យេមែន ៖ ប្រមុខជំនួយរបស់អង្គការសហប្រជាជាតិបានព្រមានថា ប្រទេសយេមែននឹងប្រឈមមុខនឹងគ្រោះទុរ្ភិក្សដ៏ធំមួយដែលនឹងប៉ះពាល់ដល់ជីវិតមនុស្សរាប់លាននាក់លុះត្រាតែក្រុមចម្រុះដឹកនាំដោយអារ៉ាប៊ីសាអ៊ូឌីតបញ្ចប់ការរារាំងហើយអនុញ្ញាតឲ្យមានការបញ្ជូនជំនួយចូលទៅក្នុងប្រទេសនេះ។
លោក Mark Lowcock អគ្គលេខាធិការរងទទួលបន្ទុកកិច្ចការមនុស្សធម៌របស់អង្គការសហប្រជាជាតិបានព្រមានថា “វានឹងក្លាយជាគ្រោះទុរ្ភិក្សដ៏ធំបំផុតដែលពិភពលោកជួបប្រទះក្នុងរយៈពេលប៉ុន្មានទសវត្សមកនេះហើយមានជនរងគ្រោះរាប់លាននាក់”។
មន្ត្រីអង្គការសហប្រជាជាតិរូបនេះបាននិយាយបែបនេះទៅកាន់អ្នកយកព័ត៌មានបន្ទាប់ពីសម័យប្រជុំបិទទ្វាររបស់ក្រុមប្រឹក្សាសន្តិសុខអង្គការសហប្រជាជាតិស្តីពីវិបត្តិនៅយេមែនដែលជាកន្លែងក្រុមចម្រុះដឹកនាំដោយអារ៉ាប៊ីសាអ៊ូឌីតបានធ្វើយុទ្ធនាការយោធាប្រឆាំងនឹងក្រុមឧទ្ទាម Huthi ចាប់តាំងពីខែមិនាឆ្នាំ២០១៥មក។
ក្រុមប្រឹក្សានេះបានទាមទារឲ្យក្រុមចម្រុះដឹកនាំដោយអារ៉ាប៊ីសាអ៊ូឌីតបើកច្រកអាកាសនិងសមុទ្ររបស់យេមែនចំពោះការចែកចាយជំនួយនៅក្នុងប្រទេសមួយនេះដែលប្រជាជនចំនួន៧លាននាក់ប្រឈមមុខនឹងគ្រោះទុរ្ភិក្សរួចទៅហើយ។
ក្រុមចម្រុះនេះបានបិទព្រំដែនយេមែនដើម្បីឆ្លើយតបទៅនឹងការវាយប្រហារដោយមីស៊ីលមួយពីសំណាក់ពួកឧទ្ទាម Huthi របស់ប្រទេសយេមែនដែលត្រូវបានស្ទាក់ចាប់នៅក្បែរព្រលានយន្តហោះក្រុង Riyadh កាលពីថ្ងៃអាទិត្យ។
ប៉ុន្តែអង្គការសហប្រជាជាតិដែលធ្លាប់បានចុះបញ្ជីយេមែនរួចមកហើយថាជាប្រទេសមានវិបត្តិមនុស្សធម៌លេខ១នៅលើពិភពលោកគឺបានឆ្លើយតបទៅនឹងសេចក្តីសម្រេចនេះទាំងមិនពេញចិត្តដោយបានព្រមានថា ស្ថានភាពនេះគឺជា “មហន្តរាយ” រួចទៅហើយនៅក្នុងប្រទេសនេះ។
អគ្គលេខាធិការអង្គការសហប្រជាជាតិលោក Antonio Guterres បានជួបពិភាក្សាតាមទូរស័ព្ទជាមួយរដ្ឋមន្ត្រីការបរទេសអារ៉ាប៊ីសាអ៊ូឌីត Adel al-Jubeir កាលពីថ្ងៃពុធនិងបានទទួលយកការចង្អុលបង្ហាញថា ពួកគេនឹងពិនិត្យមើលការបើកឡើងវិញនៃចំណុចចូលទៅក្នុងប្រទេសយេមែន។
ប្រជាពលរដ្ឋយេមែនប្រមាណ១៧លាននាក់កំពុងត្រូវការស្បៀងអាហារទាំងអស់សង្ឃឹមដែលក្នុងនោះមាន៧លាននាក់ដែលមានគ្រោះថ្នាក់នៃគ្រោះទុរ្ភិក្សនិងជំងឺអាសន្នរោគរួចទៅហើយដោយបានបណ្តាលឲ្យមនុស្សជាង២,០០០នាក់ស្លាប់៕
វៀតណាម ៖ ព្យុះទីហ្វុងដំរីបានសម្លាប់មនុស្សកើនដល់១០៦នាក់ខណៈដែលអាងស្តុកទឹកដ៏ច្រើនសន្ធឹកសន្ធាប់បានបញ្ចេញទឹកស្របពេលដែលប្រទេសអាស៊ីអាគ្នេយ៍មួយនេះត្រូវរៀបចំកិច្ចប្រជុំកំពូលថ្នាក់តំបន់មួយ។
គណៈកម្មាធិការស្វែងរកនិងជួយសង្គ្រោះរបស់ប្រទេសនេះបាននិយាយថា គិតត្រឹមថ្ងៃពុធ មនុស្សចំនួន១០៦នាក់ត្រូវបានគេដឹងថាស្លាប់ដោយសារតែព្យុះធំទី១២ក្នុងឆ្នាំនេះដែលបានវាយប្រហារកាលពីថ្ងៃសៅរ៍ហើយធ្វើឲ្យមនុស្សចំនួន២៥នាក់បាត់ខ្លួននិង១៩៧នាក់ទៀតរងរបួស។
អាជ្ញាធរបាននិយាយថា កិច្ចខិតខំប្រឹងប្រែងយ៉ាងខ្លាំងក្លាត្រូវបានធ្វើឡើងដើម្បីចៀសវាងការជន់លិចនៅជុំវិញទីក្រុង Danang ដែលនឹងទទួលប្រធានាធិបតីអាមេរិកលោក Donald Trump, លោក Xi Jinping នៃប្រទេសចិននិងលោក Vladimir Putin របស់រុស្ស៊ីក្នុងចំណោមមេដឹកនាំអាស៊ីប៉ាស៊ីហ្វិកដទៃទៀតនៅឯកិច្ចប្រជុំកំពូលក្នុងសប្តាហ៍នេះ។
គណៈកម្មាធិការបង្ការគ្រោះមហន្តរាយបានឲ្យដឹងថា ទឹកកំពុងត្រូវបានបញ្ចេញពីអាងស្តុកទឹកយ៉ាងហោចណាស់ចំនួន៤៩ដែលមានកម្រិតគ្រោះថ្នាក់។ទឹកភ្លៀងកម្ពស់១,៧០០មីលីម៉ែត្រត្រូវបានកត់ត្រានៅស្ថានីយអាកាសធាតុមួយ។ភ្លៀងធ្លាក់ត្រូវបានគេរំពឹងថានឹងបន្តមុនពេលថយចុះវិញនៅថ្ងៃព្រហស្បតិ៍។
កិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នឹងចាប់ផ្តើមនៅថ្ងៃចន្ទដោយលោក Trump, Xi និង Putin នឹងចូលរួមជាមួយមេដឹកនាំថ្នាក់តំបន់ផ្សេងទៀតនៅក្នុងព្រឹត្តិការណ៍ដ៏សំខាន់មួយនេះនៅថ្ងៃសុក្រនិងថ្ងៃសៅរ៍។
ទោះបីជាយ៉ាងណាក៏ដោយ ភ្លៀងមិនបានរំខានដល់កាលបរិច្ឆេទនៃការជួបប្រជុំនេះទេប៉ុន្តែប្តីប្រពន្ធរបស់មេដឹកនាំអាចនឹងមិនធ្វើដំណើរទៅកាន់ទីក្រុង Hoi An ដែលជាបេតិកភ័ណ្ឌរបស់អង្គការ UNESCO បានទេដែលគ្រោងទុកនៅថ្ងៃសៅរ៍៕
ខេត្តកណ្តាល ៖ កម្លាំងនគរបាលខេត្តសហការជាមួយកម្លាំងនគរបាលស្រុកស្អាងកាលពីម្សិលមិញបានចុះឆែកឆេរផ្ទះធ្វើអាជីវកម្មដោយគ្មានច្បាប់អនុញ្ញាតមួយកន្លែងដែលសង្ស័យទទួលទិញផលចោរកម្ម។ ផ្ទះដែលសមត្ថកិច្ចចុះឆែកឆេរនោះជារបស់ឈ្មោះ ជ្រូ គីមស្រ៊ី ភេទប្រុស អាយុ៣៣ឆ្នាំ ស្ថិតក្នុងភូមិ តាលន់ ឃុំតាលន់ ស្រុកស្អាង ខេត្តកណ្តាល ។ ប្រតិបត្តិការនោះសមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ជ្រូ គីមស្រ៊ី ភេទប្រុស អាយុ៣៣ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកតាប្រាក់ ឃុំតាលន់ ស្រុកស្អាង ខេត្តកណ្តាល ។
សមត្ថកិច្ចក៏បានដកហូតម៉ូតូចំនួន២៦គ្រឿង រួមមាន ៖ ម៉ូតូម៉ាកហុងដាសេ៩០ ជ្រុងចំនួន ០១គ្រឿង២-ម៉ាក ស៊ុយស៊ីគីស្មាស់ ចំនួន ០៤គ្រឿង៣-ម៉ាក ហុងដា អ៊ែ ប្លេត ចំនួន ០១គ្រឿង៤-ម៉ាក ហុងដា ស្កូពី ចំនួន ០១គ្រឿង ៥-ម៉ាក ហុងដា MSX ចំនួន ០១គ្រឿង៦-ម៉ាក ហុងដា សេ៥០ ចំនួន ០៤គ្រឿង៧-ម៉ាក ហុងដា សេ១២៥ ចំនួន ០២គ្រឿង៨-ម៉ាក ស៊ុយ ស៊ីគីណូវ៉ូ ចំនួន ០១ គ្រឿង៩-ម៉ាក ហុងដា អាយខុន ចំនួន ០១គ្រឿង១០-ម៉ាក យ៉ាម៉ាហា ចំនួន ០១គ្រឿង១១-ម៉ាក ស៊ុយ ស៊ីគីវីវ៉ា ចំនួន ០១គ្រឿង១២-ម៉ាក ហុងដា សេ៩០ មូល ចំនួន ០២គ្រឿង១៣-ម៉ាក ហុងដា STR ចំនួន ០១គ្រឿង១៤-ម៉ាក ហុងដា វ៉េង ចំនួន ០១គ្រឿង១៥-ម៉ាក សេ១០០ កូរ៉េ ចំនួន ០២គ្រឿង១៦-ម៉ាក ហុងដា សេ៧០ ចំនួន ០១គ្រឿង១៧-ម៉ាក ហុងដា សេ៩០ ចំនួន០១គ្រឿង ។
ចំពោះមុខសមត្ថកិច្ចជនសង្ស័យឈ្មោះ ជ្រូ គីមស្រ៊ី បានឆ្លើយសារភាពថា ខ្លួនទទួលទិញម៉ូតូគ្រប់ប្រភេទដូចខាងលើនេះ ក្នុងតម្លៃ ២០០,០០០រៀល (ម្ភៃម៉ឺនរៀល) ទៅ ១០០,០០០០រៀល (មួយលានរៀល) ក្នុង០១គ្រឿង ទៅតាមប្រភេទម៉ូតូ ដោយគ្រាន់តែធ្វើលិខិត ទិញលក់តែប៉ុណ្ណោះ។ ហើយបើហួសកំណត់តាមកិច្ចសន្យាគឺខ្លួននឹងលក់ម៉ូតូនេះបន្តទៀត ។ ឈ្មោះ ជ្រូ គីមស្រ៊ី ក៏បានអះអាងបន្តថា-ខ្លួនពិតជាមិនមានច្បាប់អនុញ្ញាត្តឲ្យប្រកមុខរបរអាជីវកម្ម នេះពិតប្រាកដមែន។
បច្ចុប្បន្នជនសង្ស័យនឹងវត្ថុតាងនាំមកអធិការដ្ឋាននគរបាលស្រុកស្អាងដើម្បីកសាងសំណុំរឿងតាមនីតិវិធីបញ្ជូនទៅតុលាការខេត្តកណ្តាល ៕
កូឡុំប៊ី ៖ ប្រធានាធិបតីកូឡុំប៊ីលោក ចូន ម៉ានុយអែល សានតូស (Juan Manuel Santos) បាននិយាយថា ប៉ូលិសរឹបអូសបានថ្នាំញៀនប្រភេទកូកាអ៊ីនជាង១២តោនពីក្រុមឧក្រិដ្ឋកម្មកំពូលរបស់ប្រទេសកូឡុំប៊ី ដែលនេះគឺជាការរឹបអូសបានក្នុងចំនួនដ៏ច្រើនបំផុតមិនធ្លាប់មាននៅក្នុងការប្រយុទ្ធប្រឆាំងទៅនឹងការជួញដូរថ្នាំញៀននៅក្នុងប្រទេសនេះ។
ថ្នាំញៀនប្រភេទកូកាអ៊ីនទាំងនោះត្រូវបានរកឃើញលាក់ទុកក្រោមដីនៅក្នុងកសិដ្ឋានចំនួន៤ដែលស្ថិតនៅជិតព្រំដែនប្រទេសកូឡុំប៊ីជាមួយប្រទេសប៉ាណាម៉ា ហើយត្រូវបានប្រធានាធិបតីកូឡុំប៊ីប៉ាន់ស្មានថាមានតម្លៃប្រហែល៣៦០លានដុល្លារអាមេរិកនៅក្នុងទីផ្សារអាមេរិក។
លោក សានតូស (Santos) បាននិយាយថា ថ្នាំញៀនកូកាអ៊ីនទាំងនេះមានជាប់ពាក់ព័ន្ធទៅនឹងក្រុមឧក្រិដ្ឋកម្មជួញដូរថ្នាំញៀនមួយក្រុមដែលបានក្លាយជាការគំរាមកំហែងធំបំផុតមួយទៅដល់សន្តិសុខក្នុងតំបន់ ចាប់តាំងពីរដ្ឋាភិបាលកូឡុំប៊ីបានចុះកិច្ចព្រមព្រៀងសន្តិភាពជាមួយក្រុមឧទ្ទាមហ្វាស់ (FARC) កាលពីឆ្នាំមុនមក។
យោងតាមសេចក្តីថ្លែងការណ៍របស់ប៉ូលិស, មនុស្ស៤នាក់ត្រូវបានចាប់ខ្លួនផងដែរក្នុងអំឡុងប្រតិបត្តិការរយៈពេល៣ថ្ងៃដែលឈានទៅដល់ការរឹបអូសថ្នាំញៀននេះ៕
រាជធានីភ្នំពេញ ៖ នៅព្រឹកថ្ងៃទី៩ ខែវិច្ឆិកានេះ សមត្ថកិច្ចសមត្ថកិច្ចខណ្ឌមានជ័យ បានចាប់វ៉ៃខ្នោះយុវជនម្នាក់ ដែលបានរួមភេទជាមួយសង្សារ មិនទាន់គ្រប់អាយុ ក្នុងថ្ងៃបុណ្យអុំទូក ហើយត្រូវក្រុមគ្រួសារខាងស្រីប្តឹងឲ្យចាប់ខ្លួន។
ជនសង្ស័យឈ្មោះ សន ឧត្ដម ភេទប្រុស អាយុ១៧ឆ្នាំ ស្នាក់នៅផ្ទះជួលលូ៥ សង្កាត់ស្ទឹងមានជ័យ២ ខណ្ឌមានជ័យ ពីបទរួមភេទជាមួយអនីតិជនក្រោមអាយុ១៥ឆ្នាំ ប្រព្រឹត្តកាលពីថ្ងៃទី០៤ ខែវិច្ឆិកា ឆ្នាំ២០១៧ នៅក្នុងបន្ទប់ផ្ទះសំណាក់ យីហោ៣៤១ ក្នុងរាជធានីភ្នំពេញ ៕
រាជធានីភ្នំពេញ ៖ លោក គឹម សន្តិភាព អ្នកនាំពាក្យក្រសួងយុត្តិម៌បានឲ្យដឹងថា ទង្វើក្លែងបន្លំរបស់ ទណ្ឌិត សម រង្ស៊ី ក្នុងសេចក្តីថ្លែងការណ៍របស់ក្រុមតំណាងរាស្ត្រគណបក្សសង្គ្រោះជាតិ ពេលនេះ បង្កើតបាន ជាបទល្មើសព្រហ្មទណ្ឌសម្រាប់ខ្លួនឯងផង និងនាំឱ្យ CNRP ប្រឈមមុខនឹងច្បាប់ គណបក្ស នយោបាយថែមទៀត ។ លោកថា អ្វីដែលសំខាន់ជាងនេះទៀតនោះគឺលោក សម រង្ស៊ី បានជម្រុញឲ្យគណបក្សសង្គ្រោះជាតិឆាប់រំលាយតែម្តង ។
សូមបញ្ជាក់ថា លោក សម រង្ស៊ី អតីតប្រធានគណបក្សសង្គ្រោះជាតិ បានចុះហត្ថលេខា ក្នុងនាមតំណាងរាស្ត្របក្សប្រឆាំងនៅលើសេចក្តីថ្លែងការណ៍របស់អ្នកតំណាងរាស្ត្រគណបក្ស កាលពីម្សិលមិញដែលបង្ហាញអំពីជំហរទាមទារឲ្យមានការដោះលែងលោក កឹម សុខា រួមទាំងជំហរដ៏រឹងមាំរបស់គណបក្សទាំងមូលផងដែរ ។ ប៉ុន្តែមន្ត្រីអ្នកច្បាប់ បានអះអាងថា លោក សម រង្ស៊ី បានក្លែងបន្លំចុះហត្ថលេខាក្នុងនាមតំណាងរាស្ត្រក្នុងពេលដែល លោកបានលាលែងចេញទាំងអស់ពីគណបក្សសង្គ្រោះជាតិ ។
អ្នកនាំពាក្យរូបនោះបញ្ជាក់ថា អតីតប្រធានគណបក្សសង្គ្រោះជាតិ ដែលបានលាលែងទាំងអស់ ចេញពីគណបក្សនេះរួចហើយនោះ បានក្លែងបន្លំខ្លួនចុះហត្ថលេខាធ្វើជាតំណាង រាស្ត្រមួយរូប ក្នុងចំណោមតំណាងរាស្ត្ររបស់គណបក្សសង្គ្រោះជាតិនៅថ្ងៃទី០៨ ខែវិច្ឆិកា ឆ្នាំ២០១៧នេះ លើសេចក្តីថ្លែងការណ៍មួយ ដើម្បីបានជាសំឡេងបង្ហាញជំហរ ប្តេជ្ញាចិត្តនៅជាមួយគណបក្សប្រឆាំង។
សូមជម្រាបថា បើតាមច្បាប់គណបក្សនយោបាយថ្មី រាល់គណបក្សនយោបាយទាំងអស់ មិនអនុញ្ញាតឱ្យ ប្រើប្រាស់សំឡេង ឬសេចក្តីថ្លែងការណ៍របស់ទណ្ឌិត ដើម្បីជាប្រយោជន៍ គណបក្ស នយោបាយឡើយ។ គណបក្សនយោបាយ ដែលប្រព្រឹត្តខុសនឹងច្បាប់នេះ នឹងត្រូវផ្តន្ទាទោសទៅតាមច្បាប់៕
រាជធានីភ្នំពេញ ៖ ថ្ងៃទី០៩ ខែវិច្ឆិកា ឆ្នាំ២០១៧នេះ គឺជាថ្ងៃចុងក្រោយនៃដំណើរការចុះឈ្មោះបោះឆ្នោត ក្នុងបញ្ជីបោះឆ្នោតថ្មី ឆ្នាំ២០១៧ និងធ្វើបច្ចុប្បន្នភាពបញ្ជីបោះឆ្នោត ឆ្នាំ២០១៦ ។ ដូច្នេះបងប្អូនប្រជាពលរដ្ឋខ្មែរមានឱកាសតែមួយថ្ងៃនេះប៉ុណ្ណោះ សម្រាប់ការចុះឈ្មោះបោះឆ្នោត ។
តាមរបាយការណ៍របស់ គ.ជ.ប គិតត្រឹមថ្ងៃទី០៧ ខែវិច្ឆិកា ឆ្នាំ២០១៧ ប្រជាពលរដ្ឋខ្មែរ បានទៅចុះ ឈ្មោះបោះឆ្នោត ក្នុងបញ្ជីឈ្មោះបោះឆ្នោតថ្មី ឆ្នាំ២០១៧ មានចំនួនជាង៥ម៉ឺននាក់ ៕
រាជធានីភ្នំពេញ ៖ នៅព្រឹកថ្ងៃទី០៩ ខែវិច្ឆិកា ឆ្នាំ២០១៧ កម្ពុជាប្រារព្ធព្រះរាជពិធីឯករាជ្យ៩វិច្ឆិកា ខួប៦៤ឆ្នាំនៃការដណ្តើមបានឯករាជ្យពីបារាំង (៩ វិច្ឆិកា ១៩៥៣-៩ វិច្ឆិកា ២០១៧) យ៉ាងមហោឡារិក ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះមហាក្សត្រខ្មែរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី។ ពិធីអបអរសាទរនេះ ត្រូវបានធ្វើឡើងនៅវិមានឯករាជ្យ ដែលជានិមិត្តរូបនៃការទាមទារបាននូវឯករាជ្យពីបារាំង៕
អាមេរិក ៖ ប្រធានាធិបតីអាមេរិកលោក ដូណាល់ ត្រាំ បានព្រមានដល់ របបផ្តាច់ការដ៏សាហាវឃោរឃៅ របស់កូរ៉េខាងជើងប្រឆាំងនឹងការមើលងាយសហរដ្ឋអាមេរិកប៉ុន្តែបានលើកឡើងថា មេដឹកនាំ គីម ជុងអ៊ុន នឹងមានអនាគតដ៏ល្អប្រសើរប្រសិនបើគាត់បោះបង់ចោលមហិច្ឆតានុយក្លេអ៊ែររបស់គាត់។
នៅក្នុងសុន្ទរកថាមួយទៅកាន់សភាកូរ៉េខាងត្បូងដែលនេះជាលើកដំបូងសម្រាប់ប្រធានាធិបតីអាមេរិកក្នុងរយៈពេល២៤ឆ្នាំមកនេះ, លោក ត្រាំ បានហៅក្រុងព្យុងយ៉ាងថាជារបបសង្កត់សង្កិននិងជិះជាន់។
គាត់បានអំពាវនាវឲ្យពិភពលោកធ្វើសកម្មភាពដូចជាប្រទេសរុស្ស៊ីជាដើមនិងជាពិសេសគឺសម្ព័ន្ធមិត្តរបស់កូរ៉េខាងជើងគឺប្រទេសចិនដែលជាកន្លែងគាត់នឹងធ្វើដំណើរទៅនៅថ្ងៃពុធ។
មេដឹកនាំអាមេរិករូបនេះបានប្រកាសថា “កូរ៉េខាងជើងគឺជាប្រទេសមួយដែលគ្រប់គ្រងដូចជាសាសនាមួយ”។ នៅចំកណ្តាលនៃការគោរពផ្នែកយោធានេះគឺជាជំនឿដែលរារាំងដល់ជោគវាសនារបស់មេដឹកនាំក្នុងការគ្រប់គ្រងដូចជាអ្នកការពារឪពុកម្តាយលើឧបទ្វីបកូរ៉េ”។
ក្រុមអ្នកវិភាគបាននិយាយថា ការរិះគន់នេះអាចបង្កឲ្យមានប្រតិកម្មពីប្រទេសកូរ៉េខាងជើង។ប៉ុន្តែអ្នកតាក់តែងច្បាប់កូរ៉េខាងត្បូងបានអបអរសាទរនៅពេលដែលប្រធានាធិបតីអាមេរិករូបនេះបានប្តេជ្ញាមិនបំភិតបំភ័យនិងបានព្រមានទីក្រុងព្យុងយ៉ាងថា ខ្លួនមិនគួរសាកល្បងជាមួយដំណោះស្រាយរបស់អាមេរិកឡើយ។
កូរ៉េខាងជើងបានធ្វើការសាកល្បងនុយក្លេអ៊ែរលើកទី៦របស់ខ្លួនដែលមានឥទ្ធិពលបំផុតនៅក្នុងខែកញ្ញាហើយបានបាញ់មីស៊ីលរាប់សិបគ្រាប់ក្នុងរយៈពេលប៉ុន្មានខែថ្មីៗនេះ។ក្នុងនោះមានពីរគ្រាប់បានហោះលើប្រទេសជប៉ុនដែលជាសម្ព័ន្ធមិត្តរបស់អាមេរិកហើយក្រុងព្យុងយ៉ាងបាននិយាយថា ខ្លួនអាចដាក់ក្បាលគ្រាប់នុយក្លេអ៊ែរមួយលើគ្រាប់រ៉ុក្កែតដែលអាចឈានដល់ដីគោកអាមេរិក។
មុននោះ លោក ត្រាំ ត្រូវបង្ខំចិត្តលុបចោលដំណើរទស្សនកិច្ចដ៏គួរឲ្យភ្ញាក់ផ្អើលមួយទៅកាន់តំបន់គ្មានយោធា (DMZ) ដែលបែងចែកកូរ៉េទាំងពីរដោយសារតែអាកាសធាតុមិនល្អដែលធ្វើឲ្យគាត់មានការខកចិត្តយ៉ាងខ្លាំង។ នេះបើយោងតាមការឲ្យដឹងពីសេតវិមាន។
ប្រធានាធិបតីកូរ៉េខាងត្បូងលោក មូន ចេអ៊ីន ដែលបានហោះហើរមុនពេលចុះអ័ព្ទគឺបានរង់ចាំគាត់នៅឯប៉ុស្តិ៍យាមព្រំដែនមួយដែលមានព័ទ្ធដោយរបងអគ្គីសនី ចម្ការមីននិងរបាំងប្រឆាំងរថក្រោះ។
នៅក្នុងសុន្ទរកថារបស់គាត់, លោក ត្រាំ បានហៅ DMZ ថាជា “បន្ទាត់មួយដែលបែងចែករវាងការជិះជាន់និងសេរីភាព” នាពេលបច្ចុប្បន្ន៕
រាជធានីភ្នំពេញ ៖ សមេចតេជោ ហ៊ុន សែន បានប្រកាសនិងអះអាងជាថ្មីម្តងទៀតថា កម្ពុជានឹង ធ្វើជាម្ចាស់ផ្ទះកីឡាស៊ីហ្គេមនៅឆ្នាំ២០២៣ខាងមុខ ហើយគម្រោងនេះមិនត្រូវបានផ្លាស់ប្តូរនោះ ទេ ។ ការថ្លែងបែបនោះធ្វើឡើងក្នុងពិធីជួបសំណេះសំណាលជាមួយកម្មករ កម្មការិនី ប្រមាណ ១៥០០០នាក់ កាលពីព្រឹកមិញ នៅតំបន់ចំការដូង ។
សម្តេច ហ៊ុន សែន បានថ្លែងថា មូលហេតុដែលសម្តេចមិនសម្រេចទទួលធ្វើជាម្ចាស់ផ្ទះ ស៊ីហ្គេមមុនឆ្នាំ២០២៣នោះ ដោយសារតែកម្ពុជាត្រូវការពេលវេលា ត្រូវការថវិកា ដើម្បីសាងសង់ ហេដ្ឋានរចនាសម្ព័ន្ធសំខាន់ៗ មួយចំនួន ។ សម្តេចថា ការចំណាយលើការរៀបចំស៊ីហ្គេមម្តងៗ គឺមានប្រមាណ៥០០លានដុល្លារឯណោះ ។ ដូច្នេះយើងត្រូវការថវិកាទាំងនោះ ដើម្បីសាងសង់ ប្រទេសជាតិសិន ។
យ៉ាងណាក៏ដោយ សម្តេចថ្លែងអះអាងថា កម្ពុជានឹងធ្វើជាម្ចាស់ផ្ទះកីឡាស៊ីហ្គេមឆ្នាំ ២០២៣ ដោយមិនផ្លាស់ប្តូរទេ ហើយសង្ឃឹមថា សម្តេចនឹងមានវត្តមានក្នុងពិធីបើកកីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះនេះផងដែរ ។
សូមជម្រាបថា កន្លងទៅនេះមានលេចឮព័ត៌មានក្រៅផ្លូវថា សម្តេចបានសម្រេចលុប ចោលគម្រោងធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ នោះហើយ ។ ប៉ុន្តែឥឡូវច្បាស់លាស់ ហើយថា កីឡាស៊ីហ្គេមឆ្នាំ២០២៣ គឺកម្ពុជានឹងធ្វើជាម្ចាស់ផ្ទះ ៕
កូរ៉េខាងត្បូង ៖ ស្ត្រីអ្នកនាំពាក្យម្នាក់បាននិយាយថា ដំណើរបំពេញទស្សនកិច្ចដែលមិនបានប្រកាសជាមុនរបស់ប្រធានាធិបតីអាមេរិកលោក ដូណាល់ ត្រាំ ទៅកាន់តំបន់គ្មានយោធាក្នុងប្រទេសកូរ៉េខាងត្បូងនៅថ្ងៃពុធនេះត្រូវបានខកខានដោយសារតែអាកាសធាតុមិនអំណោយផល។ ដំណើរបំពេញទស្សនកិច្ចដែលខកខាននេះបានធ្វើឡើងក្នុងរយៈពេលមួយថ្ងៃបន្ទាប់ពីលោក ត្រាំ បានជំរុញឲ្យប្រទេសកូរ៉េខាងជើងងាកមករកតុចរចាវិញ។
ស្ត្រីអ្នកនាំពាក្យបានប្រាប់ក្រុមអ្នកសារព័ត៌មានថា ប្រធានាធិបតីកូរ៉េខាងត្បូងលោក មូន ជេអ៊ីន (Moon Jae-in) ក៏បានធ្វើដំណើរទៅកាន់តំបន់គ្មានយោធានោះជាមួយលោក ត្រាំ ផងដែរ ប៉ុន្តែដោយសារតែមានការចុះអ័ព្ទខ្លាំងទើបបង្ខំឲ្យវិលត្រឡប់មកវិញ។
សូមបញ្ជាក់ថា ថ្ងៃពុធនេះគឺជាថ្ងៃចុងក្រោយនៃដំណើរបំពេញទស្សនកិច្ចរបស់លោក ត្រាំ នៅក្នុងប្រទេសកូរ៉េខាងត្បូងដែលជាផ្នែកមួយនៃដំណើរបំពេញទស្សនកិច្ចរយៈពេល១២ថ្ងៃរបស់លោកនៅក្នុងតំបន់អាស៊ីដើម្បីពិភាក្សាអំពីពាណិជ្ជកម្ម និងបញ្ហាប្រទេសកូរ៉េខាងជើង៕
ហាណូយ ៖ ចំនួនមនុស្សស្លាប់បានកើនដល់ ៨៩នាក់ហើយ និងប្រមាណ១៨ផ្សេងទៀតនៅតែបន្តបាត់ខ្លួនដដែល ខណៈដែលមនុស្ស១៧៤នាក់រងរបួសដោយសារព្យុះទីហ្វុងដំរីដែលបានវាយលុកយ៉ាងចាស់ដៃ នៅតាមបណ្តាញឆ្នេរភាគកណ្តាល និងភាគខាងត្បូងប្រទេសវៀតណាមកាលពីថ្ងៃសៅរ៍ចុងសប្តាហ៍មុន។ នេះបើតាមសារព័ត៌មាន Channel News Asia ចេញផ្សាយនៅព្រឹកនេះ។
រដ្ឋាភិបាលវៀតណាម គិតចាប់តាំងតែពីព្យុះកំណាចខាងលើ បានធ្វើដំណើរមកដល់កាលពីថ្ងៃសៅរ៍ចុងសប្តាហ៍មុនមក មនុស្សសរុបកើនដល់៨៩នាក់ បានបាត់បង់ជីវិត នៅក្នុងគ្រោះទឹកជំនន់ និងរអិលបាក់ដី ព្រមទាំងក្នុងហេតុការណ៍លិចទូក នៅឯនាយសមុទ្រ ខណៈមនុស្សប្រមាណ១៨ផ្សេងទៀត នៅតែបន្តបាត់ខ្លួនដដែល និង១៧៤នាក់រងរបួស។ ក្រៅពីនេះ លំនៅឋានជាង២,០០០ខ្នងត្រូវបានបំផ្លិចបំផ្លាញទាំងស្រុង និងច្រើនជាង១១០,០០០ខ្នងទៀត រងការខូចខាត ហើយសត្វចិញ្ចឹមជិត ១០,០០០ក្បាលបានងាប់។
ព្យុះទីហ្វុងដំរី គឺជាព្យុះដ៏កំណាចចុងក្រោយគេបង្អស់ ដែលបានបោកបក់មកលើបណ្តោយឆ្នេរប្រទេសវៀតណាម ក្នុងឆ្នាំ២០១៧នេះ ខណៈមនុស្សយ៉ាងតិច ២៤០នាក់ ត្រូវបានគេរាយការណ៍ថា បានស្លាប់ ឬក៏បាត់ខ្លួន នៅក្នុងគ្រោះទឹកជំនន់ និងរអិលបាក់ដី ចាប់តាំងពីដើមឆ្នាំនេះ។
សូមបញ្ជាក់ថា ព្យុះទីហ្វុងដំរីនេះ បានវាយប្រហារមកលើប្រទេសអាស៊ានមួយនេះ នៅមុនប្រទេសនេះ គ្រោងរៀបចំធ្វើជាម្ចាស់ផ្ទះ សម្រាប់សន្និសីទស្តីពីកិច្ចសហប្រតិបត្តិការផ្នែកសេដ្ឋកិច្ច នៃតំបន់អាស៊ីប៉ាស៊ីហ្វិកហៅកាត់ថា APEC នៅឯទីក្រុងដាណាង នាសប្តាហ៍ក្រោយ។ កិច្ចប្រជុំកំពូលនេះ នឹងមានការចូលរួមពីសំណាក់ ប្រធានាធិបតីអាមេរិក លោក ដូណាល់ ត្រាំ, ប្រធានាធិបតីចិន លោក ស៊ី ជិនពីង, និងប្រធានាធិបតីរុស្ស៊ី លោក វ្ល៉ាឌីមៀ ពូទីន ផងដែរ៕
ខេត្តកណ្ដាល ៖ ជនសង្ស័យ២នាក់ត្រូវបានសមត្ថកិច្ចនគរបាលស្រុកពញាឮធ្វើការចាប់ខ្លួន ខណៈដែល ធ្វើសកម្មភាពដឹកឈើប្រណីតដោយខុសច្បាប់តាមម៉ូតូសណ្ដោងរ៉ឺម៉កមួយគ្រឿង កាលពីថ្ងៃទី៧ ខែវិច្ឆិកា ឆ្នាំ២០១៧ វេលាម៉ោង១១ និង៤៥នាទី ស្ថិតក្នុងភូមិចេតិយថ្មី ឃុំវិហារលួង ស្រុកពញាឮ ខេត្តកណ្តាល ។
តាមនគរបាលបានឲ្យដឹងថា នៅមុនពេលកើតហេតុ កម្លាំងសមត្ថកិច្ចបានធ្វើការចុះល្បាតក្នុងដែនសមត្ថកិច្ចរបស់ខ្លួន ខណៈមកដល់ចំណុចកើតហេតុស្រាប់តែឃើញម៉ូតូសណ្ដោងរ៉ឺម៉កមួយគ្រឿងកំពុងបើកតាមបណ្ដោយផ្លូវដោយមានដឹកឈើផងដែរ ដោយមានការសង្ស័យ កម្លាំងសមត្ថកិច្ចក៏បានហៅឲ្យឈប់ រួចសុំធ្វើការឆែកឆេរបានរកឃើញឈើប្រណិតជាប្រភេទឈើធ្នុងចំនួន២៤ដុំ ឈានដល់ធ្វើការចាប់ខ្លួនជនសង្ស័យទាំង២នាក់។
ប្រភពបន្តថា ជនសង្ស័យដែលត្រូវចាប់ខ្លួនមាន២នាក់ ទី១-ឈ្មោះ ភិន សុខហេង ភេទប្រុស អាយុ៣៧ឆ្នាំ មានទីលំនៅភូមិទោង ឃុំរលួសមានជ័យ ស្រុកសំបូរ ខេត្តក្រចេះ និងទី២-ឈ្មោះ សៅ ដានី ហៅច្រែង ភេទប្រុស អាយុ៤៥ឆ្នាំ មានទីលំនៅភូមិទោង ឃុំសណ្តាន់ ស្រុកសំបូរ ខេត្តក្រចេះ។ ចំណែកវត្ថុតាងដែលដកហូតរួមមាន ៖ ឈើប្រណិតប្រភេធ្នុងចំនួន២៤ដុំ និងម៉ូតូសណ្ដោងរ៉ឺម៉កចំនួនមួយគ្រឿង ។
បច្ចុប្បន្នជនសង្ស័យទាំង២នាក់ រួមនឹងវត្ថុតាងត្រូវបានយកមកអធិការដ្ឋាននគរបាលស្រុកដើម្បីសួរនាំចាត់ការតាមនីតិវិធីច្បាប់៕
អាមេរិក ៖ តាមសេចក្ដីរាយការណ៍របស់ទូរទស្សន៍ ABC តាមរយៈរបាយការណ៍ស្ទង់មតិមួយថា ពលរដ្ឋអាមេរិកដល់ទៅ៦៥ភាគរយបាននិយាយថា ប្រធានាធិបតីអាមេរិក លោក ដូណាល់ ត្រាំ សម្រេចការងារបានតិចតួចប៉ុណ្ណោះ នៅក្នុងអំឡុងពេលកាន់អំណាចរយៈពេលជិតមួយឆ្នាំមកនេះ។
ផ្ទុយទៅវិញ អ្នកឆ្លើយតបតែ៣៧ភាគរយប៉ុណ្ណោះ យល់ស្របទៅនឹងប្រសិទ្ធភាពការងាររបស់លោក ត្រាំ ដែលនេះគឺជាតួលេខទាបបំផុតនៅក្នុងប្រវត្តិសាស្ត្រអាមេរិក បើធៀបនឹងប្រធានាធិបតីដទៃទៀតគិតចាប់តាំងពីឆ្នាំ១៩៤៦មក បន្ទាប់ពីលោក ត្រាំ បានឡើងកាន់តំណែងបានរយៈពេល៩ខែដំបូង។
ការស្ទង់មតិនោះ បានរកឃើញទៀតថា អ្នកឆ្លើយតបដល់ទៅ៥៥ភាគរយ និយាយថា លោក ត្រាំ នឹងមិនធ្វើតាមការសន្យាដែលលោកបានប្ដេជ្ញានៅអំឡុងយុទ្ធនាការឃោសនាបោះឆ្នោតនោះទេ ដែលតួលេខនេះបង្ហាញនូវការកើនឡើងពីអត្រា៤១ភាគរយ នៅក្នុងការស្ទង់មតិមួយកាលពីខែមេសាកន្លងមក ពោលគឺ ១០០ថ្ងៃក្រោយលោក ត្រាំ ឡើងកាន់តំណែង។
ការស្ទង់មតិក៏បានចោទសួរផងដែរថា តើលោក ត្រាំ ជាមេដឹកនាំខ្លាំងម្នាក់ឬទេ។ ជាការឆ្លើយតប ពលរដ្ឋ ៤០ភាគរយប៉ុណ្ណោះយល់ស្រប ប៉ុន្តែ តួលេខនេះបង្ហាញពីការធ្លាក់ចុះពីចំនួន ៥៣ភាគរយ នៅក្នុងការស្ទង់មតិកាលពីខែមេសាកន្លងមក។
សូមបញ្ជាក់ថា លោក ត្រាំ បានឡើងដឹកនាំអាមេរិកបន្តពីអតីតប្រធានាធិបតី បារ៉ាក់ អូបាម៉ា កាលពីថ្ងៃទី២០ ខែមករាក្នុងឆ្នាំនេះ បន្ទាប់ពីលោកឈ្នះការបោះឆ្នោតប្រធានាធិបតីកាលពីខែវិច្ឆិកាឆ្នាំមុន៕
អាហ្វហ្គានីស្ថាន ៖ ក្រុមមន្ត្រីមូលដ្ឋានបាននិយាយថា មនុស្សយ៉ាងតិច៥នាក់បានស្លាប់ក្នុងនោះមានអ្នកវាយប្រហារចំនួន២នាក់ និងចំនួន២១នាក់ទៀតបានរងរបួសក្នុងការវាយប្រហារភេរវកម្មមួយនៅស្ថានីយទូរទស្សន៍សាមសាដ (Shamshad) នៅក្នុងទីក្រុងកាប៊ូលប្រទេសអាហ្វហ្គានីស្ថាន។
គ្រោះថ្នាក់នេះបានកើតឡើងនៅព្រឹកថ្ងៃម្សិលមិញនៅពេលក្រុមភេរវករចំនួន២នាក់បានវាយប្រហារស្ថានីយទូរទស្សន៍នេះដោយចោលគ្រឿងផ្ទុះនៅច្រកចូលស្ថានីយបន្ទាប់មកដើរចូលក្នុងអគារការិយាល័យក្នុងម៉ោងធ្វើការធ្វើឲ្យបុគ្គលិកមួយចំនួនវាយកញ្ចក់លោតតាមបង្អួចគេចពីគ្រោះថ្នាក់នេះ។
ក្រោយមក អ្នកវាយប្រហារបានក្លែងខ្លួនជាមន្ត្រីប៉ូលិសចូលជ្រកក្នុងអគារមួយនៅក្នុងស្ថានីយ៍នេះ ហើយក៏មានការប៉ះទង្គិចគ្នារវាងអ្នកវាយប្រហារនិងកងកម្លាំងពិសេសដែលបានទៅដល់ទីនោះក្រោយពីកើតហេតុដោយបានបាញ់សម្លាប់អ្នកវាយប្រហារទាំង២នាក់នេះនៅកន្លែងកើតហេតុ។
គណៈកម្មាធិការសុវត្ថិភាពអ្នកកាសែតនៅប្រទេសអាហ្វហ្គានីស្ថានបាននិយាយថា ប្រព័ន្ធផ្សព្វផ្សាយនិងអ្នកកាសែតតែងរងការវាយប្រហារពីក្រុមបះបោរដោយគ្រាន់តែរយៈពេល៦ខែដំបូងក្នុងឆ្នាំនេះគឺមានបុគ្គលិកផ្នែកព័ត៌មាននិងអ្នកកាសែតចំនួន១០នាក់ត្រូវបានសម្លាប់នៅប្រទេសនេះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
