្ពុជា គឺជារឿងរបស់ប្រទេសនោះ សំខាន់ឲ្យតែប្រជាពលរដ្ឋខ្មែរ ទទួលស្គាល់ទៅបានហើយ ហើយកម្ពុជា ក៏មិនបានចាប់បង្ខំឲ្យទទួលស្គាល់នោះដែរ។
សម្តេចថ្លែងបែបនេះនាឱកាសអញ្ជើញជួបសំណេះសំណាលជាមួយក្រុមនាវាយុវជនអាស៊ីអាគ្នេយ៍ នៅព្រឹកថ្ងៃទី១០ ខែវិច្ឆិកានេះ ។ សម្ដេចតេជោ ហ៊ុន សែន បានមានប្រសាសន៍ថា គ្មានប្រទេសណាមួយ នៅក្នុងពិភពលោកគ្មានបញ្ហានោះទេ ហើយចង់ឲ្យប្រទេសនីមួយៗ ធ្វើកិច្ចការរបស់ប្រទេសខ្លួនឯងទៅ កុំមកជ្រៀតជ្រែកលើកិច្ចការងារផ្ទៃក្នុងរបស់កម្ពុជា។
សម្ដេចតេជោបញ្ជាក់ថា “យើងនឹងរៀបចំការបោះឆ្នោតព្រឹទ្ធសភា ២៥ កុម្ភៈ បោះឆ្នោតសភា ២៩ មករា។ ទោះអ្នកមិនទទួលស្គាល់ ជារឿងរបស់អ្នកឯង សំខាន់ពលរដ្ឋរបស់យើង ទទួលស្គាល់ហើយ ការបោះឆ្នោតបានហើយ”។
សម្ដេចតេជោ សង្ឃឹមថា បញ្ហាប្រទេសរបស់កម្ពុជា ទុកឲ្យកម្ពុជា ដោះស្រាយ កុំមកជ្រៀតជ្រែក ហើយកម្ពុជា ប្តេជ្ញាគោរពលទ្ធិប្រជាធិបតេយ្យសេរីពហុបក្ស។ សម្ដេចថា កម្ពុជា អត់មានអញ្ជើញឲ្យប្រទេសក្រៅ មកទទួលស្គាល់លទ្ធផលបោះឆ្នោតនៅកម្ពុជាទេ
សូមបញ្ជាក់ថា ការប្រកាសរបស់សម្តេចតេជោ បែបនេះ បន្ទាប់ពីលោក ថិដ គ្រូស៍ (Ted Cruz) សមាជិកព្រឹទ្ធសភាអាមេរិក កាលពីថ្ងៃទី៩ ខែវិច្ឆិកាម្សិលមិញ បានលើកឡើងថា បើគ្មានការដោះលែងលោក កឹម សុខា ប្រធានគណបក្សសង្គ្រោះជាតិ នៅពេលបោះឆ្នោតឆ្នាំ២០១៨នោះទេ សហរដ្ឋអាមេរិក និងប្រទេសជាសម្ព័ន្ធមិត្ត មិនទទួលស្គាល់លទ្ធផលការបោះឆ្នោតថ្នាក់ជាតិ នៅកម្ពុជា ជាដាច់ខាត៕
កីឡា ៖ នៅម៉ោង៦ល្ងាចនេះកីឡាករវាយដាក់ទ្រុងរបស់កម្ពុជាចំនួន២រូបនឹងត្រូវបង្ហាញខ្លួនក្នុងព្រឹត្តិការណ៍ ONE Championship នៅលើសង្វៀន Mall of Asia Arena នាទីក្រុងម៉ានីល ប្រទេសហ្វីលីពីន ដោយប៉ះកីឡាករចិនទាំង២នាក់។
ក្នុងនោះកីឡាករ ថៃ រិទ្ធី ប៉ះ កីឡាករ Zhao Zhi Kang ក្នុងទម្ងន់ ៦៥,៨ គីឡូក្រាម ខណៈ ផាត សូដា ជួប Peng Xue Wen ក្នុងទម្ងន់ ៥២,២ គីឡូក្រាម ៕
ខេត្តកំពង់ចាម ៖ កម្មករ១០៣នាក់ រងរបួសធ្ងន់ស្រាល ដោយក្នុងនោះ៤នាក់រងរបួសធ្ងន់ បានបញ្ជូនទៅសង្គ្រោះនៅមន្ទីរពេទ្យកាល់ម៉ែត បន្ទាប់រថយន្តដែលពួគគេក្រឡាប់ដោយសារតែអ្នកបើកបរបួងចង្កូតខ្លាំងពេក។ ហេតុការណ៍នេះកើតឡើងនៅវេលាម៉ោងប្រមាណ៧ព្រឹក ថ្ងៃទី១០ ខែវិច្ឆិកា ឆ្នាំ២០១៧នេះ នៅតាមផ្លូវជាតិលេខ៦ ក្នុងភូមិរវៀង ឃុំខ្នុរដំបង ស្រុកជើងព្រៃ។
ស្នងការនគរបាលខេត្តកំពង់ចាម លោកឧត្តមសេនីយ៍ត្រី ឯម កុសល បានឲ្យដឹងថា គ្រោះថ្នាក់ចរាចរណ៍នេះបង្កឡើងដោយ រថយន្តម៉ាកហ៊ិនដាយខ្លួនឯងតែម្ដង ពាក់ស្លាកលេខកំពង់ចាម 3A-4553 បើកបរដោយឈ្មោះ ឆៃ គីមហេង ទីលំនៅភូមិពោធិ៍ស្ទាង ឃុំសណ្ដែក ស្រុកបាធាយ ខេត្តកំពង់ចាម។ លោកបញ្ជាក់ថា មុនពេលកើតហេតុរថយន្ដខាងលើ បានដឹកកម្មកររោងចក្របើកពីទិសខាងលិចទៅកើត ចូលរោងចក្រជូហួយ លុះមកដល់ចំណុចកើតហេតុ បានបត់ឆ្វេងបម្រុងចូលរោងចក្រជូហួយ ប៉ុន្ដែពេលបត់ចូលនោះអ្នកបើកបរបួងចង្កូតខ្លាំងពេក ក៏បណ្ដាលឲ្យក្រឡាប់ខ្លួនឯងតែម្ដង។
ក្រោយកើតហេតុភា្លមៗ កម្លាំងនគរបាលនៃអធិការដ្ឋាននគរបាលស្រុកជើងព្រៃ ដែលដឹកនាំដោយលោក ប្រាក់ សុគន្ធ អធិការនគរបាលស្រុក បានបញ្ជូនជនរងគ្រោះទាំងអស់ទៅសង្គ្រោះមន្ទីរពេទ្យបង្អែកស្រុកជើងព្រៃ ចំណែកជនរងគ្រោះដែលរបួសធ្ងន់ចំនួន៤នាក់ បានបញ្ជូនទៅសង្គ្រោះនៅភ្នំពេញ៕
ខេត្តកណ្ដាល ៖ ក្មេងប្រុសតូចអាយុ៣ឆ្នាំម្នាក់បានបែកក្បាលធ្លាយខួរស្លាប់យ៉ាងអាណោចអាធ័មក្រោមកងរេវិចទ័រ (ប្រភេទលើកថ្ម) ខណៈឪពុកបង្មើតក្មេងរងគ្រោះបើកថយក្រោយ មិនបានមើល កាលពីវេលាម៉ោង៩ និង០៥នាទី ព្រឹកថ្ងៃទី៩ ខែវិច្ឆិកា ឆ្នាំ២០១៧ ស្ថិតនៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។
នគរបាលប៉ុស្តិ៍កំពង់សំណាញ់ បានឲ្យដឹងថា ក្មេងតូចរងគ្រោះឈ្មោះ ទុំ សុខណា ភេទប្រុស អាយុ៣ឆ្នាំ ត្រូវជាកូនជនបង្ក។ ចំណែកជនសង្ស័យឈ្មោះ ទូក ទុំ ភេទប្រុស អាយុ៣១ឆ្នាំ មុខរបរអ្នកបើកបររេវិចទ័រ (ប្រភេទលើកថ្ម) ត្រូវជាឪពុក។ នគរបាលប៉ុស្តិ៍កំពង់សំណាញ់ បញ្ជាក់ឲ្យដឹងថា នៅវេលាកើតហេតុខាងលើ អ្នកបើកបររេវិចទ័រ (ប្រភេទលើកថ្ម) ដែលបើកបរដោយឈ្មោះ ទូក អ៊ំ ភេទប្រុស អាយុ៣១ឆ្នាំ មានទីលំនៅស្នាក់នៅបណ្តោះអាសន្ន ភូមិកើតហេតុខាងលើ ដោយមិនបានមើលក្រោយ បណ្តាលឲ្យកិនកូនខ្លួនឯងស្លាប់ភ្លាមៗនៅកន្លែងកើតហេតុ។
សមត្ថកិច្ច បានចុះពិនិត្យសាកសព និងបានធ្វើសេចក្ដីសន្និដ្ឋាន ដោយករណីនេះ ឪពុកម្ដាយមានការធ្វេសប្រហែល បណ្ដាលឲ្យកូនខ្លួនឯងមានគ្រោះថ្នាក់ រហូតស្លាប់។ សពបានក្រុមគ្រួសារយកទៅបុណ្យតាមប្រពៃណី៕
រាជធានីភ្នំពេញ ៖ ដំណើរការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ រយៈពេល៦៩ថ្ងៃ មានប្រជាពលរដ្ឋចំនួន៥២៥,៤៥៩នាក់ ស្មើនឹង ៣២.៣១ភាគរយ បានទៅចុះឈ្មោះបោះឆ្នោត ដែលសរុបចំនួនពលរដ្ឋឈ្មោះបោះឆ្នោតបណ្ដោះអាសន្នមានចំនួន៨,៣៧០,៥៨៥នាក់។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
សេចក្ដីប្រកាសបានបន្តថា រយៈពេល៦៩ថ្ងៃដូចគ្នា ប្រជាពលរដ្ឋដែលត្រូវលុបឈ្មោះចេញពីបញ្ជីបោះឆ្នោត ឆ្នាំ២០១៦ មានចំនួន ១៩,៩០៧នាក់ និងអ្នកត្រូវកែតម្រូវឈ្មោះមានចំនួន ៥,៤៩៣នក់។
តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរ ដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់។
សូមបញ្ជាក់ថា ដំណើរការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ មានចំនួន៧០ថ្ងៃ ចាប់ពីថ្ងៃទី០១ ខែកញ្ញា ដល់ថ្ងៃទី០៩ ខែវិច្ឆិកា ឆ្នាំ២០១៧៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
