ម៉ាឡេស៊ី ៖ មនុស្សចំនួន៨នាក់ត្រូវបានប៉ូលិសម៉ាឡេស៊ីចាប់ខ្លួនដោយសង្ស័យថា មានការពាក់ព័ន្ធនឹងសកម្មភាពភេរវកម្មថ្មីៗនេះពីព្រោះគេមានភស្តុតាងមួយចំនួនបង្ហាញថា សកម្មភាពរបស់ក្រុមជនសង្ស័យទាំងនេះបានបង្កការព្រួយបារម្ភនៅប្រទេសម៉ាឡេស៊ីដែលមានប្រជាពលរដ្ឋពហុជាតិសាសន៍និងពហុសាសនា។
ឧបនាយករដ្ឋមន្ត្រីលោក អះម៉ាដ ហ្សាហ៊ីដ ហាមីឌី បាននិយាយថា គោលបំណងសំខាន់របស់ក្រុមជ្រុលនិយមនេះគឺចង់បង្ហាញឲ្យសាធារណជនចាប់អារម្មណ៍ថា ប្រទេសម៉ាឡេស៊ីមិនមានសិទ្ធិសេរីភាពផ្នែកសាសនានោះទេ។ លោកបានបញ្ជាក់ថា ការចាប់ខ្លួនក្រុមជនសង្ស័យនេះត្រូវបានធ្វើឡើងដោយក្រុមប្រឆាំងភេរវកម្មពិសេសនៅប្រទេសម៉ាឡេស៊ីដើម្បីប្រយុទ្ធប្រឆាំងនឹងការវាយប្រហារភេរវកម្មនៅប្រទេសនេះ។
គួរបញ្ជាក់ថា ចាប់ពីថ្ងៃទី២៧ខែកញ្ញាដល់ថ្ងៃទី៦ខែតុលា មនុស្សចំនួន៨នាក់ត្រូវបានចាប់ខ្លួននៅតាមតំបន់មួយចំនួននៅប្រទេសម៉ាឡេស៊ីដោយសង្ស័យថា រៀបចំសកម្មភាពភេរវកម្ម កេណ្ឌអ្នកទោសឲ្យចូលរួមក្រុមភេរវករ និងផែនការវាយប្រហារលំនៅឋានពលរដ្ឋគោរពសាសនាអ៊ីស្លាម គ្រឹស្តសាសនា និងសាសនាហិណ្ឌូដើម្បីបង្កើតជម្លោះនៅប្រទេសនេះ៕
ប៉ាគីស្ថាន ៖ មន្ត្រីមូលដ្ឋានបាននិយាយថា ក្រុមខ្មាន់កាំភ្លើងបានសម្លាប់ពលរដ្ឋមូស្លីមនិកាយសៀ (Shia) ចំនួន៥នាក់មកពីសហគមន៍ជនភាគតិចហាហ្សារ៉ា (Hazara) នៅភាគនិរតីប្រទេសប៉ាគីស្ថានកាលពីថ្ងៃចន្ទម្សិលមិញ។
ការវាយប្រហារនេះបានកើតឡើងនៅខេត្តបាឡូគីស្ថានជាទីដែលជនជាតិភាគតិចហាហ្សារ៉ាជិតកន្លះលាននាក់បានតាំងទីលំនៅនៅទីនោះតាំងពីពួកគេបានរត់គេចពីអំពើហិង្សានៅប្រទេសអាហ្វហ្គានីស្ថានដែលជាស្រុកកំណើតរបស់ខ្លួនកាលពី៤ទសវត្សរ៍មុន។
មន្ត្រីប៉ូលិសម្នាក់បាននិយាយថា ក្រុមអ្នកវាយប្រហារបានបើកការបាញ់ប្រហារពីលើម៉ូតូមួយគ្រឿងក្រោយពីបានសុំឲ្យរថយន្តមួយគ្រឿងឈប់នៅតាមផ្លូវរួចហើយ។ មន្ត្រីប៉ូលិសបានបញ្ជាក់ថា ក្រុមអ្នកវាយប្រហារបានបាញ់សម្លាប់បុរសចំនួន៥នាក់ដែលកំពុងធ្វើដំណើរទៅលក់ដូរបន្លែនៅផ្សារមួយកន្លែងបន្ទាប់មកក្រុមខ្មាន់កាំភ្លើងបានរត់គេចខ្លួន ហើយមកដល់ពេលនេះមិនទាន់មានក្រុមណាមួយអះអាងទទួលខុសត្រូវចំពោះការបាញ់ប្រហារនេះនៅឡើយទេ៕
រាជធានីភ្នំពេញ ៖ យុវជនម្នាក់ដែលរំលោភ និងសម្លាប់ក្មេងស្រីអាយុ១០ឆ្នាំ រួចបោះសពចោលក្នុងទឹកទន្លេនៅកោះដាច់ ត្រូវបានសាលាដំបូងរាជធានីភ្នំពេញសម្រេចផ្តន្ទាទោសដាក់ពន្ធនាគាររយៈពេល១៥ឆ្នាំ និងបង្គាប់ឲ្យសងសំណងជាប្រាក់ទៅគ្រួសារជនរងគ្រោះចំនួន៨០លានរៀល ក្រោមបទចោទ «ឃាតកម្មមានស្ថានទម្ងន់ទោស តាមមាត្រា២០២ នៃក្រមព្រហ្មទណ្ឌ» ។ ការប្រកាសសាលក្រមនេះធ្វើឡើងកាលពីម្សិលមិញ។
ជនជាប់ចោទឈ្មោះ ហ៊ន សុខហេង ភេទប្រុស អាយុ១៧ឆ្នាំ មុខរបរសិស្សថ្នាក់ទី១០ នៅវិទ្យាល័យ ប៊ុន រ៉ានី ហ៊ុន សែនកោះដាច់។ មុនពេលត្រូវចាប់ខ្លួន រស់នៅភូមិរនៈ សង្កាត់កោះដាច់ ខណ្ឌជ្រោយចង្វារាជធានីភ្នំពេញ។ ដោយឡែក ជនរងគ្រោះមានឈ្មោះ ឌ.ត អាយុ១០ឆ្នាំ ជាសិស្សថ្នាក់ទី៣ខ នៃសាលាបឋមសិក្សាសម្តេចឪ រស់នៅជាមួយឪពុកម្តាយភូមិកោះដាច់ សង្កាត់កោះដាច់ ខណ្ឌជ្រោយចង្វា។
សូមរម្លឹកថា កាលពីល្ងាចថ្ងៃទី១ ខែមីនា ឆ្នាំ២០១៧ ខណៈដែលជនរងគ្រោះដើរមកពីសាលារៀន សំដៅទៅផ្ទះម្នាក់ឯង លុះដល់ចំណុចកើតហេតុខាងលើ ជនជាប់ចោទបានហៅជនរងគ្រោះ មកជិះម៉ូតូជាមួយ រួចឌុបជនរងគ្រោះ ទៅច្រាំងទន្លេជាកន្លែងស្ងាត់ ហើយសុំជនរងគ្រោះរួមភេទ ប៉ុន្ដែជនរងគ្រោះមិនព្រម ពេលនោះ ជនជាប់ចោទបានចាប់ក្រៀកឱបជនរងគ្រោះផ្ដួលទៅលើដី តែជនរងគ្រោះបានរើបំរាស់រួច ក៏រត់ចេញពីជនជាប់ចោទ។ ដោយខ្លាចជនរងគ្រោះនិយាយប្រាប់ឪពុកម្ដាយ ទើបជនជាប់ចោទបានដេញតាមចាប់ជនរងគ្រោះបាន រួចចាប់ច្របាច់ក និងអូសទៅច្រមុជទឹកសម្លាប់ចោលក្នុងទន្លេតែម្តង។ ចំណែកសពក្មេងស្រីរងគ្រោះខាងលើត្រូវបានប្រជាពលរដ្ឋប្រទះ អណ្តែកក្នុងទន្លេ នៅចំណុចភូមិចុះកោះ សង្កាត់កោះដាច់ ខណ្ឌជ្រោយចង្វា កាលពីព្រឹកថ្ងៃទី២ ខែមីនា ឆ្នាំ២០១៧កន្លងទៅ៕
ដាម៉ាស ៖ អង្គការឃ្លាំមើលសិទ្ធិមនុស្សស៊ីរី (SOHR) បានអះអាងថា ការវាយប្រហារតាមផ្លូវអាកាសដឹកនាំដោយសហរដ្ឋអាមេរិក នៅក្នុងទីក្រុងរ៉ាកា (Raqqa) របស់ប្រទេសស៊ីរីក្នុងអំឡុងពេល ០៤ថ្ងៃកន្លងទៅនេះបានបណ្តាលឲ្យជនស៊ីវិលយ៉ាងតិច២៥០នាក់ ស្លាប និងជាច្រើននាក់រងរបួស ។ នេះបើតាមទីភ្នាក់ងារព័ត៌មានចិន ស៊ីនហួរ។
អង្គការឃ្លាំមើលសិទ្ធិមនុស្សស៊ីរី (SOHR) ដែលមានមូលដ្ឋាននៅក្នុងចក្រភពអង់គ្លេសបានអះអាងទៀតថា ប្រតិបត្តិការតាមផ្លូវអាកាសធ្វើឡើងដោយក្រុមចម្រុះអន្តរជាតិ ដឹកនាំដោយអាមេរិក បានផ្តាច់យកអាយុជីវិតប្រជាជនស៊ីវិលស្លូតត្រង់ យ៉ាងហោចណាស់ចំនួន១,១១៧នាក់ ដោយក្នុងនោះរួមមានកុមារ២៦៧នាក់ និងស្ត្រី១៦៤នាក់ បើគិតចាប់តាំងតែពីខែមិថុនា ឆ្នាំ២០១៧។ SOHR បានឲ្យដឹងថា ៨៥ភាគរយ នៃទីក្រុង Raqqa ត្រូវបានវាយរំដោះចេញពីការគ្រប់គ្រងរបស់ក្រុមសកម្មប្រយុទ្ធ ISIS ហើយ៕
រាជធានីភ្នំពេញ ៖ កម្ពុជានឹងទទួលរងនូវប្រព័ន្ធសម្ពាធទាបនៅភាគខាងជើង ចាប់ពីថ្ងៃទី១១ ខែតុលា ដែលធ្វើឱ្យមានភ្លៀងធ្លាក់នៅទូទាំងប្រទេសចាប់ពីថ្ងៃទី១៣ ដល់២២ ខែតុលា ឆ្នាំ២០១៧។ នេះបើយោងតាមការព្យាករណ៍របស់ក្រសួងធនធានទឹក និងឧតុនិយម។ តាមការព្យាករណ៍ខាងលើបញ្ជាក់ថា នេះរាជធានី និងខេត្តជាច្រើនរបស់កម្ពុជា អាចប្រឈមនឹងជំនន់ទឹកភ្លៀង។ ចំណែកទឹកទន្លេក៏នឹងហក់ឡើងជាថ្មីផងដែរ៕
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីរសៀលថ្ងៃទី០៩ ខែតុលា ឆ្នាំ២០១៧នេះ បានប្រកាសជាផ្លូវការថា ក្រុមហ៊ុន សុខាអូតែល បានស្ម័គ្រចិត្តឈប់លក់សំបុត្រយកថ្លៃ ចូលឧទ្យានជាតិព្រះមុនីវង្ស «បូកគោ» និងរមណីយដ្ឋានបូកគោ ដែលនឹងចូលជាធរមាន ចាប់ពីវេលាម៉ោង ០០៖០០នាទី ថ្ងៃទី១៥ ខែតុលា ឆ្នាំ២០១៧តទៅ។
សម្តេចតេជោ ហ៊ុន សែន បានប្រកាសតាមរយៈ Facebook ផ្លូវការរបស់សម្តេចយ៉ាងដូច្នេះថា៖ «ទូលព្រះបង្គំ ខ្ញុំព្រះករុណាខ្ញុំ ក្នុងនាមរាជរដ្ឋាភិបាល មានសេចក្តីរីករាយ សូមជម្រាបជូនដល់សាធារណជនឱ្យបានជ្រាបថា ក្រុមហ៊ុន សុខា អូតែល បានស្ម័គ្រចិត្តឈប់លក់សំបុត្រយកថ្លៃចូលឧទ្យានជាតិព្រះមុនីវង្ស «បូកគោ» និងរមនីយដ្ឋានបូកគោ ដែលនឹងចូលជាធរមាន ចាប់ពីវេលាម៉ោង ០០:០០នាទី ថ្ងៃទី១៥ ខែតុលា ឆ្នាំ២០១៧ តទៅ។
ទូលព្រះបង្គំ ខ្ញុំព្រះករុណាខ្ញុំ យល់ថា ការឈប់លក់សំបុត្រយកថ្លៃចូលឧទ្យានជាតិនេះ នឹងជួយសម្រួលដល់បងប្អូនជនរួមជាតិ ក៏ដូចជាភ្ញៀវទេសចរណ៍ទាំងអស់បានឡើងទៅទស្សនាកម្សាន្ដនៅលើតំបន់រមណីយដ្ឋានប្រវត្តិសាស្ដ្រ ជាពិសេសបានទស្សនាទេសភាពដ៏ស្រស់ត្រកាលនិងសែនមនោរម្យ និងស្វែងយល់អំពីប្រភេទសត្វ និងរុក្ខជាតិដ៏មានតម្លៃ ដែលមាននៅក្នុងតំបន់ឧទ្យានជាតិ។ បងប្អូនជនរួមជាតិ នឹងមានភាពងាយស្រួលក្នុងការធ្វើដំណើរឡើងទៅកាន់តំបន់រមណីយដ្ឋានបូគោ ដើម្បីស្វែងយល់ពីហេដ្ឋារចនាសម្ព័ន្ធវប្បធម៌ និងសាសនា ក៏ដូចជាការគោរពប្រតិបត្តិពិធីប្រពៃណីសាសនានៅលើតំបន់ប្រវត្តិសាស្ដ្រនេះ។ លើសពីនេះទៅទៀត ទូលព្រះបង្គំ ខ្ញុំព្រះករុណាខ្ញុំសង្ឃឹមថា ដំណោះស្រាយនេះ ក៏នឹងជួយជំរុញឱ្យសកម្មភាពទេសចរណ៍នៅតំបន់ឧទ្យានជាតិព្រះមុនីវង្ស «បូគោ» ក៏ដូចជានៅរបៀងទេសចរណ៍ភាគខាងត្បូង ជាពិសេសតំបន់ឆ្នេរ មានការកើនឡើងបន្ថែមទៀត សំដៅរួមចំណែកដល់សេដ្ឋកិច្ចសង្គម និងជីវភាពរស់នៅរបស់ប្រជាសហគមន៍ក្នុងមូលដ្ឋាន»៕
រាជធានីភ្នំពេញ ៖ លោក គឹម សុខ អ្នកវិភាគនយោបាយ ដែលកំពុងជាប់ឃុំនៅពន្ធនាគារព្រៃសរ កាលពីថ្ងៃទី៦ ខែតុលានេះ បានសរសេរសំបុត្រមួយច្បាប់ ដោយទាមទារឲ្យដោះលែងលោក កឹម សុខា ប្រធានគណបក្សសង្គ្រោះជាតិ ។ ការទាមទាររបស់លោក គឹម សុខ នោះគឺវិធានការបង្អត់ អាហារ ( មិនហូបបាយ ) និងសាច់ ឬម្ហូបអាហារមានសាច់ នោះទេ។ ប៉ុន្តែលោកហូបទឹកបបរសជាមួយអំបិល និងបន្លែស្រុះទឹកក្ដៅជំនួសវិញ។ បើតាមលោក គឹម សុខ កូដកម្មនេះឈប់ទៅបាន លុះណាមានការដោះលែងលោក កឹម សុខា មានសេរីភាព និងមានឱកាសប្រកួតប្រជែងផ្នែកនយោបាយឡើងវិញ។
លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានសរសេរបែបចំអកទៅលោក គឹម សុខ វិញតាមបណ្តាញទំនាក់ទំនងសង្គម តេឡេក្រាម ដោយពន្យុះឲ្យលោក គឹម សុខ បន្តបង្អត់អាហារខ្លួនឯងរហូតទៅ មិនបាច់ផ្អាកទេ ហើយបើបង្អត់បបរទៀតក៏ជាការកាន់តែប្រសើរ។
លោកសុខ ឥសាន្ត បានលើកឡើងថា គឹម សុខ បានប្រើមធ្យោបាយបង្អត់បាយ ដើម្បីដាក់សម្ពាធមកលើរាជរដ្ឋាភិបាលនិងតុលាការឲ្យដោះលែងការចោទប្រកាន់ កឹម សុខា ពីទោសក្បត់ជាតិ និងដោះលែងឲ្យមានសេរីភាពឡើងវិញ។ បើ កឹម សុខាមិនត្រូវបានដោះលែងទេ គឹម សុខ នៅតែបង្អត់បាយខ្លួនឯងដដែលតរៀងទៅ ។
យ៉ាងណាក៏ដោយ អ្នកជំនាញសុខាភិបាលបានលើកឡើងថា ការធ្វើដូចលោក គឹម សុខ មិនហៅថា បង្អត់អាហារនោះទេ ព្រោះបើហុតទឹកបបរ ហូបបន្លែ ផ្លែឈើវាកាន់តែធ្វើឲ្យមនុស្សមានសុខភាពល្អទៅវិញទេ ៕
រាជធានីភ្នំពេញ ៖ ថ្លែងជាសាធារណកាលពីព្រឹកមិញនេះ សម្តេចនាយករដ្ឋមន្ត្រី ហ៊ុន សែន បានប្រកាសថា ចាប់ពីឆ្នាំ២០១៨តទៅ ស្ត្រីជាមន្ត្រីរាជការស៊ីវិល នគរបាល និងកងទ័ព នឹងទទួលបាន ប្រាក់៨០ម៉ឺនរៀល សម្រាប់ការឆ្លងទន្លេ សម្រាប់កូនមួយ ។ ចំណែកស្ត្រីសម្រាលបានកូនភ្លោះ២ទទួលបានប្រាក់១,៦០លានរៀល , កូនភ្លោះបីទទួលបានប្រាក់ ២,៤លានរៀល ។
សម្តេចបានបន្ថែមថា បច្ចុប្បន្នស្ត្រីក្នុងក្របខណ្ឌមន្ត្រីរាជការ ស៊ីវិល នគរបាល និងកងទ័ព មានសរុបប្រមាណ៩ម៉ឺននាក់។ តែក្នុងនោះស្ត្រីមាន លទ្ធភាពមានកូនមានប្រមាណតែ ១០,៨៤៤នាក់ ដែលក្នុងនោះមន្ត្រីរាជការស៊ីវិល មាន ១០,៣៦០នាក់ នគរបាលមានចំនួន ១៩៤ និងកងទ័ពមានចំនួន ២៥០នាក់។
សម្តេច ហ៊ុន សែន បានថ្លែងអះអាងថា ចាប់ពីឆ្នាំ២០១៨តទៅ ការឧបត្ថម្ភសម្រាប់ស្ត្រីឆ្លង ទន្លេផ្នែកកម្មករ និយោជិតត្រូវចំណាយប្រមាណ ១០លានដុល្លារ និងសម្រាប់ស្ត្រីជាមន្ត្រីរាជការ ស៊ីវិល និងកងកម្លាំងប្រដាប់អាវុធមានប្រមាណ២លានដុល្លារ ៕
ភ្នំពេញ ៖ នៅព្រឹកថ្ងៃទី៩ខែតុលាឆ្នាំ២០១៧លោក ឃឹម ប៉ុណ្ណ អនុប្រធានតុលាការកំពូល និងជាប្រធានក្រុមប្រឹក្សាជំនុំជម្រះតុលាការកំពូលបានប្រកាសសាដីកាសម្រេចតម្កល់ទោសអតីតឧត្ដមសេនីយ៍ឯកយោធា ឈឿន ចាន់ថន អាយុ៤១ឆ្នាំ ដាក់ពន្ធនាគារ១៥ឆ្នាំដដែលក្រោមការចោទប្រកាន់ពីបទ”រំលោភលើទំនុកចិត្ត , បំផ្លិចបំផ្លាញដោយចេតនា , គៃបំបាត់ដោយទុច្ចរិត , លក់ដូរនិងចែកចាយអាវុធ , បំផ្លិចបំផ្លាញនូវសម្ភារៈយោធាសម្រាប់បម្រើការប្រយុទ្ធនិងខ្វះស្មារតីទទួលខុសត្រូវក្នុងការដឹកនាំគ្រប់គ្រងអង្គភាព”ប្រព្រឹត្តនៅរាជធានីភ្នំពេញ ក្នុងឆ្នាំ២០០៧ តាមមាត្រា៦០១ មាត្រា៤៤៧ មាត្រា៣៩២នៃក្រមព្រហ្មទណ្ឌ មាត្រា២០នៃច្បាប់ស្ដីពីការគ្រប់គ្រងអាវុធជាតិផ្ទុះនិងគ្រាប់រំសេវ និង មាត្រា៩នៃក្រឹត្យច្បាប់លេខ០៤ឆ្នាំ១៩៨១ ។
កាលពីថ្ងៃទី២ខែតុលាឆ្នាំ២០១៧តុលាការកំពូល បានបើកសវនាការជំនុំជម្រះ ទោសអតីតឧត្ដមសេនីយ៍ឯកយោធា ឈឿន ចាន់ថន នាពេលសវនាការជនជាប់ចោទបានឆ្លើយបដិសេធថា ខ្លួនមិនបានប្រព្រឹត្តអ្វីដូចតុលាការយោធាចោទប្រកាន់នោះទេ ហើយសូមស្នើឲ្យតុលាការកំពូលដោះលែងឲ្យមានសេរីភាពវិញ។គួរបញ្ជាក់ថា អតីតឧត្តមសេនីយ៍ឯកឈឿន ចាន់ថន ហៅម៉ៅ មេបញ្ជាការកងអង្គរក្សសម្តេចអគ្គមហាធម្មពោធិសាលជា ស៊ីម បានត្រូវកម្លាំងកងរាជអាវុធហត្ថចាប់ខ្លួន កាលពីព្រឹកព្រលឹមថ្ងៃទី១៣ ខែសីហា ឆ្នាំ២០១១ រួមជាមួយអង្គរក្ស៣នាក់ផ្សេងទៀតនៅក្នុងភូមិគ្រឹះតម្លៃជិត១លានដុល្លារ លេខ៦៥ ផ្លូវលេខ៩៥ សង្កាត់បឹងកេងកងទី៣ ខណ្ឌចំការមន ។
ការចាប់ខ្លួនគួរឱ្យភ្ញាក់ផ្អើលនេះ គឺបន្ទាប់ពីមានព្រះរាជក្រឹត្យដកហូតឋានន្តរស័ក្តិ និងតួនាទីដែលឡាយព្រះហស្តលេខាដោយព្រះមហាក្សត្រកាលពីថ្ងៃទី១២ ខែសីហា ឆ្នាំ២០១១មានន័យថា ការចាប់ខ្លួននេះធ្វើបន្ទាន់តែម្តង។ ជាមួយគ្នានេះ ក៏មានអនុក្រឹត្យតែងតាំងលោកឧត្តមសេនីយ៍ឯកយឹម លាង ឱ្យទទួលតំណែងជាមេបញ្ជាការកងអង្គរក្សជំនួសវិញ៕
វ៉ាស៊ីនតោន ៖ សារព័ត៌មាន Channel News Asia ចេញផ្សាយនៅព្រឹកថ្ងៃចន្ទនេះបានឲ្យដឹងថា គ្រោះរញ្ជួយដីកំរិត ៦.៦រ៉ិចទ័រ បានវាយប្រហារមកលើតំបន់ឆ្នេរភាគខាងលិចនៃរដ្ឋ អាឡាស្កា (Alaska) ដែលស្ថិតនៅភាគពាយ័ព្យសហរដ្ឋអាមេរិក។
វិទ្យាស្ថានស្ទាបស្ទង់ភូមិសាស្ត្រអាមេរិក (USGS) រញ្ជួយដីមានជំរៅញ័ររញ្ជួយ១១១.៨គីឡូម៉ែត្រ ពីក្នុងស្រទាប់ដី និងមានចំងាយ ៦០គីឡូម៉ែត្រ ពីកោះបាល់ដឺ (Buldir) នៃទីប្រជុំកោះ អាលឿធាន (Aleutian) ដែលមានប្រជាជន ៨,០០០នាក់ កំពុងរស់នៅ។ ប៉ុន្តែភ្លាមៗបែបនេះ មិនទាន់មានសេចក្ដីរាយការណ៍ពីការខូចខាត ឬជនរងគ្រោះ និងមិនមានសេចក្ដីព្រមានណាមួយថា អាចកើតមានរលកយក្សស៊ូណាមិឡើយ៕
ប៉េកាំង ៖ ទីភ្នាក់ងារអង្កេតជាតិបាននិយាយពីថ្ងៃអាទិត្យថា អាកាសធាតុត្រជាក់បានចាប់ផ្ដើមវាយប្រហារផ្នែកភាគច្រើននៅភាគខាងជើង និងពាយព្យនៃប្រទេសចិនដោយធ្វើឲ្យសីតុណ្ហភាពចុះត្រជាក់ខ្លាំង និងមានភ្លៀងធ្លាក់ផងដែរ។
ទីភ្នាក់ងារឧតុនិយមជាតិនិយាយថា តំបន់មួយចំនួនស្ថិតនៅភាគខាងជើងប្រទេសចិនដូចជាខេត្តស៊ីនជាំង ខេត្តសានស៊ី និងហ្គានស៊ូព្រមទាំងនៅតំបន់ស្វយ័តម៉ុងហ្គោលីនឹងមានសីតុណ្ហភាពចុះត្រជាក់រហូតដល់ជាង១២អង្សាចាប់ពីថ្ងៃអាទិត្យរហូតដល់ថ្ងៃអង្គារ។ ទីភ្នាក់ងារឧតុនិយមនេះបានបន្ថែមទៀតថា តំបន់មួយចំនួនរួមទាំងខេត្តឆឹងហៃ (Qinghai) នៅភាគពាយព្យប្រទេសចិននឹងមានភ្លៀងធ្លាក់ជាបន្តបន្ទាប់ផងដែរ។
ទីភ្នាក់ងារនេះបានបញ្ជាក់ថា ចាប់ពីថ្ងៃអាទិត្យដល់ថ្ងៃពុធសីតុណ្ហភាពចុះត្រជាក់នឹងបន្តរាលដាលទៅភាគខាងត្បូងប្រទេសដោយធ្វើឲ្យសីតុណ្ហភាពចុះត្រជាក់ខ្លាំងនៅតំបន់ភាគច្រើនស្ថិតនៅភាគកណ្ដាលនិងខាងកើតនៃប្រទេសចិនហើយនឹងធ្វើឲ្យប៉ះពាល់ចរាចរណ៍នៅទីនោះ៕
ហ្គាណា ៖ មន្ត្រីអាជ្ញាធរបាននិយាយពីថ្ងៃម្សិលមិញនេះថា រថយន្តដឹកប្រេងមួយគ្រឿងបានផ្ទុះឆេះស្ថានីយប្រេងមួយកន្លែងបន្ទាប់មកមានការផ្ទុះមួយទៀតធ្វើឲ្យមនុស្សយ៉ាងតិច៧នាក់ស្លាប់ និង១៣២នាក់ទៀតរងរបួសនៅជាយទីក្រុងអាក្រា នៅប្រទេសហ្គាណា។
អនុរដ្ឋមន្ត្រីក្រសួងព័ត៌មាននៅប្រទេសហ្គាណានិយាយថា រថយន្តដឹកប្រេងនេះបានផ្ទុះនៅជិតស្ថានីយប្រេងដែលរងការឆាបឆេះដោយសារការផ្ទុះរថយន្តនេះ។ អនុរដ្ឋមន្ត្រីរូបនេះបានបញ្ជាក់ថា អគ្គិភ័យដោយសារការផ្ទុះលើកទី១ត្រូវបានគ្រប់គ្រងបានហើយ ប៉ុន្តែសេវាពន្លត់អគ្គិភ័យនៅកំពុងព្យាយាមគ្រប់គ្រងការផ្ទុះឆេះជាលើកទី២ទៀត។
គួរបញ្ជាក់ថា ហ្គាណាដែលជាប្រទេសផលិតឧស្ម័ន និងប្រេងមួយនោះបានទទួលរងគ្រោះថ្នាក់មួយចំនួនក្នុងពេលថ្មីៗនេះរួមទាំងការផ្ទុះមួយបានកើតឡើងនៅឆ្នាំ២០១៥ដែលបានសម្លាប់ចំនួនប្រហែល១០០នាក់ផងដែរ៕
ប៉េកាំង ៖ ទីភ្នាក់ងារសារព័ត៌មាន Reuters បានផ្សាយថា គិតចាប់តាំងពី ឆ្នាំ២០១៣មក មន្ត្រីជាន់ទាបនៅក្នុងប្រទេសចិន ប្រហែលជា ១.៣៤លាននាក់ ត្រូវបានដាក់ទោសទណ្ឌ នៅក្រោមក្របខណ្ឌនៃយុទ្ធនាការប្រឆាំងអំពើពុករលួយដឹកនាំដោយប្រធានាធិបតីចិន លោក ស៊ី ជិនពីង។
គណៈកម្មការមជ្ឈិមសម្រាប់អធិការកិច្ចវិន័យ (CCDI) បាននិយាយថា អ្នកត្រូវដាក់ទោសសម្រាប់អំពើពុករលួយ កាលពីឆ្នាំ២០១៣ ក្នុងនោះរួមមានទាំងមន្ត្រីថ្នាក់ភូមិ ៦៤៨,០០០នាក់ និងបទឧក្រិដ្ឋភាគច្រើន ដែលពួកគេបានប្រព្រឹត្តគឺមាន ជាប់ពាក់ព័ន្ធនឹងអំពើពុករលួយតូចតាច។ ប៉ុន្តែ CCDI បញ្ជាក់ថា យុទ្ធនាការប្រយុទ្ធប្រឆាំងនឹងអំពើពុករលួយមានគោលដៅច្រើនតែទៅលើមន្ត្រីថ្នាក់ភូមិ និងស្រុក ការតាមប្រមាញ់ ឬក៏ការកំណត់គោលលើមន្ត្រីជាន់ខ្ពស់បែរជាធ្លាក់ចុះទៅវិញ។
ការលើកឡើងខាងលើរបស់ CCDI ធ្វើឡើងនៅមុនពេលគណបក្សកុម្មុយនីស្ដចិន នឹងបើកសមាជបក្សលើកទី១៩ នៅចុងខែតុលានេះ ដែលជាឱកាសឱ្យលោក ស៊ី ជីពីង ពង្រឹងអំណាច និងគោលនយោបាយរបស់លោក ជាពិសេសគឺយុទ្ធនាការប្រឆាំងនឹងអំពើពុករលួយនេះតែម្ដង៕
កណ្តាល ៖ ថ្មីៗនេះ គេសង្កេតឃើញមានករណីស្ត្រីមានផ្ទៃពោះស្លាប់ជាបន្តបន្ទាប់ ពេលចូលទៅសម្រាលកូននៅក្នុងមន្ទីរសម្ភពនានា ដែលករណីនេះ ត្រូវបានមហាជននិយាយថា បណ្តាលមកពីការធ្វេសប្រហែស របស់ក្រុមគ្រូពេទ្យ ពិសេសគ្មានវិជ្ជាជីវៈបច្ចេកទេសច្បាស់លាស់ ទើបបណ្តាលឱ្យមានករណីនេះកើតឡើង ។
ជាក់ស្តែង កាលពីវេលាម៉ោង ជាង៧យប់ ថ្ងៃទី៧ ខែតុលា ឆ្នាំ២០១៧ ស្ត្រីមានផ្ទៃពោះម្នាក់ បានទៅសម្រាលកូននៅឯមន្ទីរ «សម្រាកព្យាបាល និងសម្ភព ម៉ានី » ក្រុងតាខ្មៅ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល ហើយបានបែកទឹកភ្លោះស្លាប់ភ្លាមៗចោលកូនដែលទើបនឹងកើត ។
ស្ត្រីរងគ្រោះមានឈ្មោះ រឿន ដានី ភេទស្រី អាយុ ៣១ឆ្នាំ ជនជាតិខ្មែរ មុខរបរធើ្វធៀបការ-មានស្រុកកំណើតភូមិកំពង់ព្រឹង ឃុំសិត្បូ ស្រុកស្អាង ខេត្តកណ្តាល ។
បើតាមលោក ស កែវពិសិដ្ឋ អធិការក្រុងតាខ្មៅ បានប្រាប់ឲ្យដឹងថា ករណីស្ត្រីម្នាក់ទៅសម្រាលកូននៅមន្ទីរសំរាកព្យាបាល និងសម្ភព ម៉ានី កាលពីយប់ថ្ងៃទី៧ តុលានោះ គឺពិតជាបានស្លាប់នៅក្នុងមន្ទីរសំរាកពិតមែន ដោយពេលភ្លាមៗនោះ លោកក៏បញ្ជាឲ្យកម្លាំងជំនាញ ចុះទៅដល់កន្លែងកើតហេតុ ដើម្បីធ្វើការសាកសួរ និងចាត់ការទៅតាមជំនាញរបស់នគរបាលយុត្តិធម៍ ។
លោកអធិការបានបញ្ជាក់ថា៖ បន្ទាប់ពីធ្វើការសាកសួររួចមក ជនរងគ្រោះស្លាប់ ដោយសារបែកទឹកភ្លោះ តែចំពោះករណីនេះ លោកនៅមិនទាន់អាចសន្និដ្ឋានបានទេថា ជនរងគ្រោះស្លាប់ដោយអាការ:នេះ ឬក៍ស្លាប់ដោយសារការធ្វេសប្រហែសរបស់គ្រូពេទ្យ ដោយសារកិច្ចការនេះ ជាជំនាញរបស់មន្ទីរសុខាភិបាល។ ករណីនេះលោកបានរាយការណ៍ទៅស្ថាបន័តុលាការហើយ ក្នុងនោះលោកក៏កំពុងឲ្យកម្លាំងជំនាញកសាងសំណុំរឿងបន្តផងដែរ។
តាមការបំភ្លឺរបស់ម្តាយជនរងគ្រោះ ឈោះ្មឆាយ សោភណ្ឌ ភេទស្រី អាយុ៥៥ឆ្នាំ មុខរបរមេផ្ទះ បានឲ្យដឹងថា នៅថ្ងៃកើតហេតុខាងលើ ជនរងគ្រោះ បានប្រាប់ម្តាយថា ឈឺពោះ គាត់ក៏បានរៀបចំឥវ៉ាន់ ដើម្បីមកសម្រាលកូន នៅមន្ទីរពេទ្យសម្ពព ម៉ានី ពេលមកដល់គ្រូពេទ្យក៏បានយកជនរងគ្រោះ ចូលក្នុងបន្ទប់ លោកគ្រូពេទ្យក៏បានដាក់សេរ៉ូមឲ្យជនរងគ្រោះ បានប្រហែលមួយសន្ទុះ ជនរងគ្រោះក៏បានឈឺពោះបែកទឹកភ្លោះ ហើយគ្រូពេទ្យក៏បានចាប់ផ្តើមយកជនរងគ្រោះ ឡើងលើគ្រែដើម្បីសម្រាលកូន ដោយជនរងគ្រោះខំប្រឹងបង្កើតកូនចេញមក ក៏សន្លប់នៅពេលនោះ គ្រូពេទ្យក៏ជួយសង្គ្រោះទារករួចហើយ ក៏ជួយសង្គ្រោះជនរងគ្រោះ ប៉ុន្តែធ្លាក់ឈាមច្រើន ដោយជនរងគ្រោះមានអារម្មណ៍ថប់ទ្រូង គ្រូពេទ្យក៏បានជួយសង្គ្រោះសង្កត់ទ្រូង ប៉ុន្តែគ្រូពេទ្យមិនអាចជួយសង្គ្រោះជនរងគ្រោះបាន ក៏ដាច់ខ្យល់ស្លាប់បាត់តែម្តង។
ពាក់ព័ន្ធនឹងករណីខាងលើនេះ អ្នកយកព័ត៌មាន បានព្យាយាមសុំការបំភ្លឺពីប្រធានមន្ទីរសំរាកព្យាបាល និងសម្ភព ម៉ានី នេះដែរ ប៉ុន្តែមិនអាចទំនាក់ទំនងបានទេ កាលពីព្រឹកថ្ងៃទី៨ តុលា ឆ្នាំ២០១៧ នេះ។
សូមរំលឹកថា៖ មន្ទីរសំរាកព្យាបាល និងសម្ភព នៅក្រុងតាខ្មៅ គឺកើតមានករណី ស្ត្រីសម្រាលកូនស្លាប់ញឹកញាប់ណាស់ ប្រជាពលរដ្ឋសំណូមពរឱ្យ ក្រសួងសុខាភិបាល និងស្ថាបន័ពាក់ពន្ធ័មេត្តាពិនិត្យ និងជួយចាត់វិធានការទៅលើគ្រូពេទ្យ ដែលគ្មានជំនាញច្បាស់លាស់ផង ។ ពួកគាត់កំពុងរង់ចាំមើលថា តើស្ថាប័ន័តុលាការ នឹងមានវិធានការបែបណាទៅលើករណីនេះ ៕
អ្នកនាំពាក្សក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានបញ្ជាក់ថា សហរដ្ឋអាមេរិក និងសហគមអឺរ៉ុប ដែលជាប្រទេសបញ្ជាទិញទំនិញដ៏ធំពីកម្ពុជាបានចាត់ទុកបញ្ហា បច្ចេកទេសជារឿងបច្ចេកទេសនយោបាយជារឿងនយោបាយ មិនពាក់ព័ន្ធជាមួយគ្នានោះទេ ។
អ្នកនាំពាក្យរូបនេះ បានអោយដឹងយ៉ាងដូច្នេះបន្ទាប់ពី លោក អ៊ិត សំហេង រដ្ឋមន្ត្រីក្រសួង ការងារ និងបណ្តុះបណ្តាលវិជ្ជាជីវៈ បានទទួលជួបជាមួយឯកឧត្តម William A. Heidt ឯកអគ្គរដ្ឋ ទូតអាមេរិកប្រចាំកម្ពុជា និងឯកឧត្តមGeorge Edgar ឯកអគ្គរដ្ឋទូតសហភាពអ៊ឺរ៉ុប ប្រចាំនៅកម្ពុជា ព្រមគ្នាតែម្តង ដើម្បីពិភាក្សាអំពីកិច្ចសហប្រតិបត្តិការលើវិស័យការងារ កាលពីរសៀល ថ្ងៃទី៦ ខែ តុលា ឆ្នាំ២០១៧ នេះ។
ក្នុងការជួបពិភាក្សានេះឯកអគ្គរដ្ឋទូតទាំង២រូប បានសាទរចំពោះកម្ពុជា ដែលទើបសម្រេច បានប្រាក់ឈ្នួលអប្បបរមាឆ្នាំ២០១៨ចំនួន១៧០ដុល្លារអាមេរិក ប្រកបដោយរលូន និងកុងសង់ ស៊ីសគ្នា ពីគ្រប់ភាគីនាពេលថ្មីៗនេះ។ឯកអគ្គរដ្ឋទូតទាំង២ ក៏បានលើកទឹកចិត្តឱ្យកម្ពុជា បន្តប្រកាន់ ភ្ជាប់នូវយន្តការត្រីភាគី ការសន្ទនាសង្គម ការគោរពលក្ខខណ្ឌការងារ ការគោរពសិទ្ធិសេរីភាព អង្គការវិជ្ជាជីវៈ និងការដោះស្រាយបញ្ហាទំនាក់ទំនងវិជ្ជាជីវៈ និងវិវាទការងារឱ្យបានលឿន និងមាន តម្លាភាព។
ឯកអគ្គរដ្ឋទូតទាំងពីរបានបញ្ជាក់ថា សហរដ្ឋអាមេរិក និងសហភាពអ៊ឺរ៉ុបនឹងមិនភ្ជាប់កិច្ចខិតខំ ប្រឹងប្រែងរបស់កម្ពុជា ក្នុងការគោរពលក្ខខណ្ឌការងារ ទៅនឹងភាពតានតឹងផ្នែកផ្សេងទៀតឡើយ។ សហរដ្ឋអាមេរិក និងសហភាពអ៊ឺរ៉ុបនឹងបន្តបើកទីផ្សាររបស់ខ្លួនដល់កម្ពុជា និងបង្កើនការបញ្ជា ទិញ ទំនិញពីកម្ពុជា។
ជាការឆ្លើយតប លោក អ៊ិត សំហេង បានថ្លែងអំណរគុណដល់ប្រទេសទាំង២ ដែលបាន រួម ចំណែកក្នុងការលើកកម្ពស់លក្ខខណ្ឌការងារនៅកម្ពុជា ព្រមទាំងធានាថាកម្ពុជានឹងបន្ត គោល នយោបាយផ្សារភ្ជាប់ពាណិជ្ជកម្មទៅនឹងលក្ខខណ្ឌការងារ ដោយបន្តសហការជាមួយ គម្រោង រោង ចក្រកាន់តែប្រសើរ ជាមួយអង្គការអន្តរជាតិខាងការងារ (ILO-BFC) អង្គការ GIZ និងអង្គការ អន្តរ ជាតិ ផ្សេងទៀត ដែលចុះបញ្ជីការត្រឹមត្រូវតាមច្បាប់នៅកម្ពុជា៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
